शिवसेनेची महाआरती

कोल्हापूर: अयोध्येत राममंदिराची उभारणी व्हावी, या मागणीसाठी शिवसेनेच्यावतीने बिनखांबी गणेश मंदिर येथे शिवसैनिकांनी महाआरती केली. महाआरतीनंतर शिवसेनेच्यावतीने 'जय श्रीराम' चा गजर केला. पक्षप्रमुख उद्धव ठाकरे अयोध्यात राममंदिर उभे रहावे, या मागणीसाठी गेले आहेत. आज सायंकाळी ठाकरे यांनी शरयू नदी घाटावरील महाआरतीत सहभागी झाले. राम मंदिरप्रश्नी शिवसेनेने राज्यभर महाआरतीचे नियोजन केले होते. आज शहरातील बिनखांबी मंदिर येथे उत्तर विधानसभा संपर्कप्रमुख रघुनाथ खडके यांच्या प्रमुख उपस्थित महाआरती करण्यात आली. गणपती आणि श्रीरामाची आरती करुन राम मंदिर लवकर बांधावे अशी प्रार्थना केली. आरतीनंतर शिवसैनिकांनी जय श्रीरामाचा गजर केला. यावेळी जिल्हा उपप्रमुख सुजित चव्हाण, पश्चिम महाराष्ट्र देवस्थान व्यवस्थापन समितीचे सदस्य शिवाजीराव जाधव, माजी नगरसेवक दत्ता टिपुगडे, हर्षल सुर्वे, शिवाजीराव पाटील, शहर प्रमुख दुर्गेश लिंग्रस, युवा सेनेचे मंजित माने, रवी चौगुले, शशी बिडकर, कमलाकर जगदाळे, रणजित आयरेकर, चैतन्य अष्टेकर, दीपाली शिंदे, बजरंग दलाचे संभाजी साळुंखे, महेश उरसाल यांच्यासह शिवसैनिक मोठ्या संख्येने उपस्थित होते.

म. टा. प्रतिनिधी, कोल्हापूर

'का रे दुरावा, का रे अबोला, जिवलगा कधी रे येशील तू, प्रथम तुज पाहता, आज कुणीतरी यावे, दिवसामागुन दिवस चालले' यासारख्या अवीट गीतांची पेशकश, गाण्यांच्या संदर्भातील वेगवेगळे किस्से अशा सांगितीक कार्यक्रमातून विविध कलाकारांनी संगीतकार-गायक व स्वरतीर्थ सुधीर फडके तथा बाबूजी यांच्या आठवणी जागवल्या. अंतिम फेरीतील दोन्ही गटातील प्रथम क्रमांकाच्या विजेत्यांना बक्षीस म्हणून अंदमानची मोफत सहल घडविण्याची घोषणा पालकमंत्री चंद्रकांत पाटील यांनी स्पर्धेच्या उद्घाटनप्रसंगी केले.

गायन समाज देवल क्लबतर्फे गायक संगीतकार सुधीर फडके यांच्या जन्मशताब्दी वर्षाचे औचित्याने राज्यस्तरीय गायन स्पर्धेच्या अंतिम फेरीचे आयोजन केले होते. अंतिम फेरीत ३६ स्पर्धकांनी गायन सादर केले. देवल क्लबचे अध्यक्ष व्ही.बी.पाटील यांच्या प्रमुख उपस्थितीमध्ये शनिवारी सकाळी अंतिम फेरीचे उद्घाटन झाले. याप्रसंगी देवल क्लबचे उपाध्यक्ष चारुदत्त जोशी, अरुण पुरोहित, राजेंद्र पित्रे, सुबोध गद्रे, उमा नामजोशी उपस्थित होते. श्रीकांत डिग्रजकर यांनी प्रास्ताविक केले.

दरम्यान राज्यस्तरीय गायन स्पर्धेत कोल्हापूरसह, मुंबई, पुणे, नाशिक, अमरावती, औरंगाबाद, रत्नागिरी गोवा येथील गायकांनी स्पर्धेत सहभागी नोंदवला आहे. १५ ते ३० वर्ष आणि ३१ ते ४५ वर्षे अशा दोन वयोगटात स्पर्धा रंगली. गायकांनी भावगीत, सिनेगीत, राष्ट्रभक्तीपर गीते, अभंग सादर केले. गायिका अनुराधा मराठे, उपेंद्र भट हे अंतिम फेरीचे परीक्षक तर प्राथमिक फेरीसाठी गायक महेश हिरेमठ व भाग्यश्री मुळे यांनी काम पाहिले.

आज 'बाबूजींची गाणी' अन् बक्षीस समारंभ

गायन स्पर्धेचा बक्षीस समारंभ रविवारी ता.२५ होणार आहे. पालकमंत्री पाटील यांच्या हस्ते स्पर्धेतील विजेत्यांना पारितोषिक प्रदान करण्यात येणार आहे. याप्रसंगी गायक संगीतकार श्रीधर फडके यांचा 'बाबुजींची गाणी' हा कार्यक्रम होणार आहे. संगीतसूर्य केशवराव भोसले नाट्यगृहात सायंकाळी पाच वाजता कार्यक्रमाला सुरुवात होईल.

..................

कोल्हापूरच्या कलाकरांनी स्पर्धा गाजवली

दोन्ही गटातील स्पर्धेत कोल्हापूरच्या गायक कलाकारांनी छाप पाडली. कसबा बीड येथील अंध गायक सिध्दराज पाटील हा १५ ते ३० वयोगटातील गायन स्पर्धेत प्रथम क्रमांकाचा विजेता ठरला. या गटात मोनिका साठे (शाहूवाडी) व्दितीय तर मृण्मयी जोशी (पुणे) हे तृतीय क्रमांकाचे विजेते आहेत. मुस्तकीन मोमीन (कोल्हापूर), अनुष्का आपटे (बेळगाव), सिध्दी वेताळ (मुंबई) यांना उत्तेजनार्थ क्रमांक दिले. मोठ्या गटात (३१ ते ४५) कोल्हापूरचा अभय कुमार पोतदारने प्रथम तर नवी मुंबईची श्रेया श्रीपाद देशपांडे उपविजेती ठरली. गोवा येथील समीर वायंगणकरने तृतीय क्रमांक पटकावला.

सदस्यांची मागणी; ३२ पानी प्रतिज्ञापत्र तयार

म. टा. प्रतिनिधी, कोल्हापूर

जिल्हा परिषदेच्या माध्यमिक शिक्षण विभागाचे शिक्षणाधिकारी किरण लोहार यांच्या चौकशीचा दैनंदिन अहवाल सदस्यांनी मागविल्यामुळे या प्रकरणांनी पुन्हा एकदा उचल खाल्ली. पाच सदस्यीय समितीकडून सध्या चौकशी सुरू आहे. दरम्यान जिल्हा परिषदेने केलेल्या कारवाईविरोधात त्यांनी 'मॅट'मध्ये दाखल केलेल्या याचिकेवर २७ नोव्हेंबर रोजी सुनावणी आहे. दुसरीकडे जिप प्रशासनाने बाजू मांडण्यासाठी ३२ पानी प्रतिज्ञापत्र सादर करण्यात येणार असल्याचे वृत्त आहे.

जिल्हा परिषदेच्या सर्वसाधारण सभेत ११ सप्टेंबर रोजी लोहारांना सक्तीच्या रजेवर पाठवून चौकशी करण्याचा ठराव झाला होता. मात्र सक्तीच्या रजेवर पाठविण्याच्या कारवाईवरुन पेच निर्माण झाला होता. सर्वसाधारण सभेतील ठरावानुसार त्यांच्या चौकशीसाठी शिक्षण समिती सभापती अंबरिश घाटगे यांच्या अध्यक्षतेखाली पाच सदस्यीय चौकशी समिती नेमली. चौकशी समिती व प्रशासनाकडे शिक्षणाधिकाऱ्यांच्या कामकाजाच्या विरोधात ५४ तक्रारी दाखल झाल्या. प्रशासनाने पाच ऑक्टोबर रोजी त्यांना कार्यमुक्त केले. त्या विरोधात त्यांनी महाराष्ट्र प्रशासकीय प्राधिकरणकडे (मॅट) दाद मागितली. 'मॅट' ने प्रशासनाच्या कार्यमुक्त करण्याच्या कारवाईला स्थगिती दिल्यानंतर ऑक्टोबर महिन्याच्या शेवटच्या आठवड्यात पुन्हा कार्यभार स्वीकारला. 'मॅट'पुढे प्रशासनाने भक्कमपणे बाजू मांडली नसल्याचा आक्षेपही सदस्यांनी नोंदविला.

दरम्यान पाच सदस्यीय चौकशी समितीने दोन वेळेला तक्रारदारांचे म्हणणे ऐकून घेतले आहे. समिती सदस्यांची या आठवड्यात पुन्हा बैठक होणार आहे. चौकशी समितीच्या कामाचा दैनंदिन अहवाल जिल्हा परिषद सदस्य राजवर्धन निंबाळकर यांनी प्रशासनाकडे मागितला आहे. यामुळे चौकशीचा मुद्दा पुन्हा ऐरणीवर आला आहे. दरम्यान जि.प. प्रशासनाकडून कोर्टात कारवाईमागील कारण, सर्वसाधारण सभेचा ठराव, तक्रारदारांचे म्हणणे मिळून ३२ पानी प्रतिज्ञापत्र सादर करण्यात येणार असल्याचे वृत्त आहे.

म. टा. वृत्तसेवा, इस्लामपूर

येथील बांधकाम व्यावसायिक साकेत उर्फ चिकू किरण कांबळेचा (वय ३२ रा. गुरुप्रसाद कॉलनी, राजारामनगर) आर्थिक देवाणघेवाणीतून निर्घृण खून झाल्याचे स्पष्ट झाले. शनिवारी, १७ नोव्हेंबरपासून ते बेपत्ता होते. त्यांचा खून करून मृतदेहाचे तुकडे करून मृतदेह वारणा नदीत टाकल्याची कबुली संशयिताने दिली आहे. पोलिसांनी दोघांना ताब्यात घेतले आहे.

संतोष ज्ञानू पवार (रा. शाहूनगर, इस्लामपूर, मूळगाव-पाटण, जि. सातारा) व अनिकेत गणेश पानिरे (रा. कार्वे, ता. वाळवा) अशी ताब्यात घेतलेल्या दोघांची नावे आहेत. या दोघांवर गुन्हा दाखल केला आहे. दरम्यान, आज दिवसभर चिकुर्डे व कणेगाव येथील वारणा नदी पात्रात पोलिसांनी मृतदेहाचा शोध घेतला मात्र रात्री उशिरापर्यंत मृतदेह सापडला नाही.

साकेत शनिवारी, १७ नोव्हेंबरला रात्री बेपत्ता झाला होता. रविवारी त्याची पत्नी स्नेहलने इस्लामपूर पोलिसात साकेत बेपत्ता असल्याची फिर्याद दिली होती. साकेत येथील शिवपार्वती अपार्टमेंटमध्ये कमिशनवर फ्लॅट विक्रीचे काम करत होता. येथे संशयित संतोष पवार इलेक्ट्रिशीयन म्हणून काम पाहतो. पवारचे 'शिवपार्वती'च्याच बांधकाम व्यवसायिकाकडून कामाचे १४ लाख रुपये येणे होते. या रकमेला साकेत मध्यस्थ होता. दिवाळीच्या आदल्या दिवशी, ५ नोव्हेंबरला साकेत आणि संतोषमध्ये पैशावरून वाद झाला होता. त्यावेळी एकमेकाला बघून घेण्याची भाषा वापरली होती. तपास सुरू असताना पवार गेल्या आठ दिवसांपासून रोज साकेतच्या नातेवाईकांसोबत पोलिस ठाण्यात दिवसभर असायचा. त्याचाही तपास पोलिसांनी केला होता. त्याच्या सांगण्यात तफावत आढळल्याने पोलिसांनी खोलात जाऊन त्याची तपासणी केली.

.. .. ..

.. .. .. .. ..

सिंगल फोटो...

म. टा. वृत्तसेवा, हातकणंगले

शाळेत निघालेल्या ग्रंथपाल महिलेची मोपेड हुपरी (ता. हातकणंगले) येथे रस्त्यावरील मुरुमावरून घसरून झालेल्या अपघातात महिला जागीच ठार झाली. कुमुदिनी कौतिकराव हिरे (मूळ गाव मालेगाव, जि. नाशिक, सध्या रा. शांतीनगर, हुपरी) असे त्यांचे नाव आहे. अपघात शनिवारी सकाळी दत्त मंदिरासमोर घडला.

याबाबत घटनास्थळावरून मिळालेली माहिती अशी : हुपरीतील शांतीनगर वसाहतीत कुमुदिनी हिरे कुटुंबीयांसह २५ वर्षांपासून राहत आहेत. त्या पट्टणकोडोली येथील बापूसाहेब हुपरे हायस्कूलमध्ये ग्रंथपाल म्हणून कार्यरत होत्या, तर त्यांचे पती कौतिकराव हिरे रयत शिक्षण संस्थेच्या हुपरी शाखेत शिक्षक म्हणून सेवेत आहेत. शनिवार सकाळी शाळा असल्यामुळे नेहमीप्रमाणे कुमुदिनी मोपेड (एम.एच.०९-ए.एक्स-४२१२) वरून पट्टणकोडोली येथे जाण्यासाठी निघाल्या होत्या. मात्र, घरापासून बाहेर पडल्यानंतर थोड्याच अंतरावर समोरून भरधाव वेगाने येणाऱ्या ट्रॅक्टरला चुकविण्याच्या प्रयत्नात त्यांनी मोपेड रस्त्याच्या कडेला घेतली. मात्र, तिथे मुरुमाचे मोठे दगड असल्याने गाडी घसरून त्या खाली पडल्या. यामध्ये पोटाला गंभीर दुखापत झाल्याने त्या जागीच ठार झाल्या. कुमुदिनी यांच्या पश्चात पती, दोन मुली असा परिवार आहे.

म. टा. प्रतिनिधी, कोल्हापूर

महापालिकेच्या गाळेधारकांना रेडीरेकननुसार भाडे आकारणी करण्याचा अधिकार आयुक्तांना मिळणार आहे. याबाबतची अधिसूचना लवकरच निघणार असून महापालिकेच्या २,०९५ गाळेधारकांना दिलासा मिळणार आहे.

शहरात महापालिकेच्या मालकीची २२ मार्केट आहेत. त्याठिकाणी २,०९५ दुकानगाळे आहेत. ११ महिने, तीन वर्षे, २० वर्षे व ३० वर्षे अशा कराराने संबंधित दुकानगाळे भाडेतत्वावर दिले आहेत. यापैकी १,५३५ दुकानगाळेधारकांची मुदत संपलेली आहे. मुदतवाढीसाठी इस्टेट विभागाकडे अर्ज दाखल केलेले नसतानाही व्यापाऱ्यांकडून भाडे वसूल केले जात होते. त्यानंतर प्रशासनाने दुकानगाळ्यांसंदर्भात सुधारित धोरण ठरवले. त्यानुसार प्रस्ताव तयार करून महासभेसमोर ठेवला. नोव्हेंबर २०१२ रोजी झालेल्या सभेत भाडेवाढीचा प्रस्ताव मंजूर झाला. महापालिकेच्या दुकानगाळ्यांना मुदतवाढ देताना मुदतीत अर्ज केलेल्या व्यापाऱ्यांना चालू रेडीरेकनरच्या तीनपट भाडे आकारावे. तसेच ज्यांनी मुदतवाढीसाठी अर्ज केले नाहीत, त्यांना मुदत संपलेल्या तारखेपासून रेडीरेकनरच्या पाचपट भाडे आकारण्याचा ठराव मंजूर केला. तसेच दरवर्षी भाड्यामध्ये १५ टक्के वाढ करण्याची शिफारस केली. महासभेच्या मंजुरीनंतर भाडेवाढीला व्यापाऱ्यांनी तीव्र विरोध केला, तरीही भाडेवाढीचा प्रस्ताव राज्य सरकारकला पाठवला.

राज्य सरकारकडून प्रस्तावाला मंजुरी मिळेपर्यंत दुकानधारकांना सुधारीत दराप्रमाणे भाडे भरण्यासाठी इस्टेट विभागाने नोटिसा पाठवल्या. काहीठिकाणी वसुली मोहीम राबवली. महापालिकेच्या कारवाईला काही व्यापाऱ्यांनी प्रतिसाद दिला. तर काही व्यापाऱ्यांनी कोर्टात दाद मागितली. त्याचवेळी महापालिकेने पाठवलेल्या प्रस्तावाला राज्य सरकारच्या नगरविकास खात्याने मंजुरी देत रेडीरेकनरप्रमाणे भाडे वसूल करण्याचे आदेश दिले.त्यानंतर थकीत भाड्यापोटी १,२०० दुकानगाळेधारकांना दुकानगाळा ताब्यात का घेऊ नये, अशी नोटीस बजावली. नोटिशीनंतर किराणा व भुसारी व्यापारी असोसिएशनसह राज्यातील महापालिका क्षेत्रातील व्यापाऱ्यांनी नगरविकास विभागाच्या प्रधान सचिव मनीषा म्हैसकर यांची भेट घेतली. म्हैसकर यांनी याबाबत कायदा करण्यात येणार असल्याचे अभिवचन शिष्टमंडळाला दिले होते. त्यानंतर सरकारीपातळीवर सर्वच महापालिका क्षेत्रातील गाळेधारकांचे भाडे आकारणी ठरवण्यासाठी आयुक्तांना अधिकार देण्याचा निर्णय घेतला आहे. याबाबतची अधिसूचना लवकरच काढण्यात येणार आहे. अधिसूचनेनंतर जादाच्या भाडे आकारणीतून महापालिकेच्या गाळेधारकांची सुटका होण्याची शक्यता आहे.

महापालिकेने यापूर्वी चुकीच्या पद्धतीने गाळेधारकांना भाडे आकारणी केली होती. भाडे आकरणीचे आयुक्तांना मिळणार असले, तरी रेडिरेकनच्या किती टक्के भाडेवाड करायची याचा अधिकार त्यांना मिळणार आहे. त्यामुळे चांगला निर्णय होईल, अशी अपेक्षा आहे.

बबन महाजन, खजानिस, किराणा व भुसारी व्यापारी असोसिएशन

चौकट

२२

मार्केट

४०

महापालिका ठिकाणे

२०९५

एकूण गाळे

१५३५

करार संपलेले गाळेधारक

१२००

नोटीस बजावलेले गाळेधारक

'कविता काळ्या आईची'संमेलनातून अवरतले शिवार

म. टा. प्रतिनिधी, कोल्हापूर

सावकारी कर्जामुळे झालेली शेतकऱ्यांची दुर्दशा, दिवसभर शेतात राबवूनही शेती उत्पादनांना दर न लाभल्याने मनाची होणारी तगमग, आणि संकटाशी सामना करत काळ्या मातीशी इमान राखण्याची धडपड यावर आधारित कवितेतून बळीराजाची अनेकविध रुपे प्रकटली. विविध कवींच्या शेती आणि शेतकऱ्यांच्या जीवनावर आधारित कवितांनी शेतशिवाराची गाथा रसिकांसमोर मांडली. 'कष्टणारे हात कधीही भ्रष्ट ना झाले कधी'अशा शब्दांत शेतकऱ्यांचा गौरवही केला.

येथील चिल्लर पार्टीतर्फे कॉम्रेड गोविंद पानसरे यांच्या जयंतीनिमित्त 'कविता काळ्या आईची' या काव्यसंमेलनाचे आयोजनाचे केले होते. शाहू स्मारक भवन येथे कार्यक्रम झाला. कर्जामुळे शेतकऱ्यांची झालेली दुर्दशा कवी गोविंद पाटील यांनी 'कर्जात जन्मलो आम्ही, कर्जात नदीवर जावू, जमिनीवरच्या कर्जाला स्वर्गातून जामीन देऊ.' या कवितेतून मांडली.

कवी सुरेश मोहिते यांनी आधुनिक पिढीची शेतीशी असलेली नाळ दुरावत असल्याचे कवितेतून निदर्शनास आणले. तसेच सरकारी यंत्रणेकडून शेतकऱ्यांची होणारी फसगत मांडली. 'साप शेतकऱ्याचा मित्र असतो असं म्हणतात, तसं तलाठीही शेतकऱ्याचा मित्र असतो म्हणतात, साप चावताना दिसतो तरी, तलाठी लुटताना कधीच दिसत नाही' या कवितेला प्रेक्षकांनी भरभरुन दाद दिली. कवी चंद्रकांत पोतदार यांनी 'पाला सोलताना रोज, पाला रगात काढतो, दिनवाण्या जगण्याा बाप असाच गिळतो' या शब्दांत शेतकऱ्यांच्या व्यथा मांडल्या. कवयित्री सुनंदा शेळके यांनी शेतकऱ्यांच्या कष्टाचा गौरव केला. 'कष्टणारे हात यांचे भ्रष्ट झाले ना कधी, वेदना वस्तीत यांच्या नेहमी वसतात का' या शब्दातून प्रामाणिकपणे काम करुनही सुख प्राप्त न होणाऱ्या शेतकऱ्यांची दशा मांडली. कार्यक्रमाचे नियोजन मिलिंद यादव, श्रीधर कुलकर्णी, सचिन पाटील, अनिल काजवे, राजू नाईक, शिवप्रभा लाड, राहुल कांबळे, निलेश झेंडे, मिलिंद कोपार्डेकर आदींनी केले. प्रास्ताविक उदय संकपाळ यांनी केले. पदमा दवे यांनी स्वागत केले.

म. टा. प्रतिनिधी, कोल्हापूर

शिक्षक भरती, पवित्र पोर्टल प्रणालीला विरोधासह विविध शैक्षणिक प्रश्नांच्या सोडवणुकीसाठी राज्य सरकार चालढकल करत असल्याचा आरोप करत शिक्षण संस्था चालकांनी आंदोलन पुकारले आहे. सरकारच्या चुकीच्या शैक्षणिक धोरणाविरोधात कोल्हापूर, सांगली, सातारा, रत्नागिरी आणि सिंधुदुर्ग या पाच जिल्ह्यातील शाळा मंगळवारी (ता.२७) बंद राहणार आहेत. कोल्हापूर जिल्हा शिक्षण संस्था संघ व जिल्हा शैक्षणिक व्यासपीठातर्फे सकाळी ११ वाजता जिल्हाधिकारी कार्यालयावर मोर्चा काढण्यात येणार असल्याची माहिती पदाधिकाऱ्यांनी पत्रकार बैठकीत दिली.

पाच जिल्ह्यातील मिळून सुमारे तीन हजार शाळा या दिवशी बंद राहणार आहेत. कोल्हापूर जिल्ह्यातील १२०० शाळांचा आंदोलनात सहभाग असणार आहे. आंदोलनाविषयी माहिती सांगताना जिल्हा शिक्षण संस्था संघाचे सचिव जयंत आसगांवकर म्हणाले, 'मंगळवारच्या आंदोलनात जिल्ह्यातील सर्व शैक्षणिक संस्थांचा सहभाग आहे. सरकारकडे सातत्याने पाठपुरावा करुनही शैक्षणिक प्रश्नांची सोडवणूक झाली नाही. शिक्षक भरती बंद आहे, २००० पासून वेतनेतर अनुदान मिळाले नाही. कोर्टाने शिक्षक भरतीचे अधिकार संस्थांना देण्याचा आदेश दिला आहे. मात्र सरकारकडून कसलीच प्रक्रिया नाही. सरकारच्या चुकीच्या धोरणाविरोधात आंदोलन आहे.'

जिल्हा शैक्षणिक व्यासपीठाचे अध्यक्ष एस. डी. लाड म्हणाले, 'पाच जिल्ह्यातील शिक्षण संस्था आंदोलनात सहभाग नोंदविणार आहेत. जिल्ह्यातील १२०० शाळा व ३० हजार शिक्षक, शिक्षकेत्तर कर्मचाऱ्यांचा समावेश राहील. यादिवशी खासगी प्राथमिक, खासगी माध्यमिक, अनुदानित, विनाअनुदानित शाळा बंद राहतील. दसरा चौक येथून सकाळी ११ वाजता मोर्चाला प्रारंभ होईल. संस्थाचालक, शिक्षक व शिक्षकेत्तर कर्मचाऱ्यांचा सहभागी होणार आहेत.

ताराराणी विद्यापीठाचे कार्यकारी अध्यक्ष प्राचार्य क्रांतिकुमार पाटील म्हणाले, 'सरकारच्या धोरणाविरोधात शिक्षण क्षेत्रात असंतोष आहे. सरकारने शिक्षक व शिक्षकेत्तर पदावरील बंदी कायम ठेवल्यामुळे शैक्षणिक कामकाजावर परिणाम झाला आहे. भरती अभावी मोठ्या संख्येने पदे रिक्त आहेत. शिक्षण संस्था चालकांसमोर शाळा कशी चालवायची? असा प्रश्न उभा राहिला आहे. सरकारने मागण्यांची गांभीर्याने दखल घ्यावी.'पत्रकार परिषदेला प्रिन्स शिवाजी मराठा बोर्डिंग हाऊसचे चेअरमन डी. बी. पाटील, शिक्षण संस्था संघाचे अध्यक्ष वसंतराव देशमुख, प्राचार्य सी. आर. गोडसे, प्रा. विनय पाटील, एस. व्ही. सूर्यवंशी, सी. एम. गायकवाड, सुरेश पाटील, संदीप पाटील, उदय पाटील, गजानन काटकर आदी उपस्थित होते.

प्रमुख मागण्या

पवित्र पोर्टल प्रणालीला विरोध

सर्व अनुदानित शाळांना नियमित वेतनेत्तर अनुदान द्या

जुनी पेन्शन योजना सुरू करा

शिक्षक व शिक्षकेत्तर भरती प्रक्रियेवरील बंदी उठवा

२० टक्के अनुदान मिळणाऱ्या शाळांना अनुदानाचे पुढील टप्पे मिळावेत

मूल्यांकन झालेल्या शाळांना पुढील अनुदानाचे टप्पे मिळावेत

शिक्षकेत्तर सेवकांचा सुधारित आकृतिबंध त्वरित लागू करावा

असोसिएशन ऑफ आर्किटेक्टस् अँड इंजिनीअर्स आरोप

म. टा. प्रतिनिधी, कोल्हापूर

बांधकाम परवाना देणे ही तांत्रिक बाब असली, तरी काही अधिकारी जाणीवपूर्वक फायलींची अडवणूक करतात. तसेच माहितीच्या अधिकाराचा दुरुपयोग करणारे कार्यकर्ते आणि अधिकारी यांच्यामधील लांगेबांध्यामुळे बांधकाम व्यावसायिक अडचणीत आल्याचा आरोप असोसिएशन ऑफ आर्किटेक्टस् अँड इंजिनीअर्सने प्रसिद्धी पत्रकाद्वारे केला आहे.

पत्रकात म्हटले आहे, 'बांधकाम परवानगी महापालिका नगररचना, विकास प्राधिकरण व कोल्हापूर जिल्हा प्रादेशिक योजनामार्फत दिली जाते. बांधकाम परवानगी तांत्रिक बाब आहे, पण नियमावलीचा आपल्या सोयीचा अर्थ लावून फायली अडवणूक केली जाते. विनाकारण अतांत्रिक अडथळे निर्माण करून बांधकाम व्यावसायिकांची वेठीस धरले जाते. परवानगी देणाऱ्या प्रत्येक विभागाची नियामावली निश्चित केलेली आहे. परंतू नियमावलीमध्ये असलेल्या संदिग्धतेचा फायदा घेऊन संबंधित अधिकारी नियमावलींचा हवा तसा अर्थ लावून फायलीची अडवणूक करत आहेत. अशा अडचणींतून बांधकाम परवानगी घेतल्यानंतर माहितीच्या अधिकाराचा वापर करणाऱ्या कार्यकर्त्यांना प्रकल्पांची माहिती मिळते. यामधून बांधकाम व्यावसायिकांचा छळ सुरू होतो. यामुळे बांधकाम प्रकल्प लांबणीवर पडत आहेत. प्रकल्पामध्ये गुंतवलेली रकमही ठप्प होत असल्याने त्याचा परिणाम व्यावसायिकांच्या आर्थिक व कौटुंबिक परिस्थितीवर होत आहे. बांधकाम व्यावसायिकांबरोबर या क्षेत्रातील सल्लागर असलेल्या आर्किटेक्ट, इंजिनीअर्स यांनाही अशा संकटांना सामोरे जावे लागत आहे. रखडलेल्या प्रकल्पामुळे मानसिक दडपण व तणाव निर्माण होत असल्याने सावकारी पाशात ओडले जातात अथवा आत्महत्येसारखा प्रकार घडतात. अशा प्रकारांना आळा घालण्यासाठी एकजूट दाखवून लढा देण्याची आवश्यकता आहे. तसेच पोलिस यंत्रणेनेही नाहक त्रास देणाऱ्या अधिकारी व कार्यकर्त्यांवर कारवाई करण्याची गरज असल्याचे पत्रकात नमूद केले आहे.

डॉ. एन. व्ही. चिटणीस

यांचे निधन

कोल्हापूर: शिवाजी विद्यापीठातील संगीत व नाट्यशास्त्र विभागप्रमुख प्रा. डॉ. एन. व्ही. चिटणीस यांचे शनिवारी रात्री हृदयविकाराच्या झटक्याने निधन झाले. नाट्यशास्त्र विभागात ते १९८६ मध्ये सहायक प्राध्याक म्हणून रुजू झाले. ते मूळचे बेळगाव येथील होते. त्यांनी औरंगाबाद येथील डॉ. बाबासाहेब आंबेडकर मराठवाडा विद्यापीठातून नाट्यशास्त्राची पदवी व पदव्युत्तर शिक्षण घेतले होते. शनिवारी रात्री त्यांचे शाहू कॉलनी आर.के.नगर येथील निवासस्थानी निधन झाले. त्यांच्या पश्चात पत्नी, मुलगा, मुलगी असा परिवार आहे. रक्षाविसर्जन सोमवारी (ता.२६) सकाळी नऊ वाजता पंचगंगा स्मशानभूमी येथे आहे.

म. टा. प्रतिनिधी, कोल्हापूर

राष्ट्रवादी काँग्रेसचे अध्यक्ष शरद पवार तीन दिवसाच्या कोल्हापूर दौऱ्यानंतर शनिवारी रात्री कराडला रवाना झाले. कौटुंबिक कार्यक्रमासाठी ते कोल्हापूरात आले असले, दौऱ्यात त्यांनी विविध पक्षाच्या वरिष्ठ नेत्यांनी त्यांची आवर्जून भेट घेतली. लोकसभा निवडणुकीच्या पार्श्वभूमीवर बरीच जुळवाजुळव करताना त्यांनी बंद खोलीत पक्षातील अनेकांना कानमंत्र दिल्याने त्याची चर्चा सुरू आहे.

पाच महिन्यांवर लोकसभा निवडणुका आल्याने मोर्चेबांधणीसाठी सर्व पक्षांच्या वरिष्ठ नेत्यांनी जिल्हा निहाय दौरा करण्यास सुरुवात केली आहे. यामुळेच खासदार पवार यांच्या दौऱ्याला विशेष महत्त्व प्राप्त झाले होते. कौटुंबिक कार्यक्रमासाठी पवार आले असले, तरी गेल्या वर्षभरातील त्यांचा चौथा जिल्हा दौरा होता. लोकसभा निवडणूक जवळ आल्याने त्यांच्या दौऱ्याला महत्त्व आले होते. तीन दिवस त्यांनी काही नेत्यांशी चर्चा केली. खासदार राजू शेट्टी, कल्लाप्पाण्णा आवाडे, आमदार हसन मुश्रीफ, खासदार धनंजय महाडिक, व्ही. बी. पाटील यांच्याशी संवाद साधून माहिती घेतली.

गुरुवार व शुक्रवारी शासकीय विश्रामगृह येथे अनेक नेत्यांनी भेट घेतली. माध्यमाबरोबर संवाद साधताना गुगली टाकत जिल्ह्यातील नेत्यांसह कार्यकर्त्यांना योग्य तो संदेश दिला. शनिवारी कुंभोज येथे सदिच्छा भेट दिल्यानंतर रुकडीला रवाना झाले. स्वाभिमानी शेतकरी संघटनेला हातकणंगले लोकसभा मतदारसंघ देण्याचा ग्रीन सिग्नल दिल्याने रुकडी येथील कार्यक्रमाकडे माजी खासदार निवेदिता माने यांनी पाठ फिरविली. माने यांच्या गावात कार्यक्रम असताना त्या अनुपस्थित राहिल्याने याची चर्चा सुरू होती. रुकडी येथील कार्यक्रमानंतर पवार कोल्हापूर येथे सायंकाळी पाच वाजता दाखल झाले. दोन तास विश्रांती घेतल्यानंतर ते कराडला रवाना झाले.

म. टा. वृत्तसेवा, कराड

संशोधक पक्षिमित्रांनी आपले अनुभव विविध माध्यमांतून लोकांपर्यंत पोहोचवावेत. पक्षी संवर्धनासाठी हे ज्ञान पुढील पिढ्यांकडे हस्तांतरित करण्यासाठी प्रयत्न करावेत, अशी अपेक्षा व्यक्त करीत येथे भरलेल्या दुसऱ्या राष्ट्रीय आणि ३२व्या राज्यस्तरीय पक्षिमित्र संमलेनाचा शनिवारी समारोप करण्यात आला.

महाराष्ट्र पक्षिमित्र संयोजित व कराड जिमखाना यांच्या वतीने हे संमेलन घेण्यात आले. या संमेलनांच्या परिसंवादात 'बर्ड लाइफ इंटरनॅशनल'चे व्यवस्थापक प्रशांत महाजन यांनी हवामान बदलाचा पक्षी जीवनावर होणारा प्रभाव, राजू कसबे यांनी मराठी साहित्यातील पक्षांवरील पुस्तके, सांगली येथील पक्षी अभ्यासक शरद आपटे व रोहन भाटे यांनी सह्याद्री व्याघ्र प्रकल्पातील वैभव व मत्स्य घुबडाचे यशस्वी पुनर्वसनाच्या पंचवीस वर्षातील पक्षी अभ्यास नोंदी, गोव्यातील 'नेचर नेस्ट'चे संचालक पंकज लाड यांनी पक्षी संवाद शास्त्र मृगया एक्सपिरेशन तर आंबोली व गोवा येथे काम करणारे पराग रांगणेकर यांनी स्थानिक सहभागातून पर्यटन याविषयी मार्गदर्शन केले.

बी. एस. कुलकर्णी, सुरेशचंद्र वानखेडे, डॉ. किशोर पवार, किरण पुरंदरे आदी विविध लेखकांची पक्षी जगत, चला पक्षी पहायला, आनंदगान, एका तळ्यात होती, रानवारा, चक्रवाक देशी, निसर्गयात्रा, अंगणातील पक्षी, देशोदेशीचे पक्षी अशा विवध मराठी, इंग्रजी पुस्तकांची माहिती संमलेनात देण्यात आली.

डॉ. किरण मोरे यांनी विदर्भातील सात स्थानिक व तीन स्थलांतरित चंडोल पक्षांच्या जातींविषयी ओळख करून दिली. परिसंवादाचे अध्यक्ष प्रा. सुधाकर कुराडे व प्रा. निनाद शहा यांनी वक्त्यांनी व्यक्त केलेल्या विचारांचा आढावा घेतला. कराड जिमखान्याचे सचिव सुधीर एकांडे, रोहन भाटे आदींनी या संमेलनाचे संयोजन केले. संमलेनात राज्यभरातून पक्षिप्रेमी सहभागी झाले होते.

ज्वारी दराचे अर्धशतक

ज्वारी ५० रुपये किलो

म. टा. प्रतिनिधी, कोल्हापूर

ज्वारीच्या दरात गेल्या महिनाभरात तब्बल १६ रुपयांनी वाढ झाली आहे. या आठवड्यात ज्वारीच्या दराने अर्धशतक गाठल्याने बार्शी ज्वारीची ५० रुपये दराने विक्री होत आहे. ज्वारीच्या दरात वाढ झाल्याने बाजरी, नाचणी, गव्हाच्या दरातही वाढ झाली आहे.

दुष्काळामुळे धान्य, कडधान्यात वाढ होत आहे. गेल्या आठवड्यात ज्वारीचा दर ४८ रुपये होता. या आठवड्यात दोन रुपयाने वाढ झाल्याने ५० रुपयावर पोचला आहे. गेल्या महिनाभरात बार्शी ज्वारीच्या दरात वाढ झाल्याने तब्बल १६ रुपयांनी वाढ झाल्याने किराणा विक्रेत्यांनी सांगितले. ज्वारीला पर्याय म्हणून बाजरी व नाचणीची भाकरी केली जाते. त्यामुळे बाजरी आणि नाचणीला मागणी वाढल्याने त्यांच्या दरातही दोन ते चार रुपयांनी वाढ झाली आहे. तूरडाळीच्या दरात चार रुपयांनी वाढ झाली आहे. छोले दरात वाढ झाली असून प्रतिकिलो १०० रुपयांनी विक्री होत आहे. शेंगदाण्याच्या दरात दहा रुपयांनी वाढ झाल्याने प्रतिकिलो १०० रुपयांनी विक्री होत आहे. शेंगदाण्याचा दर वाढल्याने शेंग तेलाही पाच रुपयाने वाढ झाली आहे. शेंगतेलाचा दर सव्वाशे रुपयांवर पोचला आहे. शेंगतेल महाग झाले असले तरी सूर्यफूल, सरकी तेलाचे स्थिर असल्याने खाद्य तेल खरेदीसाठी ग्राहकांना पर्याय उपलब्ध असल्याने त्याची झळ बसणार नसल्याचे किराणा विक्रेत्यांचे म्हणणे आहे.

किराणा दर (प्रतिकलो )

पोहे :४८ रु.

साखर: ३६ रु.

शेंगदाणा : १००

मैदा :३२ रु.

आटा: ३२ रु.

रवा: ३२ रु.

गूळ : ४५ ते ५० रु.

साबुदाणा: ६४ रु.

वरी: ७२ रु.

००००

डाळीचे दर (प्रतिकिलो रु.)

तूरडाळ : ७० ते ८० रु.

मूगडाळ: ८४ रु.

उडीद डाळ: ८० रु.

हरभरा डाळ : ६० ते ७० रु.

मसूर डाळ : ६४ ते ६८ रु.

मसूर: ६० ते १२० रु.

चवळी : ८० रु.७२

हिरवा वाटाणा : ९६ रु.

काळा वाटाणा: ६४ रु.

पांढरा वाटाणा : ५६ रु.६४

मटकी: ८० ते १०० रु.

छोले : १००रु.

००००

ज्वारी दर (प्रतिकिलो)

बार्शी शाळू : ३६ ते ५० रु.

गहू :२८ ते ३६ रु.

हायब्रीड ज्वारी :२४ ते ३० रु.

बाजरी : ३० ते ३२ रु.

नाचणी : ३६ ते ४० रु.

००००

तेलाचे दर (प्रतिकलो )

शेंगतेल : १२५ रु.

सरकी तेल: ९० रु.

खोबरेल :२२० रु.

सूर्यफूल: ९० ते १०० रु.

०००

मसाले दर (प्रतिकलो)

तीळ :२०० रु.

जिरे :२८० रु.

खसखस: ८०० रु.

खोबरे: १८० ते २२० रु.

वेलदोडे: २००० रु.

म. टा. वृत्तसेवा शाहूवाडी

सरुड (ता. शाहूवाडी) येथे शतकोत्तर वर्षाची परंपरा लाभलेल्या व येथील विठ्ठल-रुक्मिणी मंदिरात गेले महिनाभर सुरू असलेल्या पहाटेच्या काकड आरती सोहळ्याची मोठ्या भक्तिमय वातावरणात सांगता झाली. यावेळी सांगता सोहळ्यानिमित्त महाप्रसादाचे वाटप करण्यात आले.

कोजागरी पौर्णिमा ते त्रिपुरी पौर्णिमेअखेर महिनाभराच्या कालावधीत दररोज पहाटे चार ते साडेसहा या वेळेत हा काकड आरतीचा विधिवत कार्यक्रम झाला. यामध्ये राधा कृष्ण, श्री जोतिबा, संत बाळूमामा आदी देवदेवतांच्या विविध रूपातील आकर्षक पूजा बांधण्यात आल्या. यासाठी संयोजकांनी ठरविल्याप्रमाणे अनेक मान्यवरांनी उपस्थिती दर्शविली होती. दरम्यान, सरुडमध्ये शतकोत्तर वर्षापासून अशी काकड आरतीची परंपरा असल्याने या सोहळ्यादरम्यान पहाटेच्या वेळी विठ्ठल-रुक्मिणी मंदिरामध्ये भाविकांची मोठी रीघ लागलेली असते.

यावेळी ह.भ.प. मारुती लाड, कृष्णात नाईक, एस. के. पाटील, रामदास वडेकर, भीमराव पाटील, आर. के. रोडे, गोविंद रोडे, दिनकर कोकणे, बाबूराव कांबळे, रामभाऊ रावण, महादेव कुंभार, बाबुराव कुंभार, सुशीला लोले, विमल भूतकर, रुक्मिणी खोत, मंगल बाऊचकर, वनिता डाकवे, शारदा डाकवे, आदी भक्तगण सोहळ्यात हजर होते.

म. टा. प्रतिनिधी, कोल्हापूर

राज्यातील दुष्काळी स्थितीमुळे राज्य सरकारने दूध अनुदान योजनेस ३१ जानेवारी २०१९ पर्यंत मुदतवाढ दिली आहे. दरम्यान दूध अनुदान योजनेंतर्गत जिल्ह्यातील विविध दूध संघांची सुमारे दहा कोटी रुपयांहून अधिक रक्कम सरकारकडे थकीत आहे. दुसरीकडे नोव्हेंबर ते जानेवारी या कालावधीत दुधाच्या उत्पादनात वाढ होते. दूध उत्पादन वाढले तरी खरेदी-विक्री दरात कसलीही वाढ संभवत नाही असे संघांचे म्हणणे आहे.

जिल्ह्यात गोकुळ, वारणा, शाहू, स्वाभिमानी, हनुमान यळगूड, अन्नपूर्णा अशा सहकारी आणि खासगी तत्वावरील ११ दूध संघाकडे रोज जवळपास २० लाख लिटर संकलन होते. संकलित दुधात साधारणपणे ५० टक्के दूध गायीचे आहे. सरकारने सहकारी व खासगी संस्थांना गायीच्या दुधाला २५ रुपये दर देण्याचा आदेश दिला. तसेच दूध भुकटी व दूध निर्यातीसाठी खासगी आणि सहकारी संघांना भुकटीसाठी प्रति किलो ५० रुपये तर निर्यात होणाऱ्या दुधासाठी पाच रुपये अनुदान योजना जाहीर केली. दरम्यान दूध अनुदान योजनेंतर्गत वारणा दूध संघाला ऑगस्ट महिन्याचे सुमारे दोन कोटी दहा लाख रुपयांचे अनुदान मिळाले. तर गोकुळ दूध संघाचे सहा कोटी ७९ लाख रुपयांचे अनुदान सरकारकडे थकीत आहे. राज्यातील विविध संघांचे एकूण ८० कोटी रुपये अनुदान थकीत असल्याचे या क्षेत्रातील जाणकारांचे आहे.

भुकटी योजनेचा कालावधी १९ जानेवारी २०१९ पर्यंत आहे. गायीच्या दुधासाठीची अनुदान योजना एक ऑगस्ट ते ३१ ऑक्टोबर २०१८ पर्यंत जाहीर केली होती. दरम्यान राज्यातील दुष्काळी परिस्थितीमुळे अनुदान योजनेचा कालावधी आणखी तीन महिन्यांनी वाढविण्याचा निर्णय सरकारने घेतला आहे. कृषी, पशुसंवर्धन, दुग्धव्यवसाय विकास व मत्स्यव्यवसाय विभागाचे प्रधान सचिव अनुप कुमार यांनी राज्यात उत्पादित होणाऱ्या (पिशवीबंद दूध वगळून) गाय दूध व त्यापेक्षा अधिक गुणप्रतीच्या दूध रुपांतरण अनुदान योजनेस (प्रतिलिटर पाच रुपये अनुदान) ३१ जानेवारी २०१९ पर्यंत मुदतवाढ देत असल्याचा आदेश १७ नोव्हेंबर रोजी काढला आहे.

दुसरीकडे अनुदान योजनेंतर्गत दूध उत्पादकांचे बँकेत खाते, दर दहा दिवसांनी बँकेत रकमेचा भरणा आणि त्याचा अहवाल सरकारी यंत्रणेकडे सादर करावा लागतो. या प्रक्रियेसाठी जादा वेळ लागतो असे काहींचे म्हणणे आहे. तर योजनेचे निकष पाळले की, अनुदान योजनेचा लाभ मिळू शकतो असे सरकार सांगते. सरकारी नियमावलीनुसार योजनेसाठी कॅशलेस पध्दतीचा अवलंब न केल्यामुळेच दूध संघांचे अनुदान मोठ्या प्रमाणात रखडल्याचे अधिकाऱ्यांचे म्हणणे आहे. महाराष्ट्र दूध उत्पादक व प्रक्रिया व्यावसायिक कल्याणकारी संघाच्या पदाधिकाऱ्यांच्या नुकतीच पुण्यात बैठक झाली. त्यामध्ये अनुदान योजना, त्यातील अडचणींसंदर्भात चर्चा झाली. देशपातळीवर सध्या दुधापासून रुपांतर केलेल्या पावडर, लोण्याचे दर कमी आहेत. शिवाय अनुदानही वेळेत उपलब्ध होत नसल्यामुळे संस्थांसमोर आर्थिक अडचणी निर्माण होत आहेत. दूध अनुदान योजनेत जाचक अटी असल्याचा आक्षेपही राज्य पातळीवर नोंदविला आहे.

राज्य सरकारच्या दूध अनुदान योजनेपोटी वारणा दूध संघाला ऑगस्ट महिन्याचे दोन कोटी दहा लाख रुपयांचे अनुदान मिळाले आहे. संघांने सप्टेंबर महिन्याची बिलिंग व इतर प्रक्रिया पूर्ण केली आहे. नोव्हेंबर ते जानेवारी या कालावधीत दुधाचे उत्पादन वाढते. त्यामुळे दुधाच्या खरेदी दरात वाढ होण्याची शक्यता नाही.

- मोहन येडूरकर, कार्यकारी संचालक वारणा दूध संघ

राज्य सरकारकडून मिळणारे कोट्यवधी रुपयांचे अनुदान थकीत आहे. सप्टेंबर, ऑक्टोबर महिन्याचे अनुदान अद्याप यायचे आहे. अनुदान मिळविण्यासाठी संघाच्या पातळीवर प्रयत्न सुरू आहेत. दरम्यान सद्यस्थितीत दूध दरात वाढ केली जाणार नाही.

- विश्वास पाटील, चेअरमन गोकुळ दूध संघ

कोल्हापूर: महापालिकेच्यावतीने दीनदयाळ अंत्योदय योजना व राष्ट्रीय नागरी उपजीविका अभियानातंर्गत युवक-युवतींना रोजगार आणि स्वयंरोजगाराची संधी उपलब्ध करून देण्यासाठी मोफत कौशल्य प्रशिक्षण देण्यात येणार आहे. राजारामपुरी तिसरी गल्ली येथील आयजी कॉम्प्युटर एज्युकेशनमध्ये प्रशिक्षण देण्यात येणार आहे.

युवक-युवतींना रोजगार व स्वयंरोजगाराची संधी उपलब्ध करुन देण्यासाठी दीनदयाळ अंत्योदय योजना राबवण्यात येत आहे. योजनेतंर्गत स्मॉल ऑफिस, होम ऑफिस कोऑर्डिनेटर, बीपीओ व्हाईस अँड नॉन व्हाईस, डीटीपी अँड प्रिंट पब्लिशिंग असिस्टंट, कॉम्प्युटर हार्डवेअर असिस्टंट, वेब डिझायनिंग, अनिमेशन आदींचे प्रशिक्षण देण्यात येणार आहे. सामाजिक, आर्थिक, जात निहा सर्वेक्षण (एसईसीसी-२०११) यादीतील लाभार्थी तसेच अनुसूचित जाती-जमाती, स्त्रिया, अल्पसंख्यांक व दिव्यांग प्रवर्गातील १८ ते ४५ वयोगटातील लाभार्थींना योजनेचा लाभ घेऊ शकतात. अधिक माहितीसाठी एमएसएसडीएसच्या मान्यता प्रास्त असलेली संस्था आयजी कॉम्प्युटर एजुकेशन पंचवटी अपार्टमेंट राजारामपुरी तिसरी गल्ली येथे शैक्षणिक कागदपत्रासह संपर्क साधण्याचे आवाहन केले आहे.