म. टा. वृत्तसेवा, सोलापूर

निर्मलकुमार फडकुले प्रतिष्ठान, सोलापूरच्या वतीने देण्यात येणाऱ्या साहित्यसेवा व समाजसेवा पुरस्काराची घोषणा बुधवारी करण्यात आली. साताऱ्याचे डॉ. दत्तप्रसाद दाभोळकर तसेच अहमदनगरचे डॉ. राजेंद्र धामणे कुटुंबीय हे या पुरस्काराचे मानकरी ठरले आहेत. शनिवार (२८ जुलै) रोजी सायंकाळी सोलापुरातील फडकुले सभागृह येथे माजी केंद्रीय मंत्री सुशीलकुमार शिंदे यांच्या हस्ते या पुरस्काराचे वितरण होणार आहे, अशी माहिती डॉ. निर्मलकुमार फडकुले प्रतिष्ठानचे सचिव बिपीनभाई पटेल यांनी पत्रकार परिषदेत दिली. या वेळी प्रतिष्ठानचे सदस्य दत्ता गायकवाड, बाबुराव मैंदर्गीकर, रवीकिरण पोरे, मीर इसाक शेख आदी उपस्थित होते.

यंदा पुरस्काराचे १२ वे वर्ष असून, प्रत्येकी २५ हजार रुपये रोख, सन्मानचिन्ह असे या पुरस्काराचे स्वरूप आहे. डॉ. दत्तप्रसाद दाभोळकर यांचे संशोधन व साहित्य क्षेत्रात उल्लेखनीय काम केले आहे. तर, अहमदनगरमधील डॉ. सुचेता व डॉ. राजेंद्र धामणे हे नगर जिल्ह्यातील शिंगवे येथे डॉक्टरी पेशा सांभाळत अनेक सामाजिक उपक्रम राबविले आहेत. तसेच. साहित्य क्षेत्रातही त्यांची सेवा उल्लेखनीय आहे.

७८१ कोटी रुपये ठेवी, पाच टक्क्यांच्या खाली एनपीए

Satish.ghatage@timesgroup.com

Tweet:satishgMt

कोल्हापूर

राजर्षी शाहू महाराजांची प्रेरणा आणि नामदार भास्करराव जाधव यांच्या मार्गदर्शनखाली स्थापन झालेल्या शतकोत्तर अर्बन को ऑपरेटिव्ह बँकेने ७८१ कोटी रुपये ठेवींचा पल्ला गाठताना शेड्यूल्ड बँकेकडे झेप घेतली आहे . ७५० रुपये ठेवी, पाच टक्क्यांच्या खाली एनपीए कायम ठेवणे यासह रिझर्व्ह बँकेच्या अटींचे पालन केल्यानंतर एक एप्रिल २०१९ पासून अर्बन बँकेचे रुपांतर शेड्यूल्ड बँकेत होईल. त्यामुळे कोल्हापुरातील सहकारातील पहिली शेड्यूल्ड बँक होण्याचा बहुमान अर्बन बँकेला मिळणार आहे.

सहकाराचे जाळे ग्रामीण भागात पोहचलेल्या कोल्हापूर जिल्ह्यात अर्बन बँकेने ग्राहकांच्या मनात प्रथमपासून विश्वास निर्माण केला . मराठा, शाहू, बलभीम, कोल्हापूर जनता, रवि को ऑपरेटिव्ह बँका गैरकारभार व चुकीच्या नियोजनामुळे अन्य बँकात विलिन झाल्या असताना अर्बन बँकेने पारदर्शक कारभार करताना गरजू व प्रामाणिक लोकांना दिलेले कर्ज, कर्जदारांकडून प्रामाणिकपणे होत असलेली परतफेड यामुळे बँकेच्या ठेवी व कर्जफेडीमध्ये वाढ झाली आहे. शेड्यूल्ड बँकेसाठी सहा वर्षांपासून प्रयत्न सुरु आहेत. शेड्यूल दर्जासाठी ठेवींची मोठी अट असल्याने दरवर्षी रिझर्व्ह बँकेकडून ठेव रक्कमेत वाढ व्हायची आणि शेड्यूल्ड बँकेचा दर्जा मिळण्याची संधी हुकायची.

मार्च २०१८ पूर्वी ठेवींचा ७५० कोटी रुपयांचा पल्ला गाठल्यानंतर अर्बन बँकेने रिझर्व्ह बँकेकडे शेड्यूल्ड बँकेसाठी अर्ज केला आहे. ३१ मार्च २०१८ पर्यंत रिझर्व्ह बँक 'अर्बन' च्या व्यवहारांवर लक्ष ठेवणार आहे. त्यामध्ये बँकेला ७५० कोटी रुपये ठेवीची आकडेवारी कायम ठेवायची असून एनपीएचे प्रमाण पाच टक्क्यांच्या आत ठेवायचे आहे. शेड्यूल्ड बँकेची सेवा देण्यासाठी अर्बन बँकेने व्यवस्थापनात मोठे बदल केले आहेत. ५० लाख रुपयांपुढील कर्जाची क्रेडीट रिस्क अधिकाऱ्यांवर ठेवली आहे. बँकेचे सीइॅओ, चिफ ऑपरेटिंग ऑफीसर व लिगल ऑफिसर यांच्यात एकत्रित चर्चा विनिमय झाल्यावरच ५० लाख रुपयांवरील कर्ज देण्याचे बंधन घातले आहे.

बँकेला शेड्यूल्ड बँकेचा दर्जा मिळाल्यानंतर छोट्या व्यवसायकांच्या कर्जावर कोणताही परिणाम होणार नसल्याचे बँकेचे संचालक मंडळाने स्पष्ट केले. रिझर्व्ह बँकेने छोट्या व्यवसायाकांना १५ टक्के कर्ज देण्याची अट घातली असली तरी अर्बन बँकेत छोट्या व मध्यम कर्जदारांना ३३ टक्के कर्जाचे वाटप केले जात आहे. कुंभार, बागवान, गवळी, विक्रेते, व्यापारी व व्यावसायिकांना अंगावर एक लाख रुपये कर्ज दिले जाते. अशा कर्जाची परतफेडही केली जाते. एकीकडे पिग्मी एजंटांना अन्य बँका सुट्टी देत असताना पिग्मी एजंट हे बँकेच्या रक्तवाहिन्या आहेत, अशी संचालक मंडळाची धारणा आहे. सध्या बँकेकडे ४० हून अधिक पिग्मी एजंट आहेत. छोट्या व मध्यम कर्जाबरोबर ५० लाख रुपये ते ४० कोटी रुपयांचा कर्जपुरवठा बँकेकडून केला गेला आहे. वैद्यकीय, उद्योगधंदे, गृहबांधणीला कर्ज पुरवठा केला जात आहे.

शेड्यूल्ड बँकेचा दर्जा मिळाल्यानंतर रिझर्व्ह बँकेचे काटेकोर नियम पाळण्याचे बंधन जरी बँकेवर असले तरी बँकेला अनेक गोष्टींचा लाभ होणार आहे. सर्वात महत्वाचे म्हणजे कर्जांचे दर कमी होणार आहेत. गृहकर्ज स्वस्त होणार आहे. अन्य सहकारी बँकांच्या ठेवी स्वीकारण्याची परवानगी मिळणार आहे. तसेच सरकारी योजना राबवण्यासाठी लागणारी आवश्यक सेवा ग्राहकाला बँक उपलब्ध करुन देऊ शकते. बँक स्वत:ची विमा योजनाही सुरु करु शकते. या सर्वांचा लाभ थेट बँकेच्या सभासदांना व ग्राहकांना होणार असल्याने संचालक मंडळ व अधिकारी वर्गाने बँकेला शेड्यूल्ड बँकेचा दर्जा मिळावा यासाठी झोकून देवून काम सुरू केले आहे.

०००००

अर्बन बँकेची स्थापना १९१३

सभासद ३० हजार

शाखा १९

संचालक १४

ठेवी ७८१ कोटी

कर्जे ४६१ कोटी

००००

कोट

'अर्बन बँकेने शेड्यूल्ड बँकेसाठी अर्ज केला आहे. रिझर्व्ह बँकेच्या सर्व अटींची पूर्तता वर्षभर कायम ठेवण्यासाठी संचालक मंडळ व अधिकारी, कर्मचारी कार्यरत झाले आहेत. बँकेने व्यवस्थापन प्रणालीत कोटेकोरपणा आणत सीईओ ते शिपाई यांची जबाबदार निश्चित केली आहे.

उमेश निगडे, अध्यक्ष, अर्बन बँक

म. टा. प्रतिनिधी, कोल्हापूर

पंचगंगा बँकेच्या ४७ व्या वार्षिक सर्वसाधारण सभेत सभासदांना १० टक्के लाभांश देण्याची घोषणा अध्यक्ष राजाराम शिपुगडे यांनी केली. व्ही. टी. पाटील सभागृहात सभा झाली. यावेळी संचालक मंडळ व सभासद मोठ्या संख्येने उपस्थित होते.

बँकेच्या वर्षभरातील केलेल्या कामांचा आढावा अध्यक्ष शिपुगडे यांनी घेतला. ते म्हणाले, 'आर्थिक वर्षात दोन कोटी ३३ लाख रुपये करपूर्व नफा मिळवला आहे. बँकेने शून्य टक्के एनपीए राखला आहे. लेखापरिक्षणात अ वर्ग मिळाला आहे. सभासदांनी विश्वास ठेवल्याने बँकेत २३८ कोटी ४६ लाखाच्या ठेवी जमा झाल्या आहेत. १४७ कोटी २३ लाख रुपये कर्जाचे वितरण करण्यात आले आहे.'

बँकेने आधुनिकतेवर भर दिला असून मोबाईल बँकिंग, टीजीएस, एनइएफटी या सुविधांचा लाभ ग्राहकांना घरबसल्या व व्यवसायाच्या ठिकाणावरुन मिळत आहे, असेही शिपुगडे यांनी सांगितले. संजय वाघापूरकर, किरण कर्नाड, हेमंत आराध्ये, अंकुश वाघापूरकर, माणिकांचन झुरळे, संतोष घोडगिरीकर यांनी विचारलेल्या प्रश्नांना शिपुगडे यांनी उत्तरे दिली. महाव्यवस्थापक सुशील कुलकर्णी यांनी इतिवृत्त वाचन केले. मुख्य कार्यकारी अधिकारी दीपक फडणीस यांनी अहवाल वाचन केले. उपाध्यक्षा माधुरी कुलकर्णी यांनी आभार मानले. संचालक पी. एस. कुलकर्णी, विकास परांजपे, भालचंद्र साळोखे, दिगंबर जोशी, चंद्रशेखर जोशी, चंद्रशेखर धर्माधिकारी, उपेंद्र सांगवडेकर, संदीप पाटील, राहुल भोसले, नंदकुमार दिवटे, विजय चव्हाण, विवेक शुक्ल, वृषाली बंकापुरे आदी उपस्थित होते.

खासदार शरद पवार यांची उपस्थिती

म. टा. प्रतिनिधी, कोल्हापूर

येथील लोकराजा फोरम मल्टीपर्पज सोसायटीच्यावतीने छत्रपती शाहू महाराज यांच्या जीवनावरील 'राजर्षी' या चित्रमय पुस्तकाचा प्रकाशन सोहळा ज्येष्ठ नेते खासदार शरद पवार यांच्या हस्ते व शाहू छत्रपती यांच्या अध्यक्षतेखाली होणार आहे. प्रकाशन सोहळा शनिवारी (ता.२८) सकाळी अकरा वाजता संगीतसूर्य केशवराव भोसले नाट्यगृहात होणार असून महापौर शोभाताई बोंद्रे, आमदार हेमंत टकले प्रमुख उपस्थित राहणार असल्याची माहिती लोकराजा फोरमचे व्ही.बी. पाटील यांनी पत्रकार बैठकीत दिली.

पाटील म्हणाले, 'छत्रपती शाहू महाराजांचे कार्य नवीन पिढीस कळावे हा पुस्तक प्रकाशनामागील प्रमुख हेतू आहे. १२० पानांच्या या पुस्तकातून शाहू महाराजांच्या जीवनातील दुर्मिळ क्षणांचे चित्रमय दर्शन होईल. शाहू महाराजांवरील विविध दहा ग्रंथांचा अभ्यास करून या पुस्तकाची मांडणी करण्यात आली आहे. पुस्तकात विविध चौकटीच्या माध्यमातून महत्वाचे प्रसंग मांडण्यात आले आहेत. पुस्तक लहान मुलांना हाताळण्यायोग्य बनवले आहे. यातील समाविष्ट प्रत्येक चित्राला ऐतिहासिक संदर्भ आहे. तसेच या कार्यक्रमात सामाजिक कार्यात अग्रेसर असलेल्या तीन संस्था व व्यक्तींना सन्मानित करण्यात येणार आहे. यात भाई माधवराव बागल विद्यापीठ, आंतरजातीय विवाह संस्था, राजर्षी शाहू संशोधन केंद्र व हनुमान नाट्य मंदिरचे सुनील माने तसेच शाहू महाराजांवर कमी वयात पुस्तक लिहलेली विद्यार्थिनी गायत्री शिंदेला गौरवण्यात येणार आहे. उमेश सूर्यवंशी यांचे लेखन, विजय चोकाकर यांची चित्रे तसेच विकास पाटील यांचे मुखपृष्ठ व सत्यजित निगवेकर यांचा पुस्तकनिर्मितीत मोठा वाटा आहे.' यावेळी दीपक दळवी, नितीन देसाई, उमेश सूर्यवंशी, संदीप बोरगावकर, सोमनाथ माने आदी उपस्थित होते.

(फोटो आहे)

अंतर्गत रस्ते तयार करा

मॅकचे एमआयडीसी अधिकाऱ्यांना साकडे

म. टा. प्रतिनिधी, कोल्हापूर

कागल पंचतारांकित औद्योगिक वसाहतीत अंतर्गत रस्त्यांची दुरवस्था झाल्याने अपघातांचा धोका वाढला आहे. लक्ष्मी टेकडी ते हुपरी हा मुख्य रस्ता तातडीने दुरुस्ती करणे गरजेचे आहे. याशिवाय स्ट्रीट लाईट बसवण्याची मागणी मॅन्युफॅक्चरर्स असोसिएशन ऑफ कागल, हातकणंगले (मॅक) या संस्थेने महाराष्ट्र औद्योगिक विकास महामंडळाचे कार्यकारी अभियंता दिलीप काकडे यांच्याकडे केली. मॅकच्या कार्यालयात बुधवारी पदाधिकारी आणि कार्यकारी अभियंत्यांची बैठक पार पडली.

महाराष्ट्र औद्योगिक विकास महामंडळाच्या कोल्हापूर विभागीय कार्यकारी अभियंतापदी दिलीप काकडे यांची निवड झाली आहे. महिन्यापूर्वीच त्यांनी पदभार स्वीकारला. पंचतारांकित औद्योगिक वसाहतीमधील समस्यांची माहिती देण्यासाठी मॅकने बुधवारी कार्यकारी अभियंता काकडे यांच्यासोबत बैठकीचे आयोजन केले होते. औद्योगिक वसाहतीतील रामप्रताप झंवर सभागृहात पार पडलेल्या बैठकीत मॅकचे अध्यक्ष हरिश्चंद्र धोत्रे यांनी समस्यांची मांडणी केली. ते म्हणाले, 'पंचतारांकित औद्योगिक वसाहत विस्तारत आहे. हजारो तरुणांना रोजगार उपलब्ध करून देणाऱ्या या औद्योगिक वसाहतीत मूलभूत सुविधांची गरज आहे. लक्ष्मी टेकडी ते हुपरी या मुख्य रस्त्यावर खड्डे वाढले आहेत. याशिवाय अंतर्गत रस्त्यांचीही दुरवस्था आहे, त्यामुळे तातडीने रस्ते तयार करण्याची गरज आहे. 'ए' ब्लॉकमधून होणाऱ्या पाणी पुरवठ्यात तांत्रिक अडचणी आहेत, त्यामुळे सुरळीत आणि पुरेसा पाणीपुरवठा व्हावा यासाठी दुरुस्ती करावी. औद्योगिक वसाहतीत स्वच्छता मोहीम राबवावी. मुख्य चौक, फॉस्ट्री चौक आणि किर्लोस्कर चौकात हायमास्क दिवे बसवावेत. सर्व झोनमधील बंद स्ट्रीट लाईटची दुरुस्ती करावी. एलईडी दिवे बसवल्यास विजेची बचत होईल. वेस्ट सॅण्ड टाकण्यासाठी पुरेशी जागा नाही, त्यामुळे अधिकाऱ्यांनी भूखंड उपलब्ध करून द्यावा.'

यावर बोलताना कार्यकारी अभियंता काकडे यांनी औद्योगिक विकास महामंडळाची भूमिका स्पष्ट केली. ते म्हणाले, 'औद्योगिक वसाहतीमधील अंतर्गत रस्त्यांच्या कामाचे टेंडर मंजूर झाले आहे. पावसाळ्यानंतर तातडीने कामाला सुरुवात होईल. स्ट्रीट लाईटच्या कामांनाही प्राधान्य दिले जाईल. स्वच्छतेसाठी औद्योगिक विकास महामंडळ प्रयत्नशील आहेच, मात्र उद्योजकांनीही आपल्या कारखान्याच्या आसपास स्वच्छता ठेवावी. अत्यावश्यक कामे तातडीने केली जातील.'

यावेळी त्यांनी मॅकच्या पदाधिकाऱ्यांसोबत उद्योगांशी संबंधित विविध विषयांवर चर्चा केली. औद्योगिक विकास महामंडळाचे उपअभियंता सुभाष मोरे, अभियंता एकनाथ पाटील, मॅकचे उपाध्यक्ष गोरख माळी, सचिव संजय पेंडसे, संचालक मोहन कुशिरे, विठ्ठल पाटील, निमंत्रित सदस्य भावेश पटेल, सुरेश क्षीरसागर, कुमार पाटील, राजेंद्र कुलकर्णी आदी उपस्थित होते. अध्यक्ष धोत्रे यांनी स्वागत केले. उपाध्यक्ष माळी यांनी आभार मानले.

महापालिका लोगो

Maruti.Patil

@timesgroup.com

tweet: @MarutipatilMT

कोल्हापूर

एलबीटी रद्द झाल्यानंतर थकीत रक्कम वसूल करण्यासाठी महापालिकेने दंड व व्याजामध्ये सवलत देणारी 'अभय' योजना सुरू केली. पण शहरातील साडेचार हजार व्यापाऱ्यांनी यामध्ये नोंदणीच केली नसल्याने महापालिकेला एलबीटी मुद्दलही वसूल करता आलेली नाही. अशा व्यापाऱ्यांवर कारवाई करण्यास तीन वर्षानंतरही महापालिकेला वेळ मिळत नसल्याने एकप्रकारे व्यापाऱ्यांना 'अभय' मिळत आहे.

जकात रद्द करुन २०११ पासून एलबीटी नव्या कराच्या अंमलबजावणीस सुरुवात झाली. एलबीटीमुळे महापालिकेला भरघोस उत्पन्न मिळेल अशी अपेक्षा असताना व्यापाऱ्यांनी या नव्या करप्रणालीला जोरदार विरोध केला. या विरोधामुळेच शहरात १२ हजार व्यापारी असताना ८,५०० व्यापाऱ्यांनीच एलबीटीसाठी नोंद केली. उर्वरीत व्यापाऱ्यांनी नोंदच न केल्याने महापालिकेच्या उत्पन्नावर पर्यायाने विकासकामांवर परिणाम झाला.

राज्यात भाजप शिवसेना सरकार सत्तेवर आल्यानंतर मुख्यमंत्री देवेंद्र फडणवीस यांनी २०१५ मध्ये ज्या व्यापाऱ्यांची वार्षिक उलाढाल ५० लाखांपेक्षा कमी आहे, अशा व्यापाऱ्यांना एलबीटी माफ करण्याचा निर्णय घेतला. पण २०११ ते २०१५ मध्ये ज्यांनी एलबीटी भरला नाही, अशा व्यापाऱ्यांना दंड व व्याजामध्ये सूट देत केवळ मुद्दल भरण्यासाठी अभय योजना सुरू केली. त्यानंतर महापालिकेने तीन वर्षानंतर सहा चार्टर्ड अकाउटंट यांचे पॅनेल निर्माण केले. पॅनेलकडून व्यापाऱ्यांची पडताळणी अंतिम टप्प्यात आली असताना अभय योजनेमध्ये २,२०० व्यापाऱ्यांनी नोंद केली. त्यापैकी १,२०० व्यापाऱ्यांकडून एलबीटीपोटी १२ कोटीची मुद्दल वसूल झाली. मात्र अभय योजनेमध्ये सहभागी झालेल्या ७०० व्यापाऱ्यांकडून अद्याप मुद्दल येणेबाकी आहे.

केवळ मुद्दल देवून एलबीटी वसूल करण्यासाठी सुरू केलेल्या अभय योजनेमध्ये ४,५०० व्यापाऱ्यांनी अर्जच केला नाही आणि तीन वर्षात कर भरलेला नाही, अशा व्यापाऱ्यांचे काय करायचे याबाबत महापालिकेने एक वर्षापूर्वी राज्य सरकारकडे अभिप्राय मागवला होता. मात्र एक वर्षानंतही सरकारकडून याबाबतचा अभिप्राय अद्याप प्राप्त झालेला नाही. राज्यपातळीवर अशी स्थिती असली, तरी ज्या व्यापाऱ्यांनी अभय योजनेमध्ये सहभागी होण्यासाठी अर्ज केला, त्यांच्याकडून केवळ मुद्दल वसूल करणार असली, तरी ज्यांनी या योजनेसाठी अर्जच केलेला नाही, त्यांच्याकडून मात्र दंड, व्याज माफ करु शकत नाही. त्यामुळेच महापालिकेने अशा व्यापाऱ्यांना सेल्फ असेसमेंटची कागदपत्रे जमा करण्याच्या सूचना केल्या आहेत. सेल्फ असेसमेंट जमा करण्यास व्यापाऱ्यांनी दिरंगाई केल्यास व्हॅटनुसार एलबीटीची रक्कम निश्चित करुन रक्कम भरण्यासाठी नोटीस पाठवण्यात येणार आहे. नोटिसीनंतर रक्कम न भरल्यास अशा व्यापाऱ्यांवर कायदेशीर कारवाई करण्याच्या हालचाली सुरू केल्या आहेत. गेल्या तीन वर्षानंतरही एलबीटी रक्कम वसूल होत नसल्याने, महापालिका खडबडून जागी झाली असून व्यापाऱ्यांवर कायदेशीर बडगा उचलण्याची तयारी सुरू केली आहे. पण तीन वर्षात अशी कारवाई न केल्याने महापालिकेचा महसूल वसुलीवर गंभीर परिणाम झाला असून ‌वसुली अभावी शहराच्या विकासकामांवर मात्र चांगलाच परिणाम झाला आहे.

..............

कोट

'ज्या व्यापाऱ्यांनी अभय योजनेमध्ये सहभाग घेतला नाही, अशा व्यापाऱ्यांचा आढावा घेण्यास महापालिकेने सुरुवात केली आहे.

सुनील बिद्रे, मुख्य अधिकारी, एलबीटी

...................

चौकट

ग्राहकांकडून मात्र कर वसूल

राज्यात एलबीटी लागू झाल्यानंतर प्रत्येक वस्तूच्या विक्रीतून कर वसूल केली जात होता. हा कर ग्राहकांनी वस्तू खरेदी केल्यानंतर त्यांच्यावर बसत होता. याप्रमाणे व्यापाऱ्यांनी ग्राहकांकडून एलबीटी घेतला. पण हा कर महापालिकेकडे जमा केला नाही, आणि अभय योजनेत सहभागही घेतला नाही. एकीकडे ग्राहकांची लूट केली, असताना महापालिकेच्या महसूल बुडवण्यात व्यापाऱ्यांनी धन्यता मानली आहे.

मराठा नेत्यांचा आरोप

म. टा. प्रतिनिधी, कोल्हापूर

'मराठा समाजाला शैक्षणिक व उद्योग व्यवसायासाठी कर्ज उपलब्ध करून देण्यासाठीचे सरकारने काढलेले सातही जीआर बोगस आहेत. त्याची प्रत्यक्षात अंमलबजावणी झालेली नाही. अण्णासाहेब पाटील महामंडळातून अर्थपुरवठा करण्यासाठी ५०० कोटींची तरतूद केल्याचे सरकार सांगत आहे. प्रत्यक्षात इतक्या निधींची तरतूद केलेली नाही', असा आरोप प्रा. मधुकर पाटील यांनी बुधवारी पत्रकार परिषदेत केला.

प्रा. पाटील म्हणाले,' आरक्षणासाठी मराठा समाजाने लाखोंच्या संख्येने शांततेत मोर्चे काढले. त्यानंतरही सरकारने आरक्षणासाठी ठोस निर्णय घेतले नाही. शिक्षण, उद्योग, व्यवसायासाठीच्या कर्जासंबंधीचे सरकारने जीआर काढले. मात्र त्याची अंमलबजावणी झालेली नाही. यामुळे सरकारने काढलेले जीआर बोगस आहेत, असे समाजाचे मत झाले आहे. आरक्षण नाही, सवलतीसाठीच्या जीआरची अंमलबजावणी होत नसल्याने आता समाज आक्रमक झाला आहे. तरीही समाजातील तरूणांनी हताश, वैफल्यग्रस्त होऊ नये. जीव धोक्यात घालून आंदोलन करू नये. शांततेच्या मार्गाने आंदोलन करता येते. हिंसक आंदोलनात सरकारी मालमत्तेचे नुकसान करू नये. पोलिसांवर दगड मारणे, इतर समाजाबद्दल तेढ निर्माण होईल, असे वक्तव्य करू नये.'

बाळ घाटगे म्हणाले, 'मराठा समाजाच्या आरक्षणासाठी अनेक वर्षांपासून चळवळ सुरू आहे. त्या चळवळीतून निर्माण झालेल्या मराठा नेत्यांनी राजकीय संधी साधून आरक्षणाच्या मूळ प्रश्नाकडे दुर्लक्ष केले. यामुळे सरकारने चर्चेला आमंत्रण देण्याऐवजी आरक्षण जाहीर करावे, अशी भूमिका समाजातील अनेक मान्यवरांची आहे. फत्तेसिंह सावंत म्हणाले, 'आरक्षणासाठीच्या आंदोलनात कोणीही राजकीय फायदा घेण्याचा प्रयत्न करू नये. समाजाने काळ्याऐवजी लाल गणवेश परिधान करून सरकारला इशारा द्यावा.'

छावा संघटनेचे राजू सावंत म्हणाले, 'मराठा समाजाला आरक्षण मिळावे यासाठी विविध संघटना एकत्रपणे काम करीत आहेत. यापुढील काळातही एकीनेच आंदोलन केले जाईल.' यावेळी माजी उपमहापौर विक्रम जरग, भरत पाटील, बाबा महाडिक, प्रकाश सरनाईक, दीपा पाटील, अवधूत पाटील आदी उपस्थित होते.

-----------

चौकट

माफी मागावी

'पंढरपूरला वारकऱ्यांत साप सोडण्याची तयारी केल्याचा आरोप मुख्यमंत्री देवेंद्र फडणवीस यांनी करून मराठा समाजाच्या भावना दुखावल्या आहेत. पालकमंत्री पाटील यांनी मराठा समाजाच्या आंदोलनात 'पेड' लोक घुसले आहेत, असा आरोप केला. त्यामुळे मुख्यमंत्री फडणवीस, पालकमंत्री पाटील यांनी समाजाची जाहीर माफी मागावी', अशी मागणी प्रा. मधुकर पाटील यांनी यावेळी केले.

------------------

बाळासाहेब शेलार

कुडित्रे : कुडित्रे (ता. करवीर) येथील श्री हनुमान सहकारी दूध व्यावसायिक संस्थेचे माजी चेअरमन बाळासाहेब लिंगाप्पा शेलार (वय ६६) यांचे निधन झाले. गुरुकृपा कृषी सेवा केंद्र, दोनवडेचे मालक उत्तम शेलार यांचे ते वडील होत. त्यांच्या पश्चात पत्नी, मुलगा, दोन मुली, सून व नातवंडे असा परिवार आहे.

पुण्याच्या चौघांना अटक, सराफही ताब्यात

म. टा. प्रतिनिधी, कोल्हापूर

बनावट रिव्हॉल्व्हरचा धाक दाखवून कोल्हापुरात लूटमार करणाऱ्या पुणे येथील टोळीला स्थानिक गुन्हे अन्वेषण विभागाच्या पथकाने अटक केली. या प्रकरणी शाहुपूरी व्यापारी पेठेत गोविंद लॉजमध्ये थांबलेल्या चौघांना अटक केली. सोलोमन उर्फ अमित जेम्स चोपडे (वय २५, रा. मयूर कॉम्प्लेक्स, कासारवाडी,नाशिक फाटा, पुणे), आकाश राजू गोरखा (वय २६ रा. चाळ नं.१, नेहरुनगर, संतोषीमाता चौक, पिंपरी पुणे), इस्माईल रशिद इनामदार (वय २३, अंजुमन चाळ, नेहरुनगर, पुणे), वसीम वकील शेख (वय २२, रा. खारवाडी उड्डाणपुलाच्या खाली, पिंपरी,पुणे) अशी त्यांची नावे आहेत. राजारामपुरीत आठवी गल्ली येथे २० जुलैला दुपारी तीन वाजता संजय प्रल्हाद गुरव (वय ५८ रा. मंगळवार पेठ) यांना रिव्हाल्व्हरचा धाक दाखवून एक तोळ्याची सोन्याची चेन लंपास केली होती. या चेनसह दुचाकी, रोख रक्कम असा एकूण ६९ हजार रुपयांचा मुद्देमाल पोलिसांनी जप्त केला. चोरीचे सोने घेणारा सराफ अमृत हरिदास कालेकर (वय ३५, रा. दुधाळी) याला ताब्यात घेतले आहे. ही माहिती स्थानिक गुन्हा अन्वेषणचे पोलिस निरीक्षक तानाजी सावंत यांनी बुधवारी पत्रकार परिषदेत दिली.

पोलिस निरीक्षक सावंत म्हणाले, 'राजारामपुरी आठवी गल्ली येथे दुचाकीवरुन आलेल्या तिघा चोरट्यांनी रिव्हॉल्वरचा धाक दाखवून संजय गुरव यांना रस्त्यात अडवून त्यांची सोन्याची चेन लंपास केली होती. त्यासाठी दोन तपास पथके तैनात केली होती. या प्रकरणी संशयित तीनजणांना ताब्यात घेतले होते. त्यांच्याकडून एअरगन ताब्यात घेतली होती. पोलिस उपनिरीक्षक राजेंद्र सानप यांच्या पथकाने गुन्हा घडलेल्या ठिकाणापासून संशयित लुटारु गेलेल्या मार्गापर्यंतचे सीसीटिव्ही फूटेजही तपासले होते. या तपासात संबधीत लुटारु शाहूपुरी व्यापारी पेठेतील गोविंद लॉज परिसरात घुटमळल्याचे लक्षात आले. त्यांच्यावर तीन दिवस पाळत ठेवण्यात आली. या प्रकरणातील संशयित वसीम शेखने टेहाळणी करण्यासाठी मदत केल्याचेही स्पष्ट झाले आहे.

................

चार दिवस लॉजवर

संशयित सोलोमन उर्फ अमित चोपडे याचे मूळ गाव मनपाडळे (ता. हातकणंगले) असून त्याचे वडील पुणे येथे नोकरीला असल्याने तेथेच स्थायिक झाले आहेत. त्याची कसबा बावडा येथील गोळीबार मैदान परिसरात सासूरवाडी आहे. वडगाव येथील पाहुण्यांकडेही त्याची ये-जा सुरु होती. त्याचा मित्र सूरज सावंत हा कसबा वाबडा येथे राहत असून त्याची गाडी घेऊन या सर्व संशयित आरोपींनी पुणे येथे पळून जाण्याचा कट रचला होता. त्यासाठी पुन्हा कोल्हापुरात एखादी चोरी करण्याचे नियोजन करण्यासाठी ते चार दिवस लॉजवर थांबून होते. राजारामपुरीत चोरलेली चेन त्यांनी गुजरी येथील कालेकर ज्वेलर्समध्ये विक्री केली होती. चोरीची चेन घेतल्याबद्दल सराफ अमृत कालेकरलाही ताब्यात घेतले आहे.

.....

सराईत गुन्हेगार ...

संशयित अमित चोपडे, आकाश गोरखा यांच्यावर पुणे येथील कासारवाडी, खडकी, पुणे शहर, मानपाडा पोलिस ठाणे, नवी मुंबई या ठिकाणी हाणामारी, प्राणघातक हल्ला, बेकायदा हत्यार बाळगल्याचे गंभीर गुन्हे दाखल आहेत. या दोघांसह त्याच्या साथीदारांनी कोल्हापूर जिल्ह्यातही लुटमारीचे नियोजन केले होते.

म. टा. प्रतिनिधी, कोल्हापूर

शाहुपूरी पोलिसांनी सराईत गुन्हेगार सुरेश कृष्णमुर्ती शेट्टी (वय ३६, रा. कामगार चौक, संभाजीनगर, कोल्हापूर, सध्या कागल) याला अटक केली. त्याने शहरात विविध ठिकाणी चार बुलेटसह सात दुचाकी चोरल्याची कबुली दिली. संशयित चोरटा सुरेश शेट्टीने निपाणी येथून दुचाकी चोरी केल्याप्रकरणी निपाणी पोलिसांनी त्याला अटक केली होती. त्याने कोल्हापूर बसस्थानक परिसरातून दुचाकी चोरल्याची कबुली दिली. त्याचा ताबा शाहुपूरी पोलिसांनी घेतला. त्याच्याकडे कसून तपासणी केली असता त्याने शाहूपुरी, लक्ष्मीपुरी,हातकणंगले, हुपरी, गोवा येथून दुचाकी चोरल्या असल्याची कबुली दिली. त्याच्याकडून चार बुलेट, एक स्पेलेंडर, दोन मोपेड अशा ५ लाख रुपये किंमतीच्या ७ दुचाकी जप्त केल्याचे पोलिस निरीक्षक संजय मोरे यांनी सांगितले.

म. टा. वृत्तसेवा, पन्हाळा

निवडणुकीनंतर सुरुवातीला ठरलेल्या सव्वा वर्षाच्या फॉर्म्युल्यानुसार पन्हाळा पंचायत समितीचे विद्यमान सभापती पृथ्वीराज सरनोबत यांनी राजीनामा दिला आहे. त्यामुळे नूतन सभापती निवडीची प्रक्रियाही लगेच सुरू झाली आहे. तालुक्याच्या राजकारणाची सद्य:स्थिती पाहता वाडीरत्नागिरी गणातून प्रथमच निवडून आलेले जनसुराज्यचे अनिल कंदूरकर सभापतिपदाचे प्रमुख दावेदार आहेत.

पंचायत समितीच्या वाघवे गणातून निवडून आलेले जनसुराज्यचेच संजय माने हेही सभापतिपदासाठी आणखी एक दावेदार आहेत. परंतु मावळते सभापती सरनोबत आसुर्लेचे असून, ते पन्हाळ्याच्या दक्षिणेकडील भागाचे प्रतिनिधित्व करतात. त्याच भागाला सलग दुसऱ्यांदा संधी मिळण्याची शक्यता कमी आहे. त्यामुळे माने यांचे नाव मागे पडून कंदूरकर यांच्या गळ्यात सभापतिपदाची माळ पडण्याची शक्यता आहे.

दोन्ही तालुक्यांत कष्ट घेऊ शकेल अशा सदस्याला सभापतिपदी संधी देणे जनसुराज्यला विधानसभा निवडणुकीत फायद्याचे ठरणार आहे. कंदूरकर यांचा पन्हाळा आणि शाहूवाडीत तालुक्यांत चांगला संपर्क आहे. या जमेच्या बाजू लक्षात घेता कंदूरकर हेच सभापतिपदाचे प्रबळ दावेदार असल्याचे बोलले जाता. याबाबतचा निर्णय जनसुराज्यचे नेते विनय कोरेच घेणार आहेत.

००००००

म. टा. वृत्तसेवा, सांगली

सांगली महापालिका क्षेत्रातील ५४४ पैकी १६४ मतदान केंद्र संवेदनशील असल्याचा अहवाल पोलिसांकडून प्राप्त झाला असल्याची माहिती निवडणूक अधिकारी आणि आयुक्त रवींद्र खेबुडकर बुधवारी पत्रकारांना दिली. निवडणूक प्रक्रिया सुरळीत आणि भयमुक्त वातावरणात पार पाडण्याच्या दृष्टीने प्रशासकीय तयारी पूर्ण झाल्याचेही खेबुडकर यांनी सांगितले. यावेळी उपायुक्त सुनील पवार, स्मृती पाटील उपस्थित होते.

खेबुडकर म्हणाले की, महापालिका क्षेत्रात एकूण ५४४ मतदान केंद्रावर मतदानाची प्रक्रिया पार पडणार आहे. निवडणूक आयोगाच्या सूचनेनुसार मतदार संघाची ठिकाणे आणि रचना करण्यात आली आहे. एकूण २० प्रभागातील १६४ मतदान केंद्रे संवेदनशील असल्याचा अहवाल पोलिसांनी दिला आहे. या अहवालाची दखल घेऊन अशा ठिकाणी पोलिस यंत्रणाही सज्ज आहे. मतदार स्लीप छपाई पूर्ण झाली आहे. आज, गुरुवारपासून १५४ कर्मचाऱ्यांच्या माध्यमातून त्या स्लीप मतदारांपर्यंत दोन दिवसांत पोहोचवल्या जातील. सर्व मतदान यंत्रे राजकीय पक्षांच्या उपस्थितीत सील करण्यात आली आहेत.

२७ भरारी पथके

आठवड्यावर येऊन ठेपलेल्या मतदानासाठी प्रशासनही सतर्क झाले आहे. कोणताही अनूचित प्रकार घडू नये व अवैध धंदे रोखण्यासाठी २७ भरारी पथके तैनात करण्यात आले आहेत. तसेच तपासणी नाक्यांची संख्याही वाढविण्यात आली आहे. आजवर २७ गुन्हे दाखल करण्यात आले आहे. आचारसंहितेच्या कडक अंमलबजावणीसाठी चोवीस तास पथके सतर्क राहतील.

सांगली महापालिका निवडणुकीच्या मतमोजणीसाठी मिरजेतील शासकीय गोदामात सोय करण्यात आली आहे. ३ ऑगस्ट रोजी सकाळी दहा वाजता मतमोजणीला सुरवात होईल. सांगली-कुपवाड आणि मिरजेतील प्रभागासाठी स्वतंत्र व्यवस्था करण्यात आली आहे. मतमोजणीसाठी अकरा फेऱ्या होतील. दुपारी तीन वाजेपर्यंत निकाल स्पष्ट होणे अपेक्षित आहे.

दोषींवर कारवाई

राष्ट्रवादीचे नेते जयंत पाटील यांनी जाहीर सभेत प्रशासनावर केलेल्या आरोपाबाबत विचारले असता आयुक्त खेबुडकर म्हणाले की, हा विषय पोलिस प्रशासनाशी निगडीत आहे. आरोपाची तथ्यता पडताळून पाहणार आहोत. पडताळणीत दोषी आढळणाऱ्यावर निश्चित कारवाई होईल.

आदर्श मतदान केंद्र

उपायुक्त स्मृती पाटील म्हणाल्या की, निवडणूक आयोगाच्या सूचनेनुसार सर्व मतदान केंद्र आदर्श करण्यावर भर आहे. तेथे सर्व सुविधा, प्रसन्न वातावरण, स्वच्छतागृहाची व्यवस्था असेल. त्यासाठी शाळा मुख्याध्यापकांची बैठक घेण्यात आली आहे. सर्वच मतदान केंद्र आदर्श होतील.

वाहतूकदारांचे साखळी उपोषण सुरू

म. टा. प्रतिनिधी, कोल्हापूर

वाहतूकदारांच्या देशव्यापी चक्काजाम आंदोलनात लॉरी ऑपरेटर्स असोसिएशनने बुधवारपासून साखळी उपोषण सुरू केले. पुणे-बेंगळुरू महामार्गावर उजळाईवाडी येथे उपोषणाला सुरुवात झाली असून, आंदोलन आणखी तीव्र करण्याचा इशारा वाहतूकदारांनी दिला आहे. दरम्यान, बुधवारी राजर्षी शाहू मार्केट यार्डात भाजीपाला, फळे आणि कांदे-बटाट्याचा एकही ट्रक आला नाही.

इंधन दरवाढ कमी करण्यासह विविध मागण्यांसाठी ऑल इंडिया ट्रान्सपोर्ट असोसिएशनमार्फत शुक्रवारपासून (ता. २०) देशव्यापी चक्काजाम आंदोलन सुरू आहे. आंदोलनाच्या सहाव्या दिवशी कोल्हापूर जिल्हा लॉरी ऑपरेटर्स असोसिएशनने पुणे-बेंगळुरू महामार्गावर उजळाईवाडी येथे साखळी उपोषण सुरू केले. रोज दहा वाहतूकदार उपोषण करणार आहेत. याशिवाय टप्प्याटप्प्याने आंदोलनाची तीव्रता वाढवली जाणार असल्याचा इशाराही वाहतूकदारांनी सरकारला दिला आहे. बुधवारी संध्याकाळी उजळाईवाडी येथे आंदोलकांनी आठ ते दहा वाहनांच्या चाकातील हवा सोडली. आंदोलनाची कल्पना असूनही ट्रकमध्ये माल भरल्याने आंदोलकांनी ट्रकचालकांना खडसावले. आंदोलनामुळे जिल्ह्यातील महामार्गावरील सर्व पेट्रोल पंप, मार्केट यार्ड, तावडे हॉटेल, गांधीनगर, रेल्वे गुड्स यार्ड परिसरात ट्रक उभे केले आहेत.

गेल्या दोन दिवसात मार्केट यार्डमध्ये भाजीपाला आणि कांदे, बटाट्याची आवक सुरू होती. आंदोलनातून भाजीपाला वगळला असूनही बुधवारी भाजीपाला आणि फळांच्या एकाही ट्रकची आवक शाहू मार्केट यार्डात झाली नाही. मालच न आल्याने सौदे होऊ शकले नाहीत. यामुळे सुमारे एक कोटी रुपयांची उलाढाल होऊ शकली नाही. याचे परिणाम थेट भाजी मंडई आणि किरकोळ बाजारात जाणवणार आहेत. कोल्हापुरातून कोकण, कर्नाटक आणि गोव्यात जाणारी वाहतूकही पूर्णत: ठप्प असल्याने अन्नधान्य, भाजीपाला, कापड, सिमेंट, बांधकाम साहित्य आणि औद्योगिक वसाहतींना सुमारे एक हजार कोटी रुपयांचा फटका बसला. केंद्र सरकारने मागण्या मान्य केल्याशिवाय चक्काजाम आंदोलन मागे घेणार नाही, अशी माहिती लॉरी ऑपरेटर्स असोसिएशनचे कोल्हापूर जिल्हा अध्यक्ष सुभाष जाधव यांनी दिली. दरम्यान, जीवनावश्यक सेवा सुरळीत रहाव्यात यासाठी जिल्हा प्रशासनाकडून प्रयत्न सुरू आहेत.

चौकट

केंद्र सरकारने पुढाकार घ्यावा

'देशभरात सुमारे ९० लाख वाहने आंदोलनात सहभागी आहेत. आंदोलनाची कोंडी अधिकच वाढत आहे. ही कोंडी फोडण्यासाठी केंद्र सरकारने पुढाकार घ्यावा. आंदोलनामुळे उद्योगांसह थेट सर्वसामान्य नागरिकांना झळ बसत आहे. इंधन दर, टोल आणि प्राप्तिकर आकारणीत सरकारने सुधारणा करावी. ई-वे बिलातील तांत्रिक चुकांची दुरुस्ती करावी', अशी आग्रही मागणी खासदार धनंजय महाडिक यांनी बुधवारी संसदेत केली.

चौकट

माथाडी युनियनचा पाठिंबा

महाराष्ट्र राज्य माथाडी, ट्रान्सपोर्ट आणि जनरल कामगार युनियनने वाहतूकदारांच्या चक्काजाम आंदोलनाला बुधवारी पाठिंबा जाहीर केला. माथाडी कामगार आणि वाहतूकदार ही यंत्रणा परस्परांना पूरक आहे, त्यामुळे जोपर्यंत सरकार वाहतूकदारांच्या मागण्या मान्य करीत नाही, तोपर्यंत आंदोलनात वाहतूकदारांच्या सोबत राहण्याचा निर्णय युनियनने घेतला आहे. याशिवाय शिवसेनेच्या महाराष्ट्र वाहतूक सेनेनेही चक्काजाम आंदोलनास पाठिंबा दिला.

शतकातील सर्वात

मोठे चंद्रग्रहण उद्या

कोल्हापूर : शतकातील सर्वात मोठे चंद्रग्रहण शुक्रवारी (ता. २७ जुलै) होणार आहे. ऑस्ट्रेलिया, आशिया, युरोप, साऊथ अमेरिकेत हे चंद्रग्रहण दिसणार नाही. हा चंद्रग्रहणाचा काळ सर्वात मोठा १०३ मिनिटांचा आहे. म्हणजेच पृथ्वीची चंद्रावर १०३ मिनिटे सावली राहणार आहे. 'कोल्हापूरचा विचार करता ग्रहणाची सुरुवात रात्री १० वाजून ४६ मिनिटांनी होईल. चंद्र हा रात्री १ वाजून १५ सेकंद ते २ वाजून ४४ मिनिटे या कालावधीत पूर्ण पृथ्वीच्या सावलीखाली असणार आहे. याला ग्रहणाला मायक्रोमून म्हणतात. ग्रहणाचा शेवट ४ वाजून ५९ मिनिटांनी होणार आहे' अशी माहिती विवेकानंद कॉलेजचे पदार्थविज्ञान व खलोगशास्त्र विभागप्रमुख प्रा. डॉ. मिलिंद कारंजकर यांनी दिली.

म. टा. प्रतिनिधी, कोल्हापूर

बँकेला दिलेला दहा लाखांचा धनादेश वटला नसल्याप्रकरणी विशाल विष्णुपंत तेजम (वय ३३, कदमवाडी, कपूर वसाहत) याच्यावर जुना राजवाडा पोलिसांनी गुन्हा दाखल केला. त्याबाबतची फिर्याद तत्कालीन शाखाधिकारी पद्मा राजेश बंडकर (वय ४४, कोल्हापूर) यांनी फिर्याद दिली. बँकेने याप्रकरणी न्यायालयात तक्रार दाखल केली होती. या प्रकरणाचा तपास करण्याचे आदेश जुना राजवाडा पोलिसांना दिले होते.

तेजम याने मौजे कोपार्डे (ता. करवीर) येथील गट नंबर ७८६ मध्ये बांधलेल्या अपार्टमेंटमधील एफ-३०३ हा फ्लॅट खरेदी केला. त्यासाठी त्याने अर्बन बॅँकेच्या गंगावेश शाखेत अर्ज करून दस्त आणि इतर कागदपत्रे सादर केली. बॅँकेच्या शाखाधिकारी पद्मा बंडकर यांनी चौकशी करून कर्ज मंजूर केले. कर्जाचा बोजा सातबारा पत्रकी नोंद करण्यात आला. तेजमने मार्च २०१६ मध्ये फ्लॅट खरेदी केली होती. मात्र, त्यानंतर २२ एप्रिल २०१७ रोजी प्रसिद्ध झालेल्या जाहीर नोटिशीमध्ये विशाल तेजनमने श्रीराम फायनान्समधून घेतलेल्या थकीत कर्जाची रक्कम तत्काळ भरण्याचे आदेश केले होते. ही बाब अर्बन बॅँकेच्या पदाधिकाऱ्यांच्या लक्षात आल्यानंतर त्यांनी कर्जदार तेजमला बोलावून विचारणा केली. त्याच्याकडून माफीनाफा लिहून १ मे २०१७ आणि १२ मे या दोन तारखांचे ५ लाख आणि ५ लाख १० हजार असे दोन धनादेश घेतले होते. मात्र, हे धनादेश वटले नसल्याचे पोलिसांनी सांगितले.

०००००

जिप. महिला कर्मचाऱ्याला

भामट्याचा गंडा

म. टा. प्रतिनिधी, कोल्हापूर

विशेष कार्यकारी दंडाधिकारी असल्याचे भासवत जिल्हा परिषदेतील एका महिला कर्मचाऱ्याचे सहा तोळ्यांचे दागिने भामट्याने लंपास केल्याची घटना बुधवारी जिल्हा परिषदेच्या आवारात घडली. या प्रकरणी फसवणूक झाल्याची तक्रार संबधित महिलेने शाहूपुरी पोलिसांत दिली. पोलिसांनी जिल्हा परिषदेतील सीसीटिव्ही फूटेज ताब्यात घेतले असून भामट्याचा शोध सुरु केला आहे.

गेल्या सहा महिन्यांपासून हा भामटा महिलेच्या संपर्कात आहे. त्याने आपण 'विशेष कार्यकारी अधिकारी' असून अनेक ठिकाणांहून कर्ज मिळवून देतो, असे सांगून महिलेचा विश्वास संपादन केला. अनेकांना कर्ज आणि नोकरी लावल्याची कागदपत्रे दाखविली. या भामट्याने महिलेची सातत्याने भेट घेतली. बुधवारी सकाळी त्या महिलेकडून सहा तोळे दागिने घेऊन या दागिन्यांवर लाखो रुपयांचे कर्ज देतो असे सांगून धूम ठोकली. तासाभरानंतरही हा भामटा आला नसल्याने ही महिला घाबरली. भामट्यांशी मोबाइलवरुन संपर्क साधण्याचा प्रयत्न केला. मात्र संपर्क झाला नसल्याने महिला हवालदिल झाली. घडलेल्या प्रकाराची माहिती महिलेने नातेवाईकांना दिली. घाबरलेल्या अवस्थेत ती मुलासोबत शाहुपूरी पोलिसांत दाखल झाली. पोलिस निरीक्षक संजय मोरे यांनी या प्रकरणाची गंभीर दखल घेऊन तपासाचे आदेश दिले. दरम्यान, या भामट्याने जिल्हा परिषदेमधील अनेक महिलांची फसवणूक केल्याची शक्यता व्यक्त होत आहे.

फोटो अर्जुन टाकळकर

म. टा. प्रतिनिधी, कोल्हापूर

''गाणं ऐकायचं नसतं तर ते जगायचं असतं,' ही अनुभूती सुधीर फडके तथा बाबूजींच्या गाण्यातून नेहमीच मिळते. शब्द आणि भाव यांची सुरेल गुंफण करणाऱ्या बाबूजींचे गाणे आयुष्यातील प्रत्येक भावना जगायला शिकवते,' अशा शब्दांत सुधीर फडके यांच्या सांगीतिक अभ्यासिका डॉ. भाग्यश्री मुळे यांनी रसिकांशी संवाद साधला. यावेळी सुधीर फडके यांच्यासोबत मेळ्यांमध्ये काम केलेल्या विना मुनीश्वर यांनी बाबूजी, गदिमा यांच्या आठवणी सांगितल्या. कोल्हापुरातील त्यांच्या अनेक स्मृतींना यानिमित्ताने उजाळा मिळाला. यावेळी गायन समाज देवल क्लबचे अध्यक्ष व्ही. बी. पाटील, बाबूराव पेंटर फिल्म सोसायटीचे चंद्रकांत जोशी, दिलीप बापट उपस्थित होते.

ज्येष्ठ संगीतकार, गायक व कोल्हापूरचे सुपुत्र सुधीर फडके यांचे जन्मशताब्दी वर्ष बुधवार, २५ जुलैपासून सुरू झाले. यानिमित्ताने वर्षभर विविध कार्यक्रमांचे आयोजन करण्यात येणार आहे. या कार्यक्रमांचा प्रारंभ कोल्हापुरातून बुधवारी 'जिवाचा सखा' या सिनेमाच्या प्रदर्शनाने करण्यात आला. कलामहर्षी बाबूराव पेंटर फिल्म सोसायटीच्या वतीने या कार्यक्रमाचे आयोजन केले होते. यावेळी डॉ. मुळे यांनी फडके यांच्या सांगीतिक कारकिर्दीचा प्रवाही आढावा घेतला.

डॉ. मुळे म्हणाल्या, 'सुधीर फडके यांचा जन्म कोल्हापुरात झाला. रामचंद्र विनायक फडके अर्थात सुधीर फडके तथा बाबूजी या नावाने ते मराठी सिनेसृष्टीत लोकप्रिय झाले. वडिलांच्या अकाली निधनामुळे शिक्षण अर्धवट सोडून त्यांनी पंडित वामनराव पाध्ये यांच्याकडे संगीताचे शिक्षण घेतले व त्यांच्याकडे संगीत शिकवण्याचे काम करू लागले. नोकरी व संगीतसाधना असा त्यांचा प्रवास सुरू होता. प्रभात फिल्म कंपनीत रूजू झाल्यानंतर त्यांच्या कारकिर्दीला खऱ्या अर्थाने सुरुवात झाली. पार्श्वगायक व संगीतकार अशी त्यांची यशस्वी वाटचाल होती. गदिमांचे शब्द आणि बाबूजींचे संगीत या समीकरणातून तयार झालेल्या गीतरामायणाने मराठी मनावर गारूड केले. १९४८ साली गदिमा, सुधीर फडके व राजा परांजपे एकत्र आले आणि त्यांनी 'जिवाचा सखा' सिनेमा बनवला. या त्रयीने पुढे अनेक वर्षे मराठी पडद्यावर राज्य केले.'

प्रास्ताविकात फिल्म सोसायटीचे दिलीप बापट म्हणाले, 'कोल्हापूर आणि सुधीर फडके यांचे नाते संगीतानेच जोडले गेले आहे. त्यामुळे वर्षभर त्यांच्या आठवणी जपणारे कार्यक्रम होणार आहेत. येत्या ऑक्टोबरमध्ये गदिमा व नोव्हेंबरमध्ये पु. ल. देशपांडे यांचेही जन्मशताब्दी वर्ष सुरू होत आहे. यानिमित्ताने या त्रयींच्या कलात्मक स्मृती जपणाऱ्या कार्यक्रमांची पर्वणी रसिकांना देण्यात येणार आहे.

म. टा. प्रतिनिधी, कोल्हापूर

कोल्हापूर क्षेत्र नागरी विकास प्राधिकरणची नियमावली आणि कार्यकक्षेच्या स्वरूपावरून समाविष्ठ गावांच्या ग्रामपंचायत सदस्यांत गोंधळाचे चित्र बुधवारी दिसले. प्राधिकरणची स्थापना होऊन ११ महिने झाले तरी या कालावधीत एकही प्रकल्प नाही की निधीची घोषणा नाही. कुपोषितांसारखी प्राधिकरणची अवस्था बनली असून, प्राधिकरण नकोच अशी टोकाची भूमिका काहींनी घेतल्याने गोंधळात भर पडली. मात्र प्राधिकरणचे फायदे-तोटे, नियमावली, भविष्यकालीन नियोजन समजून न घेता टोकाची भूमिका योग्य नाही, असा सल्ला माजी आमदार संपतराव पवार-पाटील, निमंत्रक नाथाजी पोवार, नारायण पोवार यांनी दिला. दोन तासांच्या बैठकीत कोणताही ठोस निर्णय न होता बैठक अर्ध्यावर संपविण्यात आली. त्यामुळे प्राधिकरणवरून मतभेद पुन्हा उघडकीस आले.

'प्राधिकरणाचा कायदा, स्वरूप आणि संकल्पित विकास'संबंधी माहिती मिळावी म्हणून आरकेनगर येथील जिजामाता सांस्कृतिक सभागृह येथे शहरालगतच्या गावांचे सरपंच आणि सदस्यांची बैठक झाली. माजी आमदार पवार-पाटील अध्यक्षस्थानी होते. निमंत्रक नाथाजी पोवार यांनी प्रास्ताविकांत प्राधिकरणाची संकल्पना, कामकाजाची पद्धत आणि त्या माध्यमातून होणारा गावांचा विकास यासंबंधी मांडणी केली. विवेकानंद कॉलेजचे प्रा. सुनील देसाई यांनी प्राधिकरणच्या माध्यमातून मुंबई, पुणे, नाशिक, औरंगाबाद, नागपूरमधील विकासकामे चित्रफितीद्वारे दाखविली. सादरीकरण सुरू असताना शिंगणापूर येथील अशोक पाटील, सुनील शिंदे यांनी प्राधिकरणमुळे अडचणी निर्माण झाल्याचे सांगत चित्रफीत दाखवू नका अशी भूमिका मांडली.

संपतराव पवार-पाटील म्हणाले, 'प्राधिकरणवरून सध्या 'धरलं तर चावतंय अन् सोडलं तर पळतंय' अशी स्थिती झाली आहे. हद्दवाढ रद्द करताना प्राधिकरण स्वीकारण्याचा निर्णय झाला होता. प्राधिकरणचा अभ्यास करून त्याचे फायदे-तोटे, भविष्यकालीन परिणाम यासंबंधी गावागावांत अधिकाऱ्यांनी संवाद साधायला हवा. वर्षभरात काही घडले नाही, हे खरे आहे. पण प्रत्येक गोष्टीकडे राजकीय दृष्टिकोनातून पाहू नये. गावपातळीवर सुविधा निर्माण झाल्या पाहिजेत. पालकमंत्र्यांनी शनिवारी बैठक बोलावली असून, त्यामध्ये प्राधिकरणविषयक अडचणी, त्रुटी प्रभावीपणे मांडू. मात्र, कुणाचा निषेध आणि ऊठसूट विरोध करायला आम्ही एकत्र आलो नाही. प्राधिकरणमुळे नागरिकांची गैरसोय, अन्यात होत असल्याची भावना असेल तर कायद्यातील तरतुदी बदलाव्या लागतील.'

बैठकीला सरपंच संग्राम पाटील (पाचगाव), सुनंदा कुंभार (मोरेवाडी), सागर भोगम (कळंबा), रितू हरेश लालवानी (गांधीनगर), सचिन चौगुले (वडणगे), शोभा खोत (कासारवाडी), तानाजी पाटील (गडमुडशिंगी), रेश्मा कांबळे (कोगे खुर्द), अर्चना पाटील (कंदलगाव), जि.प.चे माजी सदस्य महेश चव्हाण, पाचगावचे उपसपरंच संग्राम पोवाळकर, प्रकाश गाडगीळ, सागर दळवी, आदी उपस्थित होते.

०००

निव्वळ विरोधाची भूमिका नको...

'हद्दवाढ नको, प्राधिकरणही नको' अशी निव्वळ विरोधाची भूमिका कशी चालणार? शहरी सुविधा ग्रामीण भागात मिळायला हव्यात. गावांचा सुनियोजित विकास आवश्यक आहे. प्राधिकरणमध्ये काही त्रुटी असतील तर त्या समोर आणून सुधारणा करता येते. मुख्यमंत्र्यांनी, प्राधिकरण स्थापताना हजारो कोटी रुपये देण्याची घोषणा केली होती. मात्र प्राधिकरणच्या वर्षभरातील कामकाजात ग्रामस्थांना विश्वासात घेतले नाही. गावांचे सर्वेक्षण केले असते तर आज अनेक प्रश्ने उद्भवले नसते असे निमंत्रक नाथाजी पोवार यांनी सांगितले. राजू माने यांनी ग्रामपंचायत सदस्यांना प्राधिकरणचे स्वरुप, नियमावली समजावी, त्रुटी सामोरे याव्यात यासाठी ठिकठिकाणी बैठका होतील असे स्पष्ट केले.

..........

'ओसाड गावची मालकी'

प्रा. बी. जी. मांगले यांनी 'प्राधिकरण स्थापल्याने ग्रामपंचायतींकडून बांधकाम परवान्याचे अधिकार काढून घेतले आहेत. प्राधिकरण स्थापनेवेळी गावांच्या विकासासाठी हजारो कोटी रुपये मिळतील अशी घोषणा होती. ११ महिन्यांत एक पैचा निधी मिळाला नाही. ग्रामपंचायतीचे अधिकार काढून घेतल्याने गावचा सरपंच म्हणजे 'ओसाड गावची मालकी' अशी स्थिती बनली आहे. प्राधिकरणमुळे नागरिकांची गैरसोय आणि गाव अडचणीत येत असेल तर प्राधिकरण हद्दपार करूया. गावठाणाबाहेर वाढविलेल्या २०० मीटर परिघाचा ग्रामपंचायतींना काही फायदा नाही.' अशी भूमिका मांडली. नारायण पोवार यांनी 'प्राधिकरण स्थापनेवेळी सर्व आमदारांनी पाठिंबा दिला होता. काही गावांनी प्राधिकरणच्या बाजूनी ठराव केले आहेत. पहिल्यांदा प्राधिकरणचे फायदे-तोटे समजावून घेऊ या. एकदम टोकाची भूमिका योग्य नाही. सर्व बाबींचा विचार करुन निर्णय घेणे उचित ठरेल' असा मुद्दा मांडला.

फोटो आहे

म. टा. प्रतिनिधी, कोल्हापूर

राज्यात प्राध्यापकांच्या दहा हजारांहून अधिक जागा रिक्त असताना आणि भविष्यात १२ हजारांहून अधिक जागांची गरज निर्माण होणार असताना प्राध्यापक बंदीमुळे सरकारने सीएचबीधारक प्राध्यापकांची आर्थिक कोंडी केली आहे. भरतीबंदी उठवण्यासह सेवेत कायम करून नियमित वेतनश्रेणी द्यावी, दरआठवडा १२ तासिका निश्चित कराव्यात, या मागण्यांसह सीएचबीधारक प्राध्यापकांच्या न्यायासाठी राज्यभरात दबाबयंत्रणा निर्माण करण्याचा निर्धार महाराष्ट्र प्राध्यक्षक महासंघ (एमफुक्टो) व शिवाजी विद्यीपीठ सेवक संघ (सुटा) यांच्यावतीने आयोजित मेळाव्यात केला.

बुधवारी शाहू स्मारक भवन येथे झालेल्या मेळाव्यात ऑगस्टपासून सुरू करण्यात येणाऱ्या आंदोलनाची दिशा ठरविण्यात आली. दरम्यान, २७ जुलैला शाहू स्मारक भवन येथे दुपारी तीन वाजता प्राध्यापकांच्या मेळाव्याचे आयोजन केले आहे. यावेळी सुटाचे ज्येष्ठ नेते सुधाकर मानकर, एमफुक्टोचे राज्य उपाध्यक्ष सुभाष जाधव, सुटाचे जिल्हाध्यक्ष अरुण पाटील, सचिव डॉ. डी. एन. पाटील, व्यवस्थापन परिषदेचे सदस्य आर. जी. कोरबू, गजानन चव्हाण, अरुण शिंदे, आदी उपस्थित होते. मेळाव्याचे अध्यक्षस्थान सुधाकर मानकर यांनी भूषविले.

मानकर म्हणाले, 'भरती बंदीमुळे हजारो प्राध्यापकांना शैक्षणिक पात्रता असूनही आर्थिक सुरक्षा मिळत नाही. राज्यात सद्य:स्थितीत प्राध्यापकपदाच्या ११ हजारांहून अधिक जागा रिक्त आहेत. दहावी-बारावीचा निकाल पाहता कॉलेजला दरवर्षी नव्याने तुकडी वाढवून दिली जात आहे. यानुसार भविष्यात १२ हजारांवर पदांची निर्मिती होणार आहे. प्राध्यापकाच्या जागेसाठी तुटपुंज्या मानधनावर तासिका तत्त्वावरील प्राध्यापकांची नेमणूक केली जाते. मात्र, त्यांना ठरलेले मानधन नियमित दिले जात नाही. त्यामुळे कायमस्वरूपी नेमणूक व नियमित वेतन या प्रमुख मागणीसाठी संघटन करून दबाव निर्माण केला तरच आवाज सरकारपर्यंत पोहोचेल. सुटाचा सीएचबीधारक प्राध्यापकांना पाठिंबा देण्यात येईल.'

एमफुक्टोचे राज्य उपाध्यक्ष सुभाष जाधव म्हणाले, 'राज्यातील विद्यापीठे व महाविद्यालये यांना दीड लाख पूर्णवेळ शिक्षकांची गरज आहे. राज्यातील कॉलेज व विद्यापीठात शिक्षण घेणाऱ्या विद्यार्थ्यांची संख्या ३० लाखांवर पोहोचली आहे. बंदीमुळे प्राध्यापकांच्या जागा रिक्त राहिल्या आहेत. ज्या जागा तासिका तत्त्वावर भरल्या आहेत. त्यांना सरकारकडून कोणतेही अनुदान देण्यात येत नाही. परिणामी या प्राध्यापकांना शैक्षणिक वर्ष संपत आले तरीही वेतन मिळत नाही. त्यातून होणारी आर्थिक कुचंबणा मोठी आहे. शिक्षणक्षेत्र वाचवण्यासाठी सरकारचे अन्यायी धोरण परतवून लावण्याचा हा लढा संघटीतपणे लढण्यात येणार आहे.'

यावेळी प्रा. किशोर खिलारे, प्रा. जान्हवी रोडे व प्रा. शोभा पाटील यांनी मनोगत व्यक्त केले. अरुण शिंदे यांनी प्रास्ताविक केले.

०००

आंदोलनाची दिशा

मेळाव्यात सीएचबीधारक प्राध्यापकांच्या मागण्यांसाठी येत्या ६ ऑगस्टपासून राज्यभरात आंदोलनाची दिशा ठरविण्यात आली. ६ ऑगस्टला राज्यातील सर्व प्राध्यापकांच्या सह्यांचे निवेदन राज्यपालांना पाठविण्यात येणार असून, याच दिवशी प्राध्यापकांचा मागणी दिवस साजरा केला जाणार आहे. २० ऑगस्टला शिक्षण सहसंचालक कार्यालयासमोर निदर्शने करण्यात येणार आहेत. ११ सप्टेंबरला एक दिवस काम बंद आंदोलन करण्यात येणार आहे. इथपर्यंत सरकारने दखल न घेतल्यास २५ सप्टेंबरपासून बेमुदत बंद पुकारण्यात येणार आहे.

००००