म. टा. प्रतिनिधी, कोल्हापूर

शहराचा विकास झपाट्याने होत असताना अनेकजण घराचे स्वप्न पाहतात. प्लॉट, फ्लॅट, रो-हाऊससोबत अनेकजण प्रशस्त बंगलोसाठी पसंती देतात. ग्राहकांच्या मनातील घराची सुप्त इच्छा शाहूपुरी येथे आयोजित केलेल्या 'क्रिडाई दालन २०१९' प्रदर्शनामधून पूर्ण होत आहे. स्वप्नातील घर पाहण्यासाठीच्या या प्रदर्शनाला नवतंत्रज्ञानाचीही जोड दिली आहे. त्यामुळे शनिवारी प्रदर्शनाच्या दुसऱ्या दिवशी शहरवासियांनी उत्स्फूर्त प्रतिसाद दिला.

नैसर्गिक साधन सपन्नता, मुबलक पाणी आणि मिळणाऱ्या पायाभूत सुविधांमुळे कोल्हापूरात घर असावे असे स्वप्न अनेकजण पाहतात. मुंबई, पुण्यानंतर अनेकजण स्वप्नातील घरासाठी कोल्हापूरला पसंती देतात. यामुळे शहराचा विस्तार वेगाने होत असून बांधकाम व्यावसायिकांच्यामुळे विकासाला चालना मिळाली. त्यामध्ये येथील बांधकाम व्यावसायिकांची शिखर संस्था असलेल्या क्रिडाईचा सहभाग महत्त्वपूर्ण राहिला आहे. या संस्थेच्या माध्यमातून दर तीन वर्षांनी 'दालन'च्या माध्यमातून बांधकाम क्षेत्रातील बदलत्या तंत्रासोबत आकर्षक फ्लॅटची उपलब्धता करुन दिली जाते.

अद्ययावत अशा तंत्राने परिपूर्ण असे आधुनिक वास्तू व बांधकाम विषयक माहितीचे सुमारे १६० स्टॉल्स प्रदर्शनात आहेत. बांधकाम क्षेत्रासाठी लागणाऱ्या अत्याधुनिक मिक्सर, बार कटिंग, व्हायब्रेटर, मिक्सर वीथ लीफ्ट अशा साहित्यांची येथे आकर्षक पद्धतीने मांडणी केली आहे. स्वप्नातील फ्लॅट खरेदीनंतर हॉलमधील सजावटीला प्राधान्य देऊन येथे फर्निचर, सोफासेटसह इंटिरिअरची माहिती ग्राहक घेत आहेत. शहर आणि उपनगरांमध्ये सुरू असलेल्या बांधकाम प्रकल्पांची त्यामध्ये देण्यात येणाऱ्या सुविधांसह प्रेझेंटेशन करण्यात आले आहे. पूर्वी या कमात प्लायउडचा वपार होत होता. आता प्लास्टिकपासून बनवलेल्या दारे, चौकटी, खिडक्या उपस्थितांचे लक्ष वेधून घेत आहेत. विशेषत: बाथरुममधील बदललेल्या साहित्यांची मांडणी प्रदर्शनात आहे. प्रधानमंत्री आवास योजनेच्या अनेक प्रकल्पांची येथे विस्तृत मांडणी येथे केली आहे. त्यामुळे प्रदर्शनाच्या दुसऱ्या दिवशी ग्राहकांचा उत्स्फूर्त प्रतिसाद मिळाला आहे.

सायंकाळच्या सत्रात बांधकाम व्यवसायातील बदलांचा सेमिनारच्या माध्यमातून आढवा घेतला. बी. जी. शिर्के कंपनीचे सिनिअर जनरल मॅनेजर सी. एम. अडसर, शशीकांत किल्लेदार-पाटील यांनी मार्गदर्शन केले. सार्वजनिक बांधकाम विभागाचे अधीक्षक अभियंता संभाजी माने यांनीही मार्गदर्शन केले.

पर्यावरणाचा संदेश

फ्लॅट, प्लॉटची माहिती देताना अनेक बांधकाम व्यावसयिक पर्यावरणपूरक प्रकल्पांला प्राधान्य देत असल्याचे सांगत आहेत. शहराच्या पर्यावरणाचा समतोल राखणारे प्रकल्प खरेदीदारांना आकर्षित करत आहेत. दालनच्या प्रवेशद्वारावर पर्यावरणाचा संदेश दिला जात आहे. आकर्षक फुले, झाडांची सजावट केली असून नर्सरीच्या माध्यमातून शोभिवंत रोपांची मांडणी केली आहे.

मोहिते-पाटील, सोपल, परिचारक, ढोबळेंसह ३९ जणांवर ठपका

सोलापूर

सोलापूर जिल्हा मध्यवर्ती बॅँक बरखास्त झाल्यानंतर बँकेतील गैरव्यवहाराची नेमकी स्थिती समजून घेण्यासाठी चाचणी लेखापरीक्षण (टेस्ट ऑडिट) करून घेण्यात आले होते. त्याचा अहवाल शुक्रवारी तयार झाला आहे. अहवालात १९९२पासून केलेल्या कर्जवाटपाची यादीच जोडली आहे. संबंधित ८१ जणांना म्हणणे देण्याच्या नोटिसा दिल्या आहेत. शिवाय कर्जे घेऊनही थकीत राहिलेल्या ५४ सहकारी संस्थांच्या ५४८ संचालकांनाही नोटिसा देण्याची प्रक्रिया सुरू आहे, अशी माहिती लेखापरीक्षक पिंगळे यांनी दिला आहे.

मुलीच्या खूनप्रकरणी वडिलांना अटक

कराड :

पाटण तालुक्यातील ढेबेवाडी विभागातील करपेवाडी गावच्या हद्दीत उसाच्या शेतात भाग्यश्री उर्फ सोनू संतोष माने या सतरा वर्षीय अल्पवयीन विद्यार्थिनीचा धारधार शस्त्राने गळा चिरून निर्घून हत्या झाल्याची घटना मंगळवारी, २२ जानेवारीला उघड झाली होती. या प्रकरणी भाग्यश्रीचे वडील संतोष माने यांनाच पोलिसांनी अटक केली आहे. हा खून अंधश्रद्धेतून झाला असल्याची माहिती समोर येत आहे. या बाबत एका मांत्रिकाचीही चौकशी सुरू आहे.

करपेवाडी-तळमावले या गावच्या हद्दीतील देसाई शेत शिवारालगतच्या एका उसाच्या शेतामध्ये अज्ञाताने गळा चिरून भाग्यश्री मानेचा निर्घृण खून केल्याची घटना उघडकीस आली होती. तपासादरम्यान ढेबेवाडी पोलिसांच्या हाती काही महत्वाचे धागेदोरे लागले होते. पोलिसांनी तिच्या वडिलांना ताब्यात अटक केली आहे. भाग्यश्रीचा खून हा अंधश्रद्धेतून झाला असल्याच्या संशय असून पोलिस मांत्रिकाची चौकशी करीत आहेत.

म. टा. प्रतिनिधी, कोल्हापूर

महापालिका क्षेत्रातील अनेक मिळकतदारांना प्रॉपर्टी कार्ड मिळत नाही. त्यामुळे त्यांना केवळ सात-बारा उतारा नोंद असल्याने दुहेरी कर भरावा लागत आहे. याबाबतचे निवेदन आमदार अमल महाडिक यांनी मुख्यमंत्री देवेंद्र फडणवीस यांना दिले. निवेदनानंतर मुख्यमंत्र्यांनी शहरातील सर्व मिळकतींचे प्रॉपर्टी कार्ड तयार करण्याचे आदेश दिले. त्यानुसार नगरविकास विभागाच्या सचिवांनी जिल्हाधिकारी आणि महापालिका आयुक्तांना निर्णयाची अंमलबजावणी करण्याच्या सूचना दिल्या आहेत.

याबाबत आमदार महाडिक यांनी पत्रकात म्हटले आहे, 'शहरातील महापालिका क्षेत्रातील भागाचे नागरिकरण झाले आहे. मात्र सर्व भागांचे नगर

भूमापन झालेले नाही. त्यामुळे नागरिकांना अद्याप त्यांचा मिळकतींचा केवळ सात-बारा उतारा मिळत आहे. त्यामुळे मिळकतदारांना दुहेरी कर भरावा लागत आहे. त्यामुळे महापालिका क्षेत्रातील नगरभूपान होऊन प्रॉपर्टी कार्ड देण्याची आवश्यकता आहे. नागरिकांच्या या समस्येबाबत आमदार महाडिक यांनी पाठपुरावा केला. त्यांच्या पाठपुराव्यानंतर मुख्यमंत्र्यांनी प्रॉपर्टी कार्ड देण्याचे आदेश दिले. त्यानुसार १५ जानेवारी रोजी नगरविकास विभागाचे अवर सचिवांनी निर्णयाची अंमलबजावणी करण्याच्या सुचना जिल्हाधिकारी व आयुक्तांना दिले आहेत.'

म. टा. वृत्तसेवा, इचलकरंजी

केंद्र सरकारच्या टफ योजनेशी निगडित नवीन वस्त्रोद्योग प्रकल्पांना व्याजाची सवलत देण्यासाठी राज्य सरकारने ५४६ उद्योग घटकांना १४७ कोटी रुपयांचा निधी मंजूर करून तो वितरित करण्यास मान्यता दिल्याची माहिती आमदार सुरेश हाळवणकर यांनी दिली.

वस्त्रोद्योग धोरण २०११-१७ अंतर्गत केंद्र सरकारच्या टफ योजनेचा लाभ घेतलेल्या वस्त्रोद्योगातील घटकांना राज्य सरकारचा वाटा देण्याचा विषय दीर्घकाळापासून प्रलंबित होता. याबाबत आमदार सुरेश हाळवणकर यांनी वेळोवेळी वस्त्रोद्योग मंत्री सुभाष देशमुख तसेच मुख्यमंत्री देवेंद्र फडणवीस यांच्याकडे पाठपुरावा केला होता. पाच लाख रुपये व त्यापेक्षा कमी रकमेचे व्याज अनुदान यापूर्वीच वितरित केले आहे, तर पाच लाखांपेक्षा अधिक व्याज अनुदानाची रक्कम वितरित करण्यास यापूर्वीच मंजुरी दिली होती. मात्र, निधीअभावी ते वितरित करण्याचे काम प्रलंबित राहिले होते. अनुदान वितरित केल्यामुळे राज्यभरातील वस्त्रोद्योजकांचा प्रलंबित प्रश्‍न मार्गी लागला आहे. तसेच या योजनेतील प्रलंबित अनुदान आगामी अर्थसंकल्पात तरतूद करून लवकरच वितरित केले जाणार असून, वस्त्रोद्योगाच्या विकासास गती येणार असल्याचे आमदार हाळवणकर यांनी म्हटले आहे.

०००

म. टा. प्रतिनिधी, कोल्हापूर

शहरातील सर्व मिळकतींना घरफाळा लागू करण्यासाठी महापालिकेने खासगी कंपनीला सर्वेक्षणाचे काम दिले. या कंपनीने गेल्या तीन वर्षात ८ हजार ६२७ मिळकती शोधल्या. मात्र ज्या-त्या वेळी या इमारतींची पडताळणी न झाल्याने आणि पडताळणीची यंत्रणाच नसल्याने कोट्यवधींच्या मिळकत करावर पाणी सोडावे लागले आहे. मात्र, कंपनीच्या कामाची पडताळणी करूनच घरफाळा लागू करण्याची भूमिका महापालिकेची आहे. पडताळणीस आणखी सहा महिन्यांचा कालावधी लागणार असल्याने या नव्या मिळकतदारांकडून पुढील आर्थिक वर्षातच घरफाळा वसूल होईल अशी शक्यता आहे.

शहरातील अनेक मिळकतींना घरफाळा लागू झालेला नाही. तर अनेक मिळकतदार घरफाळा लागू करून घेण्यासाठी महापालिकेत येरझाऱ्या मारत असतात. पण, लालफितीच्या कारभारामुळे अनेक मिळकतींना कर लागू झालेला नाही. याबाबत अनेकदा महासभेत चर्चा झाल्यानंतर नव्या मिळकतींचा शोध घेण्यासाठी सर्व्हे करण्याचा निर्णय घेतला. सर्वेक्षणाचे काम सायबर टेक कंपनीला देण्यात आले. गेल्या तीन वर्षांपासून वॉर्डनिहाय जीआयएस प्रणालीद्वारे सर्वेक्षण सुरू आहे. कंपनीने दिलेल्या मुदतीत सर्वेक्षणाचे काम पूर्ण न झाल्याने दोनवेळा मुदतवाढ मागितली. वाढीव मुदतीत सर्व्हे पूर्ण न झाल्याने कंपनीने तिसऱ्यांदा मुदतवाढ मागितली. पण १५ डिसेंबर रोजी कंपनीला मुदतवाढ न देता दररोज एक हजार रुपये दंड आकारणी सुरू करण्यात आली. कंपनीने या कालावधीत नव्या मिळकतींचा शोधल्या. मात्र कंपनीवर पहिल्यापासून आक्षेप असल्याने नव्या मिळकतींची पुन्हा पडताळणी करण्याचा निर्णय घेतला आहे.

मात्र, पहिल्यापासून अशी समांतर यंत्रणा राबवून सर्वेनंतर त्वरीत पडताळणी झाली असती तर नव्या मिळकतींना यापूर्वीच घरफाळा लागू झाला असता. पण, महापालिकेकडे अशी यंत्रणा नसल्याने पूर्ण सर्व्हे झाल्यानंतर घरफाळा लागू होईल. कंपनीने आतापर्यंत एक लाख ५२ हजार मिळकतींपैकी एक लाख सात हजार मिळकतींचा सर्व्हे केला. सुमारे ७५ टक्के काम पूर्ण झाले असून त्यामध्ये ८,६२७ नव्या मिळकती सापडल्या आहेत. अद्याप २५ टक्के मिळकतींचा सर्व्हे झालेला नसून कंपनीला मुदतवाढ न दिल्याने काम थांबले आहे. त्यामुळे नव्याने शोधलेल्या मिळकतींची पडताळणी करण्याचा निर्णय प्रशासनाने घेतला आहे. पडताळणीसाठी सहा महिन्यांचा कालावधी लागणार असून नंतरच या मिळकतींना घरफाळा लागू होणार आहे. मात्र ही प्रक्रिया राबवण्यासाठी पुरेशी यंत्रणा नसल्याने यास विलंब लागण्याची शक्यता आहे.

उर्वरीत सर्व्हे कधी ?

शहरातील सुमारे दीड लाख मिळकतींचा सर्वे करण्यासाठी कंपनीला तीन कोटी ७२ लाखांचा ठेका दिला. तीन टप्प्यात कंपनीला पैसे देण्यात येणार होते. त्यापैकी एक कोटी ४५ लाख कंपनीला अदा केले आहेत. कंपनीचे काम समाधानकारक नसताना पैसे दिल्याने वादाचा मुद्दा उपस्थित झाला आहे. नगरसेवकांच्या मागणीनुसार कंपनीला ब्लॅकलिस्टमध्ये टाकल्यास रक्कम कशी वसूल करायची असा प्रश्न निर्माण होणार आहे. तसेच कंपनीची मुदतवाढ फेटाळली आहे. त्यामुळे उर्वरीत २५ टक्के मिळकतींचे सर्वेक्षण कसे पूर्ण होणार? असाही प्रश्न निर्माण होत आहे.

१,५२,६१३

मिळकतींची संख्या

१,१६,३२३

करपात्र निवासी इमारती

२९,२९०

करपात्र अनिवासी इमारती

८,६२७

सर्व्हेमध्ये मिळालेल्या मिळकती

कोल्हापूर : पंचायत सशक्तीकरण अभियान पुरस्कार अंतर्गत केंद्रीय पथकाने जिल्हा परिषदेच्या योजनेच्या मूल्यांकनाचे काम शनिवारी पूर्ण केले. तीन दिवसीय दौऱ्यात द्विसदस्यीय पथकाने मुख्यालयासह ग्रामपंचायती, प्राथमिक आरोग्य केंद्र व बचत गटांना भेटी दिल्या. पथकप्रमुख श्रीनिवास बावा, अनिलकुमार वेल्ठाती यांनी दौऱ्याचा समारोप करताना जिपच्या विविध योजनांच्या अंमलबजावणीबाबत समाधान व्यक्त केल्याचा दावा प्रशासनाने केला. केंद्रीय पथकाने शनिवारी वाडी रत्नागिरी, बोरपाडळे येथील प्राथमिक आरोग्य केंद्र व पन्हाळा पंचायत समितीच्या कामकाजाची पाहणी केली. त्यानंतर दुपारी जिल्हा परिषदेकडील समिती सभागृहामध्ये विविध योजनेच्या रेकॉर्डची तपासणी केली. मुख्य कार्यकारी अधिकारी अमन मित्तल, प्रकल्प संचालक सुषमा देसाई, उमुख्य कार्यकारी अधिकारी रविकांत आडसूळ यांच्यासह विविध विभागाचे अधिकारी उपस्थित होते. उपमुख्य लेखा व वित्त अधिकारी राहुल कदम यांनी आभार मानले.

म. टा. प्रतिनिधी, कोल्हापूर

इचलकरंजी शहराला वारणा नदीतून पाणी योजना कार्यान्वित करण्यासाठी खासदार राजू शेट्टी आणि जिल्हाधिकारी अविनाश सुभेदार यांच्या अध्यक्षतेखाली शनिवारी जिल्हाधिकारी कार्यालयात बैठक झाली. इचलकरंजी नगरपालिकेचे पदाधिकारी आणि कोथळी ग्रामस्थांमध्ये एकमत न झाल्याने बैठक निष्फळ ठरली. यावेळी इचलकरंजी नगराध्यक्षा अलका स्वामी, मुख्याधिकारी दीपक पाटील, माजी आमदार अशोकराव जांभळे, जिल्हा नगरपालिका प्रशासन अधिकारी नितीन देसाई उपस्थित होते.

अमृत योजनेंतर्गत वारणा नदीतून इचलकरंजी शहराला थेट पाणीपुरवठा योजना राबविण्यात येणार आहे. यापूर्वी शिरोळ तालुक्यातील दानोळी येथून वारणेचे पाणी उचलण्यात येणार होते, पण ग्रामस्थांनी तीव्र विरोध केल्याने दानोळी योजना पालकमंत्री चंद्रकांत पाटील यांनी रद्द केली. मुंबई येथे ३१ मे २०१८ रोजी झालेल्या बैठकीत दानोळीऐवजी कोथळी येथील पाणी लिफ्ट करण्याच्या योजनेला मान्यता दिली.

कोथळी येथे महाराष्ट्र जीवन प्राधिकरणाचे अधिकारी सर्व्हे करण्यास गेले असताना ग्रामस्थांनी विरोध केला. इचलकरंजीला पाणीपुरवठा झाला तर शेतीला पाणी कमी पडण्याची भावना ग्रामस्थांमध्ये निर्माण झाली आहे. कोथळीला पाणीपुरवठा कमी पडू नये यासाठी अंकली येथे १३ फूट उंचीचा बंधारा बांधण्याची सूचना खासदार शेट्टी यांनी केली होती. या सर्व प्रश्नांवर चर्चा करण्यासाठी जिल्हाधिकारी कार्यालयात बैठक झाली.

बैठकीत कोथळी ग्रामस्थांनी अंकली येथे आधी बंधारा बांधण्यासाठी निविदा काढा, अशी मागणी केली. तर इचलकरंजीतील नगरसेवकांनी पाणीपुरवठा योजनेचा सर्व्हे करण्यासाठी परवानगी द्यावी अशी मागणी केली. अंकली येथे बंधारा बांधण्याबाबत १५ दिवसांत सरकारने निधी मंजूर करावा, असा आग्रह कोथळी ग्रामस्थांनी धरला, तर पाणीपुरवठा योजना राबविण्यासाठी आधी कोथळी परिसरातील वारणा नदीकाठचा सर्व्हे करण्यासाठी परवानगी द्या, सरकार बंधाऱ्यासाठी निधी देईल, अशी भूमिका इचलकरंजीतील नगरसेवकांनी घेतली. त्यामुळे आजच्या बैठकीत निर्णय झाला नाही.

जिल्हाधिकारी अविनाश सुभेदार यांनी कोथळी येथील बंधारा आणि पाणीपुरवठा योजनेचा सर्व्हे करण्याचा आदेश दिला. अंकली येथे बंधारा बांधला तर जयसिंगपूर पालिकेकडून विरोध होण्याची शक्यता इचलकरंजीतील नगरसेवकांनी व्यक्त केली. जयसिंगपूर नगरसेवकांच्या अनुपस्थितीत अंकली येथे बंधारा बांधण्याबाबत निर्णय घेता येणार नाही याकडे लक्ष वेधण्यात आला. त्यामुळे कोणत्याही निर्णयाविना बैठक स्थगित करण्यात आली.

बैठकीला इचलकरंजीचे उपनगराध्यक्ष तानाजी पोवार, आरोग्य सभापती संगीता आलासे, इचलकरंजी पाणीपुरवठा समिती सभापती संजय तेलताडे, नगरसेवक शशांक बावचकर, अजितमामा जाधव, शशांक बावचकर, सागर चाळके, रविंद्र माने, मदन झोरे, अशोक स्वामी, तर कोथळी ग्रामपंचायत सदस्य राजू पाटील, विजय पाटील, नितीन वायदंडे, सरिता भवरे, अमृता पाटील आदी उपस्थित होते.

००००

चारजणांनी घेतली दीक्षा

म. टा. प्रतिनिधी, कोल्हापूर

येथील भक्तीपूजा नगरमधील सिध्दी भद्रंकर संयम वाटिकेत गेल्या पाच दिवसांपासून सुरू असलेला दीक्षाग्रहण उत्सव भक्तीमय वातावरणात पार पडला. सिध्दी भद्रंकर प्रवज्या समितीतर्फे कार्यक्रमाचे आयोजन केले होते. दरम्यान, रविवारी पहाटे दीक्षा विधी सोहळा झाला. आचार्य भगवंत श्री नररत्नसूरीश्वर महाराज यांच्या हस्ते नटवर (सुरत), वत्सलकुमार (अहमदाबाद), काव्याकुमारी, जीनलकुमारी (पुणे) यांना विधीवत दीक्षा देण्यात आली.

पहाटे ५ वाजून ३१ मिनिटांनी विधीस प्रारंभ झाला. चेन्नईचे विपीन, मुंबईचे प्रशांत शहा यांची प्रमुख उपस्थिती होती. अतिशय भक्तीपूर्ण वातावरणात चौघांना दीक्षा देण्यात आली. त्यानंतर त्यांचे नामकरण मुनिश्री निर्लेपरत्न विजयश्री महाराज, मुनिश्री विजयजी महाराज, साध्वीश्री कृपाद्रष्टिश्री महाराज, साध्वीश्री जीवमैत्रीश्री महाराज असे करण्यात आले.

खासदार धनंजय महाडिक, आमदार अमल महाडिक यांनी कार्यक्रमास भेट दिली. ललित गांधी, प्रदीप जैन, मनोज राठोड, दिनेश ओसवाल, भरत ओसवाल यांच्यासह जैन समाजातील विविध संघटनांचे पदाधिकारी, कार्यकर्ते, भाविक मोठ्या संख्येने उपस्थित होते.

Satish.ghatage@timesgroup.com

Tweet:@satishgMT

कोल्हापूर : लोकसभा किंवा विधानसभा निवडणुकीत ५० टक्के मतांची मोजणी व्हीव्हीपॅट यंत्राद्वारे करण्यात यावी, अशी मागणी देशातील २३ राजकीय पक्षांनी केली आहे. मात्र निवडणूक आयोगाने प्रत्येक विधानसभा मतदारसंघातील एक इव्हीएम मशिनची मोजणी करण्याचे तोंडी आदेश जिल्हा स्तरावरील निवडणूक प्रशासनाला दिले आहेत. त्यामुळे कोल्हापूर व हातकणंगले लोकसभा मतदारसंघात फक्त १२ इव्हीएम व व्हीव्हीपॅटमधील मतांची मोजणी करून ताळमेळ घातला जाणार आहे.

इव्हीएमद्वारे निवडणुकीला आक्षेप घेत ही यंत्रे योग्य प्रकारे सुरू आहेत की त्यात घोळ आहे यांची शहानिशा करण्यासाठी, मतदानाच्या ५० टक्के मतांची मोजणी व्हीव्हीपॅटद्वारे करण्यात यावी अशी मागणी काँग्रेसच्या नेतृत्वाखाली २३ राजकीय पक्षांच्या शिष्टमंडळाने नुकतीच मुख्य निवडणूक आयुक्त सुनील अरोरा यांच्याकडे केली आहे. इव्हीएम मशिनवर मतदान केल्यानंतर मतदाराला त्याने कोणाला मतदान केले यांची चिठ्ठी व्हीव्हीपॅटवर दिसणार आहे. ही चिठ्ठी फक्त दहा सेकंद दिसणार असून त्यानंतर व्हीव्हीपॅटमध्ये सर्व चिठ्ठ्या जमा होणार आहेत. आगामी लोकसभा निवडणूकीत प्रत्येक इव्हीएमसोबत व्हीव्हीपॅट असेल. पण सर्व इव्हीएमच्या व्हीव्हीपॅटमधील चिठ्ठ्यांची मोजणी होणार नाही.

निवडणूक आयोगाच्या सूचनेनुसार मतमोजणी झाल्यानंतर प्रत्येक विधानसभा मतदारसंघातील एक इव्हीएम निवडून त्याच्यासोबत असलेल्या व्हीव्हीपॅटमधील चिठ्ठ्यांची मोजणी केली जाणार आहे. कोल्हापूर लोकसभा मतदारसंघातील कोल्हापूर दक्षिण, कोल्हापूर उत्तर, करवीर, कागल, चंदगड, राधानगरी या विधानसभा मतदारसंघातील प्रत्येकी एक आणि हातकणंगले लोकसभा मतदारसंघातील हातकणंगले, इचलकरंजी, शिरोळ, पन्हाळा, वाळवा, शिराळा विधानसभा मतदारसंघातील प्रत्येकी एक अशा एकूण १२ व्हीव्हीपॅटमधील चिठ्ठ्यांची मोजणी होणार आहे.

लोकसभा निवडणुकीची सर्व निवडणूक प्रक्रिया पूर्ण झाल्यानंतर इव्हीएम आणि व्हीव्हीपॅटमधील चिठ्ठ्यांची मोजणी करण्यात येणार आहे. लोकसभा मतदारसंघाचे प्रमुख असलेल्या जिल्हाधिकारी व अतिरिक्त जिल्हाधिकारी दर्जा असलेल्या मुख्य निवडणूक अधिकाऱ्यांच्या उपस्थितीत ही मोजणी होणार आहे. इव्हीएम आणि व्हीव्हीपॅटमधील चिठ्ठ्यांची मोजणी झाल्यावर ताळमेळ घालण्यात येणार आहे. मात्र त्याबाबत काही अडचणी निर्माण झाल्यास अंतिम निर्णय घेण्याचा अधिकार मुख्य निवडणूक अधिकाऱ्यांना दिला आहे.

प्रत्येक विधानसभा मतदारसंघातील एक इव्हीएम आणि व्हीव्हीपॅटमधील मतांची मोजणी करून पडताळ‌णी करण्याचे आदेश निवडणूक आयोगाने दिला आहे. कोल्हापूर व हातकणंगले लोकसभा मतदारसंघातील १२ व्हीव्हीपॅटमधील चिठ्ठ्यांची मोजणी करुन इव्हीएममधील मतदानाच्या आकड्यांशी त्यांचा ताळमेळ घातला जाईल. पण मतमोजणीचा निकाल जाहीर करण्याचे अधिकार फक्त मुख्य निवडणूक अधिकाऱ्यांना दिले आहेत.

- स्नेहल भोसले, जिल्हा निवडणूक अधिकारी

कोल्हापूर

क्रिडाई कोल्हापूरतर्फे भरविण्यात आलेल्या चार दिवसीय गृहप्रकल्प विषयक 'दालन २०१९' प्रदर्शनाचा सोमवारी (ता.११) समारोप होत आहे. येथील शाहूपुरी जिमखाना मैदान येथे प्रदर्शन सुरू आहे. जिल्हाधिकारी अविनाश सुभेदार, पोलिस अधीक्षक अभिनव देशमुख, महापालिकेचे आयुक्त अभिजित चौधरी आणि जिल्हा परिषदेचे मुख्य कार्यकारी अधिकारी अमन मित्तल यांच्या प्रमुख उपस्थितीत सायंकाळी पाच वाजता प्रदर्शनाचा समारोपाचा कार्यक्रम होणार असल्याची माहिती क्रिडाईतर्फे देण्यात आली.

कोल्हापूर : 'उत्तम आरोग्यासाठी आहार, विहार व व्यायाम आवश्यक आहे. आहारात कमीत कमी प्रक्रिया केलेले नैसर्गिक स्वरुपातील अन्नाचा समावेश करणे फायदेशीर ठरते' असे मत प्रा. हेमलता कोले यांनी व्यक्त केले. येथील विवेकानंद कॉलेजमधील सचेतना समितीमार्फत आयोजित व्याख्यानात त्या बोलत होत्या. 'युवतींच्या आरोग्य समस्या व घ्यावयाची काळजी' हा व्याख्यानाचा विषय होता. कॉलेजचे प्राचार्य डॉ. एस. वाय. होनगेकर यांनी निरोगी आरोग्याचे महत्व विशद केले. डॉ. माधवी चरणकर यांनी विद्यार्थिनींना आरोग्यविषयक काळजी घेण्याचे आवाहन केले. डॉ. मंजुश्री घोरपडे यांनी प्रास्ताविक केले. प्रा. नाजनीन पटेल यांनी आभार मानले.

कोल्हापूर टाइम्स टीम

'आज अनेक क्षेत्रातील लोक त्यांच्या फायद्यासाठी तरुणांना लक्ष्य करत आहेत. त्यांच्या आमिषाला बळी न पडता आयुष्याचा प्लॅन तयार करा. स्वप्न पाहून त्यांचा पाठलाग करा,' असा कानमंत्र विशेष पोलिस महानिरीक्षक विश्वास नांगरे-पाटील यांनी दिला.

न्यू कॉलेज येथे आयोजित केलेल्या कार्यक्रमात '२१ व्या शतकातील युवकांसमोरील आव्हाने' या विषयावर नांगरे-पाटील यांनी विद्यार्थ्यांशी संवाद साधला. अध्यक्षस्थानी डी. बी. पाटील होते. गुरुवारी न्यू कॉलेज येथे हा कार्यक्रम झाला.

नांगरे-पाटील म्हणाले, 'आजच्या मुलांनी स्वयंशिस्त पाळली पाहिजे. आईवडील ज्या तळमळीने तुम्हाला घडवतात त्याची जाण ठेवली पाहिजे. विज्ञाननिष्ठतेची कास धरली पाहिजे.' प्राचार्य डॉ. व्ही. एम. पाटील यांनी स्वागत व प्रास्ताविक केले. यावेळी संस्थेचे अध्यक्ष आर. एस. चरापले, आर. डी. आतकिरे, के. जी. पाटील, विनय पाटील, सी. एम. गायकवाड यांच्यासह पदाधिकारी, प्राध्यापक, व विद्यार्थी उपस्थित होते. डॉ. कविता गगराणी व धनंजय पाटील यांनी निवेदन केले. उपप्राचार्य प्रा. टी. के. सरगर यांनी आभार मानले.