म. टा. वृत्तसेवा, जयसिंगपूर

जयसिंगपूर पालिकेत मागील सभेचे इतिवृत्त वाचून कायम करण्याच्या विषयावर सत्ताधारी राजर्षी शाहू आघाडी व विरोधी ताराराणी आघाडीत वादाची ठिणगी पडली. या विषयावरच सुमारे दीड तास हमरीतुमरी झाली. शहरात विविध ठिकाणी महिलांसाठी सार्वजनिक ठिकाणी स्वच्छतागृहे बांधण्याविषयी चर्चा सुरू असताना नगराध्यक्षांनी मोबाइलवर व्हिडीओ रेकॉर्डिंग केले. त्यावरून उपनगराध्यक्षांनी अध्यक्षांसमोर जाऊन त्याला आक्षेप घेतला. यावरूनही सभागृहात गदारोळ उडाला. भुयारी गटार योजनेची निविदा रद्द करण्यात आल्याने सदस्यांनी प्रशासनास धारेवर धरले. आठवडी बाजार जागा बदलाच्या विषयावरही जोरदार खडाजंगी झाली. दोन सत्रात झालेल्या सभेत साडेसहा तास विविध विषयावर प्रदीर्घ चर्चा झाली. एसटीपी प्लँटसाठी जागा ताब्यात घेऊन भुयारी गटार योजना राबविण्याचा निर्णय यावेळी झाला. देशभक्त रत्नाप्पाण्णा कुंभार सभागृहात झालेल्या सभेच्या अध्यक्षस्थानी नगराध्यक्षा डॉ. नीता माने होत्या.

सभेत मागील दोन सभांचे इतिवृत्त वाचून कायम करण्याचा विषय चर्चेला आला. मागील सभेत राजर्षी शाहू महाराजांना भारतरत्न पुरस्कार देण्यात यावा, असा ठराव झाला होता. तो पंतप्रधान कार्यालयाकडे पाठविला की नाही, असा प्रश्‍न शिवाजी कुंभार यांनी उपस्थित केला. त्यावर संबंधित अधिकारी रजेवर असल्याने मला माहीत नाही, असा खुलासा मुख्याधिकारी राजेंद्र तेली यांनी केला. यावर मुख्याधिकारी जबाबदारी झटकत असल्याचा आरोप कुंभार यांनी केला. अनेक ठराव केवळ कागदोपत्री होतात, पण त्यांची अंमलबजावणी होत नसल्याचे संभाजी मोरे यांनी सांगितले. रजेवर असणारे अधिकारी अनिल तराळ यांना मोबाइलवरून संपर्क करण्यात आला. दोन वेळा प्रयत्न केल्यानंतर त्यांनी मोबाइलवर मागील २०१६ पासूनची इतिवृत्ते लिहिली नसल्याचे सांगितल्यावर पुन्हा गोंधळास सुरूवात झाली.

निवृत्त झालेल्या कर्मचार्‍यांचा निधी देण्याच्या विषयावरही हमरीतुमरी झाली. अनेक कर्मचार्‍यांना पैसे मिळाले नसल्याने कर्मचारी संतप्त असल्याचे शिवाजी कुंभार यांनी निदर्शनास आणून दिले. अशा कर्मचार्‍यांचे पैसे एका आठवड्यात द्या, अन्यथा कारणे दाखवा नोटीस बजाविण्यात येईल, असा इशारा नगराध्यक्षांनी प्रशासनाला दिला.

जयसिंगपूर शहरात महिलांसाठी सार्वजनिक स्वच्छतागृहे बांधण्याच्या विषयावर जेथे स्वच्छतागृहे बांधण्यात येणार आहेत, तेथील नागरिकांची ना-हरकत घ्या, अशी सूचना उपनगराध्यक्ष संजय पाटील-यड्रावकर यांनी केली. नेमक्या याच वेळी नगराध्यक्षांनी मोबाइलवर व्हिडीओ रेकॉर्डिंग सुरू केले. ते पाहताच उपनगराध्यक्षांनी अध्यक्षांच्या आसनाकडे धाव घेऊन रेकॉर्डिंग बंद करण्याची मागणी केली. हे रेकॉर्डिंग मोडतोड करून सोशल मीडियावर आल्यास मानहानी होऊ शकते, असा त्यांचा आक्षेप होता. त्यावर 'सभागृहात सीसीटीव्ही आहेत. त्यामुळे रेकॉर्डिंग बंद करणार नाही,' असे नगराध्यक्षा म्हणाल्या. 'यापूर्वी तुम्हीच पत्रकारांना व्हीडिओ रेकॉर्डिंग करण्यास बंदी केली आहे. आता तुम्हीच रेकॉर्डिंग का करताय? असा सवाल संजय पाटील नगराध्यक्षांना विचारला. त्यावर लोकसभेचे कामकाजही जाहीरपणे दाखविले जात असताना येथे रेकॉर्डिंग करणे गैर नाही, अशी भूमिका घेत नगराध्यक्षांनी उपस्थित पत्रकारांनी येथून पुढे चित्रीकरण करण्यास हरकत नाही, असे सांगितले.

संविधान गौरव समिती व पालिका यांच्यामार्फत संविधानदिनानिमित्त कार्यक्रम घेण्याच्या विषयावरही वादळी चर्चा झाली. त्यावर सत्ताधारी गटाकडून सूचना व अपक्ष सदस्य सर्जेराव पवार यांनी उपसूचना मांडली. मात्र, सूचना बहुमताने मंजूर होऊन उपसूचना नामंजूर करण्यात आली.

दलितवस्ती सुधारणा योजनेंतर्गत शहरात आरसीसी नाले करण्यासाठी २४ लाख रुपयांची तरतूद करण्याचा विषयही वादळी ठरला. निधी देण्यास मंजुरी देता येणार नाही, असा पवित्रा संजय पाटील-यड्रावकर यांनी घेतला. परस्पर निधी हस्तांतरित करून सर्व आधीच ठरवून मग विषय चर्चेला येतात, असा आरोप त्यांनी केला. अखेर नगराध्यक्षांच्या अधिकारात या निधीची तरतूद करण्यात येईल, असा ठराव मंजूर करण्यात आला.

जयसिंगपूर शहरासाठी मंजूर झालेल्या भुयारी गटार योजनेची वर्कऑर्डर वेळेत न दिल्याने मुख्याधिकार्‍यांनी निविदा रद्द केली आहे. या विषयावरून सदस्यांनी प्रशासनास धारेवर धरले. निविदा काढल्यानंतर १२० दिवसांत वर्कऑर्डर द्यावी लागते. एसटीपी प्लँटची जागा पालिकेच्या ताब्यात नसल्याने निविदा रद्द करावी लागली असा खुलासा मुख्याधिकारी राजेंद्र तेली यांनी केला. मात्र पुन्हा या विषयावर सभागृहात चर्चा झाली. एसटीपी प्लँटच्या जागेचा प्रश्‍न तातडीने सोडवून भुयारी गटार योजनेसाठी फेरनिविदा काढाव्यात व ही योजना कार्यान्वित करावी अशी सूचना सदस्यांनी केली. तसा ठरावही सभागृहात करण्यात आला. रविवारच्या आठवडा बाजाराला शिस्त लावणे, मुख्याधिकारी निवासासाठी भूसंपादन करणे अशा विषयांना मंजुरी देण्यात आली.

साडेसहा तास कामकाज

नगरपालिकेच्या या सभेत १८ विषय चर्चेसाठी होते. मात्र मागील सभेचे इतिवृत्त वाचून कायम करण्याच्या पहिल्या विषयापासूनच वादळी चर्चेस सुरूवात झाली. महिला स्वच्छता गृह, आरसीसी नाला बांधणे, काडगे मळ्यातील विरंगुळा केंद्रासाठी निधी या विषयावरून राजर्षी शाहू आघाडी व ताराराणी आघाडीच्या सदस्यांत जुंपली. त्यामुळे पालिकेची सभा दोन सत्रात तब्बल साडेसहा तास चालली.

मारामारीप्रकरणी परस्परविरोधी फिर्याद

इचलकरंजी : गहाणवट दिलेले घर रिकामे करण्याच्या कारणावरुन मंगल सुरेश सुतार (वय ४०) यांना मारहाण करुन गंभीर जखमी केल्याप्रकरणी शिवाजीनगर पोलिसांनी सोमवारी शब्बीर शेख, त्यांची पत्नी रशिदा तसेच त्यांच्या दोन मुली अशा चौघांवर गुन्हा दाखल करण्यात आला. लिगाडे मळा येथील शब्बीर शेख व सुरेश सुतार यांच्यातील घर खाली करण्याच्या कारणावरुन असलेला वाद रविवारी उफाळून आला. त्यातूनच खुरपे तसेच लोखंडी पाइपने मारहाण केल्याने शब्बीर, रशिदा व इशरत शेख हे तिघे जखमी झाले होते. याप्रकरणी पोलिसांनी सुरेश सुतार यांच्यासह तिघांना अटक केली. या प्रकरणात मंगल सुतार यांना शेख दाम्पत्य व त्यांच्या दोन मुलींनी घर रिकामे करा नाहीतर तुम्हांला सोडणार नाही अशी धमकी देत डोक्यात कशाने तरी मारहाण केली. यामध्ये त्या जखमी झाल्या असून त्यांनी दिलेल्या तक्रारीवरुन पोलिसांनी शेख यांच्यासह चौघांवर गुन्हा दाखल केला आहे.

म. टा. प्रतिनिधी, कोल्हापूर

'सत्ता ही सत्ता असते, त्याला स्थळ काळ, जात आणि धर्माची मर्यादा नसते. पूर्वी काँग्रेसवासी असलेले अनेकजण आज भाजपच्या वळचणीला आहेत. ते भाजपच्या किती कामी आले, हा भाग वेगळा ? मात्र महाराष्ट्रासह देशपातळीवर नजर टाकली तर सध्या भाजपाच्या झाडाला काँग्रेसच्या फांद्या असे चित्र आहे' अशा शब्दांत कवी आणि वात्रटिकाकार रामदास फुटाणे यांनी सोमवारी राजकीय फटकारे लागवले. कोल्हापूर प्रेस क्लबतर्फे रविवारी सायंकाळी फुटाणे यांच्यासोबत वार्तालाप झाला. राजकारण्यातील थोरामोठ्यांचा स्नेह लाभलेल्या फुटाणे यांनी गप्पांच्या ओघात वेगवेगळ्या क्षेत्रातील नामवंत व्यक्तींसोबतच्या आठवणी शेअर केल्या.

माजी मुख्यमंत्री यशवंतराव चव्हाण, वसंतराव नाईक, वसंतदादा पाटील, बाळासाहेब ठाकरे, शरद पवार, सुशीलकुमार शिंदे ते चित्रतपस्वी भालजी पेंढारकर, शाहीर दादा कोंडके, लेखक वसंत तेंडुलकर, अभिनेते श्रीराम लागू, निळू फुले, दिग्दर्शक जब्बार पटेल यांच्यासोबतचे अनुभव, गंमतीदार किस्से ऐकवित वार्तालापमध्ये चांगलाच रंग भरला. वेगवेगळ्या जाती धर्माचे लोक लिहू लागले तरच मराठी साहित्य समृद्ध होवू शकेल हे ही त्यांनी नमूद केले.

'अहमदनगर जिल्ह्यातील जामखेड या कायमस्वरुपी दुष्काळी गावापासून माझा प्रवास सुरू झाला. मुंबईत कलाशिक्षक म्हणून काही काळ केलेली नोकरी केली. सिनेमाचे पहिल्यापासून आकर्षण होते. वाचनाची आवड होती. अभिनेते दादा कोंडके सोबतच्या मैत्रीमुळे चित्रतपस्वी भालजी पेंढारकर यांना भेटण्याची संधी मिळाली' असे सांगत फुटाणे म्हणाले, 'उमेदीचा काळ हा प्रत्येकाकडून काही ना काही शिकायचा होता. कोल्हापुरात आल्यानंतर जयप्रभा स्टुडिओत तासनतास भालजी पेंढारकर यांच्यासोबत देव, देश आणि धर्माविषयी चर्चा तर सायंकाळी अभिनेते निळू फुले यांच्याकडून डॉ. राममनोहर लोहिया यांच्यासंदर्भातील विचार अशा दोन प्रवाह मी एकाचवेळी अनुभवत होतो. सोंगाड्या, एकटा जीव सदाशिव या सिनेमांची निर्मिती जवळून पाहिली.'

फुटाणे म्हणाले, 'पुढे सामना सिनेमाची निर्मिती करताना लेखक चांगला पाहिजे, त्यावरच सिनेमाचे भवितव्य अवलंबून असते अशी खूणगाठ बांधून निर्मिती केली. उदारउसनवारी करत निर्माण केलेला हा सिनेमा फ्लॉप झाला. जवळपास तीन लाख रुपये खर्च झालेला. पुढे बर्लिन महोत्सवात सिनेमा झळकला. त्यानंतर राज्यात ठिकठिकाणी हा सिनेमा फुल्ल झाला. कोल्हापूरने माझ्यावर प्रचंड प्रेम केले. धर्म म्हणून सिनेमा निर्माण करणारी इथली मंडळी आहेत.'

प्रेस क्लबचे अध्यक्ष विजय पाटील व ज्येष्ठ पत्रकार उदय कुलकर्णी यांच्या हस्ते त्यांचे स्वागत झाले.

तीन राज्यांवर लोकसभेचे भवितव्य

'देशात सध्या अघोषित आणीबाणी असल्यासारखी स्थिती आहे. राजस्थान, मध्यप्रदेश आणि छत्तीसगडच्या निवडणूक निकालावर लोकसभा निवडणूक वेळेत होईल की नाही हे अवलंबून आहे. या तीन राज्यातील निकाल उलटे लागले तर लोकसभा निवडणूक लांबू शकते. काँग्रेसच्या आणीबाणीच्या कालावधीत लोकांना १७ महिने कारावास भोगावा लागला होता. त्याचे उट्टे काढण्यासाठी हे काँग्रेसजनांना ३६ महिन्यांचा कारावास घडवतील' असा टोला रामदार फुटाणे यांनी लगाविला.

काकांच्या पोटात काय दडलंय?

'माजी मुख्यमंत्री वसंतराव नाईक, शरद पवार यांनी महाराष्ट्राला आर्थिक दृष्ट्या सक्षम केले. दुग्ध, कृषी क्षेत्राला प्रोत्साहित केले. वसंतदादा पाटील यांनी 'विना अनुदानित'तत्वावर शैक्षणिक संस्था काढण्यास परवानगी दिली नसती तर निम्मेहून अधिक पदवीधर तयार झाले नसते अशा शब्दांत त्यांनी या नेत्यांच्या कार्याचे मोठेपण नमूद केले. वसंतराव नाईकांच्या दूरदृष्टीच्या निर्णयामुळे दुग्ध व्यवसायाला पोषक वातावरण निर्माण झाले. पूर्वी दुधाच्या दोन बाटल्याच्या परमिटसाठीही मंत्रालयात उभे राहावे लागत होते. आता 'गोकुळा'त नांदणाऱ्यांनाही मल्टीस्टेट व्हावे लागत आहे' अशी टिप्पणी फुटाणे यांनी केली.

म. टा. वृत्तसेवा, कुडित्रे

'कॉंग्रेसने देशात सहकाराच्या माध्यमातून सर्वसामान्यांना उभारी देण्याचे काम केले. सहकाराचे जाळे निर्माण करण्यात कॉंग्रेसचा मोठा वाटा आहे. मात्र, भाजप-शिवसेना सरकारने सर्वसामान्यांचा आधार असलेला हा सहकार मोडीत काढण्याचे काम केले आहे. शासनाच्या चुकीच्या धोरणांमुळे आज गावांतील विकास संस्थाही डबघाईला आल्या. परिणामी शेतकरी अडचणीत आले. सहकाराच्या विकासासाठी खऱ्या अर्थाने कॉंग्रेसची गरज आहे' असे प्रतिपादन काँग्रेसचे जिल्हाध्य, माजी आमदार पी. एन. पाटील यांनी केले. करवीर तालुक्यातील नागदेववाडी येथील नागनाथ विकास संस्थेच्या सुवर्णमहोत्सवी कार्यक्रमात प्रमुख पाहुणे म्हणून ते बोलत होते. अध्यक्षस्थानी संस्थेचे चेअरमन तानाजी निगडे होते.

ज्येष्ठ संचालक दादूमामा कामिरे म्हणाले, 'सहकारामुळे शेतकरी जगला आहे. सहकार नसता तर शेतकऱ्यांना पेढीसमोर हात पसरून व्याजाच्या खाईत पिसत बसावे लागले असते. सहकारामुळे बॅंका, विकास संस्थांच्या माध्यमातून शेतकऱ्यांना गरजेच्या वेळेला पैसा उपलब्ध होऊ लागला. भाजप सरकारची आश्वासने फोल ठरली असून हे सरकार भ्रष्टाचारात अडकले आहे.' संस्थेचे चेअरमन तानाजी निगडे यांनी स्वागत करून संस्थेच्या कार्याचा आढावा घेतला. संचालक आनंदराव जांबीलकर, व्हाइस चेअरमन बाळासाहेब जाधव यांनी मनोगत व्यक्त केले. यावेळी पाटील यांच्या हस्ते संस्थेच्या सभासदांना भेटवस्तूंचे वाटप करण्यात आले. कार्यक्रमास गोकुळचे संचालक बाळासाहेब खाडे, सरपंच दिपाली दिवसे, बी. एच. पाटील, बाळासाहेब ढेरे, बाबूराव दिवसे, दिलीप निगडे, प्रकाश दिवसे, मारुती निगडे आदी उपस्थित होत्या. रमेश निगडे यांनी आभार मानले.

२०१९ला 'पी.एन.' आमदार

संचालक दादूमामा कामिरे यांनी भाषणात पी. एन. पाटील यांचा उल्लेख माजी आमदार असा न करता आमदार असा केला. 'हा उल्लेख जाणीवपूर्वक केला असून येणाऱ्या २०१९च्या विधानसभा निवडणुकीत तेच आमदार होणार आहेत,' असे कामिरे म्हणताच उपस्थितांनी जोरदार टाळ्या वाजवून त्यास प्रतिसाद दिला.

फोटो :

नागनाथ विकास संस्थेच्या सुवर्णमहोत्सवी कार्यक्रमानिमित्त सभासदांना भेटवस्तू वाटपप्रसंगी माजी आमदार पी. एन. पाटील. शेजारी बाळासाहेब खाडे, तानाजी निगडे, बाळासाहेब जाधव, सरपंच दिपाली दिवसे, दादूमामा कामिरे व मान्यवर.

म. टा. वृत्तसेवा, कुडित्रे

नागपूर येथे दिनांक १ ते ४ ऑक्टोबर रोजी झालेल्या राज्यस्तरीय जलतरण स्पर्धेतील तीन प्रकारांत विक्रमी वेळेची नोंद करत करवीर तालुक्यातील कांचनवाडी येथील अभिनंदन तानाजीराव दळवी याने सुवर्णपदके पटकावली. त्याची दिल्ली इथे होणाऱ्या राष्ट्रीय जलतरण स्पर्धेसाठी निवड झाली आहे.

अभिनंदनने स्पर्धेच्या पहिल्या दिवशी ५० मीटर बेस्ट स्ट्रोक प्रकारात यापूर्वीचा ३२.५६ सेंकदाचा विक्रम मोडीत काढून ३१.० सेंकदाची विक्रमी नोंद करून सुवर्णपदक पटकवले. दुसऱ्या दिवशी १०० मीटर ब्रेस स्ट्रोकमध्ये यापूर्वीचा १.१२.२१ हा विक्रम मोडीत काढून १.०९.०० अशी विक्रमी वेळ नोंदवून दुसरे सुवर्णपदक मिळवले. तसेच २०० मीटर ब्रेस्टस्ट्रोक प्रकारात लक्षणीय कामगिरी करीत तिसरे सुवर्णपदक मिळवले. एकाच स्पर्धेत तीन सुवर्णपदके मिळवणारा अभिनंदन हा एकमेव खेळाडू ठरला आहे. अभिनंदन हा कोल्हापुरात अंबाई जलतरण तलाव येथे प्रशिक्षक प्रभाकर डांगे यांच्या मार्गदर्शनाखाली सराव करत आहे.

कौलवकर हायस्कूलमधील सहा विद्यार्थ्यांची निवड

म. टा. वृत्तसेवा, राधानगरी

कौलव (ता. राधानगरी) येथील बाळासाहेब पाटील कौलवकर हायस्कूल व ज्यू कॉलेजमधील सहा विद्यार्थ्यांची निवड राज्यस्तरीय क्रीडा स्पर्धेसाठी झाली आहे. सातारा येथे झालेल्या विभागीय क्रीडा स्पर्धेत कौलवकर हायस्कूलच्या खेळाडूंनी यश संपादन केले.

शासकीय राज्यस्तरीय क्रीडा स्पर्धेत सतत सहभागी होणाऱ्या कौलवकर हायस्कूलमधील सहा विद्यार्थी यावर्षीच्या जलतरण आणि डायव्हिंग क्रीडा स्पर्धेसाठी पात्र ठरले आहेत. अजय परशराम पाटील (जलतरण), आदिनाथ कृष्णात पाटील (जलतरण), प्रदोष लहू चरापले, विवेक साताप्पा पाटील, ऋत्विक संजय अतिगरे, प्राजक्ता नामदेव जाधव (डायव्हिंग) हे पुणे येथे होणाऱ्या स्पर्धेत सहभागी होणार आहेत. त्यांना कोल्हापूर आर्य समाज शिक्षण संस्थेचे अध्यक्ष दिलीपसिंह पाटील, सचिव अनिरुद्ध पाटील, उदयसिंह पाटील यांच्यासह मुख्यध्यापक एस. वाय. पाटील, क्रीडा शिक्षक ए. व्ही. चरापले यांचे मार्गदर्शन लाभले.

फोटो

राज्यस्तरीय शालेय क्रीडा स्पर्धेसाठी पात्र विद्यार्थ्यांसह संस्थेचे अध्यक्ष दिलीपसिंह पाटील, रणजित पाटील.

म. टा. प्रतिनिधी, कोल्हापूर

'विचारांशी बांधिलकी ठेवून सातत्याने समाजासाठी कार्यरत राहण्याचे काम कॉम्रेड महादेव पडवळे यांनी केले आहे. सर्वसामान्य जनतेसाठी त्यांनी केलेले काम अभिमानास्पद आहे' असे गौरवोद्गार माजी मंत्री प्रकाश आवाडे यांनी काढले. भारतीय कम्युनिस्ट पक्षाचे ज्येष्ठ कार्यकर्ते कॉम्रेड पडवळे यांच्या गौरव सोहळ्यात ते दसरा चौकातील शाहू स्मारक भवनात बोलत होते. अध्यक्षस्थानी प्राचार्य टी. एस. पाटील होते. ज्येष्ठ पत्रकार विजय चोरमारे प्रमुख उपस्थित होते.

यावेळी माजी मंत्री आवाडे म्हणाले, 'सर्वसामान्य जनतेशी नाळ जुळलेल्या कार्यकर्त्याचा होत असल्याचा सन्मान हा त्यांच्या कार्याचा गौरव आहे. कोणत्याही लाभाची अपेक्षा न ठेवता केवळ समाजासाठी काम करणारा कार्यकर्ता दुर्मिळ होत आहे. पडवळे यांनी रस्त्यावरची लढाई लढली आहे. गोरगरीब जनतेच्या प्रश्नांना न्याय मिळवून देण्यासाठी त्यांनी कार्य केले. जे संयुक्तिक आहे आणि जे स्वत:ला पटते या बाण्याने त्यांनी आयुष्यभर चळवळीसाठी काम केले. चळवळीत काम करणाऱ्या कार्यकर्त्याला मार्गदर्शनाची गरज आहे. प्रबोधनाचे काम हाती घेतल्याशिवाय चळवळी जिवंत राहणार नाहीत. सध्याच्या घडीला प्रबोधन शिबिरांची वानवा असून कार्यकर्त्यांत विध्वंसक वृत्ती बानवण्यासाठी काही शक्ती काम करत आहेत. सत्य स्पष्टपणे मांडण्यासारखी स्थिती राहिलेली नाही. यासाठी धर्मनिरपेक्ष विचारांवर श्रद्धा ठेवणारा कार्यकर्ता तयार करण्याकडे अधिक लक्ष देणे गरजेचे आहे. सध्याचा संघर्ष वेगळ्या टप्प्यांवर नेणारा आहे. विचार स्वातंत्र्य संपवले जात आहे. यासाठी सामाजिक जाणीवा आणि आत्यंतिक तळमळ असणारा कार्यकर्ता निर्माण करण्यावर अधिक भर द्यायला हवा.'

प्राचार्य टी. एस. पाटील व पत्रकार विजय चोरमारे यांचे भाषण झाले. पीटर चौधरी, अॅड. अशोकराव साळोखे, अॅड. गुलाबराव घोरपडे, प्रा. बी. जी. मांगले यांनी मनोगत व्यक्त केले. सुनीलकुमार सरनाईक यांनी मानपत्राचे वाचन केले. याप्रसंगी दिलीप पवार, उमा पानसरे, भारत पाटील, सुरेश शिपूरकर उपस्थित होते. रवींद्र मोरे यांनी सूत्रसंचालन केले.

म. टा. वृत्तसेवा, इचलकरंजी

येथील महाराष्ट्र गृहनिर्माण संस्था वसाहतीच्या खुल्या जागेत असलेल्या हनुमान मंदिरलगतच्या जागेतील अनधिकृत पत्र्याचे शेड पोलिस बंदोबस्तात नगरपालिका प्रशासनाने हटविले. यावेळी अतिक्रमण निर्मूलन पथकाला महिलांनी विरोध दर्शविल्याने काहीकाळ तणाव निर्माण झाला होता.

सम्राट अशोकनगर परिसरात महाराष्ट्र गृहनिर्माण संस्थेची वसाहत आहे. या वसाहतीच्या खुल्या जागेत हनुमान मंदिर आहे. या मंदिराच्या लगतच असलेल्या मोकळ्या जागेत निवास गागडे यांनी आठ दिवसांपूर्वी पत्र्याचे शेड उभारले होते. हे अनधिकृत अतिक्रमण तातडीने हटवावे यासाठी गृहनिर्माण संस्थेच्या पदाधिकाऱ्यांसह नागरिकांनी नगरपालिकेवर मोर्चा काढला. यावेळी शिष्टमंडळाने मुख्याधिकारी दीपक पाटील यांची भेट घेऊन माहिती दिली असता त्यांनी अतिक्रमण हटवण्यासाठी पोलिस बंदोबस्ताची मागणी केली.

अतिक्रमित शेडमध्ये महापुरुषांचा पुतळा ठेवण्यासह एका सामाजिक संघटनेचा फलक लावण्यात आला होता. त्यामुळे अतिक्रमण हटविण्यात अडथळा निर्माण होत होता. अखेर पोलिसांनी गागडे याला ताब्यात घेत अतिक्रमण काढून घेण्याच्या सक्त सूचना केल्या. परंतु महिलांनी या कारवाईस विरोध दर्शवत गोंधळ घालण्यास सुरुवात केल्याने पोलिस बंदोबस्त वाढविण्यात आला. पोलिसांनी शेडमधील महिलांना बाहेर काढण्याचा प्रयत्न करता महिलांनी आत्मदहनाचा इशारा देत रॉकेलचे कॅन घेतल होते. पण पोलिसांनी तातडीने हालचाली करत रॉकेलचे कॅन काढून घेतले. त्याचवेळी गागडे याला पोलिसांनी सोडावे यासाठी महिलांनी गोंधळ घातला. पोलिसांनी त्यांना रोखून धरल्याने अतिक्रमण निर्मूलन पथकांने अनधिकृतपणे उभारलेले पत्र्याचे शेड जेसीबीच्या सहाय्याने जमिनदोस्त करण्यात आले. यावेळी मुख्याधिकारी दीपक पाटील, पोलिस उपाधिक्षक धीरज पाटील, पोलिस निरीक्षक के. एन. पाटील, आय. एन. पाटील, नगरअभियंता बापूसाहेब चौधरी, संपत चव्हाण, बापू पाटील उपस्थित होते.

भीमा हेल्थ झोन प्रकरणी महापौर शोभा बोंद्रे यांचे प्रशासनाला आदेश

फोटो आहे

म. टा. प्रतिनिधी, कोल्हापूर

माळी कॉलनी येथील महापालिकेच्या राजर्षी शाहू जलतरण तलाव येथील भीमा हेल्थ झोनच्या नावाखाली विविध व्यवसायिक कार्यक्रम घेतले जात आहेत. यासाठी शुल्क आकारणी केली जात असल्याचे निदर्शनास आले आहे. ठेका देताना जर टर्फचा वापर व्यवसायिक कार्यक्रमासाठी करण्यास मनाई असेल तर आणि जर येथे अटी व शर्तीचा भंग होत असल्यास ठेकेदारांवर कारवाई करण्याचे आदेश महापौर शोभा बोंद्रे यांनी प्रशासनाला दिल्या.

महापालिकेच्या शाहू जलतरण तलावाशेजारी असणाऱ्या टर्फवर फुटबॉल खेळण्यासाठी तासाला एक हजार रुपये घेत असल्याची माहिती सत्तारुढ नगरसेवकांना मिळाली. याची माहिती घेण्यासाठी महापौर बोंद्रे यांच्यासह नगरसेवकांनी सोमवारी सायंकाळी अचानक जलतरण तलाव येथे भेट दिली. भेटीदरम्यान येथील कर्मचाऱ्याने नगरसेवकांकडूनच एक हजार रुपये घेतले. ही बाब नगरसेवकांनी प्रशासनाच्या निदर्शनास आणून दिली.

महापालिकेचा तलाव २०१५ पासून खासगी ठेकेदाराला दिला आहे. भीमा हेल्थ झोनच्या माध्यमातून येथे व्यवस्थापन केले जात आहे. करारावेळी उत्कृष्ट जलतरण खेळाडू घडवणे असा उद्देश होता. पण मूळ उद्देशाला हरताळ फासला गेला असल्याचा आरोप नगरसेवकांनी केला. त्यांनी अतिरिक्त आयुक्त श्रीधर पाटणकर, शहर अभियंता नेत्रदीप सरनोबत, इस्टेट अधिकारी प्रमोद बराले यांच्या निदर्शनास वस्तुस्थिती आणून दिली. प्रशासनातील अधिकाऱ्यांसमोरच काही खेळाडूंनी पैसे घेवून खेळत असल्याचे सांगितले.

महापौर बोंद्रे म्हणाल्या, 'जलतरण तलावामध्ये सराव करुन उत्कृष्ट खेळाडू तयार होतील अशी अपेक्षा होती. पण तलावच कोरडा पडल्याने असे खेळाडू घडणार कसे? ठेकेदारांकडून खेळाडूंची लूट सुरु असून त्याला तत्काळ अटकाव करा. प्रशासनाने करार करताना घातलेल्या अटी पहाव्यात. जर अटी व शर्तीचा भंग झाला असल्यास त्वरीत कारवाई करा.' अतिरिक्त आयुक्त पाटणकर यांनी ठेकेदारांसोबत झालेला करार पाहून याबाबतचा अहवाल आयुक्त डॉ. अभिजीत चौधरी यांच्याकडे सादर करणार असल्याचे स्पष्ट केले.

यावेळी महिला आणि बाल कल्याण समिती सभापती सुरेखा शहा, गटनेता शारंगधर देशमुख, सभागृह नेता दिलीप पोवार, शिक्षण सभापती अशोक जाधव, नगरसेवक डॉ. संदीप नेजदार, राहुल माने, प्रतापसिंह जाधव, अर्जुन माने, सुभाष बुचडे, अफजल पिरजादे, मोहन सालपे, दुर्वास कदम, अशपाक अजरेकर, इंद्रजित बोंद्रे, सागर येवलुजे आदी उपस्थित होते.

...................

चौकट

शह कटशहाचे राजकारण

गोकुळ मल्टिस्टेटच्या राजकारणाचे पडसाद महापालिकेत उमटू लागले आहेत. शनिवारी भाजप-ताराराणी आघाडीच्या नगरसेवकांनी अयोध्या पार्क येथील पार्किंगच्या जागेची पाहणी केली होती. पाहणीदरम्यान स्थायी समिती सभापती आशिष ढवळे यांनी डीपी रोड खुला करण्याचे आदेश दिले होते. तर सोमवारी सत्तारुढ काँग्रेसच्या नगरसेवकांनी शाहू जलतरण तलाव व टर्फची पाहणी केली. व्यावसायिक कारणासाठी टर्फचा वापर होत असल्याने ठेकदारांवर कारवाई करण्याचे आदेश महापौर बोंद्रे यांनी दिले. परिणामी महापालिकेत दोन्ही आघाड्यांमध्ये शह कटशहाचे राजकारण सुरु असल्याची चर्चा महापालिका चौकात सायंकाळी सुरु होती.

म. टा. वृत्तसेवा, इचलकरंजी

गेल्या आठ दिवसांपासून अनियमित व अपुरा पाणीपुरवठा केला जात असल्याने जवाहरनगर येथील संतप्त महिलांनी नगरपालिकेवर मोर्चा काढत नगराध्यक्षा अलका स्वामी यांच्यावर प्रश्नांची सरबत्ती करत धारेवर धरले.

जवाहरनगर परिसरात आठवडाभरापासून अनियमित व अपुरा पाणीपुरवठा होत आहे. या संदर्भात पाणी पुरवठा कार्यालयाशी संपर्क साधून लेखी व तोंडी तक्रारी करुनही त्याकडे दुर्लक्ष केले गेल्याने सोमवारी भागातील नागरिकांनी विशेषत: महिलांनी नगरपालिकेवर मोर्चा काढला. नगराध्यक्ष स्वामी यांची भेट घेऊन त्यांच्याकडे संतप्त प्रतिक्रिया व्यक्त करताना आठ दिवसांतून एकदा तेही अपुरे पाणी सोडले जात असल्याने पाण्यासाठी वणवण करावी लागत आहे. सणासुदीच्या काळात पाणी पुरवठा होत नसल्याने तो तातडीने सुरळीतपणे सुरू करावा अशी मागणी केली. पाणी सोडणाऱ्या कर्मचाऱ्यांकडे विचारणा करता उडवाउडवीची उत्तरे दिली जात असल्याचे सांगत हनुमान मंदिर परिसरातील पाण्याची पाइपलाईन खराब झाली असून ती बदलण्याची गरज व्यक्त करुन आंदोलकांनी लक्ष वेधले. त्याचबरोबर काही भागात रस्त्यावरील पथदिवे नादुरुस्त असून भागात दैनंदिन साफसफाई होत नसल्याबद्दल तक्रारी मांडल्या. या सर्व प्रश्नांच्या सोडवणूकीसाठी मुख्याधिकारी व नगराध्यक्षांनी भागाची पाहणी करावी अशी मागणी केली.

यावेळी चर्चेत उपनगराध्यक्षा सरीता आवळे, नगरसेविका नेहा हुक्किरे, अशोकराव जांभळे, मनोज हिंगमिरे, विनायक हुक्किरे यांच्यासह भागातील नागरिक महादेव जाधव, निर्मला कांबळे, अमर बडे, कुमार शिंत्रे, विजय कडाले, चैताली रणदिवे, विमल कांबळे, कांचन कांबळे, शकुंतला मानकर, कुसुम मानकर आदींसह महिला उपस्थित होत्या.

म. टा. वृत्तसेवा, इचलकरंजी

माथाडी कामगारांच्या मजुरीवाढ प्रश्नी प्रांताधिकारी कार्यालयात झालेल्या संयुक्त बैठकीत तीन टप्प्यात दरवर्षी ९ रुपये याप्रमाणे वाढ देण्याचा निर्णय घेण्यात आला. या संयुक्त करारावर स्वाक्षऱ्याही झाल्या. तरीही या संदर्भात आठ दिवसात अंतिम निर्णय घ्यावा, अन्यथा माथाडी बोर्डाचे अध्यक्ष एकतर्फी निर्णय जाहीर करतील. आणि १ ऑगस्टपासून मजूरीवाढ लागू करण्यात येईल, असा इशारा देत कामबंद आंदोलन मागे घेण्याचा निर्णय प्रांताधिकारी समीर शिंगटे व आमदार सुरेश हाळवणकर यांच्या उपस्थितीत घेण्यात आला. दरम्यान, हमाल संघटना आज (मंगळवार) थोरात चौक येथे सकाळी बैठक घेऊन आंदोलन संदर्भात झालेल्या चर्चेची माहिती देऊन काम सुरू करण्याबाबत निर्णय जाहीर करण्यात येणार असल्याची माहिती कामगार नेते शामराव कुलकर्णी यांनी दिली.

माथाडी कामगार व वाहतुकदार यांच्यातील कराराची मुदत ३१ जुलै रोजी संपली आहे. त्यानंतर मजुरीवाढीसंदर्भात चर्चा होऊनही त्यामध्ये तोडगा न निघाल्याने माथाडी कामगारांनी गेल्या मंगळवारपासून कामबंद आंदोलन सुरू केले होते. या संदर्भात झालेल्या संयुक्त चर्चेत वाहतूकदार संघटनेच्या पदाधिकाऱ्यांनी हमाली वाढ संदर्भात चर्चा करू, पण कामबंद करु नये अशी भूमिका घेतली होती. तर माथाडी कामगार प्रतिनिधींनी जोपर्यंत वाढ मिळतणार नाही तोपर्यंत आंदोलन सुरू ठेवण्याचा निर्णय घेतला. यातून मार्ग काढण्यासाठी प्रांत कार्यालयात संयुक्त बैठक झाली. बैठकीत माथाडी कामगार प्रतिनिधी व ट्रान्सपोर्ट असोशिएशनचे पदाधिकारी आपल्या भूमिकेवर ठाम होते.

आमदार सुरेश हाळवणकर व प्रांताधिकारी समीर शिंगटे यांनी चर्चेतून मार्ग काढावा अशी सूचना केली. वाहतूकदार संघटना २७ रुपये वाढ देण्यास तयार आहे. परंतु मंदीच्या परिस्थितीमुळे दरवर्षी ९ रुपये याप्रमाणे तीन टप्प्यांत वाढ देण्यास त्यांनी संमती दर्शविली असल्याचे सांगितले. पण, माथाडी कामगार प्रतिनिधींनी हा तोडगा मान्य नसल्याचे सांगितल्याने आमदार हाळवणकर यांनी, आठ दिवसात पुन्हा संयुक्त बैठक घेऊन योग्य तोडगा काढावा असे आवाहन केले. मजूरीवाढ ही १ ऑगस्टपासून दिली जाईल. तेव्हा कामबंद आंदोलन मागे घेण्याचीही सूचना करत आठ दिवसात निर्णय न झाल्यास माथाडी बोर्डाचे अध्यक्ष हमालीवाढ प्रश्नी एकतर्फी निर्णय जाहीर करतील, असे सांगितले. दोन महिन्यांत सर्वच हमालांच्या नोंदी माथाडी बोर्डाच्या रजिस्टरला नोंद करण्याचा निर्णय घेण्यात आला.

बैठकीस उपस्थित माथाडी कामगार प्रतिनिधी यशवंत लाखे, शामराव कुलकर्णी, धोंडीराम जावळे, ट्रान्सपोर्ट असोशिएशनचे राजू जगताप, आनंदराव नेमिष्टे, सोनाळकर, जानवेकर, प्रदीप बहिरगुंडे आदींनी या संयुक्त करारावर स्वाक्षरी केल्या.

गोकुळचे संचालक दीपक पाटील यांच्यासह तिघे निर्दोष

म. टा. वृत्तसेवा, चंदगड

जातीवाचक शिविगाळ केल्याच्या प्रकरणातून माजी मंत्री भरमूआणा पाटील यांचे चिरजीव गोकुळचे विद्यमान संचालक दिपक पाटील व त्यांच्या पत्नी जि. प. च्या माजी सभापती ज्योती पाटील, मजरे कार्वे ग्रामपंचायतीचे ग्रामसेवक जी. एल. पाटील यांची गडहिंग्लज येथील जिल्हा व सत्र न्यायालयाने सबळ पुराव्याअभावी निर्दोष मुक्तता केली. पाटणे फाटा (ता. चंदगड) येथील पत्र्याचे शेड जेसीबीच्या सहाय्याने उद्ध्वस्त करुन जातीवाचक शिवीगाळ केल्याची तक्रार काशिनाथ हणमंत कांबळे (रा. माणगाव, ता. चंदगड) यांनी केली होती.

याबाबत अधिक माहीती अशी, २५ आगस्ट २०१४ रोजी पाटणे फाटा येथील पत्र्याचे शेड जेसीबी लावून उद्ध्वस्थ करुन जातीवाचक शिवीगाळ केल्याप्रकरणी अनुसुचित जाती-जमाती अत्याचार प्रतिबंधक कायदा कलम ४३, २ व ५ तसेच भादविस कलम ४२७, ५०४ व ५०६ प्रमाणे गोकुळचे संचालक दीपक पाटील, त्यांच्या पत्नी ज्योती, कार्वे ग्रामपंचायतीचे ग्रामसेवक जी. एल. पाटील यांच्या विरोधात चंदगड पोलिस ठाण्यात गुन्हा दाखल झाला होता. जिल्हा व सत्र न्यायाधीश विशेष न्यायाधीशांचे न्यायालयात दोषारोपपत्र दाखल केले होते. या खटल्याची सुनावणी जिल्हा व सत्र न्यायाधीश गडहिंग्लज विशेष न्यायाधीश यांच्यासमोर झाली. याकामी सरकारी पक्षातर्फे नऊ साक्षीदार तपासण्यात आले. संबंधीत जागा सरकारी मालकीची आहे. त्या जागेशी फिर्यादीचा मालकी हक्काचा कोणताही पुरावा नाही. घटनेवेळी दीपक पाटील व त्यांची पत्नी ज्योती या संस्थेच्या वार्षिक सर्वसाधारण सभेत हजर होते. लेखी तक्रार व फिर्याद यामध्ये घटनेबाबत तफावत आहे. तपासात तांत्रिक त्रुटी आहेत अशा आरोपींच्यावतीने केलेले युक्तिवाद जिल्हा व सत्र न्यायाधीश अनिरुद्ध प्रतिनिधी यांनी मान्य करून सर्व आरोपींची निर्दोष मुक्तता केली. पाटील यांच्यातर्फे ॲड. शिवाजीराव राणे, आर. एस. तोडकर व ग्रामसेवक जी. एल. पाटील यांच्यातर्फे ॲड. संपतराव पवार यांनी काम पाहिले.

म. टा. वृत्तसेवा, पन्हाळा

पन्हाळगडाला पाणीपुरवठा करणाऱ्या यंत्रणेतील विद्युत पंपात बिघाड झाल्याने गेल्या पाच दिवसांपासून गडावर कमी दाबाने पाणीपुरवठा सुरू आहे. त्यातही दोन दिवसाआड पाणी येत असल्याने 'पाणीबाणी'ची स्थिती निर्माण झाली आहे. पाणी टंचाईला वैतागलेल्या नागरिकांमध्ये महाराष्ट्र जीवन प्राधिकारण आणि नगरपरिषदेच्या कारभाराविरोधात संतापाची लाट पसरली आहे.

पन्हाळगडावर १९८० मध्ये आसुर्ले येथुन महाराष्ट्र जीवन प्राधिकरणाच्यावतीने नळपाणी पुरवठा योजनेला सुरुवात करण्यात आली. मात्र ही योजना कार्यान्वित झाल्यापासुन ते आजअखेरपर्यंत या योजनेकडे जीवन प्राधिकरणचे दुर्लक्ष झाले आहे. त्यामुळे योजना मोडकळीस आली आहे. सध्याची योजना जुनी झाली असून पाइपलाइन जीर्ण झाली आहे. त्यामुळे यात वारंवार बिघाड होऊन गावचा पाणीपुरवठा खंडीत होतो.

आसुर्ले येथुन पाणी दरेवाडी, पाटाचीवाडी, रेडेघाट असा टप्प्याटप्याने इरिगेशनने आणुन पन्हाळ्यात पाणीपुरवठा होतो. मात्र पाटाचीवाडी येथील पाणी उपसा करणाऱ्या विद्युत पंपात बिघाड झाल्याने रेडेघाट येथे पाणीसाठा कमी होत गेला. त्यामुळे गडावर पाणी येण्याचे वेळापत्रक सध्या कोलमडून पडले आहे. कधी दोन दिवस आड तर कधी तीन दिवसांनंतर पाणी येते. त्यातही कधी सकाळी, दुपारी तर कधी रात्री कमी दाबाने अत्यंत अल्प प्रमाणात पाणी मिळत असल्याचे नागरिकांचे म्हणणे आहे.

पन्हाळगडावर सध्या असे अधुनमधून पाणी मिळत असले तरी नेहमीच पाणी कमी मिळत असल्याची नागरिकांची ओरड आहे. त्यातच आता पाटाचीवाडी येथील विद्युत पंपातील बिघाडामुळे दोन अथवा तीन दिवस आड होत असलेल्या पाणीपुरवठ्यामुळे नागरिकांत संतापाची लाट पसरली आहे. पाणी टंचाईच्या काळात नगरपरिषदेकडून टँकरने अथवा इतर पर्यायी व्यवस्था नागरिकांसाठी करणे आवश्यक आहे. मात्र नगरपरिषदेने याकडे दुर्लक्ष केल्याने नागरिकांना पाण्यासाठी वणवण करावी लागत आहे. पन्हाळगडासाठी उत्रे येथील साडेपाच कोटी रुपयांची नवीन नळपाणी योजना लवकर सुरू करावी. जीवन प्राधिकरण व नगरपरिषदेने जुन्या योजनेत झालेला बिघाड दुर करून पाणी पुरवठा सुरळीत करावा अशी मागणी नागरिकांतून होत आहे.

पन्हाळ्याची जुनी पाणीयोजना कालबाह्य झाली असून योजनेत वारंवार बिघाड होत आहे. त्यामुळे पन्हाळगडाला पाणीटंचाई जाणवत आहे. उत्रे येथील नवीन पाणी योजना डिसेंबर महिन्यात पूर्ण होणार असून या नवीन योजनेचे काम युद्धपातळीवर सुरु आहे. नवीन योजना कार्यान्वित झाली तर पन्हाळकरांचा पाणीप्रश्न कायमचा मिटेल.

- रुपाली धडेल, नगराध्याक्षा

पन्हाळगडाचा पाणीप्रश्न अत्यंत बिकट स्थितीत आहे. गडावर लाखो पर्यटक येतात. मात्र पाणी योजनेत होत असलेल्या वारंवार बिघाडामुळे स्थानिक नागरिकांसह, पर्यटकांनादेखील पाण्याची समस्या भासवत आहे. उत्रे येथील नवीन योजना कार्यान्वीत झाल्यास पाणीप्रश्न मिटणार आहे. मात्र त्यास आणखी दीड वर्ष लागणार असल्याचे जीवन प्राधिकरणने सांगितले आहे. नगरपरिषदेच्यावतीने जनतेची दिशाभुल सुरू आहे. पाणी योजनेचे काम लवकर पूर्ण न झाल्यास जनआंदोलन उभारू.

- संग्रामसिंह भोसले, सामाजिक कार्यकर्ते

राधानगरी : साठ वर्षावरील सर्व जेष्ठ नागरिकांना राज्य सरकारने पेन्शन योजना सुरू करावी अशी मागणी राधानगरी तालुका जेष्ठ नागरिक संघटनेचे अध्यक्ष रामचंद्र पाटील यांनी पत्रकार परिषदेत केली आहे. कौलव आणि भोगावती परिसरात जेष्ठ नागरिक लोकांच्यासाठी नेहमी कार्यरत असणारे रामचंद्र पाटील यांनी राज्य सरकारने जेष्ठ नागरिकांना पेन्शन योजना त्वरित सुरू व्हावी, जेष्ठ नागरिकांना ओळखपत्र दयावे या मागण्या केल्या. सरकारने जेष्ठ लोकांच्या आरोग्याचा विचार करावा, इतर राज्यांत काही प्रमाणात पेन्शन दिली जाते. मात्र महाराष्ट्रात दुजाभाव का केला जातो? असा प्रश्न त्यांनी उपस्थित केला. यावेळी जेष्ठ नागरिक संघटनेचे सदस्य उपास्थित होते.

म. टा. वृत्तसेवा शाहूवाडी

तालुक्यात अधिकृत भात खरेदी केंद्र त्वरित सुरू करावे. तसेच हमीभावापेक्षा कमी दराने धान्य खरेदी करणाऱ्या धान्य व्यापाऱ्यांवर कायदेशीर कारवाई करण्याची मागणी स्वाभिमानी शेतकरी संघटनेच्या कार्यकर्त्यांनी निवेदनाद्वारे तहसीलदार चंद्रशेखर सानप यांच्याकडे केली.

निवेदनात म्हटले आहे की, शाहूवाडी तालुक्यातील धान्य व्यापारी शेतकऱ्यांकडून भात, सोयाबीन, भुईमूग यासह सर्रास धान्याची हमीभावापेक्षा कमी दराने खरेदी करीत आहेत. यामध्ये सोयाबीनचा हमीभाव प्रतिक्विंटल ३४०० रुपये असताना २७०० रुपये प्रमाणे तर भात पिकाचा हमीभाव प्रतिक्विंटल १७५० रुपये असताना १३०० ते १४०० रुपये प्रमाणे धान्य व्यापाऱ्यांकडून ही खरेदी सुरू असल्याने शेतकऱ्यांचे मोठे आर्थिक नुकसान होत आहे. शेतकऱ्यांची अशी आर्थिक लूट करणाऱ्या धान्य व्यापाऱ्यांवर कायदेशीर कारवाई करण्यात यावी. तसेच सद्या भात काढणीचा हंगाम सुरू असल्याने शेतकऱ्यांकडून मोठ्या प्रमाणावर भाताची विक्री होणार आहे. यासाठी तालुक्यात अधिकृत भात खरेदी केंद्र सुरू करून भात उत्पादक शेतकऱ्यांना दिलासा द्यावा.

या मागणीकडे दुर्लक्ष केल्यास शेतकऱ्यांना सोबत घेऊन स्वाभिमानी शेतकरी संघटनेच्या वतीने तीव्र आंदोलन छेडण्यात येईल असा इशाराही या निवेदनाच्या शेवटी देण्यात आला आहे. वसंत पाटील, जयसिंग पाटील, सुरेश म्हाऊटकर, पद्मसिंह पाटील, गुरुनाथ शिंदे, अजित साळोखे, संतोष पाटील, शिवाजी पाटील, पांडुरंग पाटील आदींच्या या निवेदनावर सह्या आहेत.

फोटो :

शाहूवाडी : तहसीलदार चंद्रशेखर सानप यांच्याकडे तालुक्यात अधिकृत भात खरेदी केंद्र सुरू करण्याच्या मागणीचे निवेदन देताना 'स्वाभिमानी'चे पदाधिकारी.

म. टा. वृतसेवा, हातकणंगले

'ज्या काँग्रेस-राष्ट्रवादी काँग्रेसने पश्चिम महाराष्ट्रातील साखर कारखानदारी, जिल्हा मध्यवर्ती बँका संपवून सर्वसामान्य जनता, शेतकरी, शेतमजूर यांचे वाटोळे करून विश्वासघात केला. त्यांच्याबरोबर हातात हात घालून काही मंडळी संगत करत आहेत. फक्त आपली खासदारकी टिकवण्यासाठी या मंडळींचा उद्योग सर्वांच्या लक्षात आला आहे. येत्या लोकसभा निवडणुकीत जनता त्यांना धडा शिकवल्याशिवाय राहणार नाही,' अशी टीका कृषी व पणन, पाणीपुरवठा राज्यमंत्री सदाभाऊ खोत यांनी खासदार राजू शेट्टी यांचे नाव न घेता केली. हुपरी (ता. हातकणंगले) येथील नगरपरिषदेच्यावतीने महाराष्ट्र सुवर्णजयंती नगरोत्थान महाअभियानांर्तगत शहरातील सर्वच प्रभागांमधील विविध विकासकामांचा प्रारंभप्रसंगी मंत्री खोत बोलत होते. कार्यक्रमाच्या अध्यक्षस्थानी आमदार सुरेश हाळवणकर होते.

मंत्री खोत म्हणाले, 'केंद्र सरकारने स्वामिनाथन आयोगाच्या सर्वच शिफारशी स्वीकारल्या आहेत. पण काही मंडळी अफवा पसरवून याला वेगळे वळण देऊन आपली राजकीय पोळी भाजण्याचा प्रयत्न करत आहेत. या वर्षी राज्य सरकारच्या प्रयत्नाने नवीन एफआरपीनुसार शेतकऱ्यांना १२.५ टक्के उताऱ्याला २९०० ते ३००० हजार रुपये ऊसाला दर मिळणार असल्याने कोणत्याही परिस्थितीत ऊसदर आंदोलन होणार नाही. काही मंडळींच्या भूलथापांना शेतकरी बांधवांनी बळी न पडू नका.'

आमदार सुरेश हाळवणकर म्हणाले, 'नवनिर्मित हुपरी नगरपरिषदेला राज्य सरकारने शहरातील विविध विकासकामांसाठी आतापर्यंत कोट्यवधी रुपयांचा निधी मंजूर केला आहे. येत्या काळात शहरातील प्रलंबित सर्व विकासकामे पूर्णत्वाकडे नेण्यासाठी नगराध्यक्षा जयश्री गाट, युवानेते अमित गाट व त्यांचे सर्व सहकारी यांनी प्रयत्न करून आदर्शवत काम करावे.'

नगराध्यक्षा जयश्री गाट म्हणाल्या, 'पालकमंत्री चंद्रकांत पाटील व आमदार हाळवणकर यांच्या मार्गदर्शनाने अल्पकाळात हुपरी शहरातील विविध विकासकामांसाठी कोट्यावधी रुपये निधी मिळाल्याने शहराचा चेहरामोहरा बदलणार आहे.'

माजी आमदार राजीव आवळे यांनी नवीन हुपरी नगरपरिषदेला राज्य सरकारने कोट्यवधी रुपयांचा निधी मंजूर केल्यामुळे अनेक विकासकामे मार्गी लागणार असल्याचे सांगितले. शहरातील बाजारपेठ, मुस्लिम कब्रस्थान, बाळूमामा मंदिर परिसर, जय बजरंग तालीम आदी ठिकाणी विविध विकासकामांचा प्रारंभ करण्यात आला.

जेष्ठ नेते महावीर गाट, माजी आमदार राजीव आवळे, आण्णासाहेब शेंडूरे, नानासाहेब गाट, जिल्हा परिषद सदस्या स्मिताताई शेंडूरे, मंगलराव माळगे, उपनगराध्यक्ष जयकुमार माळगे, पक्षप्रतोद भरतराव लठ्ठे, दौलतराव पाटील आदी प्रमुख उपस्थिती होत्या. कार्यक्रमासाठी अजित उगळे यांनी स्वागत केले. युवानेते अमित गाट यांनी प्रास्ताविक केले. मुबारक शेख व धनंजय खाडे यांनी सूत्रसंचलन केले. पक्षप्रतोद भरतराव लठ्ठे यांनी आभार मानले.

मुख्यमंत्र्यांच्या उपस्थितीत मेळावा

राज्यातील शेतकरी बांधवांना अनेक वर्षे ऊस दर आंदोलनाच्या माध्यमातून तथाकथित संघटनेच्या नेत्यांनी फसवण्याचा उद्योग केल्यामुळे कोडोली येथे होणाऱ्या शेतकरी मेळाव्यात साखर कारखानदार, शेतकरी आदींसह आमदार, खासदारांबरोबरच मुख्यमंत्री देवेंद्र फडणवीस हे उपस्थितीत राहणार आहेत. त्यामुळे मेळाव्यात ऊसदर आंदोलनावर निश्चितच तोडगा निघणार' असे मंत्री सदाभाऊ खोत यांनी सांगितले.

ऊसदर आंदोलनात फिक्सिंग...?

'राज्य सरकारने शेतकरी हिताच्या दृष्टीने चांगले निर्णय घेतले असून काही मंडळी ऊसदर आंदोलनात साखर कारखानदारांना हाताशी धरुन काही मंडळी राजकारण करत आहेत. या आंदोलनात फिक्सिंग होत असल्याने हा उद्योग चव्हाट्यावर आणणार आहे' असे मंत्री खोत यांनी सांगितले.

फोटो ओळी

हुपरी (ता. हातकणंगले) येथील नगरपरिषदेच्यावतीने महाराष्ट्र सुवर्णजयंती नगरोत्थान महाअभियानांर्तगत शहरातील विकासकामांचा प्रारंभ करताना मंत्री सदाभाऊ खोत. शेजारी नगराध्यक्षा जयश्री गाट, महावीर गाट, आमदार सुरेश हाळवणकर, आण्णासाहेब शेंडूरे, स्मिताताई शेंडूरे, अमित गाट, भरत लठ्ठे आदी.

म. टा. वृत्तसेवा, पन्हाळा

पन्हाळा तालुक्यात सुमारे १९४ प्राथमिक शाळा आहेत. शाळांसाठी सर्वशिक्षा अभियान मोहिमेंतर्गत प्राथमिक शाळेसाठी पुरेशा प्रमाणात वर्ग खोल्या आणि स्वच्छतागृहे मंजूर आहेत. त्यानुसार बांधकामही झाले असून मुलांसाठी आणि मुलींसाठी स्वतंत्र स्वच्छतागृहे आहेत. शाळांना स्वतंत्र इमारती, वर्ग खोल्या आणि स्वच्छतागृहे सुस्थितीत आहेत. पण बऱ्याच ठिकाणी पाण्याचा तुटवडा दिसून येत आहेत.

सर्वशिक्षा मोहिमेंतर्गत स्वच्छतागृहे बांधकामाला दहा वर्षे पूर्ण झाली आहेत. तरीही काही शाळांतील स्वच्छतागृहे चांगली आहेत. बांधारी भागात तसेच वाडी-वस्त्यांवरील शाळांमध्ये पाण्याची कमतरता दिसत आहे. अशा गावातील स्वच्छतागृहांची अवस्था दिवसेंदिवस वाईट होत चालली आहे. रस्त्याशेजारील शाळांच्या स्वच्छतागृहांमध्ये मद्यसेवन, सिगारेट ओढणे, शौचास जाणे इत्यादी गैरकृत्ये ग्रामस्थांकडून होत असल्याचा आरोप काही शालेय व्यवस्थापन समितीच्या सदस्यांनी केला आहे.

शाळेत बांधलेली स्वच्छतागृहे सर्वशिक्षा अभियान योजनेतून बांधण्यात आली आहेत. पण, सध्या १४व्या वित्त आयोग मार्फत स्वच्छता गृहांची नवीन उभारणी सुरु आहे. तालुक्यातील ठराविक ग्रामपंचायतीकडून शाळेच्या स्वच्छतागृहासाठी वेळेत पाणी पुरवठा होत नसल्याची माहिती शिक्षकांकडून मिळत आहे. शाळेमध्ये पाणीसाठा करण्याच्या टाक्या आहेत. पण पाणी पुरेसे नाही. स्वच्छतागृहात, शौचालय आणि हात धुण्यासाठी पाण्याच्या चाव्या आहेत. पण धुतलेले पाणी पुढे जाण्यासाठी मार्ग नाहीत. त्यामुळे अस्वछता वाढली आहे.

बऱ्याच ठिकाणी ग्रामपंचायती सहकार्य करत नसल्याच्या तक्रारी मुख्याध्यापक करत आहेत. १४ व्या वित्त आयोगामधून मिळणारी २० टक्के रक्कम शाळेसाठी सुविधा, स्वच्छतागृहे व साहित्य देखभाल, दुरुस्तीवर खर्च होतो. त्यामुळे शाळेमधील स्वच्छतागृहे आणि भौतिक सुविधांकडे निधी खर्च करण्यापेक्षा कागदावरच खर्च दाखवला जातो. त्यामुळे अशा शाळावरती देखभाल करण्यासाठी व शाळांची सुविधा सुधारण्यासाठी राज्य सरकारने नवीन कायदा अंमलात आणून अशा ठिकाणी कर्मचारी भरावेत अशी मागणी ग्रामीण भागांतून होत आहे.

प्रशासकीय दुर्लक्ष

तालुका स्तरावर काही गावामधून शाळांच्या दुरवस्थेबाबत पालकांनी गटशिक्षणाधिकाऱ्यांशी संपर्क साधला. मात्र, त्यांच्याकडून कोणतीच कार्यवाही होत नसल्याची स्थिती आहे.

प्राथमिक शाळा सुधारल्या आहेत असे सांगितले जाते. मात्र शाळांमध्ये काय सुविधा आहेत किंवा नाहीत याची वरिष्ठ चौकशी किती करतात हे गौडबंगाल आहे. विस्तार अधिकारी स्तरावरही माहिती उपलब्ध नसते. संपर्क होत नाही. पालकांनी कोणाला विचारायचे असा प्रश्न आहे.

- युवराज वरुटे, पालक

लोगो ... तिढा राष्ट्रवादीच्या उमेदवारीचा

फोटो ... धनंजय महाडिक, मुश्रीफ, के.पी., ए.वाय

Gurubal.Mali@timesgroup.com

gurubalmaliMT

कोल्हापूर

'लोकसभा निवडणुकीत हातात घड्याळ बांधले की संसदेत जाण्याचा मार्ग मोकळा' अशी एकेकाळी कोल्हापूर मतदारसंघाची अवस्था होती, पण 'हातात घड्याळ आणि मनात भाजप' अशी प्रतिमा निर्माण झालेल्या प्रबळ उमेदवाराला पक्षातूनच विरोध सुरू झाला आहे. यामुळे राष्ट्रवादीसमोर मोठा पेच निर्माण झाला आहे. खासदार धनंजय महाडिकांना विरोध करताना पर्याय कोण? याचे उत्तर सापडत नसल्याने हक्काच्या जागेची वाट बिकट होत आहे.

राष्ट्रवादी कॉंग्रेसची स्थापना झाल्यानंतर माजी खासदार सदाशिवराव मंडलिक दोन वेळा घड्याळाच्या चिन्हावर निवडून आले. दहा वर्षापूर्वी राष्ट्रवादीची उमेदवारी मिळावी म्हणून जिल्ह्यातील सात नेते प्रयत्न करत होते. कारण या पक्षाची उमेदवारी मिळाली म्हणजे संसदेत जाण्याचा मार्ग मोकळा अशी तेव्हाची अवस्था होती. त्यामुळे मंडलिक व महाडिक यांच्यासह माजी मंत्री दिवंगत बाबासाहेब कुपेकर, ज्येष्ठ नेते विक्रमसिंह घाटगे, माजी मंत्री दिग्विजय खानविलकर, व्ही.बी. पाटील आणि युवराज संभाजीराजे यांच्यापैकी उमेदवारी द्यायची कोणाला असा प्रश्न शरद पवार यांच्यासमोर उभा होता. तेव्हा स्थानिक नेत्यांनी संभाजीराजेंचे नाव पुढे केले, त्यांच्या गळ्यात उमेदवारी पडली. पण आज उलटी स्थिती निर्माण झाली आहे. महाडिक यांना पक्षातून विरोध झाला असला तरी त्यांना डावलून उमेदवारी द्यायची कोणाला हा मोठा प्रश्न पवारांसमोर आहे. मला उमेदवारी द्या, असे एकही नेता म्हणत नसल्याने पक्षाची ही बिकट अवस्था झाली आहे.

देशभर मोदी लाट असताना महाडिक कोल्हापुरातून राष्ट्रवादीचे उमेदवार म्हणून निवडून आले. त्यानंतर मात्र अनेक अडचणी पुढे करत त्यांनी पक्षाचे काम करण्यास बगल दिली. त्याचा त्रास आता सुरू झाला आहे. जे आजपर्यंत मुश्रीफ बोलत होते, ते आता आर.के.पोवार व राजू लाटकर बोलले. खासदारांनी संसदेत आपली प्रतिमा खुलवली असली तरी स्थानिक नेत्यांमध्ये त्यांच्याविषयी नाराजी आहे. यातूनच त्यांच्या उमेदवारीला विरोध झाला. पण विरोध करताना पर्यायी उमेदवार सध्या तरी या पक्षाकडे नाही. पवारांना महाडिक व मुश्रीफ दोघेही हवे आहेत, दोघे एकमेकांविरोधात उभे ठाकले तर पक्ष आणखी कमकुवत होणार आहे. हे टाळण्यासाठी त्यांचे प्रयत्न सुरू आहेत.

.............

पर्यायी उमेदवार कोण?

खासदारांना पक्षातून विरोध झाला, पण त्यांच्याऐवजी 'यांना' उमेदवारी द्या अशी मागणी झाली नाही. याचा अर्थ सरळ आहे. दुसरा ताकदीचा पर्यायी उमेदवार सध्या तरी नाही. आमदार मुश्रीफ प्रबळ दावेदार आहेत. पण त्यांना राज्यात रस आहे. माजी आमदार के.पी. पाटील, ए.वाय. पाटील यांची नावे पुढे केली जातात, पण त्यांना देखील कणभरही इच्छा नाही. मुश्रीफांना लोकसभेत पाठवण्यासाठी के.पीं. ची धडपड सुरू आहे, कारण जोपर्यंत ते आमदार आहेत, तो पर्यंत सिनीअर म्हणून मंत्रिमंडळात त्यांचे स्थान पक्के आहे. हीच अवस्था ए.वाय. यांची आहे. जोपर्यंत पाहुण्यांचा रस विधानसभेत आहे, तोपर्यंत मेव्हण्यांना राधानगरी विधासभेचा मार्ग बंद आहे. यामुळे आपला मार्ग सुकर करण्यासाठी 'मेव्हणे पावणे'प्रयत्न करत आहेत. पण उलट याच दोघांपैकी एकाच्या गळ्यात लोकसभेची माळ घालण्याचा प्रयत्न आमदार मुश्रीफ यांचा आहे.

.................

मुश्रीफांची मदार प्रा. मंडलिकांवर

महाडिकांना विरोध करताना पर्यायी उमेदवार म्हणून राष्ट्रवादीची नजर प्रा. संजय मंडलिकांवर आहे. मी शिवसेनेचाच उमेदवार असेन असे ते रोज सांगत असताना मंडलिक हातात घड्याळ बांधतील या आशेवर मुश्रीफ आहेत. तसे झाल्यास एका दगडात अनेक पक्षी मारल्याचे समाधान त्यांना होणार आहे. महाडिकांना उमेदवारी न देण्याचा डाव यशस्वी होईल, सतेज पाटीलांच्या हातात हात घालत मंडलिकांचा प्रचार करण्याचे समाधान तर मिळेल आणि सर्वात महत्वाचे म्हणजे कागल विधानसभेचे त्यांचे राजकारण सोपे होईल.

.................................

महाडिक काय करतील ?

राष्ट्रवादीची उमेदवारी न मिळाल्यास खासदार महाडिकांसमोर अनेक पर्याय असतील. भाजप सेना युतीची उमेदवारी मिळावी यासाठी ते प्रयत्न करतील. युती झाली आणि प्रा. मंडलिक तेथेच राहिले तर मात्र त्यांची अडचण होईल. अशावेळी त्यांना अपक्ष राहण्याशिवाय दुसरा पर्याय राहणार नाही. युती झाली नाही तर मात्र भाजपची उमेदवारी त्यांच्याच गळ्यात पडेल. अशावेळी राष्ट्रवादीला उमेदवार शोधावा लागेल. मुश्रीफ यांना नाइलाजाने रिंगणात उतरावे लागेल. महाडिकांना उमेदवारी मिळो अथवा न मिळो, सध्या तरी राष्ट्रवादीच्या अडचणीत भर पडल्यात जमा आहे.

...................................

नुकसान राष्ट्रवादीचेच

महाडिकांना उमेदवारी मिळो अथवा न मिळो, यामध्ये नुकसान होणार आहे ते राष्ट्रवादीचेच. कारण उमेदवारी दिली तर या पक्षाचे काही नेते व कार्यकर्ते मनापासून त्यांच्यासाठी राबतील असे म्हणणे धाडसाचे ठरेल. काँग्रेसचा एक मोठा गट त्यांच्या विरोधात काम करणार हे ठरलेलेच आहे. 'मल्टिस्टेट' चे भूत त्यांच्या पाठीवर असणार आहे. यामुळे पुन्हा खासदार होण्यासाठी त्यांना जंगजंग पछाडावे लागणार आहेत. याउलट त्यांना उमेदवारी दिली नाही तर दुसरा प्रबळ उमेदवार मिळणार नसल्याने नुकसान पक्षाचे होणार आहे. कारण प्रा. मंडलिकांची उमेदवारी म्हणजे 'बाजारात तुरी...' अशी अवस्था आहे. या सर्व पार्श्वभूमीवर नेत्यांमधील वादाने पक्ष मात्र अडचणीत आला आहे.

....................................

चौकट १

महाडिक गटाची ताकद

महाडिकांना उमेदवारी मिळाली तर राष्ट्रवादीचा प्रबळ उमेदवार म्हणून ते विरोधकांसमोर आव्हान उभे करू शकणार आहेत. कारण पक्षाच्या पलिकडे जावून मते खेचून आणण्याची ताकद त्यांच्यात आहे. त्यासाठी 'गोकुळ'चा त्यांना मोठा फायदा होणार आहे. या संघाचे बहुसंख्य संचालक त्यांच्या पाठिशी राहणार यात शंका नाही. प्रत्येक तालुक्यात महाडिक गट आहे, त्याची त्यांना मदत होणार आहे. या गटातील अनेकजणांच्या हातात 'कमळ' असले तरी लोकसभेत मात्र ते यु टर्न घेतील आणि महाडिकांना उघड अथवा छुप्या पद्धतीने मदत करतील अशी शक्यता आहे.

...................

चौकट २

कोण करतील महाडिकांना मदत?

काही झाले तरी आमदार सतेज पाटील हे खासदार महाडिकांना मदत करणार नाहीत. त्यामुळे लाखावर मतांचा पडणारा खड्डा भरून काढण्याचे आव्हान त्यांच्यासमोर राहणार आहे. अशावेळी आघाडीचे उमेदवार म्हणून कोल्हापूर उत्तरेतून आर.के.पोवार, करवीरमधून पी.एन. पाटील , कागलमधून मुश्रीफ, गडहिंग्लजमधून कुपेकर, राधानगरीतून के.पी, ए.वाय., चंदगडमधून भरमू सुबराव पाटील हे सारे त्यांच्या प्रचारात उतरतील. पण त्यांच्या हातात 'घड्याळ' नसेल तर मात्र घाटगे, देसाई, कुपेकर, पाटील असे काही मोजके गट त्यांच्या सोबत असतील.