कोल्हापूर टाइम्स टीम जिल्हा परिषद शाळांचा दर्जा वाढावा, मुलांची गुणवत्ता उंचवावी यासाठी जिल्हाभर 'माझी शाळा, समृद्ध शाळा'अभियानाने वेग घेतला आहे. या अभियान अंतर्गत प्रत्येक शाळेचे स्वयंमूल्यांकन सुरू आहे. भौतिक व गुणवत्ता वाढीसोबतच माजी विद्यार्थ्यांच्या सहभागातून शाळेचा विकास साधण्यावर भर आहे. गेल्यावर्षी शाळा समृध्दीसाठी दीड कोटी रुपये लोकवर्गणी जमली. शैक्षणिक उठावतंर्गत तब्बल १६ कोटी रुपयांची कामे झाली आहेत. यंदा लोकसहभाग वाढवून २० कोटी रुपयांपर्यंतचा निधी शैक्षणिक उठावसाठी जमविण्याचा पदाधिकारी व प्रशासनाचा संकल्प आहे. गावपातळीवरील या प्रयत्नांना जिल्हा परिषद प्रशासनाने हातभार लावला आहे. शिक्षणतज्ज्ञ डॉ. जे. पी. नाईक जन्मशताब्दी वर्षानिमित्त 'माझी शाळा...समृद्ध शाळा'अभियानाची अंमलबजावणी सुरू आहे. या अभियानातील विजेत्या शाळांना तालुका आणि जिल्हास्तरावर रोख रक्कम देऊन गौरविले जाणार आहे. तत्पूर्वी सहभागी शाळांनी ३०० गुणांचे स्वयंमूल्यांकन करावयाचे आहे. यामध्ये भौतिक व गुणवत्ता विषयासाठी १६० गुण आहेत. अभियान कालावधीत राबविलेल्या उपक्रमांसाठी १४० गुण आहेत. डिसेंबर अखेर हे अभियान चालणार आहे. शाळा विकासात लोकांना सहभाग करुन घेणे हा प्रमुख उद्देश आहे. अभियानाला चालना देण्यासाठी पदाधिकारी आणि प्रशासकीय पातळीवरुन प्रयत्न सुरू आहेत. अध्यक्षा शौमिका महाडिक यांच्या मार्गदर्शनाखाली जिल्ह्यात तालुकानिहाय बारा कार्यशाळा घेतल्या. मुख्य कार्यकारी अधिकारी अमन मित्तल, शिक्षण समिती सभापती अंबरिश घाटगे, उपमुख्य कार्यकारी अधिकारी रविकांत आडसूळ, प्राथमिक शिक्षणाधिकारी आशा उबाळे यांनी कार्यशाळेला मार्गदर्शन केले. ००० 'स्पर्धेच्या माध्यमातून शाळा विकास हे अभियानाचे सूत्र आहे. माझी शाळा समृद्ध शाळा अभियानमध्ये प्रत्येक शाळेचा सहभाग आहे. १९ निकषावर आधारित स्वयंमूल्यांकन आहे. प्रत्येक शाळेने त्या पद्धतीने काम केल्यास शाळेची गुणवत्ता, भौतिक सुविधा निर्माण होणार आहेत. हे अभियान शाळा विकासासाठी नव संजीवनी ठरेल.' रविकांत आडसूळ, उपमुख्य कार्यकारी अधिकारी शाळा समृद्धीसाठी गेल्यावर्षी जमलेला निधी तालुका जमलेला निधी आजरा ९,५२,५०० भुदरगड १३,०१,००० चंदगड ३,६७,५१० गडहिंग्लज ३१,९१,९२७ गगनबावडा ३,८०,३३० हातकणंगले ७,२८,४६० कागल २३,८५,६०० करवीर ११,७७,८७० पन्हाळा १८,०५,००० राधानगरी ६,२७,४६२ शाहूवाडी १६,७३,५०० शिरोळ ४,३८,१०० वित्त आयोगातील निधी शाळेसाठी बंधनकारक चौदाव्या वित्त आयोगातील निधी थेट ग्रामपंचायतींना उपलब्ध होतो. या निधीतील २५ टक्के रक्कम ही शिक्षण, आरोग्य आणि उपजिविका या घटकावर खर्ची करणे बंधनकारक आहे. जिल्हा परिषदेतीच्या प्राथमिक शाळा या ग्रामीण भागातील मुलांच्या आधारवड आहेत. चौदाव्या वित्त आयोगातील अधिकाधिक निधी शाळा विकासासाठी खर्च करावा, असे आवाहन कार्यशाळेतून करण्यात आले. जिल्हा परिषद शाळेची गुणवत्ता वाढावी, मुलांना भौतिक सुविधा मिळाव्यात यासाठी प्रयत्नशील आहे. गेल्या वर्षी शैक्षणिक उठावांतर्गत १६ कोटी रुपयांची कामे झाली.'माझी शाळा समृद्ध शाळा'ही अभिनव संकल्पना आहे. त्याच्या प्रभावी अंमलबजावणीसाठी ठिकठिकाणी कार्यशाळा घेतल्या. शिक्षकांना, लोकांना महत्त्व पटवून दिले. शाळा विकासात प्रशासकीय धोरणासोबतच लोकसहभाग अंत्यत महत्त्वाचा आहे. शाळा तिथं प्रयोगशाळा, वाचनालय, भौतिक सुविधा हा उद्देश आहे. यंदा लोकसहभागाच्या प्रयत्नातून वीस कोटी रुपयांपर्यंतची शाळा विकासाची कामे करण्यासाठी प्रयत्न सुरू आहेत. अंबरिश घाटगे, सभापती शिक्षण समिती जिल्हा परिषद
मोबाइल अॅप डाउनलोड करा आणि राहा अपडेट
