म. टा. प्रतिनिधी, कोल्हापूर

सरकारच्या राजर्षी छत्रपती शाहू महाराज शिक्षण शुल्क शिष्यवृत्ती योजना, डॉ. पंजाबराव देशमुख वसतिगृह निर्वाह भत्ता योजनाची प्रभावीपणे अंमलबजावणीसाठी सरकारने जिल्हाधिकाऱ्यांच्या अध्यक्षतेखाली समिती स्थापन करण्याचा आदेश दिला आहे. या समितीमध्ये ९ सदस्य असणार आहेत. समितीतर्फे योजनांची माहिती विद्यार्थ्यांपर्यंत पोहचविणे, लाभ मिळण्यासाठी मदत करण्याचे काम करावे, असे आदेशात म्हटले आहे.

जिल्हाधिकारी हे समितीचे पदसिध्द अध्यक्ष असतील. विभागीय तंत्र शिक्षण सहसंचालक, सरकारी अभियांत्रिकी किंवा सरकारी तंत्रनिकेतन प्राचार्य सचिव असतील. वैद्यकीय शिक्षण, संशोधन संचालक, जिल्हा, कार्यक्षेत्रातील कृषी, अकृषी विद्यापीठ, जिल्ह्यातील नामवंत उच्च, तंत्र, वैद्यकीय, कृषी, इतर उच्च शिक्षण देणाऱ्या संस्थांचे प्रतिनिधी, समाज कल्याणचे सहायक संचालक, जिल्हा आदिवासी विकास अधिकारी, जिल्हा सहायक संचालक, जिल्हा कौशल्य विकास, रोजगार, उद्योजकता मार्गदर्शन केंद्राचे प्रतिनिधी सदस्य म्हणून असणार आहेत. प्रवेशावेळी आलेल्या तक्रारींचे निरसण करणे, आण्णासाहेब पाटील आर्थिक मागास विकास महामंडळ योजनेतील कर्ज प्रकरणे मार्गी लावण्यासाठी जिल्ह्यातील बँकांशी समन्वय साधणे, प्रत्येक १५ दिवसांनी योजना अंमलबजावणी प्रगतीचा आढावा घेणे, योजनांच्या लाभासाठी आवश्यक कागदपत्रे देणाऱ्या अधिकाऱ्यांच्या उपस्थितीत ३१ ऑगस्टपर्यंत विशेष शिबिराचे आयोजन करणे, गरजू विद्यार्थ्यांना वसतिगृहात सोय करून देण्यासंबंधीचा आढावा घेण्याची जबाबदारी समितीवर असणार आहे.

पोलिस अधीक्षक डॉ. अभिनव देशमुख यांची ग्वाही

Sachin.Yadav@timesgroup.com

tweet:@sachinyadavMT

'संघटित गुन्हेगारी मोडीत काढून अनेक टोळ्यांवर चाप बसविला जाईल. जिल्ह्यात क्राइम रेट कमी करण्यासाठी जाणीवपूर्वक प्रयत्न केले जातील. येत्या गणेशोत्सवात डॉल्बी हद्दपार करण्यासाठी सार्वजनिक तरुण मंडळांचे प्रबोधन करण्यात येणार असून येत्या आठवड्यात पोलिस प्रशासन आणि मंडळांची बैठक घेतली जाईल. जिल्ह्यातील गुंतागुंतीच्या गुन्ह्याची उकल करण्यासह वाहतुकीला शिस्त आणि कोंडीतून मुक्त करण्यासाठी जादा वाहतूक पोलिसांची नेमणूक केली जाणार असल्याची ग्वाही नूतन पोलिस अधीक्षक डॉ. अभिनव देशमुख यांनी दिली. 'महाराष्ट्र टाइम्स'च्या कार्यालयाला शुक्रवारी त्यांनी भेट दिली. त्यावेळी ते बोलत होते. डॉ. देशमुख यांनी यावेळी करण्यात येणाऱ्या विविध उपाययोजनांची माहिती दिली.

संघटित गुन्हेगारी मोडीत काढणार

पोलिस अधीक्षक डॉ. देशमुख म्हणाले,' जिल्ह्यातील गुन्हेगारी कमी करण्यासाठी प्रयत्न केले जाणार असून पोलिसांचा गुंडावर धाक राहील. जिल्ह्यात संघटित गुन्हेगारी असून अनेक प्रकारच्या टोळ्या आहेत. या टोळ्यांना मोक्का लावला जाणार आहे. कायदा आणि सुव्यवस्था राखण्यासाठी जिल्हा पोलिस दल सातत्याने कार्यरत आहे. गुंडांना पोलिसी खाक्या आणि नागरिकांचे रक्षण करण्याची जबाबदारी प्रत्येक पोलिसावर सोपविली जाणार आहे. चोरी, गुन्हेगारी, हत्या यासह अन्य तक्रारींसाठी '१०० क्रमांक' हा सक्षमपणे नागरिकांसाठी उपलब्ध राहणार आहे. त्यासाठी पोलिसांच्या ताफ्यातील काही वाहनांना जीपीएस यंत्रणा कार्यन्वित केली जाईल. तक्रारीतील तथ्य आणि घटनेनुसार पोलिसांची गाडी अवघ्या सात ते दहा मिनिटांत घटनस्थळी पोहोचणार आहे. काही ठिकाणी बीट मार्शलकडून घटनेची माहिती घेऊन तत्काळ तपास सुरु केला जाणार आहे. घरफोडी, चेन स्नॅचिंग, गुन्हेगारी टोळी, निर्भया पथक सक्षमपणे कार्यरत राहणार आहे. कॉलेजच्या युवती, महिलांविषयक असलेल्या तक्रारींची गांभीर्याने दखल घेतली जाणार आहे. आंतरराज्यातील टोळीचा शोध घेतला जाणार असून कॉ. पानसरे, पोलिस निरीक्षक आश्विनी ब्रिदे हत्या प्रकरण, रुकडी येथील डॉक्टर दाम्पत्यासह गुंतागुंतीच्या गुन्ह्याची उकल केली जाणार आहे.'

गणेशोत्सव मंडळांची बैठक लवकरच

ते पुढे म्हणाले,' उच्च न्यायालयाने उत्सव काळात ८० डेसिबल पेक्षा अधिक आवाज असू नये, असे निर्देश दिले आहेत. मात्र बहुतांशी सार्वजनिक मंडळे या सूचनांचे पालन करीत नाही. डॉल्बीमुळे होणारे ध्वनीप्रदूषणाचे प्रबोधन पोलिस खात्याकडून सुरु आहे. यंदाच्या गणेशोत्सवात डॉल्बीचा दणदणाट रोखण्यासाठी तरुण मंडळाची बैठक घेतली जाणार आहे. या बैठकीत ध्वनी मर्यादेचे उल्लघंन केल्यास त्यांच्यावर दाखल केले जाणारे गुन्हे, न्यायालयीन प्रक्रियेची माहिती दिली जाणार आहे. पोलिस आणि मंडळात समन्वय साधला जाणार आहे. त्यातूनही मंडळांनी आदेशाचे पालन न केल्यास कठोर कारवाई केली जाणार आहे. कोल्हापूर हे राजर्षी शाहू महाराजांचे शहर आहे. अनेक सामाजिक सलोख्याचे निर्णय कोल्हापुरात झाले. कोल्हापूर शहराचा गणेशोत्सव हा पारंपारिक आणि भव्य झाला पाहिजे. येथील गणेशोत्सवात देशभरातील पर्यटकांनी भेट दिली पाहिजे. पोलिस दल विधायक कामासाठी मंडळांना प्रोत्साहन देणार आहे.'

वाहतूक कोंडीतून मुक्तता

डॉ. देशमुख म्हणाले,' कोल्हापूर आणि इचलकरंजी शहरासाठी स्वतंत्र वाहतूक शाखा आहे. शहरातील वाहतुकीला शिस्त लागण्यासाठी आणि वाहतुकीच्या कोंडीतून मुक्त करण्यासाठी विशेष प्राधान्य दिले जाणार आहे. शहर वाहतूक नियंत्रण शाखेला विशेष सूचना दिल्या जाणार आहेत. सध्या वाहतूक शाखेत १३० कर्मचारी आहे. वाहनांची वाढती संख्या लक्षात घेऊन वाहतूक पोलिसांच्या संख्येतही वाढ करता येईल. अनेक ठिकाणी सिग्नल, पार्किंगसाठी पट्टे मारलेले नाही. त्यासाठी पोलिस आणि महापालिका संयुक्तपणे आराखडा तयार करून लवकरच शहर वाहतूक कोंडीतून मुक्त केले जाईल. अनेक ठिकाणी बहुमजली इमारतींच्या पार्किंगसाठी जागा नसल्याने रस्त्यावर वाहने पार्किंग केल्याचे दिसते. शहराच्या काही रस्त्यांवरही जुनी वाहने वर्षानुवर्षे ठिकाणी पडून आहेत.याबाबतही योग्य ती कार्यवाही केली जाईल. विशेषत: शाळा, कॉलेज भरण्याच्या आणि सुटण्याच्या वेळेत होणारी कोंडी फोडली जाणार आहे. '

तक्रार देण्यास पुढे यावे

ते म्हणाले,' अनेकदा पोलिसांत तक्रार केली की पाठीमागे ससेमिरा लागतो, असा सर्वसामान्य नागरिकांचा समज आहे. त्यामुळे डोळ्यासमोर काही गैरकृत्ये दिसूनही तक्रार देण्यासाठी धाडस केले जात नाही. तक्रार देण्यास नागरिक घाबरतात. मात्र नागरिकांनी घाबरून जाण्याची काहीच गरज नाही. घटनेच्या गांभीर्यानुसार साक्षीदाराला पोलिस दलातर्फे संरक्षण दिले जाते. त्याचे नावही गोपनीय ठेवले जाते. पोलिसांच्या 'विटनेस प्रोटेक्शन प्रोग्रॅम' नुसार विशेष संरक्षण देता येऊ शकते. त्याअतंर्गत त्याच्या संपूर्ण कुटुंबाला संरक्षण देता येते. नागरिक थेट तक्रार देण्यासाठी पुढे येत नसल्याने गुन्हेगारांना अधिक वाव मिळत आहे. पोलिस ठाण्यात तक्रारदारांना सतत बोलाविले जाणार नाही.'

फोटो आहे....

म. टा. प्रतिनिधी, कोल्हापूर

जिल्हा परिषद सर्वसाधारण सभा मराठा आरक्षणाला पाठिंबा देण्यासाठी शुक्रवारी तहकूब करण्यात आली. तत्पूर्वी सभेस उपस्थित, गैरहजर अधिकाऱ्यांची हजेरी घेण्यात आली. त्यात आठ अधिकारी गैरहजर असल्याचे सामान्य प्रशासनाचे उपमुख्य कार्यकारी अधिकारी रविकांत आडसूळ यांनी सांगितले. सभेला गैरहजर माध्यमिक शिक्षणाधिकारी किरण लोहार यांना कारणे दाखवा नोटीस द्या आणि त्यांच्यावर कारवाई करा, अशी मागणी अरुण इंगवले, राजवर्धन निंबाळकर यांनी केली. माध्यमिक विभागाचे चाललेय काय, त्यांचे अतिलाड करू नका, असेही इंगवले यांनी सुनावले.

अध्यक्षा शौमिका महाडिक अध्यक्षस्थानी होत्या. प्रभारी मुख्य कार्यकारी अधिकारी डॉ. रवी शिवदास यांनी प्रशासनाची बाजू सांभाळली. सुरुवातीला दुखवट्याचा आणि अभिनंदनाचा ठराव करण्यात आला. सांगली, जळगाव महापालिकेत भाजपने एकहाती सत्ता मिळविल्याबद्दल मुख्यमंत्री देवेंद्र फडणवीस, पाकमंत्री चंद्रकांत पाटील यांचा अभिनंदनाचा ठराव निंबाळकर यांनी मांडला.

त्यानंतर त्यांनी गैरहजर अधिकाऱ्यांवर काय कारवाई करणार, असा प्रश्न उपस्थित केला. माध्यमिक शिक्षणाधिकारी लोहार गेल्या सभेलाही गैरहजर राहिल्याचे इंगवले यांनी निदर्शनास आणून दिले. सतीश पाटील यांनी गैरहजर अधिकाऱ्यांना पाठीशी घालू नका, कारवाई करा, अशी मागणी केली. मराठा समाजाचे आरक्षणासाठी व्यापक आंदोलन सुरू आहे. त्यामुळे आरक्षणाला पाठिंबा देण्यासाठी सभा तहकूब करावी, अशी मागणी सदस्य पाटील, प्रसाद खोबरे, विजय भोजे यांनी केली. मराठासह धनगर, कोळी, लिंगायत समाजालाही आरक्षण मिळावे, अशी मागणी इंगवले, खोबरे यांनी केली. अध्यक्षा महाडिक यांनी आरक्षणाच्या पाठिंब्यासाठी सभा तहकूब करीत असल्याचे जाहीर केले. सदस्य भगवान पाटील यांनी एक मराठा, लाख मराठा अशा घोषणा दिल्या. सर्वच सदस्यांनी सभात्याग करावा, असे आवाहन केले. त्यानंतर सदस्य बाहेर पडले. सभेस उपाध्यक्ष सर्जेराव पाटील यांच्यासह पदाधिकारी, सदस्य उपस्थित होते.

००००

सदर बाजार आहे का ?

अध्यक्ष, उपाध्यक्षांसह पदाधिकारी सभेला आल्यानंतरही अधिकारी येत नाहीत. अधिकारी मनमानी पद्धतीने उपस्थित राहायला काय सदर बाजार आहे का, असा सवाल अरुण इंगवले यांनी उपस्थित करताच सदस्यांत हशा पिकला.

०००

सत्ताधारी, विरोधकांत स्पर्धा

मराठा आरक्षणाला पाठिंब्यासाठी सभा तहकूब करण्याच्या मागणीसाठी सत्ताधारी, विरोधकांत स्पर्धा लागल्याचे दिसले. या मागणीसाठी एकाचवेळी विरोधी गटाचे सतीश पाटील, भगवान पाटील आणि सत्ताधारीमधील प्रसाद खोबरे, इंगवले, विजय भोजे बोलायला उठले. त्यामुळे काहीकाळ गोंधळ निर्माण झाला.

००००

म. टा. प्रतिनिधी, कोल्हापूर

आषाढ महिन्यातील अखेरची त्र्यंबोली यात्रा पारंपरिक व धार्मिक वातावरणात उत्साहात साजरी झाली. दरम्यान, शनिवारी होणारी गटारी अमावस्या साजरी करण्यासाठी जंगी बेत आखले असून, शुक्रवारी रात्री पंचगंगा नदीला परडी सोडण्यासाठी नागरिकांनी मोठी गर्दी केली होती.

आषाढ महिन्यात नदीचे पाणी देवदेवतांसह टेंबलाई टेकडीवरील त्र्यंबोली देवीस वाहण्याची प्रथा आहे. आषाढ संपण्यापूर्वी आज शेवटच्या शुक्रवारी शहरातील तालमी व मंडळांनी त्र्यंबोली देवीला पारंपरिक पिपाणी, डफाच्या वाद्यात पाणी वाहिले. कार्यकर्त्यांनी गुलालाची उधळण केली. टेंबलाई टेकडीवरही देवीच्या दर्शनासाठी गर्दी केली होती. टेकडीवरील लहान मुलांसाठी खेळणी, खेळणी व खाद्य पदार्थांच्या स्टॉलमुळे जत्रा भरली होती. यात्रेनिमित्त मासांहारी जेवणाचे बेत आखले गेले.

पावसाळ्यात नदीची परडी सोडून पूजा केली जाते. शुक्रवारी सायंकाळी परडी सोडण्यासाठी नागरिकांनी मोठी गर्दी केली होती. परडीच्या मांसाहारी नैवेद्याचा लाभ घेण्यासाठी झुंबड उडाली. दरम्यान शनिवारी (ता.११) दीप अमावस्या असून घरोघरी दिव्यांची पूजा केली जाते. तर दुसरीकडे या अमावस्येला गटारी अमावस्या संबोधले जाते. गटारी अमावस्येला भरपेट मांसाहार करून श्रावणात मांसाहार वर्ज्य केला जातो. त्यामुळे शनिवारी गटारीचे जंगी बेत केले जात आहेत. शनिवारी व रविवारी सलग दोन दिवस सरकारी कार्यालयांना सुट्टी असल्याने गटारी पार्टीसाठी जंगी बेत आखले गेले आहेत. अनेकजण शनिवारी मांसाहार करत नसल्याने शुक्रवारीच गटारीच्या पूर्वसंध्येला गटारीच्या पार्ट्या झोडल्या गेल्या.

म. टा. प्रतिनिधी, कोल्हापूर

मराठा समाजाला आरक्षण मिळावे या मागणीसाठी शुक्रवारी जिल्हा परिषदेची सर्वसाधारण सभा तहकूब करण्यात आली. जिल्हा परिषद सदस्यांनी दसरा चौकात सुरु असलेल्या सकल मराठा समाजाच्या ठिय्या आंदोलनाला पाठिंबा देऊन आंदोलनात सहभाग घेतला.

गेले पंधरा दिवस सकल मराठा समाजाच्यावतीने मराठा समाजाला आरक्षण मिळावे, या मागणीसाठी दसरा चौकात ठिय्या आंदोलन सुरु आहे. गुरुवारी (ता.९) क्रांती दिनी सकल मराठा समाजाने महाराष्ट्र बंदची हाक दिली होती. कोल्हापुरातही बंदला उत्स्फूर्त प्रतिसाद मिळाला. सकल मराठा समाजाने दसरा चौकात आयोजित केलेल्या सभेला कोल्हापूर शहरासह जिल्ह्यातील मराठा समाजातील कार्यकर्ते मोठ्या संख्येने आले होते. कोल्हापूर बंदनंतर सकल मराठा समाजाने मराठा आरक्षणाची मागणी पूर्ण होईपर्यंत आंदोलन सुरु ठेवण्याची घोषणा केली होती.

शुक्रवारी दिवसभर महाविद्यालयीन तरुणांनी ठिय्या आंदोलनात सहभाग घेतला. जिल्हा परिषदेची सर्वसाधारण सभा होती. मात्र मराठा आरक्षणप्रश्नी सभा तहकूब करण्यात आली. त्यानंतर काँग्रेस, राष्ट्रवादी, शिवसेनेच्या सदस्यांनी दसरा चौकातील आंदोलनस्थळी भेट देऊन पाठिंबा व्यक्त केला. यावेळी सदस्यांनी 'एक मराठा, लाख मराठा' अशा घोषणा दिल्या. आंदोलनात जिल्हा परिषद सदस्य जीवन पाटील, मनोज फराकटे, विनय पाटील, राहुल पाटील, सतीश पाटील, बजरंग पाटील, भगवान पाटील, जिल्हा परिषद सदस्या रोहिणी आबिटकर, स्वरुपा जाधव, वंदना जाधव, स्नेहल परीट, सविता चौगुले, शिल्पा पाटील, शिवानी भोसले, करवीर पंचायत समिती सभापती राजेंद्र सूर्यवंशी, भुदरगड पंचायत समिती सभापती स्नेहल परीट आदींनी सहभाग घेतला.

दरम्यान, जिल्हा परिषदेच्या सर्वसाधारण सभेत भाजपसह सर्व पक्षांनी मराठा आंदोलनप्रश्नी पाठिंबा दिला. पण जिल्हा परिषदेचे अध्यक्ष, उपाध्यक्षांसह, सर्व समित्यांचे सभापती तसेच भाजपचे सदस्य ठिय्या आंदोलनाला पाठिंबा देण्यासाठी गेले नसल्याने जिल्हा परिषद वर्तुळात याबाबतची चर्चा रंगली होती.

००००००

चोवीस तास बंद

सकल मराठा समाजाचा कोल्हापुरात घोषित करण्यात आलेल्या कोल्हापूर बंदला कडकडीत प्रतिसाद मिळाला. गुरुवारी सकाळी सात वाजल्यापासून शुक्रवारी सकाळी सात वाजेपर्यंत २४ तास सर्व व्यवहार बंद होते. बंद शांततेत झाल्याने पोलिसांनी सुटकेचा नि:श्वास सोडला. शुक्रवारी सर्व व्यवहार सुरळीत सुरु झाले.

म. टा. प्रतिनिधी, कोल्हापूर

गेल्या काही दिवसांत ‌विस्मृतीत गेलेल्या स्वाइन फ्लूने पुन्हा डोके वार काढले आहे. इचलकरंजी येथील एका महिलेस स्वाइन फ्लू झाला असून शहरातील एका हॉस्पिटलमध्ये उपचार सुरू आहेत. याबाबत हॉस्पिटलच्या व्यवस्थापनाने महापालिकेच्या आरोग्य विभागास शुक्रवारी स्वाइन फ्लू रुग्णांबाबतची माहिती दिली.

दोन वर्षांपूर्वी शहरात स्वाइन फ्लूने रुग्णांच्या संख्येत मोठी वाढ झाली होती. संसर्गजन्य आजार असल्याने याबाबत नागरिकांमध्ये प्रचंड घबराट निर्माण झाली होती. गेल्या काही वर्षात स्वाइन फ्लू रुग्णांच्या संख्येत घट झालेली असली, तरी इचलकरंजी येथील एका महिलेस स्वाइन फ्लू झाल्याचे स्पष्ट झाले आहे. त्यांना उपचारांसाठी कोल्हापूर येथील रुग्णालयात उपचारांसाठी दाखल केले आहे. स्वाइन फ्लू रुग्ण आढळल्याने आरोग्य यंत्रणा सतर्क झाली आहे. स्वाइन फ्लूचा धोका लक्षात घेऊन हॉस्पिटल प्रशासनाने महापालिकेच्या आरोग्य विभागास स्वाइन फ्लू रुग्णांबाबत माहिती दिली आहे.

कोंडेकर समर्थकांची डॉक्टरांना शिवीगाळ

म. टा. प्रतिनिधी, कोल्हापूर

पूर्ववैमनस्यातून झालेल्या पाचगाव येथील धनाजी तानाजी गाडगीळ (वय ३५) याच्या खून प्रकरणात कळंबा कारागृहात आजन्म कारावासाची शिक्षा भोगत असलेला आरोपी अक्षय जयसिंग कोंडेकर (वय २८, रा. महादेव गल्ली, पाचगाव) याचा शुक्रवारी सकाळी सीपीआर रुग्णालयात मृत्यू झाला. त्याच्यावर वेळेवर उपचार झाले नसल्याचा कारणावरुन शुक्रवारी दुपारपर्यंत सीपीआरचा परिसर तणावाखाली राहिला. डॉक्टरांना शिवीगाळ, धक्काबुक्की करुन मारहाण करण्याचा प्रयत्नही झाला. सीपीआर परिसरात शीघ्र कृतीदल, राज्य राखीव दलाची तुकडी असा बंदोबस्त ठेवण्यात आला.

पाचगाव (ता. करवीर) येथे ग्रामपंचायत निवडणुकीनंतर राजकीय वर्चस्ववादातून माजी ग्रामपंचायत सदस्य अशोक पाटील याचा १३ फेब्रुवारी २०१३ रोजी न्यू महाद्वार रोडवरील ॲक्सिस बँकेसमोर डोक्यात गोळ्या झाडून खून झाला. या प्रकरणी पोलिसांनी १६ फेब्रुवारीला कोगनोळी टोलनाका येथून दिलीप जाधव, अमोल जाधव, हरिश पाटील, ओंकार सूर्यवंशी आणि महादेव कलगुटकी या पाच संशयितांना अटक केली होती. या खुनाचा बदला घेण्यासाठी २३ डिसेंबर २०१३ रोजी पाचगाव येथील प्रगतीनगर चौकात ओंकार गॅरेजच्या समोर रात्री साडेआठच्या सुमारास दिलीप जाधवचा मेहुणा धनाजी गाडगीळ (वय २८, रा. पाचगाव, महादेव कॉलनी) याचा सहाजणांनी जांबियाने भोसकून खून केला. या प्रकरणी मिलिंद अशोक पाटील (३०), महेश अशोक पाटील (२८), अक्षय जयसिंग कोंडेकर (२८), निशांत नंदकुमार माने (२५), प्रमोद कृष्णात शिंदे (२८) आणि गणेश कलगुटकी (२६, सर्व रा. पाचगाव) या सहाजणांना अटक केली होती. तपास करून संशयितांवर जिल्हा न्यायालयात दोषारोपपत्र दाखल केले होते. न्यायाधीश एल. डी. बिले यांनी संशयित आरोपींना २३ एप्रिल २०१८ रोजी आजन्म कारावासाची शिक्षा सुनावली होती. तेव्हापासून कोंडेकरसह सर्व आरोपी कळंबा कारागृहात शिक्षा भोगत आहेत.

दरम्यान, कारागृहातील डॉक्टरांनी अक्षयची प्रकृती गंभीर असल्याचे सांगितले होते. मात्र वेळेवर पोलिस पथक मिळाले नसल्याने सीपीआरमध्ये दाखल करता आले नाही. त्याला श्वासोच्छवासाचा त्रास होऊन पांढऱ्या पेशी वाढल्या होत्या. अतिदक्षता विभागात उपचारही सुरु होते. शुक्रवारी सकाळी तो नातेवाईक आणि मित्रांसोबत बोलला. मात्र सकाळी पावणेनऊ वाजता त्याचा मृत्यू झाल्याने सर्मथक चिडले. त्याचा जाब विचारण्यासाठी समर्थक गेले असता डॉक्टरांसोबत वाद निर्माण झाला. त्यांनी डॉक्टरांना धक्काबुक्की करुन मारहाणीचा प्रयत्न केला. त्या विरोधात संतप्त झालेल्या डॉक्टरांनी काम बंद आंदोलन करून अधिष्ठाता एस. डी. नणंदकर यांच्या कार्यालयात जाऊन तक्रार केली. हा प्रकार पोलिसांना समजल्यानंतर तत्काळ अधिकारी दाखल झाले. अखेर शवविच्छेदनानंतर सायंकाळी पाच वाजता त्याचा मृतदेह नातेवाईकांच्या ताब्यात दिला. या प्रकरणी जुना राजवाडा व लक्ष्मीपुरी पोलिसांत या घटनेची रात्री उशीरा नोंद करण्यात आली.

........

कार्यकर्त्यांवर गु्न्हे दाखल करु नका

'कोंडेकरच्या मृत्यूचे कारण डॉक्टरांनी व्यवस्थित दिले नाही. मोघम उत्तर दिल्याने संतप्त झालेल्या कार्यकर्त्यांनी वाद घातला. त्यांच्याकडून भावनेच्या भरात ही घटना घडली आहे, त्याबद्दल आम्ही दिलगिरी व्यक्त करतो. त्या तरुणांच्यावर गुन्हे दाखल करु नका', असे आवाहन अधिष्ठाता नणंदकर यांच्याकडे रहिम सनदी, प्रकाश टोणपे, पाचगावचे सरपंच संग्राम पाटील, बाबा इंदूलकर यांनी केली. मात्र डॉक्टरांनी झालेल्या प्रकाराबद्दल तीव्र संताप व्यक्त केला.

.........

तरुणांवर गुन्हे दाखल करा

डॉक्टरांना धक्काबुक्की झाल्याने सर्व डॉक्टरांनी काम बंद आंदोलन सुरु केले. सर्वच डॉक्टर अधिष्ठाता यांच्या कार्यालयात आले. या वेळी डॉक्टरांनी त्यांच्यासमोर व्यथा मांडल्या. ' अनेक प्रकरणात डॉक्टरांना मार खावा लागतो. मात्र रुग्णालय प्रशासनाकडून काहीच कठोर भूमिका घेतली जात नाहीत. भविष्यात अशा प्रकारची घटना घडू नये, त्यासाठी धक्काबुक्की करणाऱ्या तरुणांवर गुन्हा दाखल करावा. तोपर्यंत आम्ही काम सुरु करणार नाही, ' असा पवित्रा डॉक्टरांनी घेतला. मात्र रुग्णांची गैरसोय टाळण्यासाठी दुपारी चारनंतर डॉक्टर कामावर रुजू झाले.

...

सीपीआरमध्ये शवविच्छेदन

शिक्षा भोगणाऱ्या कैद्याचा मृत्यू झाल्यास यापूर्वी मिरज येथे शवविच्छेदन केले जात होते. मात्र शवविच्छेदनाची परवानगी सीपीआरला मिळाली आहे. त्यानुसार करवीरचे तहसीलदार संतोष सानप यांच्या उपस्थितीत 'इन कॅमेरा शवविच्छेदन' करण्यात आले. या वेळी रुग्णालयात करवीरचे पोलिस उपअधीक्षक सूरज गुरव, शहर पोलिस उपअधीक्षक डॉ. प्रशांत अमृतकर, लक्ष्मीपुरीचे पोलिस निरीक्षक वसंत बाबर आदी उपस्थित होते.

...

पोलिसांचे पथक मिळाले नाही..

कळंबा कारागृहात अक्षय कोंडेकर (सी ७०८७) हा आजन्म कारावासाची शिक्षा भोगत होता. त्याला २३ एप्रिल २०१८ रोजी कारागृहात दाखल केले होते. कारागृहातील सर्कल ८ बरॅक क्रमांक १ मध्ये तो शिक्षा भोगत होता. ७ ऑगस्ट २०१८ रोजी श्वासोच्छवासाच्या त्रासामुळे त्याला कारागृहातील दवाखान्यात दाखल केले होते. त्याची प्रकृती अधिक खालावल्याने सीपीआरमध्ये दाखल करण्यासाठी ७ आणि ८ ऑगस्ट रोजी पोलिस पथकाची मागणी केली होती. मात्र पथक उपलब्ध झाले नाही. ९ ऑगस्ट रोजी पोलिस मुख्यालयातील पोलिस पथक उपलब्ध झाल्यानंतर त्याला ९ रोजी सीपीआरमध्ये दाखल केल्याचे कळंबा मध्यवर्ती कारागृहाचे अधीक्षक शरद शेळके यांनी सांगितले.

दुचाकी घसरून तरुण जखमी

कोल्हापूर : इचलकरंजी-सांगली रोडवर यड्राव फाटा येथे दुचाकी घसरून झालेल्या अपघातात दिनेश बबन नवाळे (वय २८ रा. इचलकरंजी) हा तरुण जमखी झाला. त्याला उपचारासाठी सीपीआरमध्ये दाखल करण्यात आले. घटनेची नोंद सीपीआर पोलिस चौकीत झाली.

.

तरुणाचा मृत्यू

कोल्हापूर : राहत्या घरी किरकोळ कारणावरून चिडून नाथाजी शंकर कांबळे (वय ३५, रा. आडूर ता. करवीर) या तरुणाने विष प्राशन केलेल्या तरुणाचा शुक्रवारी मृत्यू झाला. त्याच्यावर सीपीआरमध्ये उपचार सुरु होते.

.

अपघातात तरुण जखमी

कोल्हापूर : शाहूपुरी येथे रात्री एक वाजता दुचाकी घसरुन झालेल्या अपघातात विजय जगन्नाथ घोडके (वय ४०, रा. मंगळवार पेठ) हा जखमी झाला. त्याच्या डोक्याला मार लागला आहे. त्याच्यावर सीपीआरमध्ये उपचार सुरु आहेत.

.

दाम्पत्य जखमी

कोल्हापूर : खानापूर (ता. भुदरगड) येथे दुचाकीवरुन तोल जाऊन पडल्यान दाम्पत्य जखमी झाले. गौरी महेश थोरबोले (वय २५), महेश मोहन थोरबोले (वय २८, रा. शिंदेवाडी, ता.भुदरगड) अशी जमखीची नावे आहेत. गुरुवारी सायंकाळी हा प्रकार घडला. त्याच्यावर सीपीआरमध्ये उपचार सुरु आहेत.

.

मारहाणीत एकजण जखमी

कोल्हापूर : कनाननगर येथे गुरुवारी रात्री किरकोळ कारणावरून झालेल्या मारहाणीत जावेद खुदबुद्दीन मुजावर (वय ४५) हा जखमी झाला. त्याच्या डोक्याला व हाताला मार लागला आहे. त्यांच्यावर सीपीआर मध्ये उपचार सुरु आहेत. घटनेची नोंद सीपीआर पोलिस चौकीत झाली.

म. टा. प्रतिनिधी, कोल्हापूर

शहरात दिवसेंदिवस मोकाट जनावरांचा वावर वाढत असल्याने अस्वच्छतेबरोबरच अपघातांच्या प्रमाणात वाढ होत आहे. शहरातील वाहतूक व्यवस्था विस्कळीत करणाऱ्या आणि विद्रुपीकरणास साह्यभूत ठरणाऱ्या जनावरांच्या मालकांवर कारवाई करण्याचा इशारा महापालिकेने दिला आहे. रस्त्यावर जनावरे सोडणे बंद न केल्यास जनावरे जप्तीची कारवाई करण्यात येणार आहे.

शहरातील अनेक प्रमुख रस्त्यांवर मोकाट जनावरे व गायींचा वावर वाढला आहे. रस्त्यावर फिरणारी जनावरे खासगी मालकांची असल्याचे निदर्शनास आले आहे. मोकाट फिरणारी जनावरे रस्त्यावरच बसून राहत असल्याने वाहतूक कोंडीबरोबर अपघाताचे प्रमाण दिवसेंदिवस वाढत आहे. रस्त्यावर बसलेल्या जनावरांमधून मार्ग काढताना वाहनधारकांना कसरत करावी लागत आहे. तसेच अनेक जनावरे थेट भाजीमंडईत जात असल्याने भाजी विक्रेत्यांसह ग्राहकांना मोठ्या त्रासाला सामोरे जावे लागते. मोकाट जनावरे कोंडाळ्यात पडलेला भाजीपाला तसेच सडलेले अन्नपदार्थ खात असल्याने त्यांना हानिकारक घटकांची बाधा होऊन त्यांच्या आरोग्यास धोका निर्माण होऊ शकतो. मोकाट जनावरांचा वावर सातत्याने रस्त्यावर असल्याने अस्वच्छता निर्माण होत आहे. सध्या पावसाळ्याचे दिवस असल्याने जनावरांकडून मलमूत्राद्वारे होणाऱ्या अस्वच्छतेमुळे घाणीचे साम्राज्य निर्माण होत आहे. याची दखल घेऊन खासगी मालकांनी मोकाट जनावरे रस्त्यावर सोडणे बंद करावे, अन्यथा अशी जनावरे ताब्यात घेऊन जप्त करण्याचा इशारा महापालिकेने दिला आहे.

अनुकंपाखालील कर्मचाऱ्यांची भरती करण्याची स्थायी समितीमध्ये मागणी

महापालिका लोगो

म. टा. प्रतिनिधी, कोल्हापूर

महापालिकेच्या अनेक प्रभागात सफाई कर्मचाऱ्यांची संख्या असमान असल्याने सफाई व कचरा उठावाची कामे त्वरीत होत नाही. साथीच्या रोगाचा फैलाव रोखण्यासाठी प्रत्येक भागात आरोग्य कर्मचाऱ्यांची संख्या एकसमान ठेवावी. यासाठी अनुकंपा व वारसांच्या नेमणुका करुन कर्मचाऱ्यांची नेमणूक करावी, अशी मागणी स्थायी समितीच्या बैठकीत करण्यात आली. घनकचरा व्यवस्थापन व हाताळणीसाठी सफाई क्षेत्र निश्चित करुन कर्मचाऱ्यांतून नेमणूक करण्यात येणार असल्याचे प्रशासनाच्यावतीने स्पष्ट करण्यात आले.

प्रभागात सफाईसाठी कर्मचारी नसल्याचे सदस्या प्रतिज्ञा निल्ले व प्रतीक्षा पाटील यांनी प्रशासनाच्या निदर्शनास आणले. त्या म्हणाल्या, 'सफाई कर्मचाऱ्यांची संख्या काही प्रभागात जास्त तर काही प्रभागात नगण्य आहे. सफाई कर्मचारी कमी असल्याने अनेक प्रभागातील सापसफाई वेळेत होत नसल्याने कोंडाळे ओसंडून वाहत असतात. भाजी मंडई, स्टँड व रेल्वे स्टेशन परिसरात नागरिकांची वर्दळ जास्त असल्याने येथे जास्त कर्मचारी नियुक्ती करण्याची आवश्यकता आहे. यासाठी अनुकंपा व वारसांच्या आरोग्य कर्मचाऱ्यांची नेमणूक करावी.'

अफजल पिरजादे म्हणाले, 'सिद्धार्थ नगर व परिसरात नेहमी कमी दाबाने पाणीपुरवठा होतो.' नियमित पाणीपुरवठा कधी होणार अशी विचारणा करत एमईसीबीचे कारण पुढे न करता कायस्वरुपी उपाययोजना करण्याची मागणी केली. त्यावर बालिंगा जलउपसा केंद्रातील ट्रान्सफॉर्म जळाला असल्याने पाणीपुरवठा कमी दाबाने होत असल्याचे प्रशासनाने स्पष्ट केले. संजय मोहिते यांनी 'रस्ते, फुटपाथवर अतिक्रमण करुन हातगाड्यावर व्यवसाय सुरू आहे. त्यांच्यावर कारवाई कधी करणार असा प्रश्न उपस्थित केला. त्यावर महापालिकेच्या चार विभागीय कार्यालयांच्यावतीने अतिक्रमण मोहीम राबवणार असल्याचे प्रशासनाने सांगितले.

सभापती आशिष ढवळे यांनी शिवाजी पार्क प्रभाग क्रमांक १६ मधील खुल्या जागेची कब्जेपट्टी घेण्याबाबत प्रशासनाला यापूर्वी सूचना केली होती. याबाबत कोणती कारवाई केली असा जाब प्रशासनाला विचारला. शिवाजी पार्कमधील खुली जागा ताब्यात घेण्यासाठी तहसीलदारांशी पत्रव्यवहार केले असल्याचे सांगण्यात आले. सुनंदा मोहिते यांनी पाण्याच्या खजिना कार्यालयाचा स्लॅब नादुरुस्त आहे. स्लॅबचा गिलावा पडत असून कर्मचाऱ्यांना धोका निर्माण होण्याची शक्यता वर्तवली. दीपा मगदूम यांनी कपिलतीर्थ मार्केटमधील पार्किंगच्या जागेत कोंडाळ्यातील कचरा इतरत्र पसरत आहे. कचऱ्यामुळे दुर्गंधी सुटत असताना पार्किंगपासून मिळणारे उत्पन्न बुडत असल्याचे निदर्शनास आणून दिले.

उद्घाटन : इनरव्हील क्लब ऑफ कोल्हापूर हेरिटेजतर्फे गृहसजावट प्रदर्शनाचे उद्घाटन, हस्ते : आमदार सतेज पाटील, प्रतिमा पाटील, स्थळ : धैर्यप्रसाद हॉल, ताराबाई पार्क, वेळ : सकाळी ९ : ३० वा.

मेळावा : उद्योजक, व्यापाऱ्यांसाठी राज्यव्यापी मेळावा, स्थळ : राम गणेश गडकरी सभागृह, न्यू महाद्वार रोड, वेळ : दुपारी ४ वा.

नाट्यवाचन : भालजी पेंढारकर सांस्कृतिक केंद्र निर्मित आणि सर्जनशाळा प्रस्तुत 'विभाव' नाट्यवाचन, स्थळ : भालजी पेंढारकर केंद्र, नागाळा पार्क वेळ : सायंकाळी ५ वा.

गुरुवंदना : गुणिदास संगीत विद्यालयातर्फे 'गुरुवंदना' कला सादरीकरण, स्थळ : श्री लक्ष्मी मंगल कार्यालय, खरी कॉर्नर, वेळ : सायं. ५ वा.

म. टा. प्रतिनिधी, कोल्हापूर

राज्यात यंदा उसाची अतिरिक्त लागवड झाल्याने यंदा गळीत हंगाम एक ऑक्टोबरपासून सुरू करण्याचा निर्णय राज्य सरकारने घेतला आहे. पण नैसर्गिक स्थिती, उसाचा उतारा, ऊसतोडणी कामगारांची उपलब्धता, पूर्वहंगामी कर्ज या प्रक्रिया पूर्ण होण्यास कालावधी लागणार असल्याने एक नोव्हेंबरपासून जिल्ह्यातील साखर कारखाने सुरू होण्याची दाट शक्यता वर्तविण्यात येत आहे.

राज्यात यंदा ११ लाख ६२ हजार हेक्टर जमिनीवर ऊसलागवड झाली आहे. सरासरीपेक्षा हे प्रमाण दोन लाख ६० हेक्टर जमिनीवर उसाची लागवड जादा झाली आहे. यंदा या हंगामात ९४१.६० हेक्टर गाळपासाठी उपलब्ध होणार असल्याने पुणे येथे झालेल्या साखर कारखान्याच्या प्रतिनिधींच्या बैठकीत साखर कारखाने एक नोव्हेंबरऐवजी एक ऑक्टोबरला सुरू करण्याचा निर्णय घेण्यात आल्याची माहिती सहकार मंत्री सुभाष देशमुख यांनी दिली.

कोल्हापूर जिल्ह्यात २२ साखर कारखाने असून, साखरेचे दर कोसळल्याने बहुतांश साखर कारखाने एफआरपी देण्यास असमर्थ आहेत. गतवर्षी हंगाम सुरू होण्यापूर्वी स्वाभिमानी शेतकरी संघटनेने आंदोलन केल्यानंतर एफआरपीपेक्षा जादा २०० रुपये दर देण्याची घोषणा झाली होती. पण साखरेचे दर घसरल्याने साखर कारखान्यांना एफआरपीचे देण्यात नाकीनाऊ आले आहे. त्यामुळे ऊस उत्पादकांकडून थकीत एफआरपी देण्यासाठी साखर कारखान्यांवर दबाव वाढला आहे. एफआरपीची रक्कम देऊन नवीन हंगामासाठी साखर कारखाना कसा चालवायचा असा प्रश्न उपस्थित करुन एक ऑक्टोबरला हंगाम सुरू करण्याबाबत जिल्ह्यातील साखर कारखान्यांकडून असमर्थता दर्शविली जात आहे.

एक ऑक्टोबरला हंगाम सुरू करताना नैसर्गिक परिस्थिती लक्षात घेण्याची गरज व्यक्त केली जात आहे. यंदा दक्षिण महाराष्ट्रात चांगला पाऊस पडला आहे. सप्टेंबर व ऑक्टोबरच्या पहिल्या आठवड्यात हस्त नक्षत्राचा पाऊस पडतो. त्यामुळे शेतात पाणी असल्याने ऊसतोडणी जवळजवळ अशक्य असते. अनेक कारखान्यांकडून अजून ऊसतोडणी कामगारांशी करार झालेले नाहीत. दसरा झाल्याशिवाय ऊसतोडणी टोळ्या येत नाहीत. साखरेचे दर पडल्याने थकीत कर्जाची परतफेड न झाल्याने साखर कारखान्यांची बँक खाती एनपीएमध्ये गेली आहेत. साखर हंगामासाठी पूर्वहंगामी कर्ज मिळवण्यासाठी साखर कारखान्यांना थकीत कर्ज भरावे लागणार आहे. या सर्व प्रक्रिया पूर्ण झाल्यानंतर कारखाने सुरू होण्यास एक नोव्हेंबरचा कालावधी लागणार असल्याचे कारखान्यांच्या प्रतिनिधींनी सांगितले. नैसर्गिक परिस्थिती अनकूल राहिली तरच १५ ऑक्टोबरला हंगाम सुरू होईल, पण एक ऑक्टोबरला हंगाम सुरू होऊ शकत नसल्याचे कारखान्याच्या प्रतिनिधींनी स्पष्ट केले.

०००

सध्या प्रस्तावित वीज दरवाढीवरुन महावितरण चर्चेत आहे. महावितरणच्या कोल्हापूर परिमंडळमध्ये कोल्हापूर आणि सांगली या दोन जिल्ह्यांचा समावेश आहे. लहानसहान उद्योगांपासून ते मोठ्या कारखानदारीपर्यंत आणि घरगुती वापरापासून ते कार्पोरेट कार्यालयांपर्यंत साऱ्यांची भिस्त महावितरणवर आहे. विजेची उपलब्धता, पुरवठा यावरच प्रगतीची चक्रे फिरत असतात. या पार्श्वभूमीवर कोल्हापूर आणि सांगली जिल्ह्यातील महावितरणच्या कार्यकक्षेवर एक दृष्टीक्षेप....

........................

कोल्हापूर जिल्हा

एकूण ग्राहक संख्या १०७८६२६

घरगुती ग्राहक ८१६७५०

वाणिज्य ग्राहक ७४८२८

औद्योगिक ग्राहक १९७५१

शेती पंप १३९१७८

दिवाबत्ती ३२७४

इतर २०८०२

उच्चदाब (मोठे उपसा सिंचन व मोठे उद्योग) १२००

नळपाणी पिण्याचे पाणी पुरवठा योजना २८४३

......................................

सांगली जिल्हा

एकूण ग्राहक संख्या ८४१०६१

घरगुती ग्राहक संख्या ५४८०१२

वाणिज्य ग्राहक ४९६९८

औद्योगिक ग्राहक ९५५२

शेती पंप २२१६४४

दिवाबत्ती २७७७

इतर ७४०९

उच्चदाब (मोठे उपसा सिंचन व मोठे उद्योग) ७५६

नळपाणी पिण्याचे पाणी पुरवठा योजना १२१३

...................

२०१७-१८ मधील प्रत्यक्ष वीज वापर

कोल्हापूर ४३११.२६ दशलक्ष युनिट

सांगली २७४८.८७ दशलक्ष युनिट

........................

एप्रिल ते जून २०१८ या कालावधीतील वीज जोडणी

कोल्हापूर ७४४३

सांगली ५३१३

म. टा. प्रतिनिधी, कोल्हापूर

'ज्येष्ठ विचारवंत गोविंद पानसरे यांच्या मारेकऱ्यापर्यंत लवकरच पोहचणार असून, या प्रकरणात आणखी काही महत्त्वाचे धागेदोरे हाती लागले आहेत. तपास शेवटच्या टप्प्यापर्यंत आला आहे. विशेष तपास पथकाकडूनही (एसआयटी) तपासात प्रगती असून अधिकाधिक भक्कम पुरावे मिळतील,' असा विश्वास नूतन पोलिस अधीक्षक डॉ. अभिनव देशमुख यांनी शुक्रवारी बोलून दाखवला.

पानसरे यांच्यासह डॉ. नरेंद्र दाभोलकर, डॉ. एम. एम. कलबुर्गी यांच्या हत्येचा तपास महाराष्ट्र आणि कर्नाटक पोलिसांकडून सुरु आहे. पानसरे हत्येप्रकरणी एसआयटीने अनेक पुरावे गोळा केले आहेत. एसआयटीकडून या हत्येचा तपास चांगल्या पद्धतीने सुरु आहे. गौरी लंकेश प्रकरणात काही संशयितांना अटक केली आहे. तपास यंत्रणांना पानसरे यांच्या हत्येचे धागेदोरे मिळाले आहेत. तिन्ही हत्या प्रकरणात साम्य आहे. त्या आधारे पानसरे हत्या प्रकरणात शेवटच्या टप्प्यापर्यंत एसआयटी पोहोचली आहे. कर्नाटक एसआयटी पत्रकार गौरी लंकेश प्रकरणाची उकल करण्यापर्यंत पोहोचली आहे. कोल्हापूर एसआयटीलाही त्यांच्याकडून धागेदोरे मिळाले आहेत. त्यातून तपासातील सुटलेले दुवे पोलिसांच्या हाती लागले आहेत. पानसरे हत्येचा तपास अंतिम टप्प्यात असून हत्या प्रकरणी मिळालेले भक्कम पुरावे न्यायालयासमोर सादर केले जातील. महाराष्ट्र आणि कर्नाटक एसआयटी आणि सीबीआय या तिघांत समन्वयही चांगला आहे. मारेकऱ्यांची नावे काही दिवसांतच उघड होतील. माझ्या कारकीर्दीत गुन्ह्याची उकल नक्की होईल.'

म. टा. वृत्तसेवा, बेळगाव

एअर इंडियाच्या बेळगाव-बेंगलोर सेवेला शुक्रवारपासून प्रारंभ झाला. बेळगावसाठी हा ऐतिहासिक दिवस ठरला. बेळगावच्या सांबरा विमानतळाचे विस्तारीकरण झाल्यानंतर पहिल्यांदाच एअर इंडियाच्या एअरबसचे लँडिंग झाले. यापूर्वी प्रवासी वाहतूक करणारी छोटी विमाने येत होती. पण, एअरबस उतरण्याची शुक्रवारची पहिलीच वेळ होती. बंगलोरहून निघालेले विमान पंचेचाळीस मिनिटांत बेळगावला सकाळी ८.३० वाजता पोहोचले. वॉटर सॅल्यूट देऊन एअरबसचे स्वागत करण्यात आले.

बेंगलोरहून बेळगावला पहिल्या दिवशी ८३ प्रवासी आले तर बेळगावहून १०४ प्रवासी बेंगलोरला गेले. विमानाची क्षमता एकूण १२२ आहे. सकाळी साडेनऊ वाजता विमानाने बंगलोरला जाण्यासाठी उड्डाण केले.

सोमवार, गुरुवार, शुक्रवार आणि रविवारी एअर इंडियाची सेवा असणार असून उर्वरित तीन दिवशी अलायन्स एअर लाइन्सची सेवा उपलब्ध असेल. यावेळी खासदार प्रकाश हुक्केरी यांच्या हस्ते केक कापून दीपप्रज्ज्वलन करण्यात आले.

म. टा. प्रतिनिधी, कोल्हापूर

जिल्हा परिषदमधील विविध विभागांत फायली, सामान्यांची प्रकरणे प्रलंबित ठेवण्यामागे टक्केवारीचा हेतू असतो. जनसुविधा, नागरी सुविधांच्या कामात पाच टक्क्यांची मागणी केली जाते, अशी तक्रार भाजपचे सदस्य अॅड. हेमंत कोलेकर यांनी शुक्रवारी झालेल्या पार्टी बैठकीत केला. हे थांबविण्यासाठी अध्यक्षांनी विशेष लक्ष घालावे, अशी मागणीही त्यांनी केली. सत्ताधारी सदस्यानेच प्रशासनाकडून पैशाची मागणी होत असल्याची तक्रार केल्याने जिल्हा परिषदेतील खाबुगिरीचा कारभार पुन्हा एकदा चव्हाट्यावर आला.

जिल्हा परिषदेची सर्वसाधारण सभा दुपारी एक वाजता आयोजित केली होती. त्यापूर्वी सकाळी अकराच्या सुमारास अध्यक्षा शौमिका महाडिक, पक्ष प्रतोद विजय भोजे, ज्येष्ठ सदस्य अरुण इंगवले यांच्या प्रमुख उपस्थितीत सत्ताधारी सदस्यांची बैठक झाली. बैठकीत निधीवाटपावरूनही अनेक सदस्यांनी पदाधिकाऱ्यांना 'लक्ष्य' केले.

अॅड. कोलेकर म्हणाले, 'जिल्हा परिषदेत भाजपची सत्ता आहे. त्यामुळे लोकांकडून पारदर्शक कारभाराची अपेक्षा आहे. पूर्वी जसा कारभार होत होता, तसा होऊ नये, असे वाटते. मात्र सदस्यांनाच पारदर्शक प्रशासकीय कामकाजाचा अनुभव येत नसल्याचे चित्र आहे. झिरो पेंन्डसी उपक्रम राबविला जात असतानाही पेन्शनसह इतर अनेक प्रस्ताव प्रलंबित ठेवले जातात. टक्केवारीसाठीच फायली प्रलंबित ठेवल्या जातात, असा सामान्यांना अनुभव येत आहे. त्यामुळे अध्यक्ष, पक्षप्रतोदानी लक्ष घालून हे चित्र बदलावे. जन, नागरी सुविधांच्या कामांची निविदा काढणे, तांत्रिक मान्यता देणे, बिल काढण्यासाठी पाच टक्याची मागणी केली जाते.'

सदस्य राहुल आवाडे यांनी निधी वाटपात पक्षपाती, दुजाभाव होत असल्याचा मुद्दा उपस्थित केला. राजवर्धन निंबाळकर यांनी त्याचे समर्थन केले. सदस्या रसिका पाटील यांचे पती अमर पाटील यांनीही निधी वाटपप्रश्नी नाराजी व्यक्त केली. पदाधिकारी मनमानी पद्धतीने निधी वाटप करीत आहेत. स्वत:ला जास्त निधी घेत आहेत. ते आपलीच कामे करून घेतात. त्यांच्याकडून गेले तरच अधिकारी कामे करतात. त्यामुळे पदाधिकारी जिल्हा परिषदेचे मालक बनलेत का, असा संतप्त सूर काही सदस्यांनी आळवला. स्वकियांनीच असे थेट आरोप केल्याने सर्वच पदाधिकाऱ्यांना निरूत्तर व्हावे लागले. सभा वादळी होणार होऊ नये, म्हणून बोलाविलेल्या बैठकीतच गंभीर मुद्दे उपस्थित करीत पदाधिकाऱ्यांना कोंडीत पकडण्याचा प्रयत्न झाला. सभा असली तरच पार्टी बैठक बोलावली जाते. इतरवेळी पक्षप्रतोद व इतर पदाधिकाऱ्यांना सदस्यांची आठवण येत नाही, असे आरोप करीत निंबाळकर यांनी बैठकीतून निघून केले. आवाडे, अमर पाटील यांनी जिल्हा नियोजन समितीमधील सदस्यांनाही कमी निधी मिळाल्याचे निदर्शनास आणले. यावर वादळी चर्चा झाली. यासंबंधी पालकमंत्री चंद्रकांत पाटील यांना भेटू, असे पदाधिकाऱ्यांनी सांगितले. बैठकीस उपाध्यक्ष सर्जेराव पाटील, शिक्षण सभापती अंबरिश घाटगे यांच्यासह सत्ताधारी सदस्य उपस्थित होते.

००००००

म. टा. प्रतिनिधी, कोल्हापूर

पाचगांव (ता. करवीर) येथे राजकीय वर्चस्वातून झालेल्या धनाजी गाडगीळ खूनप्रकरणातील कैदी अक्षय कोंडेकरचा सीपीआरमध्ये मृत्यू झाल्यानंतर त्याच्या नातेवाईकांनी गोंधळ घातला. तसेच डॉक्टरांना धक्काबुक्की करत मारहाणीचा प्रयत्नही करण्यात आला. त्यामुळे तणाव निर्माण झाला. हा प्रकार समजताच जमावाला नियंत्रणात आणण्यासाठी पोलिसांनी धाव घेत परिस्थिती नियंत्रणात आणली. धक्काबुक्कीच्या घटनेच्या निषेधार्थ डॉक्टरांनी चार तास काम बंद आंदोलन केले.

चगाव ग्रामपंचायत निवडणुकीनंतर वर्चस्ववादातून माजी ग्रामपंचायत सदस्य अशोक पाटील यांचा १३ फेब्रुवारी, २०१३ रोजी डोक्यात गोळ्या झाडून खून झाला. या खुनाचा बदला अशोक पाटील समर्थकांनी घेतला. त्यांनी दिलीप जाधव ऊर्फ डीजेचा मेहुणा धनाजी गाडगीळचा डिसेंबर २०१३ मध्ये खून केला. पाटील ग्रुपमधील अक्षय जयसिंग कोंडेकर (वय २८, रा. पाचगाव) याच्यासह अकराजणांना न्यायालयाने दोषी ठरवून त्या सर्वांना आजन्म कारावास ठोठावला होता. दोषीपैकी कोंडेकर कळंबा कारागृहात शिक्षा भोगत होता. छातीत दुखत असल्याने आणि पांढऱ्या पेशी कमी झाल्याने गुरुवारी त्याला कळंबा कारागृहातील रुग्णालयात दाखल केले होते. मात्र पुन्हा श्वासोच्छ्वासाचा त्रास होऊ लागल्यामुळे डॉक्टरांनी सीपीआरमध्ये दाखल करण्याचा सल्ला दिला. सुरक्षेसाठी पोलिस नसल्याने त्याला आठ ऑगस्टला रुग्णालयात नेले नाही. ९ ऑगस्टला त्याला सीपीआरमध्ये दाखल केले. उपचार सुरु असतानाच त्याचा शुक्रवारी सकाळी पावणे नऊच्या सुमारास मृत्यू झाला. त्याच्या मृत्यूमुळे संतप्त झालेले अडीचशेवर तरुण रुग्णालयात आले. डॉक्टरांच्या हलगर्जीपणामुळेच मृत्यू झाल्याचा आरोप करुन त्यांना धक्काबुक्की आणि मारहाणीचा प्रयत्न केला. त्यामुळे सीपीआरमध्ये तणाव निर्माण झाला. याच्या निषेधार्थ डॉक्टरनी काम बंद ठेवले.

करवीरचे तहसीलदार संतोष सानप यांच्या उपस्थितीत 'इन कॅमेरा' शवविच्छेदन करण्यात आले. दरम्यान कारागृहातील आणखी एका कैद्याचा मृत्यू झाल्याने तणावात आणखीच भर पडली. पोलिसांनी ट्रॅकिंग फोर्स, राज्य राखीव दलाची तुकडी तैनात केली.

म. टा. प्रतिनिधी, कोल्हापूर

कसबा बावडा येथील रणदिवे गल्लीतील शामराव धोंडिराम पाटील (वय ८९) व पांडुरंग धोंडिराम पाटील (८२) या सख्ख्या भावांचा शुक्रवारी (ता. १०) एकाच दिवशी दहा तासांच्या आत मृत्यू झाला. या घटनेने कसबा बावडा परिसरात हळहळ व्यक्त होत आहे.

रणदिवे गल्लीत राहणाऱ्या पाटील कुटुंबीयांतील पांडुरंग धोंडिराम पाटील यांचे शुक्रवारी सकाळी वृद्धापकाळाने घरात निधन झाले. त्यांच्यावर अंत्यसंस्कार करून नातेवाईक आणि पै-पाहुणे दुपारी घरी पोहोचले. दरम्यान, पांडुरंग यांचे थोरले बंधू शामराव यांची प्रकृती बिघडल्याने त्यांना उपचारासाठी खासगी रुग्णालयात दाखल केले होते. पांडुरंग यांच्यावरील अंत्यसंस्कार उरकून काही पाहुणे माघारी परतत होते. याचवेळी दुपारी तीनच्या सुमारास शामराव यांच्या निधनाचा निरोप नातेवाइकांना मिळाला. दहा तासांत सख्ख्या भावांची अचानक एक्झिट झाल्याने नातेवाइकांसह पै-पाहुणेही अवाक् झाले. परतीला लागलेले पाहुणे पुन्हा माघारी फिरले. शामराव यांच्या मृतदेहावर अंत्यसंस्कार करण्यात आले. एकाच घरात एकाच दिवशी दोघा सख्ख्या भावांचा मृत्यू झाल्याने पाटील कुटुंबीयांच्या दुःखाला पारावार उरला नाही. या घटनेमुळे कसबा बावडा परिसरात हळहळ व्यक्त केली जात होती.

शामराव पाटील यांच्या पश्चात मुलगा, मुलगी, सून, नातवंडे असा परिवार आहे, तर पांडुरंग पाटील यांच्या पश्चात दोन मुली, जावई, नातवंडे असा परिवार आहे. रक्षाविसर्जन रविवारी (ता. १२) सकाळी नऊ वाजता कसबा बावडा येथील स्मशानभूमीत होणार आहे. शामराव पाटील हे प्रा. बी. एस. पाटील यांचे वडील होत.

ट्रान्सफॉर्ममध्ये बिघाड, दुपारनंतर पाणीपुरवठा सुरळीत

फोटो आहे

म. टा. प्रतिनिधी, कोल्हापूर

बालिंगा जलउपसा केंद्रातील ट्रान्सफॉर्ममध्ये बिघाड झाल्याने ऐन पावसाळ्यात शहरातील नागरिकांना पाण्यासाठी धावाधाव करावी लागली. दुपारपर्यंत ट्रान्सफॉर्ममधील बिघाड काढण्यास यश आले , तरी सकाळी सत्रात पाणीपुरवठा न झाल्याने टँकरद्वारे पाणीपुरवठा करण्यात आला. दिवसभरात कळंबा फिल्टर हाऊस येथून २३ टँकरद्वारे पाणीपुरवठा करण्यात आला.

बालिंगा जलउपसा केंद्राजवळील बालिंगा ते चंबुखडी टाकीकडे जाणाऱ्या जलवाहिनीत गेल्या आठवड्यापासून बिघाड झाला आहे. शुक्रवारी ८०० मिमी रायझिंगची गळती काढण्यात येणार होती. त्यामुळे निम्म्या शहराचा पाणीपुरवठा बंद होणार असल्याच्या सूचना पाणीपुरवठा विभागाने दिल्या होत्या. पण बुधवारी रात्री बालिंगा जलउपसा केंद्रातील ट्रान्सफॉर्म जळाला. गुरुवारी कोल्हापूर बंद असल्याने दिवसभर ट्रान्सफॉर्म बदलण्यासाठी क्रेन उपलब्ध होऊ शकली नाही. गुरुवारी रात्री क्रेन उपलब्ध झाल्यानंतर ट्रान्सफॉर्म बदलण्यात आला. मात्र त्यानंतर पुन्हा त्यामधील फ्यूज खराब झाल्याने पुन्हा पाणी उपसा बंद राहिला.

शुक्रवारी सकाळी ११ वाजेपर्यंत फ्यूज बदलण्यात आली. सकाळच्या सत्रासाठी पाणीपुरवठा करण्यात येणाऱ्या विभागात पाणीपुरवठा होऊ शकला नाही. त्यामुळे रविवार पेठ, वांगी बोळ, लक्ष्मीपुरी, राजाराम चौक, खंडोबा तालीम, तटाकडील तालीम व सानेगुरुजी परिसरात पाणीपुरवठा होऊ शकला नाही. या सर्व भागांना टँकरद्वारे पाणीपुरवठा करण्यात आला. ज्या भागात पाणीपुरवठा होऊ शकला नाही, त्या भागात कळंबा फिल्टर हाऊस येथून २३ टँकरच्या फेऱ्यांद्वारे पाणीपुरवठा करण्यात आला. सायंकाळच्या सत्रात ज्या भागात पाणीपुरवठा होते, तेथे नेहमीप्रमाणे पाणीपुरवठा झाला.

शुक्रवारी (ता. ३) बालिंगा उपसा केंद्राजवळील विद्युत वाहिनीला शॉर्ट सर्किट झाल्याने पाणीपुरवठा खंडीत झाला होता. त्यामुळे अनेक भागात टँकरद्वारे पाणीपुरवठा करावा लागला होता. विद्युत वाहिनीतील बिघाड दूर झाल्यानंतर आपटेनगर पाण्याच्या टाकीजवळील ट्रान्सफॉर्मध्ये बिघाड झाला. दोन दिवस ट्रान्सफॉर्ममधील बिघाड काढण्यास अपयश आल्याने नवीन ट्रान्सफॉर्म बसवण्यात आला. त्यानंतर बालिंगा उपसा केंद्रातील ट्रान्सफॉर्ममध्ये बिघाड होत असल्याने महापालिका पाणीपुरवठा विभागाची डोकेदुखी वाढली आहे.

चौकट

रायझिंगची सोमवारी दुरुस्ती

बालिंगा जलउपसा केंद्राजवळील बालिंगा ते चंबुखडी टाकीकडे जाणाऱ्या जलवाहिनी दुरुस्तीच्या कामाला शुक्रवारपासून सुरुवात होणार होती. दुरुस्तीसाठी महापालिकेने नियोजनही केले होते. पण अचानक टान्सफॉर्ममध्ये बिघाड झाल्याने पाणीपुरवठाच ठप्प झाला. त्यामुळे बालिंगा जलउपसा केंद्राजवळून बालिंगा ते चंबुखडीकडे जाणाऱ्या ८०० मिमी रायझिंग व आपटेनगरकडे जाणाऱ्या जलवाहिनीची गळती काढण्याचे काम रद्द केले. आठवड्यात दोनवेळा दुरुस्तीचे काम पुढे ढकलण्यात आले आहे. आता हे काम सोमवारी (ता.१३) करण्यात येणार असल्याने पुन्हा नागरिकांना पाण्यासाठी धावाधाव करावी लागणार आहे.