म. टा. प्रतिनिधी, कोल्हापूर
छत्रपती घराण्यातील चिमासाहेबांच्या प्रेरणेतून १८५७ च्या बंडाची ठिणगी पडलेला ऐतिहासिक जुना राजवाडा, भवानी मंडप परिसर, पोलिसांच्या गोळीबारात मृत्युमुखी पडलेल्या बिंदू नारायण कुलकर्णी यांच्या हौतात्म्यामुळे नामकरण झालेला बिंदू चौकासह २० पुरातन वास्तूंची ओळख कोल्हापूरवासीयांना हेरिटेज वॉकमधून मिळाली. या उपक्रमाच्या उद्घाटनप्रसंगी खासदार संभाजीराजे यांनी हेरिटेज वॉक या उपक्रमासाठी खासदार निधीतून एक कोटी रुपये देण्याची घोषणा केली.
जागतिक वारसा सप्ताह दिनानिमित्त छत्रपती संभाजीराजे फाउंडेशन, कोल्हापूर हॉटेल मालक संघ, असोसिएशन ऑफ आर्किटेक्ट अँड इंजिनिअर्स या संस्थांनी या उपक्रमाचे आयोजन केले होते. शनिवारी सकाळी दसरा चौकात श्रीमंत शाहू छत्रपती यांच्या हस्ते उपक्रमाचे उद्घाटन झाले. यावेळी महापौर शोभा बोंद्रे, कोल्हापूर परिक्षेत्राचे विशेष पोलिस महानिरीक्षक विश्वास नांगरे-पाटील, पोलिस अधीक्षक डॉ. अभिनव देशमुख, महापालिका आयुक्त डॉ. अभिजित चौधरी, निवासी उप जिल्हाधिकारी संजय शिंदे, संयोगिताराजे, मधुरिमाराजे, प्रतिमा पाटील यांची प्रमुख उपस्थिती होती.
शाहू महाराजांच्या पुतळ्याला अभिवादन करुन मान्यवरांसह उपक्रमात सहभागी झालेले सर्व नागरिक चालत चिमासाहेब चौकात आले. आर्किटेक्ट अमरजा निंबाळकर, राम यादव, मंदिर अभ्यासक उमाकांत राणिंगा, प्रसन्न मालेकर, कोल्हापूर वास्तुसंग्रहालयाचे अमृत पाटील, डॉ. अमर आडके यांनी पुरातन वास्तूंची माहिती दिली. आर्किटेक्ट अमरजा निंबाळकर यांनी वास्तूंची शैली, बांधणी यांची माहिती देताना त्यांची जपणूक होण्याची गरज व्यक्त केली. सुमारे तीन तास चाललेल्या या उपक्रमात नागरिक मोठ्या संख्येने सहभागी झाले होते. परिवहन समिती सभापती राहुल चव्हाण, असोसिएशन ऑफ आर्किटेक्ट अँड इंजिनीअर्सचे अध्यक्ष अजय कोराणे, गौरी चोरगे, वंदना कुसाळकर, माजी महापौर सई खराडे, हसिना फरास, फाउंडेशनचे कार्याध्यक्ष हेमंत साळोखे, हॉटेल मालक संघाचे अध्यक्ष उज्ज्वल नागेशकर, सचिव सिद्धार्थ लाटकर, प्रसाद कामत, दयानंद शेट्टी, अरुण चोपदार, आदी सहभागी झाले होते.
००००००
कोल्हापूर शहरात २५०, तर जिल्ह्यात ३५०० पुरातन वास्तू आहेत. तसेच शिवकालीन ११ किल्ले आहेत. या सर्वांची माहिती हेरिटेज कमिटीच्या वतीने एकत्रित केली जात आहे. हेरिटेज वॉक या उपक्रमातून नागरिकांना पुरातन वास्तूबद्दल अभिमान जागृत होण्यास मदत होईल.
अमरजा निंबाळकर, अर्किटेक्ट
०००००
कोल्हापूर शहराला प्राचीन धार्मिक, ऐतिहासिक, सामाजिक वारसा आहे. शहरातील पुरातन वास्तू परिसरात स्वच्छता ठेवण्यासाठी महापालिकेसह नागरिकांचे सहकार्य आवश्यक आहे. भवानी मंडप परिसर प्लास्टिकमुक्त करून स्वच्छतेसाठी पाऊल उचलले आहे.
संयोगिताराजे
०००००
कोल्हापुरातील पुरातन वास्तू जगाच्या नकाशावर येण्यासाठी खासदार संभाजीराजेंचे प्रयत्न सुरू आहेत. त्यांच्या प्रयत्नाला हेरिटेज वॉकच्या माध्यमातून बळ देण्याचा आमचा प्रयत्न आहे. तसेच या उपक्रमाच्या माध्यमातून भावी पिढीला कोल्हापूरचा समृद्ध वारसा, संस्कृतीची नव्याने ओळख निर्माण करून देण्यास मदत होईल.
उज्ज्वल नागेशकर, अध्यक्ष कोल्हापूर हॉटेल मालक संघ
००००
