'मराठा आरक्षण मागणीच्या पार्श्वभूमीवर प्रत्येक जिल्ह्यात विद्यार्थ्यांसाठी डॉ. पंजाबराव देशमुख वसतिगृह सुरू करण्याचा निर्णय सरकारने घेतला. मात्र जागा घेऊन नव्याने इमारत बांधून वसतिगृह सुरू करण्यास विलंब होईल. तत्पूर्वी तातडीने प्रत्येक जिल्ह्याच्या ठिकाणच्या खुल्या सरकारी इमारतीचे नुतनीकरण करून वसतीगृह सुरू केले जात आहे. कोल्हापुरात राज्यातील पहिल्या वसतिगृहाचे उदघाटन झाले आहे. महिनाभरात राज्यातील १० जिल्ह्यात वसतिगृहे सुरू केली जातील', असे आश्वासन पालकमंत्री चंद्रकांत पाटील यांनी शुक्रवारी दिले.
सदर बाजार परिसरातील शाहू कॉलेजजवळ डॉ. पंजाबराव देशमुख वसतिगृहाच्या उदघाटनप्रसंगी ते बोलत होते. यावेळी पालकमंत्री पाटील यांच्या हस्ते प्रातिनिधिक ५ विद्यार्थ्यांना वसतिगृहातील रूमच्या चाव्या देण्यात आल्या.
पालकमंत्री पाटील म्हणाले, 'महसूल विभागाच्या वापराविना असलेल्या इमारतीचे लोकवर्गणीतून नूतनीकरण केले आहे. त्या इमारतीमध्ये निवासाची मोफत सोय केली जाईल. शुध्द पिण्याचे पाणी, आंघोळीसाठी गरम पाणी अशा दर्जेदार सुविधा निर्माण केल्या आहेत. वसतिगृहाची क्षमता ७२ आहेत. मात्र डबल बेडचा वापर केल्यास ९२ विद्यार्थी राहू शकतात. अर्ज केलेल्या सर्व विद्यार्थ्यांना सामावून घेण्याचा प्रयत्न आहे. मराठा समाजाची आरक्षणाची मागणी पूर्ण करण्यासाठी सरकार कटिबध्द आहे. सध्या ही मागणी न्यायप्रविष्ट आहे. राज्य मागासवर्गीय आयोगाचा अहवाल आल्यानंतर विलंब न लावता विशेष अधिवशेन बोलवून आरक्षणचा निर्णय घेतला जाईल. तोपर्यंत मराठा समाजातील तरूण, तरुणींना विविध व्यवसाय, उद्योगांसाठी आण्णासाहेब पाटील आर्थिक विकास महामंडळाच्या माध्यमातून देण्यात येणाऱ्या १० लाखांपर्यंतच्या कर्जास सरकारने हमी दिली आहे. या कर्जाचे व्याज सरकार भरणार आहे. कर्जासाठी आतापर्यंत १२ हजार तरुणांनी ऑनलाईन अर्ज भरले आहेत. त्यापैकी पाचशे तरुणांना कर्ज उपलब्ध झाले आहे. राजर्षी छत्रपती शाहू महाराज शिक्षण शुल्क शिष्यवृत्ती योजना, डॉ. पंजाबराव देशमुख निर्वाह भत्ता योजनेची प्रभावीपणे अंमलबजावणी होण्यासाठी जिल्हाधिकाऱ्यांच्या अध्यक्षतेखाली जिल्हा स्तरावर समिती स्थापन केली आहे. समितीमध्ये मराठा समाजातील नेतेही सदस्य असतील.'
आमदार अमल महाडिक म्हणाले, 'मराठा समाजातील विद्यार्थ्यांसाठी कोल्हापुरात पहिलेच सुसज्ज वसतिगृह सुरु झाले आहे. या वसतिगृहासाठी महाडिक उद्योग समूहातर्फे २ लाख ५१ हजार रुपयांची देणगी दिली जाईल. दानशूरांनीही वसतिगृहासाठी सढळ हाताने मदत करावी.'
यावेळी जिल्हाधिकारी अविनाश सुभेदार, पुणे म्हाडाचे अध्यक्ष समरजित घाटगे, नगरसेवक सत्यजित कदम, किरण नकाते, आशिष ढवळे, शेखर कुसाळे, स्मिता माने, उमा इंगळे, रुपाराणी निकम, जयश्री जाधव, सुरमंजिरी लाटकर, अर्चना पगार, सीमा कदम आदी उपस्थित होते.
... तर मुलींसाठीही वसतिगृह
'बसची सुविधा चांगली असल्याने मुली कॉलेज सुटल्यानंतर घरी वेळेत जातात. तरीही गरज असल्यास शहराच्या मध्यवस्तीत सरकारच्या इमारतीमध्ये सुसज्ज असे मुलींसाठीचे वसतिगृह सुरू केले जाईल. त्यासाठीही समाजातील दानशूरांकडून आर्थिक मदत स्वीकारली जाईल', असे पालकमंत्री पाटील यांनी सांगितले.
मोबाइल अॅप डाउनलोड करा आणि राहा अपडेट
