कोल्हापूर : महानगरपालिका स्तरावरील शालेय मैदानी स्पर्धेत नागोजीराव पाटणकर हायस्कूलने धावणे, गोळाफेक, थाळीफेक हातोडाफेक, भालाफेक क्रीडाप्रकारात यश मिळवले. खेळाडूंची सांगली येथे होणाऱ्या विभागीय स्पर्धेसाठी निवड झाली. स्पर्धेत अविनाश पाटील, प्रथमेश सुर्वे, मनिष मोरे, जान्हवी सावंत, अस्मिता सातपुते, विजय यादव, धैर्यशिल चौगले, आर्यन पांडव, प्रथमेश चव्हाण, आलिशा इनामदार, सिध्दी नलवडे या खेळाडूंनी विविध क्रीडा प्रकारांत यश संपादन केले. खेळाडूंना क्रीडाशिक्षक एन. एस. जाधव, मुख्याध्यापक एस. आर. गुरव यांचे मार्गदर्शन लाभले.

म. टा. प्रतिनिधी, कोल्हापूर

'डॉ. विनय कोरे यांनी सामान्य कार्यकर्त्यांवर पैलू पाडून घडवले. गाव ते जिल्ह्याच्या राजकारणात सामान्यांना पदे दिली. विधानसभा निवडणुकीत अपयश आले तरी जनता त्यांच्या पाठीशी ठामपणे उभी आहे,' असे प्रतिपादन कृषी राज्यमंत्री सदाभाऊ खोत यांनी केले.

जनसुराज्य शक्ती पक्षाचे संस्थापक डॉ. कोरे यांच्या जीवनकार्यावर सुभाष भिके लिखित 'जिगर' या पुस्तकाच्या प्रकाशनप्रसंगी ते बोलत होते. स्वामी विवेकानंद कॉलेजमध्ये कार्यक्रम झाला. अध्यक्षस्थानी विवेकानंद संस्थेचे कार्याध्यक्ष अभयकुमार साळुंखे होते. मान्यवरांच्या हस्ते पुस्तक प्रकाशन झाले.

मंत्री खोत म्हणाले, 'पन्हाळा, गगनबावडा, शाहूवाडी तालुक्यांत शैक्षणिक, सहकार क्षेत्रात कोरे यांनी उल्लेखनीय काम केले. व्हिलेज, नॉलेज, कॉलेज ही त्यांची संकल्पना विदर्भातील कृषी महाविद्यालयात राबवली. त्याचा सकारात्मक बदल जाणवत आहे. वाड्या-वस्त्यांतील छोटे-मोठे प्रश्न त्यांना तोंडपाठ आहेत. त्यांच्या मार्गदर्शनाखालीच शाहूवाडी, पन्हाळा तालुक्यांत मुख्यमंत्री आणि राष्ट्रीय पेयजल योजनेतून ६० हून अधिक पाणीयोजना मंजूर केल्या. त्यासाठी लागणारा निधीही जिल्हा परिषदेकडे वर्ग केला आहे. हातकणंगले लोकसभा मतदारसंघात विविध योजनांच्या माध्यमातून २५० कोटींपेक्षा अधिक निधी आणला आहे.'

जि. प. सदस्य भगवान पाटील, शिवाजी मोरे, अशोक नारकर, अध्यक्ष साळुंखे यांची भाषणे झाली. लेखक भिके यांनी प्रास्ताविकात पुस्तक लेखनाचा हेतू स्पष्ट केला. कार्यक्रमास जि. प. समाजकल्याण सभापती विशांत महापुरे, बांधकाम सभापती सर्जेराव पाटील-पेरीडकर, पन्हाळ्याच्या नगराध्यक्षा रूपाली धडेल, विजयसिंह जाधव, प्रकाश पाटील यांच्यासह कार्यकर्ते, पदाधिकारी उपस्थित होते. पृथ्वीराज सरनोबत यांनी आभार मानले.

००००

धोका का बसला ?

कोरे यांचे काम चांगले आहे. गावागावांत कार्यकर्तेही आहेत. तरीही गेल्या विधानसभा निवडणुकीत धोका बसला. त्याचा विचार करून २०१९ च्या निवडणुकीत कोरे यांना आमदार करण्यासाठी आतापासून कामाला लागणे गरजेचे आहे, असे मत कर्णसिंह गायकवाड यांनी व्यक्त केले.

०००००

म. टा. प्रतिनिधी, कोल्हापूर

बी टेन्यूअर शेरा महसूल विभागाने काढून टाकल्यानंतर मध्यवर्ती बस स्थानक परिसरातील भूविकास बँकेच्या इमारत विक्रीचा मार्ग खुला झाला आहे. इमारत विक्रीसाठी निविदा काढली असून इमारतीची १२ कोटी ४१ लाख रुपये किंमत निश्चित केली आहे. इमारत विक्रीसाठी निविदा मागवल्या असून २३ ऑक्टोबरला निविदा उघडण्यात येणार आहेत.

राज्यातील भूविकास बँकांचे काम ठप्प झाले आहे. बँकेतून सेवानिवृत्त झालेल्या कर्मचाऱ्यांचे कोट्यवधी रुपये द्यावयाचे आहे. त्यासाठी कर्मचाऱ्यांनी हायकोर्टात दावा दाखल केला. कोर्टाने कर्मचाऱ्यांची रक्कम तातडीने द्यावी, असे आदेश दिले आहेत. कर्मचाऱ्यांची देणी देण्यासाठी राज्य सरकारने बँकेच्या इमारती विक्रीचा निर्णय घेतला आहे. कोल्हापूरातील भूविकास बँक इमारतीच्या जागेवर बी टेन्यूअरचा शेरा होता. त्यामुळे इमारत विक्रीचा मार्ग काही काळ रखडला होता. बी टेन्यूअरचा शेरा काढून टाकून इमारत विक्री करुन कर्मचाऱ्यांची देणी भागवावीत यासाठी कर्मचाऱ्यांनी दोन महिन्यांपूर्वी जिल्हाधिकारी कार्यालयासमोर प्रदीर्घ आंदोलन केले होते. महसूल विभागाकडून बी टेन्यूअरचा शेरा काढून टाकला जाईल, असे आश्वासन पालकमंत्री चंद्रकांत पाटील यांनी दिल्यानंतर आंदोलन मागे घेण्यात आले होते. त्यानंतर बी टेन्यूअरचा शेरा काढण्याची प्रक्रिया सुरू झाली. करवीर प्रांताधिकारी सचिन इथापे यांनी बी टेन्यूअरचा शेरा काढून टाकल्यावर इमारत विक्रीचा मार्ग मोकळा झाला आहे.

तीन मजली इमारतीच्या जागेचे क्षेत्रफळ ९५०० स्क्वेअर फूट असून त्यावर सुमारे २२ हजार स्क्वेअर फुटांचे बांधकाम आहे. इमारतीचे मूल्यांकन केले असून, बँकेचे अवसायक डी. बी. बल्लाळ यांनी इमारत विक्रीसाठी निविदा मागविल्या आहेत. इमारतीची रक्कम १२ कोटी ४१ लाख रुपये निश्चित केली आहे. २० ऑक्टोबरपर्यंत निविदा स्वीकारल्या जाणार असून १५ ऑक्टोबरपर्यंत इमारत पाहण्यास खुली ठेवण्यात येणार आहे.

कोल्हापूर

रविवार पेठ, सोनटक्के तालीम परिसरातील सनत सचिन कालेकर (वय १५) याचा डेंगीने मृत्यू झाला. तो विद्यापीठ हायस्कूलमध्ये दहावी इयत्तेत शिकत होता. सनतला मंगळवारी (ता. २) ताप आल्यानंतर खासगी हॉस्पिटलमध्ये उपचारास दाखल केले होते. ताप मेंदूपर्यंत चढल्याने त्याची शुद्ध हरपली. वैद्यकीय चाचणीत डेंगीचे निदान झाल्यावर त्याला अधिक उपचारासाठी सुपर स्पेशॅलिटी हॉस्पिटलमध्ये उपचारासाठी दाखल केले. उपचार सुरु असताना त्याचे निधन झाले. तो अभ्यासात हुशार होता. एनसीसी आणि टेबल टेनिसमध्ये त्याने प्राविण्य मिळवले होते. सनतच्या वडिलांचे बिंदू चौक सबजेल परिसरात गॅरेज आहे. त्याच्या पश्चात वडील, आई, बहीण असा परिवार आहे.

म. टा. प्रतिनिधी, कोल्हापूर

शारदीय नवरात्रोत्सवाच्या कालावधीत कोल्हापूर महापलिकेच्या परिवहन उपक्रम विभागाच्या (केएमटी) श्री दुर्गादर्शन विशेष बससेवेला बुधवार (ता.१०) पासून सुरुवात होणार आहे. बससेवेच्या आरक्षणाला शाहू मैदान नियंत्रण पास विक्री केंद्रातून रविवारपासून (ता. ७) सुरुवात होईल. विशेष बससेवेच्या माध्यमातून शहर आणि परिसरातील १५ देवींचे दर्शन नवरात्रोत्सवाच्या कालावधीत भाविकांना घेता येणार आहे.

नवरात्रोत्सवाच्या कालावधीत शहर आणि परिसरातील अनेक देवींचे दर्शन भाविक घेत असतात. यामध्ये प्रामुख्याने लक्ष्मीदेवी, एकविरादेवी, फिरंगाईदेवी, कमलजादेवी, महाकाली, अनुगामिनी, तुळजाभवानी, कात्यायनी व करवीर निवासिनी अंबाबाई मंदिराचा समावेश असतो. भाविकांना या ठिकाणी सुलभ प्रवासातून दर्शन घडवून आणण्यासाठी विशेष बससेवा प्रतिवर्षाप्रमाणे सुरुवात करण्यात येणार आहे.

सकाळी नऊ ते दुपारी दोन पर्यंत भाविकांना विशेष बससेवा देण्यात येणार आहे. सुमारे साडेचार तासाच्या कालावधीसाठी अगाऊ आरक्षणाची सुविधा उपलब्ध करुन देण्यात आली आहे. रविवारपासून सकाळी नऊ ते सायंकाळी सात वाजेपर्यंत भाविकांना आरक्षण करता येणार आहे. तसेच सामूहिक बुकिंगची सुविधा भाविकांना देण्यात आली आहे. आठ किमी अंतरातील किमान ३४ प्रवाशांना विशेष बससेवा उपलब्ध करुन दिली आहे. विशेष बस शाहू मैदान येथून प्रत्येक अर्धा ते एक तासाला मार्गस्थ होऊन पुन्हा शाहू मैदान येथे दाखल होणार आहे. त्यानंतर भाविकांना तुळजाभवानी व अंबाबाई देवीचे दर्शनासाठी जाता येणार आहे. अधिक माहितीसाठी भाविकांनी छत्रपती शिवाजी महाराज चौक येथील वाहतूक नियंत्रण केंद्राशी सकाळी सहा ते रात्री दहापर्यंत संपर्क साधण्याचे आवाहन केले आहे.

.......................

चौकट

दुर्गादर्शन बससेवा

१५० रु.

प्रौढ व्यक्तीस प्रवास दर

७५ रु.

तीन ते १२ वर्षापर्यंत प्रवास दर

१५

देवींचे दर्शन

५,६००

सामूहिक बुकिंग (३४ प्रवाशांसाठी)

म. टा. प्रतिनिधी, कोल्हापूर

देवदासी, जोगते, वाघ्या, मुरळींना प्रतिमहिना सात हजार रुपये पेन्शन द्यावी, यासह विविध मागण्यांकडे लक्ष वेधण्यासाठी गडहिंग्लज येथील देवदासी निराधार मुक्ती केंद्राच्या नेतृत्वाखाली शुक्रवारी जिल्हाधिकारी कार्यालयावर लाँग मार्च काढण्यात आला. यावेळी जिल्हाधिकारी अविनाश सुभेदार यांना निवेद देण्यात आले. मागण्यांप्रश्नी सकारात्मक निर्णय न झाल्यास २५ ऑक्टोबरला विधानभवनला धडक मोर्चा काढणे, आत्मदहनाचा इशाराही देण्यात आला.

गडहिंग्लज येथील म. दु. श्रेष्ठी विद्यालयातून पहाटे पाच वाजता मार्चला सुरुवात झाली. तेथून काळभैरी, बेरडवाडी, कापशी, मेतके, हमीदवाडा, आणूर, केनवडे, होन्याळी, कागल, सायबरमार्गे लाँगमार्च दुपारी अडीच वाजता बिंदू चौकात आला. देवदासी चळवळीचे ज्येष्ठ नेते माजी आमदार अॅड. श्रीपतराव शिंदे, सामाजिक कार्यकर्त्या प्रा. मेघा पानसरे, प्रा. विठ्ठल बन्ने, बापू म्हेत्री यांच्या नेतृत्वाखाली बिंदू चौकातून मोर्चाला सुरुवात झाली. व्हीनस कॉर्नर, बसंत-बहार टॉकीजमार्गे जिल्हाधिकारी कार्यालयावर मोर्चा आला. मोर्चात देवदासींनी मागण्यांचे फलक हातात घेऊन लक्ष वेधले.

अॅड. शिंदे म्हणाले, 'सन १९७५ पासून देवदासींच्या विविध प्रश्नांसाठी लढत आहे. तरीही देवदासींचे पेन्शन ६०० रुपयांवर गेले नाही. सध्याचे सरकार धार्मिक उतरंड, चातुर्वर्णाला प्रोत्साहन देत आहे. यामुळे येत्या निवडणुकीत अन्याय करणाऱ्या सरकारला मत न टाकण्याचा निर्णय देवदासींनी घ्यावा. सरकार वारंवार फसवत आहे. त्याला जाग आणण्यासाठी २५ ला चौंडकं घेऊन विधानभवनवर धडक मोर्चा काढणार आहे.'

प्रा. पानसरे म्हणाल्या, 'सध्याचे सरकार गरिबांकडे दुर्लक्ष करून उद्योगपतींना कोट्यवधींचे अनुदान देत आहे. मंत्र्यांचे मित्र घोटाळे करून देश सोडून जात आहेत. देवदासींचे प्रश्न, मागण्यांकडे दुर्लक्ष केलेल्या सरकारला धडा शिकवण्याची गरज आहे.'

प्रा. अच्युत माने, प्रा. बन्ने, बापू म्हेत्री, दत्तात्रय मगदूम, अशोक भंडारे यांची भाषणे झाली. यावेळी पूनम म्हेत्री, आप्पासाहेब कांबळे यांच्यासह देवदासी उपस्थित होत्या.

०००००

चौकट

प्रा. बन्नेंना चक्कर

देवदासी चळवळीतील ज्येष्ठ नेते प्रा. बन्ने मोर्चात सहभागी झाले होते. जिल्हाधिकाऱ्यांना निवेदन देण्यासाठी जात असताना त्यांना चक्कर आली. ते खाली कोसळत असताना कार्यकर्त्याने धरले. त्यांना त्वरित जिल्हा नियोजन समिती कार्यालयासमोरील वाहनातून सीपीआरमध्ये उपचारासाठी दाखल करण्यात आले.

०००

महत्त्वाच्या मागण्या अशा

२००५ सालच्या देवदासी निमूर्लन कायद्यात बदल करावा, जोगते, वाघ्या, मुरळी, शोषित महिलांसाठी जिल्हास्तरावर एक खिडकी योजना सुरू करावी, मोफत घरे बांधून द्यावीत, देवदासींच्या मुला-मुलींच्या विवाहासाठी ५० हजारांचे अनुदान मिळावे, एक लाखापर्यंत भागभांडवल अनुदान स्वरूपात मिळावे, अंत्योदय, संजय गांधी, श्रावण बाळ योजनेचा लाभ द्यावा, शिधापत्रिकेवर मासिक ४० किलो धान्य, रेल्वे, बसची मोफत सेवा, विमा संरक्षण द्यावे.

००००

म. टा. प्रतिनिधी, कोल्हापूर

'होर्डिंग फुक्कट जाहिरात झटपट' याप्रमाणे महापालिका हद्दीत होर्डिंग डौरात झळकत असतात. काही ठिकाणी परवानगी घेऊन तर काही अनधिकृतरीत्या होर्डिंग लावून फुक्कटची प्रसिद्धी मिळवली जाते. लोखंडी सांगाडा उभारून केलेल्या होर्डिंग कोसळून पुणे येथे चार निष्पाप नागरिकांना जीव गमवावा लागला. होर्डिंग उभारल्यानंतर पुन्हा त्याची तपासणी करणारी यंत्रणाच महापालिकेत नसल्याने अशा होर्डिंगमुळे नागरिकांचा जीव आणि सुरक्षा धोक्यात आली आहे.

दादा, भाऊ यांच्या वाढदिवसासह अनेक उत्पादनांच्या जाहिरातीसाठी महापालिका क्षेत्रात अनेक ठिकाणी भलीमोठी होर्डिंग लावली जातात. होर्डिंगसाठी कधी महापालिकेची परवानगी, तर काहीवेळा अनधिकृतपणे होर्डिंग उभारले जातात. हायकोर्टाच्या आदेशानुसार अशा अनधिकृत होर्डिंगवर कारवाई करण्याचे निर्देश दिले. त्यानंतर कोल्हापूर महापालिकेने अनधिकृत होर्डिंगवर कारवाई केली, पण २०१८ मध्ये अशा स्वरूपाची कारवाई केलेली नाही. सद्य:स्थितीत महापालिकेकडे ३५० परवानाधारक होर्डिंगची नोंद असली, तरी होर्डिंगच्या सुरक्षेबाबत कोणत्याच विभागाकडे माहिती नाही.

शहराच्या अनेक महत्त्वाच्या व वर्दळीच्या ठिकाणी अशी होर्डिंग असतात. एकदा होर्डिंग उभा केल्यानंतर तपासणीसाठी महापालिकेची यंत्रणाच नसल्याने नागरिकांची सुरक्षा धोक्यात आली आहे. सध्या जोरदार वाऱ्यासह परतीच्या पावसाला सुरुवात झाली आहे, तर मे महिन्यामध्ये वळवाचा पाऊसही सोसाट्याच्या वाऱ्यासह पडत असतो. अशावेळी होर्डिंग कोसळण्याच्या घटना नेहमीच घडत असतात. होर्डिंग पडल्यानंतर त्याची दुरुस्ती केली जाते, पण अशा घटना घडू नयेत, यासाठी कोणतीच काळजी घेतली जात नाही. होर्डिंगसाठी शुल्क जमा करून परवानगी घेतली जाते, पण त्यानंतही महापालिका व संबंधित होर्डिंगधारक नियमित पाहणी करत नाहीत. परिणामी अशा होर्डिंगमुळे नागरिकांची सुरक्षा धोक्यात आली आहे. पुणे येथील घटनेनंतर तरी महापालिकेची संबंधित यंत्रणा अशी तपासणी मोहीम हाती घेणार का? असा प्रश्न उपस्थित होत आहे.

देवस्थान समितीचे कचखाऊ धोरण; महापालिकेचा कानाडोळा

कोल्हापूर टाइम्स टीम

अंबाबाई मंदिरात नवरात्रोत्सवाच्या काळात लाखो भाविक येत असले तरी त्यांना पुरेशा सुविधा देण्यात पश्चिम महाराष्ट्र देवस्थान समिती प्रशासन अपयशी ठरते. हे असतानाच वर्षानुवर्षे प्रलंबित असलेला अतिक्रमणांचा विळखा अजूनही मंदिराभोवती आहे. महानगरपालिका, देवस्थान व्यवस्थापन समिती, पोलिस प्रशासन अतिक्रमण काढून भाविकांना वाट मोकळी करून देणार का? असा प्रश्न उपस्थित केला जात आहे. राजकीय वरदहस्त, देवस्थान समितीची कचखाऊ भूमिका आणि महापालिकेचा कानाडोळा यामुळे अतिक्रमणांचा विळखा वाढतच आहे.

अंबाबाई मंदिराला दहशतवाद्यांपासून असलेला संभाव्य धोका लक्षात घेत मंदिर परिसरात सुरक्षिततेसाठी गेली पाच वर्षे गृह विभागाकडून सूचना केल्या जात आहेत. त्यानंतर परिसरातील दुकाने आणि अतिक्रमणांचा मुद्दा ऐरणीवर आला होता. घाटी दरवाजा परिसरातील मंदिराच्या भिंतीला खेटून असलेल्या हार विक्रीची दुकाने हटवण्याची सूचना केली आहे. पण या सूचनेला वाटाण्याच्या अक्षता लावल्या जात असून दिवसेदिवस हार विक्रेत्यांचे अतिक्रमण वाढू लागले आहे. जोतिबा मंदिर ते कार्तिक स्वामी मंदिर परिसरात भाविकांना चालणेही मुश्कील झाले आहे. काशी विश्वेश्वर मंदिराला फुल विक्रेत्यांनी अक्षरश: वेढा घातला आहे. विक्रेत्यांनी पाऊस व उन्हापासून बचाव होण्यासाठी थाटलेल्या छपऱ्या रस्त्यांवर आल्या आहेत. गाडगे महाराज पुतळ्याजवळ फुले, व पूजा साहित्य विक्री करणाऱ्या दुकानांनी गराडा घातला आहे. तसेच रस्त्यांच्या दोन्ही बाजूला रिक्षा थांबत असल्याने भाविकांना चालणेही मुश्कील झाले आहे.

महाद्वार चौक, ताराबाई रोडवरील विक्रेते व फेरीवाल्यांनी विळखा घातला आहे. अंबाबाई मंदिरातून थेट रंकाळ्यावर पर्यटकांना जाता यावे, यासाठी नगरोत्थान योजनेतून रस्ता तयार करण्यात आला. रस्त्यांच्या दोन्ही बाजूला फूटपाथ बांधण्यात आले. काही ठिकाणी फूटपाथ काढण्यात आले असून काही ठिकाणी फूटपाथवर विक्रेत्यांनी दुकाने थाटली आहेत. कपिलतीर्थ मार्केटजवळ अधिकृत रिक्षा स्टॉप आहे. पण बहुतांशी रिक्षा महाद्वार चौकात थांबतात. कपिलतीर्थ मार्केटमध्ये शहरातील विक्रेत्यांनी जागा व्यापल्याने ग्रामीण भागातील शेतकऱ्यांना ताराबाई रोडवर भाजी व फळे विक्रीस बसावे लागत आहे. अतिक्रमणामुळे या परिसरातून भाविकांना चालणेही मुश्कील होत आहे. महाद्वार रोड ते पापाची तिकटी या मार्गावर प्रत्येक दुकानाच्या समोर फेरीवाले व विक्रेत्यांनी दोन्ही बाजूंनी दुकाने थाटली आहेत. त्यातूनच वाहतूक सुरू असते. नवरात्र उत्सवात या परिसरात वाहतूक बंद केल्यावर अतिक्रमण करणाऱ्या विक्रेत्यांना रान मोकळे मिळत असल्याने ते रस्त्यांचा मोठा भाग व्यापतात. शिवाजी पुतळा ते भवानी मंडप आणि राजाराम हायस्कूल ते बिंदू चौक सब जेल रस्त्यांवरही विक्रेत्यांचे अतिक्रमण वाढले आहे.

भवानी मंडपातही परराज्यातील व स्थानिक विक्रेत्यांचे अतिक्रमण झाले आहे. या विक्रेत्यांनी क्रीडा स्मृती स्तभांजवळील बॅरिकेटस् तोडून काढले आहे. विद्यापीठ हायस्कूलजवळील दक्षिण दरवाजा आणि सरलष्कर भवन जवळील पूजेचे साहित्य विक्री करणाऱ्यांनी आपली दुकाने थेट रस्त्यांवर आणली आहेत. अंबाबाई मंदिरात हजारो भाविक दर्शनासाठी येत असताना आपत्ती व्यवस्थापनाच्यादृष्टीने सर्व रस्ते मोकळे असणे आवश्यक आहे. तरीही प्रशासनाकडून कोणतीही कार्यवाही केली जात नसल्याने आश्चर्य व्यक्त केले जात आहे.

अतिक्रमणाला सर्वपक्षीयांचा आशीर्वाद

शहरातील प्रमुख विषय व मंदिरातील महत्त्वाच्या विषयावर राजकीय पक्ष आंदोलन करण्याची टोकाची भाषा बोलतात. पण मंदिराभोवती वाढणाऱ्या अतिक्रमणाच्या विरोध राजकीय पक्ष, संघटना, संस्था मूग गिळून गप्प बसतात. महाद्वार चौक ते ताराबाई रोडवरील अतिक्रमणाला देवस्थानच्या दोन पदाधिकाऱ्यांचा आशीर्वाद आहे. हे दोन्ही पदाधिकारी सत्ताधारी पक्षाचे आहेत. जोतिबा रोड ते घाटी दरवाजा परिसरातील अतिक्रमणाला सत्ताधारी पक्षाच्या व हिंदूत्ववादी पक्षाच्या कार्यकर्त्यांकडून बळ मिळते. मंदिरातील संवेदनशील विषयांवर हे कार्यकर्ते आंदोलन करण्यात आघाडीवर असतात. राजाराम हायस्कूल परिसरातील विरोधी पक्षाचा शहराचा पदाधिकारी व एका संघटनेच्या ज्येष्ठ पदाधिकाऱ्यांकडून अतिक्रमण विरोधात कारवाई होऊ नये यासाठी 'शक्ती' मिळत असते. डावे, उजव्या पक्षातील सर्व मंडळीकडून सरंक्षण मिळत असल्याने अतिक्रमणाचा चक्रव्यूह भेदण्यासाठी पोलिस व महानगरपालिकेच्या वरिष्ठ अधिकाऱ्यांना स्वत: रस्तावर उतरण्याची गरज आहे.

मटा भूमिका

कठोर पावले

उचलावीत

अंबाबाई मंदिर शहराच्या मध्यवस्तीत असून सभोवती महाद्वार रोड, गुजरी, कपिलतीर्थ मार्केट, भाऊसिंगजी रेड, चप्पल लाइन या व्यापारपेठा आहेत. नवरात्रोत्सवात अंबाबाईच्या दर्शनाला देशभरातून लाखो भाविक येत असतात. या परिसरात नवरात्रीसह वर्षभरात सुटीच्या काळातही प्रचंड गर्दी असते. या परिसरात दुकानदार, फेरीवाले, विक्रेत्यांनी परिसराला अतिक्रमणाचा विळखा घातला आहे. मंदिराकडे जाताना भाविक व शहरातील नागरिकांना त्यातून वाट काढत जावे लागते. अतिक्रमणामुळे रस्ते, फूटपाथ व्यापले आहेत. त्यातच जागोजागी व आणि कोपऱ्याकोपऱ्यावर बेकायदेशीर रिक्षाचे थांबे निर्माण होत आहेत. सहा सीटर रिक्षा शाहू मैदानमार्गे थेट भवानी मंडपात येऊन भाविकांना सोडत आहेत. नवरात्रोत्सवात मंदिर परिसरात लाखो भाविक येणार असल्याने आपत्ती व्यवस्थापनाची कसोटी लागणार आहे. उत्सव काळात सुरक्षिततेच्या दृष्टीने उपाययोजना करणे गरजेचे आहे. मंदिर परिसरातील सुरक्षिततेला बाधा आणणाऱ्या व अडथळा आणणाऱ्या अनेक घटना दिसत असतानाही प्रशासन ढिम्म आहे. दरवर्षी पालकमंत्री व जिल्हाधिकारी यांच्या अध्यक्षतेखाली बैठका होऊन त्यात चर्चा होते. नियोजन होते. सूचना व आदेश दिल्या जातात. पण प्रत्यक्षात कृती काहीच होत नाही. देवस्थान समितीचे पदाधिकारी मंदिराच्या आतील सुरक्षितेतेची जबाबदारी घेतात पण बाहेरील व्यवस्थेतील बेशिस्तीकडे महानगरपालिका आणि पोलिस प्रशासनाकडे बोट दाखवले जाते. प्रशासनाने कारवाई केल्यानंतर राजकीय पक्षाचे नेते, पदाधिकारी अटकाव करतात. त्यामुळे महापालिका आणि पोलिसांनी कठोर पावले उचलत राजकीय हस्तक्षेप मोडून काढत अतिक्रमणांचा विळखा सोडविले पाहिजे

म. टा. प्रतिनिधी, कोल्हापूर

ऐतिहासिक भवानी मंडपात आठवर्षीय वीर सोमनाथ मगर याने वाढदिवसादिवशी सलग १२ तास स्ट्रेचिंग करण्याचा विक्रम केला. त्यांच्या विक्रमाची नोंद 'वर्ल्ड रेकॉर्ड ऑफ इंडिया'मध्ये झाली आहे. विक्रमानंतर केक कापून क्रीडाप्रेमींनी जल्लोष साजरा केला.

वीरने वाढदिवसादिवशीच १२ तास स्ट्रेचिंग करण्याचा निर्णय जाहीर केला होता. शुक्रवारी सकाळी सात वाजता वीरने स्ट्रेचिंग सुरु केले. जमिनीवर समांतर आडवे पाय ठेवून तो बसून होता. वडील सोमनाथ आणि आई शारदा यांच्यासह त्याला प्रोत्साहन देण्यासाठी त्याचे नातलग व मित्र उपस्थित होते. स्ट्रेचिंग करताना त्याने थोडा आहार व पाणीही घेतले.

प्रशिक्षक संदीप लाड त्याला सूचना देत होते. विक्रमाची वेळ जसजशी जवळ येऊ लागली तशी त्यांच्या मित्रांनी गर्दी केली. उपक्रमाचे निरीक्षक 'वर्ल्ड रेकॉर्ड ऑफ इंडिया'च्यावतीने पवन सोळंकी करत होते. सात वाजता बारा तासाचा विक्रम पूर्ण झाल्यावर त्याच्या मित्रांनी जल्लोष केला. मोतिबाग तालमीच्या मल्लांनी त्याला नोटाचा हार घातला. नातलगांनी केक कापून त्याचा वाढदिवस साजरा केला. पोलिस अधीक्षक डॉ. अभिनव देशमुख यांनी त्याचे अभिनंदन केले. यावेळी शहर पोलिस उप अधीक्षक प्रशांत अमृतकर, स्थानिक गुन्हे अन्वेषण विभागाचे निरीक्षक तानाजी सावंत, जुना राजवाडा पोलिस ठाण्याचे निरीक्षक मानसिंग खोचे उपस्थित होते. सायंकाळी झालेल्या विशेष कार्यक्रमात श्रीमंत शाहू छत्रपती यांच्या हस्ते वीरला प्रशस्तीपत्र व सन्मानचिन्ह देऊन गौरव करण्यात आला. यावेळी पश्चिम महाराष्ट्र देवस्थान व्यवस्थापन समितीचे अध्यक्ष महेश जाधव, स्वप्निल पार्टे, प्रसाद जाधव, अर्चना क्षीरसागर, बंटी सावंत उपस्थित होते. वीर हा वंडर किडस इंग्लिश मीडियम स्कूलचा विद्यार्थी असून चाणक्य मार्शल आर्टसचा कराटेपटू आहे.

.. .. ..

कोल्हापूर

एक महिन्यापासून शहरातील पाणीपुरवठा विस्कळीत होऊन नागरिकांच्या तक्रारी वाढल्या आहेत. या तक्रारींची दखल घेवून महापालिकेने पाणीपुरवठा नियोजनासाठी चर्चा करण्यासाठी मंगळवारी (ता.९) महापालिकेची विशेष सभा बोलवण्यात आली आहे. सभेत पाणीपुरवठा नियोजनाबाबत कृती आराखडा सादर करण्याच्या सूचना महापौर शोभा बोंद्रे यांनी पाणीपुरवठा विभागाला दिल्या आहेत.

गणेशोत्सवापासून शहरातील अनेक प्रभागात अपुरा व अनियमित पाणीपुरवठा सुरु आहे. पाणीपुरवठा सुरळीत करण्यासाठी नागरिक रस्त्यावर उतरुन आंदोलन करत आहेत. विशेषत: उपनगरांमध्ये पाणीपुरव‌ठ्याची समस्या अत्यंत जटील बनली आहे. स्थायी समितीच्या बैठकीत याबाबत चर्चा झाली होती. आठवड्यानंतरही पाणीपुरवठा सुरळीत न झाल्याने स्थायी समिती सदस्यांनी पाणीपुरवठा नियोजनासाठी विशेष सभा बोलवण्याची मागणी महापौर बोंद्रे यांच्याकडे केली होती. सदस्यांच्या मागणीनुसार महापौर बोंद्रे यांनी मंगळवारी विशेष सभा बोलावली आहे.

गोकुळ बचाव कृती समितीची मागणी

म. टा. प्रतिनिधी, कोल्हापूर

'सहकार कायद्याप्रमाणे जिल्हा दूध उत्पादक संघाची (गोकुळ) सभा अध्यक्षांनी पार पाडली नसल्याने संचालक मंडळ बरखास्त करावे', अशी मागणी गोकुळ बचाव कृती समितीने पत्रकार परिषदेत केली. तसेच सभेची जबाबदारी व्यवस्थित पार पाडली नसल्याने अध्यक्ष विश्वास पाटील, कार्यकारी संचालक डी.व्ही. घाणेकर यांनी सभा गुंडाळल्याबद्दल त्यांच्यावर गुन्हे दाखल करावेत, अशीही मागणी केली. बचाव कृती समितीकडे जिल्ह्यातील १८३७ संस्थांनी गोकुळ मल्टिस्टेट करु नये असे ठराव दिले आहेत, अशी माहिती बचाव समितीचे पदाधिकारी माजी जिल्हा परिषद सदस्य बाबासो देवकर व मारुतराव जाधव यांनी पत्रकार परिषदेत दिली.

सभा बेकायदेशीर झाली असताना सभा योग्य झाली असे ठराव गोळा करणाऱ्या गोकुळच्या सुपरवायझरना बडतर्फ करावे, अशी मागणी समितीच्यावतीने करण्यात आली. सभा गुंडाळताना राष्ट्रगीताचा अवमान झाला असल्याचा आरोपही त्यांनी केला. समितीच्यावतीने देवकर आणि जाधव यांनी पत्रकार परिषदेत माहिती दिली. गोकुळच्या सर्वसाधारण सभेत विषय पत्रिकेचे वाचन करण्यात आले नाही. तसेच उपस्थित संस्था प्रतिनिधींची ठरावावर हरकत आहे की नाही, हेही सभाध्यक्षांनी जाणून घेतले नाही. मल्टिस्टेटच्या विषयाबाबत १०३० पेक्षा जास्त संस्थांनी हरकतीचे ठराव सभेपूर्वी दिले असतानाही त्याचा विचार अध्यक्षांनी केला नाही. तसेच या ठरावावर मतदानही घेतलेले नाही. महाराष्ट्र सहकारी संस्था अधिनियम १९६० व नियम १९६१ नुसार सभेची जबाबदारी अध्यक्ष व संचालकांनी पार पाडली नसल्याने अध्यक्ष, कार्यकारी संचालक मंडळावर १९६० चे कलम ७५(५) नुसार सहकार खात्याने कारवाई करावी.

अध्यक्षांकडून खोटे व बोगस सभावृत्तांत लिहिण्याची शक्यता आहे. त्यामुळे संघाची नोंदणी रुपांतरीत करण्याकरिता राज्य सरकारने संमती देऊ नये, तसेच पोलिस अधीक्षकांचा अहवाल, सभेचे व्हिडिओ रेकॉर्डिंग मागवून संचालक मंडळावर कारवाई करावी, अशी मागणीही बचाव कृती समितीने केली. पत्रकार परिषदेला कुंभीर सहकारी साखर कारखान्याचे उपाध्यक्ष किशोर पाटील, भैय्या माने, सदाशिव चरापले, किशोर पाटील, किरणसींह पाटील, प्रदीप पाटील भुयेकर आदी उपस्थित होते.

.............

शिरोलीतील कार्यकर्त्यांचा गोंधळ

'गोकुळ'च्या सभा या खेळीमळीत व्हायच्या. सभासदांच्या प्रश्नांना उत्तरे दिली जायची. पण माजी आमदार महादेवराव महाडिक यांनी सभेची परंपरा खंडीत करुन काळीमा फासला आहे, असा आरोप मारुतराव जाधव यांनी केला. सभेत महाडिकांची हुकूमशाही पहायला मिळाली. सभेत पुढील बाजूला बसलेले दूध उत्पादक नव्हते तर शिरोलीतील कार्यकर्ते होते, असा आरोपही त्यांनी केला.

म. टा. प्रतिनिधी, कोल्हापूर

माध्यमिक शिक्षणाधिकारी किरण लोहार यांना एकतर्फी कार्यमुक्त करण्याच्या प्रस्तावावर शुक्रवारी सायंकाळी उशिरा अध्यक्षा शौमिका महाडिक यांनी सही केली. यामुळे मुख्य कार्यकारी अधिकारी (सीईओ) डॉ. अमन मित्तल यांच्याकडून लोहारांना कार्यमुक्त करण्याची केवळ औपचारिकता उली आहे. दरम्यान, लोहार यांच्या चौकशी समितीच्या आदेशावर डॉ. मित्तल यांनी सही केली. यामुळे चौकशीच्या प्रक्रियेला सुरूवात होणार आहे.

लोहार यांच्यावर ११ सप्टेंबरला झालेल्या सभेत गंभीर आरोप करण्यात आले होते. लोहार वैयक्तिक शिक्षक मान्यतेसाठी पैसे मागतात, त्यांनी नियमबाह्य मान्यता दिल्या, माहिती देण्यास टाळाटाळ करतात, जि. प. ची बैठक, सभांना गैरहजर राहतात, असे या आरोपांचे स्वरुप होते. त्याचेळी त्यांना सक्तीच्या रजेवर पाठवून प्रशासकीय कामकाजाची चौकशी करण्याचा निर्णय झाला. मात्र नियमानुसार सक्तीच्या रजेवर पाठवता येत नसल्याचे कारण सांगत सीईओ डॉ. मित्तल यांनी त्यांना रजेवर पाठवले नाही.

दरम्यान, इतिवृत्तातून सक्तीच्या रजेचा उल्लेख काढण्याच्या हालचाली सुरू होत्या. त्यासंबंधीची माहिती मिळताच सदस्य आक्रमक झाले. उपाध्यक्ष सर्जेराव पाटील, पक्षप्रतोद विजय भोजे यांच्या नेतृत्वाखालील १९ सदस्यांच्या शिष्टमंडळांनी दुपारी सीईओ डॉ. मित्तल यांची भेट घेतली. लोहार यांना प्रशासन का पाठिशी घालत आहे? अशी विचारणा केली. त्यांना रजेवर पाठवा, अन्यथा एकतर्फी मुक्त करा, अशी मागणी लावून धरली. यावेळी सदस्य राजवर्धन निंबाळकर यांनी लोहार यांनी मोठा भ्रष्टाचार केला आहे, चुकीच्या शिक्षक मान्यता दिल्या आहेत, हायकोर्टाचे आदेश डावलले आहेत, असे आरोप केले. सदस्य आक्रमक झाल्याने डॉ. मित्तल यांनी लोहार यांना कार्यमुक्त करण्याचे आश्वासन शिष्टमंडळाला दिले. कार्यमुक्तीचा प्रस्ताव सायंकाळी अध्यक्ष महाडिक यांच्याकडे पाठविण्यात आला. त्यांनी प्रस्तावावर सही केली. प्रस्ताव पुन्हा सीईओ डॉ. मित्तल यांच्याकडे आला आहे. त्यावर अंतिम सही झाल्यानंतर कार्यमुक्तीचा आदेश निघणार आहे. शनिवारी रितसर आदेश काढण्यात येणार असल्याचे प्रशासनाच्या सूत्राकडून सांगण्यात आले.

-- --

किरण लोहार यांना कार्यमुक्त करण्याचा निर्णय झाला आहे. त्यासंबंधीच्या पुढील कार्यवाहीसाठी वरिष्ठांशी चर्चा सुरू आहे. कार्यमुक्तीचा रितसर आदेश शनिवारी काढण्यात येईल.

डॉ. अमन मित्तल, सीईओ

-- --

म. टा. प्रतिनिधी, कोल्हापूर

माध्यमिक शिक्षणाधिकारी किरण लोहार यांच्यासह शिक्षण विभागातील प्रशासकीय कामकाजाच्या चौकशीसाठी स्थापन झालेल्या समितीवर शुक्रवारी मुख्य कार्यकारी अधिकारी (सीईओ) डॉ. अमन मित्तल यांनी रितसर शिक्कामोर्तब केले. समितीला अधिकार प्राप्त झाल्याने चौकशीला गती येणार आहे.

जिल्हा परिषद माध्यमिक शिक्षण विभागाबद्दल मोठ्या प्रमाणात तक्रारी आहेत. शिक्षणाधिकारी लोहार यांच्यावर गंभीर आरोप झाले. म्हणून त्यांना सक्तीच्या रजेवर पाठवून प्रशासकीय कामकाजाची चौकशी करण्याचा निर्णय झाला. सक्तीच्या रजेचा निर्णय लांबणीवर पडल्याने शिक्षण सभापती अंबरिश घाटगे, समाजकल्याण सभापती विशांत महापुरे, सदस्य राजवर्धन निंबाळकर, अशोक माने, अरुण इंगवले, जयवंत शिंपी, प्रसाद खोबरे, पांडुरंग भांदिगिरे, मनेाज फराकटे, वंदना मगदूम, डॉ. पद्माराणी पाटील, अनिता चौगुले, मनिषा कुरणे, स्वाती सासणे, परवीन पटेल, कोमल मिसाळ, वंदना जाधव, प्रविण यादव यांच्या शिष्टमंडळाने सीईओ डॉ. मित्तल यांची भेट घेतली.

यावेळी इंगवले यांनी लोहार यांना पाठीशी का घातले जात आहे, अशी विचारणा केली. चौगुले यांनी सभेत झालेल्या निर्णयानुसार प्रशासनाने अंमलबजावणी करावी, अशी मागणी केली. निंबाळकर म्हणाले, 'लोहार यांनी मोठ्या प्रमाणात भ्रष्टाचार केला आहे. अतिरिक्त असलेल्या शिक्षण संस्थेलाच नव्याने शिक्षक भरतीला नियमबाह्य परवानगी दिली. त्यांना सक्तीच्या रजेवर पाठवा, अन्यथा एकतर्फी कार्यमुक्त करा, अशी जोरदार मागणी केली. दरम्यान, सक्तीच्या रजेवर पाठवण्याचा नियम नसल्याचे प्रशासनाकडून सांगण्यात आले. त्यावेळी शिष्टमंडळांतील अनेक सदस्यांनी यापूर्वीच्या अधिकाऱ्यांना कसे सक्तीच्या रजेवर पाठवले, असा प्रश्न विचारून प्रशासनाची कोंडी केली. शेवटी लोहार यांना कार्यमुक्त करण्याचा निर्णय झाला. त्यांना कार्यमुक्त किंवा रजेवर पाठवण्याचा निर्णय लांबल्याने आठवड्यापूर्वी चौकशी समिती नियुक्ती होऊनही प्रत्यक्षात कामकाजाला सुरुवात झालेली नव्हती. कार्यमुक्तीचा निर्णय होऊन समितीला प्रशासकीय अधिकार प्राप्त झाले. परिणामी चौकशीसाठीची पुढील कार्यवाही सुरू होणार आहे.

०००००

पाणीपुरवठा सुरळीत करण्याचे महापौर, आयुक्तांचे आदेश

म. टा. प्रतिनिधी, कोल्हापूर

गेल्या काही दिवसांपासून शहरातील अनेक प्रभागात पाणीपुरवठ्याचे तीनतेरा वाजले आहेत. पाणीपुरवठ्याची वस्तुस्थिती पाहण्यासाठी शुक्रवारी महापौर शोभा बोंद्रे, आयुक्त डॉ. अभिजीत चौधरी यांनी अधिकाऱ्यांसह दौरा केला. आपटेनगर येथील पपिंग स्टेशन पाहणीवेळी संतप्त नागरिकांनी आयुक्त डॉ. चौधरी यांना घेराव घालून पाणीपुरवठा सुरळीत करण्याची मागणी केली. यावेळी चौधरी यांनी जलअभियंता सुरेश कुलकर्णी यांना पुन्हा धारेवर धरले.

पाणीदार जिल्ह्याच्या शहरात गेल्या काही दिवसांपासून अपुरा व अनियमित पाणीपुरवठा होत आहे. नियोजनशून्य कारभारामुळे नागरिक रस्त्यावर उतरुन आंदोलन करत आहेत. शहरात विस्कळीत झालेल्या पाणीपुरवठ्याची प्रत्यक्ष पाहणी करुन वस्तुस्थिती जाणून घेण्यासाठी महापौर बोंद्रे, आयुक्त डॉ. चौधरी, जलअभियंता कुलकर्णी व अन्य अधिकारी कर्मचाऱ्यांनी शहरातील अनेक पंपिंग स्टेशनला भेट दिली. रिंगरोड येथील बालावधूत पंपिंग स्टेशन, राजोपाध्येनगर, राजेसंभाजी तरुण मंडळ, विक्रमनगर येथील नवदुर्गा गल्लीची पाहणी केली. आपटेनगर नवीन वाशीनाका येथील पंपिंग स्टेशनची पाहणीदरम्यान गटनेते शारंगधर देशमुख, नगरसेवक अभिजीत चव्हाण, नगरसेविका रीना कांबळे, मनीषा कुंभार व विशाल दिंडोर्ले यांच्यासह सुमारे १५० महिला उपस्थित होत्या.

पंपिग स्टेशनची पाहणी करताना सर्व महिलांनी आयुक्तांना घेराव घालत पाणीपुरवठ्याबाबत तक्रारींचा पाढा वाचला. यावेळी महिलांचा चांगलाच आवजा वाढला. दरम्यान आयुक्त डॉ. चौधरी यांनीही त्याच आवाजात उत्तर देण्याचा प्रयत्न केला. सुमारे अर्धा ते पाऊण तास महिला आपली कैफीयत मांडत होत्या. देशमुख यांनी 'नियमित पाणी बिले भरतात त्यांना नियमित पाणीपुरवठा होत नाही, पण ज्यांनी पाणी बिले थकवली आहेत, अशांना मात्र २४ तास पाणीपुरवठा केला जात आहे. रिंगरोड परिसरात परस्पर व्हॉल सोडून पाणी सोडले जाते, याबाबत संबंधित कर्मचाऱ्यांना माहिती देवूनही दुर्लक्ष केले जाते. रिंगरोडवर संलग्न असलेल्या ग्रामीण भागात परस्पर पाणी सोडणाऱ्यावर कारवाई करा, पदाधिकाऱ्यांसोबत बैठकीचे नियोजन करा अशा वारंवार सूचना देवूनही कार्यवाही होत नसल्याचे निदर्शनास आणून देत एक दिवसा आड पाणीपुरवठ्याला येथील भागाचा विरोध असल्याचे स्पष्ट केले.

रीना कांबळे यांनी, फुलेवाडी पंपिंग स्टेशन येथील कर्मचारी कशाप्रकारची वागणूक देतात याची पाहणी करण्याचा आग्रह करत नागरिकांच्या रोषाला आम्हाला सामोरे जावे लागत असल्याचे सांगितले. याचवेळी अनेक महिला वारंवार पाणीपुरवठ्याचा मुद्दा उपस्थित करत प्रशासनाला दोष देत होत्या.

महिलांच्या आक्रमक भूमिकेमुळे आयुक्त डॉ. चौधरीही चांगलेच आक्रमक झाले. जलअभियंता कुलकर्णी यांना त्यांनी ज्या-ज्या प्रभागात पाणीपुरवठ्याचे नियोजन कोलमडले आहे, त्याठिकाणी तातडीने उपाययोजना करण्याच्या सूचना दिल्या.

पाणीपुरव‌ठा विभागाच्या नियोजनशून्य कारभारामुळे संपूर्ण शहराचे पाण्याविना हाल होत असल्याबद्दल स्थायी समिती सभापती आशिष ढवळे यांनी नाराजी व्यक्त केली. 'ई वॉर्डातून महापालिकेला मोठ्याप्रमाणात कर मिळत असून त्याप्रमाणात सुविधा मिळत नाहीत. नागरिकांना पिण्याच्या पाण्यासाठी वारंवार खासगी टँकर मागवावे लागत असल्याचे प्रभाग समिती सभापती राजसिंह शेळके यांनी निदर्शनास आणून दिले.

यावेळी प्राथमिक शिक्षण समिती सभापती अशोक जाधव, महिला व बालकल्याण समिती सभापती सुरेखा शहा, शोभा कवाळे, अतिरिक्त आयुक्त श्रीधर पाटणकर, नगरसेवक संजय मोहिते, रत्नेश शिरोळकर, नगरसेविका वनिता देठे, स्मिता माने, सीमा कदम, उपजल अभियंता व्ही. एन. सुरवसे, शाखा अभियंता राजेंद्र हुजरे यांच्यासह कर्मचारी उपस्थित होते.

........................

कोट

'पाणीपुरवठ्याबाबत मंगळवारी विशेष सभा बोलवली आहे. सभेपूर्वी सर्व प्रभागात पाणीपुरवठा सुरळीत करण्यासाठी कोणते नियोजन केले आहे, याचा अहवाल सादर करण्याच्या सूचना दिल्या आहेत. तसेच परस्पर व्हॉल्व सोडणाऱ्यांवर कारवाई करण्याच्या सूचना दिल्या आहेत.

शोभा बोंद्रे,महापौर

आमदार चंद्रदीप नरकेंची मागणी

म. टा. प्रतिनिधी, कोल्हापूर

सहकार न्यायालयाने आदेश देऊनही जिल्हा दूध उत्पादक संघाच्या (गोकुळ) सभेत चर्चा न करता सभेचे कामकाज हुकुमशाही पद्धतीने केले आहे. या सभेची सहकार खात्याने चौकशी करावी, अशी मागणी मुख्यमंत्री देवेंद्र फडणवीस, सहकारमंत्री सुभाष देशमुख, दुग्धविकास मंत्री महादेव जानकर यांच्याकडे करणार असल्याचे आमदार चंद्रदीप नरके यांनी पत्रकार परिषदेत सांगितले. सभेची चौकशी होईपर्यंत इतिवृत्त लिहिण्यास मनाई करावी, अशीही मागणी करणार असल्याचे त्यांनी सांगितले.

आमदार नरके म्हणाले, 'सभेत येण्यासाठी माझ्या नावे ठराव नव्हता ,असे वक्तव्य माजी आमदार पी.एन. पाटील यांनी केले होते. माझ्याकडे बोरगाव पैकी चव्हाणवाडी (ता. पन्हाळा) येथील संस्थेचा ठराव होता. सभेत बारकोडनुसार प्रवेश देण्याची घोषणा गोकुळ प्रशासनाने केली होती. पण बारकोडनुसार प्रवेश दिल्यास सभासदांना सोडण्यास संध्याकाळ होईल, असे वक्तव्य नेत्यांनी सभेच्या दोन दिवसांपूर्वी केले होते. सभेच्या ठिकाणी जवळपास दोन हजार बोगस सभासद बसवले होते. या बोगस सभासदांचा पोलिसांनी छडा लावावा. आमच्याकडे ठराव असतानाही आम्हाला बसण्यासाठी व्यवस्था केली नव्हती. अध्यक्षांनी चर्चा न करता अवघ्या तीन मिनिटात सभा गुंडाळली होती. सभेत बोगस ठरावधारक व कार्यकर्ते आणून हुकमशाही पद्धतीने सभा हाताळल्याचा आरोपही त्यांनी केला.

.................

हिरो कोण ते जनताच ठरवेल

आमदार नरके म्हणाले,' पी.एन पाटील यांना विधानसभेचे आर्थिक गणित दूध संघाच्या माध्यमातून राबवावे लागते. त्यामुळे त्यांना संघ मल्टिस्टेट करायचा आहे. अरुण नरके हे गेली ४५ वर्षे संघात संचालक असल्याने आम्ही कायम सत्तारुढ गटाला पाठिंबा देत आहे. पण गोकुळ दूध संघ आणि उत्पादकांचे अस्तित्व कायम रहावे यासाठी सभेला हजर होतो. आम्हाला हिरो व्हायचे नव्हते. हिरो कोण होणार, झिरो कोण होणार हे नेते नव्हे जनता ठरवणार आहे.'

(फोटो आहे)

विस्तारीकरणातील अडथळे हटवण्यावर बैठकीत सहमती

म. टा. प्रतिनिधी, कोल्हापूर

'विमानतळ विस्तारीकरणासाठी अतिरिक्त ६९ एकर जागेच्या मागणीचा प्रस्ताव जिल्हा प्रशासनाने मंत्रालयासह विमानतळ विकास विभागाकडे पाठवला आहे. तसेच यापूर्वी हस्तांतरित केलेल्या वन विभागाच्या जमिनीचे १ कोटी ९० लाख रुपये जिल्हा प्रशासनाकडे जमा झाले आहेत,' अशी माहिती निवासी उपजिल्हाधिकारी संजय शिंदे यांनी दिली. जिल्हाधिकारी कार्यालयात शुक्रवारी (ता. ५) विमानतळ विस्तारीकरण कामांच्या आढावा बैठकीत ते बोलत होते.

कोल्हापूर विमानतळाच्या विस्तारीकरणाचे काम सध्या गतीने सुरू आहे. कामांचा आढावा घेण्यासाठी शुक्रवारी जिल्हाधिकारी कार्यालयात निवासी उपजिल्हाधिकारी संजय शिंदे यांच्या अध्यक्षतेखाली व आमदार अमल महाडिक यांच्या उपस्थितीत बैठक पार पडली. या बैठकीस विविध विभागांचे अधिकारी उपस्थित होते. यावेळी बोलताना उपजिल्हाधिकारी शिंदे म्हणाले, 'मोठ्या विमानांचे उड्डाण शक्य व्हावे, तसेच नाईट लँडिंग करता यावे, यासाठी धावपट्टी वाढवण्याची गरज विमानतळ प्राधिकरणने व्यक्त केली होती. यासाठी अतिरिक्त ६९ एकर जागेची गरज असल्याचे विमानतळ प्राधिकरणने जिल्हा प्रशासनाला कळवले होते. यानुसार जिल्हा प्रशासनाने लोकप्रतिनिधींसह गडमुडशिंगी येथील जागेची पाहणी करून भूसंपादनाचा प्रस्ताव तयार केला होता. हा प्रस्ताव मंत्रालयासह विमानतळ विकास विभागाकडे पाठवला आहे. प्रस्तावाला मंजुरी येताच भूसंपादन केले जाईल.'

झालेल्या कामांची माहिती देताना शिंदे म्हणाले, 'विमानतळ विस्तारासाठी वन विभागाची जमीन हस्तांतरित केली होती. याचे १ कोटी ९० लाख रुपये जिल्हा प्रशासनाकडे जमा झाले आहेत. विमान उड्डाण क्षेत्रात अडथळा ठरणारे महावितरणचे विद्युत तारांचे पोल हटवून त्या ठिकाणी जमिनीखालून विद्युत तारा टाकण्याचे महावितरणने कबूल केले असून, त्याच्या खर्चाचा अंदाजही तयार झाला आहे. गडमुडशिंगी येथील लक्ष्मी मंदिर, रस्ते आणि इतर सुविधांबाबत सर्व संबंधित विभागांनी आठ दिवसात कामातील प्रगतीचा अहवाल सादर करावा.'

आमदार अमल महाडिक म्हणाले,' 'जिल्हा नियोजन समितीच्या निधीतून विमानतळावर नियमित रुग्णवाहिका उपलब्ध करून दिला जाणार आहे. याशिवाय परिसरातील रस्त्यांचा विकास करण्यासाठी संबंधित गावांमधील लोकप्रतिनिधी, ग्रामस्थ प्रशासकीय अधिकाऱ्यांशी चर्चा करून वेळेत कामांची पूर्तता केली जाईल. ६९ एकर जागेच्या संपादनाला परवानगी मिळावी, यासाठी पालकमंत्री चंद्रकांत पाटील आणि खासदार धनंजय महाडिक यांच्यासोबत पाठपुरावा करू.' बैठकीसाठी विमानतळ सल्लागार समितीचे सदस्य समीर सेठ, प्रांताधिकारी सचिन इथापे, विमानतळ अधिकारी पूजा मूल, राजेश अय्यर, सार्वजनिक बंधकाम विभागातील उपअभियंता धनंजय भोसले, जिल्हा परिषदेतील अधिकारी, गडमुडशिंगी येथील तानाजी पाटील, आदी उपस्थित होते.

..............

चौकट

लक्ष्मी मंदिर स्थलांतरीत करणार

विमानतळ विस्तारीकरणात गडमुडशिंगी हद्दीतील लक्ष्मी मंदिर येते. हे मंदिर अडथळा ठरत असल्याने इतरत्र स्थलांतरीत करण्याचे आवाहन विमानतळ प्राधिकरणने केले होते. गडमुडशिंगी येथील ग्रामस्थांनी याला मान्यता दिली असून, येणाऱ्या आठवड्यात मंदिर अन्य ठिकाणी स्थलांतरीत केले जाणार आहे. विमानतळ परिसरातील ग्रामस्थांच्या सकारात्मक भूमिकेमुळे विस्तारीकरणाचे काम गतीने होत असल्याचे मत आमदार अमल महाडिक यांनी बैठकीत व्यक्त केले.

आयुक्त डॉ. चौधरी यांच्या जलअभियंत्यांना सूचना

म. टा. प्रतिनिधी, कोल्हापूर

शहरात विस्कळीत झालेल्या पाणीपुरवठ्याची माहिती घेण्यासाठी गेलेल्या महापालिका पदाधिकाऱ्यांना नागरिकांच्या रोषाला सामोरे जावे लागले. पाणीपुरवठा विभागाच्या गलथान कारभारामुळे निर्माण झालेल्या परिस्थितीमुळे पाहणीदरम्यान आयुक्त डॉ. अभिजीत चौधरी यांनी जलअभियंता सुरेश कुलकर्णी यांना धारेवर धरले. नियमित पाणीपुरव‌ठा करण्याबरोबर परस्पर व्हॉल सोडून पाणी घेणाऱ्यांवर फौजदारी गुन्हा दाखल करण्याची सूचना आयुक्तांनी जलअभियंत्यांना केली.

गेल्या काही दिवसांपासून शहरातील पाणीपुरवठा विस्कळीत झाला आहे. सण समारंभाच्या कालावधीत अपुरा पाणीपुरवठा होत असल्याने लोकप्रतिनिधींना नागरिकांच्या रोषाला सामोरे जावे लागत आहेत. याबाबतचे पडसाद स्थायी समितीच्या बैठकीत उमटले होते. समितीमध्ये जलअभियंता सुरेश कुलकर्णी यांना धारेवर धरले होते. बैठकीदरम्यान कुलकर्णी यांनी एक दिवसाआड पाणीपुरवठा करण्याचा प्रस्ताव तयार केला असल्याचे स्पष्ट केले. मात्र या प्रस्तावाला विरोध करण्यात आला.

वारंवार होणाऱ्या अपुऱ्या पाणीपुरवठ्याची वस्तुस्थिती जाणून घेण्यासाठी पदाधिकाऱ्यांनी पाहणी केली. पाहणीदरम्यान विशेषत: महिला आक्रमक बनल्या. तसेच अनेक लोकप्रतिनिधींनी पाणीपुरवठा विभागाच्या कार्यपद्धतीवर ताशेरे ओढले. तसेच लोकप्रतिनिधींनी परस्पर व्हॉल सोडून पाणी घेत असल्याचे निदर्शनास आणून दिले.

नवरात्रकाळात मंदिर सुरक्षेसाठी पोलिस यंत्रणा सज्ज

म. टा. प्रतिनिधी, कोल्हापूर

शारदीय नवरात्र उत्सवात करवीर निवासिनी श्री अंबाबाई मंदिराच्या सुरक्षेच्या कारणास्तव दररोज बॉम्बपथकातर्फे मंदिराची पाहणी करण्याच्या सूचना पोलिस अधीक्षक डॉ. अभिनव देशमुख यांनी शुक्रवारी पोलिस यंत्रणेला दिल्या. तसेच श्वानपथकही तैनात ठेवण्यात येणार आहे. नवरात्र उत्सवाच्या पार्श्वभूमीवर शुक्रवारी डॉ. देशमुख यांनी अंबाबाई मंदिराच्या सुरक्षेबाबत पाहणी केली. यावेळी मंदिरातील पोलिस कुमक व सुरक्षारक्षकांना सूचना दिल्या.

दहा ऑक्टोबरपासून नवरात्र उत्सवाला प्रारंभ होत आहे. देवस्थान समितीच्यावतीने मंदिरातील धार्मिक विधीसंदर्भातील तयारी अंतिम टप्प्यात आली आहे. नवरात्रकाळात रोज किमान दीड ते दोन लाख भाविक दर्शनासाठी येतात. यापैकी पंचमी, अष्टमी व दसरा यादिवशी दर्शनासाठी येणाऱ्या भाविकांची संख्या वाढते. नवरात्रकाळात सकाळी सहा वाजल्यापासून रात्री अकरा वाजेपर्यंत प्रचंड गर्दी असते. यावेळी काही अनुचित प्रकार घडू नये तसेच गर्दीवर नियंत्रण रहावे यासाठी सुरक्षेच्यादृष्टीने पोलिस यंत्रणेने पाहणी केली. यावेळी मंदिरात नवरात्रकाळातील सुरक्षायंत्रणेचा आढावा डॉ. देशमुख यांनी घेतला.

सकाळी साडेअकराच्या सुमारास डॉ. देशमुख, शहर पोलिस उपअधीक्षक डॉ. प्रशांत अमृतकर, स्थानिक गुन्हे अन्वेषण शाखेचे पोलिस निरीक्षक तानाजी सावंत, जिल्हा विशेष शाखेचे पोलिस निरीक्षक शशिराज पाटोळे मंदिरात पाहणीसाठी आले. यावेळी गरूडमंडप येथे ठेवण्यात आलेल्या सुवर्णपालखीचीही त्यांनी पाहणी केली. मंदिराच्या महाद्वार, घाटी दरवाजा, विद्यापीठ हायस्कूलमार्गाकडील व सरलष्कर भवनसमोरील प्रवेशद्वारात असलेल्या मेटल डिटेक्टर दरवाजांची पाहणी करून संशयास्पद भाविकांकडे लक्ष ठेवण्याच्या सूचना करण्यात आल्या. मंदिराच्या आवारात ५५ सीसीटिव्ही कॅमेरे बसवण्यात आले आहेत. कॅमेऱ्यातील फुटेज पाहण्यात येणाऱ्या कंट्रोलरूममधील प्रक्षेपणकक्षाला भेट देऊन प्रक्षेपणाचा दर्जा तपासण्यात आला.

................................................

चोरट्यांवर नजर

मंदिरातील गर्दीत महिला भाविकांचे दागिने, पर्स, पुरूषांचे पाकिट चोरणाऱ्यांवर नजर ठेवण्यासाठी पोलिसांचे पथक सज्ज ठेवण्यात येणार आहे. सीसीटीव्ही फुटेज दिवसातून एक तासाच्या अंतराने तपासण्याच्या सूचना विशेष पथकाला देण्यात आल्या आहेत. मंदिराच्या चारही दरवाजातून संशयास्पद मंदिराच्या आवारात येणाऱ्यांवरही नजर ठेवण्यात येणार आहे.

.................................................

पोलिसांना सूचना

नवरात्रकाळात सुरक्षायंत्रणा सतर्क ठेवण्याबाबत डॉ. देशमुख यांनी पोलिस अधिकाऱ्यांची बैठक घेतली. जुना राजवाडा पोलिसठाण्यात झालेल्या या बैठकीमध्ये मंदिराच्या परिसरातील अतिक्रमणमुक्ती, पार्किंगचा विळखा तसेच वाहतुकीचे नियोजन करण्याबाबत सूचना देण्यात आल्या. पर्यटक भाविकांच्या वाहनांचे पार्किंग करण्यासाठी दहा ठिकाणे निश्चित करण्यात आली आहे. मंदिराकडे येणाऱ्या वाहनांसाठी शिवाजी पुतळा, बिंदू चौक, मिरजकर तिकटी, दसरा चौक येथे तात्पुरत्या काळासाठी एकेरी वाहतुकीचे नियोजन करावे असाही मुद्दा या बैठकीत मांडण्यात आला. मंदिरात गर्दी वाढल्यास चेंगराचेंगरी होऊ नये यासाठी बॅरिकेड्स लावण्याची तयारी केली आहे.

......................................

सीसीटीव्ही कॅमेरे ५५

पुरूष सुरक्षारक्षक ३६

महिला सुरक्षारक्षक १३

होमगार्डस रक्षक १०

..........................

आपत्ती व्यवस्थापन कक्ष

अग्निशामक दल, फायर फायटर, दुचाकी फायर फायटर यंत्रणा सज्ज ठेवण्यात येणार आहे. भवानी मंडप परिसरातील शेतकरी बझार येथे आपत्ती व्यवस्थापन कक्ष उभारण्यात आला आहे. तसेच कारंजा चौकात वैद्यकीय कक्ष सज्ज ठेवण्यात येणार असून मंदिराच्या बाह्यपरिसरात वैद्यकीय यंत्रणा तैनात ठेवण्यात येणार आहे. यामध्ये जुना राजवाडा पोलिस ठाणे आवारात अॅपल हॉस्पिटलतर्फे वैद्यकीय पथक असेल. तर इंदुमती हायस्कूलसमोर जिल्हा परिषदेतर्फे वैद्यकीय यंत्रणा देण्यात आली आहे. मंदिरातील उद्यानात व्हाइट आर्मीतर्फे वैद्यकीय सुविधा भाविकांना देण्यात येणार आहे. नवरत्न मंदिराजवळ आधार हॉस्पिटलमधील वैद्यकीय पथक तैनात ठेवण्यात येणार आहे. स्वाइनफ्लूचा धोका ओळखून दर्शनरांगेत मिस्ट फॅन बसवण्यात येणार असून स्वाइनफ्लू प्रतिबंधक औषधांचे मोफत वाटप देवस्थानतर्फे करण्यात येणार आहे.

...............................................................

अंबाबाईच्या पूजा

साहित्याची स्वच्छता

नवरात्रकाळात पूजाविधीसाठी वापरण्यात येणाऱ्या चांदीच्या पूजासाहित्याची स्वच्छता शुक्रवारी देवस्थान व्यवस्थापनाच्यावतीने करण्यात आली. यामध्ये तबक, ताम्हण, समई, कापूरथाळ, घंटा, प्रभावळ यासह पूजेसाठी लागणारे साहित्याचा समावेश होता. सुवर्णपालखीची स्वच्छता, पालखीतील वस्त्रांची स्वच्छता यावेळी करण्यात आली.

........................................................................................

प्लास्टिकमुक्त नवरात्रौत्सव

गेल्यावर्षी अंबाबाई मंदिर देवस्थान समितीच्यावतीने प्लास्टिकमुक्त नवरात्र उत्सव साजरा करण्यात आला होता. यंदाही मंदिरात ही परंपरा कायम राखण्याचे आवाहन शुक्रवारी देवस्थान समितीचे अध्यक्ष महेश जाधव यांनी मंदिर आवारातील दुकानदारांना केले. यासाठी मंदिरात बैठकीचे आयोजन करण्यात आले होते. यावेळी सदस्य संगीता खाडे, शिवाजीराव जाधव, सुदेश देशपांडे, शिवाजीराव साळवी आदी उपस्थित होते.