सायंकाळनंतर रोड पॅक, अतिक्रमण विभाग हतबल म. टा. प्रतिनिधी, कोल्हापूर दिवाळी सणामध्ये महाद्वार व ताराबाई रोड खुला करण्यासाठी रविवारी महापालिकेच्या अतिक्रमण विभागाने कारवाई केली. कारवाईनंतर महालक्ष्मी धर्मशाळेपासून विक्रेत्यांना बसण्यास जागा दिली. मात्र सोमवारी सायंकाळनंतर दोन्ही रोडवर विक्रेत्यांनी पुन्हा ठिय्या मारला. त्यामुळे महाद्वार ते पापाची तिकटी रोड वाहतुकीसाठी पूर्णपणे बंद झाला. दिवाळीमध्ये महाद्वार व ताराबाई रोड खुला करण्यावरुन गेल्या चार दिवसांपासून व्यापारी व विक्रेत्यांमध्ये संघर्ष सुरू आहे. महापालिकेने यामध्ये हस्तक्षेप करुन संघर्ष संपुष्टात आणला. रविवारी सकाळी अतिक्रमण निर्मूलन मोहीम राबवून विक्रेत्यांना हटवले. सर्व विक्रेत्यांना ताराबाई रोडवरील महालक्ष्मी धर्मशाळेपासून रंकाळाकडे जाणाऱ्या मार्गावर व बाबूजमाल येथील पार्किंगमध्ये बसण्यास पर्यायी जागा दिली. त्यानुसार विक्रीला सुरुवातही झाली. सोमवारी दुपारपर्यंत महाद्वार विक्रेतामुक्त होता. पण त्यानंतर काही फेरीवाल्यांचे नेते व विक्रेत्यांमध्ये मध्यभागी बसण्यासाठी चर्चा होऊ लागली. विक्रीचा महत्त्वाचा दिवस असल्याने सायंकाळी विक्रेत्यांनी रस्त्याच्या मध्यभागी ठाण मांडले. रस्त्यावर विक्रेत्यांनी अतिक्रमण करु नये, यासाठी अतिक्रमण निर्मूलन पथक बिनखांबी गणेश मंदिर येथे तैनात होते. पण पापाची तिकटी येथून एक-एक विक्रेता रस्त्यावर येवू लागला. महाद्वार गर्दीने ओसंडून वाहत असताना अचानक विक्रेत्यांनी घेतलेल्या या पवित्र्यामुळे क्षणात महाद्वार व ताराबाई रोड विक्रेत्यांनी व्यापून गेला. विक्रेते बिनखांबी गणेश मंदिरांपर्यंत आल्यानंतर पथकाला याबाबतची माहिती मिळाली. त्यामुळे गर्दीत विक्रेत्यांना हटवणे अतिक्रमण विभागाला शक्य झाले नाही. मंगळवारपासून महापालिकेला तीन दिवस सुटी असल्याने पुढील तीनही दिवस विक्रेत्यांचा ठिय्या रोडवरच राहणार आहे. मंगळवारी जर व्यापाऱ्यांनी वेगळी भूमिका घेतली तर ऐन दिवाळीच्या मुख्य दिवशी संघर्षाची ठिणगी पडण्याची शक्यता आहे.
मोबाइल अॅप डाउनलोड करा आणि राहा अपडेट