सिंगल फोटो...

वाहून गेलेल्या वृद्धाचा मृतदेह सापडला

आजरा : बुधवारी सायंकाळी सुळेरान बंधाऱ्यानजीक नदीपात्रातून वाहून गेलेल्या आंबाडे (ता. आजरा) येथील वृद्धाचा मृतदेह शुक्रवारी सायंकाळी उशिरा सापडला. शंकर लक्ष्मण कुऱ्हाडे (मूळगाव बेळगुंदी, ता. गडहिंग्लज) असे त्यांचे नाव आहे. गुरुवारपासून त्यांचा शोध सुरू होता. दरम्यान, दाभिल बंधाऱ्यात गुरुवारी उशिरा त्यांचा मृतदेह दिसून येत होता. दाभिल ग्रामस्थांनी याची माहिती पोलिसांना दिली. मात्र, पाण्याचा वेग मोठा असल्याने ते वाहून पुढे गेल्याचे सांगण्यात आले. शुक्रवारी सायंकाळी उशिरापर्यंत मोहीम सुरू होती. मात्र नदीचे पात्र अरुंद असल्याने शोधकार्यात अडथळे येत होते. अखेर आजची मोहीम आटोपती घेत असतानाच हिरण्यकेशी नदीपात्रात नलवडे फार्म नजीक कुऱ्हाडे यांचा मृतदेह आढळला.

००००

'प्रभारीं'वरच जि. प.चा कारभार

१३ टक्के पदे रिक्त; प्रशासकीय कामकाज विस्कळीत, सर्वसामान्यांचे हेलपाटे

Bhimgonda.Desai@timesgroup.com

Tweet : @bhimgondaMT

कोल्हापूर : जिल्हा परिषदेतील मुख्य कार्यकारी अधिकारी, अतिरिक्त मुख्य कार्यकारी अधिकारी आणि सहा महत्वाच्या विभागप्रमुखांसह १८१ अधिकाऱ्यांची पदे रिक्त आहेत. त्यामुळे सर्व कामकाज प्रभारींवर सुरू असल्याचे वास्तव आहे. मुख्यालय, सर्व पंचायत समित्यांमध्ये ग्रामसेवक, शिक्षक यांसह एकूण १८५० कर्मचाऱ्यांची पदे रिक्त आहेत. गुरुवारी सीईओ डॉ. कुणाल खेमनार यांची बदली झाल्यानंतर कार्यभार देण्यासाठी सुमारे अर्धा तास सक्षम अधिकाऱ्याचा शोध घ्यावा लागला. शेवटी पदाचा कार्यभार उपमुख्य कार्यकारी दर्जाच्या अधिकाऱ्याकडे देण्यात आला. त्यानंतर मुख्यालय, पंचायत समित्यांमधील रिक्त अधिकारी, कर्मचाऱ्यांचा प्रश्न ऐरणीवर आला आहे.

केंद्र, राज्य सरकारच्या योजना राबवण्याचे महत्वाचे केंद्र म्हणून जिल्हा परिषद आणि पंचायत समित्यांकडे पाहिले जाते. देशात, राज्यात आणि जिल्हा परिषदेमध्ये भाजपची सत्ता असतानाही ग्रामीण विकासाच्या मुख्यालयात अधिकारी, कर्मचाऱ्यांच्या मोठ्या संख्येने जागा रिक्त आहेत. दोन वर्षांपासून अनेक महत्वाच्या पदांवर पूर्णवेळ अधिकारी नाही. महसूलमंत्री चंद्रकांत पाटील यांच्या रुपाने जिल्ह्यात महत्वाचे मंत्रिपद असतानाही अधिकारी, कर्मचारी देता का? अशी म्हणण्याची वेळ आली आहे. पूर्णवेळ अधिकारी, कर्मचारी नसल्याने विकासकामांवरही परिणाम होत आहे. प्रशासकीय कामकाज विस्कळीत झाले आहे. सामान्यांना कामासाठी हेलपाटे मारावे लागत आहे. राज्यात अधिकाऱ्यांमध्ये कोल्हापूरला येण्यासाठी जोरदार स्पर्धा असते. त्यातून ठरलेला 'दर' देऊनही रूजू होतात. मात्र सध्या उलटी स्थिती निर्माण झाली आहे.

सीईओंनंतरचे महत्वाचे पद अतिरिक्त मुख्य कार्यकारी अधिकारी पदावरील अधिकारी इंद्रजित देशमुख यांनी महिन्यापूर्वी स्वेच्छानिवृत्ती घेतली. ते दीर्घ रजेवर आहेत. त्यांच्या पदाचा कार्यभार ग्रामपंचायत विभागाचे उपमुख्य कार्यकारी अधिकारी राजेंद्र भालेराव यांच्याकडे आहे. सीईओपदाचा कार्यभार असलेल्या सुषमा देसाई यांच्याकडे ग्रामीण विकास यंत्रणा प्रकल्प संचालक, ग्रामसेवक प्रशिक्षण केंद्राचे प्राचार्यपद अशा तीन पदांचा कार्यभार आहे. प्राथमिक शिक्षणाधिकारी, समाजकल्याण अधिकारी पदाचा कार्यभारही प्रभारीच आहे. माध्यमिक शिक्षणाधिकारी किरण लोहार यांच्याकडे उपसंचालक पदाचा कार्यभार आहे. ते उपसंचालक कार्यालयात बसून 'माध्यमिक'चे कामकाज पाहतात. त्यामुळे ते 'माध्यमिक'मध्ये भेटत नाहीत, अशा तक्रारी आहेत. गटशिक्षणधिकाऱ्यांची सहा पदे रिक्त आहेत. त्यामुळे तालुका पातळीवरील शिक्षण प्रशासनाचाही बोजवारा उडाला आहे.

देशात नावलौकीक

एकेकाळी प्रशासकीय कामकाजात कोल्हापूर जिल्हा परिषद राज्यात, देशात अव्वल ठरली होती. मात्र आता सर्व विभागांत अनेक महिन्यांपासून पूर्णवेळ अधिकारी नसल्याने प्रशासकीय कामकाज मंदावले आहे. कामकाजातील क्रमांकही घसरला आहे. कार्यरत ग्रामपंचायत, आरोग्य विभागाकडील अनेक अधिकाऱ्यांच्या विरोधात गलथान कारभारासंबंधीच्या तक्रारी आहेत. अनेक ग्रामपंचायतींच्या तक्रारी दाबून ठेवल्या जात असल्याच्या तक्रारी आहेत.

महत्वाची पदे

मुख्यालयातील रिक्त अधिकारी पदे

सीईओ, अतिरिक्त मुख्य कार्यकारी अधिकारी, प्रकल्प संचालक, प्राथमिक शिक्षणाधिकारी, समाजकल्याण अधिकारी, पाणीपुरवठा कार्यकारी अभियंता, गटविकास अधिकारी (सहा), सहायक गटविकास अधिकारी (नऊ).

१

जिल्हा परिषद

१२

पंचायत समिती

४००

एकूण अधिकारी पदे मंजूर

१८१

रिक्त पदे

१४,२८२

कर्मचारी जागा मंजूर

१८५०

रिक्त पदे

लोंघेजवळ बसच्या अपघातात महिला ठार

म. टा. वृत्तसेवा , कुडित्रे

कोल्हापूर- गगनबावडा राज्यमार्गावरील गगनबावडा तालुक्यातील लोंघे येथे शुक्रवारी सकाळी ९ वाजण्याच्या सुमारास दोन बसची समोरासमोर जोरदार धडक बसून झालेल्या अपघातात एक महिला जागीच ठार झाली. तर २०हून अधिक प्रवासी जखमी झाले. बेबी बाळू मुल्लाणी (वय ६२, रा. तिसंगी, ता. गगनबावडा) असे अपघातात ठार झालेल्या महिलेचे नाव आहे. तर त्यातील तिघांची प्रकृती चिंताजनक आहे.

कोल्हापूर-कोदे बस साळवणच्या दिशेने निघाली होती तर विजयदुर्ग-पुणे ही बस गगनबावड्याहून कोल्हापूरकडे येत होती. दरम्यान लोंघे येथे या दोन्ही एसटींची समोरासमोर जोरदार धडक झाली. यामध्ये २०हून अधिक प्रवाशी जखमी झाले. जखमींना व सर्व प्रवाशांना स्थानिक नागरिकांच्यामदतीने बाहेर काढण्यात आले. जखमींना १०८ रुग्णवाहिकेतून कोल्हापूरला सीपीआर रुग्णालयात उपचारासाठी दाखल करण्यात आले. अपघातात बसचालक उदय अरुण पाटील (वय ३२ रा. सांगरुळवाडी), बसचालक बंडा धोंडीराम राऊत (वय ४१ रा. महे, ता. करवीर) हे गंभीर जखमी झाले. अपघातामुळे रस्त्याच्या दुतर्फा वाहनांच्या रांगाच रांगा लागल्या होत्या. लोंघे येथे यापूर्वीही अनेक अपघात झाले आहेत. मात्र सार्वजनिक बांधकाम विभागाकडून येथे सुरक्षेसाठी कोणत्याही उपाययोजना केलेल्या नाहीत.

अन्य जखमींची नावे : भगवान प्रभावळे (वय ७२, रा. कळे ता. पन्हाळा), चंद्रकांत घाडी (६०, रा. देवगड), नंदकिशोर कागले (५५, कोपार्डे, कणकवली),चंद्रकांत सूर्यंवंशी (५५, रा. कसबाबीड, ता. करवीर), विलासराव खानविलकर (६७ रा. लांजा), पोलिस कॉन्स्टेबल सदाशिव पाटील (रा. खाटांगळे ता. करवीर), बाळू म्हेतर (४० रा. नाळेवाडी) सुजाता ठोसर (४० रा. नाळेवाडी), विघ्नेश गोटम (१० रा. पन्हाळा), केरबा गोटम (३७ रा. पन्हाळा), रोहित शेबवरे (२६ रा. कुची, कवठेमहाकाळ), महादेव बडे (६० रा. विजापूर), मुक्ताबाई बडे (५५ रा. विजापूर), विजयकुमार वर्धन (५० रा. विजयदूर्ग), शंकर मुकबूल (५७ रा. देवगड), रणजित यादव (२६ रा. देवगड).

जोरदार धडक

अपघातस्थळी दोन्ही बसची समोरासमोर बसलेली धडक एवढी भयानक होती की या बसचा समोरील, ड्रायव्हरकडील भाग एकमेकात घुसला होता. सहजासहजी दोन्ही गाड्या बाजूला करणे अशक्य होते. त्यामुळे दोन्ही बसचे पत्रे कापून गाड्या हटविण्यात आल्या.

फोटो : कोल्हापूर-गगनबावडा मार्गावरील लोंघे येथे दोन एसटींच्या झालेल्या समोरासमोरील धडकेत दोन्ही एसटी एकमेकांत घुसल्या.

म. टा. प्रतिनिधी, कोल्हापूर

'चांदोली अभयारण्य प्रकल्पग्रस्तांसाठी संपादित करण्यात येणारी पुनर्वसनाची जमीन गायब होत असून कोल्हापूर जिल्हाधिकाऱ्यांनी याकडे गेली दोन वर्षे लक्ष दिलेले नाही,' असा आरोप श्रमिक मुक्ती दलाचे राष्ट्रीय अध्यक्ष डॉ. भारत पाटणकर यांनी केला. पुनर्वसनाकडे दुर्लक्ष होत असल्याबद्दल श्रमिक मुक्ती दलाच्या वतीने नऊ ऑगस्ट क्रांतिदिनी जिल्हाधिकारी कार्यालयावर इशारा मोर्चा काढण्यात येणार असल्याची माहिती त्यांनी पत्रकार परिषदेत दिली.

पाटणकर म्हणाले, 'चांदोली अभयारण्यातील ९४२ प्रकल्पग्रस्तांना ९०० हेक्टर जमीन पुनर्वसनासाठी आवश्यक असताना गेल्या वीस वर्षांत जिल्हा प्रशासनाने अवघी ९० हेक्टर जमीन संपादित केली असून, ५४ प्रकल्पग्रस्तांना जमिनीचे वाटप केले आहे. प्रकल्पग्रस्तांच्या पुनर्वसनासाठी जमीन शिल्लक असताना सरकारी यंत्रणेकडून लपवून ठेवली जात आहे. पाच वर्षांपूर्वी प्रशासनाने ८०० हेक्टर जमीन पुनर्वसनासाठी असल्याचे सांगितले होते. पण प्रत्येक बैठकीत पुनर्वसनाच्या जमिनीचा आकडेवारी कमी होत चालल्याचे दिसत आहे. शिरोळ तालुक्यात २०० हेक्टर जमीनीचे वाटप करायचे आहे. पण प्रशासन यंत्रणा जमीन लपवून एजंटाकरवी जमिनीची विक्री करत आहे. प्रकल्पग्रस्त व प्रशासनाच्या होणाऱ्या प्रत्येक बैठकीत जमीन कमी असल्याचे अधिकारी सांगतात. पाच वर्षांपूर्वी प्रशासनाने जाहीर केलेली ८०० हेक्टर जमीन कुठे गायब झाली?'

गेली वीस वर्षे चांदोली अभयारण्यग्रस्त जमीन मागत आहेत पण प्रशासन त्यांना देत नाही. राज्य सरकारने जमीन विकत घेऊन पुनर्वसन करण्याची घोषणा केली आहे. गेली दोन वर्षे कोल्हापूर जिल्हाधिकाऱ्यांनी प्रकल्पग्रस्तांना जमीन संपादित करण्यासाठी लक्ष घातलेले नाही. त्यामुळे नऊ ऑगस्टला जिल्हाधिकारी कार्यालयावर मोर्चा काढण्यात येणार आहे. त्यानंतर ऑक्टोबर ते नोव्हेंबर महिन्यात वनविभाग कार्यालयासमोर ठिय्या आंदोलन केले जाईल, असेही पाटणकर यांनी स्पष्ट केले. पत्रकार परिषदेला गेल ऑम्वेट, संपत देसाई, मारुती पाटील, वसंत पाटील, डी. के. बोडके, आदी उपस्थित होते.

०००००

महापालिकेचा कारवाईचा बडगा

बेसमेंटमधील पाणी न काढल्याबद्दल भोगवटा व बांधकाम परवाना रद्द करण्याचा प्रस्ताव

म. टा. प्रतिनिधी, कोल्हापूर

डेंगीचा फैलाव रोखण्यासाठी प्रतिबंधात्मक उपायावर भर देणाऱ्या महापालिकेने शुक्रवारी कारवाईचा बडगा उगारला. नोटिसा देऊनही बेसमेंटमधील पाणी उपसा न केल्याबद्दल ओंकार एन्क्लेव्ह अपार्टमेंटचा भोगवटा आणि बांधकाम परवाना रद्द करण्याचा प्रस्ताव नगररचना विभागास पाठविण्याच्या सूचना आयुक्त डॉ. अभिजित चौधरी यांनी आरोग्य विभागाला दिल्या. याशिवाय शहरातील तीन मिळकतधारकांना १२ हजार ५०० रुपयांचा दंड करण्यात आला. दंडानंतरही साचलेले पाणी न काढल्यास फौजदारी करण्याचा इशारा महापालिकेने दिला आहे.

जून महिन्यापासून शहरात डेंगीचा फैलाव वेगाने वाढत गेल्यानंतर महापालिकेच्यावतीने सर्वेक्षण हाती घेण्यात आले आहे. औषध फवारणी, तापाचे रुग्ण तपासणी, कोरडा दिवस पाळणे, हँडबिल वाटप आदी मार्गाने प्रबोधन करण्यात आले. प्रतिबंध हाच डेंगीला रोखण्याचा मुख्य मार्ग असल्याने सर्वेक्षणाच्या माध्यमातून 'घर टू घर' प्रबोधन करण्यात आले. ज्या इमारतींच्या बेसमेंटमध्ये पाणी साचून राहते, त्यांना पाणीउपसा करण्याच्या सूचना दिल्या होत्या. त्याकडे दुर्लक्ष झाल्याने आणि डेंगीच्या रुग्णांत वाढ होत असल्याने महापालिकेने कारवाईचा इशारा दिला होता.

त्यानुसार शहरातील ९७ मिळकतधारकांना बेसमेंटमध्ये साचलेले पाणी उपसा करण्याच्या नोटिसा बजवल्या. नोटिसांकडे दुर्लक्ष करून बेसमेंटमधील पाणी तसेच ठेवल्याबद्दल तीन मिळकतधारकांवर दंडात्मक कारवाई करण्यात आली. वृषाली हॉटेलच्या पिछाडीस असलेल्या ओंकार एन्क्लेव्ह अपार्टमेंटमध्ये पाणी साचल्याबद्दल स्थानिक नागरिकांनी तक्रारी दाखल केल्या. नोटीस बजावूनही बेसमेंटमधील पाणी उपसा न केल्याबद्दल ओंकार एन्क्लेव्हचा भोगवटा प्रमाणपत्र व बांधकाम परवाना रद्द करण्याचा प्रस्ताव नगररचना विभागास पाठवण्याच्या सूचना आयुक्त डॉ. चौधरी यांनी दिल्या. शिवाय जेथे नवीन बांधकाम सुरू आहे, अशा ठिकाणी पाणी साचून राहिल्यास थेट बांधकाम परवाना रद्द करण्याचे आदेश महापालिकेने दिले आहेत.

दंडाची कारवाई

डेंगी प्रतिबंधात्मक मोहिमेंतर्गत आरोग्य विभागाने केलेल्या सर्वेक्षणात अनेक अपार्टमेंटच्या बेसमेंटमध्ये पाणी साचल्याचे आढळले होते. अशा मिळकतधारकांना साचलेल्या पाण्याचा उपसा करण्याच्या सूचना देऊन नोटिसाही बजवल्या. तरीही साचलेल्या पाण्याचा उपसा न केल्याबद्दल राजारामपुरीतील डॉ. गाडवे, संभाजीनगरात बिटू बिल्डरला प्रत्येकी पाच हजार रुपये तर कनाननगरातील करण नर्सरीला २५०० रुपयांचा दंड करण्यात आला. सात दिवसांत दंडाची रक्कम न भरल्यास हा दंड घरफाळ्यामध्ये वर्ग करून महापालिकेच्यावतीने फौजदारी गुन्हा दाखल करण्यात येणार आहे.

- ९७ मिळकतधारकांना नोटीस

- पाणी साठल्यास नवीन बांधाकम परवानाही रद्द होणार

- सात दिवसांत दंड न भरल्यास फौजदारी गुन्हा

- साथरोग विभागातील कर्मचाऱ्यांची कानउघडणी

डेंगीच्या ४८ रुग्णांची भर

म. टा. प्रतिनिधी, कोल्हापूर

महापालिकेने शुक्रवारी केलेल्या सर्वेक्षणात डेंगीचे आणखी ४८ रुग्ण आढळले. जुलै महिन्यात डेंगी रुग्णांच्या संख्येत सातत्याने वाढ झाली आहे. सर्वेक्षणात १८४ कुटुंबानी साठवलेल्या पाण्यामध्ये डेंगीच्या अळ्या आढळून आल्या आहेत.

शहरात १२ जूनपासून डेंगी प्रतिबंधात्मक मोहीम हाती घेण्यात आली आहे. शुक्रवारी परिट गल्ली, उमरावकर गल्ली, जैन मठ, राजेंद्रनगर, लक्ष्मी वसाहत, मातंग वसाहत, सरलष्कर पार्क, राजारामपुरी, सानेगुरुजी वसाहत, कदमवाडी, शहाजी वसाहत आदी ठिकाणी राबवलेल्या मोहिमेमध्ये १५४३ घरांची तपासणी करण्यात आली. एकूण ७ हजार ४२ नागरिकांची तपासणी करून त्यामध्ये तापाचे २० तर डेंगीचे ४८ रुग्ण आढळले. शहरातील २६३३ कंटेनरपैकी ११७ कंटेनरमध्ये डेंगीच्या अळ्या आढळल्या आहेत. अकरा पथकांतील ८४५ कर्मचाऱ्यांनी दिवसभर सर्वेक्षण केले.

सैनिक टाकळीत

मगर जेरबंद

म. टा. वृत्तसेवा, जयसिंगपूर

सैनिक टाकळी (ता. शिरोळ) येथे खिद्रापूर रस्त्यालगत गुरुवारी रात्री दहा फूट लांबीची मगर आढळली अन् परिसरातील नागरिक भयभीत झाले. प्रशासनास याची माहिती देण्यात आल्यानंतर वनविभाग आणि वन्यजीव संवर्धन व बचाव संस्थेच्या पथकाने रात्री दीड वाजता या मगरीस पकडले. त्यानंतर नागरिकांनी सुटकेचा निःश्‍वास सोडला.

सैनिक टाकळी-खिद्रापूर मार्गावर मोठा ओढा आहे. हा ओढा पुढे कृष्णा नदीस मिळतो. या ओढ्यामध्ये मगरींचा वावर आहे. सध्या पावसामुळे कृष्णा नदीच्या पाणीपातळीत वाढ होत आहे. गुरूवारी रात्री साडेदहा वाजण्याच्या सुमारास खिद्रापूर मार्गावर वनकोरे व पाटील कुटूंबियांना मगर आढळली. यामुळे भीतीने परिसरातील नागरिकांच्या काळजाचा ठोका चुकला. वनविभागास याची माहिती देण्यात आली. दरम्यान, ही मगर उसाच्या शेतात गेली. वनविभाग, वन्यजीव संवर्धन व बचाव संस्थेचे पथक सैनिक टाकळीत दाखल झाले. संगमेश्‍वर येलूरकर, ओदक शास्त्री, देवेंद्र कोळी, रितेश राजेशिर्के, ओंकार चांदणे, अमोल पोरुशे, वनपाल घनःशाम भोसले, वनरक्षक सागर पवार यांनी मोहीम राबविली. रात्री दीड वाजण्याच्या सुमारास मगरीला जेरबंद करण्यात यश आले. तहसिलदार गजानन गुरव यांनी घटनास्थळी भेट देऊन पाहणी केली. नदीच्या पाणीपातळीत वाढ होत असल्याने मगर पात्राबाहेर आली असावी अशी शक्यता वन्यजीव संवर्धन संस्थेच्या सदस्यांनी व्यक्त केली.

म. टा. प्रतिनिधी, कोल्हापूर

पुणे विभागातील १८ अधिकाऱ्यांचा गट विकास अधिकारी होण्याचा मार्ग मोकळा झाला आहे. गेली दोन वर्षे रखडलेल्या पदोन्नती प्रक्रिया तत्काळ मार्गस्थ लावण्याची ग्वाही विभागीय आयुक्त दीपक म्हैसेकर यांनी दिली. कोल्हापूर जिल्हा परिषद युनियनचे अध्यक्ष धनंजय जाधव यांच्या नेतृत्वाखाली युनियनच्या पदाधिकाऱ्यांनी म्हैसेकर यांची भेट घेऊन पदोन्नतीबाबत निवेदन दिले. पदोन्नतीचा निर्णय झाल्यास कोल्हापुरातील सहा अधिकाऱ्यांना संधी मिळणार आहे.

पुणे विभागातील कक्ष अधिकारी, विस्तार अधिकाऱ्यांमधून गट विकास अधिकारीपदाची पदोन्नती प्रक्रिया दोन वर्षापासून रखडली आहे. त्यामुळे संबंधितावर अन्याय होत असल्याचे युनियनचे जिल्हाध्यक्ष जाधव यांनी विभागीय आयुक्त म्हैसेकर यांच्या निदर्शनास आणून दिले. शिष्टमंडळात युनियनचे महावीर सोळांकुरे, सुधाकर कांबळे, किरण निकम, अभिजित पाटील, बी. डी. पाटील, संजय शिंदे, रवींद्र गस्ते, अशोक पाटील, मनीषा पालेकर आदींचा समावेश होता.

पंधरा दिवसांत ठरणार आंदोलनाची दिशा

म. टा. प्रतिनिधी, कोल्हापूर

कोल्हापुरात खंडपीठ होण्यासाठी पुन्हा रस्त्यावर उतरून संघर्ष करण्याची तयारी सुरू झाली आहे. कोल्हापूर जिल्हा बार असोसिएशनने जिल्ह्यातील पदाधिकाऱ्यांशी चर्चा सुरू केली असून येत्या पंधरा दिवसांत आंदोलनाची पुढील दिशा ठरविली जाणार आहे. त्यासाठी येत्या आठवडाभराचे नियोजन निश्चित केले आहे. खंडपीठाच्या जागेसाठी सोमवारी (ता. १६) विभागीय आयुक्त डॉ. दीपक म्हैसेकर यांची भेट घेण्यात येणार आहे.

औरंगाबाद खंडपीठाचे न्यायमूर्ती तानाजी नलवडे यांचे गुरूवारी बार असोसिएशनमध्ये व्याख्यान झाले. त्यांनी खंडपीठासाठी आंदोलनाची सुरूवात करावी, असे आवाहन केले. त्यानुसार कोल्हापूर जिल्हा बार असोसिएशनने आंदोलनाची तयारी सुरू केली आहे.

खंडपीठासाठी गेल्या तीस वर्षांपासून कोल्हापुरात लढा सुरू आहे. त्यासाठी कोल्हापूर, सांगली, सातारा, सोलापूर, रत्नागिरी व सिंधुदूर्ग अशा सहा जिल्ह्यांतील १६ हजार वकिलांनी ५४ दिवसाचे कामबंद आंदोलन केले होते. तरीही सरकारने दखल घेतलेली नाही. इमारत निधी, मुलभूत सुविधांची कारणे देऊन खंडपीठ होत नसल्याचा आरोप बार असोसिएशनकडून केला जात आहे. या मागणीसाठी सरकारने सकारात्मक चर्चेची तयारी दर्शविली, मात्र आजअखेर आश्वासने मिळाल्याने पुन्हा आंदोलन केले जाणार आहे. खंडपीठाच्या मागणीसाठी जाणीवपूर्वक दुर्लक्ष केले जात असल्याच्या निषेधार्थ सहा जिल्ह्यातील वकील संघर्ष करून एकजुटीने लढा देणार आहेत. पहिल्या टप्प्यात पदाधिकाऱ्यांची भेटीसाठी बार असोसिएशनने कृतीबद्ध कार्यक्रम निश्चित केला आहे. त्यासाठी येत्या आठवड्यात आंदोलनाच्या जबाबदारीचे नियोजन पूर्ण केले जाणार आहे.

०

आंदोलनाची तयारी

१६ जुलै : विभागीय आयुक्तांची जागेसंदर्भात भेट

१७ जुलै : सांगली, रत्नागिरी, सिंधुदुर्ग पदाधिकाऱ्यांची भेट

१८ जुलै : बारचे माजी अध्यक्ष, उपाध्यक्ष, सेक्रेटरी यांची बैठक

१९ जुलै : प्रभारी न्यायमूर्तीची भेट, निवेदन

००

कोट

'कोल्हापूर खंडपीठासाठी पुन्हा लढण्याची तयारी सुरू केली आहे. आजअखेर केवळ आश्वासने मिळाल्याने हा पवित्रा घ्यावा लागत आहे. त्यासाठी असोसिएशनच्या कार्यक्षेत्रात संपर्क दौरा सुरू केला आहे.

अॅड. प्रशांत चिटणीस, अध्यक्ष, जिल्हा बार असोसिएशन

फोटो...

म. टा. प्रतिनिधी, कोल्हापूर

'कोल्हापुरात १० ते १२ हजार रिक्षाचालक असून, ते प्रामाणिकपणे प्रवाशांना सेवा देत कुटुंबांचा उदरनिर्वाह करत आहेत. अशा रिक्षाचालकांच्या अडीअडचणी सोडविण्यासाठी आणि त्यांच्या व्यवसायात वृद्धी व विकास होण्यासाठी रिक्षा भवन स्थापन करू,' अशी घोषणा पालकमंत्री चंद्रकांत पाटील यांनी भारतीय जनता पक्षाच्या वतीने रिक्षा संघटनेच्या मेळाव्यात केली.

राजर्षी शाहू स्मारक भवन येथील मिनी हॉलमध्ये झालेल्या मेळाव्यात मोठ्या संख्येने रिक्षाचालक उपस्थित होते. मेळाव्यात दोन हजार रिक्षांना पक्षाच्या वतीने मोफत रिकॅलिब्रेशन पूर्ण केल्याची माहिती पालकमंत्री पाटील यांनी दिली. ते म्हणाले, 'समाजातील वंचित घटकांसाठी भाजप कार्यरत आहे. रिक्षाचालक व्यवसायाच्या माध्यमातून आपल्या कुटुंबाचा उदरनिर्वाह करतात. त्यांना मूलभूत सुविधा देण्यास आम्ही कटिबद्ध आहोत. कोल्हापूरात रिक्षा व्यावसायिकांची १० ते १२ हजार संख्या असून त्यांच्या विकासासाठी रिक्षा भवन स्थापन करण्यात येईल.' यावेळी रिक्षाचालकांना रिकॅलिब्रेशन झालेले मीटर व प्रमाणपत्राचे वाटप करण्यात आले. महिला रिक्षाचालक रेखा दुधाणे यांनी जुनी रिक्षा विकली असून, त्यांना नवीन रिक्षा घेण्यासाठी लागणारी उर्वरित रक्कम देणार असल्याचे पालकमंत्री पाटील यांनी सांगितले.

मेळाव्याच्या प्रारंभी भाजपचे जिल्हा उपाध्यक्ष बाबा इंदुलकर यांनी रिक्षा संघटनेच्या उपक्रमाची माहिती दिली. यावेळी पश्चिम महाराष्ट्र देवस्थान व्यवस्थापन समितीचे अध्यक्ष महेश जाधव, भाजप महानगर अध्यक्ष संदीप देसाई, भाजप रिक्षा संघटना अध्यक्ष विजय गायकवाड, सरचिटणीस अशोक देसाई, माजी नगरसेवक आर. डी. पाटील, सुभाष रामुगडे, अॅड. संपतराव पवार, कॉमन मॅनचे अध्यक्ष अविनाश दिंडे, जाफर मुजावर, आदी उपस्थित होते.

म. टा. प्रतिनिधी, कोल्हापूर

स्वाभिमानी शेतकरी संघटनेने पुकारलेल्या दूध संकलन बंद आंदोलनाला पाठींबा देताना जिल्हा दूध उत्पादक संघाने (गोकुळ)ने सोमवारी (ता. १६) एक दिवस संकलन बंद करण्याची घोषणा केली. राज्य सरकारने गाईच्या दुधाला प्रतिलिटर पाच रुपये अनुदान उत्पादकांच्या खात्यावर जमा करावे, या मागणीसाठी स्वाभिमानी शेतकरी संघटनेने आंदोलन पुकारले आहे. गोकुळच्या निर्णयानंतर जिल्ह्यातील अन्य दूध संघाच्या निर्णयाकडे लक्ष लागले आहे. दरम्यान, एक दिवस संकलन बंद करण्याचा निर्णय घेतल्याने 'गोकुळ'ला अंदाजे साडेपाच कोटीचा फटका बसणार आहे.

स्वाभिमाने शेतकरी संघटनेने रविवारी मध्यरात्री बारापासून दूध बंद आंदोलनाचा निर्णय घेतला आहे. तसेच मुंबईला जाणारे दूध रोखण्याची घोषणा केली आहे. कोल्हापूर, सांगली जिल्ह्यात स्वाभिमानीचा बालेकिल्ला असल्याने ग्रामीण भागातून या आंदोलनाला पाठींबा मिळत आहे. जिल्हा सहकारी दूध संस्था कर्मचारी संघटनेने आंदोलनाला पाठींबा दिला आहे.

गोकुळ, वारणा, शाहू संघाकडून अंदाजे साडेपंधरा लाख लिटर दूध संकलन केले जाते. दूध बंदबाबत गोकुळ कोणता निर्णय घेणार याकडे दूध उत्पादकांचे लक्ष होते. शनिवारी 'गोकुळ'चे अध्यक्ष विश्वास पाटील यांच्या अध्यक्षतेखाली बैठक झाली. बैठकीत सोमवारी एक दिवस संकलन बंद करण्याचा निर्णय घेण्यात आला. मंगळवारी (१७) दूध संकलन सुरु राहणार असल्याचे अध्यक्ष पाटील यांनी सांगितले. शेतकऱ्यांना दूध डेअरीत घाला असा आग्रह केला जाणार नाही, पण एखादा शेतकरी दूध डेअरीत घेऊन आला तर त्याचे दूध स्वीकारले जाईल. संकलन केलेले दूध मुंबईलाही पाठवले जाईल, असे त्यांनी स्पष्ट केले.

गाईच्या दूधाला पाच रुपये अनुदान द्यावे, दूध पावडरला अनुदान द्यावे, अशी मागणी 'गोकुळ'नेच पहिल्यांदा केली होती. जिल्हाधिकारी कार्यालयावर मोर्चा काढला होता, याकडे अध्यक्ष पाटील यांनी लक्ष वेधले. गोकुळने केलेल्या मागणीसाठीच स्वाभिमानीने आंदोलनाची घोषणा केली असल्याने एक दिवस दूध संकलन बंद करण्याचा निर्णय घेतला आहे. त्यामुळे ११ लाख लिटर दूध संकलन बंद होणार अडीच कोटींचा फटका बसणार आहे. आंदोलनामुळे राज्य सरकारने मागणी मान्य केल्यास दूध उत्पादकांना फायदा होणार असल्याने गोकुळने फटका सोसूनही एक दिवस संकलन बंद करण्याचा निर्णय घेतला आहे.

बैठकीला गोकुळचे माजी अध्यक्ष अरुण नरके, अरुण डोंगळे, रवींद्र आपटे यांच्यासह संचालक उपस्थित होते.

०००००

दूध उत्पादकांना लिटरला पाच रुपये अनुदान द्यावे, या मागणीसाठी आंदोलन होणारच आहे. आंदोलनात दूध उत्पादक, सहकारी, खासगी डेअरी व संघांनी सहभागी व्हावे. मुंबईचा दूध पुरवठा तोडणार असून, त्यामुळे सरकार वठणीवर येईल.

खासदार राजू शेट्टी.

म. टा. प्रतिनिधी, कोल्हापूर

गेली नऊ वर्षे फरारी असलेला आणि दुचाकी चोरीचे गुन्हे दाखल असलेला मिलिंद आनंदा पाटील (वय ३१, रा. मजरे-कासारवाडा ता. राधानगरी) या चोरट्याला स्थानिक गुन्हे अन्वेषण पथकाने शिफातीने पकडले. रेकॉर्डवर असलेला हा चोरटा आदमापूर येथे देवदर्शनासाठी येणार असल्याची माहिती मिळाली. त्या ठिकाणी सापळा रचून पोलिसांनी पकडले. पाटील याच्यावर कोल्हापूर, जयसिंगपूर, भुदरगड, कराड व उंब्रज या ठिकाणी दुचाकी चोरीचे गुन्हे दाखल होते. तो आदमापूर येथे येणार असल्याची माहिती स्थानिक गुन्हे अन्वेषण पथकाला समजली. त्या ठिकाणी सापळा रचून शिफातीने या चोरट्याला ताब्यात घेतले. हा चोरचा २००९ पासून फरार होता. त्याच्यावर न्यू शाहूपुरी येथील गणेश मागलेकर यांची दुचाकी चोरीचा गुन्हा शाहूपुरी पोलिसांत दाखल आहे. स्थानिक गुन्हे अन्वेषणचे पोलिस निरीक्षक तानाजी सावंत यांच्या मार्गदर्शनाखाली कारवाई झाली.

म. टा. प्रतिनिधी, कोल्हापूर

कोल्हापुरात गेली २५ वर्षे सार्वजनिक जीवनात कार्यरत व विविध आंदोलनाच्या माध्यमातून सक्रिय असणाऱ्या सामाजिक कार्यकर्ते संजय दिनकरराव पाटील यांच्या सुवर्णमहोत्सवी वाढदिवसानिमित्त रविवारी (ता.१५) नागरी सत्कार करण्यात येणार आहे. याप्रसंगी त्यांच्या आतापर्यंतच्या आंदोलनावर आधारित 'आंदोलन'स्मरणिकेचे प्रकाशन होणार आहे. संगीतसूर्य केशवराव भोसले नाट्यगृह येथे सकाळी ११ वाजता कार्यक्रमाला सुरुवात होईल अशी माहिती संयोजन समितीने पत्रकार परिषदेत दिली. माजी राज्यपाल डॉ. डी. वाय. पाटील हे प्रमुख पाहुणे आणि खासदार राजू शेट्टी यांच्या अध्यक्षतेखाली हा कार्यक्रम होणार आहे. पाटील यांनी रॉकेल, पेट्रोल, जिल्हा परिषदेतील औषध घोटाळा, गहू घोटाळा, आरोग्य, शिक्षण, पर्यावरण, शहर झोपडपट्टी निर्मूलन अशा विविध विषयावर आंदोलन करत सामान्यांना न्याय मिळवून देण्याचा प्रयत्न केला. त्यांच्या या आंदोलनाचा आढावा घेणाऱ्या 'आंदोलन'स्मरणिकेचे प्रकाशन कार्यक्रम आहे. महापौर शोभा बोंद्रे यांच्या हस्ते स्मरणिकेचे प्रकाशन होईल.

म. टा. प्रतिनिधी, कोल्हापूर

'मराठी चित्रपटातील सर्वश्रेष्ट कलाकार निळू फुले यांनी पडद्यावर रंगवलेल्या खलनायकांची प्रतिमा समाजात काहीवेळा कुचेष्ठेची ठरली. पण राष्ट्रसेवा दल, सामाजिक कृतज्ञता निधी, एक गाव एक पाणवठा या चळवळी व उपक्रमात त्यांनी झोकून दिले. चित्रपट व नाटकाच्या मानधनातील बरीच रक्कम त्यांनी सामाजिक कार्यासाठी खर्च केली. निळू फुलेंचे सामाजिक काम चित्रपटसृष्टीसह समाजाला दिशादर्शक आहे,' असे प्रतिपादन प्राचार्य टी. एस. पाटील यांनी केले. अभिनेते निळू फुले यांच्या नवव्या स्मृतीदिनानिमित्ताने आयोजित केलेल्या शॉर्ट फिल्म महोत्सव कार्यक्रमात ते बोलत होते.

प्रसिद्ध हार्मोनियम वादक गोविंदराव टेंबे मार्गावरील शेतकरी कामगार पक्षाच्या कार्यालयात महोत्सवाचे आयोजन केले होते. प्राचार्य पाटील व डॉ. अनमोल कोठडिया यांची प्रमुख उपस्थिती होती. भाई माधवराव बागल विद्यापीठ अंतर्गत सत्यशोधक युवा परिषद, निळू फुले फिल्म सर्कल यांच्या संयुक्त विद्यमाने महोत्सवाचे आयोजन केले होते. डॉ. कोठडिया यांनी निळू फुले यांच्या चित्रपटातील भूमिकेचे विश्लेषन करताना त्यांच्या सामाजिक कार्याची माहिती दिली. ते म्हणाले, डॉ. बाबा आढाव यांच्या 'एक गाव, एक पाणवठा' या लढ्यात निळू फुले अग्रेसर होते. डॉ. नरेंद्र दाभोलकर यांच्या सामाजिक कृतज्ञता निधीला त्यांनी मदत केली. राष्ट्रसेवा दलाच्या उपक्रमांना त्यांनी सढळ हातांनी मदत केली. प्रसंगी त्यांनी चित्रपट व नाटकांच्या प्रयोगातून मदत केली. '

यावेळी तुर्कीच्या तुफान तस्तन दिग्दर्शित 'वर्ड्स फ्लाय', कोल्हापुरच्या सेव्हन सेकंद ग्रुपचा 'नाऊ, युवर होम', उमेश मालनचा 'गोल्डन टॉयलेट', विनोद कांबळे यांचा 'पोस्टमार्टम', तन्मयी देव, ज्ञानेश झोटिंग यांचा 'अ फॅमिली ड्रामा', मिथून चौधरी यांचा 'पायवाट' या शॉर्ट फिल्म दाखवण्यात आल्या. यावेळी रंगकर्मी यशोधन गडकरी, निखिल कुंभार, राजवैभव कांबळे, तुषार पाटील, निवृत्त पोलिस उपअधीक्षक दिलीप पाटील, अभिषेक मिठारी, रवी जाधव, सुभाष पाटील आदी उपस्थित होते. उपस्थित होते. सूत्रसंचालन प्रभाकर पाटील यांनी केले.

म. टा. प्रतिनिधी, कोल्हापूर

'उपेक्षित, वंचित आणि दीनदलितांना न्याय देताना राजर्षी शाहू महाराजांनी समतेचा विचार प्रस्थापित केला. कोल्हापुरात विचारांची संपन्नता असल्याने स्थानिकांच्या अडचणी व गरजा ओळखून उद्योगनिर्मिती व युवकांना रोजगार उपलब्ध करून देताना समतेच्या विचारांवर मार्गक्रमण करा,' असे आवाहन सिक्कीमचे राज्यपाल डॉ. श्रीनिवास पाटील यांनी केले.

उर्वरित महाराष्ट्र वैधानिक विकास महामंडळाच्या अध्यक्षपदी डॉ. योगेश जाधव यांची नियुक्ती झाल्याबद्दल आयोजित सर्वपक्षीय सत्कार समारंभात ते प्रमुख पाहुणे म्हणून बोलत होते. डॉ. जाधव यांचा राजर्षी शाहू महाराजांचा पुतळा, शाल व मानपत्र देऊन सत्कार करण्यात आला. अध्यक्षस्थानी पालकमंत्री चंद्रकांत पाटील होते.

डॉ. पाटील म्हणाले, 'महामंडळांतर्गत राजधानी मुंबईसह १७ जिल्हे, १६१ तालुके आणि राज्याच्या ६५ टक्के लोकसंख्येचा समावेश आहे. प्रत्येक महसुली विभागाची समस्या आणि गरजा विभिन्न आहेत. पिण्यासाठी मुबलक पाणी, नद्यांचे प्रदूषण आणि युवकांना रोजगार मिळवणे या कामांना प्राधान्य देण्याची आवश्यकता आहे. नागरिकांच्या गरजा ओळखून निधी आणत असताना आलेला निधी योग्य ठिकाणी वितरित करण्याची दक्षता घेणे आवश्यक आहे.'

पालकमंत्री चंद्रकांत पाटील म्हणाले, 'मुख्यमंत्री निधीतून विकासकामासाठी महामंडळाला मुख्यत: निधी मिळत असल्याने प्राधान्यक्रम ठरवून निधीचा आराखडा तयार करा. केंद्रीय पेट्रोलियम मंत्रालयाकडून राज्यात सहा ठिकाणी नवे उद्योग उभारण्यात येणार आहेत. यासाठी प्रयत्न करून स्थानिकांना रोजगार उपलब्ध करून द्यावा.'

महामंडळाचे अध्यक्ष डॉ. योगेश जाधव म्हणाले, 'पंचगंगा प्रदूषण, रंकाळा सुशोभिकरण, खंडपीठ, तीर्थक्षेत्र विकास या कोल्हापुरातील मुख्य प्रश्नांबरोबरच इतर जिल्ह्यांतील विकासकामे निश्चित करण्यासाठी विभागनिहाय संबंधित अधिकाऱ्यांच्या बैठका घेऊन विकास आराखडा राज्यपालांना सादर केला जाईल. आराखड्याच्या माध्यमातून सर्वोत्तम काम करू.'

यावेळी राज्यपाल डॉ. पाटील यांना सिक्कीम विद्यापीठाने डॉक्टरेट पदवी प्रदान केल्याबद्दल त्यांचा बिहारचे माजी राज्यपाल डॉ. डी. वाय. पाटील यांच्या हस्ते सत्कार करण्यात आला. सत्कार समारंभामध्ये श्रीमंत छत्रपती शाहू महाराज यांनी मनोगत व्यक्त केले. यावेळी उपमहापौर महेश सावंत, ज्येष्ठ पत्रकार प्रतापसिंह जाधव, खासदार धनंजय महाडिक, आमदार हसन मुश्रीफ, सतेज पाटील तसेच अनेक आमदार, कुलपती डॉ. पी. डी. पाटील यांच्यासह विविध पक्षांचे पदाधिकारी, विविध विभागांचे अधिकारी व सर्वपक्षीय सत्कार समितीचे सदस्य उपस्थित होते. महापौर व सत्कार समितीच्या अध्यक्षा शोभा बोंद्रे यांनी प्रास्ताविक केले. निनाद काळे यांनी सूत्रसंचालन केले. माजी उपमहापौर आर. के. पोवार यांनी आभार मानले.

००००

शरद पवार पंतप्रधान होतील - डॉ. डी. वाय. पाटील

व्यक्तीचे कर्तृत्व निर्माण होण्यासाठी त्याच्यातील श्रम महत्त्वाचे असतात. कर्तृत्वाला श्रमाची साथ मिळाली की, यश नक्की मिळते. तत्कालीन मुख्यमंत्री वसंतदादा पाटील, बॅ. ए. आर. अंतुले व शरद पवार यांचे शैक्षणिक संस्थांची उभारणी करताना मोलाचे सहकार्य लाभले. व्यक्तीमधील गुणग्राहता या सर्व नेतृत्वांकडे होती. या नेतृत्वगुणामुळेच पवार भविष्यात पंतप्रधान होतील, असा आशावाद डॉ. पाटील यांनी व्यक्त केला.

००००

पंचगंगेसह जिल्ह्यातील सर्वच नद्यांच्या पाणीपातळीत वाढ; कळंबा भरला

म. टा. प्रतिनिधी, कोल्हापूर

गेल्या दोन दिवसांपासून पावसाची संततधार सुरू असल्याने पंचगंगा नदीसह रंकाळा, कळंबा व राजाराम तलावाच्या पाणीपातळीत लक्षणीय वाढ झाली आहे. पावसाचा जोर ओसरला असला तरी पाणलोट क्षेत्रात जोरदार पाऊस झाल्याने पंचगंगा दुसऱ्यांदा पात्राबाहेर पडल्याने पुराचे पाणी पाहण्यासाठी कुटुंबासह पिकनिक पॉइंटवर शुक्रवारी नागरिकांनी गर्दी केली होती.

दोन दिवसांपासून धरणक्षेत्रासह जिल्ह्यात पावसाची संततधार सुरू असल्याने जिल्ह्यातील नद्यांच्या पाणीपातळीत वाढ झाली आहे. पंचगंगा नदी धोकापातळीकडे वाटचाल करत असल्याने पाणी गायकवाड वाड्याच्या पुढे आले आहे. रंकाळा ओसांडून वाहत असून कळंबा, राजाराम व कंदलगाव तलाव कोणत्याक्षी ओव्हर फ्लो होण्याची शक्यता आहे. पंचगंगा नदीसह तलावांची वाढलेली पाणीपातळी पाहण्यासाठी नागरिक गर्दी करू लागले आहेत.

दुसरा शनिवारी सरकारी कार्यालयांना असणारी सुटी आणि सकाळच्या शाळांमुळे दुपारनंतर सर्वच ठिकाणी कुटुंबासह पर्यंटकांनी गर्दी केली होती. गंगावेश मार्गे शिवाजी पुलाकडे जाणारा मार्ग वाहतुकीसाठी बंद केल्याने तोरस्कर चौकांत वाहतुकीची कोंडी झाली होती. शिवाजी पुलावरुन अवजड वाहतूक बंद असल्याने अनेकठिकाणी अस्थाव्यस्थपणे वाहनांचे पार्किंग केले जात असल्याने वारंवार वाहतूक कोंडी होत होती. संततधार पावसांमुळे कळंबा व रंकाळा तुडूंब भरल्याने नागरिकांनी गर्दी केली होती.

शनिवारी जवाहरनगर ते आयसोलेशन हॉस्पिटल मार्गावरील मोठे झाडे दुपारी सव्वा एक वाजता पडले. त्यामुळे या मार्गावरील दोन तास वाहतूक ठप्प झाली होती. अग्निशमन दलाच्या जवानांनी रस्त्यावरील झाड बाजूला काढल्यानंतर पुन्हा वाहतूक सुरळीत झाली. तसेच लक्ष्मीपुरी पान लाइन येथील झाडाची फांदी विद्युत वाहिनीवर पडल्याने या परिसरातील विद्युत पुरवठा काहीकाळ खंडीत झाला होता.

जिल्ह्यातील गडकिल्ले, धरण, धबधबे पाहण्यासाठी पर्यटक मोठ्या संख्येने बाहेर पडले आहेत. या ठिकाणी अतिउत्साहाने धोकादायक पॉइंटच्या ठिकाणी सेल्फी काढू नये. दरीच्या काठापर्यंत वाहने नेऊ नयेत, असे आवाहन पोलिस अधीक्षक संजय मोहिते यांनी केले. जिल्ह्यात अतिवृष्टी सुरू झाली असून नदी, तलाव, बंधारे यांच्या पाणीपातळीत वेगाने वाढ होत आहे. पुराचे पाणी पाहण्यासाठी पर्यटक विविध ठिकाणी गर्दी करत आहेत. काही हौशी पर्यटकांकडून अनावधानाने किंवा अतिउत्साहाने कृत्य करण्याची शक्यता आहे. त्याचे पर्यवसान जीवावर बेतू शकते. त्यासाठी धोकादायक पॉइंटच्या ठिकाणी सेल्फी काढू नयेत. अतिवृष्टी आणि धुक्याच्या वातावरणात प्रखर प्रकाश झोतात वाहन चालवावे. रस्त्यावर मारलेल्या पांढऱ्या पट्ट्याचा आधार घेऊन वाहने चालवावित. दरीपासून सुरक्षित अंतरावर वाहनांचे पार्किग करावे. दरीच्या काठापर्यत वाहने नेऊ नयेत. मद्यपान करून वाहन चालवू नये. पर्यटनस्थळाच्या ठिकाणी धिंगाणा घालून नियमबाह्य वर्तन करू नये. पर्यटनाच्या ठिकाणी महिलांना अन्य नागरिकांना पर्यटकांनी त्रास देऊ नये. ट्रॅकिंगसाठी गाईडचा आधार घ्यावा असेही, आवाहन पोलिस प्रशासनाकडून केले आहे.

...................

जिल्ह्यातील अन्य धराणाचा पाणीसाठा

धरण पाणीसाठा (टीएमसी) टक्केवारी

तुळशी २.४४ ७०

कासारी २.३३ ८४

कडवी २.२७ ९०

कुंभी १.९५ ७२

पाटगाव २.५७ ६९

चिकोत्रा १०.०३ २३

चित्री ३२.४६ ६१

जंगमहट्टी २१.३३ ६२

घटप्रभा १.५६ १००

जांबरे ०.८२ १००

कोदे ०.२१ १००

आलमट्टी ८०.८४ --

म. टा. प्रतिनिधी, कोल्हापूर

'माहिती-तंत्रज्ञान'चा गाजावाजा करणाऱ्या राज्य सरकारने शालेय अभ्यासक्रमातून 'माहिती संप्रेषण तंत्रज्ञान' हा विषय वगळला आहे. अभ्यासक्रमातून विषय वगळण्याबरोबरच हंगामी तत्त्वावरील आयसीटी शिक्षकांनाही पुन्हा सेवेत सामावून घेतले जात नाही. त्यामुळे गेल्या दहा वर्षांत तीन हजार शिक्षकांवर बेरोजगारीची वेळ आली आहे. नजीकच्या काळात आणखी पाच हजार शिक्षकांच्या नोकरीवर गंडांतर संभवत आहे. याविरोधात आयसीटी शिक्षक संघटनांनी राज्यव्यापी आंदोलनाचा इशारा दिला आहे.

'आयसीटी शिक्षकांना सेवेत कायमस्वरूपी सामावून घ्यावे आणि इयत्ता नववीपासून आयसीटी विषय शालेय अभ्यासक्रमात पूर्ववत करावा,' या मागणीसाठी कोल्हापूर जिल्हा आयसीटी शिक्षक संघटनेमार्फत जुलै महिन्यात जिल्हाधिकारी कार्यालयासमोर धरणे आंदोलन करण्यात येणार आहे. केंद्र आणि राज्य सरकारने याप्रश्नी योग्य निर्णय घेतला नाही तर प्रसंगी केंद्रीय मंत्री प्रकाश जावडेकर यांच्या निवासस्थानासमोर आंदोलनाचा इशारा जिल्हा संघटनेचे पदाधिकारी भोजराज पवार, संतोष ससाणे आणि योगेश गावकर यांनी दिला. शिवाजी पार्क येथील मुख्याध्यापक संघाच्या सभागृहात संघटनेच्या पदाधिकाऱ्यांनी आंदोलनाची दिशा स्पष्ट केली. राज्यभरात सध्या पाच हजार आयसीटी शिक्षक आहेत. दरम्यान कोल्हापूर, सांगली, सातारा आणि कोकणातील शिक्षकांना गेल्या नऊ महिन्यांपासून मानधन मिळाले नसल्याचे पवार यांनी सांगितले. गेल्या वर्षापासून राज्य सरकारने नववी आणि दहावीच्या अभ्यासक्रमातून 'माहिती संप्रेषण तंत्रज्ञान' विषय रद्द केला. सध्या नववीच्या अभ्यासक्रमात एका पाठासाठी 'माहिती तंत्रज्ञान' विषय आहे.

शालेय जीवनात 'माहिती-तंत्रज्ञान'ची गोडी लागावी हा उद्देश ठेवून केंद्र सरकारने २००८-०९ मध्ये प्रत्येक शाळेत माहिती संप्रेषण तंत्रज्ञानअंतर्गत प्रयोगशाळा सुरू करण्यासाठी कंपनीमार्फत निधी पुरवठा केला. मानधन तत्त्वावर आयसीटी शिक्षकांच्या नेमणुका केल्या. दर पाच वर्षांनी त्यामध्ये नव्याने अंमलबजावणी करताना पूर्वीच्या शिक्षकांना पुन्हा सामावून घेतले नाही. यामुळे २००८-०९ मध्ये ५०० आणि २०११-१२ मध्ये २५०० हंगामी तत्त्वावरील आयसीटी शिक्षक बेरोजगार झाले आहेत. राज्यभरात २०१४-१५ मध्ये नव्याने पाच हजार आयसीटी शिक्षकांच्या नेमणुका झाल्या आहेत. मात्र, अभ्यासक्रमातून विषय वगळल्यामुळे नजीकच्या काळात त्यांच्यावर बेरोजगारीची टांगती तलवार निर्माण होण्याचा धोका असल्याचे ससाणे व गावकर यांनी सांगितले. देशातील २१ राज्यांत आयसीटी शिक्षकांना सेवेत सामावून घेतले आहे, त्याच धर्तीवर महाराष्ट्रातही सेवेत घ्यावे, माध्यमिक शाळांना स्वतंत्र संगणकक कक्ष मिळावा, इयत्ता सहावी ते दहावीसाठी स्वतंत्र आयसीटी विषय सुरू करावा, आदी मागण्यांसाठी आंदोलनाचा निर्धार केला. याप्रसंगी सुप्रिया बांदेकर, वैशाली सावंत, संजय जाधव, दिगंबर चौगुले, सुधीर पाटील, श्रीकांत पाटील, दत्तात्रय बळीप, आदी उपस्थित होते.

०००००

'महिला-बालकल्याण'साठी आवाडे गटाकडून मगदूम;दोन्ही काँग्रेसची आज बैठक

म. टा. प्रतिनिधी, कोल्हापूर

महिला व बालकल्याण समिती सभापतपिदाच्या सोमवारी (ता.१६) होणाऱ्या निवडीवरुन जिल्हा परिषदेतील राजकीय हालचाली वेगावल्या आहेत. सत्तारुढ भाजप व मित्रपक्षांकडून सभापतिपदासाठी आवाडे गटाच्या सदस्या वंदना मगदूम यांच्या उमेदवारीवर शिक्कामोर्तब झाले. जिपमध्ये भाजप व मित्रपक्षांचे स्पष्ट बहुमत असल्यामुळे मगदूम यांची निवड निश्चित मानली जाते. मात्र अध्यक्षपदासह अन्य पदाधिकारी बदलाला विलंब होत असल्यामुळे इच्छुक सदस्यात नाराजी कायम असल्याचे चित्र आहे. दरम्यान स्वाभिमानी शेतकरी संघटनेपाठोपाठ शिवसेनेतही जिल्हा परिषदेतील पदाधिकारी बदलाला गती आली. २३ जुलै रोजी शिवसेना नेत्यांची बैठक होणार आहे. दुसरीकडे काँग्रेस, राष्ट्रवादी काँग्रेसही निवडणूक लढविण्याच्या पावित्र्यात आहेत. यामुळे भाजप आणि काँग्रेस आघाडीत पुन्हा राजकारण तापण्याची चिन्हे आहेत.

'महिला-बालकल्याण'सभापतिपदाच्या निवडी संदर्भात सत्तारुढ भाजप व मित्रपत्र आघाडीचे नेते व सदस्यांची शनिवारी हॉटेल अयोध्या येथे बैठक झाली. पालकमंत्री चंद्रकांत पाटील, आमदार सुजित मिणचेकर, माजी आमदार प्रकाश आवाडे, माजी आमदार संजय घाटगे, अध्यक्षा शौमिका महाडिक आदींच्या उपस्थितीत झालेल्या बैठकीत सदस्यांची मते आजमावली. 'महिला-बालकल्याण'सभापतिपदासाठी आवाडे गटाच्या सदस्या वंदना मगदूमसह अपक्ष सदस्या रसिका पाटील यांनी दावा केला. चर्चेअंती मगदूम यांच्या नावाला सर्वांनीच सहमती दर्शविली. मात्र अपक्ष सदस्या रसिका पाटील यांचे पती अमर व चंदगड विकास आघाडीचे सदस्य कल्लाप्पाणा भोगण व विद्या विलास पाटील यांनी बैठकीत पदाबाबत विचारणा करत सत्ता स्थापनेवेळी नेत्यांनी दिलेला शब्द पाळावा, अशी विनंती केली.

पालकमंत्री पाटील यांना तिघाही सदस्यांना भविष्यकाळात मोठे पद देऊ असे सांगितले. तसेच अमर पाटील यांना सरकारी महामंडळावर नेमू अशी ग्वाही दिल्याचे वृत्त आहे. भाजप आघाडीकडे स्पष्ट बहुमत आहे. शिवाय काँग्रेसचे तीन सदस्यही आपल्यासोबत असल्याने संख्याबळ ४० पर्यंत वाढल्याचे पालकमंत्र्यांनी सांगितले. बैठकीला उपाध्यक्ष सर्जेराव पाटील, बांधकाम सभापती सर्जेराव पाटील पेरीडकर, शिक्षण सभापती अंबरिश घाटगे, समाजकल्याण समिती सभापती विशांत महापुरे, पक्षप्रतोद विजय भोजे, नगरसेवक राहूल आवाडे आदी उपस्थित होते.

सेनेच्या पदाधिकाऱ्यांबाबत २३ जुलैला बैठक

शिवसेनेच्या वाट्याला उपाध्यक्षपद आणि शिक्षण समिती सभापतिपद आहे. आमदार चंद्रदीप नरके यांच्या गटाकडे सध्या उपाध्यक्षपद तर शिक्षण समिती माजी आमदार संजय घाटगे गटाकडे आहे. सव्वा वर्ष संपल्यामुळे सेनेत पदाधिकारी बदलासाठी इच्छुक सरसावले आहेत. उपाध्यक्षपदासाठी आमदार सुजित मिणचेकर गटाचे सदस्य प्रवीण यादव तर शिक्षण समिती सभापतिपदासाठी आमदार नरके गटाकडून सदस्या मनीषा सतीश कुरणे व कोमल सरदार मिसाळ यांची नावे चर्चेत आहेत. शिवाय आमदार सत्यजित पाटील गटाचे सदस्य हंबीरराव पाटील यांनी शिक्षण समिती सभापतिपदासाठी इच्छुक आहेत. या साऱ्या पार्श्वभूमीवर सेना नेत्यांची २३ जुलै रोजी बैठक होणार आहे.

अध्यक्षपदाबाबत पालकमंत्री ठाम, इंगवले उशिरा दाखल

जिल्हा परिषद अध्यक्षपदासाठी अरुण इंगवले इच्छुक आहेत. अन्य समितीत बदल होत असताना अध्यक्षपदासाठी मात्र कसलाही बदल होणार नसल्याचे पालकमंत्र्यांनी यापूर्वीच स्पष्ट केले. शनिवारीही त्यांनी, 'अध्यक्ष हा भाजपचा आहे. अध्यक्षांचा राजीनामा केव्हा घ्यायचा याचा निर्णय मी घेणार आहे. मित्र पक्षांनी त्यांच्या वाट्याच्या पदाबाबत निर्णय घ्यावा'असे सुचविले. दरम्यान शनिवारी पदाधिकारी बदलासंदर्भात महत्त्वपूर्ण बैठक असताना अरुण इंगवले हे प्रमुख नेत्यांची बैठक संपल्यानंतर दाखल झाले.

काँग्रेस आघाडीची आज बैठक

काँग्रेसचे जिल्हाध्यक्ष पी. एन.पाटील, आमदार सतेज पाटील, राष्ट्रवादीचे नेते व आमदार हसन मुश्रीफ यांच्या उपस्थितीत काँग्रेस आघाडीची रविवारी एका हॉटेलमध्ये बैठक होत आहे. या बैठकीत निवडणूक लढविण्याबाबत निर्णय होणार आहे. दरम्यान काँग्रेसचे तीन सदस्य यापूर्वी अध्यक्षपद निवडीवेळी गैरहजर राहिले. त्याचा फायदा भाजप आघाडीला झाला. काँग्रेसचे सदस्य सचिन बल्लाळ हे शनिवारी भाजप आघाडीच्या बैठकीला हजर होते.

म. टा. प्रतिनिधी, कोल्हापूर

कोल्हापूर जिल्हा दूध संघाकडे (गोकुळ) वाईट नजरेने पाहू नका, असा इशारा गोकुळचे नेते माजी आमदार महादेवराव महाडिक यांनी आमदार हसन मुश्रीफांना दिला आहे. गोकुळ मल्टिस्टेट करण्याच्या निर्णयाला आमदार मुश्रीफ यांनी विरोध दर्शवला असून याकडे लक्ष वेधले असता महाडिक यांनी प्रतिक्रिया दिली.

माजी आमदार महाडिक म्हणाले, 'गोकुळ हा राज्यातीलच नव्हे तर देशातील सर्वोत्कृष्ट दूध संघ आहे. गोकुळचा आशिया खंडात १२ वा क्रमांक लागतो. आजही गोकुळकडून प्रतिलिटर २२ रुपये दराने दूध खरेदी केले जाते. दहा दिवसांतून एकदा व महिन्यातून तीनवेळा दूध उत्पादकाला दूध बिलाची रक्कम दिली जाते. कोल्हापूर जिल्ह्यात १७ ते १८ लाख लिटर दूध संकलन होते. त्यापैकी गोकुळ ११ लाख लिटर दूध संकलन करते. दूध संघाने विस्तारासाठी १०० कोटी रुपयांची गुंतवणूक केली आहे. विस्तारीकरणामुळे गोकुळला २० ते २२ लाख लिटर दूध संकलनाची गरज कर्नाटक व गोवा राज्यांतून भागविली जाते. दूध संकलनासाठी गोकुळच्या संचालक मंडळाने दूध संघ मल्टिस्टेट करण्याचा निर्णय घेतला आहे. त्यामुळे संघाकडे कोणीही वाईट नजरेने पाहू नये. मल्टिस्टेटमुळे दूध उत्पादकांचाच फायदा होणार आहे.'

गोकुळच्या संचालक मंडळाने दूध संघ मल्टिस्टेट करण्याचा निर्णय घेतला असल्याने आमदार मुश्रीफ यांनी विरोध केला आहे. तसेच या निर्णयाला विरोध करण्यासाठी जिल्ह्यात जनजागृती करण्याची घोषणाही त्यांनी केली आहे. वारणा दूध संघ यापूर्वीच मल्टिस्टेट दूध संघ असून, जिल्ह्यातील काही साखर कारखाने मल्टिस्टेट आहेत. आमदार मुश्रीफ यांचा संताजी घोरपडे साखर कारखाना खासगी आहे, पण गोकुळच्या मल्टिस्टेटला राजकीय हेतूतून विरोध होत आहे, असा सूर गोकुळ संचालकांतून निघू लागला आहे. मल्टिस्टेटच्या निर्णयावरून गोकुळची आगामी सर्वसाधारण सभा वादळी ठरण्याची शक्यता वर्तवली जात आहे.

म. टा. प्रतिनिधी, कोल्हापूर

राष्ट्रीय विधी सेवा प्राधिकरणाच्या सूचनेनुसार शनिवारी झालेल्या लोकअदालतीत १०२७ खटले निकाली काढण्यात आले. हे खटले तडजोडीने मिटवून ९ कोटी ८४ लाख ८३ हजार रुपयांची नुकसानभरपाई देण्यात आली. पती आणि पत्नी वादाचे ४० खटले निकाली काढण्यात आले असून, मोटार अपघातातील २९ खटल्यांत दीड कोटींची भरपाई देण्यात आली. कुटुंबातील कलह मिटल्याने अनेक दांपत्यांच्या चेहऱ्यावर आनंद ओसंडून वाहिला.

राष्ट्रीय विधी सेवा प्राधिकरणाच्या सूचनेनुसार सर्व दिवाणी न्यायालये, फौजदारी, सत्र न्यायालय, मोटार अपघात न्यायाधिकरण, सहकार न्यायालये, औद्योगिक आणि कामगार न्यायालये, कुटुंब न्यायालयात राष्ट्रीय लोकअदालत झाली. 'साधू संवाद, मिटवू वाद' या न्यायाने वर्षांनुवर्षे प्रलंबित असलेले सर्वच प्रकारचे खटले, वाद विवाद सोडवण्यासाठी ही अदालत झाली. जिल्ह्यातील सर्वच न्यायालयांत ४२ पॅनेलवर कामकाज झाले. यामध्ये प्रलंबित १०२७ खटले तडजोडीने मिटवून ९ कोटी ८४ लाख, ८३ हजार रुपयांची नुकसानभरपाई देण्यात आली. किरकोळ आणि नात्यातील दुराव्यामुळे पती आणि पत्नीत वाद असलेले ४० खटले सामोपचाराने निकाली काढण्यात आले. लोकअदालतीने या दांपत्यांना 'सुखी संसाराचे महत्त्व' पटवून देऊन त्यांच्या नव्या आयुष्याची सुरुवात केली.

लोकअदालतीत जिल्ह्यातील सर्वच न्यायालयांत प्रलंबित असलेली ४८०० प्रकरणे दाखल करण्यात आली. यामध्ये बॅँक वसुली १३८ अन्वयेची, कामगार वाद, वीज, पाणी, दिवाणी, फौजदारी प्रकरणांचा समावेश होता. जिल्ह्यातील सर्वच न्यायालयांत १३ विधी सेवा समिती व जिल्हा विधी सेवेच्या ४२ पॅनेलमध्ये सकाळी १० ते सायंकाळी ५ पर्यंत कामकाज चालले. यामध्ये जिल्ह्यातील सर्व न्यायाधीश, सरकारी वकील, खासगी वकील, सामाजिक कार्यकर्ते यांनी सहभाग घेतला. मोटार अपघातातील २९ खटले दाखल झाले. ते तडजोडीने मिटवून पक्षकारांना एक कोटी ५० लाख ९५ हजार रुपये नुकसान भरपाई मिळाली. पती पत्नीमधील ४० प्रकरणे दोघांतील मतभेद दूर करून मिटवले. दिवसभरात १०२७ खटले तडजोडीने मिटवून एकूण ९ कोटी ८४ लाख, ८३ हजार, ५१५ रुपयांची नुकसानभरपाई देण्यात आली. प्रमुख जिल्हा न्यायाधीश एम. ए. लव्हेकर यांच्या नेतृत्वाखाली कामकाज पार पडले. जिल्हा विधी सेवा प्राधिकरणाचे सचिव उमेशचंद्र मोरे, एस. एस. बाबर, सर्जेराव सावंत, ज्ञानेश्वर मिरजकर, गुरुदास येळावडेकर, शैलेश पवार, बाळासाहेब खुपेकर, अनिकेत मोहिते, सारिका शिंदे, आदींनी परिश्रम घेतले.

०००००

१२ वर्षांनी 'समाधान'ला मिळाले आई-वडील

बारा वर्षांपूर्वी लग्न झालेल्या पती-पत्नीत वाद झाला. या दांपत्या एक मुलगा झाला. मात्र, दिराने या दांपत्यात वाद निर्माण केला. झालेला मुलगा माझे अपत्य नसल्याचा पवित्रा पतीने घेतला. त्या कारणावरून दोघांत वाद झाला. दोघेही विभक्त राहू लागले. त्यामुळे मुलगा समाधानला विभक्त राहावे लागले. डीएनए चाचणीतील अहवालानंतर समाधान त्यांचा मुलगा असल्याचे स्पष्ट झाले. लोकअदालतीने दांपत्यातील गैरसमज दूर केला. त्यानंतर गेल्या बारा वर्षांपासून विभक्त असलेल्या समाधानला आई-वडील मिळाले. याच प्रकारचे ४० दांपत्यांचे संसार जोडले.

००००

महावितरणला ७५ लाखांची भरपाई

सदोरोमल नागदेव यांनी भांडी कारखान्यासाठी वीज कनेक्शन घेतले होते. मात्र, त्यांनी वीज बिल भरले नसल्याने १० कोटी रुपयांचा दावा महावितरणने केला होता. या अदालतीत तडजोडीने हा दावा निकालात काढून ७५ लाख ८९ हजार ७४५ रुपये भरण्याचा आदेश दिला. त्यामुळे अनेक वर्षांपासून प्रलंबित असलेला हा दावा तासाभरात निकाली काढण्यात आला.