इच्छुकांच्या मोर्चेबांधणीला वेग

म. टा. प्रतिनिधी, कोल्हापूर

जिल्हा दूध उत्पादक संघाच्या (गोकुळ) अध्यक्षपदाच्या निवडीसाठी आज, सोमवारी तारीख निश्चित होणार आहे. १४ किंवा १५ जानेवारीला निवडणूक कार्यक्रम जाहीर होणार आहे. दरम्यान, अध्यक्षपदासाठी इच्छुक असलेल्या संचालकांनी मोर्चेबांधणी सुरु केली आहे.

जिल्हा दूध उत्पादक संघाच्या (गोकुळ) नूतन अध्यक्ष निवडीसाठी सहकार प्राधिकरणाने सहायक दुग्ध विकास अधिकारी डॉ. गजेंद्र देशमुख यांची निवडणूक निर्णय अधिकारी म्हणून नियुक्ती केली आहे. देशमुख यांनी गोकुळचे कार्यकारी संचालक डी. व्ही. घाणेकर यांना अध्यक्षपदासाठी निवडणूक कार्यक्रम तयार करण्याचे आदेश दिले आहेत. सोमवारी गोकुळ प्रशासन निवडणूक तारखेबाबत देशमुखांना कळवणार आहे. १४ किंवा १५ जानेवारीला अध्यक्ष निवडीसाठी बैठक घेण्याची शक्यता आहे.

अध्यक्षपदासाठी ज्येष्ठांना संधी मिळणार की नवीन चेहऱ्याला संधी मिळणार हे माजी आमदार महादेवराव महाडिक व पी.एन. पाटील हे ठरवणार आहे. इच्छुकांची त्यासाठी मोर्चेबांधणी सुरु झाली आहे. रविवारी पी.एन. पाटील यांच्या वाढदिवसादिवशी बहुतांशी संचालकांनी शुभेच्छा देण्यासाठी गर्दी केली होती. पी.एन. यांच्या गटातील विश्वास पाटील हे गेले पावणेचार वर्षे अध्यक्ष होते. त्यामुळे यावेळी महाडिक गटाला संधी मिळावी यासाठी त्यांच्या गटाकडून मागणी होण्याची शक्यता आहे. विश्वास पाटील जरी पी.एन. गटातील असले तरी महाडिक यांच्याशी त्यांची जवळीक होती. महाडिक व पी.एन. या दोन्ही नेत्यांना जवळ असलेल्या संचालकांच्या गळ्यात अध्यक्षपदाची माळ पडणार आहे. रविंद्र आपटे, अरुण डोंगळे, रणजितसिंह पाटील, धैर्यशील देसाई, पी.डी. धुंदरे, बाळासाहेब खाडे यांची नावे चर्चेत आहेत. निवडणूक कार्यक्रम जाहीर झाल्यानंतर अध्यक्षपदासाठी वेगवान घडामोडी होण्याची शक्यता आहे.

लोगो : खांडेकर स्मृती व्याख्यानमाला

फोटो आहे..

म. टा. प्रतिनिधी, कोल्हापूर

'आयुष्यातील प्रत्येक क्षण महत्त्वाचा आहे. जीवन आनंददायी बनविण्यासाठी स्वत:साठी, कुटुंब व समाजासाठी आणि आपण ज्या क्षेत्रात काम करतो त्यासाठी हमखास वेळ काढा. वेळेच्या या त्रिसूत्रीची सांगड घातली तर जीवनातील कटकटी संपतील. महत्त्वाचे म्हणजे, कुटुंबावर प्रेम करत आहात तर निरोगी आयुष्य जगा,'असा सल्ला प्रा. डी. यू. पवार यांनी दिला.

करवीर नगर वाचन मंदिरतर्फे ज्ञानपीठ पुरस्कार विजेते लेखक व पद्मभूषण वि. स. खांडेकर स्मृती व्याख्यानमालेचे पहिले पुष्फ गुंफताना ते बोलत होते. 'प्रत्येक क्षण आनंदाचा' हा त्यांच्या व्याख्यानाचा विषय होता. संस्थेचे उपकार्याध्यक्ष नंदकुमार मराठे कार्यक्रमाच्या अध्यक्षस्थानी होते. कार्यक्रम विश्वनाथ पार्वत गोखले सभागृहात झाला.

दैनंदिन जीवनातील दाखले देत त्यांनी आनंददायी जीवनाची संकल्पना मांडली. पवार म्हणाले, 'अलीकडे आनंदाच्या कल्पना बदलल्या आहेत. मात्र, बदललेल्या कल्पना दुरुस्त करता येऊ शकतात. दिवसातील २४ तासांत ८४ हजार ६०० सेकंद असतात. त्या प्रत्येक सेकंदाचा हिशेब मांडायला हवा. मैत्री आणि प्रेम करायला वयाची मर्यादा नसते. मुळात प्रेमाकडे मर्यादित अर्थाने व संकुचित नजरेने पाहू नये. एकमेकांच्या सुख-दु:खात सहभागी होणे, अडचणीच्या वेळी मदतीचा हात देणे हा प्रेमाचा आविष्कार असतो. आयुष्यात साहित्य व ग्रंथालयाने महत्त्व अनन्यसाधारण आहे. जगण्याला ऊर्मी आणि जीवनात आनंद निर्माण करण्याचे बळ त्यामध्ये आहे.'

संस्थेचे कार्यवाह सतीश कुलकर्णी यांनी प्रास्ताविक केले. प्रा. डॉ. रमेश जाधव यांनी पाहुण्यांचा परिचय करून दिला. गिरीजा गोडे यांनी सूत्रसंचालन केले. संस्थेचे सहकार्यवाह अश्विनी वळिवडेकर यांनी आभार मानले. स्थायी समिती सभापती आशीष ढवळे, आशुतोष देशपांडे, प्रा. रवींद्र कुंभार यांची प्रमुख उपस्थिती होती.

०००००००

फोटो आहे...

म. टा. प्रतिनिधी, कोल्हापूर

'कोल्हापुरातील पत्रकार व त्यांच्या कुटुंबीयांसाठी वैद्यकीय विमा रूपाने सुरक्षाकवच निर्माण करण्यासाठी प्रेस क्लबने पुढाकार घ्यावा. लोकसहभागातून वैद्यकीय विमा योजना राबविताना त्यांच्या स्वप्नातील घराचा प्रश्न मार्गी लावला जाईल,' अशी ग्वाही पालकमंत्री चंद्रकांत पाटील यांनी रविवारी दिली.

कोल्हापूर प्रेस क्लबच्याव तीने शाहू स्मारक भवन येथे आयोजित केलेल्या पत्रकार दिन व उत्कृष्ट पत्रकार पुरस्कार वितरण सोहळ्यात ते बोलत होते. अध्यक्षस्थानी महापौर सरिता मोरे, तर प्रमुख पाहुणे आणि वक्ते म्हणून ज्येष्ठ पत्रकार व माजी खासदार भारतकुमार राऊत उपस्थित होते. आद्य पत्रकार 'दर्पण'कार बाळशास्त्री जांभेकर यांच्या प्रतिमेस पुष्पहार अर्पण करुन त्यांना आदरांजली वाहण्यात आली. त्यानंतर पालकमंत्री पाटील यांच्या हस्ते मुद्रित माध्यमातील उत्कृष्ट छायाचित्रकार अर्जुन टाकळकर, पत्रकार सुनील पाटील, इलेक्ट्रॉनिक माध्यमाचे पत्रकार विजय केसरकर, संदीप राजगोळकर, कॅमेरामन अभिजित पाटील यांचा राजर्षी शाहू ग्रंथ, पाच हजार रुपये व स्मृतीचिन्ह देऊन गौरव करण्यात आला. तसेच संपर्क अॅडव्हर्टायझर्सचे सुधीर शिरोडकर, मोहन कुलकर्णी, परीक्षक डॉ. शिवाजी जाधव, विजय टिपुगडे, मिलिंद यादव यांचा 'सम्राट शिवाजी' पुस्तक देऊन गौरव केला.

पालकमंत्री पाटील म्हणाले, 'कोल्हापुरात लवकरच परवडणाऱ्या घरांचा प्रकल्प हाती घेतला असून यामध्ये ५० घरे पत्रकार आणि आजी-माजी सैनिकांसाठी राखीव ठेवण्याचा मानस आहे. राज्य सरकारने जनतेच्या आरोग्याबाबत विशेष काळजी घेतली असून मुख्यमंत्री वैद्यकीय सहाय्यता कक्षामार्फत गेल्या साडेचार वर्षात १,१०० कोटी रुपये निधी दिला असून कोल्हापुरात ५० कोटी देण्यात आले आहेत.'

महापौर मोरे म्हणाल्या, 'लोकशाहीत पत्रकारांचे काम अत्यंत मोलाचे असून पत्रकार समाजहिताचे आणि समाजजागृतीचे महत्त्वपूर्ण काम करतात. आज माध्यमांमध्ये प्रचंड स्पर्धा निर्माण झाली असून या स्पर्धेच्या युगात अधिक सक्षमतेने उभे राहण्यासाठी नवनव्या गोष्टी आत्मसात कराव्यात, तसेच आधुनिकता आणि तंत्रज्ञानाचाही अवलंब करावा.'

ज्येष्ठ पत्रकार भारतकुमार राऊत म्हणाले, 'पत्रकारदिनी दुर्जनांना साथ देणार नाही, अशी शपथ घेताना आपली लेखनी व कॅमेऱ्याद्वारे समाजाचे चौकीदार बनावे. निद्रिस्त समाजाला जागे करण्यासाठी पत्रकारांनी सजग राहण्याची आवश्यकता आहे. कोणत्याही क्षेत्रापेक्षा जनसंपर्क माध्यमात वेगाने प्रगती होत असून माध्यमांना उज्ज्वल भविष्य आहे. बाळशास्त्री जांभेकर, लोकमान्य टिळक यांच्यासह अन्य महापुरुषाच्या पत्रकारितेचा वारसा सांगताना आपल्यामध्ये तेवढी प्रगल्भता आहे का?, असा स्वत:ला प्रश्न विचारून अशी प्रगल्भता असेल तर समाजाच्या जाणिवांचा चौकदार बनू शकतो, त्यासाठी प्रभळ इच्छाशक्तीची आवश्यकता आहे.'

पुरस्कार गौरव समारंभास निवासी उपजिल्हाधकारी संजय शिंदे, प्रांताधिकारी सचिन इथापे, कार्याध्यक्ष सदानंद पाटील, सचिव बाळासाहेब पाटील यांच्यासह विविध वृत्तपत्रांचे संपादक, ज्येष्ठ पत्रकार उपस्थित होते. प्रेस क्लबचे अध्यक्ष विजय पाटील यांनी प्रास्ताविक केले. जयश्री देसाई यांनी सूत्रसंचालन केले. उपाध्यक्ष समीर मुजावर यांनी आभार मानले.

कोल्हापूर : शिवाजी विद्यापीठातील आजीवन अध्ययन व निरंत शिक्षण विभागामार्फत नोव्हेंबर २०१८ मध्ये घेतलेल्या 'योग व निसर्गोपचार' या अभ्यासक्रमाचा निकाल जाहीर झाला आहे. या परीक्षेत पंडित प्रदीप कुलकर्णी यांनी ६३ टक्के गुण मिळवत प्रथम श्रेणीत उत्तीर्ण झाले.

कोल्हापूर टाइम्स टीम

पान, तंबाखू, गुटखा, शिगारेट व्यसनाविरोधात जनस्वास्थ दक्षता समितीच्या पुढाकाराने शुक्रवारी येथील दसरा चौकात शहरातील डीएड कॉलेजच्या विद्यार्थ्यांनी जागृतीसाठी मानवी साखळी केली. जिल्ह्यातील ८५० शाळांतील विद्यार्थ्यांनीही रस्त्यावर उतरून लक्ष वेधले.

दक्षता समितीतर्फे व्यसनविरोधी सप्ताह साजरा केला जात आहे. या अभियानतर्गंत दसरा चौक, भवानी मंडप, खरी कॉर्नर, महाव्दार रोड, साने गुरूजी रोडवर राजारामपुरीत पेटाळा, सेंन्ट झेविअर्स, दादासाहेब मगदूम डीएड तर साई आणि हरिअर हायस्कूलचे विद्यार्थी सायंकाळी ४ ते ५ या वेळेत रस्त्यावर उतरले. व्यसनविरोधी फलक हातात धरून जागृती केली. दक्षता समितीचे अध्यक्ष दीपक देवलापुरकर, प्रकार मायदेव, शामराव कांबळे, लतिफ शेख, प्रफुल्ल वर्धमाने, अनुराधा मधाळे यांच्यासह शिक्षक, विद्यार्थी सहभागी झाले होते. दरम्यान, वसंतराव जयवंतराव देशमुख प्रायमरी इंग्लिश स्कूलमध्ये पोस्टर प्रदर्शनाचे आयोजन केले होते. शिक्षक प्रमोद गंधवाले यांनी व्यसनामुळे होणाऱ्या आरोग्यावरील दु:परिणाम सांगितले. मुख्याध्यापक रुपा पास्ते, सुरेश कांबळे, अविनाश जाधव, सारीका पाटील आणि विद्यार्थी उपस्थित होते.

कोल्हापूर टाइम्स टीम

'लोकशाही, निवडणूक आणि सुशासनाचा प्रसार करुन लोकशाही मुल्ये रुजवण्यासाठी राज्य निवडणूक आयोगाच्या निर्देशानुसार २६ जानेवारी ते दहा फेब्रुवारी दरम्यान लोकशाही पंधरवड्याचे आयोजन केले आहे. पंधरवड्यानिमित्त महापालिकेच्यावतीने विविध कार्यक्रमांचे आयोजन केले आहे' अशी माहिती उपायुक्त मंगेश शिंदे यांनी दिली.

उपायुक्त शिंदे म्हणाले, 'निवडणूक प्रक्रियेमध्ये जास्तीतजास्त युवकांनी सहभाग घेण्यासाठी लोकशाही पंधरावड्याचे आयोजन केले असून प्रजासत्ताक दिनापासून कार्यक्रमाला सुरुवात होणार आहे. ध्वजारोहणानंतर नवमतदारांना इपीक कार्डांचे वितरण महापौर सरिता मोरे यांच्या हस्ते होईल. तसेच जनजागृतीसाठी शहरात ३० ठिकाणी जाहिरात फलक लावण्यात येणार आहेत. शंभर टक्के मतदान हीच लोकशाहीची शान या घोषवाक्यावर प्राथमिक, माध्यमिक शाहा व कॉलेजमध्ये निबंध व चित्रकला स्पर्धा घेण्यात येणार आहे. ३१ जानेवारी रोजी लोकशाही व निवडणूक याविषयी प्रबोधन करण्यासाठी विद्यार्थ्यांची रॅली काढण्यात येणार आहे. २८ जानेवारी ते चार फेब्रुवारी दरम्यान विविध कॉलेजमध्ये महापालिकेच्या विभागांची माहिती दिली जाईल. कोल्हापूर प्रेस क्लबच्यावतीने खुल्या चर्चासत्राचे आयोजन केले असून चर्चासत्रात शिवाजी विद्यापीठ व केएमसी कॉलेजचे प्राध्यापक सहभागी होणार आहेत.'

पत्रकार परिषदेस नगरसचिव दिवाकर कारंडे, विजय वणकुंद्रे, मोहन सूर्यवंशी आदी उपस्थित होते.

कोल्हापूर टाइम्स टीम

रोप क्लायंबिंगपासून दोरी उड्या, अॅबस्टॅकलचा थरार, साथीला ढोल-ताशांचा निनाद, आजुबाजूला सायकलिंगचा आनंद घेणारी मुले, नागरिक असे वातावरण हॉकी स्टेडियम ते आयटी पार्कच्या रस्त्यावर रविवारी सकाळी होते. 'महाराष्ट्र टाइम्स'तर्फे आयोजित 'हॅपी स्ट्रीट'मध्ये आबालवृद्धांनी वेगळ्या वातावरणाने संडे 'हॅपी' केला. बोचऱ्या थंडीतही बालपणीच्या हरवलेल्या खेळांपासून ते कलागुणांपर्यंतच आविष्कार फुलवत तब्बल तीन तास कुटुंबीयांसमवेत उपस्थितांनी धमाल केली. गुलाबी थंडीमुळे स्वेटर, कानटोपी असे उबदार कपडे घालून आलेल्या 'मटा'च्या वाचकांनी रविवारची सकाळ आनंददायी केली.

नववर्षाच्या पहिल्या रविवारी 'मटा'च्या हॅपी स्ट्रीट उपक्रमाला सुरुवात होते. महिन्यातील चारही रविवारी रस्त्यावर उतरून धमाल करण्याची संधी कोल्हापूरकरांना असते. आजच्या पहिल्याच हॅपी स्ट्रीटमध्ये गुलाबी थंडी आणि धुक्याची दुलई बाजुला सारत सकाळी पावणेसात वाजल्यापासूनच हॉकी स्टेडियम रस्त्यावर युवकांसह ज्येष्ठ नागरिक दाखल झाले. अनेकांनी सहकुटुंब हॅपी स्ट्रीट गाठला. डिजेच्या तालावर युवकांनी एकच ठेका धरल्यानंतर रस्त्यावरील पारंपरिक आणि आठवणीत हरवलेल्या खेळांना सुरुवात झाली.

नृत्य, गाण्यांची मजा घेत असताना अनेकजण साहसी प्रात्यक्षिके, सायकल राइड, जुन्या खेळांमध्ये हरवून गेले होते. मोबाइल आणि सोशल मीडियाला चार हात लांब ठेवत जिबली, दोरी उड्यांचा खेळ महिला, युवतींमध्ये रंगताना दिसला. स्वत: खेळात मश्गुल होताना कुटुंबातील सर्वजण एकमेंकाची आवड जपत खेळांचा पुरेपूर आनंद घेताना दिसले. अॅबस्टॅकलमधील थरार अनुभवताना बाजुला ढोल-ताशांच्या निनादाची साथ होती. देहभान हरपून ढोल-ताशा वाजवणारी तरुणाई हे अनेकांचे आकर्षण ठरले. हरवलेले खेळ खेळण्यात तल्लीन झालेले असताना गार्डन क्लब, व्हाइट आर्मी, जिल्हा विधी सेवा प्राधिकरण आणि भारतीय भूलशास्त्र संघटनेने दिलेला प्रबोधनाचा संदेशही अनेकांसाठी महत्त्वपूर्ण ठरलला. लहान मुलांच्या गळ्यातील ताइत असलेल्या डोरेमॉनसोबत सेल्फी घेताना अनेकजण गुंग झाल्याचे दिसून येत होते. वुशू संघटनेने महिला स्वसंरक्षणाचे धडे दिले. हॅपी स्ट्रीटवर उतरलेल्या कॉलेजीयन्समध्ये टॅटू रेखाटण्यासाठी झालेली गर्दी तरुणाईचा कल दाखविणारी ठरली. सिद्धी कांबळे आणि स्वरा जाधव यांनी मांडलेल्या भातुकुलीच्या खेळात ज्येष्ठ महिलांनाही सहभाग घेतला.

फोटो : मुख्यमंत्री फडणवीस, पालकमंत्री चंद्रकांत पाटील, खासदार राजू शेट्टी

००००

मराठी मुलखात : दक्षिण महाराष्ट्र : विजय जाधव

०००

साखरेची कोंडी फोडा !

०००

कोणत्याही प्रश्नावर नाका-तोंडात पाणी गेल्याशिवाय हालचालच करायची नाही, ही राज्यकर्त्यांची जुनी सवय राज्यातील भाजप-शिवसेनेच्या महायुती सरकारलाही लागली. ऊस उत्पादक शेतकऱ्यांना त्यांच्या हक्काचा एफआरपी देण्यावरून हीच चालढकल सुरू आहे. या साखर कोंडीत राज्यातील ऊस उत्पादक शेतकरी होरपळून निघतो आहे. राज्य आणि केंद्र सरकारचा देशाच्या अन्नदात्याकडे पाहण्याचा दृष्टिकोन हाच आहे काय, असा प्रश्न विचारण्याची वेळ यामुळेच आली आहे.

०००

दरवर्षीचा साखर हंगाम, ऊस लागवडीखालील जुने-नवे क्षेत्र, गाळपाचा परवाना घेतलेले साखर कारखाने आणि अपेक्षित साखर उत्पादन या आकडेवारीची सारी जंत्री टेबलवर असूनही त्यापासून सरकारी पातळीवर कोणताच धडा घेतला जात नाही. साखरेच्या बाजारपेठेवर कोणाचे नियंत्रण नसल्याने हा प्रश्न चिघळत चालल्याचे सांगितले जाते; पण ही काही आजची स्थिती नाही. गेली दोन वर्षे साखर दिवसेंदिवस घसरत चालली असून, ती आणखी कोसळणार याचा अंदाज गेल्या हंगामाची सांगता होत असतानाच व्यक्त केला होता. मात्र, साखरेची परिस्थिती आज ना उद्या सुधारेल, मग प्रश्न आपसूकच सुटेल, या आशेवर बसलेल्या सरकार आणि कारखानदार यांच्यावर नामुष्की ओढवली आहे. यातून सरकारचा नाकर्तेपणा समोर येत आहे. स्वाभिमानीच्या ऊस परिषदेतील हवा काढून घेण्यासाठी घाईने घेतलेल्या कोडोलीच्या ऊस परिषदेत मुख्यमंत्री देवेंद्र फडणवीस यांनी साखरेचे दर ३४०० रुपये करण्यासाठी केंद्राकडे पाठपुरावा करण्याची ग्वाही देत शेतकऱ्यांसाठी सरकारची तिजोरी खुली करण्याची तयारी दाखविली होती. त्याला दोन महिने उलटून गेले, तरी त्यात दोन रुपयांचीही वाढ झालेली नाही. याचा पंतप्रधान नरेंद्र मोदींकडे पाठपुरावा करण्याची जबाबदारी कोणाची? मोदींनी लक्ष घातल्याशिवाय हल्ली कोणतेच प्रश्न सुटत नाहीत, मंत्रिमंडळात मंत्री आहेत, पण नावापुरतेच की काय, असा प्रश्न पडतो. केंद्रीय कृषिमंत्री राधामोहन सिंह यांनी याची दखल घेतली असावीच, पण ते एकटे काय करणार? शेतकरी हिताची ठोक भाषणे करणाऱ्या पंतप्रधानांचे यंदाच्या साखर हंगामावर धोरण काय? दुसरे ज्येष्ठ आणि पंतप्रधानपदाच्या शर्यतीतील मंत्री नितीन गडकरी यांनी तर कमालच केली. पंधरा दिवसांपूर्वीच झालेल्या दक्षिण महाराष्ट्राच्या दौऱ्यात त्यांनी साखर समुद्रात फेकून द्यावी लागेल, असे वक्तव्य करून आर्थिक चणचणीत असणाऱ्या शेतकऱ्याच्या जखमेवर मीठच चोळण्याचा प्रयत्न केला. या वक्तव्याचा संदर्भ पाण्याच्या उधळपट्टीबद्दलचा असला तरी सध्या झालेल्या साखरकोंडीतून काहीतरी मार्ग काढला जाईल, अशी अपेक्षा होती. मात्र, गडकरी सभा गाजविण्याच्या नादात काही-बाही बरेच बोलून गेले. यावर शेतकरी संघटनांनी सोयीस्कर मौन पाळले, साखर कारखानदार गप्प राहिले. राज्यकर्तेच साखर समुद्रात फेकून देण्याची भाषा करू लागले तर? साखर उद्योग, शेतकरी संघटना आणि ऊस उत्पादक शेतकऱ्यांसमोरच्या अडचणी वाढणार हेच दिसते.

साखर उद्योग ठप्प

ऊसतोडी सुरू आहेत, गाळपही होते आहे. लाखो टन नवी साखर गोदामांतून येत आहे. राज्यात १८५ साखर कारखान्यांतून ४६ लाख टनांहून अधिक साखरेचे उत्पादन झाले आहे. ते गेल्यावर्षीपेक्षा सहा लाख टन जादाचे आहे. तोडी होऊन दोन महिने उलटले तरी शेतकऱ्याच्या खात्यावर बिले पडायला तयार नाहीत. उसाचे पैसे कारखान्यांकडे अडकल्याने अर्थकारणच ठप्प होते की काय, अशी स्थती आहे. राज्यातील कारखान्यांकडे सुमारे ३ हजार ५५७ कोटी रुपये थकले आहेत. एकट्या कोल्हापूर आणि सांगली जिल्ह्यातील ही थकबाकी १७०० कोटींवर आहे. कृषी क्षेत्रावर अवलंबून असलेल्या पश्चिम महाराष्ट्राच्या अर्थकारणावर याचे होत असलेले परिणाम नाकारून चालणार नाहीत. मी मैदानात, तू मैदानातची भाषा करणाऱ्या राजकारण्यांना निवडणुकांचीच घाई झाल्याने त्यांनी या संकटावर अजूनतरी तोंड उघडलेले नाही. स्वाभिमानी शेतकरी संघटनेने मोर्चा काढून आपली प्रतिक्रिया दिली आहे, एफआरपीपेक्षा एक रुपया कमीचा घेणार नाही, ही त्यांची ताजी भूमिका आहे. हंगामाच्या तोंडावर साखर कारखानदारांशी चर्चेत एफआरपी अधिक २०० ची मागणी मान्य झाली खरी, प्रत्यक्षात मात्र एफआरपी देतानाही साखर कारखानदारांना घाम फुटला आहे. साखर कारखान्यांवरील साखरेचा आणि त्यावरील कर्जाचा, व्याजाचा बोजा वाढत आहे. कारखानदारांनी यातून मार्ग काढण्यासाठी ५०० रुपयांचे सॉफ्ट लोन (कर्ज) देण्याची, निर्यातीसाठी कर्जाची मागणी केली आहे. या बिकट परिस्थितीत सरकार बघ्याची भूमिका घेत आहे. शेतकऱ्याला नागविण्याचे धोरण सरकार आणि कारखानदार या दोन्हींकडून सुरू आहे.

ऊस तुटल्याने शेतकऱ्यांच्या नव्या लावणी, पाणी, खते, मजुरी, कर्जे या साऱ्याचेच दुष्टचक्र सुरू झाले आहे. हा खर्च भागवायचा कसा, हा मोठा प्रश्न आहे. शिवाय बाजारात येणारे चलन थांबल्याने दिवाळीनंतर सारी बाजारपेठच थंडावली आहे. मोठ्या उलाढाली ठप्प आहेत. ऊसतोडी, तोडणी मजूर, वाहतूक, साखर कामगार, ऊसशेतीत काम करणारा असंघटित कामगार अशी सारी साखळीच खंडित होण्याचा धोका निर्माण झाला आहे. स्थानिक बाजारपेठेची आर्थिक घडी विस्कटण्याची वेळ आली आहे. सराफी, कापड पेठेत शांतता आहे.

तडजोडीचे मार्ग

साखर कारखानदारांनी २३०० रुपयांप्रमाणे पैसे शेतकऱ्यांच्या खात्यावर जमा करण्याची तयारी दाखविली आहे. मात्र एफआरपी एकरकमीच घेणार, अशी शेतकरी संघटनांची भूमिका आहे. पुण्यात काही साखर कारखान्यांनी ८०:२० चा, तर सोलापूर जिल्ह्यात ७०:१५:१५ चा फॉर्म्युला अवलंबला असल्याचे सांगितले जाते. सांगली, कोल्हापूर जिल्ह्यांतही ८०:२० नुसार पैसे देण्याची तयारी साखर कारखानदारांनी दाखविली आहे. या स्थितीत शेतकऱ्याच्या हतबलतेचा गैरफायदा घेण्याचे, आपला नाकर्तेपणा लपविण्याचेच सरकारचे धोरण आहे. आता यासाठी कारखानदारांनी मंगळवारी मुख्यमंत्र्यांना भेटायचे ठरवले आहे. याचा अर्थ सरकारला याच्याशी काहीच देणेघेणे नाही काय? साखरेला अनुदान देणे, कारखान्यांना प्रतिक्विंटल ५०० रुपये सॉफ्ट लोन देणे, साखरेचा खरेदी दर ३४०० रुपये करणे असे पर्याय सरकारसमोर आहेत. यावर बोलायला कोणीच तयार नाही. अशा बिकट स्थितीत साखर समुद्रात ओतण्याची भाषा केली जात आहे. साखरेतील स्वयंपूर्णतेला आणि आता कुठे स्थिरावलेल्या साखर धंद्याला चूड लावण्यातलाच हा प्रकार म्हणावा लागेल. साखरेची बाजारपेठेतील स्थिती सुधारण्याची चिन्हे नाहीत, केंद्र सरकार त्यावरील उयाययोजनांसाठी पुढे यायला तयार नाही. त्यासाठी पुन्हा मागण्या, जोर-बैठका, आश्वासने, आंदोलनांची गरज नसावी.

एफआरपीचा संबंध थेट शेतकऱ्याच्या चुलीशी आहे, याचे भान दुर्दैवाने राज्यकर्त्यांना नसावे, असे म्हणण्याची वेळ आली आहे. अर्थकारणाचे चक्र थांबण्याची वेळ आली असून यातून काही विपरीत घडू नये, ते घडण्याची वाट बघितली जात आहे काय? आमच्याकडे अनुदान मागायला येऊ नका, असे सांगून साखर कारखानदारीची कुंडली आणि भविष्यातील चित्र केंद्रीय मंत्री गडकरी यांनी मांडले आहेच, साखरेची देशी आणि आंतरराष्ट्रीय बाजारपेठेतील स्थिती, त्यावर ठरणारा साखरेचा आणि पर्यायाने उसाचा दर, ऊस उत्पादनासाठी येणारा खर्च, सिंचनाच्या सुविधा आणि पाण्याचा वापर, साखरेला इथेनॉलसारखे पर्याय यावर सहकारी साखर उद्योगातील धुरिणांनी वेळीच विचारमंथन केलेले बरे! साखर उद्योग टिकला तरच अर्थकारणाची चक्रे फिरती राहणार आहेत. गडकरी उद्याचे बोलत आहेत, हे खरे असले तरी शेतकऱ्यासाठी आजचे मरण महत्त्वाचे आहे. त्यावर स्वाभिमानीचे खासदार राजू शेट्टी, साखर कारखानदार आणि अन्य शेतकरी संघटनांनी सामंजस्याची भूमिका घेणे, पालकमंत्री चंद्रकांत पाटील यांनी सरकारच्या वतीने मध्यस्थी करणे आणि मुख्यमंत्री फडणवीस यांनी ठोस मदतीचा हात पुढे करणे, हाच एकमेव मार्ग समोर आहे. उद्या याच कारणासाठी संतप्त शेतकरी रस्त्यावर उतरले तर नवल वाटायला नको! काँग्रेस-राष्ट्रवादीच्या आणि भाजप-सेनेच्या जागावाटपावर आणि खासदारकीचा उमेदवार कोण? कोण कोणत्या पक्षात गेल्याने कोणाचे किती आणि कसे भले होणार? याची चर्चा करण्यात आणि घडविण्यातच सारे राजकारणी दंग आहेत, शेतकऱ्यांच्या या जीवन-मरणाच्या प्रश्नावर कोणीच बोलायला तयार नाही, शेतकऱ्यांनी निवडणुकीचे हत्यार वापरण्याची वेळ येवू नये, इतकेच!

………००००००

मर्दानी खेळाने उत्साह दुणावला

लाठी, दांडपट्टा, तलवार बाजी, लिंबू काढणे, गळ्यावरील पान मारणे, विटा फेक अशा चित्तथरारक प्रात्यक्षिकांनी हॅपी स्ट्रीटवर तरुणाईचा उत्साह आणखी दुणावला. शिवसंस्कार प्रतिष्ठान, चाणक्य मर्दानी खेळ, सर्वोदय मर्दानी खेळ पथकातील मावळ्यांनी प्रात्यक्षिके सादर केली. गळ्यावरील पान मारताना उपस्थितांचा श्वास रोखला होता. राजेंद्र पाटील यांच्या मार्गदर्शनाखाली महिलांना स्वसंरक्षणाचे धडेही देण्यात आले.

महिला स्वसंरक्षणाचे धडे

एसटी, बस, रेल्वे किंवा अनेकदा महिलांवर अपत्कालीन परिस्थिती उद्भवते. अशावेळी मदत मिळण्याचीही शक्यता कमी असते. अशा कटू प्रसंगांना सामोरे जाण्यासाठी वूशू संघटनेने महिलांना स्वसंरक्षणाचे धडे दिले. प्रशिक्षक सतीश वडणगेकर यांनी स्वसंरक्षणाची प्रात्यक्षिके दाखवली.

शिल्पकला, व्यंगचित्रातून हास्स्याचे फवारे

हॅपी स्ट्रीटवर वारणा कोडोली येथील शिल्पकार संतोष नागवंशी यांनी शिल्फकला सादर केली. हुबेहूब कलाकृती सादर करत त्यांनी उपस्थितांची वाहवा मिळवली. आर. एस. कुलदीपने रेखाटलेल्या व्यंगचित्रालाही दाद मिळाली. प्रसाद इव्हेंटच्या रोहन कालेकर, प्रशांत व्हटकर, रतन भोसले, आनंद गदम, दीपक त्रिमुखे, अदित्य देशमुख, महेश चव्हाण यांनी टॅटू रेखाटले.

रोप क्लायबिंगची श्वास रोखला

हील रायडर्स अॅडव्हेंचर फाउंडेशनने हॉकी स्टेडियमवर रोप क्लायम्बिंगची व्यवस्था केली होती. गडकोट मोहिमांमध्ये रोप क्लायबिंगला अनन्यसाधारण महत्त्व असते. गेल्या काही वर्षात ट्रेकिंग मोहिमांचे आयोजन केले जात असल्याने युवक-युवतींसह लहान मुलांत त्याचे आकर्षण आहे. चित्तथरारक आणि श्वास रोखून धरायला लावणाऱ्या रोप क्लायबिंगचा थरार अनेकांनी अनुभवला. लहान मुलांनी अक्षरश: रांगा लावून रोप क्लायंम्बिंगचा अनुभव घेतला. हील रायडर्सचे शिवतेज पाटील, सूरज ढोले, अभिजित इंगळे, प्रसाद कदम, मयूर लवटे, सचिन नरके, श्रावणी पसारे, भक्ती मगदूम सहभागी झाले होते.

सायकलिंग आणि स्केटिंगही

हॅपी स्ट्रीटमध्ये सायकलिंग आणि स्केटिंगने धमाल उडवली. एस. के. रोलर स्केटिंग अकॅडमीच्या खेळाडूंनी स्केटिंगची प्रात्यक्षिके सादर केली. प्रशिक्षक सुहास कारेकर यांच्या मार्गदर्शनाखाली प्रात्यक्षिके पार पडली.

अॅबस्टॅकलचा थरार

ट्रॅम्पोलीन, रोप, कोन, हडर्ल्स, बॅलन्स, वॉल जंप, लॅडर अशा अॅबस्टॅकल थराराची अनुभूती हॅपी स्ट्रीटमध्ये अनेकांनी घेतली. एफ ३ जीमचे युवराज कुंभार यांच्या प्रमुख मार्गदर्शनाखाली अॅबस्टॅकलचा थरार अनुभवला.

फोटो...

म. टा. वृत्तसेवा, कागल

'गेल्या साडेचार वर्षांत भाजप सरकारमुळे गरिबांची परवड झाली. आघाडी सरकारच्या काळात गोरगरिबांसाठीच्या कल्याणकारी योजना सरकारने जवळजवळ बंद केल्या आहेत. या सरकारने गोरगरिबांच्या चुलीत पाणी ओतण्याचे काम केले आहे. येणाऱ्या निवडणुकीत या महिलाच सरकारच्या चुलीत पाणी ओततील,' असा इशारा आमदार हसन मुश्रीफ यांनी दिला.

नानीबाई चिखली (ता. कागल) येथे आयोजित महिला मेळाव्यात ते प्रमुख मार्गदर्शक म्हणून बोलत होते. अध्यक्षस्थानी पंचायत समिती सभापती राजश्री माने होत्या. मुश्रीफ म्हणाले, '३४ हजार कोटींची कर्जमाफी दिली म्हणणाऱ्या सरकारने सरकारमध्ये देवेंद्र फसणवीस नावाचा मुख्यमंत्री गेली दोन वर्षे कर्जमाफी देत आहे. त्यांच्यात सरकारमधील उद्धव ठाकरे यांना मात्र राज्यात एकही कर्जमाफी झालेला शेतकरी सापडत नाही यातच मोठा घोळ आहे. रेशनवर धान्य देणारे आमचे सरकार होते, परंतु भाजपचे सरकार दारू देण्याची भाषा करते. साखरेऐवजी मीठ देतो म्हणते. दहा हजार लोकसंख्येची अट रद्द करून तीन हजार लोकसंख्येला दारू दुकान उघडून देत आहे. अशा सरकारच्या मागे काठ्या घेऊन महिलाच जुलमी सत्ता उलथवून टाकतील. ३१ उद्योगपतींसाठी स्थापन झालेले हे सरकार गरिबांसाठी मात्र कर्दनकाळच आहे. प्रत्येकाच्या खात्यात १५ लाख जमा करतो असे सांगून अच्छे दिनचे गाजर दाखवून सत्तेवर आलेल्या या सरकारला आता जनताच त्यांची जागा दाखवेल.'

यावेळी सरपंच शीतल फराकटे, मनीषा पाटील, भैया माने, अशोक लुगडे, नबीला मुश्रीफ, आदींनी मनोगत व्यक्त केले. मेळाव्यास जि. प. सदस्य शिल्पा खोत, दीपा कुदळे, प्रियांका पुजारी, शिवानंद माळी, कागलच्या नगराध्यक्षा माणिक माळी, अशाकाकी माने, सुमन लकडे, आदी प्रमुख उपस्थित होते. सदाशिव दुकाने यांनी स्वागत केले. प्रास्ताविक प्रवीणसिंह भोसले यांनी केले. बशीर नदाफ यांनी आभार मानले.

००००

... तर मी २० टक्के व्याज देतो

केवळ निवडणुका डोळ्यासमोर ठेवून भाजपचे नेते चंद्रकांत पाटील शेतकऱ्यांना ऑगस्ट महिन्यात ५० हजार रुपये भरा तुम्हाला १९ टक्के व्याज देतो, अशा वल्गना करीत सुटले आहेत. केवळ निवडणुकीवर लक्ष ठेवून मत देण्यासाठी गरीब शेतकऱ्यांचा भुलभुलैया करू नका. तुम्ही १९ टक्के व्याज देत असाल तर मी २० टक्के व्याज द्यायला तयार असल्याचे आव्हान आमदार मुश्रीफ यांनी दिले.

०००००

हिंदु राष्ट्र-जागृती सभेत पुनाळेकर यांचा सवाल

म. टा. प्रतिनिधी, कोल्हापूर

'सध्या देशाची परिस्थिती बिकट आहे. बँका अडचणीत आल्या आहेत. सार्वजनिक व्यवस्था, संस्था कोलमडत आहेत', असे मत हिंदू विधीज्ञ परिषदेचे राष्ट्रीय सचिव संजीव पुनाळेकर यांनी रविवारी व्यक्त केले. राममंदिर बांधण्यासाठी दिरंगाई का, असा प्रश्नही त्यांनी उपस्थित केला. राजारामपुरी येथील महानगरपालिका शाळेच्या मैदानात आयोजित हिंदु राष्ट्र-जागृती सभेत ते बोलत होते.

ते म्हणाले, 'नक्षलवादी, धर्मांधांचा उपद्रव वाढला आहे. कायदा, सुव्यवस्थेचा प्रश्न निर्माण होत आहे. यामुळे हिंदूनी संघटित होणे ही काळाची गरज आहे. स्वसंरक्षणाचे धडे घेतले पाहिजे. पाच राज्यात हिंदुत्ववादी पक्षांचा पराभव झाला तरी निराश होण्याची गरज नाही. आगामी काळात चित्र निश्चितपणे बदलेल. मुख्यमंत्री देवेंद्र फडणवीस, खासदार राजू शेट्टी यांची जात काढणारे शरद पवार पुरोगामी कसे ? सहकार, शिक्षण सम्राट गब्बर झाले आहेत. यामुळे दिशाभूल करणाऱ्यांकडे कुणीही लक्ष देणार नाहीत. सन २०२३ पर्यंत हिंदू राष्ट्र आणण्यासाठी प्रयत्न करणार आहोत.'

हिंदू जनजागृती समितीचे पश्‍चिम महाराष्ट्र समन्वयक मनोज खाड्ये, स्वाती खाड्ये यांनी मार्गदर्शन केले. दरम्यान, प्रारंभी पुरोहित गुरुप्रसाद जोशी, विवेक देवस्थळी, शतानंद कात्रे यांनी वेदमंत्रपठण केले. श्री शिवप्रतिष्ठान हिंदुस्थानचे प्रवीण पाटील, शिवसेनेचे नितीन काकडे, सुवर्णा पवार यांचा यावेळी सत्कार करण्यात आला. समितीचे जिल्हा समन्वयक किरण दुसे यांनी कामकाजाचा आढावा घेतला. यावेळी मनोहर सोरप, संजय कुलकर्णी आदी उपस्थित होते. विपुल भोपळे यांनी आभार मानले.

-----------------------

तुकाराम जंगम

कोल्हापूर : कसबा बावडा जाधव कॉलनी येथील निवृत्त सहायक पोलिस उपनिरीक्षक तुकाराम महादू जंगम (वय ६८) यांचे शनिवारी हृदयविकाराने निधन झाले. जाधव कॉलनी परिसरातील सामाजिक कार्यात ते अग्रेसर होते. त्यांच्या पार्थिवावर मिणचे सावर्डे (ता. हातकणंगले) येथे अंत्यसंकार करण्यात आले. त्यांच्या पश्चात पत्नी, दोन मुलगे, सून, मुलगी, जावई असा परिवार आहे. रक्षाविसर्जन सोमवारी (ता.७) सकाळी नऊ वाजता मिणचे सावर्डे येथे आहे.

म. टा. वृत्तसेवा, गारगोटी

येथील इन्स्टिट्यूट ऑफ सिव्हिल अँड रूरल इंजिनीअरिंग (आयसीआरई) आणि महाराष्ट्र राज्य तंत्र शिक्षण मंडळातर्फे मंगळवार (ता.८) पासून फिरत्या तंत्रशिक्षण मार्गदर्शन मेळाव्याचे आयोजन केले आहे. दहावी, बारावी आणि आयटीआय विद्यार्थ्यांसाठी गारगोटी, कडगाव, राधानगरी, मुरगूड आणि आजरा येथे मेळावे होतील. अभियांत्रिकी, पॉलिटेक्निक अभ्यासक्रमाच्या माहितीसह शैक्षणिक कर्जाबाबत मेळाव्यात व्याख्याने आणि समुपदेशन केले जाणार आहे. मंगळवारी सकाळी १० वाजता येथील शाहू कुमार भवनात मेळावा होईल. दुपारी दोन वाजता कडगाव हायस्कूल येथे बुधवारी सकाळी १० वाजता कूर येथील राम मंगल कार्यालयात मेळावा होणार आहे. गुरुवारी (ता.१०) मुरगूड येथील कॉम्रेड दत्ता देशमुख सभागृहात सकाळी १० वाजता मेळावा होईल. दुपारच्या सत्रात दोन वाजता आजरा येथील व्यंकटराव हायस्कूल येथे उपक्रमाची सांगता होईल.

म. टा. प्रतिनिधी, कोल्हापूर

'महिला बचत गटाच्या उत्पादित वस्तूंसाठी 'ताराराणी महोत्सव'हे हक्काचे व्यासपीठ आहे. महिला व बचत गटाच्या उन्नतीसाठी सरकारच्या विविध योजना आहेत. महिला आज शिक्षित बनल्या आहेत, त्यांनी कौशल्य शिक्षण आत्मसात करावे आणि स्वतला सर्वार्थांनी सक्षम व स्वावलंबी बना.' अशी साद जिल्हा परिषदेच्या अध्यक्षा शौमिका महाडिक यांनी महिला बचत गटाच्या महिलांना घातली.

जिल्हा परिषद, जिल्हा ग्रामीण विकास यंत्रणेतर्फे येथील प्रायव्हेट हायस्कूलच्या मैदानावर पाच दिवसीय ताराराणी महोत्सव भरविला आहे. प्रदर्शनात बचत गटांनी उत्पादित वस्तूंचे १६० स्टॉलचा समावेश आहे.रविवारीमहोत्सवाचे उद्घाटन, गटविकास अधिकाऱ्यांचा सत्कार व राजमाता जिजाऊ स्वावलंबन पुरस्कार प्राप्त बचत गटांना पारितोषिक वितरण समारंभ झाला. जिल्हा परिषदेचे मुख्य कार्यकारी अधिकारी अमन मित्तल अध्यक्षस्थानी होते.

राजमाता जिजाऊ स्वावलंबन पुरस्कार २०१७-१८ मधील जिल्हा स्तरावरील विजेत्या कृष्णावेणी स्वयंसहाय्यता समूह दत्तवाड, श्री महालक्ष्मी स्वयंसहाय्यता समूह मालवे व ज्वालामालिनी स्वयंसहाय्यता समूह राशिवडे या बचत गटांना पुरस्कारांनी गौरविले.मान्यवरांच्या हस्ते महोत्सवच्या स्मरणिकेचे प्रकाशन झाले. याप्रसंगी जिल्हा परिषद सदस्य अरुण इंगवले, बंडा माने, बॅँक ऑफ इंडियाचे विभागीय व्यवस्थापक नितीन देशपांडे यांची भाषणे झाली. जिल्हा ग्रामीण विकास यंत्रणेच्या प्रकल्प संचालक सुषमा देसाई यांनी प्रास्ताविक केले. याप्रसंगी महिला व बालकल्याण समिती सभापती वंदना मगदूम, सदस्या पद्माराणी पाटील, स्वरुपाराणी जाधव, हेमंत कोलेकर, 'नाबार्ड'चे नंदू नायक, अग्रणी बँकेचे राहूल माने यांची प्रमुख उपस्थिती होती.

पदाधिकारी, अधिकारी लांबच

महोत्सवाच्या उद्घाटन सोहळ्याला उपाध्यक्ष व बांधकाम, शिक्षण, समाजकल्याण समिती सभापती अनुपस्थित होते. शिवाय विविध विभागाचे अधिकारीही महोत्सवापासून लांब राहिल्याचे चित्र उद्घाटनप्रसंगी पाहावयास मिळाले. सदस्यांची संख्या तुरळक होती.

तालुकास्तरीय पुरस्कार प्राप्त बचत गट (अनुक्रमे पहिले तीन विजेते)

करवीर : डॉ.आंबेडकर स्वयंसहाय्यता समूह आरे, लक्ष स्वयंसहायता समूह वळिवडे, रत्नदीप स्वयंसहायता समूह सांगवडे.

कागल : श्री गणेश स्वयंसहाय्यता समूह सुळकूड, सत्वपंचशिल स्वयंसहायता समूह सांगाव, ताराराणी स्वयंसहाय्यता समूह बिद्री.

आजरा : शंभूमहादेव स्वयंसहाय्यता समूह दाभिल,भवानी स्वयंसहाय्यता समूह लाटगाव, सिद्धकला स्वयंसहाय्यता समूह उत्तूर.

गगनबावडा : ओंकार स्वयंसहाय्यता समूह किरवे, भरारी स्वयंसहाय्यता समूह खेरीवडे, हिरकणी स्वयंसहाय्यता समूह निवडे.

भुदरगड : भैरवनाथ स्वयंसहाय्यता समूह शेळोली, आदिशक्ती स्वयंसहाय्यता समूह म्हसवे, माऊली स्वयंसहाय्यता समूह हेदवडे.

चंदगड : वैष्णवी स्वयंसहाय्यता समूह राजगोळी खुर्द, भावेश्वरी स्वयंसहाय्यता समूह कालकुंद्री, किर्ती स्वयंसहाय्यता समूह कागणी.

गडहिंग्लज : आदर्श स्वयंसहाय्यता समूह दुंडगे, स्वामिनी स्वयंसहाय्यता समूह शेंद्री, भिमज्योती स्वयंसहाय्यता समूह माद्याळ.

हातकणंगले : एकता जिजाऊ स्वयंसहाय्यता समूह चोकाक, तुलसी स्वयंसहाय्यता समूह इंगळी, विघ्नहर्ता स्वयंसहाय्यता समूह रुकडी.

पन्हाळा : सई स्वयंसहाय्यता समूह नणुंद्रे, श्री स्वामी समर्थ स्वयंसहाय्यता समूह माले, शुभलक्ष्मी स्वयंसहाय्यता समूह केखले.

राधानगरी : श्री महालक्ष्मी स्वयंसहाय्यता समूह मालवे, ज्वालामालिनी स्वयंसहाय्यता समूह राशिवडे, संत गाडगेबाबा स्वयंसहाय्यता समूह कसबा तारळे.

शाहूवाडी : जोतिबा स्वयंसहायता समूह कडवे, रमाई स्वयंसहाय्यता समूह सोनवडे, सतीमाता स्वयंसहाय्यता समूह पणुंदे.

शिरोळ : कृष्णावेणी स्वयंसहाय्यता समूह दत्तवाड, आदर्श स्वयंसहाय्यता समूह कुटवाड, कल्लेश्वर स्वयंसहाय्यता समूह शिरदवाड.

कोल्हापूर टाइम्स टीम

'श्री बिनखांबी गणेश मित्रमंडळाच्यावतीने समता, साक्षरता व क्रिडा विकास हा छत्रपती राजर्षी शाहू महाराजांचा विचार युवा पिढीपर्यंत पोहोचवण्यासाठी प्रतिवर्षीप्रमाणे यंदा ३ फेब्रुवारीला राज्यस्तरीय कोल्हापूर शाहू मॅरेथॉन स्पर्धेचे आयोजन करण्यात आले आहे. स्पर्धेला सकाळी सहा वाजता बिनखांबी गणेश मंदिर, शाहू मॅरेथॉन चौकातून सुरुवात होईल' अशी माहिती कोल्हापूर राज्यस्तरीय शाहू मॅरेथॉन संयोजन समितीचे कार्याध्यक्ष चंद्रकांत झुरळे यांनी पत्रकार परिषदेत दिली.

झुरळे म्हणाले, 'स्पर्धेचे हे चोविसावे वर्ष असून एकूण १५ गटात स्पर्धा होणार आहे. स्पर्धेतील विजेत्यांना सुमारे दीड लाखांची रोख पारितोषिके व स्मृतिचिन्हे दिली जाणार आहेत. दर्जेदार खेळाडू घडावे यासाठी शाहू मॅरेथॉन स्पर्धेचे आयोजन केले जाते. यंदाचे मुलांना सोशल मीडियापासून दूर ठेवा-वाचन संस्कृती वाढवा असे घोषवाक्य आहे. स्पर्धा खुला पुरुष, महिला गट, शालेय मुले, मुली वय वर्षे दहा, बारा, चौदा, सतरा या गटासाठी तर दिव्यांग वयोगट चौदा ते सतरा असणार आहे. स्पर्धेत विजेत्यांना एकवीस हजार ते दोनशे रुपयेपर्यंतची रोख बक्षीसे दिली जाणार आहेत.' पत्रकार परिषदेस मंडळाचे अध्यक्ष किसन भोसले, उपकार्याध्यक्ष प्रतापसिंह घोरपडे, सचिव दत्ताजी कदम, संदिप जाधव आदी उपस्थित होते.

स्पर्धेच्या अटी

स्पर्धेत सहभागी होण्यासाठी प्रौढ व शालेय मुले-मुली गटांसाठी वयाचा दाखला आवश्यक आहे. स्पर्धेची नावनोंदणी १५ जानेवारीपासून सुरु होणार आहे. स्पर्धकांना बिनखांबी गणेश मित्र मंडळ कार्यालय, दर्शन दौलत अपार्टमेंट, भूमाई लॉन्ड्रीसमोर, बिनखांबी गणेश मंदीर जवळ नोंद करावी लागेल. नावनोंदणीची अंतिम तारीख २ फेब्रुवारी रोजी सायंकाळी ५ वाजेपर्यंत आहे. स्पर्धेत स्पर्धा क्रमांक असल्याशिवाय स्पर्धकांना सहभागी होता येणार नाही. खुला पुरुष गटासाठी २०० रुपये, महिलांसाठी १०० रुपये, प्रौढ पुरुष व महिला गटासाठी ५० रुपये प्रवेश फी असेल. शालेय दहा, बारा, चौदा व सतरा वर्षांखालील गटासाठी मोफत प्रवेश आहे.

कोल्हापूर टाइम्स टीम

'मटा'ने यावर्षी प्रथमच हॅपी स्ट्रीटला 'स्वच्छ कोल्हापूर... सुंदर कोल्हापूर...'ची थीम दिली आणि त्याला पर्यावरण चळवळीतील नागरिकांनी उदंड प्रतिसाद दिला. उपक्रमाला गार्डन्स क्लबचा उत्स्फूर्त प्रतिसाद मिळाला. 'ग्रीन अँड क्लीन सिटी' उपक्रम राबवणाऱ्या गार्डन्स क्लबने मौजमजेची धमाल सुरू असताना कचरा व्यवस्थापनाचा संदेश दिला. सुका व ओला कचरा विलगीकरणानंतर कंपोस्ट खत बनविण्याबाबत मार्गदर्शन आणि प्रात्यक्षिकही दाखवले.

वाढत्या लोकसंख्यमुळे शहरात घनकचऱ्याचा प्रश्न जटील बनत आहे. अशावेळी नागरिकांकडून घरच्या घरी कचऱ्याचे व्यवस्थापन व्हावे यासाठी गेल्या काही वर्षांपासून गार्डन्स क्लब प्रयत्नशील आहे. त्याचाच भाग म्हणून 'ग्रीन अँड क्लीन सिटी' उपक्रम राबविला जात आहे. हॅपी स्ट्रीटवर या उपक्रमाला आणखी चालनी मिळाली. पारंपरिक आणि हरवलेल्या खेळांचा मनसोक्त आनंद घेत असलेल्या नागरिकांनी कचऱ्यावर होणारी प्रक्रिया जाणून घेत आपली पर्यावरणाप्रती सजगता दाखवून दिली.

ओल्या कचऱ्यापासून कंपोस्टिंग करताना त्याचा वापर करण्याबाबत क्लबच्या सदस्या मार्गदर्शन करत होत्या. ओल्या कचऱ्यासोबत घरी निर्माण होणारा थर्माकोल, काच, प्लास्टिक कचऱ्याचे कोणत्या पद्धतीने सेग्रीगेशन करायचे याची माहिती दिली जात होती. घरी निर्माण होणाऱ्या सांडपाण्याचे शुद्धीकरण करून त्याचा बगिच्यासाठी केला जाणारा वापर प्रात्यक्षिकांसह सादर करण्यात आला. गार्डनींग, बॉटल गार्डन, नेचर गार्डनच्या प्रकारांची माहिती देताना कीचन गार्डनसाठी ग्रो बॅग्जचा वापर कशा पद्धतीने केला जातो, त्याबाबतचे मार्गदर्शन केले. क्लबच्या अध्यक्षा कल्पना सावंत, रमेश शहा, प्रमीला बत्तासे, संगीता कोकितकर, शशिकांत कदम, पल्लवी कुलकर्णी, वर्षा वायचळ, शैला निकम, अमृता वासुदेव, रवींद्र साळुंखे आदी क्लबचे सदस्य उपस्थित होते.

कोल्हापूर टाइम्स टीम

'मटा'तर्फे आयोजित हॅपी स्ट्रीटमध्ये प्रथमच 'स्वच्छ कोल्हापूर... सुंदर कोल्हापूर'ची हाक दिली होती. या आवाहनाला प्रतिसाद देत अनेकांना स्वच्छता मोहिमेत सहभाग घेतला. हॉकी स्टेडिमयवरील कार्यक्रमात अनेक स्वच्छतादूत सहभागी झाले. 'हॅपी संडे' साजरा केल्यानंतर उपस्थितांनी संपूर्ण मार्गाची स्वच्छता करीत उपस्थितांनी शहर स्वच्छतेची प्रतिज्ञाही घेतली.

दरवर्षीच्या हॅपी स्ट्रीटमध्ये अनेकांनी सहकुटुंब सहभागी होत आनंदाच्या क्षणांचा अनुभव घेतला. यावेळी दिलेल्या शहर स्वच्छतेला आवाहनाला वाचकांनी उत्स्फूर्त प्रतिसाद दिला. रविवारच्या हॅपी स्ट्रीटच्या पार्श्वभूमीवर महापालिकेची अद्ययावत यंत्रणा नगरसेवक किरण नकाते यांच्या प्रेरणेने कार्यरत झाली होती. रस्त्याच्या दुतर्फा स्वच्छता करण्यात आली. दोन्ही बाजूंची झुडूपे काढून फूटपाथ मोकळे करण्यात आले. हॅपी स्ट्रीट साजरा होण्यापूर्वी रस्ता स्वच्छ झाल्याने 'स्वच्छ कोल्हापूर... सुंदर कोल्हापूर' संकल्पाला बळकटी मिळाली. रविवारी तीन तासांच्या धमाल उडवून देणाऱ्या कार्यक्रमानंतर पुन्हा स्वच्छता मोहीम राबविण्यात आली. स्वच्छता मोहीम राबवून वाहनांच्या रहदारीमुळे साचलेली धूळ, कागद, खाद्यपदार्थांची पाकिटे एकत्र करण्यात आली. हॉकी स्टेडियम ते आयटी पार्कपर्यंतचा मार्ग स्वच्छ केल्यानंतर सहभागी युवकांनी स्वच्छ कोल्हापूरची प्रतीज्ञाही घेतली. नगरसेवक नकाते यांच्या मार्गदर्शनाखाली गजानन महाराजनगर येथील ओंकार ग्रुप, म्हसोबा तरुण मंडळ, शिवशक्ती तरुण मंडळातील कार्यकर्ते सहभागी झाले होते.

सोलापूर हाफ मॅरेथॉन स्पर्धेत

केनियाच्या धावपटूंचे वर्चस्व

सोलापूर :

सोलापूर रनर्स असोसिएशनच्या वतीने घेण्यात आलेल्या सीएनएस सोलापूर हाफ आंतरराष्ट्रीय मॅरेथॉनमध्ये २१ किमीच्या पुरुष गटातील पहिले, दुसरे आणि तिसरे तसेच महिला गटातील पहिले आणि दुसरे विजेतेपद केनियाच्या धावपटूंनी पटकावून सोलापूरच्या मॅरेथॉनवर केनियन्सनी वर्चस्व कायम ठेवले. दहा किमीमध्ये बार्शीचा आदित्य निरगुण याने विजेतेपद मिळवले. सकाळी ५.४५ वाजता सुरू झालेल्या सोलापूर मॅरेथॉनमध्ये तब्बल ४ हजारांवर धावपटूंनी सहभाग घेतला होता.

२१ किलोमिटरची मॅरेथॉनचा प्रारंभ सोलापूर महानगर पालिका आयुक्त डॉ. अविनाश ढाकणे, पोलिस आयुक्त महादेव तांबडे यांच्या हस्ते हिरवा झेंडा दाखवून तसेच वॉशिंग्टन डिसी येथील विद्यापीठातील पीटर कुझनीक आणि सोलापूर विद्यापीठाच्या कुलगुरू डॉ. मृणालीनी फडणवीस यांच्या हस्ते हवेत फुगे सोडून मॅरेथॉनचा झाला.

नोवा क्रमाई याने १ तास ७ मि. १० सेकंदात ही स्पर्धा पूर्ण करून पहिला क्रमांक पटकावला. तोये तेरफी याने १ तास ७ मि.४७ सेकंदात पूर्ण करून दुसरा क्रमांक मिळवला आणि इसाकेमाऊ याने १ तास १२ मि. ४ सेकंदात पूर्ण करून तिसरा क्रमांक पटकावला हे तिघेही केनियाहून सोलापूरच्या मॅरेथॉनमध्ये सहभाग घेण्यासाठी आले होते. याच २१ किमी मध्ये महिलामध्ये केनियाच्याच क्रिसलर मियांगू हिने १ तास १७ मि. २६ सेकंदात ही स्पर्धा पूर्ण करून पहिला क्रमांक घेतला तसेच केरेन माईयो हिने १ तास २२ मि.४ सेकंदात पूर्ण करून दुसरा क्रमांक मिळवला. तर मोनिका राऊत हिने १ तास २४ मि. ५९ सेकंदामध्ये ही स्पर्धा पूर्ण करून तिसरा क्रमांक पटकावला. या सर्व विजेत्यांना सहकार व पणनमंत्री सुभाष देशमुख, सोलापूर जिल्हा परिषदेचे मुख्य कार्यकारी अधिकारी राजेंद्र भारूड यांच्या हस्ते प्रथम १ लाख तर द्वितीय ५० हजार आणि तृतीय २५ हजार रूपये, अशी बक्षिसे, प्रमाणपत्र, मेडल देऊन सन्मानीत करण्यात आले.

कोयना धरण

व्यवस्थापनाचा गौरव

कराड :

कोयना धरणाच्या व्यवस्थापनाला देशपातळीवरील उत्कृष्ट धरण व्यवस्थापन, या पुरस्काराने सन्मानित करण्यात आले. शुक्रवारी चार जानेवारी रोजी नवी दिल्ली येथे केंद्रीय ऊर्जामंत्री (स्वतंत्र कार्यभार) आर. के. सिंग यांच्या हस्ते हा पुरस्कार प्रदान करण्यात आला.

आयएसओ मानांकन प्राप्त असलेले हे धरण उत्कृष्ट व्यवस्थापनामुळे जगाच्या कानाकोपऱ्यात पोहोचले आहे. त्या मुळेच केंद्रीय सिंचन आणि ऊर्जा मंडळातर्फे दिला जाणाऱ्या देशपातळीवरील पुरस्काराने हे धरण सन्मानित झाले आहे. या वेळी राज्याचे जलसंपदा विभागाचे मुख्य सचिव राजेंद्र पवार, जलसंपदा विभाग मुख्य अभियंता टी. एन. मुंडे, मुख्य अभियंता एन. व्ही. शिंदे, साताऱ्याच्या सिंचन मंडळ अधीक्षक अभियंता वैशाली नारकर, कोयना सिंचन विभाग कोयनानगरचे कार्यकारी अभियंता कुमार पाटील यांनी महाराष्ट्र सरकारच्या वतीने हा पुरस्कार स्वीकारला .

कोयना धरण १९५४-१९६३ या कालावधीत बांधण्यात आले. सन १९६३पासून आजपर्यंत ५५ वर्षे कोयना प्रकल्पाची उत्कृष्ट देखभाल-दुरुस्ती, परिचलन व नियोजन केल्याबाबत हा पुरस्कार मिळाला आहे.

............

कराड बसस्थानकाचे

आज रावतेंच्या हस्ते उद्‌घाटन

कराड :

गेली अनेक वर्षांपासून प्रतिक्षेत असलेल्या कराड मध्यवर्ती बसस्थानकाच्या नूतन इमारतीचे उद्‌घाटन आज, सोमवारी सकाळी अकरा वाजता परिवहन मंत्री दिवाकर रावते यांच्या हस्ते आणि माजी मुख्यमंत्री पृथ्वीराज चव्हाण यांच्या उपस्थितीत उद्घाटन होणार आहे.

पृथ्वीराज चव्हाण मुख्यमंत्री असताना त्यांच्या माध्यमातून स्व. यशवंतराव चव्हाण जनमशताब्दी निधीतून कराडच्या नवीन सुसज्य बसस्थानकासाठी अकरा कोटी रुपयांचा निधी मंजूर केला होता. त्या नंतर या बसस्थानकाचे काम सुरू झाले. मात्र काही तांत्रिक कारणांमुळे गेली अनेक वर्षांपासून या इमारतीचे काम रखडले होते. अखेर पावसाळ्यात प्रवाशांची गैरसोय टाळण्यासाठी अर्धवट पूर्ण झालेल्या इमारतीतूनच बसस्थानकाचे काम सुरू करण्यात आले होते. मात्र सध्या बसस्थानकाचे काम पूर्णत्वास आल्याने एस. टी. प्रशासनाच्या वतीने सोमवारी बसस्थानकाच्या उद्घाटनाचा कार्यक्रम आयोजित करण्यात आला आहे.

............

मराठवाडी धरणग्रस्तांच्या बैठकीत इशारा

कराड :

पाटण तालुक्यातील मराठवाडी धरणग्रस्तांच्या विविध प्रश्नांबाबत येत्या ३० जानेवारीपर्यंत ठोस निर्णय न झाल्यास एक फेब्रुवारीपासून गुराढोरांसह बेमुदत ठिय्या आंदोलन करण्याचा इशारा देण्यात आला आहे. शनिवारी साताऱ्यात अधिकऱ्यांसमवेतच्या झालेल्या बैठकीत धरणग्रस्थांनी हा इशारा दिला आहे. बैठकीत विविध मुद्यांवर सकारात्मक चर्चा झाली असली, तरी त्याची प्रभावीपणे अंमलबजावणी अपेक्षित असल्याचे मत धरणग्रस्तांनी व्यक्त केले आहे.

धरणग्रस्तांच्या विविध प्रलंबित प्रश्नांबाबत तातडीने मंत्रालयात बैठक बोलवावी, या मागणीसाठी चार दिवसांपासून धरणस्थळी सुरू असलेले आंदोलन अतिरिक्त जिल्हाधिकाऱ्यांच्या उपस्थितीत बैठकीचे आयोजन केल्याचे पत्र मिळाल्यानंतर मागे घेण्यात आले. त्या नंतर शनिवारी सायंकाळी साताऱ्यात बैठक झाली.