म. टा. प्रतिनिधी, कोल्हापूर

'बंदुकीची गोळी झाडल्यावर ती परत येत नाही त्याप्रमाणे शिवसेनाप्रमुख बाळासाहेब ठाकरे हे कधीही आपल्या शब्दावर मागे फिरले नाहीत. पण 'चौकीदार चोर है' 'मोदी मुर्दाबाद', 'युती गेली खड्ड्यात' , अशी टीका करणाऱ्या उद्धव ठाकरे यांनी भाजपशी युती केल्याने शिवसेनेने विश्वासार्हता गमावली आहे. उद्धव ठाकरे हे सत्तेसाठी लाचार झाले असून त्यांच्या लाचारीबद्दल राज्यातील जनता त्यांना शिक्षा देईल', अशी टीका आमदार नितेश राणे यांनी केली.

आमदार राणे हे शुक्रवारी कोल्हापूर दौऱ्यावर आले होते. त्यांच्या हस्ते शहर कार्यालयाचे उद्घाटन झाले. यावेळी ते पत्रकारांशी बोलत होते. राज्यात शिवसेना हा महाराष्ट्र स्वाभिमान पक्षाचा प्रमुख शत्रू असून कोकण, मुंबई, ठाणे, विदर्भ आणि मराठवाड्यात पाच लोकसभा मतदारसंघात निवडणूक लढवली जाईल.' शिवसेना स्वार्थासाठी एकत्र आली आहे अशी टीका करुन राणे म्हणाले, 'राममंदिर, शेतकरी आत्महत्या या प्रश्नांवरुन भाजपवर टीका करणाऱ्या शिवसेनेने हे सर्व प्रश्न बाजूला ठेऊन मुख्यमंत्रीपद मिळवण्यासाठी भाजपबरोबर युती केली आहे. स्वबळावर सत्ता मिळवणे कठीण आहे, हे लक्षात आल्यावर शिवसेनेने १४४ जागांचा तोडगा काढला आहे. युती करणे म्हणजे शिवसेनेने आत्मविश्वास गमावल्याचे लक्षण आहे.'

गरज असेल तर आमची भाजपशी लढण्याची तयारी असल्याचे सांगून आमदार राणे म्हणाले, 'खासदार नारायण राणे हे कधीच भाजप पक्षात नव्हते. भाजपच्या सहयोगी पक्षाचे ते खासदार आहेत. भाजपच्या जाहीरनामा समितीचा ते लवकरच राजीनामा देणार आहेत. आमचा पक्ष लोकसभा आणि विधानसभा निवडणूक लढणार असून राज्यात निवडणूक लढवणारे चांगले उमेदवार व कार्यकर्ते पक्षात सहभागी होणार आहेत.'

पत्रकार परिषदेला जिल्हाध्यक्ष सचिन तोडकर, अशोक पाटील, बांधकाम व्यावसायिक जयेश कदम, विजय मांगुरे आदी उपस्थित होते. दरम्यान, पक्षाचे जिल्हाध्यक्ष म्हणून राणे यांनी सचिन तोडकर यांच्या नावाची घोषणा केली.

चौकट

स्वाभिमान लढणार पाच जागा

स्वाभिमान पक्ष राज्यात लोकसभेच्या पाच जागा लढणार आहे. यातील पहिली जागा खासदार नारायण राणे यांनी जाहीर केली आहे. त्यानुसार रत्नागिरी सिंधूदुर्ग मतदारसंघातून निलेश राणे लढतील. याशिवाय मुंबई, ठाणे, विदर्भ आणि मराठवाड्यातही या पक्षाचे उमेदवार असतील.

म. टा. वृत्तसेवा, कागल

राष्ट्रवादीचे नेते शरद पवार यांच्या आदेशानुसार जर राष्ट्रवादीने कागल पंचायत समितीत शिवसेनेशी युती तोडल्यास राष्ट्रवादीचीच मोठी अडचण होऊ शकते. कारण, शिवसेना आणि राष्ट्रवादी काँग्रेसचे समान पाच सदस्य असल्याने आणि राष्ट्रवादीचा एक सदस्य अपात्र झाल्याने याचा फायदा शिवसेनेलाच होण्याची शक्यता आहे.

सध्या पंचायत समितीत पक्षीय पातळीपेक्षा गटातटाचीच चलती आहे. जरी शिवसेना एकत्र लढली असली तरी यामध्ये माजी आमदार संजय घाटगे गटाचा एकच सदस्य असून मंडलिक गटाचे चार सदस्य आहेत. त्यामुळे ही युती राष्ट्रवादी-शिवसेना यापेक्षा मंडलिक आणि आमदार हसन मुश्रीफ गट अशीच मानली जाते. त्यामुळे सभापतिपदाच्या रोटेशननुसार आता आमदार मुश्रीफ गटाच्या राजश्री माने या पदावर असून उपसभापतीपदी प्रा. संजय मंडलिक गटाचे विजय भोसले हे आहेत.

पंचायत समितीची निवडणूक झाल्यानंतर शिवसेनेच्या माजी आमदार संजय घाटगे गटाने आमदार मुश्रीफ गटाचे सदस्य जोती मुसळे यांच्या कुणबी दाखल्यावर आक्षेप घेत न्यायालयीन प्रक्रियेद्वारे त्यांना अपात्र ठरवले आहे. परंतु यामध्ये मंडलिक गटाने इंटरेस्ट दाखवला नव्हता. आता राष्ट्रवादी काँग्रेस आणि शिवसेनेची युती तोडण्याचे आदेश वरिष्ठ पातळीवरून आल्यास साहजिकच याठिकाणी शिवसेनेची पाच विरुद्ध चार अशी सत्ता येऊन सभापती आणि उपसभापती सेनेचाच करावा लागणार आहे.

येथील कृती फाउडेशनतर्फे आयोजित कार्यक्रमात अर्चना पाटील यांच्या हस्ते प्रतिमा पूजन झाले. रेश्मा जमादार, अशितोष माने, विशाखा भास्कर, शिवानी नाईक आदी उपस्थित होते.

संजीवन इंग्लिश मीडियम स्कूलमध्ये अमर सरनाईक यांच्या हस्ते प्रतिमापूजन झाले. शिवकालीन वेशभूषा करून विद्यार्थ्यांनी लक्ष वेधले. प्राचार्य अपूर्वा सरनाईक, स्नेहा पाटील यांच्यासह शिक्षक, विद्यार्थी उपस्थित होते. राजे प्रतिष्ठानतर्फे आयोजित कार्यक्रमात जिल्हा अध्यक्ष सागर मांडवकर यांच्या हस्ते प्रतिमापूजन झाले. ए. डी. कुलकर्णी, जनार्दन गवळी, रघुनाथ अवताडे, पृथ्वीराज पाटील, स्वप्नील बराले यांच्यासह विद्यार्थी उपस्थित होते. कात्यायनी कॉम्लेक्स मंडळाने शिवजयंती साजरी केली. यावेळी शहीद जवानांना आदरांजली वाहण्यात आली.

कोल्हापूर: येथील 'ज्ञानेश्वर मुळे राष्ट्रीय विकास अकादमी'तर्फे येत्या मार्च महिन्यात राज्यस्तरीय काव्यसंमेलनाचे आयोजन केले आहे. 'वीर जवान...तुझे सलाम' या नावांनी हे काव्य संमेलन होणार आहे. संमेलनात मुक्त प्रवेश आहे. यामध्ये नवोदित कवींनी संस्थेच्या फोर्ड कॉर्नर येथील कार्यालयात नोंदणी करावी. काव्य संमेलनाची तारीख लवकरच जाहीर करण्यात येणार असल्याचे संस्थेने म्हटले आहे.

नितेश राणे

आज सोलापुरात

सोलापूर

महाराष्ट्र स्वाभिमान पक्षाचे नेते व आमदार नितेश राणे आज, शनिवारी सोलापूर शहर आणि जिल्ह्याच्या दौऱ्यावर येणार आहेत. दुपारी एक वाजता पत्रकार परिषद आयोजित करण्यात आली आहे. ते करमाळा तालुक्याला भेट देणार आहेत. सायंकाळी कुस्ती स्पर्धेचे उद्घाटन, महाराष्ट्र केसरी बालारफी शेख यांचा सत्कार करणार आहेत, अशी माहिती माजी नगरसेवक सुनील खटके यांनी दिली.

म. टा. वृत्तसेवा, पंढरपूर

'चांगली कामे करून निवडून येत येते, यावर माझा विश्वासच नाही, असे असते तर आयुष्यभर लोकांची कामे करूनही मी आणि सुशीलकुमार शिंदे निवडणुकीत पराभूत झालो नसतो,' अशी खंत महाराष्ट्र स्वाभिमानी पक्षाचे अध्यक्ष नारायण राणे यांनी शुक्रवारी व्यक्त केली. पंढरपूर तालुक्यातील वाडीकुरोली येथील कै. वसंतदादा काळे अमृतमहोत्सवी वर्षानिमित्त आयोजित शेतकरी मेळाव्यात राणे बोलत होते.

ज्येष्ठ नेते सुशीलकुमार शिंदे कार्यक्रमाच्या अध्यक्षस्थानी होते. कार्यक्रमाचे आयोजक कॉँग्रेसचे असल्यामुळे युती झाल्यानंतर राणे काय बोलतात. याकडे सर्वांचे लक्ष होते. राणे म्हणाले, 'आजवर सहा वेळा निवडून आलो, सातव्यांदा उभारलो आणि राज्यभर प्रचारासाठी फिरत राहिलो. मतदान केले आणि मतमोजणीला गेलो तर लोकानी मला आडवे केले होते. त्यामुळे कामे करून निवडून येते यावर माझा विश्वास राहिला नाही. अजूनही सोलापूर लोकसभा मतदारसंघाची उमेदवारी जाहीर झाली नाही. शेजारच्या (माढा) मतदारसंघात उमेदवार जाहीर झाला आहे, कारण त्यांच्या पक्षाचे ते मालकाच आहेत.' दरम्यान, 'या निवडणुकीत जर मोदी जिंकले तर ही देशातील शेवटची निवडणूक असेल. मोदींची वाटचाल हुकूमशहीच्या दिशेने सुरू आहे,' असे शिंदे म्हणाले. दरम्यान, माजी आमदार शहाजी पाटील यांनी शिंदेंच्या उपस्थितीतच जोरदार टोलेबाजी केली. शेतकऱ्यांच्या प्रश्नावर नेते फक्त विरोधात आल्यावरच बोलतात. सत्तेवर असताना त्यांना या गोष्टींसाठी वेळच नसतो, असेही पाटील म्हणाले.

............

कोट

स्वाभिमानी पक्षाच्या वतीने कोणाशीही आघाडी न करता आम्ही निवडणूक लढविणार आहोत. अजून किती जागा लढवायच्या या बाबत निर्णय झाला नाही. युती करणार नाही म्हणणाऱ्या उद्धव ठाकरे यांनी लाचारी का केली, याचे उत्तर मिळत नाही.

नारायण राणे, अध्यक्ष महाराष्ट्र स्वाभिमानी पक्ष

...........

कोल्हापूर टाइम्स टीम

रात्रीच्ययावेळी शहरातील एकही पेट्रोल पंप सुरू राहत नसल्याने वाहनधारकांची प्रचंड गैरसोय होत आहे. रात्री पंप सुरू ठेवण्यासंबंधी प्रयत्न करण्यात जिल्हा पुरवठा अधिकारी प्रशासन आणि तेल कंपन्यांचे अधिकारी उदासीन आहेत. पुरवठा प्रशासनाने पूर्णपणे अंग काढून घेत तेल कंपन्यांच्या अधिकाऱ्यांच्या कोर्टात चेंडू ढकलला आहे.

शहरात नोकरी, व्यवसायानिमित्ताने रात्रभर अनेक दुचाकी, चारचाकीधारकांची वर्दळ असते. याशिवाय अंबाबाई मंदिरासह विविध पर्यटनस्थळे पाहण्यासाठी परजिल्हा, राज्यातून प्रवाशी रात्री उशिराही येतात. वाहनधारकांना मध्यरात्री आणि पहाटे पेट्रोल, डिझेल मिळत नाही. त्यांना गैरसोयींना सामोरे जावे लागते. केवळ इंधन भरण्यासाठी म्हणून राष्ट्रीय महामार्गावरील पंपावर जावे लागते. म्हणून शहरातील सर्व भागातील एकेक पंप रात्रभर सुरू ठेवावेत, अशी मागणी जोर धरली आहे. मात्र यासंबंधीची कार्यवाही करण्याकडे सरकारी यंत्रणा सोयीस्करपणे दुर्लक्ष करीत आहे.

शहरात २५ पंप होते. त्यापैकी आठ पंप बंद झाले आहे. यामुळे कार्यरत पंपावर अतिरिक्त ताण आला आहे. वाहनांची संख्या वाढते आहे. दिवसभर पंपावर रांगा लागलेल्या दिसतात, अशा परिस्थितीत शहरातील पंप रात्री ११ वाजता बंद होतात. मात्र शहरातील जास्त वर्दळीच्या प्रमुख रस्त्यावरील पंप रात्रभर राहिल्यास वाहनधारकांची चांगली सोय होणार आहे. पण रात्रीच्यावेळी सुरक्षेचा मुद्दा उपस्थित करून पंपचालक उत्सुक नाहीत. त्यांच्यावर नियंत्रण ठेवण्याची जबाबदारी असलेल्या तेल कंपन्यांचे अधिकारी निष्क्रिय आहेत. ते ग्राहकांच्या हिताऐवजी पंप चालकांची बाजू घेताना दिसत आहेत. शहरात मध्यरात्री इंधन भरण्यासाठी येणाऱ्या काही ग्राहकांकडून दमदाटी होण्याची शक्यता असते, कामगार मिळत नाहीत अशा तकलादू कारणांचे समर्थन कंपन्याचे अधिकारी करीत आहेत. यामुळे राष्ट्रीय महामार्गावर रात्रभर पंप सुरू ठेवल्यानंतर सुरक्षेचा मुद्दा ऐरणीवर येत नाही तर शहरात का येतो, असा प्रश्न उपस्थित होत आहे.

रात्रभर पंप चालू ठेवण्याबाबत निर्णय घेण्याची जबाबदारी तेल कंपन्यांच्या विक्री अधिकाऱ्यांची आहे. पुरवठा विभागाकडे हा विषय येत नाही.

अमित माळी, प्रभारी जिल्हा पुरवठा अधिकारी

Bhimgonda.Desai@timesgroup.com

Tweet : @bhimgondaMT

कोल्हापूर : सरकारकडून जिल्ह्यातील विविध विकासकामांसाठी प्राप्त झालेल्या ७२ कोटी लोकसभा निवडणुकीच्या आचारसंहितेच्या कचाट्यात सापडण्याची चिन्हे आहेत. प्रशासकीय दिरंगाईपणा आणि लोकप्रतिनिधींच्या ठोस पाठपुराव्यांअभावी निधी वेळेत खर्च झालेला नाही. त्याचा विकास कामावर परिणाम होत आहे. मार्च महिन्याच्या पहिल्या आठवड्यात आचारसंहिता लागू होण्याची शक्यता असल्याने हा निधी कसा खर्च होणार याबाबत प्रश्नचिन्ह उपस्थित होत आहे.

राज्य सरकारकडून आलेला निधी प्रत्यक्ष कामावर खर्च करण्यासाठी जिल्हा परिषद आणि इतर सरकारी विभागाकडे वर्ग केला जातो. पालकमंत्र्यांच्या अध्यक्षतेखालील जिल्हा नियोजन समितीमध्ये मंजूर कामांना आवश्यक निधीचे वितरण संबंधित विभागाच्या खात्यावर वर्ग केले जाते. अंमलबजावणीची जबाबदारी असलेल्या विभागाकडून आलेल्या पात्र प्रस्तावांना नियोजन समितीकडून प्रशासकीय मंजुरी दिली जाते. त्यानुसार निविदा काढून ठेकेदार निवडणे, काम सुरू करण्याचा आदेश देणे, प्रत्यक्ष कामास सुरुवात होणे असे महत्त्वाचे टप्पे पूर्ण व्हावे लागतात. मात्र टक्केवारीचे गणित जमत नसल्याने शेवटच्या टप्यातच दिरंगाई जाणवते. काही विभागाची प्रचंड अनास्था आहे. त्यांनी आलेल्या निधीकडे पाहिलेलेही नाही.

निधी वर्ग करूनही उपवनसंरक्षक, सामाजिक वनीकरण, पाटबंधारे, प्राथमिक शिक्षण, जिल्हा व्यवसाय शिक्षण, प्रशिक्षण, जिल्हा क्रीडा अधिकारी, सीपीआर, वरिष्ठ भूवैज्ञानिक, महसूल, नगरविकास, समाज कल्याण, कौशल्य विकास, रोजगार, उद्योजकता मार्गदर्शन केंद्र, जिल्हा ग्रंथालय अधिकारी, पोलिस या विभागाकडे निधी वर्ग करूनही त्यांनी खर्च केलेला नाही. तोंडावर आचारसंहिता आल्याने आता हा निधी खर्च होणे अवघड आहे. इतर विभागाकडे वर्ग केलेला सर्व निधी खर्च झालेला नाही. यामुळे मिळालेल्या ७२ कोटींचा निधी आचारसंहितेपूर्वी खर्च करणे आव्हानात्मक आहे. निधी शिल्लक असलेल्या विभागाचे प्रशासकीय कामकाज अजूनही कासवगतीनेच चालले आहे. यामुळे निधी परत करण्याची नामुष्की ओढवणार आहे.

शिल्लक निधीपैकी किती निधी खर्च होणार आणि परत किती करणार यासंबंधीची सविस्तर माहिती देण्याचे आवाहन केले आहे. यासंबंधीचे पत्र सर्व खातेप्रमुख आणि माहितीसाठी लोकप्रतिनिधींना दिले आहेत. आचारसंहितेपूर्वी अधिकाधिक निधी विकास कामावर खर्च होण्यासाठी पाठपुरावा सुरू आहे.

सरिता यादव, जिल्हा नियोजन अधिकारी

जिल्हाधिकारी बदलले, काम वाढले

जिल्हा नियोजन समिती प्रशासन प्रशासकीय मंजुरीसाठीचा प्रस्ताव जिल्हाधिकाऱ्यांच्या नावासह तयार करते. त्यावर सही झाल्यानंतर पुढील प्रक्रिया होते. दरम्यान, जिल्हाधिकारी अविनाश सुभेदार यांची गेल्या आठवड्यात बदली झाली. त्यांच्या नावे असलेले प्रस्ताव बदलून नव्या जिल्हाधिकाऱ्यांचे नावे प्रस्ताव करावा लागत आहे. आधीच्या जिल्हाधिकाऱ्यांचे नाव आहे, मात्र सही न झालेल्या सर्व प्रस्तावात बदल करावा लागत आहे. यामुळे जिल्हाधिकारी बदले आणि काम वाढले, असे चित्र प्रशासनात दिसते आहे. लोकप्रतिनिधींही निवडणूक तयारीला लागले आहेत. विकास कामे वेळेत पूर्ण करण्यासाठीचे त्यांचे प्रयत्न कमी झाले आहेत.

१९२ कोटी ३९ लाख

एकूण प्राप्त निधी

१५८ कोटी ११ लाख

वितरित निधी

१२० कोटी १५ लाख

खर्च झालेला निधी

७२ कोटी

शिल्लक निधी

म. टा. वृत्तसेवा, हातकणंगले

हातकणंगले येथील तहसीलदार कार्यालय सकाळी आठ वाजल्यापासून रात्री आठ वाजेपर्यंत नेहमीच गजबजलेले असते. मात्र, गेल्या काही दिवसांपासून प्रधानमंत्री किसान योजनेच्या कामासाठी रात्री उशिरापर्यंत कार्यालयीन काम सुरू आहे. त्यामुळे गेल्या मंगळवारी रात्री अकरा वाजता नूतन जिल्हाधिकारी दौलत देसाई यांनी तहसीलदार कार्यालयाला अचानक भेट देऊन प्रधानमंत्री किसान योजनेचा आढावा घेतला. जिल्हाधिकाऱ्यांच्या 'सरप्राइज' भेटीने महसूल अधिकाऱ्यांची तारांबळ उडाली.

हातकणंगले तालुक्यातील प्रधानमंत्री किसान योजनेचा आढावा घेताना जिल्हाधिकारी देसाई यांनी स्वतः कर्मचाऱ्यांच्या कामाच्या ठिकाणी जाऊन आकडेवारी पाहिली. एक हजारपेक्षा जास्त काम केलेल्या मंडल अधिकारी व तलाठ्यांसह प्रांताधिकारी समीर शिंगटे, तहसीलदार सुधाकर भोसले यांचे कौतुक केले. योजनेसाठी रात्री उशिरापर्यंत सुरू झालेल्या कामाबाबत जिल्हाधिकाऱ्यांनी त्यांना शाबासकीची थाप दिली. अतिरिक्त जिल्हाधिकारी संजय शिंदे, अविनाश हादगल, इचलकरंजीचे प्रांताधिकारी समीर शिंगटे, तहसीलदार सुधाकर भोसले आदींसह अनेक अधिकारी उपस्थित होते.

दरम्यान, हातकणंगले तालुक्यातील ज्या शेतकऱ्यांची शेतजमीन दोन हेक्टरच्या आत आहे, त्यांनी प्रधानमंत्री किसान सन्मान योजनेत सहभागी होण्यासाठी बँक खाते, आधार कार्ड क्रमांक त्वरित द्यावे, असे आवाहन हातकणंगले तहसीलदार सुधाकर भोसले यांनी केले आहे.

००००

म. टा. प्रतिनिधी, कोल्हापूर

महाशिवरात्री सणाच्या पार्श्वभूमीवर बाजारात साखर, साबूदाणा, वरीच्या दरात वाढ झाली आहे. तूरडाळीच्या दरातही प्रतिकिलो तीन ते चार रुपयांनी वाढ झाली आहे. तर ज्वारीच्या दरात प्रतिकिलो दोन ते तीन रुपयांनी घट झाली आहे.

मार्चच्या पहिल्या आठवड्यात महाशिवरात्री उत्सव असून उपवासांच्या पदार्थांना मोठी मागणी असते. उत्सवाच्या पार्श्वभूमीवर साबूदाणा दरात प्रतिकिलो चार ते पाच रुपयांनी वाढ झाली आहे. वरीचा दरही चांगलाच वधारला असून प्रतिकिलो सहा ते आठ रुपयांनी वाढ झाली. साबूदाण्याचा प्रतिकिलो दर ५४ ते ६० रुपये असून वरीचा दर ७५ ते ८० रुपये इतका झाला आहे. साखरेच्या दरात प्रतिकिलो दोन रुपयांनी वाढ झाली आहे. केंद्र सरकारने साखरेचा दर प्रतिकिलो २९ रुपयांवरुन ३१ रुपये केल्याने दर वाढला आहे. तूरडाळीच्या दरात तीन ते चार रुपयांनी वाढ झाली आहे. बाजारात ज्वारीची नव्याने आवक झाल्याने दर घसरले आहेत. प्रतिकिलो दोन ते चार रुपयांनी घट झाली आहे.

किराणा दर (प्रतिकलो रुपयांत)

पोहे : ४४

साखर : ३६ ते ३८

शेंगदाणा : ८० ते १००

मैदा : ३२

आटा : ३२ ते ३६

रवा : ३२

गूळ : ४० ते ५०

साबुदाणा : ६० ते ७०

वरी : ७५ ते ८०

००००

डाळीचे दर (प्रतिकिलो रुपयांत)

तूरडाळ : ८० ते ९०

मूगडाळ : ८४

उडीद डाळ : ८०

हरभरा डाळ : ६४ ते ६८

मसूर डाळ : ६४

मसूर : ६० ते १२०

चवळी : ७२

हिरवा वाटाणा : ८८ ते ९०

काळा वाटाणा : ६० ते ६४

मूग ७४ ते ८०

मटकी : ८० ते १००

छोले : ८० ते ९०

००००

ज्वारी दर (प्रतिकिलो रुपयांत)

बार्शी शाळू : ३२ ते ४४

गहू : ३० ते ३६

हायब्रीड ज्वारी : २४ ते २८

बाजरी : २८

नाचणी : ३५

००००

तेलाचे दर (प्रतिकलो रुपयांत)

शेंगतेल : १२४

सरकी तेल : ८८

खोबरेल : २४०

सूर्यफूल : ९० ते १०५

०००

मसाले दर (प्रतिकलो रुपयांत)

तीळ : १८०

जिरे :२८०

खसखस : ७००

खोबरे : १९०ते २००

वेलदोडे : २०००

०००००

म. टा. प्रतिनिधी, कोल्हापूर

ऐतिहासिक गडकिल्ल्यांच्या संवर्धनासाठी सरदारी घराणी पुढे सरसावली आहेत. सरदार घराण्यांचे वंशज गेली चार वर्षे गेल्या चार वर्षापासून फेब्रुवारी महिन्याच्या शेवटच्या रविवारी एकत्र येऊन दुर्गपूजा करत आहेत. त्यानुसार यंदा रविवारी (ता. २४) देशभरातील १३१ किल्ल्यांवर दुर्गपूजनाचा कार्यक्रम होणार आहे. या उपक्रमासाठी राज्यातील ५० किल्ल्यांवर ८०पेक्षा जास्त सरदार घराणी उपस्थित राहणार आहेत. मराठे सरदार सुभा आणि शिवाजी ट्रेलच्या संयुक्त विद्यमाने गडकिल्ल्यांविषयी प्रबोधनासाठी हा उपक्रम हाती घेतल्याचे नीलराजे बावडेकर यांनी सांगितले.

दुर्गपूजा उपक्रमांतर्गत कोल्हापूर जिल्हा आणि परिसरातील चार किल्ल्यांवर उपक्रमाचे नियोजन केले आहे. विजयदुर्ग येथे भूषणसिंह होळकर, पन्हाळा येथे तेजसिंह गायकवाड, रणवीर निंबाळकर, पावनगड येथे अधिराजसिंह डफळे, गगनगड येथे निलराजे बावडेकर हे सरदार घराण्यातील वंशज दुर्गपूजा करणार आहेत. दुर्गपूजेच्या माध्यमातून वास्तूची साफसफाई करून नागरिकांत प्रबोधन, महत्व विषद करण्यात येणार असल्याचे बावडेकर यांनी सांगितले.

बावडेकर म्हणाले, 'यंदा महाराष्ट्रासह पंजाब, दिल्ली, मध्यप्रदेश, राजस्थान, गुजरात, दमण, गोवा, केरळ, कर्नाटक, आंध्रप्रदेश, तामिळनाडू या राज्यांतील गडकिल्ल्यांवर हा उपक्रम होणार आहे. दुर्गपूजाच्या माध्यमातून किल्ल्यांची साफसफाई, वास्तूची स्वच्छता आणि प्रार्थना केली जाते. दुर्ग संवर्धन क्षेत्रातील तज्ज्ञ मिलिंद क्षीरसागर यांच्या मार्गदर्शनाखाली काम सुरू आहे. त्याअंतर्गत किल्ल्यांवर ध्वजस्तंभ उभारणी, वनस्पती, फुले यांचा अभ्यास व नोंदी, किल्ल्यांचे सर्वेक्षण, दुर्ग संवर्धक कार्यशाळा अशी विविध कामे सुरू आहेत.'

म. टा. प्रतिनिधी, कोल्हापूर

'राज्यातील सुमारे आठ हजार आयसीटी शिक्षकांना पूर्ववत सेवेत घेण्याच्या प्रस्तावाला सरकारने तत्काळ मंजुरी द्यावी. मानधनात वाढ करावी, अन्यथा लोकसभा निवडणुकीत संबंधित शिक्षक भारतीय जनता पक्षाविरोधात प्रचारार्थ मैदानात उतरतील' अशा इशारा कोल्हापूर जिल्हा आय. सी. टी. शिक्षक व शिक्षिका संघटनेचे जिल्हा सचिव भोजराज पवार, जिल्हाध्यक्ष योगेश गावकर यांनी पत्रकार बैठकीत दिला. 'गेल्या दहा महिन्यांचा पगारही थकीत आहे. सरकारने न्याय दिला नाही राज्यभर आंदोलन केले जाईल' असेही ते म्हणाले.

भोजराज पवार म्हणाले, 'शालेय विद्यार्थ्यांना कम्प्युटरचे शिक्षण देण्यासाठी यूपीए सरकारने 'इन्फॉर्मेशन कम्युनिटी अँड टेक्नॉलॉजी' (आयसीटी) योजना सुरू केली होती. या योजनेंतर्गत कम्प्युटरचे शिक्षण पूर्ण केलेल्या उमेदवाराला पाच वर्षासाठी आयसीटी शिक्षक म्हणून नियुक्ती केली. केंद्र व राज्य सरकारच्या प्रत्येकी ७५ आणि २५ टक्के अनुदानातून शिक्षकांचे वेतन देण्याची तरतूद आहे. आयसीटी शिक्षकांनी राज्य सरकारच्या शालेय शिक्षण विभागाकडे मानधनात वाढ आणि कायमस्वरुपी नियुक्ती करावी अशी मागणी केली होती. शिक्षणमंत्री विनोद तावडे यांनी संबंधित शिक्षकांना सामावून घेण्यात येईल असे आश्वासन दिले होते. मंत्री तावडे यांनी २४ जुलै २०१७ रोजी कम्प्युटर शिक्षकांना मानधनावर सामावून घेण्याबाबतचा प्रस्ताव राष्ट्रीय माध्यमिक शिक्षा अभियानांतर्गत केंद्र सरकारकडे पाठवू जाहीर केले. राज्य सरकारकडून या आठवड्यात प्रस्ताव केंद्र सरकारकडे सादर होणार आहे. मनुष्यबळ विकासमंत्री प्रकाश जावडेकर यांनी या प्रश्नी लक्ष घालून शिक्षकांना पूर्ववत सेवेत घेण्याच्या प्रस्तावाला मंजुरी द्यावी. सध्याच्या मानधनात वाढ करुन ते नऊ व तेरा हजार रुपये करावे. अन्यथा आयसीटी शिक्षक संघटना लोकसभा निवडणुकीवर बहिष्कार टाकतील. तसेच सरकारच्या विरोधात प्रचार करतील.'

श्रमिक संघाचे अध्यक्ष कॉम्रेड अतुल दिघे म्हणाले, 'श्रमिक संघ आयसीटी शिक्षकांच्या पाठीशी आहे. शिक्षकांचे दहा महिन्याचे वेतन पूर्णपणे जमा न केल्यास संबंधित कंपनीच्या विरोधात भूमिका घेतली जाईल.'

पत्रकार परिषदेला रवि कांबळे, हिना बेफारी, पूजा पाटील, स्वाती पाटील आदी उपस्थित होते.

आज कराडमध्ये

शहिदांना आदरांजली

कराड :

खासदार उदयनराजे भोसले यांच्या वाढदिवसानिमित्त रविवारी, २४ रोजी शहीद जवानांना आदरांजली वाहण्याच्या कार्यक्रमाचे आयोजन करण्यात आले आहे. यशवंतराव चव्हाण यांच्या समाधी परिसरात कार्यक्रम होणार असून, खासदार उदयनराजे भोसले यांच्या उपस्थित १२७ जवानांच्या कुटुबीयांचा सन्मान करण्यात येणार असल्याची माहिती माजी उपनगराध्यक्ष व नगरसेवक राजेंद्र यादव यांनी दिली.

सरकारी विश्रामगृहात गुरुवारी दुपारी आयोजित पत्रकार परिषदेत ते बोलत होते. या वेळी जिल्हा परिषद सदस्य सुनील काटकर, नगरसेवक हणमंतराव पवार, विजय वाटेगांवकर, शंकर माळवदे, विजय यादव, सुधीर एकांडे यांच्यासह अन्य मान्यवर उपस्थित होते. राजेंद्र यादव म्हणाले, २४ फेब्रुवारी रोजी उदयनराजे भोसले यांचा वाढदिवस असतो. मात्र पुलवामा येथील घटनेमुळे वाढदिवसाचा कार्यक्रम रद्द करण्यात आला आहे. त्या ऐवजी जम्मू- काश्मीरमधील पुलवामा येथील भ्याड हल्यात शहीद झालेल्या तसेच आजअखेर सातारा जिल्ह्यातील देशसेवा करताना धारातिर्थी पडलेल्या वीर जवानांच्या कुटुंबीयांचा सन्मान करण्यात येणार आहे. या कार्यक्रमाला सर्व पक्षांचे लोकप्रतिनिधी, विविध सामाजिक संस्था, क्रीडा, शैक्षणिक व आर्थिक संस्था, डॉक्टर, इंजिनिअर,मेडिकल व बार असोशिएशन तसेच तरुण मंडळे, रिक्षा संघटना व समाजातील इतर घटक यांना निमंत्रित करण्यात येणार आहे. कराड व सातारा येथील महाविद्यालयातील एन.सी.सी कॅडेट व शालेय विद्यार्थ्यांचा सहभाग राहील. चव्हाण साहेबांच्या समाधीस्थळी दोन हजार एन.सी.सी.कॅडेट कॅडल मार्च घेऊन येतील. शालेय विद्यार्थी देशभक्तीपर गीत सादर करणार आहेत. शहीद स्तंभ असणार आहे. आर्मी बॅन्ड व पोलिस बॅन्ड श्रद्धाजंली अर्पण करतील. लोकप्रतिनिधी व वरिष्ठ प्रशासकीय अधिकारी उपस्थित राहणार आहेत. शेवटी देशभक्तीपर गीतांचा कार्यक्रम होईल.

म. टा. प्रतिनिधी, कोल्हापूर

महाराष्ट्र राज्य कनिष्ठ महाविद्यालयीन शिक्षक संघाने प्रलंबित मागण्यांसाठी बारावीच्या उत्तरपत्रिका तपासणीवर पुन्हा बहिष्कारास्त्र उगारले आहे. मागण्या मान्य होईपर्यंत पेपर तपासणीवर बहिष्कार टाकण्याचा निर्णय संघटनेने घेतला आहे.

राज्य माध्यमिक व उच्च माध्यमिक शिक्षण मंडळातर्फे शनिवारी बोलाविलेल्या नियामकांच्या सभेवर इंग्रजी विषयाच्या नियामकांनी बहिष्कार टाकला. नियामकांपाठोपाठ उत्तरपत्रिकांची तपासणी करणारे परीक्षकही विभागीय मंडळाशी असहकार आंदोलन करणार असल्याचे कोल्हापूर विभागीय कनिष्ठ महाविद्यालयीन शिक्षक संघाचे अध्यक्ष प्रा. पी. एन. औताडे यांनी स्पष्ट केले.

कायम विनाअनुदानित अनुदानास पात्र शाळांची यादी वेतन अनुदानासह जाहीर झाली पाहिजे, सर्वांना सरसकट निवडश्रेणी, आयटी विषयास वेतन व अनुदान मिळावी, २००३ ते २०११ मधील पदांना मान्यता देऊन पुनरूज्जीवित करणे, या कालावधीतील वगळलेल्या पदांसह २०११ पासून वाढीव पदांना मंजुरी द्यावी आदी प्रमुख मागण्यांसाठी संघटना सातत्याने लढा देत आहेत. तथापि, संघटनेचे आश्वासनावरच बोळवण केली जात असल्याचा आरोप संघटनेने केला आहे. शिक्षकांनी ऐन परीक्षेच्या कालावधीत असहकार आंदोलन पुकारल्यामुळे बारावीच्या उत्तरपत्रिका तपासणी आणि गुणपत्रिका मूल्यमापन कामावर थेट परिणाम होणार आहे. सरकारने, कनिष्ठ महाविद्यालयीन शिक्षकांच्या मागण्याकडे दुर्लक्ष केल्यास राज्यभरातील ९१ लाख उत्तरपत्रिका तपासणीच्या कामावर परिणाम होणार असल्याचेही शिक्षक संघाने म्हटले आहे.

.. .. .. ..

.. .. .. ..

कोल्हापूर : थंडीचा कडाका संपून उन्हाचा तडाखा वाढला असून शनिवारी कोल्हापूरचा पारा ३६.१ अंशावर गेला. त्यामुळे दुपारी रस्त्यावरील वर्दळ थंडावली. उन्हामुळे हैराण झालेल्या नागरिकांना थंड पेयांचा आधार घ्यावा लागला.

गेले अडीच महिने थंडीने जिल्हा चांगलाच गारठून गेला होता. पण गेल्या काही दिवसांपासून उन्हाळ्याची चाहूल लागली आहे. सकाळच्या थंड वातावरणानंतर दुपारी उन्हाचा तडाखा चांगलाच जाणवू लागला आहे. शुक्रवारी (ता. २२) तापमान ३४.१ अंश होते. आज पारा दोन अंशानी वाढला होता. सकाळी दहा वाजल्यापासून उन्हामुळे अंगाची लाहीलाही होऊ लागल्याने नागरिकांनी थंड पेयांचा आधार घेतला. आइस्क्रीम पार्लर, रसवंती गृहामध्ये गर्दी झाली होती. कलिंगडाचीही चांगली विक्री झाली. नागरिकांनी उन्हापासून बचाव करण्यासाठी टोप्या व गॉगलचा आधार घेतला. तर महिलांकडून सनकोटचा वापर सुरू झाला आहे.

शिवसेनेची विश्वासार्हता संपली

सोलापूर :

'अतिरेकी कारवायांबाबत भारताला जसे वारंवार पाकिस्तानने फसविल्यामुळे जगात पाकिस्तानची जशी विश्वासार्हता संपली आहे, त्याच पद्धतीने महाराष्ट्रात शिवसेनेची विश्वासार्हता संपली आहे,' असा जोरदार टीका आमदार नितेश राणे यांनी केली. रत्नागिरी-सिंधुदुर्ग यासह महाराष्ट्रात लोकसभेच्या पाच जागा स्वाभिमानी पक्ष लढविणार आहे, अशी माहितीही आमदार राणे यांनी दिली. महाराष्ट्र स्वाभिमान पक्षाच्या सोलापुरातील पदाधिकारी आणि कार्यकर्ता बैठकीसाठी शनिवारी आमदार राणे सोलापूर दौऱ्यावर आले होते.

राणे म्हणाले, 'आगामी निवडणुकीत शिवसेनेमुळे भाजपला फटका बसणार आहे. सत्तेत असताना देखील शिवसेनेने भाजपवर टीकेची झोड उठविली होती. शिवाय कोकणातील शिवसेनेच्या नेत्यांनी अत्यंत खालच्या पातळीवर जाऊन भाजपवर टीका केल्याचे सर्वश्रुत आहे. आता मात्र युती झाल्यानंतर शिवसेना नेते उद्धव ठाकरे भाजप नेत्यांबरोबर फोटोशेशन करीत आहेत आणि या वरूनच शिवसेनेची विश्वासार्हता दिसून येते. सत्तेत असताना शिवसेनेने कोणताही प्रश्न सोडविलेला नाही. धनगर आरक्षणाबाबत समाज बांधवांना न्याय दिलेला नाही. आता तर पहले मंदिर फिर सरकारचा नारा देणाऱ्या शिवसेनेने आता राम मंदिराचा मुद्दा बाजूला सोडून अतिरेकी कारवायांबाबत आपली भूमिका मांडण्यास सुरवात केली आहे. एकूणच भाजपची राजकीय गणिते चुकत असून, भाजपाला शिवसेनेला सोबत घेतल्याचा फटका बसल्याशिवाय राहणार नाही.' शिवसेना राज्यातील जनतेला मूर्ख बनवत आहे. महाराष्ट्राची जनता शिवसेनेसोबत फरपटत जाणार नाही. महाराष्ट्रातील जनता शिवसेनेला खड्यासारखे बाजूला केल्याशिवाय राहणार नाही आणि निवडणुकीनंतर शिवसेनेला सोबत घेतल्याचा भाजपला पश्चाताप झाल्याशिवाय राहणार नाही, असेही राणे म्हणाले. दरम्यान, अण्णासाहेब पाटील आर्थिक महामंडळाच्या माध्यमातून सरकारने मराठा समाजातील जनतेला फसविले आहे. आतापर्यंत एकाही तरुणाला बँकांनी कर्ज दिलेले नाही. त्यामुळे आता बँका फोडायची वेळ आली आहे, अशा शब्दात आमदार राणे यांनी आपला संताप व्यक्त केला.