फोटो

म. टा. प्रतिनिधी, कोल्हापूर

उत्सुकता वाढवणारे नवनवे प्रयोग, तरुण संशोधकांच्या कल्पक संकल्पना, तंत्रज्ञान, कृषी, विज्ञान, कला अशा विविधांगी विषयांना स्पर्श करणारे अभिनव प्रयोग अविष्कार संशोधन महोत्सवात अनुभवायला मिळाले. 'स्पेक्ट्रल माउस', वायरलेस वॉटर लेवल मॉनिटरिंग कंट्रोलर, तेल आणि पाणी वेगळे करणारा प्रयोग तसेच इंटरनेटवरून कचरा भरल्याचे नोटिफिकेशन्स देणारे स्मार्ट डस्टबीन असे प्रकल्प महोत्सवाचे आकर्षण ठरले.

यशवंतराव चव्हाण स्कूल ऑफ रूरल डेव्हलपमेंट विभागाच्या वतीने शिवाजी विद्यापीठात १३ व्या आविष्कार संशोधन स्पर्धेला शुक्रवारी प्रारंभ झाला. कुलगुरू डॉ. देवानंद शिंदे यांच्या हस्ते लोककला केंद्रात स्पर्धेचे उद्घाटन झाले. स्पर्धेत पदवीस्तरीय विद्यार्थी, पदव्युत्तर व पदव्‍युत्तरोत्तर तसेच शिक्षक अशा गटातील एकूण ३१७ स्पर्धकांनी सहभाग नोंदवला. लोककला केंद्रात सकाळपासून आपले प्रयोग मांडण्यासाठी विद्यार्थ्यांची लगबग सुरू होती. प्रयोगाचे प्रात्यक्षिक तसेच त्याची माहिती पोस्टरच्या माध्यमातून लावण्यात आली होती. संशोधनाची आणि तंत्रज्ञानाची आवड असणाऱ्या असंख्य विद्यार्थ्यांनी महोत्सवाला भेट दिली. काही विद्यार्थ्यांनी प्रयोगाची माहिती संदर्भासाठी टिपून घेतली. प्रकल्पाची माहिती देणाऱ्या विद्यार्थ्याला प्रयोगाबाबत आलेल्या शंका उपस्थिताकडून विचारल्या जात होत्या.

'कॉलेज जीवनात संशोधन वृत्तीला चालना मिळावी यासाठी अशा स्पर्धा महत्त्वाच्या ठरतात. या माध्यमातून विद्यार्थ्यांच्या नवनिर्मितीला चालना मिळत असते. आविष्कार संशोधन स्पर्धा ही विद्यार्थ्यांच्या क्रियाशीलतेला अधिक वाव देणारी आहे,' असे प्रतिपादन कुलगुरू डॉ. शिंदे यांनी यावेळी केले. उद्घाटनानंतर प्रमुख उपस्थितांनी महोत्सवातील विविध संशोधन प्रकल्पांची पाहणी केली. याप्रसंगी प्र-कुलगुरू डॉ. डी. टी. शिर्के, कुलसचिव विलास नांदवडेकर, शैक्षणिक सल्लागार डॉ. डी. आर. मोरे, अधिष्ठाता डॉ. ए. एम. गुरव उपस्थित होते.

........

हे होते स्पर्धा प्रकार

मानववंशशास्त्र, भाषा, अभिजात कला, शिक्षण व वाणिज्य, व्यवस्थापन, कायदा तसेच मूलभूत विज्ञान, शेती आणि पशुसंवर्धन, अभियांत्रिकी आणि तंत्रज्ञान, वैद्यकशास्त्र व औषध शास्त्र अशा प्रकारांत ही स्पर्धा घेण्यात आली.

.....................

महोत्सवातील आकर्षण

महोत्सवातील प्रयोगात अपंगांसाठी असणारे 'स्पेक्ट्रल माउस', वायरलेस वॉटर लेवल मॉनिटरिंग कंट्रोलर, तेल आणि पाणी वेगळे करणारा प्रयोग तसेच इंटरनेटवरून कचरा भरल्याचे नोटिफिकेशन्स देणारे स्मार्ट डस्टबीन, तुकडे झालेल्या तांदळावर प्रक्रिया करून नव्याने तांदूळ तयार करणारा राइस प्रकल्प, डेंगीवरील रुग्णांसाठी महत्त्वपूर्ण ठरणारा पपया आणि ड्रॅगन फ्रूट यांपासून बनवलेला ज्यूस, मोठ्या वाहनांसाठी सस्पेंशन तयार करणारे इलेक्ट्रिकल शॉकप्सर, ऊर्जेचे जतन करण्यासाठी महत्त्वपूर्ण ठरणारा 'सुपर कपॅसिटर' हे प्रयोग उपस्थितांचे लक्ष वेधून घेणारे ठरले.

...........

दिव्यांगांसाठी 'स्पेक्ट्रल माउस' वरदान

दोन्ही हात नसलेल्या दिव्यांगाना कॉम्प्युटर सहजरीत्या हाताळता यावा यासाठी स्पेक्ट्रल माउस तयार करण्यात आला होता. या डिव्हाईसमध्ये डोळ्यांना असणाऱ्या चष्म्याच्या सहायाने सेन्सॅारच्या माध्यमातून कॉम्प्युटरला कमांड देण्याची यंत्रणा विकसित करण्यात आली आहे. यामध्ये डोळ्याच्या पापण्यांच्या सहायाने देखील कॉम्प्युटर नियंत्रित करता येतो. या डिव्हाईसमध्ये अधिक संशोधन झाल्यास दिव्यांगासाठी तो वरदान ठरू शकते.

..............

कचरा निर्मूलनासाठी 'स्मार्ट डस्टबिन'

अजय माने या विद्यार्थ्याने तयार केलेला 'स्मार्ट डस्टबिन' हा कचरा निर्मूलनात प्रभावी ठरू शकतो. या प्रयोगात डस्टबिनच्या झाकणाला सेन्सॉर बसवण्यात आले आहेत. त्यामुळे कचरा ७५ टक्क्याहून अधिक झाल्यास आपोआप मोबाईल तसेच मेलवर नोटिफिकेशन देण्याची सोय करण्यात आली आहे. यासाठी 'लाइव्ह अॅप' विकसित करण्यात आले आहे.

फोटो -

म. टा. वृत्तसेवा, इचलकरंजी

येथील राज्यस्तरीय एकांकिका स्पर्धेच्या पहिल्याच दिवशी विनोदी व रंजक तसेच सामाजिक आशयाच्याही एकांकिका विविध ठिकाणच्या संघांनी सादर केल्या. मनोरंजन मंडळ, श्री दगडूलाल मर्दा फाउंडेशन आणि रोटरी क्लब ऑफ इचलकरंजी सेंट्रल यांच्यावतीने आयोजित स्पर्धेचे हे विसावे वर्ष आहे.

कोल्हापूरच्या प्रयोग नाट्य संस्थेने 'मित्तर' ही पहिली एकांकिका सादर केली. एखाद्या माणसातील वाल्याचा वाल्मिकी होतो. त्यावेळी तो खऱ्या अर्थाने बुद्ध म्हणून जगतो, अशा आशयाची नक्षलवादी जीवनावरील ही एकांकिका होती. लेखन मोहन बनसोडे यांचे होते तर दिग्दर्शन प्रमोद पुजारी यांचे होते. दुसरी 'सम्राट' ही एकांकिका विजय साळवी लिखित आणि भाऊसाहेब केटकाळे दिग्दर्शित होती. भारत नाट्य क्लब कबनूर यांच्या एकांकिकेत एका गुन्हेगाराचे मन परिवर्तन एक तरुणी करते असा आशय होता.

नौटंकी थिएटर पुणे या संघाची 'बिबट्या' ही राजकुमार जरांगे या युवा लेखकानेच ही एकांकिका दिग्दर्शित केली होती. अवैध जंगल तोडीमुळे प्राण्यांचे होणारे हाल आणि लोकांच्या एकमेकातील भांडणामुळे बिबट्याचा नाहक बळी जातो, या आशयाची ही एकांकिका होती.

बारामतीच्या नाट्यसाधना या संस्थेने प्रवीण तरडे लिखित 'आर्टीफिशल इंटेलिजन्स' ही एकांकिका इंजिनीअरिंगच्या शेवट वर्षाच्या मुलांवर आधारित होती. अनिकेत पांडकर हे दिग्दर्शक होते. भावना आणि तर्कशास्त्र अशा संघर्षाचा आशय यात होता. 'साजू' ही राजू फूलकर लिखित आणि प्रमोद कुलकर्णी दिग्दर्शित एकांकिका नाट्य शुभांगी जयसिंगपूर या संघाने सादर केली. शेवटच्या सत्रात संघर्ष सेवा संस्था जयसिंगपूर यानी डॉ. पराग घोंगे लिखित 'मृगजळ' एकांकिका सादर केली. शेवटी कोकण ज्ञानपीठ उरण महाविद्यालय संघाने आकाश म्हात्रे व निखिल पालांडे लिखित 'अलेक्सा' एकांकिका सादर केली.

जिल्हा बँकेचा फोटो तसेच

गूड न्यूज लोगो वापरणे

म टा. प्रतिनिधी, कोल्हापूर

प्रशासक काळातील १०३ कोटी रुपयांचा तोटा भरून काढत तीन वर्षांत कोल्हापूर जिल्हा मध्यवर्ती सहकारी बँकेने २०१७-१८ या आर्थिक वर्षात ५७ कोटी रुपये ढोबळ नफा, तर तरतुदी करून ४४ कोटी रुपये नफा मिळवून राज्यात प्रथम क्रमांक पटकावला आहे. मुंबईतील दी महाराष्ट्र स्टेट को-ऑपरेटिव्ह बँक असोसिएशन लिमिटेड कंपनीने जाहीर केलेल्या वार्षिक अहवालात ही माहिती प्रसिद्ध केली आहे.

राज्यातील ३१ जिल्हा बँकांच्या आर्थिक ताळेबंदाचा अभ्यास करून कोल्हापूर जिल्हा बँकेला प्रथम क्रमांकाने गौरविण्यात आले. ३५ कोटी रुपये नफा मिळवणाऱ्या पुणे जिल्हा बँकेला दुसरा, तर ३४ कोटी रुपये नफा मिळवणाऱ्या अहमदनगर जिल्हा बँकेला तिसरा क्रमांक मिळाला आहे. ठाणे जिल्हा बँकेने ३० कोटी रुपये नफा मिळवत चौथे स्थान मिळवले.

जिल्हा बँकेत राष्ट्रवादी आणि काँग्रेसची सत्ता आहे. आमदार हसन मुश्रीफ यांची २०१५ मध्ये अध्यक्षपदावर निवड झाल्यानंतर बँकेला आर्थिक शिस्त लावण्यासाठी प्रयत्न केले. संचालक मंडळाचे सहकार्य आणि अधिकारी व कर्मचाऱ्यांनी विशेष परिश्रम घेऊन तोट्यात असलेली बँक फायद्यात आणली आहे. ३१ मार्च २०१५ अखेर बँकेकडे २८९० कोटी रुपयांच्या ठेवी होत्या. त्या आज ४०४९ कोटी रुपये झाल्या आहेत. तीन वर्षांपूर्वी कर्ज वाटपाचे प्रमाण २१६७ कोटी रुपयांवरून २८९० कोटी रुपयांपर्यंत पोहोचले आहे. कर्ज वसुलीसाठी बड्या कर्जदारांच्या दारात जाऊन ढोल वाजवून आंदोलन करण्यात आले. तसेच कर्जदारांच्या आकडेवारीचे फलकही बँकेच्या दारात लावण्यात आले. त्यामुळे कर्जाच्या वसुलीला सहकार्य मिळत आहे. चुकीचे कर्जवाटप टाळून काटकसरीचे धोरण स्वीकारले आहे. तसेच ठेवी वाढविण्यासाठी प्रयत्न केले जात आहे.

एनपीएचे प्रमाण २.४९ टक्क्यांवरून २.१५ टक्क्यांवर आले आहे. साडेतीन वर्षांपूर्वी २० शाखा नफ्यात होत्या. आज १८२ शाखा नफ्यात आहेत. सीआरएआरचे प्रमाण सात टक्क्यांवरून १२.४३ टक्क्यांपर्यंत वाढले आहे. बँकेचा प्रतिकर्मचारी व्यवसाय २.७६ कोटींवरून ४.२१ कोटींवर आला आहे. प्रतिशाखा सरासरी वार्षिक उलाढाल २३ कोटीवरून ३२ कोटी रुपयांवर पोहोचली आहे. सर्वांत महत्त्वाचे म्हणून संचित १०३ कोटी रुपयांचा तोटा भरून बँकेने ५७ कोटी रुपयांचा ढोबळ नफा मिळवला आहे. तसेच बँकेने कर्मचाऱ्यांना नऊ टक्के बोनस दिला आहे. सभासदांना आठ टक्के लाभांश दिला आहे.

०००

बँकेचा आर्थिक दृष्टिक्षेप

१७७ कोटी

वसूल भांडवल

४०४८ कोटी

ठेवी

२९९१ कोटी

कर्ज वाटप

५.३२

एनपीए

१८२

नफ्यातील शाखा

५७ कोटी

ढोबळ नफा

८ टक्के

लाभांश

९ टक्के

कर्मचाऱ्यांना बोनस

४.५० कोटी

प्रति कर्मचारी व्यवसाय

म. टा. प्रतिनिधी, कोल्हापूर

एकरकमी एफआरपी देण्याबाबत येणाऱ्या अडचणींसंदर्भात जिल्हा साखर कारखानदारांच्या कार्यकारी संचालकांनी शुक्रवारी पुण्यात प्रभारी साखर आयुक्त शेखर गायकवाड यांची भेट घेऊन चर्चा केली. एफआरपी देण्यास विलंब होत असल्याने कारखान्यांवर कारवाई करू नये, अशी विनंती यावेळी करण्यात आली.

साखर हंगाम सुरू होऊन दीड महिन्याचा कालावधी उलटूनही कोल्हापूर विभागातील एकाही कारखान्याने शेतकऱ्यांच्या खात्यावर एकरकमी एफआरपी जमा केलेली नाही. त्यामुळे प्रादेशिक साखर सह संचालकांनी कारखान्यांना नोटीस बजावली आहे. आंतरराष्ट्रीय बाजारपेठेत कोसळलेले साखरेचे दर, कर्जाची परतफेड न केल्याने साखर निर्यातीस बँकांकडून परवानगी मिळत नसल्याने कारखानदार अडचणीत आले आहेत. कारखानदारांच्या वतीने आयुक्त गायकवाड यांना निवेदन देण्यात आले आहे. निवेदनात एफआरपी देण्यासाठी ५०० रुपये कमी पडत असल्याने सरकारने अनुदान देताना थेट शेतकऱ्यांच्या खात्यावर रक्कम जमा करावी, असे निवेदन देण्यात आले. शिष्टमंडळात राजाराम साखर कारखान्याचे मानद कार्यकारी संचालक पी.जी. मेढे, एम.डी. पाटील, एस.डी. निकम यांच्यासह सर्व साखर कारखान्यांच्या कार्यकारी संचालकांचा समावेश होता.

अल्प बचत व ओव्हर टाइमची १४ लाख रक्कम खात्यावर वर्ग

म. टा. प्रतिनिधी, कोल्हापूर

महापालिकेच्या परिवहन उपक्रांतंर्गत केएमटी विभागाकडे कार्यरत असलेल्या कर्मचाऱ्यांची चार वर्षापासून प्रलंबित असलेली अल्प बचतीची तसेच दोन महिन्याचा ओव्हर टाइम रक्कम बँक खात्यावर वर्ग करण्यात आला. अल्प बचतीचे नऊ लाख ७७ हजार व ओव्हर टाइमचे पाच लाख असे १४ लाख ७७ हजारांची रक्कम शुक्रवारी प्रशासनाने जमा केली.

केएमटीकडील चालक, वाहक आणि इतर कर्मचाऱ्यांची पोस्टाच्या अल्प बचत खात्यात रक्कम जमा केली होती. पण गेल्या चार वर्षांपासून कर्मचाऱ्यांची जमा होत असलेली रक्कम बचत खात्यात जमा केलेली नव्हती. त्यामुळे कर्मचारी वारंवार प्रशासनाकडे रक्कम जमा करण्यास रेटा लावत होते. पण आर्थिक अरिष्टात सापडलेल्या कर्मचाऱ्यांचे दरमहा वेतन देता येत नसताना बचत खात्याची रक्कम द्यायची कशी असा प्रश्न निर्माण झाला होता. दिवाळीपूर्वी स्थायी समिती सभापती, परिवहन समिती सभापती यांच्यासोबत झालेल्या बैठकीदरम्यान वेतनासोबत अल्पबचत खात्यातील रक्कम देण्याचे आदेश दिले होते. मात्र त्यानंतरही थकीत रकमेपासून कर्मचारी वंचित होते. शुक्रवारी मात्र कर्मचाऱ्यांनी पाठपुरावा केल्यानंतर बचत खात्यातील नऊ लाख ७७ हजार रुपये त्यांच्या खात्यावर वर्ग केली. त्यामुळे कर्मचाऱ्यांना काहिसा दिलासा मिळाली.

नियमित वेतनासोबत ओव्हरटाइम रक्कम मिळण्यासाठी चालक, वाहक नेहमीच मागणी करत असतात. गेल्या सहा महिन्यांपासून चालक, वाहकांसह अन्य कर्मचाऱ्यांची ओव्हरटाइम रक्कम मिळालेली नाही. नुकत्याच झालेल्या परिवहन समितीच्या बैठकीत संपूर्ण रक्कम देण्याचे आदेश दिले. मात्र नियमित कर्मचाऱ्यांची जून, जुलै तर रोजंदारी कर्मचाऱ्यांची केवळ जून महिन्यांची ओव्हर टाइमची पाच लाखाची रक्कम जमा केली. अल्प बचत व ओव्हर टाइमची रक्कम मिळाल्याने कर्मचाऱ्यांमध्ये काहीसे समाधानाचे वातावरण निर्माण झाले. गेल्या अनेक वर्षांपासून केएमटी कर्मचाऱ्यांना नियमित वेतन मिळत नाही. गणेशोत्सवापासून नियमित वेतनासाठी प्रशासन प्रयत्न करत असून कर्मचाऱ्यांचे केवळ नोव्हेंबर महिन्याचे वेतन थकीत आहे.

..........................

चौकट

आज आयुक्तांची भेट

कर्मचाऱ्यांच्या वेतनासह अन्य प्रलंबित मागण्यांसाठी म्युनिसिपल ट्रान्सपोर्ट युनियन सातत्याने प्रयत्न करत आहे. शुक्रवारी कर्मचारी संघटनेच्या प्रतिनिधींनी शुक्रवारी आयुक्त डॉ. अभिजित चौधरी यांची भेट घेतली. शनिवारी (ता. २९) सायंकाळी पाच वाजता युनियनच्या पदाधिकाऱ्यांसोबत आयुक्तांची बैठक होणार आहे.

म. टा. प्रतिनिधी, कोल्हापूर

'बचत गटाच्या माध्यमातून महिला सक्षमीकरण होत असल्याने बँकांनी महिला बचत गटांना अर्थसाह्य करण्यात सक्रिय व्हावे,' असे आवाहन नाबार्डचे जिल्हा विकास अधिकारी नंदू नाईक यांनी केले. महिला आर्थिक विकास महामंडळाच्या वतीने दीनदयाळ अंत्योदय राष्ट्रीय नागरी उपजीविका अभियान कार्यक्रमांतर्गत आयोजित केलेल्या बँकर्स वर्कशॉप व कृती संगम कार्यशाळेत ते बोलत होते.

कार्यशाळेस अग्रणी जिल्हा प्रबंधक राहुल माने, माविमचे जिल्हा समन्वयक बाळासाहेब झिंजाडे प्रमुख उपस्थित होते.

बँकांनी नाबार्डचे घालून दिलेल्या पंचसूत्रीनुसार कार्यक्रम राबविणे गरजेचे असल्याचे सांगून नाबार्डचे जिल्हा विकास अधिकारी नाईक म्हणाले, 'जिल्ह्यात बचत गटांची चळवळ यशस्वी ठरत असून महिला बचत गटांना अधिक प्रोत्साहन देण्यासाठी बँकांनी त्यांना लागणारे अर्थसाह्य करावे. महिला आर्थिक विकास महामंडळाकडील बचत गटांची वसुली अतिशय चांगली असून, यापुढील काळातही बचत गटाच्या महिलांनी बँकांच्या कर्जाची वेळीच परतफेड करावी.'

अग्रणी जिल्हा प्रबंधक राहुल माने म्हणाले, 'महिला आर्थिक विकास महामंडळाचे जिल्ह्यात १२७३ बचत गट असून, आजअखेर १०३० बचत गटांचे क्रेडिट लिंकेज झाले आहे. माविमच्या महिला बचत गटांना बचत खाते उघडताना बँकर्सनी अधिक सकारात्मक भूमिका ठेवावी. महिलांच्या काही अडचणी असल्यास त्यावर मार्ग काढून नियमानुसार कार्यवाही करावी.'

माविमचे जिल्हा समन्वयक बाळासाहेब झिंजाडे यांनी स्वागत केले. यावेळी महाराष्ट्र बँक, सारस्वत बँकेसह अन्य बँकांच्या अधिकाऱ्यांनी मनोगत व्यक्त केले. माविमचे लेखाधिकारी विनायक कुलकर्णी यानी आभार मानले.

००००

Maruti.Patil@timesgroup.com

tweet: @MarutipatilMT

कोल्हापूर : मान्सूनने ऑगस्ट, सप्टेंबरमध्ये मारलेली दडी आणि परतीच्या पावसानेही पाठ फिरवल्याचा परिणाम रब्बी क्षेत्रावर झाला. खरीप हातचा गेला असताना रब्बीकडे डोळे लागून राहिलेल्या शेतकऱ्यांची घोर निराशा झाली असून, २६ डिसेंबरअखेर ३९.२१ टक्के क्षेत्रावर केवळ १५ हजार ८०० हेक्टरवर पेरण्या पूर्ण झाल्या आहेत. बारमाही सिंचन सुविधा असणाऱ्या जिल्ह्यात रब्बीखालील घटलेले क्षेत्र चिंताजनक मानले जाते. परतीच्या पावसाअभावी सिंचन सुविधी नसलेल्या ठिकाणी स्थिती अधिकच चिंताजनक दिसत आहे.

लहरी मान्सून पावसाचा फटका नेहमीच कृषी उत्पादनाला बसतो. वर्षानुवर्षे सुरू असणारे दुष्टचक्र यावर्षीही अनुभवास आले आहे. मान्सूनच्या सुरुवातीच्या काळात दमदार पावसाने खरिपाची उगवण आणि वाढ चांगली झाली, पण अतिवृष्टीमुळे सुरुवातीच्या काळात पिके कुजून गेली, तर काही ठिकाणी पीक वाढीवर परिमाण दिसून आला. नंतर पिके पक्व अवस्थेत असताना पावसाने दडी मारली, त्यामुळे खरीप उत्पादनात चांगलीच घट झाली.

खरीप हातचा गेल्यानंतर शेतकऱ्यांनी परतीच्या पावसाच्या आशेवर रब्बी हंगामाची जोरदार तयारी केली. पूर्वमशागत करून पेरणीसाठी सज्ज झालेल्या शेतकऱ्यांना परतीचा पाऊस समाधानकारक झाला नाही. त्याचा रब्बी हंगामात ज्वारी, गहू, मका या तृणधान्यांबरोबर कडधान्य व गळीत धान्याच्या पेरणी क्षेत्रावर परिणाम झाला. नोव्हेंबरच्या मध्यावर सलग तीन दिवस पाऊस आणि ढगाळ वातावरणाचा विपरित परिणाम झाला. परिणामी अल्प काळात चांगले उत्पन्न देणाऱ्या पिकांची पेरणी कमी झाल्याने शेतकऱ्यांच्या आणखी आर्थिक फटका बसणार आहे.

रब्बी हंगामात ज्वारी, गहू, मका, आदी तृणधान्यांखाली २९,५६० हेक्टर क्षेत्रावर पेरणीचे उद्दिष्ट होते. पण प्रत्यक्षात ९,२३३ हेक्टरवर पेरणी झाली आहे. ज्वारीची ५० टक्के पेरणी झाली असली, तरी गहू व मका पिकांची अत्यंत नगण्य अशी केवळ दहा ते १२ टक्के पेरणी करण्यात आली आहे. तर कडधान्याच्या १० हजार हेक्टरपैकी केवळ दोन हजार ५६० हेक्टरवर पेरण्या करण्यात आल्या आहेत. जिल्ह्यात सूर्यफूल, करडई आदी गळीत धान्याखालील ७५ हेक्टर असे नगण्य क्षेत्र असले तरी, या पिकांखालील पेरण्या ५० टक्क्यांपर्यंत कशाबशा पूर्ण झाल्या आहेत. रब्बी हंगामात ४० हजार २९७ हेक्टरवर पेरणीचे उद्दिष्ट असताना आतापर्यंत केवळ १५ हजार ८०० हेक्टरवर पेरणी झाली असून, उद्दिष्टापेक्षा ६१ टक्के क्षेत्रावर पेरण्या अपूर्ण राहिल्या आहेत. ज्या ठिकाणी सिंचन सुविधा आहे, अशाच बुहतांश क्षेत्रावर पेरण्या झाल्या आहेत. मात्र, जेथे केवळ पावसाच्या पाण्यावर पेरण्या घेतल्या जातात, तेथील क्षेत्रावर घट झाली असल्याचे कृषी अभ्यासकांची सांगितले.

००००

कोट...

पाऊस कमी झाल्याचा रब्बी क्षेत्रावर परिणाम झाला. त्याचबरोबर ऐन पेरणीदरम्यान नोव्हेंबर महिन्यात सलग तीन दिवसांच्या पावसामुळे शेतकऱ्यांना पेरणीच करता आली. हंगाम पुढे जात असल्याने शेतकऱ्यांनी रब्बी पिकाची पेरणी कमी केली असल्याची शक्यता आहे.

प्रा. अशोक पिसाळ, कृषी महाविद्यालय

००००

चौकट...

रब्बी हंगामातील पेरणी क्षेत्र (हेक्टरमध्ये)

पीक उद्दिष्ट पेरणी

ज्वारी १५,९३२ ७,३८२

गहू ७,७६७ ९००

मका ५,७९१ ९५१

कडधान्ये १०,२६७ २,५६०

गळीत धान्ये ७५ ३३

०००००

महापालिका लोगो

म. ट. प्रतिनिधी, कोल्हापूर

राज्य सरकारच्या आरोग्य विभागाच्यावतीने राबवण्यात येत असलेल्या गोवर, रुबेला लसीकरण मोहिमेत कोल्हापूर महापालिका राज्यात अव्वल ठरली आहे. महापालिकेच्या आरोग्य विभागाने राबवलेल्या मोहिमेत ८८ टक्के लसीकरण पूर्ण झाले आहे. कोल्हापूर महापालिकेनंतर नवी मुंबई व वसई-विरार महापालिकेंचा क्रमांक लागतो. मोहिमेचे उद्दीष्ट पूर्ण करण्यासाठी शनिवारपासून (ता.२९) महापालिकेच्या ११ नागरी प्राथमिक आरोग्य केंद्रात लसीकरण करण्यात येणार आहे.

गोवर अत्यंत संक्रामक आणि घातक आजार आहे. या आजाराचे प्रमाण बालकांमध्ये दिसून येते. गोवरचा अति फैलाव झाल्यास मृत्यू होऊ शकतो. तर रुबेला मुले व प्रौढ व्यक्तींना होऊ शकतो. पण गर्भवती महिलांना रुबेलाचा संसर्ग झाल्यास गर्भपात किंवा जन्मजात दोष निर्माण होण्याची शक्यता अधिक असते. त्यामुळेच राज्य सरकारच्या आरोग्य विभागाच्यावतीने गोवर व रुबेला लसीकरणाची मोहीम हाती घेण्यात आली.

राज्य सरकारच्या मार्गदर्शक सुचनेनुसार महापालिकेच्यावतीने २७ नोव्हेंबरपासून नऊ महिने ते १५ वर्षे वयोगटातील मुलांना लसीकरण करण्यास सुरुवात केली. पहिल्या पंधरा दिवसांत महानगरपालिकेच्या शाळा व त्यानंतर खासगी, अनुदानित, विनाअनुदानित व अंगणवाडीतील मुलांसाठी लसीकरण मोहीम राबवली. लसीकरणामुळे गोवर व रुबेला आजारांना अटकाव करण्यासाठी प्रतिकारशक्ती वाढत असल्याने पालकांनी विशेष प्रतिसाद दिला. त्यामुळे आजअखेर महापालिका क्षेत्रातील एक लाख १७ हजार ५०२ मुलांना म्हणजेच ८८ टक्के लसीकरण करण्यात आले. लसीकरणामध्ये कोल्हापूर महपालिकेने राज्यात अव्वल क्रमांक मिळवला आहे.

लसीकरण मोहीम अंतिम टप्प्यात आली असल्याने शाळाबाह्य मुलांना लस देण्यास शनिवारपासून सुरुवात होणार आहे. महापालिकेच्या ११ नागरी प्राथमिक आरोग्य केंद्रामार्फत सकाळी नऊ ते दुपारी एक वाजेपर्यंत लसीकरणाची सुविधा उपलब्ध केली आहे. ३१ डिसेंबरपर्यंत लसीकरण मोहीम राबवण्यात येणार होती, पण पूर्ण उद्दीष्टपूर्तीसाठी आणखी आठवडाभर लसीकरण मोहीम सुरू राहणार असल्याची शक्यता महापालिकेच्या आरोग्य विभागाने व्यक्त केली.

म. टा. वृत्तसेवा, हातकणंगले

पाडळी (ता. हातकणंगले) येथील जलस्वराज्य पाणी योजनेत ८८ लाखांचा भ्रष्टाचार झाला असून, याची चौकशी करण्याची मागणी ग्रामस्थ राहुल पाटील यांनी उच्च न्यायालयात याचिका दाखल करून केली होती. याबाबत सुनावणी होऊन ग्रामपंचायत, जिल्हा परिषद व राज्य सरकारला मुंबई उच्च न्यायालयाने नोटीस काढून न्यायालयात म्हणणे सादर करण्याचे आदेश दिले आहेत. यामुळे सर्वत्र खळबळ उडाली आहे.

पाडळीतील जलस्वराज्य पाणीपुरवठा योजना सन २००९ मध्ये पूर्ण झाली. योजनेसाठी ८८ लाख खर्च करण्यात आला. मात्र, योजना पूर्ण होऊनही ग्रामपंचायतीकडे अद्याप हस्तांतरित करण्यात आलेली नाही आणि योजनाही सुरू झालेले नाही. गावाला सध्या विहिरीतून पाणीपुरवठा सुरू आहे. योजनेतील भ्रष्टाचार व कागदपत्रे मिळत नसून ग्रामपंचायतीकडे या योजनेचे पूर्ण दप्तरही उपलब्ध होत नाही.

यामुळे पाडळी येथील राहुल वसंतराव पाटील यांनी माहितीच्या अधिकाराखाली माहिती मागवून जिल्हा परिषदेसमोर उपोषणही केले होते. तरीही न्याय न मिळाल्याने त्यांनी एप्रिल २०१७ मध्ये योजनेसंदर्भात उच्च न्यायालयात याचिका दाखल केली होती. याबाबत मुंबई उच्च न्यायालयात सुनावणी सुरू आहे. योजनेसाठी ८८ लाख रुपये खर्च होऊन गावात योजनेचे पाणी मिळत नसल्याने न्यायालयाने जिल्हा परिषद व राज्य सरकारवर ताशेरे ओढले. या प्रकल्पाची संपूर्ण माहिती न्यायालयात सादर करण्याचे आदेश उच्च न्यायालयाच्या न्यायाधीश अनुजा प्रभुदेसाई व न्यायाधीश रणजित मोरे यांनी दिले आहेत.

०००००

म. टा. वृत्तसेवा, गारगोटी

भुदरगड तालुक्यातील राष्ट्रवादी काँग्रेसच्या वतीने भुदरगड तहसीलदार कार्यालयावर जनतेच्या रेशन कार्डाच्या अडचणी, विविध पेन्शन योजना, वाढीव वीज बिलाच्या निषेधार्थ राष्ट्रवादी काँग्रेसच्या वतीने माजी आमदार के. पी. पाटील यांच्या नेतृत्वाखाली तहसीलदार कार्यालयावर आक्रोश मोर्चा काढण्यात आला.

जोतिबा मंदिरापासून मोर्चास सुरुवात झाली. सार्वजनिक वितरण व्यवस्था पारदर्शक व भ्रष्टाचारमुक्त करण्याच्या नावाखाली सर्वसामान्य गोरगरीब जनतेचे प्रचंड हाल होत आहेत, त्यांना न्याय देण्यासाठी सध्या सुरू असलेल्या रेशन कार्डधारकांचे आधार कार्डासाठी सक्तीची अंगठा सिस्टीम त्वरित बंद करा, अंत्योदय योजनेतील बंद झालेली ७७८ कार्डे पूर्ववत सुरू करून त्यांना पूर्वीप्रमाणे कार्डधारकास ३५ किलो धान्य वितरण द्यावे, खराब झालेले रेशन कार्ड विनामोबदला बदलून द्या, गॅस धातकाना रॉकेल चालू करा, बायोमेट्रिक रेशन वितरण व्यवस्था बंद करा, तालुक्यातील सात ते आठ हजार सुरक्षा योजनेपासून वंचित आहेत. त्यांना ताबडतोब धान्य सुरू करा, २८०० निराधार लोकांची बंद केलेल्या पेन्शन पूर्ववत सुरू करा, सातबारा कोरा करा, ६० वर्षांवरील शेतकऱ्यांना शेतकरी पेन्शन योजना सुरू करा, अशा मागण्या करण्यात आल्या.

मोर्चात राष्ट्रवादी जिल्हा कार्यकारी अध्यक्ष अनिलराव साळोखे, जिल्हा बँकेचे संचालक रणजित पाटील, तालुका अध्यक्ष विश्वनाथ कुंभार, पंडितराव केणे, तालुका संघाचे चेअरमन प्रा. बाळ देसाई, बिद्रीचे संचालक मधुकर देसाई, धनाजीराव देसाई, के.ना.पाटील, अशोक कांबळे,

माजी संचालक सुनील कांबळे, विलास झोरे, आदींसह कार्यकर्ते उपस्थित होते.

००००

म. टा. वृत्तसेवा, गडहिंग्लज

जरळी (ता. गडहिंग्लज) येथे उसाने भरलेल्या बैलगाडीच्या टायरवर चढत असताना पाय घसरून आणि चाकाखाली पडल्याने चाक डोक्यावरून एकाचा मृत्यू झाला. मारुती पांडुरंग धनगर (वय ३७) असे या ऊसवाहतूक करणाऱ्या शेतमजुराचे नाव आहे. याबाबतची नोंद गडहिंग्लज पोलिस ठाण्यात झाली आहे.

म. टा. वृत्तसेवा, इचलकरंजी

शहर आणि परिसरात दहशत माजविलेल्या गुंड चंद्रकांत लोहार याच्यासह असिफ बशीर मुजावर, विशाल तुकाराम लांडगे, गुंड्या गोवणकोप, शीतल मारुती सोलगे, याकूब सिकंदर मलिक (सर्व रा. जुना चंदूर रोड) व मल्लेश ऊर्फ मल्लिनाथ विजय पालापुरे (रा. गुरुकन्नननगर) सातजणांच्या टोळीविरोधात पुणे येथील विशेष मोक्का न्यायालयात दोषारोपपत्र दाखल करण्यात आले आहे.

पोटगी मिळवून देण्याचे आमिष दाखवून महिलेवर बलात्कार, मारहाण व लूट केल्याप्रकारणी चंद्रकांत लोहार याच्यासह सातजणांविरुद्ध पीडित महिलेने शिवाजीनगर पोलिस ठाण्यात फिर्याद दिली आहे. याप्रकरणी या सर्वांविरोधात पोलिसांत गुन्हा दाखल केला होता. लोहारविरोधात जिल्ह्यातील विविध पोलीस ठाण्यात १३ गंभीर स्वरुपाचे गुन्हे नोंद असून एका गुन्ह्यात त्याला शिक्षाही झाली आहे, तर त्याचे सहकारी असिफ मुजावर याच्यावर दोन, गुंड्या गोवणकोप यांच्या विरोधात तीन गुन्हे नोंद आहेत. पोलिसांनी या टोळीविरोधी मोक्कांर्गत कारवाईचा प्रस्ताव तयार करून अप्पर पोलिस महासंचालकांकडे मंजुरीसाठी पाठविला होता. त्याला मंजुरी मिळाल्याने मोक्का कोर्टात दोषारोपपत्र दाखल केले आहे.

००००

फोटो -

इचलकरंजीत प्रांताधिकाऱ्यांची

खुर्ची पळविण्याचा प्रयत्न

म. टा. वृत्तसेवा, इचलकरंजी

महागाईविरोधात मनसेच्या वतीने शुक्रवारी प्रांताधिकारी कार्यालयावर घंटानाद मोर्चा काढला. यावेळी आंदोलकांनी प्रवेशद्वारात ठिय्या मारत जोरदार शंखध्वनी केला. प्रांताधिकारी उपस्थित नसल्याने त्यांची खुर्ची पळविण्याचा प्रयत्न करणारे आंदोलक व पोलिस यांच्यात झटापट झाल्याने काही काळ तणाव निर्माण झाला.

वाढत्या महागाईने जनता त्रस्त झाल्याने महागाई कमी करावी, अशी मागणी करत मनसेच्या वतीने काढलेल्या मोर्चाला पक्ष कार्यालयापासून सुरुवात झाली. प्रमुख मार्गावरून घोषणा देत व घंटानाद करत मोर्चा प्रांत कार्यालयासमोर आल्यानंतर आंदोलकांनी प्रवेशद्वारातच ठिय्या मारला. सरकारविरोधात घोषणा देत शंखध्वनी केला. कार्यालयात प्रांताधिकारी समीर शिंगटे हे उपस्थित नव्हते. त्यामुळे संतप्त आंदोलकांनी त्यांची रिकामी खुर्ची उचलून ती कार्यालयाबाहेर पळविण्याचा प्रयत्न केला. त्यामुळे पोलिसांची चांगलीच तारांबळ उडाली.

म. टा. प्रतिनिधी, कोल्हापूर

तंबाखू नियंत्रण कायद्यान्वये जिल्ह्यातील १६९ शाळा तंबाखूमुक्त झाल्या असून यापुढील काळात जिल्ह्यतील सर्वच शाळा आणि महाविद्यालये तंबाखुमुक्त करण्याचा संकल्प असल्याचे अतिरिक्त जिल्हाधिकारी नंदकुमार काटकर यांनी सांगितले. जिल्हाधिकारी कार्यालयात तंबाखू नियंत्रण कायदा २००३ अन्वये स्थापन करण्यात आलेल्या जिल्हास्तरीय सनियंत्रण समितीच्या बैठकीत ते बोलत होते.

जिल्हाधिकारी कार्यालयात झालेल्या बैठकीत काटकर यांनी आढावा घेतला. काटकर यांनी यावेळी कायद्याचा वापर करुन शैक्षणिक संस्था परिसर तंबाखुमुक्त ठेवण्यासाठी पावले उचलावीत, असे आदेश दिले. या कायद्यान्वये नोव्हेंबरअखेर जिल्ह्यातील ७६ जणांवर दंडात्मक कारवाई करून १९ हजार ४०० रूपयाचा दंड वसूल करण्यात आल्याची माहिती यावेळी देण्यात आली. जिल्हा सल्लागार सुधीर घोलप, शिल्पा बांगर यांनी स्वागत केले. जिल्हा शल्य चिकित्सक डॉ. केंपी.पाटील, महापालिका आरोग्य अधिकारी डॉ. दिलीप पाटील, पोलिस निरीक्षक ए.व्ही. पवार, अन्न व औषध प्रशासनचे सहाय्यक आयुक्त मोहन केंबळकर, समिती सदस्य बाळासाहेब भोसले, धनाजी मोरुसकर, दीपक ढाले, रवि पाटील आदी यावेळी उपस्थित होते.

सोलापूर : पंतप्रधान नरेंद्र मोदी नऊ जानेवारी रोजी सोलापूर दौऱ्यावर येणार आहेत. देहू-आळंदी पालखी मार्ग भूमीपूजन, तुळजापूर-अक्कलकोट राष्ट्रीय महामार्ग, कामगारांसाठीच्या तीस हजार घरकुलांचे भूमीपूजन, स्मार्ट सिटी, १८० कोटी ड्रेनेज योजना आदी विविध विकासकामांचे उद्घाटन पंतप्रधानांच्या हस्ते होणार आहे. या शिवाय दौऱ्यात एक जाहीर सभा ही होणार आहे. हा संपूर्ण कार्यक्रम सोलापुरात होणार की, पंढरपुरात हे मात्र अद्याप नक्की झालेले नाही. मात्र, सोलापुरात हा कार्यक्रम होण्याची शक्यता जास्त आहे.

पंतप्रधान नरेंद्र मोदी २०१४सालच्या लोकसभा निवडणुकीपूर्वी सोलापूर आणि पंढरपुरात आले होते. आगामी विधानसभा आणि लोकसभा निवडणुका काही महिन्यांवर येऊन ठेपल्या आहेत. या पार्श्वभूमीवर पंतप्रधान मोदी यांच्या हस्ते विविध विकासकामांचे उद्घाटन करून जाहीर सभेद्वारे निवडणुकीच्या प्रचाराचा नारळ फोडण्याच्या हालचाली सुरू आहेत.

म. टा. प्रतिनिधी, कोल्हापूर

'उदं गं आई उदं'...च्या गजरात आज नेहरुनगर परिसरातील ओढ्यावरील रेणुकादेवीची आंबिल यात्रा धार्मिक वातावरणात साजरी झाली. भाविकांनी देवीला भाजी भाकरी, वडी, आंबिलचा नैवेद्य दाखवला. देवीच्या दर्शनासाठी भाविकांनी पहाटे तीन वाजल्यापासून रात्री उशिरापर्यंत गर्दी केली होती.

सौंदत्ती डोंगरावरील रेणुका देवीची यात्रा शुक्रवारी झाल्यानंतर येथे रेणुका भक्त मंडळाकडून आज आंबिल यात्रेचे आयोजन केले होते. यात्रेनिमित्त पहाटे तीन वाजता देवीला अभिषेक घालून पुजारी सुनील मेढे, मदनआई जाधव यांनी रेणुकादेवीसह परशुराम, जमदग्नी ऋषीची सालंकृत पूजा बांधली. त्यानंतर न्यू पॅलेसवरुन छत्रपती घराण्याकडील पहिला मानाचा नैवेद्य दाखवल्यानंतर देवीची आरती झाली. पहाटे साडेपाच वाजल्यापासून शहरातील भाविकांकडून नैवेद्य देण्यासाठी गर्दी झाली. त्यासाठी स्वतंत्र कक्ष उघडण्यात आला होता. भाविकांकडून आलेला नैवेद्य परत भाविकांना देण्यात आल्याने अन्नाची नासाडी झाली नाही. अनेक भाविकांनी देवीचे दर्शन घेत भोजनाचा आस्वाद घेतला. आंबिल यात्रेनिमित्त परिसरात यात्रा भरली होती. खेळणी, विविध वस्तूंचे स्टॉल मांडले होते. लहान मुलांनी खेळण्यांच्या दुकानांसमोर गर्दी केली. खाद्यपदार्थांची चांगली विक्री झाली. भाविकांनी केलेल्या खरेदीमुळे यात्रेत चांगलीच उलाढाल झाली.

म. टा. प्रतिनिधी, कोल्हापूर

शाहूपुरीतील श्वेतांबर मूर्तीपूजक तपागच्छ जैन संघाच्यावतीने शत्रुंजय सोसायटीत गेल्या दीड महिन्यापासून उपधान महातप विधी सुरू असून उपधान विधी समारोपनिमित्त शनिवारी शहरातून भव्य शोभायात्रा काढण्यात आली. चातुर्मासापासून आचार्य श्री नररत्नसूरीश्वर महाराजांच्या उपस्थितीत शाहूपुरीतून शोभायात्रा काढण्यात आली.

झांजपथकाचा अखंड गजर, अग्रभागी असलेला इंद्रध्वज, रथ आणि २७ बग्गींचा समावेश असलेल्या शोभायात्रेला आचार्य श्री नररत्नसूरीश्वर महाराज व नगरसेवक ईश्वर परमार यांनी ध्वज फडकावल्यानंतर प्रारंभ झाला. आचार्यांसोबत जैन मुनी, श्रावक-श्राविका आणि जैन मारवाडी समाजातील नागरिक शोभायात्रेत सहभागी झाले होते. स्टेशन रोड, व्हीनस कॉर्नर, फोर्ड कॉर्नर, उमा टॉकीज रोड, गोखले कॉलेज या मार्गावरून ध्यानचंद हॉकी स्टेडियमसमोरील शत्रुंजय सोसायटीत शोभायात्रा दाखल झाली. शोभायात्रेचे रहिवाशांनी आणि श्रावक-श्राविकांनी जल्लोषी आणि भक्तीमय वातावरणात स्वागत केले.

शोभायात्रा सोसायटीत दाखल झाल्यानंतर दुपारी महाप्रसाद वाटप करण्यात आले. हजारो भाविकांनी महाप्रसादाचा लाभ घेतला. भक्तीमय वातावरणात चातुर्मासामध्ये सहभागी झालेल्या श्रावक-श्रावकांचा मालारोपण विधी आचार्यांच्या हस्ते पार पडला. सायंकाळी प्रमुख पाहुण्यांच्या हस्ते सहभागी साधकांचा सत्कार करण्यात आला. यावेळी अध्यक्ष प्रवीण मणियार, विजय शहा, वसंत शहा, महावीर शहा, रोहित पारेख, तेजल शहा, राजेंद्र शहा, उदय शहा, अमृतभाई शहा, नरेंद्र राठोड, मनीष शहा, जतीन शहा यांच्यासह जैन बांधव मोठ्या संख्येने शोभायात्रेत सहभागी झाले होते.

उपधान महातपाचा समारोप

उपधान महातप समारोपानिमित्त विविध कार्यक्रम होत आहेत. समारोपानिमित्त रविवारी (ता. ३०) सकाळी भक्तीपूजा नगर येथील नॉर्थस्टार हॉस्पिटल येथे भव्य सभामंडपात मोक्ष मालारोपण कार्यक्रम होणार आहे. त्यानंतर आराधाकांकडून महाप्रसादाचे वाटप करण्यात येणार आहे. यावेळी उपधान महातपाचा समारोप होणार आहे. त्यास उपस्थित राहण्याचे आवाहन आचार्य नररत्नसूरीश्वर महाराजांनी केले.

संघटनांचे प्रयत्न

कोल्हापूर जिल्ह्यातील अतिरिक्त ठरलेल्या शिक्षकांचे समायोजन गतीने व्हावे यासाठी गेले काही दिवस संघटनांच्या पातळीवर आणि वैयक्तीक स्तरावरही प्रयत्न सुरू आहेत. प्रशासकीय पातळीवर शिक्षक नसलेल्या शाळांत अतिरिक्त शिक्षकांच्या नियुक्त्या सुरू केल्या आहेत. दरम्यान या शिक्षकांचे ज्या-त्या तालुक्यांतच समायोजन करावे यासाठी शिक्षक संघटना प्रयत्नशील आहेत. शनिवारी त्याच मागणीसाठी ५० हून अधिक शिक्षकांनी जिल्हा परिषद गाठली होती. यापूर्वीही शिक्षकांनी अशी मागणी लावून धरली आहे. मात्र, त्याचा कितपत परिणाम होतो, याविषयी साशंकतेची स्थिती आहे.

म. टा. प्रतिनिधी, कोल्हापूर

बंड केलेल्या १२ संचालकांच्या दबावामुळे बॅकफूटवर गेलेल्या नेत्यांनी जिल्हा दूध उत्पादक संघाचे (गोकुळ) अध्यक्ष विश्वास पाटील यांना एक जानेवारीनंतर कार्यकारी संचालकांकडे राजीनामा देण्याचा आदेश दिला आहे. चार जानेवारीच्या तहकूब सभेत अध्यक्षांचा राजीनामा मंजूर होणार असल्याचे सांगण्यात येत आहे. 'गोकुळ'च्या संचालक मंडळात फूट पडली नसल्याचा दावाही माजी आमदार महादेवराव महाडिक, पी. एन. पाटील यांनी केला आहे.

'गोकुळ'चे अध्यक्ष पाटील यांनी राजीनामा द्यावा यासाठी गेले दोन महिने ज्येष्ठ संचालकांनी नेत्यांमागे तगादा लावला होता. पण, नेत्यांनी वेळ आल्यावर राजीनाम्याचा निर्णय घेतला जाईल, असे सांगून त्यांना टाळले. त्यामुळे ज्येष्ठ संचालकांसह १२ जणांनी एकत्र येऊन अध्यक्षांविरोधात बंड केले. हे बंड मोडून काढण्यासाठी नेत्यांनी संचालकांची बैठक घेतली. बंड चालणार नाही अशी समजही नेत्यांनी दिली. वेळ आल्यावर अध्यक्षांचा राजीनामा घेतला जाईल, असे आश्वासन त्यांनी दिले होते.

अध्यक्ष पाटील यांनी १४ डिसेंबर रोजी महाडिक यांच्याकडे राजीनामा दिला. शुक्रवारी (ता. २८) संचालकांची सभा होती. सभेत पाटील यांचा राजीनामा मंजूर होण्याची अटकळ होती. माजी आमदार महाडिक यांनी कार्यकर्ते रघू पाटील यांच्यामार्फत कार्यकारी संचालक डी. व्ही. घाणेकर यांच्याकडे अध्यक्षांचा राजीनामा घेण्याविषयीचा निरोप दिला होता. मात्र अध्यक्ष पाटील यांनी महाडिकांचा आदेश डावलला. जानेवारी महिन्यात राजीनामा देणार असल्याचे अध्यक्ष पाटील यांनी सांगितले. मात्र पाटील यांनी राजीनामा न दिल्यास सभेला जायचे नाही, असा निर्णय १२ संचालकांनी घेतला. तरीही अध्यक्ष पाटील यांनी सभा घेण्याचा प्रयत्न केला. यावेळी सभेला पी. एन. पाटील गटाचे चार संचालकच उपस्थित राहिले. कोरमअभावी ही सभा तहकूब झाली.

संचालकांच्या भूमिकेने हादरलेल्या महाडिक आणि पाटील यांनी संचालकांशी संपर्क साधून तहकूब सभा चार जानेवारी रोजी घेण्याचा निर्णय घेतला. सभेत पाटील यांना राजीनामा देण्याचे आदेश नेत्यांनी दिले आहेत. पाटील यांनी राजीनामा देण्याची तयारी दर्शवली आहे. पण, पाटील हे राजीनाम्याचा निर्णय बदलू शकतील अशी शक्यता घेऊन बंड केलेल्या १२ संचालकांचा गट फुटू नये यासाठी काळजी घेण्यास सुरुवात केली आहे. मुंबई येथे गोकुळच्या प्रकल्पाचे विस्तारीकरण करण्यात येणार असून त्यासाठी जमीन खरेदी करण्यात येणार आहे. हा व्यवहार अध्यक्ष पाटील यांच्या काळातच व्हावा यासाठी त्यांनी राजीनामा देऊ नये यासाठी त्यांच्यावर पी. एन. पाटील गट दबाव टाकत असल्याचे समजते. तर दुसरीकडे १२ संचालकांनी अध्यक्षांचा राजीनामा जोपर्यंत सादर होत नाही तोपर्यंत सभेला उपस्थित न राहण्याचा निर्णय घेतला आहे. त्यामुळे कोंडी होणार असल्याने नेत्यांनी अध्यक्षांना राजीनामा देण्याचे आदेश दिले आहेत.

शुक्रवारी झालेले पेल्यातील वादळ शमले आहे. काही संचालकांचे गैरसमज झाले आहेत. मी आणि पी. एन. पाटील यांनी एक जानेवारीनंतर अध्यक्ष पाटील यांना राजीनामा देण्यास सांगितले आहे. त्यांनी राजीनामा देण्याची तयारी दर्शवली आहे.

- महादेवराव महाडिक, माजी आमदार

अध्यक्ष विश्वास पाटील हे जानेवारी महिन्यात राजीनामा देतील हे ठरले होते. पण काही संचालकांमध्ये राजीनाम्यावरुन गैरसमज झाला आहे. तो दूर करण्यासाठी विश्वास पाटील यांना अध्यक्षपदाचा राजीनामा देण्यास सांगितले आहे.

- पी. एन. पाटील, माजी आमदार

०००

(मूळ कॉपी)

म. टा. प्रतिनिधी, कोल्हापूर

बंड केलेल्या १२ संचालकांच्या दबावामुळे बॅकफूटवर जाणाऱ्या नेत्यांनी जिल्हा दूध उत्पादक संघाचे (गोकुळ) अध्यक्ष विश्वास पाटील यांना एक जानेवारीनंतर कार्यकारी संचालकांकडे राजीनामा देण्याचा आदेश दिला आहे. चार जानेवारीच्या तहकूब सभेत अध्यक्षांचा राजीनामा मंजूर होणार असल्याचा विश्वास व्यक्त केला आहे. गोकुळच्या संचालक मंडळात कोणताही फूट पडली नसल्याचा दावाही माजी आमदार महादेवराव महाडिक, पी.एन. पाटील यांनी केला आहे.

गोकुळच्या अध्यक्षांनी राजीनामा द्यावा, यासाठी गेले दोन महिने ज्येष्ठ संचालकांनी नेत्यांच्यामागे तगादा लावला होता. पण नेत्यांनी वेळ आल्यावर राजीनाम्याचा निर्णय घेतला जाईल,असे सांगून टाळले होते. दरम्यान ज्येष्ठ संचालकांनी एकत्र मोट बांधत १२ संचालकांनी अध्यक्षांविरोधात बंड केले. बंड मोडून काढण्यासाठी नेत्यांनी संचालकांची बैठक घेतली. बैठकीत गोकुळमध्ये बंड चालणार नाही अशी समजही नेत्यांनी दिली होती. तसेच वेळ आल्यावर अध्यक्षांचा राजीनामा घेतला जाईल, असे आश्वासन दिले होते.

१४ डिसेंबर रोजी अध्यक्ष पाटील यांनी महाडिक यांच्याकडे राजीनामा दिला होता. काल शुक्रवारी (ता. २८) संचालकांची सभा होती. या सभेत पाटील यांचा राजीनामा मंजूर होण्याची अटकळ होती. आमदार महाडिक यांनी त्यांचे कार्यकर्ते रघू पाटील यांच्याकडून कार्यकारी संचालक डी.व्ही. घाणेकर यांना पाटील यांनी अध्यक्षपदाचा राजीनामा देण्याचा निरोप दिला होता. पण अध्यक्ष पाटील यांनी महाडिक यांचा आदेश डावलून राजीनामा देण्यास नकार दिला. जानेवारी महिन्यात राजीनामा देणार असल्याचे अध्यक्ष पाटील यांनी सांगितले. अध्यक्षांनी राजीनामा दिला नाही तर सभेला जायचे नाही, असा निर्णय १२ संचालकांनी घेतला. तरीही अध्यक्ष पाटील यांनी सभा घेण्याचा प्रयत्न केला. सभेला पी.एन. पाटील गटाचे चार संचालक उपस्थित होते. सभेचा कोरम न भरल्याने अध्यक्षांनी सभा तहकूब केली.

या घटनेने खळबळ उडाल्याने नेत्यांनी फोनाफोनी करुन तहकूब सभा चार जानेवारी रोजी घेण्याचा निर्णय घेण्यात आला. या सभेत राजीनामा देण्याचे आदेश नेत्यांनी दिले आहेत. अध्यक्ष पाटील यांनी राजीनामा देण्याची तयारी दर्शवली आहे. पण शुक्रवारच्या सभेप्रमाणे अध्यक्ष राजीनाम्याचा निर्णय बदलू शकतील अशी शक्यता घेऊन महाडिक गटाच्या १२ संचालकांचा गट फूटू नये यासाठी काळजी घेण्यास सुरुवात केली आहे. मुंबई येथे गोकुळच्या प्रकल्पाचे विस्तारीकरण करण्यात येणार असून त्यासाठी जमीन खरेदी करण्यात येणार आहे. जमिनीचा व्यवहार अध्यक्ष पाटील यांच्या काळातच व्हावा यासाठी त्यांनी राजीनामा देऊ नये यासाठी त्यांच्यावर दबाव टाकण्यात येत आहे. तर दुसरीकडे १२ संचालकांनी अध्यक्षांचा राजीनामा जोपर्यंत सादर होत नाही तोपर्यंत सभेला उपस्थित राहण्याचा निर्णय घेतला आहे. त्यामुळे गोकुळच्या कारभारात कोंडी होणार असल्याने नेत्यांनी अध्यक्षांना राजीनामा देण्याचे आदेश दिले आहेत.

००००

शुक्रवारी झालेले पेल्यातील वादळ शमले आहे. काही संचालकांचे गैरसमज झाले आहेत. मी आणि पी.एन. पाटील यांनी एक जानेवारीनंतर अध्यक्ष पाटील यांना राजीनामा देण्यास सांगितले आहे. त्यांनी राजीनामा देण्याची तयारी दर्शवली आहे.

महादेवराव महाडिक, माजी आमदार

०००००

अध्यक्ष विश्वास पाटील हे जानेवारी महिन्यात राजीनामा देतील हे ठरले होते. पण काही संचालकांमध्ये राजीनाम्यावरुन गैरसमज झाला आहे. तो दूर करण्यासाठी विश्वास पाटील यांना अध्यक्षपदाचा राजीनामा देण्यास सांगितले आहे.

पी.एन. पाटील, माजी आमदार

लोगो : सतेज कृषी प्रदर्शन

म. टा. प्रतिनिधी, कोल्हापूर

विविध जातीचे पशुपक्षी, ३०० हून अधिक जातिवंत जनावरे, गायींच्या विविध प्रजाती, नर्सरींची आकर्षक फुलझाडे आणि महिला बचत गटांनी उत्पादित केलेल्या नानाविध वस्तू हे सतेज कृषी प्रदर्शनाचे वैशिष्ट्य ठरत आहे. शनिवारी शहरासह जिल्ह्यातील विविध भागातील नागरिकांनी प्रदर्शन स्थळी भेट दिली. शेतकऱ्यांसाठी आयोजित व्याख्यानाला चांगला प्रतिसाद मिळाला.

कळंबा रोडवरील तपोवन मैदान येथे प्रदर्शन भरले आहे. प्रदर्शनात तब्बल १८० स्टॉल आहेत. यामध्ये ट्रॅक्टरचे नवीन मॉडेल्स, ठिबक सिंचनाची उत्पादने, डेअरी उत्पादनांच्या स्टॉलचा समावेश आहे. प्रदर्शनात सोळा लिटर दूध देणाऱ्या पंढरपुरी जातीच्या तब्बल ८०० किलो वजनाची व पाच फूट लांब शिंगे असलेली म्हैस पाहण्यासाठी शेतकऱ्यांनी गर्दी केली होती. येलूर येथील दत्तात्रय शिनगारे यांच्या मालकीची ही म्हैस आहे. याशिवाय हातकणंगले तालुक्यातील हेरलेच्या आदिनाथ पाटील यांच्या मालकीची विक्रमी १८ लिटर दूध देणारी मुऱ्हा जातीची म्हैस प्रदर्शनात आहे. या म्हशीचे वय आठ वर्षे असून एका दुभत्याला नऊ महिने दूध देत असल्याचे रत्नेश पाटील यांनी सांगितले. राधानगरी तालुक्यातील प्रकाश हळदीकर यांच्या मालकीची 'महाराष्ट्र कन्या'गाय आकर्षण ठरली आहे.

०००

तर चाळीस हजार रुपयांचे अतिरिक्त उत्पादन

प्रदर्शनाच्या दुसऱ्या दिवशी डॉ. सुरेश गंगावणे यांचे 'फायदेशीर दुग्ध व्यवसाय व्यवस्थापन' विषयावर व्याख्यान झाले. ते म्हणाले, 'दुभत्या जनावरांच्या संगोपणासाठी जास्त खर्च होतो. योग्य आहाराचे व्यवस्थापन करुन गायी, म्हशींचे संगोपन केले तर दूध उत्पादनात हमखास वाढ होते. वर्षाकाठी गायीच्या दुधात ४० हजार, तर म्हशींच्या दुधात ७० हजार रुपयांचे अतिरिक्त दूध उत्पादन मिळू शकेल. गायी, म्हशी रवंथ करत असताना त्यांच्या तोंडाला फेस आल्यावर त्या कमी दूध देतात. त्या जनावरांचे पचन व्यवस्थित होण्यासाठी रोज २० ग्रॅम खाण्याचा सोडा घालावा यामुळे दूध उत्पादन वाढेल.'