म. टा. प्रतिनिधी, कोल्हापूर

येथील एक्स सर्व्हिसमन को-ऑपरेटिव्ह हाउसिंग सोसायटीचा मी अध्यक्ष होतो. माझ्यावर अविश्वास ठरावाची प्रक्रिया शहर उपनिबंधक प्रदीप बर्गे यांनी चुकीच्या पद्धतीने राबविली. काही कागदपत्रांत खाडाखोड केली आहे. त्यामुळे त्यांची चौकशी करून फौजदारी दाखल करावी, अशी मागणी माजी अध्यक्ष संचालक रमेश आनंदराव शिंदे यांनी रविवारी पत्रकार परिषदेत केली.

ते म्हणाले, 'एक्स सर्व्हिसमन को-ऑपरेटीव्ह हाउसिंग सोसायटी मार्केट यार्डनजीक आहे. सोसायटीचे मुक्त सैनिक वसाहतीत १४१ भूखंड आहेत. सोसायटीवर मी दोनवेळा संचालक म्हणून निवडून आलो. २०१६ मध्ये अध्यक्ष झालो. कामकाज चांगले करीत असूनही जुलैच्या पहिल्या आठवड्यात माझ्यावर अविश्वास ठराव आणला. अविश्वास ठराव ७-२ ने मंजूर झाला. मात्र, उपनिबंधक बर्गे यांनी अविश्वासाची प्रक्रिया चुकीची आणि नियमबाह्य राबवली. यामुळे माझ्यावर अन्याय झाला आहे. तीन अपत्यांप्रकरणी अपात्र संचालिकेची सही असलेल्या कागदपत्राचा वापर केला आहे. बर्गे यांनी कागदपत्रांत खाडाखोड केली आहे. त्यांच्याविरोधात सहकार आयुक्तांकडे तक्रार केली आहे. सखोल चौकशी होऊन त्यांच्यावर फौजदार दाखल करावी.'

०००००

अध्यक्षांसह सात जणांवर गुन्हा

मालवाहतूकदारांनी पुकारलेल्या चक्काजाम आंदोलनात राष्ट्रीय महामार्गावरील उजळाईवाडी येथे वाहतूक रोखल्याप्रकरणी कोल्हापूर जिल्हा लॉरी ऑपरेटर असोसिएशनचे अध्यक्ष सुभाष जाधव यांच्यासह एकूण सात जणांवर रविवारी रात्री गुन्हा दाखल करण्यात आला. जमावबंदीचा आदेश लागू करुनही असोसिएशनच्या पदाधिकाऱ्यांनी उल्लंघन केल्याप्रकरणी गोकुळशिरगांव पोलिसांनी आंदोलकांवर ही कारवाई केली आहे. राष्ट्रीय महामार्गावर समर्थ मंगल कार्यालयासमोर वाहने अडविल्याप्रकरणी सात जणांवर कारवाई करण्यात आली. या प्रकरणी सुभाष रामचंद्र जाधव (राजारामपुरी १४ वी गल्ली), भाउसाहेब होगळे, हेमंत दिसले, अमित पवार (रा. उजळाईवाडी, ता. करवीर), योगेश रेळेकर (नागांव, ता. हातकणंगले), बालाजी काटे, रेणुका कॉलनी, उजळाईवाडी) यांच्यासह १५ अज्ञातांवर गुन्हे दाखल केले.

म. टा. प्रतिनिधी, कोल्हापूर

'राष्ट्रवादी काँग्रेस पक्षाची विचारधार तळागाळापर्यंत पोहचविण्यासाठी कार्यकर्त्यांनी बूथ कमिट्या सक्षम कराव्यात. गटातटापेक्षा राष्ट्रवादी बळकट करु या. शिवाय पद घेऊन जे पक्ष कार्य करणार नाहीत त्यांची गय करणार नाही.'असा इशारा राष्ट्रवादीचे जिल्हाध्यक्ष ए. वाय. पाटील यांनी दिला. पक्षाचे नेते व माजी उपमुख्यमंत्री अजित पवार यांच्या वाढदिवसानिमित्त आयोजित कार्यक्रमात ते बोलत होते.

पवार यांच्या वाढदिवसानिमित्त पक्ष कार्यालयात केक कापण्यात आला. याप्रसंगी राष्ट्रवादी काँग्रेसच्या तालुका व विधानसभा मतदारसंघनिहाय अध्यक्षांच्या निवडी रविवारी जाहीर केल्या. राष्ट्रवादी जिल्हा कार्यालयात आयोजित कार्यक्रमात पदाधिकाऱ्यांना निवडीची पत्रे दिली. पक्षाच्या नूतन तालुकाध्यक्षांना निवडीची पत्रे दिली. यामध्ये मारुती पाटील (चंदगड), रामाप्पा करीगार (गडहिंग्लज), मुकुंद देसाई (आजरा), विश्वनाथ कुंभार (भुदरगड), शिवाजी देसाई (करवीर), दाजी पाटील (पन्हाळा), प्रकाश पाटील (गगनबावडा), दशरथ पिष्टे (हातकणंगले), प्रकाश पाटील (शिरोळ), प्रा. किसन चौगुले (राधानगरी), शिवानंद माळी (कागल), पंडितराव शेळके (शाहूवाडी) यांचा समावेश आहे.

नगरपालिका निहाय अध्यक्ष

'कोल्हापूर दक्षिण'अध्यक्षपदी आप्पासाहेब धनवडे यांची निवड झाली आहे. पक्षाचे जिल्हा सरचिटणीस यांनी बूथनिहाय कमिटीची संकल्पना विषद केली. याप्रसंगी बाबासाहेब पाटील आसुर्लेकर, संगीता खाडे, जयकुमार शिंदे आदी उपस्थित होते. दरम्यान नगरपालिका शहरनिहाय अध्यक्ष निवडले आहेत. विठ्ठल भमानगोळ (गडहिंग्लज), रणजित सुर्यवंशी (मुरगूड), संजय चितारी (कागल), सखाराम काशीद (पन्हाळा), प्रकाश पाटील (मलकापूर), फिरोज बागवान (पेठवडगाव), प्रकाश पाटील (इचलकरंजी), अस्लम फरास (जयसिंगपूर), जिन्नाप्पा पोवार (कुरुंदवाड) आणि विठ्ठल पाटील (हुपरी) अशा निवडी जाहीर केल्या.

म. टा. प्रतिनिधी, कोल्हापूर

रिल्हॉल्वरचा धाक दाखवून कामगाराला लुटल्याप्रकरणी ताब्यात घेतलेल्या तिघांकडून एक एअरगन आणि गुन्ह्यात वापरलेली एक दुचाकी जप्त केली. त्यांनी गुन्ह्याची कबुली दिली असून चौकशी सुरु असल्याचे राजारामुपरी पोलिसांनी सांगितले.

राजारामपुरी आठव्या गल्लीत २० जुलै रोजी दुपारी टेलरिंग कामगार संजय प्रल्हाद गुरव (वय ५८, रा. कुपेकर गल्ली, मंगळवार पेठ) याला रिव्हॉल्वरचा धाक दाखवून तिघा मोटारसायकवरील चोरट्यांनी लुटले होते. या प्रकरणी रेकॉर्डवरील तीन सराईत चोरट्यांना ताब्यात घेतले आहे. या प्रकरणाचा राजारामपुरी पोलिसांसह स्थानिक गुन्हे अन्वेषण शाखेकडून तपास सुरु आहे. जिल्हापोलिस प्रमुख संजय मोहिते यांनी शनिवारी या प्रकाराची दखल घेऊन तत्काळ शोध घेण्याचे आदेश दिले होते. त्याची अंमलबजावणी करून चार पथके तैनात केली होती. ताब्यात घेतलेल्या तीन चोरट्याकडून गुरव यांना धमकावून लंपास केलेल्या सोन्याच्या चेनची माहिती घेण्यात आली. सीसी टिव्हीज फुटेजमधील संशयितांची रेखाचित्रे तयार करण्यात आली. ताब्यात घेतलेल्या सराईत गुन्हेगारांकडून एक एअरगन ताब्यात घेतली आहे. परिसरातील सीसीटीव्हीचे फुटेज वरुनही या गुन्ह्यात ही एअरगन वापरली आहे का, याचा तपास सुरु केला आहे. फुटेजमध्ये मोटारसायकलवरून तिघे जण आले असून गुरव यांना मारहाण केल्याचे दिसते. त्यावरून पोलिसांनी चोरटे स्थानिक असल्याची प्राथमिक माहिती तपासात पुढे आली होती. तिघेही शिये एमआयडीसी येथे खासगी कारखान्यात काम करीत असून त्यांना दारुचे व्यसन आहे. त्यांनी लुटमारीचा पहिलाच प्रयत्न केल्याचे प्राथमिक तपासात स्पष्ट झाले आहे.

सासने मैदान परिसरात

पूर्ववैमनस्यातून तरुणाला मारहाण

कोल्हापूर : सासने मैदान परिसरात सायंकाळी सात वाजता पूर्ववैमनस्यातून एका तरुणाला बेदम मारहाण करून कारची तोडफोड करण्यात आली. या प्रकरणी रात्री उशीरापर्यंत शाहूपुरी पोलिसांत गुन्हा नोंदविण्याचे काम सुरू होते. हल्ला करून आठ ते दहा तरुण दुचाकीवरुन पळून गेले. या प्रकाराने परिसरात तणाव निर्माण झाला. दाभोलकर कॉर्नर ते सासने मैदान परिसरात एका कार चालकाची आणि मोटारसायकलस्वार तरुणांचा किरकोळ कारणावरुन वाद झाला होता. त्यावेळी तरुणांनी सासने मैदान येथे कारचा पाठलाग केला. दुचाकी रस्त्यात आडवी लावून कार अडवली. त्या कारचालकाला बाहेर काढून मारहाण करण्यास सुरुवात केली. कारचीही तोडफोड करण्यात आली. झालेल्या या प्रकाराची माहिती कारचालकाने मोबाइलवरुन नातेवाईकांना दिली. नातेवाईक येथे आल्यानंतर हल्लेखोरांनी पळ काढला. हल्ल्याचे नेमके कारण समजले नसल्याचे पोलिसांनी सांगितले.

पिसाळलेल्या कुत्र्याच्या

हल्ल्यात तीन मुले जखमी

कोल्हापूर : वेसर्डे (ता. भुदरगड) येथे पिसाळलेल्या कुत्र्याने रविवारी दुपारी अडीच वाजता केलेल्या हल्ल्यात तीन विद्यार्थी आणि एक म्हैस जखमी झाली. श्रेयश संतोष केळसकर (रा. तांबेचेवाडी पैकी पारगाव, ता. भुदरगड) असे यापैकी जखमी झालेल्या एका विद्यार्थ्यांचे नाव आहे. त्याला उपचारासाठी सीपीआरमध्ये दाखल केले आहे. श्रेयस घराच्या परिसरात खेळत असताना अचानक पिसाळलेल्या कुत्र्याने त्याच्या गाल आणि कानाचा चावा घेतला.

विष प्यालेल्याचा मृत्यू

कोल्हापूर : कौटुंबिक वादातून दारुच्या नशेत संजय नामदेव चौगले (वय ४५, रा. शाहूनगर परिते, ता. करवीर) या तरुणाने २० जुलै रोजी विष प्राशन केले होते. त्याला उपचारासाठी सीपीआरमध्ये दाखल केले होते. त्याचा उपचार सुरू असताना रविवारी त्याचा मृत्यू झाला.

अपघातात तरुण जखमी

कोल्हापूर : सिद्धर्नेली रोडवर दुचाकी अपघातात सूरज रुस्तुम मुल्लाणी (वय २७, रा. हुपरी, ता. हातकणंगले) हा तरुण जखमी झाला. शनिवारी रात्री दहा वाजता हा अपघात झाला. त्याच्यावर सीपीआरमध्ये उपचार सुरू आहेत.

मारहाणीत तरुण जखमी

कोल्हापूर : शाहूपुरीतील घोरपडे गल्लीत शनिवारी रात्री १० वाजता झालेल्या मारहाणीत मुकसाद इकबाल आदम-शेख (वय ३५, रा. शाहूपुरी) हा तरुण जखमी झाला. त्याला उपचारासाठी सीपीआरमध्ये दाखल केले.

साळोखेनगरात एक जखमी

कोल्हापूर : साळोखेनगरात अज्ञाताकडून शनिवारी रात्री झालेल्या मारहाणीत शेखर सुहास पाटील (वय २४, रा. साळोखेनगर) हा जखमी झाला. त्याला उपचारासाठी सीपीआरमध्ये दाखल केले.

दुचाकी अपघातात दोघे जखमी

कोल्हापूर : कोल्हापूर-पन्हाळा रोडवर आंबेवाडीजवळ झालेल्या दुचाकी अपघातात प्रकाश धोंडिराम कांबळे (वय २०) आणि स्वप्नील नाथा कांबळे (वय २०, रा. माळपुडे, ता. शाहूवाडी) जखमी झाले. त्याच्यांवर सीपीआरमध्ये उपचार सुरू आहेत.

शेळोलीत मोरीत

पडून एकाचा मृत्यू

गारगोटी : शेळोली (ता. भुदरगड) येथे गाव पाटाच्या मोरीत पडून जयसिंग श्रीपती चव्हाण (वय ५०) यांचा मृत्यू झाला. घरातील कर्त्या पुरुषाच्या झालेल्या दुर्देवी मृत्यूमुळे त्यांच्या कुंटुंबावर मोठा आघात झाला. जयसिंग चव्हाण हे रात्री जेवण झाल्यावर दूधाची किटली, लहान पिशवीतून जनावरांसाठी सुग्रास घेऊन साडेनऊ वाजता गावाशेजारी असलेल्या बेघरवस्तीमधील आपल्या जनावरांच्या गोठ्याकडे जातो असे सांगून गेले होते. सकाळी ते दूध घेऊन घरी न आल्यामुळे कुटूंबीयांनी शोध सुरू केला. सकाळी १०च्या दरम्यान गारगोटी-वेंगरुळ-वेसर्डे मार्गावरील शेळोली रस्त्यावर गावपाटाच्या मोरीजवळ दूधाची किटली, छत्री व पिशवी सापडली. या मोरीत पडून त्यांचा मृत्यू झाला. फौजदार अनंत कांबळे, हवालदार संभाजी पाटील तपास करीत आहेत.

म. टा. वृत्तसेवा, गारगोटी

गारगोटी आणि चंदगड ग्रामपंचायतीला नगरपंचायतीचा दर्जा देण्याबाबतचा निर्णय उच्च न्यायालयाच्या निर्देशानुसार चार आठवड्यात घेतला जाणार असल्याची माहिती नगरविकास राज्यमंत्री डॉ. रणजित पाटील यांनी विधानपरिषदेत दिली. गारगोटी व चंदगडवासीयांची नगरपंचायतीची मागणी मार्गस्थ होण्याची चिन्हे निर्माण झाली आहे.

सातारा जिल्ह्यातील मलकापूर नगरपंचायतीस नगरपरिषदेचा दर्जा द्यावा अशी लक्षवेधी सूचना सदस्य आनंदराव पाटील यांनी विधानपरिषदेत मांडली होती. या लक्षवेधीला उत्तर देताना मंत्री डॉ. रणजित पाटील यांनी राज्यातील ग्रामपंचायतींचे नगरपंचायत, नगरपरिषदेत रुपांतर करून नागरी दर्जा देणे बाबतची कार्यवाही महाराष्ट्र नगरपरिषद, नगरपंचायती व औद्योगीक नागरी अधीनियम, १९६५ मधील कलम ३, कलम ३४१ (अ) (२) व कलम ३४१ (अ) (१अ) मधील अटींची पुर्तता होत असल्यास शासनाकडून करण्यात येते. नगरपंचायतीचे नगरपरिषदेत रुपांतर करण्याची कार्यवाही कलम ३४१ (ड) मधील तरतुदीनुसार शासनाकडून केली जाते. याबाबत तालुका मुख्यालयातील ग्रामपंचायती व ज्या ग्रामपंचायतींची लोकसंख्या दहा हजारांपेक्षा जास्त आहे त्यांना नगरपंचायत, नगरपरिषदेत रूपांतर करण्याबाबतचा निर्णय लवकर घेण्यात येईल असेही त्यांनी सांगितले.

यावेळी झालेल्या चर्चेत आमदार सतेज पाटील यांनीही सहभाग घेऊन आपली भूमीका मांडली होती. शिरोळ, हुपरी या ठिकाणी नगरपालीका तर आजरा ग्रामपंचायतीला नगरपंचायतीचा दर्जा देण्यात आला आहे. चंदगड व गारगोटी ग्रामपंचायत नगरपंचायत करावी अशी मागणी होती. ग्रामपंचायतीमध्ये ठराव करून याबाबत पदाधिकाऱ्यांनीही मागणी केली होती. नगरपंचायत मागणीसाठी चंदगड, गारगोटीतील नागरीकांनी निवेदन, मोर्चे, बंद, लाक्षणिक उपोषण यासारखी आंदोलने केली होती. तरीही या ग्रामपंचायतींच्या दर्जात बदल झालेला नाही. शिरोळ, हुपरी, आजऱ्याला एक न्याय आणि चंदगड, गारगोटीला एक न्याय त्यामुळे सरकारविरोधात संतप्त प्रतिक्रिया उमटत आहेत. पालकमंत्री चंद्रकांत पाटील यांनी चंदगड व गारगोटीला नगरपंचायत करण्याची ग्वाही दिली होती. आता शासनाकडे वरिष्ठ दर्जाचे अधिकारी नसल्याचे सांगून वेळ मारून नेली जात आहे. मात्र सदस्य आनंदराव पाटील यांनी विधानपरिषदेत लक्षवेधी मांडून पुन्हा नगरपरिषद व नगरपंचायतीच्या मागणीचा प्रश्न उचलून धराला आहे.

म. टा. वृत्तसेवा , कुडित्रे

प्रतिपंढरपूर म्हणून ओळखल्या जाणाऱ्या करवीर तालुक्यातील नंदवाळ येथे आषाढी एकादशी यात्रेनिमित्त आलेल्या वारकऱ्यांच्या दिंड्याबरोबरच लहान-मोठ्या लाखो भाविकांच्या गर्दीने नंदवाळ नगरी गजबजून गेली. वारीत टाळ मृदंगाच्या गजरात विठूनामाचा अखंड जयघोष दुमदुमत होता.

सोमवारी आषाढी एकादशीच्या पहाटे अडीच वाजता विठ्ठल मंदिरात विठुराया, रुक्मिणी व सत्यभामा देवीच्या मूर्तींचे करवीर पंचायत समितीचे सभापती राजेंद्र व तेजस्विनी सूर्यवंशी यांच्या हस्ते पूजन करण्यात आले. पंचायत समिती सदस्या आश्विनी धोत्रे, सरपंच अस्मिता कांबळे, उपसरपंच सागर पाटील, कृष्णात पाटील, ज्योतिराम पाटील, शंकरराव फाटक यांसह स्थानिक देवस्थान समितीचे सदस्य उपस्थित होते. काकड आरती झाल्यानंतर भाविकांना दर्शनासाठी मंडपात सोडण्यात आले. करवीर, राधानगरी, भुदरगड, पन्हाळा, गगनबावडा तालुक्यातील दिंड्यासह सांगली, सातारा, कोकण आणि कर्नाटकातून भाविक नंदवाळला विठ्ठल दर्शनासाठी आले होते.

एकादशीच्या पूर्वसंध्येला सकाळी ८ वाजता कोल्हापूरहून पालखीचे प्रस्थान झाले. माऊलीच्या जयघोषात तल्लीन झालेल्या वारकऱ्यांच्या, भाविकांच्या उत्स्फूर्त प्रतिसादात पुईखडी येथे अश्वरिंगण पार पडले. दरम्यान ११ वाजता वाशी येथील खत कारखाना येथे बाचणीतील मानाची दिंडी आल्यावर ग्रामीण भागातील दिंड्यांच्या सहभागात आमदार चंद्रदीप नरके यांच्या हस्ते पूजन करून दुसरे अश्व रिंगण पार पडले. पायी दिंडीमध्ये जिल्हा परिषद सदस्य राहुल पाटील हे सहभागी झाले होते. वाशी येथे रिंगण पार पडल्यावर तेथे उपस्थित महिलांनी झिम्मा फुगडीचा ठेका धरला.

कोल्हापूरहून आलेल्या दिंडी व पालखींचे स्वागत मार्गावरील पीरवाडी, वाशी येथे करण्यात येत होते. तर हळदीमार्गे येणाऱ्या दिंडींचे व पालखीचे स्वागत हळदी, देवाळे, कांडगाव येथील ग्रामस्थांकडून होत होते. शिरोली दुमाला, बाचणी, सडोली खालसा, हळदी, कोथळी, देवाळे, कांडगाव, वाशी, पीरवाडी येथे सामाजिक संस्था, तरुण मंडळे, विविध संस्था, नंदवाळ परिसरात करवीर तालुका युवक कॉंग्रेस संघटनेबरोबरच संस्था, शेतकरी व ग्रामस्थांनी दूध, खिचडी, शाबू, राजगिरा लाडू, केळी, चहा इत्यादी फराळांचे वाटप करण्यात आले. कोल्हापूरहून आलेल्या दिंडी व पालखीचे नंदवाळ येथे सरपंच अस्मिता कांबळे व ग्रामस्थांच्यावतीने स्वागत करण्यात आले.

सायंकाळनंतर गर्दी कमी झाली. डीवायएसपी सूरज गुरव यांच्या देखरेखीखाली बंदोबस्त होता. रात्री उशीरापर्यंत येणाऱ्या भाविकांच्या सुरक्षेसंदर्भात पोलीस यंत्रणा व देवस्थान कमिटीकडून विशेष लक्ष पुरविण्यात आले होते.

मोफत आरोग्य सुविधा ...

यावर्षी वारीसाठी ॲस्टर आधार, प्राथमिक आरोग्य केंद्र इस्पूर्ली व कणेरी, सिध्दगिरी मठ कणेरी, महिपतराव बोंद्रे फाउंडेशन यांच्यासह अन्य वैद्यकीय संस्थांच्यावतीने वारकऱ्यांसाठी मोफत आरोग्य शिबिर, मोफत तपासणी व औषधोपचार सेवा पुरवण्यात आल्या.

४ लाख भाविकांची उपस्थिती...

विठुरायाच्या दर्शनासाठी वारकऱ्यांनी , भाविकांनी रविवारी चार वाजल्यापासूनच यायला सुरूवात केली होती. मंगळवारी पहाटे तीन वाजल्यापासून ते मध्यरात्रीपर्यंत भाविकांच्या दर्शनासाठी रांगा लागलेल्या होत्या. सुमारे दीड-दोन किलोमीटरपर्यंत लांब दर्शनरांगा होत्या. दिवसभरातील अलोट गर्दी पाहता सुमारे ४ लाख भाविकांनी उपस्थिती लावल्याचे देवस्थान मंडळाकडून सांगण्यात आले.

जाण्या-येण्यासाठी एकच मार्ग..

वाशी येथील नंदवाळ फाट्यापासून ते मुख्य मंदिरापर्यंत जाण्यासाठी एकच मार्ग आहे. लाखोंच्या संख्येने दर्शनासाठी जेवढे भाविक येत होते, तेवढेच भाविक दर्शन घेऊन माघारी फिरत होते. ही सर्व ये-जा एकाच मार्गावरून होत होती. पावसामुळे रस्त्याकडेला प्रचंड चिखल होता. गर्दीमुळे भाविकांना मोठा त्रास सहन करावा लागत होता.

फोटो आहे.

म. टा. प्रतिनिधी, कोल्हापूर

मुंबई हायकोर्टाच्या नियोजित कोल्हापूर खंडपीठसाठी शेंडा पार्क येथील ७५ एकर जागा आरक्षित करण्यासाठी परिपूर्ण प्रस्ताव विभागीय आयुक्तांकडे ३० जुलैअखेर पाठविण्याचा निर्णय सोमवारच्या बैठकीत झाला. येथील जिल्हाधिकारी कार्यालयात बार असोसिएशनचे पदाधिकारी, आरोग्य विभाग, सार्वजनिक बांधकाम विभागाच्या अधिकाऱ्यांची बैठक आयोजित केली होती.

खंडपीठासाठी शेंडा पार्क येथील आरोग्य विभागाकडील जागेचा प्रस्ताव विभागीय आयुक्तांकडे पाठविला होता. त्यात त्रुटी काढण्यात आल्या. या त्रुटींमध्ये खंडपीठासाठी जागा आरक्षित करण्यासंबंधी विधी व न्याय विभागाची मान्यता आहे किंवा नाही, त्याचा पुरावा जोडलेला नाही, मोजणी नकाशातील वाटप क्षेत्र, रस्ते आदींचा तपशील जोडलेला नाही, महानगरपालिकेने जमीन देण्यासंबंधी स्पष्ट अभिप्राय दिलेला नाही, जागेचा वस्तुस्थितीजन्य पंचनामा केलेला नाही, सातबारा उताऱ्यावर कब्जेदार शेंडा पार्क लेपर कॉलनी अशी नोंद आहे. त्यांच्या वापरात किती जमीन आहे, आरोग्य विभागाच्या क्रमांक १४ विभागाने त्या जागेची मागणी केली आहे, त्याची सध्याची परिस्थिती काय आहे, नगर रचना विभागाचा अभिप्राय दिलेला नाही, अशा महत्वाच्या १५ त्रुटींचा समावेश आहे. बैठकीत प्रत्येक त्रुटीवर चर्चा करण्यात आली.

निवासी उपजिल्हाधिकारी संजय शिंदे यांनी सकारात्मक प्रस्ताव पाठविण्यासाठी सर्व विभागांनी सहकार्य करावे, असे आवाहन केले. आरोग्य उपसंचालक प्रशासनातर्फे आरोग्य विभाग अत्यावश्यक सेवेत आहे. त्यासाठी ही जागा आवश्यक आहे, असे सांगितले. हायकोर्ट मुंबईला असल्याने सामान्य पक्षकारांची गैरसोय होत आहे. अनेक दावे प्रलंबित आहेत. त्यामुळे कोल्हापूर खंडपीठासाठी जमीन देण्यासंबंधी सकारात्मकता दाखवावी, अशी विनंती बार असोसिएशनचे अध्यक्ष अॅड. प्रशांत चिटणीस यांनी केली. चर्चा झाल्यानंतर सर्व त्रुटी पूर्ण करून परिपूर्ण अहवाल २७ ते ३० जुलैअखेर विभागीय आयुक्त दीपक म्हैसेकर यांच्याकडे पाठविण्यावर एकमत झाले. त्रुटी पूर्ण करण्यासाठी संबंधित विभागांनी मदत करावी, अशा सूचना शिंदे यांनी केल्या.

यावेळी करवीरचे प्रांताधिकारी सचिन इथापे, आरोग्य उपसंचालक प्रकाश पाटील, जिल्हा आरोग्य अधिकारी डॉ. योगेश साळे यांच्यासह विविध विभागाचे अधिकारी, बार असोसिएशनचे उपाध्यक्ष अॅड. आनंदराव जाधव, सचिव सुशांत गुडाळकर आदी उपस्थित होते.

--------------

कळंब्यात सव्वालाखाची घरफोडी

म. टा. प्रतिनिधी, कोल्हापूर

कळंबा येथे कोल्हापूर-गारगोटी मार्गावरील घोडके मळा परिसरात चोरट्यांनी बंद घराचे कुलूप उचकटून तीन तोळे सोन्याचे दागिने व रोख २० हजार रुपये असा सव्वा लाख रुपयांचा मुद्देमाल लंपास केला. हा प्रकार सोमवारी (ता. २३) सकाळी उघडकीस आला. १७ ते २२ जुलै दरम्यान चोरी झाल्याचा संशय आहे. याबाबत गजानन शंकरराव उन्ने (वय ५४, रा. लक्षतीर्थ वसाहत) यांनी करवीर पोलिस ठाण्यात फिर्याद दिली.

करवीर पोलिसांनी दिलेल्या माहितीनुसार, गजानन उन्ने हे कृषी विभागात नोकरी करतात. उन्ने यांचे कळंब्यातील घोडके मळ्यात जुने घर आहे. या घरात त्यांची आई राहते, तर सध्या ते लक्षतीर्थ वसाहत येथे राहतात. प्रकृती बिघडल्यामुळे सहा महिन्यांपासून आई लक्षतीर्थ वसाहत येथे मुलाकडे राहत असल्याने घोडके म‌ळ्यातील घर बंद आहे. १७ जुलैला गजानन उन्ने घोडके मळ्यातील घरात जाऊन आले होते. सोमवारी सकाळी उन्ने घरी गेल्यानंतर त्यांना घराचे कुलूप उचकटल्याचे दिसले. तसेच घराची कौलेही निघाली होती. कपाटांमधील साहित्यही विस्कटले होते. चोरी झाल्याचे लक्षात येताच त्यांनी करवीर पोलिसांना घटनेची माहिती दिली. चोरट्यांनी २० हजार रुपये आणि तीन तोळ्यांचे दागिने लंपास केल्याची फिर्याद त्यांनी पोलिसात दिली आहे. पोलिसांनी पंचनामा करून अज्ञाताविरोधात गुन्हा दाखल केला.

अल्पवयीनसह सातजणांना अटक

म.टा.वृत्तसेवा,इचलकरंजी -

गुन्हेगारी टोळीत सहभागी होण्यास नकार देणाऱ्या जयभीमनगर झोपडपट्टीतील रामा कचरु गरड (वय ३०) याचा सोमवारी भर दुपारी फिल्मीस्टाईलने पाठलाग करत धारदार शस्त्राने तब्बल १५ वार करुन निर्घृणपणे खून करण्यात आला. पोलिस ठाण्यापासून हाकेच्या अंतरावरच घडलेल्या खून प्रकरणामुळे शहरात खळबळ माजली होती. या प्रकरणाचा पोलिसांनी अवघ्या तीन तासातच छडा लावत अल्पवयीन साथीदारासह ७ जणांच्या मुसक्या आवळल्या.

संतोष उर्फ ऋष्या बाळू बाबर (वय २०, रा. आभारफाटा चंदूर), आसिफ महंमद शेख (वय २०), राजेश उर्फ लाज्या नामदेव चव्हाण (वय २४ दोघे रा. भाटले मळा, दत्तनगर), किरण उर्फ किया आप्पासो वडर (वय २० रा. जयभीमनगर), सुहेल सिराज शेख (वय २१ रा. कोरोची), अक्षय बबन कल्ले (वय २० रा. तारदाळ) अशी संशयित आरोपींची नावे असून त्यांनी खुनाची कबुली दिली असल्याची माहिती अप्पर पोलिस अधिक्षक श्रीनिवास घाडगे यांनी पत्रकारांना दिली.

घाडगे म्हणाले, 'खून प्रकरणातील मुख्य सूत्रधार हा रेकॉर्डवरील सराईत गुन्हेगार असून अल्पवयीन असल्याने त्याची बालसुधारगृहात रवानगी करण्यात आली होती. पण तेथून त्याने पलायन केले होते. त्याच्या टोळीवर मोक्का अंतर्गत कारवाई करण्यात आल्यामुळे टोळीतील सर्वजण सध्या पुण्यातील कारागृहात आहेत. टोळीचे वर्चस्व कमी होऊ नये यासाठी नवीन टोळी निर्माण करण्यासाठी हालचाली सुरु होत्या. त्यातूनच मयत रामा गरड याला टोळीत सामील होण्याचा तगादा लावला होता. गरड याच्यावरही विविध पोलिस ठाण्यात काही गुन्हे दाखल आहेत. परंतु, गरड हा गुन्हेगारी विश्वातून बाजूला जात गवंडी काम करुन उदरनिर्वाह करत होता. त्यामुळे त्याने टोळीत सहभागी होण्यास नकार दर्शविला होता. त्यातूनच वाद निर्माण होऊन गरड याने यासंबंधी पोलिसांना माहिती देण्याची धमकीही दिली होती.

सोमवारी सकाळी रामा गरड हा मोटरसायकल घेऊन घरातून बाहेर पडला होता. दुपारच्या सुमारास तो डॉ. आंबेडकर पुतळ्याकडून थोरात चौक रिंगरोड मार्गावरुन जात होता. त्यावेळी तीन मोटरसायकलींवरुन काहीजण आपला पाठलाग करत असल्याचा संशय आल्याने त्याने मोटरसायकल दामटण्याचा प्रयत्न केला. पण थोरात चौक परिसरात संशयितांनी त्याला गाठत गाडी आडवी मारत गाडीसह खाली पाडले. आणि तलवारी, कोयता अशा धारदार शस्त्रांसह दगडांनी हल्ला चढविला. हल्लेखोरांनी त्वेषाने गरड याच्यावर तब्बल १५ वार केले. त्यामध्ये काही वार वर्मी बसल्याने गरड हा जागीच ठार झाला. त्यानंतर संशयितांनी घटनास्थळावरुन पलायन केले.

या घटनेची माहिती समजताच स्थानिक गुन्हे शाखा पथकाचे सहायक पोलिस निरीक्षक सतीश शिंदे, अमोल माळी, गावभाग पोलिस ठाण्याचे पोलिस निरिक्षक प्रदीप काळे यांनी घटनास्थळी धाव घेतली. मृतदेहाचा चेहरा ओळखत नसल्याने पोलिसांनी प्रथम त्याची ओळख पटविण्यासाठी हालचाली केल्या. त्यातून तो मृतदेह गरड याचा असल्याची माहिती मिळाल्यानंतर गरड याच्या भावाला आणून ओळख पटविण्यात आली. त्यानंतर काही संशयितांची नावे निष्पन्न झाल्यानंतर संशयितांचा शोध सुरु केला. त्यामध्ये सर्व संशयित लक्ष्मी औद्योगिक वसाहतीजवळील डोंगरात लपवून बसल्याची माहिती मिळाल्यानंतर पोलिसांनी तातडीने धाव घेऊन सर्वांना ताब्यात घेतले. या सर्वांना गावभाग पोलिसांनी रात्री उशीरा अटक केली आहे.

राज्य सरकारचे अंमलबजावणी करण्याचे आदेश जिल्हा प्रशासनाला आदेश

Satish.ghatage@timesgroup.com

Tweet:satishgMT

कोल्हापूर

शेतामध्ये किटकनाशक फवारणी करीत असताना विषबाधा झाल्याने मृत्यूमुखी पडणाऱ्या व्यक्तींच्या कुटुंबाला पाच लाख रूपयांची मदत करण्याचा निर्णय राज्य सरकारने घेतला आहे. सरकारने या संदर्भात अधिसूचना काढली असून त्याची अंमलबजावणी करण्याचे आदेश जिल्हा प्रशासनाला दिले आहेत.

विदर्भात बोंडअळीचा नायनाट करण्यासाठी किटकनाशकांची फवारणी केलेल्या अनेक शेतकऱ्यांचा बळी गेला होता. बळी गेलेल्या शेतकऱ्यांच्या कुटुंबांना मदत व्हावी, अशी मागणी सातत्याने होत होती. यासाठी नागपूर खंडपीठात २०१७ मध्ये जनहित याचिका दाखल करण्यात आली होती. कोर्टाने दिलेल्या आदेशानुसार सरकारने किटकनाशक फवारणी करताना झालेल्या विषबाधेत मृत्यूमुखी पडणाऱ्या कुटुंबाला मदत करण्याचा निर्णय घेतला आहे. त्यासाठी २००४ मध्ये काढलेल्या अध्यादेशात सुधारणा केली आहे. जुन्या अध्यादेशानुसार दहशतवादी व नक्षलवादी कारवायात मृत्यूमुखी पडलेल्या व जखमींना मदत दिली होती. या आदेशात सुधारणा करत शेतामध्ये किटकनाशक फवारणी करत असताना विषबाधा होणारी दुर्घटना, सार्वजनिक ठिकाणी होणाऱ्या चेंगराचेंगरीच्या घटना, निवासी इमारती कोसळण्याच्या घटनांमध्ये बाधित होणाऱ्या आपदग्रस्तांना मदत देण्याचा निर्णय घेतला आहे.

कोल्हापूर जिल्ह्यात शेतकरी ऊस व भाजीपाल्यावर कीड पडू नये यासाठी किटकनाशकांची फवारणी करतात. उसावर लोकरी मावा, शेंडा मुरगुळणारी अळी, हुमणी, नदीकाठावरील शेतामध्ये पाने खाणारी अळी, जमिनीला बुरशी आल्यावर किटकनाशकांची फवारणी केली जाते. अनेक कंपन्याची किटकनाशके प्रमाणित नसल्याने त्याचा फटका शेतकऱ्यांना बसतो. किटकनाशक फवारणी करताना बूट, प्लास्टिक कोट, डोळ्याला गॉगल, हॅन्डग्लोव्हज टोपी घालण्याची सूचना केलेली असते. बहुतेकदा ही सूचना पाळली जात नाही. काहीवेळा किटकनाशकांचा नायनाट करण्यासाठी दोन किटकनाशके एकत्र करुन डोस दिला जातो.

किटकनाशके नाकावाटे फुफ्फुस व रक्तात जाऊन विषबाधा होते. अशावेळी वेळेत उपचार झाल्यास शेतकरी बरा होतो, पण तत्काळ व वेळेत उपचार न झाल्याने विषबाधेमुळे दगावण्याच्या घटना घडतात. जिल्ह्यात अनेक शेतकरी यापूर्वी किटनाशकांच्या फवारणीत मृत्यूमुखी पडले आहेत. अशा घटनांत मृत्यूमुखी पडलेल्यांना यापूर्वी कोणतीही मदत मिळत नव्हती. पण आता सरकारने अशा घटनेनील मृत व्यक्तींच्या कुटुंबियांना पाच लाख रुपये देण्याचा निर्णय घेतला आहे. फवारणी करताना डोळे, कानावर परिणाम होऊन अवयव निकामी झाल्यास ५० हजार ते दोन लाख रुपयांची मदत मिळू शकते. पण अशी मदत मिळवण्यासाठी सरकारने अटी घातल्या आहेत. मृत्यूचे कारण प्राधिकृत वैद्यकीय अधिकाऱ्यांच्या स्वाक्षरीचे प्रमाणपत्र आवश्यक केले आहे. मयत व्यक्ती पोलिसांकडील गुन्ह्यात आरोपी नसावा अशी अट घातली आहे. वस्तुस्थिती व कागदपत्रांची छाननी करुन मदत देण्याचे आधिकार जिल्हाधिकाऱ्यांना दिले आहेत.

००००००

कोट

'सरकारने मदत देण्याचा आदेश काढला असला तरी त्याची अंमलबजावणी कशी होते यावर बरेच अवलंबून आहे. पण मदतीपेक्षा शेतकऱ्यांनी किटकनाशकांची फवारणी करताना काळजी घेण्याची गरज आहे. तसेच प्रमाणित नसणाऱ्या किटकनाशक कंपन्यावर कारवाई केली पाहिजे.

सुधाकर चव्हाण, शेतकरी

००००

'बोंडअळीवरील किटकनाशकांच्या फवारणीमुळे शेतकऱ्यांचा मृत्यू झाल्याच्या पार्श्वभूमीवर सरकारने अध्यादेश काढला आहे. या आदेशाची अंमलबजावणी जिल्हा प्रशासनाकडून केली जाईल.

संजय शिंदे, निवासी उपजिल्हाधिकारी

००००

'किटकनाशकांच्या फवारणीमुळे विषबाधा झाल्यावर शेतकऱ्यांना उलट्या होतात. उलट्या झाल्यानंतर बाधित व्यक्तीला ताबडतोब हॉस्पिटलमध्ये उपचारास दाखल करावे. सध्या उपचाराच्या चांगल्या सुविधा असल्याने विषबाधेपासून शेतकरी वाचण्याच्या घटनेत वाढ झाली आहे.

डॉ. प्रविण नाईक

राधानगरी धरणक्षेत्रात पाऊस

म. टा. वृत्तसेवा, राधानगरी

राधानगरी तालुक्यात पावसाची उघडझाप सुरू आहे. सकाळच्या सत्रात जोरदार पाऊस तर दुपारी उघडीप आहे. राधानगरी जलाशयाचे दोन स्वयंचलित दरवाजे खुले असून साडेचार हजार क्युसेस पाण्याचा विसर्ग भोगावती नदीपात्रात सुरू आहे.

तालुक्यात सोमवारी सकाळी जोरदार पाऊस पडला तर दुपारी उघडीप राहिली. अधुनमधून येणाऱ्या पावसाच्या जोरदार सरी वगळता दिवसभर पावसाची उघडीप राहिली. राधानगरीतील लक्ष्मी जलाशयाचे दोन स्वयंचलित दरवाजे अद्याप खुले आहेत. जलाशयातून साडेचार हजार क्युसेस पाण्याचा विसर्ग भोगावती नदीपात्रात सुरू आहे. भोगावती नदीच्या पुराची पातळी स्थिर असून शिरगाव, तारळे, राशिवडे येथील बंधारे पाण्याखाली आहेत. राधानगरी धरणक्षेत्रात कालचा पाऊस ८० मिलीमीटर झाला असून एकूण पाऊस ३११९ मिलीमीटर झाला आहे. काळमावाडीतील राजर्षी शाहू सागर जलाशय नव्वद टक्के भरला आहे. धरणातून तीन हजार क्युसेस पाण्याचा विसर्ग दुधगंगा नदीपात्रात सुरु आहे. दूधगंगा नदीची पूरपातळी वाढली आहे. धामोड येथील तुळशी जलाशय शंभर टक्के भरला आहे.

आजरा-आंबोली रस्त्यावरील

खड्डयात शिवसेनेचे वृक्षारोपण

म. टा. वृत्तसेवा, आजरा

कोकणाकडे जाणारा महत्वाचा मार्ग असलेल्या आजरा-आंबोली मार्गावर सध्या खड्डेच खड्डे आहेत. या मार्गावर पडलेल्या खड्ड्यांकडे सार्वजनिक बांधकाम विभागाचे दुर्लक्ष झाले. त्याकडे या विभागाचे लक्ष वेधण्यासाठी आजरा शिवसेनेच्यावतीने वृक्षारोपण करण्यात आले. मोठा अपघात आणि जीवितहानी झाल्याशिवाय हा विभाग जागा होत नाही. यासाठी शिवसेनेच्यावतीने हा उपक्रम पार पाडण्यात आला.

आजरा-आंबोली हा केवळ एकच रस्ता नव्हे तर तालुक्यातील सर्वच प्रमुख रस्ते हे खड्डेमय आहेत. रस्ता कुठे आणि खड्डे कुठे हेच समजत नसल्याची स्थिती आहे. त्यामुळे याकडे सार्वजनिक बांधकाम खात्याचे लक्ष वेधून खड्डे त्वरित भरून घेण्याची कार्यवाही व्हावी, यासाठी शिवसेनेने पुढाकार घेत आंदोलन केल्याचे सांगण्यात आले. यावेळी शिवसेनेचे कोल्हापूर जिल्हाप्रमुख विजय देवणे, संघटक संग्राम कुपेकर, उपसंघटक संभाजी पाटील, आजरा तालुकाप्रमुख राजेंद्र सावंत, गडहिंग्लज तालुकाप्रमुख दिलीप माने, महिला संघटक श्वेता नाईक, युवराज जाधव, युवराज पोवार, संजय येसादे, प्रतिक क्षीरसागर, सागर कुराडे, प्रकाश मुरुकटे, वसंत नाईक आदींसह कार्यकर्ते उपस्थित होते.

बटालियनचे एसपी चौकशीला गैरहजर

म. टा. प्रतिनिधी, कोल्हापूर

सामूहिक लाचप्रकरणी लाचलुचपत प्रतिबंधक विभागाचे उपअधीक्षक गिरीश गोडे यांनी राज्य राखीव बटालियन क्रमांक तीनचे पोलिस अधीक्षक कुशल सपकाळे यांना नोटीस पाठवून चौकशीला बोलवले होते. मात्र, सोमवारी सपकाळे चौकशीला उपस्थित राहिले नाहीत. तसेच अनुपस्थितीचे सबळ कारणही कळवले नाही, त्यामुळे एसीबीने त्यांना फेरनोटीस पाठवल्याचे गोडे यांनी सांगितले.

भारतीय बटालियनचे अधिकारी आणि कर्मचारी असे सहा संशयित लाच घेताना रंगेहात सापडले होते. याप्रकरणी एसीबीने संशयितांना अटक केली आहे. त्यांची पाच दिवसांची पोलिस कोठडी संपल्यानंतर न्यायालयीन कोठडीत रवानगी झाली. जामीन मिळावा यासाठी संशयितांच्या वकिलांनी जिल्हा न्यायालयात अर्ज केला आहे. सोमवारी त्यांच्या जामीन अर्जावर सुनावणी झाली, मात्र याबाबत मंगळवारी निर्णय होण्याची शक्यता आहे.

म. टा. प्रतिनिधी, कोल्हापूर

कोल्हापूर जिल्हा मध्यवर्ती सहकारी बँकेच्या दहा मोठ्या थकबाकीदारांकडील वसुलीबाबत कठोर भूमिका घेण्याचा निर्णय बँक प्रशासनाने घेतला आहे. या थकबाकीदारांकडे १०४ कोटी १३ लाख ३००० रुपयांची थकबाकी आहे. पहिल्या टप्प्यात थकबाकीदारांची यादी वर्तमानपत्रे व फलकावर प्रसिद्ध केली जातील. दुसऱ्या टप्प्यात थकबाकीदारांच्या दारात जाऊन ढोल-ताशा वाजवण्यात येणार आहे. वसुलीसाठी सहकार्य न केल्यास शेवटचा पर्याय म्हणून मालमत्तांचा लिलाव करण्याचा निर्णय घेण्यात आला आहे. सोमवारी जिल्हा बँकेत औद्योगिक कर्ज व ग्रामीण कारागीर योजना समितीच्या बैठकीत हा निर्णय झाला. अध्यक्षस्थानी बँकेचे अध्यक्ष, आमदार हसन मुश्रीफ होते.

बँकेच्या बड्या थकबाकीदारांच्या कर्जाच्या वसुलीसाठी गेली अनेक वर्षे प्रयत्न सुरू आहेत. थकबाकीमुळे २००९ मध्ये बँकेवर प्रशासक नियुक्ती झाली. त्यावेळी बँकेचे अधिकारी, कर्मचाऱ्यांनी थकबाकीदारांच्या दारात जाऊन घंटानाद, ढोल-ताशा वाजवून आंदोलन केले. कर्जाची बरखास्त संचालक मंडळावरही जबाबदारी निश्चित झाली होती. २०१५मध्ये प्रशासक हटवून नवीन संचालक मंडळ निवडले गेले. अध्यक्ष मुश्रीफ यांच्या अध्यक्षतेखाली संचालकमंडळ गेली तीन वर्षे कार्यरत आहे. वसुलीसाठी थकबाकीदार सहकार्य करत नसल्याने त्यांच्याविरोधात कठोर भूमिका घेण्याचा निर्णय बैठकीत झाला. पहिल्या टप्प्यात थकबाकीदारांची यादी प्रसिद्ध केली जाणार आहे. या संस्थांच्या संचालकांची यादी जाहीर केली जाईल. संचालकांच्या नावाचे फलक त्यांच्या कार्यक्षेत्रातील गावांत लावण्यात येतील. त्यांच्या दारात जाऊन ढोल-ताशा वाजवून थकबाकी भरण्याचे आवाहन केले जाणार आहे. शेवटचा टप्पा म्हणून मालमत्ता लिलावाची प्रक्रिया होईल असे ठरले.

राजकीय हितसंबधातून कर्जवाटप

राजकीय हितसंबधातून यापूर्वीच्या संचालकमंडळाने कर्जवाटप केले होते. आताच्या थकबाकीत बँकेचे माजी संचालक संजय पाटील यांच्याशी संबधित संस्था आहेत. त्यामध्ये शेतकरी सहकारी तंबाखू खरेदी विक्री संघ, महाराष्ट्र स्टेट टोबॅको फेडरेशन, मयूर वाहतूक संघ, एस. के. पाटील सहकारी बँक या संस्थांकडे ४० टक्के थकबाकी आहे. त्याच्या वसुलीसाठी जिल्हा बँकेचा कस लागणार आहे.

थकबाकीदार संस्था आणि थकबाकी (आकडेवारी लाखात)

शेतकरी सहकारी तंबाखू खरेदी-विक्री संघ कोल्हापूर २७१२.८७

राधानगरी तालुका सहकारी मका प्रक्रिया संस्था ठिकपुर्ली ३३७०.३३

विजयमाला बाबूराव देसाई सहकारी वाहतूक संस्था, मडीलगे बुद्रुक १०८०.१७

शेतीमाल सहकारी प्रक्रिया संस्था, हेरवाड ६१४.०९

भोगावती शेतकरी सहकारी कुकुटपालन संस्था परीते ६२८.११

हिरण्यकेशी शेतीमाल सहकारी प्रक्रिया संस्था निलजी ८५८.७६

महाराष्ट्र स्टेट टोबॅको फेडरेशन- मार्केट यार्ड, कोल्हापूर ३७०.५७

मयूर सहकारी वाहतूक संघ कोल्हापूर २५१.६५

पंत सहकारी वस्त्रोद्योग प्रोसेस संस्था तिळवणी २८७.९४

एस. के. पाटील सहकारी बँक कुरुंदवाड २३८.५४

म. टा. प्रतिनिधी, कोल्हापूर

हातकणंगले तालुक्यातील शिरोली व नागाव गावातील कचरा विल्हेवाटीसाठी जागा उपलब्ध करुन दिली जाईल. त्यासाठी ग्रामपंचायतींच्यामार्फत जिल्हा परिषदेने जागा मागणीचा प्रस्ताव पाठवावा, असा आदेश जिल्हाधिकारी अविनाश सुभेदार यांनी दिला.

जिल्हाधिकारी कार्यालयात जिल्ह्यातील औद्योगिक वसाहतीतील समस्यांवर चर्चा करण्यासाठी आयोजित केलेल्या 'उद्योग' मित्र बैठकीच्यावरी त्यांनी आदेश दिले. बैठकीत जिल्हाधिकाऱ्यांनी औद्योगिक वसाहतीतल अडचणी व विविध प्रश्नांचा आढावा घेतला. वसाहतीतील अंतर्गत रस्त्यांची स्थिती, ईएसआय आदी प्रश्नांवर चर्चा झाली. शिरोली औद्योगिक वसाहतील उद्योजक व कारखानदारांच्या प्रतिनिधींनी शिरोली व नागाव या दोन गावात रस्त्यावरच कचरा टाकला जात असल्याने त्रास होत आहे, याकडे लक्ष वेधून कचरा प्रश्नांवर मार्ग काढावा अशी मागणी केली. जिल्हाधिकारी सुभेदार यांनी जिल्हा परिषदेतील ग्रामविकास अधिकाऱ्यांना जागेबाबत विचारणा केली असता त्यांनी फक्त गायरानाची जागा शिल्लक असल्याची माहिती दिली. दोन्ही गावात कचरा टाकण्यासाठी जागा उपलब्ध असेल तर जागा मागणीचा प्रस्ताव जिल्हाधिकारी कार्यलयाकडे पाठवावा, असे आदेश दिले.

बैठकीला महानगरपालिका आयुक्त डॉ. अभिजित चौधरी, जिल्हा परिषद प्रभारी मुख्य कार्यकारी अधिकारी सुषमा देसाई, ग्रामपंचायत विभाग उपमुख्य कार्यकारी अधिकारी राजेंद्र भालेराव, जिल्हा उद्योग केंद्राचे महाव्यवस्थापक एस.बी. शेळके, स्मॅकचे राजू पाटील आदी उपस्थित होते.

म. टा. प्रतिनिधी, कोल्हापूर

ऑल इंडिया मोटार ट्रन्सपोर्ट असोसिएशनकडून सुरू असलेल्या देशव्यापी चक्काजाम आंदोलनाची तीव्रता सोमवारी वाढली. आंदोलकांनी शाहू मार्केट यार्डसमोर दोन ट्रकच्या चाकांमधील हवा सोडली, तर पोलिसांचा दबाव झुगारून गनिमी काव्याने वाहने अडवण्याचा निर्धार आंदोलकांनी केला. याशिवाय जिल्हाधिकाऱ्यांच्या आवाहनानंतरही सरकारी धान्याची वाहतूकही रोखण्याचा निर्णय लॉरी ऑपरेटर्स असोसिएशनने घेतला. चार दिवस पुरेल इतकाच इंधन आणि धान्यसाठा जिल्ह्यात असल्याने जिल्हा प्रशासन खडबडून जागे झाले आहे.

इंधन दरात सातत्याने होणारी वाढ रोखण्यासह विविध मागण्यांसाठी ऑल इंडिया मोटार ट्रान्सपोर्ट असोसिएशनमार्फत शुक्रवारपासून देशव्यापी चक्काजाम सुरू आहे. जिल्ह्यातही आंदोलनाची तीव्रता वाढली असून, सोमवारी बहुतांश मालवाहतूक बंदच राहिली. गेल्या चार दिवसात सुमारे १०० कोटींची उलाढाल ठप्प आहे. रविवारी रात्री उशिरा दोन ट्रकमधून छुप्या पद्धतीने वाहतूक सुरू असल्याची माहिती आंदोलकांना मिळाली होती. मार्केट यार्डसमोर आंदोलकांनी दोन्ही ट्रक अडवून चाकांमधील हवा सोडली. आंदोलनाची तीव्रता वाढवण्यासाठी सोमवारी संध्याकाळी शाहूपुरीतील कार्यालयात बैठक घेण्यात आली. पोलिसांचा दबाव झुगारून गनिमी काव्याने वाहने अडवण्याचा निर्णय बैठकीत झाला. रात्रीची छुपी वाहतूक रोखण्यासाठी आंदोलक महामार्गांवर नजर ठेवणार आहेत. शिवाय ट्रान्सपोर्ट कंपन्या आणि वाहन मालकांनाही माल न भरण्याच्या सूचना असोसिएशनने दिल्या आहेत.

चक्काजाम आंदोलनामुळे जिल्ह्यातील धान्य आणि इंधन साठ्याचा आढावा घेण्यासाठी जिल्हाधिकारी अविनाश सुभेदार यांनी सोमवारी सकाळी धान्य व्यापारी संघटनांचे पदाधिकारी आणि इंधन कंपन्यांच्या अधिकाऱ्यांची बैठक घेतली. यावेळी गॅस वितरण कंपन्या, पेट्रोल पंप असोसिएशनचे पदाधिकारी उपस्थित होते. चार दिवस पुरेल इतकाच इंधन आणि धान्याचा साठा जिल्ह्यात उपलब्ध आहे. आंदोलन काळात गॅस, पेट्रोल, डिझेल आणि सरकारी धान्याची वाहने अडवू नयेत, असे आवाहन जिल्हाधिकारी सुभेदार यांनी आंदोलकांना केले. मात्र, सोमवारी संध्याकाळी लॉरी ऑपरेटर्स असोसिएशनच्या बैठकीत याबाबत असमर्थता व्यक्त करण्यात आली. सोमवारपर्यंत ९० टक्के धान्य आणि इंधनाचा पुरवठा सुरळीत झाल्याचा दावा जिल्हा प्रशासनाने केला आहे. इंधन आणि रेशनचे धान्य अडवल्यास पोलिस बंदोबस्तात वाहतूक सुरू ठेवण्याचा विचार जिल्हा प्रशासनाकडून सुरू आहे.

इंधन टंचाईचा धोका

चक्काजाम आंदोलन तीव्र करण्यासाठी पेट्रोल, डिझेल आणि गॅसचे टँकरही अडवले जाणार आहेत. इंधन आणि सरकारी धान्याचा समावेश अत्यावश्यक सेवेत असल्याने ते अडवू नये, असे आवाहन जिल्हा प्रशासनाने केले होते. सध्या केवळ चार दिवसांचा साठा जिल्ह्यात असल्याची माहिती जिल्हा पुरवठा अधिकाऱ्यांनी दिली. इंधनाची वाहने अडवल्यास टंचाईचा धोका उद्भ‌वणार आहे.

सरकारने अजूनही आंदोलन गांभीर्याने घेतलेले नाही. आता गनिमी काव्याने इंधन पुरवठा करणारी वाहने आणि सरकारी धान्य वाहतूक करणारी वाहने अडवली जातील. व्यापारी संघटनांनीही पाठिंबा दिला असून, होणाऱ्या परिणामांची जबाबदारी सरकारचीच आहे.

सुभाष जाधव, अध्यक्ष, लॉरी ऑपरेटर्स असोसिएशन

उपलब्ध धान्य, इंधन साठ्याचा आढावा जिल्हाधिकाऱ्यांनी घेतला आहे. आणखी चार दिवस पुरेल इतके इंधन आणि धान्य आपल्याकडे आहे. इंधन आणि सरकारी धान्य वाहतूक आंदोलनातून वगळावी, असे आवाहन आंदोलकांना केले आहे. यानंतरही काही अडचण उद्भवल्यास बंदोबस्तात वाहतूक करण्याचा पर्याय आहे.

विवेक आगवणे, जिल्हा पुरवठा अधिकारी

सोसायटीतील महिलेची काढली छेड

म. टा. प्रतिनिधी, कोल्हापूर

शाहू नाका येथील वैभव हाउसिंग सोसायटीच्या अध्यक्षाने फ्लॅट नावावर करून देण्यासाठी सोसायटीतील महिलेला स्वत:ची सेक्रेटरी होण्यास सांगितले. याशिवाय असभ्य वर्तन करून जिवे मारण्याची धमकीही दिल्याची फिर्याद पीडित महिलेने राजारामपुरी पोलिस ठाण्यात दिली आहे. याबाबत वैभव हाउसिंग सोसायटीचा अध्यक्ष युवराज माळी (रा. शाहू नाका, कोल्हापूर) याची पोलिसांकडून चौकशी सुरू आहे.

याबाबत अधिक माहिती अशी की, पीडित महिला शाहू नाका येथील वैभव हाउसिंग सोसायटीत राहते. त्यांच्या पतीचे २०१४ मध्ये निधन झाले. यानंतर त्यांनी पतीच्या नावावरील फ्लॅट आपल्या नावावर करावा, असा अर्ज हाउसिंग सोसायटीच्या अध्यक्षांकडे दिला. डिसेंबर २०१६ मध्ये सोसायटीचे अध्यक्ष माळी यांनी मोबाइलवर फोन करून ऑफिसमध्ये बोलवून घेतले. 'तुम्ही खुप सुंदर आहात. तुमचे काम करून देतो, पण तुम्ही माझी सेक्रेटरी व्हायला हवे,' असे त्याने सांगितले. यानंतर पुन्हा एकदा मैत्रिणींसमक्ष माळी याने असेच असभ्य वर्तन केले. त्याच सोसायटीत राहत असल्याने पीडित महिलेने भीतीपोटी पोलिसात तक्रार दिली नाही. जून २०१८ मध्ये त्यांनी महिला दक्षता आयोगाकडे ऑनलाइन तक्रार दिली. तक्रार केल्याचे समजताच अध्यक्ष माळी याने पीडित महिलेस भेटून जिवे मारण्याची धमकी दिली. याबाबत पीडित महिलेने राजारामपुरी पोलिस ठाण्यात फिर्याद दिली असून, अध्यक्ष माळी याची पोलिसांकडून चौकशी सुरू झाली आहे.