म. टा. वृत्तसेवा, गारगोटी

केंद्रीय कृषी व सहकार मंत्रालयांतर्गत राष्ट्रीय सहकारी विकास निगमचा 'उत्कृष्टता' हा मानाचा प्रथम क्रमांकाचा पुरस्कार मुदाळच्या हुतात्मा स्वामी-वारके सहकारी सूतगिरणीस सहकार आयुक्त सतीश सोनी यांच्या हस्ते प्रदान करण्यात आला. सूतगिरणीचे अध्यक्ष पंडितराव केणे, उपाध्यक्ष राजाराम पाटील, कार्यकारी संचालक मिलिंद कुलकर्णी यांनी पुरस्कार स्वीकारला. २५ हजार रुपये, मानचिन्ह, गुणवत्ता प्रशस्तिपत्र असे पुरस्काराचे स्वरूप आहे.

'माजी आमदार के. पी. पाटील यांच्या प्रयत्नाने व मार्गदर्शनाने ही संस्था सुरू आहे. पुरस्काराचे श्रेय कामगारांचे परिश्रम, सभासदांचे सहकार्य, संचालक मंडळाला आहे' असे चेअरमन पंडितराव केणे यांनी नमूद केले. कार्यकारी संचालक मिलिंद कुलकर्णी यांनी सूतगिरणीच्या कामकाजाविषयी माहिती दिली. राष्ट्रीय विकास निगमच्या क्षेत्रीय संचालक वंदना सवदी यांनी, 'तीन वर्षात पॉझिटिव्ह नेटवर्थ, आर्थिक गुणवत्तेत सुबत्ता व नफा, सहकारी, आर्थिक व प्रशासकीय कामकाज या निकषांवर तपासणी करून राज्यातील सर्वोत्कृष्ट 'उत्कृष्टता' हा नंबर एकचा पुरस्कार दिला जातो. हे निकष पूर्ण केल्याने वारके सहकारी सूतगिरणीला पुरस्कार देण्यात आला' असे सांगितले. राष्ट्रीय विकास निगमचे उपव्यवस्थापक संजय कुमार, खाडे, सारडा, कटके, सचिव सुरेश पाटील, आर. व्ही. देसाई, सुरेशराव सूर्यवंशी, प्रॉडक्शन व्यवस्थापक पी. डी. कुलकर्णी, चीफ अकाउंटंट नेताजी ढेकळे उपस्थित होते.

फोटो

राष्ट्रीय सहकारी विकास निगमचा उत्कृष्टता पुरस्कार सहकार आयुक्त सतीश सोनी यांच्या हस्ते स्वीकारताना हुतात्मा स्वामी-वारके सहकारी सूतगिरणीचे चेअरमन पंडितराव केणे, कार्यकारी संचालक मिलिंद कुलकर्णी. शेजारी व्हा. चेअरमन राजाराम पाटील, क्षेत्रीय संचालक वंदना सवदी आदी.

म. टा. वृत्तसेवा, चंदगड

बेळगाव-वेगुर्ला रोडवर कानूर खुर्द (ता. चंदगड) येथे गोवा बनावटीची ४१ हजार ३४७ रुपयांच्या दारुची वाहतूक करताना स्विफ्ट गाडीसह शिवाजी खेमान्ना तेजम (वय ३०, बिजूर, ता. चंदगड) याला पकडले. बुधवारी दुपारी सव्वातीन वाजता ही घटना घडली. पोलिस कॉन्स्टेबल अमर सायेकर यांनी याबाबतची माहीती चंदगड पोलिसात दिली. पोलिसांनी सांगितले की, शिवाजी तेजम हे स्विफ्ट गाडीमधून (एमएच ०७, एजी २३५८) गोवा बनावटीची दारुची नेत नसल्याने पोलिसांना समजले. त्यांनी सापळा रचून तेजमला गाडीसह कानूर खुर्द येथे पकडले. त्याच्याकडून रम, व्हीस्की, ऑइल ब्लू, हायवार्ड, फाइन व्हीस्की, बिअर जप्त केली. एएसआय पाटील, रावसाहेब कासेकर, दिलीप येसादे, अमोल निकम, राजू किल्लेदार, अमर सायेकर यांच्या पथकाने कारवाई केली. घटनेची नोंद चंदगड पोलिसात झाली असून सहायक फौजदार राजू पाटील तपास करीत आहेत.

म. टा. वृत्तसेवा, आजरा

आजरा तालुक्यातील चित्री प्रकल्पाजिकच्या जंगलात एक युवकाने आत्महत्या केल्याची घटना आज उघडकीस आली. संजय गजानन वाघरे (वय २३, रा. किणे, ता. आजरा) असे त्याचे नाव आहे. याबाबत त्याचा भाऊ अजयने आजरा पोलिसांत वर्दी दिली आहे.

संजय, त्याचा भाऊ अजय व आई असे एकत्र राहतात. संजय (गणेशवाडी, ता. आजरा) येथे एका काजू फॅक्टरीत काम करीत होता. आज सकाळी तेथे कामास जातो म्हणून तो सकाळी साडेसातच्या सुमारास बाहेर पडला. नंतर सकाळी साडेअकराच्या दरम्यान अर्जुन मनगुतकर (रा. गणेशवाडी, ता. आजरा) याचा वाघरे कुटुंबियांना फोन आला. त्याने सांगितले की संजयने चित्री प्रकल्प परिसरातील आवंडी गावच्या जंगलात झाडाला गळ्याला स्कार्फ गुंडाळून गळफास घेतला आहे आणि त्याचा मृतदेह तेथील ऐनाच्या झाडाला लोंबकळत आहे. त्यानुसार अजय आणि त्याचे नातेवाईकानी चित्री परिसरातील जंगलात शोध घेतला. तेव्हा त्याचा मृतदेह सापडला. पोलिसांना या घटनेची माहिती देण्यात आली. पंचनामा करण्यात आला. संजय एकलकोंडा आणि मानसिक संतुलन बिघडलेला होता. या घटनेची नोंद आजरा पोलिसात झाली आहे. प्रल्हाद सरदेसाई पुढील तपास करीत आहेत.

म. टा. वृत्तसेवा, इचलकरंजी

केंद्र व राज्य सरकारच्या नकारात्मक धोरणाच्या विरोधात देशव्यापी संपाला पाठिंबा दर्शवत कामगार संघटना संयुक्त कृती समितीच्यावतीने कॉ. मलाबादे चौकात सरकारविरोधात निदर्शने करण्यात आली. संपाला पाठिंबा दर्शवत माकप, अ.भा. किसान सभा व जनवादी महिला संघटनेने रुई फाटा येथे रास्तारोको करण्यात आला.

सरकारच्या कामगारविरोधी धोरणाच्या विरोधात देशातील ११ कामगार संघटनांनी एकत्र येऊन ४८ तासांचा संप जाहीर केला होता. त्यानुसार संयुक्त कामगार संघटनांच्या संयुक्त कृती समितीच्यावतीने मलाबादे चौकात जोरदार निदर्शने करण्यात आली. सरकारचा निषेध नोंदवत घोषणाबाजी केली. कामगार नेते शामराव कुलकर्णी, मिश्रीलाल जाजू, कॉ. दत्ता माने, आनंदा गुरव, सदा मलाबादे, शिवानंद पाटील, बंडा सातपुते आदी सहभागी होते.

'सत्तेवर येताना केंद्र व राज्य सरकारने जी आश्‍वासने दिली, ती पूर्ण करण्यात सरकार अपयशी ठरले. दरवर्षी २ कोटी नोकर्‍या, प्रत्येकाच्या खात्यात १५ लाख रुपये जमा, महिलांना संरक्षण, शेतकर्‍यांच्या मालाला हमीभाव, स्वामीनाथन आयोग लागू करणार अशा गोंडस घोषणांच्या नावाखाली भाजपाने जनतेची फसवणूक केली आहे. त्यामुळे सरकारच्या विरोधातील संपाला अ. भा. किसान सभा, माकप, जनवादी महिला संघटनांनी पाठिंबा दर्शवत रुई फाटा येथे रास्तारोको आंदोलन केले. यावेळी इचलकरंजी-कोल्हापर मार्गावरील वाहतूक ठप्प झाली होती.

आंदोलनात सुभाष निकम, विकास पाटील, अमोल नाईक, चंद्रकला मगदूम, मुमताज हैदर, आप्पासाहेब परीट, आनंदराव चव्हाण, दिलीप सुतार, राजू शिंदे, नारायण गायकवाड, विनायक डंके, रावसाहेब घोरपडे सहभागी झाले.

कोल्हापूर: राज्य सरकारने स्थापन केलेल्या पाचव्या वित्त आयोगाचे अध्यक्ष श्री. व्ही. गिरीराज यांच्याकडे जिल्हा परिषदेच्या अध्यक्षा शौमिका महाडिक यांनी जिल्हा परिषदेच्या उत्पन्नवाढी संदर्भातील सूचनांचे निवेदन सादर केले. उत्पन्नवाढीच्या अनुषंगाने चर्चा केली. सातारा जिल्हाधिकारी कार्यालय येथे बैठक झाली. याप्रसंगी जिल्हा परिषद अध्यक्ष संजय नाईक निंबाळकर, साताऱ्याच्या नगराध्यक्षा माधवी कदम उपस्थित होते.

म. टा. प्रतिनिधी, कोल्हापूर

जिल्हा परिषदेच्या जिल्हा ग्रामीण विकास यंत्रणेमार्फत भरविलेल्या ताराराणी महोत्सवात ४० लाख २१ हजार ५९७ रुपयांची उलाढाल झाली. पाच दिवसीय महोत्सवात विविध प्रकारच्या चटण्या, मिरची पूड, पापड, लोणची, मसाल्यांचे पदार्थ मिळून २१ लाख ९१ हजार ५२२ रुपयांच्या वस्तूंची विक्री झाली. खवय्यांनी विविध खाद्य स्टॉल्सवर १८ लाख ३० हजार ७५ रुपयांच्या पदार्थावर ताव मारला. प्रायव्हेट हायस्कूलच्या मैदानावरील महोत्सवाचा बुधवारी समारोप झाला.

यावेळी सर्वाधिक वस्तू व खाद्यपदार्थांची विक्री करणाऱ्या बचत गटांना सन्मानित केले. वस्तू विक्रीमध्ये शिरोळ तालुक्यातील अब्दुललाट येथील अहिल्यादेवी स्वयंसहायता बचत गटाने बाजी मारली. त्यांनी २ लाख ४६ हजार ७८० रुपयांच्या चटणीची विक्री केली. गडहिंग्लज तालुक्यातील धनसंपदा स्वयंसहाय्यता समूहाने १ लाख ५८ हजार ८५० रुपयांच्या वस्तूंची विक्री केली. करवीर तालुक्यातील आयन स्वयंसहायता महिला बचत गटाने १ लाख ६८० रुपयांच्या वस्तूंची विक्री केली. यात पापड लोणची, मसाले व पुरणपोळीचा समावेश होता. करवीर पंचायत समिती सभापती राजेंद्र सूर्यवंशी, जिल्हा नियोजन अधिकारी सरिता यादव, निवडणूक विभागाच्या उपजिल्हाधिकारी स्नेहल भोसले, जिल्हा परिषदेचे मुख्य वित्त व लेखाअधिकारी संजय राजमाने,उपमुख्य कार्यकारी अधिकारी रविकांत आडसूळ, जिल्हा कृषि अधिकारी चंद्रकांत सुर्यवंशी, हातकणंगले तालुका पंचायत समितीच्या सदस्या रेश्मा सनदी, पूनम भोसले यांच्या उपस्थितीत बचतगटांना सन्मानपत्रांचे वितरण झाले.

कोगेत भरणार करवीर महोत्सव

सभापती राजेंद्र सूर्यवंशी यांनी महिनाभरात करवीर पंचायत समितीतर्फे कोगे येथे करवीर महोत्सवाची घोषणा केली. जिल्हा ग्रामीण विकास प्रकल्प संचालक सुषमा देसाई यांनी महोत्सवचा आढावा घेतला. करवीर पंचायत समितीचे गटविकास अधिकारी सचिन घाडगे यांनी आभार मानले. याप्रसंगी प्रकल्प संचालक देसाई, सहायक प्रकल्प अधिकारी सम्राट पोतदार, राजेंद्र जाधव, सचिन पानारी यांचा सत्कार झाला. प्रायव्हेट एज्युकेशन सोसायटीचे बी. जी. देशपांडे, एस. एस. कुलकर्णी, ए. व्ही. कुंभार उपस्थित होते.

खाद्यपदार्थांचे स्टॉल फुल्ल

महोत्सवात शाकाहारी, मांसाहारी जेवण, बिर्याणी, पुरणपोळी, भाकरी खर्डा, थालिपीठ विक्रीचे ४९ स्टॉल्स होते. रुकडी येथील कुदरत बचत गटाच्या स्टॉलवर २ लाख २५ हजार ६०० रुपयांच्या पदार्थांची विक्री झाली. त्यापाठोपाठ आसुर्ले-पोर्ले येथील गुरुदत्त महिला बचत गटाच्या स्टॉलवरील हैद्राबादी बिर्याणीची विक्री २ लाख ९ हजार १४० रुपयांपर्यंत झाली. पन्हाळा येथील श्री गणेश बचत गटाच्या स्टॉलवर नागरिकांनी १ लाख ७४ हजार ७०० रुपयांच्या खाद्यपदार्थांवर ताव मारला. पाच स्टॉल्सवरील विक्रीचा आकडा साडेसात लाखांपर्यंत आहे.

म. टा. प्रतिनिधी, कोल्हापूर

'कोल्हापुरातील नेत्यांचे दरडोई उत्पन्न वाढले. मात्र, शहरातील नागरी प्रश्न जिथल्या तिथे आहेत. प्रस्थापित पक्ष नागरिकांच्या मदतीसाठी पुढे येत नाहीत. त्यांना केवळ मतांचे राजकारण करायचे आहे. महाराष्ट्र स्वाभिमान पक्ष नागरिकांच्या आयुष्याशी जुगार खेळणार नाही. समाजकारण आधी, राजकारण नंतर ही पक्षाची कार्यपद्धती आहे' असे प्रतिपादन पक्षाचे नेते व माजी खासदार निलेश राणे यांनी केले.

सुधाकर जोशीनगर येथील काँग्रेसचे कार्यकर्ते दयानंद नागटिळे, विकास नागटिळे, सचिन चौगुले व सहकाऱ्यांनी बुधवारी महाराष्ट्र स्वाभिमान पक्षात प्रवेश केला. संभाजीनगर येथील इंदिरासागर सभागृहात कार्यक्रम झाला. याप्रसंगी नागटिळे यांच्या हस्ते निलेश राणे यांना तलवार, श्रीफळ व पुष्पगुच्छ देऊन स्वागत केले.

राणे म्हणाले, 'काँग्रेसमध्ये कार्यकर्त्यांची घुसमट झाल्यामुळे त्यांनी स्वाभिमान पक्षात प्रवेश केला. पक्षासाठी कार्यकर्त्यांनी वेळ द्यावा, नागरी प्रश्नांची सोडवणूक करावी. पक्षही त्यांचा निश्चितच सन्मान करेल. सुधाकर जोशीनगरमधील प्रॉपर्टी कार्डचा विषय अनेक वर्षापासून प्रलंबित आहे. प्रॉपर्टी कार्डप्रश्नी उद्या प्रांताधिकाऱ्यांशी बोलून त्याची सोडवणूक केली जाईल.'

याप्रसंगी स्वाभिमान पक्षाचे जिल्हाध्यक्ष सचिन तोडकर, अशोक पाटील यांची भाषणे झाली. संदीप मगदूम यांनी सूत्रसंचालन केले. दरम्यान कार्यक्रम सुरू होण्याअगोदर भाजप व राष्ट्रवादीचे काही कार्यकर्ते त्यांना शुभेच्छा देण्यासाठी इंदिरासागर हॉलमध्ये आले होते.

सेना बिघडली, मनसे बदनाम

कार्यकर्त्यांना मार्गदर्शन करताना राणे म्हणाले, 'पक्षात शिस्त महत्वाची आहे. कार्यकर्त्यांनी पक्ष शिस्तीला बाधा येईल असे कोणतेही कृत्य करु नये. शिवसेनेत चाळीस वर्षापूर्वी शिस्त होती. म्हणून तो पक्ष वाढला. मात्र आज तेथे कसलीही शिस्त नाही. शिवसेना हा बिघडलेला पक्ष आहे. तर कार्यकर्ते बेशिस्तीने वागल्यामुळे मनसे बदनाम झाला.'

Appasaheb.mali@timesgroup.com

Tweet:Appasaheb_MT

कोल्हापूर : कार्यालयात उशिरा येणाऱ्या अधिकाऱ्यांना चाप लावण्यासाठी आयुक्त अभिजित चौधरी यांनी बायोमेट्रिक हजेरी बंधनकारक केली. अतिरिक्त आयुक्त, उपायुक्तांसह विविध विभागाच्या अधिकाऱ्यांनाही बायामेट्रिकच्या हजेरी कक्षेत आणले. मात्र दुसरीकडे महापालिकेच्या मालकीच्या बहुतांश शाळांतील बायोमेट्रिक मशिन्स अनेक महिन्यापासून बंद स्थितीत आहेत. तर काही ठिकाणी कर्मचाऱ्यांनीच जाणूनबुजून बायोमेट्रिक यंत्रणा बंद पाडल्याची चर्चा आहे.

स्वत:च्या सोयीसाठी बायोमेट्रिक यंत्रणेला 'सुट्टी'वर पाठवण्याच्या प्रतापामुळे कामचुकार कर्मचाऱ्यांचे चांगलेच फावले आहे. बायोमेट्रिकऐवजी ऑफलाइन पद्धतीने मस्टरवर हजेरी नोंदवली जात आहे. महिनाअखेरीस ऑफलाइन पध्दतीचा हजेरी अहवाल शिक्षण समिती कार्यालयाकडे सादर होऊ लागला आहे. शहरात महापालिकेच्या मालकीच्या ५९ शाळा आहेत. मात्र शाळेत बायोमेट्रिकची सोय नसल्याने शिक्षकांना महापालिकेच्या फिल्टर हाऊस, फायर स्टेशन आणि हॉस्पिटलपर्यंत धावाधाव करुन बायोमेट्रिकवर हजेरी नोंदवावी लागत होती. बायोमेट्रिक हजेरीसाठी शिक्षकांची होणारी धावपळ थांबावी, यासाठी प्रत्येक शाळेत मशिन्स बसावावीत यासाठी शिक्षक संघटनांनी प्रशासनाकडे पाठपुरावा केला होता.

प्रशासनाने ५९ शाळेपैकी ४३ शाळेत दोन वर्षांपूर्वी बायोमेट्रिक यंत्रणा कार्यान्वित केली. महापालिका शाळेतील शिक्षकांची संख्या ३९० तर कर्मचाऱ्यांची संख्या १३५ आहे. बायामेट्रिकमुळे कार्यालयीन प्रवेश व बाहेर पडण्याच्या वेळेची अचूक नोंद होऊ लागली आहे. प्रामाणिक शिक्षक व कर्मचाऱ्यांनी बायोमेट्रिक हजेरीचे कौतुक केले. शिवाय तत्कालिन आयुक्त पी. शिवशंकर यांनी बायामेट्रिकद्वारे हजेरी नोंदली नाही तर पगार थांबविण्याचे आदेशही दिले. त्याचा परिणाम म्हणून बायोमेट्रिकवर हजेरी नोंद लागली.

दुसरीकडे वर्षभराच्या आत शाळेतील बायोमेट्रिक मशिन्स खराब झाल्याच्या तक्रारी आहेत. शिवाय बायामेट्रिकमुळे अडचणी निर्माण झाल्यामुळे मशिन्समध्ये जाणूनबुजून बिघाड करण्याचा उद्योग काही ठिकाणी झाला. सरकारी शाळा म्हणजे 'कधीही या आणि परत जा' या पद्धतीने काम करणाऱ्यांची पंचाईत झाली. ऑफलाइन पद्धतीमुळे सहकाऱ्यांना सांगून मस्टरवर हजेरी नोंदविण्याच्या प्रकारात वाढ होत आहेत. मशिन्स खराब झाल्यानंतर मुख्याध्यापकांनी शिक्षण समिती कार्यालयाला त्या संदर्भात कळविले. मात्र समितीच्या कार्यालयातून बायोमेट्रिक मशिन्स कार्यालयात आणून जमा करण्याच्या सूचना केल्या. काही शाळांनी मशिन्स जमा केल्या तर काही ठिकाणी शाळेतच मशिन्स पडून आहेत.

सोळा शाळेत मशिन नाहीत

प्रशासकीय पातळीवर खराब मशिन्सची मुदतीत दुरुस्ती झाली नाही. सध्य स्थितीमध्ये शाळा आणि प्रशासकीय पातळीवर दोन्ही ठिकाणी बायोमेट्रिकविषयी उदासिनता दिसून येत आहे. आयुक्तांनी लक्ष घालून प्रत्येक शाळेतील बायामेट्रिक मशिन्स सुरू करायचा आदेश प्रशासनाला दिल्यास कामचुकारांना चाप बसणार आहे. दरम्यान शहर आणि परिसरातील सोळा शाळेत अद्याप बायोमेट्रिक हजेरीची यंत्रणा नाही. या शाळेतील शिक्षक व कर्मचाऱ्यांना रोज शाळा भरताना व सुटल्यानंतर महापालिकेच्या अन्य कार्यालयात जाऊन हजेरी नोंदवावी लागते. शाळा एका भागात आणि बायामेट्रिक हजेरीची कार्यालये दुसऱ्या भागात असे चित्र काही ठिकाणी आहे. महापालिका प्रशासनाने उर्वरित सोळा शाळेतही बायामेट्रिक मशिन्सची उपलब्धता करावी, अशी शिक्षकांची मागणी आहे.

प्रशासन म्हणते सहाच शाळेतील यंत्रणा बिघडली

शिक्षण समिती कार्यालयाकडे बायोमेट्रिक यंत्रणेच्या सध्यस्थितीबाबत विचारणा केली. त्यावर शिक्षण समितीने केवळ सहा शाळेतील बायोमेट्रिक यंत्रणा नादुरुस्त झाल्याचे सांगितले. तसेच ऑफलाइन हजेरी अहवालही योग्यरित्या सादर होत असल्याचे सांगितले. प्रशासनाधिकारी एस. के. यादव यांच्याशी संपर्क साधण्याचा प्रयत्न केला पण तो होऊ शकला नाही.

कोल्हापूर

महानगरपालिका प्रशासनामार्फत शहरामध्ये अतिक्रमण हटाव मोहीम राबविली जात आहे. परंतु अतिक्रमणानंतर विस्थापित झालेल्या फेरीवाल्यांचे योग्य ठिकाणी पुनर्वसन करणेही अत्यावश्यक आहे. त्यासाठी शिवसेना फेरीवाले सेनेच्यावतीने आमदार राजेश क्षीरसागर यांच्या नेतृत्वाखाली मोर्चा काढून प्रशासनाला जाब विचारला. तसेच शहरात राष्ट्रीय फेरीवाले धोरणाची अंमलबजावणी करण्याची मागणी केली असल्याचे प्रसिद्धी पत्रक फेरीवाला सेनेचे शहरप्रमुख धनाजी दळवी यांनी दिले आहे. पत्रकात पुढे म्हटले आहे, शिवसेनेच्या मोर्चाने पोटशूळ उठलेल्या भाजप-ताराराणी आघाडीच्या ठराविक नगरसेवकांना स्थानिक फेरीवाले परप्रांतीय वाटू लागले आहेत.

कोल्हापूर

औषधे व वैद्यकीय उपकरणांवरील जीएसटी रद्द करावा, यासह विविध मागण्यांकडे लक्ष वेधण्यासाठी येथील महाराष्ट्र सेल्स अॅन्ड रिप्रेझेंटीव्हज असोसिएशनच्या नेतृत्वाखाली औषध विक्री प्रतिनिधींनी दसरा चौक ते जिल्हाधिकारी कार्यालयापर्यंत बुधवारी मोटारसायकल रॅली काढली. वैद्यकीय प्रतिनिधींना किमान वेतन २० हजार मिळावे, सहा हजार पेन्शन मिळावे, समान वेतन द्यावे, बोनस, इएसआयसी, पीएफचा लाभ द्यावा, सामाजिक सुरक्षा देण्यात यावी आदी मागण्यांकडे लक्ष वेधण्यात आले. रॅलीमध्ये विजय धनवडे, विवेक गोडसे, प्रशांत सावंत, सचिन पाटील, अविनाश सोहनी, पंकज डोर्ले, संज्योती जयस्वाल, प्रीतम कासाद, प्रसाद देसाई यांच्यासह प्रतिनिधी सहभागी झाले .

डॉक्टरांच्या हलगर्जीमुळे

मातेसह अर्भकाचा मृत्यू?

सातारा

डॉक्टरांच्या हलगर्जीमुळे दीपाली प्रसाद शिंदे (वय २५) आणि त्यांच्या नवजात अर्भकाचा मृत्यू झाल्याचा आरोप करीत कामाठीपुरा येथील नागरिकांनी सातारा शहर पोलिस ठाण्यासमोर ठिय्या आंदोलन केले. त्यामुळे काही तणावाचे वातावरण निर्माण झाला होता. या प्रकरणी नातेवाईकांनी डॉक्टरवर गुन्हा दाखल करण्याची मागणी केली आहे.

गोडोलीतील कामाठीपुरा भागातील वैदूवाडी हे दीपाली शिंदे यांचे माहेर आहे. सव्वा वर्षांपूर्वी त्यांचा विवाह झाला आहे. बाळंतपणासाठी माहेरी आल्यानंतर त्यांच्या नावाची नोंदणी नातेवाईकांनी गोडोली येथील संचित हॉस्पिटलमध्ये केली. या ठिकाणी डॉ. अपर्णा जगताप यांनी दीपाली यांच्यावर उपचार सुरू केले होते. दीपाली सुमारे साडेआठ महिन्यांची गर्भवती असेपर्यंत याच रुग्णालयात डॉक्टर सांगतील त्याप्रमाणे ट्रीटमेंट सुरू होती. २५ डिसेंबर रोजी दीपाली यांची तब्येत थोडी बिघडल्याने हॉस्पिटलमध्ये नेण्यात आले. डॉ. जगताप यांनी युरीन टेस्ट करण्यासाठी लॅबमध्ये जाण्यास सांगितले. या तपासणीचे रिपोर्ट नॉर्मल असल्याचे सांगत डॉ. जगताप यांनी ताप कमी होण्याच्या गोळ्या दिल्या. तीन दिवस औषधे खाल्ल्यानंतरही दीपालीचा ताप कमी होत नव्हता. २९ रोजी जास्तच ताप वाढल्याने दीपाली यांना पुन्हा हॉस्पिटलमध्ये नेण्यात आले. डॉ. जगताप गावाला गेल्याचे सांगत त्या ठिकाणच्या कर्मचाऱ्यांनी दीपाली यांना दुसऱ्या हॉस्पिटलमध्ये पाठवून दिले. तेथील डॉक्टरांनी दीपाली यांची प्रकृती गंभीर असल्याचे सांगितले. या बाबत डॉ. जगताप यांनाही फोन करून तत्काळ सांगून त्याच दवाखान्यात नेण्यास सांगण्यात आले.

दीपाली यांना संचित दवाखान्यात नेईपर्यंत डॉ. जगताप या हॉस्पिटलमध्ये येऊन थांबल्या होत्या. तपासणी करुन डॉ. जगताप यांनी दीपालीच्या गर्भात असणारे अर्भक दगावल्याचे सांगितले. हे ऐकताच कुटुंबीय हादरुन गेले. दरम्यान, डॉक्टरांनी दीपालीची रक्त तपासणी करण्यास सांगितले. रक्त तपासणी अहवालात दीपाली हिच्या शरीरात कावीळीचे प्रमाण आढल्याचे नमूद करण्यात आले होते. हा अहवाल पाहून डॉ. जगताप यांनी दीपालीला मुंबई किंवा पुणे येथे उपचारासाठी नेण्यास सांगून तेथून निघून गेल्या. या नंतर ३० रोजी दीपाली यांना मुंबई येथील सायन हॉस्पिटलमध्ये नेण्यात आले. तेथील डॉक्टरांनी उपचारासाठी दिरंगाई केल्याच्या कारणावरुन नातेवाईकांना सुनावले. तपासणी अहवाल पाहून त्या ठिकाणच्या डॉक्टरांनी दीपाली यांना कावीळ झाल्याचे तुम्हाला सांगितले नाही का? असा सवाल केला. दुर्देवाने दीपाली यांचा ६ जानेवारी रोजी रात्री उपचारादरम्यान रात्री सायन हॉस्पिटलमध्ये मृत्यू झाला.

शहर पोलिस ठाण्यासमोर दोन तास जमाव ठिय्या मांडून असल्याने तणावाचे वातावरण निर्माण झाला. पो. नि. सारंगकर यांना याची माहिती दिल्यानंतर ते दोन तासांनी पोलिस ठाण्यात आले. दीपालीच्या कुटुंबीयांशी त्यांनी चर्चा केली. तक्रार अर्ज घेऊन वैद्यकीय तरतुदीनुसार गुन्हा दाखल करण्याची प्रक्रिया नातेवाईकांना समजावून सांगितली. या नुसार संजीव आप्पाराव गुडिले (रा. कामाठीपुरा) यांनी डॉक्टरवर गुन्हा दाखल करून कारवाई करण्याचे निवेदन सारंगकर यांना दिले. निवेदन स्वीकारल्यानंतर वैद्यकीय अहवाल, उपचारांची कागदपत्रे वैद्यकीय तज्ञांकडून तपासल्यानंतर तत्काळ डॉ. जगताप यांच्यावर गुन्हा दाखल करण्याचे आश्‍वासन सारंगकर यांनी नातेवाईकांना दिले आहे.

.....

गर्भपातप्रकरणी

पाच जणांवर गुन्हा

सातारा

गर्भवती राहिल्यानंतर लग्नाचा बनाव करून गोळ्या देऊन गर्भपात केल्याप्रकरणी पाच जणांवर सातारा शहर पोलिस ठाण्यात गुन्हा दाखल झाला आहे. या बाबतची तक्रार पीडित युवतीने दिली असून, बलात्कार केला असल्याचेही तक्रारीत म्हटले आहे.

प्रशांत क्षीरसागर, अमृत किसन क्षीरसागर, कांता किसन क्षीरसागर, सविता किसन क्षीरसागर, सोनाली शिंदे (सर्व रा. मंगळाई कॉलनी, गोडोली) यांच्यावर गुन्हा दाखल झाला आहे. प्रशांत क्षीरसागर याचे तक्रारदार ३० वर्षीय युवतीशी प्रेमसंबंध होते. लग्नाचे आमिष दाखवून प्रशांत याने वारंवार शरीरसंबंध ठेवले. यातून ती युवती गर्भवती राहिली. लग्नासाठी युवतीने तगादा लावला असल्याने पाच महिन्यांची गर्भवती असणाऱ्या त्या युवतीशी प्रशांत क्षीरसागर याने प्रतापगंज पेठेतील एका ठिकाणी ५ मे २०१८ रोजी एकमेकांच्या गळ्यात हार घालून लग्न केले. युवती घरी असताना संशयित सर्वांनी दौलतनगर येथे इलेक्ट्रॉल पावडर तसेच कणकणीवरील गोळ्या म्हणून गर्भपाताच्या गोळ्या खाण्यास दिल्या. या औषधांमुळे तिचा गर्भपात झाला.

कोयना प्रकल्पग्रस्तांचे चार फेब्रुवारीपासून बेमुदत आंदोलन

शंभर टक्के पुनर्वसनाशिवाय उठणार नाही; भारत पाटणकर

म. टा. वृत्तसेवा, कराड

कोयना प्रकल्पग्रस्तांच्या प्रश्नांबाबत जिल्हा प्रशासनाकडून मुंगीच्या पावलाने आणि कासवाच्या गतीने काम चालविले जात आहे. ही खेदाची आणि संतापजनक बाब असून, कोयना प्रकल्पग्रस्तांना आणखी किती दिवस वाट पहावी लागणार? प्रकल्पग्रस्तांचे आता होणारे आंदोलन जमीन वाटप प्रक्रिया आणि शंभर टक्के विकसनशील पुनर्वसन पूर्ण होत नाही, तोपर्यंत उठणार नाही. यासाठी कोयना प्रकल्पग्रस्त ४ फेब्रुवारीपासून पाटण तालुक्यातील कोयनानगर आणि जावळी तालुक्यातील बामणोली या ठिकाणी पुन्हा बेमुदत आंदोलनास बसणार आहेत, असा इशारा श्रमीक मुक्ती दलाचे अध्यक्ष डॉ. भारत पाटणकर यांनी दिला.

कोयनानगर येथील तीन मंदिरात बुधवारी दुपारी आयोजित केलेल्या कोयना प्रकल्पग्रंस्तांच्या मेळाव्यात डॉ. पाटणकर बोलत होते. डॉ. पाटणकर म्हणाले, मुख्यमंत्र्यानी दिलेल्या आश्वासनानुसार व मंत्रालयात कोयना प्रकल्पग्रस्तांच्या प्रतिनिधींबरोबर झालेल्या बैठकीत कोयना प्रकल्पग्रस्तांचे प्रलंबित प्रश्न तीन महिन्यांत मार्गी लावावे, असे आदेश जिल्हा प्रशासनाला दिले होते. मात्र, तीन महिन्यांतील प्रश्न सोडविण्यासाठी प्राथमिक छाननी आणि इतर कामालाच निव्वळ नऊ महिन्यांचा कालावधी होऊन गेला तरी कसलीही हालचाल केली नाही. प्रशासनाने मुंगीच्या पावलाने आणि कासवाच्या गतीने काम चालविले आहे, ही खेदाची आणि संतापजनक बाब आहे. कोयना प्रकल्पग्रस्तांना आणखी किती दिवस वाट पाहावी लागणार आहे. मुख्यमंत्र्यानी मंजूर केलेल्या १४ मागण्यांची कार्यवाही कासवाच्या गतीने चालली आहे. स्वतंत्र पुनर्वसन अधिकारी आणि कर्मचारी नेमून खास कोयना प्रकल्पग्रस्तांच्या कामाला गती द्यावी, असे ठरलेले असताना सुद्धा कोणतीही हालचाल झालेली दिसत नाही. कोयना प्रकल्पग्रस्तांसाठी टास्क फोर्स स्थापन करून त्यासाठी स्वतंत्र पुनर्वसन अधिकारी का नेमला नाही?कोयना प्रकल्पग्रस्तांनी आणखी किती दिवस आश्वासनाच्या गाजरावर दिवस काढायचे, असा संतप्त सवाल त्यांनी या प्रसंगी बोलताना केला.

ओळी

कोयनानगर येथील प्रकल्पग्रस्तांच्या मेळाव्यात बोलताना डॉ. भारत पाटणकर.

म. टा. प्रतिनिधी, कोल्हापूर

येथील शाहू जन्मस्थळाच्या कामासाठी पाच कोटी निधी देण्यासाठी सरकार पातळीवर प्रयत्न करावेत, अशी मागणी सकल मराठा समाजातर्फे गुरूवारी जिल्हाधिकारी अविनाश सुभेदार यांच्याकडे करण्यात आली. निवेदनात म्हटले आहे की, राजर्षी शाहू महाराज महाराष्ट्राचे श्रध्दास्थान आहे. त्यांच्या जन्मस्थळाच्या सुशोभिकरणाचे काम सुरू आहे. हे काम पूर्ण झालेले नाही. ठेकेदार, आर्किटेक्टवर नियंत्रण ठेवण्यासाठी समिती आहे. समितीकडून कामाची सद्यस्थिती जनतेसमोर आली नाही. या कामात लक्ष घालावे. काम त्वरित मार्गी लावावे. निवेदन देताना दिलीप पाटील, सचिन तोडकर, स्वप्निल पार्टे, गणी आजरेकर, सुभाष देसाई, विश्वास कांबळे, धोडिंराम कांबळे आदी उपस्थित होते.

फोटो...

म. टा. वृत्तसेवा, कुडित्रे

कुंभी-कासारी साखर कारखान्याच्या २८ व्या मानधनधारक कुस्ती स्पर्धेतील खुल्या गटात पृथ्वीराज पाटील (रा. देवठाणे) विरुद्ध सनिकेत राऊत (रा. पडळ) यांच्यात झालेल्या चुरशीच्या लढतीत पृथ्वीराजने आक्रमक सुरुवात केली. पृथ्वीराजने पहिल्या मिनिटांत सनिकेतवर एकेरी पट काढून २ तर डूख डावावर खाली खेचत पुन्हा २ अशी ४ गुणांची नोंद करत आघाडी घेतली. मात्र, दुसऱ्या फेरीत सनिकेतने पृथ्वीराजला एकही गुण घेऊ न देता एक गुणाची कमाई केली. अखेर ४ विरुद्ध १ अशी आघाडी घेत पृथ्वीराजने सनिकेतवर विजय मिळवून प्रथम क्रमांकाचा मानधनधारक होण्याचा मान पटकावला. सनिकेत उपविजेता ठरला.

सर्व विजयी मल्लांना गोकुळचे संचालक अरुण नरके, कुंभीचे अध्यक्ष आमदार चंद्रदीप नरके, कुंभी बँकेचे चेअरमन अजित नरके यांच्या प्रमुख उपस्थितीत गौरविण्यात आले. ८४ किलो वजनी गटातील लढत भगतसिंग खोत (माळवाडी) विरुद्ध स्वप्निल पाटील (वाकरे) यांच्यात झाली. पहिल्या फेरीअखेर दोन्ही मल्लांची २-२ अशी बरोबरी होती, पण दुसऱ्या फेरीत भगतसिंग स्वप्निलवर एकेरी पट काढत २ गट्ठा गुण मिळवून विजयी झाला. ७४ किलो गटात विजय पाटील (पासार्डे) याने कसलेल्या नितीन पवारला (वाकरे) ९ विरुद्ध २ अशा गुण फरकाने पराभूत केले.

याप्रसंगी कारखान्याचे उपाध्यक्ष ॲड. बाजीराव शेलार, देवराज नरके, संचालक किशोर पाटील, प्रकाश पाटील, भगवान पाटील, उत्तमराव वरुटे, दादासाहेब लाड, आदींसह कुस्तीशौकीन उपस्थित होते. यशवंत पाटील यांनी निवेदन केले.

०००

शेलक्या शब्दांची खैरात

दोन मल्लांच्या खडाखडीला सुरुवात होताच पंच व त्यांचे समर्थक यांच्याकडून धर, पकड, आपट, उचल, टाक, फिरीव, फेक, अशा शेलक्या शब्दांची खैरात करून मल्लांना प्रोत्साहन दिले जात होते. विविध गटांतील प्रथम क्रमाकांच्या लढतीत संपूर्ण मैदानावर घुमणाऱ्या या शेलक्या शब्दांमुळे लढतीतील रंजकता आणखीनच वाढत होती.

००००

म. टा. वृत्तसेवा, इचलकरंजी

केंद्र व राज्य सरकार महिलांना अधिक हक्क देण्यासाठी प्रयत्नशील असताना नगरपरिषद प्रशासनाकडून मात्र नवनियुक्त महिला अधिकाऱ्यांना डावलून त्यांना हक्कापासून वंचित ठेवले जात असल्याचा आरोप विरोधी सदस्यांनी केला. प्रशासनाने त्यावर नवीन अधिकाऱ्यांना कामाचा अनुभव नसल्याचे कारण पुढे करत वेळ मारून नेण्याचा प्रयत्न केला. यावेळी विरोधी सदस्य व मुख्याधिकाऱ्यांत खडाजंगी उडाली. मुख्याधिकारी दीपक पाटील यांनाही सुरुवातीला कोणता अनुभव होता, असा सवाल करताच ते संतप्त झाले. अखेर नगराध्यक्षा अलका स्वामी यांनी वादावर पडदा पाडला.

प्रधानमंत्री आवास योजनेंतर्गतचे प्रस्ताव, शहर रस्ते एकात्मिक विकास प्रकल्प अहवाल अमृतऐवजी सुवर्ण जयंती नगरोत्थान महाअभियान अंतर्गत प्रस्तावित करणे, शाखा अभियंता यांचे प्रतिनियुक्तीस मुदतवाढ यासह विविध नऊ विषयांवर चर्चा करून निर्णय घेण्यासाठी नगराध्यक्षा स्वामी यांनी गुरुवारी नगरपरिषदेची विशेष सभा बोलावली होती. सभेच्या प्रारंभी काँग्रेसचे नगरसेवक शशांक बावचकर यांनी कृष्णा योजना दुरुस्ती प्रस्तावाचा मुद्दा उपस्थित केला. साडेदहा किलोमीटर जलवाहिनी बदलासाठी नगरपरिषदेने २५.५० कोटी रुपये खर्चाचा प्रस्ताव सरकारकडे मंजुरीसाठी पाठविला होता. परंतु सरकारने सहा किलोमीटर जलवाहिनी बदलासाठी १७ कोटी रुपये मंजूर केले आहेत. हे म्हणजे शासनाने नगरपरिषदेच्या प्रस्तावाला केराची टोपली दाखविण्याचा प्रकार असल्याची टीका केली. प्रस्तावातील निधी आणण्यात आमदार सुरेश हाळवणकर कमी पडल्याचा आरोपही बावचकर यांनी केला. शाहू आघाडीचे मदन कारंडे यांनी, मजरेवाडीतील पंपाची क्षमता कमी झाल्याने तोही बदलण्याची गरज असून पुनर्प्रस्ताव पाठविण्याची मागणी केली. त्यावर भाजपचे नगरसेवक अजित जाधव यांनी, आमदारांनी केलेल्या कामांचे कौतुक करण्याऐवजी त्यामध्ये कमीपणा शोधण्यापेक्षा शहराच्या विकास कामात राजकारण न आणता सर्वांनी एकजुटीने काम करुया, असे सांगितले. तसेच १४ जानेवारीला वारणा योजनेसंदर्भात जिल्हाधिकारी कार्यालयात बैठक होत असून त्यासाठी उपस्थित राहून सहकार्य करण्याचे आवाहन केले. मुख्याधिकारी दीपक पाटील यांनी, प्रस्तावातील रक्कम कमी करण्यासंदर्भातील घडामोडींची माहिती देत वारणा प्रस्तावित असल्याने कृष्णा योजनेची आवश्यक तितक्याच जलवाहिन्या बदलाची सूचना केली असून, त्यामुळेच रकमेत कपात झाल्याचे सांगितले. चर्चेअंती विरोधी गटाच्या मागणीवरुन चर्चा आणि समन्वयातून वारणा योजना पूर्णत्वास नेण्यासाठी तानाजी पोवार यांच्या नेतृत्वाखाली समिती स्थापन करण्याचा निर्णय घेण्यात आला.

नगरसेवक राजू बोंद्र यांनी, विद्युत वाहिनी टाकल्यानंतर खुदाई झालेल्या रस्त्यांच्या दुरुस्तीसाठी आवश्यक निधी उपलब्ध असतानाही त्याकडे दुर्लक्ष होत असल्याचा मुद्दा उपस्थित केला. शहर एकात्मिक रस्ते विकास प्रकल्प अहवाल अमृत योजनेऐवजी महाराष्ट्र सुवर्ण जयंती नगरोत्थान महाअभियान अंतर्गत प्रस्ताविक करण्याच्या विषयावरही बावचकर यांनी काही मुद्दे उपस्थित केले. या संदर्भातील डीपीआर नगरपरिषदेकडे उपलब्ध नसल्याचे सांगितले जात असून केवळ कागदपत्रांचा खेळ आणि घोळ घालत गाजर दाखविण्याचा प्रकार सुरू असल्याचे सांगितले. चर्चेदरम्यान अशोक जांभळे व बावचकर यांच्यात शाब्दिक चकमक उडाली.

मुदतवाढीवरून गदारोळ

नगरपरिषदेकडे नव्यानेच तीन अधिकारी रुजू झाले असताना शाखा अभियंता यांच्या प्रतिनियुक्तीस मुदतवाढ देण्याचा विषय आणल्याने त्यावर मोठा गदारोळ उडाला. शाहू आघाडीचे मदन कारंडे, शशांक बावचकर यांनी आक्षेप घेत टीका केली, तर मुख्याधिकारी पाटील यांना नवीन अधिकाऱ्यांची त्यांच्या पदावर नियुक्ती केल्याचे सांगत, त्यांना कामकाजाचा अनुभव नसल्याने अनुभवी अधिकारी कायम मदतीसाठी ठेवल्याचे सांगितले. चर्चेवेळी शशांक बावचकर व प्रकाश मोरबाळे तसेच मदन कारंडे आणि अशोकराव जांभळे यांच्यात शाब्दिक खडाजंगी उडाली.

०००००

Satish.ghatage@timesgroup.com

Tweet:satishgMT

कोल्हापूर : एनपीएतील कर्जांची वसुली, ठेवीदारांचा विश्वास आणि संचालक मंडळाने खर्चात केलेली काटकसर यामुळे राज्यातील सर्व जिल्हा बँकात कोल्हापूर जिल्हा मध्यवर्ती सहकारी बँक नफ्यात अग्रेसर राहिली आहे. ठेवी आणि कर्जाचे प्रमाण वाढल्याने दरवर्षी १००० कोटींचा व्यवसाय वाढला आहे. बँक सध्या नफ्यात असली तरी अद्याप एनपीएतील कर्जवसुलीचे शिवधनुष्य पेलावे लागणार आहे.

जिल्हा बँकेचे संचालक मंडळ २००९ मध्ये बरखास्त झाले. त्यानंतर प्रशासक मंडळ अस्तित्वात आले. बँकेच्या कारभाराच्या चौकशी अहवालानुसार आजी-माजी ४५ संचालक, एक कार्यकारी संचालकांवर १४७ कोटींची जबाबदारी निश्चित करण्यात आली. त्यात २२ संचालकांवर प्रत्येकी पाच कोटींची जबाबदारी निश्चित झाली. प्रशासक मंडळाने सहा वर्षे चांगला कारभार केला. त्यानंतर संचालक मंडळ अस्तित्वात आले. आमदार हसन मुश्रीफ अध्यक्षपदाची सूत्रे स्वीकारल्यावर एनपीएतील कर्जाच्या वसुलीसाठी पावले उचलली. मोठ्या कर्जदारांना नोटिसा पाठवल्या. तसेच बड्या कर्जदारांच्या दारात जाऊन बँड आणि ढोल वाजवत कर्ज भरण्याची विनंती करण्यात आली. थकबाकीदारांची यादी फलकावर लावण्यात आली. थकबाकीदारांच्या मालमत्तेवर बोजा चढवण्यात आला. त्यामुळे कर्जदारांवर दबाव वाढू लागला. अनेक संस्थांनी कर्जफेडीस सुरुवात केली. 'ओटीसी' योजनेखाली एनपीएतील संस्थांसाठी एकरकमी परतफेड कर्ज योजना सुरु करण्यात आली. रिझर्व्ह बँक आणि 'नाबार्ड'च्या निर्देशानुसार दंड माफ केला. तसेच व्याजाचे प्रमाण कमी करण्यात आल्याने अनेक संस्था कर्ज भरण्यास पुढे आल्या. कर्जवसुलीनंतर त्यांना नव्याने कर्ज देऊन संस्था उर्जितावस्थेत आणण्यास प्राधान्य दिले.

ओटीएस योजनेतून उदयसिंगराव गायकवाड तोडणी ओढणी वाहतूक संघाचे १२ कोटींचे कर्ज वसूल झाले. मंगलमूती पतसंस्था, घोसरवाड, आर.बी. पाटील किसान संघ, शिरोळ तालुका तंबाखू संघ, गुरुदेव पतसंस्था, उचगाव, कोल्हापूर बेरोजगार संस्था, विवेकानंद मजूर संस्थाकडून १९ कोटी रुपये थकबाकी जमा केली. थकीत कर्जाचीही वसुली झाल्याने ५०४ कोटी रुपयांवर कर्जाचे प्रमाण ४५३ कोटी रुपयांचे कर्ज खाली आणले. एनपीएचे प्रमाण ८.१६ टक्क्यावरुन ५.३२ टक्क्यापर्यंत खाली आले. कर्ज देताना काटेकोरपणा पाळला जातो. अधिकाऱ्यांनी शिफारस आणि तारण असल्यावरच कर्ज दिले जाते.

संचालक मंडळाने काटकसरीचा कारभार करत खर्चाचे प्रमाण २.४९ टक्क्यावरुन २.१५ टक्क्यावर आणले. २०१५ मध्ये वीस शाखा नफ्यात होत्या. अन्य शाखा नफ्यात आणण्यासाठी अधिकारी व कर्मचाऱ्यांना प्रोत्साहन देण्यात आले. ठेवींचे प्रमाण वाढवताना चांगले व गरजू कर्जदारांना पतपुरवठा करण्यात आला. घरबांधणी, वाहन, ग्राहकोपयोगी वस्तू, शैक्षणिक, सोलर खरेदी, सोने खरेदी, महिला बचत गटाला कर्ज देण्यात येते. शेतकऱ्यांना पीक कर्जाचा सर्वाधिक पुरवठा केला जातो. जिल्ह्यातील शेतकऱ्यांना १२२१ कोटींचा कर्ज पुरवठा करण्यात आला. यामुळे नफ्यातील शाखांचे प्रमाण २० वरुन १८२ वर पोचले आहे. बँकेच्या प्रतिकर्मचाऱ्यांचा व्यवसाय सरासरी २.७६ कोटींवरुन ४.२१ कोटींवर पोहोचला आहे. प्रशासकीय कालावधीतील संचित १०३ रुपयांचा तोटा भरुन काढत यंदाच्या आर्थिक वर्षांत ५७ कोटींचा ढोबळ नफा मिळाला आहे.

००००

एनपीएतील कर्जाची वसुली, संचित तोटा भरुन काढण्याबरोबरच खर्चात काटकसर केली. ठेवींचे प्रमाणही वाढल्याने बँकेने तीन वर्षांत भरीव प्रगती केली. त्यासाठी संचालक, अधिकारी, कर्मचाऱ्यांनी चांगली साथ दिली. एनपीएची तरतूद करुन बँकेने नफा मिळवला आहे.

आमदार हसन मुश्रीफ, अध्यक्ष, जिल्हा बँक

०० ०० ०० ०० ०० ००

तपशील २०१५ २०१८

ठेवी २८९० कोटी ४०४९ कोटी

कर्जे २१६७ कोटी २९९० कोटी

वसुली ५०४ कोटी ४५३ कोटी

एनपीए ८.१६ टक्के ५.३२ टक्के

खर्च २.४९ टक्के २.१५ टक्के

नफ्यातील शाखा २० १८२

प्रतिकर्मचारी व्यवसाय २.७६ कोटी ४.२१ कोटी

०००००

जिल्हा बँकेचा गौरव

राज्यातील सर्व जिल्हा बँकात कोल्हापूर जिल्हा बँकेने सर्वात जास्त ५७ कोटी ढोबळ नफा मिळवला आहे. त्याबद्दल मुंबईतील महाराष्ट्र स्टेट को ऑपरेटिव्ह बँक्स असोसिएशनने राज्यातील सर्व जिल्हा बँकांचा आढावा घेतला. त्यामध्ये जिल्हा बँकेने सर्वाधिक नफा मिळवण्याचा मान मिळवला आहे. त्याबद्दल असोसिएशनने गौरव केला आहे.

म. टा. प्रतिनिधी, कोल्हापूर

जिल्हा दूध उत्पादक संघाच्या (गोकुळ) अध्यक्षपदी ज्येष्ठ संचालकांऐवजी नव्या चेहऱ्याला संधी द्या या मागणीचा जोर वाढला आहे. नव्या चेहऱ्यांत धैर्यशिल देसाई, पी. डी. धुंदरे या संचालकांची नावे आघाडीवर आहेत.

विश्वास पाटील यांनी अध्यक्षपदाचा राजीनामा दिल्यानंतर सोमवारी (ता. १४) नवीन अध्यक्ष निवडीसाठी निवडणूक होणार आहे. माजी आमदार महादेवराव महाडिक व पी. एन. पाटील हे अध्यक्षाचे नाव सुचवितील. धैर्यशिल देसाई आणि पी. डी. धुंदरे यांनी महाडिक व पाटील यांची स्वतंत्र भेट देऊन अध्यक्षपदासाठी संधी देण्याची विनंती केली आहे. आगामी लोकसभा, विधानसभा निवडणूक लक्षात घेऊन नेते ज्येष्ठ संचालकांना संधी देतील अशी शक्यता व्यक्त केली जात आहे. त्यामध्ये आपटे, डोंगळे, पाटील यांची नावे आघाडीवर आहेत. दोन्ही नेत्यांना मान्य होईल व निवडणुकीसाठी मदत होणाऱ्या संचालकांच्या पारड्यात नेते वजन टाकतील.

दरम्यान नवीन चेहऱ्यांना संधी द्यावी अशी मागणी पुढे येत आहे. 'गोकुळ'मध्ये आनंदराव पाटील चुयेकर १६ वर्षे तर अरुण नरके यांनी दहा वर्षे अध्यक्षपद भूषवले आहे. विश्वास नारायण पाटील यांना पाच वर्षे, रणजित पाटील यांना तीन वर्षे तर अरुण डोंगळे व रवींद्र आपटे यांना दोन वर्षे अध्यक्षपदाची संधी मिळाली आहे. नरके, विश्वास पाटील, रणजित पाटील, डोंगळे, आपटे हे गोकुळचे अनेक वर्षे कारभारी आहेत. त्यामुळे नवीन चेहरा अध्यक्षपदासाठी द्यावा मागणीला जोर धरला आहे. इच्छुक संचालक मोर्चेबांधणी करत आहेत. पण, महाडिक यांच्या बंधुंचे निधन झाल्याने पुढील दोन दिवस या घडामोडी थांबतील. अध्यक्षनिवडीच्या आदल्या दिवशी नेत्यांकडून नाव निश्चित होईल.

०००

(मूळ कॉपी)

नव्या चेहऱ्या संधी देण्यासाठी जोर वाढला

अध्यक्षपदासाठी नवा कि जुना चेहरा

म. टा. प्रतिनिधी, कोल्हापूर

जिल्हा दूध उत्पादक संघाच्या (गोकुळ) अध्यक्षपदासाठी ज्येष्ठ संचालकांऐवजी नव्या चेहऱ्याला संधी द्या या मागणीचा जोर वाढला आहे. नव्या चेहऱ्यात धैर्यशिल देसाई, पी.डी. धुंदरे या संचालकांची नावे आघाडीवर आहेत.

विश्वास पाटील यांनी अध्यक्षपदाचा राजीनामा दिल्यानंतर सोमवारी (ता.१४) नवीन अध्यक्षांची निवडणूक होणार आहे. माजी आमदार महादेवराव महाडिक व पी.एन. पाटील अध्यक्षपदाचे नाव सूचवणार आहेत. धैर्यशिल देसाई आणि पी.डी. धुंदरे यांनी महाडिक व पी.एन. यांची स्वतंत्र भेट देऊन अध्यक्षपदासाठी विचार करण्याची विनंती केली आहे. आगामी लोकसभा, विधानसभा निवडणूक लक्षात घेऊन नेते मंडळी ज्येष्ठ संचालकांना संधी देण्याची दाट शक्यता व्यक्त केली जात आहे. त्यामध्ये आपटे, डोंगळे, पाटील यांची नावे आघाडीवर आहेत. दोन्ही नेत्यांना मान्य होईल व निवडणूकीसाठी मदत होणाऱ्या संचालकांच्या पारड्यात नेते मंडळी वजन टाकण्याची शक्यता आहे.

दरम्यान ज्येष्ठ संचालकांऐवजी नवीन चेहऱ्याला अध्यक्षपदासाठी संधी द्यावी अशी मागणी पुढे येत आहे. गोकुळमध्ये आनंदराव पाटील चुयेकर १६ वर्षे तर अरुण नरके दहा वर्षे अध्यक्ष भूषवले आहे. विश्वास नारायण पाटील यांना पाच वर्षे, रणजित पाटील यांना तीन वर्षे तर अरुण डोंगळे व रविंद्र आपटे यांना दोन वर्षे अध्यक्षपदाची संधी मिळाली आहे. नरके, विश्वास पाटील, रणजित पाटील, डोंगळे, आपटे हे गोकुळचे अनेक वर्षे कारभारी आहेत. त्यामुळे नवीन चेहरा अध्यक्षपदासाठी द्यावा, मागणीला जोर धरला आहे. इच्छुक संचालक मोर्चे बांधणी करत आहेत. पण महाडिक यांच्या बंधूचे निधन झाल्याने पुढील दोन दिवस मोर्चेबांधणीला मर्यादा येणार आहेत. अध्यक्ष निवडीच्या आदल्या दिवशी नेतेमंडळीकडून अध्यक्षपदाच्या नावाला अंतिम रुप देण्याची शक्यता वर्तवली जात आहे.