'शिष्यवृत्ती'त विद्यामंदिर

कारभारवाडीचे यश

कोल्हापूर टाइम्स टीम

कारभारवाडी (ता. करवीर) येथील विद्यामंदिरच्या नऊ विद्यार्थ्यांनी पाचवी शिष्यवृत्ती परीक्षेमध्ये गुणवत्ता यादीत स्थान मिळवले. शाळेचा अद्वैत अरुण हळदकर यांनी २८० गुण मिळवत ग्रामीण विभागातून राज्य गुणवत्ता यादीत तिसरे स्थान मिळवले. तर कावेरी अंकुश साळोखेने २६८ गुण मिळवत राज्यात नववी आली. राज्य शिष्यवृत्ती परीक्षेचा सोमवारी रात्री संकेतस्थळावर निकाल जाहीर झाला. ग्रामीण विभागातून कारभारवाडी येथील विद्यामंदिरच्या नऊ विद्यार्थ्यांनी गुणवत्ता यादीत स्थान मिळवले. यामध्ये मंथन मुरलीधर पाटील (२६८), यश नेताजी पाटील (२५०), आर्यन प्रमोद पाटील (२४८), प्राची प्रदीप पाटील (२४६), संस्कार रामचंद्र मोरे (२४४), सिद्धी आनंदा चौगले (२४४) यांचा समावेश आहे. विद्यार्थ्यांना शिक्षक धनाजी केशव पाटील, गटशिक्षणाधिकारी एस. के. यादव, शिक्षण विस्तार अधिकारी विश्वास सुतार, केंद्रप्रमुख अशोक देशमुख, मुख्याध्यापक मुरली पाटील, डी. डी. पाटील व दीपक पिंजरे यांचे मार्गदर्शन मिळाले.

कोल्हापूर टाइम्स टीम

केंद्र सरकारप्रमाणे सातवा वेतन आयोग त्वरित लागू करावा यांसह विविध मागण्यांसाठी राज्य सरकारी कर्मचारी मध्यवर्ती संघटनेने पुकारलेल्या संपात, बुधवारी दुसऱ्या दिवशीही कर्मचाऱ्यांनी सहभाग घेतला. त्यामुळे जिल्हाधिकारी कार्यालयासह सर्व सरकारी कार्यालयांतील प्रशासकीय कामकाज बंद राहिले. जिल्ह्यातील आरोग्य यंत्रणाही कोलमडून गेली आहे. येथील छत्रपती प्रमिलाराजे शासकीय रुग्णालयातील (सीपीआर) तब्बल ६४६ कर्मचारी संपावर आहेत. परिणामी रुग्णसेवेची प्रचंड हेळसांड सुरू झाली आहे. त्यामुळे डॉक्टरांना किरकोळ शस्त्रक्रिया पुढे ढकलाव्या लागल्या आहेत.

राज्य सरकारी कर्मचारी मध्यवर्ती संघटनेने मंगळवारपासून तीन दिवस राज्यस्तरीय संप पुकारला आहे. संपाच्या दुसऱ्या दिवशीही अनेक कार्यालयांतील खुर्च्या रिकाम्या राहिल्या. परिणामी प्रशासकीय कामकाज थांबले. अधिकारी कामावर उपस्थित होते. मात्र अधीक्षक ते शिपाई, वाहनचालक पदापर्यंतचे सर्व स्तरातील कर्मचारी संपात सहभागी असल्याने अधिकाऱ्यांची अडचण झाली. कोणत्याही प्रकारचे प्रशासकीय कामकाज होऊ शकले नाही. राज्य सरकारने संपात सहभागी होणाऱ्या कर्मचाऱ्यांवर कारवाईचे आदेश दिले आहेत. मात्र पहिल्याच दिवशी हा आदेश झुगारून सरासरी पाच टक्के वगळता उर्वरित कर्मचारी संपात सहभागी झाले. तरीही अधिकाऱ्यांनी त्यांच्यावर कारवाईचे धाडस केलेले नाही. त्यामुळे पहिल्या दिवशी कारवाईच्या भीतीने कामावर आलेले कर्मचारी दुसऱ्या दिवशीच्या संपात सहभागी झाल्याचे दिसले.

सीपीआरचे आरोग्य बिघडले

छत्रपती प्रमिलाराजे शासकीय रुग्णालयात (सीपीआर) एकूण ८३९ कर्मचारी कार्यरत आहेत. मंगळवारी त्यापैकी ७०१ कर्मचारी तर बुधवारी ६४६ कर्मचारी संपात सहभागी झाले. संपात प्रामुख्याने आरोग्यसेविका, लिपीक, वार्डमन, शिपाई आदींचा समावेश आहे. मोठ्या संख्येने कर्मचारी संपावर असल्याने आरोग्य सेवा विस्कळीत झाली. परिणामी संप रुग्णांच्या जिवावर बेतण्याची शक्यता निर्माण झाली आहे. प्रशिक्षणार्थी डॉक्टर, नर्स, वैद्यकीय शिक्षण घेणारे विद्यार्थी, होमगार्ड यांच्या सहाय्याने पर्यायी मनुष्यबळ उभारण्याचे प्रयत्न करण्यात आले. मात्र ती यंत्रणा अपुरी पडत आहे. यामुळे बाह्य रुग्ण विभागासह आंतररुग्णांना सेवा मिळण्यात अडचणीत येत आहेत. केवळ तातडीच्या शस्त्रक्रिया सुरू आहेत. किरकोळ आणि विलंबाच्या शस्त्रक्रिया पुढे ढकलण्यात आल्या आहेत. वार्डमन, शिपाई नसल्याने रुग्णाच्या नातेवाईकांवर स्ट्रेचर ढकण्याची वेळ आली आहे.

मृतदेह वेटिंगवर

शवविच्छेदन करण्यापूर्वीची कागदोपत्री प्रक्रिया करणारे नेहमीचे अनुभवी कर्मचारी उपस्थित नसल्याने आत्महत्या, विष प्राशन, अपघातामध्ये मृत झालेल्या प्रकरणांत प्रचंड गैरसोय होत आहे. अशा मृतदेहांविषयीची प्रक्रिया करण्यास कुटूंबीयांना प्रतिक्षा करावी लागली. सिंधूदुर्ग येथील शांताराम घाणेकर (वय ४५) यांनी विष प्यायल्याने त्यांना मंगळवारी उपचारासाठी दाखल करण्यात आले होते. उपचार सुरू असताना बुधवारी सकाळी आठ वाजता त्यांचा मृत्यू झाला. संपामुळे त्यांच्या मृतदेहाच्या शवविच्छेदनास विलंब झाला. बाह्य रुग्ण विभागाजवळील एका कोपऱ्यात स्ट्रेचरवर त्यांचा मृतदेह सकाळी आठ वाजल्यापासून दुपारी ३ वाजल्यापर्यंत ठेवण्यात आला होता. त्यांचे नातेवाईक शवच्छेदनासाठीची कागदपत्रे मिळावीत, यासाठी वारंवार पाठपुरावा करीत राहिले. मात्र दुपारी दोन वाजेपर्यंत त्यांना कोणीही जबाबदार अधिकारी समाधानकारक उत्तर देत नव्हता. ते मृतदेहाजवळ चिंताग्रस्त अवस्थेत बसून होते.

जिल्हातील आरोग्य सेवेवर परिणाम

उपजिल्हा रुग्णालय, ग्रामीण रुग्णालयांतील कर्मचारीही संपावर गेले आहेत. त्यामुळे गावागावांतील आरोग्यसेवा कोलमडली आहे. त्यासंबंधी जिल्हा शल्य चिकित्सकाकडून चांगली पर्यायी व्यवस्था निर्माण केली गेली नसल्याच्या तक्रारी आहेत. ते जुजबी उत्तरे देऊन वेळ मारून नेत असल्याचाही आरोप होत आहे. त्यामुळे ग्रामीण भागातील रुग्णांवर तातडीने उपचार होण्यास अडथळे येत आहेत. लिपीक, वॉर्डमन नसल्याने रुग्णालयातील प्रशासकीय कामकाज विस्कळीत झाले. अनेक ठिकाणी कर्मचारी संपावर असल्याने डॉक्टरांनीही दांडी मारल्याचे दिसले.

जिल्हाधिकारी कार्यालय

जिल्हाधिकारी कार्यालयातून जिल्हा प्रशासनाचे कामकाज चालते. मात्र, जिल्हाधिकाऱ्यांसह वरिष्ठ अधिकारी वगळता इतर कर्मचारी संपावर असल्याने दुसऱ्या दिवशीही कामकाज बंद राहिले. कार्यालयात शुकशुकाट जाणवत होता. सामान्य नागरिकांची कामे झाली नाही. गावपातळीवरील कर्मचारीही संपात असल्याने विविध प्रकारचे दाखले मिळालेले नाहीत. कायदा सुव्यवस्था राखण्यात महसूल प्रशासनाची पोलिसांना मदत करीत असते. मात्र महसूल विभागातील कर्मचारी संपावर असल्याने त्याचा कामकाजावर परिणाम झाला.

आरटीओ, पाटबंधारे कार्यालय

आरटीओ विभाग, पाटबंधारे विभाग आणि सार्वजनिक बांधकाम विभागातील कर्मचारीही संपावर असल्याने कामकाज ठप्प राहिले. अधिकारी कक्षात आणि कार्यालयातील कर्मचाऱ्यांच्या खुर्च्या रिकाम्या असे चित्र राहिले. नवा वाहन परवाना, पासिंग अशा आरटीओंशी संबंधीची कामे झाली नाहीत. नेहमी वर्दळ असलेल्या या कार्यालयाजवळही शांतता राहिली.

जिल्हा परिषदेतील स्थिती

एकूण अधिकारी कर्मचारी संख्या

वर्ग एक मधील अधिकारी १४०

वर्ग दोन मधील अधिकारी ६७

वर्ग तीन मधील कर्मचारी १०७३१

वर्ग चार मधील कर्मचारी ८८३

....................

संपात सहभागी कर्मचारी

वर्ग तीन मधील कर्मचारी ८३४४

वर्ग चार मधील कर्मचारी ४९४

वर्ग दोन मधील अधिकारी २

.........................

कार्यालयात उपस्थितांची संख्या

वर्ग एक मधील अधिकारी १३५

(पाच अधिकारी रजेवर)

वर्ग दोन मधील अधिकारी ६३

वर्ग तीन मधील कर्मचारी २१५७

वर्ग चार मधील कर्मचारी ३५५

कोल्हापूर

संपावर गेलेल्या येथील सीपीआरमधील कर्मचाऱ्यांनी त्वरित हजर व्हावे. बेकायदेशीरपणे संपावर गेलेल्या कर्मचाऱ्यांवर कारवाई करावी, अशी मागणी भारतीय जनता पार्टी युवा मोर्चातर्फे बुधवारी एका निवेदनाव्दारे अधिष्ठाता सुधीर नणंदकर यांच्याकडे केली. निवेदनात म्हटले आहे, सीपीआरमध्ये जिल्ह्यातून रुग्ण, अपघातग्रस्त उपचारासाठी येतात. वैद्यकीय क्षेत्र, सरकारी रुग्णालये अत्यावश्यक सेवेमध्ये येतात. यामुळे सीपीआरमधील कर्मचाऱ्यांना संपात सहभागी होता येत नाही. तरी देखील ते संपात सहभागी झाल्याचे दिसून आले आहे. यावेळी युवा मोर्चाचे अध्यक्ष दिग्विजय कालेकर, सुमित पारखे, अमित माळी, प्रसाद मोहिते, वैभव कांबळे आदी उपस्थित होते.

--------

म. टा. वृत्तसेवा, आजरा

आंबोलीतील मुख्य धबधब्याजवळील दरीत बुधवारी संध्याकाळी ट्रक कोसळून झालेल्या अपघात चालक ठार झाला. चालकाचे नाव समजू शकले नाही. मुख्य रस्त्यालगत चर खोदण्यात आली आहे. ट्रक सावंतवाडीच्या दिशेने जात होता. मुख्य धबधब्याशेजारी चरीत चाक गेल्यानंतर चालकाचे ट्रकवरील नियंत्रण सुटले आणि ट्रक पाचशे फूट दरीत कोसळला. ही दुर्घटना समजताच आंबोली आणि सांगेली येथील बचाव पथकाने घटनास्थळी भेट घेऊन रात्री मदतकार्य सुरू केले.

भूमिका

रासायनिक खतांचा अनावश्यक वापर टाळावा

जिल्ह्याचा आर्थिकस्तर उंचावण्यासाठी येथील शेती क्षेत्राचा महत्त्वपूर्ण वाटा आहे. पारंपरिक पद्धतीने शेती करताना जमिनीचा पोत कसा टिकेल याकडे गांभीर्याने पाहिले गेले. पण गेल्या काही वर्षांत भरघोस उत्पादनासाठी रासायनिक खतांचा वापर मोठ्याप्रमाणात वाढला आहे. खतांच्या वापरांमुळे उत्पादन वाढत असले, तरी जमिनीचे आरोग्य बिघडत चालले आहे. खतांचा अमर्याद वापर कायम राहिल्यास भविष्यात शेतीमधील उत्पादकतेत प्रचंड घट होण्याची शक्यता आहे. त्यामुळेच रासायनिक खतांचा आवश्यकतेपेक्षा कमी वापर करून हिरवळींच्या खतांचा अधिक वापर करण्याची आवश्यकता आहे. राज्यासह जिल्ह्यात सुरू असलेल्या मृदा सर्वेक्षणातून जमिनीतील आवश्यक सूक्ष्म अन्यद्रव्यांची कमतरता असल्याचे समोर आले आहे. जमिनीची उत्पादकता वाढविण्यासाठी कृषी विद्यापीठांकडून नेहमीच मार्गदर्शन केले जाते. पण हे मार्गदर्शन शेतीच्या बांधापर्यंत पोहोचत नसल्याची टीका होत असताना मृदा सर्वेक्षणात शेतकऱ्यांनी रुची वाढवली आहे. रासायनिक खतांच्या अतिवापराबाबत शेतकऱ्यांच्या बांधापर्यंत माहिती पोहोचविल्यास निक्कीच त्यांच्यात प्रबोधन घडून येईल. अशी माहिती शेतकऱ्यांना उपलब्ध न झाल्यास भविष्यातील पिढीला कसदार जमीन शिल्लक राहणार नाही, याचा गांभीर्याने विचार करण्याची गरज आहे.

०००००००

जिल्ह्याच्या जमिनीचा पोत बिघडला

रासायनिक खतांचा वारेमाप वापर; सूक्ष्म अन्यद्रव्यांची कमतरता; एनपीकेचे प्रमाण जास्त

फोटो वापरा

Maruti.Patil@timesgroup.com

tweet: @MarutipatilMT

कोल्हापूर : मृदा सर्वेक्षण मोहिमेंतर्गत जिल्ह्यातील शेतकऱ्यांमध्ये आरोग्यपत्रिका (सॉइल हेल्थ कॉर्ड) बनवण्याकडे ओघ वाढत आहे. शेतकऱ्यांनी जमिनीच्या आरोग्याबाबत दाखविलेल्या रुचीमुळे तीन वर्षांत जिल्ह्यातील नऊ लाख सॉइल हेल्थ कार्ड तयार झाली असून, जमिनीमध्ये सूक्ष्म अन्यद्रव्यांचे प्रमाण अत्यंत नगण्य असल्याचे समोर आले आहे. रासायनिक खतांच्या अतिरिक्त वापरामुळे आवश्यकतेपेक्षा जास्त नत्र, स्फूरद, पालाशचे (एनपीके) प्रमाण जास्त असल्याने याचा जमिनीच्या पोतावर परिणाम दिसून येत आहे.

जिल्ह्याचे एकूण पाच लाख हेक्टर क्षेत्र असून, सुमारे तीन लाख हेक्टर क्षेत्र बागायत, तर दोन लाख ३९ हजार हेक्टर क्षेत्र जिरायतीखाली आहे. बारमाही पाण्याच्या सुविधांमुळे येथील ओलिताखालील क्षेत्र जास्त असले, तरी जास्त उत्पादन घेण्याच्या वृत्तीमुळे रासयनिक खते आणि औषधांचा वारेमाप वापर सुरू झाला आहे. खते व औषधांच्या अतिवापरांमुळे उत्पादन भरघोस निघत असले, तरी जमिनीचा पोत मात्र बिघडत चालला आहे.

पारंपरिक पद्धतीने शेती करताना शेणखत, लेंढी, कोंबडी खत याबरोबर जमिनीमध्ये आलटून पालटून पिके घेतली जात होती. पीक पद्धतीमध्ये बदल होत असल्याने जमिनीचा पोत कायम राहत सूक्ष्म अन्यद्रव्यांचे प्रमाण कायम राहत होते. पण गेल्या काही वर्षांत रासायनिक खतांचा वापर वाढल्यानंतर उत्पादनात वाढ होऊ लागली. सुरुवातीच्या काही वर्षांत चांगले उत्पादन निघू लागले, मात्र त्यानंतर उत्पादनामध्ये घट होऊ लागली. त्यानंतर पुन्हा रासयनिक खतांची मात्रा वाढवण्यात आली. त्याचा परिणाम जमिनीवर होऊन सूक्ष्म अन्यद्रव्यांचे प्रमाण कमी होऊ लागले आहे.

जमिनीचा पोत राखणारी ही सुक्ष्म अन्यद्रव्यांचे प्रमाण कमी होत निघाल्याचे मृदा सर्वेक्षणावरुन स्पष्ट झाले आहे. जिल्ह्यातील १,२११ गावांतून ४० हजार ७१७ ठिकाणचे मातीचे नमुने घेतले आहेत. तपासणीत एनपीकेचे प्रमाण वाढल्याचे दिसत असताना कॉपर (०.९), झिंक (२१), लोह (३३) टक्क्यांपर्यंत कमी झाले आहे. सुक्ष्म अन्यद्रव्यांची टक्केवारी वाढवण्यासाठी पिकांची फेरपालटणीबरोबरच हिरवळीच्या खतांवर भर देण्याची गरज आहे.

जमिनीबरोबर पाण्यातही दोष

मृदा सर्वेक्षणाबरोबर जिल्ह्यातील विहिरी व कूपनलिकांमधील पाण्याचे नमुनेही तपासण्यात आले. ९४१ ठिकाणी केलेल्या पाणीतपासणीमध्ये ६९८ ठिकाणचे पाणी शेतीस योग्य असल्याचे, तर २४४ ठिकाणी अयोग्य असल्याचा अहवाल प्राप्त झाला आहे. त्यामुळे भविष्यात जमिनीबरोबर पाण्याची गुणवत्ता राखण्याकडे गांभीर्याने उपाययोजना करण्याची आवश्यकता आहे.

००

तालुकानिहाय मृदा सर्वेक्षण

करवीर - ३,५७४, कागल - ४,४६२, राधानगरी - २,८०१, गगनबावडा - १,०२१, शिरोळ - २,९००, हातकणंगले - ५,९५८, भूदरगड - २,८७४, गडहिंग्लज - ३,५९०, आजरा - २,२८०, चंदगड - ३७०४

०००

जमिनीतील सूक्ष्म द्रव्यांचे सरासरी प्रमाण (टक्के)

कॉपर - ०.९

झिंक - २१

लोह - ३३

०००

जिल्ह्यात वितरित केलेल्या आरोग्य पत्रिकेवरून जमिनीमध्ये सूक्ष्म अन्यद्रव्यांचे प्रमाण कमी असल्याचे स्पष्ट झाले आहे. सूक्ष्म अन्यद्रव्यांचे प्रमाण वाढविण्यासाठी तज्ज्ञांच्या शिफारसीनुसार मशागतीवेळी मात्रा देण्याची आवश्यकता आहे.

महावीर लाटकर, जिल्हा मृदा चाचणी अधिकारी

०००००

म. टा. प्रतिनिधी, कोल्हापूर

तीन दिवसीय संपांच्या पाठिंब्यावरून जिल्हा परिषदेतील विविध कर्मचारी संघटनांत धुसफूस वाढली आहे. राज्य संघटनेने संपामध्ये एक दिवस सहभागाचा व पाठिंब्याचा निर्णय घेतला असताना स्थानिक पातळीवर तीन दिवस आंदोलनात सक्रिय होण्याचा काहींनी निर्णय घेतला. राज्य संघटनेचा आदेश डावलून स्थानिक पातळीवर परस्पर निर्णय घेण्याच्या या प्रकाराविरोधात जिल्हा परिषद कर्मचारी युनियनचे जिल्हाध्यक्ष धनंजय जाधव व लिपिकवर्गीय संघटनेचे राज्य कार्याध्यक्ष सचिन मगर यांनी पदाचा राजीनामा दिला आहे.

महाराष्ट्र राज्य जिल्हा परिषद कर्मचारी युनियनने आंदोलनात एक दिवस सहभागाचा निर्णय घेतला होता, तर जिल्हा परिषद लिपिकवर्गीय संघटनेने आंदोलनात सहभागी न होता केवळ पाठिंब्याची घोषणा केली होती. कर्मचारी युनियनशी लिपिकवर्गीय संघटना, लेखा संघटना संलग्न आहेत. नियोजनाप्रमाणे कर्मचारी युनियनने बुधवारी कामावर हजर होण्याचा निर्णय घेतला. युनियनने तसे आवाहन केले होते. त्यानुसार ठिकठिकाणी आरोग्य कर्मचारी, लिपिक, शिपाई कामावर हजर झाले. मात्र, युनियनशी संलग्न कर्मचारी कामावर रुजू होण्यासाठी बुधवारी जिल्हा परिषेदत आले असता अन्य संघटना प्रतिनिधींकडून दबाव आणल्याचे प्रकार घडल्याची चर्चा आहे. शिवाय लिपिकवर्गीय व लेखा संघटनेच्या स्थानिक पदाधिकाऱ्यांनी राज्य कार्यकारिणीची पूर्वपरवानगी न घेता परस्पर संपात सहभागी होण्याचा निर्णय घेत आंदोलन कायम ठेवले.

कर्मचारी युनियन व लिपिकवर्गीय संघटनेच्या राज्य कार्यकारिणीच्या धोरणानुसार कामकाज करण्याऐवजी काहींनी स्वतंत्रपणे निर्णय घेतले. स्थानिक पातळीवरील हा निर्णय न पटल्यामुळे कर्मचारी युनियनचे जिल्हाध्यक्ष धनंजय जाधव, तर लिपिकवर्गीय संघटनेचे राज्य कार्याध्यक्ष सचिन मगर यांनी आपआपल्या पदाचा राजीनामा राज्य संघटनेकडे सादर केला. लिपिकवर्गीय संघटनेने केवळ पाठिंब्याचा निर्णय घेतला होता. मात्र, काहींनी संपात सहभागी होत इतर कर्मचाऱ्यांचे आर्थिक नुकसान केले. संपातील कालावधीचा पगार कपात झाल्यास त्या आर्थिक नुकसानीला जबाबदार कोण? असा प्रश्न मगर यांनी उपस्थित केला.

०००

म. टा. प्रतिनिधी, कोल्हापूर

कोल्हापूर जिल्हा परिषदेतील बहुतांश कर्मचाऱ्यांनी दुसऱ्या दिवशीही संपातील सहभाग कायम ठेवल्यामुळे कामकाज बंद राहिले. जिल्हा परिषदेतील अनेक कार्यालये उघडली नाहीत. वरिष्ठ अधिकारी आणि विभागप्रमुख वगळता अन्य कर्मचाऱ्यांनी कार्यालयाकडे पाठ फिरवली. जिल्हा परिषद कर्मचारी महासंघाच्या नेतृत्वाखालील कर्मचाऱ्यांनी प्रवेशद्वारासमोर सरकारविरोधात निदर्शने केली. घोषित आंदोलनानुसार कर्मचारी तिन्ही दिवस संपात सहभागी असतील, अशी माहिती कर्मचारी महासंघाचे अध्यक्ष सचिन जाधव यांनी दिली.

जिल्हा परिषदेतील विविध कर्मचारी संघटना संपात उतरल्यामुळे प्रशासकीय कामकाज थंडावले आहे. दरम्यान, प्रभारी मुख्य कार्यकारी अधिकारी आर. पी. शिवदास सकाळी गडहिंग्लज येथील आढावा बैठकीसाठी रवाना झाले. मंगळवारी कर्मचारी युनियनने कामावर हजर होण्याचा निर्णय घेतला होता. मात्र, कर्मचाऱ्यांच्या अन्य संघटना आंदोलनावर ठाम राहिल्याने कामकाज ठप्प राहिले. कर्मचारी कामावर नसल्याने पदाधिकाऱ्यांची कार्यालये कुलूपबंद होती. आंदोलनाच्या पार्श्वभूमीवर पदाधिकारी आणि सदस्यही दोन दिवस जिल्हा परिषदेकडे फिरकले नाहीत.

सकाळी अकराच्या सुमारास सगळे कर्मचारी जिल्हा परिषदाच्या प्रवेशद्वारासमोर जमले. त्यांनी प्रवेशद्वारासमोर ठिय्या मारत 'हम सब एक है, हमारी ताकद हमारी युनियन' अशा घोषणा देत सरकारचा धिक्कार केला. याप्रसंगी झालेल्या द्वारसभेत कर्मचारी महासंघाचे अध्यक्ष सचिन जाधव, सचिव अजित मगदूम, अजय शिंदे, लिपिकवर्गीय संघटनेचे नीलेश म्हाळुंगेकर यांची भाषणे झाली. ग्रामसेवक संघटनेचे के. आर. किरुळकर, लेखा संघटनेचे किरण निकम, भालचंद्र माने यांनी संपाला पाठिंबा दिला. महिला प्रतिनिधी अलका पाटील, रेखा पाटील, प्रतिमा पाटील, पूनम ठमके, आदींची उपस्थिती होती. सर्व शिक्षा अभियानमधील कर्मचाऱ्यांनी आंदोलनस्थळी भेट देऊन पाठिंबा दिला.

००००

म. टा. प्रतिनिधी, कोल्हापूर

केंद्राप्रमाणे राज्य सरकारी कर्मचाऱ्यांना सातवा वेतन आयोग त्वरित लागू करावा, यासह विविध मागण्यांकडे लक्ष वेधण्यासाठी बुधवारी दुसऱ्या दिवशीही महसूलसह सर्वच सरकारी कार्यालयांतील कर्मचारी संपावर गेले. अधिकारी वगळता इतर कर्मचारी संपावर असल्याने प्रशासकीय कामकाज ठप्प राहिले. त्याचा सर्वाधिक फटका सामान्य लोकांना बसला. विविध कामांसाठी तातडीने लागणारे दाखले मिळाले नाहीत. कर्मचाऱ्यांअभावी कार्यालयात शुकशुकाट राहिला. अधिकारी उपस्थित राहिले तरी नव्याने फाइल्स न आल्याने त्यांना प्रशासकीय काम करता आले नाही.

सलग दुसऱ्या दिवशी संप सुरू राहिल्याने प्रशासन पूर्णपणे विस्कळीत झाले. अधिकारी हजर राहिले तरी कर्मचारी नसल्याने प्रशासकीय कामकाज सुरू राहिले नाही. चालक संपावर असल्याने अनेक अधिकारी आपल्या वाहनांतून येताना दिसत होते. गुरुवारीही संपच सुरूच राहणार आहे. संपाचे दोन दिवस झाले आहेत. आणखी एक दिवस संप राहणार असल्याने सामान्यांना मोठा फटका बसला. जिल्हा ते गावपातळीवरील प्रशासकीय कामकाज ठप्प झाले. संपाचा सर्वाधिक परिणाम सीपीआरवरील रुग्णसेवेवर झाला. सीपीआरमध्ये एकूण ८३९ कर्मचारी आहेत. त्यातील ६४६ कर्मचारी संपावर राहिले. पर्यायी मनुष्यबळही कमी पडल्याने रुग्णांचे प्रचंड हाल झाले. रुग्णांना तातडीने उपचार मिळण्यात अडचणी येत आहेत. तालुका स्तरावरील ग्रामीण रुग्णालय, प्राथमिक, उपकेंद्रातील कर्मचारीही संपावर असल्याने रुग्णसेवा खंडित झाली. सामान्य, गरीब रुग्णांना उपचारासाठी खासगी दवाखान्यात जावे लागले. यामुळे संबंधित रुग्णांना आर्थिक भुर्दंड सहन करावा लागला.

०००

कोट..

संपात सहभागी होणाऱ्या कर्मचाऱ्यांवर शिस्तभंगाची कारवाई करण्याचे आदेश सरकारने दिले आहेत. आदेश कर्मचाऱ्यांच्या निदर्शनास आणून देण्यासाठी कारवाईच्या आदेशाची प्रत फलकावर लावली आहे. संपातील कर्मचाऱ्यांचा पगार कपात करणे किंवा इतर प्रकारची कारवाई सरकारकडून पुढील आदेश आल्यानंतर केली जाईल.

अविनाश सुभेदार, जिल्हाधिकारी

००००

'सुटा'चा पाठिंबा

राज्य कर्मचारी संघटनेतर्फे विविध मागण्यांप्रश्नी काम बंद संप सुरू आहे. या संपास शिवाजी विद्यापीठ शिक्षक संघाने (सुटा) पाठिंबा असल्याची माहिती सुटाचे प्रमुख कार्यवाह डॉ. डी. एन. पाटील यांनी प्रसिद्धी पत्रकातून दिली.

००००

संपातील कर्मचाऱ्यांची संख्या

महसूल विभाग : तलाठी, सर्कल, लिपिकसह 'क' वर्ग कर्मचारी : १०३९, ड वर्ग : १६४

सीपीआर : ६४६

संपातील सरकारी कर्मचारी : २० हजार

निमसरकारी कर्मचारी : १५ हजार

प्राथमिक, माध्यमिक शिक्षक : २५ हजार

शिक्षकेतर व इतर कर्मचारी ४० हजार

००००

रक्त संक्रमण परिषदेचे रक्तपेढ्यांना दरपत्रक लावण्याचे आदेश

Sachin.patil1@timesgroup.com

Tweet-sachinpMT

गरजू रुग्णांना रक्ताची नेमकी किंमत किती आहे, कोणत्या रक्तगटातील रक्त उपलब्ध आहे, इतर चाचण्यांचे निर्धारित दर किती आहेत याची पारदर्शक माहिती मिळावी यासाठी रक्त संक्रमण परिषदेने राज्यातील रक्तपेढ्यांना दरपत्रक दर्शनी भागात लावण्याचे आदेश दिले आहेत. यानुसार शहरातील अनेकांनी दरफलक आवर्जून लावले आहेत. काही ठिकाणी मात्र रक्तसाठ्याची संख्या देण्याचे टाळल्याचे चित्र आहे.

रक्त संक्रमण परिषदेने घेतलेल्या निर्णयाबाबत शहरातील रक्तपेढ्यांत विशेष पाहणी करण्यात आली. सीपीआर रुग्णालयातील रक्तपेढीतील दरफलक अद्ययावत करण्यासाठी दिल्याचे व लवकरच तो दर्शनी भागात लावण्यात येईल असे प्रशासनाकडून सांगण्यात आले. तसेच कसबा गेट येथे असणाऱ्या कोल्हापूर महानगरपालिकेच्या रक्तपेढीत प्रवेशद्वाराजवळ रक्तदराचा उल्लेख असणारा तक्ता लावण्यात आला आहे. त्याचबरोबर उपलब्ध रक्तसाठा व प्रकाराची विस्तृत माहिती फलकावर दररोज लावण्यात येते.

शहरात अनेक खासगी ब्लड बँका रक्तपुरवठा करतात. यातील लक्ष्मीपुरी येथील अर्पण ब्लड बँकेत रक्तदराचा फलक लावण्यात आला आहे. रक्तसाठ्याची अपडेट माहिती लगोलग लावण्यात आली. राजारामपुरी येथील जीवनधारा ब्लड बँकेने रक्तसाठा व रक्तदर दर्शनी भागात लावले आहेत. नागाळा पार्क येथील राजर्षी शाहू ब्लड बँकेने रक्ताच्या दर पत्रकासह विविध चाचण्यांचे दर कार्यालयातील टेबलावर तसेच प्रवेशद्वाराजवळील नोटीस बोर्डवर लावले आहेत. उपलब्ध रक्तसाठा, विविध चाचण्यांचे प्रकार याचे फलक लावण्यात आले आहेत. मात्र अनेकांनी ते कागदावर प्रिंट काढून चिकटवले असल्याने रुग्णांना ते पटकन लक्षात येत नाहीत. यासाठी दरफलक व रक्तसाठा याची माहिती मोठ्या अक्षरात उपलब्ध करून लावणे गरजेचे आहे. जेणेकरून रुग्णांच्या नजरेस ती माहिती सहजरित्या पडेल.

रक्ताच्या देवघेवीत पारदर्शकता ...

रक्ताची निर्धारित किंमत ठरली असताना काही रक्तपेढ्या रुग्णांकडून अतिरिक्त शुल्क उकळतात. रुग्णांना दराबाबत काहीही माहिती नसल्याने तसेच त्याची निकड समजून हव्या त्या दरात रक्तखरेदी केली जाते. मात्र राज्य रक्त संक्रमण परिषदेने रक्तदराबाबत दर्शनी भागात फलक लावण्याच्या घेतलेल्या निर्णयामुळे रक्ताच्या देवघेवीत पारदर्शकता येईल.

प्रबोधनासाठी पुढाकाराची गरज

रक्तदान तसेच रक्ताविषयी नागरिकांना पुरेशी माहिती नसते. रक्ताच्या किंमती, साठवणूक, त्याच्या विविध चाचण्या याची माहिती सामान्य नागरिकाला माहित असणे गरजेचे आहे. तसेच रक्तदानाबाबत अनेकांच्या मनात गैरसमज असतात ते दूर होण्यासाठी प्रबोधनात्मक काम करण्यासाठी रक्तपेढ्यांनी पुढाकार घेणे गरजेचे आहे.

..............

पॉंईंटर

शहरात महिन्याला बाराशे ते तेराशे रक्ताच्या बॅगांची मागणी

सातशे रक्त बॅगांचे दरमहिन्याला संकलन

रक्ताचा पुरवठा कमी; त्यामानाने मागणी अधिक

मे ते जुलै महिन्यात अधिक रक्त तुटवडा

सीपीआरमध्ये रक्ताचा सर्वात कमी दर प्रती बॅग ५०० रु.

कोल्हापुरातील रक्ताचे साधारणत: दर (प्रती बॅग)

प्रकार एलायजातपासणी झालेले रक्त

पीसीव्ही १२५० रु.

आरडीपी ४०० रु.

एफएफपी ४०० रु.

व्होल ब्लड १२५०

एसडीपी ११ हजार

सीआरवायओ २५० रु.

..........

कोट

'रक्तबँकात याआधी दरफलक नव्हते त्यामुळे रक्त बॅगेचा नेमका दर किती आहे याची माहिती मिळत नव्हती. त्यामुळे काही ठिकाणी दराबाबत तफावत जाणवायची. अलिकडे दर्शनी भागात दरपत्रक लावले असल्याने नेमकी माहिती मिळते.

विक्रांत गायकवाड, रक्तदान चळवळीतील कार्यकर्ते

............

कोट

'मुंबईनंतर रक्तसंकलनात कोल्हापूर आघाडीवर आहे. ग्राहक आणि रक्तपेढ्या यांच्यात सुसंवाद व्हावा यासाठी आम्ही कोल्हापूर जिल्हा ब्लड बँक असोसिएशनच्यावतीने प्रयत्न करत आहोत. रक्तदेवघेव पारदर्शक पद्धतीने व्हावी यासाठी आग्रही आहे.

प्रकाश घुंगुरकर, अध्यक्ष, कोल्हापूर जिल्हा ब्लड बँक असोसिएशन

फोटो आहेत.

म. टा. प्रतिनिधी, कोल्हापूर

शहर आणि जिल्ह्यात बुधवारी दिवसभर पावसाची रिपरिप राहिली. दुपारी एक ते तीनपर्यंत आणि सायंकाळी साडेसहाच्या सुमारास पावसाच्या मोठ्या सरी कोसळल्या. सकाळी आठपर्यंतच्या चोवीस तासांत १००.४३ मि.मी. पावसाची नोंद झाली. सर्वाधिक गगनबावडा, तर सर्वांत कमी हातकणंगले, शिरोळ तालुक्यात पाऊस झाला. पंचगंगा नदीवरील राजारामसह नऊ बंधारे पाण्याखाली आहेत. धरणक्षेत्रात पावसाचा जोर अधिक असल्याने नदीची वाढलेली पाणीपातळी कायम राहिली.

सलग चार दिवसांपासून पावसाच्या सरीवर सरी कोसळत आहेत. सरी पडून गेल्यानंतर शहरातील रस्त्यावर पाणीच पाणी दिसत आहे. पीक वाढीसाठी पाऊस पोषक असल्याने शेतकऱ्यांतून समाधान व्यक्त होत आहे. अजूनही शिरोळ, हातकणंगले, गडहिंग्लज तालुक्यात पुरेसा पाऊस झालेला नाही. परिणामी या तालुक्यांत वैरणटंचाई निर्माण झाली आहे. पिकांची वाढ खुंटली आहे. उर्वरित तालुक्यांत पाऊस समाधानकारक झाला आहे. तेथील पिकांची वाढही चांगली आहे. आंतरमशागतीच्या कामांना वेग आला आहे. पंचगंगा नदीवरील शिंगणापूर, राजाराम, सुर्वे, रुई, इचलकरंजी, तेरवाड, शिरोळ बंधारे पाण्याखाली आहेत. भोगावती नदीवरील खडक कोगे, तर वारणा नदीवरील चिंचोली बंधारा पाण्याखाली आहे. राधानगरी, तुळशी, वारणा, दूधगंगा अशी महत्त्वाची धरणे भरली आहेत.

००००

चौकट..

धरणसाठा टीएमसीमध्ये -

वारणा ३२.४६, दूधगंगा २३. ८३, राधानगरी ८.०९, तुळशी ३.४७, कासारी २.५९, कडवी २. ५२, कुंभी २.३५, पाटगाव ३.५०, चिकोत्रा ०.८६, चित्री १.८९, जंगमहट्टी १.२२, घटप्रभा १.५६, जांबरे ०. ८२, कोदे ०.२१

०००

तालुकानिहाय पाऊस मि.मी. असा

हातकणंगले १.७५, शिरोळ ०.२८, पन्हाळा ५.५७, शाहूवाडी २०.००, राधानगरी १५.८३, करवीर ३.९०, कागल ३.५७, गडहिंग्लज २.२८, भुदरगड ११.००, आजरा ६.७५, चंदगड ८.००

००००

जखमी वृध्दाच्या असाहय्यतेचा फायदा घेवून लुबाडले

म. टा. प्रतिनिधी, कोल्हापूर

'मृत माणसाच्या टाळूवरचे लोणी खाणे' ही म्हण अनेकदा वापरली जाते. समाजातील टोकाचा स्वार्थीपणा व भावनाशून्यता या म्हणीतून अभिप्रेत होते. एकीकडे समाजात चांगुलपणा, प्रामाणिकपणा, मदतीची भावना या गोष्टींवर कौतुकाचा वर्षाव केला जात असताना एखाद्याच्या असहाय्यतेचा गैरफायदा घेणाऱ्या प्रवृत्तीने समाज कसा नासलेला आहे हे दाखवणाऱ्या घटनेने कोल्हापुरात माणुसकीलाच तडा गेला. अपघातात जखमी झालेल्या वृद्धाला दवाखान्यात नेतो असे सांगून रंकाळ्याजवळ सोडून त्याच्या खिशातील पैसे चोरणाऱ्या नराधम युवकाने 'माणुसकी' या शब्दालाच मूठमाती दिली .

शिवाजी पेठेतील लाड चौकात दुचाकी धडकेत गंभीर जखमी झालेल्या वृद्धाला मदत करण्याऐवजी रंकाळा परिसरात त्याच्या खिशातील पैसे घेऊन एका अज्ञात तरुणाने धूम ठोकली. या वृद्धाला वेळेवर उपचार मिळाला नसल्याने केवळ तरुणाच्या हलगर्जीपणामुळे हकनाक बळी गेला. हा प्रकार रंकाळा रोडवरील एका दुकानाच्या सीसी टिव्ही कॅमेऱ्यात कैद झाला आहे. शंकरराव रामचंद्र मोरे (वय ७७, रा. धोत्री गल्ली, गंगावेश) असे या दुर्देवी वृद्धाचे नाव आहे. त्यांचा मुलगा प्रताप मोरे यांना हे चित्रीकरण मिळाल्यानंतर दिवसभर सोशल मीडियावर हा संदेश व्हायरल झाला. संशयित तरुणाचा जुना राजवाडा पोलिस शोध घेत आहेत.

शंकरराव मोरे हे टिंबर मार्केट येथे सुतारकाम करीत होते. १० जुलै २०१८ रोजी दुपारी साडेबारा वाजता कामावरुन घरी जात असताना शिवाजी पेठेतील लाड चौकात अज्ञात मोटारसायकलने त्यांना धडक दिली. या धडकेत मोरे यांच्या डोक्याला गंभीर मार लागल्याने रक्तस्त्राव होऊन ते बेशुद्ध पडले. ही घटना घडल्यानंतर नागरिकांची मोठी गर्दी या ठिकाणी झाली. गर्दीतून एक तरुण पुढे आला आणि त्याने मोरे यांना उचलून भाड्याच्या ऑटो रिक्षात घातले. रक्तस्त्राव होत असलेल्या आजोबांना रुग्णालयात घेऊन जातो, असे सांगत रिक्षा रंकाळ्याजवळील जाऊळाचा गणपती येथील दुकानाजवळ थांबविली. काही नागरिकांच्या मदतीने मोरे यांना रिक्षातून उचलून त्याने रस्त्यावर ठेवले. मोरे यांच्या खिशातील रक्कम, ओळखपत्र काढून घेतले. हा प्रकार सुरु असताना रंकाळा परिसरातील रहिवाशांनी तरुणाची चौकशी सुरु केली. त्या वेळी हे मामा रस्त्यात चक्कर येऊन पडले होते. त्यांच्या ओळखपत्रावरुन नातेवाईकांना बोलावून आणतो, असे सांगून सहकाऱ्याच्या मोटारसायकलवरुन तो तरूण निघून गेला. मोरे रस्त्यावरच बेशुद्धावस्थेत दुपारी १ ते ४ वाजेपर्यंत पडून होते. काहींनी १०८ अॅम्ब्युलन्समधून त्यांना सीपीआरमध्ये दाखल केले. उपचारासाठी वेळेत रुग्णालयात दाखल करता आले नसल्याने ते कोम्यात गेले. १० जुलै पासून ते १६ जुलै पर्यंत त्यांनी मृत्यूशी झुंज दिली. अखेर १६ जुलै रोजी उपचार सुरु असताना त्यांचा दुर्देवी मृत्यू झाला.

...

चित्रीकरण पाहून धक्काच बसला

मोरे यांना रंकाळा येथे सोडून जाणारा तरुण, ऑटो रिक्षामधून खाली उतरताना आणि खिशातील पैसे काढून घेत असलेला प्रसंग रंकाळा टॉवर येथील एका दुकानाच्या सीसी टिव्हीत कैद झाला आहे. त्यांचा मुलगा प्रताप मोरे यांना या घटनेचे चित्रीकरण मिळाले. ते पाहून त्यांना धक्काच बसला. संशयित तरुण हा अंदाजे २६ वर्षाचा असून त्याने निळा शर्ट, जीन्सची पॅट घातली आहे. केवळ या तरुणाच्या हलगर्जीपणामुळे त्यांच्या वडिलांचा हकनाक बळी गेला आहे. या प्रकरणी तरुणाच्या विरोधात जुना राजवाडा पोलिसांत फिर्याद दाखल केली असून पोलिसांनी फुटेजवरुन तरुणाचा शोध सुरु केला आहे. त्याच्या सहकाऱ्याच्या दुचाकीचा नंबर अस्पष्ट आहे.

........

कोट

'मानवतेला काळीमा फासणाऱ्या या घटनेच्या प्रकरणी संशयित तरुणाच्या विरोधात गुन्हा दाखल केला आहे. सीसी टिव्हीवरुन त्याचा शोध सुरु केला असून त्याला लवकरच ताब्यात घेतले जाईल.

मानसिंग खोचे, पोलिस निरीक्षक, जुना राजवाडा पोलिस ठाणे

(फोटो आहे)

कोर्टाचे कामकाज होणार ठप्प

वकिलांचा आंदोलनास पाठिंबा

म. टा. प्रतिनिधी, कोल्हापूर

'मराठा आरक्षणासाठी गुरुवारी (ता. ९) होणाऱ्या बंदमध्ये जिल्हा बार असोसिएशन सहभागी होणार आहे. कसबा बावडा येथील न्याय संकुलाच्या सभागृहात बुधवारी झालेल्या विशेष बैठकीत हा निर्णय घेण्यात आला. या निर्णयामुळे कोर्टाचे कामकाज ठप्प राहणार आहे. बंददरम्यान पोलिस आणि आंदोलकांमध्ये संघर्ष निर्माण झाल्यास वकील समन्वयासाठी काम करणार आहेत,' अशी माहिती बार असोसिएशनचे अध्यक्ष अॅड. प्रशांत चिटणीस यांनी दिली.

मराठा समाजास शिक्षण आणि नोकरीत आरक्षण मिळावे, या मागणीसाठी गेल्या पंधरा दिवसांपासून आंदोलन सुरू आहे. दसरा चौकातील ठिय्या आंदोलनात उपस्थित राहून जिल्हा बार असोसिएशनने पाठिंबा दिला होता. गुरुवारी होणाऱ्या बंदमध्ये सहभागी होण्याबाबत निर्णय घेण्यासाठी बुधवारी न्यायसंकुलाच्या सभागृहात विशेष सभेचे आयोजन केले होते. या सभेत मजी अध्यक्ष प्रकाश मोरे, विवेक घाटगे यांच्यासह ज्येष्ठ वकील महादेवराव आडगुळे, रणजित गावडे, इंदिरा राजेपांढरे यांनी आरक्षणाच्या निर्णयात होत असलेल्या दिरंगाईबद्दल नाराजी व्यक्त केली, त्याचबरोबर आंदोलनात सक्रीय सहभाग नोंदवण्याचे आवाहनही केले.

बार असोसिएशनचे अध्यक्ष प्रशांत चिटणीस म्हणाले, 'जिल्ह्यातील सर्व बार असोसिएशनना ठराव पाठवून बंदमध्ये सहभागी होण्याचे आवाहन केले आहे. याला उत्स्फूर्त प्रतिसाद मिळाला असून, जिल्ह्यातील सर्वच वकील बंदमध्ये सहभागी होणार आहेत. बंददरम्यान पोलिस आणि आंदोलकांमध्ये संघर्ष निर्माण झाल्यास त्याच ठिकाणी मध्यस्थाची भूमिका घेऊन समन्वय साधण्याचा प्रयत्न वकिलांकडून केला जाईल. यासाठी वकिलांचे गट तयार केले आहेत.' सभेसाठी सर्व पदाधिकारी व वकील उपस्थित होते. उपाध्यक्ष आनंदराव जाधव यांनी प्रास्ताविक केले. दीपाली पोवार यांनी आभार मानले.

दरम्यान, उपविभागीय कार्यालय करवीर येथील गुरुवारी होणाऱ्या सर्व अर्धन्यायिक सुनावण्यांचे काम बंदमुळे होऊ शकणार नाही. या सुनावण्यांचे काम मंगळवारी (ता. १४) होणार आहे. तसेच जिल्हा अधीक्षक भूमी अभिलेख कार्यालयातील सुनावणी तारखाही पुढे ढकलण्यात आल्या आहेत. कोल्हापूर डिस्ट्रिक कंझ्युमर प्रॅक्टिश्नर बार असोसिएशननेही आंदोलनाला पाठिंबा दिला असून, ते गुरुवारी न्यायालयीन कामकाजापासून अलिप्त राहणार आहेत.

रमेश चव्हाण, आजरा

शिष्यवृत्तीसारख्या परीक्षा आणि त्यातील आजरा तालुक्याचे यश हे समीकरण गेली अनेक वर्षे रुजले आहे. शिष्यवृत्तीचा 'मडिलगे पॅटर्न' राज्यात पोहोचला. पण सध्या उत्तूर पॅटर्नची चलती सुरू आहे. गेली दोन वर्षे येथील कन्या आणि कुमार विद्यामंदिरमधील तन्वी शिवणे आणि श्रेयस देशमानेमुळे उत्तूरचे नाव राज्यात गाजले. यावर्षी सलग तिसऱ्या वर्षी येथील कुमार शाळेच्या विराज अमृत कुराडेने राज्यात शिष्यवृत्तीमधील विजेता होण्याची मालिका पुढे सुरू ठेवली आहे. 'उत्तूर पॅटर्न'ची ही हॅटट्रिक ठरली आहे.

येथील शिक्षकांच्या सुयोग्य आणि सातत्यपूर्ण मार्गदर्शन, पालक, लोकप्रतिनिधी आणि ग्रामस्थांचे विधायक पाठबळ आणि विद्यार्थ्यांच्या अथक परिश्रमाचा हा परिपाक आहे. विराजचे यश तर आणखीनच खुलून उठले आहे. एका शेतकरी कुटुंबातील हा मुलगा. आई-वडील दोघेही शेतकरी. त्यामुळे शेतातल्या घरातूनच दोन किलोमीटर अंतरावरील शाळेस सायकलने येणे अत्यावश्यक होते. ११ ते ५ दरम्यान नियमित शाळेचे आणि इयत्ता पाचवीचे अध्ययन आणि सकाळी व संध्याकाळी शिष्यवृत्तीच्या जादा तासिकांना उपस्थित राहणे आणि घरातून सकाळी आणलेल्या जेवणावरच संपूर्ण दिवसभर पाठीचा कणा वाकेपर्यंत अभ्यास करणे, ही विराजची दैनंदिनी होती. पण त्या माध्यमातून केलेल्या प्रयत्नांचे या यशाने अखेर चीज झाले. श्रेयस आणि तन्वी यांच्यानंतर सलग तिसऱ्या वर्षी उत्तूरचा झेंडा विराजने राज्यस्तरावर पहिला येत रोवला आहे. यासाठी अर्थातच त्याचे पालक आणि मार्गदर्शक शिक्षक प्रशांत पाटील यांच्यासह इतरांचे पाठबळ महत्त्वाचे ठरले आहे. परिसराची संघर्षरत राहण्याची वृत्ती आणि अपार कष्ट करण्यातूनच अगदी मोजक्या वर्षात या गावातील ७५ जण शिष्यवृत्तीधारक बनले आहेत. ही मालिका अशीच वाढत जायला हवी, हीच अपेक्षा यानिमित्ताने व्यक्त होत आहे.

०००

प्लास्टिक बंदी धाब्यावर

कारवाईकडे दुर्लक्ष, प्लास्टिकच्या खुलेआम विक्रीसह वापर सुरू

कोल्हापूर टाइम्स टीम

राज्य सरकारने प्लास्टिक बंदी लागू करून दीड महिना उलटला असला तरी नागरिकांकडून प्लास्टिकचा खुलेआम वापर सुरू आहे. काही ठिकाणी प्लास्टिक पिशव्यांची सर्रास विक्री सुरू असल्याचे दिसून येत आहे. काही ठिकाणी प्लास्टिकला पर्याय म्हणून कागदी वस्तूंचा वापर झाला असली तरी महानगरपालिका, जिल्हा परिषद, प्रादेशिक प्रदूषण विभाग, अन्न व औषध प्रशासन या संबंधीत विभागांच्या दुर्लक्षामुळे प्लास्टिक बंदी धाब्यावर बसवली जात आहे.

राज्य सरकारने गुढीपाडव्याच्या मुहुर्तावर प्लास्टिक बंदीची घोषणा केली. मात्र व्यापारी व विक्रेत्यांनी कोर्टात धाव घेतल्यानंतर बंदी असलेल्या प्लास्टिकच्या साठ्याची विल्हेवाट लावण्यासाठी उत्पादक व विक्रेत्यांना सरकारने तीन महिने मुदत देण्यात आली. जून महिन्यात तीन महिन्यांची मुदत संपल्यावर प्लास्टिक बंदीची अंमलबजावणी सुरू झाली. सुरुवातीला काही दिवस कडक अंमलबजावणी झाली. मात्र प्लास्टिकला पर्याय द्यावा अशी मागणी करत व्यापारी, उद्योजक, दुकानदारांनी प्लास्टिक बंदीला विरोध सुरू केला. सरकारने ५० मायक्रॉनवरील प्लास्टिक बॅग्जना काही अटींवर परवानगी दिली. पण परवानगीचा चुकीचा अर्थ लावत व्यापारी, विक्रेत्यांनी बंदी असलेल्या प्लास्टिक वस्तूंची खुलेआम विक्री सुरू केली आहे.

शहरातील महानगरपालिकेच्या व्यापारी संकुलातील किराणा दुकानदार कमी मायक्रॉनच्या प्लास्टिक बॅग्जमधून धान्य, मसाले यांची विक्री करत आहेत. शहरातील कपिलतीर्थ मार्केट, ऋणमुक्तेश्वर, पाच बंगला, शिवाजी मार्केट या भाजी मंडयांमध्येही प्लास्टिक बॅग्जचा वापर केला जात आहे. फळ विक्रेत्यांनी वरवर प्लास्टिक बंदीची अंमलबजावणी केली असली तरी ग्राहकाच्या मागणीप्रमाणे चोरट्या पद्धतीने कॅरीबॅग्ज पुरवल्या जात आहेत. फूल बाजारात प्लास्टिक पिशव्यांचा वापर कायम आहे. काही ठिकाणी हार व फुले कागदात गुंडाळून दिली जात असली तरी बुकेसाठी कमी मायक्रॉनच्या शोभिवंत प्लास्टिक पेपरचा वापर सढळ हाताने सुरू आहे. महानगरपालिकेपासून हाकेच्या अंतरावर असलेल्या मटण व फीश मार्केटमध्ये प्लास्टिक पिशव्यांचा वापर सुरूच आहे. सुरवातीच्या काळात मटण, चिकन, मासे विक्रेत्यांनी डब्याचा आग्रह केला. पण गेले महिनाभर प्लास्टिक पिशव्यांतून मटण, चिकन, मासे, अंड्यांची विक्री होत असून हजारो प्लास्टिक पिशव्या कचऱ्यात दिसत असल्याने प्लास्टिक बंदीला हारताळ फासल्याचे चित्र दिसत आहे.

बेकरी व खाद्यपदार्थांच्या दुकानातून प्लास्टिक बंदी काही प्रमाणात पाळली जात आहे. ब्रेड कागदातून बांधून दिला जात असला तरी खारी, बटर, टोस्ट हे बेकरी पदार्थ प्लास्टिक पिशव्यांमधून दिले जात आहेत. काही बेकरी मालक प्लास्टिक पिशव्यांमध्ये वस्तू आणि त्यावर कागदी पिशवी असा दिखावा करीत आहेत. वडापाव, भजी या खाद्यपदार्थांच्या गाड्यांवर रद्दी पेपर व कागदी बॅग्जचा वापर केला जातो. चहासाठी प्लास्टिक कपाऐवजी कागदी कपांचा वापर सुरू झाल्याने प्लास्टिक कचरा कमी होण्यास मदत झाली आहे. मिठाईच्या दुकानात काही पदार्थांना कागदी तर अन्य पदार्थांना प्लास्टिक पिशव्यांचा वापर केला जात आहे. हॉटेलमध्ये खाद्यपदार्थ व जेवण नॉनवोवन पॉलिप्रॉपीलीन बॅग्ज दिल्या जात आहे. कार्यक्रम, जेवणावळीत मात्र कॅटरर्सकडून मात्र बंदी असलेल्या प्लास्टिक द्रोण, कप, वाट्या, चमच्यांचा वापर केला जात आहेत. जेवणावळी, रस्सा मंडळासाठी प्लास्टिक पत्रावळ्या, द्रोणांचा वापर खुलेआम सुरू आहे. शहरात अनेक ठिकाणी उघडपणे दुकानातून बंदी असलेल्या वस्तूंची विक्री होत असूनही महानगरपालिकेकडून डोळेझाक केली जात आहे.

प्लास्टिक बंदीवर कारवाईची यंत्रणा शहरात महानगरपालिकेकडे आहे. पण आरोग्य विभागाच्या अधिकाऱ्यांना कचरा उठाव अन्य कामांचा उरक जास्त असल्याने प्लास्टिक बंदीकडे आरोग्य निरीक्षकांनी दुर्लक्ष केले आहे. ग्रामीण भागात तर प्लास्टिकचा वापर सर्रास होत आहे. प्लास्टिक बंदीची अंमलबजावणी सर्व विभागांकडून होण्याची गरज असताना फक्त महानगरपालिकेच्या आरोग्य विभागाकडूनच अंमलबजावणी केली जात असल्याचेही दिसते

प्लास्टिक बंदी असलेल्या वस्तू

प्लास्टिक पिशव्या (हँडल असलेल्या, नसलेल्या), पास्टिक ताट, कप्स, प्लेटस्, काटे, वाटी, चमचे, भांडे, हॉटेलमध्ये पँकेजिंगसाठी वापरण्यात येणारी भांडे व वाटी, स्ट्रॉ, नॉन वोवर पॉलिप्रॉपीलेन बॅग्ज, प्लास्टिक पाऊच.

००००

बंदी असलेली ठिकाणे

सरकारी संस्था, शैक्षणिक संस्था, क्रीडा संकुल, क्लब्ज, चित्रपट व नाट्यगृहे, औद्योगिक घटक, समारंभाचे हॉल, वाणिज्य संस्था, कार्यालये, धार्मिक स्थळे, हॉटेल, धाबे, दुकानदार, मॉल्स, विक्रेते, कॅटरर्स, घाऊक विक्रेते, किरकोळ विक्रेते, व्यापारी, फेरीवाले, वितरक, वाहतूकदार, सेल्समन, मंडई, उत्पादक, स्टॉल्स, पर्यटन स्थळे, वने, सरंक्षित वने, इको सेन्सिटिव्ह झोन, सागरी किनाारे, सर्व सार्वजनिक ठिकाणे, बस स्थानके, रेल्वे स्थानक.

००००

कचऱ्याची जाळून विल्हेवाट

ग्रामीण भागात प्लास्टिक कचऱ्याची विल्हेवाट लावण्याची यंत्रणा नसल्याने दुकानदार, विक्रेते नियमित प्लास्टिक कचरा पेटवून देतात. त्यामुळे हवेचे मोठे प्रदूषण होत आहे. याकडे ग्रामपंचायत विभागाचे दुर्लक्ष होत आहे. काही डॉक्टर मंडळीही मेडिकल कचरा जाळून टाकत आहेत. प्लास्टिक कचऱ्याची विल्हेवाट चुकीच्या पद्धतीने लावणाऱ्यावर प्रदूषण नियंत्रण मंडळाने कारवाई करण्याची गरज आहे.

तरुणाचा आत्महत्येचा प्रयत्न

म. टा. प्रतिनिधी कोल्हापूर

नोकरी मिळत नसल्याच्या नैराश्यातून नवनाथ जयसिंग कारंडे ( वय ३४, रा. जरगनगर, कोल्हापूर ) याने शिवाजी पुलावरुन आत्महत्या करण्याचा प्रयत्न केला. त्याला वेळीच पोलिस आणि मराठा सकल समाजाच्या कार्यकर्त्यांनी आत्महत्येपासून रोखले. करवीर पोलिस ठाण्यात या प्रकरणी गुन्हा दाखल करण्यात आला. गुरुवारी दुपारी बारा वाजण्याच्या सुमारास नवनाथ हा पुलावरुन उडी मारण्याचा प्रयत्नात होता. त्या वेळी दसरा चौकाकडे जाणाऱ्या मराठा सकल समाजाच्या कार्यकर्त्यांना हा प्रकार लक्षात आला. पोलिस निरीक्षक तानाजी सावंतही या ठिकाणी होते. उडी मारण्याच्या प्रयत्नात असतानाच त्याला प्रेमजीत पाटील, प्रशांत खवरे, श्रीधर शिंदे, सुशिल शेवडे यांनी रोखले.

कोल्हापूर : कोल्हापूर जिल्हा परिषदेची सर्वसाधारण सभा शुक्रवारी (ता. १०) दुपारी एक वाजता होत आहे. राज्य आणि केंद्र सरकारच्या विविध योजनांच्या अंमलबजावणीतील त्रुटी, शिक्षक बदलीतील बनावटगिरी, सदस्यांना निधी वाटपातील दुजाभाव यावरून सभा गाजण्याची चिन्हे आहेत. सत्तारुढ गटातील सदस्यातही निधी वाटपावरून धुसफूस आहे. शिवाय विविध सरकारी योजनांची प्रभावी अंमलबजावणी होत नसल्यामुळे विकास कामांवरही परिणाम झाला आहे. त्याचे पडसादही सभेत उमटण्याची चिन्हे आहेत. जिल्हा परिषदेतील विविध समित्यांच्या सभापती बदलाची प्रक्रिया थंडावल्यासारखी स्थिती आहे, त्यावरूनही इच्छुक सदस्यांमध्ये नाराजी आहे.

(फोटो आहे)

प्रवाशांना करावी लागली पायपीट

म. टा. प्रतिनिधी, कोल्हापूर

मराठा आरक्षणासाठी गुरुवारी पुकारलेल्या बंदमुळे कोल्हापुरात आलेले प्रवासी आणि भाविकांना पायपीट करावी लागली. विशेषत: रेल्वेने आलेल्या प्रवाशांना बुकिंग केलेल्या हॉटेल्सपर्यंत पायीच पोहोचावे लागले. वयोवृद्ध प्रवाशांनी जादा पैसे मोजून खासगी वाहनांचा आधार घेतला. मध्यवर्ती बसस्थानकातील प्रवाशांना मात्र संध्याकाळी बससेवा सुरू होण्याची वाट पाहावी लागली. बंदमुळे संपूर्ण वाहतूक बंद असल्याने दिवसभर प्रवाशांचा खोळंबा झाला.

मराठा आरक्षणासाठी गुरुवारी राज्यव्यापी बंद होणार असल्याचे आठवड्यापूर्वीच जाहीर झाले होते. यामुळे गुरुवारी अनेकांनी प्रवास करणे टाळले. बाहेरच्या राज्यातून येणाऱ्या प्रवाशांना मात्र बंदची पूर्वकल्पना नसल्याने त्रास सहन करावा लागला. याशिवाय काही प्रवासी बुधवारी रात्रीच कोल्हापुरात येऊन अकडले होते. यातील काही प्रवाशांनी रेल्वेतून जाणे पसंत केले, तर अनेकांना एसटी वाहतूक पूर्ववत सुरू होण्याची वाट पाहावी लागली. नाशिक जिल्ह्यातील येवला येथून तिरुपती बालाजीला गेलेले भाविक बुधवारी रात्री कोल्हापुरात आले होते. गुरुवारी दुपारी रेल्वेने शिर्डी येथे जाण्यासाठी त्यांनी आरक्षण केले होते, त्यामु‌ळे त्यांनी कोल्हापुरात मुक्काम केला. बंदमुळे भवानी मंडप ते रेल्वे स्टेशनपर्यंत त्यांना पायपीट करावी लागली. यावेळेत त्यांना नाष्टा आणि जेवणही मिळाले नाही.

गुजरातमधील बडोदा येथून १८ ते २० जणांचा एक गट गुरुवारी दुपारी रेल्वेने कोल्हापुरात दाखल झाला. त्यांना बंदची काहीच माहिती नव्हती. कोल्हापुरात उतरताच रिक्षा, बससेवा बंद असल्याचे लक्षात येताच त्यांची चिंता वाढली. बुकिंग केलेल्या हॉटेलपर्यंत पोहोचण्यासाठी त्यांनी एका खासगी कारचालकाला विनंती केली. प्रत्येकी ५० रुपये मोजून ते कसेबसे हॉटेलपर्यंत पोहोचले. अनेक प्रवाशांना पायपीट करीतच रेल्वे स्टेशनमधून बाहेर पडावे लागले. मध्यवर्ती बसस्थानकातही अशीच स्थिती होती. आयटीआय प्रवेशासाठी बीड जिल्ह्यातील आंबेजोगाई येथून आलेला गणेश गीते हा विद्यार्थी त्याच्या मित्रासह पहाटेपासून मध्यवर्ती बसस्थानकात अडकून पडला होता. स्टँड परिसरात मिळालेला चहा आणि पोह्यांवरच त्याला दिवस ढकलावा लागला. संध्याकाळनंतर एसटीची वाहतूक सुरळीत सुरू झाली.

खासदार-आमदारांसह

राजकारणी रस्त्यावर

आंदोलनात आजी,माजी लोकप्रतिनिधींनी सहभाग घेतला. राजर्षी शाहू महाराजांच्या पुतळा परिसरात उभारलेल्या व्यासपीठासमोरील रस्त्यावर खासदार, आमदारांनी ठिय्या मारत मराठा आरक्षणाला पाठिंबा दिला. यामध्ये खासदार धनंजय महाडिक, आमदार चंद्रदीप नरके, आमदार सत्यजित पाटील सरुडकर, आमदार सतेज पाटील, काँग्रेसचे जिल्हाध्यक्ष व माजी आमदार पी. एन. पाटील, माजी आमदार मालोजीराजे छत्रपती, माजी आमदार सुरेश साळोखे, करवीर पंचायत समिती सभापती राजेंद्र सूर्यवंशी, स्वाभिमानी शेतकरी संघटनेचे जिल्हाध्यक्ष भगवान काटे, भैयासाहेब कुपेकर, ऋतुराज पाटील, विश्वविजय खानविलकर यांचा समावेश होता. आंदोलनात आमदार चंद्रदीप नरके यांच्या लाठीकाठी प्रात्यक्षिकाने सर्वांचे लक्ष वेधले. खासदार व आमदारांनी मराठा आरक्षणाचा झेंडाही उंचावला.

...................

नगरसेवकही आंदोलनात

महापालिकेतील विविध आघाड्यांचे नगरसेवक आंदोलनात सहभागी झाले. नगरसेवक शारंगधर देशमुख, संजय मोहिते, राहुल माने, मुरलीधर जाधव, नियाज खान, तौफिक मुल्लाणी, रुपाराणी निकम, सीमा कदम, माजी नगरसेवक मधुकर रामाणे, आदिल फरास, इंद्रजित बोंद्रे, उत्तम कोराणे, विनायक फाळके आदींनी रस्त्यावर ठिय्या मारत पाठिंबा दिला. आंदोलनात उद्योजक चंद्रकांत जाधव, कुंभी बँकेचे चेअरमन अजित नरके, बार असोसिएशनचे अध्यक्ष प्रशांत चिटणीस, डॉ. सूरज पवार, डॉ. संदीप पाटील, देवस्थान समिती सदस्य संगीता खाडे, राजीव लिंग्रस आदींचा समावेश होता.

एसटीला ५० लाखांचा तर केएमटीला ११ लाखांचा फटका

म. टा. प्रतिनिधी, कोल्हापूर

सकल मराठा समाजाच्या कोल्हापूर बंद आंदोलनाचा फटका सार्वजनिक वाहतूक व्यवस्थेला बसला. शहर आणि जिल्ह्यात वाहतूक व्यवस्था पूर्णपणे थांबली. शहर आणि जिल्ह्यात एकही केएमटी तसेच एसटी धावली नाही. एसटीला सुमारे ५० लाख तर केएमटीला ११ लाखांचा तोटा सहन करावा लागला. रेल्वे सेवा सुरुळीत सुरु राहिली, मात्र स्थानकावरुन घरी जाण्यासाठी पर्यायी व्यवस्था नसल्याने प्रवाशांचे हाल झाले. मध्यवर्ती बसस्थानक, छत्रपती शाहू महाराज टर्मिनसवर मोठा पोलिस बंदोबस्त तैनात करण्यात आला होता. कायदा आणि सुव्यवस्था राखण्यासाठी जिल्ह्यात पहाटे तीन वाजल्यापासून पोलिस रस्त्यावर तैनात राहिले.

एसटीला ५० लाखांचा फटका

बंदमुळे कोल्हापूर मध्यवर्ती बसस्थानकात रात्री मुक्कामासाठी आलेल्या एसटी बसस्थानकातच थांबून राहिल्या. सकाळी सहा वाजल्यापासून एकही एसटी जिल्ह्यात धावली नाही. बेळगांव, कोकणमधून दररोज येणाऱ्या एसटींचा प्रवास गुरुवारी थांबला होता. सकाळी सहा वाजल्यापासून सीबीएसवरील फलाटवर एकही एसटी लागली नाही. या ठिकाणी मोठा पोलिस बंदोबस्त ठेवण्यात आला. कोल्हापूर विभागात ६५० एसटींचा ताफा आहे. गुरुवारी एसटीची चाके थांबल्याने १ लाख ३२ हजार किलोमीटर प्रवास रद्द झाला. दुपारी चार वाजेपर्यंत ४१ लाखांचे नुकसान झाले. सायंकाळी सहा वाजपेर्यंत हा आकडा ५० लाखांवर गेला. पहाटे सहा ते चार वाजेपर्यंत २५०० फेऱ्या रद्द झाल्या. रात्री सहानंतरही एसटीची सेवा सुरु झालेली नव्हती. एसटी प्रशासनाने पोलिस बंदोबस्त दिल्यास सेवा सुरु करण्याची तयारी दर्शविली होती. मात्र बंदला उत्स्फूर्त प्रतिसाद मिळाल्याने आगाराबाहेर एकही एसटी धावली नाही. मध्यवर्ती बसस्थानक, रंकाळा बसस्थानक, संभाजीनगर बसस्थानकात शुकशुकाट जाणवला. एसटीची संख्या अधिक झाल्याने काही एसटी ताराबाई पार्कातील विभागीय कार्यशाळेत थांबून राहिल्या.

..........

केएमटीला ११ लाखांचा तोटा

सार्वजनिक वाहतूक सेवेत शहरातील प्रमुख वाहिनी असलेली केएमटीची सेवा दिवसभर बंद राहिली. सर्व केएमटी स्टॉपवर एकही प्रवासी नव्हता. शहरात दररोज १०३ केएमटी बसेस धावतात. या बसेसच्या ३०० हून अधिक फेऱ्या विविध भागात केल्या जातात. त्यातून दररोज ९ लाखांचे उत्पन्न मिळते. बंदकाळात चालक आणि वाहकांचे वेतनाचे २ लाख रुपये असा एकूण ११ लाख रुपयांचा तोटा सहन करावा लागला. बंदला मिळालेल्या प्रतिसादाचा केएमटी प्रशासनाने अंदाज घेऊन रस्त्यावर एकही केएमटी धावली नाही. सीबीएस आणि खासबाग मैदान येथील केएमटी स्टॉपवरील प्रवाशांनी सायंकाळनंतर बस सोडण्याचे आवाहन केले. मात्र बस सेवा सुरु करता येणार नसल्याचे प्रशासनाकडून सांगण्यात आले. केएमटीच्या शास्त्रीनगरातील कार्यशाळेत बसेस थांबून राहिल्या.

.....

रेल्वे सेवा बंदोबस्तात सुरु

खासगी आराम बस आणि एसटी सेवा बंद असल्याने सार्वजनिक वाहतूक व्यवस्थेसाठी रेल्वे हा एकमेव पर्याय प्रवाशांच्यासमोर राहिला. दिवसभरात छत्रपती शाहू महाराज टर्मिनन्स वरुन १४ रेल्वे धावल्या. आंदोलक रेल्वे स्थानकावर येण्याची शक्यता गृहित धरुन रेल्वे प्रशासनाने रेल्वे फाटक क्रमांक एक, प्रवेशद्वार, आरक्षण काउंटर या ठिकाणी मोठा बंदोबस्त ठेवण्यात आला. रेल्वे सुरक्षा बलाचे ५० हून अधिक कर्मचारी तैनात होते. रेल्वेस्थानकातून दिवसभरात ७० हजारांहून अधिक प्रवासी कोल्हापुरात आले.

..

पार्किंग व्यवस्था

दसरा चौकात दाखल होण्यासाठी मोठ्या संख्येने तरुण दाखल झाले. शहरात वाहतूक व्यवस्था सुरळीत ठेवण्यासाठी शहर आणि ग्रामीण भागातून येणाऱ्या वाहनांसाठी स्वतंत्र पार्किग व्यवस्था करण्यात आली. तावडे हॉटेलमार्गे येणाऱ्या वाहनांसाठी मार्केट यार्ड येथील जोतिबा हॉटेल परिसर, शिवाजी विद्यापीठ मार्गे येणाऱ्या वाहनांसाठी शेंडा पार्क, शिये टोल नाक्याकडील वाहनांसाठी शुगर मिल वाहनतळ, कळंबा संभाजीनगरकडील वाहनांसाठी निर्माण चौक, बालिंगामार्गे येणाऱ्या वाहनांसाठी फुलेवाडी दत्तमंदिर परिसर, शिवाजी पूल मार्गे येणाऱ्या वाहनांसाठी वडणगे, आंबेवाडी परिसरात पार्किगची व्यवस्था केली होती. शहरातील वाहनांसाठी मेरी वेदर मैदान, आयर्विन ख्रिश्चन, गांधी मैदान, सासने मैदान या ठिकाणी वाहने पार्किंग केली.

..

इंटरनेट सेवा बंद

सोशल मिडियावर अफवा पसरविणारे मेसेज, व्हिडीओ व्हायरल होत असल्याच्या कारणावरुन पोलिस प्रशासनाने गुरुवारी सकाळी आठ वाजल्यापासून इंटरनेट सेवा बंद केली. शहर आणि ग्रामीण भागात ही सेवा बंद राहिली. जिल्ह्यातील सर्वच मोबाइल कंपन्यांनी ही सेवा बंद ठेवली. सायंकाळी सहानंतर ही सेवा पुन्हा सुरु करण्यात आली.

.................

पहाटे तीनपासून पोलिस रस्त्यावर

कायदा आणि सुव्यवस्था राखण्यासाठी जिल्हा पोलिस दलाने चोख व्यवस्था केली. शहरातील प्रमुख चौक, सीबीएस, केएमटीसह गजबजलेल्या चौकात पोलिस कर्मचारी तैनात होते. जिल्ह्यात सुमारे ३ हजार पोलिस बंदोबस्तासाठी तैनात होते. पहाटे तीन वाजल्यापासून बंदोबस्ताच्या ठिकाणी पोलिस थांबून होते. ३१ पोलिस ठाण्यांच्या हद्दीत प्रत्येक व्यक्तीच्या हालचालींवर लक्ष ठेवण्यात आले. शहरात १५० हून अधिक सीसीटिव्ही कॅमेरे बसविले होते. त्याच्यावर पोलिस मुख्यालयातून नियंत्रण ठेवण्यात आले. हुल्लडबाजांवर नजर ठेवण्यासाठी साध्या वेशातील पोलिसही तैनात करण्यात आले. दहाहून अधिक विशेष पथकांकडून दिवसभराच्या हालचालींचा आढावा घेण्यात आला. सरकारी आणि खासगी मालमत्तेचे नुकसान टाळण्यासाठी पथकाला सूचना देण्यात आल्या. बंदकाळात १ पोलिस अधीक्षक , २ अप्पर पोलिस अधीक्षक, ७ पोलिस उपअक्षीक्षक , ३० पोलिस निरीक्षक १२० पोलिस उपनिरीक्षक, एसआरपीएफ २ तुकड्या, राज्य राखीव दलाच्या ३ तुकड्या, बॉंम्बशोधक पथक १ आणि ६०० होमगार्डचे जवान तैनात करण्यात आले.