अल्पवयीन मुलीवर

करमाळ्यात अत्याचार

सोलापूर : करमाळा तालुक्यातील वांगी शिवारात ऊसतोडीसाठी आलेल्या एका दाम्पत्याची अल्पवयीन मुलगी मोकळ्या रानात शौचासाठी गेली असता तिच्यावर अज्ञातांनी अत्याचार करून, मारहाण करून जखमी अवस्थेत शेतातील उसाच्या फडात टाकून दिले. ही घटना सोमवारी सकाळी घडली.

ऊसतोड करणारी एक टोळी करमाळा तालुक्यातील वांगी गावात राहात होती. त्या टोळीतील एका दाम्पत्यांची मुलगी सोमवारी, सात जानेवारी रोजी सकाळी शौचालयासाठी मोकळ्या रानात गेली असता तिच्यावर अज्ञातांनी अत्याचार केला. तिने कोणाकडे तक्रार करू नये यासाठी तिला जीवे मारण्याच्या उद्देशाने तिच्या डोक्यात दगड घालून गंभीर जखमी केले. जखमी अवस्थेतच तिला बाजूच्याच उसाच्या फडात टाकून नराधमांनी पळ काढला. तिला वडिलांनी तातडीने सोलापूरच्या सरकारी रुग्णालयात दाखल केले आहे. या बाबत अद्याप करमाळा पोलिस ठाण्यात नोंद झाली नसली तरी पोलिस तपास करीत असल्याचे सांगण्यात आले.

सहा विकासकामांचे भूमीपूजन

करणार नरेंद्र मोदी

म. टा. वृत्तसेवा, सोलापूर

पंतप्रधान नरेंद्र मोदी उद्या, बुधवारी नऊ जानेवारी रोजी सोलापूरच्या दौऱ्यावर येणार आहे. प्रशासनाच्या वतीने तयारी सुरू आहे. मोदींच्या उपस्थित सहा विविध विकासकामांचा प्रारंभ आणि लोकार्पण सोहळा पार्क स्टेडियमवर आयोजित कार्यक्रमात होणार आहे. मोदी एकूण ८५ मिनिटे सोलापूर शहरात असतील, अशी माहिती जिल्हाधिकारी डॉ. राजेंद्र भोसले यांनी दिली.

मोदींच्या सोबत राज्यपाल के. विद्यासागर राव, मुख्यमंत्री देवेंद्र फडणवीस, केंद्रीय रस्ते व दळणवळण मंत्री नितीन गडकरी, केंद्रीय गृहनिर्माण विकास मंत्री हरजितसिंग गिरी सोलापूरच्या दौऱ्यावर येणार आहेत. सकाळी १० वाजून ५० मिनिटांनी मोदींचे हेलिकॉप्टरने बिदरहून सोलापूर विमानतळावर आगमन होईल. त्या नंतर पार्क स्टेडियम येथे इलेट्रिक कळ दाबून पंतप्रधान मोदी यांच्या हस्ते सहा विकासकामांचे भूमीपूजन व लोकार्पण सोहळा होणार आहे. त्या नंतर उपस्थित लोकांशी संवाद साधणार आहेत. त्या नंतर दुपारी १२ वाजून १५ मिनिटांनी सोलापूर विमानतळावरुन हेलिकॉप्टरने बिदरकडे रवाना होतील, अशी माहिती डॉ. भोसले यांनी दिली.

दौऱ्यात उजनी-सोलापूर या ३६० कोटी रुपये खर्चून साकारण्यात येणाऱ्या समांतर जलवाहिनीचे भूमीपूजन, स्मार्ट सिटीतील एबीडी एरियातील स्मार्ट सिटी योजनेअंतर्गत पाणीपुरवठा व ड्रेनेज लाईन सुविधा १९० कोटींच्या कामाचे भूमीपूजन, हद्दवाढ भागात मनपाच्या वतीने करण्यात येणाऱ्या अमृत योजनेअंतर्गत १८० कोटींच्या भुयारी गटार योजनेचे भूमीपूजन, मनपाच्या वतीने सांडपाण्यावर प्रक्रिया करण्यासाठी उभारण्यात आलेल्या तीन एस. टी. पी प्रकल्पाचे लोकार्पण, पंतप्रधान आवास योजनेतून नियोजित ३० हजार गृहनिर्माण प्रकल्पाचे भूमीपूजन, सोलापूर-उस्मानाबाद, या चार पदरी राष्ट्रीय महामार्गाचे लोकार्पण सोहळा पंतप्रधान मोदी यांच्या हस्ते होणार असल्याचे डॉ. भोसले यांनी सांगितले.

म. टा. प्रतिनिधी, कोल्हापूर

जिल्हाधिकारी कार्यालय आणि इतर सरकारी कार्यालयात दुचाकीवरून येणारे अधिकारी, कर्मचाऱ्यांना जिल्हाधिकाऱ्यांनी हेल्मेटसक्ती केली. त्याची अंमलबजावणी सोमवारपासून करण्यात आली. यामुळे अनेक अधिकारी, कर्मचारी हेल्मेट परिधान करून आल्याचे दिसत होते.

दुचाकीचे अपघात झाल्यानंतर हेल्मेट नसल्यास डोक्याला गंभीर इजा होते. त्यात अनेकजण दगावतात. यामुळे दुचाकी चालवताना हेल्मेट घालणे आवश्यक असते. मात्र याकडे बहुतेकजण दुर्लक्ष करतात. पोलिसही काटेकोरपणे कारवाई करीत नाहीत. जिल्हाधिकारी अविनाश सुभेदार यांनी नव्या वर्षात सरकारी अधिकारी, कर्मचाऱ्यांना हेल्मेटसक्ती केली आहे. अधिकारी, कर्मचारीच हेल्मेट घालून आले तर इतर दुचाकीस्वारांत जागृती होईल. त्यातून स्वत:हून हेल्मेट घालणाऱ्या दुचाकीस्वारांची संख्या वाढेल, असा हेतू आहे. पहिल्याच दिवशी जिल्हाधिकारी कार्यालयात दुचाकीवरून येणारे बहुतांशी अधिकारी, कर्मचारी हेल्मेट परिधान करून आले. चांगला प्रतिसाद मिळाल्याने इतर कार्यालयातही याची अंमलबजावणी केली जाणार आहे.

-------------

भूमाता प्रदूषणमुक्त पंचगंगा जागरचे आवाहन,पदयात्रेची सांगता

म. टा. प्रतिनिधी, कोल्हापूर

पंचगंगा नदीचे प्रदूषण कमी करण्यासाठी कोल्हापूर महानगरपालिका, इचलकरंजी नगरपालिका, जिल्हा परिषद यांनी तातडीने कृती करावी. अन्यथा दहा दिवसानंतर नदीकाठावरील प्रत्येक गावाने प्रदूषण करणाऱ्यांना उत्तर देण्याची तयारी करावी', असे आवाहन कृषीरत्न डॉ. बुधाजीराव मुळीक यांनी सोमवारी केले. भूमाता प्रदूषणमुक्त पंचगंगा जागरतर्फे 'पंचगंगा नदी संगम ते उगम' पदयात्रा सांगताप्रसंगी ते बोलत होते. येथील दसरा चौकात हा कार्यक्रम झाला.

डॉ. मुळीक म्हणाले, 'पंचगंगा गटारगंगा बनली आहे. शिरोळ तालुक्यातील गावांना विषयुक्त पाणी प्यावे लागत आहे. नविन पिढी बरबाद होत आहे, शेती धोक्यात आली आहे. यामुळे निर्णायक लढा सुरू केला आहे. नृसिंहवाडीजवळील पंचगंगा नदी संगमापासून प्रयाग चिखली येथील उगमापर्यंत जागर यात्रा काढली़ विद्यार्थ्यांपर्यंत प्रदूषणचा प्रश्न पोहचवला. प्रदूषणमुक्तीचा आगामी काळात लढा तीव्र करायचा आहे. आम्हाला हिंसक मार्ग मान्य नाही. मात्र प्रशासन प्रदूषण करणाऱ्यांवर कारवाई करणार नसेल तर गावांनी आपल्या पध्दतीने उत्तर द्यावे. आता शांत बसायचे नाही, असा निर्धार शिरोळकरांनी केला आहे.'

आमदार उल्हास पाटील म्हणाले, 'पंचगंगा प्रदूषणाचा प्रश्न अनेकवेळा विधानसभेत मांडला. प्रदूषण नियंत्रण मंडळ, जिल्हा प्रशासनाकडे अर्ज, विनंत्या केल्या. काहीही न झाल्याने भूमाता प्रदूषणमुक्त पंचगंगा जागरतर्फे प्रदूषणमुक्तीसाठी आरपारची लढाई सुरू केली आहे. या लढाईला खासदार उदयनराजे, डॉ. बुधाजीवराव मुळीक यांचे पाठबळ लाभले आहे. यामुळे प्रशासनाने तातडीने उपाय योजना केल्या नाहीत आणि प्रदूषणकारी कारखान्यांवर कारवाई केली नाही तर लढा तीव्र होईल. आता संयम सुटला आहे. संघर्षावेळी गुन्हे दाखल झाले तरी चालेल मात्र मागे हटणार नाही.'

माजी मंत्री प्रकाश आवाडे म्हणाले, 'पंचगंगा प्रदूषणमुक्त करण्यासाठी जे येतील त्यांना घेऊन आणि जे येणार नाहीत त्यांना सोडून लढा देणे काळाची गरज आहे. नदीकाठावरील गावांनी शहरातील प्रत्येकाने स्वत:पासून प्रदूषणमुक्तीची सुरूवात करावी.'

यावेळी शिवसेना जिल्हाप्रमुख मुरलीधर जाधव, नगरसेवक अशोक जाधव, धैर्यशील माने यांची भाषणे झाली. कार्यक्रमास रजनी मगदूम, मंगल चव्हाण, उज्वला पाटील यांच्यासह भूमाताच्या महिला पदाधिकारी, पंचगंगाप्रेमी उपस्थित होते.

....

चौकट

सतेज पाटील यांना सांगा

प्रदूषणमुक्त पंचगंगा जागरला पाठिंबा देण्यासाठी कसबा बावड्यातील नगरसेवक अशोक जाधव आले होते. त्यांनी भाषणात प्रदूषण रोखण्यासाठी महानगरपालिकेवर जी जबाबदारी टाकाल ती पार पाडेल, असे सांगितले. हाच संदर्भ घेत भाषणात डॉ. मुळीक यांनी आमदार सतेज पाटील यांना शहरातील येणारे प्रदूषित पाणी पूर्णपणे थांबवण्यासाठी तातडीने कृती करण्यास सांगा, असा सल्ला दिला.

....

पक्ष विसरून एकत्र

व्यासपीठावर शिवसेनेचे आमदार उल्हास पाटील, काँग्रेसचे नेते माजी मंत्री प्रकाश आवाडे, रजनी मगदूम उपस्थित होत्या. यामुळे 'पंचगंगा प्रदूषण मुक्तीसाठीच्या जागरासाठी तरी पक्ष विसरून नेते एकाच व्यासपीठावर आले, हे महत्वाचे आहे', असे डॉ. मुळीक यांनी सांगितले. 'प्रदूषण करणाऱ्या कारखान्यांना आवाडे यांनी खरंच सूचना द्याव्यात', असा सल्लाही त्यांनी दिला.

...

जिल्हाधिकाऱ्यांना निवेदन

शहरातून हलगीच्या वाद्यात दुपारी एक वाजता जागर यात्रा दसरा चौकात दाखल झाली. आमदार उल्हास पाटील, डॉ. मुळीक, माने यांच्या नेतृत्वाखालील शिष्टमंडळाने जिल्हाधिकारी अविनाश सुभेदार यांना निवेदन दिले. प्रदूषणकारी घटक कोणते आहेत, तातडीने कोणत्या उपाययोजना केल्या पाहिजेत, जबाबदारी कोणाची आहे यासंबंधीचा आशय निवेदनात आहे.

इचलकरंजीत अतिक्रमण निर्मूलन पथकाविरोधात निदर्शने

म. टा. वृत्तसेवा, इचलकरंजी

अतिक्रमण निर्मूलन पथकाकडून खोकीधारक व हातगाडाचालकांशी आर्थिक व्यवहार करून त्यांना मोक्याच्या जागा देत असल्याचा आरोप करत नवीन युवक सेनेच्यावतीने सोमवारी नगरपालिकेत पिवळा रंग उधळत निदर्शने करण्यात आली. चर्चेदरम्यान, मुख्याधिकारी दीपक पाटील व आंदोलक संतोष कांदेकर यांच्यात वाद झाल्याने तणाव निर्माण झाला होता. दरम्यान, मुख्याधिकारी पाटील यांनी आंदोलकांवर गुन्हे दाखल करण्याचे आदेश देऊनही रात्री उशीरापर्यंत याबाबतची नोंद झाली नव्हती.

नगरपरिषदेच्या अतिक्रमण निर्मूलन पथकाकडून गेल्या काही महिन्यांपासून शहरातील अनधिकृत खोकी, हातगाड्यांवर केली जाणारी कारवाई थांबविण्यात आली आहे. त्यामुळे शहरातील मुख्य चौकांसह रस्त्यांवर अडथळा होईल अशी अतिक्रमणे वाढत चालली आहेत. त्याचा निषेध करत नवीन युवक सेनेच्या कार्यकर्त्यांनी नगरपरिषदेच्या प्रवेशद्वारात पिवळा रंग उधळून घोषणाबाजी करत निदर्शने केली. संघटनेच्या शिष्टमंडळाने मुख्याधिकारी पाटील यांची भेट घेतली. मुख्याधिकारी पाटील यांनी आंदोलन करण्याची ही पद्धत नाही असे सांगत खडे बोल सुनावले. त्यावर कांदेकर यांनी, 'अतिक्रमण निर्मूलन पथकाडून काहीच कारवाई केली जात नसल्याच्या निषेधार्थ आंदोलन आहे' असे सांगितले. त्यावर नगरपरिषदेत अशा पध्दतीने रंग उधळणे चांगले नाही, असे सांगत मुख्याधिकार्‍यांनी खडसावत गैरवर्तनाबद्दल पोलिस कारवाईचा इशारा दिला. त्यावेळी दोघांमध्ये जोरदार वाद झडल्याने तणाव निर्माण झाला. यावेळी योगेश चव्हाण, मनोहर कांबळे, आदी उपस्थित होते.

इचलकरंजीत शुक्रवारी

उपनगराध्यक्ष निवड

इचलकरंजी : रिक्त झालेल्या उपनगराध्यक्ष पदासाठी नगराध्यक्षा अलका स्वामी यांनी शुक्रवारी (ता. ११) विशेष सभा बोलाविली आहे. भाजपचे पक्षप्रतोद तानाजी पोवार आणि नगरसेवक युवराज माळी यांची नांवे चर्चेत आहेत. नगरपालिकेवर भाजपची सत्ता आहे. त्यावेळी पहिल्यावर्षी उपनगराध्यक्षपद हे ताराराणीच्या वाट्याला आले होते. फॉर्म्यूल्यानुसार दुसर्‍या वर्षी पद भाजपला मिळाले आहे. त्यामुळे या पदाची माळ कोणाच्या गळ्यात पडणार याची उत्सुकता असून त्यासाठी तानाजी पोवार आणि युवराज माळी यांच्या नांवाची चर्चा आहे. सरीता आवळे यांनी एक जानेवारी रोजी पदाचा राजीनामा नगराध्यक्षांकडे दिला आहे.

कोळींद्रेनजीक गव्याच्या धडकेत

ॲड. मळवीकर गंभीर जखमी

म. टा. वृत्तसेवा, चंदगड

हेरे येथून दौलत कारखान्याची बैठक संपवून घरी परतताना हेरे-नांदवडे रोडवर खालसा कोळींद्रे-शिप्पूर दरम्यानच्या ओढ्यानजीक पाच गव्यांच्या कळपाने रात्री अचानक हल्ला केल्याने ॲड. संतोष लक्ष्मण मळवीकर (रा. नांदवडे, ता. चंदगड) हे गंभीर जखमी झाले. काल रात्री अकरा वाजता ही घटना घडली. ॲड. मळवीकर काल सायंकाळी हेरे येथे दौलत संदर्भातील बैठकीला उपस्थित होते. बैठक आटोपून रात्री साडेदहा वाजता नांदवडेला आपल्या घरी मोटारसायकलवरुन जात होते. त्यांनी सहकारी रुपेश अनगुडे यांना वाटेतच खालसा कोळींद्रेत सोडले. नांदवडेच्या दिशेने ते एकटेच निघाले असताना कोळींद्रे ते शिप्पूर दरम्यान रस्ता पार करत असलेल्या गव्यांनी त्यांच्या मोटारसायकलला जोराची धडक दिली. यामध्ये त्यांना गंभीर दुखापत झाल्याने ते दहा मिनीटे बेशुध्द पडले. याची माहिती मिळताच शिवाजी गावडे, दयानंद गावडे, केशव गावडे, रुपेश अनुगडे यांनी त्यांनी तातडीने त्यांना हेरे येथील सरकारी दवाखान्यात हलवले. तेथून गडहिंग्लजमधील उपजिल्हा रुग्णालयात आणि नंतर त्यांच्यावर उपचार सुरू आहेत. वनविभागाचे पाटील यांनी मळवीकर यांची भेट घेऊन माहिती घेतली.

बलात्कारप्रकरणी आरोपीस चार दिवस कोठडी

शाहूवाडी : कापशी (ता. शाहूवाडी) येथे शारीरिक व्याधीने विकलांग झालेल्या महिलेवर मसाजच्या बहाण्याने बलात्कार करणाऱ्या रंगराव सदाशिव नाईक (वय ४६, रा. सरुड, ता. शाहूवाडी) या संशयित नाराधमास गुरुवारपर्यंत (ता. १०) पोलिस कोठडी सुनावण्यात आली. शाहूवाडी-मलकापूरचे प्रथमवर्ग न्यायदंडाधिकारी ए. ए. वाळुंजकर यांच्यासमोर सोमवारी दुपारी त्याला पोलिसांनी हजर केले.

कापशीत सवते रस्त्यालगतच्या शेतात गुरुवारी (ता. ३) सायंकाळी साडेसातच्या सुमारास ही घटना घडली. पीडितेच्या पतीने दिलेल्या फिर्यादीवरून संशयिताविरुद्ध शाहूवाडी पोलिसात बलात्काराचा गुन्हा दाखल झाला आहे. दरम्यान संशयित आरोपी रंगराव नाईक हा सराईत गुन्हेगार असून खून, मारामारी, चोरी, अवैध धंदे अशा गुन्हेगारी कृत्यात त्याचा सहभाग राहिला असल्याचे पोलिसांच्या चौकशीत समोर येत आहे.

म. टा. वृत्तसेवा, इचलकरंजी

'मोक्का' कारवाई केलेल्या जर्मनी टोळीतील अविनाश व आदर्श या भावांना सोडविण्यासाठी दरमहा १० हजार रुपयांची खंडणी मागत लाकडी मागाचा मारा आणि लाथाबुक्क्यांनी मारहाण करुन लुटल्याप्रकरणी जर्मनी टोळीतीलच आनंद जर्मनी याला शिवाजीनगर पोलिसांनी अटक केली. या प्रकरणात यापूर्वी एका अल्पवयीनासह तुषार लगारे, अक्षय कोंडुगळे यांना अटक करण्यात आली. ते सध्या न्यायालयीन कोठडीत आहेत. तर अरबाज शेख फरारी आहे. मारहाणीत फिर्यादी, त्याचा मित्र व तीन संशयित आरोपी असे पाचजण जखमी झाले.

दरम्यान, पोलिसांनी आदर्श आणि अविनाश जर्मनी या दोघांच्या टोळीवर 'मोक्का'अंतर्गत कारवाई केली आहे. तर आता आनंद जर्मनी या तिसर्‍या टोळीवरही मोक्का कारवाई केली जाणार असल्याचे समजते. रुईतील दस्तगीर आप्पासो खलिफा हे २८ डिसेंबर २०१८ रोजी मित्र प्रकाश मानेसोबत दुचाकीवरुन घरी निघाले होते. दुपारी सहारानगर ते लक्ष्मीमाळ कबनूर रोडवरील दत्तनगर परिसरात आनंद जर्मनी, तुषार लगारे, अक्षय कोंडुगळे, अरबाज शेख, शुभम पट्टणकुडे, अरबाज शेख व अन्य अनोळखी दोघांनी खलिफा यांना अडविले. आनंद जर्मनी याने 'मी जर्मनी गँगचा बॉस आहे. माझे भाऊ अविनाश व आदर्श यांना जेलमधून बाहेर काढायचे असल्याने मला दरमहा १० हजार रुपये हप्ता दिला पाहिजे' असे म्हणत खलिफा व त्यांचा मित्र माने या दोघांना मोटारसायकलवरुन खाली उतरवून मारहाण केली. खलिफा यांच्याकडील अडीच हजारांची रोकड, ५०० रुपये किंमतीचे चांदीचे कडे आणि माने यांच्याकडील १५० रुपयांची चांदीची अंगठी असा ५६०० रुपयांचा ऐवज काढून घेतला. मोटरसायकलींचेही नुकसान केले. फिर्याद दिल्यास ठार मारण्याची धमकीही दिली होती. या प्रकरणी खलिफा यांनी २९ डिसेंबर रोजी फिर्याद दाखल केली होती.

गारगोटी : दासेवाडी (ता. भुदरगड) येथील कृष्णा भागोजी दासव यांच्या शेतात शॉर्टसर्किटने लागलेल्या आगीने पाच एकरातील सुमारे दीडशे टन ऊस जळाला. आगीत सुमारे साडेचार लाखांचे नुकसान झाले आहे. दासेवाडीतील कृष्णा भागोजी दासव यांचे केळाच्या गोंडावरील 'मोळा' नावाचे पाच एकर शेत असून शेतात वीज वितरणचे रोहित्र (डीपी) आहे. दुपारी रोहित्रामुळे शॉर्टसर्किट झाले आणि पाच एकरातील ऊस जळाला. आगीत सुमारे दीडशे टन ऊस जळून चार ते साडेचार लाखांचे नुकसान झाले. आगीची कल्पना दासेवाडी येथील बिद्री कारखान्याच्या शेतकी कार्यालय, वीज वितरण कार्यालय, तलाठी कार्यालयात देण्यात आली. पण एकही कार्यालयाचा जबाबदार अधिकारी घटनास्थळी दाखल झाला नाही.

म. टा. वृत्तसेवा, जयसिंगपूर

'मंदीच्या गर्तेत सापडल्याने वस्त्रोद्योग कोलमडला आहे. त्यामुळे टफ योजनेचे अनुदान पूर्ववत करावे. वस्त्रोद्योगास मंदीच्या गर्तेतून बाहेर काढण्यासाठी केंद्र सरकारने तातडीने पावले उचलावीत, अशी मागणी स्वाभिमानी शेतकरी संघटनेचे नेते खासदार राजू शेट्टी यांनी केंद्रीय अर्थमंत्री अरूण जेटली यांच्याकडे केली. तसेच यार्न बँकेमार्फत येणार्‍या सवलत योजनेमध्ये वाढ करण्याची आग्रही मागणीदेखील त्यांनी यावेळी केली.

वस्त्रोद्योगातील अडचणींसंदर्भात खासदार शेट्टी यांनी मंत्रालयात केंद्रीय अर्थमंत्री अरूण जेटली यांची भेट घेऊन निवेदन दिले. टफ योजनेमुळे भारतातील वस्त्र उद्योगात प्रचंड विकास आहे. ही योजना गेल्या १५ वर्षांपासून अतिशय सुलभतेने अंमलात आणली गेली आहे. आरआर-टीयूएफएस योजनेअंतर्गत पॉवरलूम उद्योजकांना ३० टक्के भांडवली सबसिडी होती. पण १३ जानेवारी २०१६ रोजी भांडवल अनुदान फक्त १० टक्के केले आहे. त्यामुळे वस्त्रोद्योग व्यवसायावर संक्रात आली आहे. मंदीच्या गर्तेत व्यवसाय सापडला असून वस्त्रोद्योग व्यवसाय कोलमडून जाण्याच्या मार्गावर आहे. या व्यवसायाला तारण्यासाठी १० टक्के सबसिडी अपुरी असल्याचे खासदार शेट्टी यांनी सांगितले. गेल्या २ वर्षांपासून उद्योजकांच्या शेड्यूल्डची बँक परतफेड योजना विस्कळीत झाल्याने सबसिडी रक्कम मिळविण्यात विलंब होतो. केंद्र सरकारने त्वरीत तातडीने ठोस पावले उचलावीत. यंत्रमागधारक पूर्णपणे तोट्यात आहेत. आर्थिक मंदीमुळे या धंद्यावर मोठी संक्रात आली आहे. जर उद्योग तारायचा असेल तर यासाठी सरकारने तातडीने यंत्रमागधारकांना पॅकेज द्यावे, तसेच याची तरतूद येणार्‍या अर्थसंकल्पात केली जावी, अशी आग्रही मागणी खासदार शेट्टी यावेळी केली. वस्त्रोद्योगाच्या या प्रश्नांसाठी केंद्र सरकार सकारात्मक असून या व्यवसायाला योग्य ती मदत करू, अशी ग्वाही अर्थमंत्री अरुण जेटली यांनी दिली. यावेळी पॉवरलूम असोसिएशनचे अध्यक्ष सतीश कोष्टी उपस्थित होते.

माजी आमदार महादेवराव महाडिक यांचा पुढाकार

म. टा. प्रतिनिधी, कोल्हापूर

रिझर्व्ह बँकेने यूथ बँकेवर आर्थिक निर्बंध घातल्यावर माजी आमदार महादेवराव महाडिक संचालक मंडळींच्या मदतीला धावून आले. बँकेतील व्यवहार ठप्प झाल्याने जिल्हा दूध उत्पादक संघाच्या (गोकुळ) एक हजार कर्मचाऱ्यांच्या दोन कोटी रुपयांच्या पगाराची सोय महाडिक यांनी बैठक घेऊन तातडीने वीरशैव बँकेतून केली. यूथ बँकेचे संचालक अरुण नरके आणि महाडिक यांनी दीड महिन्यात कर्जवसुली आणि भाग भांडवल जमा करुन बँकेवरील निर्बंध हटवण्यासाठी पावले उचलण्यास सुरुवात केली आहे.

शनिवारी (ता. ५) सायंकाळी पाच वाजता रिझर्व्ह बँकेच्या अधिकाऱ्यांनी यूथ बँकेवर आर्थिक निर्बंध आणले. या घटनेने जिल्ह्याच्या राजकारणात खळबळ उडाली. यूथ बँक ही महाडिक व नरके यांच्या संबधित असल्याने सोमवारी दिवसभर सहकार क्षेत्रात चर्चा सुरु होती. शहरातील गोकुळच्या वितरकांना पैसे भरण्याची सोय रविवारी तातडीने वीरशैव बँकेत केली. बँकेच्या कोल्हापूर शहरात दहा तर जयसिंगपूर येथे एक शाखा आहे. या ठिकाणी गोकुळच्या एक हजार कर्मचाऱ्यांचे पगार, टँकर वाहतूकदारांचे भाडे जमा होते. गोकुळच्या एक हजार कर्मचाऱ्यांच्या पगारपोटी दोन कोटी रुपये शनिवारी यूथ बँकेत भरले होते. शनिवारी सायंकाळी आरबीआयने निर्बंध आणल्याने प्रत्येक खात्यावरुन सभासद व ग्राहकांना पाच हजार रुपये काढण्याची परवानगी दिली आहे. त्यामुळे गोकुळच्या कर्मचाऱ्यांचा पगार कसा होणार याची चर्चा सुरु झाली. सोमवारी सकाळी महाडिक यांनी गोकुळच्या संचालक व अधिकाऱ्यांची बैठक घेऊन वीरशैव बँकेत कर्मचाऱ्यांच्या पगारासाठी नवीन खाते काढले. कर्मचाऱ्यांचा दोन कोटी रुपयांचा पगार खात्यावर जमा केल्याने यूथ बँकेवर संकट दूर केले.

दरम्यान, कोंडाओळ येथील बँकेच्या मुख्य कार्यालयात सकाळपासून संचालक अरुण नरके, अरुण भोसले, विश्वास जाधव आणि अधिकारी उपस्थित होते. बँकेच्या पिग्मी एजंटांना ग्राहकांकडून पैसे जमा करु नये अशी सूचना केली. तसेच बँकेला भेट देणाऱ्या सभासद आणि ग्राहकांना संचालक व अधिकाऱ्यांनी दिलासा दिला. बँकेचे व्यवस्थापक तोडकर व अन्य अधिकारी तातडीने दिल्ली येथे रवाना झाले असून त्यांनी रिझर्व्ह बँकेच्या अधिकाऱ्यांची भेट घेतली. त्यांच्यासमवेत राज्य सहकारी बँकेचे अध्यक्ष आणि राज्य नागरी बँकेचे अध्यक्ष विद्याधर अनास्कर होते. बँकेच्या एनपीएत वाढ झाली असल्याने बँकेचे भागभांडवल आणि कर्ज वसुली केल्यानंतर एक ते दीड महिन्यात निर्बंध उठवण्यासाठी पावले उचलली जातील, असे स्पष्ट केले आहे.

बँकेला गेली अडीच वर्षे कर्ज देण्यास आरबीआयने निर्बंध आणले आहेत. या कालावधीत बँकेने कर्जाची वसुली १०८ कोटीवरुन ३८ कोटीवर आणली आहे. तसेच १५० कोटींच्या ठेवी आहेत. बँकेचे १७ हजार सभासद आहेत. निवडक सभासदांकडून दोन ते अडीच कोटीचे भाग भांडवल वाढवण्यासाठी संचालक मंडळ प्रयत्न सुरु करणार आहे. तसेच ३८ कोटी कर्जापैकी दीड महिन्यात अडीच ते तीन कोटी रुपये वसुली झाल्यास बँकेवरील आर्थिक निर्बंध उठतील, असा विश्वास संचालक अरुण नरके यांनी व्यक्त केला.

कोल्हापूर

सरकारने मानधन वाढीच्या निर्णयाची अंमलबजावणी न केल्याबद्दल अंगणवाडी सेविका व मदतनीसांनी मंगळवारी व बुधवारी काम बंद आंदोलन पुकारले आहे. या आंदोनलात जिल्ह्यातील दहा हजार कर्मचारी सहभागी होणार आहेत. या आंदोलनाचा एक भाग म्हणून अंगणवाडी कर्मचारी मंगळवारी दुपारी बारा वाजता, जिल्हाधिकारी कार्यालय आणि जिल्हा परिषदेवर मोर्चा काढणार आहेत. महावीर उद्यान येथून मोर्चाला सुरूवात होणार असल्याची माहिती संयोजकांनी दिली आहे.

म. टा. प्रतिनिधी, कोल्हापूर

जिल्हा परिषदेतर्फे आयोजित महिला बचत गटांच्या उत्पादित वस्तूंच्या प्रदर्शनाला नागरिकांचा उत्स्फूर्त प्रतिसाद मिळत आहे. गेल्या तीन दिवसांत ताराराणी महोत्सवात सोळा लाख रुपयांहून अधिक उलाढाल झाली आहे. बचत गटांच्या उत्पादित वस्तू व खाद्यपदार्थ ग्राहकांच्या पसंतीस उतरत आहेत.

प्रायव्हेट हायस्कूलच्या मैदानावर प्रदर्शन सुरू आहे. प्रदर्शनात सुमारे १५० स्टॉल्स आहेत. विविध प्रकारच्या वस्तूंचे उत्पादन करणाऱ्या स्वयंसहाय्यता गटांची निवड केली आहे. प्रदर्शनामध्ये कोल्हापुरी साज, गूळ, काकवी, चप्पल, ज्वेलरी, कापडी पिशव्या, बेदाणे, हळद, कंदी पेढे, मातीची भांडी, घोंगडी, स्ट्रॉबेरी, विविध प्रकारची लोणची, पापड, लाकडी खेळण्यांचा समावेश आहे. सायंकाळच्या सत्रातील करमणुकीचे कार्यक्रमही आकर्षण ठरत आहेत. शनिवारी आणि रविवारी प्रदर्शन पाहण्यासाठी गर्दी झाली. शनिवारी दिवसभरात ३ लाख ४१ हजार तर रविवारी ९ लाख ८९ हजार रुपयांच्या वस्तूंची विक्री झाली. सोमवारी दुपारपर्यंत २ लाख ९१ हजार रुपयांची उलाढाल झाली होती. प्रदर्शन बुधवारपर्यंत (ता. ९) खुले राहणार आहे.

पुरणपोळी, भाकरी-खर्डाला पसंती

ताराराणी महोत्सवात जवळपास ५० खाद्यपदार्थांचे स्टॉल आहेत. यामध्ये मांसाहार व शाकाहार खाद्य पदार्थ्यांच्या स्टॉलचा समावेश आहे. पुरणपोळी, भाजरीची भाकरी-दही खर्डा, थालीपीठ, शेंगांच्या पोळी प्रेक्षकांच्या पसंतीस उतरल्या आहेत. ग्राहक कोल्हापुरी मिसळीसोबतच नाशिकचे मांडे याचाही आस्वाद लुटत आहेत.

अरे टाळ्या वाजवा की...

बचत गटांनी उत्पादित वस्तूना शहरी मार्केट मिळवून देण्यासाठी प्रायव्हेट हायस्कूलच्या मैदानावर महोत्सव सुरू आहे. महोत्सवाला शनिवारी सुरुवात झाली. मात्र लोकप्रतिनिधींच्या सोयीसाठी महोत्सवाचा उद्घाटन समारंभ रविवारी झाला. जिल्हा ग्रामीण विकास यंत्रणेने उद्घाटन सोहळ्याप्रसंगी कसलीही कमतरता ठेवली नव्हती. व्यासपीठाच्या सजावटीपासून सत्कारमूर्तीच्या स्वागतापर्यंतच्या जय्यत तयारीमुळे सगळे वातावरण कलरफूल बनले होते. जिल्हा परिषदेतील 'अण्णा'नी भाषणात नेटक्या नियोजनाचे कौतुक केले. मात्र कार्यक्रमावर सरकारी छाप. समारंभ रुटीनपणे सुरू होता. विविध समिती सभापतींची अनुपस्थिती नजरेत भरत होती. उपस्थित पदाधिकारी व सदस्यांची भाषणे, स्मरणिकेचे प्रकाशन झाले. सगळे काही शांतपणे. टाळ्यांचा कडकडाट सुद्धा नाही. व्यासपीठावरील गट नेते व ज्येष्ठ सदस्यांच्या नजरेत हा प्रकार आला. आणि त्यांनी समोर पाहत अधिकारवाणीने सांगितले की, 'अरे आपलाच कार्यक्रम आहे, टाळ्या तरी वाजवा. स्मरणिका प्रकाशन झालय म्हणून.' मग क्षणार्धात उपस्थितांनी टाळ्यांचा कडकडाट केला. मात्र उपस्थितात चर्चा रंगली की कर्मचाऱ्यांना टाळ्या वाजवा हे सुद्धा सांगावे लागतंय याची.

आप्पासाहेब माळी

गारगोटी : कुर (ता. भुदरगड) येथील कल्पना संभाजी कुंभार यांच्या पोल्ट्रीतील गिरीराज जातीच्या तीनशे कोंबड्या अज्ञात चोरट्यांनी चोरून नेल्या. याबाबतची भुदरगड पोलिसांत फिर्याद दिली. कुर येथील वेदगंगा नदीवरील पुलानाजीक कुंभार यांचे बंदिस्त गावरान कुक्कुटपालनाचे शेड आहे. शेडमध्ये गिरीराज आणि देशी सुमारे तीनशे कोंबड्या होत्या. रविवारी रात्री दहा वाजता कल्पना यांचे पती संभाजी कुंभार हे कोंबड्याना खाद्य व पाणी घालून दाराला कुलूप लावून घरी आले. रात्री शेडवर कोणी नसल्याचे पाहून अज्ञात चोरट्यांनी मागील बाजूची जाळी उचकटून आत प्रवेश केला. गारगोटी-कोल्हापूर मार्गालगतच्या या शेडमधून चोरट्याने चारचाकी वाहानातून ट्रेमध्ये भरून हे पक्षी पळवले.

म. टा. प्रतिनिधी, कोल्हापूर

कोल्हापूर लोकसभा निवडणुकीसाठी इच्छुक आमदार हसन मुश्रीफ यांनी 'उमेदवार कोण? या विषयाला पूर्णविराम दिला आहे' असे सोमवारी सांगितले. 'राष्ट्रवादी काँग्रेस पक्ष व खासदार शरद पवार उमेदवाराची घोषणा करतील. त्याच उमेदवाराच्या पाठिशी राहून हाडाची काडं आणि रक्ताचे पाणी करून त्याला निवडून आणू,' असेही त्यांनी स्पष्ट केले. ताराबाई पार्कातील राष्ट्रवादी काँग्रेस पक्षाच्या कार्यालयात पक्षातर्फे राज्यभर काढण्यात येणाऱ्या निर्धार परिवर्तन यात्रेच्या नियोजन बैठकीत त्यांनी भूमिका स्पष्ट केली.

बैठकीत आमदार मुश्रीफ म्हणाले, 'मुंबईत पक्षप्रमुख शरद पवार यांनी कार्यकर्त्यांची बैठक घेतली होती. काँग्रेस व राष्ट्रवादीची आघाडी झाली असून कोल्हापूर व हातकणंगले हे लोकसभा मतदारसंघ राष्ट्रवादीकडे आहेत. हातकणंगलेची जागा मित्रपक्षाला देण्यात आली असून कोल्हापूरची जागा राष्ट्रवादीकडे आहे. राष्ट्रवादीचा उमेदवार कोण या विषयाला पूर्णविराम दिला आहे. पक्षात मतभेद, उकाळ्या-पाकाळ्या होत असतात. पण, ज्यावेळी पक्षाकडून उमेदवाराची घोषणा होईल, त्याला निवडून आणण्याचा चंग बांधला जाईल.'

जिल्हाध्यक्ष ए. वाय. पाटील यांनी भाजप सरकारला हद्दपार करा, असे आवाहन केली. सरचिटणीस अनिल साळोखे यांनी प्रास्ताविक केले. शहराध्यक्ष आर. के. पोवार यांनी आभार मानले. महापौर सरिता मोरे, बाजार समितीच्या उपाध्यक्षा संगिता पाटील, जिल्हा महिलाध्यक्षा संगीता खाडे, शहराध्यक्षा जहिदा मुजावर, जिल्हा परिषदेचे माजी अध्यक्ष नानासाहेब गाठ, माजी नगरसेवक राजेश लाटकर आदी पदाधिकारी उपस्थित होते.

पालकमंत्र्यांची हत्तीवरुन मिरवणूक काढणार

'सरकारमध्ये सहभागी होऊन सरकारने कर्जमाफी केली नाही. राम मंदिर बांधले नाही, असे म्हणणारे उद्धव ठाकरे धाडसी असल्याचे सांगत आमदार मुश्रीफ यांनी त्यांचे कौतुक केले. पालकमंत्र्यांवर टीका करताना मुश्रीफ म्हणाले, 'मंत्रिमंडळात एखादा निर्णय जाहीर होण्यापूर्वी पालकमंत्री चंद्रकांत पाटील घोषणा करतात. ऑगस्ट व सप्टेंबर महिन्यात शेतकऱ्यांकडे पैसे असतात, असा शोध पालकमंत्र्यांनी लावला आहे. शेतकऱ्यांनी बँकेत १० ते ५० हजार रुपये भरल्यास १९ टक्के व्याज दिले जाईल. शेतकऱ्यांना तीन हजार रुपये पेन्शन देण्यात येईल, अशी घोषणा त्यांनी केली आहे. एकीकडे पैसे नसल्याने शेतकरी कर्ज काढतात आणि दुसरीकडे पालकमंत्री शेतकऱ्यांना १० हजार रुपये बँकेत भरल्यास व्याज देण्याची घोषणा करतात. पालकमंत्र्यांनी जिल्ह्यातील सर्व शेतकऱ्यांची पेन्शन योजनेसाठी रक्कम भरली तर त्यांची हत्तीवरुन मिरवणूक काढली जाईल' अशी घोषणा मुश्रीफ यांनी केली.

२७ तारखेला परिवर्तन यात्रा कोल्हापूर

राष्ट्रवादी काँग्रेसच्या निर्धार परिवर्तन यात्रेला १० जानेवारीला रायगड येथे प्रारंभ होणार आहे. २७ तारखेला यात्रा कोल्हापुरात येणार आहे. प्रदेशाध्यक्ष जयंत पाटील, माजी उपमुख्यमंत्री अजित पवार यांच्या उपस्थितीत त्यादिवशी गडहिंग्लज, मुदाळतिट्टा, कोल्हापूर शहर आणि शिरोळ येथे जाहीर सभा होणार आहेत. सभा यशस्वी करण्यासाठी पदाधिकाऱ्यांनी नियोजन करण्याचे आवाहन मुश्रीफ यांनी बैठकीत केले.

००००००००००००

(मूळ कॉपी)

'लोकसभे'ला पक्षाच्या उमेदवाराच्या पाठीशी,

आमदार हसन मुश्रीफ

म. टा. प्रतिनिधी, कोल्हापूर

कोल्हापूर लोकसभा निवडणूकीसाठी इच्छुक असलेल्या आमदार हसन मुश्रीफ यांनी उमेदवार कोण या विषयाला फुलस्टॉप दिल्याची घोषणा केली. राष्ट्रवादी काँग्रेस पक्ष व खासदार शरद पवार उमेदवाराची घोषणा करणार असून त्या उमेदवाराच्या पाठिशी राहत हाडाची काडं आणि रक्ताचे पाणी करुन पक्षाचा उमेदवार निवडून आणला जाईल, असेही त्यांनी स्पष्ट केले.

ताराबाई पार्क येथील राष्ट्रवादी काँग्रेस पक्षाच्यावतीने राज्यभर काढण्यात येणाऱ्या निर्धार परिवर्तन यात्रेच्या नियोजन बैठकीत त्यांनी आपली भूमिका स्पष्ट केली. यावेळी महापौर सरिता मोरे, बाजार समितीच्या उपाध्यक्षा संगीत पाटील यांची प्रमुख उपस्थिती होती. बैठकीत बोलताना मुश्रीफ म्हणाले, मुंबईत पक्षप्रमुख शरद पवार यांनी राष्ट्रवादीची बैठक घेतली होती. काँग्रेस व राष्ट्रवादीची आघाडी झाली असून कोल्हापूर व हातकणंगले हे लोकसभा मतदार संघ राष्ट्रवादीकडे आहेत. हातकणंगलेची जागा मित्र पक्षाला देण्यात आली असून कोल्हापूरची जागा राष्ट्रवादीकडे आहे. राष्ट्रवादीचा उमेदवार कोण या विषयाला फुलस्टॉप दिला आहे. पक्षात मतभेद, उखाळ्या पाखाळ्या होत असतात. पण ज्यावेळी पक्षाकडून उमेदवारीची घोषणा झाल्यावर त्याला निवडून आणण्यासाठी चंग बांधला जाईल.

जिल्हाध्यक्ष ए.वाय. पाटील यांनी भाजप सरकारला हद्दपार करा, असे आवाहन यावेळी केली. सरचिटणीस अनिल साळोखे यांनी प्रास्ताविक केले तर शहराध्यक्ष आर.के. पोवार यांनी आभार मानले. यावेळी जिल्हा महिला अध्यक्षा संगीता खाडे, शहराध्यक्षा जहिदा मुजावर, जिल्हा परिषदेचे माजी अध्यक्ष नानासाहेब गाठ, माजी नगरसेवक राजेश लाटकर आदी पदाधिकारी उपस्थित होते.

०००००००

पालकमंत्र्यांची हत्तीवरुन मिरवणूक काढणार

मंत्रीमंडळात एखादा निर्णय जाहीर होण्यापूर्वी पालकमंत्री चंद्रकांत पाटील घोषणा करतात. ऑगस्ट व सप्टेंबर महिन्यात शेतकऱ्यांकडे पैसे असतात असा शोध पालकमंत्र्यांनी लावला आहे. १० ते ५० हजार रुपये शेतकऱ्यांनी बँकेत भरल्यास १९ टक्के व्याज दिले जाईल. तसेच शेतकऱ्यांना तीन हजार रुपये पेन्शन देण्यात येईल, अशी घोषणा त्यांनी केली आहे. एकीकडे शेतकऱ्यांकडे पैसे नसताना कर्ज काढतात. आणी दुसरीकडे पालकमंत्री शेतकऱ्यांना १० हजार रुपये भरल्यावर व्याज देण्याची घोषणा करतात. पालकमंत्र्यांनी जिल्ह्यातील सर्व शेतकऱ्यांची रक्कम भरली तर त्यांची हत्तीवरुन मिरवणूक काढली जाईल अशी घोषणा मुश्रीफ यांनी केली. सरकारमध्ये सहभागी होऊन सरकारने कर्जमाफी केली नाही. राम मंदिर बांधले नाही, असे म्हणणारे उद्धव ठाकरे धाडसी असल्याचे मुश्रीफ यांनी कौतुक केले.

०००००००

२७ तारखेला परिवर्तन यात्रा कोल्हापूर

१० जानेवारीला रायगड येथील निर्धार परिवर्तन यात्रेस प्रारंभ होणार असून २७ तारखेला यात्रा कोल्हापूरात येणार आहे. प्रदेशाध्यक्ष जयंत पाटील, माजी उप मुख्यमंत्री अजित पवार यांच्या उपस्थितीत त्या दिवशी गडहिंग्लज, मुदाळतिट्टा, कोल्हापूर शहर आणि शिरोळ येथे जाहीर सभा होणार आहेत. सभा यशस्वी करण्यासाठी पदाधिकाऱ्यांनी नियोजन करण्याचे आवाहन मुश्रीफ यांनी बैठकीत केले.

म. टा. वृत्तसेवा, जयसिंगपूर

नृसिंहवाडीत दत्त मंदिरात दुपारी बारा वाजता श्री नृसिंहसरस्वती स्वामी महाराजांचा जन्मकाळ सोहळा संपन्न झाला. यावेळी दर्शनासाठी भाविकांनी मोठी गर्दी केली होती.

गेले सात दिवस चालू असलेल्या जन्मोत्सव सोहळ्यात दत्त देव संस्थानच्यावतीने धार्मिक कार्यक्रमांचे आयोजन केले होते. कृष्णा-पंचगंगा नदीच्या संगमावर नृसिंहसरस्वती स्वामी महाराजांनी बारा वर्षे तपश्‍चर्या करून 'मनोहर पादुकांची' स्थापना केल्याने त्यांच्या तपसाधनेनेच गावाला नृसिंहवाडी हे नाव मिळाले. यामुळे या जन्मोत्सवास येथे महत्व आहे. दत्त मंदिरात पहाटे पाच वाजता काकड आरती व षोडशोपचार पूजा झाली. यानंतर श्रींच्या चरणावर रुद्राभिषेक करण्यात आला. उत्सवकाळात सुरू असलेल्या गुरुचरित्र पारायणाची सांगता करण्यात आली. सकाळी अकरा वाजता वेदमूर्ती दिलीपशास्त्री उपाध्ये यांचे पुराण व दुपारी बारा वाजता 'श्री गुरुदेव दत्त' च्या गजरात नृसिंह सरस्वती स्वामी महाराजांचा जन्मकाळ सोहळा साजरा झाला. भाविकांनी आकर्षक फुलांनी सजविलेल्या श्रींच्या चांदीच्या पाळण्यावर अबिर, गुलाल व फुलांची मुक्त हस्ताने उधळण केली. दतात्रय पुजारी यांनी श्रींची विधिवत पूजा केली. ब्रम्हवृंदांनी पाळणा म्हटला आणि प्रार्थना केली. भक्तांना सुंठवडा वाटप करण्यात आला. सायंकाळी पाच वाजता पुण्याचे हर्षदबुवा जोगळेकर यांचे कीर्तन व रात्री साडेसात वाजता धूप, दीप, आरती झाली. पालखी सोहळा होऊन रात्री दहा वाजता शेजारती करण्यात आली.

फोटो :

नृसिंहवाडी येथील दत्त मंदिरात नृसिंहसरस्वती स्वामी महाराज जन्मकाळ सोहळ्यावेळी हजारो भाविकांनी गर्दी केली.

म. टा. प्रतिनिधी, कोल्हापूर

राजर्षी शाहू महाराज यांच्या समाधीस्थळाच्या लोकार्पण सोहळ्यासाठी काँग्रेसचे अध्यक्ष राहुल गांधी व राष्ट्रवादीचे अध्यक्ष शरद पवार यांना आमंत्रित करण्याच्या हालचाली सुरू आहेत. काँग्रेसच्या पातळीवर गांधी यांच्यासाठी प्रयत्न सुरू आहेत तर राष्ट्रवादीचे नेते व महापालिकेतील पदाधिकारी पवार यांच्याशी संपर्क साधत आहेत. राष्ट्रवादीच्या मंडळींनी पवारांना कार्यक्रमाला उपस्थित राहण्याबाबत पत्र दिले आहे. शिवाय येत्या शनिवारी पवार कोल्हापूर दौऱ्यावर आहेत. याप्रसंगी त्यांची भेट घेऊन कार्यक्रमाची तारीख व वेळ निश्चित करण्यासाठी पदाधिकारी व नगरसेवक भेटणार आहेत.

काँग्रेस व राष्ट्रवादी काँग्रेसची महापालिकेत सत्ता आहे. महापालिकेच्या स्वनिधीतून नर्सरी बागेत राजर्षी शाहू महाराज यांच्या समाधीस्थळाचे काम विकसित करण्यात येत आहे. समाधीस्थळाचे काम अंतिम टप्प्यात आहे. दरम्यान, सोमवारी महापालिकेत झालेल्या बैठकीत महापौर सरिता मोरे यांनी समाधीस्थळ परिसरातील विकासकामासाठी आणखी ७५ लाख रुपयांच्या कामाची निविदा लवकर काढावी, अशी सूचना अधिकाऱ्यांना केली. याप्रसंगी शहर अभियंता नेत्रदीप सरनोबत यांनी शाहू समाधीस्थळ मेघडंबरी लोकार्पण सोहळ्यापूर्वी समाधीस्थळ ते मुख्य प्रवेशद्वारापर्यंत पाथवे, लॅण्डस्केपिंग, लाइट इफेक्टस, लॉनच्या कामाचे अंदाजपत्रक तयार केल्याचे सांगितले.

चर्चेत गटनेते शारंगधर देशमुख, मराठा महासंघाचे जिल्हाध्यक्ष वसंत मुळीक, इतिहास अभ्यासक इंद्रजित सावंत यांनीही सूचना केल्या. बैठकीला सभापती अशोक जाधव, सुरेखा शहा, सभागृह नेता दिलीप पोवार, विरोधी पक्ष नेता विलास वास्कर, नगरसेविका माधवी गवंडी, ठेकेदार व्ही.के.पाटील, रियाज सुभेदार आदी उपस्थित होते.

.......

बुधवारी विशेष सभा

शाहू समाधीस्थळासाठी बजेटमध्ये तरतूद करण्यासाठी बुधवारी (ता.९) विशेष सभा बोलावली आहे. यामध्ये ७५ लाख रुपयांचा ठराव मंजूर झाल्यावर महापौरांच्या स्वाक्षरीने तातडीने ठराव प्रशासनाला पाठविला जाणार आहे. यासंदर्भात उपमहापौर भूपाल शेटे म्हणाले, 'प्रशासनाने दोन दिवसात निविदा प्रक्रिया राबवावी. तसेच समाधीस्थळाच्या सविस्तर प्रकल्प आराखड्यानुसार उर्वरित कामाच्या आवश्यक निधीसाठी तातडीने जिल्हा नियोजन समितीला प्रस्ताव सादर करावा, अशी सूचना प्रशासनाला केली आहे.'

कोल्हापूर

महापालिकेतर्फे आयोजित लोकशाही दिनामध्ये नागरिकांनी नगरररचना विभागाच्या कामकाजाविरोधात तक्रारींचा पाढा वाचला. लोकशाही दिनात दाखल बारा पैकी सात तक्रारी या नगररचना विभागांशी संबंधित आहेत. अतिक्रमण विभाागाशी निगडीत दोन व विभागीय कार्यालयाशी निगडीत प्रत्येकी एक तक्रार आहे. आयुक्त अभिजित चौधरी यांनी या तक्रारींची तातडीने सोडवणूक करावी, अशी सूचना अधिकाऱ्यांना केली.

कोल्हापूर टाइम्स टीम

मकरसंक्रांतीसाठी मागणी वाढल्याने तिळाच्या दर प्रतिकिलो २० रुपयांनी वाढले आहेत. गेल्या दीड महिन्यांत तिळाच्या दरात प्रतिकिलो ६० ते ८० रुपयांनी वाढ झाली आहे. पोह्याच्या दरात चार रुपयांनी वाढ झाली असून धान्य व कडधान्याचे दर स्थिर आहेत.

पुढील आठवड्यात भोगी, मकर सक्रांत, किक्रांत हे सण आहेत. सणाच्या कालावधीत तिळाचा वापर स्वयंपाक व गोड पदार्थात केला जातो. बाजरीच्या भाकरी, तिळगूळ, तिळाची वडीमध्ये तिळाचा वापर केला. त्यामुळे तिळाची मागणी वाढल्याने प्रतिकिलो वीस रुपयांनी दरवाढ झाली आहे. तिळाचा दर प्रतिकिलो २०० रुपयांवर पोचला आहे. गुळाचा दर स्थिर असला तरी सेंद्रीय गुळाच्या दरात पाच रुपयांनी वाढ झाली आहे. प्रतिकिलो ५५ रुपयांनी सेंद्रिय गुळाची विक्री होत आहे. धान्य व कडधान्याचे दर स्थिर असले तरी चवळीच्या दरात प्रतिकिलो आठ रुपयांनी वाढ झाली. चवळीचा दर प्रतिकिलो ७२ रुपयांवरुन ८० रुपयावर पोचला आहे.

किराणा दर (प्रतिकलो, रुपयांत)

पोहे : ४५ ते ४८ रु.

साखर : ३४ ते ३६ रु.

शेंगदाणा : ९० ते १०० रु.

मैदा : ३० रु.

आटा : ३२ रु.

रवा : ३२ रु.

गूळ : ५० ते ५५ रु.

शाबूदाणा : ५६ रु.

वरी : ७२ ते ८० रु.

डाळीचे दर (प्रतिकिलो रुपयांत)

तूरडाळ : ७० ते ७६ रु.

मूगडाळ: ८४ ते ८८ रु.

उडीद डाळ: ८० ते ८४ रु.

हरभरा डाळ : ७० ७२ रु.

मसूर डाळ : ६० ते ६४ रु.

मसूर: ७० ते १२० रु.

चवळी : ८०रु.

हिरवा वाटाणा : ९० ते ९६ रु.

काळा वाटाणा: ६० ते ६४ रु.

पांढरा वाटाणा : ५६ रु.

मटकी: ८० ते १०० रु.

छोले : ८० ते १०० रु.

ज्वारी दर (प्रतिकिलो, रुपयांत)

बार्शी शाळू : ४० ते ५० रु.

गहू : २८ ते ३४ रु.

हायब्रीड ज्वारी :२८ ते ३० रु.

बाजरी : २८ रु.

नाचणी : ३६ रु.

तेलाचे दर (प्रतिकलो, रुपयांत)

शेंगतेल : १२५ रु.

सरकी तेल: ८६ ते ८८ रु.

खोबरेल : १८० ते २२० रु.

सूर्यफूल: ९० ते १०५ रु.

मसाले दर (प्रतिकलो, रुपयांत)

तीळ : २०० रु.

जिरे : २८० रु.

खसखस : ७०० रु.

खोबरे : १८० ते २०० रु.

वेलदोडे : २००० रु.

कोल्हापूर टाइम्स टीम

'नोंदणी व मुद्रांक विभागाचा सर्व्हर सेटअप खासगी संस्थेकडे स्थलांतरित करण्याची कार्यवाही सुरू असल्याने पुढील सात दिवस सर्व्हर डाऊन राहणार आहे. डाटा स्थलांतरित होण्यास काही कालावधी लागणार आहे. यामुळे कबुलीजबाबासाठी प्रलंबित आणि मुदत संपुष्टात येत असलेल्या दस्तांबाबत पक्षकारांनी कबुलीजबाब, दस्ताची नोंदणी पूर्ण करुन घ्यावीत,' असे आवाहन सह जिल्हा निबंधक तथा मुद्रांक जिल्हाधिकारी सुंदर जाधव यांनी प्रसिद्धी पत्रकातून केली.

सरकारच्या धोरणानुसार सर्व्हर सेटअप, त्यातील प्रणालीसह खासगी संस्थेकडे देण्यात येत आहे. डाटा स्थलांतरित होण्यास कमीत कमी तीन ते सात दिवस वेळ लागणार आहे. दस्त नोंदणी प्रक्रियेवेळी ई-चलने पास न होणे, सर्व्हर संथगतीने सुरू असणे, आय-सरिता प्रणालीशी जोडलेली ई-म्युटेशन प्रणाली, ग्रास प्रणाली सुरळीत नसणे आदी अडचणी येण्याची शक्यता आहे. तरी दस्त नोंदणीसाठी येणाऱ्या पक्षकारांनी संयम राखून सहकार्य करावे, असे पत्रकात म्हटले आहे.