वाहनकर्जाच्या हमीसाठी दिलेले धनादेश परस्पर वठवले

म. टा. प्रतिनिधी, कोल्हापूर

चारचाकी वाहन कर्ज हमीसाठी दिलेले धनादेश बनावट कागदपत्राद्वारे आपल्या नावावर भरून सुमारे ८० लाख रुपयांची फसवणूक केल्याप्रकरणी जुना राजवाडा पोलिसांनी तिघांना अटक केली. रंगराव आनंदा खोंद्रे (वय ४०, रा. निगवे दुमाला, ता. करवीर), कृष्णात महादेव पाटील (४०,रा. वरणगे, ता. करवीर), नितीन सर्जेराव वळके (४०, रा. निगवे दुमाला, ता.करवीर) अशी त्यांची नावे आहेत.

पोलिसांनी दिलेल्या माहितीनुसार, भवानी मंडप येथील एका सहकारी बँकेकडून फिर्यादी मधुकर झांबरे (४०, रा. राम गल्ली,मंगळवार पेठ) यांनी चारचाकी वाहनासाठी कर्ज घेतले होते. त्यासाठी हमी म्हणून तीन धनादेश स्वाक्षरी करून दिले होते. या कर्जाची पूर्णपणे परतफेड झांबरे यांनी १८ मार्च २०१८ मध्ये केली होती. संशयित रंगराव खोंद्रे याने संबंधित सहकारी बँकेत दिलेले धनादेश, खोटे पत्र, दस्त, पुरावा तयार करून आपल्या ताब्यात घेतले. त्यानंतर साथीदार कृष्णात पाटील, नितीन वळके यांच्याशी संगनमत करून ४० लाख, ३० लाख आणि १० लाख रूपयांची रक्कम धनादेशावर लिहून आपल्या खात्यावर जमा केली. दिलेले धनादेश वटले नसल्याने संशयितांनी झांबरे यांनी आपल्याकडून हातउसणे ८० लाख रुपये घेतल्याचे दाखविले. न्यायालयात धनादेश न वटल्याची संशयितांनी फिर्याद देऊन झांबरेंना नोटीस पाठविली. या प्रकरणी फसवणूक झाल्याचे झांबरे यांच्या लक्षात येताच त्यांनी या तिघांच्या विरोधात जिल्हा न्यायालयात तक्रार दाखल केली. न्यायालयाने याप्रकरणी गुन्हा दाखल करून तपासाचे आदेश जुना राजवाडा पोलिसांना दिले. त्यानुसार तिघांच्यावर गुन्हा दाखल करण्यात आला. दरम्यान, झांबरे यांनी बँकेच्या ताब्यात तीन कोरे धनादेश दिले होते. संबधित धनादेश खोंद्रे याच्या हाती कसे लागले? ते बँकेचे कर्मचारी आहे की बँकेतील कोणा कर्मचाऱ्याने त्याच्या ताब्यात धनादेश दिले , याचे गूढ तपासात लवकरच उलगडले जाणार असल्याचे जुना राजवाडा पोलिसांनी सांगितले.

म. टा. प्रतिनिधी, कोल्हापूर

जोरदार पावसामुळे रेगे तिकटी ते पंचगंगा रस्त्याची झालेली चाळण झाली असून पुरातून वाहून आलेला प्लास्टिक कचऱ्यामुळे नागरिकांना दुर्गंधीला सामोरे जावे लागत आहे. पंचगंगा नदीला पूर आल्यावर पहिला फटका शुक्रवार पेठ, उत्तरेश्वर पेठ परिसराला बसतो. पूराच्या पाण्याची पातळी वाढल्याने गंगावेश ते शिवाजी पुलाकडे जाणारा रस्ता बंद झाला आहे. सध्या पाणी जामदार क्लबच्या पुढे आहे. पूरातून वाहून आलेला प्लास्टिक, थर्माकोल कडेला आले आहे.

रेगे तिकटी ते शुक्रवारी पोलिस चौकी या या रस्त्यांवर शंभरहून लहान मोठे खड्डे असल्याने वाहनधारकांना कसरत करावे लागत आहे. या परिसरात छोटे मोठे अपघात होत असून वाहनचालक किरकोळ जखमी होत आहेत. रेगे तिकटी परिसरात पाण्याचा व्हॉल्व्ह असून दुरुस्तीसाठी वर्षभर दोन ते तीन महिन्यांनी पाणी पुरवठा खात्याची खोदाई होत असते. तसेच सांडपाणी पिण्याच्या पाइपलाइनमध्ये मिसळत असल्याने या परिसरात अनेक ठिकाणी खोदाई केली असल्याने रस्त्यांची चाळण झाली आहे. या रस्त्यावर धनवडे गल्ली, सोमेश्वर गल्ली, पंचगंगा हॉस्पिटल चौकात खड्डे पडले आहेत. पंचगंगा हॉस्पिटलच्या समोरील चेंबर तुंबल्याने सांडपाणी रस्त्यांवर वाहत आहे.

गायकवाड पुतळ्याजवळून स्मशानभूमीकडे जाणाऱ्या रस्त्यांवरही खड्डे असले तरी सध्या हा रस्ता पुराच्या पाण्याखाली गेला आहे. पुराच्या पाण्याची फुग उत्तरेश्वर गवत मंडई, दुधाळी नवीन एसटीपी प्लँट पर्यंत आली आहे. गवत मंडईजवळील अनेक घरातील तळघरात पाणी घुसल्याने गाई, म्हशी रस्त्यांवर बांधली आहेत. शिंगणापूर रस्ता वाहतूकीसाठी बंद झाला असल्याने राबाडे मळा, जिव्हाळा कॉलनीकडे जाणाऱ्या नागरिकांना लक्षतीर्थ वसाहतीतून पर्यायी मार्गाचा वापर करावा लागत आहे. उत्तरेश्वर पेठेकडे जाणार मुख्य रस्ता चांगला असला तरी गल्लीबोळातील रस्त्यांवर खड्डे आहेत. शुक्रवार पेठ, केसापूर पेठ परिसरातील रस्त्यांवर खड्डे असल्याने नागरिकांना त्रासास तोंड द्यावे लागत आहे. हळदकर व्यायाम शाळा, सोल्जर्स ग्रुप या रस्त्यांवर पाणी पाइपलाइन, ड्रेनेजसाठी खोदाई केली असल्याने खड्डे पडले आहेत.

शनिवार पेठतील सरदार बोळाकडे महानगरपालिकेचे दुर्लक्ष असल्याने हा रस्ता पाणंदीपेक्षा खराब झाला आहे. गेले १५ वर्षे या रस्त्यांचे डांबरीकरण झालेले नाही. सिटी सर्व्हे ऑफिसजवळ मोठ्या खड्ड्यांनी कामानिमित्त आलेले नागरिक महानगरपालिकेला शिव्याशाप देत आहेत. माणियार मशिद ते न्यू इंडिया हॉटेल या रस्त्यांवर खड्ड्याबरोबर ड्रेनेज चेंबरही खराब झाले आहेत.

म. टा. प्रतिनिधी, कोल्हापूर

'माहिती-तंत्रज्ञान'चा गाजावाजा करणाऱ्या राज्य सरकारने शालेय अभ्यासक्रमातून 'माहिती संप्रेषण तंत्रज्ञान' हा विषय वगळला आहे. अभ्यासक्रमातून विषय वगळण्याबरोबरच हंगामी तत्त्वावरील आयसीटी शिक्षकांनाही पुन्हा सेवेत सामावून घेतले जात नाही. त्यामुळे गेल्या दहा वर्षांत तीन हजार शिक्षकांवर बेरोजगारीची वेळ आली आहे. नजीकच्या काळात आणखी पाच हजार शिक्षकांच्या नोकरीवर गंडांतर येण्याची शक्यता आहे. याविरोधात आयसीटी शिक्षक संघटनांनी राज्यव्यापी आंदोलनाचा इशारा दिला आहे.

'आयसीटी शिक्षकांना सेवेत कायमस्वरूपी सामावून घ्यावे आणि इयत्ता नववीपासून आयसीटी विषय शालेय अभ्यासक्रमात पूर्ववत करावा,' या मागणीसाठी कोल्हापूर जिल्हा आयसीटी शिक्षक संघटनेमार्फत जुलै महिन्यात जिल्हाधिकारी कार्यालयासमोर धरणे आंदोलन करण्यात येणार आहे. केंद्र आणि राज्य सरकारने याप्रश्नी योग्य निर्णय घेतला नाही तर प्रसंगी केंद्रीय मंत्री प्रकाश जावडेकर यांच्या निवासस्थानासमोर आंदोलनाचा इशारा जिल्हा संघटनेचे पदाधिकारी भोजराज पवार, संतोष ससाणे आणि योगेश गावकर यांनी दिला. शिवाजी पार्क येथील मुख्याध्यापक संघाच्या सभागृहात संघटनेच्या पदाधिकाऱ्यांनी आंदोलनाची दिशा स्पष्ट केली. राज्यभरात सध्या पाच हजार आयसीटी शिक्षक आहेत. दरम्यान कोल्हापूर, सांगली, सातारा आणि कोकणातील शिक्षकांना गेल्या नऊ महिन्यांपासून मानधन मिळाले नसल्याचे पवार यांनी सांगितले. गेल्या वर्षापासून राज्य सरकारने नववी आणि दहावीच्या अभ्यासक्रमातून 'माहिती संप्रेषण तंत्रज्ञान' विषय रद्द केला. सध्या नववीच्या अभ्यासक्रमात एका पाठासाठी 'माहिती तंत्रज्ञान' विषय आहे.

शालेय जीवनात 'माहिती-तंत्रज्ञान'ची गोडी लागावी हा उद्देश ठेवून केंद्र सरकारने २००८-०९ मध्ये प्रत्येक शाळेत माहिती संप्रेषण तंत्रज्ञानअंतर्गत प्रयोगशाळा सुरू करण्यासाठी कंपनीमार्फत निधी पुरवठा केला. मानधन तत्त्वावर आयसीटी शिक्षकांच्या नेमणुका केल्या. दर पाच वर्षांनी त्यामध्ये नव्याने अंमलबजावणी करताना पुर्वीच्या शिक्षकांना पुन्हा सामावून घेतले नाही. यामुळे २००८-०९ मध्ये ५०० आणि २०११-१२ मध्ये २५०० हंगामी तत्त्वावरील आयसीटी शिक्षक बेरोजगार झाले आहेत. राज्यभरात २०१४-१५ मध्ये नव्याने पाच हजार आयसीटी शिक्षकांच्या नेमणुका झाल्या आहेत. मात्र, अभ्यासक्रमातून विषय वगळल्यामुळे नजीकच्या काळात त्यांच्यावर बेरोजगारीची टांगती तलवार निर्माण होण्याचा धोका असल्याचे ससाणे व गावकर यांनी सांगितले. देशातील २१ राज्यांत आयसीटी शिक्षकांना सेवेत सामावून घेतले आहे, त्याच धर्तीवर महाराष्ट्रातही सेवेत घ्यावे, माध्यमिक शाळांना स्वतंत्र संगणक कक्ष मिळावा, इयत्ता सहावी ते दहावीसाठी स्वतंत्र आयसीटी विषय सुरू करावा, आदी मागण्यांसाठी आंदोलनाचा निर्धार केला. याप्रसंगी सुप्रिया बांदेकर, वैशाली सावंत, संजय जाधव, दिगंबर चौगुले, सुधीर पाटील, श्रीकांत पाटील, दत्तात्रय बळीप, आदी उपस्थित होते.

Sachin.patil1@timesgroup.com

Tweet-sachinpMT

पावसाळा आणि आजारपण हे समीकरण रुजले आहे. पावसाचा जोर वाढल्याने शहरातील रस्त्यांवर पाणी साचू लागले आहे. पावसाळ्यात लेप्टोस्पायरोसिस होण्याचा धोका सर्वाधिक असतो. तुंबलेले पाणी, छोटी-मोठी तयार झालेली तळी तसेच अनेक ठिकाणी खड्ड्यांचे साम्राज्य पसरले असून त्यात पाणी साचून राहिल्याने लेप्टोस्पायरोसिस फैलावण्याची शक्यता अधिक आहे. हा आजार जीवघेणा असून मुंबईत लेप्टोस्पायरोसिसने एकाचा बळी गेल्याची घटना घडली आहे. आधीच डेंगीने हैराण झालेल्या कोल्हापुरकरांनी लेप्टोस्पायरोसिसबाबत सावधानी बाळगणे गरजेचे आहे.

असा पसरतो लेप्टोस्पायरोसिस

लेप्टोस्पायरोसिस हा जीवाणूंपासून होणारा आजार आहे. प्रामुख्याने याचा प्रसार प्रसार उंदीर, डुक्कर तसेच पाळीव प्राणी गाय, म्हैस, घोडा, कुत्रा , मांजर यांच्या लघवीतून होतो. लेप्टोस्पायरोसिसचे जीवाणू पाण्यात तसेच चिखलात अनेक महिने जिवंत राहतात. या प्राण्यांच्या लघवीमुळे दूषित झालेले पाणी, माती, भाज्या यांचा माणसांच्या त्वचेची संपर्क आल्यास किंवा जखमा असल्यास लेप्टोस्पायरोसिस हा रोग होतो. सर्वाधिक पाऊस पडल्याने हा आजार होण्याची शक्यता असते. दुषित पाण्याशी जखमांचा संपर्क आल्यास जंतूसंसर्ग शरीरात पसरतो. पावसाच्या साठलेल्या पाण्यात सांडपाणी व घाण मिसळल्याने प्रादुर्भाव वाढण्यास मदत होते.

कुणाला आहे धोका

तसे पाहता लेप्टोस्पायरोसिसचा धोका सर्वांनाच आहे. यामध्ये व्हेटर्नरी व्यवसाय, प्रयोगशाळेत काम करणारे आणि प्राण्यांच्या कत्तलखान्यात काम करणाऱ्या व्यक्तींनादेखील या आजाराचा धोका अधिक संभवतो. तसेच पावसाळ्यात शेतात काम करणाऱ्या शेतकऱ्यांना लेप्टोस्पायरोसिसचा धोका वाढतो. बाहेर फिरतीवर असणाऱ्यांना देखील लेप्टोस्पायरोसिस लागण होण्याची शक्यता अधिक असते.

लेप्टोस्पायरोसिसची लक्षणे

यात अंग मोडून थंडीताप येणे, डोळे लाल होणे,डोके, कंबर आणि पाय दुखणे,स्नायू दुखणे,त्वचेवर रॅश येणे अशी लक्षणे दिसतात. वेळीच लक्ष न दिल्यास मेनेन्जायटिस, कावीळ होणे, किडणीला सूज येऊन किडणी निकामी होणे, यकृताचे काम बंद पडणे, लघवी वाटे रक्त पडणे अशी गंभीर लक्षणे जाणवतात. तसेच रुग्णाच्या रक्तातील प्लेटलेट्स झपाट्याने कमी होतात.

काय काळजी घ्याल

या आजाराची लक्षणे आढळल्यास त्वरित डॉक्टरांशी संपर्क करावा. पावसात साचलेल्या पाण्यात जाणे शक्यतो टाळावे. तसेच घरातील व परिसरातील उंदीर-घुशींचा नायनाट करावा, कचऱ्याची त्वरित विल्हेवाट लावावी. शक्यतो ‎बाहेरचे पाणी पिणे टाळावे. उघड्यावरचे अन्नपदार्थ खाऊ नयेत. उघड्या पायाने पावसाच्या पाण्यात जाणे टाळावे. ‎पायावर जखम किंवा ओरखडा असल्यास ड्रेसिंग करुन घ्यावे. कटाक्षाने पाय मोजे, गम बुट वापरावेत. त्याचबरोबर बाहेर ‎पावसाच्या पाण्यात जाऊन आल्यास तात्काळ हात, पाय साबनाने स्वछ धुवावेत.

लेप्टोस्पायरोसिसला टाळण्यासाठी प्रतिबंधात्मक काळजी घेणे गरजेचे आहे. पावसाच्या पाण्यात लहान मुले खेळायला अधिक जातात त्यामुळे त्यांना जंतूसंसर्ग होण्याची शक्यता अधिक असते. या आजारात यकृतावर परिणाम होतो. वेळीच उपचार घेतल्यास अँटिबायोटिक्स औषधांमुळे याला अटकाव घालणे शक्य आहे.

डॉ. मोहन पाटील

तीन जिल्ह्यातील २२ जणांना नोटिसा

Bhimgonda.Desai@timesgroup.com

Tweet : @bhimgondaMT

कोल्हापूर : येथील प्रादेशिक प्रदूषण नियंत्रण मंडळ कार्यालय प्रशासनातर्फे बंदी असलेल्या प्लास्टिकचे उत्पादन होऊ नये, यासाठी कारखान्यांवर वॉच ठेवले जात आहे. बंदीचे प्लास्टिक उत्पादन केल्याप्रकरणी कोल्हापूर, सांगली, चिपळून जिल्ह्यातील २२ कारखान्यांना नोटीस दिली. प्रशासनाने त्यांची सुनावणी घेतली. त्यामध्ये केवळ बंदीचेच प्लास्टिक उत्पादन करण्याची यंत्रसामुग्री असलेल्या सांगलीतील तीन कारखान्यांवर बंदची कारवाई केली. यामुळे सरकारच्या सुधारित आदेशानुसार बंदीचे प्लास्टिक उत्पादन करू नये, असे आवाहनही प्रशासनाने केले आहे.

प्लास्टिक बंदीची अंमलबजावणी गेल्या महिन्यात सुरू केली. कारवाई व्यापक झाल्यानंतर सरसकट प्लास्टिक बंदीला व्यापाऱ्यांचा विरोध झाला. त्याची दखल घेत सरकारने काही प्लास्टिक उत्पादने बंदीतून वगळले. नवा आदेश काढून अंमलबजावणी करण्याच्या सूचना देण्यात आल्या. २०० मिलीपेक्षा जास्त द्रव धारण करणाऱ्या प्लास्टिकच्या बाटल्या, निर्यातीसाठी उत्पादित केलेल्या वस्तूवरील आवरण, ५० मायक्रॉनपेक्षा जास्त जाडीचे आणि २० टक्के पुनर्चक्रीत प्लास्टिक, थर्माकॉलचे आवरण, अन्नधान्य, किराणा वस्तूंच्या शीलबंदसाठीचे प्लास्टिक, प्लास्टिकचा थर असलेला पुठ्ठा, खोका, दुधाच्या पॅकिंगसाठीचे ५० मायक्रॉनपेक्षा अधिकचे प्लास्टिक, मल्टिलेअर पॅकेजिंगसाठीचे प्लास्टिक, घरगुती वापरण्याचे प्लास्टिकची उत्पादने, औषधांचे वेष्टन, वैद्यकीय उपकरणे, मासे ठेवण्यासाठीचे थर्माकॉल बॉक्स यावर बंदी नाही. उर्वरित प्लास्टिक वापरावर बंदी कायम ठेवण्यात आली.

बंदीचे प्लास्टिक हाताळणाऱ्या, विकणाऱ्यांवर कारवाईचा अधिकार महानगरपालिका, नगरपालिका, नगरपरिषद, ग्रामपंचायतींना देण्यात आला आहे. बंदीच्या प्लास्टिकचे उत्पादनच होऊ नये, झाले तर त्या कारखान्यावर कारवाईची जबाबदारी प्रदूषण नियंत्रण मंडळाच्या प्रशासनाची आहे. त्यानुसार प्रशासन कोल्हापूरसह जिल्हयातील प्लास्टिक उत्पादित करणाऱ्या सर्व कारखान्यांची यादी तयार केली आहे. अशा ६८ पैकी बंदीचे प्लास्टिक उत्पादित करणाऱ्या २२ कारखान्यांना नोटीस दिली. त्यातील सांगलीतील थर्माकॉल इंडस्ट्रीज, सुपर आणि तेजस पॅकेजिंग अशा तीन कारखान्यांवर बंदची कारवाई केली. उर्वरित कारखान्यांना बंदी असलेले प्लास्टिक उत्पादित करू नये, अशा सूचना दिल्या आहेत.

चौकट

बंदी कायम

बंदी असलेले प्लास्टिक असे : प्लास्टिकच्या नॉन वोवन बॅग्ज, शॉपिंग बॅग्ज, थर्माकोल, प्लास्टिकपासून तयार केलेले ताट, कप्स, प्लेटस, ग्लास, काटे, वाटी, चमचे, भांडी, प्लास्टिकचे भांडे, स्ट्रॉ, सजावटीसाठी वापरले जाणारे प्लास्टिक, थर्माकॉल.

तीन जिल्ह्यातील कारखाने

६८

कोल्हापूर

२६

सांगली

२२

चिपळूण

२०

बंद कारखाने

३

तीन जिल्ह्यातील बंदी असलेले प्लास्टिक उत्पादित करणाऱ्या कारखान्यांना नोटीस दिल्या. त्यांची सुनावणी घेतली. त्यात सांगलीतील तीन कारखान्यांवर बंदची कारवाई केली आहे. उर्वरित कारखान्यांना बंदी असलेले प्लास्टिक उत्पादीत करू नये, अशा सूचना दिल्या आहेत.

प्रशांत गायकवाड, प्रादेशिक अधिकारी, प्रदूषण नियंत्रण मंडळ

हरित लवादाचे मनपाला आदेश

म. टा. प्रतिनिधी, कोल्हापूर

महापालिकेने पंचगंगा नदी व रंकाळी प्रदूषण रोखण्यासाठी केलेल्या उपाययोजनासह अमृत योजनेतील कामाचा त्रैमासिक अहवाल सादर करण्याचे आदेश हरित लवादाने महापालिका प्रशासनाला दिले. सोमवारी पंचगंगा प्रदूषणासह अमृत योजनेबाबत हरित लवादासमोर सुनावणी झाली.

पंचगंगा व रंकाळा प्रदूषणप्रकरणी तब्बल आठ महिन्यानंतर सुनावणीला सुरुवात झाली. लवादाला महापालिकेने प्रदूषण रोखण्यासाठी केलेल्या उपाययोजनांची माहिती सादर केली. मात्र यावर लवादाने असमाधान व्यक्त करत तर तीन महिन्याला माहिती देण्याच्या सूचना केल्या. सोमवारी झालेल्या सुनावणी दरम्यान रंकाळामध्ये मिसळणारे सांडपाणी दुधाली नाल्याकडे वळवण्यात आल्याचे स्पष्ट करत नाल्यावर १७ एमएलडी क्षमतेचा एसटीपी प्लांट लवकरच सुरू करणार असल्याचे सांगितले.

रंकाळा प्रदूषण मुक्त करण्यासाठी ठोस उपाययोजणा करा, अशा सक्त सूचना लवादाने यापूर्वीच दिल्या आहेत. पंचगंगा नदीत मिसळणारे सांडपाणी व शहरातील कचराप्रश्नी लवादाने पुन्हा महापालिकेला सूचना दिल्या. सुनावणी दरम्यान महापालिकेने अमृत योजनेचा संपूर्ण कृती आराखडा सादर केला. त्यामुळे लवादाने दर तीन महिन्याला कामाला अहवाल देण्याच्या सूचना केल्या.

म. टा. प्रतिनिधी, कोल्हापूर

शहरात पावसाने थोडी उघडीप दिली असली तरी जिल्ह्यात सुरु असलेल्या पावसामुळे मंगळवारी रात्री पंचगंगा नदीच्या पुराने ४३ फुटाची धोका पातळी गाठली. यामुळे जिल्हा प्रशासनाने हाय अलर्ट जारी केला आहे. नदीकाठांवरील गावांमध्ये जाऊन जिल्हा प्रशासनाने दवंडी देऊन नागरिकांना सतर्क राहण्याचे आवाहन केले आहे. तसेच पूरग्रस्तांना स्थलांतरीत करण्याचेही आदेश देण्यात आले आहेत. दिवसभरात शहरातील १३ पूरग्रस्त कुटुंबांना सुरक्षितस्थळी हलवण्यात आले. रत्नागिरी महामार्गावरील आंबेवाडीनजीकचा रेडेडोह फुटल्याने पूरस्थिती आणखी गंभीर होणार आहे. पाणी पातळीत आणखी वाढ झाल्यास पुणे बंगळुरु महामार्गाच्या सर्व्हिस रोडवर पाणी येण्याची चिन्हे आहेत. जिल्ह्यातील ५८ रस्ते बंद झाले असून ८५ बंधारे पाण्याखाली गेले आहेत.

दरम्यान, पूरस्थिती गंभीर होत असल्याने जिल्हाधिकारी अविनाश सुभेदार यांनी मंगळवारी शिवाजी पुलापासून केर्लेपर्यंत सर्व प्रकारची वाहतूक बंद करण्याचे आदेश दिले. त्यानुसार पोलिसांनी पुलावर बॅरिकेड्स लावून वाहतूक बंद केली. बालिंगा पुलाजवळ रस्त्यावर पाणी आल्याने हा पूलही वाहतुकीस बंद करण्यात आला. रात्री नदी धोका पातळी गाठणार असल्याने जिल्हा प्रशासनाने चिखली, आंबेवाडी परिसरात जिल्हा आपत्ती व्यवस्थापनाची पथके बोट व इतर सर्व साहित्यानिशी रवाना केली आहेत. शिरोळ, हातकणंगले तालुक्यातही पूरस्थिती गंभीर होणार असल्याने तहसील कार्यालयात पथके सज्ज ठेवली आहेत.

गेल्या २४ तासात जिल्ह्यात सर्वात जास्त गगनबावडा तालुक्यात १८३ मिलीमीटर पावसाची नोंद झाली. साळवण परिसरात २४८ मिलीमीटर, आजरा तालुक्यातील गवसे परिसरात १७० तर राधानगरीत १६५ मिलीमीटर असा प्रचंड पाऊस झाला आहे. सर्वच तालुक्यात ४० मिलीमीटरपेक्षाही जादा पावसाची नोंद झाली. राधानगरी धरणक्षेत्रात तब्बल २४४ मिलीमीटर पाऊस झाल्याने धरण सायंकाळी ९१ टक्के भरले.

वारणा धरणातून १८ हजार ११२ क्युसेक्स, राधानगरीतून १६०० क्युसेक्स विसर्ग करण्यात येत आहे. कोयना धरणातूनही सात हजार ८८८ क्युसेक्स विसर्ग करण्यात येत असल्याने कृष्णा नदीच्या पातळीत वाढ होणार आहे. अशा परिस्थितीत राधानगरी धरणाचे स्वयंचलित दरवाजे उघडल्यास पंचगंगेच्या पुराच्या पाणी पातळीत झपाट्याने वाढ होण्याची शक्यता आहे. यामुळे शहर तसेच परिसरातील ग्रामीण भागातील पूरस्थिती गंभीर होणार आहे. अलमट्टी धरणातून ४७ हजार ६५१ क्युसेक्स विसर्ग सुरु असल्याने कृष्णा नदीतील पाण्याची पातळी कमी होण्यास मदत होणार आहे.

.....

पंचगंगेची मच्छिंद्री

पंचगंगा नदीने धोका पातळी ओलांडल्यानंतर शिवाजी पुलाच्या वक्राकार कमानीजवळ असलेल्या माशाच्या आकाराच्या बांधकामावर पाणी येते. त्यावेळी पंचगंगा नदीची मच्छिंद्री झाली असे समजण्यात येते. यामुळे पंचगंगेला महापूर आल्याचेही समजले जाते. पुराचे पाणी सातत्याने वाढल्याने मंगळवारी रात्री पंचगंगेची मच्छिंद्री झाली. दिवसभर पुराचे पाणी पाहण्यासाठी शिवाजी पुलावर नागरिकांनी गर्दी केली होती.

......

प्रमुख धरणातील पाणीसाठा

राधानगरी ९१.१६ टक्के

दूधगंगा ७९.७२ टक्के

वारणा ८५.१३ टक्के

कोल्हापूर

सीसीटिव्ही फुटेजवरून राजारामपुरी पोलिसांनी ज्युपिटर मोपेडच्या डिकीतील चोरलेला मोबाइल हँण्डसेट एका अल्पवयीन मुलाकडून जप्त केला. मोबाइल चोरीची तक्रार अजित मोरे (रा. कसबा बावडा) यांनी दिली होती. रेड्यांच्या टकरी, प्रतिभानगर येथून ज्युपिटर मोपेडच्या डिकीतून सुमारे ३० हजार रूपये किंमतीचा मोबाइलचा हँण्डसेट अज्ञाताने चोरला होता. पोलिसांनी या मार्गावरील सीसी टिव्ही फूटेजवरून एका संशयित अल्पवयीन मुलाला पकडले. त्याने हा मोबाइल चोरल्याची कबुली दिली.

ऑगस्टपासून केएमटीचा

प्रवास महागणार?

१४ टक्के भाडेवाडीचा प्रस्ताव परिवहन समितीच्या बैठकीत मंजूर

म. टा. प्रतिनिधी, कोल्हापूर

दैनंदिन तोट्यात सापडलेल्या केएमटीचा तोटा भरुन काढण्यासाठी प्रशासनाने दिलेला १४ टक्के भाडेवाडीच्या प्रस्तावास मंगळवारी झालेल्या परिवहन समितीच्या बैठकीत मंजुरी देण्यात आली. भाडेवाढीमुळे केएमटीचा दैनंदिन ६० हजार रुपायांचा तोटा भरुन निघणार आहे. परिवहन समितीचा प्रस्ताव शुक्रवारी (ता. २०) होणाऱ्या सर्वसाधारण सभेत पाठवला जाणार आहे.

शहरासह परिसरातील महापालिकेच्या सार्वजनिक वाहतूक व्यवस्थेच्या माध्यमातून दररोज ११० केएमटी बसेस रस्त्यावर धावतात. एसटी तसेच अवैध वाहतुकीबरोबर स्पर्धा करत असताना,केएमटीला दिवसाला दररोज आठ लाख रुपयांचे उत्पन्न मिळत आहे. मात्र त्यापेक्षा जास्त खर्च होत असल्याने दररोज सुमारे अडीच लाखांचा तोटा सहन करावा लागतो. जमाखर्चाचा ताळमेळ बसत नसल्याने केएमटी दिवसेंदिवस आर्थिक अरिष्टात सापडत आहे. केएमटीला यातून बाहेर काढण्यासाठी प्रशासनाने १४ टक्के भाडेवाढ करण्याचा प्रस्ताव तयार केला होता. भाडेवाढीचा प्रस्ताव मंगळवारी झालेल्या परिवहन समितीच्या बैठकीत मंजूर करण्यात आला. या नव्या प्रस्तावानुसार पहिल्या टप्प्यासाठी एक रुपया वाढ करण्यात आली असून त्यानंतर चौथ्या व पाचव्या टप्प्यात प्रत्येकी दोन रुपयांची वाढ होणार आहे. तिकिट दरात वाढ होणार असली, तरी दैनंदिन पासचा दर ४० रुपयांवरुन ३५ रुपये करण्यात येणार आहे. केएमटीला आर्थिक अरिष्टातून बाहेर काढण्यासाठी भाडेवाढ आवश्यक असली, तरी यामुळे सर्वसामान्यांच्या खिशाला कात्री लागणार आहे. भाडेवाढ करताना एसटी व अवैध वाहतुकीपेक्षा कमी तिकिट दर असेल, याची काळजी प्रस्तावित भाडेवाढीमध्ये घेतली आहे.

नव्या भाडेवाढीच्या प्रस्तावामुळे केएमटीचा दररोजचा ६० हजार रुपयांचा तोटा भरुन निघणार आहे. सर्वसाधारण सभा व त्यानंतर प्राधिकरणाच्या मंजुरीनंतर केएमटीची भाडेवाढ झाल्यास २०१३ नंतर प्रथमच भाडेवाढ होणार आहे. मात्र यासाठी सर्वसाधारण सभेसह प्राधिकरणाची भाडेवाढीला मंजुरी मिळण्याची आवश्यकता आहे.

म. टा. प्रतिनिधी, कोल्हापूर

गाईच्या दुधाला प्रतिलिटर पाच रुपये अनुदान दूध उत्पादकांच्या खात्यावर जमा व्हावे, या मागणीसाठी स्वाभिमानी शेतकरी संघटनेने सुरू केलेल्या दूध संकलन बंद आंदोलनाला दूध उत्पादकांकडून दुसऱ्या दिवशीही चांगला पाठिंबा मिळाला. मंगळवारी जिल्हा दूध उत्पादक संघा (गोकुळ) सह वारणा, शाहू, हनुमान-यळगूडसह ११ सहकारी व खासगी दूध संघांकडे सरासरी ५० टक्केच दूध जमा झाले. स्वाभिमानीचा बालेकिल्ला असलेल्या शिरोळ तालुक्यात फक्त २० ते ३० टक्के दूध संकलन झाले. शाहूवाडी तालुक्यात कार्यकर्त्यांनी दूध संकलन करणारी वाहने अडवून दूध रस्त्यावर ओतून दिले.

रविवारी मध्यरात्री स्वाभिमानीने दूध संकलन बंदची हाक दिली होती. राज्यातील दूध उत्पादकांकडून आंदोलनाला चांगला पाठिंबा मिळत आहे. अनेक ठिकाणी टँकर रोखणे, टँकरला आग लावणे, टँकरमधून दूध रस्त्यांवर ओतणे असे हिंसक प्रकार घडू लागले आहेत. जिल्ह्यात शाहूवाडी, कागल, शिरोळ तालुक्यात कार्यकर्ते हिंसक झाले आहेत. खासदार राजू शेट्टी यांनी कार्यकर्त्यांना शांततेचे आवाहन करताना दूध उत्पादकांना दूध डेअरीत घालू नका असे आवाहन केले आहे. शेट्टी यांच्या आवाहनाला जिल्ह्यातील दूध उत्पादकांकडून पाठिंबा मिळत आहे. हिंसक आंदोलनाच्या पार्श्वभूमीवर दूध संघ, चिलिंग सेंटर, दूध डेअऱ्या, दूध वाहतूक करणाऱ्या वाहनांना पोलिस बंदोबस्त देण्यात आला आहे.

'गोकुळ'ने सोमवारी (ता.१६) दूध संकलन बंद ठेवले होते. मंगळवारी गोकुळसह सर्व सहकारी व खासगी दूध संस्थांनी संकलन सुरू केले. दूध संकलनाकडे ५० टक्के दूध उत्पादकांनी पाठ फिरवली. स्वाभिमानी शेतकरी संघटनेचे आंदोलनाचे मुख्य केंद्र असलेल्या शिरोळ व हातकणंगले तालुक्यांतील दूध उत्पादकांनी डेअरीला दूध घातले नाही. त्यामुळे गोकुळचे अवघे २० ते ३० टक्केच दूध संकलन झाले. संकलित केलेल्या दुधाची वाहने उदगाव येथील सॅटेलाइट डेअरीत आणल्यावर कार्यकर्त्यांनी एक तास ठिय्या आंदोलन करून वाहने रोखली. अखेर एक तासानंतर दुधाची वाहने डेअरीत सोडण्यात आली.

'गोकुळ'चे रोज ११ लाख लिटर दूध संकलित होते, पण दूध उत्पादकांनी आंदोलनाला प्रतिसाद दिल्याने मंगळवारी सकाळच्या सत्रात साडेतीन लाख लिटर दूध संकलन झाले. दिवसभरात गोकुळचे अंदाजे ५० टक्के दूध संकलन झाले. दिवसभरात गोकुळने पोलिस बंदोबस्तात १५ टँकरमधून तीन लाख लिटर मुंबईला पाठवले.

शाहूवाडी तालुक्यात आंदोलकांनी आंदोलन तीव्र केल्याने अनेक ठिकाणी परिस्थिती चिघळली होती. कार्यकर्त्यांनी दूध संकलन करणारी वाहने अडवून दूध ओतले. त्यामळे या तालुक्यात गोकुळ, वारणा, प्रतिभा या दूध संस्थांच्या संकलनावर मर्यादा आल्या. वारणा संघाने सोमवारी दूध संकलन सुरू ठेवले होते. साडेतीन लाख दूध संकलन करणाऱ्या वारणाकडे एक लाख ६० हजार दूध संकलन झाले, तर मंगळवारी सकाळी अंदाजे ४५ हजार लिटर दूध जमा झाले. गडहिंग्लज तालुक्यातील वारणेचे दूध संकलन ठप्प होते. सर्वच तालुक्यांत दूध संकलन निम्म्यावर आले आहे.

०००००

संघनिहाय संकलित दूध (दुपारी १२ पर्यंत)

दूध संघाचे नाव एकूण दूध

गोकुळ ३ लाख ५० हजार लिटर

वारणा ४५ हजार लिटर

प्रतिभा-कोडोली १७ हजार लिटर

हनुमान-यळगूड ३५०० लिटर

शाहू मिल्क कागल ५३०० लिटर

एकूण ४ लाख २० हजार लिटर

००००००

कोल्हापूर शहरासाठी मुबलक दूध

कोल्हापूर शहर व आसपासच्या उपनगरांना गोकुळकडून सव्वा लाख लिटर दुधाचा पुरवठा केला जातो. मुंबईला जरी तीन लाख लिटर दूध पाठवले असले तरी मंगळवारी सायंकाळच्या सत्रात संकलित केलेले दूध शहरासाठी राखीव ठेवण्यात आले आहे. सोमवारी मध्यरात्री शहरात वितरकांना गोकुळने रात्री दोन वाजता दूध पिशव्यांचे कॅरेट पोच करण्याची खबरदारी घेतली होती. बुधवारीही दूध पुरवले जाणार असल्याचे 'गोकुळ'चे अध्यक्ष विश्वास पाटील यांनी सांगितले.

००००

मराठवाड्यातील दूध वारणेत

मराठवाड्यातील अतिरिक्त दूध वारणा उद्योग समूहाकडे दूध भूकटीसाठी पाठविण्यात आले आहेत. जालनासह अन्य जिल्ह्यांतीसल सहा टँकर जयसिंगपूरमार्गे न पाठवता पोलिसांनी पर्यायी मार्गाने वारणेकडे रवाना केले. सांगली व कोल्हापूर पोलिसांकडून दूध वाहतुकीला सरंक्षण दिले जात आहे.

००००

सावित्रीबाई फुले रुग्णालय समस्यांच्या गर्तेत

लोंबकळणारे वायरिंग अन् स्विच बोर्ड, गळक्या इमारतींमुळे रुग्ण भितीच्या छायेत

पूर्वार्ध.... लोगो

Maruti.Patil

@timesgroup.com

tweet: @MarutipatilMT

कोल्हापूर :

सर्वसामान्यांना वाजवी व कमी किंमतीमध्ये उपाचर होण्यासाठी सावित्रीबाई फुले रुग्णालयाची १५ ऑगस्ट १९५१ रोजी सुरुवात झाली. सुरुवातीस मिळणाऱ्या चांगल्या सुविधांमुळे येथील रुग्णांवर उत्तम उपचार केले जात होते. सद्य:स्थितीतही उपचार चांगले होत असले, तरी भिंतीवरुन ओंघळणारे पावसाचे पाणी, लोंबकळणारे स्विच अन् वायरिंगमुळे रुग्णांमध्ये भीतीचे वातावरण निर्माण झाले आहे. बालगृहातील स्लॅबच्या छताला पडलेला ढपल्यामुळे रुग्णांमधील भीती अधिक गडद झाली आहे. दरवर्षीच्या अंदाजपत्रकांमध्ये लाखो रुपयांची तरतूद करुन होणारा खर्च नेमका कोठे मुरतो असा प्रश्न रुग्णालयातील असुविधांवरुन उपस्थित होत आहे.

............................

प्रसूतीगृह, बालरोग, ऑर्थोपेडिक, सर्व प्रकारच्या जनरल शस्त्रक्रियांसह येथे उपचार केले जातात. सर्व उपचार नाममात्र शुल्कांमध्ये होत असल्याने येथे रुग्णांची नेहमीच वर्दळ असते. दैनंदिन ओपीडीद्वारे १५० ते २०० रुग्णांवर उपचार केले जातात. तर ७० ते ८० निवासी रुग्णांवर उपचार केले जातात. यामध्ये प्रामुख्याने झोपडपट्टी व कनिष्ठ मध्यमवर्गीय रुग्णांची संख्या लक्षणीय असते. खासगी हॉस्पिलमध्ये उपचारांसाठी लागणारा भरमसाठ खर्च आणि सीपीआरमध्ये रुग्णांची संख्या अधिक असल्याने शहरातील अनेक कनिष्ठ मध्यमवर्गीय सावित्रीबाई फुले रुग्णालयाचा आधार घेतात. पण येथील परिस्थितीवरून येथे येणारे सर्व रुग्ण भीतीच्या छायेखाली वावरत असल्याचे चित्र आहे.

रुग्णालयाच्या मुख्य इमारतीच्या अनेक भिंतींवर वायरिंग व स्वीच लोंबकळत असून लाईटच्या ट्यूब कोणत्याही क्षणी खाली पडण्याची शक्यता आहे. पावसाचे पाणी भिंतीवरुन खाली पडत असल्याने रुग्णालयाच्या आवारात अनेक ठिकाणी पाणी साचले आहे. तर नुकत्याच केलेल्या नुतनीकरणानंतरही बालगृहातील स्लॅबच्या छताचा ढपला पडल्यामुळे रुग्णामध्ये अधिकच भिती निर्माण झाली आहे. सुदैवाने स्लॅबच्या छताचा ढपला पडताना बालगृह विभागात रुग्ण नसल्याने अनर्थ टळला असला तरी यामुळे महापालिकेच्या आरोग्य विभागाचा गलथान कारभार चव्हाट्यावर आला आहे. रुग्णालय महापालिकेचे असतानाही रुग्णांना मात्र अॅरोचे पाणी एक रुपयाा लिटरप्रमाणे विकत घ्यावे लागत आहे. महापालिकेच्यावतीने पुरवण्यात येणाऱ्या सुविधांसाठी रुग्णालयाच्यावतीने अनेकदा पत्रव्यवहार केला जातो, पण पाठवले जाणारे सर्व प्रस्ताव महापालिका प्रशासनाच्या लालफितीत अडकून पडत आहेत. त्यामुळे येथे नवीन इमारतीचे सुरू असलेले काम कित्येक दिवस कासवगतीने सुरू आहे. नव्या इमारतीमध्ये अनेक ठिकाणी रुग्णालयाचे साहित्य पडून आहे. साहित्यामधून वाट काढतच रुग्णांवर उपचार केले जात आहेत.

महापालिकेच्या प्रत्येक सर्वसाधारण सभेत लोकप्रतिनिधी पायाभूत सुविधांसाठी सभागृह डोक्यावर घेत असतात, पण सर्वसामान्यांच्या जिव्हाळ्याच्या आरोग्य सेवेकडे मात्र नेहमीच दुर्लक्ष केले जात आहे. महापालिकेच्या वार्षिक अर्थसंकल्पामध्ये आरोग्य सुविधांसाठी ४० ते ५० लाखांची तरतूद केली जाते. पण प्रत्यक्षात तरतूद केलेला निधी आरोग्य सेवेवर खर्च झाला का, असा प्रश्न उपस्थित होत आहे. केवळ सावित्रीबाई फुले रुग्णालयाचे स्ट्रक्चर ऑडिट झाल्यास हा निधी नेमका कोठे झिरपला याचा पोलखोल होऊ शकतो.

चौकट

रुग्णालयाची सुरक्षा रामभरोसे

उपचाराच्या निमित्ताने येथे दररोज ४०० ते ५०० रुग्ण येत असतात. या रुग्णांच्या साहित्याबरोबरच येथे अनेक प्रकारचे आरोग्य साहित्य पडले आहे. सर्व साहित्यासह इमारतीच्या सुरक्षेसाठी केवळ तीन सुरक्षा रक्षकांची नेमणूक केली आहे. प्रत्येक शिफ्टमध्ये केवळ एकच सुरक्षा रक्षक असल्याने आणि त्याच्यावर दोन इमारतींना सुरक्षा पुरवण्याची जबाबदारी असल्याने रुग्णालयाची सुरक्षा व्यवस्था रामभरोसे झाली आहे.

चौकट

दृष्टीक्षेपात रुग्णालय

१२०

रुग्णालयातील बेड

१५० ते २००

दैनंदिन ओपीडी

१३

वैद्यकीय अधिकारी

पाच रुपये

केसपेपर

४०

कॉट भाडे

१८

एकूण कर्मचारी

कोल्हापूर टाइम्स टीम

'लोकसभा आणि विधानसभा निवडणुकीसाठी मतदार यादी अचूक करणे, नवीन मतदार नोंदणीसाठी मतदार जागृती विशेष मोहिम राबविली जात आहे. त्याचा लाभ मतदारांनी घ्यावा', असे आवाहन अतिरिक्त जिल्हाधिकारी नंदकुमार काटकर यांनी केले. मतदार जागृती अभियानची रुपरेषा ठरविण्यासाठी आयोजित बैठकीत ते बोलत होते. काटकर म्हणाले, 'मतदारयादी अद्यावत करण्यासाठी दुबार, मयत, स्थलांतरीत मतदारांची नावे वगळली जात आहेत. मतदार यादीत महिला, सैन्यदलातील कर्मचारी, स्थलांतरीत कामगार मतदार यादीत नेमकेपणा येण्यासाठी स्वीप कार्यक्रम राबविला जात आहे. दहा टक्केपेक्षा कमी मतदान झालेल्या मतदान केंद्रे शोधून त्याबाबत विश्लेषणात्मक अभ्यास करण्यात येणार आहे. मतदार नोंदणी जागृतीसाठी शाळा, महाविद्यालयस्तरावर कँम्पस ॲबॅसीडर नेमण्यात येणार आहे. एनएसएस, एनसीसी विद्यार्थ्यांसह शाळा, महाविद्यालयस्तरावर निवडणूक साक्षरता क्लब स्थापन करण्यात येणार आहे. मतदान प्रक्रियेतील पारदर्शकतेसाठी असावी यासाठी निवडणूक आयोगाने आगामी लोकसभा, विधानसभा निवडणुकीमध्ये ईव्हीएम बरोबरच व्हीव्हीपॅट मशिनचा वापर करण्याचा निर्णय झाला आहे.'

बैठकीस जिल्हा परिषदेच्या प्रभारी मुख्य कार्यकारी अधिकारी सुषमा देसाई, उपजिल्हा निवडणूक अधिकारी तथा निवासी उपजिल्हाधिकारी संजय शिंदे, जिल्हा पुरवठा अधिकारी विवेक आगवणे, जिल्हा अग्रणी बँक प्रबंधक राहूल माने, कृषी विकास अधिकारी चंद्रकांत सूर्यवंशी, उपमुख्य कार्यकारी अधिकारी सोमनाथ रसाळ, निवडणूक नायब तहसीलदार शोभा कोळी आदी उपस्थित होते.

चंदगड : हलकर्णी फाटा (ता. चंदगड) येथील बसस्थानकाच्या परिसरात कचऱ्याचे साम्राज्य पसरले आहे. त्यामुळे ह्या परिसरात सर्वत्र दुर्गंधी पसरली आहे. परिसराची स्वच्छता करून प्रवाशांना ऊन, पाऊस यापासून सुरक्षा मिळावी. आठ दिवसांच्या आत समस्या दूर कराव्यात, अन्यथा मनसे स्टाइलने आंदोलन करण्याचा इशारा विद्यार्थी सेनेचे तालुका अध्यक्ष राज सुभेदार यांनी निवेदनाद्वारे हलकर्णी ग्रामपंचायतीला दिला आहे.

म. टा. प्रतिनिधी, कोल्हापूर

भारत राखीव बटालियनच्या सहा संशयित लाचखोरांना न्यायालयाने पाच दिवसांची पोलिस कोठडी सुनावली. जिल्हा व सत्र न्यायाधीश आर. एस. निंबाळकर यांच्यासमोर संशयित आरोपींना मंगळवारी उभे करण्यात आले. त्यांनी या प्रकरणी संशयितांना कोठडी सुनावली.

आहार भत्ता, हजेरीत सूट, निलंबन टाळण्यासाठी आणि पतंसस्थेतून कर्ज मंजुरीसाठी काही उमेदवारांकडून पाच हजार रूपयांची मागणी केली होती. कसबा बावडा येथील बटालियनच्या कार्यालयातच एका जवानांकडून चाळीस हजार रुपयांची लाच घेताना बटालियनच्या उपअधिक्षकासह निरीक्षक, दोन उपनिरीक्षक, कॉन्स्टेबल व लिपिक असे सहा अधिकारी, कर्मचारी लाचलुचपत प्रतिबंधक विभागाला रंगेगहात सापडले. संशयित उपअधीक्षक मनोहर गवळी, निरीक्षक मधुकर सकट, उपनिरीक्षक रमेश शिरगुप्पे, हजेरी मेजर सहायक फौजदार आनंदा पाटील, कॉन्स्टेबल प्रविण कोळी, लिपीक राजकुमार जाधव यांनी जवानांकडे लाचेची मागणी केली होती. या सर्व संशयित आरोपींना लाचलुचपत प्रतिबंधक विभागाने मंगळवारी अटक करून गुन्हा दाखल केला होता. त्यांना न्यायालयासमोर बुधवारी उभे केले असता सात दिवसांची पोलिस कोठडीची मागणी केली. सहायक सरकारी वकील अॅड. विक्रम बन्ने यांनी युक्तिवाद केला. लाचलुचपत प्रतिबंधक विभागाचे पोलिस उपअधीक्षक गिरीश गोडे यांनी पुरावे आणि केलेली कार्यवाही सांगून सहाय्य केले. या प्रकरणी न्यायालयाने सर्व संशयित आरोपींना पाच दिवसांची पोलिस कोठडी दिली. भारत राखीव बटालियन नंबर तीन, कसबा बावडा येथील खेळाडू सहायक फौजदाराने या प्रकरणी फिर्याद दाखल केली होती. त्याची गंभीर दखल घेत ही कारवाई करण्यात आली होती.

कोल्हापूर टाइम्स टीम

'माहिती-तंत्रज्ञान'चा गाजावाजा करणाऱ्या राज्य सरकारने शालेय अभ्यासक्रमातून 'माहिती संप्रेषण तंत्रज्ञान' हा विषय वगळला आहे. अभ्यासक्रमातून विषय वगळण्याबरोबरच हंगामी तत्त्वावरील आयसीटी शिक्षकांनाही पुन्हा सेवेत सामावून घेतले जात नाही. त्यामुळे गेल्या दहा वर्षांत तीन हजार शिक्षकांवर बेरोजगारीची वेळ आली आहे. नजीकच्या काळात आणखी पाच हजार शिक्षकांच्या नोकरीवर गंडांतर संभवत आहे. याविरोधात आयसीटी शिक्षक संघटनांनी राज्यव्यापी आंदोलनाचा इशारा दिला आहे.

'आयसीटी शिक्षकांना सेवेत कायमस्वरूपी सामावून घ्यावे आणि इयत्ता नववीपासून आयसीटी विषय शालेय अभ्यासक्रमात पूर्ववत करावा,' या मागणीसाठी कोल्हापूर जिल्हा आयसीटी शिक्षक संघटनेमार्फत जुलै महिन्यात जिल्हाधिकारी कार्यालयासमोर धरणे आंदोलन करण्यात येणार आहे. केंद्र आणि राज्य सरकारने याप्रश्नी योग्य निर्णय घेतला नाही तर प्रसंगी केंद्रीयमंत्री प्रकाश जावडेकर यांच्या निवासस्थानासमोर आंदोलनाचा इशारा जिल्हा संघटनेचे पदाधिकारी भोजराज पवार, संतोष ससाणे आणि योगेश गावकर यांनी दिला.

शिवाजी पार्क येथील मुख्याध्यापक संघाच्या सभागृहात संघटनेच्या पदाधिकाऱ्यांनी आंदोलनाची दिशा स्पष्ट केली. राज्यभरात सध्या पाच हजार आयसीटी शिक्षक आहेत. दरम्यान कोल्हापूर, सांगली, सातारा आणि कोकणातील शिक्षकांना गेल्या नऊ महिन्यांपासून मानधन मिळाले नसल्याचे पवार यांनी सांगितले. गेल्या वर्षापासून राज्य सरकारने नववी आणि दहावीच्या अभ्यासक्रमातून 'माहिती संप्रेषण तंत्रज्ञान' विषय रद्द केला. सध्या नववीच्या अभ्यासक्रमात एका पाठासाठी 'माहिती तंत्रज्ञान' विषय आहे.

शालेय जीवनात 'माहिती-तंत्रज्ञान'ची गोडी लागावी हा उद्देश ठेवून केंद्र सरकारने २००८-०९ मध्ये प्रत्येक शाळेत माहिती संप्रेषण तंत्रज्ञानअंतर्गत प्रयोगशाळा सुरू करण्यासाठी कंपनीमार्फत निधी पुरवठा केला. मानधन तत्त्वावर आयसीटी शिक्षकांच्या नेमणुका केल्या. दर पाच वर्षांनी त्यामध्ये नव्याने अंमलबजावणी करताना पूर्वीच्या शिक्षकांना पुन्हा सामावून घेतले नाही. यामुळे २००८-०९ मध्ये ५०० आणि २०११-१२ मध्ये २५०० हंगामी तत्त्वावरील आयसीटी शिक्षक बेरोजगार झाले आहेत. राज्यभरात २०१४-१५ मध्ये नव्याने पाच हजार आयसीटी शिक्षकांच्या नेमणुका झाल्या आहेत. मात्र, अभ्यासक्रमातून विषय वगळल्यामुळे नजीकच्या काळात त्यांच्यावर बेरोजगारीची टांगती तलवार निर्माण होण्याचा धोका असल्याचे ससाणे व गावकर यांनी सांगितले. देशातील २१ राज्यांत आयसीटी शिक्षकांना सेवेत सामावून घेतले आहे, त्याच धर्तीवर महाराष्ट्रातही सेवेत घ्यावे, माध्यमिक शाळांना स्वतंत्र संगणकक कक्ष मिळावा, इयत्ता सहावी ते दहावीसाठी स्वतंत्र आयसीटी विषय सुरू करावा, आदी मागण्यांसाठी आंदोलनाचा निर्धार केला. याप्रसंगी सुप्रिया बांदेकर, वैशाली सावंत, संजय जाधव, दिगंबर चौगुले, सुधीर पाटील, श्रीकांत पाटील, दत्तात्रय बळीप, आदी उपस्थित होते.

महापालिकेचा लोगो वापरावा

........

पोषण आहारापासून रजा मंजुरीपर्यंत 'डल्ला'

शहरातील शाळेत 'मॅडम'च्या गैरव्यवहाराच्या सुरस कहाण्या

म. टा. प्रतिनिधी, कोल्हापूर

शाळांना दुपारी भेटी द्यायच्या. सोबत ऑफीसमधील दोन सहकारी असायचे. शालेय पोषण आहाराची तपासणी ठरलेली. 'मॅडम'नी पोषण आहारातील त्रुटी काढून मुख्याध्यापकांसह शिक्षकांची झाडाझडती करायची. कारवाईचा इशारा देऊन त्या शाळेतून बाहेर पडल्या की त्यांचे दोन सहकारी, संबंधित शाळेतील शिक्षकांना 'मॅडम'च्या कारवाईची भिती घालून प्रकरण मिटवामिटवीसाठी वाटाघाटी करायचे. याशिवाय कधी शिक्षण सेवकांना नियमित पगार तर कधी मुख्याध्यापक पदाला मान्यता अशा प्रत्येक कामात 'वाटा' मिळाल्याशिवाय प्रस्ताव मान्य करायचा नाही अशी कामाची पध्दत 'मॅडम'नी शिक्षण समितीत तयार केली होती.

मंगळवारी जिल्ह्यात पोलिस आणि शिक्षण खात्यातील भ्रष्टाचाराची प्रकरणे उघडकीस आली. या प्रकरणाने काही वर्षापूर्वी महापालिकेच्या शिक्षण समितीमध्ये प्रमुख अधिकारी पदावर काम केलेल्या एका 'प्रतिभा'वान महिला अधिकाऱ्याच्या भ्रष्टाचाराच्या सुरस कहाण्यांना शिक्षण क्षेत्रात पुन्हा उकळी फुटली. साधे वागणे, प्रभावाशाली बोलणे ही त्यांची खासियत. कोल्हापूर शहरातील खासगी आणि महापालिका शाळेवर नित्रंयण ठेवण्याची जबाबदारी प्राथमिक शिक्षण समितीची. मात्र या पदाचा कार्यभार हाती आला की प्राथमिक शिक्षणाची उन्नतीचे पाठ शिकवण्याऐवजी अनेक अधिकारी स्व उध्दाराचे धडे गिरवतात. शहरातील शिक्षण खात्यात प्रमुख पदावर काम करताना एका महिला अधिकाऱ्याची कारकिर्द वादग्रस्त ठरली होती. त्या अधिकाऱ्याच्या शिक्षण समितीतील दोन कनिष्ठ अधिकाऱ्यांचा सहभाग नजरेत भरणारा आहे. विशेष म्हणजे, दीड, दोन वर्षांनी शिक्षण समितीतील प्रमुख अधिकारी बदलले तरी शिक्षण समितीतील कनिष्ठ अधिकारी कधी 'वडिलकी'च्या रुबाबात तर कधी प्राथमिक शिक्षण जगतातील आपणच 'नाथ'असल्याच्या अविर्भावात संबंधितांचा आर्थिक व्यवहार सांभाळत राहिले. त्यांना सुपरवायझर असलेल्या एका'साहेबा'ची व अन्य एका केंद्रप्रमुखाची 'साथ' होती. या चौकडीने प्रत्येक कामासाठी दर निश्चित केला होता. हजारो रुपयांपासून पन्नास हजारापर्यंत वसुली करुन ते प्रमुख अधिकाऱ्यांना पोहोच करण्याचे काम इमानेइतबारे करत. काही वेळेला ठरलेली रक्कम एका पानपट्टीत ठेवली जायची.

राजेंद्रनगर आणि प्रतिभानगर परिसरातील शाळेत शालेय पोषण आहारातील त्रुटींवर 'अर्थपूर्ण' व्यवहावरानंतर पडदा टाकण्याची कार्यशैली आजही शिक्षकांच्या स्मरणात आहे. शिक्षण सेवकांचा तीन वर्षाचा कालावधी पूर्ण झाल्यानंतर नियमित पगार लागू होतो. मात्र या कामातही आडकाठी निर्माण करायची आणि 'डल्ला मारायचा अशी त्या अधिकाऱ्याच्या कामाची पध्दत होती. शिक्षक म्हणून बारा वर्षे नोकरी झाल्यानंतर वरिष्ठश्रेणी आणि निवडश्रेणी लागू होते. शिक्षक त्या लाभासाठी पात्र ठरतात. मात्र २५ हजाराची दक्षिणा मिळाल्याशिवाय प्रस्ताव त्या कालावधीत मंजूर झाले नव्हते अशा तक्रारी शिक्षक संघटनांनी केल्या होत्या. शिक्षण समितीमधील काही सदस्यांनी लोकवर्गणी गोळा करुन सांस्कृतिक कार्यक्रम व अन्य उपक्रम राबविले. मात्र त्यातही खोटी बिले दाखवून पैसे लाटण्याचा उद्योग त्या अधिकाऱ्याच्या कालावधीत झाला होता.

...........................................

तेलही गेले तूपही गेले

शिवाजी उद्यमनगर परिसरातील एका शाळेतील शिक्षक सात ते आठ महिने विनापरवानगी गैरहजर होते. त्या शिक्षकाच्या रजा मंजुरीचा प्रस्ताव शिक्षण समितीकडे आला. रजा मंजूर करण्यासाठी हजारो रुपयांचा व्यवहार ठरला. संबंधित शिक्षकाने रक्कम पोहोच केली. दरम्यानच्या कालावधीत त्या 'मॅडम'ची अन्यत्र बदली झाली. रजा मंजुरीचा प्रस्तावही लटकला आणि पैसैही परत नाहीत. यामुळे त्या शिक्षकाची अवस्था 'तेलही गेले तूप ही गेले, हाती धुपाटणे आले'अशी झाली. साकोली कॉर्नर, दुधाळी परिसरातील एका शिक्षिकेला मुख्याध्यापकपदी पदोन्नती मिळाली. मुख्याध्यापक पदाच्या मान्यतेचा प्रस्ताव शिक्षण समितीकडे सादर झाला. ५० हजार रुपयांच्या मागणीमुळे शिक्षण समितीकडे सहा महिने प्रस्ताव रखडला होता.

म. टा. वृत्तसेवा, सांगली

हॉटेलमधील काउंटरवर झालेल्या वादातून पोलिसाचा भोसकून खून केल्याची खळबळजनक घटना मंगळवारी मध्यरात्री येथे घडली. धारधार शस्त्राने हॉटेलच्या गेटवरच वर्दीवरील पोलिसावर तब्बल १८ वार केले. कुपवाड रोडवरील हॉटेल रत्ना डिल्सक्समध्ये खुनाची ही घटना घडली. समाधान भगवान मांटे (वय २९) असे मृत पोलिसाचे नाव आहे. पोलिसांनी दोघांना अटक केली असून, मुख्य संशयित अद्याप हाती लागलेला नाही. हॉटेलमधील पाच जणांना पोलिसांनी ताब्यात घेतले आहे.

मिरज शहर पोलिस ठाण्याकडे नेमणूक आणि वाहतूक नियंत्रणाची जबाबदारी असलेले मांटे विश्रामबागमधील पोलिस वसाहतीत राहत होते. मंगळवारी रात्री घरी येताना ते हॉटेल रत्नामध्ये मद्यप्राशनासाठी गेले. त्यावेळी हॉटेलमधून परत निघालेला झाकीर जमादार (रा. जुनी हडको कॉलनी, कुपवाड रोड) हा बिल देण्यासाठी काउंटरवर आला. हॉटेल व्यवस्थापक आणि त्याच्यात बिलावरुन वाद झाला. त्यावेळी मांटे यांनी झाकीरला समजावण्याचा प्रयत्न केला. तो ऐकत नसल्याने त्याला खाक्या दाखवला. याचा राग आल्याने झाकीरने मित्रांना फोन करुन बोलवून घेतले. त्याचे दोन मित्र हॉटेलबाहेर आल्यानंतर झाकीरने त्यांच्याजवळ जावून याने मला मारहाण केल्याचे सांगितले. तोपर्यंत मांटेही हॉटेलच्या गेटपर्यंत आले होते. ते गेटवर आल्याचे दिसताच दुचाकीत लपवलेला धारधार सुरा काढून तोंडाला मास्क लावून झाकीर मांटेंकडे धावला. त्याने त्यांच्यावर पोट आणि छातीवर सपासप वार केले. अचानक हल्ला झाल्याने घायाळ होऊन मांटे कोसळले. त्यानंतरही त्याने अनेक वार केले. त्यात ते जागीच ठार झाले.

रस्त्याची लागली 'वाट'

धान्य बाजारात दैनाच, मंगळवार पेठेत अंतर्गत रस्त्यांचे पॅचवर्क गरजेचे

कोल्हापूर टाइम्स टीम

धान्याची प्रमुख बाजारपेठ, भाजी मंडई असलेल्या लक्ष्मीपुरी धान्य व्यापारीपेठेतील रस्त्यांची अक्षरश: वाट लागली आहे. ठिकठिकाणी पडलेले रस्ते, साचलेले पाणी आणि गटारी तुंबून रस्त्यावर पसरलेले सांडपाणी असे चित्र या ठिकाणी दिसते. त्यामुळे या रस्त्यावरून वाहने चालवताना वाहनधारकांना मोठी कसरत करावी लागत आहे. दुसरीकडे मंगळवार पेठेतील अंतर्गत रस्ते पावसामुळे पूर्णत: उखडले आहेत. बिंदू चौकातील रस्त्याची तर चाळण झाली आहे.

लक्ष्मीपुरी धान्य व्यापार पेठेतील रस्त्यावरुन मोठ्या प्रमाणात वाहतूक असते. धान्याची ने-आण करणारी वाहने, फळ-भाजीपाला विक्रेत्यांची लगबग, किराणा दुकानदार, स्टेशनरी साहित्य विक्रीची लहानमोठे दुकाने या मार्गावर आहेत. रवी बँकेपासून लक्ष्मीपुरी मुख्य रोडला जोडणारा हा प्रमुख रस्ता आहे. मात्र पावसामुळे रस्त्याला खड्ड्याचे स्वरुप लाभले आहे. या मार्गावर गटारी तुंबून सांडपाणी रस्त्यावर पसरले आहे. उंच-सखल भागामुळे पाण्याचा निचरा होत नाही. पावसाचे व सांडपाण्याचे पाणी रस्त्यावर पसरल्यामुळे आरोग्य विषयक समस्या निर्माण होण्याची भीती वाहनधारक अतुल भोसले यांनी व्यक्त केले.

बिंदू चौकातील रस्त्याची डागडुजी हा नेहमीच चर्चेचा विषय ठरला आहे. गेल्यावर्षी हा रस्ता तयार केला होता. या पावसाळ्यात पुन्हा एकदा रस्ता उखडला आहे. त्यामुळे रस्त्याच्या दर्जाविषयी प्रश्नचिन्ह निर्माण झाला आहे. मंगळवार पेठेतील प्रमुख रस्त्यांची स्थिती सध्या चांगली असली तरी अंतर्गत रस्त्यांची डागडुजी, पॅचवर्कची गरज निर्माण झाली आहे. नंगीवली तालीम समोरील रस्ता उखडला आहे. डाकवे गल्लीतील रस्ता मुळातच अरुंद आहे. पावसामुळे डांबरचा एक थर वाहून गेल्यामुळे खडी वर आली आहे. मिरजकर तिकटी दूधकट्टा ते छत्रपती शिवाजी स्टेडियम कार्यालयापर्यंतच्या रस्त्याची अवस्था बिकट आहे.

रस्त्यावरच बांधकाम साहित्य

मंगळवार पेठ, लक्ष्मीपुरी भागात ठिकठिकाणी बांधकाम सुरू आहे. बांधकामासाठी आवश्यक वाळू, विटासह अन्य साहित्य रस्त्याच्याकडेला टाकले आहे. अरुंद रस्ते, पावसाने खड्ड्यात साचलेले पाणी, त्यामधून वाट काढत वाहने हाकण्याची कसरत करावी लागत आहे. रस्त्याकडेला टाकलेल्या बांधकाम साहित्यामुळे वाहतूक कोंडीत भर पडत आहे. पाटाकडील तालीम मंडळजवळील रस्ताही खराब झाला आहे. पीटीएम ते साई मंदिरापर्यंतच्या रस्त्यावर ठिकठिकाणी टाकलेल्या बांधकाम साहित्याने रस्ता अडविला आहे.

कोल्हापूर : जिल्हा परिषदेच्या स्थायी समिती सभेत सायकल वाटप योजना व एमएससीआयटी प्रशिक्षण योजनेच्या निधीवरून वादावादी झाली. पंचायत समितीकडून प्रस्ताव मंजूर होऊनही निधी वाटपास जाणूनबुजून विलंब केला जात असल्याचा आरोप समाजकल्याण समिती सभापती विशांत महापुरे यांनी केला. महिला व बालकल्याण समितीचे उपमुख्य कार्यकारी अधिकारी सोमनाथ रसाळ यांना त्यांनी या योजनेच्या निधीवरुन धारेवर धरले. बैठकीत वादावादीचे स्वरुप प्राप्त झाल्यानंतर उपाध्यक्ष सर्जेराव पाटील यांनी त्यामध्ये हस्पक्षेप केला. दहा मिनिटाच्या गोंधळानंतर सभेला पुन्हा सुरुवात झाली. जिल्हा परिषद अध्यक्षा शौमिका महाडिक सभेच्या अध्यक्षस्थानी होती. विविध समित्यांचे सभापती व विभागप्रमुखांच्या उपस्थितीत बैठक झाली. प्रस्तावानुसार निधी वाटपाचा निर्णय होऊन त्याप्रश्नी मार्ग काढला.

कोल्हापूर : जिल्ह्यात अतिवृष्टी होऊन नागरिकांचे मोठे नुकसान झाले आहे. नागरी वस्तीत पाणी शिरल्याने घरांची पडझड झाली आहे. शिवाय ग्रामीण भागात शेतीचे मोठे नुकसान झाले आहे. पुरामुळे झालेल्या नुकसानीचे पंचनामे करून नुकसानग्रस्तांना तातडीने मदत द्यावी, अशी मागणी आमदार सतेज पाटील यांनी विधानपरिषदेत केली. जिल्ह्यातील ७२ मार्ग बंद आहेत. तसेच २०० गावांचा संपर्क तुटल्याने जनजीवन विस्कळीत झाल्याचे त्यांनी सभागृहात सांगितले. यावर पालकमंत्री चंद्रकांत पाटील यांनी पूरस्थितीच्या पार्श्वभूमीवर जिल्हा प्रशासन सतर्क असल्याचे सांगितले.