एसटीपीबाबत महापालिकेकडून विश्वा इन्फ्रास्ट्रक्चरला कारणे दाखवा नोटीस

Maruti.Patil

@timesgroup.com

tweet: @MarutipatilMT

कोल्हापूर : कसबा बावडा व दुधाळी येथील सांडपाणी प्रक्रिया प्रकल्प (एसटीपी) वेळत न केल्याबद्दल व पूर्ण क्षमतेने सुरू नसल्याने महापालिकेने दोन्ही कंपन्यांना सव्वा कोटीचा दंड केला आहे. कसबा बावडा प्लांटच्या विश्वा इन्फ्रास्ट्रक्चर प्रायव्हेट कंपनीला प्रतिदिन २५ हजाराप्रमाणे ८० लाख तर दुधाळी एसटीपी प्लांटचे काम करणाऱ्या लक्ष्मी सिव्हिल इंजिनीअरिंग कंपनीला ३५ लाख असा एक कोटी १५ लाखांचा दंड ठोठवला आहे. तसेच 'विश्वा' कंपनीला बावडा प्रकल्पाचे 'काम का काढून घेऊ नये' अशी कारणे दाखवा नोटीस बजावली आहे.

शहरातील सांडपाणी थेट पंचगंगा नदीमध्ये मिसळत असल्याने कसबा बावडा व दुधाळी येथे सांडपाणी प्रकल्प उभारण्यास सुरुवात झाली. यासाठी शहराची २०३४ ची लोकसंख्या गृहीत धरण्यात आली. कसबा बावडा येथील ७६ एमएलडी सांडपाणी प्रकल्प 'बांधा, वापरा आणि हस्तांतर करा' या तत्वावर विश्वा इन्फ्रास्ट्रक्चर प्रयाव्हेट कंपनीला देण्यात आला. तर दुधाळी येथील १७ एमएलडी प्रकल्प लक्ष्मी सिव्हिल इंजिनीअरिंग कंपनीला देण्यात आला. दोन्ही प्रकल्पांसाठी शहरातील प्रमुख नाले वळवण्याबरोबर तीन ठिकाणी पंपिंग स्टेशनही उभारण्यात येणार होते.

बावडा येथील प्रकल्पासाठी जयंती नाल्यातून ४० एमएलडी तर बापट कँप व लाइन बाजार येथील नाल्यातून ३५ एमएलडी सांडपाणी पंपिंगद्वारे उपसा करण्यात येणार होते. या कामाकरिता कंपनीला २०१३ पर्यंत मुदत दिली होती. कामाला विलंब होत गेल्यानंतर ही मुदत २०१६ पर्यंत वाढवण्यात आली. मुदतीमध्ये कंपनीला केवळ जयंती नाल्यातूनच सांडपाणी उपसा करण्यात यश आले. मात्र बापट कँप व लाइन बाजार येथील सांडपाणी उपसा करण्यात कंपनीला अपयश आले असल्याने थेट पंचगंगा नदीत सांडपाणी मिसळत आहे. याबाबत ठेकेदार कंपनीला महापालिकेने अनेकवेळा पत्रव्यवहार केला. पण कामाला गती मिळाली नाही. त्यामुळे महापालिकेने प्रतिदिन कंपनीला २५ हजारप्रमाणे ८० लाख रुपायंचा दंड करत कारणे दाखवा नोटीस बजावली आहे.

दुधाळी एसटीपी प्लांटबाबतही अशीच स्थिती राहिली आहे. १७ एमएलडीची प्रकल्प पूर्ण झालेला असला, तरी अद्याप पूर्ण क्षमतेने सांडपाण्यावर प्रक्रिया केली जात नाही. त्यामुळे दुधाळी येथे प्रकल्प उभारलेल्या लक्ष्मी इंजिनीअरिंग कंपनीला ३५ लाखांचा दंड केला आहे. दोन्ही कंपनीकडून हा दंड त्यांच्या बिलाच्या रकमेतून वजा करण्यात येणार आहे. एसटीपी प्रकल्प उभा करणाऱ्या दोन्ही कंपन्यांना महापालिकेने दंड केला असला, तरी पंचगंगा नदीचे प्रदूषण रोखण्यात अपयश आल्याने शहरासह नदीकाठावरील नागरिकांचे आरोग्य धोक्यात मात्र निश्चित आले आहे.

फटकाऱ्यानंतर महापालिकेचा दंड

शहरातील नाल्यामुळे पंचगंगा नदीच्या प्रदूषणात वाढ होत आहे. नदीचे प्रदूषण रोखण्यासाठी राष्ट्रीय हरित लवादाकडून वारंवार सूचना दिल्या जात आहे. त्याबाबत सुनावणीही घेतली जात आहे. महापालिका एसटीपी प्लांटचे काम सुरू असल्याचे वारंवार स्पष्ट करत आली आहे. पण जुलै महिन्यात झालेल्या सुनावणीवेळी राष्ट्रीय हरित लवादाने महापालिकेच्या कार्यपद्धतीवर जोरदार ताशेरे ओढले होते. हरित लवादाने खडे बोल सुनावल्यानंतर महापालिकेने कंपनीला दंड करण्याची कारवाई केली आहे.

१२० एमएलडी

शहरातील एकूण पाणीपुरवठा

८३ एमएलडी

सांडपाणी तयार होते

७६ एमएलडी

कसबा बावडा प्रकल्प क्षमता

१७ एमएलडी

दुधाळी एसटीपी

श्रावणात गोड मार्केटिंग बहरतेय

म. टा. प्रतिनिधी, कोल्हापूर

सणांची रेलचेल असलेल्या पवित्र श्रावण महिन्यात उपवासाचे पदार्थ, मिठाई, गोड पदार्थांची बाजारपेठ सज्ज झाली आहे. श्रावण महिन्यात बासुंदी, श्रीखंडाला मागणी वाढली असल्याने गोकुळ, वारणासह अन्य दूध संघ बाजारपेठ कॅश करण्यासाठी जोरदार तयारी केली आहे.

श्रावण महिन्यात दर सोमवारी व शुक्रवारी उपवास करणाऱ्यांची मोठी संख्या आहे. काही भाविक दिवसातून एक वेळ आहार घेऊन श्रावणी करतात. गुरुवार, शनिवार आणि रविवारी उपवास करणाऱ्यांची संख्या मोठी आहे. उपवासादिवशी खिचडी, साबूवडा, साबूचिवडा, उपवासाचे पॅटीस यांना मोठी मागणी आहे. मिठाई व बेकरी उत्पादकांनी हे पदार्थ तयार करण्यासाठी मोठी तयारी केली आहे. बेकरी मालकांनी बटाटे चिवडा, साबू चिवड्याचे दोन-तीन प्रकारात बाजारात उपलब्ध करून दिले आहेत. शेंगदाणा लाडू, शेंगदाणा चिक्कीबरोबर राजगिरा लाडू, राजगिरा चिक्कीला मोठी मागणी आहे.

उपवास सोडण्यासाठी गोड पदार्थांचा वापर केला जतो, त्यामुळे श्रावण महिन्यात श्रीखंड, बासुंदीला जास्त मागणी असते. कोल्हापुरातील गोकुळ, वारणा या दूध संघांच्या बासुंदी व श्रीखंडाला सर्वांत जास्त मागणी असते. गोकुळ व वारणा दूध संघाची वितरण व्यवस्था बळकट असल्याने कोल्हापूर शहरासह जिल्ह्यात श्रीखंड, बासुंदीची बाजारपेठ काबीज केली आहे. शहरात भारत डेअरीच्या स्फूर्ती बासुंदी, श्रीखंडाला मोठे मार्केट आहे. कपिलतीर्थ मार्केटमध्ये कपिल डेअरी, बासुंदीमध्येही अंजीर, सीताफळ बासुंदीला ग्राहकांकडून चांगला प्रतिसाद मिळतो. रबडी, रसमलाई या उत्तर भारतीय पदार्थ खरेदीमध्येही ग्राहक रुची दाखवू लागला आहे. रक्षाबंधन सणादिवशी श्रीखंड व बासुंदीला सर्वांत जास्त मागणी असते. तसेच मलई बर्फी, गुलकंद बर्फी या मिठाईच्या मागणीत वाढ असते. श्रावण महिन्यात स्वातंत्र्यदिन असल्याने जिलेबी, गुलाबजाम या सर्वमान्य गोड पदार्थांसाठीही मिठाई दुकानदारांनी जोरदार तयारी सुरू केली आहे. यंदा पनीर जिलेबी हे नवीन प्रकार बाजारात असणार आहे.

श्रावण महिन्यात फळांनीही मागणी असल्याने सफरचंद, केळी, डाळिंब, पपई, सीताफळांची आवक मोठ्या प्रमाणात झाली आहे. श्रावण, भाद्रपद, अश्विन महिन्यातील गणेशोत्सव, नवरात्रातही फळांना मोठी मागणी असल्याचे फळ विक्रेत्यांनी सांगितले.

००

कोट...

बचत गटांनी राजगिरा लाडू तयार करण्यात मोठी आघाडी घेतली आहे. उपवासासाठी फिंगर चिप्स, शेंगदाणा उसळीलाही मागणी आहे. तरुण पिढीतही उपवास करण्याचे प्रमाण वाढल्याने साबूवडा पॅटीस, फिंगर चिप्सना मागणी वाढली आहे.

चंद्रकांत वडगावकर, बेकरी व्यावसायिक

०००००

कोल्हापूर: ऊर्जा सोशल अँड एज्युकेशन वेलफेअर फाऊंडेशनच्यावतीने शालेय मुलींना मोफत सॅनिटरी नॅपकीन वाटपाचा कार्यक्रम झाला. मिरजकर तिकटी येथील नूतन मराठी विद्यालयात हा कार्यक्रम झाला. संस्थेच्या अध्यक्षा उज्ज्वला जाधव कार्यक्रमाच्या अध्यक्षस्थानी होत्या. नूतन मराठी विद्यालयाचे मुख्याध्यापक सं. ता. गायकवाड, संस्थेचे समन्वयक अमृता बराडे आदी उपस्थित होत्या.

म. टा. प्रतिनिधी, कोल्हापूर

महाराष्ट्रातील रामोशी व बेडर समाजाचा एसटी प्रवर्गात समावेश करावा, अशी रामोशी व बेडर समाजाची मागणी आहे. याबाबत सरकारने तातडीने संघटनेशी चर्चा करावी, अन्यथा जय मल्हार क्रांती संघटनेच्या वतीने गुरुवारी (ता. १६) ठिकठिकाणी महामार्ग रोखून धरणार असल्याचा इशारा देण्यात आला आहे. रामोशी व बेडर समाजाला कर्नाटकसह नऊ राज्यांत एसटी प्रवर्गातून आरक्षण दिले जाते. बापट कमिशननेही २००६ मध्ये रामोशी समाजाला एसटी प्रवर्गात समाविष्ट करण्याची शिफारस केली आहे. महाराष्ट्रात मात्र या समाजाचा एनटी प्रवर्गात समावेश केल्याने समाजावर अन्याय होत असल्याची भावना आहे. सरकारने याकडे लक्ष न दिल्यास कोल्हापूर जिल्ह्यात १६ ऑगस्टला महामार्ग रोको केला जाईल, तर सांगली जिल्ह्यात २० ऑगस्टला महामार्ग रोखला जाईल, असा इशारा संघटनेने दिला आहे.

म. टा. प्रतिनिधी,, कोल्हापूर

आर्थिकदृष्ट्या संपन्न, आरोग्यविषयक सुविधांची उपलब्धता आणि शैक्षणिक, आर्थिक, राजकीय व कृषी क्षेत्रात सुधारित म्हणून ओळख असलेले तालुके मुलींच्या जन्मदरात पिछाडीवर असल्याचे पुन्हा एकदा समोर आले आहे. उलट डोंगराळी भाग आणि शहरी सुविधांपासून वंचित तालुक्यात मुलींच्या जन्मदराची स्थिती चांगली असल्याचा ताजा अहवाल आहे. जिल्हा परिषदेच्या आरोग्य विभागाने महिला-पुरुष जन्मदराचा जून २०१८ अखेरचा अहवाल प्रसिध्द केला आहे. यात जिल्ह्यामध्ये दर हजारी मुलांमागे ९३२ असा मुलींचा जन्म दर आहे. तर चंदगड तालुक्यात देच प्रमाण हजार मुलांमागे ९८९ मुली इतके आहे. हा तालुका जिल्ह्यात प्रथम क्रमांकावर आहे. वंशाचा दिवा मुलगा नव्हे तर मुलगी ही भावना समाजमनात बळावत असल्याचेच हे निदर्शक आहे.

मुलींच्या जन्मदरात जिल्ह्यातील सहा तालुक्यांची स्थिती समाधानकारक आहे. यात चंदगडसह गडहिंग्लज, गगनबावडा, आजरा, शाहूवाडी आणि हातकणंगले तालुक्यांचा समावेश आहे. उलट शहरी भागालगतची व सधन तालुके म्हणून ओळखल्या जाणाऱ्या भागात मुलींचा जन्मदर कमी आहे. कागल, पन्हाळा, भुदरगड, राधानगरी, करवीर आणि शिरोळ या तालुक्यांमध्ये तुलनेत मुलींच्या जन्मदराचा टक्का आजही कमी आहे. शिरोळ तालुक्यात मुलींचे प्रमाण ९११ तर करवीरमध्ये ९१२ इतके आहे. पश्चिम महाराष्ट्र हा सुधारलेला प्रदेश म्हणून ओळखला जातो. शिक्षण, आरोग्य सुविधांपासून अर्थार्जनापर्यंत कोल्हापूर, सांगली, सातारा, पुणे हे जिल्हे पुढारलेले आहेत. मात्र स्त्रीभ्रूण हत्या करण्यात हेच जिल्हे पुढे असल्याची धक्कादायक माहिती पुढे आली होती. २००१ मध्ये दर हजारी मुलींचे प्रमाण ८३९ इतके कमी झाले होते.

गर्भातच कळ्या खुडण्याच्या अमानवी कृत्याला पायबंद घालण्यासाठी प्रशासकीय आणि सामाजिक पातळीवर प्रयत्न झाले. एक व दोन मुलींवर शस्त्रक्रिया करणाऱ्या दाम्पत्यांना प्रोत्साहनपर बक्षीस योजना राबविल्या. दुसरीकडे मुलगाच वंशाचा दिवा ही मानसिकता हळूहळू कमी होत असल्याचे जाणकारांचे म्हणणे आहे. या साऱ्याचे फलित म्हणून गेल्या दशकभरात मुलींच्या जन्मदराचा टक्का वाढताना दिसत आहे. जिल्हा परिषदेमार्फत सातत्याने महिला व पुरुष जन्मदराचा अहवाल प्रसिद्ध केला जातो. आरोग्य विभागाच्या जून महिन्यातील अहवालानुसार चंदगडमध्ये एक हजार मुलामागे ९८९ मुली इतके प्रमाण आढळले आहे. करवीर, शिरोळमध्ये अन्य तालुक्यांच्या तुलनेत मुलींच्या जन्मदर कमी आहे. मात्र गेल्या काही वर्षात या तालुक्यातही मुलींच्या जन्मदराच्या प्रमाणात वाढ होत असल्याचे दिसते.

.......................

सहा तालुक्यात जन्मदराची स्थिती चांगली

तालुके मुले मुली एकूण लिंग प्रमाण

चंदगड ८१०८ ८०१५ १६१२३ ९८९

गडहिंग्लज ७८९३ ७७०७ १५६०० ९७६

गगनबावडा १७२४ १६६५ ३३८९ ९६६

आजरा ३७६६ ३६०५ ७३७१ ९५७

शाहूवाडी ७२५८ ६८८६ १४१४४ ९४९

हातकणंगले २४९४० २३२३८ ४८१७८ ९३२

.............

मुलींचा जन्मदर कमी असलेले तालुके

तालुका मुले मुली एकूण लिंग प्रमाण

कागल १०१६७ ९४३८ १९६०५ ९२८

पन्हाळा १०७८८ ९९५२ २०७४० ९२३

भुदरगड ६५१७ ५९६७ १२४८४ ९१६

राधानगरी ७९२७ ७२३५ १५१६२ ९१३

शिरोळ १३०९९ ११९३६ २५०३५ ९११

................................................

कोल्हापूर: इंडोनेशिया जकार्ता येथे होणाऱ्या १८ व्या एशियन गेम्स स्पर्धेसाठी बास्केटबॉलपटू स्नेहल विद्याधर बेंडके हिची पंच म्हणून निवड करण्यात आली. जागतिक महासंघाकडून ही निवड जाहीर करण्यात आली. ऑगस्ट महिन्यात होणाऱ्या स्पर्धेसाठी ती शुक्रवारी (ता.१०) रोजी रवाना झाली. स्पर्धेसाठी पंच म्हणून निवड होणारी ती पहिली भारतीय महिला आहे. ऑस्ट्रेलिया येथे झालेल्या राष्ट्रकूल स्पर्धेमध्ये तिने बास्केटबॉल क्रीडा प्रकारात तिने उपांत्य फेरीपर्यंत मजल मारली होती. तिला आई वृंदा, वडील विद्याधर बेंडके, भारतीय बास्केटबॉल सहासंघ व महाराष्ट्र बास्केटबॉल संघटनेचे पदाधिकारी यांचे मार्गदर्शन आणि सहकार्य लाभले.

म. टा. प्रतिनिधी, कोल्हापूर

गुंतवणूक केलेली रक्कम नऊ वर्षांत दुप्पट करुन देण्याच्या आमिषाने गुंतवणूकदारांची फसवणूक केल्याप्रकरणी मुंबईच्या फिनॅमिनल कंपनीच्या १८ संचालकांविरोधात शाहूपुरी पोलिसांत शुक्रवारी गुन्हा दाखल करण्यात आला. या प्रकरणात सुमारे ७०० गुंतवणूकदारांची १७ लाख १४ हजार रुपयांची फसवणूक झाली आहे. फसवणूक झालेल्यांच्या संख्येत आणखी वाढ होण्याची शक्यता आहे. या प्रकरणी अरुणा अरुण यादव (वय ६०, रा. काळकाई गल्ली, शिवाजी पेठ) यांनी शाहुपुरीत फिर्याद दाखल केली आहे. या प्रकरणी आर्थिक गुन्हा शाखेकडून तपास सुरू झाला आहे.

या प्रकरणी फिनॅमिनल कंपनीचे अध्यक्ष नंदलाल केशर, मीनबहाद्दूर केशर सिंग, श्रेना श्रीधरन नायर, मानतोष हरिनाथ विश्वकर्मा, फुला भिला पाटील (रा. उस्मानपुरा, औरंगाबाद), कार्यकारी संचालक विलास नारकर, मोनिका सावंत, सभेस्टीयन रॅपेल मलिकन, थेके माडाथील, श्रीधरन पद्मनाभन नायर, जोसेफ लाझर, कन्नमपूजन, संजय तुकाराम पाटील (सर्व रा. टोयाटो शोरुममसमोर, लिंकरोड, मालाड, मुंबई), विष्णू शंकर सोनवणे (रा. सन्मान कॉलनी, तरोडा नाका, नांदेड), प्रदीप मल्लिक, अरुणकुमार दिघे, दिवेकर, इनामदार (पूर्ण नाव नाही), शंकर पाटील (रा. शाहूवाडी), बळवंत कळंबे (रा. मलकापूर) अशा १८ जणांवर महाराष्ट्र वित्तीय ठेवीदार संरक्षण कायद्यानुसार फसवणुकीचा गुन्हा दाखल करण्यात आला आहे.

स्टेशन रोडवरील प्रभाकर प्लाझा येथील तिसऱ्या मजल्यावर फिनॅमिनल कंपनीचे कार्यालय आहे. या कंपनीच्या अधिकाऱ्यांनी सुमारे ७०० जणांचा मोफत आरोग्य विमा, वैयक्तिक विमा, मोफत आरोग्य तपासणी, मोफत अपघाती विमा उतरविला. त्यासाठी ३ जून, २००७ पासून गुंतवणूकदारांकडून दोन हजार रुपयांपासून ते पाच हजारापर्यंतची रक्कम घेतली. गुंतवणूकदारांना नऊ वर्षानंतर व्याजासह दामदुप्पट रक्कम देण्याचे आश्वासन कंपनीने दिले होते. मात्र मुदत संपूनही परतावा मिळाला नसल्याने फसवणूक झाल्याचे गुंतवणूकदारांच्या लक्षात आले. तक्रारदार अरुणा यादव यांनी ३ लाख १८ हजार रुपये आणि अन्य गुंतवणूकदारांनी १३ लाख ९६ हजार रुपयांची गुंतवणूक केली आहे.

२२ लाखाची ऑनलाइन फसवणूक

दुसऱ्या प्रकरणात ८ कोटी ४० लाखाचे कर्ज मिळवून देण्याच्या आमिषाने २२ लाख ३७ हजाराची ऑनलाइन फसवणूक झाल्याचा प्रकार घडला आहे. या प्रकरणी गजानन राजाराम भोसले (वय ६३, रा. शिवनेरी प्लॉट नं, ५, श्रीकृष्ण कॉलनी, संभाजीनगर) यांनी लक्ष्मीपुरी पोलिसांत फिर्याद दिली असून, तिघांवर गुन्हा दाखल झाला आहे. भोसले प्लॉट विक्रीचा व्यवसाय करतात. त्यांनी एका जाहिरातीनुसार गोरख शर्मा, हर्षवर्धन राणा आणि प्रिया अशा तिघांना दूरध्वनीवरुन संपर्क साधला. या तिघांनी त्यांना ८ कोटी, ४० लाखांचे कर्ज मिळवून देण्याचे आश्वासन दिले. त्यासाठी प्रोसेसिंग फी म्हणून भोसले यांनी १३ डिसेंबर, २०१७ ते २ जुलै, २०१८ पर्यंत टप्प्याटप्प्याने २२ लाख ३७ हजार ९८० रुपये आरटीजीएस आणि एनइएफटीद्वारे भरले. मात्र कर्ज मंजूर झाले नसल्याने फसवणूक झाल्याचे त्याच्या लक्षात आले. लक्ष्मीपुरी पोलिसांनी या प्रकरणी संबंधित अकाउंटची चौकशी सुरु केली आहे.

म. टा. प्रतिनिधी, कोल्हापूर

जिल्ह्यात सर्वाधिक २५ मिलीमीटर पावसाची नोंद शाहूवाडी तालुक्यात झाली. शहरात दिवसभर पावसाची उघडझाप होती. जोरदार पावसाची सर आणि त्यानंतर उघडीप अशी स्थिती आज दिवसभर अनुभवायास मिळाली. पावसामुळे जिल्ह्यातील ११ बंधारे अद्याप पाण्याखाली आहेत. त्यामध्ये पंचगंगा नदीवरील शिंगणापूर, राजाराम, सुर्वे, रुई, इचलकरंजी तेरवाड, शिरोळ या सात बंधाऱ्याचा समावेश आहे. तसेच भोगावती नदीवरील हळदी, खडक कोगे हे दोन बंधारे तर वारणा नदीवरील चिंचोली व माणगांव हे दोन बंधारे पाण्याखाली आहेत. राजाराम बंधाऱ्यावर पाण्याची पातळी १९ फूट नऊ इंच इतकी होती. दरम्यान गेल्या २४ तासांत रविवारी सकाळी आठ वाजेपर्यंत तालुक्यातील पावसाची आकडेवारी अशी, हातकणंगले १.२५ मिली मीटर, शिरोळ ०.२८, पन्हाळा ३.७१, राधानगरी १२.१७, गगनबावडा १२.००, करवीर ३.३६, कागल २.७१, गडहिंग्जल १.२८, भुदरगड ८.८०, आजरा ६.५०, चंदगड १०.०० मिलीमीटर.

गडहिंग्लज : येथील जयश्री प्रकाश मगदूम (वय ४४) यांचे निधन झाले. प्रकाश सुबराव मगदूम यांच्या त्या पत्नी होत.

आज 'प्रधान मंत्री आवास'चा

प्रस्ताव महासभेत चर्चेला

म. टा. प्रतिनिधी, कोल्हापूर

महापालिकेच्या तपोवन येथील जागेवर प्रधान मंत्री आवास योजनेंतर्गत उभारण्यात येणाऱ्या गृहप्रकल्पाचा प्रस्ताव सोमवारी (ता. १३) होणाऱ्या महासभेत चर्चेला येणार आहे. महापालिकेच्यावतीने प्रथमच या योजनेतंर्गत गृहप्रकल्प उभारण्यात येणार असून महासभेने प्रस्तावाला मंजुरी दिल्यानंतर राज्य सरकारकडे प्रस्ताव पाठवण्यात येणार आहे. याबरोबरच राजर्षी शाहू महाराज यांना भारतरत्न पुरस्कार देण्याचा ठराव आणि ज्येष्ठ विरंगुळा केंद्रास जागा देण्याच्या प्रस्तावावर चर्चा होणार आहे.

महासभा महापालिकेच्या राजर्षी सभागृहात आज दुपारी १२ वाजता होणार आहे. महापालिकेच्यावतीने प्रधान मंत्री आवास योजनेतंर्गत तपोवन येथील आठ हजार स्क्वेअर फूट जागेवर २३४ युनिटचा गृहप्रकल्प तयार करण्याचा प्रस्ताव प्रशासनाने तयार केला आहे. महापालिकेच्यावतीने तयार करण्यात येणाऱ्या प्रकल्पातील प्रत्येक युनिटची किंमत अकरा लाख ४० हजार रुपये असून यासाठी लाभार्थ्यांना अडीच लाखांचे अनुदान मिळणार आहे. ज्या लाभार्थ्यांचे घरी नाही आणि ज्यांचे वार्षिक उत्पन्न तीन लाखांपेक्षा कमी आहे, अशा लाभार्थ्यांची निवड करण्यात येणार आहे. प्रशासनाने त्यासाठी २४०० लाभार्थ्यांची यादी तयार केली असून सोडतद्वारे त्यांची निवड करण्यात येणार आहे. हा संपूर्ण प्रस्ताव आज होणाऱ्या महासभेसमोर ठेवण्यात येईल. महासभेने प्रस्तावाला मंजुरी दिल्यानंतर राज्य सरकारला प्रस्ताव सादर करण्यात येणार आहे. ज्या लाभार्थ्यांची स्वमालकीची जागा आहे, आशा आर्थिकदृष्ट्या मागास लाभार्थ्यांना प्रधान मंत्री आवास योजनेतंर्गत निवड केली जाणार आहे. त्यासाठी १०७ घरांचा प्रस्ताव तयार करण्यात आला आहे.

Sachin.patil1@timesgroup.com

Tweet-sachinpMT

गेल्या सात महिन्यांपासून कोल्हापूरकरांना डेंगीने हैराण आहे. मोठ्या संख्येने डेंगीसदृश्य रुग्ण आढळले आहेत. डेंगीमुळे स्वच्छतेसाठी महानगरपालिकेकडून उपाययोजना सुरू असताना स्वाइन फ्लू सदृश्य लक्षणे रुग्णांमध्ये आढळल्याने त्याची पसरण्याची शक्यता वाढली आहे. अत्यंत धोकादायक मानल्या जाणाऱ्या स्वाइन फ्लूपासून बचावासाठी प्रतिबंधात्मक काळजी घेणे गरजेचे आहे.

गेल्यावर्षी स्वाइन फ्लूच्या साथीने कोल्हापूरकरांना हैराण केले होते. यामध्ये तब्बल ६३ जणांचा बळी गेला होता. देशात २००९ पासून स्वाइन फ्लूने थैमान घातले आहे. स्वाइन फ्लूचे एच- १, एन- १ या विषाणूंची एका व्यक्तीपासून दुसऱ्याला लागू होते. संसर्ग फैलावत असल्याने या रोगाचा धोका जास्त आहे. विषाणूचा संसर्ग झाल्यानंतर पहिल्या ते चौथ्या दिवसांपर्यंत त्याची लक्षणे दिसून येतात. स्वाइन फ्लू संसर्गजन्य आजार असल्याने एच १ - एन १ विषाणू बाधित व्यक्तीच्या खोकण्यातून किंवा शिंकण्यातून हा आजार फैलावतो. तसेच बाधित व्यक्तीच्या नाकावाटे किंवा तोंडावाटे बाहेर निघणाऱ्या कफच्या माध्यमातून ती व्यक्ती, ज्या ठिकाणी स्पर्श करेल, त्या ठिकाणी संसर्ग होतो. स्वाइन फ्लूत प्रामुख्याने थंडी वाजून ताप येणे, कमालीचा थकवा, स्नायुदुखी, डोकेदुखी, घसादुखी ही लक्षणे आढळून येतात. काही लक्षणे सात दिवसांपर्यंत टिकतात. इतर आजारांतही स्वाइन फ्लू सदृश्य लक्षणे आढळतात. त्यामुळे चाचणी करून घेण्यास प्राधान्य द्यावे. बारा वर्षाआतील मुले, वयोवृद्ध, गरोदर माता यांना अधिक धोका असल्याने त्यांनी विशेषतः काळजी घेणे गरजेचे आहे. याशिवाय, ज्यांना फुफ्फुसाचे विकार, दमा, तीव्र हृदयविकार, मूत्रपिंड व यकृताचे विकार आहेत, अशांना अधिक धोका संभवतो.

दक्षता कशी घ्यावी?

स्वाइन फ्लूची लक्षणे आढळताच प्रतिबंधात्मक औषधे घेण्यास प्राधान्य द्यावे. तत्काळ औषधोपचार मिळाल्यास त्याला अटकाव घालणे शक्य आहे. स्वाइन फ्लूचा प्रसार आणि प्रचार थांबवण्यासाठी तोंड आणि नाक पूर्णतः झाकून बाहेर पडावे. साबणाने हात वारंवार धुवावेत. दरवाज्याच्या कड्या, रिमोट यांसारख्या वस्तू नीट पुसून घ्याव्यात. शक्यतो घराबाहेर पडणे टाळावे. हातरुमालाचा वापर करावा. शरीराची प्रतिकारशक्ती वाढवणारे पदार्थ आवर्जून खावेत. आहारात फळे व भाज्या याचा वापर वाढवावा. तसेच भाज्या स्वच्छ धुवून घ्याव्यात. नियमित व्यायाम करावा. आहारात 'ब'१२ जीवनसत्व असणारे पदार्थ वाढवावेत. तसेच ताप व खोकला अंगावर न काढता त्वरित फमिली डॉक्टरांशी संपर्क साधावा.

स्वाइन फ्लूची लक्षणे आढळताच नागरिकांनी घाबरून जाऊ नये. योग्य उपचार तसेच प्रतिबंधात्मक काळजी घेतल्यास त्यावर मात करता येते. त्यासाठी नागरिकांनी काळजी घेणे, वेळेत डॉक्टरांच्या सल्ल्याने औषधोपचार घेणे गरजेचे आहे. त्यामुळे स्वाइन फ्लूला न घाबरता त्याच्याशी लढण्याची तयारी ठेवणे महत्वाचे आहे.

- डॉ. विकास बनसोडे

- राज्यात एच १, एन १ संक्रमणाने अधिक मृत्यू

- गेल्या दोन वर्षात देशात ११०० हून अधिक स्वाइन फ्लूमुळे मृत्यू

- राज्यात गेल्या दीड वर्षात ४८८ हून अधिक जणांना लागण

- राज्यात २०१६ पासून २२१८६ जण स्वाइन फ्लूसदृश्य

- दगावणाऱ्यात २५ ते ५० वयोगटातील संख्या अधिक

- देशात स्वाइन फ्लूत महाराष्ट्र, गुजरात आघाडीवर

सांगली कनेक्शनमध्ये

'शिवप्रतिष्ठान'चीही चर्चा

म. टा. प्रतिनिधी, सांगली

मुंबईतील नालासोपारामध्ये दहशतवादी विरोधी पथकाने स्फोटके जप्त केल्यानंतर अटक केलेल्या सुधन्वा गोंधळेकरचा शिवप्रतिष्ठानशी संबध असल्याचे समोर आले आणि सांगली चर्चेत आली. 'सनातन'च्या साधकांवर कारवाई झाली की, त्याचे कनेक्शन सांगलीशी जुळते. मडगाव बॉंम्बस्फोट, कॉम्रेड गोविंद पानसरे यांची हत्या, एम. एस. कलबुर्गी, पत्रकार गौरी लंकेश यांच्या हत्यांच्या तपासादरम्यान कर्नाटक पोलिसांनी सांगलीला येरझार्‍या घातल्या आहेत. कॉम्रेड पानसरे यांच्या हत्त्येप्रकरणी तर सांगलीच्या समीर गायकवाड याला अटक करण्यात आली होती. एरवी 'सनातन'साधकांच्या पातळीवर असलेल्या सांगली कनेक्शनमध्ये नालासोपाऱ्यातील कारवाईनंतर सनातनसह 'शिवप्रतिष्ठान'चे नाव जोडले जाऊ लागले आहे.

गोव्यातील मडगाव येथील बॉम्बस्फोटाच्या घटनेनंतर सर्वप्रथम सांगली कनेक्शन अधिक चर्चेत आले. सुमारे दहा वर्षांपूर्वी विजयादशमीच्या दिवशी मडगावात एका स्कूटरमध्ये बॉंबस्फोट झाला. त्या स्फोटात सनातचा साधक मलगोंड पाटील हा ठार झाला. मलगोंडा पाटील याचा धागा पकडून पोलिसांनी तपास पुढे नेल्यानंतर मलगोंड हा जत तालुक्यातील काराजगी येथील मूळचा राहणारा असल्याचे समोर आले. त्याने सांगलीत काही काळ 'सनातन प्रभात'चा पत्रकार म्हणूनही काम केले होते. बॉंबस्फोट घडवून आणताना मलगोंडाचा मृत्यू झाला असावा, असा संशय घेऊन एनआयएने तपासाला गती दिली. त्यानंतर मलगोंडचा चुलतभाऊ रुद्रगौडा पाटील आणि कवठेमहांकाळ तालुक्यातील ढालगाव येथील प्रविण लिमकर यांची नावे पुढे आली. हे दोघेही 'सनातन'शी संबधित असल्याचे सांगितले जात आहे. या पार्श्वभूमीवर समोर आलेले नवे सांगली कनेक्शन गंभीर घटनांशी पुन्हा जोडले जाऊ लागले आहे.

जेष्ठ विचारवंत, कॉम्रेड गोविंद पानसरे यांच्या हत्त्येप्रकरणी सांगलीतील मोती चौकात राहणार्‍या समीर गायकवाड याला अटक झाली होती. जामिनावर सुटल्यानंतर तो एक दिवसासाठी सांगलीतील घरी आला होता. मडगाव स्फोटाच्या पार्श्वभूमीवर तपास करताना एनआयएच्या पथकाने खूप प्रयत्न केले. स्फोटाची चाचणी घेतल्याची ठिकाणे शोधली. मलगोंड आणि रुद्र पाटील यांच्या घराचा परिसर कुठे आणि कसा आहे हे पाहिले. त्या ठिकाणच्या निर्जन परिसरातही काही गोष्टींची चाचणी झाल्याचा संशय व्यक्त केला. परंतु अद्यापही रुद्र पाटील पथकाच्या हाती लागलेला नाही. तो फरारी असतानाच त्याचे नाव कॉम्रेड पानसरे यांच्या प्रकरणात समोर आले. त्यानंतरही पोलिस येऊन गेले. बेंगळुरूमध्ये पत्रकार गौरी लंकेश यांची हत्या झाल्यानंतर आणि त्याआधी प्रा. कलबुर्गी यांची हत्या या दोन्ही प्रकरणांतही कर्नाटकच्या विशेष पथकाने जत तालुक्यातील काराजगी गावात तपास केल्याची चर्चा होती. आता नालासोपारा येथील ताज्या प्रकरणाने पुन्हा सांगली चर्चेत आली आहे. यावेळी एटीएसने अटक केलेल्या सुधन्वा गोंधळेकर याच्यामुळे. तो मूळ साताऱ्यातील आहे, परंतु त्याचा 'शिवप्रतिष्ठान'शी संबध असल्याचे सांगितले जात आहे.

दरम्यान, शिवप्रतिष्ठानचे कार्यवाहांनी गोंधळेकरचा आणि शिवप्रतिष्ठानचा गेल्या चार वर्षांपासून संबध नसल्याचे सांगितले आहे. कामाच्या व्यापामुळे आपण प्रतिष्ठानच्या कामाला अधिक वेळ देऊ शकत नसल्याचे सांगून तो दुरावला आहे. त्यानंतर तो प्रतिष्ठानच्या कोणत्याही उपकम्रात सहभागी नाही. कोणत्याही माध्यमातून त्याचा संपर्क झालेला नसल्याचे चौगुले यांनी स्पष्ट केले आहे.

म. टा. प्रतिनिधी, कोल्हापूर

श्रावणसरींनी दिवसभर जनजीवन विस्कळीत झाले असतानाही भाजी खरेदीसाठी ग्राहकांनी गर्दी केल्याने मंडई हाउसफुल्ल झाली. भाज्यांची मोठी आवक झाली असताना घेवडा, भेंडी, वाटाणा यांच्या दरातही प्रतिकिलो दहा रुपयांनी वाढ झाली आहे. मात्र पालेभाज्यांचे दर स्थिर राहिले.

श्रावण महिन्यात शाकाहाराला प्राधान्य दिले जात असल्याने रोजच्या आहारात फळभाज्या आणि पालेभाज्यांचा समावेश असतो. त्यामुळे श्रावणाच्या पहिल्या दिवशी भाजीखरेदीसाठी ग्राहकांची मोठी गर्दी झाली. उपवासाच्या पदार्थांत बटाटा, मिरचीचा वापर मोठ्या प्रमाणावर असतो. तरीही बटाट्याचा दर प्रतिकिलो ३० रुपयांवर स्थिर होता. पण घेवडा, भेंडी, वाटाणा, वांगी यांच्या दरात वाढ झाली आहे. लाल वांग्याचा दर प्रतिकिलो ४० रुपये असला तरी हिरव्या वांग्याचा दर प्रतिकिलो ८० रुपये होता. हिरव्या वांग्याच्या दरात प्रतिकिलो दहा रुपयांनी वाढ झाली आहे. श्रावण सोमवारी मुळ्याचा वापर जेवणात होत असल्याने दहा ते पंधरा रुपयाला दोन अशी मुळ्याची मोठी विक्री झाली. दोडका, कारली यांचे दर स्थिर आहेत. पालेभाज्यांचीही मोठी आवक झाली असून मेथी पेंडीचा दर दहा रुपयांना एक तर पंधरा रुपयांना दोन असा होता. शेपू, कांदा पात व कोथंबिरीची आवक मोठ्या प्रमाणात झाल्याने आणि सततच्या पावसामुळे दर चांगलेच घसरले आहेत. दहा रुपयांना दोन शेपू, कांदा व कोथंबिरीची पेंडीची विक्री झाली. श्रावणातील पहिला सण नागपंचमीचा असल्याने थालीपीठ तयार करण्यासाठी मिरचीचा वापर जास्त असल्याने मिरचीची प्रतिकिलो ४० ते ६० रुपये दराने विक्री होत होती. ओल्या वाटाण्यांच्या विक्रीलाही चांगला प्रतिसाद मिळाला.

उपवासामुळे फळांना

मोठी मागणी

श्रावण महिन्यातील उपवासामुळे फळांना मोठी मागणी वाढली आहे. सफरचंदाची चांगली आवक झाली असून परदेशी व देशी जातीच्या सफरचंदांना मोठी मागणी आहे. परदेशी सफरचंदाचा दर प्रतिकिलो १७० ते २०० रुपये किलो आहे. सिमला सफरचंदाचे आगमन झाले असून प्रतिकिलो १०० ते १५० रुपये दर आहे. रॉयल जातीच्या फळांत रसांचे प्रमाण जास्त असल्याने चोखंदळ ग्राहक सिमला सफरचंदाची मागणी करत आहे. डाळिंबाची बारामती, कर्नाटक, सोलापूर, पंढरपूर, आटपाडी, लोणंद, निरा, श्रीगोंदा येथून मोठ्या प्रमाणात आवक झाली आहे. प्रतिकिलो ५० ते ९० रुपये दराने डाळिंबांची विक्री होत आहे. सांगली जिल्ह्यातील अंजनी, पंढरपूर, सोलापूरसह बेंगळुरूहून सिताफळाची आवक झाली आहे. प्रतिकिलो ४० ते ७० रुपये दर आहे. मोसंबीची आवक झाली असून चिनी व पावली छाप अशा दोन जातींची मोसंबी आहेत. आंध्र प्रदेशातून आलेली चिनी जातीची मोसंबी चवीला आंबट असून पावलीछाप मोसंबीची आवक औरंगाबादमधून झाली आहे. प्रतिकिलो २० ते ५० रुपये असा दर आहे. जवारी व देशी केळीला सर्वात जास्त मागणी होत आहे. जिल्ह्यातील ग्रामीण भागातून मोठ्या प्रमाणात केळीची आवक होत आहे, अशी माहिती होलसेल फळविक्रेते जुबेर बागवान यांनी दिली.

फळभाज्यांचे दर (प्रतिकिलो, रुपयांत)

वांगी ४० ते ८०

टोमॅटो १५ ते २०

भेंडी ६०

ढबू मिरची ५० ते ६०

गवार ८०

दोडका ६० ते ८०

कारली ६०

वरणा ४० ते ६०

ओली मिरची ४० ते ६०

बटाटा ३०

लसूण ३०

घेवडा ६० ते ७०

फ्लॉवर १५ ते ४० (नग)

कोबी १० ते ३० (नग)

मुळा ५ ते १० (नग)

पालेभाजी दर (पेंडी, रुपयांत)

मेथी १०

शेपू ५

कांदा पात ५

०००००००

फळांचे दर (प्रतिकिलो, रुपयांत)

सफरंचद १५० ते २००

डाळिंब ५० ते ९०

पपई ३५ ते ४० (नग)

केळी २० ते ६० (डझन)

जवारी केळी ३० ते ७० (डझन)

फोटो आहे.

जिल्ह्यातील ११ बंधारे पाण्याखाली, हवेत कमालीचा गारवा

म. टा. प्रतिनिधी, कोल्हापूर

शहर आणि परिसरात रविवारी दिवसभर पावसाची संततधार राहिली. यामुळे हवेत कमालीचा गारवा निर्माण झाला होता. दिवसभर पावसाचा जोर कायम राहिल्याने पंचगंगेसह जिल्ह्यातील सर्वच नद्यांच्या पाणी पातळीत वाढ झाली. ११ बंधारे पाण्याखाली गेले असून या बंधाऱ्यांवरील वाहतूक पर्यायी मार्गाने वळविण्यात आली आहे. सकाळी ९ वाजता राजाराम बंधाऱ्यावर २१ फूट १ इंच पाणी राहिले. सकाळी आठ वाजेपर्यंत झालेल्या चोवीस तासात एकूण २३६ मिलीमीटर पावसाची नोंद झाली.

शनिवारी सायंकाळी चारनंतर आकाश ढगांनी भरून आले. त्यानंतर पावसाची रिपरिप सुरू झाली, तर रात्री पावसाचा जोर वाढला. मध्यरात्री जोरदार सरी कोसळल्या. रविवारी पहाटेपासून पाऊस पडत राहिला. पावसामुळे लक्ष्मीपुरी, कसबा बावडा येथील आठवडा बाजारातील विक्रेते, ग्राहकांची तारांबळ उडाली. महाव्दार रोड, शिवाजी चौक, राजारामपुरी, लक्ष्मीपुरी, गांधीनगर येथील फेरीवाल्यांना पावसापासून बचाव करून व्यवसाय करावा लागला. ढगाळ वातावरण, हवेतील गारव्यामुळे ग्राहकांची संख्याही कमी राहिली. त्याचा परिणाम बाजारपेठेतील उलाढालीवर झाला. धान्य, फळ बाजारातही मंदीचे वातावरण राहिले.

दरम्यान, दमदार पडणारा पाऊस सर्वच पिकांना पोषक असल्यामुळे शेतकऱ्यांतून समाधान व्यक्त होत आहे. गेल्या महिन्यात पावसाने उसंत दिली होती. त्यावेळी आतंरमशागतीची कामे करून खतांचा डोस देण्यात आला आहे. त्यानंतर होत असलेल्या पावसामुळे पिकांची वाढ चांगली होणार आहे, असे कृषी प्रशासनाचे म्हणणे आहे. पुढील महिन्यात गणेश चतुर्थी असल्याने कुंभारवाड्यात मूर्तीकारांची मूर्ती तयार करण्याची जोरदार धांदल सुरू आहे. मूर्तींचे रंगकाम अंतिम टप्प्यात आहे. अशावेळीच पाऊस पडत असल्याने रंगकाम केलेल्या आणि नव्याने तयार केलेल्या मूर्ती सुकविणे मूर्तीकारांसमोर आव्हानात्मक बनले आहे. अनेक मूर्तीकार विद्युत बल्बच्या सहाय्याने मूर्ती सुकविताना दिसत आहेत.

दरम्यान, दिवसभर पावसाचा जोर कायम राहिल्याने पंचगंगा नदीवरील शिंगणापूर, रूई, इचलकरंजी, तेरवाड, शिरोळ तर भोगावती नदीवरील हळदी, खडक कोगे आणि वारणा नदीवरील चिंचोली, माणगाव बंधारे पाण्याखाली गेले. तर कोयना धरण पूर्ण क्षमतेने भरल्याने २१०० क्युसेक पाण्याचा विसर्ग सुरू आहे.

---------------------------------------------------

चौकट

रोपवाटीकेत गर्दी

रिपरिप पावसात रोप लागवड केल्यानंतर ते त्वरित वाढण्यास सुरूवात होते. आता लागवडीसाठी पोषक वातावरण असल्याने शहरातील सर्वच रोपवाटिकेत रोप खरेदीसाठी मोठी गर्दी होत आहे. हातगाडीवरून विक्री होत असलेली रोपेही अनेकजण खरेदी करत आहेत.

.................

सर्वाधिक पाऊस

गगनबावडा तालुक्यात

रविवारी सकाळी आठ वाजेपर्यंत झालेल्या चोवीस तासात तालुकानिहाय झालेला पाऊस (मिमी) असा : हातकणंगले : ४. ३७ , शिरोळ : ०. ७१, पन्हाळा : १०. ४२, शाहूवाडी : ३१. ८३, राधानगरी : ३४, गगनबावडा : ३९, करवीर : ६.९०, कागल : १५. ८४, गडहिंग्लज : १३, भुदरगड : २८, आजरा : १७, चंदगड : ३४. ६६.

------

धरणसाठा

धरणनिहाय साठा आणि कंसात एकूण क्षमता टीमसीमध्ये : राधानगरी - ८.१९ (८.३६१), तुळशी ३.४७ (३. ४७१), वारणा ३३.३३ (३४.३९९), दुधगंगा २४.१३ (२५.३९३), कासारी २.६५ (२.७७४), कडवी २.५२ (२.५१६), कुंभी २.४२ (२.७१५, पाटगाव ३.५७ (३.७१६), चिकोत्रा ०.९२ (१.५२२), चित्री १.८९ (१.८८६), जंगमहट्टी १.२२ (१.२२४), घटप्रभा १.५६ (१.५६०), जांबरे ०.८२ (०.३००), कोदे ०.२१ (०.२१४).

--------------

पन्हाळ्यात जनजीवन विस्कळीत

पन्हाळा : तालुक्यात सकाळपासून पावसाने पुन्हा हजेरी लावली, त्यामुळे गेल्या चार दिवसांपासून सुरळीत चाललेले जनजीवन पुन्हा विस्कळीत झाले. शेतीची कामे पूर्ण झाली असली तरी किरकोळ कामे करण्यासाठी अडचणी निर्माण होत आहेत. सकाळपासून सुरू झालेल्या पावसाने धरण क्षेत्रातील पाणीपातळीत झपाट्याने वाढ होऊ लागली आहे. अगोदरच पुराच्या पाण्यामुळे पिके जमीनदोस्त झाली असताना पिके पुन्हा पाण्याखाली जातात की काय, याची भीती वाटू लागली आहे.

फोटो

ग्रामीण भागातील मराठा समाज बांधवांचा ठिय्या आंदोलनाला पाठिंबा

म. टा. प्रतिनधी, कोल्हापूर

संततधार पावसात राधानगरी तालुक्यातील पाच गावच्या ग्रामस्थांनी रविवारी दसरा चौकात येऊन सकल मराठा समाजाच्या ठिय्या आंदोलनाला पाठिंबा दिला. ग्रामस्थांनी खर्डा भाकरी खाऊन मराठा आरक्षणाच्या मागणीकडे दुर्लक्ष करणाऱ्या राज्य सरकारचा निषेध केला.

रविवारी पावसाने जनजीवन विस्कळीत झाले असतानाही ग्रामीण भागातील मराठा बांधव आंदोलनात सहभागी झाले. राधानगरी तालुक्यातील कसबा वाळवे, कपिलेश्वर, मौजे कासारवाडा, ठिकपुर्ली, पालकरवाडी आदी गावातील ग्रामस्थांनी आंदोलनस्थळी भेट देवून पाठिंबा व्यक्त केला. कोल्हापूर जिल्हा दूध कर्मचारी पतसंस्थेचे सभासद आंदोलनात मोठ्या संख्येने सहभागी झाले . निवृत्त पोलिस निरीक्षक मोहन माने यांच्यासह मांगूर गावकऱ्यांनी आंदोलनस्थळी भेट देऊन पाठिंबा दिला.

ग्रामीण भागातील नागरिकांनी 'एक मराठा, लाख मराठा' अशा घोषणा देत मराठा समाजाला आरक्षण देण्याची मागणी केली. तसेच खर्डा भाकरी खाऊन सरकारचा निषेध केला. कसबा वाळवेचे सरपंच अशोक फराकटे आणी जी.डी. पाटील यांच्या नेतृत्वाखाली ग्रामस्थ आंदोलनात सहभागी झाले. यावेळी उपसरपंच सुनील मांडवकर, तानाजी संकपाळ, अजिंक्य कोठावळे, रामराव इंगळे, वाय.डी. बरगे आदी उपस्थत होते.

मजरे कासारवाडाचे सरपंच बाबूराव जाधव यांच्या नेतृत्वाखाली उपसरपंच शहाजी वारके, दिगंबर जितकर, दूधगंगा साखर कारखान्याचे संचालक युवराज वारके, पांडुरंग सुतार, विलास चव्हाण यांच्यासह ग्रामस्थ ठिय्या आंदोलनात सहभागी झाले. कासारवाडा येथील फुलबाग तालीम मंडळाच्या सदस्यांनी आंदोलनाला पाठिंबा दिला.

कोल्हापूर: येथील बेळगाव मित्र मंडळ नागरी सहकारी पतसंस्थेच्या सर्वसाधारण सभेत दहा टक्के लाभांश जाहीर करण्यात आला. शेठ रामभाई सामाणी हॉलमध्ये कामान्ना रेमाणीच्या अध्यक्षतेखाली सभा झाली. व्यवस्थापिका सुमन जाधव यांनी इतिवृत्ताचे वाचन केले तर ज्येष्ठ संचालक अशोक चौगुले यांनी अहवाल वाचन केले. सभेला परशराम पाटील, शशिकांत ओऊळकर उपस्थित होते.

म. टा. प्रतिनिधी, कोल्हापूर

गवताला लागलेला चिखल धुण्यासाठी पंचगंगा नदीपात्रात उतरलेली बैलगाडी पाण्याचा प्रवाहाने पंचगंगा नदीत वाहून गेली. नदीकाठावरील नागरिकांनी गाडी चालकास ओढून काढल्याने बचावला. मात्र, बैलाचा दुर्देवी अंत झाला. रविवारी सकाळी साडेअकरा वाजण्याच्या सुमारात ही घटना घडली.

शनिवार पेठ येथे राहणारे शिवाजी रावजी नाईक यांच्या मालकीची बैलगाडी शीतल रोटे (वय ४२, रा. शिपुगडे तालीम, बुधवार पेठ) हे जनावरांना वैरण आणण्यासाठी रविवारी सकाळी पंचगंगा नदीवर गेले होते. पंचगंगा नदीघाटावरील दत्त मंदिराशेजारी वैरण भरून धोबीघाटावर आले. त्या ठिकाणी गवताला लागलेला चिखल धुण्यासाठी ते बैलगाडीसह पाण्यात उतरत होते. त्यावेळी पाण्याचा प्रवाह अधिक असल्याने बैलगाडीसह रोटे वाहून जाऊ लागले. त्यांनी आरडाओरडा सुरू केला. यावेळी परिसरातील नागरिकांनी पाण्यात उड्या मारुन रोटे यांना वाचविले. मात्र, बैल आणि गाडी पाण्याच्या प्रवाहाबरोबर वाहत गेली. अग्निशामक दलाचे जवानही याठिकाणी पोहोचले. त्यांनी नदीपात्रात शोध घेतला असता काही अंतरावर बैल मृतावस्थेत आढळला. बैलगाडीचे मानेवर ओझे असल्याने बैलास पोहता आला नसल्याचा अंदाज अग्निशामक दलाच्या जवानांनी व्यक्त केले. याप्रकरणी करवीर पोलिस ठाण्यात नोंद झाली आहे. रोटे यांचे सुमारे साठ हजार रुपयांचे नुकसान झाले.

म. टा. प्रतिनिधी, कोल्हापूर

चार दिवसांच्या विश्रांतीनगर रविवारी जिल्ह्यात सर्वत्र दमदार पावसाला सुरुवात झाली असून, नद्यांच्या पाणीपातळीत वाढ झाली आहे. राधानगरी तालुक्यात दमदार पाऊस सुरू असून, धरणक्षेत्रात जोरदार पाऊस पडत असल्याने भोगावती नदीपात्रात १६०० क्युसेक्स पाण्याचा विसर्ग वाढविण्यात आला आहे. याशिवाय चंदगड, भुदरगड, शाहूवाडी तालुक्यांतही जोरदार पाऊस सुरू असून, नदी, नाले ओसंडून वाहत आहेत. हा पाऊस खरीप पिकांसाठी पोषक असल्याने शेतकरी भात, नाचणीच्या रोपलावणीत व्यस्त आहेत. सतत पडत असलेल्या पावसामुळे वातावरणात गारवा निर्माण झाला आहे.

राधानगरीत दमदार

राधानगरी : आठवडाभराच्या विश्रांतीनंतर तालुक्यात पावसाने दमदार हजेरी लावल्याने शेतकरी वर्गात समाधान व्यक्त होत आहे. गेले महिनाभर पावसाने तालुक्यात पावसाने थैमान घातले होते. रविवारी पहाटेपासून जोरदार पावसाचे आगमन झाले आहे. दिवसभर ढगाळ वातावरण आणि जोराचा पाऊस यामुळे हवेत गारवा निर्माण झाला आहे. राधानगरी धरण परिसरात पाऊस दमदार आहे, तर तालुक्यात अन्य ठिकाणी पावसाने चांगलीच हजेरी लावली आहे. राधानगरी धरण प्रशासनाने पाण्याचा विसर्ग १२०० क्युसेक्सवरून १६०० क्युसेक्स वाढवला आहे. पाण्याच्या विसर्गामुळे भोगावती नदीच्या पाण्याची पातळी वाढत आहे. हा पाऊस भात, नाचणी पिकांना पोषक असल्याचे शेतकरीवर्गातून सांगितले जात आहे. राधानगरी धरणक्षेत्रात गेल्या चोवीस तासांत ८४ मि.मी. पावसाची नोंद झाली. आजअखेर धरण परिसरात ३९३६ मि.मी. पाऊस झाला. तालुक्यातील तुळशी जलाशय पूर्णक्षमतेने भरला असून, काळम्मावाडी येथील राजर्षी शाहू सागर जलाशयात ९५ टक्के पाणीसाठा झाला आहे. धरण भरण्यास अद्याप एक टीएमसी पाणीसाठा कमी आहे. दूधगंगा नदीमध्ये धरणातून दोन हजार क्युसेस पाण्याचा विसर्ग सुरू आहे. तालुक्यातील केळोशी, खामकरवाडी, हसणे, कौलव, माजगाव येथील लघुपाटबंधारे तलाव ओसंडून वाहत आहेत.

चंदगड झोडपले, रोपलावणीला वेग

चंदगड : गेले चार दिवस काहीशी विश्रांती घेतलेल्या पावसाने रविवारी दिवसभर चंदगडकरांना झोपडून काढले. शहर परिसरात दिवसभर मुसळधार पाऊस कोसळत होता. पावसामुळे शिवारात मोठ्या प्रमाणात पाण्याची उपलब्धता झाली आहे. त्यामुळे शेतकरी सुखावला असून, तालुक्यात सगळीकडे भात व नाचणीच्या रोपलावणीच्या कामांना गती आली आहे. सकाळी आठपर्यंत झालेल्या चोवीस तासांत तालुक्यात सरासरी २१.६६ तर आतापर्यंत ५६४ मि.मी. पावसाची नोंद झाली. सर्वाधिक पाऊस हेरे सर्कलमध्ये ५६ मि.मी.,तर सर्वांत कमी माणगाव सर्कलमध्ये ३ मि.मी. झाला. आज दिवसभर पावसाच्या आगमनामुळे शिवार माणसांनी फुलला होता. बैलजोडी नसलेल्यांनी ट्रॅक्टरच्या सहाय्याने चिखल करुन रोपलावण केली आहे.

कडवी पात्राबाहेर

शाहूवाडी : तालुक्यात दोन दिवसांपासून पावसाचा जोर पुन्हा वाढला आहे. रविवारी सकाळपर्यंतच्या चोवीस तासांत सरासरी ३१.८३ मि.मी. पावसाची नोंद झाली आहे. याच कालावधीत कडवी धरणाच्या पाणलोट क्षेत्रात सरासरी ६१ मि.मी. पाऊस झाला. धरणाच्या सांडव्यातून १२४ क्युसेक्स, तर वीजगृहातून २१० क्युसेक्स असा ३३४ क्युसेक्स प्रतिसेकंद पाण्याचा विसर्ग नदीपात्रात होत असल्याने कडवी नदी दुथडी भरून वाहू लागली असून, पाणी पात्राबाहेर पडले आहे. तसेच वारणा-चांदोली धरण क्षेत्रातही पावसाचा वेग वाढल्याने दोन दिवसांपूर्वी प्रशासनाने धरणाचे चारही वक्राकार दरवाजे खुले केले आहेत. त्यामुळे वारणा नदीच्या पाणीपातळीत झपाट्याने वाढ झाली आहे. दरम्यान, संततधार पावसाच्या प्रभावाने वातावरणात गारठा वाढला आहे.

०००००

राजेंद्र पाटील, इचलकरंजी

जिल्ह्याला जोडणाऱ्या इचलकरंजी-अतिग्रे रस्त्याची दुरवस्था झाली असून, मोठ्या प्रमाणात पडलेल्या खड्ड्यांमुळे या रस्त्यावरील प्रवास धोकादायक बनला आहे. वाहनचालकांना या मार्गावरून खड्डे चुकवताना तारेवरची कसरत करावी लागत आहे. सार्वजनिक बांधकाम विभागाच्या दुर्लक्षामुळे हातकणंगले तालुक्यातील सर्वच रस्त्यांची बिकट अवस्था झाली आहे. असे असले तरी संबंधित खात्याला याचे सोयरसुतक नसल्याचा अनुभव इचलकरंजी-अतिग्रे रस्त्यावरून प्रवास करणाऱ्या वाहनचालकांना येत आहे. गेल्या वर्षी लाखो रुपये खर्च करून हा रस्ता बनविला होता. परंतु निकृष्ट दर्जाच्या कामामुळे पावसाळ्यात दोन महिन्यांतच रस्ता पूर्णपणे उखडला आहे. मोठमोठ्या खड्ड्यांमुळे अपघातांच्या प्रमाणात वाढ झाली आहे.

इचलकरंजी-अतिग्रे हा जिल्ह्याला जोडणारा हा एकमेव रस्ता असून सतत या रस्त्यावरून वाहनांची वर्दळ असते. अलीकडेच या मार्गावर मोठ्या प्रमाणात कारखाने, उद्योगधंदे सुरू झाली आहेत. अनेक कारखान्यांमधील अवजड वाहनांची वाहतूक याच रस्त्यावरून होते. सार्वजनिक बांधकाम विभाग या रस्त्याच्या कामासाठी लाखो रुपयांचा खर्च करतो. मात्र कामांचा दर्जा सुमार असल्याने काही दिवसात रस्त्याचे खरे रूप उघड होते. अवजड वाहनांच्या क्षमतेचा रस्ता बनवला जात नसल्याने पावसाळ्यात या रस्त्यावर खड्डे पडतात. या परिसरातील लोकांना विविध कामांसाठी, नोकरीसााठी कोल्हापूरला जावे लागते. कोल्हापूर हीच मोठी बाजारपेठ असल्याने या मार्गावरील स्थानिकांनाही या रस्त्याचा वापर करावा लागतो. मात्र रस्त्यावर पडलेल्या खड्ड्यांमुळे या रस्त्यावरील प्रवास नकोसा झाला असून नागरिकांमध्ये संतापाचे वातावरण आहे. आता पावसाळ्याचे आणखी काही महिने याच रस्त्यावरून प्रवास करावा लागणार असल्याने रस्त्याची तात्पुरती दुरुस्ती करण्याची मागणी केली जात आहे.

कबनूर ते अतिग्रे या दहा किलोमीटरच्या रस्त्यावर रेल्वे फाटक आहे. अतिग्रे येथील रेल्वेफाटकावर उड्डाणपूल व्हावा यासाठी राज्याच्या अर्थसंकल्पात दोन वर्षांपूर्वी निधी मंजूर करण्यात आला आहे. लोकप्रतिनिधीनी तशी घोषणाही यापूर्वी अनेक वेळा जाहीरपणे केली आहे. प्रत्यक्षात मात्र या उड्डाणपुलाची फाइल कुठे अडकली आहे, याचे उत्तर एकाही अधिकाऱ्यांकडे नाही, हे दुर्दैव म्हणावे लागेल. पहाटेपासून मध्यरात्रीपर्यंत अनेक रेल्वेगाड्या या मार्गावरून जात असतात, त्यामुळे फाटक बंद करण्यात येत असल्यामुळे नागरिकांना, वाहनधारकांना अनेक वेळा या फाटकावरच ताटकळत उभे राहावे लागते. इचलकरंजी व परिसरातील अनेक रुग्ण पुढील उपचारासाठी कोल्हापूरला रुग्णवाहिकेतून जात असतात. मात्र रेल्वेच्या बंद फाटकाचा मोठा अडथळा गंभीर रुग्णांना वर्षानुवर्षे सोसावा लागतोय. वेळेत उपचार न मिळाल्याने काहींना जीव गमवावा लागला आहे, याचा गांभीर्याने विचार होणार की नाही, असा प्रश्न उपस्थित होत आहे.

याच मार्गावरील श्रीबाळूमामा मंदिर ते कोल्हापूर-सांगली मुख्य रस्ता अत्यंत धोकादायक बनला आहे. अनेक खड्ड्यांमुळे वाहनधारकांना अक्षरशः कसरत करावी लागते. रेल्वे फाटकापासून काही अंतरावर एका छोट्या फुलाचे रुंदीकरण करण्यात आले होते, यासाठी लाखो रुपये खर्च करण्यात आला. मात्र, आजही याचे दुखणे कायम आहे. इचलकरंजीतून कोल्हापूर आणि अतिग्रे येथील घोडावत इंटरनॅशनल स्कूलसाठी दररोज शेकडो विद्यार्थी प्रवास करीत असतात, त्यांना या खराब रस्त्याचा मोठा फटका सोसावा लागतो आहे.

००००

इचलकरंजी-अतिग्रे रस्त्याची खड्ड्यांमुळे अक्षरश: चाळण झाली आहे. यामुळे वाहनचालकांना वाहने चालविताना जीव मुठीत धरून प्रवास करावा लागत आहे. नोकरी, शिक्षण, सरकारी कामासाठी नागरिक या मार्गावरून सतत ये-जा करीत असतात. त्यांना मोठा मन:स्ताप सहन करावा लागतो.

सागर पाटील, प्रवासी

००००