\Bउपवासाच्या पदार्थांना मागणी वाढली\B

कोल्हापूर टाइम्स टीम

शारदीय नवरात्रोत्सवात नऊ दिवस केल्या जाणाऱ्या उपवसासासाठी पदार्थांची आवक आणि विक्री वाढली आहे. बाजारात विविध प्रकारातील उपवासाचे पदार्थ दाखल झाले असून आवक वाढल्याने गतवर्षीच्या तुलनेत दर स्थिर आहेत.

महापालिका चौक, महाद्वार रोड, बाजार गेट, लुगडी ओळ,लक्ष्मीपुरी परिसरात उपवासासाठी लागणाऱ्या पदार्थांच्या खरेदीसाठी मंगळवारपासून गर्दी होत आहे. खजूर, शाबूदाणा, राजगिरा लाडू, खारीक, पांढरी खारीक, उपवासाची भाजणी, शिंगाडा पीठ, सुका मेवा रताळी, भगर तसेच पुरी, भाजणी अशा पदार्थांना मोठी मागणी आहे. गेल्या वर्षीच्या तुलनेत यंदा भगरीच्या उत्पादनात वाढ झाली आहे. त्यामुळे दर स्थिर आहेत. खारीक दरात किरकोळ वाढ झाली आहे. नऊ दिवस उपवासाचे असल्याने विविध पदार्थांची खरेदी एकत्र केली जात आहे.

खजूर, शाबूदाणा, रताळे अधिक मागणी

काही दिवसांपूर्वी साबुदाण्याचे दर तेजीत होते. मात्र या कालावधीत आवक वाढल्याने इंधन दरवाढ होऊनही दर स्थिर राहिले आहेत. ग्रामीण भागात खजुराला अधिक मागणी आहे. दिवसाला किमान एक ते दोन पोती खजूर विकली जात आहे. जिल्ह्याच्या अनेक भागात ग्रामदैवतासाठी उपवास करण्याची परंपरा असल्याने शहरातून खजूर ग्रामीण भागात पाठवली जाते. तसेच यावर्षी रताळ्याच्या उत्पादनात वाढ झाल्याने चांगल्या प्रतीची रताळे वीस रुपये किलोने मिळत आहेत. त्यामुळे रताळे खरेदीसाठी मंडईत गर्दी होत आहे. याबरोबर केळी, बटाटा, वेफर्स, चिक्की आदींच्या मागणीत वाढ झाली आहे.

उपवासाचे पदार्थ

खजूर : १०० रुपये किलो

शाबू : ६० रुपये किलो

खारीक: ३६० रु. किलो

पांढरी खारीक: १६० रु. किलो

उपवास भाजणी: ५० रु. (२०० ग्रॅम)

शिंगाडा पीठ: ९० रु. (२०० ग्रॅम)

सुका मेवा: ४४० रु. किलो

रताळे २० ते ३० रु. किलो

राजगिरा लाडू : २० रु. (१२ नग)

यंदा उपवासाचे पदार्थांचे दर स्थिर आहेत. सलग नऊ दिवस उपवास असल्याने त्या मानाने पदार्थांची खरेदी करावी लागते. आवक वाढल्याने दरात घसरण झाल्याने ग्राहकांना दिलासा मिळाला आहे.

इंदूमती पाटील, ग्राहक

उपवासाच्या पदार्थांच्या खरेदीसाठी ग्राहकांमध्ये उत्साहाचे वातावरण आहे. दर तुलनेत स्थिर असल्याने उपवासाच्या पदार्थांच्या मागणीत अधिक वाढ झाली आहे. उत्सवकाळात आवक जास्त असल्याने दर स्थिर राहण्याची शक्यता अधिक आहे.

सुरेश नारायणवीर, विक्रेते

कोल्हापूर : येथील जिल्हा खादी ग्रामोद्योग संघातर्फे उत्पादित वस्तूंची विक्री रेशन दुकानातून करण्याचा आदेश सरकारच्या अन्न, नागरी पुरवठा व ग्राहक संरक्षण विभागातर्फे दिला आहे. ग्रामोद्योग संघात इको फ्रेंडली डास प्रतिबंधक मिश्रणे आणि सॅनिटरी नॅपकिन्स उत्पादित केले जातात. त्यांना बाजारपेठ मिळावी, रेशन दुकानदारांचे कमिशनच्या माध्यमातून उत्पन्न वाढावे, यासाठी सरकारने हा निर्णय घेतला. यानुसार आता जिल्ह्यातील सर्व रेशन दुकानांत ग्रामोद्योगाने उत्पादित केलेल्या वस्तू ग्राहकांना विकत मिळणार आहे. त्यासाठी संघातर्फे एक वर्षापासून सरकारकडे पाठपुरावा केला जात होता. त्याची दखल घेत सरकारने बुधवारी निर्णय घेतला.

म. टा. प्रतिनिधी, कोल्हापूर

जिल्ह्यात १३ ते २८ ऑक्टोबरअखेर कार्यालयीन स्वच्छता पंधरवडा साजरा करण्याचे नियोजन केले आहे. या दरम्यान सर्व सरकारी, निमसरकारी कार्यालयांत कायमपणे स्वच्छता राहण्यासाठी अधिकाऱ्यांनी उपाययोजना कराव्यात. अंतर्गत आणि बाह्यस्वच्छता करावी, असे आदेश जिल्हाधिकारी अविनाश सुभेदार यांनी गुरुवारी दिले.

कार्यालयीन स्वच्छता पंधरवडा साजरा करण्याचा निर्णय सरकारने घेतला आहे. या पार्श्वभूमीवर नियोजनासाठी जिल्हाधिकारी कार्यालयात आयोजित बैठकीत ते बोलत होते.

सुभेदार म्हणाले, 'स्वच्छतेच्या कामात हयगय झाल्यास संबंधित अधिकारी, कर्मचाऱ्यांवर कडक कारवाई केली जाईल. पंधरवड्याची सुरुवात येत्या शनिवारी सुट्टीच्या दिवशी होणार आहे. मात्र, सुट्टी न घेता नेहमीप्रमाणे सर्व अधिकारी, कर्मचाऱ्यांनी कार्यालयीन वेळेत उपस्थित राहून स्वच्छता करायची आहे. वर्गीकरण करून अनावश्यक कागदपत्रांची विल्हेवाट लावावी.'

स्वच्छता पंधरवड्याच्या यशस्वितेसाठी, नियंत्रणासाठी जिल्हा, तालुकास्तरावर प्रांताधिकाऱ्यांच्या अध्यक्षतेखाली समिती स्थापन केली जाईल. समितीने तालुका, गावपातळीवरीलही सरकारी, निमसरकारी कार्यालयातील स्वच्छतेची मोहीम गतिमान करावी. परिसरात पार्किंग लॉटस, येण्या-जाण्याचा रस्ता, पायऱ्या स्वच्छ ठेवाव्यात. शौचालय स्वच्छ असावीत. तेथे पुरेसे पाणी उपलब्ध करावे. वापरात नसलेल्या वाहनांची नियमानुसार विल्हेवाट लावावी.'

निवासी उपजिल्हाधिकारी संजय शिंदे यांनी पंधरवड्याच्या अंमलबजावणीची सविस्तर माहिती दिली. जिल्हा नियोजन अधिकारी सरिता यादव, मुद्रांक जिल्हाधिकारी सुंदर जाधव, जिल्हा उद्योग केंद्राचे महाव्यवस्थापक सतीश शेळके, उपमुख्य कार्यकारी आधिकारी प्रियदर्शनी मोरे, वैद्यकीय अधिकारी डॉ. हर्षला वेदक, महापालिकेचे मुख्य आरोग्य निरीक्षक डॉ. विजय पाटील, तहसीलदार सविता लष्करे, नायब तहसीलदार प्रकाश दगडे यांच्यासह अधिकारी उपस्थित होते.

००००

...तर २०० रुपये दंड करा

कार्यालयातील कुठल्याही कोपऱ्यात कोणी थुंकणार नाही, याची दक्षता घ्या. थुंकताना आढळणाऱ्यास २०० रुपये दंड करावा, असा आदेश जिल्हाधिकारी सुभेदार यांनी दिला. याउलट स्वच्छतेत उत्कृष्ट काम केलेल्यांना जिल्हास्तरावर प्रमाणपत्र देऊन गौरविण्यात येणार असल्याचे त्यांनी सांगितले.

०००००

कोल्हापूर टाइम्स टीम

'आयटक'चे कामगार वकील व डाव्या चळवळीतील कार्यकर्ते कॉम्रेड जमिर शेख यांच्या अपघाती निधनानंतर त्यांच्या मुलांच्या शिक्षणाची व कुटुंबांची जबाबदारी कामगार संघटनांनी स्वीकारली. शेख कुटुबांच्या मदतीसाठी निधी जमा करण्याचेही ठरले.

शेख यांना श्रध्दाजंली वाहण्यासाठी आयटक कामगार केंद्र व डाव्या संघटनेतर्फे शोकसभा आयोजित केली होती. याप्रसंगी शेख यांच्याविषयीच्या आठवणी जागविताना अनेकांना गहिवरुन आले. केर्ली येथे दोन ऑक्टोबर रोजी झालेल्या अपघापात जमिर शेख यांचा मृत्यू झाला. त्यांच्या पश्चात आई, पत्नी, एक मुलगी आणि मुलगा असा परिवार आहे. त्यांच्या कुटुंबांची आर्थिक परिस्थिती बेताची आहे. मुलगी चौथीत शिकत आहे. तिच्या शिक्षणाची पूर्ण जबाबदारी मेघा पानसरे यांनी स्वीकारली. तर अन्य एका मुलाची व कुटुंबांची जबाबदारी कामगार संघटनेने उचलली.

सभेत कॉम्रेड दिलीप पवार, अतुल दिघे, आयटकचे एस.बी.पाटील, शेकापचे संभाजी जगदाळे, राज्य कर्मचारी संघटनेचे अनिल लवेकर, वसंत डावरे, प्राध्यापक संघटनेचे सुभाष जाधव, प्रा. विलास रणसुभे, सोशालिस्ट पार्टीचे हसन देसाई, विक्रम कदम यांनी जमिर शेख यांच्यासोबतच्या आठवणी जागविल्या. जमिर शेख यांनी कॉम्रेड गोविंद पानसरे व अवि पानसरे यांच्यासोबत काम केले होते. डाव्या चळवळीत कार्य करताना त्यांना कामगारासाठी कायदेशीर लढा दिला. सामान्यांच्या प्रश्नांची सोडवणुकीसाठी प्रयत्नशील राहिले अशा शब्दांत आठवणींना उजाळा दिला. निधी संकलनासाठी बँकेत खाते उघडण्यात येणार आहे. सर्वांनी मदत करावी असे आवाहन बैठकीत करण्यात आले. याप्रसंगी सदाशिव निकम, सुशिला यादव, बाबुराव तारळी, कृष्णात कोरे, भगवान पाटील, ज्योती भालकर, सुभाष वाणी, मिलिंद यादव, आनंद परुळेकर आदी उपस्थित होते.

कोल्हापूर: मित्राचे उसने घेतलेले पैसे कधी देणार, अशी विचारणा करत एका तरुणावर हल्ला करणाऱ्या रंकाळा टॉवर परिसरातील संतोष कांदेकर व अमित कारंडे यांना जुना राजवाडा पोलिसांनी अटक केली. या दोघांनी पैसे वसुलीसाठी फुलेवाडी परिसरातील शत्रुघ्न जाधववर शुक्रवारी रात्री हल्ला केला होता. त्याच्याकडून मोबाइल आणि घड्याळही काढून घेतले होते. याप्रकरणी कांदेवर व कारंडेवर गुन्हा नोंदविला होता.

म. टा. प्रतिनिधी, कोल्हापूर

येथील तत्कालीन माध्यमिक शिक्षणाधिकारी किरण लोहार यांच्याविरोधात आतापर्यंत चौकशी समितीकडे गंभीर स्वरुपाच्या १३ लेखी तक्रारी प्राप्त झाल्या आहेत. समिती सदस्यांकडेही तक्रारींचा ओघ वाढला आहे. माध्यमिक शिक्षण विभाग आणि लोहार यांच्या कामकाजासंबंधीच्या तक्रारी २२ ऑक्टोबरपर्यंत स्वीकारण्यात येणार आहेत. संबंधितांनी निर्भयपणे तक्रारी द्याव्यात,'असे आवाहन चौकशी समितीचे अध्यक्ष व प्राथमिक शिक्षण समिती सभापती अंबरिश घाटगे यांनी शुक्रवारी पत्रकार परिषदेत केले.

ते म्हणाले, 'लोहार यांच्यासह कार्यालयातील अधिकारी, कर्मचाऱ्यांची चौकशी करणे, चौकशी पूर्ण होईपर्यंत लोहार यांना सक्तीच्या रजेवर पाठवण्याचा निर्णय गेल्या सर्वसाधारण सभेत झाला. रजेवर जात नसल्याने त्यांना नुकतेच कार्यमुक्त करण्यात आले. त्यानंतर चौकशी समितीची पहिली बैठक झाली. बैठकीत चौकशीची कार्यकक्षा निश्चित करण्यात आली. लोहार माध्यमिक शिक्षणाधिकारीपदी रूजू झाल्यापासून ते कार्यमुक्त होईपर्यंतच्या काळातील त्यांच्या सर्व प्रशासकीय कामकाजाची चौकशी होईल. त्यांनी दिलेल्या शिक्षक मान्यतेची संपूर्ण माहिती समितीचे सचिव रवीकांत आडसूळ यांना घेण्याच्या सूचना दिल्या आहेत. हायकोर्टात प्रविष्ट कामांची माहितीही घेतली जाईल. काही प्रकरणात जिल्हा परिषद पॅनेलवरील वकिलांचा सल्ला घेतला जाईल.'

विविध कामांसाठी लोहार यांनी पैसे मागितल्याच्याही तक्रारी आहेत, असे सांगून घाटगे म्हणाले, 'तक्रारी लेखी स्वरूपात द्याव्यात. निनावी तक्रारीची दखल घेतली जाणार नाही. त्यामुळे ज्यांना तक्रार करावयाची आहे. त्यांनी ती नाव, मोबाइल क्रमांकासह करावी. संबंधितानी आपल्या तक्रारी जि. प. मधील सामान्य प्रशासनचे उपमुख्य कार्यकारी अधिकारी आणि शिक्षण सभपतींच्या कक्षात देऊन पोहच घ्यावी.'

यावेळी चौकशी समितीचे सचिव रविकांत आडसुळ, सदस्य अरूण इंगवले, प्रसाद खोबरे, भगवान पाटील उपस्थित होते.

सुनावणी २३ पासून

२२ पर्यंत आलेल्या तक्रारींची सुनावणी २३ ऑक्टोबरपासून सुरू होईल. ९० दिवसांत चौकशी पूर्ण करून स्थायी समितीला अहवाल देण्याचे उद्दिष्ट ठेवले आहे. तक्रारी मोठ्या संख्येने वाढल्यास चौकशीचा कालावधी वाढू शकतो.

मदतीसाठी अधिकारी, कर्मचारी

घाटगे म्हणाले, 'माध्यमिक शिक्षण विभागात यापूर्वी काम केलेले अधिकारी आणि कर्मचाऱ्यांना आवश्यकतेनुसार चौकशीसाठी मदतीला घेण्यात येणार आहे. प्रत्येक तक्रारीची वस्तूनिष्ठ आणि पारदर्शक चौकशी होईल. यामुळे माध्यमिक शिक्षण आणि लोहार यांच्यासंबंधी ज्यांच्या तक्रारी आहेत. त्यांनी त्या निर्भयपणे कराव्यात. लेखी तक्रारीशिवाय जि. प. सदस्यांच्याही तक्रारींची दखल घेतली जाईल.'

म. टा. वृतसेवा, हातकणंगले

हुपरी (हातकणंगले) येथील स्वातंत्र्यसेनानी एल. वाय. पाटील प्रतिष्ठानमार्फत प्रतिवर्षी विविध क्षेत्रांत चांगली कामगिरी करणाऱ्या गुणवंत व्यक्ती, संस्था यांना गौरविण्यात येते. पुरस्कार वितरण सोहळा डॉ. भालेराव यांच्या हस्ते व ज्येष्ठ साहित्यिक डॉ. पी. जी. कुलकर्णी यांच्या अध्यक्षतेखाली शनिवारी (ता.१३) जिव्हेश्वर सांस्कृतिक हॉलमध्ये होणार आहे. यावर्षीचे पुरस्कार प्रतिष्ठानचे अध्यक्ष शंकरराव पाटील यांनी गुरुवारी जाहीर केले.

पुरस्कार असे : सामाजिक सेवा : ★शिवाजी गोरख गोंदील (टेंभुर्णी, जि. सोलापूर), चित्रकार : किशोर बाळासाहेब कांबळे (हुपरी), समाजसेवा : हमिदा बाबूराव गोरवाडे (इचलकरंजी), ★समाजभूषण : प्रणव श्रीकृष्ण जोशी (भारतीय सेना) (इचलकरंजी), ★सामाजिक सेवा : जुगनू नियाज पिरजादे (इचलकरंजी), ★समाजभूषण : श्रीलेखा प्रकाश पाटील (माळशिरस) आदींचा समावेश आहे.

कोल्हापूर : प्राथमिक व माध्यमिक शिक्षकांनी एकत्र येऊन स्थापन केलेल्या गायक शिक्षक मंचतर्फे शनिवारी (ता.१३) मराठी, हिंदी गीतांच्या सादरीकरणाचा कार्यक्रम आयोजित केला आहे. शाहू स्मारक भवन येथे सायंकाळी पाच वाजता कार्यक्रमाला सुरुवात होईल. जिल्ह्यातील प्राथमिक व माध्यमिक शिक्षकांच्या गायन कलेला प्रोत्साहन मिळावे यासाठी 'गायक शिक्षक मंच' वॉट्सअॅप ग्रुपची स्थापना केली आहे. या ग्रुपच्या माध्यमातून मराठी, हिंदी गाण्यांचे कार्यक्रम सादर करण्यात येणार आहेत. राजेंद्र कोरे, कुमार पाटील, बाळ डेळेकर काम पाहत आहेत. रसिकांनी या कार्यक्रमास मोठ्या संख्येने उपस्थित राहावे, असे आवाहन संयोजकांनी केले आहे.

म. टा. वृत्तसेवा, हुपरी

हुपरी (ता. हातकणंगले) येथे विविध विकासकामांच्या प्रारंभप्रसंगी आलेल्या मंत्री सदाभाऊ खोत यांच्याकडे नगरपरिषदेच्या वतीने शहरातील व्यापारी बांधवांसाठी भव्य छत्रपती शिवाजी महाराज व्यापारी संकुलाची मागणी केली होती. या मागणीच्या आधारे मंत्री खोत यांनी युवानेते अमित गाट यांना तातडीने मुंबईला बोलावून मुख्यमंत्र्यांची भेट घडवून व्यापारी संकुल व्हावे याबाबतची मागणी लावून धरली. त्याला मुख्यमंत्र्यांनी सकारात्मक प्रतिसाद देत तत्काळ पुढील मंजुरीचा आदेश लवकरच काढण्याचे आश्वासन दिले.

महाराष्ट्र नगरोत्थान अभियानअंतर्गत शहरातील सुमारे साठ लाख रुपयांच्या विविध विकासकामांचा प्रारंभ राज्यमंत्री खोत यांच्या हस्ते झाला. यावेळी युवानेते अमित गाट व अन्य नगरसेवकांनी मंत्री खोत यांच्याकडे शहरात भव्य बहुउद्देशीय व्यापारी संकुल बांधण्याची मागणी केली. त्याला मंत्री खोत यांनी मंत्रालय स्तरावर पाठपुरावा करण्याचे आश्वासन दिले होते. दरम्यान बुधवारी मंत्री सदाभाऊ खोत यांनी अमित गाट यांना तत्काळ मुंबईला बोलावून मुख्यमंत्री फडणवीस यांची भेट घालून देत कोणत्याही परिस्थितीत हुपरीसाठी व्यापारी संकुलाची गरज असल्याचे सांगितले. मंत्री खोत यांच्या मागणीला मुख्यमंत्र्यांनी सकारात्मक प्रतिसाद देत लवकरच हुपरीतील व्यापारी संकुल सरकारच्या वतीने मान्यता देऊन निधी देण्याचे आश्वासन दिले. यामुळे बहुउद्देशीय व्यापारी संकुल साकारण्याचा मार्ग मोकळा झाला आहे.

००००

तिसऱ्या दिवशी अंबाबाईची माहेश्वरी रुपात पूजा

कोल्हापूर टाइम्स टीम

शारदीय नवरात्रोत्सवाच्या तिसऱ्या दिवशी शुक्रवारी करवीर निवासिनी श्री अंबाबाईची माहेश्वरी रूपात जडावी सालंकृत पूजा बांधण्यात आली. नवरात्रातील शुक्रवार असल्याने पहाटे चार वाजल्यापासूनच भाविकांच्या गर्दीने मंदिर परिसर गजबजून गेला. रात्री साडेअकरापर्यंत गर्दीचा ओघ सुरूच होता. मंदिर परिसर गर्दीने फुलून गेला होता.

सकाळी साडेसहा, साडेआठ व साडेअकरा वाजता देवस्थानच्यावतीने भाविकांसाठी देवीला अभिषेक करण्याची सुविधा आहे. सकाळी देवीला शासकीय अभिषेक घालण्यात आला. दुपारी नैवेद्य व आरती झाल्यानंतर देवीच्या सालंकृत पूजा बांधण्यात आली.

नवरात्रकाळातील शुक्रवारी अंबाबाईचे दर्शन घेण्यासाठी प्रचंड गर्दी होते. पर्यटक भाविकांनीही शुक्रवारी देवीच्या दर्शनाला पसंती दिल्यामुळे सकाळपासूनच दर्शनमंडपातील रांग बॅरिकेडसच्या बाहेर शेतकरी बझारपर्यंत गेली होती. महिला भाविकांची संख्या लक्षणीय होती. मुखदर्शनाची रांगदेखील सकाळी साडेअकरा वाजता गरूडमंडपाच्या मुखदर्शन मार्गापासून तुळजाभवानी मंदिरापर्यंत गेली होती.

देवस्थान समितीच्यावतीने दर्शन मंडपातील रांगे उभ्या असलेल्या भाविकांना शुक्रवारी दिवसभरात १५ हजार राजगिरा लाडूचे मोफत वाटप करण्यात आले. तर काशीविश्वेश्वर मंदिरासमोर दुधगावकर ट्रस्टच्यावतीने सरबत वाटप करण्यात आले. वैद्यकीय कक्ष, माहिती कक्ष, हिरकणी कक्ष या सुविधांचाही भाविकांनी लाभ घेतला.

पूजेविषयी

माहेश्वरीची पूजा म्हणजे शिवाची शक्ती अथवा त्याचे स्त्रीरूप. मत्स्यपुराण, महाभारत, देवीमहात्म्य यामध्ये या देवतेचा उल्लेख येतो. मत्स्यपुराणानुसार शिवाने अंधकासुराच्या नाशासाठी मातृकांची निर्मिती केली. त्यातील माहेश्वरी ही एक मातृका. महासरस्वती किंवा कौशिकीच्या मदतीला माहेश्वरी धावून आली होती असा उल्लेख पुराणात आहे. शिवाचे स्वरूप धारण करणारी शक्ती म्हणून माहेश्वरीला महत्त्व आहे. बैलावर आरूढ असलेल्या या देवीचा उल्लेख वृषारूढा असाही होतो. ही देवी व्याघ्रचर्य धारण करणारी आहे. त्रिशुल डमरू सर्प आणि अक्षमाला पाणी धारण करणारी ही देवी त्रिनेत्रा आहे. मस्तकावर चंद्रकोर आहे. संध्यावंदनामध्ये सामवेदरूपी सायंगायत्री म्हणजे संध्याकाळच्या सूर्याची देवता मानले जाते. पुजारी सारंग मुनीश्वर, मंदार मुनीश्वर, सचिन गोटखिंडीकर यांनी पूजा बांधली.

पोलिसांच्या अरेरावीने भाविक त्रस्त

तीन तास रांगेत थांबून पेटीचौकात अंबाबाईच्या मूर्तीसमोर दर्शनासाठी काही क्षण थांबणाऱ्या भाविकांना ढकलण्यावरून पोलिस व भाविक यांच्यात वाद झाला. पोलिसांची अनेकदा विनाकारण अरेरावी होत असल्याच्या तक्रारी भाविकांनी देवस्थानकडे केल्या आहेत. देवीचे दर्शन झाल्यानंतर भाविकांनी पेटीचौकात थांबू नये, यासाठी सूचना दिल्या पाहिजेत, पण जे भाविक स्वत:हून पुढे जात आहेत त्यांनाही पेटीचौकात बंदोबस्तासाठी असलेले पोलिस कर्मचारी जोरात ढकलत असल्याची भाविकांची तक्रार आहे. भाविकांना ढकलणाऱ्या पोलिसांमध्ये महिला पोलिसांची संख्या जास्त असल्याचेही तक्रार करणाऱ्या भाविकांनी सांगितले. भाविकांच्या तक्रारीरून सीसीटीव्ही फुटेजची पाहणी केली असता पेटी चौकात मुख्य दर्शनाच्या ठिकाणी महिला पोलिसांकडून भाविकांना विनाकारण ढकलण्याचा प्रकार होत असल्याचे उघडकीस आले आहे.

पार्किंगस्थळे हाउसफुल्ल

नवरात्र काळातील शुक्रवारी अंबाबाईचे दर्शन घेण्यासाठी भाविकांनी प्रचंड गर्दी केली होती. देवस्थान व्यवस्थापनाच्यावतीने शहरात दहा पार्किंग ठिकाणे निश्चित केली आहेत. शुक्रवारी सकाळपासूनच या पार्किंगस्थळावर वाहनाची गर्दी झाली. तसेच बिंदू चौक, भाऊसिंगजी रोड, शिवाजी चौक या मंदिराकडे येणाऱ्या मार्गावर दिवसभर वाहतुकीची कोंडी झाली होती.

फोटो आहे

कोल्हापूर टाइम्स टीम

शहराला पाणीपुरवठा करणाऱ्या मुख्य जलवाहिनीची गळती काढण्यात येणार असल्याने दोन दिवस पाणीपुरवठा बंद राहणार आहे. परिणामी नवरात्रोत्सव आणि ऑक्टोबर हिटच्या तडाक्यात शहरात अपुरा पाणीपुवरठा होणार आहे. ए, बी व ई वॉर्ड आणि सलंग्न उपनगरातील नागरिकांच्या तोंडचे पाणी पळाले आहे. गळती काढण्याचे काम दोन दिवस सुरू राहणार असल्याने शहरात चांगलीच पाणीबाणी निर्माण झाली आहे. नागरिकांना टँकरद्वारे पाणीपुरवठा केला जात असला, तरी मागणी एवढा पुरवठा नसल्याने टँकरभोवती शहरवासियांची झुंबड उडाली आहे.

शहरातील पाणीपुरवठा विस्कळीत झाल्यामुळे अनेकठिकाणी नागरिक आंदोलन हाती घेत आहेत. शहरातील पाण्याचे नियोजन करण्यासाठी विशेष सभाही बोलवण्यात आली. पण सभेचा वेळ उपाययोजना सुचवण्यापेक्षा स्टंटबाजी करण्यात गेला असला, तरी ठिकठिकाणी असलेल्या गळती काढण्याचे काम प्रशासनाने तातडीने हाती घेतले आहे. याचाच भाग म्हणून गेल्या काही महिन्यापासून साळोखेनगर रिंगरोड येथे ११०० मिमी व्यासाच्या मुख्य जलवाहिनीची गळती काढण्याच्या कामाला शुक्रवारपासून सुरुवात झाली. परिणामी या जलवाहिनीवर अवलंबून असलेल्या अनेक भागातील पाणीपुरवठा सकाळपासून बंद झाला आहे.

सकाळच्या सत्रात येणाऱ्या अनेक भागात पाणीपुरवठा बंद राहिल्याने सकाळपासूनच कळंबा फिल्टर हाऊस व कसबा बावडा फिल्टर हाऊस येथून टँकरच्या फेऱ्या वाढल्या आहेत. एखाद्या भागात पाण्याचा टँकर गेल्यानंतर टँकरभोवती महिलांचा गराडा पडत आहे. दुपारपर्यंत कळंबा फिल्टर हाऊस येथून १२ तर कसबा बावडा येथून १० टँकरच्या फेऱ्या झाल्या आहेत. ऐन सणासुदीच्या कालावधीत नागरिकांचे पाण्यावाचून हाल होऊ नये, यासाठी नगरसेवकांकडून अधिक टँकरची मागणी होऊ लागली आहे. शारदीय नवरात्रोत्सव आणि ऑक्टोबर हिटमुळे पाण्याच्या मागणीमध्ये वाढ झाली आहे. अशा परिस्थितीत पाणीपुरवठा बंद असल्याने शहरवासियांना पाण्यासाठी धावाधाव करावी लागत आहे. परिणामी टँकरमधून पाणी मिळण्यासाठी नागरिकांची झुंबड उडत असून काहीवेळा वादही निर्माण होत आहेत. केवळ महापालिकेच्या टँकरवर अवलंबून न राहता मोठ्या अपार्टमेंटमध्ये सामुदायिकपणे खासगी टँकर मागवले जात आहेत. तसेच व्यवसायिक वापरासाठीही खासगी टँकरला प्राधान्य दिले जात आहे. दुपारपर्यंत कळंबा फिल्टर हाऊसमधून संभाजीनगर, सुभाषनगर, वेताळमाळ तालीम परिसर, अपाटेनगर, जरगनगर, टिंबर मार्केट व राजाराम चौक येथे, तर बावडा फिल्टर हाऊसमधून टेंबलाई मंदिर, पद्मा पथक, कपूर वसाहत, मालदार बोळ, सह्याद्री हाउसिंग सोसायटी, कदमवाडी, सदर बझार, पवार मळा, मंगळवार पठे व शाहुपूरी व्यापारी पेठ येथे टँकरद्वारे पाणीपुरवठा सुरू होता.

खासगी टँकरचालकांना 'अच्छे दिन'

दोन महिन्यांपासून शहरातील पाणीपुरवठा विस्कळीत झाला आहे. त्याचा फायदा खासगी टँकरचालकांनी चांगलाच होत आहे. अव्वाच्या सव्वा भाडे आकरणी करत खासगी टँकर नागरिकांना पाणीपुरवठा करत आहेत. गळतीमुळे शहरात दोन दिवस पाणीपुरवठा बंद राहणार असल्याने नेहमीच्या दरापेक्षा टँकरचालकांनी चांगलाच दर वाढवला आहे. सणासुदीच्या तोंडावर अपुऱ्या पाण्यामुळे नागरिकांच्या तोंडच्या पाणी पळाले असले, तरी खासगी टँकरचालकांना चांगलेच 'अच्छे दिन' आल्यासारखी स्थिती शहरात निर्माण झाली आहे.

स्केटिंग स्पर्धा पंच निवड

कोल्हापूर : साउथ झोन स्केटिंग स्पर्धेसाठी पंच म्हणून धनश्री कदम यांची पंच म्हणून निवड झाली. स्पर्धा सीबीएसई न्यू दिल्ली यांच्यावतीने खोपोली येथील याक पब्लिक स्कूलच्या आंतराष्ट्रीय बॅन ट्रॅकवर होणार आहे. स्पर्धेसाठी महाराष्ट्र, गोवा, तामीळनाडू, आंध्र, तेलगंणा या राज्यातील स्केटर सहभागी होणार आहेत. स्पर्धा स्केटिंग असोशिएशन ऑफ महाराष्ट्र यांच्या मार्गदर्शनाखाली होणार आहेत.

म. टा. प्रतिनिधी, कोल्हापूर

करवीर तालुक्यातील वरणगे पाडळी परिसरात पीक आणि पाइपलाईनसाठीच्या कर्ज प्रकरणासाठी बनावट सातबारा, आठ अ उतारे वापरल्याचे नुकतेच उघडकीस आले. यामुळे सातबारा, आठ अ उतारे बनावट काढले जातात. ते वापरात येत असल्याचे स्पष्ट झाले आहे. त्यामध्ये महसूल प्रशासनाची कामे करून देणाऱ्या दलालांचे रॅकेट आघाडीवर आहे. मोठ्या गावात प्रत्येक खातेदाराची ओळख तलाठ्यास नसल्याने तेही प्रत्येक उताऱ्याची बारकाईने पडताळणी करीत नाहीत.

काही शेतकरी बँकांच्या अधिकाऱ्यांशी संगनमत करून खोटी कागदपत्रे दाखल करून कर्ज घेत असल्याचे समोर आले आहे. वरणगे येथील आयडीबीआय बँकेच्या शाखेत असा प्रकार घडला. त्यानंतर बनावट सातबारा, आठ अ उतारा मिळत असल्यावर शिक्कामोर्तब झाले. परिणामी महसूल प्रशासनाही सतर्क झाले. मात्र एकाच तलाठ्याकडे अनेक गावांचा कार्यभार असणे, शेती खरेदी विक्रीच्या व्यवहारानंतर नव्याने सात बारावर नावे वाढवणे, कमी होणे, सातबारा त्वरित अद्यावत करण्याची प्रणाली नसल्याने बनावटगिरी करणे शक्य आहे. ऑनलाइन मिळणारा सातबारा सहजपणे छेडछाड करता येत असल्याने गैरफायदा घेतला जात आहे. याला चिरीमिरीसाठी काही तलाठीही मदत करीत आहेत. यामुळे बनावट आणि खरा उतारा कोणता, असा संशय बळावत आहे.

अनेक सातबारा उताऱ्यांवर १० ते १५ जणांची नावे असतात. त्यातील एक नाव कमी करून आपल्याला हवे ते घुसडण्याची संधी आहे. शहरालगतच्या तालुक्यात शेतीच्या खरेदी, विक्रीचे व्यवहार वाढले आहेत. व्यवहारानंतर सातबारा, आठ अ अद्यावत होण्यासाठी तीन महिने लागतात. याही त्रुटीचा गैरफायदा काही शेतकरी घेतात. कर्ज देताना जोडलेली कागदपत्रे खरी आहेत की बनावट आहेत, याची खात्री करण्याची जबाबदारी संबंधित बँकांची असते. डिजीटल सहीनिशी उतारे मिळाल्यानंतर बनावटगिरीला काही प्रमाणात चाप बसेल, असे महसूल प्रशासनाचे म्हणणे आहे. दरम्यान, महसूलची कामे करून देणारी अशासकीय यंत्रणा कमी अधिक प्रमाणात सर्वत्र असते. तीच बनावट उतारे करण्यास मदत करत असल्याचे चित्र आहे. असे रॅकेट पोलिसांच्या मदतीने मोडून काढण्यासाठी महसूलमधील वरिष्ठ अधिकाऱ्यांनी पुढाकार घ्यावा, अशी मागणी होत आहे.

--------

कोल्हापूर टाइम्स टीम

'सहकारी पाणीपुरवठा संस्थांच्या वीज बिलासाठी १३४ कोटी रुपयांचे अनुदान मार्च २०२० पर्यत देण्याचे मुख्यमंत्र्यांनी जाहीर केले. तसेच कृषिपंपधारकांचा वीज दराचा प्रश्न मार्गी लावू' अशी ग्वाही मुख्यमंत्री देवेंद्र फडणवीस यांनी इरिगेशन फेडरेशनच्या प्रतिनिधींच्या शिष्टमंडळाला दिली.

मुख्यमंत्री देवेंद्र फडणवीस, कृषी राज्यमंत्री सदाभाऊ खोत यांच्या उपस्थितीत इरिगेशन फेडरेशनचे पदाधिकारी बाबासाहेब पाटील, कोल्हापूर जिल्हा इरिगेशनचे जिल्हाध्यक्ष विक्रांत पाटील, आर. जी. तांबे यांच्या नेतृत्वाखालील शिष्टमंडळाची मंत्रालयात बैठक झाली. बैठकीत बाबासाहेब पाटील व विक्रांत पाटील यांनी मुख्यमंत्री फडवणीस यांच्यासमोर शेतकऱ्यांच्या समस्यांची सोडवणूक व सहकारी संस्थांच्या वीज बिलाच्या सवलतीसंदर्भात मागणी केली.

भुयेकर यांनी चर्चेदरम्यान सवलतीच्या वीज दरासंदर्भात प्रा. एन. डी. पाटील यांनी ऊर्जा विभागासोबत केलेला पत्रव्यवहार व इरिगेशन फेडरेशनने २७ मार्च २०१८ रोजी काढलेल्या धडक मोर्चाची आठवण करून दिली. याप्रसंगी कृषिराज्यमंत्री सदाभाऊ खोत यांनी सरकार, कृषिपंपधारकांना (सहकारी पाणी पुरवठा संस्था) सवलतीच्या दरात वीज उपलब्ध करुन देण्यासाठी प्रयत्नशील आहे. वीजदरप्रश्नी यापुढेही ऊर्जामंत्री, मुख्यमंत्र्यांच्याकडे सातत्याने पाठपुरावा करू असे सांगितले.

म. टा. प्रतिनिधी, कोल्हापूर

'सरासरीपेक्षा कमी पाऊस झाल्याने जिल्ह्यातील हातकणंगले तालुक्यातील पाच गावांतील पिकांच्या वाढीवर परिणाम झाला आहे. परिणामी दुष्काळसदृश गावांतील पीक उत्पादनात २५ ते ३० टक्क्यांपर्यंत घट होणार आहे. या परिस्थितीचा वस्तूनिष्ठ अहवाल घेऊन दुष्काळग्रस्त शेतकऱ्यांच्या पाठीशी सरकार खंबीरपणे उभे राहील,' अशी ग्वाही पालकमंत्री चंद्रकांत पाटील यांनी शुक्रवारी दिली. हातकणंगले तालुक्यातील कासारवाडी, मनपाडळे, लक्ष्मीवाडी, तारदाळ, माले या पाच गावांना भेट दिल्यानंतर पालकमंत्री बोलत होते.

पाहणी दौऱ्यानंतर तारदाळ येथे आढावा घेताना पालकमंत्री पाटील म्हणाले, 'पिकांच्या उत्पादनात घट झाल्याची दखल घेतली आहे. कमी पावसाच्या गावांत मार्चनंतर पिण्याच्या पाण्याची टंचाई निर्माण होण्याची शक्यता आहे. त्यापार्श्वभूमीवर प्रशासनाने पाणी पुरवठा योजनांची गावनिहाय वस्तूस्थिती जाणून घेऊन पाण्याचे नवे स्रोत शोधून काढावेत. सरकारच्या निर्णयानुसार दुष्काळी परिस्थितीच्या मूल्यांकनासाठी निकष निश्चित केले आहेत. या निकषांनुसार राज्यात १७२ तालुक्यांत दुष्काळसदृश परिस्थिती आहे. त्यातील दहा टक्के गावांची पाहणी केली जात आहे. पाऊस कमी झालेल्या गावांत महसूल, कृषी विभागाच्या अधिकाऱ्यांनी जाऊन पाहणी करावी.'

यावेळी आमदार डॉ. सुजित मिणचेकर, सुरेश हाळवणकर, जिल्हा परिषद सदस्य अरुण इंगवले, जिल्हा अधीक्षक कृषी अधिकारी ज्ञानदेव वाकुरे, तहसीलदार सुधाकर भोसले, गटविकास अधिकारी अरविंद धरणगुत्तीकर, तालुका कृषी अधिकारी व्ही. व्ही. देवकर आदी उपस्थित होते.

म. टा. प्रतिनिधी, कोल्हापूर

महापालिका कर्मचारी संघ आणि प्रशासनामध्ये शुक्रवारी झालेल्या बैठकीत सकारात्मक चर्चा झाली. बैठकीत कर्मचाऱ्यांच्या बहुतांशी मागण्या मान्य झाल्याने सोमवारपासून (ता. १५ ऑक्टोबर) जाहीर केलेला बेमुदत संप स्थगित केला आहे.

महापालिकेचे जे कर्मचारी मृत व सेवानिवृत्त झाले आहेत आणि सेवानिवृत्त होणार आहेत अशा कर्मचाऱ्यांच्या वारसांना एकरकमी फरकाची रक्कम द्यावी, दिवाळीसाठी सानुग्राह अनुदान द्यावे, १२ ते २४ आश्वासित योजनांचा लाभ पगारात समावेश केला आहे. पण त्यांचा फरक मिळालेला नाही. हा फरक द्यावा यांसह अन्य मागण्यांसाठी कर्मचारी संघाने २६ सप्टेंबर रोजी संपाची नोटीस दिली होती. नोटिसीनंतर आयुक्त डॉ. अभिजित चौधरी यांनी संघटनेच्या पदाधिकाऱ्यांची शुक्रवारी बैठक घेतली.

बैठकीत संघटनेच्या पदाधिकाऱ्यांशी सकारात्मक चर्चा झाली. वर्ग तीन व चारच्या कर्मचाऱ्यांना दिवाळी सानुग्राह अनुदानापोटी अॅडव्हान्स म्हणून प्रत्येकी चार व आठ हजार रुपये देण्याचा निर्णय झाला. १४ महिन्यांचा महागाई फरक देण्याची मागणी मान्य करण्यात आली. आरक्षित प्रवर्गातील पदोन्नतीला कोर्टाने स्थगिती दिली असल्याने कोर्टाच्या निर्णयानंतर पदोन्नतीबाबत निर्णय घेतला जाईल असे आश्वासन आयुक्त चौधरी यांनी दिले. बहूतांश मागण्या मान्य झाल्याने संप स्थगित केला असल्याची माहिती संघटनेचे कार्याध्यक्ष विजय वणकुद्रे यांनी दिली. बैठकीस संघटनेचे अध्यक्ष रमेश देसाई, दिनकर आवळे, अजित तिवले, बाबूराव ओतारी, विजय चरापले, अतिरिक्त आयुक्त श्रीधर पाटणकर, उपायुक्त मंगेश शिंदे, संजय सरनाईक आदी उपस्थित होते.

म. टा. वृत्तसेवा, सांगली

भिलवडी (ता. पलूस) येथील चितळे आणि जीन्स एबीएसच्या संयुक्त कंपनीच्या गायी, म्हशींची आनुवंशिकता सुधारण्यासाठी उभारलेल्या कृत्रिम रेतन प्रकल्पात दुर्गा नावाची नवी प्रजाती विकसित केली आहे. मुऱ्हा जातीची म्हैस आणि महाबली वळू यांच्या संयोगातून जन्मलेले पहिले सेक्सेल अपत्य (फक्त मादी जन्माला घालणारे) नुकतेच जन्मले आहे. 'शेतकऱ्यांची आर्थिक स्थिती सुधारण्यासाठी ही प्रजाती उपयुक्त ठरेल,' असा विश्वास चितळे डेअरीचे संचालक विश्वास चितळे यांनी व्यक्त केला.

चितळे डेअरीच्यावतीने भिलवडीत ब्रह्मा नावाचा प्रजाती विकास प्रकल्प राबविण्यात येतो. या प्रकल्पाबाबत विश्वास चितळे यांनी यांनी शुक्रवारी भिलवडीत पत्रकारांशी संवाद साधला. ते म्हणाले, 'सेक्सेल सिमेन वापरून या वर्षी सुमारे एक लाख सेक्सेल रेत डोस वापरण्यात आले आहेत. त्यातून हजारो कालवडी निर्माण होत आहेत. या तंत्रज्ञानाचा सर्व शेतकरीबंधू जास्तीत जास्त उपयोग करुन उत्पादन वाढवतील, अशी अपेक्षा आहे. भारत आणि ब्रिटन यांच्यात २०१५मध्ये झालेल्या अॅग्रीकल्चर डायरेक्ट फॉरेन इन्व्हेस्टमेंटच्या अनुषंगाने केलेल्या घोषणेतील हा एक प्रकल्प आहे. या प्रकल्पांतर्गत भारतात प्रथमत: उच्च पुनरुत्पादन क्षमता असलेले निवडक वळू, भ्रूण तसेच जिवंत वळू अमेरिकेतून आयात करून ब्रह्मा या बुल सेंटरमध्ये त्यांची जोपासना करण्यात येत आहे. या प्रकल्पामुळे अमेरिकेच्या दर्जाचे उच्च प्रतीचे रेत आपल्या शेतकऱ्यांना मिळणार आहे. प्रत्येक वर्षी ३५ ते ४० लाख रेत डोसचे उत्पादन केले जाते.'

.. .. ..

म. टा. प्रतिनिधी, कोल्हापूर

राज्य सरकारच्या महात्मा फुले आरोग्य योजना आणि केंद्र सरकारच्या 'आयुष्मान भारत आरोग्य विमा योजने'तून मोफत उपचार सुविधा देणाऱ्या जिल्ह्यातील ३४ हॉस्पिटलवर शुक्रवारी छापे टाकण्यात आले. सरकारच्या या योजनांची अंमलबजावणी करणाऱ्या पथकांनी टाकलेल्या छाप्यात गंभीर प्रकार निदर्शनास आले आहेत. हॉस्पिटल प्रशासनाकडून रुग्णांकडून जादा रकमेची वसुली, उपचार देण्यास नकार, योजनेसाठी संबंधित रुग्ण पात्र असूनही त्यांच्याकडून किंवा नातेवाईकांकडून पैसे उकळणे, असे प्रकार या झाल्याचे पथकाच्या निदर्शनास आले. अॅस्टर आधार हॉस्पिटलमध्ये या दोन्ही योजनांच्या पातळीवर गंभीर बाबी आढळल्यामुळे या योजनेतून हॉस्पिटल तत्काळ निलंबित करण्याचा निर्णय योजनेचे मुख्य कार्यकारी अधिकारी डॉ. सुधाकर शिंदे यांनी घेतला. पथकाने टाकलेले छापे आणि छाप्यादरम्यान आढळलेल्या गंभीर प्रकारांमुळे वैद्यकीय क्षेत्रात खळबळ उडाली.

शुक्रवारी दिवसभर दहा पथकांच्या माध्यमातून कोल्हापूर शहरासह, इचलकरंजी, गडहिंग्लज, कोडोली येथील हॉस्पिटलवर छापे टाकण्यात आले. केंद्र सरकारच्या आयुष्मान भारत आरोग्य विमा योजना आणि महात्मा ज्योतिबा फुले जन आरोग्य योजनेंतर्गत दारिद्र्यरेषेखालील (पिवळी शिधापत्रिकाधारक) आणि दारिद्र्यरेषेवरील (केशरी शिधापत्रिकाधारक) कुटुंबांना चांगल्या वैद्यकीय सुविधा उपलब्ध करुन दिल्या जातात. योजनेंतर्गत लाभार्थी रुग्णास नि:शुल्क वैद्यकीय सुविधा देण्याची योजना आहे. त्यासाठी सरकारने योजनेसाठी जिल्ह्यातील सीपीआर रुग्णालयासह ३४ हॉस्पिटलची निवड केली आहे. हॉस्पिटलना विमा योजनेकडून वैद्यकीय उपचाराचा खर्च मिळतो. पण, त्यांच्याकडून जादा खर्च झाला असल्याचे सांगून पैसे उकळले जातात. तसेच औषधाचे पैसेही वसूल केले जातात. त्यामुळे सामान्य रुग्णांना किमान ५० ते ७० हजाराचा फटका बसतो. हॉस्पिटलकडून पैसे उकळते जात असल्याबरोबरच अन्य गंभीर तक्रारी योजनांची अंमलबजावणी करणाऱ्या विभागाकडे आल्या होत्या. त्यानुसार मुंबईतील विभागाने राज्यभरातील हॉस्पिटलची तपासणी सुरु केली.

शुक्रवारी सकाळी या विभागाचे मुख्य कार्यकारी अधिकारी डॉ. सुधाकर शिंदे यांच्या नेतृत्वाखाली २० जणांचे पथक कोल्हापुरात दाखल झाले. डॉक्टरांची विभागणी सात पथकात करण्यात आली. शुक्रवारी सकाळी आठपासून ३४ हॉस्पिटलवर छापे टाकण्यात आले. या योजनेतून झालेल्या शस्त्रक्रियेबाबतचा संगणकीय डाटा मागवण्यात आला. मात्र काही हॉस्पिटलनी डाटा देण्यास टाळाटाळ केली. पण, कारवाईचा बडगा उगारण्याचा इशारा दिल्यावर डाटा देण्यात आला. पथकातील डॉक्टर्सनी उपचार घेत असलेल्या रुग्णांची कागदपत्रेही तपासली. तसेच नातेवाईकांशी चर्चा केल्यावर हॉस्पिटलनी औषधे आणि शस्त्रक्रियेसाठी आलेला जादा खर्च, गेस्ट डॉक्टराच्या फीच्या नावाखाली ५० ते ६० हजार रुपये उकळल्याचेही निदर्शनास आले.

डॉ. शिंदे यांनी सायंकाळी पाचच्या सुमारास स्वत: शास्त्रीनगर परिसरातील अॅस्टर आधार हॉस्पिटलला भेट दिली. त्यांनी थेट संगणक विभागाला भेट देऊन रुग्णांची यादी मागितली. तसेच हॉस्पिटलमधील अनेक रुममध्ये भेट देऊन रुग्ण व नातेवाईकांशी चर्चा केली. उपचाराच्या खर्चासाठी दागिने गहाण ठेवून रक्कम दिल्याचे काही नातेवाईकांनी यावेळी सांगितले. हॉस्पिटल सांगत असलेल्या उपचाराच्या खर्चाची जुळणी करताना किती हाल होतात, हे सांगताना महिलांना रडू फुटले. डॉ. शिंदे यांनी यावेळी रुग्णांकडून उकळलेले जादाचे पैसे परत करण्यास हॉस्पिटल प्रशासनाला सूचना दिली. काही रुग्णांना हॉस्पिटल प्रशासनाने २० ते ३० हजार रुपये परतही केले. रात्री उशिरापर्यंत हॉस्पिटलची तपासणी सुरु होती.

००००

महात्मा फुले आरोग्य योजना आणि केंद्र सरकारच्या 'आयुष्मान भारत आरोग्य विमा योजने'तून रुग्णांना उपचार देणाऱ्या जिल्ह्यातील ३४ हॉस्पिटलमध्ये तपासणी सुरु आहे. अॅस्टर आधार हॉस्पिटलमध्ये काही त्रुटी आणि अनियमितता आढळली. त्यामुळे दोन्ही योजनेतून या हॉस्पिटलला वगळण्यात आले आहे.

डॉ. सुधाकर शिंदे, सीईओ, महात्मा फुले आरोग्य योजना

.. .. ..

हॉस्पिटल प्रशासनाकडून जादा वसुली

उपचार देण्यास नकार

योजनेसाठी पात्र असतानाही पैसे उकळणे

.. ..

म. टा. प्रतिनिधी, कोल्हापूर

दुपारी १२.२७ ची वेळ. शिरोली जकात नाक्याजवळ झालेल्या अपघातात दोघे गंभीर झाल्याचे वृत्त कळताच सर्वांत सर्वांत प्रथम महापालिकेचे अग्निशमन यंत्र दाखल होते. वाहने थांबतात. वाहतुकीची कोंडी होते. काही वाहनधारक मदतीसाठी धाव घेतात. काही वेळातच रुग्णवाहिका दाखल होते अन् खरोखर अपघात झाला नसून हे मॉक ड्रिल असल्याचे साऱ्यांना कळते आणि सर्वांनीच सुटकेचा निश्वास सोडला.

आपत्ती व्यवस्थापन सप्ताहानिमित्त यंत्रणा किती सतर्क आहे, हे तपासण्यासाठी मॉक ड्रिलचे आयोजन केले. त्यासाठी जकात नाक्याजवळ दुचाकीस्वार चुकीच्या दिशेने येऊन एका कारवर धडकून खाली पडतात. कार अचानक थांबते. मागे असलेली दुचाकी धडकते. वाहने थांबतात. त्याची माहिती बिनतारी संदेश यंत्रणेवरून कळताच सर्वप्रथम अग्निशमन वाहन येते. त्यात जखमींना उचलून घालण्यासाठी वाहनधारक धावतात. काही वाहनधारक आपल्याकडील पाण्याची बाटली घेऊन जखमीच्या दिशेने येतात. दरम्यान, गांधीनगरमधून रुग्णवाहिका दाखल झाली. तब्बल २५ मिनिटांनी म्हणजे सर्वांत शेवटी वाहतूक पोलिस आले. त्यानंतर हा खरा अपघात नसून मॉक ड्रिल असल्याचे आपत्ती व्यवस्थापन अधिकारी प्रसाद संकपाळ यांनी जाहीर केले. अपघाताच्या भीतीने आलेल्यांनी नि:श्वास सोडले.

००००

शहरातून रॅली

आपत्ती व्यवस्थापनाच्या जनजागृतीसाठी शहरातील दसरा आणि सीपीआर चौक, महानगरपालिका चौक, लक्ष्मीपुरी, व्हीनस कॉर्नर, जिल्हाधिकारी मार्गावरून रॅली काढण्यात आली. रॅलीत विद्यार्थी, विविध स्वयंसेवी संस्थेचे कार्यकर्ते सहभागी झाले होते.

००००