कोल्हापूर टाइम्स टीम

बँक खात्यावर थेट अनुदान नको, रेशन पुरवठाच कायम ठेवा या मागणीकडे लक्ष वेधण्यासाठी ऑल इंडिया फेअर प्राइज शॉप डिलर्स फेडरेशन आणि रेशन बचाव समितीतर्फे गुरूवारी (ता. २२ नोव्हेंबर) जिल्हाधिकारी कार्यालयावर महाधडक मोर्चा काढण्यात येणार आहे. मोर्चात खासदार राजू शेट्टी, धनंजय महाडिक, आमदार सतेज पाटील सहभागी होतील, अशी माहिती फेडरेशनचे मुख्य सचिव चंद्रकांत यादव यांनी सोमवारी दिली.

चंद्रकांत यादव म्हणाले, 'सरकार टप्याटप्याने रेशनव्यवस्था मोडीत काढत आहे. पहिल्या टप्यात शिधापत्रिकेवरील धान्याऐवजी बँक खात्यावर पैसे जमा करण्यात येणार आहेत. त्यामुळे ज्यांचे बँकेत खाते नाही, त्यांना पैसेही नाही आणि धान्यही नाही असे होणार आहे. रेशन दुकानदारांवरही बेकारीची वेळ येणार आहे, त्यास विरोधासाठी रेशन दुकानदार, शिधापत्रिकाधारकांचा मोर्चा आयोजित केला आहे. मोर्चा सकाळी साडेबारा वाजता मिरजकर तिकटी चौकातून निघेल. ऑल इंडिया फेअर प्राईज शॉप डिलर फेडरेशनचे मुख्य सचिव विश्वंभर बसू, काकासाहेब देशमुख, डी. एन. पाटील नेतृत्व करतील. बिनखांबी, महाव्दार रोड, पापाची तिकटी, आईचा पुतळा, लक्ष्मीपुरी, व्हीनस कॉर्नरमार्गे जिल्हाधिकारी कार्यालयावर मोर्चा येईल. तेथे सरकार विरोधात निदर्शने करण्यात येतील.'

पत्रकार परिषदेस फेडरेशनचे जिल्हा अध्यक्ष शौकत महालकरी, रवींद्र मोरे, गजानन हवालदार, अशोक सोलापुरे, राजेश मंडलिक आदी उपस्थित होते.

म. टा. वृत्तसेवा, जयसिंगपूर

'आई आणि मुलाच्या अमर प्रेमबंधाची कहाणी 'मी अभिमन्यू' कादंबरीत आहे. जशी ती कादंबरी वाटते तसे ते आत्मचरित्र असल्यासारखे वाटते,' असे प्रतिपादन ग्रामीण कथाकार आप्पासाहेब खोत यांनी केले. येथील ऑर्थोपेडिक सर्जन डॉ. सतीश पाटील यांच्या 'मी अभिमन्यू' या कादंबरीचे येथे प्रकाशन झाले. यावेळी ते अध्यक्षस्थानावरून बोलत होते.

प्राचार्य राजेंद्र कुंभार म्हणाले, 'कादंबरीत हताशपण आहे. सर्जन म्हणजे सृजन. माणसाच्या आई व मुलाच्या नात्यातील भावबंध डॉ. पाटील यांनी आपल्या सृजनशिलतेतून मांडण्याचा प्रयत्न केला आहे.'

याप्रसंगी कादंबरीचे लेखक डॉ. सतीश पाटील, डॉ. पाटील यांचे शिक्षक गजानन महाजन (इचलकरंजी), आई मालती पाटील यांनी मनोगत व्यक्त केले. पाहुण्यांचा परिचय डॉ. संदीप पाटील, पुस्तकाचा परिचय श्रीकांत कांबळे यांनी करून दिला. यावेळी शरद साखर कारखान्याचे चेअरमन डॉ. राजेंद्र पाटील, दत्तचे चेअरमन गणपतराव पाटील, नगराध्यक्ष डॉ. नीता माने, सावकार मादनाईक, भगवान काटे, ज्येष्ठ पत्रकार उत्तम कांबळे, नगरसेविका स्वरूपा पाटील, शिरोळचे नगराध्यक्ष अमरसिंह पाटील, सपोनि नामदेव शिंदे, बजरंग खामकर यांच्यासह नगरसेवक, साहित्यप्रेमी नागरिक उपस्थित होते.

०००

फोटो ओळ :

'मी अभिमन्यू' कादंबरीच्या प्रकाशनप्रसंगी ग्रामीण कथाकार आप्पासाहेब खोत, डॉ. सतीश पाटील, आदी.

००००

Gurubal.mali@timesgroup.com

gurubalmaliMT

कोल्हापूर : लोकसभेच्या आगामी निवडणुकीसाठी फेब्रुवारी महिन्याच्या शेवटच्या आठवड्यात आचारसंहिता लागू होण्याची चिन्हे आहेत. त्यादृष्टीने निवडणूक आयोगाच्या हालचाली सुरू झाल्या आहेत. देशभरातील निवडणूक विभागांना तयारीला लागण्याचे संकेत देण्यात आले आहेत. यामुळे एप्रिल महिन्याच्या पहिल्या आठवड्यात मतदान प्रक्रिया सुरू होणार असल्याने तत्पूर्वी सज्ज राहण्यासाठी प्रशासकीय यंत्रणेची धावपळ सुरू झाली आहे.

सध्याच्या लोकसभेची मुदत येत्या ३१ मे २०१९ रोजी संपणार आहे. एक जूनपासून नवे सभागृह अस्तित्वात येणे आवश्यक आहे. यामुळे ३१ मे पूर्वी नवीन खासदारांच्या नावांची यादी राष्ट्रपतींना सादर होणे आवश्यक आहे. या पार्श्वभूमीवर साधारणपणे २० मे पर्यंत मतदान आणि मतमोजणीची सर्व प्रक्रिया पूर्ण करावी लागणार आहे. त्यासाठी आतापासूनच हालचाली सुरू आहेत. देशभरातील सर्व अधिकाऱ्यांशी व्हिडीओ कॉन्फरन्सद्वारे सातत्याने संवाद सुरू झाला आहे.

गतवेळी, सोळाव्या लोकसभा सभागृहासाठी ५ मार्च २०१४ ला आचारसंहिता लागू झाली होती. ९ एप्रिल ते १३ मे या दरम्यान मतदान प्रक्रिया राबवली आणि १६ मे रोजी मतमोजणी झाली. सतराव्या लोकसभेसाठी मात्र आठ ते दहा दिवस लवकर आचारसंहिता लागण्याची शक्यता आहे. फेब्रुवारीच्या शेवटच्या आठवड्यात निवडणूक जाहीर होणार असल्याने आतापासून प्रशासकीय तयारीला वेग आला आहे. निवडणूक प्रक्रियेसाठी लागणाऱ्या कर्मचाऱ्यांची यादी आठ दिवसांत तयार करण्याचे आदेश देण्यात आले आहेत. ही यादी करताना वर्ग एक आणि दोनच्या अधिकाऱ्यांची वेगळी यादी करावी, असे सुचवण्यात आले आहेत. प्रत्येक मतदान केंद्रावर डिसेंबरमध्ये व्हीव्हीपॅटचे प्रात्यक्षिक घेण्याच्या सूचना दिल्या आहेत. देशभरातील मतदान केंद्रे निश्चित केली आहेत. सर्व दिव्यांगांना मतदान करता यावे, यासाठी त्यांची वेगळी यादी तयार करून जनजागृती करण्यात येणार आहे. ऑक्टोबर अखेरपर्यंत नोंदणी केलेल्या सर्व मतदारांची यादी तयार आहे. ज्यांची नावे नाहीत, त्यांना आणखी एक संधी देण्यात येईल. मात्र त्याचा कालावधी कमी राहणार आहे.

नवमतदारांची यादी तयार

तरूण आणि नवमतदारांची यादी तयार करण्यासाठी यावेळी व्यापक मोहीम राबवण्यात आली. त्यासाठी अनेक कॉलेजमध्ये मतदार साक्षरता क्लब स्थापून नोंदणी करण्यात आली. त्याला देशभरात चांगला प्रतिसाद मिळाला. यामुळे तरूण मतदारांच्या संख्येत यावेळी लक्षणीय वाढ झाली आहे. या सर्व नवमतदारांचा तालुका आणि जिल्हास्तरावर सत्कार करण्यात येणार आहे.

.. ... .. .. .. ..

लोकसभा मतदारसंघ : कोल्हापूर, हातकणंगले

मतदार ३० लाख

मतदान केंद्रे ३३२१

लागणारे कर्मचारी २५०००

उपलब्ध व्हीव्हीपॅट ३३२१

बॅलेट युनिट ७३२१

कंट्रोल युनिट ४२१७

जिल्ह्यातील मान्यताप्राप्त पक्ष ७

......

म. टा. वृत्तसेवा, चंदगड

'दौलत साखर कारखाना तालुक्याच्या दृष्टीने महत्त्वाचा मुद्दा आहे. त्यामुळे दौलतबाबत नेत्यांनी भूमिका स्पष्ट करावी, अन्यथा येत्या लोकसभा निवडणुकीवर बहिष्कार टाकू. जे उमेदवार लोकसभेसाठी उभे राहतील त्यांची गाडी तालुक्यात फिरू देणार नाही,' अशा इशारा दौलतचे कामगार व त्यांच्या कुटुंबीयांना दिला.

दौलत बचाव समितीचे अध्यक्ष ॲड. संतोष मळवीकर यांच्या अध्यक्षतेखाली कामगारांनी बुधवारी बैठक बोलावली होती.

चंदगड तालुक्यातील सर्व राजकीय नेत्यांची ३० नोव्हेंबरला कारखाना कार्यस्थळावर दुपारी बारा वाजता बैठक बोलाविण्यात आली आहे. या बैठकीत नेतेमंडळींनी आपली भूमिका जाहीर करावी लागणार आहे. जिल्हा बँकेचे संचालक राजेश पाटील यांनी संचालक म्हणून कारखान्याविषयी भूमिका मांडावी. ज्यावेळी सात तारखेला दौलतच्या जमिनीचा लिलाव आहे, या लिलावाला प्रशासनाला विरोध करायचा नाही. मात्र, तालुक्यातील कोणती व्यक्ती ही जमीन घेते, हे बघण्यासाठी दोन फुटांचा हातात दांडका घेऊन हजर राहायचे आहे, असा निर्णय ॲड. मळवीकर यांच्या नेतृत्वाखाली झालेल्या आजच्या बैठकीत घेण्यात आला.

यावेळी कामगार सघंटनेचे प्रदीप पवार, सुरेश भातकांडे, राजेंद्र पाऊसकर यांनी दौलतविषयी मनोग व्यक्त केले. बैठकीस दौलतचे कामगार व शेतकरी सभासद मोठ्या सख्येने उपस्थित होते.

म. टा. प्रतिनिधी, कोल्हापूर

साने गुरूजी वसाहतीकडून शहराला जोडणाऱ्या वाशी नाका ते बुवा चौक (शिवाजी पेठ) या मुख्य रस्त्यावर वारंवार अपघात होत होते. अपघातांनी होणारी जीवितहानी रोखण्यासाठी स्थानिक रहिवाशांनी स्वत: मास्टरप्लॅन केला. नागरिकांनी केलेल्या सहकार्यामुळे ९० टक्के प्लॅन यशस्वी झाला. पण, शिवाजी पेठेत एका बांधकाम व्यावसायिकाने अतिक्रमण केल्याने प्लॅन पूर्णत्वास गेलेला नाही. प्लॅन अस्तित्वात येण्यासाठी महापालिकेने १५ दिवसांत अतिक्रमण न काढल्यास आंदोलन करण्याचा इशारा खंडोबा तालीम रोड अन्याय निवारण कृती समितीने निवेदनाद्वारे दिला आहे.

याबाबत आयुक्त डॉ. अभिजित चौधरी यांना दिलेल्या निवेदनात म्हटले आहे, 'सानेगुरुजी वसाहतीकडे जाणाऱ्या शिवाजी पेठेतील बुवा चौक ते वाशी नाका मार्गावर वारंवार अपघात होतात. अपघातांमुळे अनेकांना कायमचे अपंगत्व आले. काहींना प्राणही गमावावा लागला. रस्त्यावरील अपघातांचा वाहनधारकांना त्रास होऊ नये, यासाठी येथील नागरिकांनी रस्ता रुंदीकरणाचा मास्टरप्लॅन केला. प्लॅनला बहुतांशी नागरिकांनी संमती दर्शवली असताना एका बांधकाम व्यावसायिकाने रस्ता अडवून बांधकाम केले. याबाबत मुंबई लोकायुक्तांकडे तक्रार दाखल केल्यानंतर त्यांनी महापालिकेला कारवाईचे आदेश दिले. मात्र, सहा महिन्यानंतरही महापालिकेने कारवाई केलेली नाही. त्यामुळे येथे एखादी दुर्घटना घडल्यास प्रशासन जबाबदार राहील. लोकायुक्तांच्या आदेशानुसार १५ दिवसांत कारवाई न केल्यास आंदोलन करू.'

निवेदनावर चंद्रकांत यादव, चंद्रकांत सूर्यवंशी, अमर जाधव, बाजीराव खोत, संजय चौगले, बाबूराव घाटगे, ललितकुमार सरनाईक, शेखर पोवार, जयवंत कळके आदींच्या स्वाक्षऱ्या आहेत.

म. टा. प्रतिनिधी, कोल्हापूर

विद्यमान महापौर शोभा बोंद्रे सोमवारी (ता. २६) होणाऱ्या महासभेत राजीनामा देण्याची शक्यता आहे. त्यांच्या राजीनाम्यानंतर नव्या महापौर निवडीच्या हालचालींना वेग येणार आहे. दरम्यान महापौर अन् उपमहापौरांची निवड एकाचवेळी होणार असून उपमहापौरपदासाठी नगरसेवक श्रावण फडतारे व शिक्षण सभापती अशोक जाधव यांची काँग्रेसकडून नावे चर्चेत आली आहेत.

महापौर, उपमहापौरांचा कार्यकाळ २५ नोव्हेंबर रोजी संपणार आहे. पुढील वर्षभर महापौरपद राष्ट्रवादीकडे तर उपमहापौरपद काँग्रेसकडे राहणार आहे. महापौर बोंद्रे सोमवारच्या सभेत राजीनामा देण्याची शक्यता असल्याने राष्ट्रवादीतील इच्छुकांनी मोर्चेबांधणी करण्यास सुरुवात केली आहे. राष्ट्रवादीकडून इच्छुकांच्या मुलाखती घेतल्या जाणार असल्याने सोमवारनंतर महापौर निवडीच्या हालचाली अधिक गतिमान होतील.

दरम्यान, उपमहापौरपदाचीही निवड त्याचवेळी होईल. उपमहापौरपदासाठी काँग्रेसकडून श्रावण फडतारे व अशोक जाधव यांची नावे चर्चेत आली आहे. या पदासाठी इच्छुकांची संख्या कमी असल्याने नेत्यांना नाराजी दूर करण्यास फारसे प्रयत्न करावे लागणार नाहीत. पण महापौरपदासाठी राष्ट्रवादीकडून इच्छुकांची संख्या अधिक असल्याने उमेदवारी निवडताना नाराजी रोखण्यासाठी नेत्यांची चांगलीच कसरत होणार आहे.

लोगो : महापालिका

म. टा. प्रतिनिधी, कोल्हापूर

लोकसभा निवडणुकीच्या पार्श्वभूमीवर राजकीय वातावरण तापू लागलेले असताना राष्ट्रवादीचे अध्यक्ष आणि माजी केंद्रीय मंत्री शरद पवार आज (गुरुवारी)दुपारी शहरात येणार आहेत. त्यांचा तीन दिवस मुक्काम आहे. यादरम्यान लोकसभा मतदारसंघ आणि उमेदवारीच्या वादावर पडदा पडण्याची चिन्हे आहेत.

कोल्हापूर मतदार संघावर काँग्रेसने केलेला दावा, खासदार धनंजय महाडिक यांच्या उमेदवारीबाबत निर्माण झालेला वाद, हातकणंगले लोकसभा स्वाभिमानी शेतकरी संघटनेला देण्याचा निर्णय होणार असल्याने माने गटात निर्माण झालेली नाराजी या पार्श्वभूमीवर पवार कोल्हापुरात येणार आहे. त्यांचा दौरा खासगी असला तरीही त्यांचा मुक्काम तीन दिवस असल्याने राजकीय घडामोडींना वेग येणार आहे. गुरुवारी दुपारी साडेबाराच्या सुमारास सर्किट हाउस येथे त्यांचे स्वागत करण्यात येणार आहे. त्यानंतर दिवसभर ते अनेकांशी संवाद साधतील. २३ रोजी ते पूर्ण दिवस कोल्हापुरात तर २४ रोजी रुकडी व कुंभोज येथील कार्यक्रमाला उपस्थित राहणार आहेत.

.. .. .. ..

म. टा. प्रतिनिधी, कोल्हापूर

कृषिपंपांना आठ तास आणि इतर वर्गातील ग्राहकांना २४ तास वीजपुरवठा होतो. यामुळे राज्यात कुठेही भारनियमन नाही. शेतकऱ्यांच्या हिताला प्राधान्यक्रम देऊन मुख्यमंत्री सौर कृषी वाहिनी योजना प्रकल्पाद्वारे शेतकऱ्यांना दिवसा आठ तास वीजपुरवठा करण्यात येणार असल्याची माहिती महाराष्ट्र राज्य विद्युत मंडळ सूत्रधार कंपनीचे संचालक विश्वास पाठक यांनी पत्रकार परिषदेत दिली. पाठक बुधवारी कोल्हापूर दौऱ्यावर होते. यावेळी ताराबाई पार्क येथील सर्किट हाउस येथे झालेल्या पत्रकार परिषदेत ते बोलत होते.

पाठक म्हणाले, 'ऊर्जामंत्री बावनकुळे यांनी कोळशातील भ्रष्टाचार संपविण्याचा प्रयत्न केला. त्यामुळे गेल्या साडेचार वर्षांत चार हजार कोटी रुपयांची बचत झाली. विशेष म्हणजे नवीन वस्त्या, नवीन शहरांना भूमिगत वाहिन्यांद्वारे वीजपुरवठा प्रस्तावित आहे. भूमिगत वीज वाहिन्यांमुळे वीजगळती व चोरीच्या प्रमाणात घट होईल. गावागावांत वीज आणि दरावर नियंत्रण हा सरकारचा मुख्य उद्देश आहे. गेल्या साडेचार वर्षांत चार लाख ५० हजार ग्राहकांना वीज जोडण्या दिल्या आहेत. वर्षाला एक लाख दहा हजार ग्राहकांना वीज जोडण्या देण्यात महावितरण यशस्वी ठरली आहे. शिवाय मार्च २०१८ अखेर कृषिपंपांचे जे प्रस्ताव दाखल आहेत, त्यांना मार्च २०१९ अखेर वीज जोडणीचे नियोजन आहे. यामध्ये कोल्हापूर जिल्ह्यातील पाच हजार वीज जोडण्यांचा समावेश आहे.'

पत्रकार परिषदेला महावितरणचे मुख्य अभियंता अनिल भोसले, महापारेषणचे प्रभारी मुख्य अभियंता ए. बी. दडमल, कोल्हापूर मंडलचे अधीक्षक अभियंता शैलेंद्र राठोर, अधीक्षक अभियंता मनोज विश्वासे,आदी उपस्थित होते.

०००

पाठक म्हणाले...

महावितरण, महापारेषण व महानिर्मिती या तीन कंपन्यांची एक लाख कोटींची उलाढाल

महावितरणचे राज्यात दोन कोटी ४० लाख ग्राहक, कर्मचारी सव्वा लाखावर

मार्च २०१९ अखेर अडीच लाख वीज जोडण्यांचे नियोजन

ऊर्जा विभागाकडून वीज बचतीसाठी एलईडी बल्ब व पंख्यांची योजना

एलईडी बल्बमुळे गेल्या दोन वर्षांत ११३७ कोटी रुपयांची बचत

मार्च २०१९ अखेर अडीच लाख वीजजोडण्या देण्याचे नियोजन, पाच हजार कोटी रुपयांची तरतूद

महावितरणच्या एकूण महसुलापैकी ३० टक्के महसूल कृषी पंपांच्या वीज बिलातून

००००

औद्योगिक वीज दरवाढीबाबत बगल

औद्योगिक क्षेत्राला वाढीव दराने वीजपुरवठा होत असल्यामुळे उद्योजक अन्य राज्यांत स्थलांतर करत आहेत, या प्रश्नावर बोलताना पाठक यांनी अन्य राज्यांत विजेचे दर कमी करण्यासाठी सरकार सबसिडी देते. सबसिडीच्या माध्यमातून वीज क्षेत्र चालविणे चुकीची गोष्ट असल्याचे सांगत त्यांनी प्रश्नाला बगल दिली. तसेच औद्योगिक क्षेत्रात जादा वीज वापरावर दंडाची आकारणी करण्याच्या महावितरणच्या निर्णयाचा उद्योगक्षेत्राला फटका बसत असल्याच्या तक्रारी आहेत यासंदर्भातही ते ठोस काही बोलले नाहीत.

०००००

लोगो : रखडलेले सिंचन प्रकल्प २

Bhimgonda.Desai@timesgroup.com

Tweet : @bhimgondaMT

कोल्हापूर : आजरा तालुक्यातील उचंगी लघू आणि आंबेओहोळ मध्यम सिंचन प्रकल्पातील बाधित शेतकऱ्यांच्या पुनर्वसनाचे प्रस्ताव वर्षानुवर्षे लालफितीत आहेत. हे प्रस्ताव मंजूर होऊन प्रकल्पग्रस्तांचे समाधान झाल्यास दोन्ही प्रकल्पांचे काम सुरू करणे सोपे होणार आहे. त्यादृष्टीने सहा महिन्यांपासून प्रशासनाकडून सकारात्मक हालचाली होत आहेत. उचंगी प्रकल्पग्रस्तांसाठी सरकारने नुकतीच पहिल्या टप्यात २० कोटींच्या पॅकेजला मान्यता दिली आहे.

उचंगी प्रकल्पाच्या कामाला १९९९मध्ये प्रारंभ झाला. प्रकल्पग्रस्तांच्या मागण्यांकडे दुर्लक्ष केल्याने त्यांनी तीव्र विरोध केला. सहा महिन्यांतच काम बंद झाले. त्या भागाचे तत्कालीन आमदार दिवंगत बाबा कुपेकर यांनी पुढाकार घेऊन २००८मध्ये पुन्हा काम सुरू केले. मात्र प्रकल्पग्रस्तांचे प्रश्न कायम राहिल्याने वर्षभरातच काम बंद झाले. पूर्ण पुनर्वसन झाल्याशिवाय घळभरणीच्या कामाला प्रकल्पग्रस्तांनी तीव्र विरोध केला. पाटबंधारे विभागाने प्रकल्पग्रस्तांसाठी २१ हेक्टर जमीन संपादनाचा महसूल विभागाकडे दिलेला प्रस्ताव धूळखात पडला आहे.

इथल्या सर्व विस्थापितांना पसंत पडेल अशी जमीन परिसरात उपलब्ध नाही. यामुळे जमिनीऐवजी तेथे रेडीरेकनरच्या पाचपट पैसे देण्याचा तोडगा पुढे आला आहे. त्यासाठी हेक्टरी ४० लाख देण्यास महसूल प्रशासन तयारी केली आहे. हे पैसे प्रकल्पग्रस्त स्वीकारतात की जमिनीला जमीनच हवी, असा हट्ट करतात हे स्पष्ट झालेले नाही. जमीन देण्याच्या मागणीवर ठाम राहिल्यास प्रकल्पाचे काम लांबणीवर पडणार आहे. प्रकल्पबाधीत चार गावांतील कुटुंबांना कोळिंद्रे गावठाणमध्ये ११० भूखंड वाटप करण्यात आले. तेथे मुलभूत सुविधाही नाहीत.

आंबेओहोळ मध्यम सिंचन प्रकल्पाच्या कामाला २००१मध्ये सुरूवात झाली.'आधी पुनर्वसन, मगच धरण' अशी भूमिका घेत कामाला तीव्र विरोध झाला. मात्र, पोलिस बळाचा वापर करीत १५० प्रकल्पग्रस्तांना तुरुंगात डांबून काम चालू करण्यात आले. मात्र ते अल्पावधीत बंद पडले. दरम्यानच्या काळात सांडव्याचे ४० टक्के तर प्रकल्पाचे ७० टक्के काम झाले. घळभरणी व इतर कामांसाठी ६ कोटी २५ लाख रुपयांची आवश्यकता आहे. पुनर्वसनासाठी जमिनींसाठी ६० कोटींची गरज आहे. दोन्हींचे प्रस्ताव पाठविण्यात आले आहेत. निधी जिल्हा पातळीवर उपलब्ध न झाल्याने कामाबद्दल साशंकता आहे. ४१.२१ हेक्टर जमिनीच्या संपादन प्रक्रियेस उच्च न्यायालयाने स्थगिती दिली आहे. त्याचाही या प्रकल्पात अडथळा राहणार आहे.

उचंगी प्रकल्पाच्या पुनर्वसनासाठी निधी मिळणार आहे. काही निधी पाटबंधारे विभागाकडे शिल्लक आहे. त्यामुळे पुनर्वसनातील अडचणी सोडवता येतील. महसूल प्रशासनाकडून संबंधीत शेतकऱ्यांशी थेट संवाद साधण्यात येणार आहे. त्यांच्या शंका दूर करून विरोध कमी करण्याचा प्रयत्न होणार आहे. त्यामुळेच उचंगी प्रकल्पाच्या घळभरणीचे काम जानेवारीत सुरू होईल.

- स्मिता माने, कार्यकारी अभियंता, पाटबंधारे विभाग

प्रकल्पाची किंमत झाली चौपट

उंचगी प्रकल्प मंजूर झाला, त्यावेळी १५ कोटी १२ लाख रुपये मंजूर होते. मात्र काम निर्धारित वेळेत पूर्ण न झाल्याने त्याची किंमत ५८ कोटी ७३ लाख रुपये झाली आहे. आंबेओहोळ प्रकल्पाची मूळ किंमत २९ कोटी ३१ लाख रुपये होती. प्रकल्प रखडल्याने ती वाढून ११४ कोटी ९३ लाख रुपये झाली आहे. दोन्ही प्रकल्पांची किंमत चौपट वाढली. प्रकल्पांचे प्रत्यक्षात काम कधी सुरू होईल हे अनिश्चित आहे. त्यामुळे किंमत आणखी वाढणार आहे.

उचंगी

१९९६

प्रकल्पाला मंजुरी

५८ कोटी ७३ लाख

आताची प्रकल्पाची किंमत

३७ कोटी

आतापर्यंत झालेला खर्च

१७. ४८ दशलक्ष घनमीटर

पाणी साठवण क्षमता

२८८

एकूण प्रकल्पग्रस्त

१८४

जमीन देय प्रकल्पग्रस्त

७५ टक्के

धरणाचे झालेले काम

आजरा, गडहिंग्लज

प्रकल्पाचा लाभ मिळणारे तालुके

आंबेओहोळ

२०००

प्रकल्पाला मंजुरी

११४ कोटी ९३ लाख

प्रकल्पाची आजची किंमत

१०९ कोटी ६९ लाख

प्रकल्पाचा आजवरचा खर्च

३५. ११ द. ल. घ. मी

पाणी साठवण क्षमता

८२२

प्रकल्पग्रस्त

४६७

देय जमीन

७० टक्के

काम

आजरा, गडहिंग्लज

प्रकल्पाचा लाभ मिळणारे तालुके

म. टा. वृत्तसेवा, आजरा

शालेय पोषण आहार करण्यासाठीचे मानधन आणि पदरमोड करून गुंतवणूक केलेले इंधन बिल नियमाप्रमाणे त्वरित देण्याची मागणी मान्य केल्यामुळे स्वयंपाकी सुप्रिया शिवाजी गुरव (रा. आरदाळ, ता. आजरा) आणि त्यांच्या सहकाऱ्यांनी सुरू केलेले आंदोलन मागे घेण्यात आले. याबाबत गटशिक्षण अधिकाऱ्यांनी लेखी हमीपत्र दिले आहे. पोषण आहार बनविण्यासाठीचे मानधन आणि इंधन बिले सहा महिन्यांपासून आरदाळ येथील शाळा व्यवस्थापन समितीच्या खात्यावर जमा झाली होती, पण ती देण्यात टाळाटाळ होत होती. याबाबत गटशिक्षणाधिकाऱ्यांनी मध्यस्थी करून बिले देण्याबाबत अडवणूक होऊ नये आणि येथून पुढे व्यवस्थापन समितीच्या खात्यावर बिले जमा होताच ती अदा करावीत, असे सुचविण्यात आले आहे. त्यामुळे आंदोलन मागे घेण्यात आले. यावेळी आंदोलनकर्ते आणि मुक्ती संघर्ष समितीचे संग्राम सावंत यांनी चर्चा केली.

म. टा. प्रतिनिधी, कोल्हापूर

कृषी विभागाकडून जिल्ह्यात झालेल्या गैरव्यवहारांची पोलिसांनी चौकशी सुरू केली आहे. चौकशीचा अहवाल तातडीने सादर करण्याचे आदेश पोलिस महासंचालक दत्ता पडसलगीकर यांनी दिले आहेत. पॅक हाउस व इतर प्रकल्पांचे अनुदान वाटपात हा गैरव्यवहार झाल्याची तक्रार सामाजिक कार्यकर्ते नाथाजी पोवार यांनी केली होती.

सरकारच्या कृषी विभागाच्या वतीने विविध प्रकल्पांना अनुदान दिले जाते. पॅक हाउस, शेततळे, फळ प्रक्रिया केंद्र, नेट शेड अशा प्रकल्पांना दिल्या जाणाऱ्या या अनुदानात अधिकारी व शेतकऱ्यांनी संगनमत करून गैरव्यवहार केला. पॅक हाउस नियमानुसार न बांधता पन्नास टक्के अनुदान लाटले. याबाबत तक्रार केल्यानंतर या प्रकरणाची चौकशी करण्यासाठी दोन अधिकाऱ्यांची नियुक्ती केली. त्यांनी अहवाल दिला असून, त्यामध्ये अनेकांवर ठपका ठेवण्यात आला असल्याचे समजते.

या प्रकरणात सरकारी अधिकारी व शेतकऱ्यांनी सरकारची फसवणूक केल्याने या प्रकरणाची चौकशी करावी, अशी मागणी पोवार यांनी मुख्यमंत्री देवेंद्र फडणवीस यांच्याकडे केली होती. त्यानुसार पोलिस महासंचालक पडसलगीकर यांनी पोलिस अधीक्षक डॉ. अभिनव देशमुख यांना चौकशीचे आदेश दिले आहेत. भुदरगड व हातकणंगले तालुक्यांतील पोलिसांनी याबाबत चौकशी सुरू केली आहे. यानंतर जिल्ह्यातील सर्व तालुक्यांतील गैरव्यवहाराची चौकशी करण्यात येणार आहे.

००००

Sachin.patil1@timesgroup.com

Tweet@sachinpMT

कोल्हापूर : शालेय वयातील विद्यार्थ्यांना नवीन कौशल्ये शिकवण्याचे अवघड काम शिक्षकांना करावे लागते. त्यात विद्यार्थी दिव्यांग तसेच मतिमंद गटातील असतील तर शिक्षकांसमोर मोठे आव्हान असते. जिज्ञासा मतिमंद शाळेतील क्रीडा शिक्षक विशाल दीक्षित यांनी जिद्दीने खेळाडू विद्यार्थी घडवले आहेत. त्यांच्या मार्गदर्शनाखाली विद्यार्थ्यांनी आंतरराष्ट्रीय पातळीवरील चमक दाखवली आहे. शाळेतील दोन विद्यार्थ्यांची अबुधाबी येथे होणाऱ्या वर्ल्ड गेमसाठी निवडही झाली आहे.

सानेगुरुजी वसाहत रस्त्यावर क्रशर चौकातील रघुनंद नावाच्या दोन मजली इमारतीत मतिमंद विद्यार्थ्यांची शाळा भरते. 'जिज्ञासा' आणि 'राही' वर्गात पासष्टहून अधिक मुले शिकतात. शाळेत क्रीडा शिक्षक दीक्षित १९९५ पासून कार्यरत आहेत. राही पुनवर्सन केंद्रात सहा वर्ग असून वर्गीकरणानुसार मुलांना शिकवण्याचे काम शिक्षकांना करावे लागते. साधारण मुलांपेक्षा मतिमंद मुलांच्या वर्तनात नेहमी बदल होत असतात. त्यामुळे सुरुवातीला दीक्षित यांना मुलांना शिकवताना फार कष्ट घ्यावे लागले. मुलांतील निरागसता पाहून त्यांनी त्यांच्यातील कौशल्ये हेरून त्यांना शिक्षण द्यायचे ठरवले. विविध क्रीडा प्रकारांत त्यांना रस होता. त्यांनी मुलांना जिल्हा व जिल्ह्याबाहेरील राज्यस्तरीय क्रीडा स्पर्धामध्ये सहभाग घ्यायला लावला. धावणे, लांब उडी, सायकलिंग, वेटलिफ्टिंग, बॅडमिंटन अशा स्पर्धांमध्ये सहभागी झाल्याने मुलांचा आत्मविश्वास वाढला. त्यानंतर आंतरराष्ट्रीय संघटनेच्यावतीने ऑस्ट्रेलियात झालेल्या विशेष मुलांच्या 'स्पेशल ऑलिम्पिक' स्पर्धेत शाळेतील नऊ मुलांनी यश मिळवले. ग्रीसमध्ये झालेल्या सायकलिंग स्पर्धेत मंजिरी कुलकर्णी या खेळाडूने सहभाग घेतला. २०१९मध्ये अबुधाबी येथे होणाऱ्या वर्ल्ड गेमसाठी आदित्य डोंबलेची पॉवरलिफ्टिंगसाठी तर आरिफ जहाँगीरची सायकलिंग स्पर्धेसाठी निवड झाली आहे.

विशेष प्रशिक्षण घेऊन संकटांवर मात

मतिमंद मुलांना शिकवण्यासाठीचा विशेष अभ्यासक्रम विशाल दीक्षित यांनी पूर्ण केला आहे. विद्यार्थ्यांना ऑस्ट्रेलियाला घेऊन जाण्यापूर्वी त्यांनी राष्ट्रीय व राज्यस्तरावरील खेळातील विविध प्रशिक्षण वर्गांत सहभाग घेतला. ऑस्ट्रेलियात झालेल्या स्पर्धेत दीक्षित यांच्या मार्गदर्शनाखाली विद्यार्थ्यांनी चार सुवर्ण, तीन रौप्य, व पाच कास्यपदके पटकावली. तसेच बॅडमिंटनमध्ये भारतीय संघाचा हेडकोच म्हणून काम करण्याची संधी त्यांना मिळाली. आता जिज्ञासा शाळेने राज्यातील पहिला मतिमंद विद्यार्थ्यांसाठीचा अभ्यासक्रम तयार केला आहे. त्याला शासनाने मान्यता दिली असून असा अभ्यासक्रम तयार करणारी जिज्ञासा राज्यातील पहिली शाळा आहे.

मतिमंद विद्यार्थ्यांचे स्वत:चे एक भावविश्व असते. समाजाने त्यांच्याकडे दुर्लक्ष न करता त्यांना समजून घेतल्यास ही मुलेही सर्वसामान्य आयुष्य नीटपणे जगू शकतील. अशा विद्यार्थ्यांत अनेकविध कौशल्ये लपलेली असतात त्यासाठी प्रयत्नपूर्वक काम करावे लागते.

- विशाल दीक्षित, क्रीडा शिक्षक

फोटो -

म. टा. वृत्तसेवा, इचलकरंजी

सनी आवळे खून प्रकरणातील तिघा संशयितांच्या घरावर बुधवारी संतप्त जमावाने हल्ला चढविला. यामध्ये अक्षय कोळी, आकाश बेळगावकर व अल्पवयीन संशयितांच्या घरातील प्रापंचिक साहित्यासह वस्तूंची मोठ्या प्रमाणात तोडफोड करण्यात आली. या घटनेमुळे नेहरूनगर परिसरात तणाव निर्माण झाल्याने परिसरात पोलिस बंदोबस्त तैनात करण्यात आला होता.

पूर्ववैमनस्यातून नेहरूनगर येथील सनी आवळे याचा चार दिवसांपूर्वी तिघांनी निर्घृणपणे खून केला. या प्रकरणी शिवाजीनगर पोलिसांनी एका अल्पवयीन मुलासह तिघांना अटकही केली आहे. संशयितांना फाशी द्यावी यासाठी सोमवारी भागातील नागरिकांनी प्रांताधिकारी कार्यालयावर मोर्चा काढला होता. बुधवारी सकाळी नेहरूनगर येथे एकत्र जमलेल्या संतप्त जमावाने कोळी, बेळगावकर यांच्यासह तिघांच्या घरावर हल्लाबोल केला. यामध्ये बेळगावकर याच्या दुमजली घरात घुसून संपूर्ण प्रापंचिक साहित्यासह घरातील वस्तूंची तोडफोड करण्यात आली. त्यानंतर अल्पवयीन संशयिताच्या घरावर हल्ला चढवून दारातील स्वच्छतागृह पाडून टाकण्याबरोबरच पाण्याची टाकी फोडत घरातील साहित्याचीही मोडतोड केली. कोळीने नेहरूनगर येथील घर गहाणवट दिले आहे. तेथेही हल्ला करून साहित्याची नासधूस केली. या घटनेनंतर परिसरात तणाव निर्माण झाला होता. याबाबतची माहिती समजताच पोलिस निरीक्षक इरगोंडा पाटील, स्थानिक गुन्हे शाखेचे पथक घटनास्थळी दाखल झाले. याबाबत पंचनामा करून गुन्हे दाखल करण्याचे काम पोलिसात सुरू होते.

म. टा. प्रतिनिधी, कोल्हापूर

'श्रमिक मुक्ती दल, निर्मिती विचारमंच, समविचारी संघटनेतर्फे बुधवारी (ता. २८ नोव्हेंबर) सकाळी ११ वाजता दसरा चौकातील राजर्षी शाहू स्मारक भवनात निर्धार परिषदेचे आयोजन केले आहे. यात पर्यायी आणि समान विकास, गुलामी संपवणारा सार्वत्रिक विकासावर चर्चा होणार आहे. त्यामध्ये जातीयवादी, धर्मांधांचा बिमोड करण्याची शपथ घेण्यात येणार आहे,' अशी माहिती ज्येष्ठ विचारवंत डॉ. भारत पाटणकर यांनी बुधवारी पत्रकार परिषदेत दिली.

पाटणकर म्हणाले, 'देशात सध्या वाढत असलेली हुकूमशाही, फॅसिझम विकासाला घातक आहे. भांडवलदारांचा विकास होत असून सामान्यांची फरफट होत आहे. त्यामुळे समान, सार्वत्रिक विकास होणे आवश्यक आहे. या पार्श्वभूमीवर परिषदेत महत्वाची भूमिका घेण्यात येणार आहे. विदर्भ, मराठवाडा, पश्चिम महाराष्ट्रातील ११ जिल्ह्यातून विचारवंत, सामाजिक कार्यकर्ते सहभागी होणार आहेत. समन्यायी विकास धोरणाआड येणाऱ्यांना बाजूला करणे, जनतेला उद्ध्वस्त करणाऱ्या जातीयवादी, धर्मांधांचा बिमोड करण्याची महत्वपूर्ण शपथ घेण्यात येईल.'

दरम्यान, अंबाबाई मंदिर पुजारी नेमण्यासंबंधी कायद्याची त्वरित अंमलबजावणी करावी, पारंपरिक पुजारी हटवून, पूजेसाठी सरकारी कर्मचाऱ्यांची नियुक्ती करावी, अशी मागणीही डॉ. पाटणकर यांनी केली. हा कायदा प्रत्यक्षात अमलात आणण्याकडे सरकार जाणीवपूर्वक दुर्लक्ष करीत आहे, असा आरोपही त्यांनी केला.

यावेळी अॅड. डॉ. गेल ऑम्वेट, अनिल म्हमाणे उपस्थित होते.

कोल्हापूर : जिल्हा परिषदेचा सन २०१७-१८ चा वार्षिक प्रशासन अहवाल प्रसिध्द झाला आहे. जिपमार्फत वर्षभरातील विविध योजनांची अंमलबजावणी, निधीचा विनियोगचा समावेश आहे. जिल्हा परिषदेने ११ सप्टेंबर रोजी ठराव क्रमांक ४४० व्दारे अहवालाला मंजुरी दिली आहे. प्रशासनामार्फत वार्षिक प्रशासन अहवाल प्रसिध्द दिल्याची माहिती मुख्य कार्यकारी अधिकारी अमन मित्तल यांनी पत्रकाव्दारे दिली आहे.

कोल्हापूर : जिल्ह्यातील खासगी प्राथमिक शाळांच्वो वेतन राष्ट्रीयकृत बँकेत करावेत अशी मागणी खासगी प्राथमिक शिक्षक सेवक समितीतर्फे शिक्षणमंत्र व शिक्षण सचिवांकडे केली आहे. समितीचे राज्याध्यक्ष भरत रसाळे, उपाध्यक्ष सारंग पाटील, सचिन परीट यांनी निवेदन दिले आहे. निवेदनात 'राज्यतील खासगी प्राथमिक शाळांच्या वेतनासाठी १९८५ मध्ये वेतन व भविष्य निर्वाह निधी पथकांची स्थापना प्रत्येक जिल्ह्यात झाली. जिल्हा मध्यवर्ती बँकेमार्फत संबंधित शाळांचे वेतन करण्यात येऊ लागले. मात्र गेल्या ३५ वर्षाचा अनुभव पाहता दरमहा एक तारखेला पगार होत नाहीत. राष्ट्रीयकृत बँकेमार्फत वेतन झाल्यास या बँका वेतनधारक सभासदाला एटीएम कार्ड, गृह व वाहन तारण कर्ज, पगार तारणावर तत्काळ कर्ज, मोफत पासबुक सुविधा देतात. मात्र जिल्हा मध्यवर्ती बँकेकडून या सुविधांची वानवा आहे. तेव्हा खासगी प्राथमिक शाळांचे वेतन राष्ट्रीयकृत बँकेमार्फत करावेत.'असे म्हटले आहे.

कोल्हापूर : कर्नाटकातील सौंदत्ती यात्रेसाठी येथून मोठ्या संख्येने भाविक जातात. त्यांनी आरक्षित केलेल्या बसेस सुरक्षित असाव्यात, बसवर गॅरिअरची सोय असावी, टायर्स चांगले असावेत, खोळंबा आकार कमी करावा, या मागणीचे निवेदन येथील श्री करवीर निवासिनी रेणुका भक्त संघटनेतर्फे राज्य परिवहन विभाग नियंत्रकांना देण्यात आले. यावेळी संघटनेचे उदय पाटील, प्रशांत खाडे, प्रदीप साळोखे, किरण मोरे, विजय पाटील आदी उपस्थित होते.