म. टा. वृत्तसेवा, कुडित्रे

'देशात सोनिया गांधी, राहुल गांधी यांच्या नेतृत्त्वाखालील कॉंग्रेस पक्षाने महिलांना आरक्षणाच्या माध्यमातून पुरुषांच्या बरोबरीने सर्वच क्षेत्रात काम करण्याची संधी उपलब्ध करून दिली आहे. ग्रामीण भागातील महिलांनी शेतीबरोबरच अन्य व्यवसाय कौशल्ये आत्मसात केली तर आर्थिक स्त्रोत वाढून कुटुंबासह गावच्या प्रगतीला चालना मिळेल', असे प्रतिपादन भोगावती कारखान्याचे चेअरमन पी. एन. पाटील यांनी केले. करवीर तालुक्यातील महे येथील ग्रामपंचायतीने १४ व्या वित्त आयोगातून आयोजित केलेल्या महिला कौशल्य प्रशिक्षण कार्यक्रमाच्या सांगता समारंभप्रसंगी ते बोलत होते. अध्यक्षस्थानी सरपंच कविता पाटील होत्या.

प्रारंभी पुलवामा येथील दहशतवादी हल्ल्याचा निषेध करून सरीता वारके (कासारवाडा, ता. राधानगरी) यांच्या प्रमुख उपस्थितीत शहीद जवानांना आदरांजली वाहण्यात आली. सभापती राजेद्र सूर्यवंशी यांनी पंचायत समितीच्या माध्यमातून ग्रामीण महिलासाठी विविध योजना राबविण्यात येत असल्याचे सांगितले. महिलांनी तयार केलेल्या विविध फॅशन डिझायनिंगच्या वस्तू सभागृहात मांडण्यात आल्या होत्या. कार्यक्रमास गोकुळचे संचालक बाळासाहेब खाडे, बुद्धीराज पाटील, सरपंच कविता पाटील, सज्जन पाटील, उपसरपंच सचिन पाटील, जगदीश पाटील यांनी मनोगत व्यक्त केले. उपसरपंच सचिन पाटील, ग्रामपंचायत सदस्य निवास पाटील आदींसह ग्रामपंचायत सदस्य, महिला उपस्थित होत्या. युवराज पाटील यांनी प्रास्ताविक केले. ग्रामसेविका स्वाती चव्हाण यांनी आभार मानले.

कोल्हापूर टाइम्स टीम

राज्य सरकारने आगामी अर्थसंकल्पात रोजगार निर्मितीला चालना द्यावी, इंधन व वीजदरवाढीवर नियंत्रण ठेवण्याच्या अपेक्षा नागरिकांतून व्यक्त होत आहेत.

महिला आरोग्य विषयक योजनांची प्रभावी अंमलबजावणी करावी, तसेच शेतकऱ्यांना प्रोत्साहित करण्यासाठी तरतूद करावी. कृषीपूरक व्यवसाय, उद्योग वाढले तर रोजगार निर्मिती व अर्थार्जन वाढेल अशा नागरिकांच्या भावना आहेत. लोकांचे जीवनमान उंचाविण्यासाठी वेगवेगळ्या संकल्पना आवश्यक आहेत. शहरांतर्गत वाहतुकीचा ताण कमी करण्यासाठी रिंगरोडची निर्मिती जलदगतीने करावी अशी अपेक्षा नागरिकांनी महाराष्ट्र टाइम्सशी बोलताना व्यक्त केली.

वीज-इंधन दरवाढीवर नियंत्रण

घरगुती गॅस सिलिंडरचा दर हा आवाक्यात असला पाहिजे. महागाईवर नियंत्रण ठेवण्यासाठी तरतूद करायला हवी. मुद्रा योजनेंतर्गत ग्रामीण भागातील युवक, युवतींना अर्थसहाय्य करुन त्यांना स्वावलंबी बनविण्यासाठी मोठ्या प्रमाणात अर्थसहाय हवे. लोकांचे जीवनमान उंचाविण्यासाठी सरकारने कृतीशील कार्यक्रमांची अंमलबजावणी करावी. महत्वाचे म्हणजे सरकारी योजनांची प्रभावी अंमलबजावणी झाली पाहिजे. वीज दरवाढ, इंधनदरवाढ कमी केल्यास सगळयाच घटकांना दिलासा मिळेल.

- मानसी नागटिळे, गृहिणी, नाळे कॉलनी

शेतकरी हिताला प्राधान्यक्रम हवा

राज्य सरकारकडून जो अर्थसंकल्प मांडला जाणार आहे त्यामध्ये प्रामुख्याने शेतकऱ्यांसाठी भरीव तरतूद करायला हवी. शेतकरी हित जोपासणारा अर्थसंकल्प मांडायला पाहिजे. शेतमालाला हमीभाव, शेतीपूरक उद्योगांना अर्थसहाय करण्याची भूमिका घ्यायला हवी.शेतीसाठी आवश्यक अत्याधुनिक अवजारे खरेदीसाठी सबसिडी जाहीर करावी. कृषीपूरक व्यवसायाला चालना दिली तर रोजगार निर्मिती मोठ्या संख्येने होऊ शकते. तसेच सर्वच घटकांचे अर्थार्जन वाढेल.

- श्रेणिक टाकमारे, पेठवडगाव

शालेय साहित्य स्वस्त करावे

महिलांसाठी 'आपलं घर'हा जिव्हाळ्याचा विषय असतो. त्यामुळे घरापासून त्या घरात लागणाऱ्या सगळ्या वस्तूवरील जीएसटी रद्द करावा. घरगुती गॅस सिलिंडरच्या किंमती कमी कराव्यात. सगळ्यात महत्वाचे म्हणजे, मुलांचे शालेय साहित्य स्वस्त व्हावे. आणि खासगी शाळांच्या शुल्क आकारणीवर सरकारी अंकुश असायला पाहिजे. शाळांची फी अव्वाची सव्वा झाली आहे. सामान्य व मध्यमवर्गीय कुटुंबांना शाळांची फी परवडत नाही.

- दिपाली जगताप, फुलेवाडी रिंगरोड

रिंगरोडसाठी तरतूद करावी

शहरांचा विस्तार होत आहे, वाहतुकीवर ताण पडत आहे. यामुळे शहराभोवतालच्या रिंगरोडसाठी मोठ्या प्रमाणात तरतूद करायला हवी. रिंगरोडचे जाळे मजबूत झाले तर शहरांर्गत वाहतुकीचा ताण कमी होईल. राज्यातील अनेक तालुक्यात दुष्काळी स्थिती आहे. दुष्काळग्रस्त भागात वेगवेगळ्या योजना गरजेच्या आहेत. तसेच शहीद जवानांच्या कुटुंबीयांना भरीव आर्थिक मदत, मुलांच्या संपूर्ण शिणक्षाची सोय करावी. दहावी, बारावीच्या मुलांसाठी व्यावसायिक कौशल्ये विकसित केल्यास मुले स्वावलंबी बनतील.

- सयाजी आळवेकर, नेहरुनगर

रोजगार निर्मितीला चालना

राज्य सरकारने, रोजगार निर्मितीला चालना देण्यासाठी योजना आखाव्यात. महिलांची सुरक्षितता, आरोग्य विषयक योजनांची प्रभावी अंमलबजावणी करावी. मोठ, मोठ्या शहरातही महिलांसाठी स्वच्छतागृहे नाहीत, त्यामुळे महिलांची गैरसोय होते. सरकारने महिला आरोग्याला प्राधान्यक्रम देताना ठिकठिकाणी अद्ययावत स्वच्छतागृहे उभी करावीत. महागाई नियंत्रणात आणण्यासाठी सरकारने ठोस धोरण अवलंबावे, जेणेकरुन सामान्यांची आर्थिक ओढाताण होणार नाही.

- वर्षा गुरव, गृहिणी, कसबा बावडा

पंढरपूर :

पुणे-सोलापूर राष्ट्रीय महामार्गावर ऊसतोड मजुरांच्या मोटर-सायकलला पाठीमागून आलेल्या कारने जोरदार धडक दिल्याने झालेल्या अपघातात तीन जणांचा जागीच मृत्यू झाला आहे, अन्य दोघे जखमी झाले आहेत. जखमीपैकी एकाची प्रकृती चिंताजनक आहे. हा अपघात महामार्गावरील शिराळ पाटीजवळ रात्री साडेसातच्या सुमारास घडला आहे .

मृतांमध्ये पती-पत्नी व दहा वर्षांचा नातू यांचा समावेश आहे. मयत व जखमी एकाच कुटुंबातील असून उंडेगाव (ता. परांडा, जि. उस्मानाबाद) येथील रहिवासी आहेत. नवनाथ उगाजी गायकवाड (वय ५५), पत्नी अलका नवनाथ गायकवाड (वय ४५), नातू सूरज उर्फ काळू किरण कांबळे (वय १०) यांचा मृ्त्यू झाला आहे. तर अक्षय नवनाथ गायकवाड (वय २७) व गिरज किरण कांबळे (वय ८), अशी जखमींची नावे आहेत. गिरज किरण कांबळे याची प्रकृती चिंताजनक आहे. त्याला उपचारासाठी इंदापूर येथे हलविण्यात आले आहे. हे सर्वजण भैरवनाथ शुगर आलेगाव, या कारखान्याकडे भिवा विठ्ठल चौधर (रा. गीतेवाडी, ता. जामखेड) या मुकादमच्या ट्रॅक्टरवर ऊस तोडणी मजूर म्हणून काम करीत होते.

मारहाणीत दोघे जखमी

कोल्हापूर : साबळेवाडी (ता. करवीर) येथे लहान मुलांच्या वादातून झालेल्या भांडणानंतर दोन गटांतील मारामारीत दोघे जखमी झाले. कृष्णात ज्ञानू धुंदरे (वय ५४) आणि रमेश विलास पाटील (२४) अशी त्यांची नावे आहेत. त्यांच्यावर सीपीआर रुग्णालयात उपचार सुरू आहेत. सीपीआर पोलिस चौकीत याची नोंद झाली आहे.

अपघातात दाम्पत्य जखमी

कोल्हापूर : करजंफेण (ता. शाहूवाडी) येथे झालेल्या अपघातात मोटारसायकलवरील पती-पत्नी जखमी झाले. जयेंद्र दगडू गुजर (२४, दोघे रा. करंजफेण) आणि त्यांच्या पत्नी अश्विनी (वय २४) अशी जखमींची नावे आहेत. मंगळवारी सकाळी प्रवासी वाहन आणि मोटारसायकलची समोरासमोर धडक बसल्याने अपघात झाला. त्यामध्ये दोघे जखमी झाले. त्यांच्यावर सीपीआर रुग्णालयात उपचार सुरू आहेत.

वृद्ध जखमी

कोल्हापूर : पुणे-बेंगळुरू महामार्गावर वाठार (ता. हातकणंगले) येथे झालेल्या अपघातात मौला दस्तगीर मुल्ला (वय ६५, रा. यादवनगर) हे जखमी झाले. त्यांच्यावर सीपीआर रुग्णालयात उपचार सुरू आहेत. सीपीआर पोलिस चौकीत याची नोंद झाली आहे.

कोल्हापूर : वडणगे (ता. करवीर) येथे विळ्याने केलेल्या हल्ल्यात विकास नामदेव दाभाडे (वय ३१, रा. ख्रिश्चन चर्च माळवाडी, वडणगे) हे गंभीर जखमी झाले. याप्रकरणी करवीर पोलिसांनी अनंत संभाजी पवार (रा. साळशी, ता. शाहूवाडी) यांच्यासह चौघांविरोधात गुन्हा नोंदवला आहे. पोलिसांनी सांगितले की, विकास दाभाडे सोमवारी (ता. २५) वडणगेतील बापू वाइन्सजवळील बोळात देशी दारुच्या दुकानात दारू पिण्यास गेले होते. यावेळी दुकानात चौघेजण दारू पित होते. त्यांच्याशी दाभाडे यांचा वाद झाल्यावर अनंत पवारने त्यांच्यावर विळ्याने हल्ला केला. अन्य तिघांनी त्यांना काठ्यांनी मारहाण केली. त्यानंतर चौघे पळून गेले. जखमी झालेल्या दाभाडे यांना नातेवाईकांनी हॉस्पिटलमध्ये उपचारास दाखल केले. करवीर पोलिस ठाण्यात गुन्हा नोंद झाला आहे.

कोल्हापूर : जवाहरनगरातील लक्ष्मी वसाहतीत अज्ञात चोरट्यांनी घराचा कडी-कोयंडा उचकटून सुमारे पन्नास हजार रुपयांचे सोन्याचांदीचे दागिने लंपास केले. याप्रकरणी कलंदर सय्यद मुल्ला यांनी राजारामपुरी पोलिस ठाण्यात फिर्याद दिली. मुल्ला कुटुंबिय पाहुण्यांकडे गेले होते. घरात कोणी नसल्याचे पाहून चोरट्यांनी कडी-कोयंडा उचकटून घरात प्रवेश केला. त्यांनी कपाटातील दोन सोन्याची कर्णफुले, सहा ग्रॅम वजनाचे जुवाकिस, चार ग्रॅम वजनाचे मंगळसूत्र, ५० ग्रॅम वजनाची चांदीची वाटी असा अंदाजे ५० हजार रुपयांचे दागिने चोरुन नेले.

महापालिकेचा लोगो वापरावा...

Appasaheb.mali@timesgroup.com

Tweet:Appasaheb_MT

कोल्हापूर : 'सरकारी काम आणि सहा महिने थांब' या म्हणीची प्रचिती सध्या रावबहाद्दूर दाजी विचारे विद्यालयाच्या स्थलांतरप्रश्नी येत आहे. फुलेवाडी रिंगरोड परिसरात महापालिकेची शाळा नसल्यामुळे त्या भागात ती स्थलांतरित करण्याचा निर्णय होऊन काही महिने लोटले, प्रशासनाने भागाचा सर्व्हे, प्रस्ताव प्रक्रिया पूर्ण केली. पण प्रस्ताव मान्यतेला विलंब होत असल्याने स्थलांतर प्रक्रियेतील विघ्ने काही संपायची चिन्हे नाहीत. रावबहाद्दूर विचारे यांची बुधवारी (२७ फेब्रुवारी) १५० वी जयंती आहे, याचे स्मरण तरी महापालिका करणार का, असा प्रश्न या निमित्ताने उपस्थित होत आहे.

शाळा स्थलांतराचा प्रस्ताव लालफितीत अडकल्याने विचारे यांच्या वंशजांनी नुकतेच महापालिका प्रशासनाला शाळा स्थलांतराविषयी पत्र दिले. मात्र, प्रशासन 'डिसकस'चे कागदी घोडे नाचवत आहे. वास्तविक रावबहाद्दूर दाजी विचारे विद्यालय शहरातील जुनी शाळा आहे. प्रारंभीच्या कालावधीत महात्मा गांधी यांच्या संकल्पनेतील मूलोद्योगी शिक्षण या शाळेत दिले जायचे. दरम्यान, मध्यवर्ती बसस्थानक परिसरातील या जागेवर व्यापारी संकुलाच्या निमित्ताने शाळा अन्यत्र हलविली. गेल्या १९ वर्षांपासून ही शाळा न्यू शाहूपुरी परिसरातील आबासाहेब सासने विद्यालयात भरत आहे. न्यू शाहूपुरी परिसरात सासने विद्यामंदिर, एस्तेर पॅटन विद्यामंदिर, विजयादेवी घाटगे विद्यामंदिर या पालिकेच्या शाळा आहेत. शाळा वाढल्याने विचारे विद्यालयाच्या पटसंख्येवरही परिणाम होत आहे.

दुसरीकडे फुलेवाडी रिंगरोड परिसरात महापालिकेच्या मालकीची एकही प्राथमिक शाळा नाही. त्यामुळे तेथील पालकांनी एकत्र येऊन महापालिकेच्या अधिकाऱ्यांना या भागात शाळा सुरू करण्याबाबत पत्रही दिले आहे. तत्कालीन आयुक्त अभिजित चौधरी यांनी शाळा सुरू करण्याविषयी सकारात्मकता दर्शविली होती. अतिरिक्त आयुक्त श्रीधर पाटणकर व शिक्षण समितीचे प्रशासनाधिकारी एस. के. यादव यांना चर्चा करून निर्णय घेण्याच्या सूचना केल्या होत्या. मात्र, या त्या घटनेला महिना उलटला तरी अधिकाऱ्यांनी त्यावर कसलीही कार्यवाही केली नाही.

०००००

विचारे कुटुंबीयांचे प्रशासनाला पत्र

विचारे कुटुंबीयांतील सदस्यांनी एकत्रितपणे महापालिका प्रशासनाला शाळा अन्यत्र स्थलांतरित करून पूर्णक्षमतेने चालवावी, याबाबतचे पत्र दिले आहे. पत्रात 'रावबहाद्दूर दाजी विचारे यांची १५० वी जयंती यंदा साजरी होत आहे. राजर्षी शाहू महाराजांनी त्यांना 'रावबहाद्दूर' हा किताब देऊन गौरव केला होता. शिवाय अभयारण्याला दाजीपूर हे नाव दिले. त्यांचे नाव चिरकाल राहावे यासाठी त्यांच्या नावाची शाळा अन्यत्र स्थलांतरित करून पूर्ववत चालवावी. लोकसभा निवडणुकीची आचारसंहिता जाहीर करण्यापूर्वी स्थलांतरणाचा निर्णय घेतला तर येत्या शैक्षणिक वर्षापासून शाळेला प्रारंभ होऊ शकेल.' पत्रावर प्रकाश विचारे, अभिजित विचारे, दीपा विचारे, दीपक विचारे, देवयानी विचारे, विजय विचारे, उज्ज्वला विचारे, अमृता विचारे, आदींच्या सह्या आहेत.

०००००

कोल्हापूर : आरटीई अंतर्गत २५ टक्के प्रवेशाचा थकीत परतावा मिळावा, परतावा मागणी प्रस्तावातील जाचक अटी रद्द कराव्यात यासह अन्य मागण्यासाठी पुकारलेल्या इंग्रजी शाळा बंद आंदोलनात शहर व जिल्ह्यातील शाळांनी सहभाग घेतला. कोल्हापूर जिल्हा इंग्लिश मिडियम स्कूल असोसिएशनने आंदोलनाला पाठिंबा देताना जिल्ह्यातील १६१ शाळा बंद ठेवल्या. माध्यमिक शिक्षणाधिकारी किरण लोहार व प्राथमिक शिक्षणाधिकारी आशा उबाळे यांना निवेदन दिले. इंग्लिश मिडियम स्कूलचे अध्यक्ष महेश पोळ, कार्याध्यक्ष गणेश नायकुडे, उपाध्यक्ष माणिक पाटील, नितीन पाटील, एस. डी. लाड, दादासाहेब लाड यांच्या शिष्टमंडळाने मागण्यांचे निवेदन दिले. सरकारने, प्रवेश शुल्क परत देताना पात्र शाळांची तपासणी करण्याची घातलेली अट चुकीची आहे असे निवेदनात म्हटले आहे.

कोल्हापूर टाइम्स टीम

शिवाजी विद्यापीठ आणि राज्य सरकारच्या संयुक्त विद्यमाने बुधवारी (२७ फेब्रुवारी) मराठी भाषा गौरव दिन साजरा करण्यात येणार आहे. बुधवारी सायंकाळी ६ वाजता विद्यापीठाच्या वि. स. खांडेकर भाषा भवन सभागृहात 'बोलू कवतिके' या विशेष सांस्कृतिक कार्यक्रमाचे आयोजन करण्यात आले आहे. कुलसचिव डॉ. विलास नांदवडेकर यांनी ही माहिती दिली.

२७ रोजी सायंकाळी ६ वाजता मोहन पारसनीस व ओंकार भिसे निर्मित 'बोलू कवतिके' या मराठी भाषेचे महत्त्व जनमानसावर ठसविणाऱ्या विशेष सांस्कृतिक कार्यक्रमाचे आयोजन केले आहे. मराठी अधिविभागातर्फेही मराठी भाषा गौरव दिनानिमित्त विविध कार्यक्रम होणार आहेत. २७ रोजी सकाळी ग्रंथदिंडीचे आयोजन करण्यात आले आहे. त्यानंतर ११.३० वाजता 'महाराष्ट्राची कीर्तन परंपरा' या विषयावर ह.भ.प. कुंडलिक पाटील यांचे व्याख्यान होईल. दुपारी १ वाजता विभागातर्फे ग. दि. माडगूळकर जन्मशताब्दीच्या निमित्ताने 'राम जोशी' हा चित्रपट दाखविण्यात येईल. गुरुवारी (ता. २८ फेब्रुवारी) सकाळी 'म्हणींतले समाजदर्शन : पश्चिम महाराष्ट्रातील म्हणी विशेष' या विषयावर विद्यार्थी सादरीकरण करतील. यावेळी प्रमुख पाहुणे म्हणून जयसिंगपूरचे डॉ. मोहन पाटील उपस्थित असतील. १ मार्च रोजी दुपारी १२ वाजता 'रंग लोककलेचे' हा विशेष कार्यक्रम अवतांबर शिरढोणकर आणि त्यांचे सहकारी सादर करतील.

गॅस सिलेंडरच्या

स्फोटामुळे आग

कराड :

मलकापूर (ता. कराड) येथील आगाशिवनगर दांगट वस्ती झोपडपट्टीमध्ये मंगळवारी दुपारी गॅस सिलेंडरचा स्फोट झाला. हा स्फोट इतका भीषण होता की स्फोटामुळे दांगटवस्ती परिसर दणाणून गेला. संदीप लाखे यांच्या घरामध्ये घरगुती गॅस सिलेंडर लीक होऊन स्फोट झाला. या स्फोटात त्यांचे घर पूर्णपणे उध्वस्त झाले. या घटनेमुळे व स्फोटाच्या भीषण आवाजामुळे परिसरात काहीकाळ भीतीचे वातावरण निर्माण झाले होते. दरम्यान, स्फोटदरम्यान घरात कोणीही नसल्याने सुदैवाने यात कोणतीही जीवितहानी झाली नाही. मात्र, स्फोटानंतर लागलेल्या आगीत घरातील कपडे, घरगुती साहित्य, सोन्या-चांदीचे दागिने जळाल्याने लाखो रुपयांचे नुकसान झाले आहे. आगशिवनगर दांगटवस्ती झोपडपट्टीमध्ये मंगळवारी दुपारी बारा वाजण्याच्या सुमारास हा भीषण स्फोट झाला.

भाजपकडून सोलापूरमधून

जयसिद्धेश्वर महास्वामी?

सोलापूर :

सोलापूर लोकसभेसाठी काँग्रेस पक्षाकडून माजी केंद्रीय गृहमंत्री सुशीलकुमार शिंदे यांच्या नावावर शिक्कामोर्तब झाल्यानंतर भाजपकडून उमेदवार कोण? या चर्चेला पूर्णविराम मिळाला आहे. भाजपचे विद्यमान खासदार शरद बनसोडे यांचा पत्ता कट झाला असून, त्यांच्या ऐवजी सोलापूर लोकसभेसाठी भाजपकडून गौडगाव मठाचे डॉ. जयसिद्धेश्वर शिवाचार्य महास्वामी यांच्या नावावर शिक्कामोर्तब झाले आहे.

मंगळवारी सायंकाळी सोलापूर लोकसभेबाबत मुख्यमंत्री देवेंद्र फडणवीस यांच्या वर्षा निवासस्थानी झालेल्या बैठकीला जयसिद्धेश्वर शिवाचार्य महास्वामी यांना बोलावून घेण्यात आले होते. पालकमंत्री विजयकुमार देशमुख आणि सहकारमंत्री सुभाष देशमुख यांच्याशी मुख्यमंत्री फडणवीस यांनी अर्धा तास चर्चा केल्यानंतर महास्वामी यांच्याशी ही चर्चा केली. फडणवीस यांनी तयारीला लागण्याचे आदेश महास्वामींना दिले असल्याचे समजते.

विद्यमान खासदार बनसोडे यांच्या बाबत जनतेत कमालीची नाराजी होती. त्यांच्या ऐवजी राज्यसभेचे खासदार अमर साबळे यांचे नाव गेल्या काही दिवसांपासून सहकारमंत्री सुभाष देशमुख यांनी पुढे केले होते. साबळे यांनी ही लोकसभेच्या दृष्टीने कामाला सुरुवात केली होती. परंतु, सहकारमंत्री देशमुख यांनी साबळे यांचे नाव पुढे केल्याने पालकमंत्री देशमुखांनी विरोध केला. मात्र, मंगळवारच्या बैठकीनंतर या चर्चांना पूर्णविराम मिळाला आहे. महास्वामींच्या नावावर शिक्कामोर्तब झाले आहे, आता केवळ केवळ घोषणेची औपचारिकता बाकी राहिली आहे, अशी माहिती सुत्रांनी दिली.

दरम्यान, दोनच दिवसांपूर्वी मैंदर्गीचे नीलकंठ शिवाचार्य महास्वामींच्या पुढाकाराने या भागातील महस्वामीजींची बैठक झाली होती. या बैठकीत जयसिद्धेश्वर महास्वामींना संपूर्ण मदत करण्याचा निर्णय घेण्यात आला आहे. या बाबतची चर्चासुद्धा मुख्यमंत्री फडणवीस यांच्या सोबत झालेल्या बैठकीत करण्यात आली. शहर उत्तर, दक्षिण सोलापूर व अक्कलकोट तसेच मंगळवेढा तालुक्यात लिंगायत समाजाच्या मतदारांची संख्या मोठी आहे.

कोण आहेत महास्वामी

डॉ. जयसिद्धेश्वर महास्वामी यांचे वय ६३ असून, मराठी, हिंदी, कन्नड आणि इंग्रजी भाषेवर त्यांचे प्रभुत्व आहे. 'वीरशैव एवम काश्मीर शैव दर्शन मे मोक्षका चिंतन,' या विषयावर त्यांनी पीएच डी केली आहे. अक्कलकोट तालुक्यातील घोसळगाव, अक्कलकोट, गौडगाव बुद्रुक येथे त्यांच्या शिक्षण संस्था आहेत. शेळगी, माशाळ तसेच गौडगाव येथे मठ आहेत. सोलापूर शहरासह अक्कलकोट व दक्षिण सोलापुरात त्यांचे हजारो भक्त आहेत.

Satish.ghatage@timesgroup.com

Tweet:satishgMT

कोल्हापूर : कोल्हापूरच्या दर्जेदार गुळाला कराड बाजार समितीत प्रतिक्विंटल ५०० रुपये जादा दर मिळू लागल्याने मार्केट यार्डातील व्यापाऱ्यावर परिणाम होण्याची भीती व्यक्त केली जात आहे. हमालांच्या संपामुळे बंद पडणारे सौदे, व्यापाऱ्यांकडून मिळणारा कमी दर आणि गुळाचा वेळेत उठाव होत नसल्याने जिल्ह्यातील उत्पादक कराडकडे वळू लागले आहेत.

माथाडी कामगार आणि व्यापारी मंडळीतील वादाचा फटका उत्पादक शेतकऱ्यांना बसला आहे. मध्यंतरी तीन दिवस सौदे बंद पडल्याने गूळ उत्पादकांचे नुकसान होऊ लागले. ऊस हंगामाच्या सुरवातीस आणि शेवटच्या टप्प्यात दर पाडले जात असल्याची भावना उत्पादकांत बळावली जात आहे. या संधीचा फायदा घेत गुळाला चांगला दर मिळत असल्याने कोल्हापूर जिल्ह्यातील वाहने कराड बाजार समितीच्या आवारात दिसू लागली आहेत. कोल्हापूरच्या गुळाला थेट गुजरातमध्ये मागणी असून थोडासा पांढरा, बारीक कणी, रसदार गुळाला मागणी आहे. त्याउलट कराड बाजार समितीतील व्यापाऱ्यांकडून गोल्डन कलर, बारीक कणी, रसदार गुळाला मागणी आहे.

शाहूवाडी, पन्हाळा, हातकणंगले या तालुक्यांबरोबर पाटणमधील गूळ कराड बाजारपेठेत जातो. कोल्हापुरातील व्यापाऱ्यांकडून दर्जेदार गुळाला मागणी असली तरी साखरेचा वापर करून केलेला कर्नाटकातील गुळही खरेदी केला जातो. साखरेचा वापर केल्याने त्याला पांढरा रंग येतो. तर गोल्डन कलरच्या गुळाला दर कमी मिळत असल्याची उत्पादकांची तक्रार आहे. कारखान्यांनी एकरकमी एफआरपी देण्यास टाळाटाळ केल्यानंतर शेतकऱ्यांनी गुऱ्हाळघराकडे मोर्चा वळवला. त्यामुळे गुळाचा दरही घसरला. तरीही चांगल्या गुळाला दर चांगला मिळत आहे. पण, कराड बाजार समितीतील व्यापाऱ्यांकडून कोल्हापूरपेक्षा प्रतिटन ४०० ते ५०० रुपये जादा दर मिळत असल्याने उत्पादकांना फायदा होऊ लागला आहे.

स्वत:चे वाहन व्यवस्था असलेले उत्पादक कराडला गूळ घेऊन जात आहेत. यासाठी येणारा १००० रुपयांचा खर्च वगळून कोल्हापूरपेक्षा जास्त फायदा मिळत आहे. गेल्या पंधरा दिवसांत एक नंबरच्या गुळाला प्रतिक्विंटल चार ते साडेचार हजार रुपये दर मिळाला आहे. दुसरीकडे एक नंबरच्या गुळाला कोल्हापूरात प्रतिक्विंटल साडेतीन हजार ते चार हजार रुपये दर मिळत आहे. प्रतिकिलो पाच ते सहा रुपये आणि प्रतिक्विंटल पाचशे ते सहाशे रुपये जादा दर मिळत असल्याने कोल्हापुरातील उत्पादकांनी कराडकडे मोर्चा वळवला आहे. हंगाम संपण्यास १५ दिवस शिल्लक असून कोल्हापुरात दर मिळणार की स्थिर राहणार याकडे उत्पादकांचे लक्ष लागले आहे.

दरातील फरक

कोल्हापुरात खरेदीवेळी फिकट पिवळ्या रंगाच्या गुळाला व्यापाऱ्यांकडून पसंती मिळते. पण गडद पिवळ्या रंगाला दर कमी मिळतो. पण कराडमध्ये गडद पिवळ्या रंगाला मोठी मागणी असून हा गूळ मुंबई व पुण्याला पाठवला जातो. पिवळ्या रंगाच्या गुळाला कोल्हापूरपेक्षा प्रतिक्विंटल ५०० ते ६०० रुपये जादा दर मिळत असल्याने उत्पादकांनी कराडला पसंती दिली आहे. पंधरा दिवसांपूर्वी शाहूवाडीतील गुळाला प्रतिक्विंटल ६७०० रुपये उच्चांकी दर मिळाला होता. सध्या एक नंबरच्या गुळाला तेथे प्रतिक्विंटल ४००० ते ४५०० रुपये दर मिळत आहे. याच गुळाला कोल्हापुरात ३२०० ते ३५०० रुपये दर आहे.

शेतकऱ्यांना दर मिळावा ही शेती उत्पन्न बाजार समितीचे भावना आहे. त्यामुळे शेतकरी कोल्हापूरबरोबर सांगलीसह व कराडलाही गूळ खरेदीसाठी घेऊन जातात. बाजार समितीला फायदा व्हावा,यासाठी आमचा हेतू नाही. कोल्हापुरातही चांगला दर मिळाला तर शेतकरी मार्केट यार्डकडे वळतील.

- मोहन सालपे, सचिव शेती उत्पन्न बाजार समिती.

गेले दोन महिने कोल्हापुरात गुळाला दर चांगला मिळात नाही अशी स्थिती आहे. गेल्या पंधरा दिवसांत कराडमध्ये एक नंबरच्या गुळाला चांगला दर मिळू लागल्याने येथील उत्पादकांनी कराडला पसंती दिली आहे. चांगला दर मिळाला तरच उत्पादक कोल्हापूरला प्राधान्य देतील.

राजवीर पाटील, गूळ उत्पादक शेतकरी

लोगो : गडहिंग्लज नगरपालिका सभा

म. टा. वृत्तसेवा गडहिंग्लज

खासदारांच्या स्थानिक विकास निधीअंतर्गत नगरपालिका हद्दीत करण्यात येणाऱ्या कामांसंदर्भातले ते पत्र नगरपालिका दप्तरी दाखल न होता नगरसेवकांना मिळालेच कसे? असा जाब विचारून हे राजकारण आहे, आम्हाला शहाणपणा शिकवू नका, अशा शब्दांत नगराध्यक्षा स्वाती कोरी यांनी राष्ट्रवादी काँग्रेसच्या नगरसेवकांना दम भरला. नगराध्यक्षांच्या पवित्र्याने विरोधी नगरसेवक निरूत्तर झाले.

गडहिंग्लज नगरपालिकेची सर्वसाधारण सभा नगराध्यक्षा स्वाती कोरी यांच्या अध्यक्षतेखाली झाली. नगरपालिका हद्दीत खासदार धनंजय महाडिक यांच्या निधीतून रस्ते खडीकरण व डांबरीकरण करण्यासंदर्भात विषय उपस्थित झाला. सार्वजनिक बांधकाम विभागाचे तशा आशयाचे पत्र नगरपालिकेला मिळाले, पण ते पत्र नगरपालिका दप्तरी दाखल न होताच राष्ट्रवादी काँग्रेसच्या नगरसेविका सावित्री पाटील यांच्याकडे कसे गेले? असे राजकीय उपद्व्याप करू नका, असा दम भरत संबंधित कामाला पालिकेचे समजपत्र देण्याचा ठराव करण्यात आला.

गडहिंग्लज शहरात डॉक्टर कॉलनी, नदीवेस, भोसले इंडस्ट्रीज व गिजवणे नाला अशा चार ठिकाणी स्वच्छ भारत अभियानांतर्गत सांडपाणी प्रक्रिया केंद्र उभारण्यात येणार आहे. या प्रकल्पासाठी नेमलेल्या तांत्रिक सल्लागाराचे शुल्क अदा करण्यासंदर्भातही सभेत मंजुरी देण्यात आली.

आरक्षण क्रमांक १२ मध्ये चर्च रोड येथे नगरपालिकेमार्फत प्राथमिक शाळा बांधण्याचे काम प्रस्तावित असून, त्या जागेतील ३०५ निलगिरी झाडांचे मूल्यांकन करून लिलाव करणे गरजेचे आहे. याशिवाय सिद्धाराम पाटील कॉलनीतील खुल्या भूखंडातील वीस हजार रुपयांची १०५ झाडे तोडण्यासाठी सभेत मंजुरी देण्यात आली.

राज्य सरकारच्या नगर विकास विभागाच्या निर्णयानुसार नागरी स्थानिक स्वराज्य संस्थांच्या जमिनीवरील अतिक्रमणे नियमानुकूल करण्याबाबत चर्चा होऊन आजार रोडवरील १६ अतिक्रमणधारकांना दिलासा देण्यासाठी म्युनिसिपल हाउसिंग आरक्षण बदलून इतरत्र जमिनीवर स्थलांतरित करण्यासाठी जिल्हाधिकाऱ्यांकडे प्रस्ताव पाठवावा, अशी मागणी बसवराज खणगावे यांनी केली. अशा स्वरूपाची आणि अतिक्रमणे असतील तसे अर्ज स्वीकारावेत असेही सभेत ठरले.

कंपोस्ट डेपो येथे महिला प्रक्रिया केंद्र उभारणे, पालिका हद्दीतील रस्त्यांचे खडीकरण व डांबरीकरण, लोकशाहीर अण्णा भाऊ साठे नागरी वस्ती सुधार योजनेअंतर्गत घेण्यात येणाऱ्या विकासकामांचा अतिरिक्त अनुदान मागणीचा प्रस्ताव तयार करणे, आदी विषयांवर चर्चा होऊन सर्व विषयांना एकमुखी मंजुरी देण्यात आली. गडहिंग्लज कृषी उत्पन्न बाजार समितीमधील स्थानिक स्वराज्य संस्था प्रतिनिधी बसवराज खणगावे यांचा राजीनामा मंजूर करण्यात आला.

सभेतील चर्चेत विरोधी नगरसेवक हारून सय्यद, नरेंद्र भद्रापूर, राजेश बोरगावे, नितीन देसाई आदींनी भाग घेतला. प्रशासनाची बाजू मुख्याधिकाऱ्यांच्या गैरहजेरीत अनिल चव्हाण यांनी सांभाळली. सभेला उपनगराध्यक्ष सुनीता पाटील यांच्यासह शशिकला पाटील, नाझ खलिफा, श्रद्धा शिंत्रे, आदी उपस्थित होते.

०००००००

फोटो...

म .टा. वृत्तसेवा, इचलकरंजी

येथील डीकेटीईच्या इलेक्ट्रॉनिक्स विभागातील विद्यार्थ्यांनी मित्सुबिशी इलेक्ट्रिकल सुवर्णकप जिंकून एक लाखाच्या बक्षिसासह मेडल्स आणि जपान दौऱ्याचा मान मिळवला. मित्सुबिशी इलेक्ट्रिक कप स्पर्धेत देशभरातील विविध राज्यांतील एकूण १३५ प्रकल्पांमधून उत्कृष्ट ३५ प्रकल्प अंतिम फेरीसाठी निवडण्यात आले. या सर्व स्पर्धकांवर मात करून डीकेटीईच्या स्पार्क संघाने प्रथम क्रमांकाचे बक्षीस पटकावले.

विद्यार्थ्यांच्या विविध कल्पना आणि मित्सुबिशी कंपनीने दिलेल्या चालना यांचा सुंदर मिलाफ या स्पर्धेअंतर्गत दिसून येतो. 'डिजिटल इंडस्ट्री थ्रू स्मार्ट इमॅजिनिशन' संकल्पनेने मित्सुबिशी इलेक्ट्रिक इंडिया आणि मानव रचना शैक्षणिक संस्था यांच्या संयुक्त विद्यमाने यंदाची ही स्पर्धा फरीदाबाद (हरियाणा) येथे झाली. स्पर्धेत डीकेटीईच्या इलेक्ट्रॉनिक्समधील अथर्व पळसुले, प्रतीक खोंद्रे, रसिका कोले व समीक्षा पोतदार या विद्यार्थ्यांनी टीम स्पार्क नावाने सहभाग नोंदविला. त्यामध्ये गणिती संख्याकी आणि आधुनिक पीएलसी तंत्रज्ञान यांचा मेळ घालून 'इंटेलिजन्ट ऑटोनॉमस रोबोट' प्रकल्प बनविला. विद्यार्थ्यांना प्रा. विनोद कुंभार यांचे मार्गदर्शन लाभले.

बक्षीस वितरणप्रसंगी एआयसीटीईचे व्हा. चेअरमन डॉ. एम. पुनिया व मित्सुबिशी इलेक्ट्रिक इंडियाचे मुख्य संचालक कात्सुनोरी उशीकू, मित्सुबिशी इलेक्ट्रिक कॉर्पोरेशन जपानचे मासानोरी तानीमोतो, आदी उपस्थित होते. नावीन्यपूर्ण प्रोजेक्टसाठी अ‍ॅटोमेशन लॅबरोटरीद्वारे विद्यार्थ्यांना अशाप्रकारे यंत्रणा कार्यान्वित करण्याचे ज्ञान डीकेटीईमध्ये उपलब्ध करून देण्यात आलेले आहे. त्याचा विद्यार्थ्यांना वेगवेगळया क्षेत्रातील यंत्रणा कार्यान्वित करण्यासाठी फायदा होत असल्याची माहिती माजी मंत्री प्रकाश आवाडे यांनी दिली. विद्यार्थ्यांच्या कौशल्यात वाढ होण्यासाठी डीकेटीईमध्ये पीएलसी, एचएमआय, स्कॅडा ट्रेनिंगचे वेळोवेळी आयोजन करण्यात येते, त्यामुळे विद्यार्थ्यांना अशा स्पर्धेमध्ये अव्वल स्थान पटकविण्यास फायदा होत असल्याचे संचालक प्रा. डॉ. पी. व्ही. कडोले यांनी सांगितले. यशाबद्दल संस्थेचे अध्यक्ष कल्लाप्पाण्णा आवाडे, मानद सचिव डॉ. सपना आवाडे, आदींनी विद्यार्थ्याचे अभिनंदन केले.

०००००

कोल्हापूर टाइम्स टीम

भारतीय वायुसेनेची कामगिरी ही अभिमानस्प आणि जगभर देशाची मान उंचावणारी आहे. सैनिकांनी दहशतवादी अड्ड्यावर हल्ले करुन जैश ए महंमद संघटनेचे कंबरडे मोडले. त्याहून अधिक महत्वाचे म्हणजे, भारतीय लष्कराने, पाकिस्तानात प्रवेश करुन धडा शिकवू शकतो हे कृतीतून दाखवून दिले. भारतीय सैनिकांच्या या धडाकेबाज कारवाईतून उत्कृष्ट युद्धनिती, लष्करी सामर्थ्याचे दर्शन घडविले' अशा प्रतिक्रिया निवृत्त लष्करी अधिकाऱ्यांनी व्यक्त केल्या. भारताने बालाकोट येथील दहशतवाद्यांच्या तळांवर केलेल्या कारवाईनंतर पाकिस्तानला दिलेल्या प्रत्युत्तराबाबत या माजी अधिकाऱ्यांनी सैन्यदलाचे अभिनंदन केले आहे. 'भारतीय लष्कराची ही कारवाई नागरिकांसह सैनिकांचे मनोबल उंचावणारी आहे. भारतीय लष्कर कोणत्याही संकटाशी सामना करायला सज्ज असल्याची प्रचिती येते' असे अधिकाऱ्यांनी सांगितले.

योग्य वेळी पाकला प्रत्युत्तर

पुलवामा हल्ल्यातील शहीद जवानांच्या हत्येचा बदला घेण्यासाठी भारतीय वायुसेनाने केलेली कारवाई स्पृहनीय आहे. सध्य स्थितीत पाकिस्तानला चोख उत्तर देण्याची नितांत आवश्यकता होती. कारण शत्रूराष्ट्राच्या कुरापती वाढल्या आहेत. भारताने अतिशय हुशारीने तेथील दहशतवादी अड्ड्यांवर हल्ले केले. मुझफ्फराबाद, बालाकोट, चाकोटी येथील अड्ड्यावर हल्ले चढवित भारतीय सैन्याने पाकला चांगलाच धडा शिकवला. यामधून पाकिस्तानात प्रवेश करुन हल्ले करु शकतो हा संदेश वायुसेनेने दिला. हे भारताच्या धोरणाचे यश म्हणावे लागेल.

- ए. बी. सय्यद, निवृत्त मेजर जनरल

वेल प्लॅन्ड अॅटॅक

भारतीय लष्कराची पाकिस्तानातील दहशतवादी अड्ड्यावरील कारवाई म्हणजे 'वेल प्लॅन्ड अॅटॅक'होता. योग्य नियोजन, गोपनीयता ही रणनिती यशस्वी ठरली. शत्रू राष्ट्रात, सुमारे ८० किलोमीटर आत प्रवेश करुन भारतीय सैनिकांनी कमाल करून दाखविली. शत्रूला जी भाषा समजते, त्या भाषेत उत्तर देण्याचा धडाका दाखविला. यामुळे सैन्यदलाचे मनोबल कैकपटीने उंचावले आहे. हवाई दलाची कारवाई ही साऱ्यांना अभिमानास्पद आहे. दहशवतवादी अड्डे हल्ले उद्धवस्त केल्यामुळे पाकिस्तानाला चांगलाच इशारा मिळाला. भारताच्या लष्करी सामर्थ्याचे दर्शन घडले.

- विजयसिंह घोरपडे, निवृत्त ब्रिगेडिअर

पाकिस्तानला बिग शॉक

उरी, पठाणकोट आणि पुलवामा येथील हल्ल्याचा भारताने सूड घेतला. वायुसेनेच्या कारवाईमुळे पाकला धडा मिळाला. त्यांच्यासाठी हा खूप मोठा शॉक आहे. भारताने एकीकडे दहशतवादी अड्डे नेस्तनाबूत करत पाकिस्तानला धडा शिकवला. त्याचवेळी दुसरीकडे मुत्सेद्दिगिरी दाखवत आतंकवाद्याच्या विरोधातील लढाईसाठी इतर देशांचा पाठिंबा मिळवला. अमेरिका, रशिया, कॅनडा, ऑस्ट्रेलिया भारताच्या बाजूने उभे राहिले. चीन सुद्धा पाकिस्तानच्या बाजूने नाही. लष्कराने जैश ए महम्मदचे कॅम्प उद्धवस्त करत दहशतवाद्यांचे कंबरडे मोडले आहे. या कारवाईमुळे पाकिस्तान नरमेल अशी शक्यता आहे.

- उदय थोरात, निवृत्त ब्रिगेडिअर

वेळ आल्यावर कारवाई

पुलवामा हल्ल्याच्या तेराव्या दिवशी भारतीय लष्कराने कारवाई केली. भारताने आम्ही शांततेचे उपासक असलो तरी वेळ आल्यावर शस्त्र हाती घ्यायला कमी पडत नाही हेच कृतीतून दाखवून दिले. या कारवाईमुळे भारतीय लष्करी सामर्थ्याची जगाला कल्पना आली. गुजरात सीमेवर विमान उडविले आणि बालाकोट, मुझफ्फराबाद भागात हवाई हल्ले केले. हे उत्कृष्ट युद्धनीतीचे लक्षण आहे. भारतीय वायुसैनिक हे जगातील उत्कृष्ट वायुसैनिक आहेत, त्यांच्याशी कुणी स्पर्धा करु शकत नाही. त्यांची क्षमता, कौशल्य, धाडस, आणि टायमिंग वाखाणण्याजोगे आहे.

- माधव वेसवीकर, निवृत्त कर्नल

धाडसी कारवाई

भारतीय वायुसेनेची ही अतिशय धाडसी कारवाई आहे. पाकिस्तानात प्रवेश करुन दहशतवादी अड्ड्यावर हल्ले चढवताना आपण किती सक्षम आहोत हेच भारतीय सैनिकांनी दाखवून दिले.या हल्ल्यात नागरी वस्तीचे नुकसान केले नाही. ही केवळ अॅन्टी टेरिरिस्ट कारवाई होती. अतिशय गुप्तता, अचूक माहितीद्वारे मोहिम यशस्वी करुन दहशतवाद्यांचा खातमा केला. ही देशासाठी गौरवास्पद गोष्ट आहे. भारतीयांनी या प्रसंगी सैन्याचे मनोबल वाढविले पाहिजे. पाकिस्तान नेहमीच कांगावा करण्यात पटाईत आहे. नागरिकांनी कसल्याही अफवावर विश्वास ठेवू नये. संशयास्पद वस्तू किंवा व्यक्ती नजरेस पडल्यास पोलिसांना कळवाव्यात.

- अमरसिंह सावंत, निवृत्त कर्नल

कोल्हापूर टाइम्स टीम

पुणे, सांगली आणि हातकणंगले लोकसभा मतदारसंघातून उमेदवारीची चर्चा असलेल्या सेवानिवृत्त सनदी अधिकारी ज्ञानेश्वर मुळे यांनी 'मी जर निवडणुकीला उभा राहिलो तर तो महाराष्ट्राच्या राजकीय जीवनाचा अपघात असेल. आज समाजकारण, राजकारण, शिक्षणकारण हे बिझनेस बनला आहे' असे वक्तव्य केले.

गेले काही महिने मुले यांच्या राजकीय प्रवेशाची चर्चा वेगावली आहे. या पार्श्वभूमीवर मुळे यांच्या विधानाने राजकीय प्रवेशाविषयी संदिग्धता निर्माण झाली आहे. त्यांच्या संकल्पनेतून 'चांगुलपणाची चळवळ' या उपक्रमाची सोमवारी घोषणा झाली. याप्रसंगी पत्रकारांशी बोलताना ते म्हणाले, 'समाजकारण हेच राजकारण अशी माझी भूमिका आहे. कठल्याही विशिष्ट जातीला, वर्गाला प्रोत्साहित करण्याची धोरण नाही. सध्याची पक्ष पद्धती बदलण्यासाठी चांगली माणसे राजकारणात पाहिजेत या भावनेतून मी गेली अडीच वर्षे देशभराचा दौरा केला. अडीच लाख किलो मीटर फिरुन देश समजून घेतला. माझी अनेक लोकांशी मैत्री आहे. वेगवेगळ्या क्षेत्रात काम करणारी माणसे आहेत. माझ्या ३५ वर्षाच्या प्रशासकीय सेवेत मला कधीही जात विचारली नव्हती. पण राजकारणाच्या चर्चेत माझी जात विचारण्याचा प्रकार काही जणांकडून घडला. राजकारणाच्या प्रवेशासंदर्भात मला अतिशय कठीण परीक्षेला सामोरे जावे लागत आहे, यावरुन माझी मनोभूमिका तुमच्या लक्षात आली असेल. कारण राजकारणातील नियम खूप वेगळे आहेत, कुठेही लिखित नसलेले हे नियम विदारक, भयावह आहेत.'

ज्ञानेश्वर मुळ‌े म्हणाले, 'काहींनी राजकारण हा तुमचा प्रांत नसल्याचे सांगितले. तर कुणी राज्यसभेवर का जात नाही, राज्यपाल का होत नाही असाही प्रश्न केला. देशातील युती असो की आघाड्या, छोटे पक्ष असो की प्रस्थापित पक्ष, त्यांना लोक कंटाळले आहेत.व्यवस्था बिघडली असली तर निराश व्हायचे कारण नाही. कारण अजूनही चांगुलपणा कायम आहे, देशाविषयीची कळकळीची भावना आहे.'

कोल्हापूर टाइम्स टीम

केंद्रीय किचन पद्धती कायमची हद्दपार करा, कामगारांच्या मानधनात वाढ करा, धान्य व इतर वस्तूंचा पुरवठा वेळेवर करावा, गॅस सबसिडी मिळावी, बिले व मानधन दहा तारखेपूर्वी जमा करावीत'असे ठराव कोल्हापूर जिल्हा शालेय पोषण आहार कामगार संघटनेने केले आहे. दरम्यान 'कामगारांच्या प्रलंबित मागण्यांची पूर्तता करावी अन्यथा केंद्रीय मंत्री प्रकाश जावडेकर यांच्या निवासस्थानी मोर्चा काढण्यात येईल' असा इशारा संघटनेचे जिल्हाध्यक्ष प्राचार्य ए. बी. पाटील यांनी दिला.

संघटनेचे तिसरे जिल्हास्तरीय अधिवेशन झाले. शाहूपुरीतील आंतरभारती शिक्षण मंडळाच्या सभागृहात १५० प्रतिनिधी उपस्थिती होते. राज्य संघटनेचे अध्यक्ष प्रभाकर नागरगोजे आणि राज्य सचिव प्रा. डॉ. अशोक थोरात यांनी अधिवेशनात मार्गदर्शन केले. संघटनेचे जिल्हा सचिव अमोल नाईक यांनी तीन वर्षांच्या कामकाजाचा आढावा घेतला. पुढील तीन वर्षासाठी संघटनेची २४ सदस्यांची कार्यकारिणी जाहीर केली.

संघटनेच्या जिल्हाध्यक्षपदी प्राचार्य पाटील यांची फेरनिवड झाली. कार्याध्यक्षपदी कॉम्रेड भगवान पाटील, खजिनदारपदी प्रा. राजेंद्र गुंडे, उपाध्यक्षपदी वर्षा कुलकर्णी, महादेव फुटाणे, दिनकर पाटील यांच्या निवडी झाल्या. सचिवपदी अमोल नाईक, सहसचिवपदी शोभा पाटील, बळवंत दाभाळे यांच्या निवडीवर शिक्कामोर्तब झाले.

कोल्हापूर : अखिल भारत हिंदू महासभेतर्फे स्वातंत्र्यवीर वि. दा. सावरकर यांच्या स्मृतिदिनानिमित्त प्रतिमेस पुष्पहार अर्पण करण्यात आला. महासभेचे जिल्हाध्यक्ष मनोहर सोरप यांच्या हस्ते हा कार्यक्रम झाले. याप्रसंगी शाम जोशी यांचे भाषण झाले. संघटनेचे जिल्हा उपाध्यक्ष विनोद कोरे, बबन हरणे, नंदू घोरपडे, दिपाली खाडे, संजय कुलकर्णी, राजेंद्र शिंदे, संतोष पोवार आदी उपस्थित होते.

कोल्हापूर : कोल्हापूर शहर एनएसयूआय व युवक काँग्रेसच्यावतीने गोपाळ कृष्ण गोखले कॉलेजमध्ये बेहतर भारत अभियान व चलो वॉर्ड अभियान उपक्रम राबवण्यात आले. या अंतर्गत युवकांकडून युवाशक्ती कार्डनोंदणी करण्यात आली. दौलत देसाई व डॉ. मंजिरी मोरे यांनी या उपक्रमासाठी पुढाकार घेतला. एनएसयूआयचे अध्यक्ष अजिंक्य पाटील व युवक शहराध्यक्ष दीपक थोरात यांनी मार्गदर्शन केले. कार्यक्रमास काँग्रेसच्या महिला शहराध्यक्ष संध्या घोटणे, नगरसेवक अजित मोरे, साईराज पाटील, वैभव देसाई यांच्यासह पदाधिकारी, प्राध्यापक, विद्यार्थी उपस्थित होते.