उदयनराजे दोन एप्रिलला

अर्ज भरणार

सातारा : राष्ट्रवादी काँग्रेस आणि काँग्रेस आघाडीचे उमेदवार उदयनराजे भोसले दोन एप्रिल रोजी आपला उमेदवारी अर्ज भरणार आहेत. काँग्रेस भवनात झालेल्या बैठकीत ही माहिती देण्यात आली. या बैठकीत जिल्हा काँग्रेस कमिटीने उदयनराजेंना पाठिंबा दिला.

या सरकारने केवळ फसवाफसवी केली आहे. त्यामुळे सत्तांतर अटळ आहे. शिवसेना-भाजपला पाणी पाजा, असे आवाहन उदयनराजे भोसले यांनी केले. दरम्यान, 'मी सुपरमॅन नाही, मी तुमच्यासारखाच एक आहे. माझ्याकडून चुका झाल्या असतील तर मित्र या नात्याने माफ करा. आमदार शिवेंद्रराजे यांच्यासह राष्ट्रवादी व काँग्रेसच्या आमदारांना मीच निवडून आणणार,' असेही राजे म्हणाले.

दरम्यान, राष्ट्रवादी काँग्रेस भवनात राष्ट्रवादीच्या सर्व आमदार व पदाधिकाऱ्यांची बैठक पार पडली. बैठकीला आमदार शशिकांत शिंदे, शिवेंद्रराजे भोसले, मकरंद पाटील, बाळासाहेब पाटील, जिल्हाध्यक्ष सुनील माने, अ‍ॅड. नितीन भोसले आदी उपस्थित होते.

....

कोल्हापूर टाइम्स टीम

'जीवनाच्या प्रवाहात यशस्वी होण्याचे सामर्थ्य पदवीमध्ये असते. जीवनामध्ये यश म्हणजे नक्की काय असते, याचे आकलन करून घेतले पाहिजे. यश म्हणजे केवळ पैसा व प्रसिद्धी नव्हे, यशासाठी अनुकरण महत्त्वाचे असते,' अशा शब्दांत नाबार्डचे माजी अध्यक्ष यशवंत थोरात यांनी विद्यार्थिनींना यशाचा मंत्र दिला.

येथील कमला कॉलेजमध्ये पदवी प्रमाणपत्र वितरण समारंभ उत्साहात झाला. या समारंभात प्रमुख पाहुणे ते बोलत होते. याप्रसंगी २०१ स्नातकांना पदवी प्रदान करण्यात आली. ताराराणी विद्यापीठाचे कार्यकारी अध्यक्ष प्राचार्य क्रांतिकुमार पाटील अध्यक्षस्थानी होते.

थोरात म्हणाले, 'महाविद्यालयीन प्रवेशावेळी योग्य शाखा, विषय निवडणे गरजेचे असते. जीवनात ध्येय जरी एक असले तरी त्याकडे नेणारे मार्ग वेगवेगळे असतात. यशाचे शिखर गाठायचे असेल तर त्यासाठी प्रसिद्धी, लौकिक व दुसऱ्यासाठी कर्म करण्याची इच्छा महत्त्वाची असते. पराभूत होणे हा मानवधर्म आहे, पण कायमच पराभूत मनोवृत्ती स्वीकारणे हा गुन्हा आहे. ठरविलेल्या जीवन मार्गात यश मिळाल्यास जगण्यातील आनंद वाढतो'

डॉ. क्रांतिकुमार पाटील म्हणाले, 'महाराष्ट्राला महात्मा फुले, राजर्षी शाहू महाराज, डॉ. बाबासाहेब आंबेडकर, कर्मवीर भाऊराव पाटील, डॉ. व्ही. टी. पाटील यांच्या शैक्षणिक कार्याची परंपरा आहे. समाजसुधारकांनी बहुजन, स्त्रीशिक्षण यामध्ये मोलाचे योगदान दिले. समाजामध्ये फक्त नोकरीसाठी शिक्षण हा समज दृढ झाला आहे. समाजाला व्यवयासाभिमुख शिक्षणाची गरज आहे. पदवी घेतलेल्या विद्यार्थिनींनी स्वत: बरोबराच समाज विकासासाठी शिक्षणाचा वापर केला पाहिजे.'

प्रभारी प्राचार्या डॉ. तेजस्विनी मुडेकर यांनी प्रास्ताविक केले. प्रा. डॉ. सुजय पाटील यांनी स्वागत केले. पदवी प्रमाणपत्राचे वाचन डॉ. नीता धुमाळ यांनी केले. प्रा. रेखा पंडित यांनी आभार मानले. कार्यक्रमास संस्थेच्या विश्वस्त कांचन पाटील, जयश्री पाटील, भारती शेळके, उपाध्यक्ष डॉ. एस. एन. पवार, विद्यापीठाचे प्रतिनिधी डॉ. सुरेश गवळी, अर्थतज्ज्ञ डॉ. जे. एफ. पाटील आदी उपस्थित होते.

कराडमध्ये चाळीस जणांवर कारवाई

कराड :

लोकसभा निवडणुकीच्या पार्श्वभूमीवर ग्रामीण पोलिसांच्या रेकॉर्डवरील ४० जणांवर प्रतिबंधात्मक कारवाईचा बडगा उगारला आहे. निवडणुकी दरम्यान कायदा व सुव्यवस्थेचा प्रश्न निर्माण होऊ नये, यासाठी कडक उपाययोजना आखल्या जात आहेत. कराड ग्रामीण पोलिस ठाण्याचे निरीक्षक अशोकराव क्षीरसागर यांनी निवडणूक प्रक्रियेदरम्यान उपद्रवी ठरणाऱ्यांवर कारवाईचा बडगा उगारला आहे. ज्यांच्यावर या पूर्वी निवडणुकीच्या कालावधीत गुन्हे दाखल आहेत, अशा सुर्ली, कार्वे, सुपने,तांबवेसह अन्य गावांतील ४० जणांवर शुक्रवारी प्रतिबंधात्मक कारवाई करण्यात आली आहे. त्यांच्याकडून निवडणूक काळात कोणताही गैरप्रकार होणार नाही, या संदर्भातील लेखी हमीपत्रही घेण्यात आले आहे. या पुढील काळात आणखी कारवाया करण्यात येतील, असेहीक्षिरसागर यांनी सांगितले आहे.

कोल्हापूर: वीरशैव लिंगायत समाजाच्यावतीने महापालिका आयुक्त डॉ. मल्लिनाथ कलशेट्टी यांचा सत्कार करण्यात आला. समाजाचे अध्यक्ष सुनील गाताडे यांनी त्यांचा सत्कार केला. यावेळी आयुक्तांनी शहरात अनेक प्रश्न प्रलंबित असून प्रश्न सोडवण्याचा प्रयत्न असेल. काळम्मावाडी थेट पाइपलाइन योजना व पंचगंगा प्रदूषण रोखण्यास प्राधान्य देण्यात येणार आहे. शहराचा पाणीप्रश्न सोडवण्यास यश येईल, असा विश्वास त्यांनी व्यक्त केला. यावेळी समाजाचे सचिव राजू वाली, ज्येष्ठ संचालक नानासाहेब नष्टे, माजी नगरसेवक श्रीकांत बनछोडे, राजेश पाटील-चंदुरकर, सुभाष चौगले, वसंतराव सांगवडेकर आदी उपस्थित होते.

फोटो आहे

कोल्हापूर टाइम्स टीम

'ठिबक सिंचन योजनेमुळे तोट्यात असलेल्या पाणीपुरवठा योजना कार्यन्वित झाल्या. ठिबकच्या वापराने उत्पन्नात वाढ तर होतेच शिवाय आंतरमशागतीचा खर्च कमी होऊन पाण्यासोबत वीज बिलातही बचत झाली. परिणामी उसासारख्या शेतीला ठिबक सिंचन सुविधा उपयुक्त आहे,' असे मत प्रा. नेताजी पाटील यांनी व्यक्त केले.

जलसंपदा विभाग आणि महापालिकेच्यावतीने आयोजित जलजागृती सप्ताहाच्या समारोप समारंभात ते बोलत होते. संगीतसूर्य केशवराव भोसले नाट्यगृहात झालेल्या कार्यक्रमास आयुक्त डॉ. मल्लिनाथ कलशेट्टी यांची प्रमुख उपस्थिती होती. प्रा. पाटील म्हणाले, 'सडोलीपैकी कारभारवाडी गावात पाणी मुबलक असताना योजना बंद पडली. ग्रामस्थांच्या विनंतीवरुन योजना पुन्हा कार्यन्वित करण्याचा निर्णय घेतला. तोट्यात असलेली संस्था फायद्यात आल्यानंतर ठिबक सिंचन यंत्रणा कार्यन्वित करण्याचा निर्णय घेतला. सरासरी उत्पादन घटत असताना शेतकऱ्यांनी चांगली प्रतिसाद दिला. अल्पावधीत एकरी उत्पादनामध्ये दुप्पट वाढ होत असताना पाण्याचा अपव्यव टाळण्यास यश आले. वीजबिल, मजुरीखर्च याबरोबर पाण्याचीही बचत झाली. पाण्याच्या अतिवापरामुळे उत्पादनही कमी होते.'

आयुक्त डॉ. कलशेट्टी म्हणाले, '२२ मार्च हा जलदिन साजरा करताना त्याची वर्षभर अंमलबजावणी होणे आवश्यक आहे. जलदिन साजरा करताना जलसाक्षरता रुजवण्याची गरज आहे. जलतज्ज्ञ राजेंद्रसिंह यांच्या माध्यमातून व्यापक जाणीव जागृती करण्यासाठी प्रयत्न केले जातील. पाणी हे जीवन आहे, पाणी हे अमूल्य आहे. जलयुक्त शिवरच्या माध्यमातून 'पाणी आडवा पाणी जिरवा' ही संकल्पना आपण राबवतो. मात्र शेतीसाठी मोठ्या प्रमाणावर पाण्याच्या वापर करतो. यासाठी जल साक्षरता महत्त्वाची आहे. पाण्याचा एक थेंबही वाया जावू नये, असा विचार करून प्रत्येकाने पाण्याची काटकसर केली पाहिजे.'

कार्यकारी अभियंता रोहित बांदिवडेकर, एस. आर. पाटील, प्रादेशिक जलअधिकारी आर. के. संकपाळ, यांनी मनोगत व्यक्त केले. यावेळी विद्यार्थ्यांनी जलसाक्षरतेची प्रतिज्ञा घेतली. तसेच चित्रकार स्पर्धेत प्राविण्य मिळवलेल्या विद्यार्थ्यांचा बक्षीस देऊन प्रमुख पाहुण्यांच्या हस्ते गौरव केला. अतिरिक्त आयुक्त श्रीधर पाटणकर, उपायुक्त मंगेश शिंदे, आरोग्याधिकारी डॉ. दिलीप पाटील, उदय गायकवाड उपस्थित होते.

मटा कट्टा

कोल्हापूर टाइम्स टीम

'सध्याच्या शिक्षण धोरणात बदल करुन व्यावसायिक कौशल्ये विकसित करणाऱ्या शिक्षणप्रणालीची आवश्यकता आहे. तरुणांचा देश म्हणून भारताची जगभर ओळख असताना राज्यकर्त्यांनी तरुणांच्याआशा, आकांक्षा जाणून कारणार करण्याची गरज आहे. मात्र अनेकदा तरुणाईचा वापर केवळ मतांसाठी या मानसिकेतून होतो. निवडणुका केवळ जाती-धर्मावर व भावनिक मुद्दांवर लढवू नयेत. राष्ट्रीय धोरण आणि विकासाच्या अजेंड्यावर निवडणुका लढवाव्यात,असा सूर तरुणांच्या चर्चेतून उमटला.

'महाराष्ट्र टाइम्स'तर्फे दसरा चौक परिसरातील दिंगबर जैन बोर्डिंगमध्ये आयोजित 'मटा कट्टा'या उपक्रमात तरुणाईच्या आशा, आकाक्षांचे प्रतिबिंब उमटले. सरकारने केवळ घोषणाबाजी न करता तरुणांना रोजगार देणारा कृतीबद्ध कार्यक्रम आखण्याची मागणी केली. उच्च शिक्षणासाठी कमीत कमी व्याजदराने अर्थसहाय्य, संशोधन प्रकल्पांना चालना देणाऱ्या धोरणांची प्रभावी अंमलबजावणी व्हावी हा तरुणाईचा आग्रह आहे.

स्पर्धा परीक्षेची तयारी करणारा सम्मेद मजलेकर म्हणाला, 'केंद्र सरकारने तरुणाईला डोळ्यासमोर ठेवून स्कील डेव्हलपमेंट, स्टार्ट अप इंडिया यासारखे उपक्रम सुरू केले. शिष्यवृत्ती देऊ केली. या बाबी प्रोत्साहित करणाऱ्या असल्या तरी पदवी, पदव्युत्तर शिक्षण घेणारा तरुण हा व्यावसायिक कौशल्यांनी युक्त असला पाहिजे. पारंपरिक शिक्षणाला व्यावसायिक अभ्यासक्रमाची जोड दिल्यास उद्ममशीलतेला चालना मिळेल. व्यावसायिक अभ्यासक्रम केंद्रस्थानी असलापाहिजे'

विवेकानंद कॉलेजचा विद्यार्थी सौरभ पाटील म्हणाला, 'लोकांच्या गरजा विचारात घेऊन धोरणांची अंमलबजावणी गरजेची आहे. एखाद्या भागात औद्योगिक व अन्य प्रकल्प राबविताना नागरिकांसोबत संवाद झाला पाहिजे. प्रकल्पाचे फायदे तोटे, पर्यावरणीय परिणाम, रोजगार निर्मितीला चालना, स्थानिकांना उपयुक्तता अशा विविध बाबींची सर्वंकष चर्चा, जनजागृती झाल्यास ते समाजहिताचे ठरेल'श्रेणिक खोत म्हणाला, 'देशासमोर आज बेरोजगारी, शेतकऱ्यांचे प्रश्न महत्त्वाचे आहेत. त्यासंबंधी स्पष्ट धोरण हवे.'

विवेकानंद पाटीलचा विद्यार्थी श्रेयस पाटील म्हणाला, 'सरकारने शेतकऱ्यासाठी कर्जमाफी केली, पण त्यामधील जाचक अटीमुळे खरा शेतकरी वंचित राहिल्याची भावना व्यक्त केली. रत्नदीप पाटीलने केंद्र सरकारने तरुणाईच्या हाताला रोजगार मिळावा, उद्ममशीलता वाढावी म्हणून काही योजना जाहीर केल्या. त्यामध्ये स्टार्ट अप इंडिया, मुद्रा योजनांचा समावेश आहे. मात्र योजनेतील जाचक अटी, प्रशासकीय उदासीनता यामुळे या योजनांचा गरजू लाभार्थ्यांना खरोखर फायदा झाला का हे तपासले पाहिजे यावर भर दिला. चर्चेत हारुली येथील सागर पाटील, भरत कोचनूरे, उत्कर्ष पाटील, पंकज चौगुले, यश पाटील, धीरज पाटील, शिवराज ठिकणे, शुभम मगदूम आदींनी सहभाग घेतला. याप्रसंगी बोर्डिंगचे सचिव विजयकुमार शेट्टी, आर. ए. चौगुले, अधीक्षक प्रा. संदीप पाटील आदी उपस्थित होते.

स्वायत्त संस्थेतील वाढता हस्पक्षेप चिंताजनक

'केंद्र सरकारचा स्वायत्त संस्थेतील कामकाजातील वाढता हस्तक्षेप हा चिंताजनक आहे. सीबीआय, आरबीआयला कामकाज करताना पूर्ण मोकळीक हवी. सरकारने त्यांच्या दैनंदिन कामकाजात ढवळाढवळ सुरू केल्यास विपरित परिणाम होऊ शकतात. सरकारने शिक्षणविषयक राष्ट्रीय धोरण आखले पाहिजे,'असे मत स्पर्धा परीक्षेची तयारी करणारा किरण लठ्ठेने व्यक्त केले. महावीर कॉलेजमधील विद्यार्था अनिकेत म्हासुर्लेने सरकारची डिजिटल इंडिया, स्टार्ट अप इंडिया ही धोरणे विकासाला चालना देणारी ठरल्याचे सांगितले.

कायदेविषयक शिक्षणाला प्रोत्साहित करण्याचे धोरण हवे. गरीब, गरजू विद्यार्थ्यांना त्याचा लाभ झाला पाहिजे. राजकारणामध्ये घराणेशाही, प्रस्थापित नेते यांच्याकडे पाहून मतदान करण्यापेक्षा लोकशाहीवादी नेत्याला पाठबळ देण्याची भूमिका हवी.

अभिनंदन पाटील, शहाजी लॉ कॉलेज

विविध योजनांच्या नावाखाली शेतकरी, नागरिकांना बळीचा बकरा बनविण्याचे काम सुरू आहे. यामुळे अनेक घटकांत असंतोष आहे. वास्तविक सरकारने शेतीक्षेत्राला पूरक धोरणे राबवावीत. शेती टिकली तरच समाजगाडा सुरळीत चालणार आहे.

महावीर आसके, नागरिक

तरुणाई म्हणते....

व्यावसायिक कौशल्यावर आधारित शिक्षण प्रणाली हवी

रोजगाराभमिमुख धोरण,उच्च शिक्षणासाठी कमीत कमी व्याजदराने अर्थसहाय हवे

शिक्षणिषयक राष्ट्रीय धोरण आखावे

संशोधन प्रकल्पांना चालना मिळावी

स्पर्धा परीक्षाविषयक केंद्रातर्फेमोफत मार्गदर्शन द्यावे

राजकीय पक्षांनी घराणेशाहीला थारा देऊ नये

कोल्हापूर : प्रतिज्ञा नाट्यरंग संस्थेतर्फे रविवारी (ता. २४) स्वरानंद संगीत विद्यालयाच्या दशकपूर्ती वर्धापनदिनानिमित्त गुरुवंदना कार्यक्रम आयोजित केला आहे. यानिमित्त पंडित अरुण कुलकर्णी आणि डॉ. विनोद ठाकूर देसाई यांच्या शास्त्रीय गायनाचा कार्यक्रम होईल. गायन समाज देवल क्लबमधील अच्युतराव भांडारकर कलादालन येथे दुपारी चार वाजता कार्यक्रम होणार असल्याचे संयोजक प्रशांत जोशी यांनी कळविले आहे.

फोटो....

म. टा. वृत्तसेवा, पन्हाळा

वाघवे (ता. पन्हाळा) येथील जिल्हा परिषदेच्या शाळेच्या एका खोलीचे छत कोसळल्याने मोठे नुकसान झाले आहे. शनिवारी शाळेला सुट्टी असल्याने सुदैवाने जीवितहानी टळली. शाळेच्या नूतनीकरणाकडे दुर्लक्ष केल्याने ही घटना घडल्याचा आरोप शाळा व्यवस्थापन समितीच्या अध्यक्षांनी केला आहे. शाळेची इमारत जुनी झाली असून, तातडीने दुरुस्ती करावी, अशी मागणी ग्रामस्थांतून होत आहे.

याबाबत माहिती अशी : वाघवे येथे इयत्ता पहिली ते चौथीपर्यंत प्राथमिक शाळा आहे. या शाळेचे बांधकाम जुन्या कौलारू पद्धतीचे आहे. प्राथमिक शाळेची इमारत जुनी झाली असून, तिच्या दुरुस्तीचा प्रस्ताव पन्हाळा पंचायत समितीकडे यापूर्वी देण्यात आला होता. पण पंचायत समितीकडून दुर्लक्ष केल्याचे शालेय व्यवस्थापन कमिटीचे अध्यक्ष बंटी पाटील यांनी सांगितले. अनेक वेळा वरिष्ठांशी बोलून त्याचबरोबर कागदपत्रांची पूर्तता करूनही पन्हाळा पंचायत समितीच्या बांधकाम विभागाकडून शाळा इमारतीच्या नूतनीकरणाकडे दुर्लक्ष झाल्याने प्रस्ताव धूळ खात पडला आहे.

शनिवारी दुपारी साडेबाराच्या सुमारास पहिलीच्या वर्गाचे छत कोसळल्याने मोठे नुकसान झाले आहे. मात्र, शनिवारी शाळेला सुट्टी असल्याने मोठा अनर्थ टळला. या घटनेबाबत मुख्याध्यापक अशोक सुतार यांच्याशी संपर्क साधण्याचा प्रयत्न केला असता त्यांचा मोबाइल बंद होता. मात्र, छत कोसळलेल्या वर्गात मुले बसत नव्हती. ग्रामपंचायत व शालेय व्यवस्थापन समितीने पन्हाळा पंचायत समितीकडे शाळेच्या नूतनीकरणाबाबत तीन प्रस्ताव पाठवले आहेत, पण पंचायत समितीने दुर्लक्ष केल्याने ही घटना घडल्याचे प्रभारी मुख्याध्यापक विश्वनाथ मानवडकर यांनी सांगितले.

००

वाघवे शाळेने पन्हाळा पंचायत समितीकडे पाठविलेला प्रस्ताव बांधकाम विभागाने जिल्हा परिषदेला पाठवला आहे. पंचायत समितीवर आरोप करणारे किती वेळा चौकशीसाठी पंचायत समितीकडे आले हे त्यांनी सांगावे व बिनबुडाचे आरोप थांबवावेत.

संजय माने, सदस्य, पन्हाळा पं.स.

००००

म. टा. वृत्तसेवा शाहूवाडी

तुरुकवाडी (ता. शाहूवाडी) फाटा येथील महा ई-सेवा केंद्रालगतच्या मोकळ्या जागेत खुलेआम चालणाऱ्या जुगार अड्ड्यावर शाहूवाडी पोलिसांनी शुक्रवारी दुपारी तीनच्या सुमारास छापा टाकला. या कारवाईत ४७५१ रुपये व कल्याण मटक्याशी संबंधित आकडे लिहिलेल्या जुगाराच्या चिठ्ठ्या असा मुद्देमाल पोलिसांनी जप्त केला. यावेळी शैलेश हैबती माळी (वय ३४) हा स्थानिक युवक जुगार अड्डा चालवत असल्याचे चौकशीत निष्पन्न झाल्याने त्याला ताब्यात घेऊन रात्री साडेआठ वाजता शाहूवाडी पोलिस ठाण्यात त्याच्यावर गुन्हा दाखल केला.

००००

इचलकरंजी : कर्जाला कंटाळून मासे विक्रेत्याने आत्महत्या केल्याचा प्रकार शुक्रवारी रात्री उघडकीस आला. मारुती शामराव मराठे (वय ३५, रा. योगायोगनगर) असे त्याचे नाव आहे. याबाबत शिवाजीनगर पोलिस ठाण्यात नोंद झाली आहे.

मृत मराठे याचे तीनबत्ती चौकात मासे विक्रीचे दुकान आहे. त्याने रात्री आपल्या राहत्या घरी गळफास घेऊन आत्महत्या केली. पोलिसांना सुसाईड नोट मिळाली आहे. त्यामध्ये मराठेने कर्जाला कंटाळून आत्महत्या करत असल्याचे नमूद केले आहे.

शाहूवाडी : सरूड (ता. शाहूवाडी) येथे शाहूवाडी, पन्हाळा, शिराळा तालुक्यांतील विनाअनुदानित वाचनालय चालकांची रविवारी (ता. २४) बैठक बोलाविण्यात आली आहे. येथील ज्ञानेश्वर वाचनालयामध्ये दुपारी चार वाजता बैठक होणार असल्याची माहिती विनाअनुदानित वाचनालय चळवळीचे निमंत्रक चंद्रकांत रेडेकर-थेरगावकर यांनी प्रसिद्धीपत्रकाद्वारे दिली आहे.

०००००

म. टा. वृतसेवा, हातकणंगले

पेठवडगाव (ता. हातकणंगले) येथील डॉ. सायरस पूनावाला इंटरनॅशनल स्कूलमध्ये ब्रिटीश कौन्सिल प्रीमियर स्कील्सअंतर्गत फुटबॉल प्रशिक्षकांसाठी रविवारी (ता.२४) लीग फुटबॉल प्रशिक्षण शिबिर आयोजित केल्याची माहिती संस्थेचे अध्यक्ष गुलाबराव पोळ यांनी दिली. शिबिरासाठी महाराष्ट्रातून फक्त डॉ. सायरस पूनावाला आंतरराष्ट्रीय स्कूलच्या फुटबॉल मैदानाची निवड केली आहे. प्रशिक्षणासाठी महाराष्ट्रातून एकूण १६ पुरुष प्रशिक्षक व ८ महिला प्रशिक्षकांचा समावेश आहे. शिबिराचे नेतृत्व गोवा ब्रिटिश कौन्सिलचे प्रशिक्षक प्रतिनिधी शेखर केरकर तसेच फुटबॉल एज्युकेटर प्रीमियर स्कील्स इंडियाचे जो रिबेलो करत आहेत.

०००००

शिवाजी विद्यापीठाचा लोगो वापरावा...

म. टा. प्रतिनिधी, कोल्हापूर

'डोंगर पोखरून उंदीर शोधला' या म्हणीची प्रचिती पदवी प्रमाणपत्र छपाई प्रकरणाच्या चौकशी समितीच्या अहवालावरून येत आहे. जवळपास सव्वा वर्ष चौकशी करून समितीने सादर केलेल्या अहवालात सहीचा घोळ नेमका कुणामुळे झाला, त्याप्रकरणी दोषींवर काय निश्चिती केली हे स्पष्ट झाले नाही. यावरून प्रमाणपत्र दुबार छपाईची जबाबदारी दीक्षान्त विभागावर निश्चित करून या प्रकरणात शिवाजी विद्यापीठ प्रशासनानील वरिष्ठ अधिकाऱ्यांना वाचविण्याचा आणि कनिष्ठांना गुंतविल्याची उघड चर्चा कॅम्पसमध्ये सुरू आहे.

पदवी प्रमाणपत्र छपाईचे कामकाज दीक्षान्त विभागाकडून होते, ही वस्तुस्थिती असली तरी प्रमाणपत्राचे नमुने प्रशासकीय पातळीवर तपासले जातात. प्रत्येक निर्णयाला कुलगुरूंची मान्यता आवश्यक असते. दुसरीकडे दीक्षान्त विभागातील उपकुलसचिव, सहायक कुलसचिव, अधीक्षक, वरिष्ठ लिपिक हे पदवी प्रमाणपत्रांवरील सही, कागदाचा दर्जा आणि पदवी प्रमाणपत्रावर कुणाची सही असावी असे धोरणात्मक निर्णय घेऊ शकत नाहीत याकडे शिक्षण क्षेत्रातील जाणकार लक्ष वेधत आहेत. ५४ व्या दीक्षान्त समारंभाच्या तब्बल २४ हजार पदवी प्रमाणपत्रांवर पहिल्यांदा कुलसचिवांच्या सह्यांना फाटा देऊन केवळ कुलगुरूंच्या सहीनिशी प्रमाणपत्रे छापली. मात्र, विद्यापीठ नियमावलीनुसार प्रमाणपत्रावर कुलगुरू आणि कुलसचिवांची स्वाक्षरी अत्यावश्यक असल्याचे प्रशासनाच्या लक्षात आले.

प्रशासनाने ही चूक सुधारत पूर्वीची २४ हजार प्रमाणपत्रे रद्द करून रातोरात नव्याने प्रमाणपत्रे छापली. जुनी प्रमाणपत्रे रद्द करण्याचा, नव्याने छापण्याचा महत्त्वपूर्ण निर्णय उपकुलसचिव आणि सहायक कुलसचिव परस्पर कसे काय घेऊ शकतात, इतका साधा प्रश्नही चौकशी समितीला पडू नये? पदवी प्रमाणपत्रांवर पहिल्यांदा केवळ कुलगुरूंची सही होती. त्यांच्या सहीचा शिक्का कुलगुरू कार्यालयाकडे असतो. कुलगुरू कार्यालयाच्या संमतीशिवाय सही-शिक्क्याचा वापर कसा होऊ शकतो? अशी विचारणा होत आहे.

चौकशी समितीप्रमुख डॉ. भारती पाटील, सदस्य अमित कुलकर्णी, प्राचार्य धनाजी कणसे यांनी चौकशीदरम्यान कुलगुरू, प्रकुलगुरू, कुलसचिव, परीक्षा विभाग संचालकांचे म्हणणे ऐकून घेतले होते. मात्र, चौकशीअंती दीक्षान्त विभागावर जबाबदारी निश्चित केली. प्रशासनातील काही वरिष्ठ अधिकाऱ्यांनी चुका करायच्या आणि शिक्षा कनिष्ठ अधिकाऱ्यांवर हा प्रकार योग्य नसल्याचे कर्मचारी म्हणत आहेत. प्रशासनातील एकाही वरिष्ठ अधिकाऱ्याला नैतिक जबाबदारी स्वीकारण्याचे आणि सत्य कथन करण्याचे धारिष्ट्य दाखविता आले नाही यामागचे गौडबंगाल काय ?

०००००

कोट...

पदवी प्रमाणपत्रांतील घोळप्रकरणी दोषींवर कारवाई व्हावी ही आमची मागणी आहे. अभाविपचे कार्यकर्ते, चौकशी समितीच्या अहवालासंदर्भात सोमवारी (ता.२५) कुलगुरूंची भेट घेणार आहेत. चर्चेत दोषींकडून नुकसानभरपाई कशी वसूल करणार आणि अहवाल वाचावयास मिळावा हे मुद्दे राहतील.

साधना वैराळे, अभाविप प्रांत सहमंत्री

००००

'सुटा'ची आज बैठक

शिवाजी विद्यापीठ शिक्षक संघाच्या (सुटा) कोल्हापूर जिल्हा शाखेची बैठक रविवारी (ता.२४) होत आहे. या बैठकीत पदवी प्रमाणपत्राचा चौकशी अहवाल व तसेच कुलगुरूंविरोधातील आंदोलनासंदर्भात चर्चा होणार आहे. सुटाने विद्यापीठातील गैरकारभाराविरोधात आंदोलन सुरू केले आहे. त्या पार्श्वभूमीवर बैठक होत आहे.

०००

म. टा. प्रतिनिधी, कोल्हापूर

गेली साडेचार वर्षे एकमेकांची उणीदुणी काढून लोकसभा निवडणुकीसाठी मनोमिलन झालेल्या भाजप शिवसेना युतीचा राज्यातील प्रचाराचा शुभारंभ आज रविवारी (ता.२४) कोल्हापूरात होत आहे. सभेतून शक्तीप्रदर्शन करण्यासाठी युतीने जंगी तयारी केली आहे. मुख्यमंत्री उद्धव ठाकरे, शिवसेना कार्याध्यक्ष उद्धव ठाकरे, केंद्रीय राज्यमंत्री रामदास आठवले, भाजप प्रदेशाध्यक्ष रावसाहेब दानवे, अर्थमंत्री सुधीर मुनगुंटीवार, माजी मुख्यमंत्री मनोहर जोशी, अदित्य ठाकरे सभेला मार्गदर्शन करणार आहेत.

प्रचाराचा शुभारंभाच्या सभेसाठी तपोवन मैदानावर दोन लाख कार्यकर्त्यांसाठी बैठक व्यवस्था केली आहे. मैदानावर स्क्रीनची सोय करण्यात आली आहे. शहरात प्रमुख चौकातही स्क्रीन उभारण्यात येणार आहेत. सभेसाठी पालकमंत्री चंद्रकांत पाटील, परिवहन मंत्री दिवाकर रावते यांच्या मार्गदर्शनासाठी युतीचे आमदार राजेश क्षीरसागर, सुरेश हाळवणकर, चंद्रदीप नरके, प्रकाश आबिटकर, डॉ. सुजित मिणचेकर, उल्हास पाटील यांच्यासह कोल्हापूर मतदारसंघातील उमेदवार प्रा. संजय मंडलिक, हातकणंगले मतदारसंघाचे उमेदवार धैर्यशील माने परिश्रम घेत आहेत.

उद्धव ठाकरे रविवारी दुपारी तीन वाजता मुंबईहून खास विमानाने कोल्हापुरात येणार आहेत. त्यांच्यासमवेत माजी मुख्यमंत्री जोशी, उद्धव ठाकरे, उद्योगमंत्री सुभाष देसाई, रश्मी ठाकरे, अदित्य ठाकरे, लिलाधर डाके येणार आहेत. विमानतळावरुन ते हॉटेल सयाजी येथे जातील. भाजप प्रदेशाध्यक्ष रावसाहेब दानवेही हेलिकॉप्टरने येणार आहेत. दुपारी चार वाजता मुख्यमंत्री फडणवीस विमानाने कोल्हापुरात येतील. त्यांच्यासमवेत केंद्रीय मंत्री आठवले, अर्थमंत्री मुनगुंटीवार येणार आहे. उजळाईवाडी विमानतळावरुन मुख्यमंत्री थेट अंबाबाई मंदिराकडे दर्शनाला जाणार असून त्याचवेळी उद्धव ठाकरेही मंदिराकडे येणार आहेत. दोघेही देवीचे दर्शन घेऊन पुन्हा हॉटेलकडे परततील.

तपोवन मैदानावर दुपारी साडेचार वाजता प्रचार सभा होईल. सुरुवातीला सांस्कृतिक कार्यक्रम होतील. सहा वाजता स्थानिक नेत्यांची भाषणे होणार आहेत. सात वाजता मुख्यमंत्री, ठाकरे यांसह प्रमुख नेत्यांचे आगमन होईल. सुमारे अडीच तास सभा सुरू राहील. सभेनंतर रात्री मुख्यमंत्री आणि ठाकरे बेळगावला वाहनाने जाणार आहेत. बेळगावहून ते विमानाने मुंबईला रवाना होतील.

सेनेची मोटारसायकल रॅली

शिवसेना शहर शाखेतर्फे शहरप्रमुख रविकिरण इंगवले आणि ऋतुराज क्षीरसागर यांच्या नेतृत्वाखाली पाच हजार मोटारसायकलींची रॅली काढण्यात येणार आहे. रॅलीने दहा हजार कार्यकर्ते सभेला जाणार आहेत.

आमदार अमल महाडिकांचे काय?

शिवसेना भाजप युतीच्या प्रचाराच्या निमंत्रण पत्रिकेत त्यांचे व जिल्हा परिषद अध्यक्षा शौमिका महाडिक यांची नावे नसल्याने भाजपच्या गोटात खळबळ उडाली होती. आमदार महाडिक यांचे चुलत बंधू खासदार धनंजय महाडिक राष्ट्रवादीचे उमेदवार आहेत. मात्र, आता शुभारंभानिमित शहरात उभारलेल्या होर्डिंगवर भाजपचे आमदार अमल महाडिक यांचा फोटो लावण्यात आला आहे. उद्याच्या सभेत ते उपस्थित राहणार का? याकडे कार्यकर्त्यांचे लक्ष आहे.

म. टा. वृत्तसेवा, गडहिंग्लज

मुगळी (ता. गडहिंग्लज) येथे अर्जुन माने या शेतकऱ्याच्या शेतातील गोठ्याला शुक्रवारी रात्री शॉर्टसर्किट होऊन अचानक आग लागली. आगीत होरप‌ळून दोन गाभण म्हशी व दोन रेडकांचा मृत्यू झाला, तसेच वैरण जळून खाक झाल्यामुळे सहा लाखांचे नुकसान झाले आहे. मुगळीपासून दोन कि.मी.वर अर्जुन माने यांचा शेतात जनावरांचा गोठा आहे. शुक्रवारी रात्री नेहमीप्रमाणे ते मुलगा संजयबरोबर जनावरांना चारा टाकण्यासाठी गेले असता त्यांना गोठा जळून खाक झाल्याचे निदर्शनास येताच त्यांनी आरडाओरडा केला. पण शेजारी वस्तीच नसल्यामुळे लोक वेळेत मदतीसाठी येऊ शकले नाहीत. आगीत दोन दुभत्या म्हशी, दोन रेडके जळून मृत्युमुखी पडली. तसेच वैरणही जळून खाक झाली. या घटनेत माने यांचे सहा लाखांचे नुकसान झाले आहे. तहसीलदार रामलिंग चव्हाण यांनी घटनास्थळी भेट देऊन पंचनामा केला. मुगळीचे सरपंच बी. जी. स्वामी यांनी पुढाकार घेऊन आर्थिक मदत दिली.

०००००

जादूची कांडी असती

तर बिनविरोध झालो असतो

उदयनराजे भोसले

कराड :

लोकसभा निवडणूक ही कोणाला तरी निवडून व कोणाला तरी पराभूत करण्यासाठी नाही. देशाच्या विकासासाठी सत्ता परिवर्तन करण्यासाठी आवश्यक आहे. त्यासाठी सर्वांनी सत्ता परिवर्तन करण्याचा निर्धार करणे गरजेचे आहे. त्यासाठी आघाडीतील पक्षांनी आपापसातील मतभेद विसरून काम करायला हवे. राष्ट्रवादीतही कोणत्याही प्रकारे अंतर्गत धुसफूस नाही. परंतु, लोकशाहीत प्रत्येकाला स्वातंत्र्य असल्याने कोणीही निवडणूक लढवू शकतो, असा टोला नरेंद्र पाटील यांचे नाव न घेता लगावला. माझ्याकडे जादूची कांडी असती तर मी बिनविरोध निवडून आलो असतो, असेही मत सातारा लोकसभा मतदारसंघातील राष्ट्रवादी कॉंग्रेसचे उमेदवार उदयनराजे भोसले यांनी केले.

सातारा लोकसभा मतदारसंघातील कॉंग्रेस-राष्ट्रवादी कॉंग्रेसचे उमेदवार उदयनराजे भोसले यांच्या प्रचारार्थ आज, रविवारी सायंकाळी कराड येथील दत्त चौकात पक्षाचे सर्वेसर्वा शरद पवार यांच्या जाहीर सभेचे आयोजन करण्यात आले आहे. या संदर्भातील माहिती देण्यासाठी आयोजित पत्रकार परिषदेत ते बोलत होते. यावेळी राज्याचे माजी मुख्यमंत्री पृथ्वीराज चव्हाण, कॉंग्रेसचे आमदार मोहनराव कदम, आनंदराव पाटील, विश्वजित कदम, सत्यजितसिंह पाटणकर, सारंग पाटील उपस्थित होते.

पृथ्वीराज चव्हाण म्हणाले, 'केंद्रात दहा वर्ष युपीएचे सरकार होते. ते हलवण्यासाठी मोदींनी आश्वासनांचा ढोल बडवला. परंतु, यातील किती आश्वासने पूर्ण झाली, हे लोकांनी ठरविणे गरजेचे आहे. या पाच वर्षात देशाच्या प्रगतीऐवजी मोठी अधोगती झाली आहे. मोदी सरकारने गुजरात मॉडेल, अच्छे दिन, कर्जमाफी, दोन कोटी रोजगार, अशा भूलथापा मारून नोटाबंदी, जीएसटीच्या माध्यमातून सर्वसामान्य लोकांचे जीने मुश्किल केले आहे. ही परिस्थिती आता लोकांच्या लक्षात आली असून, लोक नक्कीच परिवर्तन घडवतील.'

Appasaheb.mali@timesgroup.com

Tweet:Appasaheb_MT

कोल्हापूर : स्थानिक राजकारण, नगरपालिका व जिल्हा परिषदेच्या निवडणुकीतील वेगळे संदर्भ यामुळे लोकसभा निवडणुकीत अनेक जिल्हा परिषद सदस्यांनी सोयीची भूमिका घेतली आहे. काँग्रेसचे काही जि.प.सदस्य अजूनही पक्षाकडून आदेश प्राप्त नसल्याचे सांगत प्रचारापासून अलिप्त आहेत. तर आमदार सतेज पाटील समर्थक सदस्य हे शिवसेनेच्या उमेदवाराच्या प्रचारात दिसतात. आजरा तालुक्याचा अपवाद वगळता अन्य तालुक्यातील राष्ट्रवादीच्या जि. प. सदस्यांनी पक्षाच्या उमेदवाराच्या प्रचारात आहेत. जिल्हा परिषदेत सत्ता स्थापनेत महत्वाच्या ठरलेल्या स्थानिक आघाड्यांनी स्थानिक राजकारण समोर ठेवून हालचाली करत आहेत. भाजपातील महाडिक समर्थक सदस्यांची मात्र गोची झाली आहे.

राष्ट्रवादीचे उमेदवार धनंजय महाडिक, शिवसेनेचे उमेदवार प्रा. संजय मंडलिक यांनी ग्रामीण भागात प्रचारावर भर दिला आहे. दुसरीकडे ठिकठिकाणच्या जिल्हा परिषद सदस्यांनी सोयीची भूमिका घेत पाठिंब्याबाबत संदिग्धता कायम ठेवली आहे. कोल्हापूर लोकसभा मतदारसंघात राष्ट्रवादीचे आठ जिल्हा परिषद सदस्य आहेत. आजरा तालुक्यात राष्ट्रवादीचे जयवंत शिंपी हे एकमेव सदस्य आहेत. मात्र महाडिक गट आणि त्यांच्यामध्ये सख्य नाही. स्थानिक व आजरा नगरपालिका निवडणुकीतील राजकारणामुळे अजूनही ते राष्ट्रवादीच्या उमेदवाराच्या प्रचारापासून अलिप्त आहेत. ते महाडिक गटावर नाराज आहेत. गडहिंग्लज तालुक्यातील राष्ट्रवादीचे सदस्य सतीश पाटील, राधानगरी तालुक्यातील विनय पाटील, सविता भाटळे, भुदरगड तालुक्यातील जीवन पाटील हे खासदार महाडिकांच्या प्रचारात आहेत. कागल तालुक्यातील राष्ट्रवादीच्या सदस्यामध्ये सदस्य युवराज पाटील, मनोज फराकटे, शिल्पा खोत यांचा समावेश आहे. चंदगड तालुक्यातील विद्या विलास पाटील आणि कल्लाप्पाण्णा भोगण हे युवक क्रांती दलाचे आहेत. जि.प.च्या सत्ताकारणात युवक क्रांती दल हा महाडिक आणि भाजपसोबत आहेत.

काँग्रेसमध्ये गटनिहाय बदलती भूमिका

करवीर तालुक्यात ११पैकीपैकी पाच सदस्य काँग्रेसचे आहेत. माजी आमदार पी. एन. पाटील गटाचे तीन सदस्य आहेत. त्यामध्ये राहुल पाटील, शिल्पा पाटील, सुभाष सातपुते यांचा समावेश आहे. त्यांच्यासह राधानगरीतील पांडूरंग भादिंगरे, सविता चौगुले हे सदस्य काँग्रेस पक्षाचा आदेश नसल्यामुळे 'वेट अँड वॉच' भूमिकेत आहेत. आमदार सतेज पाटील गटाचे सदस्य म्हणून वंदना पाटील व सरिता खोत, गगनबावडा तालुक्यातील भगवान पाटील, बजरंग पाटील व उत्तूर येथील उमेश आपटे यांचा समावेश आहे. आमदार पाटील यांनी खासदार महाडिक यांच्या विरोधात भूमिका घेतली आहे. चंदगड तालुक्यात विचित्र स्थिती आहे. काँग्रेसचे सदस्य सचिन बल्लाळ हे माजी मंत्री भरमू पाटील गटाचे आहेत. पाटील सध्या महाडिक यांना जवळचे आहेत. काँग्रेसचे दुसरे सदस्य अरुण सुतार हे राजेश पाटील यांना जवळचे आहेत. या गटाची भूमिका अद्याप ठरली नाही. भुदरगड तालुक्यातील गारगोटी मतदारसंघातून रेश्मा देसाई या काँग्रेसच्या चिन्हावर निवडून आल्या आहेत. मात्र त्यांचे पती राहूल देसाई हे सध्या भाजपात आहेत. शिंगणापूर येथील रसिका अमृत पाटील या अपक्ष म्हणून निवडून आल्या आहेत.

सेना प्रचारात, भाजप चलबिचल

भारतीय जनता पक्ष, शिवसेनेने ही निवडणूक प्रतिष्ठेची बनवली आहे. सेनेचे सदस्य प्रा. मंडलिक यांच्या प्रचारात आहेत. करवीर तालुक्यात सेनेचे आमदार चंद्रदीप नरके हे प्रचारात अग्रेसर आहेत. त्यांच्या गटाचे मनीषा कुरणे, कोमल मिसाळ हे सदस्य आहेत. गडहिंग्लज तालुक्यातील भाजप सदस्य हेमंत कोलेकर, प्रा. अनिता चौगुले, सरंबळवाडीतील सुनीता रेडेकर हे भाजप सदस्य युतीच्या उमेदवाराच्या प्रचारात आहेत. करवीर तालुक्यातील भाजप सदस्या असलेल्या पण महाडिक समर्थक समजल्या जाणाऱ्या सदस्यांची कोंडी झाली आहे. भाजप सदस्या मनीषा टोणपे यांचे पती प्रकाश व सदस्या संध्याराणी बेडगे यांचे पती विलास हे खासदार महाडिक यांच्या प्रचारात आहेत. शिक्षण समिती सभापती अंबरिश घाटगे हे अजूनही प्रचारापासून अलिप्त असल्याचे चित्र आहे. कागलमधील स्थानिक राजकारण व गोकुळचे संदर्भ त्यामागे असल्याचे बोलले जाते.

लोगो : बाजारभाव

म. टा. प्रतिनिधी, कोल्हापूर

उन्हाळी पदार्थ तयार करण्यासाठी गृहिणींची धांदल उडाली असताना साबुदाणा प्रतिकिलो आठ रुपयांनी महागला आहे. पण डाळी, कडधान्याचे दर स्थिर आहेत. रव्याच्या दरात प्रतिकिलो दोन रुपयांनी वाढ झाली आहे.

उन्हाचा तडाखा वाढल्याने उन्हाळी पदार्थ तयार केले जातात. उपवासाचे पदार्थ तयार करण्यासाठी साबुदाण्याचे सांडगे, चकली, पापड तयार केले जातात. पण साबुदाण्याच्या दरात ६० रुपयांवरून ६८ रुपयांपर्यंत वाढ झाली आहे. तिखट सांडगे तयार करण्यासाठी हरभरा डाळीसह उडीद डाळी, कडधान्यांना मागणी वाढली आहे. डाळी व कडधान्याचे दर स्थिर आहेत.

उडदाचे पापड तयार करण्यासाठी तयार पापड आट्याला मागणी वाढली आहे. प्रतिकिलो १४० ते १५० रुपये आटा बाजारात उपलब्ध आहे. तांदळाचे पापड, कुरडई तयार करण्यासाठी जाड्या तांदळाला मागणी वाढली आहे. जाड्या तांदळाचा दर प्रतिकिलो २४ रुपये आहे. पापडासाठी गृहिणींकडून हावळा तांदळाची मागणी होत आहे. त्याची किंमत प्रतिकिलो ३५ ते ४० रुपये दर आहे.

०००

किराणा दर (प्रतिकलो रु.)

पोहे : ४४

साखर : ३६

शेंगदाणा : ९० ते १००

मैदा : ३२

आटा : ३२

रवा : ३४

गूळ : ४० ते ५०

साबुदाणा : ६८

वरी : ७५ ते ८०

००००

डाळींचे दर (प्रतिकिलो रु.)

तूरडाळ : ८० ते ८४

मूगडाळ : ८४

उडीद डाळ : ७० ते ८०

हरभरा डाळ : ६४

मसूर डाळ : ६० ते ६४

मसूर : ७० ते १२०

चवळी : ८०

हिरवा वाटाणा : ९६

काळा वाटाणा : ६८

मूग ८०

मटकी : ८० ते १००

छोले : ८० ते १००

००००

ज्वारी दर (प्रतिकिलो रु.)

बार्शी शाळू : ३२ ते ५०

गहू : २८ ते ३४

हायब्रीड ज्वारी : ३०

बाजरी : २८

नाचणी : ४०

००००

तेलाचे दर (प्रतिकलो रु.)

शेंगतेल : १२५

सरकी तेल : ८८

खोबरेल : २४० ते २२०

सूर्यफूल : ९० ते १०५

०००

मसाले दर (प्रतिकलो रु.)

तीळ : १८०

जिरे : २६०

खसखस : ७००

खोबरे : १९० ते २००

वेलदोडे : २२००

०००००

माजी महापौरही

प्रचाराच्या रिंगणात

म. टा. प्रतिनिधी, कोल्हापूर

लोकसभा निवडणूकीत रंग भरु लागला असून माजी महापौरांनी प्रचारात उडी घेतली आहे. काँग्रेस, राष्ट्रवादीच्या विचारांचे असणारे माजी महापौर शिवसेनेच्या प्रचारात उतरले आहेत. तर काँग्रेस, राष्ट्रवादीचे पक्षाचे माजी महापौर शहराध्यक्ष असल्याने काँग्रेसच्या शहराध्यक्षांचीही चांगलीच कोंडी झाली आहे.

दिवंगत खासदार सदाशिवराव मंडलिकांवर श्रद्धा असणारे कार्यकर्ते शिवसेनेचे उमेदवार प्रा. संजय मंडलिक यांच्या प्रचारात उतरले आहेत. पूर्वाश्रमीचे काँग्रेस व राष्ट्रवादी पक्षाशी संबधित माजी महापौर अॅड महादेराव आडगुळे, विलासराव सासने, मारुतराव कातवरे यांनी थेट युतीच्या व्यासापीठावर उपस्थिती लावली आहे. काँग्रेसचे शहराध्यक्ष माजी महापौर प्रल्हाद चव्हाण यांचा मुलगा माजी महापौर सागर यांनीही युतीच्या मेळाव्याला उपस्थिती लावल्याने काँग्रेसच्या गोटात खळबळ उडाली आहे. चव्हाण यांच्याप्रमाणे काँग्रेस व राष्ट्रवादीच्या चिन्हावर निवडून आलेले माजी महापौर युतीच्या व्यासापीठावर उपस्थित राहण्याची शक्यता व्यक्त केली आहे.

राष्ट्रवादी काँग्रेसचे उमेदवार खासदार धनंजय महाडिक यांच्या प्रचारासाठी सुनील कदम, बाजीराव चव्हाण हे दोन माजी महापौर सक्रीय झाले आहेत. राष्ट्रवादीचे शहराध्यक्ष आर. के. पोवार हे माजी महापौर असून त्यांना पक्षाच्या आदेशानुसार प्रचारात उतरावे लागले आहे. राष्ट्रवादी काँग्रेसकडून संधी मिळालेल्या हसिना फरास, सुनीता राऊत राष्ट्रवादीचा प्रचार करावा लागणार आहे. लाचखोरीच्या गुन्ह्यात अडकलेल्या माजी महापौर तृप्ती माळवीही महाडिक यांचा प्रचार करण्याची शक्यता आहे. राष्ट्रवादीकडून महापौरपदाची संधी मिळालेल्या कांदबरी कवाळे व त्यांच्या सासू कांचन कवाळे याही राष्ट्रवादीकडून प्रचारात सक्रीय राहण्याची शक्यता आहे. कांदबरी कवाळे यांचे पती संदीप कवाळे हे सध्या विद्यमान नगरसेवक आहेत. आमदार सतेज पाटील यांच्याकडून काँग्रेसच्या नगरसेविका वंदना बुचडे, जयश्री सोनवणे, वैशाली डकरे, अश्विनी रामाने, स्वाती यवलुजे, शोभा बोंद्रे यांना महापौरपदाची संधी मिळाली आहे. आमदार पाटील यांनी प्रा. मंडलिकांना पाठिंबा दिल्याने काँग्रेसच्या माजी महापौर धनुष्य बाणाचा प्रचार करण्याची शक्यता वर्तवली जात आहे.

माजी महापौर रामभाऊ फाळके हे राजकारणापासून अलिप्त असले तरी त्यांची पालकमंत्री चंद्रकांत पाटील यांच्याशी जवळीक वाढली त्यांचा पाठिंबा कुणाकडे असणार याकडे लक्ष लागले आहे. माजी महापौर भिकशेट पाटील यांच्या घरी जाऊन माजी आमदार महाडिक यांनी भेट घेतली असली तरी ते मंडलिकांचे कार्यकर्ते आहेत. त्यांची प्रकृती ठीक नसल्याने प्रचारात सक्रीय राहणार नाहीत. माजी महापौर शिवाजीराव कदम, शिरीष कणेरकर, नंदकुमार वळंजू, प्रतिभा नाईकनवरे हे महाडिक गटाचे असल्याने ते राष्ट्रवादीच्या प्रचारात सक्रीय होण्याची शक्यता आहे. राजू शिंगाडे, भिमराव पोवार, दीपक जाधव, सई खराडे, उदय साळोखे, यांनी अजून आपली भूमिका जाहीर केलेली नाही.