फोटो आहे.
सरकारविरोधात घोषणाबाजी, ३९ कर्मचारी संघटना सहभागी
म. टा. प्रतिनिधी, कोल्हापूर
'आमच्या मागणी मान्य करा, नाही तर खुर्च्या खाली करा',' मुख्यमंत्री, पालकमंत्री, अर्थमंत्री हाय हाय' अशा घोषणा देत राज्य सरकारी कर्मचाऱ्यांनी मंगळवारी शहरातून भव्य मोर्चा काढला. काम बंद करून सर्वच सरकारी कार्यालयातील कर्मचाऱ्यांनी मोर्चादरम्यान रस्त्यावर उतरून जोरदार निदर्शने केली. राज्य सरकारी कर्मचारी मध्यवर्ती संघटनेच्या नेतृत्वाखाली मोर्चा काढण्यात आला.
सातव्या वेतन आयोगाची अंमलबजावणी तातडीने करावी, केंद्र सरकारप्रमाणे महागाई भत्ता द्यावा यासह विविध मागण्यांकडे लक्ष वेधण्यासाठी राज्य सरकारी कर्मचारी तीन दिवसापासून संपावर आहेत. सरकारने कारवाईचा दिलेला इशारा धुडकावून जिल्ह्यातील एक लाख सरकारी कर्मचारी संपात उतरले. शहरातील टाऊन हॉलपासून दुपारी बारा वाजता कर्मचाऱ्यांच्या मोर्चाला सुरूवात झाली. मोठ्या संख्येने सहभागी कर्मचाऱ्यांनी सरकारविरोधात घोषणाबाजी करीत लक्ष वेधले. शहर, जिल्ह्यातील कर्मचारी, शिक्षक, शिक्षिका, शिक्षकेतर कर्मचारी, चतुर्थश्रेणीतील कर्मचारी मोर्चात सहभागी झाल्याने पूर्ण रस्ता व्यापला. शिवाजी चौकातून मोर्चा बिंदू चौकात आला. मोर्चाचे सुरूवातीचे टोक बिंदू चौक आणि शेवटचे टोक टाऊन हॉलपर्यंत राहिले. मोर्चातील सर्व कर्मचारी बिंदू चौकात आल्यानंतर पोलिसांनी चौकातील वाहतूक पर्यायी मार्गाने वळवली.
बिंदू चौकात संघटनेचे जिल्हा शाखेचे सरचिटणीस अनिल लवेकर यांनी मागण्यांची माहिती दिली. ते म्हणाले, 'सरकारी कर्मचाऱ्यांना सातवा वेतन आयोग लागू करावा, विनाअनुदानित शाळांना अनुदान द्यावे, रिक्त जागा त्वरित भराव्यात आदी मागण्यासंबंधी सरकारकडे दोन वर्षांपासून पाठपुरावा केला जात आहे. वेळोवेळी मुख्यमंत्र्यासोबत बैठक झाली. मात्र ते केवळ आश्वासन देत राहिले. संप पुकारल्यानंतर सोमवारी मुख्यमंत्री देवेंद्र फडणवीस यांनी संघटनांच्या प्रतिनिधींशी बैठक बोलावली. बैठकीत नोव्हेंबरपर्यंत मागण्या पूर्ण करण्याचे आश्वासन दिले. त्यावेळी लोकसभेची आचारसंहिता जाहीर होण्याची शक्यता आहे. त्यामुळे मागण्या तातडीने सोडविण्यासाठी संप सुरू आहे.'
दरम्यान, मोर्चात पुरोगामी शिक्षक संघटनेचे प्रसाद पाटील, प्राथमिक शिक्षक संघटनेचे दादासाहेब लाड, चतुर्थ श्रेणी कर्मचारी संघटनेचे रमेश भोसले, नर्सिंग फेडरेशनचे हास्मत हावेरी, खासगी प्राथमिक शिक्षक संघटनेचे भरत रसाळे, मुख्याध्यापक संघाचे किशोर संकपाळ, भूमी अभिलेख कर्मचारी संघटनेचे युवराज चाळके, शासकीय तंत्रनिकेतनचे रमेश पाटील, जिल्हा परिषद कर्मचारी संघाचे सचिन जाधव यांच्यासह सर्व सरकारी कार्यालयातील कर्मचारी सहभागी झाले .
-----------
चौकट
३९ संघटना मोर्चात सहभागी
कृषी कर्मचारी, शासकीय तंत्रनिकेत कर्मचारी, सार्वजनिक बांधकाम कर्मचारी, महाराष्ट्र राज्य प्राथमिक शिक्षक संघ, भूमि अभिलेख, जिल्हा तलाठी संघ, गव्हमेंट प्रेस राष्ट्रीय कामगार संघ, खासगी प्राथमिक शिक्षक, शिक्षकेतर महासंघ, जिल्हा परिषद कर्मचारी महासंघ यांच्यासह ३९ राज्य कर्मचारी तर ३६ शिक्षक संघटना मोर्चात सहभागी झाल्या .
----------
चौकट
महत्वाच्या मागण्या
पाच दिवसांचा आठवडा करावा, महिला अधिकारी, कर्मचाऱ्यांना दोन वर्षाची बालसंगोपन रजा द्यावी, सेवानिवृत्तीचे वय केंद्राप्रमाणे ५८ वरून ६० वर्षे करावे, सर्व रिक्त पदे भरावीत, अधिकारी, कर्मचाऱ्यांना होणाऱ्या मारहाणीसंदर्भात परिणामकारक कायदा करावा, वैद्यकीय खर्च मिळावा, खासगीकरण, कंत्राटीकरण रद्द करावे, विनाअनुदानित शाळांना अनुदान द्यावे, जुनी पेन्शन योजना लागू करावी.
--------