म. टा. प्रतिनिधी, कोल्हापूर/नाशिक उजळाईवाडी येथील दिवेकर कुटुंबीयांनी ब्रेन डेड घोषित केलेल्या संतराम दिवेकर (वय ५७) यांचे अवयवदान करण्याच्या घेतलेल्या निर्णयामुळे नाशिकमधील ५१ वर्षीय रुग्णाला जीवनदान मिळाले. नाशिक येथील रुग्णालयात यकृत प्रत्यारोपणाची शस्त्रक्रिया पार पडली. बुधवारी दुपारी येथील अॅपल सरस्वती हॉस्पिटलमधून यकृत एअर अॅम्बुलन्सच्या मदतीने दोन तास ४५ मिनिटांत नाशिकला नेण्यात आले. संतराम दिवेकर यांना १९ सप्टेंबरला उजळाईवाडी येथे अपघात झाला होता. त्यांना एका खासगी रुग्णालयात दाखल करण्यात आले. मात्र, उपचार सुरू असताना त्यांचा मेंदू मृत झाल्याचे निदान झाले. उपचार सुरू असताना बुधवारी (२६ सप्टेंबर) त्यांचा मृत्यू झाला. त्यानंतर त्यांचे अवयवदान करण्याची इच्छा त्यांच्या कुटुंबीयांनी व्यक्त केली. दिवेकर कुटुंबीयांनी धाडसाने अवयवदान करण्याचा निर्णय घेतला. त्यानुसार ब्रेन डेथ कमिटीच्या तपासणीनंतर प्रत्यारोपण समन्वयक समितीने अवयवदान शस्त्रक्रिया करण्याचा निर्णय कुटुंबीयांच्या सहमतीने घेतला. झोनल ट्रान्सप्लांट कॉर्डिनेशन कमिटीच्या वतीने तत्काळ ग्रीन कॉरिडॉरची व्यवस्था करण्यात आली. कोल्हापूर ते ओझर विमानतळ एअर अॅम्ब्युलन्सची व्यवस्था करण्यात आली. ओझर ते नाशिक पोलिसांच्या मदतीने ग्रीन कॉरिडर करण्यात आले. नाशिकमधील ५१ वर्षीय रुग्णावर यकृत प्रत्यारोपणाची शस्त्रक्रिया करण्यासाठी एअर अॅम्ब्युलन्सच्या मदतीने कोल्हापूरमधून दोन तास ४५ मिनिटांत यकृत आणण्यात आले. बुधवारी सायंकाळी ७ वाजून १० मिनिटांनी कोल्हापूरहून एअर अॅम्ब्युलन्स आणि पोलिसांच्या मदतीने नाशिकमधील खासगी रुग्णालयात यकृत पोहोचविण्यात आले. त्यानंतर रुग्णावर शस्त्रक्रिया करण्यात आली. 'ग्रीन कॉरिडॉर'साठी नाशिकमध्ये प्रथमच एअर अॅम्ब्युलन्सचा वापर करण्यात आला. कोल्हापूरच्या एका रुग्णाने यकृतदान केल्यामुळे नाशिकच्या रुग्णाचे प्राण वाचविण्यात यश आले. प्रत्यारोपण सर्जन डॉ. विपीन विभूते यांनी ही शस्त्रक्रिया केली. एअर अॅम्ब्युलन्ससाठी एअर पोर्ट मॅनेजर एन. गुरव यांनी ग्रीन कॉरिडॉरासाठी विशेष परिश्रम घेतले. अवयनदानाचे महत्त्व यामुळे पुन्हा एकदा अधोरेखित झाल्याचे मत डॉ. विभूते यांनी व्यक्त केले. या मोहिमेत कोल्हापुरातील डॉक्टर सर्वश्री अशोक भूपाळी, प्रकाश शारबिद्रे, राजेश पाटील, राहुल दिवाण, अमृत नेर्लीकर, रणजित मोहिते, गिरीश हिरेगौडर, श्रेया हनमशेट्टी, सागर कुरुणकर, प्रतिभा भूपाळी, चार्मी खोत, शीतल देसाई तसेच नाशिक येथील प्रत्यारोपण सर्जन विपीन विभूते यांनी सहभाग घेतला. ग्रीन कॉरिडॉरसाठी पोलिस निरीक्षक विक्रांत चव्हाण, एस. आर. चाचे, एन. एम. टिपुगडे, सूरज पाटील यांनी विशेष परिश्रम घेतले. ०००० अवयवदानाचा निर्णय आमच्यासाठी कठीण होता. तरीही त्यामुळे दुसऱ्याला जीवनदान मिळणार होते. अवयवदानासाठी सर्वांनी पुढाकार घ्यायला हवा. अवयवाच्या माध्यमातून आमचे वडील जिवंत राहणार आहेत. तुषार दिवेकर, संतराम दिवेकर यांचा मुलगा फोटो-अर्जुन
मोबाइल अॅप डाउनलोड करा आणि राहा अपडेट