तरुणाची आत्महत्या

कोल्हापूर

उचगाव येथील तरुणाने राहत्या घरात छताच्या अँगलला दोरीने गळफास घेऊन आत्महत्या केली. पांडुरंग यशवंत साळोखे (वय ३२) असे मृत तरुणाचे नाव आहे. मंगळवारी सकाळी हा प्रकार घडला .पांडुरंग याला परिसरातील नागरिकांनी तातडीने खासगी वाहनातून सीपीआरमध्ये दाखल केले. मात्र, उपचारापूर्वीच त्याचा मृत्यू झाल्याचे डॉक्टरांनी स्पष्ट केले. पांडुरंग सेंट्रिंग कामगार होता. आठ महिन्यांपासून त्याची पत्नी दोन मुलांसह माहेरी राहत होती. कौटुंबिक वादातून आत्महत्या केल्याची शक्यता पोलिसांनी व्यक्त केली.

म. टा. प्रतिनिधी, कोल्हापूर

येथील डॉ. संतोष प्रभू यांच्या विन्स या संस्थेतील डॉ. पुष्पराज मूल्या यांनी डीएनबी न्यूरो सर्जरी अभ्यासक्रम यशस्वीरीत्या पूर्ण करत राष्ट्रपती सुवर्णपदकाला गवसणी घातली. डॉ. मूल्या २०१६ मध्ये अभ्यासक्रम उत्तीर्ण झाले आहेत. त्यांना प्रोफेसर डॉक्टर संतोष प्रभू यांचे मोलाचे मार्गदर्शन लाभले.

डॉ. मूल्या यांना २४ सप्टेंबर रोजी दिल्ली येथे 'नॅशनल बोर्ड ऑफ द एक्झामिनेशन' या संस्थेच्या १९ व्या दीक्षांत समारंभात सुवर्णपदकाने गौरवण्यात येणार आहे. विन्सचे प्रमुख डॉ. संतोष प्रभू व डॉ. सुजाता प्रभू यांनी गेल्या तीन दशकांहून अधिक काळ 'न्युरोसर्जरी' विषयात उल्लेखनीय काम केले आहे. त्यांनी स्थापन केलेल्या वेस्टर्न इंडिया इन्स्टिट्यूट ऑफ न्यूरो सायन्सेस(विन्स) संस्थेच्या वतीने न्यूरोसर्जन घडवण्यासाठी प्रयत्न केले जातात. त्यांच्या या कामगिरीची दखल घेत २००८ मध्ये नवी दिल्ली नॅशनल बोर्ड ऑफ एक्झामिनेशन या संस्थेने 'डीएनबी न्यूरो सर्जरी' या सर्वोच्च पदव्युत्तर डिग्रीची मान्यता दिली आहे. संपूर्ण देशात डीएनबी न्यूरोसर्जरी मान्यता असलेल्या संस्था केवळ २५ आहेत. त्यामध्ये डॉ. प्रभू यांच्या संस्थेचा समावेश आहे. आजवर संस्थेच्या सहा विद्यार्थ्यांनी यशस्वीरीत्या पदवी घेतली आहे.

फोटो आहे.

म. टा. प्रतिनिधी, कोल्हापूर

श्रमिकांच्या जगण्याचे मूलभूत प्रश्न धर्मांधतेच्या वातावरणामुळे मागे पडत आहेत. सर्वच स्तरांतील विषमता वेगाने वाढत आहे. या परिस्थितीत कामगार संघटनांनी संघटित आणि असंघटित अशा सर्वच कामगारांच्या हक्कांसाठी लढणे आवश्यक आहे. तसेच राजकीय भूमिका घेण्याबरोबरच राजकीय लढ्याची गरज आहे,' असे प्रतिपादन मेघा पानसरे यांनी केले. ऑल इंडिया ट्रेड युनियन कॉंग्रेस (आयटक) या संघटनेशी संलग्न कोल्हापूर जिल्हा कामगारांचा मेळावा बुधवारी राजर्षी शाहू स्मारक भवनात झाला. या मेळाव्याच्या अध्यक्षस्थानावरुन त्या बोलत होत्या.

एका बाजूला देशाची अर्थव्यवस्था वेगाने सुधारत असल्याचे सरकार सांगत आहे. मात्र प्रत्यक्षात चित्र वेगळे असल्याचे सांगून पानसरे म्हणाल्या, 'लोकशाही आणि धर्मनिरपेक्षतेच्या तत्त्वावर रोज हल्ले होत आहेत. विकासाचा नारा देऊन भारतीय जनता पक्षाचे सरकार केंद्र व राज्यात सत्तेत आले. परंतु कामगारांच्या बाबतीत ते प्रतिकूल धोरणे राबवत आहे. दीर्घकाळ संघर्ष करून कामगार संघटनांनी जे कायदेशीर हक्क मिळवले ते बदलून भांडवलदारांना फायद्याचे कायदे आणले जात आहेत. प्रचंड महागाई व बेरोजगारीचा विळखा सामान्य जनतेला बसत आहे. हे चित्र बदलवायचे असेल तर संघर्षाशिवाय पर्याय नाही. '

मेळाव्याला आयटक संघटनेशी संलग्न गोकुळ कामगार संघटना, करवीर कामगार संघ, सहकार कामगार युनियन, फेरीवाले संघटना, घरेलू कामगार संघटना, शेतमजूर संघटना, आरोग्य परिचर संघटना, बांधकाम कामगार संघटना, आशा कर्मचारी संघटना, फेरीवाले संघटना, विविध कारखान्यातील कामगार संघटना अशा क्षेत्रात कार्यरत संघटनांचे प्रतिनिधी उपस्थित होते.

सचिव एस. बी. पाटील यांनी प्रास्ताविक केले. कॉ. सुशीला यादव, आनंदा गुरव, बळवंत पोवार व दिलीप पवार यांची भाषणे झाली. शेतमजुरांचे प्रश्न, वृत्तपत्र प्रतिनिधींवरील हल्ले, आरोग्य परिचर, सरकारी नोकर, बांधकाम कामगारांचे प्रश्न, गोविंद पानसरे खून व तपास, सनातन संघटनेवर बंदी याबाबत संजय सावंत, बाबा यादव, उमेश पानसरे यांनी ठराव मांडले.

यावेळी नवी जिल्हा कार्यकारिणी व कौन्सिल निवडण्यात आली. कार्यकारिणीत दिलीप पवार, एस. बी. पाटील, सुशीला यादव, मेघा पानसरे, विक्रम कदम, सदाशिव निकम, आनंदा गुरव, बळवंत पोवार, जमीर शेख, रघुनाथ देशिंगे, पुंडलिक एकशिंगे, उमेश पानसरे, भगवान यादव, विठ्ठल एडगे, शंकर पाटील, अनिल सुतार तसेच जिल्हा कौन्सिलमध्ये बाबा यादव, दीपक निंबाळकर, बाळासाहेब प्रभावळे, आशा कुकडे, देवेंद्र सुतार, सचिन पाटील, चिमाजी पाटील, रेखा निकम, मल्हार पाटील, लक्ष्मण पाटील, मालती कुरणे, आनंदी पाटील यांची निवड झाली.

सनातनवर बंदीसाठी निदर्शने

मेळाव्यात सहभागी होण्यासाठी ग्रामीण भागातून शेतमजूर महिला मोठ्या संख्येने उपस्थित होत्या. मेळाव्यानंतर दसरा चौकात डॉ. नरेंद्र दाभोलकर, गोविंद पानसरे, प्रा. एम. एम. कलबुर्गी व गौरी लंकेश यांच्या खुन्यांना अटक करा, सनातन संस्थेवर बंदी घाला अशी मागणी करत निदर्शने करण्यात आली.

०० ००

अमित गद्रे. फोटो आहे.

एटीएस, सीबीआयच्या तपासातून मिळणार पानसरे हत्येचे धागे

लोगो ...

म. टा. प्रतिनिधी, कोल्हापूर

मुंबईत सापडलेल्या शस्त्रसाठ्याचा तपास करताना दहशतवाद विरोधी पथकाला(एटीएस) डॉ. नरेंद्र दाभोलकर यांच्या हत्येतील आरोपी हाती लागले. डॉ. दाभोलकर, कॉ.पानसरे यांच्यासह कर्नाटकातील दोन्ही हत्यांमध्ये साम्य असल्याचे निष्कर्ष तपास यंत्रणांनी काढले आहेत. एटीएस आणि सीबीआयच्या तपासातून पानसरे हत्येचे धागेदोरे मिळत असल्याचा दावा एसआयटीने केला आहे. याबाबत लवकरच काही मोठे खुलासे होऊ शकतात. याशिवाय काही पुरोगामींना आलेल्या धमकीपत्रांचा उलगडाही होण्याची शक्यता अधिकाऱ्यांनी वर्तवली आहे.

कॉ. गोविंद पानसरे यांच्या हत्येचा तपास करताना एसआयटीने संशयित समीर गायकवाड याला अटक केली. यानंतर डॉ. दाभोलकर यांच्या हत्येतील आरोपी डॉ. वीरेंद्रसिंह तावडे याचाही सीबीआयकडून ताबा एसआयटीने घेतला होता. या दोन्ही संशयितांच्या चौकशीतून एसआयटी प्रत्यक्ष मारेकरी, गुन्ह्यातील शस्त्र, गुन्ह्यात वापरलेले वाहन, गुन्ह्याच्या सूत्रधारांपर्यंत पोहोचली नव्हती. एटीएसने मुंबईत केलेल्या कारवाईनंतर मात्र पुन्हा एकदा कॉ. पानसरे हत्येच्या तपासाला गती आल्याचे चित्र दिसत आहे. एटीएसच्या कारवाईनंतर तातडीने एसआयटीची दोन पथके मुंबई आणि पुणे येथे रवाना झाली आहेत. याशिवाय कर्नाटकातील गौरी लंकेश आणि डॉ. एम. एम. कलबुर्गी यांच्या तपासावरही एसआयटीच्या पथकाचे लक्ष आहे. अटकेतील संशयित वैभव राऊत, सुधन्वा गोंधळेकर, शरद कळसकर, श्रीकांत पांगारकर आणि सचिन अंदुरे यांच्या चौकशीतून महत्त्वाची माहिती समोर येत असल्याचे एटीएसने कोर्टात सांगितले आहे. डॉ. दाभोलकर यांच्या हत्येसाठी वापरलेले शस्त्र आणि मारेकरीही पोलिसांच्या हाती लागल्याचा दावा एटीएसने केला आहे.

एटीएसच्या अटकेतील संशयित आणि जप्त केलेले शस्त्र यामुळे कॉ. पानसरे हत्येतील महत्त्वाचे धागेदोरे मिळत असल्याची माहिती एसआयटीच्या सूत्रांनी दिली आहे. विशेषत: संशयितांमधील शरद कळसकर याचे कोल्हापुरातील वास्तव्य आणि इतर संशयितांशी असलेला संबंध तपासण्याचे काम सुरू आहे. एटीएसच्या अटकेतील संशयित आणि डॉ. तावडे यांचे कनेक्शन समोर येत आहे. सीबीआयच्या तपासानुसार डॉ. तावडे हा हत्यांच्या कटाचा सूत्रधार असून हत्यांसाठी त्याने अनेक तरुणांचा वापर केला. तावडेच्या संपर्कातील काही साधक कोल्हापुरातही आहेत, त्यामुळे तपासात समोर आलेल्या नवीन माहितीनुसार पानसरे हत्येचा उलगडा होण्यास मदत होणार असल्याचे सूत्रांनी सांगितले.

चौकट

धमकी पत्रांचाही होणार तपास

गेल्या पाच वर्षात राज्यात पुरोगामी विचारधारा मांडणाऱ्या अनेकांना पत्राद्वारे जिवे मारण्याची धमकी आली आहे. यात डॉ. भारत पाटणकर, डॉ. सुभाष देसाई, डॉ. आ. ह. साळुंखे, माजी न्यायाधीश बी. जी. कोळसे-पाटील, कॉ. संपत देसाई यांचा समावेश आहे. पोलिसांनी यातील काहीजणांना संरक्षणही पुरवले. मात्र, धमकीची पत्रे कोणी पाठवली याचा तपास झाला नाही. एटीएसने अटक केलेल्या संशयितांच्या चौकशीदरम्यान धमकी पत्रांचाही उलगडा होण्याची शक्यता वर्तवली जात आहे.

............

चौकट

नक्षलवादी कारवायांवर वॉच

नक्षलवाद्यांशी संबंधित असल्याच्या संशयावरून पुणे पोलिसांनी देशात विविध ठिकाणी छापे टाकून पाचजणांना अटक केली आहे. या पार्श्वभूमीवर कोल्हापूर पोलिसांनी नक्षलवादी कारवायांशी संबंधित असलेल्या संशयितांवर वॉच ठेवला आहे. भीमा कोरेगाव येथील दंगलीचे पडसाद कोल्हापुरातही उमटले होते. त्यामागे काही नक्षलवादी असल्याचा संशय पोलिस यंत्रणांनी व्यक्त केला होता. पुणे पोलिसांच्या कारवाईनंतर कोल्हापुरातील संशयितांवर वॉच असून, गरज पडल्यास काही संशयितांची चौकशी केली जाईल, असे पोलिस अधिकाऱ्यांनी सांगितले.

मिलिंद पांगिरेकर, गारगोटी

प्राथमिक शिक्षणाच्या गुणवत्तेत भुदरगड तालुका राज्यात नेहमीच अव्वल राहिला आहे. पहिलीपासूनच स्पर्धा परीक्षेची तयारी होण्यासाठी २०११ मध्ये तत्कालीन गटशिक्षणाधिकारी संपत गायकवाड यांच्या कल्पनेतून भुदरगड प्रज्ञा शोध परीक्षा (बीटीएस) उपक्रम राज्यात प्रथमच राबविला. याचे अनुकरण राज्यातील अनेक जिल्ह्यांनी केले. याच पावलावर पाऊल ठेवत शिक्षण विस्तार अधिकारी दीपक मेंगाणे यांच्या संकल्पनेतून राज्यात प्रथमच 'माझा वर्ग - माझी ओळख' हा आगळा वेगळा उपक्रम या शैक्षणिक वर्षापासून तालुक्यात राबविला जाणार आहे.

भुदरगडचा शिक्षण विभाग नावीन्यपूर्ण उपक्रमांसाठी राज्यात परिचित आहे. भुदरगड प्रज्ञा शोध परीक्षा (बीटीएस) हा उपक्रम प्रथमच राबविला गेला. शिक्षकांनीही आपली अखंड मेहनत व योगदानाने अल्पावधीतच तो यशस्वी करून राज्यभर पोहोचवला. या उपक्रमाने शिष्यवृत्ती, नवोदय यांसारख्या परीक्षा, प्रगत शैक्षणिक महाराष्ट्र यामध्ये तालुका राज्यात नेहमीच अग्रभागी राहिला आहे. परिणामी राज्याच्या प्राथमिक शिक्षणाच्या गुणवत्तावाढीसाठी बीटीएस उपक्रम मैलाचा दगड ठरला. त्यानंतर अन्य जिल्ह्यांनी त्याचे अनुकरण करून आपापल्या स्तरावर परीक्षा सुरू केल्या. शिक्षण विस्ताराधिकारी दीपक मेंगाणे यांच्या संकल्पनेतून आता 'माझा वर्ग - माझी ओळख' हा नवोपक्रम सुरू केला असून यासाठी तालुक्यातील ६०० शिक्षकांना कार्यशाळेद्वारे उपक्रमाचे स्वरूप समजावून सांगितले आहे. शिक्षकांची ओळख त्यांचा वर्ग व वर्गातील मूल्यमापनासाठी त्यांनी केलेल्या शैक्षणिक कार्यातून व्हावी या हेतूने हा उपक्रम राबविला जात आहे. या उपक्रमाच्या अंमलबजावणीसाठी शिक्षकांवर कोणत्याही प्रकारचा दबाव न टाकता तणावमुक्त वातावरणात हा उपक्रम पार पाडावयाचा असून त्यासाठी येणारा खर्च लोकसहभाग, शाळा अनुदान, १४ वा वित्त आयोग यामधून करावयाचा आहे.

या उपक्रमाचा प्रारंभ आमदार प्रकाश आबिटकर, सभापती स्नेहल परीट, उपसभापती कीर्ती देसाई, जिल्हा परिषद सदस्या रोहिणी आबिटकर, अजित देसाई, सुनील निंबाळकर, सरिता वरंडेकर, गायत्री भोपळे, गटशिक्षणाधिकारी रवींद्र चौगले यांच्या हस्ते करण्यात आला.

०००

काय आहे उपक्रम?

या उपक्रमांतर्गत जिल्हा परिषद शाळांतील सर्व शिक्षकांना त्यांच्या शाळेतील एक वर्गखोली त्यांची त्या शाळेतून बदली होईपर्यंत अध्यापनासाठी नेमून देण्याची आहे. वर्गखोलीचा आंतरबाह्य शैक्षणिकदृष्ट्या विकास करण्याची जबाबदारी संबंधित शिक्षकांवर निश्चित केली असून वर्गखोली विकसित करण्यासाठी आकर्षक रंग, देखभाल दुरुस्ती व अनावश्यक साहित्याचे निर्लेखन, उपयुक्त शैक्षणिक साहित्य व त्याची शिस्तबद्ध मांडणी, ई-लर्निंग सुविधा व अभ्यासक्रम सॉफ्ट कॉपी, अप्रगत विद्यार्थीविरहित वर्ग, शालेय स्पर्धा परीक्षा कार्यवाही, क्रीडा व सांस्कृतिक स्पर्धा कार्यवाही, विद्यार्थी वयोगटानुरूप ग्रंथालय पुस्तके व नियतकालिके, दप्तराचे ओझे कमी करण्यासंदर्भातील कार्यवाही, बैठक व्यवस्था कचरा व चप्पल ठेवण्याचे व्यवस्थापन, वीज व आवश्यक विजेची उपकरणे असे प्रत्येकी दहा गुणांचे दहा दिशादर्शक टप्पे निश्चित केले आहेत. शैक्षणिक वर्षाच्या शेवटी प्रत्यक्ष वस्तुस्थिती व अभिलेखे यांची पडताळणी करून वर्गाचे १०० गुणांचे मूल्यांकन होईल. मूल्यमापनानंतर केंद्रातून तीन उत्कृष्ट शिक्षकांची निवड करून त्यांचा सन्मानचिन्ह व प्रशस्तिपत्र देऊन शिक्षण विभागाकडून गौरव केला जाणार आहे.

०००

कोट...

वर्ग हे केवळ मुले साक्षर करण्याचे ठिकाण न राहता विद्यार्थ्याच्या सर्वांगीण विकासाचे केंद्र व्हावे. याकामी शिक्षक, पालक व समाज यांचे भरीव योगदान मिळावे यादृष्टीने 'माझा वर्ग - माझी ओळख' या उपक्रमाची रचना करण्यात आली आहे.

दीपक मेंगाणे, शिक्षण विस्तार अधिकारी, पं. स. भुदरगड

००००

फोटो : १) 'माझा वर्ग - माझी ओळख' उपक्रमाच्या उद्घाटनप्रसंगी आमदार प्रकाश आबिटकर, स्नेहल परीट, कीर्ती देसाई, रवींद्र चौगले, दीपक मेंगाणे, आदी.

म. टा. प्रतिनिधी, कोल्हापूर

अखिल भारतीय किसान सभेच्यावतीने शनिवारी (ता. १) शेतकऱ्यांच्या विविध मागण्यांसाठी देशभरात मोर्चे काढण्यात येणार आहेत. याचाच भाग म्हणून येथील किसान सभेच्या शाखेच्या वतीने सकाळी ११ वाजता जिल्हाधिकारी कार्यालयावर मोर्चा काढण्यात येईल. मोर्चाला टाउन हॉल बागेपासून सुरुवात होणार आहे.

किसान सभेच्यावतीने दिलेल्या प्रसिद्धी पत्रकात म्हटले आहे, जिल्ह्यात सतत पडणाऱ्या पावसामुळे नदीकाठची पिके नष्ट झाली आहेत. पावसामुळे पिकांचे नुकसान झाले असून पीक पाहणी करुन ओला दुष्काळ जाहीर करावा, छत्रपती शिवाजी महाराज कर्जमाफी सन्मान योजनेचा लाभ द्यावा, आदी मागण्या करण्यात येणार आहेत.' मोर्चात शेतकऱ्यांनी सहभागी व्हावे असे, आवाहन किसान सभेचे सरचिटणीस नामदेव गावडे यांनी केले आहे.

म. टा. प्रतिनिधी, कोल्हापूर

गणेशोत्सव काळात न्यायालयीन नियमांच्या अधीन राहूनच ध्वनियंत्रणेला परवानगी दिली जाईल. परवाना देताना घालून दिलेल्या अटी, आवाज मर्यादेचे उल्लंघन झाल्यास पोलिस प्रशासन कारवाई करेल. त्यामुळे कोणत्याही मंडळांनी मोठ्या ध्वनियंत्रणा लावू नयेत, त्यासाठी अॅडव्हान्स देऊन आर्थिक नुकसान सोसू नये, असे आवाहन जिल्हा पोलिस अधीक्षक डॉ. अभिनव देशमुख यांनी बुधवारी केले.

गणेशोत्सव काळातील कायदा, सुव्यवस्थेच्या पार्श्वभूमीवर राजारामपुरी पोलिस ठाण्याच्या हद्दीतील गणेशोत्सव मंडळांच्या बैठकीत ते बोलत होते. लकी बजारमधील इंद्रप्रस्थ हॉलमध्ये बैठक झाली.

डॉ. देशमुख म्हणाले, 'दोन टॉप, दोन बेस ध्वनियंत्रणेला परवाना मिळावा, अशी मागणी अनेक मंडळांची आहे. मात्र, ध्वनियंत्रणेच्या आकारावरून आवाजाची मर्यादा निश्चित करता येत नाही. आवाज मर्यादा काटेकोरपणे पाळण्याच्या सूचना कोर्टाच्या आहेत. ध्वनियंत्रणेतील आवाजासंबंधी मंडळांच्या पातळीवर प्रबोधनही झाले आहे. मंडळांनी मोठी ध्वनियंत्रणा लावू नये. पैसे देऊन बुकिंग करू नये. आवाज मर्यादा मोजण्याची यंत्रणा पोलिस, प्रदूषण नियंत्रण मंडळ प्रशासनाकडे आहे. मिरवणुकीत लावलेल्या ध्वनियंत्रणा आवाज मर्यादा तपासली जाईल. त्याचे उल्लघंन करणाऱ्या मंडळांवर कारवाई होईल. असे कटू प्रसंग आणण्याची वेळ मंडळांच्या कार्यकर्त्यांनी पोलिसांवर आणू नये. मंगलमय, विधायक गणेशोत्सव साजरा करण्याऱ्या मंडळांना पोलिसांचे चांगले सहकार्य राहील. ८० टक्के गणेश मंडळे विधायक गणेशोत्सव साजरा करतात. यासाठी राज्यात कोल्हापूर नेहमी आघाडीवर आहे.'

महापालिका आयुक्त डॉ. अभिजित चौधरी म्हणाले, 'राजारामपुरीतील गणेशोत्सवाचा चांगला लौकिक आहे. तेथील देखावे लक्षवेधी, प्रबोधनात्मक असतात. यंदाही मंडळांनी प्रशासनास सहकार्य करीत गणेशोत्सव साजरा करावा. मंडप उभारताना तेथे रुग्णवाहिका, अग्निशमन वाहन जाईल इतका रस्ता खुला ठेवावा. सर्व परवाने एकाच ठिकाणी मिळण्यासाठी एक खिडकी सुरू केली आहे. मंडप उभारताना रस्त्यांची खोदाई करू नये, विनापरवाना जाहिरातीचे फलक, कमानीवर गुन्हे दाखल करण्याचे कोर्टाचे आदेश आहेत. ती वेळ प्रशासनावर येऊ देऊ नका. अधिकाधिक मंडळांनी पर्यावरणपूरक गणेशोत्सव साजरा करण्याकडे लक्ष द्यावे. त्यासाठी महापालिका प्रशासनाचे पूर्ण सहकार्य राहील.'

पश्चिम महाराष्ट्र देवस्थान समितीचे अध्यक्ष महेश जाधव, विरोधी पक्षनेते विलास वास्कर यांनी दोन टॉप, दोन बेस ध्वनियंत्रणा लावण्यास परवानगी द्यावी, अशी मागणी केली. संयुक्त राजारामपुरी गणेश मंडळाचे संजय जाधव यांनी शहरातील प्रमुख ठिकाणी सीसीटीव्ही लावावेत, अशी सूचना केली. जिद्द, मेहनत, मैत्री ग्रुपतर्फे केरळ पूरग्रस्तांसाठी पाच हजार रुपये दिले.

यावेळी रहीम सनदी, दुर्गेश लिंग्रज, अंकुश निपाणीकर, कमलाकर जगदाळे, महेश उत्तुरे यांची भाषणे झाली. नगरसेविका प्रतिज्ञा उत्तुरे, रूपाराणी निकम, क्षमा मुल्ला, उद्योजक चंद्रकांत जाधव, संजय जाधव, मदन चव्हाण, संदीप कवाळे यांच्यासह मंडळांचे पदाधिकारी, कार्यकर्ते उपस्थित होते. पोलिस उपअधीक्षक डॉ. प्रशांत अमृतकर यांनी प्रास्ताविक केले. दरम्यान, गेल्यावर्षी विधायक गणेशोत्सव साजरा केलेल्या गणेश मंडळांच्या पदाधिकाऱ्यांचा मान्यवरांच्या हस्ते सत्कार करण्यात आला.

००००

जिल्हाधिकाऱ्यांशी चर्चा

गणेशोत्सव काळात शेवटचे काही दिवस देखावे पाहण्यासाठी गर्दी होते. त्या काळात रात्री वेळ वाढवून देण्याची मागणी अनेक गणेश मंडळांनी केली. त्यासंबंधीची परवानगी जिल्हाधिकाऱ्यांकडून घेतली जाईल, अशी माहिती जिल्हा पोलिस अधीक्षक देशमुख यांनी दिली.

०००

म. टा. प्रतिनिधी, कोल्हापूर

'जातवैधता प्रमाणपत्र वेळेत सादर न केलेल्या १९ नगरसेवकांना सुप्रीम कोर्टाने अपात्र ठरवल्यानंतर त्यांना विविध समित्या आणि आमसभेच्या कामकाजात सहभागी होता येणार नाही,' अशी माहिती महापालिका आयुक्त डॉ. अभिजित चौधरी यांनी दिली. 'बैठक किंवा सभेपूर्वी नगरसचिव त्याबाबतच्या सूचना संबंधित सभाध्यक्ष किंवा समिती अध्यक्षांना देतील. नगरसेवकांना अपात्र ठरवल्याचा औपचारिक आदेश राज्य सरकारच्या नगरविकास विभागाकडून प्राप्त झाल्यानंतर पुढील कार्यवाही केली जाईल,'असेही आयुक्तांनी स्पष्ट केले.

जातवैधता प्रमाणपत्र मुदतीत सादर न केलेल्या महापालिकेच्या १९ नगरसेवकांना सुप्रीम कोर्टाने अपात्र ठरवले आहे. कोर्टाच्या निर्णयानंतर राज्याच्या नगरविकास विभागाने कोणतीही कार्यवाही केली नाही. त्यामुळे आगामी आमसभेच्या कामकाजात नगरसेवकांना सहभागी करुन घेण्याबाबत संभ्रम निर्माण झाला आहे. याबाबत बुधवारी प्रशासनाने राज्य सरकारचे परिपत्रक आणि कोर्टाच्या निर्णयानंतर बाजू मांडली.

आयुक्त डॉ. चौधरी म्हणाले, 'मुदतीत प्रमाणपत्र सादर न केलेल्या नगरसेवकांची यादी नगरविकास विभागाकडे सुप्रीम कोर्टाचा निर्णय होण्यापूर्वीच सदर केली आहे. कोर्टाच्या निर्णयानंतरही सोमवारी (ता. २७) पुढील कार्यवाहीसाठी नगरविकास विभागाकडे अहवाल पाठवला आहे. कोर्टाच्या निर्णयानुसार नगरसेवकांना अपात्र ठरवण्याचा अधिकार महापालिका प्रशासनाला नाही. त्याबाबतचा आदेश काढण्याचे अधिकार नगरविकास विभागाला आहेत.'

'सहा महिन्याच्या आत वैधता प्रमाणपत्र सादर न केल्याने पूर्वलक्षी प्रभावाने संबंधित नगरसेवक कार्यालयीन कामकाजात सहभागू होऊ शकत नाहीत. याबाबतची माहिती सभेपूर्वी सभाध्यक्षा व समिती अध्यक्षांना नगरविकास सचिवांमार्फत दिली जाईल. मात्र नगरविकास विभागाकडून आदेश प्राप्त झाल्याशिवाय प्रशासन अपात्र नगरसेवकांवर कोणतीही कारवाई करु शकत नाही,' असे आयुक्तांनी सांगितले.

नगरसचिव दिवाकर कारंडे म्हणाले, 'सुप्रीम कोर्टाने १९ नगरसेवकांना अपात्र ठरवण्याचे आदेश काढले आहेत. त्यामुळे प्रशासनाच्यावतीने वेगळा आदेश काढण्याची आवश्यकता नाही. मात्र अपात्र नगरसेवकांची माहिती महापौर, समिती सभापती व संबंधित नगरसेवकांना देऊन कामकाजात सहभागी न होण्याचे आवाहन केले जाईल.'

.. .. .. ... ... .. ..

फोटो आहे

तारखेत अशोक पाटील या नावाने...

कोल्हापूर : पुणे गृह निर्माण क्षेत्र विकास मंडळाच्या (म्हाडा) मुख्याधिकारी पदाचा कार्यभार अतिरिक्त जिल्हाधिकारी अशोक पाटील यांनी बुधवारी स्वीकारला. पाटील हातकणंगले तालुक्यातील पाडळीचे असून, यापूर्वी ते कोकण विभागात उपायुक्त म्हणून काम करीत होते. निवडणूक अधिकारी, जत व राधानगरीचे प्रांताधिकारी, जिल्हा पुनर्वसन अधिकारी तसेच महाराष्ट्र औद्योगिक विकास महामंडळाचे प्रादेशिक अधिकारी म्हणूनही त्यांनी काम पाहिले आहे.

000000

म. टा. प्रतिनिधी, कोल्हापूर

जातवैधता प्रमाणपत्र मुदतीत सादर न केल्याबद्दल अपात्र ठरवण्यात आलेल्या १९ नगरसेवकांचे पद कायम राहण्यासाठी विधिज्ज्ञांशी चर्चा करुन मंगळवारपर्यंत वटहुकूम काढण्याबरोबर प्रमाणपत्र सादर करण्यासाठी नगरसेवकांना वेळ देऊ,' असे आश्वासन मुख्यमंत्री देवेंद्र फडणवीस यांनी बुधवारी शिष्टमंडळाला दिले. पालकमंत्री चंद्रकांत पाटील यांच्या नेतृत्वाखाली आमदार हसन मुश्रीफ, सतेज पाटील यांनी मुंबईत मुख्यमंत्री फडणवीस यांची भेट घेतली. या आश्वासनामुळे अपात्र नगरसेवकांना काहीसा दिलासा मिळण्याची शक्यता आहे.

सुप्रीम कोर्टाच्या निर्णयामुळे कोल्हापूर महापालिकेच्या १९ तर मुंबई महापालिकेच्या ३५ नगरसेवकांना बसला आहे. कलम ९ 'अ' मध्ये बदल केल्याशिवाय या सदस्यांना दिलासा मिळणार नाही. कायद्यातील तरतुदीमध्ये बदल करण्याचे अधिकार राज्य सरकारला असल्याने पोटनिवडणूक टाळण्यासाठी महापालिकेच्या शिष्टमंडळाने पालकमंत्री पाटील यांची चार दिवसांपूर्वी भेट घेतली होती. पालकमंत्री पाटील यांनी कायदेशीर मार्ग काढण्याबरोबरच मुख्यमंत्री फडणवीस यांच्यासोबत चर्चा करण्याची ग्वाहीही दिली होती.

त्यानुसार बुधवारी पालकमंत्री पाटील यांच्यासह आमदार मुश्रीफ व पाटील यांनी मुख्यमंत्री फडणवीस यांनी भेट घेतली. स्थानिक स्वराज्य संस्थेतील अपात्र सदस्यांना जातवैधता प्रमाणपत्र सादर करण्यासाठी वेळ देण्यास सरकार सकारात्मक असून यासाठी विधिज्ज्ञांशी चर्चा करुन मंगळवारपर्यंत वटहुकूम काढण्याचे आश्वासन मुख्यमंत्री फडणवीस यांनी दिले. मुख्यमंत्री फडणवीस यांनी दिलेल्या आश्वासनामुळे सुप्रीम कोर्टाच्या निर्णयामुळे अपात्र ठरलेले नगरसेवक नव्या वटहुकूमानंतर पुन्हा सदस्यत्व कायम राहण्याची शक्यता आहे.

प्रमाणपत्रासाठी वेळ वाढवणार

निवडून आलेल्या नगरसेवकांनी जातवैधता प्रमाणपत्र मिळण्यासाठी पडताळणी समितीकडे कागदपत्रे सादर केली. मात्र समितीकडून नगरसेवकांना वेळेत प्रमाणपत्र मिळू शकले नाही. त्यामुळे अशा नगरसेवकांवर अपात्रतेची टांगती तलवार आहे. अशा नगरसेवकांचे सदस्यत्व कायम राहण्यासाठी पूर्वलक्षी प्रभावाने कायद्यात तरतूद करुन प्रमाणपत्र सादर करण्यासाठी वेळेची मर्यादा वाढवून मिळण्याची शक्यता आहे.

...............

स्थायी समितीच्या बैठकीकडे लक्ष

दरम्यान, अपात्र ठरवलेल्या नगरसेवकांमध्ये स्थायी समितीच्या चार सदस्यांचा समावेश आहे. स्थायी समितीची शुक्रवारी किंवा शनिवारी बैठक होणार आहे. बैठकीपूर्वी कोर्टाने अपात्र ठरवलेल्या नगरसेवकांना कामकाजात सहभागी होऊ नये, अशी सूचना नगरसचिव करणार आहेत. त्यामुळे अपात्रतेच्या निर्णयानंतर होणाऱ्या स्थायी समितीच्या बैठकीकडे सर्वांचेच लक्ष लागले आहे.

.............

प्रशासन व लोकप्रतिनिधींत वादाची शक्यता

प्रमाणपत्र सादर न केलेल्या नगरसेवकांना अपात्र ठरवण्याचा निर्णय सुप्रीम कोर्टाने गुरुवारी (ता. २२) दिला. कोर्टाच्या निर्णयानंतर राज्य सरकारच्या नगरविकास विभागाने अद्याप कोणताही आदेश काढलेला नाही. त्यामुळे दोन दिवसांत होणाऱ्या स्थायी समिती व इतर समितींच्या बैठकीला अपात्र नगरसेवक उपस्थित राहण्याची शक्यता आहे. सभेपूर्वी नगरविकास विभागाकडून कोणताही आदेश प्राप्त न झाल्यास आणि प्रशासनाने सभेच्या कामकाजात सहभाग करुन घेण्यास मज्जाव केल्यास प्रशासन व लोकप्रतिनिधींमध्ये वाद उफाळून येण्याची शक्यता आहे.

.................

कोर्ट अवमानाची प्रशासनाला धास्ती

सुप्रीम कोर्टाने नगरसेवकांना अपात्र ठरवल्यानंतर राज्य सरकारकडून अद्याप कोणतीही कार्यवाही झालेली नाही. केवळ कोर्टाच्या निकालपत्राअधारे अपात्र नगरसेवकांना कामकाजात सहभागी होण्यास मज्जाव करण्याचे दिव्य प्रशासनाला पार पाडावे लागणार आहे. प्रशासनाचा आदेश डावलून अपात्र नगरसेवक कामकाजात सहभागी झाल्यास कोर्ट अवमानाच्या भितीने प्रशासनाची चांगलीच अडचण झाली आहे.

(फोटो आहे)

कर्नाटकातील विक्रेत्यासह तिघांना अटक

म. टा. प्रतिनिधी, कोल्हापूर

गांजाची खरेदी-विक्री करणाऱ्या तिघांना ३१ किलो गांजा आणि दोन दुचाकींसह स्थानिक गुन्हे अन्वेषण शाखेच्या पोलिसांनी बुधवारी (ता. २९) सकाळी राजाराम तलावाजवळ पकडले. तौफिक खुदबुद्दीन कुरणे (वय ३०, रा. यादवनगर), संतोष आनंदा जाधव (३५, रा. मालेवाडी, ता. वाळवा, जि. सांगली) आणि मल्लिकार्जुन आण्णाप्पा मगदूम (३५, रा. संबरगी, ता. अथणी, जि. बेळगाव) अशी अटकेतील संशयितांची नावे आहेत. पोलिसांनी त्यांच्याकडून सव्वादोन लाखांचा गांजा, दोन दुचाकी आणि मोबाइल असा सुमारे तीन लाखांचा मुद्देमाल जप्त केला.

स्थानिक गुन्हे अन्वेषण शाखेचे पोलिस निरीक्षक तानाजी सावंत यांनी दिलेल्या माहितीनुसार, शहरासह जिल्ह्यात सुरू असलेली अमली पदार्थांची विक्री रोखण्याच्या सक्त सूचना पोलिस अधीक्षक डॉ. अभिनव देशमुख यांनी दिल्या होत्या. यानुसार पोलिसांकडून अमली पदार्थांच्या खरेदी-विक्रीवर नजर होती. यादवनगर येथील तौफिक कुरणे याच्याकडे सांगली जिल्ह्यासह कर्नाटकातून मोठ्या प्रमाणात गांजाची आवक होत असल्याची माहिती स्थानिक गुन्हे अन्वेषण शाखेच्या पोलिसांना मिळाली होती. यानुसार पोलिसांनी कुरणे याच्या हालचालींवर नजर ठेवली होती. बुधवारी सकाळी कुरणे हा गांजा खरेदीसाठी राजाराम तलाव परिसरात जाणार असल्याचे कळताच पोलिसांनी त्या परिसरात सापळा रचला. यावेळी सांगली जिल्ह्यातील संतोष जाधव आणि कर्नाटकातील मल्लिकार्जुन मगदूम हे दोघे दुचाकीवरून ३१ किलो गांजा घेऊन आले. पोलिसांनी सव्वादोन लाख रुपये किमतीचे गांजाचे पोते, दोन दुचाकी, मोबाइल आणि रोख चार हजार रुपये असा तीन लाखांचा मुद्देमाल जप्त केला. कुरणे, जाधव आणि मगदूम या तिघांनाही अटक केली असून, अधिक तपासासाठी राजारामपुरी पोलिसांच्या ताब्यात दिले.

शहरात अनेक ठिकाणी गांजाची विक्री सुरू असून, कुरणे हा काही साथीदारांच्या मार्फत गांजाच्या पुड्या पोहोच करतो. यातून रोज लाखो रुपयांची उलाढाल सुरू आहे. सांगली जिल्ह्यासह कर्नाटकातून गांजा आणला जातो. यातील आणखी काही संशयितांचा शोध सुरू असल्याचे निरीक्षक सावंत यांनी सांगितले. सहायक पोलिस निरीक्षक संतोष पवार, उपनिरीक्षक सचिन पंडित, राजेंद्र सानप आदींच्या पथकाने ही कारवाई केली.

म. टा. प्रतिनिधी, कोल्हापूर

शस्त्रसाठाप्रकरणी मुंबई दहशतवादविरोधी पथकाने अटक केलेल्या संशयितांचा ताबा घेण्यासाठी कोल्हापुरातील एसआयटीकडून प्रयत्न सुरू आहेत. वैभव राऊतसह पाचजणांचा ताबा घेऊन त्यांचे कॉम्रेड गोविंद पानसरे हत्येतील कनेक्शन शोधले जाणार आहे. संशयितांकडे डॉ. दाभोलकर यांच्या हत्येतील शस्त्र मिळाल्याने पानसरे हत्येबाबत महत्त्वाची माहिती हाती लागू शकते, असा विश्वास वरिष्ठ अधिकाऱ्यांनी व्यक्त केला आहे. एटीएस आणि कर्नाटकातील तपासाची माहिती घेण्यासाठी एसआयटीची दोन पथके पुणे आणि बेंगळुरू येथे ठाण मांडून आहेत.

मुंबईत नालासोपारा येथे वैभव राऊत या साधकाच्या घरात अवैध शस्त्रसाठा सापडल्याने मुंबई दहशतवादविरोधी पथकाने त्याला अटक केली होती. राऊतच्या चौकशीत आणखी काही संशयितांची नावे समोर आली. हा तपास थेट डॉ. दाभोलकर यांच्या हत्येपर्यंत जाऊन पोहोचल्याने पानसरे यांच्या हत्येचा तपास करणाऱ्या एसआयटीचेही लक्ष दहशतवादविरोधी पथकाच्या कारवाईकडे केंद्रित झाले. डॉ. दाभोलकर यांच्यावर शस्त्र चालविणारा संशयित आणि त्याने वापरलेले शस्त्रही हस्तगत केल्याचा दावा दहशतवादविरोधी पथकाने केला आहे. डॉ. दाभोलकर, कॉम्रेड पानसरे आणि कर्नाटकातील डॉ. कलबुर्गी यांच्या हत्यांमध्ये समान शस्त्राचा वापर झाल्याचे निष्कर्ष यापूर्वीच फॉरेन्सिक अहवालातून आले आहेत. या अनुषंगाने दहशतवादविरोधी पथकाने पकडलेल्या संशयितांकडून महाराष्ट्र आणि कर्नाटकातील चारही हत्यांचा उलगडा होऊ शकतो, अशी शक्यता निर्माण झाली आहे. एटीएसच्या कारवाईनंतर एसआयटीने तातडीने दोन पथके पुणे आणि मुंबई येथे पाठवली होती. यातील एक पथक सध्या पुणे येथे, तर दुसरे पथक बेंगळुरू येथे ठाण मांडून आहे.

वैभव राऊत, सुधन्वा गोंधळेकर, शरद कळसकर, श्रीकांत पांगारकर आणि सचिन अंदुरे हे पाच संशयित सध्या मुंबई दहशतवादविरोधी पथकाच्या पोलिस कोठडीत आहेत. संशयितांचा ताबा मिळावा, यासाठी एसआयटी कोर्टात अर्ज सादर करणार आहे. या पाच संशयितांपैकी शरद कळसकर हा कोल्हापुरात काही काळ वास्तव्यास होता. कोल्हापुरातील हिंदुत्ववादी संघटनांशी त्याचा नियमित संपर्क होता. कळसकरच्या चौकशीतून पानसरे हत्येतील महत्त्वाचे धागेदोरे मिळण्याची शक्यता वर्तवली जात आहे. याशिवाय डॉ. दाभोलकर यांच्या हत्येत वापरलेले शस्त्र आणि मारेकरी मिळाल्याने पानसरे यांचेही मारेकरी लवकरच सापडतील, असा विश्वास एसआयटीच्या अधिकाऱ्यांनी व्यक्त केला.

०००

चौकशीत मोठे खुलासे येण्याची शक्यता

एटीएसने पकडलेल्या संशयितांपैकी शरद कळसकरचा कोल्हापूरशी जवळचा संबंध आहे. उद्यमनगरातील एका कारखान्यात तो काही काळ काम करत होता. एसआयटीने त्याच्या संपर्कात असलेल्या कोल्हापुरातील काहीजणांची चौकशी केली. ज्या कारखान्यात कळसकरने काम केले, त्या कारखाना मालकाची चौकशी झाली आहे. पानसरे यांची रेकी करण्यापासून प्रत्यक्ष त्यांच्या हत्येतही त्याचा सहभाग नाकारता येत नाही, त्यामुळे कळसकरच्या चौकशीत मोठे खुलासे समोर येऊ शकतात, अशी माहिती सूत्रांनी दिली.

म. टा. प्रतिनिधी, कोल्हापूर

महापालिकेच्या परवानगीशिवाय गणेशोत्सव काळात बोर्ड, बॅनर्स आणि जाहिरात प्रसिद्ध केल्यास महाराष्ट्र विद्रुपीकरण कायदा १९९५ नुसार सार्वजनिक गणेशोत्सव मंडळांवर गुन्हा दाखल होणार आहे. महापालिकेच्या या निर्णयामुळे सार्वजनिक गणेशोत्सव मंडळांना जाहिरात करताना महापालिकेची परवानगी घ्यावी लागणार आहे.

गणेशोत्सवकाळात सार्वजनिक मंडळे डिजीटल फलक, स्वागत कमानी उभा करतात. डिजीटल फलक अथवा स्वागत कमानी उभा करत असताना महापालिका अधिनियमानुसार परवानगी घेणे अनिवार्य आहे. परंतु शहरातील बुहतांश सार्वजनिक गणेशोत्सव मंडळे जाहिरातीसाठी महापालिकेची परवानगी घेत नसल्याचे निदर्शनास आले आहे. त्यामुळे हायकोर्टाने अशांवर गुन्हा दाखल करण्याचे आदेश दिले आहेत. कोर्टाच्या आदेशानुसार बोर्ड, बॅनर्स आणि जाहिरात परवानगीशिवाय प्रसिद्ध केल्यास गुन्हा दाखल करण्यात येणार आहे. त्यामुळे सार्वजनिक गणेशोत्सव मंडळांनी जाहिरात करताना परवानगी घ्यावी असे, आवाहन महापालिकेच्या इस्टेट विभागातर्फे करण्यात आले आहे.

म. टा. वृत्तसेवा, कराड

पाटणसह कोयना धरण पाणलोट क्षेत्रात पावसाने उसंत घेतल्याने कोयना धरणाचे सहा वक्र दरवाजे अडीच फुटांवरून कमी करून दीड फुटावर करण्यात आले आहेत. त्यामुळे पायथा वीजगृहातून २ हजार १११ आणि वक्र दरवाजातून ४ हजार ४६२ असे मिळून ६ हजार ५७३ क्युसेक प्रतिसेकंद पाण्याचा विसर्ग नदीपात्रात सुरू आहे. तर, कोयना धरणात १०२.८७ टीएमसी पाणीसाठा झाला असून, २७ हजार ५३१ क्युसेक पाण्याची आवक होत आहे.

कोयना पाणलोट क्षेत्रातील पावसाने पूर्णपणे उसंत घेतल्याने जलाशयात येणाऱ्या पाण्याची आवक मोठ्या प्रमाणात घटली आहे. त्यामुळे मंगळवारी अडीच फुटांवर ठेवण्यात आलेले धरणाचे दरवाजे मंगळवारी रात्री दीड फुटांवर करण्यात आले. सध्या कोयना धरणातील पाणीसाठा पूर्णपणे नियंत्रणात आहे. गेल्या काही दिवसांपासून पाणलोट क्षेत्रातील वाढत्या पावसामुळे जलाशयात पाण्याची मोठी आवक होत होती. त्यामुळे धरणाचे दरवाजे सातत्याने कमी-जास्त करावे लागत होते. जलाशयातील पाणीसाठ्यावर नियंत्रण ठेवण्यात कोयना धरण व्यवस्थापनाची खरी कसोटी सुरू होती आणि त्यात धरण व्यवस्थापन यशस्वीही झाले आहे.

बुधवारी सायंकाळी पाच वाजेपर्यंत कोयनानगर येथे सात (५१३७),नवजा ३० (५५६९), महाबळेश्वर ९ (४८३५) मिलीमीटर पावसाची नोंद झाली आहे. तर, जलपातळी २१६१ फूट ८ इंच, म्हणजेच ६५८.८७७ मीटर झाली आहे. धरणातील पाणीसाठा १०२.८७ टीएमसी इतका झाला आहे. सध्या पाणलोट क्षेत्रातील पावसाचे प्रमाण कमी झाले असले, तरी अद्याप कोयना धरणात २७ हजार ५३१ क्युसेक प्रतिसेकंद पाण्याची आवक सुरूच आहे. त्यामुळे धरणाचे दरवाजे दीड फुटांवर स्थिर ठेवण्याचा निर्णय कोयना धरण व्यवस्थापनाने घेतला आहे.

म. टा. वृत्तसेवा, कराड

कराड तालुक्यातील येणपे येथील जनावरे चारण्यात घेऊन गेलेल्या एका महिलेचा मृतदेह विवस्त्रावस्थेत आढळून आला आहे. मंगळवारी सायंकाळी खुनाची घटना घडली असून, महिलेचा बलात्कार करून व तिच्या अंगावरील दागिने गायब करून खून करण्यात आल्याचे पोलिस तपासात स्पष्ट झाले आहे. या प्रकरणी एकास अटक करण्यात आले आहे, तर एका अल्पवयीन मुलास ताब्यात घेण्यात आले आहे.

सविता गणेश पाटील (वय २२, रा. येणपे) असे खून झालेल्या महिलेचे नाव आहे. तर, करण शंकर कोळी (वय २२, मूळ रा. साकुर्डी, ता. कराड, सध्या रा. ओकोली, ता. शिराळा, जि. सांगली) याला अटक करण्यात आले आहे. सदर संशयिताने महिलेल्या अंगावरील सुमारे २५ हजार रुपये किमतीचे दागिने लंपास केले आहेत. बुधवारी त्याला न्यायालयात हजर केले असता, पोलिस कोठडीत त्याची रवानगी करण्यात आली आहे. तसेच, या प्रकरणी एका अल्पवयीन मुलालाही ताब्यात घेण्यात आले असून, त्याची रवानगी बालसुधारगृहात करण्यात आली आहे.

सविता पाटील ही महिला सोमवारी दुपारी नेहमीप्रमाणे जनावरे चारण्यासाठी येणपे येथील वाघजाईच्यासमोर खडी नावाच्या रानात धरणाजवळ गेली होती. मात्र,जनावरे चरून सोमवारी रात्री उशिरापर्यंत घरी का आली नाहीत, म्हणून कुटुंबीयांनी सर्वत्र शोध घेतला. मात्र, त्यांचा शोध लागला नाही. त्यामुळे पती गणेश पांडुरंग पाटील यांनी पोलिसात तक्रार दिली होती. दरम्यान, मंगळवारी दुपारी सविता पाटील यांचा मृतदेह येणपे येथील धरणाजवळ विवस्त्रावस्थेत सापडला. याची माहिती पोलिस निरीक्षक अशोकराव क्षीरसागर यांना मिळताच पोलिसांनी घटनास्थळी भेट दिली. घटनास्थळाचा पंचनामा करून सविता यांचा मृतदेह शवविच्छेदनासाठी शासकीय उपजिल्हा रुग्णालयात पाठवण्यात आला. शवविच्छेदनानंतर तो नातेवाईकांच्या ताब्यात देण्यात आला. शवविच्छेदनात गळा दाबून खून झाल्याचे स्पष्ट झाले. पोलिस उपअधीक्षक नवनाथ ढवळे हे अधिक तपास करत आहेत.

म. टा. प्रतिनिधी, कोल्हापूर

कोंडुसकर ट्रॅव्हल्सचे मालक अभिजीत प्रभाकर कोंडुसकर यांच्या शाहू नाका परिसरातील वैभव हौसिंग सोसायटीमधील घरातून १ लाख आठ हजार रूपयांची चोरी झाली. सोमवारी दुपारी दीड ते मंगळवारी सायंकाळी साडेसातच्या दरम्यान ही चोरी झाली. कोंडुसकर यांनी राजारामपुरी पोलिस ठाण्यात दिलेल्या फिर्यादीत चोरीचा संशय घरातील नोकरांवर व्यक्त केला आहे. कोंडुसकर यांनी बेडरूममधील लोखंडी कपाटात पाच लाख रूपये ठेवले होते. बेंगळूरूला जाण्यासाठी त्यांनी पैसे कपाटून काढून मोजले. त्यावेळी त्यात १ लाख आठ हजार रूपये कमी असल्याचे निदर्शनास आले. घरात विविध कामांसाठी असलेल्या सहा कामगारांपैकी कुणीतरी पैसे घेतल्याचा संशय त्यांनी व्यक्त केला आहे.

------------------

म. टा. प्रतिनिधी, कोल्हापूर

वारणानगर येथील तात्यासाहेब कोरे सहकारी साखर कारखान्यास थकीत एफआरपी द्या, अन्यथा साखर जप्तीची प्रक्रिया सुरू केली जाईल, अशी नोटीस तहसीलदारांनी महिन्यापूर्वीच दिली. नोटिसीनंतरही एफआरपीची रक्कम देण्यास कारखाना प्रशासन टाळटाळ करीत असल्याचा आरोप ऊस उत्पादकांकडून होत आहे. परिणामी याकडे लक्ष वेधण्यासाठी अंकुश संघटनेने जिल्हाधिकारी कार्यालयासमोर उपोषण करण्याचा इशारा दिला आहे. त्यामुळे महसूल प्रशासनाने साखर जप्तीची प्रक्रिया सुरू केली आहे.

जिल्ह्यातील १२ साखर कारखान्यांनी गेल्या गळीत हंगामातील एफआरपीची रक्कम दिली नव्हती. या कारखान्यांवरील कारवाईसंबंधीचा अहवाल साखर आयुक्त संभाजी कडू-पाटील यांनी जिल्हाधिकाऱ्यांकडून मागितला. त्यांनी तीन कारखान्यांना नोटीस दिली. दोन कारखान्यांनी थकवलेली एफआरपी दिली. 'वारणा'ने अजूनही ३३ कोटी ५० लाख रुपये एफआरपीची रक्कम दिलेली नाही. राज्यातील सर्वच एफआरपी थकीत कारखान्यांविरोधात अंकुश संघटनेने हायकोर्टात याचिका दाखल केली. हायकोर्टानेही थकीत एफआरपी देण्याचे आदेश दिले आहेत. त्याचा आधार घेत अंकुश संघटना पाठपुरावा करीत आहे. वारणा कारखान्याची साखर जप्त करून व्याजासह एफआरपीची रक्कम उत्पादकांना मिळवून द्यावी, अशी मागणी त्यांनी जिल्हाधिकाऱ्यांकडे केली आहे.

०००

जिल्ह्यातील सर्व साखर कारखान्यांनी गेल्या हंगामातील थकीत एफआरपी द्यावी, असा पाठपुरावा केला जात आहे. एफआरपी थकविलेल्या तीन कारखान्यांना पूर्वीच नोटिसा दिल्या होत्या. त्यातील दोन कारखान्यांनी एफआरपीची पूर्ण रक्कम दिली. आता माझ्याकडून नव्याने नोटीस दिलेली नाही. यापूर्वी दिलेल्या नोटिसीनुसारच पूर्ण एफआरपीची रक्कम न दिलेल्या कारखान्याविरोधात साखर जप्तीची प्रक्रिया सुरू झाली आहे.

अविनाश सुभेदार, जिल्हाधिकारी

०००

थकीत एफआरपीप्रकरणी हायकोर्टात याचिका दाखल केली आहे. कोर्टाच्या आदेशानुसार एफआरपी न दिलेल्या कारखान्यांची साखर जप्तीची प्रक्रिया जिल्हाधिकाऱ्यांनी करणे आवश्यक आहे. मात्र, अजूनही वारणा साखर कारखान्याने पूर्ण एफआरपीची रक्कम दिलेला नाही. त्यांची साखर जप्त करून एफआरपीचे पैसे ऊस उत्पादकांना द्यावेत, अन्यथा जिल्हाधिकारी कार्यालयासमोर आंदोलन करणार आहे.

धनाजी चुडमुंगे, अध्यक्ष, अकुंश संघटना

००००

फोटो आहे....

कोल्हापूर

कोल्हापूर शहर राष्ट्रवादी युवक काँग्रेसच्या अध्यक्षपदी महेंद्र प्रदीप चव्हाण यांची निवड झाली आहे. राष्ट्रवादी युवकचे प्रदेशाध्यक्ष संग्राम कोते पाटील यांच्या हस्ते चव्हाण यांना निवडीचे पत्र देण्यात आले. चव्हाण हे शिवनेरी स्पोर्टस क्लबचे अध्यक्ष आहेत. राष्ट्रवादी युवक काँग्रेसचा नुकताच मेळावा झाला. याप्रसंगी त्यांना निवडीचे पत्र मिळाले.

बाबूराव पाटील

कोल्हापूर : शाहू कॉलनी बालाजी पार्क येथील बाबूराव महादेव पाटील (वय ८७) यांचे निधन झाले. त्यांच्या पश्चात बहिणी, भाचे असा परिवार आहे.

फोटो...

कसबा बावडा : येथील केआयटीज, आयएमईआरमधील सहायक प्राध्यापक प्रवीण शामराव जाधव यांना सावित्रीबाई फुले पुणे विद्यापीठाची पीएचडी जाहीर झाली. 'दक्षिण महाराष्ट्रातील गूळ उद्योगाचा खर्च आणि नफ्याचे विश्लेषण' हा त्यांच्या संशोधनाचा विषय होता. जाधव करवीर तालुक्यातील वळीवडे येथील आहेत. त्यांनी कोल्हापूर, सांगली, सातारा जिल्ह्यांतील गूळ उद्योगाचा अभ्यास केला आहे. त्यांना केआयटीचे अध्यक्ष भरत पाटील, उपाध्यक्ष सचिन कुलकर्णी, सचिव दीपक चौगुले, विश्वस्त सचिन मेनन, साजिद हुदली, आयएमईआरचे संचालक डॉ. सुजय खाडिलकर यांचे प्रोत्साहन लाभले.