फोटो आहे...
म. टा. प्रतिनिधी, कोल्हापूर
'विरोधी पक्षात असतानाही माजी पंतप्रधान अटलबिहारी वाजपेयी यांनी आदराचे स्थान मिळवले. सद्य:स्थितीत राजकारणाचा पाया ढासळत असताना वाजपेयींनी राजकीय प्रगल्भता दाखवली. उत्कृष्ट संसदपटू आणि कवी मनाच्या व्यक्तिमत्त्वाने देशाला नेहमीच प्रेरणा दिली. सर्वसामान्यांचा आधारवड असलेल्या व्यक्तीच्या निधनाने प्रेरणास्त्रोत हरपला,' अशा भावना व्यक्त करत माजी पंतप्रधान वाजपेयी यांना आदरांजली अर्पण करण्यात आली.
महापालिकेच्या वतीने माजी पंतप्रधान वाजयेपी यांना आदरांजली वाहण्यासाठी मंगळवारी राजर्षी शाहू सभागृहात सर्वपक्षीय शोकसभा झाली. अध्यक्षस्थानी महापौर शोभा बोंद्रे होत्या. यावेळी अनेक वक्त्यांनी वाजपेयींच्या आठवणींना उजाळा दिला.
महापौर बोंद्रे म्हणाल्या, 'वाजपेयींनी आपल्या राजकीय जीवनात सर्व पक्षांबरोबर सलोख्याचे संबंध निर्माण केले. शांत आणि संयमासोबत त्यांच्या कणखर वृत्तीचे अनेकदा देशाला दर्शन घडले. खुमासदार शैलीत भाषण करताना अनेकवेळा त्यांनी विरोधकांची मने जिंकली. कवितेच्या माध्यमातून हळवे मन अनकेदा अनुभवाला आले. म्हणूनच त्यांच्या आठवणी चिरंतणपणे राहतील.' उपमहापौर महेश सावंत म्हणाले, 'तीनवेळा पंतप्रधानपद भूषविताना वाजपेयींनी अनेक पक्षांची मोट बांधली. सत्ता स्थापन करताना सर्वांना सोबत घेऊन जाण्याच्या वृत्तीमुळे त्यांनी पाच वर्षांचा कार्यकाळ पूर्ण केला. अशा नेत्यांना आदरांजली अर्पण करण्यासाठी सर्वपक्षीय कार्यकर्त्ते उपस्थित आहेत, ही उपस्थिती त्यांना खरी श्रद्धांजली अर्पण करणारी आहे.'
ज्येष्ठ भाजप नेते सुभाष वोरा म्हणाले, 'वाजपेयी भाजपबरोबरच सर्वसामान्यांचे नेते होते. सर्वांशी असलेल्या सौहार्द संबंधामुळे त्यांच्यावर विरोधी पक्षानेही कधी टिकाटिपण्णी केली नाही. सामान्य कुटुंबातील नेतृत्वाने स्वत:च्या कर्तृत्वातून जनतेच्या मनात आदराचे स्थान निर्माण केले. अशा नेता पुन्हा होणार नाही.'
पश्चिम महाराष्ट्र देवस्थान समितीचे अध्यक्ष महेश जाधव म्हणाले, 'संसदेत एकेकाळी दोन खासदार असलेल्या भाजपने वाजपेयींच्या कुशल नेतृत्वामुळे सत्ता स्थापन केली. तीनवेळा पंतप्रधान होऊन त्यांनी आपल्या कार्याची झलक दाखवली. कोल्हापूरशी त्यांचे जिव्हाळ्याचे संबंध होते. त्यामुळेच त्यांच्या अस्थिकलश पालकमंत्री चंद्रकांत पाटील घेऊन येणार आहेत. शुक्रवारी (ता. २४) बिंदू चौकात सकाळी दहा वाजता अस्थिकलश दर्शनासाठी ठेवण्यात येणार आहे.'
जिल्हाध्यक्ष संदीप देसाई म्हणाले, 'वाजपेयींनी भाजप कार्यकर्त्यांना जगण्याची दिशा दिली. कोल्हापूरशी त्यांचा विशेष ऋणानुबंध होता. त्यामुळे अशा नेत्याच्या आठवणी कायम ठेवण्यासाठी शहरातील एखादा रस्ता किंवा चौकाला त्यांचे नाव द्यावे. तसेच महापालिकेच्या वतीने स्मारक उभारावे.'
शोकसभेत महिला व बालकल्याण सभापती सुरेखा शहा, शिक्षण सभापती अशोक जाधव, विरोधी पक्षनेते विलास वास्कर, भाजप गटनेते विजय सूर्यवंशी, माजी महापौर आर. के. पोवार, महिला काँग्रेसच्या सरलाताई पाटील, शिवसेनेचे जिल्हाप्रमुख संजय पवार, राष्ट्रवादीचे राजू लाटकर, लाला गायकवाड, माजी महापौर अॅड. महादेवराव आडगुळे, वसंतराव मुळीक, अशोक भंडारे, प्रा. विश्वास देशमुख, दिलीप पवार, नगरसेवक अजित ठाणेकर, धनंजय सावंत, किशोर घाटगे, बबन रानगे, भगवान काटे, बाबुराव कदम, प्रसाद पाटील यांनी श्रद्धांजलीपर मनोगत व्यक्त केले.
शोकसभेस शहर काँग्रेसचे अध्यक्ष प्रल्हाद चव्हाण, ताराराणी आघाडीचे गटनेते सत्यजित कदम, माजी नगरसेवक बाब पार्टे यांच्यासह सर्वपक्षीय कार्यकर्ते उपस्थित होते.
००००
