प्राधिकरणातील गावांच्या प्रतिनिधींना पालकमंत्र्यांचे आश्वासन

म. टा. प्रतिनिधी, कोल्हापूर

'प्राधिकरणातील ४२ गावांमध्ये शुद्ध पाणी पुरवठा, एसटीपी आणि कचरा प्रक्रिया प्रकल्प राबवण्यात येतील. तसेच १६ गावांत १४५ कोटी रुपये निधीतून राबवण्यात येणारी पाणीपुरवठा योजना वेगाने कार्यान्वित होण्यासाठी प्रयत्न केले जातील,' असे आश्वासन पालकमंत्री चंद्रकांत पाटील यांनी दिले. शहरात ऑडिटेरियम उभारण्यासाठी १३ कोटी रुपयांचा प्रस्ताव तयार करण्यात आल्याची माहितीही त्यांनी दिली.

दरम्यान पालकमंत्र्यांनी दिलेल्या आश्वासनाचे कायद्यात रुपांतर झाल्यावरच प्राधिकरणाबाबतचा निर्णय घेतला जाईल, असे ४२ गावच्या सरपंचांनी स्पष्ट केले. सरकारी विश्रामगृहातील राजर्षी शाहू सभागृहात झालेल्या बैठकीत ४२ गावांमधील लोकप्रतिनिधींमधील प्राधिकरणाबाबत गैरसमज दूर करण्याचा पालकमंत्र्यांनी प्रयत्न केला. यावेळी प्राधिकरणाचे मुख्य कार्यकारी अधिकारी शिवराज पाटील उपस्थित होते. प्राधिकरण्याच्या गावांमधील एक इंचही जमीन घेणार नसल्याचे पालकमंत्र्यांनी स्पष्ट केले. ते म्हणाले, 'गावठाणाच्या आतील इमारतीची परवानगी ग्रामपंचायतीकडे कायम राहणार आहे. गावठाणाच्या बाहेर अनियंत्रितपणे सुरू असलेल्या बांधकामावर नियंत्रण ठेवण्यासाठी व योग्य नियोजन करण्यासाठी प्राधिकरणाकडून बांधकामास परवानगी दिली जाणार आहे. या इमारतींचा घरफाळा ग्रामपंचायतींना मिळणार आहे. फक्त विकास शुल्क प्राधिकरणाकडे जमा होणार आहे. विकास शुल्क इमारतीवर आकारले जाणार नसून तर जमिनीच्या रेडिरेकनरवर आकारले जाणार आहे. प्राधिकरणाचा खर्च भागवण्यासाठी व प्रसंगी विकास कामासाठी सरकारकडून निधी उपलब्ध करून देण्याचे आश्वासन दिले.

ते म्हणाले, 'प्राधिकरणातील ४२ गावात शुद्ध पाणीपुरवठा करण्यासाठी पाच लाखांचा निधी दिली जाणार आहे. यापूर्वी प्राधिकरणातील गांधीनगर, उचगाव, उजळाईवाडी, पाचगावसह १६ गावातील प्रादेशिक योजनेतून १४२ कोटी रुपयांच्या निधीतून पाणी पुरवठा योजना मंजूर झाल्या आहेत. या योजना वेगाने कार्यान्वित करण्यात येणार आहे. तसेच मोठ्या गावात सांडपाणी प्रक्रिया प्रकल्प राबवण्यात येणाऱ्या छोट्या तीन ते चार गावात मिळून एक सांडपाणी प्रकल्प उभारण्यात येईल. तसेच प्रत्येक गावात ओला व सुका कचरा वेगळा करणारी यंत्रणा उभारण्यात येईल.'

प्राधिकरणात महानगरपालिकेचाही समावेश असून उपनगरातील नागरिकांना चांगली नाटके व सांस्कृतिक कार्यक्रम पहाता यावेत, यासाठी शिवाजी विद्यापीठाजवळ भव्य ऑडिटेरियम उभारण्यात येईल. त्यासाठी १३ कोटी रुपयांचा प्रस्ताव करण्यात आला आहे. महानगरपालिकेच्या परवानगीनंतर हा प्रकल्प कार्यान्वित करण्यात येईल. प्रकल्पात भव्य सभागृह, हॉस्पिटल, शॉपिंग कॉम्प्लेक्सचा समावेश आहे.

प्राधिकरणाला विरोधच

पालकमंत्री पाटील यांच्याकडून तोंडी आश्वासने दिली जातात. पालकमंत्र्यांनी दिलेल्या आश्वासनांचे कायद्यात रुपांतर होईपर्यंत प्राधिकरणाला विरोधच राहील, असे सरपंचासह लोकप्रतिनिधींनी स्पष्ट केले. प्राधिकरणाचा खर्च ४२ गावाकंडून वसूल करू नयेत, विकास कामे फक्त सरकारी मालकीच्या जमिनीवर करावा, घरफाळा ग्रामपंचायतींना मिळावा या मागण्या करण्यात आल्या. करवीर पंचायत समितीचे सभापती राजेंद्र सूर्यवंशी म्हणाले, 'प्राधिकरणात करवीर तालुक्यातील ३७ तर हातकणंगले तालुक्यातील पाच गावे आहेत. प्रत्येक गावाच्या वेगवेगळ्या अडचणी आहेत. प्रत्येक गावाच्या अडीअडचणी समस्याबाबतचे निवेदन पालकमंत्र्यांना देण्यात येईल. त्यानंतर ग्रामसभा घेऊन प्राधिकरणाबाबत निर्णय घेतला जाईल. वडणगेचे सरपंच सचिन चौगुले, पीरवाडी पंचायत समिती सदस्य कृष्णात धोत्रे, दिनकर अडसूळ, प्रकाश रोटे, साताप्पा कांबळे यांच्यासह सरपंच उपस्थित होते.

०००००००

'कोल्हापूर वेगळे राष्ट्र करुया'

प्राधिकरणाला विरोध करताना सरपंचानी कोल्हापूरची भौगोलिक रचना, बांधकाम परवानगी याबाबत विविध प्रश्नांची सरबत्ती पालकमंत्र्याकडे केली. एका सरपंचानी पुणे, नागपूर येथे जरी प्राधिकरण झाले असले तरी कोल्हापूरबाबतीत हद्दवाढ, प्राधिकरणाऐवजी वेगळा पर्याय निवडावा, अशी मागणी केल्यावर पालकमंत्री पाटील यांनी त्यासाठी 'कोल्हापूर वेगळे राष्ट्र करुया', अशी कोटी केली. गावठाण, गायरान, घरफाळा, शुल्क आकारणीबाबत पालकमंत्र्यांनी स्पष्टीकरण करुनही सार्वमताची मागणी केल्यावर पालकमंत्र्यांनी 'आता मी बाहेर जाऊन प्राधिकरण बरखास्त केले अशी घोषणा करतो. ही घोषणा केल्यावर गावठाणाबाहेरील बांधकामाच्या परवानगीसाठी जिल्हाधिकारी कार्यालयात जावा,' असेही ते म्हणाले. प्रत्येक गावात प्राधिकरणाबाबतचे गैरसमज दूर करण्याची तयारी असल्याचे त्यांनी स्पष्ट केले.

फोटो आहे...

.......

ओपन जीमचे आज

पाचगावात लोकार्पण

म. टा. प्रतिनिधी, कोल्हापूर

पाचगावमधील विविध उपनगरांतील नागरिकांच्या सोयीसाठी शिवस्वरूपनगर येथे ओपन जीमची उभारणी केली आहे. आमदार अमल महाडिक यांनी जिल्हा नियोजन समितीच्या माध्यमातून पाच लाख रुपयांचा निधी उपलब्ध केला होता. या जीमचा लोकार्पण सोहळा रविवारी (ता.२८) होत आहे.

अण्णा ग्रुप महादेव मंदिर, शिवस्वरूपनगर येथे सकाळी दहा वाजता कार्यक्रम होत आहे. ओपन जीममुळे शिवस्वरुपनगर, जरगनगर, बळवंतनगर, आर. के. नगर या भागातील नागरिकांची सोय होणार आहे. महादेव मंदिर, शिवस्वरूपनगर येथे रोज सकाळी व सायंकाळी साधारणपणे ५०० लोक फिरायला येतात. मैदानाच्या चारही बाजूंनी कंपाउंड आहे. वॉकिंग ट्रॅक तयार केले आहे. या भागात ओपन जीम सुविधा उपलब्ध करून द्यावी अशी मागणी पाचगाव ग्रामपंचायतीचे सदस्य सागर दळवी, शीतल गवळी यांनी आमदार महाडिक यांच्याकडे केली होती. त्यांनी जिल्हा नियोजन समितीच्या माध्यमातून ओपन जीमसाठी पाच लाख रुपयांचा निधी दिला. त्या माध्यमातून व्यायाम साहित्य उपलब्ध करून दिले आहे.

निशिकांत सरनाईक बडतर्फ

म. टा. प्रतिनिधी, कोल्हापूर

म्युनिसिपल ट्रान्सपोर्ट वर्कर्स युनियनची नवीन कार्यकारिणी शनिवारी झालेल्या सभेत जाहीर केली. मावळते उपाध्यक्ष इरशाद नायकवडी यांच्या अध्यक्षतेखाली झालेल्या सभेत अध्यक्षपदी प्रमोद पाटील यांची एकमताने निवड केली. निवडीनंतर केएमटी कर्मचाऱ्यांनी साखर पेढे वाटून गुलालाची उधळण करत फटाक्यांची आतषबाजी केली.

केएमटी युनियनचे अध्यक्ष निशिकांत सरनाईक यांच्या विरोधात कार्यकारिणीसह सभासदांनी बंड फुकारत त्यांच्यावर आर्थिक गैरव्यवहाराचे आरोप केले होते. सरनाईक यांनी २३ ऑक्टोबरपर्यंत राजीनामा न दिल्यास सभा घेऊन पदावरुन हटवण्याचा निर्धार सभासदांनी केला होता. सरनाईक यांनीही त्याला जोरदार प्रत्युत्तर दिले होते. परिणामी शनिवारी शेकापच्या कार्यालयात होणाऱ्या बैठकीकडे महापालिका कर्मचाऱ्यांचे लक्ष लागले होते. नायकवडी यांच्या अध्यक्षतेखाली सभेला सुरुवात होण्यापूर्वी सभागृह खचाखच भरले होते. सरनाईक किंवा त्यांचे समर्थक सभेत उपस्थित राहिल्यास वाद निर्माण होण्याची शक्यता असल्याने वातावरण काहीसे तणावपूर्ण बनले होते. पण सरनाईक यांच्यासह समर्थक सभेस अनुपस्थित राहिल्याने सभा शांततेत पार पडली. त्यामध्ये नवीन कार्यकारिणीची घोषणा केली. कार्यकारिणी २०२० पर्यंत कार्यरत राहणार आहे.

युनियनच्या अध्यक्षपदाची जबाबदारी प्रमोद पाटील यांच्यावर सोपवण्याचा निर्णय घेतला. अन्य कार्यकारिणीमध्ये जनरल सेक्रेटरी इरशाद नायकवडी, खजानिस निजाम मुल्लाणी, कार्याध्यक्ष राजेश ठोंबरे, उपाध्यक्षपदी अमर मोरे, विश्वनाथ चौगुले, सचिन पाटील जॉइन सेक्रेटरीपदी मनोज नार्वेकर, मारुती कांबळे, आनंद बळवंत आडके यांचा समावेश आहे. यावेळी ऑफिस व वर्कशॉप कार्यकारिणी जाहीर केली. रिक्त जागेवर सेवा ज्येष्ठेतेनुसार चालक, वाहकांची कायमस्वरुपी नेमणूक करणे, अनुकंपानुसार पदांची भरती, नवीन वेळापत्रकांची अंमलबजावणी करणे आदी विषयावर कार्यकारिणी प्रयत्नशील राहील. सभेत पाच ठराव मंजूर केले.

सेवानिवृत्तींना पदावर राहता येत नाही

युनियनचे अध्यक्ष सरनाईक केएमटी सेवेतून दोन वर्षापूर्वी निवृत्त झाले आहेत. युनियनच्या धोरणानुसार सरनाईक यांना पदावर राहता येत नाही. परिणामी याच धोरणाचा आधार घेऊन सरनाईक यांना युनियनने पदमुक्त केले. सभेला सरनाईक व त्यांचे समर्थक उपस्थित राहतील, अशी शक्यता होती. पण त्यांच्यासह समर्थकांनीही सभेकडे पाठ फिरवली.

म. टा. प्रतिनिधी, कोल्हापूर

महापालिकेच्या शहर पाणीपुरवठा विभागाने एक दिवसाआड पाणी देण्यास सुरुवात केल्यानंतर बहुतांशी भागाला टँकरचा आधार मिळाला. शनिवारी ए व बी वॉर्डात २१ टँकरच्या फेरीद्वारे पाणीपुरवठा केला. दुरुस्तीचे काम सुरू असल्याने पुढील चार दिवस टँकरद्वारे पाणी देण्यात येणार आहे.

शिंगणापूर येथील पंपिंग स्टेशनमधील ट्रान्सफॉर्मरमध्ये बिघाड झाल्याने ए, बी व इ वॉर्डात एक दिवसाआड पाणीपुरवठा केला जात आहे. बालिंगा व कसबा बावडा पंपिंग स्टेशनमधून नियमित पाणी उपसा सुरू असल्याने निम्म्या शहरावर फारसा परिणाम झालेला नाही. मात्र पुईखडीवरुन होणाऱ्या पाणीपुरवठ्यावर परिणाम झाला आहे. शनिवारी ए, बी वॉर्डात पाणीपुरवठा बंद असल्याने टँकरद्वारे पाणी देण्यात आले. मात्र गेल्या दोन दिवसापेक्षा शनिवारी टँकरच्या फेऱ्या कमी झाल्या. कळंबा फिल्टर हाऊस येथून मंगळवार पेठ, लाड चौक, पाण्याचा खजिना, राजेंद्र नगर, मोहिते कॉलनी, आपटेनगर, कणेरकरनगर, संभाजीनगर व कळंबा जेल येथे तर कसबा बावडा फिल्टर हाऊस येथून राजारामपुरी, लोणार वसाहत, सह्याद्री हाउसिंग सोसायटी, टेंबलाईवाडी, सदर बाजार व जागृतीनगर येथे टँकरद्वारे पाणी देण्यात आले. दुरुस्तीचे काम आणखी चार दिवस सुरू राहणार आहे.

पालकमंत्री चंद्रकांत पाटील यांची माहिती

म. टा. प्रतिनिधी, कोल्हापूर

जिल्हा नियोजन मंडळ आणि लोकवर्गणीतून जिल्हा परिषदेच्या दोन हजार शाळा दुरुस्तींची मोहीम राबवण्यात येणार असून शाळांची रंगरंगोटी, नीटनेटक्या, देखण्या करून सुसज्ज केल्या जातील, अशी माहिती पालकमंत्री चंद्रकांत पाटील यांनी जिल्हा नियोजन मंडळाच्या बैठकीत दिली. जिल्ह्यातील सर्व लघु पाटबंधारे, पाझर तलाव, कोल्हापूर पद्धतीच्या बंधाऱ्यांच्या दुरुस्तीसाठी सर्वेक्षण जून २०१९ पूर्वी दुरुस्तीची सर्व कामे पूर्ण करण्याचे आदेशही त्यांनी दिले.

जिल्हाधिकारी कार्यालयातील ताराराणी सभागृहात जिल्हा नियोजन मंडळाची बैठक झाली. बैठकीत त्यांनी जिल्हा परिषदेच्या शाळांच्या दुरुस्तीचे अंदाजपत्रक प्राधान्याने तयार करण्याचे आदेश दिले. जिल्हा नियोजन मंडळाकडून ५० टक्के आणि लोकसहभागातून ५० टक्के निधी गोळा करून शाळा दुरुस्ती केली जाणार आहे. प्राथमिक शाळांना संरक्षक भिंतीसाठी निधी उपलब्ध करून दिला जाणार असून शाळांची मैदाने जिल्हा नियोजन समितीच्या निधीतून विकसित करण्यास प्राधान्य देण्यात येणार आहे. त्यासाठी प्रस्ताव सादर करण्याच्या सूचना करण्यात आल्या.

पालकमंत्री पाटील म्हणाले, 'पाण्याची साठवण अधिक व्हावी यासाठी जिल्ह्यातील पाझर तलाव, लघु पाटबंधारे शोधून त्यांचा सर्व्हे करण्याचे कामही अधिकाऱ्यांनी हाती घ्यावे. जिल्ह्यातील चार तालुक्यात दुष्काळ सदृश परिस्थिती निर्माण झाली असून या तालुक्यातील जनतेला दुष्काळाच्या सर्व सुविधा आणि सवलती प्राधान्याने उपलब्ध करुन दिल्या जातील.'

डेंगी व स्वाइन फ्ल्यूचा फैलाव रोखण्यासाठी आरोग्य विभागाने आरोग्य विभागाने विशेष मोहिम हाती घ्यावी, अशी सूचना पालकमंत्र्यांनी केली. बैठकीला उर्वरित महाराष्ट्र वैधानिक विकास मंडळाचे अध्यक्ष डॉ. योगेश जाधव, आमदार सुरेश हाळवणकर, डॉ. सुजित मिणचेकर, उल्हास पाटील, सत्यजित पाटील, अमल महाडिक, चंद्रदीप नरके, पश्चिम महाराष्ट्र देवस्थान समितीचे अध्यक्ष महेश जाधव, जिल्हाधिकारी अविनाश सुभेदार, जिल्हा परिषदेचे मुख्य कार्यकारी अधिकारी डॉ. अमन मित्तल, पुणे विभागाचे उपायुक्त उत्तम चव्हाण, जिल्हा नियोजन अधिकारी सरिता यादव, समाजकल्याण विभागाचे सहायक आयुक्त बाळासाहेब कामत यांच्यासह सदस्य उपस्थित होते. जिल्हा नियोजन अधिकारी सरिता यादव यांनी स्वागत केले.

०००००

१०० टक्के निधी खर्च करण्याचे आदेश

जिल्हा वार्षिक योजनेचा ३७८ कोटी ३५ लाख २८ हजाराचा निधीचा अर्थसंकल्प असून सरकार कडून २७२ कोटी ९९ लाख ८६ हजार रुपयांचा निधी प्राप्त झाला आहे. आजअखेर १३१ कोटी ६० लाखाचा निधी वितरित केला असून ८९ कोटी, १५ लाखाचा निधी खर्च झाला आहे. १०० टक्के निधी खर्च करण्याचे आदेश पाकलमंत्र्यांनी प्रशासनाला दिले. अनुसूचित जाती उपयोजनेसाठी ११३ कोटी ४१ लाख आणि ओटीएसपीसाठी एक कोटी ९० लाखाच्या निधीचा समावेश आहे.

म. टा. प्रतिनिधी, कोल्हापूर

अॅड. प्रकाश आंबेडकर यांच्या नेतृत्वाखाली स्थापन झालेल्या वंचित बहुजन आघाडीला राज्यात उत्स्फूर्त प्रतिसाद मिळत आहे. बूथ ते जिल्हा पातळीपर्यंत कार्यकर्त्यांवर आघाडीची जबाबदारी सोपविली जाणार आहे. त्यासाठी कार्यकर्ता संपर्क अभियान १२ नोव्हेंबर रोजी दुपारी १२ वाजता शाहू स्मारक भवन येथे आयोजित केले आहे, अशी माहिती आघाडीचे राज्य प्रवक्ते लक्ष्मण माने यांनी पत्रकार बैठकीत दिली.

माने म्हणाले, 'आघाडी स्थापना झाल्यानंतर एमआयएमसोबत युती केली आहे. त्यामुळे आघाडीला राज्यात चांगला प्रतिसाद मिळत आहे. आघाडी शेवटच्या घटकांपर्यंत पोहोचविण्यासाठी बूथ कमिट्यांची स्थापना केली जात आहे. त्यासाठी आघाडीतील प्रमुख नेत्यांवर विविध विभागांची जबाबदारी सोपवली आहे. त्यानुसार पश्चिम महाराष्ट्राची जबाबदारी आपल्याकडे असून लोकसभेच्या निवडणुकीसाठी संभाव्य उमेदवारांची चाचपणी करून यादी पक्षाध्यक्षांकडे पाठविण्यात येणार आहे. त्यासाठी कार्यकर्ता संपर्क अभियानाचे आयोजन केले आहे. संपर्क अभियान १२ नोव्हेंबरला होणार आहे.'

राज्यात एमआयएमसोबत युती झाली असून, काँग्रेससोबत युतीबाबत बोलणी सुरू आहेत. काँग्रेस पक्षाचा उमेदवार ज्याठिकाणी सलग तीन ते चार वर्षे पराभूत झाला आहे, अशा १२ जागांची आघाडीने मागणी केली आहे. मात्र, अद्याप सकारात्मक प्रतिसाद मिळालेला नाही. काँग्रेससोबत युती न झाल्यास लोकसभेच्या व विधानसभेच्या सर्वच जागा लढविणार असल्याचे स्पष्ट करत छोट्या छोट्या संघटना एकत्र करण्याची प्रक्रिया सुरू आहे. संभाजी ब्रिगेडसोबतही युतीबाबत चर्चा सुरू असल्याचे माने यांनी सांगितले.

पत्रकार बैठकीस दिगंबर सकट, रघुनाथ कांबळे, कबीर नाईकनवरे, अॅड. शीतल कांबळे, अनिल म्हमाणे आदी उपस्थित होते.

म. टा. प्रतिनिधी, कोल्हापूर

आंदोलन मागे घेण्यासाठी मंत्री गट समितीने २२ मागण्यांचे लेखी आश्वासन दिले. मात्र यापैकी एकाही आश्वासनाची पूर्तता झालेली नाही. मराठा समाजाची गळचेपी करून दबाव टाकण्यासाठी कार्यकर्त्यांवर गुन्हे नोंद करुन कोर्टात हजर राहण्याच्या नोटिसा बजावल्या जात आहेत. याच्या निषेधार्थ दिवाळीपूर्वी आत्मक्लेश आंदोलन करण्यात येणार आहे, अशी माहिती सकल मराठा समाजाचे नेते दिलीप देसाई यांनी पत्रकार बैठकीत दिली.

देसाई म्हणाले, 'आरक्षणासह अन्य मागण्यांसाठी दसरा चौकात सुरू असलेले आंदोलन मागे घेण्यासाठी मंत्रिगट समिती कोल्हापुरात आली होती. या समितीने २२ मागण्यांचे लेखी आश्वासन दिले. त्यावर जिल्हाधिकाऱ्यांची स्वाक्षरी आहे. पण आंदोलन मागे घेतल्यापासून सरकारने एकाही आश्वासनाची पुर्तता केलेली नाही. आण्णासाहेब पाटील आर्थिक विकास महामंडळाकडून मिळणाऱ्या कर्जाला थकहमी देण्यासह सारथीला पाच कोटी रुपयांची तरतूद करण्याचे आश्वासन दिले. थकहमीबाबत कोणतेही परिपत्रक न काढता बँकेच्या अधिकाऱ्यांना कर्जपुरवठा करण्याचे आदेश दिले जातात. कर्जपुरवठ्यांबाबत सरकारचे कोणतेही आदेश बँकांना नसल्याने ते कर्जपुरवठा करत नाहीत. सारथी कार्यालयात लिपिकाची सुद्धा भरती केलेली नाही. म्हणून सारथीचे प्रमुख सदानंद मोरे यांचा राजीनामा मागितला. पण निष्क्रीय मोरेंनी अद्याप पदभार सोडलेला नाही. सरकारने आश्वासनाबाबत १५ दिवसांत निर्णय घ्यावा, अन्यथा राज्यात पुन्हा आंदोलन करु,' असा इशारा त्यांनी दिला.

वसंतराव मुळीक म्हणाले, 'आंदोलन मागे घेत असताना, मराठा समाजातील कार्यकर्त्यांवरील गुन्हे मागे घेण्याचे आश्वासन दिले. पण गुन्हे मागे न घेता विविध पोलिस स्टेशनमध्ये गंभीर स्वरुपाचे गुन्हे दाखल करुन कोर्टाच्यावतीने नोटीस बजावली जात आहे. गुन्हे मागे घेणार असाल, तर नोटिसा कशासाठी काढता. सासवड येथे ८० दिवसांपासून आंदोलन सुरू आहे. आंदोलनाला पाठिंबा देण्यासाठी बुधवारी (ता. ३१) कार्यकर्ते जाणार असून त्यासाठी नोंदणी करावी. '

इंद्रजित सावंत म्हणाले, 'आश्वासन देऊन दोन महिने झाल्यानंतर गुन्हे मागे घेण्यासाठी आता समितीची स्थापना केली जात आहे. दोन महिने सरकार झोपले होते का? सरकारकडून मराठा समाजाची गळचेपी सुरू आहे. संभाजी भिडे, मंत्री सदाभाऊ खोत यांच्यावरील गुन्हे मागे घेतले जातात. पण मराठा कार्यकर्त्यांवर गुन्हे दाखल केले जात आहेत. सर्वांना समान न्याय का नाही? सरकारने ही कारवाई तातडीने थांबवावी, अन्यथा पुन्हा आंदोलन करु.'

हर्षल सुर्वे म्हणाले, 'गुन्हा दाखल करायचा असेल, तर आंदोलनानंतर करा. ३५३ सारखी कलमे लावून समाजामध्ये दहशत निर्माण केली जात असून कोर्टाने पाठवलेल्या नोटिसा कार्यकर्त्यांनी स्वीकारु नयेत. सकल मराठा समाज कार्यकर्त्यांच्या पाठरशी ठामपणे उभा राहील.' पत्रकार बैठकीस सचिन तोडकर, स्वप्नील पार्टे, अवधूत पाटील, गणी आजरेकर, संजय पवार, अदित्य गौड, शुभम शिरहट्टी यांच्यासह सकल मराठा समाजाचे कार्यकर्ते उपस्थित होते.

दिवाळीत महाडिक उद्योग समूहातर्फे उपक्रम

म. टा. प्रतिनिधी, कोल्हापूर

'दिवाळी हा मांगल्याचा सण आहे. या सणासुदीच्या कालावधीत प्रत्येकाने नवीन कपडे परिधान केले पाहिजेत. या भावनेतून महाडिक उद्योग समूहातर्फे 'आपुलकीची भिंत' संकल्पनेंतर्गत दहा हजार गरीब लोकांना नवीन कपडे वाटप करण्यात येणार आहेत,' अशी माहिती खासदार धनंजय महाडिक यांनी पत्रकार परिषदेत दिली.

खासदार महाडिक, आमदार अमल महाडिक, ताराराणी आघाडीचे प्रमुख स्वरुप महाडिक यांच्या पुढाकारातून नवीन कपड वाटपाचा उपक्रम होणार आहे. खासदार महाडिक म्हणााले, 'दसरा चौक मैदानावर दोन नोव्हेंबर रोजी सकाळी दहा ते दुपारी दोन या वेळेत हा कार्यक्रम होईल. नवीन कपडे वाटपाचा कार्यक्रम नियोजनबद्धरित्या पार पडेल. यासाठी पुरुष, महिला, सात व चौदा वर्षांखालील मुला मुलींच्या स्वतंत्र रांगा असतील. महापालिकेतील ताराराणी आघाडीही या उपक्रमात सहभागी होणार असून त्यांच्यातर्फे हजार लोकांना कपडे प्रदान करण्यात येणार आहेत. ही नवीन कपडे मुंबईहून आणली जाणार आहेत. महागाईमुळे गरीब कुटुबीयांची दिवाळी गोड करण्यासाठी 'आपुलकीचा फराळ' हा उपक्रम तीन नोव्हेंबर रोजी होणार आहे. शहरातील चौदा झोपडपट्टीतील १५ हजार कुटुंबांना प्रत्येकी एक किलोचा मिठाई बॉक्स एकाचवेळी वितरित केला जाणार आहे. ताराराणी आघाडी व सिंधी समाजाकडून प्रत्येकी एक हजार मिठाई बॉक्सचे वाटप करण्यात येईल. या दोन्ही उपक्रमांसाठी समाजातील दानशूर व्यक्तींनी मदत करावी.' पत्रकार परिषदेला नगरसेवक सत्यजित कदम, राजसिंह शेळके, उदय शेटके, इंद्रजित जाधव, मारुती माने, वैभव माने, समीर शेठ आदी उपस्थित होते.

विमानतळ परिसरात संवाद भेट

एक नोव्हेंबरपासून कोल्हापूर ते हैदराबाद विमानसेवा सुरू होत आहे. यादिनी सकाळी दहा वाजता विमानतळ परिसर येथे कारखानदार, उद्योजक, हॉटेल व्यावसायिकसह विवध क्षेत्रातील मान्यवरांच्या संवाद भेटीचे आयोजन केले आहे. याप्रसंगी एअर एलाइन्सचे सीईओ उपस्थित राहणार आहेत. शिवाय केंद्र सरकारच्या उडान योजनेच्या तिसऱ्या टप्प्यात कोल्हापूर ते मुंबई, कोल्हापूर ते गोवा आणि कोल्हापूर ते अहमदबाद अशी विमानसेवा प्रस्तावित आहे. या तीन शहरांशी विमान सेवा सुरू व्हावी, म्हणून प्रयत्न सुरू आहेत.

म. टा. वृत्तसेवा शाहूवाडी

शिक्षक बँकेची पुढील वर्षी होऊ घातलेली निवडणूक डोळ्यासमोर ठेवून चार वर्षे हरवलेल्या कार्यक्रमाचे आयोजन करून सत्ताधारी गटाने शिक्षक व सभासदांच्या दुःखावर फुंकर घातली आहे, असा आरोप करीत बँकेच्या वतीने रविवारी (ता.२८) बांबवडे (ता. शाहूवाडी) येथे होणाऱ्या गुणगौरव व सत्कार सोहळ्याच्या कार्यक्रमावर शिक्षक संघ (थोरात गट), कास्ट्राईब संघटना, शिक्षक समिती, पदवीधर संघटना, शिक्षक सेना, पुरोगामी संघटना, जुनी पेन्शन हक्क संघटना, आदी संघटनांशी संलग्न शिक्षकांनी बहिष्कार टाकल्याची माहिती संयुक्त प्रसिद्धीपत्रकाद्वारे दिली आहे.

पत्रकात म्हटले आहे की, प्राथमिक शिक्षक बँकेमार्फत गेल्या चार वर्षांत सेवानिवृत्त शिक्षक-सभासद, पात्र ठरलेले विविध शिष्यवृत्तीधारक विद्यार्थी व त्यांचे मार्गदर्शक शिक्षक तसेच आदर्श शिक्षक पुरस्कार विजेते शिक्षक यांचा सन्मान झालेला नाही. कार्यक्रमात सातत्य राखण्यात सत्ताधाऱ्यांना अपयश आल्यामुळे बँकेचा खरा मालक असणारा घटकच सन्मानाला मुकला आहे. वास्तविक ज्या-त्या वर्षी या विद्यार्थ्यांच्या पाठीवर कौतुकाची थाप पडायला हवी होती. त्यांना प्रेरणा व प्रोत्साहन मिळायला हवे होते. अशी खंत व्यक्त करून सर्व शिक्षक संघटनेच्या पदाधिकारी व सदस्यांना विश्वासात घेऊन हा कार्यक्रम आयोजित करणे अपेक्षित असताना पुढील निवडणुकीवर डोळा ठेवून एका शिक्षक संघटनेने या कार्यक्रमाचे आयोजन केले आहे.

पत्रकावर शिक्षक बँकेचे माजी संचालक रामचंद्र मोहिते, शिक्षक समिती सरचिटणीस अर्जुन जानकर, आनंदराव शेळके, पदवीधर शिक्षक संघटना तालुकाध्यक्ष एस. के. पाटील (पिशवीकर), कास्ट्राईब संघटना तालुकाध्यक्ष सदाशिव कांबळे, पुरोगामीचे शिक्षक नेते संपतराव पाटील आदींच्या सह्या आहेत.

आपुलकीची भिंत उपक्रम राबविणार असल्याची महाडिकांची माहिती

म. टा. प्रतिनिधी, कोल्हापूर

आमदार सतेज पाटील यांच्या 'माणुसकीची भिंत' या संकल्पनेची प्रेरणा घेऊनच 'आपलुकीची भिंत'हा उपक्रम राबवित आहे. त्यांनी जुनी कपडे वाटली तर मी नवीन कपड्यांचे वाटप करणार आहे, अशी माहिती देत 'राजकारणात कुणीही कुणाचा कायमचा शत्रू अथवा मित्र नसतो. राजकारणात काहीही होऊ शकते,'असे वक्तव्य खासदार धनंजय महाडिक यांनी शनिवारी पत्रकार परिषदेत केले.

महाडिक उद्योग समुहातर्फे दोन नोव्हेंबर रोजी 'आपुलकीची भिंत'संकल्पना राबविली जाणार आहे. यासंदर्भात आयोजित पत्रकार परिषदेत खासदार महाडिक यांनी कधी आमदार पाटील यांच्या संकल्पनेचे कौतुक तर कधी त्यांच्या राजकारणावर तिरकस टिप्पणी केली. त्यांच्याकडून प्रेरणा घेऊनच हा उपक्रम राबवित असल्याचे त्यांनी सांगितले. हे 'राजकीय पॅचवर्क'आहे का? अशी विचारणा केल्यावर खासदार महाडिकांनी त्या प्रश्नाला बगल दिली. मात्र 'राजकारणात कुणी कोणाचा कायमचा शूत्र, अथवा मित्र नसतो. यापूर्वी त्यांनीही मला मदत केली, मीही त्यांना मदत केली आहे,' असा पुनरूच्चार केला.

दरम्यान पत्रकार परिषदेच्या प्रारंभीच महाडिक यांनी आमदार सतेज पाटील यांचे थेट नाव न घेता म्हणाले, 'त्यांच्या 'माणुसकीची भिंत' या उपक्रमाची प्रेरणा घेऊनच आम्ही 'आपुलकीची भिंत'सुरू करत आहोत. दिवाळीत आपण नवीन कपडे परिधान करायचे, आणि दुसऱ्यांना जुने कपडे द्यायचे हे पटत नाही. कोल्हापूर ही छत्रपती शाहू महाराजांची भूमी आहे. या नगरीचे दातृत्व मोठे आहे. यामुळे गरीब लोकांसाठी नवीन कपडे वाटपाची भूमिका स्वीकारली आहे. ज्यांना या उपक्रमासाठी कपडे द्यायचे आहेत त्यांनी बी चॅनेल कार्यालयात जमा करावेत.'असे आवाहन केले.

.........

जुन्या कपड्यांचे गणित सुटेना

आमदार पाटील यांची 'माणुसकीची भिंत'संकल्पना चांगली आहे. जुनी कपडे गोळा करुन गरीब लोकांना देण्याचा कार्यक्रम स्तुत्य आहे. त्यांच्या उपक्रमाला मीही दरवर्षी गुपचूप कपडे पाठवितो. यंदाही पाठविणार आहे. मात्र या संकल्पनेतंर्गत जमलेल्या आणि वाटप केलेल्या कपड्यांच्या संख्येचे गणित सुटत नाही. दोन हजार लोकांनी जुनी कपडे जमा केली आणि ते तीन लाख लोकांना वाटप केल्याचे सांगितले गेले, त्यांनी सांगितले. त्यामुळे हे गणित मला सुटेना झालंय, असेही ते म्हणाले.

Bhimgonda.Desai@timesgroup.com

Tweet : @bhimgondaMT

कोल्हापूर : येथील जरगनगर एमएसईबी स्टेशनजवळील महानगरपालिकेच्या खुल्या जागेत बहुखेळांचे टर्फ मैदान तयार करण्यात येणार आहे. त्यासाठी जिल्हा नियोजन समितीमधून ५३ लाख, २० हजारांचा निधी मंजूर झाला आहे. या कामासाठी निविदेची प्रक्रिया सुरू आहे. या महिना अखेर ठेकेदार निश्चित करून सहा महिन्यात काम पूर्ण करण्याचे उद्दिष्ट सार्वजनिक बांधकाम विभागाने ठेवले आहे.

शहराचा विस्तार दिवसेंदिवस वाढत आहे. नव्याने वसाहती निर्माण होत आहे. शहरालगतच्या जरगनगर परिसरातील खेळाडूंची सोय होण्यासाठी नियोजन समितीमधून नवीन्यपूर्ण उपक्रम म्हणून टर्फ मैदानासाठी निधी मंजूर करण्यात आला आहे. ३० बाय १८ मीटर आकाराचे हे मैदान असले. सिमेंट कॉक्रिट मात्र रबरावर पाय ठेवल्याची अनुभूती यावी, असे करण्यात येणार आहे. टेनिस, हॉकी, फुटबॉल, व्हॉलीबॉल खेळण्यासाठीच्या मूलभूत सुविधा निर्माण करण्यात येणार आहे. अशा सुसज्ज अशा मैदानाजवळ खेळाडूंना कपडे बदलण्यासाठी दोन खोल्या, एक स्वच्छतागृह बांधण्यात येणार आहे. खेळ पाहण्यासाठी ३८ बाय ३ आणि २८ बाय ३ असे दोन प्रेक्षक गॅलरी बांधण्यात येणार आहे.

महानगरपालिकेच्या खुल्या जागेत मैदान होईल. सार्वजनिक बांधकाम विभागातर्फे मैदानाचे काम होणार आहे. देखभाल, दुरूस्तीसाठी महानगरपालिका प्रशासनाकडे वर्ग करण्यात येणार आहे. अत्याधुनिक पध्दतीने होणारे मैदान खेळाडूंना उपयोग पडेल, सिमेंटचे असल्याने पावसाळ्यातही सराव करता येणार आहे, असा दावा सार्वजनिक बांधकाम प्रशासनाने केला आहे. निर्धारित वेळे काम पूर्ण झाल्यास येत्या उन्हाळ्यात मैदान खेळाण्यासाठी खुले होणार आहे.

शहरातील सर्वच बाजूंना मैदान आहेत. मात्र तिथे खेळाडूंना चांगल्या सेवा, सुविधा मिळत नाहीत. पिण्याचे पाणी, स्वच्छतागृह, कपडे बदलण्यासाठी खोल्या नसतात. खेळाडूंची गैरसोय होते. चिखलाचे साम्राज्य असल्याने पावसाळ्यात सराव करता येत नाही. परिणामी खेळाडूंना स्पर्धेत सहभागी होता येत नाही. सहभागी झाले तरी चांगला सराव नसल्याने यश मिळत नाही. म्हणून १२ महिने खेळाडूंना सराव करता, यावे असे मैदान जरगनरमध्ये नियोजित आहे.

जिल्हा नियोजन समितीच्या नाविन्यपूर्ण योजनेतून टर्फ मैदानासाठी निधी मंजूर आहे. निविदेची प्रक्रिया अंतिम टप्यात आहे. ठेकेदार निश्चित झाल्यानंतर प्रत्यक्ष कामाला सुरुवात होईल. काम पूर्ण झाल्यानंतर परिसरातील खेळाडूंची चांगली सोय होईल.

धनंजय भोसले, उपअभियंता, सार्वजनिक बांधकाम विभाग

कोल्हापूर: राधानगरी पंचायत समितीचे पशुधन विकास अधिकारी डॉ. पी. एस. मोरे यांच्या मनमानी कारभाराची चौकशी करावी, या मागणीचे निवेदन पशुचिकित्सा व्यवसायी संघटनेने मुख्य कार्यकारी अधिकारी अमन मित्तल यांना दिले. त्यांच्या कामकाजाविषयी वरिष्ठाकडे तक्रारी केल्या आहेत. मात्र कारवाई झाली नाही. मी वरिष्ठ अधिकाऱ्यांना हप्ते देतो, म्हणूनच माझ्याकडे पशुधन विकास अधिकाऱ्याचा कार्यभार कायम आहे. अशी दुरुत्तरे देतात, असेही निवेदनात म्हटले आहे. निवेदनावर संघटनेचे अध्यक्ष डॉ. बी. आर. बाळाप्पा, उपाध्यक्ष डॉ. अशोक गावडे, सरचिटणीस डॉ. एन. एच. चिटणीस, कार्याध्यक्ष डॉ. के. बी. अत्याळी यांच्या सह्या आहेत.

शेगावमध्ये असल्याचा पत्नीला निरोप

म. टा. प्रतिनिधी, कोल्हापूर

सहा दिवसांपासून बेपत्ता असलेल्या जिल्हा परिषदेच्या समाजकल्याण विभागातील निरीक्षक सुनील विलास पाटील यांचा शनिवारी पहाटे साडेतीन वाजण्याच्या सुमारास कुटुंबांशी फोनवरून संवाद झाला. मी शेगावमध्ये सुखरुप आहे. काळजी करु नये, असे सांगितले. तसेच सुखरूप असल्याचे छायाचित्रही मित्राच्या मोबाइलवरून पत्नी वैजयंती यांच्या मोबाइलवर पाठविले. त्यामुळे त्यांच्या कुटुंबीयांनी सुटकेचा नि:श्वास सोडला.

नातेवाइक व मित्र त्यांना आणण्यासाठी शेगावकडे रवाना झाले आहेत. रविवारी सकाळी त्यांना घेऊन ते कोल्हापूरकडे येणार आहेत. पाटील हे २२ ऑक्टोबरला सकाळी सहा वाजता जिल्हा परिषदेतील कार्यालय उघडून पुणे येथे बृहत आराखडा कामासाठी जात असल्याची नोंद केली होती. पुणे येथून मुंबईला गेले. विक्रोळी येथे त्यांचे शेवटचे लोकेशन सापडले होते. त्यानंतर त्यांच्याशी संवाद होत नव्हता. त्यांच्या पत्नी व भावाने जुना राजवाडा पोलिसात बेपत्ता झाल्याची फिर्याद दिली होती. तसेच जिल्हा परिषद प्रशासनालाही पत्र दिले होते.

दरम्यान नातेवाइक व मित्रांमार्फत ठिकठिकाणी त्यांचा शोध सुरू होता. पाटील हे करवीर तालुक्यातील बाचणी येथील आहेत. या गावचे अनेक तरुण पोलिस दलात आहेत. त्यांच्यासह मित्र परिवारतर्फे शोध सुरू होता. जिपचे सीईओ अमन मित्तल यांनीही पोलिस प्रशासनाला पत्र लिहून तपास सहकार्याची विनंती केली होती. त्यांच्या मित्रांनी विशेष पोलिस महानिरीक्षक विश्वास नांगरे-पाटील यांची भेट घेऊन तपास गतीने करण्याची विनंती केली होती. दरम्यान त्यांनी शनिवारी पहाटे ३.२२ मिनिटाच्या सुमारास पत्नीच्या मोबाइलवर संपर्क साधला. तसेच मेसेज केला. शनिवारी सायंकाळीही त्यांचे फोनवरुन कुटुंबांतील सदस्याशी संभाषण झाले. आठ वर्षीय मुलीशीही ते बोलते. दरम्यान त्यांच्या बेपत्ता प्रकरणामुळ वेगवेगळे तर्कवितर्क लढविले जात होते.

फोटो आहेत..

म. टा. प्रतिनिधी, कोल्हापूर

सामाजिक विषयावर आधारित पथनाट्ये, डोलायला लावणारा लोकसंगीताचा ठेका, एकांकिका, लघुनाटिका, मूकनाट्ये व सुगम-समूहगीत गायनातून फुललेल्या कलाविष्कारांनी ३८ वा जिल्हास्तरीय युवा महोत्सव संस्मरणीय बनला. जिल्ह्यातील ५५ कॉलेजमधील तब्बल ११०० विद्यार्थ्यांच्या कलागुणांनी महावीर कॉलेजचा कॅम्पस शनिवारी बहरला. सायंकाळी सातच्या सुमारास लोकनृत्यांच्या सादरीकरणाला प्रारंभ होताच विद्यार्थ्यांचा जोश आणि जल्लोष टिपेला पोहोचला.

कोळीगीते, शेतकरीगीते, आदिवासी नृत्य कलाप्रकारांनी लोकनृत्याचा सोहळा उत्तरोत्तर रंगला. ठसकेबाज नृत्य आणि लोकसंगीताच्या तालावर उपस्थितांनी ठेका धरला. शिवाजी विद्यापीठ व महावीर कॉलेज यांच्या संयुक्त विद्यमाने आयोजित जिल्हास्तरीय युवा महोत्सव तरुणाईसाठी आनंदोत्सव ठरला. शनिवार सकाळपासूनच महावीर कॉलेजचा कॅम्पस तरुण-तरुणींनी गजबजला.

खासदार धनंजय महाडिक यांच्या हस्ते आणि श्री आचार्यरत्न देशभूषण शिक्षण प्रसारक मंडळाचे चेअरमन अॅड. के. ए. कापसे यांच्या अध्यक्षतेखाली समारंभ झाला. उद्घाटन सोहळा पार पडताच विद्यार्थ्यांच्या कलाविष्काराला प्रारंभ झाला आणि काही मिनिटांतच संपूर्ण कॅम्पस तरुणाईच्या सळसळत्या उत्साहाने भारावला. एकांकिका, लघुनाटिका, पथनाट्य, लोकसंगीत वाद्यवृंद, मूकनाट्य, सुगमगायन, समूहगीत, वक्तृत्व स्पर्धा, प्रश्नमंजूषा अशा प्रत्येक कलाप्रकाराच्या मंचावर विद्यार्थी कलाकारांची लगबग वाढली. इतरांपेक्षा हटके सादरीकरणावर प्रत्येकजण प्रयत्नशील राहिल्याने सर्वच कलाप्रकारात प्रारंभापासून चुरस निर्माण झाली. शहर आणि ग्रामीण भागातील विद्यार्थ्यांच्या कलाविष्काराचा हा सोहळा पाहण्यासाठी कॅम्पस फुलला. दरम्यान, कॉलेज व्यवस्थापनने यंदा विद्यापीठातील उपकुलसचिव, सहायक कुलसचिव व अधीक्षकांना विविध कलाप्रकाराच्या उद्घाटनाचा मान दिला.

००००००

पथनाट्याचा आवाज, लोकसंगीताचा ठेका

कॉलेज कॅम्पसमधील क्रिकेटच्या मैदानालगतच पथनाट्य सादरीकरणाची स्पर्धा रंगली. राष्ट्रीय एकात्मता, अंधश्रद्धा निर्मूलन, सामाजिक समस्या आणि महिला सबलीकरण या विषयांवर संघांनी प्रकाशझोत टाकला. विद्यार्थ्यांनी सामूहिक कलाविष्कार आणि सामाजिक भान याचे दर्शन घडविले. तीन तासांहून अधिक काळ पथनाट्याच्या माध्यमातून सामाजिक प्रश्नांवर आवाज घुमला. दुपारी एकच्या सुमारास 'लोकसंगीत वाद्यवृंद' कलाप्रकाराला सुरुवात झाली. सहभागी ११ संघांनी पारंपरिक वाद्यांचे सुरेख वादन केले. लोकसंगीताच्या ठेक्यावर काही विद्यार्थ्यांनी मैदानातच टाळ्यांची साथ करत फेर धरला. समूहगीत गायन स्पर्धेच्या निमित्ताने कसबेकर हॉल देशभक्तीवर गीतांनी दुमदुमला. या स्पर्धेत सहभागी ३२ संघांनी एक देशभक्तीपर व एक लोकनृत्य गीत सादर करत धमाल उडवली.

००००००

लघुनाटिका, एकांकिकेला प्रतिसाद

आचार्य विद्यानंद संस्कृती भवन येथे एकांकिका, तर कसबेकर हॉल येथे लघुनाटिका अशा स्पर्धा एकाचवेळी सुरू झाल्या. या दोन्ही कलाप्रकारातील सहभागी संघांनी सद्य:स्थितीवर आधारित विषयावर मिश्किल भाष्य करत महोत्सवात रंग भरला. पाश्चात्य संस्कृतीचे अंधानुकरण, मोबाइलचा वाढता वापर, सामाजिक स्वास्थ्य बिघडवणाऱ्या घटना यावर कधी उपहासात्मक, तर कधी थेटपणे टिप्पणी केल्यामुळे या कलाप्रकाराला हशा आणि टाळ्यांचा प्रतिसाद मिळाला. एकांकिका स्पर्धेत १०, तर लघुनाटिकेत २४ कॉलेजनी सादरीकरण केले.

००००००

तीन भाषांत रंगली वक्तृत्व स्पर्धा

मराठी, हिंदी आणि इंग्रजी या तीनही भाषांत वक्तृत्व स्पर्धा रंगली. तीनही भाषांतील स्पर्धकांसाठी एकसमान विषय होते. 'पर्यावरण संवर्धन एक जबाबदारी', 'महिला संरक्षण समस्या व उपाय', 'मोबाइलचा अतिवापर', 'भारतीय उत्सवांचे बदलते स्वरूप' यापैकी एका विषयावर स्पर्धा झाली. यामध्ये सर्वाधिक स्पर्धा मराठी विषयात रंगली. मराठी भाषेतील वक्तृत्व स्पर्धेत ३६, तर इंग्रजी भाषेत १५ कॉलेजमधील विद्यार्थ्यांनी सहभाग घेतला.

००००००

यशासाठी शॉर्टकट नाहीच

म. टा. प्रतिनिधी, कोल्हापूर

'सध्याच्या स्पर्धात्मक युगात जिंकण्यासाठी आत्मविश्वास, जिद्द व कष्टाची तयारी हा त्रिसूत्री फॉर्म्युला अंगी बिंबवला पाहिजे. यशासाठी कोणताही शॉर्टकट नाही,' असे प्रतिपादन खासदार धनंजय महाडिक यांनी केले. संस्थेचे चेअरमन अॅड. के. ए. कापसे अध्यक्षस्थानी होते. युवा महोत्सवाच्या उद्घाटन सोहळयात त्यांनी विद्यार्थ्यांशी संवाद साधला.

चेअरमन अॅड. कापसे म्हणाले, 'युवकांमध्ये चैतन्य निर्माण करण्यासाठी युवा महोत्सवाची गरज आहे. विद्यार्थ्यांच्या सुप्त कलागुणांना वाव देणाऱ्या या व्यासपीठातून भविष्यातील कलाकार घडतात.'

अमृता पेडणेकरने स्वागतगीत गायिले. प्राचार्य व्ही. ए. पाटील (कॉमर्स कॉलेज), प्राचार्य एन. के. शिंदे (तिसंगी), प्राचार्य भास्कर ताम्हणकर(सांगली), प्राचार्य महादेव होनगेकर (आजरा), प्राचार्य युवराज गोंडे (वाघोली), महोत्सव समितीचे सचिव डॉ. अरुण पाटील, सांस्कृतिक विभागप्रमुख शरद गायकवाड, डॉ. गोमटेश्वर पाटील, प्रा. संध्या जाधव यांची प्रमुख उपस्थिती होती. प्रा. सुजाता पंडित, प्रा. जावेद मेस्त्री, प्रा. सरिता मोरे यांनी सूत्रसंचालन केले.

व्यासपीठावर विद्यापीठाचे कुलसचिव डॉ. विलास नांदवडेकर, परीक्षा नियंत्रक महेश काकडे, विद्यार्थी विकास विभागाचे संचालक डॉ. आर. व्ही. गुरव, कॉलेजचे प्राचार्य आर. पी. लोखंडे, संस्थेचे संचालक अॅड. अभिजित कापसे, भूपाल देसाई, गुणवंत रोटे, डॉ. सुषमा रोटे, प्रदीप पाटील प्रमुख उपस्थित होते.

म. टा. प्रतिनिधी, कोल्हापूर

कविता, कथा, कादंबरी, ललितलेखन आणि लोकसाहित्याचे संशोधन करणाऱ्या प्रतिभाशाली लेखिका अरुणा ढेरे यांना संमेलनाध्यक्षपद हा त्यांच्या आजवरच्या लेखन प्रवासाचा हा गौरव आहे अशा शब्दात कोल्हापुरातील साहित्य जगताने ढेरे यांच्या निवडीचे स्वागत केले. कवयित्री अरुणा ढेरे यांची अखिल भारतीय मराठी साहित्य संमेलनाध्यक्षपदाची निवड एकमताने झाली. हा नवीन पायंडा स्वागतार्ह असल्याच्या प्रतिक्रिया उमटल्या.

'कवयित्री व ललितलेखिकेला संमेलनाध्यक्षपदाचा मान मिळाला याचा आनंद आहे. मराठीतील लोकसाहित्याचे ख्यातनाम संशोधक रा.चि. ढेरे यांचे त्यांच्यावर संस्कार झाले आहेत. शिवाय लिखाणाचा प्रभाव आहे. वडिलांचा लोकसाहित्याच्या संशोधनाचा वारसा त्या सक्षमपणे पुढे चालवित आहेत. त्यांचे कविता, कथा, ललित लेखन या वाङमय प्रकारातील साहित्य मोलाचे आहे' असे प्रकाशक अनिल मेहता यांनी सांगितले.

कवी गोविंद पाटील यांनी, 'स्त्री जाणीवेची अत्यंत प्रगल्भ कविता लिहिणारी कवयित्री अखिल भारतीय मराठी साहित्य संमेलनाच्या अध्यक्षपदी निवड झाली ही एक ऐतिहासिक गोष्ट आहे. आजवर जी निवड निवडणूक पध्दतीने व्हायची, ती या वर्षापासून बंद झाली हे सगळयात चांगले झाले. अरुणा ढेरे या जशा उत्कृष्ट कवयित्री आहेत तशा समीक्षक, विदुषीही आहेत. त्यांची संमेलनाध्यक्षपदी झालेली निवड साहित्यप्रेमीसाठी आनंददायी आहे' अशी प्रतिक्रीया व्यक्त केली.

लेखक रफिक सूरज यांनी, लोकसाहित्याच्या अभ्यासक आणि कवितेच्या दर्दी भाष्यकार असलेल्या लेखिकेची संमेलनाध्यक्षपदी झालेली निवड मराठी साहित्यासाठी महत्वाची आहे. त्यांच्या अध्यक्षीय मनोगतातून मराठी भाषेचे भवितव्य आणि लोकसाहित्याचा सर्वांगिण अभ्यास याविषयीचे मूलभूत चिंतन ऐकण्यास मिळेल अशी अपेक्षा असल्याचे सांगितले.

'अरुणा ढेरे यांच्या संमेलनाध्यक्ष निवडीने आनंद झाला. अतिशय संवेदनशील कवयित्री आणि कथा लेखिका म्हणून त्या मराठी वाचकांना परिचित आहेत. बहुआयामी लेखन करणारी लेखिकेची संमेलनाध्यक्षपदी निवडणूक प्रक्रिया न होता एकमताने निवड झाली हा चांगला पायंडा पडला. त्यांनी केलेले स्त्रीवादी लेखन, संशोधन प्रेरणादायी आहे. त्यांच्या आजवरच्या लेखनप्रवासाचा हा एका अर्थी गौरव आहे' असे कवयित्री गौरी भोगले म्हणाल्या. कथाकार प्रा. सुहास निर्मळे यांनी 'मराठीतील व्यासंगी अभ्यासकामध्ये वडील आणि मुलगी यांचे अद्वितीय साहित्यिक योगदान ही दुर्मिळ बाब आहे. वडिलांच्या पावलावर पाऊल टाकून मराठी भाषेची निस्पृह सेवा त्या करत आहेत. तज्ज्ञ अभ्यासिका, संशोधक, ललित लेखन करणाऱ्या लेखिका म्हणून त्या परिचित आहेत. इंदिरा संतानंतर त्यांनी मराठी साहित्यात वेगळा ठसा उमटविला आहे' असे सांगितले.

Maruti.Patil@timesgroup.com

tweet: @MarutipatilMT

कोल्हापूर : काळम्मावाडी ते कोल्हापूर मार्गावर पाइपलाइन टाकण्यास विविध गावांचा विरोध, जॅकवेल उभारणीस मिळालेला कमी कालावधी आणि अन्य सरकारी कार्यालयांच्या परवानग्या मिळण्यास होणाऱ्या विलंबामुळे थेट पाइपलाइनच्या कामाला महापालिका प्रशासनाने पुन्हा डिसेंबर २०१९पर्यंत मुदतवाढ दिली. दरम्यान, मुदतीत काम पूर्ण न केल्याबद्दल ठेकेदार असलेल्या जीकेसी प्रोजेक्ट कंपनीला प्रतिदिन ५० हजार रुपयांच्या दंड आकारणीस सुरुवात केली आहे. कामाला मुदतवाढ दिल्याने शहवासियांना थेट पाण्यासाठी आणखी एक वर्षाची प्रतीक्षा करावी लागणार आहे.

थेट पाइपलाइन योजनेला ४० वर्षांच्या संघर्षानंतर आमदार सतेज पाटील यांच्या प्रयत्नाने योजनेला मंजुरी मिळाली. गेल्या विधानसभेच्या निवडणुकीपूर्वी तत्कालीन मुख्यमंत्री पृथ्वीराज चव्हाण यांच्या हस्ते योजनेचे उद्घाटन झाले. ऑगस्टर २०१४मध्ये प्रत्यक्ष कामाला सुरुवात झाली. घाईगडबडीत केलेल्या उद्घाटनामुळे योजना पूर्ण होण्यास विलंब लागत आहे. अनेक सरकारी कार्यालयांच्या परवानग्या तीन वर्षानंतरही मिळालेल्या नाहीत. अनेक गावांत पाइपलाइन टाकण्यास ग्रामस्थांचा विरोध कायम आहे. त्यात जॅकवेल उभारणीस धरणाच्या पाण्यामुळे पुरेसा वेळ मिळत नसल्याचा परिणाम या कामावर झाला आहे.

सुरुवातीला ३० महिन्यांत योजना पूर्ण करायची होती. परिणामी सल्लागार कंपन्यांच्या माध्यमातून ठेकेदार कंपनीने योजनेला मुदतवाढ मागितली. प्रशासनाने मे २०१८ पर्यंत मुदतवाढ देताना ठेकेदार कंपनीला दररोज पाच हजार रुपये दंड आकारणीस सुरुवात केली. मात्र या मुदतीतही काम पूर्ण न झाल्याने पुन्हा मुदतवाढीची मागणी झाली. दोन दिवसांपूर्वी या कामाला डिसेंबर २०१९पर्यंत मुदतवाढ देण्यात आली. मात्र एकदा मुदतवाढ देऊनही काम पूर्ण न झाल्याने जून महिन्यापासून कंपनीकडून दररोज ५० हजार रुपये दंड आकारणीचा निर्णय झाला आहे. काम पूर्ण होईपर्यंत दंड आकारणी सुरू राहिल. ठेकेदाराच्या बिलातून दंडाची रक्कम जमा करून घेतली जाईल. कामाला मुदतवाढ दिल्याने शहरवासियांना थेट पाणी मिळण्यास २०२०पर्यंत प्रतीक्षा करावी लागणार आहे.

जॅकवेल रखडले

थेट पाइपलाइन योजनेच्या कामात जॅकवेल उभारणीचे काम महत्त्वाचे आहे. गेल्यावर्षीप्रमाणे यावर्षीही धरण पूर्ण क्षमतेने भरले आहे. त्यामुळे जॅकवेलच्या उर्वरीत कामाला आणखी तीन महिन्यांचा कालावधी लागणार आहे. जॅकवेलच्या कामाला पावसाआधीचे तीन महिने मिळतील. त्यामुळे धरणातील पाणीपातळीपर्यंत काम आणण्यासाठी युद्धपातळीवर यंत्रणा राबवावी लागेल. अन्यथा आणखी विलंब होणार आहे.

कोट

जॅकवेल व इतर सरकारी विभागांच्या परवानग्यांचा विषय वगळला तरी जेथे परवानगी आहे आणि जे काम करण्यास मुभा होती, ते काम कंपनीने वेळेत पूर्ण केलेले नाही. त्यामुळे कंपनीला मुदतवाढ देताना दहापट दंड आकारणीचा निर्णय घेतला आहे.

- डॉ. अभिजित चौधरी, आयुक्त, महापालिका

योजनेवर दृष्टिक्षेप

२७ डिसेंबर २०१३

योजना मंजूर

४२३ कोटी

मंजूर निधी

४८८ कोटी ७४ लाख

अंतिम निविदा मंजूर

२४ ऑगस्ट २०१४

प्रत्यक्ष कामाला सुरू

३० महिने

कामाचा कालावधी

डिसेंबर २०१९

मुदतवाढ

जीकेसी प्रोजेक्ट लि.

ठेकेदार

५३ किमी

एकूण पाइपलाइनची लांबी

३९ किमी

आतापर्यंत काम पूर्ण

१४ किमी

प्रलंबित काम