ऑनलाइन सातबारा प्रक्रिया लटकली, केवळ १ लाख १५ हजार डिजिटल सहीनीशी अपलोड
Bhimgonda.Desai@timesgroup.com
Tweet : @bhimgondaMT
कोल्हापूर
येथील महसूल प्रशासनातर्फे चार वर्षांपासून जिल्ह्यातील सातबारा ऑनलाइन केले जात आहे. आतापर्यंत ९८ टक्के सातबारा ऑनलाइन झाले तरी ते डिजिटल सहीनिशी अपलोड झालेले नाहीत. त्यामुळे अपवाद वगळता सर्वत्र सातबारा, आठ अ देण्यासाठी तलाठ्यांकडून मनमानी पध्दतीने खुलेआम पैसे घेतले जात असल्याच्या तक्रारी आहेत. परिणामी ऑनलाइन सातबारा करण्याचा मूळ उद्देशच बाजूला पडला आहे. ऑनलाइन अपलोड करण्याचा राज्यपातळीवरील सर्व्हर एक महिन्यापासून बंद आहे. साहजिकच ऑनलाइन सातबारा आणि डिजिटल सहीनिशी सातबारा अपलोडची प्रक्रिया लटकली आहे.
सरकारी योजना, बँक कर्ज यासह विविध कारणांसाठी शेतकऱ्यांना सातबारा, आठ अ लागतो. हस्तलिखित देण्यासाठी तलाठी मनमानी पैसे उकळतात. न दिल्यास संबंधित शेतकऱ्यांची अडवणूक होते. अशाप्रकारे होणरी लूट थांबावी, खातेदार शेतकऱ्यांना कोठूनही, कधीही ऑनलाइन सातबारा मिळावा, राज्य, जिल्हा पातळीवर एका क्लिकवर एकूण सातबारांची संख्या कळावी, सर्व सातबारा कायमस्वरूपी इलेक्ट्रॉनिक यंत्रणेवर राहावेत या प्रमुख कारणांसाठी २०१४ पासून सातबारा तलाठी ऑनलाईन करीत आहेत. हस्तलिखित सातबारा संगणकावर टाइप करताना अनेक चुका, त्रुटी राहिल्या असल्याने काही ठिकाणी सातबारावरील नावे गायब झाली. व्यापक प्रमाणात तक्रारी झाल्याने चुका, त्रुटी दुरूस्ती करण्याची प्रक्रियाही सुरू करण्यात आली आहे.
दरम्यान, ऑनलाईन सातबारा करण्यात पहिल्यापासून राज्यात कोल्हापूर जिल्हा आघाडीवर राहिला. सध्या ९८. ७० टक्के सातबारा ऑनलाइन आहेत. मात्र सर्व सातबारा डिजिटल सहीनिशी अपलोड नाहीत. यामुळे ऑनलाइन सातबारा घेऊन पुन्हा तलाठ्याकडे सहीसाठी जावे लागते. सही करताना पुन्हा चिरीमिरीची लूट होत आहे. अनेक तलाठी घरातील संगणक, प्रिंटरवर सातबारा, आठ अ काढून देतात. त्यासाठी कमीत कमी २० ते १०० रूपयांपर्यंत पैसे उकळतात. आता सर्व्हर डाऊन असल्याने खातेदारांना आपला सातबारा ई- भूमी वेबसाइटवरही पाहता येत नाही. तलाठ्याकडेच जाऊन प्रिंट घ्यावी लागते. अशा सध्याच्या व्यवस्थेमुळेच शेतकऱ्यांची आर्थिक पिळवणूक होत असल्याचा आरोप शेतकऱ्यांतून होत आहे. ऑनलाइनमध्ये चांगले काम असूनही सातबारा मिळण्यात पारदर्शकता निर्माण झाली नसल्याचे चित्र आहे.
----------------------------
कोट
'जिल्ह्यातील सातबारा ऑनलाइन अपलोड करण्याचे काम संपूर्ण राज्यात चांगले झाले आहे. दहा तालुक्यातील सर्व सातबारा ऑनलाईन करण्यात आले आहेत. डिजिटल सहीनिशी सातबारा अपलोड करण्याचे कामही गतीने सुरू होते. मात्र राज्यपातळीवरील सर्व्हर जुलै महिन्याच्या पहिल्या आठवड्यापासून बंद आहे. परिणामी ऑनलाईन प्रक्रिया खंडीत झाली आहे. ऑफलाईन प्रक्रिया सुरू आहे. गैरसोय टाळण्यासाठी शेतकऱ्यांना सातबारा, आठ सही करून देण्याच्या सूचना सर्व तलाठ्यांना दिल्या आहेत.
अविनाश सुभेदार, जिल्हाधिकारी
-------------------------
चौकट
करवीर, हातकणंगले मागे
ऑनलाईन सातबारा करण्यात करवीर, हातकणंगले तालुके मागे आहेत. उर्वरित आजरा, कागल, गगनबावडा, गडहिंग्लज, चंदगड, पन्हाळा, भुदरगड, राधानगरी, शाहूवाडी, शिरोळ तालुक्यांचे काम शंभर टक्के पूर्ण झाले आहे. परंतु, डिजिटल सहीनिशी सातबारा नसल्याने खातेदार शेतकऱ्यांना त्याचा फायदा झालेला नाही. डिजिटल सहीनिशी जोपर्यंत सातबारा अपलोड होत नाही, तोपर्यंत ऑनलाईन साताबारा केवळ दिखाऊच ठरणार आहे.
--------------------
जिल्ह्यातील एकूण महसूल गावे
१२३४
एकूण तलाठी संख्या
२९५
सातबारा उताऱ्यांची संख्या
१०,६७,५९२
ऑनलाईन सातबारा शंभर टक्के तालुके
१०
डिजिटल सहीनिशी तयार सातबारा
११७२२६
डिजीटल सहीनिशी अपलोड सातबारा
११५५१२
---------------
