म. टा. प्रतिनिधी, कोल्हापूर

कोल्हापुरातील उमेदवार खासदार धनंजय महाडिक आणि हातकणंगलेतील उमेदवार खासदार शेट्टी यांच्या प्रचार मेळाव्यात आघाडीच्या नेत्यांनी पालकमंत्र्यांना टीकेचे लक्ष्य केले. 'लोकसभा निवडणुकीत आघाडीच्या दोन्ही उमेदवारांना निवडून आणून लोक पालकमंत्र्यांनाच जिल्ह्यातून हद्दपार करतील,' अशी टीका केली. तर खासदार राजू शेट्टी यांनी आरोपांना उत्तर देताना बिंदू चौकात खुल्या चर्चेला या असे आव्हान दिले. शरद पवार यांच्या उपस्थितीत काँग्रेस, राष्ट्रवादी काँग्रेस, स्वाभिमानी शेतकरी संघटना, शेकाप, रिपाई, दलित महासंघ आणि मित्रपक्षाच्या प्रमुख कार्यकर्त्यांच्या मेळावा झाला.

खासदार शेट्टी म्हणाले, 'महसूलपासून कृषी खात्यापर्यंत आणि यूएलसी जमिनीपासून ते इतर कामातील गैरकारभाराचा बिंदू चौकात पंचनामा सुरू केला तर पालकमंत्री चंद्रकांत पाटील यांना पळता भुई थोडी होईल. त्यांच्या कामकाजाचे पुरावे जमा होत आहेत. त्यांनी खुल्या चर्चेचे आव्हान स्वीकारावे, बिंदू चौकात कुस्ती होऊन जाऊ द्या. पाटील यांनी रस्ते विकास कामासाठी केंद्र सरकारकडून किती पैसे आणले हे एकदा जाहीर करावे. सध्या सुरू असलेली महामार्गाची कामे खासगीकरणातून आहेत. यामध्ये त्यांचे कर्तृत्व काय? कोल्हापूर-सांगली रस्त्यासाठी २० कोटी रुपये निधी दिल्याचा डांगोरा पिटता, तर ही रक्कम कुठे, कसे खर्च केला याचा हिशोब द्या. आमच्यासारख्या चळवळ्या माणसाच्या नादाला लागू नका, नाही तर अंगलट येईल.'

काँग्रेसचे प्रदेश उपाध्यक्ष पी. एन. पाटील म्हणाले, 'पंतप्रधान मोदी हे भावनिक राजकारण करून तरुणांची माथी भडकावत आहेत. ५६ इंच छातीचा टेंभा मिरवणारे व स्वत:ला चौकीदार म्हणवून घेणारे मोदी पुलवामा हल्ल्यावेळी झोपले होते काय.'

याप्रसंगी काँग्रेसच्या महिला आघाडीच्या सरला पाटील, जनसुराज्यचे प्रा. जयंत पाटील, आरपीआय गवई गटाचे जिल्हाध्यक्ष प्रा. विश्वास देशमुख, आरपीआय कवाडे गटाचे जिल्हाध्यक्ष दगडू भास्कर यांची भाषणे झाली. राष्ट्रवादीचे जिल्हाध्यक्ष ए. वाय. पाटील यांनी स्वागत केले.

ते दिवस गेले आत्ता...

'पवार यांच्यासोबत वीस वर्ष राहिलेल्या माजी खासदार सदाशिवराव मंडलिक यांचे चिरंजीव आज प्रतिगामी शक्तींसोबत संगत करत आहेत. वडील खासदार होते म्हणून मुलगा खासदार बनण्याचे दिवस आता संपले आहेत. कोल्हापुरातील नागरिक कर्तृत्व व विकासात्मक राजकारणाला साथ देतात' विश्वास खासदार धनंजय महाडिक यांनी व्यक्त केला.

तर तुमच्याविरुद्ध संघर्ष

खासगीकरणातून होणाऱ्या रस्त्याचे परिणाम भविष्यात भोगावे लागणार आहेत. कारण पुन्हा एकदा टोलचा संघर्ष निर्माण होणार आहे. त्यावेळी भाजपवाले सत्तेत नसतील, तेव्हा संघर्ष आता व्यासपीठावर असलेल्या काँग्रेस, राष्ट्रवादीच्या नेत्यासोबतच करावा लागणार असल्याचा इशाराच शेट्टी यांनी दिला.

चंद्रकांत पाटलांची उंची काय?

आमदार हसन मुश्रीफ म्हणाले, 'चंद्रकात पाटील यांनी आयुष्यात एकदाही ग्रामपंचायतीची निवडणूक लढवली नाही. काय उंची आहे या माणसाची? त्यांनी साठ वर्षात एकही निवडणूक न हरलेल्या शरद पवार यांच्यावर टीका करावी हे हास्यास्पद आहे. येत्या निवडणुकीत कोणत्याही परिस्थितीत कोल्हापूर आणि हातकणंगलेतून आघाडीचे दोन्ही खासदार निवडून आणू. तेव्हा पालकमंत्र्यांना त्यांची जागा कळेल.'

एवढी संपत्ती आली कुठून?

स्वाभिमानी संघटनेचे प्रा. जालिंदर पाटील म्हणाले, 'यशवंतराव चव्हाण, वसंतदादा पाटील यांच्यानंतर राज्याच्या राजकारण, समाजकारण, सहकार क्षेत्रातील धुरीण म्हणून शरद पवार यांच्याकडे पाहिले जाते. मात्र पालकमंत्री स्वत:ची उंची न मोजता पवारांचे राजकारण संपविण्याची भाषा करत आहेत. ते राजकारणात नवखे आहेत. पवारांना राजकारणातून संपविणारा कुणी जन्माला आला नाही, उलट लोकसभा निवडणुकीनंतर लोक पालकमंत्र्यांनाच जिल्ह्यातून हद्दपार करतील. कोल्हापूर जिल्हा विकत घेण्याची भाषा करण्याइतकी संपत्ती त्यांच्याकडे कुठून आली? कालपरवापर्यंत ते दुसऱ्याकडे पैसे मागत होते.'

'लागलं तर ऑपरेशन करू'

आमदार सतेज पाटील व खासदार महाडिकांतील संघर्षावरुन बोलताना काँग्रेसचे जिल्हाध्यक्ष प्रकाश आवाडे म्हणाले, 'मतदारसंघात वावड्या खूप आहेत. सगळे काही आबादीआबाद नाही. काही लोक नाराज आहेत. त्यांना समजाविण्याचा प्रयत्न सुरू आहे. जखम खोल असून दुरुस्ती करावी लागेल. चांगले औषध देऊ, उपचारही करू' असे म्हणताच त्यावर आमदार मुश्रीफ यांनी 'लागलं तर ऑपरेशन करू' असे म्हणताच नेते मंडळींना हसू आवरले नाही. तेव्हा आवाडे यांनी ऑपरेशन करायची गरज भासणार नाही. येत्या निवडणुकीत कोल्हापूर, हातकणंगले आणि सांगली या ठिकाणी आघाडीचे उमेदवार विजयी होतील'अशी ग्वाही दिली.

सोलापुरातील १४० गावांत टंचाई

सोलापूर :

सोलापूर जिल्ह्यातील पाणीटंचाई अधिक तीव्र झाली आहे. प्रशासनाकडून १४० गावांतील तीन लाख लोकांना १५८ टँकरद्वारे पाणीपुरवठा करण्यात येत आहे.

यंदा वरुणराजाने पाठ फिरविल्याने जिल्ह्यात दुष्काळाची दाहकता वाढली आहे. पिण्याचे पाणी आणि जनावरांच्या चाऱ्याचा प्रश्न गंभीर झाला आहे. या दुष्काळाची सर्वाधिक झळ ग्रामीण जनतेला बसली आहे. अनेक गावांमध्ये व वाड्या वस्त्यांवर पिण्याच्या पाण्यासाठी नागरिकांची भटकंती सुरू आहे. नेते आणि अधिकारी लोकसभा निवडणुकीत दंग असल्याने दुष्काळाच्या प्रश्‍नांकडे दुर्लक्ष झाले आहे. अशाही परिस्थितीत जिल्हाधिकारी डॉ. राजेंद्र भोसले यांच्या प्रयत्नाने पाणीटंचाई असलेल्या गावांमध्ये प्राधान्याने टँकर सुरू केले आहेत. मागणीनुसार टँकर व अधिक खेपा देण्याची प्रक्रिया सुरू करण्यात आली आहे. सध्या १४० गावात १५८ पाण्याचे टँकर सुरू करण्यात आले आहेत. या गावांमध्ये ३ लाख ७ हजार ३३९ बाधित लोकसंख्या असून, १ हजार ३३ वाड्या-वस्त्यांमध्ये याद्वारे पाणीपुरवठा केला जात आहे. या टँकरमध्ये १८ सरकारी तर १४० खासगी टँकरचा समावेश आहे. यामध्ये सर्वाधिक ५० टँकर मंगळवेढा तालुक्यात, सांगोला तालुक्यात ३१ आणि करमाळ्यात २१ टँकर सुरू आहेत. या टँकरला जीपीएस प्रणाली लावण्यात आली आहे. या व्यतिरिक्त या बाधित गावांमध्ये ३० विंधन विहिरींना मंजुरी देण्यात आली असून, ४१ विहिरी व बोर अधिग्रहण करण्यात आल्याची माहिती जिल्हा टंचाई निवारण कक्षातून देण्यात आली.

म. टा. प्रतिनिधी, कोल्हापूर

लोकसभा निवडणुकीसाठी उमेदवारी अर्ज भरण्याची प्रक्रिया सुरू आहे. मंगळवारी सहाव्या दिवशी सहा जणांनी आठ अर्ज दाखल केले. खासदार धनंजय महाडिक यांनी पुन्हा दोन तर महाराष्ट्र क्रांती सेनेचे अध्यक्ष सुरेश पाटील, शेतकरी संगटनेचे रघुनाथ पाटील यांच्यासह सहा जणांनी उमेदवारी अर्ज दाखल केले.

कोल्हापूर लोकसभा मतदारसंघासाठी निवडणूक निर्णय अधिकारी दौलत देसाई यांच्याकडे बळीराजा पार्टीकडून किसन काटकर यांनी अर्ज दाखल केला. खासदार महाडिक यांचे दोन अर्ज सूचकांनी आणून दिले. 'हातकणंगले'साठी अपक्ष म्हणून संग्रामसिंह गायकवाड, विजय चौगुले, सुरेश पाटील, शेतकरी संघटनेचे नेते रघुनाथ पाटील यांनी निवडणूक निर्णय अधिकारी नंदकुमार काटकर यांच्याकडे उमेदवारी अर्ज दाखल केला. अर्ज भरल्यानंतर पत्रकारांशी बोलताना महाराष्ट्र्र क्रांती सेनेचे पाटील म्हणाले, सर्वच राजकीय पक्ष मराठा समाजाचे प्रश्न सोडवण्यात अपयशी झाले आहेत. समाजाला न्याय मिळालेला नाही. यामुळे राज्यातील १५ लोकसभा मतदारसंघात उमेदवार रिंगणात उतरवले आहेत.

मालमत्ता

रघुनाथ पाटील : एकूण २ कोटी संपत्ती, कर्ज : १७ लाख, गुन्हे : ९

सुरेश पाटील : ४ कोटी, ४५ लाख ८ हजार ८१३

संग्राम गायकवाड : जंगम मालमत्ता : ४ लाख ९० हजार १५५

कराड :

जम्मू-काश्मिरमधील पुलवामा येथे सीआरपीएफच्या ताफ्यावर नुकत्याच झालेल्या दहशतवादी हल्ल्यात ४४ जवान शहीद झाले होते. यामध्ये महाराष्ट्रातील बुलढाणा जिल्ह्यातील नितीन शिवाजी राठोड आणि संजयसिंह राजपूत या दोन वीरपुत्रांचा समावेश होता. या दोन्ही शहीद जवानांच्या कुटुंबियांना कृष्णा चॅरिटेबल ट्रस्टच्या वतीने प्रत्येकी १७ लाख, अशी एकूण ३४ लाख रुपयांच्या मदतीचा धनादेश शुक्रवारी बुलढाणा येथे प्रदान करण्यात आला. या मदतनिधीसाठी कृष्णा चॅरिटेबल ट्रस्ट संलग्नित विविध संस्थांमधील कर्मचाऱ्यांनी उत्स्फूर्त आर्थिक मदत दिली आहे.

कृष्णा चॅरिटेबल ट्रस्ट संलग्नित कृष्णा वैद्यकीय विज्ञान अभिमत विद्यापीठ, कृष्णा इंग्लिश मेडियम स्कूल, कृष्णा फार्मसी महाविद्यालय आदी सर्व संस्थांमधील अधिकारी, डॉक्टर्स, कर्मचारी व विद्यार्थी आदींनी आर्थिक मदत केली. जमा झालेला एकूण ३४ लाख रुपयांचा निधी बुलढाणा जिल्हाधिकारी कार्यालयात कृष्णा अभिमत विद्यापीठाचे कुलसचिव डॉ. एम. व्ही. घोरपडे व सहाय्यक कुलसचिव एस. ए. माशाळकर यांच्या हस्ते आणि बुलढाण्याचे निवासी उपजिल्हाधिकारी बी. एस. घुगे यांच्या प्रमुख उपस्थितीत शहीद जवानांच्या कुटुंबियांना ३४ लाखांच्या धनादेशाचे वितरण करण्यात आले. कृष्णा चॅरिटेबल ट्रस्टने नेहमीच सामाजिक बांधलिकी जपत राष्ट्रीय आपत्तीच्या काळात योगदान दिलेले आहे. ट्रस्टचे संस्थापक सहकार महर्षी स्व. जयवंतराव भोसले यांनी घालून दिलेल्या सामाजिक बांधिलकीच्या वाटेवरून चालण्याचा आमचा प्रयत्न असून, शहीद जवानांच्या कुटुंबियांना भविष्यातही सर्वोतोपरी सहकार्य करण्याची ग्वाही संस्थेच्या वतीने डॉ. घोरपडे व माशाळकर यांनी दिली.

ओळ

बुलढाणा येथे शहीद जवानांच्या कुटुंबियांना ३४ लाख रुपयांच्या मदतीचा धनादेश प्रदान करताना कृष्णा अभिमत विद्यापीठाचे कुलसचिव डॉ. घोरपडे, सहाय्यक कुलसचिव माशाळकर व निवासी उपजिल्हाधिकारी बी. एस. घुगे.

'कराड अर्बन'ला

२१ कोटींचा नफा

कराड :

कराड अर्बन को. ऑप. बँकेने गेल्या ३१ मार्च रोजी संपलेल्या आर्थिक वर्षात ४५६० कोटींचा व्यवसाय केला. २७५३ कोटींच्या ठेवी तर १८०७ कोटींचे कर्ज वाटप करण्यात आले होते. आर्थिक वर्षात बँकेला ७१.७६ कोटींचा ढोबळ तर प्राप्तिकर व तरतूद वजा जाता २१.४२ कोटींचा नफा झाला आहे. बँकेच्या २१ शाखांना १ कोटींपेक्षा जास्त नफा झाला असून, सभासद संख्येत २२१२ ने वाढ झाली आहे. भाग भांडवलामध्ये ७.९३ कोटी तर एलईडीच्या रुपाने १७ कोटी, अशी भक्कम वाढ झाली आहे, अशी माहिती अध्यक्ष डॉ. सुभाषराव एरम यांनी दिली.

एरम म्हणाले, 'गत आर्थिक वर्ष संमिश्र स्वरूपाचे गेले असल्याने या वर्षात उद्योग व व्यवसायात फारशी उलाढाल झाली नाही. अशा पार्श्वभूमीवर कराड अर्बन बँकेने कौतुकास्पद कामगिरी केली आहे. आर्थिक स्थितीमध्ये गुणवत्ता वाढीच्या दृष्टीने आणखी एक पाऊल पुढे टाकत बँकेने चालू वर्षांपासून ऑन गोईंग एनपीए संकल्पनेचा अवलंब केला आहे. एनपीए खात्यातून जवळपास ४४ कोटींची वसुली करण्यात यश मिळवले आहे. बँकेच्या एकूण ६२ शाखांपैकी १३ शाखांचा एनपीए शून्य टक्के असून, बँकेच्या निव्वळ एनपीएचे प्रमाण ७.४२ इतके राहिले आहे.'

कोल्हापूर टाइम्स टीम

प्रचंड टीका आणि गेल्या पाच वर्षात खासदार धनंजय महाडिक यांनी दिलेल्या सापत्न वागणुकीमुळे राष्ट्रवादी काँग्रेसचे नगरसेवकही लोकसभा निवडणुकीच्या प्रचारापासून दूर होते. मात्र गेल्या काही दिवसांत प्रमुख नेत्यांसह महापालिकेतील कारभारी नगरसेवकांनी केलेल्या मध्यस्तीनंतर नगरसेवकांचे नाराजीनाट्य संपुष्टात आले. सोमवारी अर्ज, प्रचार कार्यालयाच्या उद्घाटनप्रसंगी नगरसेवकांनी दाखवलेल्या उपस्थितीवरुन प्रचारात ते सक्रीय झाल्याचे स्पष्ट झाले. मात्र, पक्षाचे माजी शहराध्यक्ष राजेश लाटकर अद्याप सक्रीय झालेले नाहीत.

२०१४ मध्ये झालेल्या लोकसभा निवडणुकीत खासदार महाडिक यांचा राष्ट्रवादीच्या कार्यकर्त्यांनी प्रचार केला. मात्र नंतर झालेल्या महापालिकेच्या निवडणुकीत महाडिक यांनी तटस्थ राहण्याची भूमिका घेतली. पण, तत्कालीन आमदार महादेवराव महाडिक यांच्या ताराराणी आघाडीच्या उमेदवारांमागे ताकद लावली. याबाबतच्या तक्रारी अनेकांनी जिल्हा नेतृत्वाकडे केल्या. पण त्याचा फारसा उपयोग झाला नाही. परिणामी राष्ट्रवादीच्या अनेक उमेदवारांचा निसटत्या मतांनी पराभव झाला. नंतर महापालिकेच्या राजकारणात काँग्रेस-राष्ट्रवादी विरुद्ध भाजप-ताराराणी आघाडी असा संघर्ष निर्माण झाला. या संघर्षात कधी उघड तर कधी छुप्या पद्धतीने खासदार महाडिक यांनी भाजप-ताराराणी आघाडीला पाठबळ दिले. त्याचे पडसाद स्थायी समितीच्या निवडणुकीतही पहायला मिळाले. पक्षाचे जिल्हाध्यक्ष ए. वाय. पाटील यांच्या स्नुषा मेघा पाटील यांचा पराभव झाला. या पराभवामुळे नगरसेवकांसह आमदार मुश्रीफ यांच्यापर्यंतच्या फळीत संतापाचे वातावरण होते.

याचे पडसाद मुंबईत पक्षाध्यक्ष शरद पवार यांच्यासमवेत उमेदवारीसंदर्भात झालेल्या बैठकीत उमटले होते. नगरसेवकांनी महाडिक यांच्या विरोधात तक्रारींचा पाढा वाचत उमेदवारीला विरोध केला. पण पवार यांनी त्यांची उमेदवारी कायम ठेवल्यानंतर आमदार मुश्रीफ यांनी पक्षादेश मानून प्रचाराला सुरुवात केली. मात्र नगरसेवक मात्र सक्रीय नव्हते. त्यामुळे उलटसुलट चर्चा होती.

सोमवारी याला पूर्णविराम मिळाला. महाडिक यांचा उमेदवारी अर्ज दाखल करताना, संपर्क कार्यालयाचे उद्घाटनावेळी बहुतांशी नगरसेवकांनी हजेरी लावली. महापौर सरिता मोरे, शहराध्यक्ष आर. के. पोवार, माजी नगरसेवक अदिल फरास, अजित राऊत, उत्तम कोराणे, परीक्षित पन्हाळकर, प्रकाश गवंडी, सुनील पाटील, प्रकाश काटे, अमोल माने, अफजल पिरजादे, जालंदर पोवार, नगरसेवक मुरलीधर जाधव, नगरसेविका वहिदा सौदागर, सलीम मुल्ला, नितीन पाटील आदी उपस्थित होते.

प्रा. जयंत पाटील सक्रीय

नगरसेवक प्रा. जयंत पाटील यांची जनसुराज्यचे नेते म्हणून ओळख असली तरी, महापालिकेत ते आमदार हसन मुश्रीफ यांच्या नेतृत्वाखाली आघाडीप्रमुख म्हणून काम पाहतात. २०१५मध्ये जिल्हा बँकेच्या निवडणुकीमध्ये संस्था गटातून त्यांचा पराभव करण्यासाठी आमदार महादेवराव महाडिक यांच्यासह त्यांचे कार्यकर्ते सक्रीय होते. प्रा. पाटील यांचा निवडणुकीत पराभवही झाला. पण, हे सर्व विसरुन प्रा. पाटील पडद्यामागे खासदार महाडिक यांच्या प्रचाराची धुरा सांभाळत आहेत.

कोल्हापूर टाइम्स टीम

मतदानाला २० दिवस उरल्याने प्रचाराच्या नवनव्या क्लुप्त्या लढवल्या जात असतानाच एप्रिल महिन्यातील सण व उत्सवाला प्रचारासाठी कॅश केले जाणार आहे. सणांसह महापुरूषांच्या जयंतीच्या निमित्ताने मतदारांना शुभेच्छा देण्यासोबत उमेदवारांचे कार्यकर्ते मतांच्या बेरजा करण्यात दंग झाले आहेत. उमेदवारांनीही एप्रिलमधील मतदानापर्यंत येणाऱ्या प्रत्येक सण, उत्सव व जयंती कार्यक्रमात हजेरी लावण्याचे नियोजन केले आहे. त्यामुळे येत्या एप्रिलमधील सण उत्सवातही प्रचाराचा रंग चांगलाच भरणार आहे.

लोकसभा निवडणुकीचे वातावरण आता चांगलेच तापले आहे. २० दिवसात अख्खा मतदार संघ पालथा घालण्याचे आव्हान पेलणाऱ्या उमेदवारांसाठी सण उत्सवाच्या निमित्ताने एकत्र येणाऱ्या लोकांच्या भेटीगाठी घेण्याचेही आव्हान आहे. त्यामुळे शुभेच्छा देत असताना लक्ष असू द्या अशी विनंतीवजा हाक देण्यासाठी उमेदवारांनीही प्रचाराची नवी बांधणी केली आहे.

६ एप्रिल रोजी असलेल्या गुढीपाडव्याच्या संधीचे प्रचाराच्यादृष्टीने सोने करण्यासाठी उमेदवारांनी नियोजन केले आहे. पाडव्याच्या शुभेच्छा देत मतदारांची भेट घेण्यात येणार आहे. तसेच प्रचारपत्रकांवरही विजयाची गुढी, गुलालाचा गोडवा, नववर्ष...नवं नेतृत्व अशा आशयांचे संदेश छापण्याच्या तयारीतही काही उमेदवार आहेत. ७ एप्रिल रोजी जागतिक आरोग्यदिनाचे औचित्य साधून काही उमेदवारांच्या कार्यकर्त्यांनी मोफत आरोग्यतपासणी शिबिरांचे आयोजन केले आहे. यानिमित्ताने आपल्या उमेदवाराचे नाव मतदारांपर्यंत पोहोचवण्याचा कार्यकर्ते प्रयत्न करण्याची शक्यता आहे. याच दिवशी अक्कलकोट स्वामी समर्थ प्रकट दिन आहे. कोल्हापूर शहरात व जिल्ह्यात अनेक ठिकाणी यादिवशी महाप्रसादाचे आयोजन केले जाते. या उत्सवाला नागरिकांची मोठी गर्दीही असते. या उत्सवाच्या माध्यमातून उमेदवार व त्यांचे कार्यकर्ते मतदारांशी संवाद साधण्याची संधी जुळवून आणण्याच्या तयारीत आहेत.

जोतिबा यात्रा, अंबाबाई रथोत्सव

चैत्र महिन्यातील जोतिबा यात्रा आणि यात्रेच्या दुसऱ्याच दिवशी साजरा करण्यात येणारा अंबाबाईचा रथोत्सव हे दोन्ही उत्सव एप्रिल महिन्यातील धार्मिक वैभवाची ओळख सांगणारे आहेत. त्यामुळे जोतिबा यात्रेत दर्शनाच्या निमित्ताने जाणारे उमेदवार केदारलिंगाला साकडे घालण्यासोबत प्रचाराचाही गुलाल उधळत राहणार आहेत. अंबाबाई रथोत्सव व शिवाजी महाराज रथोत्सवादिवशीही उमेदवार कार्यकर्त्यांसह या उत्सवात सहभागी होण्याची संधी सोडणार नाहीत.

महापुरुषांच्या जयंतीच्या औचित्याने संपर्क यंत्रणेला वेग देण्याच्या नियोजनालाही सध्या गती आली आहे. १४ रोजी डॉ. आंबेडकर जयंती तर १७ रोजी महावीर जयंती असल्याने या दोन्ही दिवशी शुभेच्छांसोबत मत देण्याची विनंतीही उमेदवारांकडून केली जाणार आहे.

कोल्हापूर टाइम्स टीम

कोल्हापूर जिल्हा मध्यवर्ती सहकारी बँकेला यंदा ७३ कोटी २९ लाख रुपयांचा नफा झाला आहे. गतवर्षी ५७ कोटी रुपयांचा नफा झाला होता. गेल्यावर्षीच्या तुलनेत १६ कोटी रुपये जादा नफा झाला आहे. दौलत कारखान्याच्या १६ कोटी ८१ लाखांचा जमा-खर्च न करता ७३ कोटींचा नफा झाला असल्याचे बँकेचे अध्यक्ष आमदार हसन मुश्रीफ यांनी एका पत्रकाद्वारे प्रसिद्धिस दिले आहे.

जिल्हा बँकेने चंदगड तालुक्यातील हलकर्णी येथील दौलत सहकारी साखर कारखाना अथर्व कंपनीला भाड्याने चालवण्यासाठी दिला आहे. अथर्व कंपनीने कराराप्रमाणे १६ कोटी ८१ लाख रुपये बँकेकडे जमा केले आहेत. कारखाना भाड्याने देण्यासंदरर्भात चंदगड तालुका संघाने हायकोर्टात याचिका दाखल केला आहे. त्यामुळे अथर्व कंपनीने जमा केलेली रक्कम बँकेच्या नफ्यामध्ये दाखवता येत नाही. ही रक्कम बँकेच्या खात्यात दाखवली असती तर ९० कोटी १० लाख रुपये नफा दिसला असता. गेल्यावर्षी राज्यात कोल्हापूर जिल्हा बँक सर्वात जास्त नफा मिळवणारी बँक होती. यावर्षीही जास्त नफा मिळवणारी असणारी बँक असण्याची शक्यता आहे. यंदा बँकेने ११ कोटी रुपयांचा प्राप्तिकर भरला असून कामगारांना सहा कोटी २० लाख रुपये बोनस दिला आहे. तसेच नाबार्डने लिव्ह सॅलरीची तरतूद करण्यास सांगितले असून त्यानुसार सात कोटी ४७ लाख रुपये नफा मिळाला आहे. कर्जमाफीमध्ये गट सचिवांनी केलेल्या कामाबद्दल संचालक मंडळाने एक जादा पगार दिला असून ही रक्कम एक कोटी रुपये इतकी आहे.

बँकेच्या प्रगतीचा तुलनेचा तक्ता (रक्कम कोटीत)

तपशिल २०१८ २०१९

भाग भांडवल १७६ १९१

ठेवी ४०४८ ४७३७

गुंतवणूक १५९५ १८०६

कर्जे २९९० ३८५४

ढोबळ नफा ५६ ७३

नक्त मूल्य ३३६ ४०२

सीआरएआर टक्के १२.४३ ११.३८

ढोबळ एनपीए ५.३२ ५.१३

निव्वळ एनपीए १.६६ १.९३

सी.डी.रेशो ७३.८६ ६३.६६

नफ्यातील शाखा १८३ १८८

तोट्यातील शाखा ८ ३

म. टा. वृत्तसेवा, सांगली

समर्थकांच्या प्रचंड गर्दीने शक्तीप्रदर्शन करून वंचित बहुजन आघाडीचे उमेदवार गोपीचंद पडळकर यांनी बुधवारी आपला अर्ज भरला. जिल्ह्याच्या कानाकोपऱ्यांतून उस्फूर्तपणे आलेल्या आणि प्रचंड जोश असलेल्या गर्दीने पडळकरांनी उमेदवारी अर्ज भरल्यानंर त्यांना खांद्यावर घेऊन मिरवले. गर्दीला बरोबर घेऊनच उघड्या जीपमधून अभिवादन करीत पडळकरांनी स्टेशन चौकात विराट सभा घेतली. पिढ्यान पिढ्या प्रस्थापित व्यवस्थेने अपमान केला, मत घेतली व आमच्यावरच नांगर फिरवला, त्यांना उत्तर देण्यासाठी ही लढाई आहे. मला कोणी नाही, मोकळा गडी आहे, वापरून घ्या, मला खासदार करा, पाच वर्ष साल गड्या सारखं काम द्या, पाच वर्षांत काम नाही केले, तर पुढच्या वेळी पेकटात लाथ घाला, असे आवाहन पडळकर यांनी केले.

वंचित बहुजन आघाडीचे उमेदवार गोपीचंद पडळकर यांच्या जाहीर प्रचाराचा प्रारंभ बुधवारी सांगलीतील स्टेशन चौकातील वसंतदादा पाटील यांच्या पुतळ्याला पुष्पहार अर्पण करून करण्यात आला. या वेळी माजी आमदार प्रकाश शेंडगे, जयसिंगराव शेंडगे, उत्तम जानकर, समाज कल्याणचे सभापती बह्मानंद पडळकर, शकील पिरजादे, विद्या तामखडे, नानासाहेब वाघमारे यांच्यासह धनगर, मुस्लिम, मागासवर्गीय समाजाच्या नेत्यांची व्यासपीठावर झुंबड उडाली होती.

पडळकर म्हणाले, 'आमची मते चालतात. प्रचाराला गोपीचंद चालतो, मग निवडणुकीला का चालत नाही, असा आमचा सवाल आहे. हिम्मत असेल तर निवडणूक लढा, असे आव्हान देणारे खासदार संजय पाटील यांनी स्टेशन चौकात येऊन माझ्या मागे किती माणसे आहेत ते पहावे. सर्व आमदार आणि पदाधिकाऱ्यांचा विरोध असताना संजय पाटील यांना उमेदवारी मिळालीच कशी?, सामाजिक आणि राजकीय दिर्घ अनुभव असलेले आमदार शिवाजीराव नाईक, तीन वेळा आमदार झालेले सुरेश खाडे यांना मंत्री होऊ दिले नाही. त्यांना खाडे पालकमंत्री म्हणून चालत नाहीत. मला आमदार केले तर मी त्यांचे ऐकणार नाही, याची भिती त्यांना होती, त्यामुळे त्यांनी सतत माझ्यावर गुरगुरायला सुरुवात केली होती. पण, मी घाबरलो नाही. संजय पाटील नेहमी पैरा फेडण्याची भाषा करतात. त्यांनी आता माझा पैरा फेडावा, लोकसभेला माझ्यासह मला मानणाऱ्या सर्वांनी तुम्हाला मतदान केलेले आहे. आता तुम्ही तुमचे आणि तुमच्या परिवाराची मते मला दिली पाहिजेत.'

ही निवडणूक बारा बलुतेदारांची आहे. हरलो तर माझे काहीही नुकसान नाही, पण ज्या व्यवस्थेने आमच्यावर सतत अन्याय केला. आता आम्ही कोणाच्या दारात जाणार नाही, असा आमचा निर्धार आहे. ज्यांना आगामी निवडणुकीत आमदार व्हायचे असेल, जिल्हा परिषदमध्ये जायचे आहे, त्यांनी आताच वंचित आघाडीच्या गाडीत बसावे, कारण ही गाडी भरली की थांबणार नाही. आतापर्यंत ५० आमदारांचे फोन आले, वंचितमध्ये जाताय, चांगला निर्णय आहे, तुम्ही चला आम्हीही आलोच. परंतु, या लोकसभा निवडणुकीचे काम पाहून विधानसभेचे तिकिट मिळणार आहे, असेही पडळकर म्हणाले.

----- -------

दादा असते तर पेकटात काठी हाणली असती

प्रतीक पाटील यांना उमेदवारी नको, त्यांच्याकडे पैसे नाहीत, असे सांगणारे विशाल पाटील आपल्या भावालाच असे म्हणत असतील तर ते तुम्हा आम्हाला न्याय देतील का? त्यांच्याकडे पैसे आहेत तर, कारखान्याची बिले द्यावीत, कामगार, शेतकऱ्यांचे पैसे द्यावेत. दादा जीवंत असते, तर काठी पेकटात मारली असती. सर्व संस्था मोडून आता दादांच्या नावावर दुकानदारी नको. मदन पाटील यांना विरोध करणारे विशाल, चुलत्याला विरोध करणारे संजय पाटील सामान्य जनतेशी किती प्रामाणिक राहणार, असा सवाल पडळकर यांनी उपस्थित केला.

'प्राध्यापक' प्रचारात

म. टा. प्रतिनिधी, कोल्हापूर

राजकारण आणि शिक्षण ही दोन्ही क्षेत्रे वेगवेगळी, मात्र या दोन्ही भूमिका खुबीने वटविणाऱ्या शिक्षक व प्राध्यापकांची संख्या कमी नाही. कॉलेज, शैक्षणिक संस्था सांभाळत पार्टटाइम राजकारण करणारेही प्राध्यापक आहेत. वक्तृत्वशैली, कायद्याचा अभ्यास, मुद्देसूद भाषण मांडण्याची कला ही त्यांची बलस्थाने आहेत. त्या बळावर कोण नेत्यांचे 'ब्रेन' म्हणून तर कोण कारभारी म्हणून वावरत असतात. एरव्ही पक्षाचे जिल्हाप्रमुख, नगरसेवक म्हणून परिचित असणारी ही मंडळी लोकसभा निवडणुकीच्या मैदानाच्या प्रचारातही उतरली आहेत.

.........

'जनसुराज्य'चे जयंत पाटील आघाडीच्या प्रचारात

महापालिकेतील ज्येष्ठ नगरसेवक म्हणून प्रा. जयंत पाटील यांची ओळख आहे. एकेकाळी ते माजी आमदार महादेवराव महाडिक यांचे निकटवर्ती म्हणून परिचित होते. महापालिकेच्या राजकारणात वारणा उद्योग समूहाचे प्रमुख विनय कोरे, राष्ट्रवादीचे आमदार हसन मुश्रीफ यांचे पंधरा वर्षापूर्वी आगमन झाले. तेव्हापासून ते कोरे आणि मुश्रीफ यांच्यासोबत आहेत. जनसुराज्यचे पदाधिकारी असले तरी त्यांची ऊठबस राष्ट्रवादीच्या नेत्यांसोबत आहे. जनसुराज्य पक्षाने अधिकृत भूमिका जाहीर केलेली नाही, मात्र प्रा. पाटील हे राष्ट्रवादी आघाडीच्या प्रचारात आहेत. महापालिकेत ते राष्ट्रवादी आघाडीच्या कारभाऱ्यांच्या भूमिकेत असतात.

.....................

स्वाभिमानाची तोफ जालिंदर पाटील

प्रा. जालिंदर पाटील म्हणजे 'स्वाभिमानी शेतकरी संघटनेची तोफ' असे चित्र सध्या जाहीर मेळावे, सभेतून पाहावयास मिळत आहे. त्यांच्याकडे संघटनेच्या जिल्हाध्यक्षपदाची जबाबदारी आहे. शेतकऱ्यांचे प्रश्न, कृषीविषयक धोरण, ऊस आंदोलनातील सक्रिय सहभागी, एफआरपीसाठी लढा, साखर उद्योगाची माहिती आणि आकडेवारीसहित तपशीलवारपणे मांडण्याची हातोटी यामुळे अभ्यासू वक्ता, कार्यकर्ता म्हणून ते परिचित आहेत. शिवाय राजकारणासाठी आवश्यक आक्रमकपणा आणि प्रस्थापितांना उघड आव्हान देण्याची खासियत यामुळे यामुळे पाटील यांची भाषणबाजी संघटनेसाठी मतांची पेरणी ठरत असल्याच्या कार्यकर्त्यांचे म्हणणे आहे.

.............

सामाजिक वंचित घटकांच्या आंदोलनात सहभाग

प्रा. उदय नारकर, प्राचार्य टी. एस. पाटील, प्रा. सुभाष जाधव, प्रा. विनय कांबळे, प्रा. मधुकर पाटील ही मंडळी विविध संस्था, पक्षाशी निगडीत आहेत. प्रा. नारकर हे डाव्या चळवळीतील, माकपचे पदाधिकारी. प्राध्यापकाच्या नोकरीतून स्वेच्छानिवृत्ती घेऊन पूर्णवेळ ते पक्षाचे काम करतात. पक्षीय कार्यक्रमासोबतच विविध प्रकारच्या आंदोलनात, सामाजिक चळवळीत त्यांचा सहभाग असतो. सेवानिवृत्त प्राचार्य टी. एस. पाटील हे शेकापशी निगडीत आहेत. शेकापची आंदोलने, सामाजिक चळवळीत त्यांचा हिरिरीने पुढाकार. मात्र नोकरीत असताना रजा काढूनच ते आंदोलनात सहभागी असायचे. प्रा. सुभाष जाधव हे विविध संघटना, कष्टकऱ्यांच्या संस्थेशी संबंधित आहेत. प्रा. विनय कांबळे यांचा प्रबोधनवादी कार्यक्रमात पुढाकार असतो. प्रा. मधुकर पाटील यांची वक्ता म्हणून ओळख आहे. शिवशाहू यांच्या जीवनकार्यावर ठिकठिकाणी व्याख्यान देत असतात. तसेच सिनेट सदस्यपदी कार्यरत आहेत.

.............

देशमुख आघाडीकडे, कांबळे युतीच्या प्रचारात

दलित नेत्यांतील ऐक्य हा कायमच चर्चेचा विषय राहिला. लोकसभेच्या निवडणुकीत आरपीआय आठवले गट भाजप आघाडीसोबत आहे. तर गवई गट, कवाडे गट हे काँग्रेस, राष्ट्रवादी व मित्रपक्षाच्या आघाडीत आहेत. जिल्ह्यात आरपीआयचे सगळे गट सक्रिय आहेत. आठवले गटाचे प्रा. शहाजी कांबळे हे युतीच्या उमेदवाराच्या प्रचारात दिसत आहेत. गवई गटाचे जिल्हाध्यक्ष प्रा. विश्वास देशमुख काँग्रेस आघाडीच्या प्रचारात सक्रिय असल्याचे चित्र आहे.

म. टा. प्रतिनिधी, कोल्हापूर

विद्यापीठाच्या वरिष्ठ अधिकाऱ्यांवर 'सुटा' संघटनेने केलेले आरोप, दुबार प्रमाणपत्र छपाईच्या नुकसान भरपाई निश्चित करण्यावरुन निर्माण झालेला वादंगावरुन विद्यापीठ विकास आघाडीच्या व्यवस्थापन परिषदेतील सदस्यांत मतभेद आहेत. विकास आघाडीशी संबंधित काही सदस्यांनी कुलगुरुंच्यावर होत असलेल्या आरोपामुळे विद्यापीठाची बदनामी होत असल्याचे कारण सांगत बाजू मांडण्यासाठी कुलपतींना भेटणार आहेत. कुलपतींना द्यावयाच्या निवेदनासाठी मंगळवारी काही व्यवस्थापन परिषदेच्या सदस्यांनी सह्यांची मोहिम राबवली. पहिल्यांदा निवेदनावर स्वाक्षरी केलेल्या आघाडीच्या एका सदस्याने बुधवारी कुलपतींना निवेदन पाठविले. त्यामध्ये मंगळवारी मी विभागात शिकवत असताना घाई गडबडीत स्वाक्षरी केली होती. थोड्या वेळाने निवेदनातील मजकुराची माहिती समजल्यानंतर व्यवस्थापन परिषदेच्या त्या सदस्यांना माझी सही खोडून टाकावी, असे सुचविले होते. शिवाय सदस्यांनी पाठविलेल्या मुद्यांशी मी सहमत नसल्याचे म्हटले आहे. त्यांनी विद्यापीठ प्रशासनाला या संदर्भात माहिती दिली.

महर्षी शिंदे पुरस्कार

राजा दीक्षित यांना जाहीर

सातारा :

रा. ना. चव्हाण प्रतिष्ठान, वाई यांच्या वतीने देण्यात येणारा 23 वा महर्षी विठ्ठल रामजी शिंदे पुरस्कार सावित्रीबाई फुले पुणे विद्यापीठाच्या आंतरप्रणाली अभ्यास केंद्राचे माजी विभाग प्रमुख व नवी दिल्ली येथील भारतीय इतिहास अनुसंधान परिषदेचे सदस्य प्रा. डॉ. श्रीधर मधुकर उपाख्य राजा दीक्षित यांना जाहीर करण्यात येत असल्याची माहिती प्रतिष्ठानचे ज्येष्ठ विश्वस्त आणि सामाजिक कार्यकर्ते, दलितमित्र संभाजीराव पाटणे यांनी पत्रकार परिषदेत दिली.

या पुरस्काराचे वितरण रा. ना. चव्हाण यांच्या २६व्या स्मृतीदिनी म्हणजे १० एप्रिल रोजी ब्राह्मसमाज रविवार पेठ, वाई येथे सकाळी साडेनऊ वाजता ज्येष्ठ सामाजिक कार्यकर्ते व विचारवंत डॉ. बाबा आढाव यांच्या अध्यक्षतेखाली होणाऱ्या कार्यक्रमात ज्येष्ठ साहित्यिक, विचारवंत व समीक्षक डॉ. सदानंद मोरे यांच्या हस्ते प्रदान केला जाणार आहे. स्मृतीचिन्ह, शाल व श्रीफळ असे या पुरस्काराचे स्वरुप आहे.

महर्षी शिंदे पुरस्कार हा दरवर्षी वाई येथे रा. ना. चव्हाण प्रतिष्ठान, सातारा येथील बॅरिस्टर पी. जी. पाटील सार्वजनिक वाचनालय, तेजस्वीनी केटरर्स उद्योग समुह, महाराणी ताराबाई महिला सहकारी पतसंस्था, ब्राम्हो समाज वाई व शिवाजी वाचनालय, वाई यांच्या संयुक्त विद्यमाने देण्यात येतो.

आघाडी व युतीची कार्यालयांमध्ये केवळ हाकेचे अंतर

कोल्हापूर टाइम्स टीम

कोल्हापूर लोकसभा निवडणुकीचा प्रचार चांगलाच टिपेला पोहोचला आहे. दोन्ही राजकीय पक्षांच्या संपर्क कार्यालयांतून प्रचाराची रणनिती आखली जात आहे. राष्ट्रवादी काँग्रेस, काँग्रेस आघाडी आणि भाजप-शिवसेना युतीच्या संपर्क कार्यालयांना त्यामुळे महत्त्व आले आहे. सभा, मेळावे, पदयात्रा, कोपरा सभा, रॅली यांचे नियोजन करून त्यांची अंमलबजावणी करण्यासाठी खास यंत्रणा तैनात ठेवली आहे. परिणामी, संपर्क कार्यालयात सकाळी व रात्री उशीरा नियोजनाच्या बैठका झडू लागल्या आहेत.

काँग्रेस, राष्ट्रवादी काँग्रेस आघाडीचे उमेदवार विद्यमान खासदार धनंजय महाडिक आणि शिवसेना-भाजप युतीचे प्रा. संजय मंडलिक यांच्यामध्ये काटा लढतीचे चित्र निर्माण केले आहे. तर वंचित बहुजन आघाडीच्या उमेदवार डॉ. अरुणा माळी यांनीही उमेदवारी दाखल करुन आव्हान निर्माण करण्याचा प्रयत्न केला आहे. डॉ. माळी यांचे संपर्क कार्यालय लवकरच उमा टॉकी जवळ सुरू होणार असले, तरी आघाडी व युतीच्या संपर्क कार्यालये सुरू करुन रणनिती आखण्यास सुरुवात झाली आहे.

आघाडीचे संपर्क कार्यालय लक्ष्मीपुरी कोंडाओळ तर तर युतीचे कार्यालय लक्ष्मीपुरी स्वयंभू गणेश मंदिर जवळ सुरू करण्यात आले आहे. दोन्ही पक्षांच्या कार्यालयामधील अंतर हाकेच्या अंतरावर असल्याने शहरात हा एक चर्चेचा विषय बनला आहे. संपर्क कार्यालयातून प्रचाराची दिशी ठरवली जात असली, तरी आघाडीच्या महत्त्वाच्या बैठका मात्र ताराराणी चौकातील महाडिक यांच्या कार्यालयातच पार पडत आहेत. तर युतीच्या बैठका ताराबाई पार्क येथील जयलक्ष्मी सांस्कृतिक भवनमध्ये पार पडतात. संपर्क कार्यालयांतून मात्र ग्रामीण व शहरी भागातील प्रचाराचे नियोजन केले जात आहे. पक्षाच्या होणाऱ्या सभा, मेळावे, पदयात्रा, कोपरा सभा, रॅली याचे नियोजन करताना कार्यकर्त्यांना पक्षाचे चिन्ह असलेले झेंडे, स्कार्फ आदींचे वाटप आणि आवश्यकता वाटल्यास वाहनांची सुद्धा व्यवस्था केली जात आहे. विधानसभा मतदारसंघ, तालुकानिहाय आणि शहरातील प्रभागनिहाय प्रचाराच्या सूचना सकाळी कार्यकर्त्यांना दिल्या जात आहेत. प्रत्येकावर दिलेल्या जबाबदारीची रात्री उशारी आढावा घेतला जाऊन पुन्हा दुसऱ्या दिवसीच्या प्रचाराचे नियोजन केले जात आहे. सकाळी आणि रात्री संपर्क कार्यालयात गर्दी असली, तरी दुपारी मात्र संपर्क कार्यालयात तुरळक कार्यकर्त्यांची हजेरी असते.

माढ्यातून संजय शिंदेंचा अर्ज दाखल

सोलापूर :

माढा लोकसभा मतदारसंघातून राष्ट्रवादी कॉँग्रेस पक्षाकडून संजय शिंदे यांनी बुधवारी उमेदवारी अर्ज दाखल केला. दरम्यान, संजय शिंदे यांचा अर्ज दाखल करण्यासाठी राष्ट्रवादीचे अध्यक्ष शरद पवार, रामराजे नाईक निंबाळकर, आमदार गणपतराव देशमुख आणि आमदार भारत भालके उपस्थित होते. सहकारमंत्री सुभाष देशमुख यांनी ही भाजपचे उमेदवार रणजितसिंह नाईक निंबाळकर यांच्यासाठी म्हणून डमी अर्ज दाखल केला.

म. टा. प्रतिनिधी, कोल्हापूर

राष्ट्रीयकृत बँकांचे विलिनीकरण सुरु असताना सहकार चळवळीत ठसा उमटवेल्या पण चुकीच्या पद्धतीने गैरकारभार केलेल्या आठ नागरी व सहकारी बँकांचे गेल्या पाच ते पंधरा वर्षात विलिनीकरण झाले आहे. तर पाच बँका अवसायानात निघाल्या आहेत. तर दुसरीकडे कोल्हापूर अर्बन, आवाडे, कमर्शिअल बँक, वीरशैव बँक, वारणा बँकेने खासगी बँकांशी स्पर्धा करत उत्कृष्ट कारभार केला आहे.

एक एप्रिलपासून बँक ऑफ बडोदामध्ये देना बँक, विजया बँकेचे विलिनीकरण होऊन बँक ऑफ बडोदा ही देशातील दोन क्रमांकाची बँक झाली आहे. पण विलिनिकरणाची प्रक्रिया १५ वर्षांपूर्वी सहकार खात्यात सुरु झाली. ज्या नागरी बँका अडचणीत आहेत त्यांचे विलिनीकरण करण्यात यावे, अशी योजना रिझर्व्ह बँकेने सुरु केली. नागरी व सहकारी बँकांच्या संचालकांनी नातेवाईक व सगेसोयऱ्यांना केलेले चुकीचे कर्जवाटप आणि ठप्प झालेली कर्जवसुली यामुळे बँकांचा एनपीए वाढला. रिझर्व्ह बँकेने अशा बँकांवर नियंत्रणे आणली. त्यामुळे ठेवींना कमी प्रतिसाद मिळू लागला. बँक अवसायानात जाऊ नये व आपली गैरकृत्ये उघडकीस येऊ नयेत यासाठी सहकारी बँकांनी विलिनीकरणाचा निर्णय घेतला. त्यामध्ये महावीर बँक शामराव विठ्ठल बँकेमध्ये, कोल्हापूर जनता बँक पीएनजीमध्ये, मराठा बँक सारस्वतमध्ये, शाहू बँक एनकेजीएसबी बँकेत विलिन झाल्या. बँकांचे विलिनीकरण झाल्याने ग्राहक व ठेवीदारांचा फायदा झाला असला तरी कर्मचाऱ्यांवर मोठा परिणाम झाला. अनेक कर्मचाऱ्यांना कामावरुन काढून टाकण्यात आले तर काहीजणांना सेवेत सामावून घेण्यात आले. बँक विलिनीकरणासाठी संचालकांनी पैसे घेतल्याचा आरोप झाला. संचालक बदनाम झाले. राजकारणात असलेल्या संचालकांना स्थानिक स्वराज्य संस्थेच्या निवडणुकीत जनतेने घरचा रस्ताही दाखवला. सांगली जिल्ह्यातील पार्श्वनाथ तर साताऱ्याची अजिंक्यतारा या बँका कराड बँकेत विलिन झाल्या. कुरुंदवाडची गणेश बँक फेडरल बँकेत, इचलकरंजीतील शिवनेरी डोंबिवली बँकेत, इचलकरंजी महिला बँक जी.पी.पार्थिक, चौंडेश्वरी पुणे अर्बन बँकेत विलिन झाली. विलिनकरणाचा शहाणपणा काही बँकांनी दाखवला असताना दुसरीकडे काही बँका अवसायानात निघाल्या. त्यामध्ये रवि बँक, एस.के. पाटील बँक, साधना, शिवाजी गडहिंग्लज, इचलकरंजी कामगार या बँका अवसायानात निघाल्या. त्याचा फटका ठेवीदारांना बसला.

एकीकडे बँकांचे विलिनीकरण होत असताना आणि त्या अवसायानात निघाल्या असताना शतकमहोत्सवी अर्बन बँक, कमर्शिअल, वीरशैव, वारणा या बँकांनी काटेकोर व चोख कारभार करुन सभासदांचा विश्वास कायम राखला. अर्बन, वीरशैव, वारणा बँकेवर ठेवीदारांचा विश्वास वाढला असून या तीनही बँकांची शेड्यूल्ड बँकेकडे वाटचाल सुरु आहे.

Bhimgonda.Desai@timesgroup.com

Tweet : @bhimgondaMT

कोल्हापूर : लोकसभा निवडणुकीसाठी प्रसिद्ध करण्यात आलेल्या मतदारयादीत निकषांनुसार ८० वर्षांवरील मतदारांच्या संख्येच्या दुप्पट मतदार असल्याची नोंद समोर आली आहे. कोल्हापूर जिल्ह्यात आयुर्मान वाढले असावे अथवा मृत वृद्ध मतदारांच्या नावे यादीतून कमी झाली नसावीत अशी शक्यता आहे. यादीत नावे असलेले सर्व वृद्ध मतदार प्रत्यक्षात आहेत का? असाही प्रश्न उपस्थित होत आहे. यासंबंधी निवडणूक प्रशासनाकडे विचारणा केली असता ठोस उत्तर उपलब्ध नाही.

२०१९च्या अंदाजित जनगणनेनुसार ८० वर्षे वयावरील मतदारांची संख्या ५२ हजार २२ मतदार असणे अपेक्षित आहे. याउलट १ सप्टेंबर २०१९मध्ये प्रसिद्ध झालेल्या प्रारूप मतदार यादीत त्यांची संख्या १ लाख १० हजार २६८ आहे. लोकसभा निवडणुकीपूर्वी झालेल्या आढावा बैठकीत विभागीय आयुक्तांनी अंदाजित लोकसंख्येपेक्षा ५८ हजार २४६ मतदार वाढले कसे? असा प्रश्न उपस्थित केला होता. यादीतील प्रत्येक वृद्ध मतदाराची घरापर्यंत जाऊन खात्री करावी, त्यासाठी विशेष मोहीम राबवावी, व्यक्ती मृत असल्यास नावे कमी करावीत अशी सूचना त्यांनी दिली होती. त्यांच्या सूचनेनुसार काटेकोरपणे काम झाले असते तर अंतिम मतदार यादी काटेकोर झाली असती. मात्र ही संख्या १ लाख ६६ हजार २१ इतकी झाल्याने मृत व्यक्तींची नावे वगळण्याचे काम काटेकोर झाले नसल्याचे दिसून येत आहे.

तर ८० वर्षांवरील मतदारांच्या संख्येबाबतही संभ्रम निर्माण झाला आहे. अंदाजित जनगणनेतील संख्या तरी चुकली असावी किंवा यादीतील ८० वर्षावरील सर्व मृत व्यक्तींची नावे तरी कमी झाली नसावीत या दोन शक्यतांना प्रशासन अप्रत्यक्षपणे दुजोरा देत आहे. नेमके कारण प्रशासनाकडे उपलब्ध नाही. निवडणूक यंत्रणेकडे यादीतील प्रत्येक मतदाराच्या घरी जाऊन खात्री करण्याची सक्षम यंत्रणा नाही. कार्यालयात बसूनच स्थानिक पातळीवर संपर्क साधून हे काम केले जाते. परिणामी स्थलांतरीत, मृत झालेल्या व्यक्तींची नावे कमी होत नाहीत. निवडणूक प्रशासनाकडे येऊन विहित नमुन्यातील अर्ज भरून नाव कमी करण्याची मानसिकता मृत व्यक्तीच्या कुटुंबीयांची नसते. त्यास महसूल प्रशासनातील लालफितीचे कामकाजही जबाबदार असल्याचे म्हटले जाते.

सांखिकी विभागाकडून माहिती पण

सांखिकी विभागाकडून जिल्ह्याची अंदाजित लोकसंख्या निवडणूक प्रशासनाने घेतली आहे. निवडणूक आयोगाने दिलेल्या फॉम्युल्यानुसार 'सांखिकी'च्या प्रशासनाने वयोगटानुसार एकूण मतदारांची संख्या निश्चित केली. ही संख्या डोळ्यासमोर ठेवून मतदारयादीचे काम झाले. पण ८० वर्षांवरील अंदाजित लोकसंख्या आणि यादीतील मतदारसंख्येत मोठी तफावत आहे. याबाबत 'सांखिकी'च्या प्रशासनाकडेही नेमकेपणाचे उत्तर नाही.

कोट

मतदारयादी अद्ययावतीकरण मोहिमेत निवडणूक प्रशासनाकडून वृद्ध मतदारांची खात्री करण्याचा प्रयत्न केला आहे. यादीतील वृद्ध मतदारसंख्येवरून सरासरी आयुर्मान वाढले असावे किंवा काही मृत वृद्ध मतदारांची नावे कमी झाली नसावीत असे मानण्यास वाव आहे.

- सतीश धुमाळ, उपजिल्हाधिकारी, निवडणूक

३९२३६३३

जिल्ह्याची एकूण लोकसंख्या

३१२७९४६

जिल्ह्यातील १८ वर्षावरील लोकसंख्या

३०७५७५१

एकूण मतदार

५२,०२२

अंदाजित ८० वर्षावरील लोकसंख्या

१०६६२१

८० वर्षावरील प्रत्यक्ष मतदारसंख्या