कोल्हापूर: टेंबलाईवाडी येथील धान्य बाजार मंगळवारी (ता. ८) सुरू होणार असून लक्ष्मीपुरी व शाहूपुरीतील व्यापाऱ्याकडून महारॅली काढण्यात येणार आहे, असे पत्रक दि कोल्हापूर ग्रेन मर्चंटस् असोसिएशनच्यावतीने प्रसिद्धिस दिले आहे. शेती उत्पन्न बाजार समितीच्यावतीने मंगळवारी सकाळी ११ वाजता उद्घाटन होणार आहे. सुमारे ५० ते ६० दुकाने सुरू होणार आहेत. उद्घाटन कार्यक्रामास लक्ष्मीपुरी, शाहूपुरी, या बाजारपेठेतील व्यापारी, टेंपो, ट्रक, मोटारसायकलची लक्ष्मीपुरी धान्य बाजारातून सकाळी नऊ वाजता रॅलीस सुरू होणार आहे. व्हीनस कॉर्नर, स्टेशन रोड, दाभोळकर कॉर्नर, कावळा नाका, ओव्हर ब्रीजमार्गे टेंबलाईवाडी येथे रॅली जाणार आहे. या कार्यक्रमास शहर पोलिस उपअधीक्षक डॉ. प्रशांत अमृतकर उपस्थित राहणार आहेत.

राज्यात ९८ बसस्थानकांचे काम सुरू

परिवहन मंत्री दिवाकर रावते यांची माहिती

म. टा. वृत्तसेवा, कराड

'प्रवाशांच्या सेवेसाठी सुसज्ज आणि सर्व सोयींनियुक्त अत्याधुनिक बसस्थानक सरकारच्या निधीतून कराडमध्ये बांधण्यात आले आहे. हे बसस्थानक कराडच्या वैभवात भर घालेल. प्रवाशांना चांगल्या सुविधा मिळाव्यात, या साठी महाराष्ट्रात ९८ बसस्थानकांचे काम सुरू आहे,' अशी माहिती परिवहन मंत्री दिवाकर रावते यांनी दिली.

स्व.यशवंतराव चव्हाण जन्मशताब्दीनिमित्त तत्कालीन मुख्यमंत्री पृथ्वीराज चव्हाण यांनी मंजूर केलेल्या शंभर कोटी विकास निधीतील अकरा कोटी रुपयांचा निधी राज्य सरकारने कराड बसस्थानक बांधण्यासाठी उपलब्ध करून दिला होता. या निधीतून बांधण्यात आलेल्या राज्य मार्ग परिवहन महामंडळाच्या येथील नूतन बसस्थानकाचे उद्‌घाटन सोमवारी परिवहन मंत्री दिवाकर रावते यांच्या हस्ते झाले.

रावते म्हणाले, 'प्रवाशांच्या सुरक्षतेसाठी राज्यातील ११३ ठिकाणांच्या बसस्थानकांना संरक्षण भिंती बांधण्यात येणार आहेत. ८५ प्रवासीगृहांचे नुतनीकरण करण्यात येत आहे. राज्य मार्ग परिवहन महामंडळातील अधिकारी, कर्मचाऱ्यांसाठी सर्व सुविधा असणारे विश्रामगृहासाठी प्रयत्न करणार आहोत. या पुढे देशाच्या सीमेवर आपले कर्तव्य बजावताना शहीद झालेल्या जवानांच्या वारसांना आपल्या सेवेत सामावून घेण्याची निर्णय रा. प. महामंडळाने घेतला असून, महामंडळातील कर्मचाऱ्यांना शिक्षणासाठी बँकेचे कर्ज घ्यावे लागणार नाही, बिनव्याजी पैसे आता महामंडळ देणार आहे. महामंडळातील कर्मचाऱ्यांची मुले महाविद्यालयात शिकत आहेत, अशा मुलांच्या खात्यात दर महिन्याला थेट ७५० रुपये जमा करण्यात येत आहेत. अहिल्यादेवी होळकर योजनेंतर्गत शालेय मुलींना प्रवासासाठी मोफत पास महामंडळाकडून देण्यात येत आहे.' खासदार उदयनराजे भोसले, आमदार बाळासाहेब पाटील, श्रीनिवास पाटील आणि पृथ्वीराज चव्हाण यांनी मनोगत व्यक्त केले.

फोटो आहे

म. टा. प्रतिनिधी, कोल्हापूर

शिवसेना फेरीवाला संघटनेने सोमवारी महापालिकेवर काढण्यात आलेल्या मोर्चानंतरही मंगळवारी महापालिका अतिक्रमण निर्मूलन पथकाने कारवाईचा धडाका कायम ठेवला. शिवाजी मार्केट विभागीय कार्यालयांतर्गत येणाऱ्या व रस्ता सुरक्षा समितीने धोकादायक ठरवलेल्या ठिकाणी कारवाई करण्यात आली. रंकाळा वेस येथील कारवाईदरम्यान शिवसेनेच्या पदाधिकाऱ्यांनी विरोध करण्याचा प्रयत्न केला. पण पथकाने बायोमेट्रिक कार्डधारकांवर कारवाई करत नसल्याचे सांगितल्यानंतर त्यांचा विरोध मावळला. पथकाने २० हातगाड्या, दहा डिजीटल बोर्डसह पापाची तिकटी पान लाईन येथील दुकानांचे वाढीव पत्रे काढून टाकले.

शहरात दिवसेंदिवस अपघाताचे प्रमाण वाढत असताना रस्ता सुरक्षा समितीने २२ धोकादायक ठिकाणे निश्चित केली आहेत. धोकादायक ठिकाणांच्या शंभर मीटर परिसर मोकळा ठेवण्याबरोबरच त्याबाबतचा अहवाल राज्य सरकारला पाठवण्याचे निर्देश महापालिकेला दिले आहेत. त्यानुसार छत्रपती शिवाजी मार्केट विभागीय कार्यालयातंर्गत येणाऱ्या ठिकाणावर कारवाई केली. सीपीआर चौक ते महापालिका, शिवाजी पुतळा, रंकाळा स्टँड, गंगावेश, पापाची तिकटी येथे दिवसभर कारवाई केली. अतिक्रमण निर्मूलन कारवाईत अनधिकृत व विनापरवाना होर्डिंग्ज, बॅनर्स, जाहिरात फलक व रहदारीला अडथळा ठरणारी अतिक्रमणे काढण्यात आली. दिवसभरात ७५ स्टँडी, दहा डिजीटल बोर्ड ताब्यत घेण्यात आले.

पापाची तिकटी येथील कारवाईनंतर पान लाईन येथे कारवाई करण्यात आली. दुकानाबाहेर आलेल्या पत्र्याच्या ४७ छपऱ्या काढून टाकल्या. पाच लोखंडी कॅरेट ताब्यात घेत २० हातगाड्या व आठ केबिन काढून टाकण्यात आल्या. दरम्यान, रंकाळा वेस येथे कारवाई करताना शिवसेनेच्या काही कार्यकर्त्यांनी फेरीवाल्यांवर होणाऱ्या कारवाईस विरोध करण्याचा प्रयत्न केला. पथकासोबत वाद घालण्याचा देखील प्रयत्न झाला. पण पथकांने फेरीवाला धोरणानुसार बायोमेट्रिक कार्डधारकांवर कारवाई केली जात नसल्याचे स्पष्ट करत कारवाई सुरुच ठेवली.

कारवाईत उपशहर अभियंता एस. के. माने, कनिष्ठ अभियंता निवास पोवार, अतिक्रमण विभाग प्रमुख पंडित पवार, मुकादम उमेश माने, राजन आळतेकर, विरविजय शिंदे यांच्यासह अतिक्रमण, विद्युत व पवडी विभागाचे ५० कर्मचारी सहभागी झाले. अतिक्रमण निर्मूलन पथकांकडून बुधवारी गांधी मैदान विभागीय कार्यालयांतर्गत खरी कॉर्नर, लाड चौक, पाण्याचा खजिना, संभाजीनगर परिसरात कारवाई करण्यात येणार आहे.

म. टा. वृत्तसेवा, वृत्तसेवा

'कोडोली (ता. पन्हाळा) येथील सर्वोदय विविध कार्यकारी सहकारी सोसायटीच्या मार्गदर्शनामुळे सहकारातील इतर संस्थांना प्रगतीची प्रेरणा मिळाली,' असे मत आमदार चंद्रदीप नरके यांनी व्यक्त केले. सोसायटीच्या शतकमहोत्सव समारंभात ते बोलत होते. अध्यक्षस्थानी गोकुळचे ज्येष्ठ संचालक अरुण नरके होते.

प्रारंभी अरुण नरके, माजी मंत्री विनय कोरे, आमदार सत्यजित पाटील, आमदार चंद्रदीप नरके, माजी आमदार बाबासाहेब पाटील, जिल्हा बँकेचे

संचालक बाबासाहेब पाटील, सहकारी संस्थाचे सहायक निबंधक शिरीष तळकेरी, आदींच्या हस्ते शतकमहोत्सवी वर्षाच्या समारंभास सुरुवात झाली.

आमदार नरके म्हणाले, 'तिसऱ्या पिढीतील समृद्ध वारसा चालवत सर्वोदय संस्था सहकाराला मार्गदर्शक व प्रेरणा ठरली असून, संस्थेच्या माध्यमातून व्यापारी संकुल, रॉकेल डेपो, पिठाची गिरण, पाणीपुरवठा संस्था अशा सभासद व जनहिताच्या योजना राबवून संस्थेने नावलौकिक

मिळवला आहे. कर्जाची शंभर टक्के वसुलीची परंपरा आजही कायम आहे. सर्वोदय विकास सोसायटी सहकारातील मैलाचा दगड असून, भावी पिढ्यांना मार्गदर्शक आहे.'

यावेळी अध्यक्ष लक्ष्मणराव कुलकर्णी, उपाध्यक्ष दत्तात्रय पाटील, ए. पी. पाटील, निवृत्ती काईगडे यांचा व गोकुळचे संचालक

नरके यांचा सत्कार करण्यात आला. यावेळी उपस्थितांच्या हस्ते सभासदांना शतकमहोत्सवी वर्षानिमित्त भेट वस्तूंचे वाटप करण्यात आले.

लक्ष्मणराव कुलकर्णी यांनी स्वागत केले. संचालक माधव पाटील, अमरसिंह पाटील, माजी मंत्री विनय कोरे, बाबासाहेब पाटील, आमदार सत्यजित पाटील, आदींची भाषणे झाली. चंद्रकांत शिंदे यांनी सूत्रसंचालन केले. निशिकांत जाधव यानी अभार मानले.

राजकारण सांभाळण्यासाठी नेत्यांकडून भरमसाठ कर्जे

म. टा. प्रतिनिधी, कोल्हापूर

नव्वदाच्या दशकात महादेवराव महाडिक, पी.एन. पाटील आणि अरुण नरके या 'मनपा' पॅनेलची महानगरपालिका, जिल्हा परिषद, गोकुळसह अनेक संस्थांवर सत्ता होती. यूथ बँकेत तीनही नेत्यांची उठबस असायची. शाहूपुरी व्हिनस टॉकीज जवळील यूथ बँकेतून महापौरपदाची घोषणा व्हायची, इतका दबदबा होता. त्यामुळे बँकेत तीनही नेत्यांच्या समर्थक, कार्यकर्त्यांनी गर्दी असायची. या तीनही नेत्यांनी आपल्या सग्यासोयऱ्यांना, समर्थक कार्यकर्त्यांना कर्जे दिली. काहींनी प्रामाणिकपणे ती फेडली तर काहींनी जाणूनबुजून तटवली. कालांतराने तीनही नेत्यांची तोंडे परस्परविरोधी झाल्याने बँकेला उतरती कळा लागली. अडीच वर्षांपूर्वी रिझर्व्ह बँकेने कर्ज देण्यास बंदी घातली तर आता ३७ कोटींच्या थकीत कर्जासाठी यूथ बँकेवर रिझर्व्ह बँकेने निर्बंध आणल्याने बँक अडचणीत आली आहे.

महाडिक, पी.एन, आणि नरके यांच्याशी संबधित संस्थांची खाती यूथ बँकेत आहेत. गोकुळ कर्मचाऱ्यांचे पगार, राजाराम साखर कारखान्यांच्या कर्मचाऱ्यांचे पगार, नरके यांच्या संबधित यशवंत, अरुण नरके स्पर्धा परिक्षा केंद्रासह अनेक संस्थांची खाती बँकेत आहेत. अरुण नरके हे बँकेचे ज्येष्ठ संचालक असून महादेवराव महाडिक, पी.एन. पाटील हेदेखील यूथ बँकेचे संचालक होते. २००५ नंतर महाडिक व पाटील यांनी यूथ बँकेला बाय बाय केला. यूथ बँकेतील कर्जामुळे जिल्हा बँकेची निवडणूक लढवताना अडचणी येण्याची शक्यता लक्षात घेऊन महाडिकांनी संचालक मंडळातून काढता पाय घेतला. पण तिघांनीही राजकारण सांभाळण्यासाठी आपल्या संबधित नातलग, कार्यकर्त्यांना व्यवसाय, अडीअडचणीला कर्जे दिली.

बँकेत १५० कोटी रुपयांच्या ठेवी आहेत तर ३८ कोटींपैकी १७ कोटी रुपयांची कर्जे थकीत असल्याने रिझर्व्ह बँकेने निर्बंध आणल्यानंतर संचालक व नेतेमंडळींचे डोळे खाडकन उघडले आहेत. हॉटेल व्यावसायिक असलेल्या संचालकाने तीन ते चार कोटी रुपयांचे कर्ज काढून 'संचालकपदा'कडे पाठ फिरवली. या हॉटेल व्यावसायिकाला संचालकांनी सॉफ्ट कॉर्नर दाखवल्याने दहा वर्षात कर्ज वसुलीसाठी प्रयत्न न झाल्याने १० कोटींपर्यंत कर्ज थकले आहे. कर्ज बुडवण्यासाठी स्वत:च्या खुनाचा बनाव रचून एका व्यक्तीचा खून करणाऱ्या साने गुरुजी वसाहत येथील बांधकाम व्यावसायिकाला दिलेल्या कर्जाची तीन कोटी रुपये थकबाकी थकली आहे. सध्या हा बांधकाम व्यावसायिक कारागृहात आहे. कसबा बावड्यातील बांधकाम व सुवर्ण व्यावसायिकाचे अडीच कोटी तर साळोखे नगर येथील बांधकाम व्यावसायिकाने दोन कोटी रुपये कर्ज भरलेले नाही. जिल्हाधिकारी कार्यालयासमोरील हॉटेलमध्ये पैसे गुंतवलेल्या एका व्यक्तीची एक कोटींची थकबाकी आहे.

नेते व संचालक मंडळांनी आपले कार्यकर्ते व मतदारांना अंगावर कर्ज दिली आहेत. दहा ते वीस हजार रुपयांचे कर्ज थकले त्याचा आकडा वीस वर्षांत दीड ते दोन लाखापर्यंत गेला आहे. गोकुळच्या एका माजी अध्यक्षांच्या पुतण्याचे पाच लाखांचे कर्ज थकले आहे. तर एका नेत्याच्या 'चिखली'तील स्वयंसेवकाचे साडेचार लाख रुपये कर्ज थकले आहे. कर्ज वसुलीसाठी संचालक मंडळाने फोनाफोनी सुरु केली असली तरी राजकारणावर परिणाम होऊ नये याची काळजी संचालकांकडून घेतली जाण्याची शक्यता आहे.

.............

एकूण सभासद १७,०००

एकूण शाखा १२

एकूण ठेवी १५० कोटी

कर्जवाटप ३८ कोटी

थकीत कर्ज १७ कोटी

एनपीए १५ टक्के

म. टा. वृतसेवा, गगनबावडा

गगनबावडा तालुक्यात धुमाकूळ घातलेल्या टस्करचा मुक्काम गेले चार दिवस सांगशी गावात आहे. सायंकाळनंतर गावाशेजारी येऊन माड, नारळ, केळी, ऊस खाऊन तो घरापाठीमागील वस्तू भिरकावून देऊन मोडतोड करीत आहे. परिणामी ग्रामस्थ हवालदिल झाले आहेत.

तालुक्यात महिनाभरापूर्वी दाखल झालेला टस्कर असळज, पळसंबे, कोदे, मांडुकली परिसरात फिरत आहे. चार दिवसांपासून तो सांगशी हद्दीत आहे. दिवसभर गावालगतच्या जंगलात राहून सायंकाळी सहाच्या सुमारास बाहेर येऊन माड व केळीवर ताव मारत आहे. रात्रीच्या वेळी ग्रामस्थांच्या घरापाठीमागील मिळेल ते साहित्य भिरकावून मस्ती करत आहे. त्यामुळे ग्रामस्थ भीतीच्या छायेत आहेत. सायंकाळनंतर ग्रामस्थांना घराबाहेर पडणे मुश्कील झाले आहे.

दरम्यान, सोमवारी रात्री टस्करने आनंदा गोविंद कांबळे यांची बैलगाडी आठ फुटांवरून खाली भिरकावून दिली. त्याबरोबर शंकर बाबूराव पडवळ, प्रवीण केशव पडवळ (रा. सांगशी) यांच्या केळी व ऊसपिकाचे नुकसान केले. दररोजच्या नुकसानीचे पंचनामे वन विभागातर्फत केले जात आहे. ग्रामस्थांनी रात्रीच्या वेळी घराबाहेर पडू नये, असे आवाहन वनरक्षक विश्वास पाटील यांनी केले आहे.

०००

फोटो ओळ

सांगशी (ता. गगनबावडा) येथील आनंदा कांबळे यांची बैलगाडी टस्करने भिरकावून दिल्याने उसाच्या शेतात पडलेली गाडी.

फोटो....

Yashwant.Patil@timesgroup.com

Tweet : YashwantpMT

कोल्हापूर : राज्य सरकारने शिक्षणाच्या हक्काचा कायदा केला; पण तो तो तळागाळापर्यंत पोहोचला का, हा खरा अनुत्तरितच प्रश्न आहे. कारण आजही ऊसतोड मजुरांची मुले, भंगार गोळा करणारे, कचरा वेचकांची मुले शिक्षणापासून कोसो दूर आहेत. त्यामुळे अशा दुर्लक्षित, वंचित मुलांच्या पालांमध्ये साखर शाळेच्या माध्यमातून शिक्षणाची गंगा वाहती ठेवण्याचे काम सांगरूळ (ता. करवीर) येथील उमेद फाउंडेशनने स्वीकारले आहे.

बीड, उस्मानाबाद आदी दुष्काळी भागातून आलेले ऊसतोडणी मजूर, कचरा, भंगार वेचक लोक आपल्या मुलाबाळांसह साखर कारखान्यांच्या परिसरात पाल मारून राहतात. ही मुले आपल्या आई-वडिलांसोबत ऊसतोडणीसाठी जातात. चार महिने ऊसतोडणी व इतर मजुरीची कामे केल्यानंतर ते पुन्हा आपल्या गावी परतात. तेव्हा या काळात अशा मुलांच्या शिक्षणाची आबाळ होते, हेच हेरून उमेद फाउंडेशनने ऊसतोड मजुरांच्या मुलांसाठी आसुर्ले पोर्ले (ता. पन्हाळा) येथे साखर शाळा सुरू केली आहे.

आसुर्ले पोर्ले येथील दत्त दालमिया साखर कारखाना परिसरात गेल्या दोन वर्षांपासून हंगामी साखर शाळा सुरू केली आहे. ऊसतोड मजुरांच्या मुलांच्या शिक्षणासाठी फाउंडेशनमार्फत अनौपचारिक शिक्षण केंद्र सुरू केले आहे. 'शिक्षण आपल्या दारी' या संकल्पनेतून फाउंडेशनने मुलांना शिक्षणाची गोडी लागावी असे पायाभूत शिक्षण म्हणून लेखन, वाचन, गणिती असे आवडीचे आणि आनंददायी शिक्षण दिले जाते.

या साखर शाळेसाठी दालमिया साखर कारखान्याने एक खोली उपलब्ध करून दिली असून, सध्या येथे सहा ते चौदा वर्षे वयोगटातील

२२ मुले शिक्षण घेत आहेत. सकाळी आठ ते दहा या वेळेत शाळा भरविली जाते. त्यानंतर ही मुले हायस्कूलमध्ये शिक्षण घेण्यासाठी जातात. एक शिक्षिका, एक मदतनीस, एक पर्यवेक्षक यांच्या सहाय्याने येथील साखर शाळा चालते. या शाळेच्या जवळच असलेल्या जिल्हा परिषदेच्या आसुर्ले केंद्र शाळेमार्फत साखर शाळेतील मुलांना शालेय पोषण आहार पुरविला जातो. याशिवाय मुलांच्या गणवेश, वही, पेन, पाटी, पेन्सिल या शैक्षणिक साधनांसह शैक्षणिक खर्चासाठी फाउंडेशनचे सदस्य, समाजाच्या मदतीने तसेच लोकसहभागातून खर्चाचा भार पेलला जातो. या वंचितांच्या मुलांच्या हातात कोयत्याऐवजी वही-पेन दिल्याने उमेद फाउंडेशनच्या या कार्याला सलाम!

०००

कोट…

उमेद फाउंडेशनने साखर शाळा सुरू करून वंचितांच्या अंगणात ज्ञानगंगा पोहोचविण्याचे मोठे काम केले आहे. ज्या मुलांच्या हातात नेहमी कोयता पाहायला मिळत होता, त्याच हातात वही-पेन आल्याचे मोठे समाधान आहे. हीच मुले शिकून पुढे आपल्या जीवनात यशस्वी होतील या शंका नाही.

प्रकाश गाताडे, उमेद फाउंडेशन

००००

कोपार्डेच्या माळावरही शाळा

उमेद फाउंडेशनने कोपार्डे (ता. करवीर) गावच्या माळावरही कचरा वेचक, भंगार वेचकांच्या मुलांसाठी कायमस्वरूपी शाळा सुरू केली आहे. ही शाळासुद्धा लोकसहभागातून चालविली जाते. शाळेत सध्या १४ मुले शिक्षण घेत असून, सकाळी आठ ते दहा या वेळेत शाळा भरते. एका स्वयंसेवकाच्या माध्यमातून ही शाळा चालविली जाते. याशिवाय फाउंडेशनमार्फत बर्की, आयरेवाडी, आंबर्डे (ता. शाहूवाडी), जाधववाडी (ता. पन्हाळा), पात्रेवाडी (ता. राधानगरी), आवा (ता. आंबर्डे, जि. जालना) येथे सायंकालीन अभ्यासिका चालविल्या जातात.

०००००००

म. टा. प्रतिनिधी, कोल्हापूर

सरकारविरोधात विविध संघटनांनी सोमवारी दिवसभर प्रलंबित मागण्यांसाठी मोर्चा, निवेदने देऊन लक्ष वेधले. कामगार संघटना संयुक्त कृती समितीने बिंदू चौकात कामगारांचा मोर्चा काढून 'मागण्या मान्य करा, अन्यथा सरकार उलथवू' असा इशारा दिला. कोल्हापूर जिल्हा शालेय पोषण आहार कामगार संघटनेने निदर्शने केली. अंगणवाडी कर्मचाऱ्यांनीही जिल्हा परिषदेसमोर आंदोलन केले.

कामगार संघटना संयुक्त कृती समिती समितीच्या नेतृत्वाखाली महाराष्ट्र ऊस तोडणी, वाहतुक कामगार संघटना, इंजिनीअरिंग कामगार युनियन आदी संघटनाच्या सहभागाने दुपारी टाऊन हॉलपासून मोर्चा सुरू झाला. कामगारांनी 'गरीबांविरोधी मोदी सरकार,' 'महागाई, बेकारी वाढवणारे मोदी सरकार' अशा घोषणा देऊन परिसर दणाणून सोडला. कामगारांना दरमहा १८ हजार वेतन अधिक महागाई भत्ता मिळावा, कंत्राटीकरण रद्द करावे, मानधन सेवेची पद्धत रद्द करावी, वेतन द्यावे, रेल्वे, विमा, संरक्षण खात्यातील परदेशी गुंतवणुकीचे धोरण आणि कामगार कायद्यातील बदल रद्द करावे, किमान सहा हजार रुपये पेन्शन द्यावी या मागण्यांचे फलक हातात घेऊन लक्ष वेधले. मोर्चा दसरा चौक, फोर्ड कॉर्नर, उमा टॉकीजमार्गे बिंदू चौकात आला. संघटनेचे नेते अतुल दिघे, दिलीप पोवार, सुभाष जाधव, सुवर्णा तळेकर, नारायण मिरजकर, भगवान पाटील यांनी भाषणात केंद्र, राज्य सरकारच्या चुकीच्या धोरणांवर टीकास्त्र सोडले. कामगार विरोधी धोरणे मागे न घेतल्यास सरकार पाडू, असा इशाराही त्यांनी दिला. प्रकाश कांबळे, सुशीला यादव यांच्यासह औद्योगिक, सहकारी, दूध संघ, वीज, ऊस तोडणी, पोषण आहार विभागातील कामगार मोर्चात सहभागी झाले.

सरकारी कर्मचारी संघटनांचा

देशव्यापी संपास पाठिंबा

राज्य सरकारी कर्मचारी मध्यवर्ती संघटनेने अखिल भारतीय संयुक्त कामगार कर्मचारी कृती समितीच्या नेतृत्वाखाली दोन दिवसीय देशव्यापी संपास पहिल्या दिवशी पाठिंबा दिला. मात्र, ते काम बंद आंदोलनात सहभागी झाले नाहीत. वाढती महागाई त्वरीत रोखावी, रेशन व्यवस्था बळकट करावी, बेरोजगारी कमी करावी, रोजगार निर्मिती करावी, सर्व कामगार, शेतकऱ्यांना पेन्शन मिळावी, कामगार हक्क हिरावून घेऊ नयेत, रिक्त जागा भराव्यात, केंद्रीय कर्मचाऱ्यांप्रमाणे राज्य कर्मचाऱ्यांना भत्ते मिळावीत या मागणीचे निवेदन जिल्हाधिकारी अविनाश सुभेदार यांना देण्यात आले. संघटनेचे सरचिटणीस अनिल लवेकर, संजय क्षीरसागर, प्रकाश पाटील, वसंत डावरे, रामेश पाटील, अनिल खोत, स्नेहल जाधव, अश्विनी कारंडे, सुरेखा पोळ, अजय लुगडे उपस्थित होते.

भारतीय किसान संघाचा ठिय्या

शेतीसाठी दरवर्षी प्रतीहेक्टरी २५ हजार अनुदान मिळावे, कृषी औजारे, पूरक उद्योगांच्या साहित्यावरील जीएसटी रद्द करावी या मागणीसाठी भारतीय किसान संघाने जिल्हाधिकारी कार्यालयासमोर ठिय्या मारला. दुपारी दीड वाजता निवासी उपजिल्हाधिकारी संजय शिंदे यांना निवेदन दिले. सरकारच्या चुकीच्या धोरणामुळे शेतकरी आर्थिक अडचणीत आला आहे. जाचक अटी, कायद्यांमुळे शेतकऱ्यांच्या स्वातंत्र्यावर मर्यादा आल्या आहेत. पीक विम्यामुळे कंपन्या गब्बर झाल्या, पण नुकसानग्रस्त शेतकऱ्यांना फायदा झालेला नाही. छत्रपती शिवाजी महाराज शेतकरी सन्मान योजनेचा फायदा शेतकऱ्यांपेक्षा बँकांना अधिक झाला. कर्जमाफीचा प्रत्यक्षात लाभ झाला नसतानाही काही जणांकडून शेतकऱ्यांवर टीका होत आहे. हमीभावाची घोषणा कागदावरच आहे. परिणामी शेती संकटात आहे. त्यामुळे शेतीसाठी हेक्टरी २५००० हजार रुपये अनुदान द्यावे अशी मागणी करण्यात आली. किसान संघाचे जिल्हा अध्यक्ष यशवंत खानविलकर, उपाध्यक्ष सिद्धार्थ शिंदे, रामचंद्र चौगुले, मदन देशपांडे, संभाजी साळवी, बसवराज हंजी, चंद्रशेखर मोळदी आदी उपस्थित होते.

शालेय पोषण आहार

कामगारांचा मोर्चा

शाळांमध्ये पोषण आहारासाठीची केंद्रीय किचन पद्धत कायमची रद्द करावी यासह विविध मागण्यांकडे लक्ष वेधण्यासाठी जिल्हा शालेय पोषण आहार कामगार संघटनेने टाऊन हॉलपासून जिल्हाधिकारी कार्यालयापर्यंत मोर्चा काढला. पोषण आहार कामगारांना सामाजिक सुरक्षा योजना लागू करावी, मदतनीस, स्वयंपाकींच्या मानधनात वाढ करावी, दर महिन्याच्या ७ तारखेला ठेकेदारांची बिले, मानधन खात्यावर जमा करावे, कामगार कायद्याप्रमाणे संरक्षण मिळावे या मागणीचे निवेदन निवासी उपजिल्हाधिकारी संजय शिंदे यांना देण्यात आले. संघटनेचे अध्यक्ष ए. बी. पाटील, सचिव अमोल नाईक, खजिनदार रेखा तेरदाळे, दगडू कुमठेकर, पुनम भुकटे, वर्षा कुलकर्णी, रेखा पाटील आदी उपस्थित होत्या.

म. टा. वृत्तसेवा, आजरा

सरंबळवाडी (ता. आजरा) येथील भाजप कार्यकर्ते रमेश दत्तू रेडेकर यांच्याकडे एक कोटी रुपये खंडणीची मागणी करून त्याची पूर्तता न केल्यास कुटुंबीयांसह जीवे मारण्याची धमकी देणाऱ्या एकावर आजरा पोलिसांत सोमवारी रात्री उशिरा गुन्हा नोंद झाला आहे. श्रीधर शिंगटे (रा. इंचनाळ, ता. गडहिंग्लज) असे आरोपीचे नाव आहे. याबाबत रेडेकर यांनी फिर्याद दिली आहे. रेडेकर यांच्या गावच्या वेशीत जाऊन शिंगटेने धमकवल्याने परिसरात खळबळ मजली आहे.

रविवारी (ता. ६) रात्री ढेकोळी (ता. चंदगड) येथील कार्यक्रम संपवून रेडेकर गावी येत असताना गावच्या प्रवेशद्वाराजवळ काहीजण थांबले होते. याबाबत विचारणा केली असता शिंगटेने रेडेकरना धमकावले होते. यानंतर सोमवारी सकाळपासून फोन करून अर्वाच्य शिवीगाळ करीत एक कोटी रुपयांची खंडणी मागितली होती. न दिल्यास कुटुंबीयांनाही जीवे मारू, अशी धमकी दिल्याचे रेडेकर यांनी फिर्यादीत म्हटले आहे. यानुसार शिंगटेवर सोमवारी रात्री उशिरा गुन्हा नोंद करण्यात आला.

फोटो...

म. टा. प्रतिनिधी, कोल्हापूर

मराठीतील ख्यातनाम साहित्यिक आणि 'मृत्युंजय'कार शिवाजीराव सावंत यांचे आजरा येथे स्मृतिदालन उभारण्याचा महत्त्वपूर्ण निर्णय जिल्हा परिषदेने घेतल्याची माहिती अध्यक्षा शौमिका महाडिक यांनी पत्रकार परिषदेत दिली. पालकमंत्री चंद्रकांत पाटील यांनी जिल्हा नियोजन समितीमधून नावीन्यपूर्ण योजनेंतर्गत ५० लाख रुपयांचा निधी यासाठी मंजूर केला आहे.

महाडिक म्हणाल्या, 'जिल्हाधिकारी अविनाश सुभेदार यांनी या प्रस्तावाला प्रशासकीय मान्यता दिली आहे. आजरा येथील कन्या आणि कुमार शाळा परिसरात जिल्हा परिषदेच्या जागेवर स्मृतिदालन होईल. स्मृतिदालनात त्यांचा जीवनप्रवास, त्यांच्या मराठीतील आणि अन्य भाषांतरित पुस्तकांची माहिती, त्यांची ग्रंथसंपदा, हस्ताक्षर, विविध समारंभातील छायाचित्रांची मांडणी करण्यात येणार आह. दालनामध्ये २५० हून आसनक्षमतेचे सभागृह प्रस्तावित आहे. सावंत यांच्या पत्नी मृणालिनी यांच्यासोबत चर्चा झाली असून, त्यांनी या प्रकल्पाबाबत आनंद व्यक्त केला आहे. या दालनासाठी सावंत यांना मिळालेले पुरस्कार, छायाचित्रे, भाषांतरित पुस्तके देणार असल्याचे त्यांनी सांगितले आहे.'

बांधकाम विभागाचे कार्यकारी अभियंता तुषार बुरड म्हणाले, 'येत्या आठ दिवसांत निविदा प्रकिया राबविली जाईल आणि महिनाभरात स्मृतिदालनाच्या बांधकामाला सुरुवात करण्याचे नियोजित आहे.' पत्रकार परिषदेला सीईओ अमन मित्तल, शिक्षण समिती सभापती अंबरीश घाटगे, आजरा पंचायत समिती सभापती रचना होलम, आजऱ्याच्या नगराध्यक्षा ज्योत्स्ना चराटी, नगरसेविका शुभदा जोशी, जिल्हा परिषद सदस्य राजवर्धन निंबाळकर, महेश चौगुले, प्रकाश टोणपे, आदी उपस्थित होते.

०००

कोट....

शिवाजीराव सावंत जिल्हा परिषदेच्या मेन राजाराम हायस्कूलमध्ये १९६० ते १९६३ मध्ये टायपिंगचे प्रशिक्षक म्हणून कार्यरत होते. त्यांची 'मृत्युंजय' कादंबरी वाचल्यानंतर भारावून गेले. १९९५ मध्ये त्यांना प्रतिष्ठेचा मूर्तिदेवी पुरस्कार मिळाला होता. जिल्हा परिषदेची अध्यक्षा झाल्यानंतर त्यांच्या जन्मगाव, साहित्यकृतीविषयी माहिती घेतली. या वाचकप्रिय साहित्यिकाच्या स्मृती जपण्यासाठी जि.प.च्या माध्यमातून स्मृतिदालन उभारण्याची कल्पना पुढे आली.

शौमिका महाडिक, अध्यक्षा, जि. प.

००००

म. टा. प्रतिनिधी, कोल्हापूर

चंदगड येथील उर्दू विद्यामंदिरचे मुख्याध्यापक असगर गडकरी यांच्यावर निलंबनाची कारवाई करावी यासाठी नागरिकांनी जिल्हा परिषदेतील शिक्षण विभागापर्यंत धाव घेतली. त्यांनी मुख्याध्यापकांच्या कामकाजाविषयी आक्षेप नोंदविले आहेत.

निवेदनात म्हटले आहे, गडकरी हे गेली आठ ते नऊ वर्षे मुख्याध्यापकपदी कार्यरत आहेत. यंदाच्या शैक्षणिक वर्षात त्यांनी एकही पाठ शिकवला नाही. नुकत्याच झालेल्या तिमाही परिक्षेत प्रश्नांची उत्तरे फळ्यावर लिहून दिली.त्यांचा मनमानी पद्धतीने कारभार सुरू आहे. त्यांच्यावर निलंबनाची कारवाई करावी अशी मागणी त्यांनी शिक्षण अधिकाऱ्यांकडे केली. सिकंदर नाईक, आदम नाईक, शब्बीर बेपारी, अक्रम मुल्ला, तनविर मुल्ला, दिलशाद शेख, रियाज फनिबंद, इकबाल मदार आदींच्या सह्यांचे निवेदन प्रशासनाकडे सादर केले. यासंदर्भात शिक्षणाधिकारी आशा उबाळे म्हणाल्या, 'मुख्याध्यापकांना कारणे दाखवा नोटीस बजावली आहे. त्यांच्या संदर्भातील तक्रारींची चौकशीची कार्यवाही सुरू आहे. '

हातकणंगले : पेठवडगाव (ता. हातकणंगले) येथील वाणी पेठेतील एम. के. चव्हाण अर्बन मल्टिपल निधीचा उद्घाटन समारंभ बुधवारी (ता.९) सकाळी दहा वाजता माजी खासदार जयवंतराव आवळे यांच्या हस्ते, तर माजी नगराध्यक्षा विद्या पोळ यांच्या अध्यक्षतेखालील होणार असल्याची माहिती संस्थेचे चेअरमन सचिन चव्हाण यांनी दिली आहे. नागरिकांनी मोठ्या संख्येने उपस्थित राहावे, असे आवाहन केले आहे.

म. टा. विशेष प्रतिनिधी, मुंबई

ऊस उत्पादक शेतकऱ्यांना एकरकमी एफआरपी देण्यासाठी राज्य सरकारने कारखान्यांना प्रति टन पाचशे रुपयांची मदत करावी, अशी मागणी जिल्ह्यातील साखर कारखानदारांनी मुख्यमंत्री देवेंद्र फडणवीस यांच्याकडे केली. राज्य साखर संघाचे अध्यक्ष जयप्रकाश दांडेगावकर यांच्या नेतृत्वाखाली कारखानदारांच्या शिष्टमंडळाने मुख्यमंत्र्यांची भेट घेतली. त्यावेळी मुख्यमंत्र्यांनी पंतप्रधान नरेंद्र मोदी यांच्या सोलापूर दौऱ्यादरम्यान त्यांना विनंती करुन दोन दिवसांत तोडगा काढू, असे आश्वासन दिले.

कारखानदारांनी साखरेचा दर आणि एफआरपी देण्यातील अडचणी मुख्यमंत्र्यांसमोर सविस्तर मांडल्या. एकरकमी एफआरपी देताना कारखानदारांना पाचशे रुपयांची तूट पडते. ही रक्कम सरकारने अनुदानरुपात द्यावी किंवा केंद्राकडे पाचशे रुपये वाढवून घेऊन साखरेचा दर प्रति क्विंटल २,९०० वरून ३,४०० रुपये करण्यास भाग पाडावे, अशी मागणी केली.

यावर मुख्यमंत्री फडणवीस यांनी पंतप्रधान नरेंद्र मोदी आज (ता.९) सोलापूर दौऱ्यावर येत आहेत. याबाबत त्यांना विनंती करुन यावर दोन दिवसांत तोडगा काढू, असे आश्वासन दिले. शिष्टमंडळाने महसूल मंत्री चंद्रकांत पाटील आणि कृषी राज्यमंत्री सदाभाऊ खोत यांचीही भेट घेतली. दरम्यान, याप्रश्नी मार्ग न काढल्यास ११ तारखेला कारखानदारांची बैठक बोलावण्यात येणार आहे. त्यावेळी कारखाने सुरू ठेवायचे की नाही याबाबतचा निर्णय घेणार आहे.

शिष्टमंडळात आमदार हसन मुश्रीफ, आमदार चंद्रदीप नरके, माजी मंत्री प्रकाश आवाडे, गणपतराव पाटील, राजेंद्र पाटील-यड्रावकर, माधवराव घाटगे आणि अशोकराव चराटी आदी उपस्थित होते.

०००००

एफआरपी व्याजासह देण्याचे आदेश

पुणे : साखर आयुक्त शेखर गायकवाड यांनी साखर कारखान्यांनी ऊस उत्पादकांना १४ दिवसांत 'एफआरपी' न दिल्यास १५टक्के दराने व्याज द्यावे लागेल, असे आदेश दिले. त्यामुळे शेतकऱ्यांना वेळेत 'एफआरपी' मिळण्याची आशा निर्माण झाली आहे.

स्वाभिमानी शेतकरी संघटनेने मंगळवारी एफआरपीप्रश्नी आयुक्तालयात ठिय्या आंदोलन केले. त्यानंतर गायकवाड यांनी एफआरपी वेळेत न दिल्यास १५टक्के दराने व्याज द्यावे लागेल, असा आदेश काढला.

गायकवाड म्हणाले, 'राज्यातील १७२ कारखान्यांकडे सुमारे चार हजार ५७६ कोटींची 'एफआरपी'ची थकबाकी आहे. कायद्यानुसार साखर कारखान्यांनी 'एफआरपी'ची रक्कम देणे आवश्यक आहे. कारखान्यांना याबाबत आदेश देण्यात येणार आहेत.' दरम्यान, 'एफआरपी'बाबत काढण्यात आलेल्या परिपत्रकामध्ये गाळप केलेल्या ऊसापोटी १४ दिवसांत ऊस उत्पादकांना रक्कम अदा करणे बंधनकारक असल्याचे नमूद केले आहे.

.. .. .. .. ..

.. .. .. .. ..

सरकारकडे केलेल्या मागण्या अशा

उत्तरप्रदेशाप्रमाणे राज्यात कारखान्यांना ४४५० कोटीची मदत द्यावी

आंतरराज्य वाहतूकीसाठी कारखान्यांना ७५० कोटी अनुदान द्यावे

निर्यात साखरेसाठी ३१० कोटी वाहतूक अनुदान द्यावे

निर्यात केलेल्या साखरेचे २०० कोटीं रक्कम मिळावी.

एकरकमी एफआरपी न देणाऱ्या कारखान्यावर कारवाई करु नये

.. .. ..

गडहिंग्लज : चुलत भावाला सोडण्यास गेलेल्या सुधीर ज्योती पाटील (वय २७, रा. शिप्पूर तर्फ आजरा) हा शिप्पूर शाळेच्या स्टेजसमोर मृतावस्थेत आढळल्याची घटना मंगळवारी सकाळी घडली. याबाबतची वर्दी सुशीला ज्योती पाटील यांनी गडहिंग्लज पोलिसात दिली आहे. सुधीर पाटील सोमवारी रात्री साडेआठ वाजता गडहिंग्लज येथून चुलत भाऊ शशिकांत पाटील याला घेऊन करंबळी येथे सोडण्यास गेला होता. तो रात्री उशिरापर्यंत घरी परत आला नाही. मंगळवारी सकाळी शिप्पूर येथील मराठी शाळेच्या स्टेजसमोर तो मृतावस्थेत आढळून आला.

म. टा. प्रतिनिधी, कोल्हापूर

जिल्हा दूध उत्पादक संघाच्या (गोकुळ) अध्यक्षपदासाठी इच्छुकांनी मोर्चेबांधणी सुरु केली असून संचालक धैर्यशिल देसाई यांनी मंगळवारी माजी आमदार महादेवराव महाडिक यांची भेट घेतली. अध्यक्षपदाचा निर्णय महाडिक व पी.एन. पाटील घेणार असल्याने इच्छुक रविंद्र आपटे, अरुण डोंगळे, रणजित पाटील, पी.डी. धुंदरे हे संचालक देखील अध्यक्षपदासाठी प्रयत्न करत आहेत.

अध्यक्ष विश्वास पाटील यांच्या राजीनाम्यानंतर रिक्त झालेल्या जागेसाठी सोमवारी (१४) सकाळी ११ वाजता निवडणूक होणार आहे. नूतन अध्यक्षपदाचा निर्णय दोन्ही नेते घेणार असले तरी इच्छुकांची संख्या लक्षात घेऊन त्यांना तारेवरची कसरत करावी लागणार आहे. अध्यक्ष विश्वास पाटील यांना हटवावे यासाठी १२ संचालकांनी बंड केले होते. त्यामध्ये महाडिक यांना मानणाऱ्या संचालकांची संख्या जास्त होती. त्यामुळे महाडिक गटातील कोणत्या इच्छुक संचालकाला पी.एन. पाठींबा देणार याचे अंदाज बांधले जात आहेत. आगामी लोकसभा व विधानसभा निवडणूक डोळ्यासमोर लक्षात घेऊन ज्या संचालकांची मतदारसंघात ताकद आहे त्यांना अध्यक्षपदासाठी पसंती दिली जाण्याची शक्यता वर्तवली जात आहे. पण पुढील वर्षी गोकुळची निवडणूक असल्याने ज्येष्ठ संचालकाची निवड करण्यात येईल, असाही दावा केला जात आहे. महाडिक गटाकडून आपटे, डोंगळे, पाटील तर पी.एन गटाकडून धुंदरे हे ज्येष्ठ संचालक आहे. ज्येष्ठ संचालकांऐवजी नव्या चेहऱ्याला संधी देण्याचा मतप्रवाह संचालक मंडळात दिसून येत आहे. दूध संघाच्या कामावर नियंत्रण ठेवण्याबाबत नवीन चेहऱ्याच्या संचालकांना मर्यादा येतील. त्यामुळे नेतेमंडळी ज्येष्ठ व अनुभवी संचालकांना संधी देतील अशी चर्चा आहे.

देशात जातीयवाद वाढला

सोलापूर :

'देशात जातीयवाद आणि धर्मवाद वाढला आहे. पंतप्रधान मोदी यांना पराभूत करण्यासाठी देशभरातील महाआघाडीने एकत्र येणे गरजेचे आहे,' असे प्रतिपादन माजी केंद्रीय गृहमंत्री सुशीलकुमार शिंदे यांनी केले. पंतप्रधान नरेंद्र मोदींच्या सोलापूर दौऱ्यांच्या पार्श्वभूमीवर शिंदे बोलत होते. 'मोदी फक्त घोषणा करतात कृती मात्र काहीच करीत नाहीत. भारताची परिस्थिती नाजूक आहे. नोटबंदीमुळे देशाची आर्थिक परिस्थिती ढासळली आहे. नोटा बदलण्यासाठी रांगेत उभारलेल्या १२२ जणांच्या मृत्यूला जबाबदार कोण. किती नोटा छापल्या आणि किती नष्ट केल्या याचा हिशोब कोण देणार. दर वर्षी २ कोटी नोकऱ्या देणार असल्याचे सांगणाऱ्या मोदींनी किती जणांना नौकऱ्या दिल्या, उलट अडीच कोटी नोकऱ्या लोक गमावून बसले आहेत,' असेही शिंदे म्हणाले.

म. टा. प्रतिनिधी, कोल्हापूर

'महिला बचत गटाच्या उत्पादित वस्तूंसाठी 'ताराराणी महोत्सव'हे हक्काचे व्यासपीठ आहे. महिला व बचत गटाच्या उन्नतीसाठी सरकारच्या विविध योजना आहेत. महिला आज शिक्षित बनल्या आहेत, त्यांनी कौशल्य शिक्षण आत्मसात करावे आणि स्वतला सर्वार्थांनी सक्षम व स्वावलंबी बना.' अशी साद जिल्हा परिषदेच्या अध्यक्षा शौमिका महाडिक यांनी महिला बचत गटाच्या महिलांना घातली.

जिल्हा परिषद, जिल्हा ग्रामीण विकास यंत्रणेतर्फे येथील प्रायव्हेट हायस्कूलच्या मैदानावर पाच दिवसीय ताराराणी महोत्सव भरविला आहे. प्रदर्शनात बचत गटांनी उत्पादित वस्तूंचे १६० स्टॉलचा समावेश आहे. रविवारीमहोत्सवाचे उद्घाटन, गटविकास अधिकाऱ्यांचा सत्कार व राजमाता जिजाऊ स्वावलंबन पुरस्कार प्राप्त बचत गटांना पारितोषिक वितरण समारंभ झाला. जिल्हा परिषदेचे मुख्य कार्यकारी अधिकारी अमन मित्तल अध्यक्षस्थानी होते.

राजमाता जिजाऊ स्वावलंबन पुरस्कार २०१७-१८ मधील जिल्हा स्तरावरील विजेत्या कृष्णावेणी स्वयंसहाय्यता समूह दत्तवाड, श्री महालक्ष्मी स्वयंसहाय्यता समूह मालवे व ज्वालामालिनी स्वयंसहाय्यता समूह राशिवडे या बचत गटांना पुरस्कारांनी गौरविले.मान्यवरांच्या हस्ते महोत्सवच्या स्मरणिकेचे प्रकाशन झाले. याप्रसंगी जिल्हा परिषद सदस्य अरुण इंगवले, बंडा माने, बॅँक ऑफ इंडियाचे विभागीय व्यवस्थापक नितीन देशपांडे यांची भाषणे झाली. जिल्हा ग्रामीण विकास यंत्रणेच्या प्रकल्प संचालक सुषमा देसाई यांनी प्रास्ताविक केले. याप्रसंगी महिला व बालकल्याण समिती सभापती वंदना मगदूम, सदस्या पद्माराणी पाटील, स्वरुपाराणी जाधव, हेमंत कोलेकर, 'नाबार्ड'चे नंदू नायक, अग्रणी बँकेचे राहूल माने यांची प्रमुख उपस्थिती होती.

पदाधिकारी, अधिकारी लांबच

महोत्सवाच्या उद्घाटन सोहळ्याला उपाध्यक्ष व बांधकाम, शिक्षण, समाजकल्याण समिती सभापती अनुपस्थित होते. शिवाय विविध विभागाचे अधिकारीही महोत्सवापासून लांब राहिल्याचे चित्र उद्घाटनप्रसंगी पाहावयास मिळाले. सदस्यांची संख्या तुरळक होती.

तालुकास्तरीय पुरस्कार प्राप्त बचत गट (अनुक्रमे पहिले तीन विजेते)

करवीर : डॉ.आंबेडकर स्वयंसहाय्यता समूह आरे, लक्ष स्वयंसहायता समूह वळिवडे, रत्नदीप स्वयंसहायता समूह सांगवडे.

कागल : श्री गणेश स्वयंसहाय्यता समूह सुळकूड, सत्वपंचशिल स्वयंसहायता समूह सांगाव, ताराराणी स्वयंसहाय्यता समूह बिद्री.

आजरा : शंभूमहादेव स्वयंसहाय्यता समूह दाभिल,भवानी स्वयंसहाय्यता समूह लाटगाव, सिद्धकला स्वयंसहाय्यता समूह उत्तूर.

गगनबावडा : ओंकार स्वयंसहाय्यता समूह किरवे, भरारी स्वयंसहाय्यता समूह खेरीवडे, हिरकणी स्वयंसहाय्यता समूह निवडे.

भुदरगड : भैरवनाथ स्वयंसहाय्यता समूह शेळोली, आदिशक्ती स्वयंसहाय्यता समूह म्हसवे, माऊली स्वयंसहाय्यता समूह हेदवडे.

चंदगड : वैष्णवी स्वयंसहाय्यता समूह राजगोळी खुर्द, भावेश्वरी स्वयंसहाय्यता समूह कालकुंद्री, किर्ती स्वयंसहाय्यता समूह कागणी.

गडहिंग्लज : आदर्श स्वयंसहाय्यता समूह दुंडगे, स्वामिनी स्वयंसहाय्यता समूह शेंद्री, भिमज्योती स्वयंसहाय्यता समूह माद्याळ.

हातकणंगले : एकता जिजाऊ स्वयंसहाय्यता समूह चोकाक, तुलसी स्वयंसहाय्यता समूह इंगळी, विघ्नहर्ता स्वयंसहाय्यता समूह रुकडी.

पन्हाळा : सई स्वयंसहाय्यता समूह नणुंद्रे, श्री स्वामी समर्थ स्वयंसहाय्यता समूह माले, शुभलक्ष्मी स्वयंसहाय्यता समूह केखले.

राधानगरी : श्री महालक्ष्मी स्वयंसहाय्यता समूह मालवे, ज्वालामालिनी स्वयंसहाय्यता समूह राशिवडे, संत गाडगेबाबा स्वयंसहाय्यता समूह कसबा तारळे.

शाहूवाडी : जोतिबा स्वयंसहायता समूह कडवे, रमाई स्वयंसहाय्यता समूह सोनवडे, सतीमाता स्वयंसहाय्यता समूह पणुंदे.

शिरोळ : कृष्णावेणी स्वयंसहाय्यता समूह दत्तवाड, आदर्श स्वयंसहाय्यता समूह कुटवाड, कल्लेश्वर स्वयंसहाय्यता समूह शिरदवाड.

.. .. .. ..