आगरकर पुतळा विटंबना प्रकरणी अज्ञाताविरुद्ध गुन्हा

म. टा. वृत्तसेवा, कराड

टेंभू (ता. कराड) येथील समाजसुधारक गोपाळ गणेश आगरकर यांच्या अर्धपुतळ्याची अज्ञातांनी मोडतोड करून विटंबना केल्याची घटना गुरुवारी मध्यरात्री घडली होती. शुक्रवारी सकाळी हा प्रकार उघडकीस आला होता. या बाबतची फिर्याद टेंभूचे सरपंच युवराज भीमराव भोईटे यांनी रविवारी सायंकाळी उशीरा कराड ग्रामीण पोलिसात दिल्यानंतर पोलिसांनी या प्रकरणी अज्ञातावर गुन्हा दाखल केला आहे.

दरम्यान, गावात अनुचित प्रकार घडू नये म्हणून आगरकर प्रतिष्ठानने हा पुतळा झाकून ठेवला आहे. अज्ञात समाजकंटकांनी दगडाने आगरकरांच्या चेहऱ्याचे विद्रुपीकरण केले आहे. घडलेल्या प्रकाराबाबत अनेकांनी संताप व्यक्त केला. मात्र, पुतळ्याची मोडतोड कोणी व का केली याची माहिती अद्याप माहिती मिळू शकली नाही.

वृत्तपत्र सृष्टीचे जनक, स्वातंत्र्य लढ्यातील मवाळवादी गटाचे नेते, समाजसुधारक गोपाळ गणेश आगरकर यांचे टेंभू मूळगाव आहे. आगरकर प्रतिष्ठानने आगरकरांचा पुतळा उभारला आहे. गुरुवारी मध्यरात्रीच्या सुमारास अज्ञातांनी आगरकर यांच्या पुतळ्याची मोडतोड करून बिटंबना केली होती. मात्र, प्रतिष्ठानने या बाबत पोलिसात तक्रार दाखल केली नव्हती. आगरकरांचे बाहेरगावी स्थायिक असलेल्या नातेवाईकांनी टेभू येथे धाव घेत घडल्या प्रकाराची माहिती घेतली. त्या नंतर प्रतिष्ठानचे विश्वस्त, सरपंच युवराज भोईटे यांनी रविवारी कराड ग्राामीण पोलिसात फिर्याद दाखल केली आहे. पोलिसांनी अज्ञाताविरुद्ध गुन्हा नोंद केला आहे. टेंभू येथे आगरकर हायस्कूलच्या प्रांगणात आगरकर यांचा पुतळा उभारण्यात आला आहे. या पुतळ्याची देखभाल दुरुस्ती आगरकर प्रतिष्ठान करीत असते.

दरम्यान, दीड वर्षांपूर्वी अशाच पद्धतीने आगरकरांच्या पुतळ्याची विटंबना करण्याचा प्रयत्न झाला होता. त्या वेळीही पोलिसात गुन्हा दाखल झाला नव्हता. या वेळीही पोलिस ठाण्यापर्यंत हा प्रकार जाऊ न देण्याचीच भूमीका प्रतिष्ठानचे पदाधिकारी व पोलिस पाटील यांनी घेतल्याने ग्रामस्थ व आगरकरप्रेमींनी संताप व्यक्त केला होता. मात्र, अखेर आगरकरांच्या नातेवाईकांनी टेंभूला भेट देऊन घडल्या प्रकाराबाबत माहिती घेतल्यानंतर प्रतिष्ठानने तक्रार दाखल केली आहे.

बाजारभाव...

म. टा. प्रतिनिधी, कोल्हापूर

पालेभाज्यांची आवक मोठी झाली असताना भाजी मंडईत रविवारी दोडका व फ्लॉवर महागला. दोडक्याच्या दरात प्रतिकिलो दहा ते वीस रुपये, तर फ्लॉवर गड्ड्यात पाच रुपयांची वाढ झाली आहे.

गेल्या आठवड्यात मकर संक्रांतीला भाज्यांची मोठी आवक झाली होती. या आठवड्यातही पालेभाज्या आणि फळभाज्यांची आवक झाली आहे. तरीही दोडक्याचा दर प्रतिकिलो ६० ते ८० रुपये झाला आहे. फ्लॉवर गड्ड्यात पाच रुपयांनी वाढ झाली. आकारानुसार फ्लॉवर गड्ड्याची विक्री १५ ते २५ रुपयांत झाली. पालेभाज्यांची मोठी आवक झाल्याने मेथी, कांदा पात, पालकच्या पेंड्यांची विक्री १५ रुपयांना दोन अशी झाली आहे. भेंडीचा दर प्रतिकिलो ६० रुपयांवर, टोमॅटोचा ३० ते ४० रुपयांवर तर वांग्याचा ३० ते ४० रुपयांवर स्थिर होता. गवारीचा दर प्रतिकिलो ६० ते ८० रुपये होता. बाजारात द्राक्षांचेही आगमन झाले असून, प्रतिकिलो ८० ते १०० रुपये दराने विक्री होत आहे.

फळभाज्यांचे दर (प्रतिकिलो रुपयांत)

वांगी : ३० ते ४०

टोमॅटो : ३० ते ४०

भेंडी : ६०

ढबू : ४० ते ५०

गवार : ६० ते ८०

दोडका : ६० ते ८०

कारली : ४०

वरणा : ४०

हिरवी मिरची : ४०

फ्लॉवर : १५ ते २५

कोबी : १० ते २०

बटाटा : २० ते ३०

लसूण : ४०

कांदा : १० ते २०

पालेभाजी दर (पेंढी रुपयांत)

मेथी : ५ ते १०

कांदा पात : ५ ते १०

कोथिंबीर : १५ ते २०

पोकळा : ५ ते १०

पालक : ५ ते १०

शेपू :१० रु.

चाकवत : १०

करडा : १०

०००

फळांचे दर (प्रतिकिलो रु.)

सफरंचद : ६० ते १४०

डाळिंब : ४० ते ६०

संत्री : ३० ते ८०

मोसंबी : ३० ते ८०

बोरे : २० ते ४०

चिकू : ४०

पेरु : ६०

द्राक्षे : ८० ते १००

केळी : २० ते ६० (डझन)

जवारी केळी : ३० ते ७० (डझन)

०००

म. टा. प्रतिनिधी, कोल्हापूर

मध्यप्रदेश व राज्यस्थान विधानसभा निवडणुकीत काँग्रेसने दिलेल्या आश्वासनाप्रमाणे २४ तासांत कर्जमाफीचा निर्णय घेत सुशिक्षित बेरोजगारांना भत्ता सुरू केला. त्याचप्रमाणे राज्यातील बेरोजगार युवकांना उद्योग व्यवसायासाठी विनातारण व विनाव्याज कर्जपुरवठा करण्यात येणार आहे. तसेच लोकसभेच्या नऊ आणि विधानसभेच्या ५० जागा लढविण्यासाठी युवक काँग्रेसच्या सदस्यांनी मुलाखती दिल्याची माहिती युवक काँग्रेसचे प्रदेशाध्यक्ष सत्यजित तांबे यांनी दिली.

परिवर्तन रॅलीच्या समारोपासाठी कोल्हापूर दौऱ्यावर तांबे आले असता, त्यांनी विश्रामगृह येथे पत्रकारांशी संवाद साधला. तांबे म्हणाले, '२०१४ च्या निवडणुकीमध्ये निर्माण झालेल्या मोदी लाटेमुळे मोठ्याप्रमाणात युवकवर्ग भाजपकडे आकर्षित झाला. निवडणुकीपूर्वी दिलेली अश्वासनांची पूर्तता झालेली नसल्याने युवकांसह देशातील मतदारांमध्ये प्रचंड नाराजी असून त्यामुळे युवकांनी सत्तापरिवर्तनाचा निर्णय घेतला आहे. अशा युवकांना काँग्रेसपक्षाकडे आकर्षित करण्यासाठी पाचकलमी 'सुपर ४०' अभियान हाती घेतले आहे. अभियानाद्वारे युवकांशी जास्तीत जास्त संवाद साधला जाईल. काँग्रेसची मदार युवक काँग्रेसवर असली, तरी लोकसभा व विधानसभेसाठी कोटा मागितला जाणार नाही. मात्र, युवक काँग्रेसच्या कार्यकर्त्यांनी नऊ लोकसभा व ५० विधानसभा मतदारसंघातून निवडणूक लढवण्याची इच्छा व्यक्त केली आहे.'

ते पुढे म्हणाले, 'राज्यस्थान व मध्यप्रदेशात दिलेल्या आश्वासनाची चोवीस तासांत पूर्तता केली. बेरोजगारांना भत्ता सुरू केला. पण हा भत्ता कायमस्वरुपी नसून त्यांना नोकरी देण्यासाठी दोन्ही सरकार प्रयत्न करतील. त्यामुळे चुनावी जुमला काँग्रेस कधीही करणार नाही. मोदी लाटेमुळे २०१४ चे विश्लेषण करणे गैर आहे. मात्र, २००९ मध्ये आरपीआयचे रामदास आठवलेंचा पराभव ही मोठी चूक होती.'

पत्रकार परिषदेस पश्चिम महाराष्ट्र देवस्थान समितीचे माजी अध्यक्ष अॅड. गुलाबराव घोरपडे, राजेश पाटील, नगरसेवक तौफिक मुल्लाणी, दत्तात्रय मेडशिंगे, युवक जिल्हाध्यक्ष दीपक थोरात, एनएसयूआयचे जिल्हाध्यक्ष पार्थ मुंडे, बयाजी शेळके, आदी युवक काँग्रेसचे कार्यकर्ते उपस्थित होते.

००००

प्रतीमा मलीनतेवर भाजपचा भर

'लोकसभा निवडणुकीपूर्वी तत्कालीन पंतप्रधान मनमोहन सिंग, पक्षाध्यक्षा सोनिया गांधी व राहुल गांधी यांची भाजपने प्रतीमा मलीन केली. मनमोहनसिंग यांना चपलांचे हार घातले. पण काँग्रेस पंतप्रधान नरेंद्र मोदी यांची प्रतीमा मलीन करणार नाही. मात्र, त्यांच्या विचाराला विरोध केला जाईल. लोकशाहीत आंदोलन करण्याचा अधिकार सर्वांना आहे, त्याचा वापर विचाराला विरोध करण्यासाठी होईल,' असे तांबे यांनी सांगितले.

म. टा. प्रतिनिधी, कोल्हापूर

लोकसभा निवडणूक तोंडावर असताना काँग्रेस, राष्ट्रवादी काँग्रेस, शिवसेनेसह भाजपमध्येही गटबाजीला उधाण आले आहे. स्वाभिमानी शेतकरी संघटना, डावी आघाडी आणि मनसेदेखील याला अपवाद नसल्याने ऐन निवडणुकीत गटबाजी मिटवायची कशी? असा प्रश्न स्थानिक नेत्यांना पडला आहे. गटबाजीचा फटका भविष्यात बसू शकेल अशी स्थिती असल्याने नेते हैराण झाले आहेत.

शिस्तप्रिय पक्ष म्हणून चर्चेत असलेल्या भाजपमधील गटबाजी गेल्या आठवड्यात उघड झाली. सात मंडल अध्यक्षांनी महानगर अध्यक्ष संदीप देसाई यांच्यावर टीकेची झोड उठवत त्यांच्या राजीनाम्याची मागणी केली. देसाईंचा राजीनामा न घेतल्यास आम्ही राजीनामे देऊ असा इशाराच त्यांनी प्रदेशाध्यक्षांना दिला. हा वाद वरवर महानगर आणि मंडल अध्यक्ष यांच्यातील दिसत असला तरी तो त्याला प्रमुख कार्यकर्त्यांमधील गटबाजीचा वास आहे. विद्यमान अध्यक्ष देसाई यांना हटवून नवीन अध्यक्ष होण्यासाठी अनेकांची धडपड सुरू आहे. हा अध्यक्ष आपल्याच गटाचा व्हावा यासाठी काहींचे प्रयत्न आहेत. त्यातूनच वादाला जोर आला आहे. आतापर्यंत पक्षात फारशी गटबाजी नव्हती. पण आता ती हळुहळू डोके वर काढत आहे. त्यामुळे पालकमंत्री चंद्रकांत पाटील यांची डोकेदुखी वाढणार आहे.

काँग्रेसला गटबाजी नवी नाही. गेल्या पन्नास वर्षांत पक्षाला अनेक निवडणुकांत याचा फटका बसला. पण त्याचा धडा घेऊन नेते आपल्यात बदल करत नसल्याने आजही हा पक्ष अनेक गटांत विभागलेला दिसत आहे. सध्या पक्षात आमदार सतेज पाटील, जिल्हाध्यक्ष पी. एन. पाटील, माजी मंत्री जयवंतराव आवळे, प्रकाश आवाडे असे अनेक गट आहेत. विधानसभा निवडणुकीत या वादामुळे पक्षाचा एकही आमदार निवडून आला नाही. तरीही वाद कमी झालेला नाही. तशीच अवस्था राष्ट्रवादी काँग्रेसची आहे. कोल्हापूर लोकसभा मतदारसंघातून पक्षाच्यावतीने खासदार धनंजय महाडिक यांची उमेदवारी निश्चित मानली जाते. पण उमेदवारी मिळवतानाच त्यांना दमछाक करावी लागत आहे. पक्षात असलेल्या गटबाजीचा फटका त्यांना बसत आहे. पक्षात आमदार हसन मुश्रीफ आणि महाडिक गट कार्यरत आहेत. गटागटांतील वादाने पक्षाचेदेखील अनेक निवडणुकांत नुकसान झाले. आता लोकसभेला याचा फटका बसू नये म्हणून यादृष्टीने प्रयत्न करण्याचे मोठे आव्हान पक्षातील नेत्यांसमोर आहे.

शिवसेनेला लागलेले गटबाजीचे ग्रहण पंचवीस वर्षांत सुटलेले नाही. जिल्हाध्यक्ष विरुध्द आमदार हा वाद आजही कायम आहे. जिल्हाध्यक्ष विजय देवणे, संजय पवार यांच्याविरोधात आमदार राजेश क्षीरसागर यांच्यातील वाद पक्षप्रमुख उद्धव ठाकरे यांच्यापर्यंत पोहोचला. पण त्यावर तोडगा निघाला नाही. आमदार क्षीरसागर यांनी लोकसभेचे उमेदवार प्रा. संजय मंडलिक यांच्यावर टीका करत नव्या वादाला तोंड फोडले. त्याकडेही वेगळ्या दृष्टिने पहावे लागेल.

अंतर्गत वाद, गटबाजी केवळ या चार प्रमुख पक्षांतच आहे अशी स्थिती नाही. भाकप, माकप, शेकाप या डाव्या पक्षांबरोबरच मनसे, स्वाभिमानी शेतकरी संघटनेतही फार काही आलबेल नाही. भाकपमध्ये तर अलिकडे गटबाजीला चांगलाच जोर आला आहे. त्याचा परिणाम स्थानिक स्तरावर झाला आहे.

स्थानिक नेत्यांची डोकेदुखी

जिल्ह्यात 'जनसुराज्य शक्ती' पक्ष वगळता इतर सर्वच पक्षांत खदखद आहे. ऐन निवडणुकीत खदखद वाढत असल्याने त्याचा फटका पक्षाला बसतो. त्यामुळे त्याचे परिणाम नेत्यांना सोसावे लागतात. या पार्श्वभूमीवर वाद मिटवून एकसंघपणे निवडणुकीला सामोरे जाण्याचे मोठे आव्हान नेत्यांसमोर आहे. राज्य पातळीवर वाद पोहोचल्यानंतरही तेथे काहीच निर्णय होत नसल्याने स्थानिक नेत्यांची डोकेदुखी कायम राहत आहे.

म. टा. प्रतिनिधी, कोल्हापूर

जिल्ह्यातील राधानगरी, दाजीपूर अभयारण्यातील वन्यप्राणी गणनेसाठी ३५ कॅमेऱ्यांचा वॉच असेल. २४ जानेवारीअखेर ही गणना सुरू राहणार आहे. या दोन अभयारण्यासह सांगली जिल्ह्यातील सागरेश्वर अभयारण्यांतील प्राण्यांचीही गणना केली जात आहे. त्यासाठी या कालावधीत पर्यटकांना पर्यटनास प्रवेशबंदी करण्यात आली आहे.

वन्यजीव प्रशासनाकडून १९ जानेवारीपासून वन्य प्राणी गणनेचे काम सुरू झाले. त्यासाठी राधानगरी, दाजीपूर अभयारण्यात ९० कर्मचारी, तीन अधिकारी तर सागरेश्वर अभयारण्यात १ अधिकारी २० कर्मचारी तैनात आहेत. सागरेश्वरमध्ये हरीण, सांबरांचा आढळ होतो. त्यामुळे येथे कॅमेरे लावण्यात आले आहेत. राधानगरी, दाजीपूर अभयारण्यात वाघ, बिबट्या, गवा आदी प्राण्यांचा संचार आहे. त्यांचा अधिवास हेरून नेमकेपणाने गणना करण्यासाठी अत्याधुनिक कॅमेऱ्यांचा वापर करण्यात आला आहे. पाण्याचे नैसर्गिक स्त्रोत, घनदाट झाडी, झुडपांच्या ठिकाणी कॅमेरे बसवण्यात आले आहेत. दररोज सकाळी कॅमेराबद्ध प्राणी, जंगलात सापडलेली विष्ठा, पायांचे ठसे यांच्यावरून कोणता प्राणी आहे हे ओळखले जात आहे. अशा प्रकारे नोंदी ठेऊन किती प्राण्यांचे वास्तव्य आहे त्याचा अहवाल तयार करण्यात येणार आहे.

आयुक्त, उद्योजकांत रस्सीखेच

उद्घाटनाचा कार्यक्रम संपला आणि कार्यक्रमासाठी उपस्थित पाहुणे मंचावरुन उतरत थेट 'हॅपी स्ट्रीट'उपक्रमात सहभागी झाले. उपक्रमातील विविध प्रकारचे खेळ प्रकार पाहत, स्टॉलना भेटी देत माहिती घेतली. उपक्रमांतर्गत सुरू असलेल्या रस्सीखेच क्रीडा प्रकारात युवकांच्या दोन गटात जोरदार चढाओढ सुरू होती. याठिकाणी आयुक्त अभिजित चौधरी, उद्योजक चंद्रकांत जाधव, देवेंद्र दिवाण दाखल झाले. त्यांनाही या स्पर्धेत सहभागी होण्याचा मोह आवरला नाही. त्यांनीही इतरांना सोबत करत रस्सीखेच क्रीडा प्रकाराचा आनंद लुटला.

मर्दानी खेळाचा थरार

विधी सेवा प्राधिकरण सचिव व न्यायाधीश उमेशचंद्र मोरे यांनी 'हॅपी स्ट्रीट'उपक्रमाचा आनंद घेतला. शिवसंस्कार प्रतिष्ठान व चाणक्य मर्दानी खेळतर्फे सादर होणाऱ्या शिवकालीन युद्धकलेच्या प्रशिक्षणात सहभाग घेतला. प्रतिष्ठानचे राजेश पाटील यांनी मर्दानी खेळाची प्रात्यक्षिके दाखवली.

समाजकार्य विभागाचे पथनाट्य

सायबर संस्थेच्या समाजकार्य विभागाने कॉलेज मुलींच्या जीवनावर भाष्य करणारे पथनाट्य सादर केले. 'आजची स्त्री' हा पथनाट्याचा विषय होता. वाद्याचा वापर करुन पथनाट्य सादर केले. यामध्ये सागर पकाले, सूरज माळी, करिना मुल्लानी, शर्वरी इंगवले, तुषार पाटील, विशाल वाघमारे, शामराव निंबाळकर यांचा समावेश होता.

'हॅपी स्ट्रीट'उपक्रमाविषयी उत्सुकता होती. पहिल्यांदाच मी या कार्यक्रमात सहभागी झाले. खूप छान अनुभव आहे. पारंपरिक खेळ, गीत, नृत्य आणि त्याचा मनसोक्त आनंद घेणारे नागरिक हा माहौल खूप सुखावणारा आहे. लहान मुलांमध्ये विविध खेळांची आवड निर्माण करणारा हा कार्यक्रम आहे.

अंजना फड, इंगळेनगर

'हॅपी स्ट्रीट'म्हणजे सहकुटुंब आनंद लुटण्याचा उपक्रम आहे. कुटुंबातील सगळे सदस्य यामध्ये सहभागी होतात. वेगवेगळे खेळ खेळता येतात. यामुळे नवी ऊर्जा मिळते. प्रत्येक वर्षी 'हॅपी स्ट्रीट'मध्ये नागरिकांचा सहभाग वाढत आहे. कोल्हापूरच्या नागरिकांना हा कार्यक्रम पसंत पडल्याची ती पावती आहे.

उत्तम वेंगुर्लेकर, जवाहरनगर

म. टा. प्रतिनिधी, कोल्हापूर

'क्रिडाईतर्फे येथील शाहूपुरी जिमखाना मैदानावर ८ ते ११ फेब्रुवारीअखेर 'दालन २०१९' या प्रदर्शनाचे आयोजन केले आहे. त्यासाठी एकूण १६० स्टॉल्सची नोंदणी झाली आहे. दालनात १४ लाख ते २ कोटी रुपयांपर्यंतच्या घरांची माहिती मिळेल,' अशी माहिती 'क्रिडाई'चे अध्यक्ष महेश यादव यांनी रविवारी दिली. दालन मंडप उभारणी प्रारंभप्रसंगी ते बोलत होते. बांधकाम व्यावसायीक व्ही. बी. पाटील प्रमुख उपस्थिती होते.

अध्यक्ष यादव म्हणाले, 'बांधकाम आणि फ्लॅटसंबंधीची माहिती एकाच छताखाली मिळणारे पश्चिम महाराष्ट्रातील हे सर्वात मोठे प्रदर्शन आहे. ८ फेब्रुवारी रोजी सायंकाळी पाच वाजता पालकमंत्री चंद्रकांत पाटील यांच्या हस्ते याचे उदघाटन होईल. नगरविकास राज्यमंत्री रणजित पाटील यांना निमंत्रित केले आहे. यावेळी शहरातील घरफाळा, प्राधिकरण, विमानसेवा असे प्रश्न मांडण्यात येतील. ९ फेब्रुवारी रोजी बांधकाम क्षेत्रातील तांत्रिक विषयांवर चर्चासत्र होईल. १० फेब्रुवारीला अभिनेते अमोल कोल्हे, विशेष महानिरीक्षक विश्वास नांगरे- पाटील यांच्या उपस्थितीत कार्यक्रम होईल. सांगता कार्यक्रमास म्हाडाचे विशेष कार्यकारी अधिकारी मिलिंद म्हैसकर उपस्थित राहतील.'

दालनचे चेअरमन सचिन ओसवाल म्हणाले, 'दालन प्रदर्शनात नविन बांधकाम प्रकल्प, तंत्रज्ञान, बांधकाम साहित्य, सेवा, अर्थसहाय्य योजनांसंबंधी मार्गदर्शन मिळेल. किमान १४ लाख आणि अधिकाधिक २ कोटी रुपयांपर्यंतचे घराचे स्वप्न पूर्ण करण्यासाठी प्रदर्शन उपयुक्त ठरेल.'

व्ही. बी. पाटील म्हणाले, 'लोकांपर्यंत पोहोचण्यासाठी दालन महत्वाचे आहे. क्रिडाई, महानगरपालिकेतर्फे शहराच्या विकासासाठी चांगले काम व्हावे. महापालिकेने मध्यवर्ती बसस्थानक परिसरातील अतिक्रमणांचा विळखा हटवावा. पोलिस प्रशासनाने दिवसा शहरातून अवजड वाहतुकीस बंदी केली आहे. त्यामुळे रेडिमेड काँक्रिट वाहनांना प्रवेशबंद झाला आहे. परिणामी बांधकामांवर परिणाम झाला आहे. या प्रश्नातून पोलिसांनी व्यवहारिक तोडगा काढावा.'

महाराष्ट्र क्रिडाईचे उपाध्यक्ष राजू परीख, स्थायी समितीचे माजी सभापती आशिष ढवळे यांची भाषणे झाली. रविकिशोर माने यांची प्रास्ताविक केले. क्रिडाईचे उपाध्यक्ष विद्यानंद बेडेकर, सचिव के. पी. खोत, पारस ओसवाल, चेतन वसा, कृष्णात पाटील, दिलीप जाधव आदी उपस्थित होते.

घरफाळ्यावर मार्चपर्यंत तोडगा

भाडेतत्वावरील मिळकतींवरील कर कमी करावा,' अशी मागणी क्रिडाई वर्षभर करीत असल्याचे अध्यक्ष यादव यांनी सांगितले. यावर नगरसेवक रत्नेश शिरोळकर म्हणाले, 'भाड्याच्या मिळकतींवर राज्यात सर्वाधिक कर कोल्हापुरात आहे. तो कमी करण्यासाठी प्रयत्न केले. मात्र यश आले नाही. मार्चपर्यंत यातून तोडगा निघेल. याउलट घरगुती वापरावरील मिळकतींचा कर २०११ पासून वाढलेला नाही. शहराच्या विकासासाठी हा कर वाढवणे गरजेचे आहे.'

म. टा. वृत्तसेवा, जयसिंगपूर

कोथळी (ता. शिरोळ) येथील आदर्श शिक्षण संस्थेला अल्पसंख्याक प्रमाणपत्र मिळविण्यासाठी सहायक धर्मादाय उपायुक्तांचा बोगस आदेश तयार करून सरकारची फसवणूक केल्याप्रकरणी संबंधितांना तत्काळ अटक व्हावी. न्यायालयात दोषारोपपत्र दाखल होईपर्यंत त्यांना जामीन मिळता कामा नये, अशी मागणी संस्थेचे संस्थापक सचिव अण्णासाहेब शिरोटे यांनी पत्रकार बैठकीत केली.

शिरोटे म्हणाले, 'आदर्श शिक्षण संस्थेमार्फत कोल्हापूर व रत्नागिरी जिल्ह्यांतील एकूण चार शाळा चालविल्या जातात. सध्याच्या संचालक मंडळाने संस्थेला अल्पसंख्याक प्रमाणपत्र मिळविण्यासाठी प्रयत्न केले होते. मात्र, संचालक मंडळाची नोंद धर्मादाय उपायुक्तांकडे असल्याचा उतारा व न्यायालयात कोणताही वाद नसणे या दोन बाबी आवश्यक होत्या. परंतु, न्यायालयात दावा सुरू असतानाही संबंधितांनी खोटे प्रतिज्ञापत्र तयार करून सादर केले. तसेच धर्मादाय उपायुक्त कार्यालयातील न्यायालयाचा बनावट आदेश सहीशिक्क्यानिशी तयार करून तो मंत्रालयातील अल्पसंख्याक विकास विभागास सादर केला. त्या आधारे १६ मे २०१८ रोजी प्रमाणपत्रही मिळविले.

यानंतर धर्मादाय उपायुक्तांच्या निदर्शनास ही बाब येताच त्यांनी या प्रकरणाची सखोल चौकशी केली. त्यानंतर संबंधितांवर फौजदारी गुन्हा दाखल करण्याचे आदेश दिले. त्याप्रमाणे २९ ऑक्टोबर २०१८ रोजी कोल्हापुरात शाहूपुरी पोलिस ठाण्यात गुन्हा दाखल केला. त्यानंतर तो जयसिंगपूर पोलिस ठाण्याकडे वर्ग झाला आहे. गुन्ह्यातील संशयित अद्याप मोकाटच आहेत. त्यांना तत्काळ अटक करून न्यायालयाच्या आदेशाचे पालन करावे आणि गुन्ह्याचा तपास होऊन दोषारोपपत्र दाखल होईपर्यंत संशयितांना जामीन मिळू नये, अशी मागणी शिरोटे यांनी केली. यावेळी शिवसेनेचे माजी तालुकाप्रमुख विजय राऊत उपस्थित होते.

०००

पदाधिकाऱ्यांची कबुली

अल्पसंख्याक प्रमाणपत्र मिळविताना बनावट कागदपत्रे सादर करण्यात आली. याबाबत १४ ऑगस्ट २०१८ रोजी मुंबईत सुनावणी झाली. यावेळी संस्थेच्या पदाधिकाऱ्यांनी बनावट कागदपत्रे सादर केल्याचे मान्य केले होते. तशी नोंद मंत्रालयातील अल्पसंख्याक विकास विभागाचे सहसचिव एस. सी. तडवी यांनी निकालपत्रात केली आहे. यानुसार संस्थेचा अल्पसंख्याक दर्जा रद्द करीत असल्याचेही त्यांनी निकालपत्रात म्हटले आहे.

००००

म. टा. वृत्तसेवा, हातकणंगले

पट्टणकोडोली (ता. हातकणंगले) येथे अनैतिक संबंधातून झालेल्या परप्रांतीय तरुणाच्या खूनप्रकरणी तरुणास पोलिस कोठडी देण्यात आली. हल्लेखोर संशयित आरोपी नामदेव अशोक मोठे (वय २२, रा. पट्टणकोडोली) याला रविवारी इचलकरंजी न्यायालयात हजर केले असता न्यायालयाने त्याला चार दिवस पोलीस कोठडी सुनावली. खुनाच्या घटनेमुळे हुपरी परिसरात खळबळ उडाली आहे. खुनामध्ये मोठेबरोबर आणखीन तीन ते चारजणांचा समावेश असल्याचे बोलले जात आहे.

कोल्हापूर : महावितरणकडून वीज ग्राहकांना बिलाबाबत तसेच मीटर रीडिंगबाबतची अद्ययावत माहिती एसएमएसद्वारे ग्राहकांच्या मोबाइलवर दिली जाते. तसेच एसएमएस दाखवून वीज बिल भरण्याची सुविधा महावितरणने ग्राहकांना उपलब्ध करून दिली आहे. आता महावितरणने येत्या एक फेब्रुवारीपासून वीज बिलावरील मीटर रीडिंगचा फोटो देण्याची पद्धत बंद केली आहे. नव्या निर्णयानुसार मीटर रीडिंगची माहिती वीज ग्राहकांच्या मोबाइलवर मिळणार आहे. महावितरणच्या ९२२५५९२२५५ या क्रमांकावर एसएमएसद्वारे ग्राहकांना स्वत:च्या मोबाइल क्रमांकाची नोंदणी करण्याची सोय आहे. नोंदणी करावयाच्या मोबाइलवरून ९२२५५९२२५५ क्रमांकावर MREG (स्पेस) (१२ अंकी ग्राहक क्रमांक) अशी माहिती टाइप करून एसएमएस केल्यास मोबाइल क्रमांकाची नोंद होते.

फुल टू धम्माल

'हॅपी स्ट्रीट'वर उच्चांकी गर्दी; सायबर रोडवर उसळली गर्दी

कोल्हापूर टाइम्स टीम

पारंपरिक वाद्यांच्या ठेक्यावर ताल धरणारी तरुणाई, गीत-संगीतावर फुललेला मनोहारी नृत्याविष्कार, सोबतीला पारंपरिक खेळांची मौजमजा, श्वास रोखून धरायला लावणारी मर्दानी खेळांची चित्तथरारक प्रात्यक्षिके आणि देहभान हरपून या सर्व कला क्रीडा प्रकाराचा मनसोक्त आनंद लुटणारे हजारो नागरिक अशा जल्लोषी माहौलमध्ये रंगलेली रविवारची सकाळ 'हॅपी स्ट्रीट'मय झाली. 'महाराष्ट्र टाइम्स'तर्फे आयोजित खेळ आणि मनोरंजनाच्या या विश्वात हजारो नागरिकांनी उत्स्फूर्त सहभाग नोंदवत गर्दीचा नवा रेकॉर्ड केला. तब्बल अडीच तासहून अधिक वेळ सायबर चौक ते एनसीसी भवनपर्यंतच्या मार्गावर आनंदोत्सवाची उधळण सुरू होती.

एकापेक्षा एक हटके सादरीकरण, विविध कला प्रकारांचे बहारदार सादरीकरण आणि वेगवेगळ्या क्रीडा प्रकारांचा आनंद लुटत नागरिकांनी फुल टू धम्माल केली. 'हॅपी स्ट्रीट' आणि ओसांडून वाहणारी गर्दी हे समीकरण यंदाही सायबर रोडवर कायम राहिले. सकाळ सात वाजल्यापासूनच सायबर रोड हा गर्दीने फुलला. शाळकरी मुले, कॉलेज युवा-युवतींच्या सहभागाने वातावरणात चैतन्य निर्माण झाले.

दरम्यान आयुक्त अभिजित चौधरी, विधी सेवा प्राधिकरणचे सचिव व न्यायाधीश उमेशचंद्र मोरे, उद्योजक चंद्रकांत जाधव, उद्योजक देवेंद्र दिवाण, नगरसेवक प्रवीण केसरकर, लाला भोसले, नगरसेविका रुपाराणी निकम, शिक्षण प्रसारक मंडळ या संस्थेच्या प्रशासनाधिकारी प्रा. डॉ. मंजिरी मोरे-देसाई, माजी नगरसेवक अजित मोरे, राजू हुंबे यांच्या हस्ते आकाशात फुगे सोडून उपक्रमाचे उद्घाटन झाले. ट्रॅव्हल पार्टनर श्री ट्रॅव्हल्सचे दिनेश वालावलकर, कॅरी बॅग्ज ट्रॅव्हल बॅग ऑन रेंटचे जयेश पाटील, एफ थ्री जिमचे युवराज कुंभार, फ्रू स्टार...फ्रूटड्रिंक-संजय घोडावत ग्रुपचे अबूसुफीयान चौधरी यांची प्रमुख उपस्थिती होती. याप्रसंगी कोल्हापूरच्या सामाजिक स्वास्थासाठी कार्यरत व्यक्ती व संस्थांचा सत्कार झाला.

'हॅपी स्ट्रीट'चे टायटल प्रायोजक फ्रू स्टार...फ्रूटड्रिंक-संजय घोडावत ग्रुप, पॉवर्ड बाय स्पॉन्सर दि आयडियल कन्स्ट्रक्शन, ट्रॅव्हल पार्टनर श्री ट्रॅव्हल्स, फिटनेस पार्टनर एफ थ्री जीम, लगेज पार्टनर बॅग ट्रॅव्हल्स बॅग ऑन रेंट हे आहेत.

सकाळी साडे सात वाजण्याच्या सुमारास प्रमुख पाहुण्यांच्या हस्ते आकाशात फुगे सोडून कार्यक्रमाचे उद्घाटन होताच तरुणाईने एकच जल्लोष केला. कुणी गाजलेल्या हिंदी मराठी गीतांवर ठेका धरला. तर कुणी संगीताच्या तालावर नृत्याचा फेर. कुणी रस्त्यावर फुटबॉल, कुस्तीचे खेळ करत धमाल करायला सुरुवात केली. पारंपरिक खेळाच्या सादरीकरणाने आनंदाला आणखीन भरते आले. या आनंददायी सोहळ्याप्रसंगी सायबर चौक आणि एनसीसी भवनपर्यंतचा मार्गावर जनसागर लोटल्याचे चित्र होते. बालपणीच्या दुनियेत घेऊन जाणाऱ्या पारंपरिक खेळाची भुरळ मोठ्यांनाही पडली. पालक आणि यंग सीनिअर्सही वय विसरुन मुलांसोबत खेळात सहभागी झाले.

'आम्ही कोल्हापूरकर...'ने जिंकली मने

आम्ही कोल्हापूरकर वाद्यपथक 'हॅपी स्ट्रीट'मधील आकर्षण ठरले. एकाचवेळी हात उंचावून, एका ठेक्यात वादन करणारे ३० वादकांच्या पथकाने नागरिकांची मने जिंकली. नवीन बिटस, शिवस्तुती सादर करत त्यांनी उपस्थितांची वाहवा मिळवली. वाद्यांचा ठेका युगल जैन व प्रवीण परीट यांच्या मार्गदर्शनाखाली तीस वादकांचा समावेश होता. दोन तासहून अधिक वेळ या कलाकारांनी नागरिकांना खिळवून ठेवले.

पुष्परचनेपासून डिश गार्डनपर्यंत शिकवण

प्रत्येकाला निसर्गाची आवड, स्वतच्या परिसरात बगिचा फुलविण्याची प्रत्येकाची ईच्छा आकांक्षा असते.मात्र बगिचा कशा पद्धतीने फुलवावा, फुलझाडींची निगा कशी राखावी याबद्दल नेमकी माहिती अनेकांना नसते. नागरिकांची नेमकी हीच गरज ओळखून गार्डन्स क्लबच्या पदाधिकाऱ्यांनी पुष्परचनापासून ट्रे गार्डन, डिश गार्डनपर्यंत मार्गदर्शन केले. या उपक्रमांतर्गत कंपोस्ट खताची निर्मिती, काचेच्या भांड्यात रोपांची लागवड कशी करावी, फ्लोटिंग गार्डनविषयी माहिती दिली. क्लबच्या अध्यक्षा कल्पना सावंत, पल्लवी कुलकर्णी, शशिकांत कदम, राज अथणे, स्मिता अथणे, नीता शिंदे, रमेश शहा, सुप्रिया भस्मे, दीपा भिंगार्डे, जयश्री कजारिया, अमृता वासुदेवन, शैला निकम यांचा सहभाग होता. त्यांनी उपस्थितांना कचरा व्यवस्थापनचे धडेही दिले. तसेच बाल्कनी असो की टेरेस, सुंदर रोपांची करु वाढ अशी हाकही दिली.

व्हाइट आर्मीची प्रात्यक्षिके

दैनंदिन जीवनात अनेकदा नागरिकांना लहानसहान आपत्तींना सामोरे जावे लागते. घरातील साधनांचा वापर करुन आपत्ती व्यवस्थापन कसे करायचे याचे प्रात्यक्षिकचे नागरिकांना शिकायला मिळाले. व्हाईट आर्मीतर्फे स्ट्रेचर, वॉटर रेस्क्यू, गाठीचे प्रकार यासंबंधीचे प्रात्यक्षिक दाखविले. व्हाईट आर्मीच्या कस्तुरी रोकडे, अलका देवलापूरकर, विनायक भाटे यांनी प्रात्यक्षिके दाखवली. आपत्ती आल्यानंतर त्याला धैर्याने सामोरे जाणारे कौशल्य आणि प्रशिक्षण शिकवणाऱ्या व्हाईट आर्मीचे प्रात्यक्षिके लक्षवेधी ठरली.

ट्रू नॉलेज गेम्सविषयी तरुणाईत आकर्षण

ज्ञान आणि मनोरंजनाचा मिलाफ साधणाऱ्या 'नॉलेज गेम्स'ला नागरिकांनी पसंती दिली. विजयकुमार सोनी यांचा 'ट्रू नॉलेज गेम्स' विषयी तरुणाईत विशेष आकर्षण पाहावयास मिळाले. सोनी यांनी वैविध्यपूर्ण कोडी, पझल्स, रिडल्स यांचा अनोखा संगम घडवत त्यांनी उपस्थितांचे मनोरंजन केले. शाळकरी मुले 'नॉलेज गेम्स'मध्ये रंगले. त्यांनी विविध प्रकारच्या माहिती घेत या खेळाचा आनंद लुटला.

लहान मुलांची जमली वाडा बॉईजशी गट्टी

वाडा बॉईजच्या सहा तरुणांनी पाण्याचे खेळ करत नागरिकांची करमणूक केली. पाण्याने भरलेले पाच ग्लास आणि त्यावरील प्लास्टिकच्या चेंडूला फुंकर मारत रिकाम्या ग्लासपर्यंत पोहचविण्याचा हा खेळ साऱ्यांच्या पसंतीस उतरला. लहान मुलांची या खेळाशी गट्टी जमली. सुहास बोंद्रे, चेतन देवाडिगा, अभिजित खैरे, ओंकार जगताप, मंथन कांबळे आणि सिद्धेश झिरपे यांनी या अनोख्या खेळाची प्रात्यक्षिके दाखवली.

दोन वर्षांचा मुलाचे स्केटिंग

प्रत्येकाच्या कलागुणांच्या हक्काचे व्यासपीठ ठरलेल्या हॅपी स्ट्रीटमध्ये स्केटिंगचा थरारही अनुभवता आला. एस. के. रोलर स्केटिंग अकॅडमी प्रतिभानगरतर्फे स्केटिंगची प्रात्यक्षिके दाखविण्यात आली. वेगाने स्केटिंग करणाऱ्या बालचमूंनी नागरिकांच्या टाळया वसूल केल्या. एसके रोलर स्केटिंग अॅकेडमीमध्ये दोन ते २२ वर्षीपर्यंतच्या स्केटिंगपटूंचा समावेश होता. दोन वर्षीय रॉणेश राजकुमार वाघ हा सर्वात लहान वयाच्या स्केटिंगपटूने नागरिकांची मने जिंकली.

प्रात्यक्षिक...फेटा बांधण्याचे आणि मर्दानी खेळाचे

मर्दानी खेळ आणि कोल्हापुरी फेटा हे कोल्हापूरकरांच्या जिव्हाळ्याचे विषय. सायबर रोडवरील 'हॅपी स्ट्रीट'मध्ये नागरिकांना कोल्हापुरी फेटा बांधण्याची कलाही शिकायला मिळाली. राजमान्य उद्योग समूहातर्फे राजेश पाटील यांनी कोल्हापुरी फेटा बांधण्याची प्रात्यक्षिके शिकवले. कोल्हापुरी फेटा परिधान करण्याची अनेकांची ईच्छा यानिमित्ताने पूर्ण झाली. शिवसंस्कार प्रतिष्ठान व चाणक्य मर्दानी खेळ या संस्थेने तलवारबाजी, लाठीकाठी, भालाफेक या मर्दानी खेळाचे प्रात्यक्षिके सादर करत वातावरणात रोमांच निर्माण केले. राजेश पाटील, संदीप लाड, लखन जाधव, राजनंदिनी लाड, श्रेया वाणी, श्रावणी पंदे, आदित्य पंदे, राजवर्धन लाड,सार्थक पाखरे, प्रियांका करवळ यांनी सादर केलेल्या मर्दानी खेळाने तरुणाईचा उत्साह आणखी दुणावला.

कुस्ती, फुटबॉल आणि खो-खो

कलागुणांसाठी मुक्त व्यासपीठ आणि पारंपरिक खेळांना प्राधान्य या सूत्रावर आधारित 'हॅपी स्ट्रीट'मध्ये प्रत्येकाने आपल्याला आवडेल त्या खेळाचा आनंद लुटला. कोल्हापुरात कुस्ती आणि फुटबॉल खेळाविषयी प्रचंड वेड. या खेळावरील प्रचिती 'हॅपी स्ट्रीट'मध्ये आली. शाळकरी आणि कॉलेज विद्यार्थ्यांनी एकत्र येऊन ग्रुप तयार केले. विद्यार्थ्यांनी वेगवेगळे संघ करत कुणी फुटबॉल सामन्याचा आनंद लुटला. तर कुणी खो-खोचे सामने खेळले. यामध्ये मुलीही अग्रभागी होत्या. सामन्यातील हार जीतपेक्षा खेळाचा आनंद लुटण्याकडे प्रत्येकाचा कल होता. काही मुलांनी कुस्ती खेळताना शड्डूचा आवाज घुमवला. सायबर चौक रोड ते एनसीसी भवनपर्यंतच्या 'हॅपी स्ट्रीट'च्या मार्गावर ठिकठिकाणी आवडते खेळ खेळत आनंद वृद्धिंगत केला.

अन् बाल शिवाजी अवतरले

एनसीसी भवनकडील व्यासपीठावर गीत, नृत्याची धमाल सुरू होती. प्रत्येकजण हटके परफॉर्मन्स करत होता. गीत, गायनाच्या आविष्कारांनी वातावरण प्रफुल्लित बनला होता. अशा आनंदी आणि जल्लोषी वातावरणात व्यासपीठासमोर छत्रपती शिवाजी महाराज की जय असा जयघोष सुरू झाला. महापुरुषांच्या वेशभूषेतील मुलांनी साऱ्यांचे लक्ष वेधले. बाल शिवाजीसारखी वेशभूषा केलेल्या दौलतनगर परिसरातील अद्वैत राहूल घाडगे या साडेचार वर्षीय मुलगा साऱ्यांचा आकर्षण ठरला.

म. टा. वृत्तसेवा, इचलकरंजी

मजूरीवाढ जाहीर करुनही तीन आठवड्यानंतरही यंत्रमाग कामगारांना वाढीव मजूरी दिली जात नसल्याने जाहीर मजूरीवाढ किंवा किमान वेतन कायद्याप्रमाणे पगार मिळवून द्यावा, अन्यथा २ फेब्रुवारीपासून बेमुदत कामबंद आंदोलन छेडण्याचा इशारा लाल बावटा जनरल कामगार युनियनने सहाय्यक कामगार आयुक्तांना दिला.

२०१३ मध्ये मजुरीवाढीसाठी इचलकरंजीतील यंत्रमाग कामगारांनी कामबंद आंदोलन केल्यानंतर सहाय्यक कामगार आयुक्तांनी ५२ पिकास ६ पैसे मजुरीवाढ जाहीर केली होती. त्यावेळी झालेल्या करारानुसार दरवर्षी डिसेंबर महिन्यात दोन महागाई भत्ते एकत्र करून सहाय्यक कामगार आयुक्त मजुरीवाढ जाहीर करतात. मात्र यावेळी यंत्रमाग संघटनांनी यंदा मजूरीवाढ जाहीर न करण्याची विनंती केली होती. कारखानदार जाहीर केलेली मजुरीवाढ देण्यास टाळाटाळ करत असल्यामुळे कामगारांत असंतोष पसरल्याने लालबावटा जनरल कामगार युनियनच्या शिष्टमंडळाने सहाय्यक कामगार आयुक्तांची भेट घेतली. 'यापूर्वी झालेला करार मोडीत काढून कामगारांच्या हक्कावर गदा आणण्याचे काम सुरू आहे. अनेक यंत्रमाग मालकांची मजुरीवाढ देण्याची भूमिका असताना त्यांच्यावर यंत्रमागधारक संघटनांचे दडपण येत आहे' असा आरोप भरमा कांबळे यांनी केला. यंत्रमाग कारखानदारांनी जाहीर केलेली मजुरीवाढ न दिल्यास काम बंद आंदोलनाची भूमिका कामगारांनी घेतली. यासाठी २ फेब्रुवारीचा अल्टिमेटम कॉ. दत्ता माने, शिवगोंडा खोत यांनी दिला. या लढ्यात अन्य यंत्रमाग कामगार संघटनांनाही सहभागी करून घेऊन मजुरीवाढीचा लढा तीव्र करणार असल्याचेही त्यांनी स्पष्ट केले.

शिष्टमंडळात अंबादास कुणगिरी, सुभाष कांबळे, मंगेश वासुदेव, नागेश पोला, अमित कोरवी, दत्तात्रय फासे, गोपाळ पोला यांचा समावेश होता.

म. टा. वृत्तसेवा, इचलकरंजी

म्हाडाच्या माध्यमातून शहापूर येथे घरकुले बांधण्यास मंजूरी द्यावी, बांधकाम कामगारांना घरकुलासाठी ५ लाख रुपये अनुदान द्यावे, प्रधानमंत्री आवास योजनेच्या अर्जांची तपासणी करावी, ग्रामीण भागात भाड्याने राहण्यास असलेल्या अर्जदारांना घरकुले बांधून मिळावीत यांसह विविध मागण्यांसाठी सोमवारी भाकपच्यावतीने प्रांताधिकारी कार्यालयावर मोर्चा काढण्यात आला.

केंद्र सरकारच्या प्रधानमंत्री आवास योजनेतून घरकुले मिळण्यासाठी शहर व परिसरातील कामगार, कष्टकरी लाभार्थ्यांनी अर्ज केले आहेत. परंतू इचलकरंजी नगरपरिषदेने शहापूरातील जागा घरकुले बांधण्यासाठी जागा निश्‍चित करूनही त्याला अद्याप मंजुरी मिळाली नाही. कामगारांना वाढत्या महागाईने भाड्याच्या घरात राहणे न परवडणारे असल्याने घरकुलासाठी सातत्याने पाठपुरावा करूनही करून बांधकामास मंजूरी मिळत नसल्याने भारतीय कम्युनिस्ट पक्षाच्या नेतृत्वाखाली मोर्चाचे आयोजन केले होते.

पक्ष कार्यालयापासून प्रमुख मार्गावरून सरकारविरोधी घोषणा देत करत मोर्चा प्रांताधिकारी कार्यालयावर आला. त्यानंतर शिष्टमंडळाच्यावतीने प्रांताधिकार्‍यांना निवेदन देऊन नगरपरिषदेने म्हाडामार्फत घरकुल बांधण्यासाठी शहापूरमधील निश्‍चित केलेल्या जागेवर घरकुलासाठी मंजुरी द्यावी, ग्रामीण भागात प्रधानमंत्री आवास योजनेचे अर्ज भरलेलंची तपासणी करावी, भाड्याने राहत असलेल्यांना गायरान जागेत घरे बांधून मिळावीत, बांधकाम कामगारांना घर बांधण्यासाठी ५ लाख अनुदान आणि मुलीच्या लग्नासाठी ५१ हजार मिळावेत, यंत्रमाग कामगारांसाठी स्वतंत्र कल्याणकारी मंडळाची स्थापना करावी यासह विविध मागण्या मांडल्या.

यावेळी कॉ. हणमंत लोहार, नामदेव गावडे, सतिश कांबळे, मारुती आजगेकर, दादासाहेब जगदाळे, महेश लोहार, विष्णू चव्हाण, शिवाजी जाधव, वर्षा जाधव, कुसूम येमूल, हुसेनबी रोन्याळ, सायरा मुल्ला, नजमा दुरूगवाले यांच्यासह महिला उपस्थित होत्या.

डीवायएस काळे यांनी जयसिंगपुरात सूत्रे स्वीकारली

जयसिंगपूर : उपअधिक्षक किशोर काळे यांनी सोमवारी जयसिंगपूर उपविभागाची सूत्रे स्वीकारली. इस्लामपूर येथे कार्यरत असणारे काळे यांची ३ जानेवारी रोजी जयसिंगपूर उपविभागीय कार्यालयात बदली झाली होती. लोकसभा निवडणुकीच्या पार्श्‍वभूमीवर राज्य पोलिस दलातील १८ पोलिस उपअधिक्षक, सहायक आयुक्तांच्या बदल्या करण्यात आल्या. बदलीचे आदेश गृह विभागाने काढले होते. यामध्ये जयसिंगपूरचे पोलिस उपअधिक्षक कृष्णात पिंगळे यांची इस्लामपूर येथे तर इस्लामपूरचे उपअधिक्षक किशोर काळे यांची बदली जयसिंगपूर येथे करण्यात आली होती. पिंगळे यांनी नुकतीच इस्लामपूर येथील सूत्रे स्वीकारली. यानंतर जयसिंगपूर येथे उपअधिक्षक काळे यांनी पदभार स्वीकारला.

म. टा. वृत्तसेवा, निपाणी

येथील स्टेट बँक ऑफ इंडियाच्या शाखेत बाँब ठेवण्यात आल्याचा निनावी फोन बेळगाव व बेंगळुरू येथील पोलिस कंट्रोल रुमला गेल्याने पोलिसांनी तातडीने शहरातील एसबीआय बँकेच्या तिन्ही शाखांत शोधमोहीम राबविली. परिणामी बँकेचे कर्मचारी व ग्राहकांत भीतीमुळे गोंधळ उडाला. बँकेत बाँब ठेवल्याचा निनावी फोन आल्याने पोलिसांनी बँकेतून कर्मचारी, ग्राहकांना बाहेर काढून शोधमोहीम राबविली.सोमवार पेठ, जयनगर आणि या बँकेत विलीन झालेल्या बँक ऑफ म्हैसूर शाखेत पोलिसांनी धाव घेतली. निपाणीचे पोलिस निरीक्षक संतोष सत्त्यनायक, पोलिस उपनिरीक्षक संगमेश होसमनी यांनी बँकेत शोधमोहीम राबवली. बेळगावमधून श्‍वानपथक व बाँब निष्क्रीय दलालाही पाचारण केले होते. पोलिसांनी दोन संशयितांना चौकशीसाठी ताब्यात घेतले आहे. दुपारी उशिरापर्यंत चौकषीचे कार्य सुरू होते.