सहकारमंत्री सुभाष देशमुखांना नोटीस म. टा. वृत्तसेवा, सोलापूर गुंतवणूकदारांचे पैसे परत करण्याचा न्यायालयाच्या आदेश न पाळल्याने सहकारमंत्री सुभाष देशमुख यांच्या लोकमंगल समूहाचे म्युच्युअल फंड आणि डी मॅट खाते गोठविण्याची नोटीस सिक्युरिटीज अँड एक्सचेंज बोर्डाने (सेबी) शुक्रवारी दिली. तसेच, देणे असलेल्या ७४ कोटी रुपयांच्या वसुलीसाठी देशमुख यांना नोटीसही बजावण्यात आली आहे. गुंतवणूकदारांचे ७४ कोटी रुपये तीन महिन्यांत परत करण्याचे आदेश सेबीने १६ मे २०१८ रोजी दिले होते. मात्र, मागील सहा महिन्यांपासून लोकमंगलने सेबीच्या आदेशाला उत्तरच दिले नाही. लोकमंगलचे डी-मॅट खाते आणि म्युच्युअल फंडाची खाती गोठवण्याची नोटीस सेबीने दिली आहे. लोकमंगल अ‍ॅग्रो इंडस्ट्रीज लिमिटेड कंपनीबरोबरच, नोटीसमध्ये देशमुख यांच्या पत्नी स्मिता देशमुख, वैजनाथ लातूरे, औदुंबर देशमुख, शहाजी पवार, गुरन्ना तेली, महेश देशमुख, पराग पाटील यांनाही नोटीस देण्यात आली आहे. नियमांचे उल्लंघन नाही : देशमुख 'लोकमंगलने सेबीने सांगितलेल्या नियमांचे उल्लंघन केलेले नाही. सेबीने तीन महिन्यांत पैसे परत करण्याची प्रक्रिया करावी, असे आदेश दिले होते. ती प्रक्रिया आम्ही पाळली आहे. ज्यांना शेअर्स परत घ्यायचे आहेत, त्यांनी परत घ्यावेत, अशी नोटीस देशभरातील सर्व दैनिकांत आम्ही दिली तसेच ज्यांनी ज्यांनी पैसे मागितले त्यांना पैसे दिलेत. साधारण २० ते २५ कोटी परत दिले आहेत आणि भविष्यातही ती रक्कम परत देत आहोत,' अशी प्रतिक्रिया सहकारमंत्री सुभाष देशमुख यांनी सोलापुरात पत्रकारांशी बोलताना दिली. 'राज्यातील सर्वच साखर कारखान्यांनी अशाच पद्धतीने शेअर्स जमा केले आहेत, मग आमच्यावरच कारवाई का? हे कळत नाही,' असा सवालही सहकारमंत्री सुभाष देशमुख यांनी उपस्थित केला आहे. 'लोकमंगलची खाती गोठवण्याचे आदेश बँकांना दिले असले तरी मी कोणाचेही शोषण करणार नाही. सेबीच्या नियमानुसार वर्षाला केवळ ५० सभासद बनवता येतात. आम्ही मात्र जास्त सभासद केले आहेत, म्हणून कारवाईचे आदेश दिले होते. सेबीच्या नियमानुसार केवळ ५० सभासद बनवता येतात. मात्र अनवधानाने आम्ही जास्त सभासद केले आहेत. साधारण २० ते २५ कोटी परत दिले आहेत. माझे काही चुकले असेल तर लोक मला माफ करणार नाहीत,' असेही सुभाष देशमुख म्हणाले.
मोबाइल अॅप डाउनलोड करा आणि राहा अपडेट
