म. टा. प्रतिनिधी, कोल्हापूर

'सरकारने स्वाभिमानी शेतकरी संघटनेचे दूध दरासाठीचे आंदोलन मोडण्यासाठी खूप प्रयत्न केले. पावडरच्या दूधाचे टँकर पोलिस बंदोबस्तात मुंबईला पाठविण्याचा प्रयत्न केला. तरीही कार्यकर्त्यांनी ते टँकर अडविले. त्यातील दूध रस्त्यावर सोडले. त्यावेळी टँकरमधील अडीच हजार लिटर दूधाची नासाडी झाली असताना २० हजार दूध ओतल्याचे दाखवून संघवाल्यांनी महाचोरी केली. त्यातही ते पैसे हाणले', असा आरोप स्वाभिमानी शेतकरी संघटनेचे अध्यक्ष खासदार राजू शेट्टी यांनी सोमवारी केला. दूध आंदोलनात सक्रिय स्वाभिमानीच्या महिला पदाधिकाऱ्यांच्या सत्कार कार्यक्रमात ते बोलत होते. शाहू स्मारक भवनात कार्यक्रम झाला.

खासदार शेट्टी म्हणाले, 'दूध दरासाठीचे आंदोलन करणे अवघड आहे. मात्र, उत्पादक, महिलांनी साथ दिल्याने आंदोलन यशस्वी झाले. आंदोलन मोडीत काढण्याचे नियोजन सरकारने केले होते. गावागावतील दूध संकलन बंद झाले असतानाही पावडरच्या दूधाचे टँकर बंदोबस्तात मुंबईला पोहचवले. दूध पोहोचवताना संघवालेही चोरावर मोर निघाले. त्यांनी महाचोरी केली. दोन हजार लिटर दूध असताना टँकरमध्ये २० हजार लिटर दूध असल्याचे दाखविले. आंदोलनात दुधाची नासाडी झाली म्हणून बदनामीचा प्रयत्न केला. प्रत्यक्षात एकूण संकलन होणाऱ्या दुधापैकी एक टक्केच दूधाची नासाडी झाली. उर्वरित ९९ टक्के दुध गरिबांना, वारकऱ्यांना वाटले. खवा, बासुंदी केली. मात्र त्याची नासाडीपेक्षा कमी चर्चा झाली.'

खासदार शेट्टी म्हणाले, 'आंदोलन सुरू झाल्यानंतर सुरुवातीला मुख्यमंत्री देवेंद्र फडणवीस, पालकमंत्री चंद्रकांत पाटील यांनी दूध दराचा प्रश्न उत्पादक आणि दूधसंघांनी बघून घ्यावा, अशी भूमिका घेत आंदोलनाकडे दुर्लक्ष केले. गुजरातचे दुध मुंबईला पाजण्याचे नियोजन केले. पण, गुजरातहून येणारे दूध मी स्वत: दिवसरात्र सीमेवर बसून अडविले. पोलिसांना चकवा देत रुळावर बसून रेल्वेने दुध आणण्याचा डाव हाणून पाडला. नंतर सरकारला झळ पोहचली. पाच रुपयांची भाववाढ करीत आंदोलनाची कोंडी फोडली.'

यावेळी जिल्हा परिषद सदस्य डॉ. पद्माराणी पाटील, मेघा चौगुले यांची भाषण झाली. प्रणिता पाटील यांनी स्वागत केले. आंदोलन यशस्वी केल्याबद्दल सांगली, कोल्हापूर जिल्ह्यातील महिला पदाधिकाऱ्यांचा सत्कार दूधासाठीची किटली देऊन करण्यात आला. भगवानराव काटे, सावरक मादनाईक, प्रा. जालिदंर पाटील यांच्यासह महिला, शेतकरी मोठ्या संख्येने उपस्थित होते.

महाडिकांवर टीका

'पोलिस बंदोबस्त झुगारून किणी टोल नाक्यावर स्वाभिमानी शेतकरी संघटनेचे कार्यकर्ते, महिला कार्यकर्त्या रस्त्यावर उतरल्या. त्यावेळी एका नेत्याने भगवानराव काटे यांना उद्देशून आंदोलनातील हवा गेली का? असा टोमणा मारला. त्यांना काटे यांनी त्याचवेळी सडेतोड उत्तर दिले. त्या नेत्यासही स्वाभिमानीची टाइट हवा कळाली', असा टोला स्वाभिमानीच्या महिला पदाधिकारी सूवर्णा अपराज यांनी माजी आमदार महादेवराव महाडिक यांचा उल्लेख टाळून लगावला. त्यावेळी टाळ्यांचा प्रचंड कडकडाट करीत कार्यकर्त्यांनी त्यांचे नावे घ्या, अशी जोरदार मागणी झाली.

सदाभाऊंचे डिपॉझिट जप्त करू

'स्वत:चे अस्तित्व टिकवण्यासाठी सदाभाऊ खोत बेताल बोलत आहेत', अशी टीका निर्मला पाटील यांनी केली. 'खोतांना स्वाभिमानी शेतकरी संघटनेने अंगावर कापडे दिले, मंत्रीपद दिले. हे सर्व विसरून सदाभाऊ खासदार शेट्टींवर आरोप करीत आहेत. हातकणंगलेमधून सदाभाऊंनी लोकसभा निवडणूक लढावी, त्यांचे डिपॉझिट जप्त करू,' असे आव्हानही आपराज यांनी दिले. अनेक महिला पदाधिकाऱ्यांनी मंत्री खोत यांच्यावर जोरदार टीका करीत समाचार घेतला.

म. टा. प्रतिनिधी, कोल्हापूर

यंदा कोल्हापूर शेती उत्पन्न बाजार समितीला तबल २ कोटी रुपयाचा नफा झाला असून ही वाटचाल विकासात्मक आहे. यापुढेही मार्केटच्या हिताचे निर्णय सर्वानुमते घेतले जातील. शेतीमालाच्या साठवणुकीसाठी अद्ययावत शीतगृहाची उभारणी आणि टेंबलाईवाडी उपबाजार आवारात धान्य बाजार सूर करणे हे महत्वाचे प्रकल्प पूर्णत्वास नेणार आहे अशी माहिती कोल्हापूर शेती उत्पन्न बाजार समितीचे सभापती कृष्णात पाटील यांनी दिली. सोमवारी कोल्हापूर शेती उत्पन्न बाजार समितीच्या १५ व्या वार्षिक सर्वसाधारण सभेत ते बोलत होते. शाहू मार्केट यार्डात सभा झाली.

सभापती पाटील म्हणाले, 'समितीच्या बाजार आवारात शेतीमालाच्या साठवणुकीसाठी अत्याधुनिक तंत्रज्ञान असलेला शीतगृह प्रकल्प उभारावा अशी शेतकरी बांधवांची मागणी आहे. या अनुषंगाने बाजार समितीने ३००० मेट्रीक टन क्षमतेचे शीतगृह उभारण्यासाठी जागा निश्चित केली आहे. येत्या दोन महिन्यांत शीतगृहाच्या उभारणीच्या कामाला सुरुवात केली असून चालू वर्षात शेतकरी बांधवांना त्यांच्या हक्काचे शीतगृह उपलब्ध करुन देण्यास प्रयत्नशील राहू. समितीचा धान्य बाजार विखुरलेला असून तो एकत्र येण्यासाठी समितीने टेंबलाईवाडी उपबाजार आवारात धान्य बाजार सुरु करण्याचा निर्णय घेतला आहे. त्यासाठी तेथील उपबाजार आवारात रस्ते, गटारी, वीजपुरवठा, पाणी, पुरेशी सुरक्षा व्यवस्था पुरवण्यात येणार आहेत. तेथे लवकरात लवकर अडत व व्यापारी यांची दुकाने सुरु करून प्रकल्प पूर्णत्वास नेणार आहे' असे सभापती पाटील यांनी सांगितले.

यावेळी उपस्थित शेतकऱ्यांनी विविध प्रश्न विचारले. माजी संचालक नयन प्रसादे म्हणाले, 'बाजार समितीच्या परिसरातील अवैध धंदे बंद करावेत. कांदा, बटाटा मार्केटमध्ये स्वच्छतागृहाची सोय करावी, धान्य व्यापाऱ्यांना प्लॉट द्यावेत, निधन झालेल्या व्यापाऱ्यांच्या वारसांना विनाशुल्क प्लॉट हस्तांतरण करावे. टेंबलाईवाडी मार्केट यार्डमध्ये सुरक्षिततेसाठी सीसीटीव्ही कमेरे लावावेत. शेळेवाडीतील आर. वाय. पाटील आणि शीतगृहासाठी लवकर कार्यवाही करावी.'

पन्हाळा येथील दगडू पाटील म्हणाले, 'बाजार समितीच्या कार्यक्षेत्रातील साखर कारखान्यांकडून अर्धा ते एक टक्का सेस घ्यावा. बाजार समितीने उत्पन्नवाढीसाठी प्रयत्न करायला हवा. मराठा आरक्षणाला पाठिंबा देणारा ठराव करावा.' संदीप चौगुले म्हणाले, 'छत्रपती शाहू महाराजांना देशातील सर्वोच्च पुरस्कार भारतरत्न द्यावा यासाठी ठराव करण्यात यावा.' प्रकाश पाटील म्हणाले, 'दहा गुंठे जमीन असलेल्या शेतकऱ्याला मार्केट कमिटीने मताचा अधिकार दिल्याने मुख्य प्रवाहात शेतकऱ्याला यायला मदत झाली.'

कावणे येथील आर. के. पाटील यांनी खासदार धनंजय महाडिक व सुप्रिया सुळे यांना संसदरत्न पुरस्कार मिळालेबद्दल अभिनंदनाचा ठराव मांडला. चंद्रकांत पाटील यांनी कोल्हापूर बाजार समितीला छत्रपती शाहू महाराजांचे नाव देण्याची मागणी केली. जयवंत वळजू यांनी बाजार समितीने शाहूंचा बगीचा सुशोभिकरण, ईनाम सेवा उपलब्धता, वाढलेला नफा याबद्दल समितीचे अभिनंदन केले. महादेव शिंदे यांनी निकाली कुस्त्यांचे जंगी मैदान भरवण्याची मागणी केली. राशिवडे येथील कृष्णात पोवार यांनी ग्रामपंचायतींना शासनाने २० हजार रुपये मानधन देण्याची मागणी केली.

सचिव मोहन सालपे म्हणाले, 'चांगल्या दर्जेदार सुविधा देण्यासाठी आम्ही कटिबद्ध आहोत. स्वच्छतेचे काम बिव्हीजे कंपनीला देण्यात आले आहे. सुरक्षिततेसाठी पुरेशा उपाययोजना केल्या जातील. सभासदांच्या हिताचे निर्णय घेण्यात येतील.'

परशराम खुडे, विलास साठे, उदयसिंग पाटील, दशरथ माने, सर्जेराव पाटील, बाबासाहेब लाड, शारदा पाटील, आशालता पाटील, उत्तम धुमाळ, शेखर येडगे, संजय जाधव, संगीता पाटील, शशिकांत आडनाईक, सदानंद कोरगावकर, नंदकुमार वळंजू, बाबूराव खोत, नेताजी पाटील, संजय साने, नाथाजी पाटील, अॅड. किरण पाटील, भगवान काटे, सचिन कामिरे उपस्थित होते. उपसभापती अमित कांबळे यांनी आभार मानले.

धुम्रपानास मज्जाव

कोल्हापूर : सौदी अरब सरकारने हजच्या काळात तंबाखू व तंबाखूजन्य पदार्थांच्या सेवनावर निर्बंध घातले आहेत. या नियमानुसार हजच्या काळात धार्मिक स्थळ किंवा विमानतळांवर हज यात्रेकरूकडे नशिले पदार्थ सापडल्यास दोषी व्यक्तीस १४ वर्षांची कैद होऊ शकते. यामुळे हजला जाणाऱ्या यात्रेकरूंनी स्वत:जवळ नशिले पदार्थ ठेवू नयेत. असे आवाहन करण्यात आले आहे. प्रतिबंधात्मक साहित्यात तंबाखू, गुटखा, शक्तीवर्धक गोळ्या, नशिली औषधे, खसखस यांचा समावेश आहे. हजला जाणाऱ्या यात्रेकरूंनी या वस्तू सोबत बाळगू नयेत, असे आवाहन कोल्हापूर जिल्हा हज कमिटीचे इकबाल देसाई यांनी पत्रकाद्वारे केले.

चोरीप्रकरणी चार

महिला ताब्यात

म. टा. प्रतिनिधी, कोल्हापूर

खरेदीचा बहाणा करत राजारामपुरी मेन रोड येथील कापड दुकानात साड्या चोरी केल्याप्रकरणी चार सराईत महिलांना राजारामपुरी पोलिसांनी चौकशीसाठी ताब्यात घेतले. चोरीचे सीसीटीव्ही फुजेज तपासून पोलिसांकडून ही कारवाई सुरू आहे. संशयित महिला टेंबलाईवाडी परिसरातील असून त्यांच्यावर यापूर्वी अनेक चोरीचे गुन्हे दाखल आहेत. साड्या खरेदीच्या बहाण्याने त्या दुकानात गेल्या. दुकान मालकाला बोलण्यात गुंतवून ठेवत हातचलाखीने त्यांनी साड्या चोरल्या. हा प्रकार सीसीटीव्ही फुटेजमधून लक्षात आल्यानंतर दुकान मालकाने राजारामपुरी पोलिस ठाण्यात तक्रार दिली. संशयित महिलांकडून अद्याप मुद्देमाल हस्तगत झालेला नाही. याप्रकरणी पोलिस निरीक्षक औदुंबर पाटील यांच्याकडून अधिक तपास सुरू आहे.

म. टा. प्रतिनिधी, कोल्हापूर

त्यांना बोलता येत नाही, ऐकूही येत नाही, अशा मूकबधिरांनी सोमवारी जिल्हाधिकारी कार्यालयावर निशब्द मोर्चा काढला. देहबोली, हावभावातून त्यांनी मागण्या प्रशासनास कळविल्या. चेन्नईमधील अल्पवयीन मूकबधीर मुलीवर झालेल्या बलात्काराच्या निषेधार्थ मूक, कर्णबधिर असोसिएशनतर्फे हा मोर्चा काढण्यात आला होता.

चेन्नई येथे २२ जणांनी ११ वर्षाच्या मूकबधीर मुलीवर लैंगिक अत्याचार केले. त्याचा निषेध करण्यासाठी आणि अत्याचार केलेल्या आरोपींना त्वरित अटक करावी, त्यांना फाशीची शिक्षा द्यावी, या मागणीसाठी मूक - कर्णबधिर असोसिएशनच्या मंगळरवार पेठेतील कार्यालयापासून जिल्ह्यातील मूक, कर्णबधिरांच्या मोर्चाला सुरूवात झाली. हातात मागणीचे फलक घेऊन मोर्चा महाव्दार रोड, पापाची तिकटी, सीपीआर, दसरा चौक, व्हिनस कॉर्नरमार्गे जिल्हाधिकारी कार्यालयावर आला. तेथे शिष्टमंडळातर्फे निवासी उपजिल्हाधिकारी संजय शिंदे यांना निवेदन देण्यात आले. मोर्चात उध्दव पन्हाळकर, गौरव शेलार, संतोष मिठारी, अतुल फणसाळकर आदी सहभागी झाले.

-------------------

चौकट

खासदार शेट्टी यांची भेट

मराठा समाजातर्फे सुरू असलेल्या आंदोलनात सहभागी होण्यासाठी आलेले खासदार राजू शेट्टी यांची मोर्चेकरी मूकबधीरांनी भेट घेतली. त्यावेळी खासदार शेट्टी यांनी मूकबधीरांचे प्रश्न लोकसभेत मांडण्यात येईल, असे आश्वासन दिले.

-------------------

कापड विक्रेत्याचे

कोट्यवधीचे दिवाळे?

म.टा.वृत्तसेवा,इचलकरंजी

नारायण पेठ परिसरातील कापड विक्रेत्याने कोट्यवधी रुपयांचे दिवाळे काढून शहरातून पलायन केल्याची चर्चा आहे. यामध्ये खासगी सावकार, गारमेंट उद्योजक आणि काही वित्तीय संस्था अडकल्याने शहरात मोठी खळबळ उडाली आहे.

व्यापारी पेठ असलेल्या परिसरात या विक्रेत्याचे तयार कपडे विक्रीचे दुकान आहे. तो मागील काही वर्षांपासून शहरात वास्तव्यास होता. तयार कपडे विक्रीच्या व्यवसायातून त्याने चांगले बस्तान बसविले होते. अलिकडे कापड व्यवसायातील मंदीमुळे काही व्यापाऱ्यांचे देणे थकले असल्याची चर्चा ऐकावयास मिळत होती. त्याचबरोबर खासगी सावकार, वित्तीय संस्था तसेच गारमेंट उद्योजकांनी पैशासाठी तगादा लावला होता. यातूनच त्या व्यापार्याने काही दिवसापूर्वी परिवारासह शहर सोडल्याची चर्चा आहे. काही दिवसांपासून दुकान बंदच असल्याने तसेच तो रहात असलेल्या घरीही कोणी आढळून न आल्याने सोमवारी सकाळच्या सुमारास काही विक्रेत्यांनी परिसरात या व्यापाऱ्याची चौकशी केली. त्यावेळी व्यापाऱ्याने परिवारासह शहर सोडले असल्याचे समजले.

उदगावच्या चौघांना

मारहाणप्रकरणी शिक्षा

म. टा. वृत्तसेवा, जयसिंगपूर

शेतजमिनीच्या वादातून दगडाने मारहाण केल्याप्रकरणी उदगाव (ता. शिरोळ) येथील चौघांना जयसिंगपूर प्रथमवर्ग न्यायालयाने सहा महिन कैद व आठ हजार रुपये दंडाची शिक्षा सुनावली. बळवंत भरमू काडगे (वय ७०), जिनेंद्र बाबू काडगे (वय ३८), अभय बाबू काडगे (वय ३२), महावीर बापू काडगे (वय ३२) अशी आरोपींची नावे आहेत.

याबाबत अधिक माहिती अशी, १६ जानेवारी २०१४ रोजी सावकर काडगे हे शेतात ठिंबक सिंचनाच्या पाईप काढत होते. यावेळी संशयित आरोपी तेथे आले. पाईप काढायची नाही असे सांगत त्यांनी दगडाने मारहाण केली. यामध्ये सावकर काडगे जखमी झाले होते. जखमी सावकर यांचा भाऊ गोटेश्‍वर यांनी जयसिंगपूर पोलिसात फिर्याद दिली होती. या घटनेचा तपास सहाय्यक फौजदार ए. एस. कांबळे यांनी केला. खटल्यात जखमी सावकर काडगे, डॉ. चौगुले यांची साक्ष महत्वाची ठरली. आरोपींनी हल्ला केल्याचे स्पष्ट झाल्याने त्यांना अधिकाधिक शिक्षा द्यावी, असा युक्तीवाद विशेष सरकारी वकील सूर्यकांत मिरजे यांनी केला. यानंतर प्रथमवर्ग न्यायदंडाधिकारी ए. एम. पाटील यांनी आरोपींना सहा महिने कैद व आठ हजार रुपये दंड अशी शिक्षा सुनावली.

इचलकरंजी प्रांताधिकारी कार्यालयासमोर सरकारचे श्राद्ध आंदोलन

म. टा. वृत्तसेवा, इचलकरंजी

मराठा आरक्षणाच्या मागणीसाठी सकल मराठा समाजाच्यावतीने भाजप आमदार सुरेश हाळवणकर यांच्या कार्यालयावर मोर्चा काढून ठिय्या आंदोलन करण्यात आले. त्यांच्या राजीनाम्याची मागणी करत शंखध्वनी करण्यात आला. सरकारच्या विरोधात यावेळी जोरदार घोषणाबाजी करण्यात आली.

दरम्यान, प्रांताधिकारी कार्यालयासमोर सुरु असलेल्या बेमुदत आंदोलनस्थळी धार्मिक विधी करुन शासनाचे प्रतिकात्मक श्राध्द घालण्यात आले.

मराठा समाजाला आरक्षण मिळावे यासह राज्य शासनाने आंदोलकांवरील गुन्हे बिनशर्त मागे घ्यावेत, आंदोलनात शहीद झालेल्या कुटुंबियांना आर्थिक मदत द्यावी तसेच मराठा आरक्षणासाठी विधानसभा व विधानपरिषदेचे तातडीने विशेष अधिवेशन बोलविण्यात यावे आदी मागण्यांसाठी राज्यभर आंदोलन सुरू आहे. त्याचाच भाग म्हणून इचलकरंजीत सकल मराठा समाज व मराठा क्रांती संघटनेच्यावतीने बेमुदत ठिय्या आंदोलन सुरु आहे. सोमवारी सकाळी आंदोलनाचा भाग म्हणून आमदार हाळवणकर यांच्या कार्यालयावर मोर्चा काढण्यात आला. कार्यालयासमोर आंदोलकांनी ठिय्या मारत शंखध्वनी केला. शासनाच्या निषेधार्थ जोरदार निदर्शने करीत आमदारांनी पदाचा राजीनामा देऊन आंदोलनात सहभागी व्हावे अशी मागणी केली.

'आरक्षण आमच्या हक्काचे, नाही कुणाच्या बापाचे', 'आरक्षण मिळाल्याशिवाय स्वस्थ बसणार नाही,' 'चले जाव चले जाव, भाजपा सरकार चले जाव' अशा घोषणा देत परिसर दणाणून सोडला. खासदार राजू शेट्टी, पालकमंत्री चंद्रकांत पाटील यांच्याविरोधाताही घोषणाबाजी करण्यात आली. अप्पर पोलिस अधिक्षक श्रीनिवास घाडगे, उपअधिक्षक कृष्णात पिंगळे यांनी कडक बंदोबस्त ठेवला होता.

दरम्यान, प्रांताधिकारी कार्यालय चौकात निष्क्रीय शासन व लोकप्रतिनिधी यांच्या नांवाने शंखध्वनी करत शासनाचे श्राध्द घालण्यात आले. यावेळी जोरदार घोषणाबाजी करुन आरक्षण मागणीला विलंब करणार्‍या शासनाचा निषेध नोंदविला. यावेळी नितीन, संतोष कांदेकर, मोहन काळे, सिंधुताई शिंदे, राजाराम बोंगार्डे यांच्यासह समाज बांधव उपस्थित होते.

कागल न्यायालयासमोर वकिलांची निदर्शने

म. टा. वृत्तसेवा, कागल

आरक्षण आमच्या हक्काचे नाही कुणाच्या बापाचे, मराठा समाजास आरक्षण मिळालेच पाहिजे, आरक्षण न देणार्या सरकारचा धिक्कार असो अशा घोषणांनी कागलच्या न्यायालयाचा आवारात आवाज दुमदुमला. सकल मराठा समाजास आरक्षण देण्यासाठी वकिलांनी कागल न्यायालयाच्या आवारासमोर आंदोलन केले.

सकल मराठा समाजाच्या आरक्षणास पाठिंबा देण्यासाठी कागल बार असोशिएशनच्यावतीने न्यायालयाच्या आवारासमोर निदर्शने केली. सकाळी १२ वाजण्याच्या सुमारास झालेल्या आंदोलनावेळी बोलताना ज्येष्ठ वकील अॅड. जीवनराव शिंदे यांनी शासनाचा निषेध नोंदविला. ते म्हणाले, 'गेल्यावेळीच्या सरकारने १६ टक्के आरक्षण मंजूर केले असतानाही कोर्टाची कारणे दाखवून आताचे सरकार मंजूरी देत नाही. आरक्षण न दिल्यास शिक्षण तसेच नोकरीवर त्याचा परिणाम होणार आहे. सध्याचे सरकार मराठा समाजाची परीक्षा घेते आहे की काय अशी अवस्था निर्माण झाली आहे.' कागल बार संघटनेचे अध्यक्ष मेंडके, उपाध्यक्ष गजानन कुलकर्णी, आर. डी. मगदूम, संजय चव्हाण, डी. बी.मगदूम, के. डी. जाधव, करण जाधव, संग्राम गुरव, जी. टी. खोत, सागर मगदूम, मोहन पाटील, मुकुंद जोशी आदी उपस्थित होते.

राजेंद्र पाटील, इचलकरंजी

'राज्यातील सहकारी बँकांची अवसायन प्रक्रिया वर्षानुवर्षे अनिश्चित कालावधीसाठी प्रलंबित रहात होती. त्यामध्ये सुधारणा करत ही प्रक्रिया कालबध्द पूर्ण व्हावी यासाठी सहकार खात्याने कंबर कसली आहे. त्यासंबंधीचे परिपत्रक लवकरच जारी करून अवसायक व सहकार खात्याच्या अधिकाऱ्यांना आदेश दिले जाणार आहेत', असे प्रतिज्ञापत्र सहकार आयुक्त डॉ. विजय झाडे यांनी उच्च न्यायालयात सादर केले. त्यामुळे अवसायानात निघालेल्या सहकारी बँकांवर सरकारचा वचक राहणार आहे.

राज्यातील विविध सहकारी बँका गैरव्यवहारामुळे आर्थिक अडचणीत येऊन अवसायानात गेल्या. त्यामध्ये इचलकरंजीतील काही बँकांचाही समावेश आहे. परंतु त्यापुढील प्रक्रिया दहा वर्षांपासून प्रलंबित आहे. यासंदर्भात राज्य शासन काही निर्णय घेणार की नाही अशी विचारणा उच्च न्यायालयाने केल्यानंतर सहकार खात्याला जाग आली आहे. इचलकरंजी येथील शहापूर सहकारी पतसंस्थेने दाखल केलेल्या याचिकेवर सुनावणीदरम्यान न्या. ए. ए. सय्यद आणि न्या. मकरंद कर्णिक यांच्या खंडपीठाने शासन, सहकार आयुक्तांवर ताशेरे ओढले. त्याला अनुसरुन उपरोक्त निर्णय घेण्यात आला.

इचलकरंजीतील जिव्हेश्वर सहकार बँक आर्थिक गैरव्यवहारांमुळे डबघाईला आली. त्यामुळे २००६ मध्ये बँकेवर अवसायक नेमला गेला. शहापूर नागरी सहकारी पतसंस्थेने बँकेत २० लाखांची ठेव ठेवली होती. परंतु १० वर्षे लोटली तरी अवसायन प्रक्रिया पूर्ण झाली नसल्याने संस्थेला ठेव परत मिळालेली नाही. त्यामुळे संस्थेने उच्च न्यायालयात धाव घेऊन रिट याचिका दाखल करून अवसायकाची कार्यवाही तत्काळ करून ठेवी परत देण्याचे आदेश द्यावेत अशी विनंती केली आहे. याचिकाकार्त्यांतर्फे अॅड. धैर्यशील सुतार यांनी प्रशासनाने विविध प्रकरणांमध्ये वेळेत अवसायक नियुक्ती न करता बऱ्याच कालावधीसाठी निर्णय प्रलंबित ठेवल्याचे निदर्शनास आणून दिले.

आता सहकार खात्याच्या या परिपत्रकामुळे एकंदरीत राज्यातील अवसायनात निघालेल्या सहकारी संस्थांची वर्षानुवर्षे प्रलंबित प्रक्रिया कालबद्धरित्या पूर्ण होईल. जिव्हेश्वर बँकेच्या अवसायनाची मुदत संपली असली तरी शासनाने अवसायकास जून २०१९पर्यंत मुदतवाढ दिल्याचे स्पष्ट केले. जिव्हेश्वर बँकेने सुमारे ३ कोटी २४ लाख रुपयांच्या वसुलीसाठी २९ कर्जदारांची मालमत्ता जप्त केली आहे. त्यापैकी १४ कर्जदारांच्या ९३ लाखांच्या मालमत्तेचा लवकर लिलाव करून रक्कम वसुली केली जाईल. यामध्ये बँकेचे माजी अध्यक्ष गजानन कोळेकर, सुशिला गजाजन कोळेकर, सचिन गजानन कोळेकर आदींच्या मालमत्तेचा लिलाव करुन कर्जाची वसूली डिसेंबर २०१८पर्यंत केली जाईल असे अवसायक सहाय्यक निबंधक सुनिल माळी यांनी न्यायालयात सादर केलेल्या प्रतिज्ञापत्रात म्हटले आहे. त्यामुळे शहापूर नागरी पतसंस्थेची सुमारे २० लाख रुपयांची ठेव परत मिळण्याचा मार्ग मोकळा झाला आहे.

त्रिस्तरीय समिती

राज्यातील अवसायनातील सहकारी संस्थांवर अवसायन प्रक्रिया वेळेत पार पाडण्याकरिता तीन स्तरावर म्हणजे राज्य, विभागीय तसेच जिल्हास्तरावर वरिष्ठ अधिकाऱ्यांची देखरेख समिती नेमली जाईल. ही समिती अवसायनाचा कालबद्ध कार्यक्रम ठरविणे, लेखापरीक्षण, वसुलीची प्रक्रिया जलद करणे, जप्त मिळकतींचा लिलाव, सहकार अधिनियम कलम ८८प्रमाणे संचालकांची चौकशी, ठेवीदारांच्या ठेवी परत करणे, वेगवेगळ्या स्तरावर कायदेशीर मामले दाखल करण्यासंदर्भात अवसायकाला मार्गदर्शन, अवसायन प्रक्रियेवर देखरेख ठेवून मार्गदर्शन करणार असल्याचे सहकार आयुक्त डॉ. विजय झाडे यांनी प्रतिज्ञापत्रात नमुद केले आहे.

सातजणांवर गुन्हे दाखल

म. टा. प्रतिनिधी, कोल्हापूर

कनाननगर येथील विश्वशांती चौकात पूर्ववैमनस्यातून सात ते आठजणांनी एका घरावर हल्ला करून प्रापंचिक साहित्याची मोडतोड करीत दाम्पत्यास मारहाण केली. रविवारी (ता. २९) रात्री हा प्रकार घडला. या घटनेत फिरोज रमजान सय्यद (वय २७, रा. कनाननगर) आणि त्यांची पत्नी जखमी झाली. सय्यद यांच्या फिर्यादीनुसार शाहूपुरी पोलिसांनी सात ते आठ संशयितांवर मारहाणीचा गुन्हा दाखल केला आहे.

शाहूपुरी पोलिसांनी दिलेल्या माहितीनुसार, कनाननगर येथील फिरोज सय्यद यांचा परिसरातील काही तरुणांशी किरकोळ कारणावरून वाद झाला होता. रविवारी रात्री सात ते आठ तरुणांनी विश्वशांती चौकातील सय्यद यांच्या घरावर हल्ला केला. त्यांच्या घरातील प्रापंचिक साहित्याची तोडफोड करून काठी आणि लाथाबुक्क्यांनी बेदम मारहाण केली. या घटनेत प्रापंचिक साहित्याचे सुमारे २५ हजार रुपयांचे नुकसान झाले. सय्यद यांनी रविवारी रात्री उशीरा शाहूपुरी पोलिस ठाण्यात फिर्याद दिली. यानुसार पोलिसांनी विजय शिवाजी चव्हाण, सुरेश शिवाजी चव्हाण, काळ्या चव्हाण, आकाश चव्हाण, अजय चव्हाण, ईश्वर चव्हाण, उमेश चव्हाण (सर्व रा. विश्वशांती चौक, कनाननगर) यांच्यावर मारहाणीचा गुन्हा दाखल केला. या घटनेने परिसरात दहशतीचे वातावरण निर्माण झाले होते.

म. टा. प्रतिनिधी, कोल्हापूर

पंधरवड्यात झालेल्या मुसळधार पावसांमुळे सर्वत्र जनजीवन विस्कळीत झाले होते. या पावसाचा फटका महावीर उद्यानालाही बसला आहे. उद्यानाच्या अनेक भागातून पावसाच्या पाण्याचा निचरा होत नसल्याने अनेक ठिकाणी पाणी साचून तळ्याचे स्वरुप आले आहे. पाण्याचा निचऱ्याअभावी उद्यानातील बाकडी पाण्या आहेत. लहान मुलांच्या खेळण्याच्या परिसरात प्रचंड दलदल निर्माण झाली आहे. उद्यानात पाणी अन् दलदलीचे साम्राज्य निर्माण झाल्याने डासांची पैदास मोठ्या प्रमाणात होत आहे. त्यामुळे परिसरात साथ पसरण्याचा धोका आहे.

सकाळी व सायंकाळी फिरायला येणाऱ्या नागरिकांसह लहान मुलांसाठी प्रशस्त उद्यान अशी महावीर उद्यानाची ओळख. उद्यानात नव्याने केलेली ओपन जीम, लहान मुलांचे सुसज्ज साहित्य यामुळे येथे नेहमी गर्दी असते. शनिवार, रविवार सुटीच्या दिवशी तर गर्दी वाढते. पण पावसांमुळे उद्यानाच्या अनेक भागांत पाणी साचून राहिले आहे. अनेक दिवसांपासून पाण्याचा निचरा न झाल्याने सर्वत्र दलदल निर्माण झाली आहे.

उद्यानाच्या मध्यभागी असलेल्या भागात साचलेल्या पाण्यामुळे येथील बसण्यासाठी ठेवलेली बाकडी पाण्यात आहेत. तर लहान मुलांच्या खेळण्याच्या साहित्याच्या अवतीभोवती निर्माण झालेल्या दलदलीमुळे खेळणे मुश्कील बनले आहे. ओपन जीमच्या परिसरातही अशीच स्थिती निर्माण झाल्याने नेहमी फिरण्यासाठी येणाऱ्या नागरिकांनी ओपन जीमच्या साहित्याचा वापरच करता येत नाही. उद्यानामध्ये मॉर्निंग ट्रॅक तयार करण्यात आला आहे. ट्रॅकवरही ठिकठिकाणी पाणी साचल्याने ट्रॅकवरुन चालणेही मुश्कील झाले आहे.

उद्यान परिसरात रहिवासासह येथील सरकारी कार्यालयांमुळे येथे नेहमीच नागरिकांची वर्दळ असते. हे नागरिक येथील खाद्यपदार्थांच्या स्टॉलवर गर्दी करत असतात. उद्यानामध्ये साचलेले पाणी आणि झालेल्या दलदलींमुळे डासांची पैदास मोठ्या प्रमाणात होत आहे. याचा त्रास येथील नागरिकांना होत आहे.

महावीर उद्यानाच्या परिसरात मोठा रहिवास क्षेत्र असून येथे खाद्य पदार्थांचे स्टॉल आहेत. साचलेल्या पाण्यात डासांच्या अळ्यांची पैदास होऊन साथीचा फैलाव होण्याची शक्यता आहे. सध्या शहरात डेंगीचे अनेक रुग्ण आढळत असताना महावीर उद्यानात पाणी साचल्यामुळे आणखी धोका वाढला आहे. त्यामुळे या परिसरात सकाळी फिरायला येणाऱ्या नागरिकांना न जाणेच पसंत केले आहे.

हुपरीत पाच मिनिटांत सभा गुंडाळली

नगरपालिकेच्या सभेकडे १३ नगरसेवकांनी फिरवली पाठ

म. टा. वृतसेवा, हातकणंगले

हुपरी (ता. हातकणंगले) येथे सोमवारी झालेल्या नगरपरिषदेच्या सर्वसाधारण सभेस नगराध्यक्षांसह अवघ्या आठ नगरसेवकांच्या उपस्थित सहा विषयांवर चर्चा होऊन पाच विषयांना मंजूरी देत सभा आटोपती घेण्यात आली. कुमार विद्यामंदिराच्या सभागृहात झालेल्या सभेच्या अध्यक्षस्थानी नगराध्यक्षा जयश्री गाट होत्या. उपनगराध्यक्ष जयकुमार माळगे, प्रभारी मुख्याधिकारी अतुल पाटील आदी उपस्थिती होते.

कारभाऱ्यांचा मनमानीपणा, नगरसेविकेच्या पतींचा वाढता हस्तक्षेप, नेत्यांचे दुर्लक्ष यामुळे वैतागलेले नगरसेवक गैरहजर राहिल्याची चर्चा आहे. मानापमानामुळे नगरसेवकांनी सभेकडे पाठ फिरवली. सत्ताधारी भाजपाचे पक्षप्रतोद भरतराव लठ्ठे, ताराराणी आघाडीचे सूरज बेडगे, शिवसेना पक्षप्रतोद बाळासाहेब मुधाळे, मनसेचे दौलतराव पाटील, नगरसेविका ऋतुजा गोंधळी, पाणीपुरवठा सभापती माया रावण आदींसह १३ नगरसेवक सभेकडे फिरकले नाहीत. मानापमानामुळे नगरपरिषदेत नवी राजकीय समिकरणे उदयास येण्याची चिन्हे आहेत.

सभेसमोर सहा विषय होते. त्यातील पाच विषयांना मंजूरी देण्यात आली. सभा अवघ्या काही मिनिटांत आटोपती घेण्यात आली. हुपरी नगरपरिषद स्थापन होऊन वर्ष उलटले तरी अद्याप म्हणावा तसा विकासकामांचा धडाका सुरू नाही. काही विकासकामांना सुरुवात झाली. परंतू आता नगरपरिषदेत मानापमानाच्या राजकारणाचा शिरकाव झाला आहे. काही पदाधिकाऱ्यांचा मनमानी कारभार, पदाधिकाऱ्यांपेक्षा नगरसेविकांच्या पतींचा वाढता हस्तक्षेप अनेकांना खटकू लागला आहे. त्यामुळे अनेक नगरसेवक नाराज असल्याचे समजते.

सभेत छत्रपती राणी इंदूमती बेघर संघटनेच्या गट नंबर ९२५/८ येथील जागेचा महत्वपूर्ण प्रश्न प्रलंबित ठेवण्यात आला. छत्रपती शिवाजी महाराजांचा पूर्णाकृती पुतळा उभारणे, नगरपरिषदेचे बोधचिन्ह तयार करणे, शहरात आवश्यक ठिकाणी हायमास्ट दिवे लावणे आदींसह सन २०१७-२०१८ सालच्या जमा-खर्चास सर्वानुमते मंजूरी देण्यात आली. सभेला शिवसेनेच्या पूनम पाटील, बांधकाम सभापती सुप्रिया पालकर, महिला बालकल्याण सभापती अनिता मधाळे, लक्ष्मी साळोखे, सुदर्शन खाडे, रफिक मुल्ला आदी उपस्थित होते.

पती नगरसेवकांमुळ‌े वाद

हुपरी नगरपरिषदेत सर्वसमावशेक राजकारण करून शहराचा विकास करण्यासाठी बिनशर्त एकत्र आलेल्या हुपरी शहरातील सर्वच राजकीय पक्षांना सध्या विश्वासात घेतले जात नाही. कारभाऱ्यांची मनमानी सुरू आहे, तसेच नगरसेविका किंवा पदाधिकाऱ्यांच्या पतींचा नगरपरिषदेतील कामकाजात वाढलेला हस्तक्षेप यामुळे अनेकजण दुखावले आहेत. त्यामुळे सभेला सर्वच राजकीय पक्षांच्या निम्याहून अधिक नगरसेवकांनी दांडी मारल्याची चर्चा रंगली आहे.

मारामारीप्रकरणी तिघांवर गुन्हा

म. टा. वृत्तसेवा, गारगोटी

सालपेवाडी (ता. भुदरगड) येथे किरकोळ कारणावरून झालेल्या मारामारीप्रकरणी तीन जणांवर भुदरगड पोलिसांत गुन्हा नोंदविण्यात आला आहे. शेतातील लाकडे विक्रीच्या पैशाच्या कारणावरून चुलते-पुतण्यात शनिवारी झालेल्या मारामारीत महिलेसह पाच जण गंभीर जखमी झाले. शेतातील एका झाडाच्या मालकीवरून चुलते मारूती मोरबाळे व पुतणे संतोष मोरबाळे यांच्यात गेल्या काही दिवसापासून वाद सुरू होता. यामध्ये मारूती मोरबाळे, मंगल मोरबाळे, शहाजी मोरबाळे, संतोष मोरबाळे, प्रविण मोरबाळे हे गंभीर जखमी झाले होते. त्यांच्यावर कोल्हापूर येथे उपचार सुरू होते. याप्रकरणी संतोष मोरबाळे यांनी पोलिसात दिलेल्या फिर्यादनुसार मारूती मोरबाळे, शहाजी मोरबाळे, मंगल मोरबाळे यांच्यावर गुन्हा नोंद झाला आहे. पोलिस निरीक्षक उदय डुबल तपास करीत आहेत.

'मॅक' उद्योजकांची बैठक तोडग्याविना

वरिष्ठांकडे प्रस्ताव पाठविल्याची एमआयडीसीची माहिती

म. टा. वृत्तसेवा, कागल

कागल-हातकणंगले पंचतारांकित औद्योगिक वसाहतीत येथील रामप्रताप झंवर सभागृहात मॅन्युफॅक्चरींग असोसिएशन (मॅक) व औद्योगिक विकास महामंडळाचे अधिकारी यांची औद्योगिक वसाहतीमधील प्रलंबित समस्यांबाबत बैठक झाली. मात्र प्रस्ताव वरीष्ठ कार्यालयांना सादर केले आहेत, लवकरच त्यावर तोडगा निघेल अशी गुळमुळीत उत्तरे एमआयडीसीच्या अधिकाऱ्यांनी दिल्याने ठोस निर्णय न होता बैठक गुंडाळली गेली.

पुणे-बेंगळुरू राष्ट्रीय महामार्गावर पूर्वेला असणाऱ्या जवाहर साखर कारखान्यापर्यंतचा मुख्य रस्ता पूर्णत: खराब झाला आहे. त्याचे त्वरीत खडीकरण व डांबरीकरण करण्यात यावे, ठिकठिकाणी गतिरोधक बसवण्यात यावेत, या वसाहतीमधील अतंर्गत रस्ते दुरुस्ती करण्यात यावी, ए ब्लॉकला अपुरा पाणीपुरवठा होतो. अंतर्गत रस्ते डांबरीकरण व्हावेत, सर्वच रस्त्यांलगत आडवी येणारी झाडेझुडपे काढावीत, फ्रॉस्टी चौक, रेमंड चौकासह इतर मुख्य चौकांमध्ये हायमास्ट लॅम्प बसवण्यात यावेत यांसह इतर मागण्यांसाठी ही बैठक दुसऱ्यांदा आयोजित करण्यात आली होती.

बैठकीत औद्योगिक वसाहतीचे कार्यकारी अभियंता सुनील अपराज यांनी सांगीतले की, 'लक्ष्मी टेकडी ते जवाहर कारखान्यापर्यंतचा मुख्य रस्ता खडीकरण व डांबरीकरणासाठी सुधारित प्रस्ताव वरीष्ठ कार्यालयास पाठवण्यात आला आहे. त्याच्या मंजुरीसाठी उशीर लागेल. तोपर्यंत तात्पुरते खड्डे भरण्याचे काम हाती घेण्यात आले आहे. स्ट्रीट लाइटसाठी इलेक्ट्रिक सर्व्हे करण्याचा प्रस्ताव तयार करण्यात आला आहे. चौकांमध्ये हायमास्ट लावण्यासाठीचा प्रस्ताव पाठवण्यात आला आहे. इतर कामे सुरु करण्यात आली आहेत.'

बैठकीस औद्योगिक महामंडळाचे कार्यकारी अधिकारी दिलीप काकडे, उप अभियंता सुभाष मोरे, नवले, एस. व्ही. अपराज यांच्यासह मॅकचे सर्व पदाधिकारी व उद्योजक उपस्थित होते. 'मॅक'चे अध्यक्ष हरीश्चंद्र धोत्रे यांनी स्वागत केले. शंतनु गायकवाड यांनी सूत्रसंचलन केले. उपाध्यक्ष गोरख माळी यांनी आभार मानले.

उद्योजकांचा संताप

'औद्योगिक वसाहतीमध्ये अनेक ठिकाणी रस्त्यावरील दिवे बंद पडले आहेत, हे एमआयडीचीसे अधिकारी मान्य करीत नाहीत. त्यामुळे संध्याकाळी सर्व्हे करावा असा प्रस्ताव ठेवण्यात आला. अधिकाऱ्यांनी त्यांनी तो मान्य केला. लवकरच सांयकाळी भेट देऊन पाहणी करु असे सांगितले. गेल्या पंधरा वर्षांपासून अनेक महत्वाच्या समस्या मोठ्या प्रमाणात प्रलंबित आहेत. मात्र त्याकडे दुर्लक्ष होत आहे. या विभागाचे मंत्री, पालकमंत्री येतात. बैठका घेतात. विविध उद्योगांची उद्घाटने करतात आणि निघून जातात. याव्यतिरिक्त येथील समस्यांकेड दुर्लक्ष केले जाते' असा संताप अनेक उद्योजकांनी पत्रकारांशी बोलताना व्यक्त केला.

वीज दरवाढीविरोधात

७ ऑगस्ट रोजी मोर्चा

इचलकरंजीत समन्वय समितीचा निर्णय

म. टा. वृत्त्तसेवा, इचलकरंजी

महावितरण कंपनीने दाखल केलेल्या सरासरी २२ टक्के वीज दरवाढीच्या प्रस्तावाविरोधामध्ये इचलकरंजी शहर व परिसरातील सर्व यंत्रमागधारक, शेतकरी, औद्योगिक वीज ग्राहक संघटनांच्यावतीने मंगळवारी (ता. ७ ऑगस्ट) सकाळी राजर्षी छत्रपती शाहू महाराज पुतळा येथून मोर्चा काढण्यात येणार आहे. मोर्चाच्यावतीने महावितरण कंपनीच्या मुख्य कार्यालयासमोर वीज दरवाढ प्रस्तावाची होळी करण्यात येणार आहे.

महावितरणच्या वीज दरवाढ प्रस्तावाचा परिणाम सर्वच वर्गवारीतील वीज ग्राहकांवर होणार आहे. सरासरी वाढ १.४५ रुपये प्रति युनिट आहे. या वाढीचा सर्वाधिक फटका उद्योगांना बसणार असून त्यांचे दर प्रतियुनिट १० ते ११ रुपये होणार आहेत. यंत्रमागधारकांच्या सवलतीच्या वीजदरामध्येही वाट होईल. २७ अश्वशक्तीच्या आतील यंत्रमागधारकांच्या वीजबिलात किमान १० टक्के तर त्यावरील यंत्रमागधारकांच्या वीजबिलात किमान २५ टक्के होणारी वाढ उद्योगाला सद्यस्थितीत झेपणारी नाही. शेतीपंपाचे वीजदर मे २०१५ पर्यंतच्या सवलतीच्या दरांच्या तुलनेने २.७ पट ते ५ पट होणार आहेत. घरगुती ग्राहकांच्या वीजबिलातील वाढ किमान १७ टक्के वाढ होणार आहे महानिर्मिती व महावितरणची अकार्यक्षमता, वितरण गळती या दोन प्रमुख कारणांमुळे आज राज्यातील वीजदर शेजारील सर्व राज्यांपेक्षा २५ ते ३५ टक्के जास्त आहेत. या प्रस्तावामुळे ते दर किमान दिडपट होणार आहेत. त्याचा परिणाम राज्याच्या सामाजिक व आर्थिक विकासावर होणार आहे. त्यामुळे दरवाढ रद्द करावी. राज्य सरकारने पुढाकार घेवून हा प्रस्ताव मागे घेण्यासाठी महावितरण कंपनीस आदेश द्यावेत, अशी मागणी इचलकरंजी समन्वय समितीच्यावतीने राज्य शासनाकडे करण्यात येणार आहे.

आमदार मिणचेकर यांच्या कार्यालयावर मोर्चा

मराठा आरक्षणासाठी मुंडण आंदोलनाने कार्यकर्त्यांनी केला निषेध

म. टा. वृतसेवा, हातकणंगले

हातकणंगले येथे मराठा समाजाच्या आरक्षणाच्या मागणीसाठी सकल मराठा समाजाच्यावतीने सरकारचा निषेध करून आमदार डॉ. सुजित मिणचेकर यांच्या कार्यालयावर मोर्चा काढून मुंडण आंदोलन करण्यात आले. संतप्त कार्यकर्त्यांनी मोठ्या प्रमाणात घोषणाबाजी केली. लोकप्रतिनिधींना आरक्षण देता येत नसेल तर तत्काळ राजीनाम्याची मागणी करून शंखध्वनीने परिसर दुमदुमून सोडला. यावेळी तणावाचे वातावरण निर्माण झाले होते.

दरम्यान, रविवारी मराठा समाजाच्या आंदोलकांना भेटण्यासाठी आलेल्या खासदार राजू शेट्टी यांना संतप्त कार्यकर्त्यांनी अक्षरशः हाकलून लावल्याने आजच्या आमदार मिणचेकरांच्या कार्यालयासमोर होणाऱ्या आंदोलनासाठी मोठा पोलिस बंदोबस्त तैनात करण्यात आला होता. गेल्या सहा दिवसांपासून हातकणंगले तहसीलदार कार्यालयासमोर सकल मराठा समाजाच्यावतीने ठिय्या आंदोलनास सुरू आहे. आज सकाळी अकरा वाजण्याच्या सुमारास ठिय्या आंदोलनस्थळावरून जय भवानी-जय शिवाजी, आरक्षण आमच्या हक्काचे... नाही कुणाच्या बापाचे, चले जाव.. चले जाव अशा घोषणा देत शेकडो मराठा समाजबांधव आमदार डॉ. मिणचेकरांच्या संपर्क कार्यालयासमोर आले. त्यानंतर सरकारच्या नावाने शंखध्वनी करून निषेधाच्या घोषणा देण्यात आल्या. यावेळी अनेक कार्यकर्त्यांनी मुंडण करून लोकप्रतिनिधी व सरकारचा निषेध व्यक्त केला. या आंदोलनात तालुक्यातील समाज बांधवांनी मोठ्या प्रमाणात सहभाग नोंदवला होता. आंदोलनामुळे सांगली-कोल्हापूर महामार्गावरील मुख्य रस्त्यावर मोठी गर्दी झाल्याने वाहतूक विस्कळीत झाली. पोलिसांनी नियोजनबद्ध यंत्रणा लावत वाहतूक सुरळीत केली. आंदोलनावेळी जयसिंगपूर विभागाचे उपविभागीय पोलिस अधिकारी कृष्णात पिंगळे व हातकणंगले पोलिस निरीक्षक एस. एल. डूबल यांनी बंदोबस्त ठेवला होता.

जिल्हा बँकेचे अध्यक्ष मुश्रीफ यांची माहिती

म. टा. प्रतिनिधी, कोल्हापूर

चंदगड तालुक्यातील दौलत सहकारी साखर कारखाना न्यूट्रिएन्टस् अॅग्रो फ्रूटस कंपनीला ४५ वर्षे भाडेतत्वावर चालवण्यास देण्याचा करार जिल्हा मध्यवर्ती सहकारी बँकेने सोमवारी संचालक मंडळाच्या बैठकीत रद्द केला आहे. 'बँकेची आर्थिक देणी देण्यास न्यूट्रिएन्टस् अॅग्रो फ्रूटस कंपनी असमर्थ ठरल्याने हा निर्णय घेण्यात आला आहे', अशी माहिती बँकेचे अध्यक्ष आमदार हसन मुश्रीफ यांनी पत्रकार परिषदेत दिली. करार रद्द झाल्याने जिल्हा बँक कारखान्याचा ताबा घेणार असून नवीन कंपनीला कारखाना चालवण्यास देण्याची प्रक्रिया ३१ ऑगस्टपर्यंत पूर्ण करण्याचा प्रयत्न बँकेकडून केला जाणार असल्याचे मुश्रीफ यांनी सांगितले.

बँकेने दौलत कारखाना ४५ वर्षे मुदतीने न्यूट्रिएन्टस् अॅग्रो फ्रुटस कंपनीला एक जून २०१६ कराराने ताब्यात दिला होता. कराराप्रमाणे कंपनीने बँकेकडे १६ कोटी ७८ लाख रुपये २५ टक्के रक्कम भरली होती. उर्वरीत ४३ कोटी रुपयांचे समान पाच हप्त्याने पाच वर्षे देणे बंधनकारक होते. प्रत्येकी वर्षी आठ कोटी रुपयांचा हप्ता दरवर्षी द्यावयाचा देण्याचा करार होता. कंपनीने एक हंगाम कारखाना चालवला. त्यासाठी बँकेने साखरेवर तारण कर्ज , हंगामपूर्व कर्ज दिले होते. परंतु कंपनीने कारखाना चालवून शेतकऱ्यांची एफआरपीची सहा कोटींपेक्षा जास्त रक्कम दिली नाही. तसेच कामगारांचे पगार, तोडणी वाहतुकीची बिलेही दिली नाहीत. एफआरपीचा दर न दिल्याने शेतकऱ्यांनी कंपनीला साखर विकू दिली नाही. शेतकरी, कामगार, तोडणी कामगारांनी देणी देण्याबाबत बँक व कंपनीबरोबर चर्चा केली. शेतकऱ्यांनी आंदोलन केली. दरम्यान, ३१ मार्च २०१८ रोजी मुदतीप्रमाणे कंपनीकडून बँकेला आठ कोटी रुपयांचा पहिला हप्ता आला नाही. साखर विक्री करण्यात अडचणी आल्याने साखरेवर घेतलेले तारण कर्ज एनपीएत गेले. साखरेवरील एफआरपीही दिली नाही. बँकेने कंपनीबरोबर कराराप्रमाणे आठ कोटी ६१ लाख रुपयांचा हप्ता भरु न शकल्याने बँकेने कंपनीला नोटीस पाठवली. तसेच तीन महिन्याच्या ग्रेस पिरियडमध्येही कराराचा हप्ता व अन्य देणी न दिल्याने बँकेच्या संचालक मंडळाच्या बैठकीत करार संपुष्टात आणण्याचा निर्णय घेण्यात आला.

.............

चौकट

३१ ऑगस्टपर्यंत प्रक्रिया पूर्ण

मुश्रीफ म्हणाले,' करार संपुष्टात आल्याने कारखाना ताब्यात घेण्याबाबत नोटीस पाठवली असून १५ दिवसानंतर कारखाना ताब्यात घेतला जाईल. त्यानंतर दुसऱ्या दिवशी कारखाना चालवण्यासाठी जाहिरात देण्यात येणार आहे. न्यूट्रीएन्टस् अॅग्रो फ्रुटसबरोबर झालेल्या करारात ज्या त्रुटी राहिल्या होत्या त्याबाबत काळजी घेतली जाणार आहे. नवीन होणाऱ्या करारात न्यूट्रिएन्टस् कंपनीची राहिलेली एफआरपी रक्कम, कामगार देणी, सरकारी देणी, बँकेने दिलेले ३४ कोटी रुपयांचे कर्ज, व्याज, साखर तारणावर दिलेले कर्ज, कर्ज हंगामी कर्ज यांचा समावेश केला जाणार आहे. ३१ ऑगस्टपर्यंत कारखाना चालवण्यास देण्याची प्रक्रिया पूर्ण केली जाईल.'

छेड काढणाऱ्या तरुणास

तरुणीने दिला चोप

म.टा.वृत्तसेवा,कागल

पाठलाग करून छेडछाड करणाऱ्या तरुणास संबंधीत तरुणीनेच प्रसाद दिल्याची घटना कागल बसस्थानकावर सोमवारी घडली. सकाळी ११ वाजण्याच्या सुमारास झालेल्या या प्रकारानंतर गर्दीमुळे सुमारे पाऊण तास वाहतूक ठप्प झाली. पोलिस घटनास्थळी आल्यानंतर सर्वांनीच तेथून पलायन केले. याची नोंद झालेली नाही.

घटनास्थळी मिळालेल्या माहितीवरून, सोमवारी सकाळी ११ वाजण्याच्या सुमारास महाविद्यालय सुटल्यानंतर काही अज्ञात रोडरोमीओंनी मुलींचा पाठलाग केला. बसस्थानकावर आल्यावर त्यांनी एका मुलीची छेड काढली. मात्र त्या तरूणीने खंबीर भूमिका घेत त्याला चांगलाच चोप दिला. काही वेळात त्या ठि मुलीचा भाऊही तेथे आला. त्याने छेड काढणाऱ्या तरूणास मारण्यास सुरवात केली. मात्र छेडछाड काढणाऱ्या टोळक्यातील त्या तरुणाच्या काही मित्रांनी तरूणीच्या भावास मारहाण केली. दरम्यान पोलिस घटनास्थळी आले. मात्र , मारहाण करणारे पळून गेले. या घटनेने बसस्थानक परिसरात वाहतूक ठप्प झाली. यासंदर्भात कागल पोलिसांशी संपर्क केला असता, पोलिस उपनिरीक्षक निखिल कर्चे म्हणाले,'आमच्याकडे कोणीही तक्रार दिलेली नाही. मात्र या घटनेतील तरुणांचा शोध सुरू आहे. यापुढे महाविद्यालयीन मार्गावर पोलिसांची नजर असेल.'

पोलिसांचे दुर्लक्ष

कागल शहरातील शाळा, कॉलेजसाठी रोज सकाळी बसस्थानकापासून कॉलेजपर्यंत विद्यार्थ्यांची गर्दी मोठ्या प्रमाणात असते. यावेळी दंगेखोर तरुणांची गर्दी असते. मुलींच्या पाठीमागून पिंगा घालत फिरणे, त्यांची टिंगळटवाळी करणे, गर्दीत धक्का मारणे असे सर्रास प्रकार घडतात. त्यातून वादही झाले आहेत. येथे साध्या वेषातील पोलिस उपस्थित रहावेत या पालकांच्या मागणीकडे दुर्लक्ष झाले आहे.