Uddhav.Godase@timesgroup.com
Tweet @Uddhavg_MT
कोल्हापूर : कोल्हापुरात रेल्वेचा प्रवास आणि सुविधा यांचे नाते तसे दूरचेच होते. मात्र, गेल्या दोन वर्षात राजर्षी छत्रपती शाहू महाराज टर्मिनसचा कायापालट होत आहे. प्रवाशांच्या सोयीसाठी रॅम्प, उड्डानपूल, सरकता जिना यासह विश्रामगृहाचीही निर्मिती होत आहे. शाहूपुरी मंडईच्या बाजुला नवीन तिकीटगृह बांधले जाणार आहे, त्यामुळे राजारामपुरी, शाहूपुरीकडून येणाऱ्या प्रवाशांना तिकीट घेऊनच रेल्वे स्थानकात पोहोचता येईल. शिवाय कोल्हापूर - पुणे मार्गावरील विद्युतीकरणाच्या कामालाही गती आल्याने रेल्वेच्या सुविधा 'फास्ट ट्रॅक'वर येत आहेत.
दक्षिण महाराष्ट्रातील शेवटचे रेल्वे स्थानक असलेल्या राजर्षी शाहू महाराज टर्मिनसचा कोल्हापूरसह आसपासच्या परिसराचा विकास साधण्यात मोठा वाटा आहे. या स्टेशनवरून प्रवाशांसह मालवाहतूकही मोठ्या प्रमाणात होते. कोल्हापूर-वैभववाडी या मार्गामुळे आता कोकणही जोडले जाणार आहे. पुणे ते कोल्हापूर या मार्गाचे दुहेरीकरण आणि विद्युतीकरणाच्या कामालाही मंजुरी मिळाली आहे. विद्युतीकरणाच्या कामाला गती मिळाली असून, पोल उभे करण्यासाठी फाउंडेशन तयार केले जात आहे. डिसेंबर अखेर पोल उभारणीचे काम पूर्ण होईल. कोल्हापूर रेल्वे स्थानकातून जाणाऱ्या आणि रेल्वे स्थानकात येणाऱ्या रेल्वेंची संख्या वाढल्याने प्लॅटफॉर्मचीही संख्या वाढली. खासदार धनंजय महाडिक यांच्याकडून सुरू असलेला पाठपुरावादेखील रेल्वे स्थानकाच्या विकासाला उपयुक्त ठरत आहे. प्रवाशांना मिळणाऱ्या सुविधा रेल्वेसह कोल्हापूरच्याही हिताच्या ठरणार आहेत.
रॅम्पमुळे सर्व प्लॅटफॉर्म जोडले
रेल्वे गाड्यांची आवक-जावक वाढल्याने प्लॅटफॉर्मची संख्या वाढली. मात्र, प्लॅटफॉर्मवर जाण्यासाठी प्रवाशांना पुरेशा सुविधा उपलब्ध नव्हत्या. पायऱ्यांचा उड्डानपूल असल्याने दिव्यांग व्यक्तींना तीन, चार नंबरच्या प्लॅटफॉर्मवर जाता येत नव्हते, त्यामुळे सर्व प्लॅटफॉर्मना जोडणारा रॅम्प तयार करण्यात आला आहे. हा रॅम्प दिव्यांगांसह सर्वच प्रवाशांना सोयीचा ठरणार आहे. प्रवाशांना उन आणि पावसाचा त्रास होऊ नये, यासाठी रॅम्पवर पत्रे घातले आहेत. शाहूपुरी मंडईच्या दिशेने येणाऱ्या प्रवाशांना रॅम्पमुळे थेट एक नंबर प्लॅटफॉर्मवर जाता येते, तर एक नंबर प्लॅटफॉर्मवरील प्रवाशांना शाहूपुरी, राजारामपुरी परिसरात जाणेही सोयीचे बनले आहे. रॅम्पमुळे सर्व प्लॅटफॉर्मचा वापर वाढणार आहे.
शाहूपुरी मंडईजवळ नवीन तिकीटगृह
रेल्वे स्थानकात सध्या एकच तिकीटगृह आहे. सर्वच प्रवाशांना स्टेशन रोडवरून रेल्वे स्थानकाच्या मुख्य इमारतीत जाऊन तिकीट घ्यावे लागते. रेल्वे फाटककडून येणारे प्रवासी प्लॅटफॉर्म क्रमांक एकवरूनच तिकीट काढण्यासाठी जातात. या प्रवाशांकडे तिकीट नसल्याने रेल्वेचे तिकीट तपासणीस अशा प्रवाशांना पकडून त्यांच्यावर दंडात्मक कारवाई करतात. प्रवाशांच्या सोयीसाठी शाहूपुरी मंडईच्या बाजुला नवीन तिकीटगृह तयार होणार आहे. शाहूपुरी, राजारामपुरीच्या दिशेने येणाऱ्या प्रवाशांना परिखपूल किंवा व्हिनस कॉर्नरकडून स्टेशनला जावे लागत होते. या प्रवाशांना नवीन तिकीटगृहात तिकीट घेऊन रॅम्पवरून थेट स्टेशनमध्ये पोहोचणे शक्य झाले आहे. या सोयीमुळे प्रवाशांच्या वेळेचीही बचत होईल.
सरकत्या जिन्याचे काम अंतिम टप्प्यात
रेल्वे स्थानकातून शाहूपुरी मंडईच्या दिशेने जाणाऱ्या प्रवाशांना सरकत्या जिन्यावरून उतरण्याची सोय होणार आहे. रॅम्पवरून आल्यानंतर प्रवासी थेट सरकत्या जिन्यावरून पुढे मंडईच्या दिशेने बाहेर पडतील. रेल्वे स्थानकात हा पहिलाच सरकता जिना बसवला जात आहे. फाउंडेशनचे काम अंतिम टप्प्यात आले असून, सरकते जिने रेल्वे प्रशासनाच्या ताब्यात मिळाले आहे. विद्युत मोटर बसवण्यासाठी जागा तयार करण्याचे काम सध्या सुरू आहे. पंधरा ते वीस दिवसात हे काम पूर्ण होईल, असा विश्वास ठेकेदारांनी व्यक्त केला. सरकत्या जिन्यामुळे प्रवाशांना आधुनिक सुविधा उपलब्ध होणार आहे, त्याचबरोबर प्रवाशांना रेल्वे स्थानकातून गतीने बाहेर पडता येईल.
प्रवाशांसाठी विश्रामगृह
रेल्वे स्थानकात आलेल्या प्रवाशांना काही काळ थांबायचे असल्यास त्यांच्यासाठी विश्रामगृहाची निर्मिती केली जात आहे. लवकरच विश्रामगृहाचे काम पूर्ण होणार आहे. या ठिकाणी प्रवाशांना थांबता येईल. स्वच्छतागृह आणि अंघोळीची व्यवस्था असल्याने पर्यटकांसह भाविकांची सोय होणार आहे. सध्या तिरुपती, शिर्डी येथून रेल्वेने येणारे भाविक शहरात हॉटेल्स, लॉजचा शोध घेतात. काही काळासाठी त्यांना हजार रुपये मोजावे लागतात. अशा प्रवाशांना माफक पैसे खर्चुन विश्रामगृहात थांबता येणार आहे. सध्या विश्रामगृहाच्या रंगरंगोटीचे काम सुरू आहे. येणाऱ्या पंधरा दिवसात काम पूर्ण होईल. यानंतर हे विश्रामगृह वापरासाठी खुले होणार आहे. याशिवाय तीन नंबर प्लॅटफॉर्मची लांबी वाढवण्याचेही काम सुरू आहे. १०० मीटर लांबी वाढल्याने १८ डब्यांची गाडी या प्लॅटफॉर्मवर लावणे शक्य होणार आहे.
ओव्हरब्रीजसह पार्किंग सुविधा आवश्यक
परिख पुलाजवळ रेल्वे फाटक येथे रेल्वे रूळ ओलांडण्यासाठी ओव्हरब्रीजची गरज आहे. याला मान्यता मिळाली असून ओव्हरब्रीजही तयार आहे. ओव्हरब्रीज बसवण्याचे काम महापालिकेकडे आहे. यासाठी मोठ्या क्षमतेच्या दोन क्रेनची गरज आहे. या क्रेन कोल्हापुरात उपलब्ध नसल्याने ओव्हरब्रीजचे काम रखडले आहे. रेल्वे रूळ ओलांडणाऱ्या प्रवाशांसाठी तातडीने ओव्हरब्रीज तयार होणे गरजेचे आहे. याशिवाय रेल्वे स्टेशनसमोर पार्किंगला अद्याप शिस्त नाही. रेल्वे येताच बेशिस्त रिक्षाचालकांमुळे कोंडी निर्माण होते. याशिवाय शाहूपुरी मंडईच्या बाजुला नव्याने तिकीटगृह होणार असल्याने त्याही बाजुला प्रवाशांची वर्दळ वाढणार आहे. या परिसरात पार्किंगची सुविधा तयार करणे गरजेचे आहे.
सुरू कामांसाठी आर्थिक तरतूद
९४ लाख
प्लॅटफॉर्म वाढवणे
१ कोटी २७ लाख
फ्लॅटफॉर्म शेड व सुविधा
२ कोटी ५० लाख
रॅम्प व सरकता जिना
९० लाख
अद्ययावत विश्रामगृह
रेल्वे गाड्यांची दैनंदिन आवक-जावक
येणाऱ्या गाड्या - ११
जाणाऱ्या गाड्या - १०