मल्लिकार्जुन खरगे-आवाडे भेटीत

जिल्ह्याच्या राजकारणावर चर्चा

म. टा. वृत्तसेवा, इचलकरंजी

माजी वस्त्रोद्योग मंत्री प्रकाश आवाडे यांनी बेंगळुरू येथे काँग्रेसचे महाराष्ट्र प्रभारी मल्लिकार्जुन खरगे यांची नुकतीच भेट घेऊन शुभेच्छा दिल्या. यावेळी दोघांमध्ये कोल्हापूर जिल्ह्यातीत राजकारणाबाबत प्रदीर्घ काळ चर्चा झाली.

ज्येष्ठ नेते कल्लापाण्णा आवाडे आणि मल्लिकार्जुन खरगे यांचे घनिष्ठ संबंध आहेत. खरगे यांची नुकतीच काँग्रेस पक्षाने महाराष्ट्राचे प्रभारी म्हणून नियुक्ती केली आहे. या निवडीबद्दल माजी मंत्री प्रकाश आवाडे यांनी खरगे यांना शुभेच्छा दिल्या. या भेटीत आवाडे यांनी खरगे यांच्याशी चर्चा केली. पश्‍चिम महाराष्ट्र आणि कोल्हापूर जिल्ह्याच्या सद्यस्थितीविषयी चर्चा केली. त्यामध्ये राजकीय घडामोडी, संघटन व पक्ष मजबूत करुन देण्यासह आगामी काळात काँग्रेचा झेंडा पुन्हा डौलाने फडकण्यासाठी प्रयत्नशील राहण्याबाबत जवळपास एक तास चर्चा झाली. यापूर्वी खरगे यांची प्रभारी म्हणून नियुक्ती झाल्यानंतर आवाडे यांनी दिल्लीत जाऊन त्यांची भेट घेतली होती. यावेळी कर्नाटक राज्याचे माजी ग्रामविकास मंत्री एच. के. पाटील, जिल्हा परिषद सदस्य राहुल आवाडे आदी उपस्थित होते.

फोटो : माजी मंत्री प्रकाश आवाडे यांनी काँग्रेसचे महाराष्ट्र प्रभारी मल्लिकार्जुन खरगे यांची बेंगळुरू येथे भेट घेऊन सत्कार केला. यावेळी कर्नाटकचे ग्राविकास मंत्री एच. के. पाटील, जिल्हा परिषद सदस्य राहुल आवाडे उपस्थित होते.

म. टा. प्रतिनिधी, कोल्हापूर

पंचगंगेचे प्रदूषण रोखण्यात हयगय करणाऱ्या महापालिका आयुक्त, इचलकरंजी मुख्याधिकारी आणि प्रादेशिक प्रदूषण नियंत्रण मंडळाच्या अधिकाऱ्यांना पर्यावरण मंत्री रामदास यांनी सोमवारी धारेवर धरले. नदी प्रदूषण रोखण्यासाठी करण्यात आलेल्या उपाययोजनांचा आढावा घेण्यासाठी कदम यांनी बैठक घेतली. पंचगंगेत मिसळणारे सांडपाणी रोखण्यासाठी युद्धपातळीवर कारवाई न केल्यास आयुक्त आणि इचलकरंजी पालिका मुख्याधिकाऱ्यांवर सदोष मनुष्यवधप्रकरणी फौजदारी दाखल केली जाईल, असा इशारा देतानाच कदम यांनी उपस्थित पोलिस अधिकाऱ्यांना या दोघांवर गुन्हे दाखल करण्याचे आदेश दिले.

पंचगंगा प्रदूषणमुक्त करण्यासाठी सुरू असलेल्या उपायायोजनांचा आढावा घेण्यासाठी आठ दिवसांत मंत्रालयात बैठक घेण्यात येईल. तीत ठोस उपाययोजना केल्या जातील. नदीत रसायनमिश्रीत पाणी सोडणाऱ्या इचलकरंजीतील प्रोसेर्सस आणि हातकणंगले औद्योगिक वसाहतील कारखाने बंद करण्याचे आदेशही त्यांनी दिले.

कदम यांनी कोल्हापुरात जयंती नाला, इचलकरंजीतील काळा ओढा आणि लक्ष्मी औद्योगिक वसाहतीत भेटी दिल्या. त्यानंतर सर्किट हाउसमधील राजर्षी शाहू सभागृहात आढावा बैठक घेतली. यावेळी महापालिका आयुक्त डॉ. अभिजित चौधरी, इचलकरंजी नगरपालिका मुख्याधिकारी दीपक पाटील यांना धारेवर धरले.

पंचगंगा प्रदूषण रोखण्यासाठी महापालिकेने कसबा बावड्यातील ७६ एमएलडी आणि दुधाळी १७ एमएलडी एसटीपी उभारला आहे. याबाबतची माहिती आयुक्त चौधरी यांनी दिली. बापट कॅम्प व लाइन बाजार येथील सांडपाणी नोव्हेंबर २०१८ पर्यंत रोखले जाईल, असा विश्वासही व्यक्त केला. त्यावर कदम यांनी जयंती नाल्याला मी भेट दिली तिथून सांडपाणी थेट नदीत जात आहे. ते पाणी का रोखत नाही? अशी विचारणा केली. त्यावर आयुक्त चौधरी व प्रभारी जलअभियंता सुरेश कुलकर्णी यांनी पावसाळा असल्याने बंधाऱ्यावरील फायबर प्लेटस् काढण्यात आल्याचे सांगितले. यावर कदम यांनी सध्या पाऊस नाही. तरीही नागरिकांनी सांडपाणी प्यायचे का? हे पाणी तुम्ही पिणार का? अशी सरबत्ती केली. योग्य त्या उपाययोजना राबवा, अन्यथा तुमच्यावर सदोष मनुष्यवधाचा गुन्हा दाखल केला जाईल, असा इशारा दिला.

नंतर कदम यांनी इचलकरंजी मुख्याधिकारी दीपक पाटील यांच्याकडे मोर्चा वळवला. सांडपाणी रोखण्यासाठी एसटीपी कार्यान्वित केल्याचा दावा पाटील यांनी केल्यावर कदम चांगलेच भडकले. ते म्हणाले, 'इचलकरंजीतील काळ्या ओढ्याला भेट देऊन बैठकीला आलो आहे. एसटीपीचा व्हॉल्व्ह रात्री सोडून प्रोसेसिंगमधील काळे पाणी थेट काळ्या ओढ्यात सोडता, खोटी माहिती दिल्याबद्दल तुम्हाला एका मिनिटात निलंबित करीन.' इचलकरंजीला भेट देऊन पाण्याचे नमुने घेण्याचे आदेश प्रदूषण नियंत्रण मंडळाच्या अधिकाऱ्यांना त्यांनी दिले. ज्या प्रोसेसर्स सांडपाणी बाहेर सोडतात, ते तातडीने बंद करा, तसेच हातकणंगलेतील लक्ष्मी औद्योगिक वसाहतीतील सांडपाणी नदीत सोडणारे कारखाने बंद करण्याचे आदेश कदम यांनी दिले.

\Bमुख्यमंत्र्यांना देणार अहवाल \B

नगरविकास खाते मुख्यमंत्र्यांकडे आहे. कोल्हापूर महापालिका आणि इचलकरंजी पालिकेकडून नदी प्रदूषणाबाबत हयगय होत असल्याबद्दलचा अहवाल देणार असल्याचे कदम यांनी सांगितले. सांडपाणी रोखण्यात मला अपयश आले आहे. हे अपयश धुवून काढण्यासाठी सर्वतोपरी प्रयत्न करणार आहे. त्यासाठी इंग्लंडमधील तंत्रज्ञाचे पथक कोल्हापुरात आणले आहे. दोन महिन्यांत नदी प्रदूषण रोखण्यासाठी ठोस कार्यवाही केली जाईल, असे कदम यांनी स्पष्ट केले.

........................

\Bप्लास्टिकबंदी मागे नाही,

गुजरातमुळेच प्रदूषण\B

सांगली : 'कोणत्याही परिस्थितीत प्लास्टिक बंदीचा निर्णय मागे घेतला जाणार नाही. ८० टक्के प्लास्टिक साहित्य गुजरातमध्ये उत्पादित केले जाते. त्यांचा कचरा मात्र महाराष्ट्रात केला जात आहे. या कचऱ्यामुळेच मुंबई तुंबून दोनशेहून अधिक नागरिकांचा बळी गेला आहे. गुजरातचा स्थानिक रोजगार ठिकविण्यासाठी महाराष्ट्राचे नुकसान होऊ देणार नाही,' अशी ठोस भूमिका पर्यावरण मंत्री रामदास कदम यांनी सोमवारी सांगलीत मांडली.

प्लाटिक बंदी माघारी घेतली काय, असा प्रश्न विचारताच मंत्री कदम भडकले. 'आम्ही कुठेही प्लास्टिक बंदीत माघार घेतलेली नाही. केवळ सवलत दिली आहे. काही लोक 'आवळ्याचा भोपळा,' करण्याचे काम करीत आहेत. प्लास्टिक बंदी मागे घेतली नाही आणि घेणारही नाही. प्लास्टिकच्या बंदीतून पाव किलोपासून एक किलोपर्यंतच्या प्लास्टिक पिशव्यांना काही अटींवर तीन महिन्यांच्या मर्यादित कालावधीसाठी सवलत देण्यात आली आहे. संबधित उत्पादनांवर मायक्रॉन, त्याचा उत्पादनाचा आणि रिसायकलिंग करण्याचा दिनांक नमूद करणे आवश्यक आहे. प्लास्टिकबाबतची मानसिकता बदलून वेळीच उपाययोजना केल्यातरच भावी पिढी सुरक्षित राहणार आहे. महाराष्ट्राच्या प्लास्टिक बंदीचे जगाने कौतुक केले आहे. या निर्णयाची काटेकोर अंमलबजावणी करणारे महाराष्ट्र हे पहिले राज्य आहे. प्रतिदिन सुमारे १२०० टन प्लास्टिकचा कचरा होत आहे. एवढ्या मोठ्या प्रमाणात प्लास्टिक कचरा निर्माण होत असल्यामुळे पर्यावरण आणि आरोग्य धोक्यात आले आहे. त्यामुळे आता प्लास्टिक बंदीतून कोणत्याही परिस्थितीत माघार घेणार नाही.'

...........

टप्प्याटप्प्याने प्लास्टिकबंदीची

कडक अंमलबजावणी

म. टा. प्रतिनिधी, कोल्हापूर

'प्लास्टिक बंदी निर्णयाचे जनतेने स्वागत केले असून टप्प्याटप्प्याने प्लास्टिक बंदीची कडक अंमलबजावणी करण्यात येईल', अशी माहिती पर्यावरण मंत्री रामदास कदम यांनी पत्रकारांशी बोलताना दिली.

मंत्री कदम म्हणाले, प्लास्टिकचा धोका लक्षात घेऊन जगभर प्लास्टिकबंदीच्या अंमलबजावणीसाठी प्रयत्न सुरू आहेत. नदी, नाल्यात प्लास्टिक कचरा दिसून येत आहे. त्याचा गंभीर परिणाम निसर्ग व मानवी जीवनावर होत आहे. पंतप्रधान नरेंद्र मोदी यांनी प्लास्टिक बंदीसाठी आवाहन केले आहे. प्लास्टिक बंदीचा निर्णय घेणारे महाराष्ट्र पहिले राज्य असून बंदीची कडक अंमलबजावणी केली जाईल.'

ते पुढे म्हणाले,' कायद्याची भिती वाटावी यासाठी पाच हजार रुपये दंडात्मक कारवाई केली जात आहे. सर्वसामान्यांना दंड केला जाणार नाही. किरकोळ व्यापाऱ्यांना प्लास्टिक बंदीतून थोडी सूट दिली असली तरी प्लास्टिकचा पुनर्वापर करण्याची अटही घालण्यात आली आहे. डांबरी रस्ते तयार करण्यासाठी ७० टक्के प्लास्टिकचा वापर करण्याचा आदेश दिला असला तरी डांबरात प्लास्टिक मिसळल्यावर त्यापासून कॅन्सर होण्याची भिती व्यक्त केली जात आहे. त्यासाठी प्रदूषण नियंत्रण मंडळाकडून संशोधन करण्यात येत आहे.'

चौकट

प्रशासनाकडून प्रतिसाद नाही

संबंधित २७ प्राध्यापक पदोन्नतीसाठी प्रशासनाकडे पाठपुरावा करत आहेत. याप्रश्नी प्रशासन चालढकल करत असल्याचे अनुभव येत असल्याचे संबंधित प्राध्यापकांचे म्हणणे आहे. यासंदर्भात प्रशासनाची भूमिका जाणून घेण्यासाठी पहिल्यांदा कुलसचिव विलास नांदवडेकर यांच्याशी संपर्क साधण्याचा प्रयत्न केला. पण ते फोनवर उपलब्ध होऊ शकले नाहीत. प्रकुलगुरु डॉ. डी. टी. शिर्के यांच्याशी संपर्क साधला असता ते एका कार्यक्रमात होते. कुलसचिवांशी पुन्हा संपर्क साधण्याचा प्रयत्न केला असता मोबाइल स्वीच ऑफ होता.

दहा तोळे दागिन्यांसह

रोख रक्कम लंपास

कदमवाडीत पहाटेच्या सुमारास घरात घुसून चोरी

म. टा. प्रतिनिधी, कोल्हापूर

घराच्या मागील दरवाजातून प्रवेश करून अज्ञात चोरट्याने दहा तोळ्यांचे दागिने आणि रोख तीन हजार रुपयांची रोकड लंपास केली. कदमवाडी येथे सोमवारी (ता. २) पहाटे हा प्रकार घडला. याबाबत सौरभ उमेश पाटील (वय ३०, रा. कदमवाडी) यांनी शाहूपुरी पोलिस ठाण्यात चोरीची फिर्याद दाखल केली. पहाटेच्या सुमारास घडलेल्या या चोरीच्या घटनेने परिसरात भीतीचे वातावरण निर्माण झाले आहे.

कदमवाडीतील शेवटचा बस स्टॉप परिसरात सौरभ पाटील यांचे दुमजली घर आहे. आई, वडील, पत्नी आणि मुलासह ते या ठिकाणी राहतात. घरातच त्यांचे किराणा दुकान आहे. याशिवाय दूध विक्रीचाही त्यांचा व्यवसाय आहे. त्यांचे वडील रिक्षा व्यावसायिक असून, ते विद्यार्थी वाहतूक करतात. सोमवारी पहाटे सौरभ पाटील हे दूध विक्रीसाठी घराबाहेर पडले, तर त्यांचे वडील विद्यार्थ्यांना शाळेत सोडण्यासाठी रिक्षा घेऊन गेले. जाताना त्यांनी घराचा मुख्य दरवाजा बंद केला होता. काही वेळाने सौरभ घरी आले. यावेळी त्यांना दुकानातील कॅशबॉक्‍समध्ये ठेवलेली सात हजारांची रोकड गायब असल्याचे लक्षात आले. याबाबत त्यांनी पत्नीला विचारणा केली, मात्र पैसे कोणी पळवले याची त्यांनाही माहिती नव्हती. सौरभ यांना शंका आल्याने त्यांनी हॉलमधील तिजोरी पाहिली असता, तिजोरीचा दरवाजा उघडा दिसला. तिजोरीतील तीन हजारांची रोकड, पाच तोळ्यांचा कोल्हापुरी साज, अडीच तोळ्यांचे गंठण, अर्धा तोळे वजनाचे कानातील टॉप्स यासह दहा तोळ्यांचे दागिने लंपास झाले होते.

चोरी झाल्याची खात्री होताच त्यांनी शाहूपुरी पोलिसांना याची माहिती दिली. शाहूपुरी पोलिसांनी घटनास्थळी भेट देऊन पंचनामा केला. ठसेतज्ज्ञ आणि श्वान पथकाला पाचारण करून तपासणी केली. श्वानाने पाटील यांच्या घराच्या मागील दरवाजातून मुख्य रस्त्यापर्यंत माग काढला. मात्र, ठोस माहिती मिळू शकली नाह. या प्रकरणी सौरभ पाटील यांनी फिर्याद दिली असून, शाहूपुरी पोलिसांनी अज्ञात चोरट्याविरोधात गुन्हा दाखल केला. चार दिवसांपूर्वी दाभोळकर कॉर्नर परिसरात चोरट्यांनी दोन ठिकाणी चोरी करून सहा ठिकाणी चोरीचा प्रयत्न केला होता. आता कदमवाडी परिसरात पहाटेच्या वेळी चोरट्यांनी चोरी करून किमती ऐवज लंपास केल्याने नागरिकांमध्ये भीतीचे वातावरण निर्माण झाले आहे.

मलकापूर भाजी मार्केटमध्ये

आढळली दोन अर्भके

म. टा. वृत्तसेवा, शाहूवाडी

मलकापूर (ता. शाहूवाडी) येथे भाजी मार्केट परिसरात पुरुष व स्त्री जातीचे अशी दोन अर्भके सापडली. अज्ञात व्यक्तीविरोधात शाहूवाडी पोलिस ठाण्यात गुन्हा नोंद झाला आहे. पोलिस निरिक्षक मनोहर रानमळे यांच्या मार्गदर्शनाखाली याचा तपास सुरू आहे.

पोलिसांनी सांगितले की, शहरातील भाजी मंडई परिसरात सोमवारी सकाळी नगरपालिकेचे कर्मचारी स्वच्छता करीत असताना चार महिने वयाच्या बालिकेचे, आणि अंदाजे सहा महिने वयाच्या बालकाचे अर्भक त्यांना दिसले. सफाई कामगारांनी तत्काळ शाहूवाडी पोलिसांना याची माहिती दिली. घटनास्थळी सापडलेली दोन्ही अर्भके पोलिसांनी मलकापूर ग्रामीण रुग्णालयात दाखल केली. तेथे अर्भकांची वैद्यकीय चाचणी करण्यात आल्यानंतर त्यांची अर्धवट स्थितीत वाढ झाली असल्याचे आढळले. या घटनेबाबत अधिक माहिती असणाऱ्या नागरीकांनी तपासात सहकार्य करण्याचे आवाहन शाहूवाडीचे पोलीस निरीक्षक मनोहर रानमळे यांनी केले आहे. दरम्यान पोलीस उपअधिक्षक आर. आर. पाटील यांनी घटनास्थळी तातडीने भेट देऊन पोलिसांना तपासाबाबत महत्वाची सूचना केली. पोलिस उपनिरिक्षक श्रीराम पडवळ तपास करीत आहेत.

'त्या' वृद्धेचा

मृतदेह सापडला

म. टा. वृत्तसेवा, आजरा

आजऱ्याच्या रामतीर्थ धबधब्यामध्ये काल वाहून गेलेल्या महागोंड (ता. आजरा) येथील 'त्या' वृद्धेचा मृतदेह आज सायंकाळी साडेचारच्या सुमारास येथील महादेव मंदिरासमोरील नदीपात्रातील झुडपात सापडला. काल ही वृद्धा धबधब्याच्या प्रवाहासोबत वाहून गेली होती. नदीत उतरताना काठावर ठेवलेल्या वृद्धेच्या साहित्याबरोबर आढळलेल्या एसटी तिकीटावरून महिलेचा पत्ता समजला. त्यानुसार त्यांच्या नातेवाईकांशी संपर्क करण्यात आला. वृद्धेचा शोधही सुरू केला. पण काल शोधकार्यात अपयश आले. त्यामुळे आज सकाळपासून गडहिंग्लज येथून बोट आणून शोध सुरू होता. सायंकाळी त्यांचा मृतदेह आढळून आल्याने, उत्तरीय तपासणीनंतर मृतदेह नातेवाईकांच्या ताब्यात देण्यात आला. नजीर पटेल अधिक तपास करीत आहेत.

शिवाजी विद्यापीठाचा लोगो वापरावा

...........

पान २ अॅंकर

...................

२७ प्राध्यापकांच्या पदोन्नती रखडल्या

पंधरा वर्षानंतरही पदोन्नतीसाठी संघर्ष , कॅम्पसमधील राजकारण चव्हाट्यावर

म. टा. प्रतिनिधी, कोल्हापूर

शिवाजी विद्यापीठात नोकरीला सुरुवात करुन पंधरा, वीस वर्षांचा कालावधी उलटला. नियमानुसार या कालावधीत चार पदोन्नती मिळणे आवश्यक होते. मात्र विद्यापीठातील २७ प्राध्यापकांचा आजही पदोन्नतीसाठी संघर्ष करावा लागत आहेत. त्यांच्यापैकी दोन प्राध्यापक सेवानिवृत्त झाले. उर्वरित प्राध्यापक पदोन्नती न झाल्यामुळे वाढीव वेतनासह विविध कमिट्यांवर काम करण्यापासून वंचित राहिले आहेत. दरम्यान, कॅस अंतर्गत पदोन्नती कार्यक्रमावरुन विद्यापीठ कॅम्पसमधील प्रशासन आणि प्राध्यापकातील राजकारणही चव्हाट्यावर आले आहे.

शिक्षण सहसंचालक कार्यालयाने कॅस अंतर्गत पदोन्नती कार्यक्रम राबविला होता. विद्यापीठात आयोजित पदोन्नतीचा कार्यक्रम काही कारणास्तव पुढे ढकलला. पदोन्नतीचा कार्यक्रम रद्द झाल्यामुळे काही प्राध्यापकांनी शिक्षण सहसंचालक कार्यालयाचे खास अभिनंदन केले आहे. एकीकडे पदोन्नतीचे लाभ लाटायचे आणि दुसरीकडे काही प्राध्यापकांच्या पदोन्नतीची प्रक्रिया रद्द झाल्यामुळे अधिकाऱ्यांचे अभिनंदन करण्याचा प्रकार सध्या विद्यापीठ वर्तुळात चर्चेचा ठरला आहे. २०१० ते २०१५ या कालावधीतील विद्यापीठात प्राध्यापक, कर्मचाऱ्यांची भरती झाली. या भरती प्रक्रियेतील गैरव्यवहार काही प्राध्यापकांनी सामोरे आणला. त्यामुळे हितसंबंध दुखावलेले काही घटक पदोन्नती रखडावी यासाठी पडद्याआड खेळी करत आहेत आणि त्याला प्रशासनातील काहीजणांची फूस असल्याची चर्चा कॅम्पसमध्ये सुरु आहे.

पदोन्नती रखडलेल्या प्राध्यापकांमध्ये रसायनशास्त्र, प्राणीशास्त्र, वनस्पतीशास्त्र, इंग्रजी, पदार्थविज्ञान विभाग, भूगोल, अर्थशास्त्र, शिक्षणशास्त्र आणि संख्याशास्त्र विभागातील काहीजणांचा समावेश आहे. सेवासंलग्नता नाही, पदोन्नती नाही अशी काहींची स्थिती बनली आहे. नोकरीत रुजू होत असताना पीएचडी प्राप्त असल्यास पहिल्या चार वर्षात पदोन्नती मिळते. त्यानंतर नोकरीच्या नवव्या वर्षी, बाराव्या वर्षी आणि पंधराव्या वर्षी अशा चार पदोन्नती मिळतात. पहिल्यांदा सहायक प्राध्यापक, त्यानंतर सहयोगी प्राध्यापक आणि प्राध्यापक असा पदोन्नतीचा क्रम आहे. मात्र २७ प्राध्यापकांचा सेवाकाल पंधरा ते वीस वर्षे झाला तरी त्यांना अद्याप पदोन्नती मिळालेली नाही. ज्यांच्या पदोन्नती रखडल्या आहेत त्यांना नियमानुसार पदोन्नती मिळाव्यात यासाठी प्रशासनाकडे पाठपुरावा करुनही चालढकल होत असल्याच्या तक्रारी आहेत. काही प्राध्यापकांच्या नियुक्त्या हंगामी तत्वावर केल्यामुळे पद निश्चिती होऊ शकली नाही. त्याचा फटका काही जणांना बसल्याचे सांगितले जाते.

..........

विद्यार्थी बनले सिनीअर

विभागातील काही प्राध्यापक पदोन्नतीपासून लांब आहेत. मात्र त्यांच्या हाताखाली शिकलेले काही विद्यार्थी विद्यापीठात रुजू झाले, सहायक प्राध्यापकांपासून सहयोगी प्राध्यापक व प्राध्यापकांपर्यंत त्यांनी मजल मारली. विविध कमिट्यांवरही ते काम करु लागले. मात्र त्यांना शिकवलेली संबंधित मंडळी आजही पदोन्नतीच्या प्रतिक्षेत आहेत. रसायनशास्त्र, इंग्रजी, वनस्पतीशास्त्र विभागात असा प्रकार पाहावयास मिळतो.

.............

शिक्षण सहसंचालकांचे अभिनंदन, प्रशासनाचे वाभाडे

'कॅस' करिअर अॅडव्हान्समेंट स्कीम अंतर्गत २७ प्राध्यापक कालबध्द पदोन्नतीसाठी प्रशासनाकडे प्रयत्नशील असताना दुसरीकडे पदोन्नतीच्या कार्यक्रमास स्थगित दिल्याबद्दल विद्यापीठातील काही प्राध्यापकांनी शिक्षण सहसंचालकांचे अभिनंदन केले. काही प्राध्यापकांनी सह्यानिशी पत्र काढून सहसंचालक कार्यालयाला दिले आहे. त्यामध्ये प्रशासन नियमबाह्यरित्या कॅस अंतर्गत पदोन्नती कार्यक्रम राबवित आहे. विद्यापीठामध्ये कार्यरत काही अधिकाऱ्यांना कोणत्याही नियमाची माहिती नाही.

......................

कोट येणार आहे ....

म. टा. प्रतिनिधी, कोल्हापूर

कोल्हापूरसह सहा जिल्ह्यांसाठी खंडपीठाचे कामकाज कोल्हापुरात सुरू व्हावे, यासाठी येत्या ऑगस्टमध्ये हायकोर्टाच्या मुख्य न्यायमूर्तींची भेट घेण्याचा निर्णय खंडपीठ कृती समितीने घेतला आहे. या भेटीने खंडपीठाच्या आंदोलनाला पुन्हा सुरुवात होणार आहे. माजी मुख्य न्यायमूर्ती मोहित शहा यांच्या अहवालाची अंमलबजावणी करण्याचा आग्रह नवीन न्यायामूर्तींकडे धरला जाईल. शिवाय राज्य सरकारलाही त्यांनी दिलेल्या आश्वासनांची आठवण करून दिली जाईल. सहा जिल्ह्यांतील वकिलांना विश्वासात घेऊन आंदोलनाचा नव्याने श्रीगणेशा करू. खंडपीठाचा प्रश्न निर्णायक टप्प्यावर आहे. आगामी लोकसभा आणि विधानसभा निवडणुकांच्या पार्श्वभूमीवर सरकारला खंडपीठाचा निर्णय घ्यावाच लागेल. याचा पाठपुरावा करण्यासाठी वेळप्रसंगी आम्ही सनदही पणाला लावू, अशी ग्वाही कोल्हापूर जिल्हा बार असोसिएशनचे नूतन अध्यक्ष अॅड. प्रशांत चिटणीस आणि कार्यकारिणीने दिला.

निर्णायक आंदोलनाची सुरुवात

खंडपीठाचा प्रश्न निर्णायक वळणावर आहे. कोल्हापूरसह सहा जिल्ह्यांसाठी कोल्हापुरात हायकोर्टाचे खंडपीठ सुरू व्हावे, ही न्याय्य मागणी गेल्या २८ वर्षांपासून सुरू आहे. माजी न्यायमूर्ती मोहित शहा यांनी दिलेल्या अहवालाने कृती समितीच्या मागणीवर शिक्कामोर्तब झाले आहे. न्याय मिळण्यास उशीर होणे हा अन्यायच आहे. कोल्हापूरसह सहा जिल्ह्यातील वकिलांसह पक्षकारांवर सातत्याने २८ वर्षे अन्याय झाला आहे. आता यात कोणतेही राजकारण येऊ नये. राज्य सरकारसह न्याय यंत्रणेने अनेकदा आश्वासाने दिली. आश्वासनांची पूर्तता करण्याची वेळ आली आहे. हायकोर्टात पूर्णवेळ मुख्य न्यायमूर्ती नसल्याने त्यांची भेट झाली नव्हती. १८ ऑगस्टला नवीन न्यायमूर्ती हजर होतील. यानंतर तातडीने त्यांची भेट घेण्याचे नियोजन सुरू आहे. माजी न्यायमूर्ती मोहित शहा यांच्या अहवालानुसार कोल्हापुरात खंडपीठाचे कामकाज सुरू करण्यास मान्यता द्यावी, असा आग्रह केला जाईल. केवळ कोल्हापुरात खंडपीठ सुरू करण्यास हरकत नसल्याचे पत्र मुख्य न्यायमूर्तींनी द्यावे, अशी भमिका राज्य सरकारने घेतली आहे. हे पत्र तातडीने मिळ‌ावे, यासाठी पाठपुरावा केला जाईल. आसपासच्या पाच जिल्ह्यातील बार असोसिएशनच्या पदाधिकाऱ्यांची भेट घेऊन आंदोलनाचा श्रीगणेशा करण्याचा प्रयत्न सुरू आहे. आंदोलनाच्या माध्यमातून कोल्हापुरात घडामोडी सुरू असतात. मात्र, इतर जिल्ह्यांमध्ये याची तीव्रता वाढवणे गरजेचे आहे. वकिलांसह पक्षकार, विविध पक्ष, संघटना असे सर्व एकत्रित एकाच प्रश्नासाठी रस्त्यावर उतरल्यास सरकारला याबाबत निर्णय घ्यावाच लागेल.

अॅड. प्रशांत चिटणीस - अध्यक्ष, कोल्हापूर जिल्हा बार असोसिएशन

वकिलांसाठी आपत्कालीन निधीची योजना

वकिलांसाठी कोणतीही आपत्कालीन योजना सुरू नाही. अनेक वकिलांच्या कुटुंबांचा केवळ वकिलीवर उदरनिर्वाह असतो. दुर्दैवाने अपघाती निधन झाल्यास वकिलांच्या कुटुंबाला आर्थिक अडचणींचा सामना करावा लागतो. जिल्ह्यातील सर्व वकिलांसाठी आपत्कालीन निधी उभा करण्याचा मनस आहे. यादृष्टीने प्रयत्नही सुरू झाले आहेत. सध्या बार असोसिएशनकडे ४५ लाखांचा निधी आहे. आकस्मिक निधन झाल्यानंतर संबंधित वकिलाच्या कुटुंबीयांना पाच लाख रुपये मिळावेत, असा ठराव सर्वसाधरण सभेत मांडला जाईल. असोसिएशनचे आर्थिक उत्पन्न वाढावे यासाठीही प्रयत्नशील आहोत. सर्वच क्षेत्रात काम करणाऱ्या व्यक्तींना त्या-त्या क्षेत्रातील संस्थांकडून पुरस्कार दिले जातात. वकिलांसाठी अशी एकही योजना नाही. त्यामुळे अनेक गुणवंत वकिलांचा सन्मान होत नाही. वकिलीमध्ये मोलाचे योगदान देणाऱ्या दोन वकिलांना पुरस्कार देऊन त्यांच्या कार्याचा गौरव करण्याचा विचार आहे. ज्येष्ठ वकिलांसह यात एका नवोदित वकिलाचाही समावेश केला जाईल. यामुळे वकिलांच्या कामाची दखल घेतली जाईल. त्याचबरोबर त्यांना प्रोत्साहनही मिळेल. जिल्ह्यातील सर्व तालुका बार असोसिएशनशी नियमित संपर्क रहावा, यासाठी समन्वयक म्हणून आम्ही सदस्यांची नियुक्ती केली आहे. हे समन्वयक दर महिन्याला तालुका बार असोसिएशनशी चर्चा करून त्यांचे प्रश्न सोडवण्याचा प्रयत्न करतील. वकिलांना सन्मान मिळावा, यासाठी नवीन कार्यकारिणीचे प्रयत्न सुरू आहेत.

आनंदराव जाधव, उपाध्यक्ष

तरुण वकिलांना आंदोलनात सक्रीय करणार

खंडपीठ आंदोलनासाठी तरुण वकिलांमध्ये प्रचंड ऊर्जा आहे. तरुण वकिलांची संख्या लक्षणीय असल्याने तरुणांना खंडपीठ आंदोलनात सक्रीय करण्याचा प्रयत्न आहे. या दृष्टीने काम सुरू आहे. सांगली, सातारा, सोलापूर, रत्नागिरी आणि सिंधुदुर्ग या पाचही जिल्ह्यातील बार असोसिएशनच्या पदाधिकाऱ्यांना भेटून त्यांच्याशी चर्चा करणार आहे. तरुणांचा सहभाग वाढल्यास आंदोलन परिणामकारक होईल. यासाठी ज्येष्ठ वकिलांचे मार्गदर्शन घेतले जाईल. सुदैवाने सर्वच जिल्ह्यात तरुण वकिलांची संख्या लक्षणीय आहे. तरुणांचा उत्साह आणि ज्येष्ठांचे मार्दगर्शन यामुळे खंडपीठ आंदोलनाला योग्य दिशा मिळेल. तरुण वकिलांना मार्गदर्शन मिळावे, यासाठी जेष्ठ वकिलांच्या व्याख्यानांचे आयोजन केले जात आहे. जिल्हा न्यायालयातील सभागृहात २१ जुलैला अॅटर्नी जनरल अशुतोष कुंभकोणी यांचे व्याख्यान आयोजित केले आहे. वारसा हक्क कायदा यावर ते मार्गदर्शन करणार आहेत. वकिलांसाठी ग्रंथालय महत्त्वाचे आहे. पालकमंत्री चंद्रकांत पाटील यांनी जिल्हा कोर्टातील ग्रंथालयासाठी ५० लाखांच्या निधीची घोषणा केली आहे. हा निधी तातडीने मंजूर व्हावा, यासाठी पाठपुरावा सुरू आहे. दरम्यानच्या काळात तालुका बार असोसिएशनची ग्रंथालये सुसज्ज करण्याचे काम सुरू झाले. पेठवडगाव, चंदगड आणि इचलकरंजी येथील ग्रंथालयांमध्ये संगणकासह अत्याधुनिक सुविधा पुरवल्या आहेत. सर्व बार असोसिएशनमध्ये ई लायब्ररी तयार करण्याचा प्रयत्न सुरू आहे. काही ज्येष्ठ वकील स्वत:हून पुस्तके आणि संगणक भेट देत आहेत. काही लोकप्रतिनिधीही मदत देण्यास तयार आहेत.

सुशांत गुडाळकर, सचिव

जागेसाठी पाठपुरावा सुरू

खंडपीठ इमारतीसाठी शेंडा पार्कातील जागेची मागणी केली आहे. जिल्हाधिकाऱ्यांकडे पाठवलेला प्रस्ताव सध्या विभागीय आयुक्तांकडे पोहोचला आहे. याचा पाठपुरावा सुरू असून, विभागीय आयुक्तांकडे चौकशी केली असता, त्रुटींचे पत्र तयार केल्याची माहिती त्यांनी दिली. दोन दिवसांत त्रुटीचे पत्र जिल्हाधिकारी कार्यालयाला प्राप्त होईल. संबंधित त्रुटींची तातडीने पूर्तता करण्यासाठी महसूल विभागाकडे प्रयत्न केले जातील. यासाठी पालकमंत्री चंद्रकांत पाटील यांची भेट घेऊन चर्चा करू. पालकमंत्र्यांनी मनावर घेतल्यास त्रुटी उद्भवण्याचा प्रश्नच येणार नाही. राज्य सरकारने खंडपीठासाठी ११०० कोटींची घोषणा करून हिरवा कंदील दाखवला होता. त्या आश्वासनाची पूर्तात करण्याची वेळ आली आहे. यातील पहिला टप्पा म्हणजे खंडपीठासाठी जागा मंजूर करणे हा आहे. न्यायाधीशांच्या निवासस्थानांसाठी राजाराम तलाव परिसरातील जागेचा प्रस्ताव दिला आहे. यालाही मंजुरी मिळवण्यासाठी जिल्हा बार असोसिएशनचे प्रयत्न सुरू आहेत. शिवाय जिल्ह्यातील सर्वच कोर्टात वकिलांना पुरेशा सुविधा मिळाव्यात यासाठी प्रयत्न केले जातील. वकील आणि न्यायाधीश यांच्यातील संवाद कायम राहणे गरजेचे आहे. यासाठी प्रमुख जिल्हा न्यायाधीशांना भेटून वकील-न्यायाधीश सुसंवादाचे आयोजन करू. यातून नवीन वकिलांना बऱ्याच गोष्टी शिकता येतील. जिल्हा बार असोसिएशनसाठी खंडपीठ हा सर्वाधिक महत्त्वाचा प्रश्न आहेच, मात्र कोर्टाच्या इमारतींमधील अपुऱ्या सुविधा, वकिलांसाठी आपत्कालीन योजना, जिल्हा आणि तालुका बार असोसिएशनमधील समन्वय, आदी प्रश्नही तितकेच महत्त्वाचे आहेत. खंडपीठासह इतर प्रश्नांनाही प्राधान्य देण्याचा प्रयत्न आहे. वर्षभरात यात यश येईल, अशी खात्री आहे.

धैर्यशील पवार, लोकल ऑडिटर

महिलांच्या सुविधांना प्राधान्य

जिल्हा बार असोसिएशनमध्ये महिला प्रतिनिधित्व करणाऱ्या तीन प्रतिनिधी आहेत. इतर प्रश्नांसोबतच आमच्यासाठी महिलांचे प्रश्न महत्त्वाचे वाटतात. आजही अनेक कोर्टात महिला वकिलांसाठी स्वतंत्र रूम नाही. कोर्टाच्या इमारतीतच आम्हाला मूलभूत अधिकार नसतील तर इतरांच्या अधिकारांसाठी आम्ही कसे लढणार? जिल्ह्यातील सर्व कोर्टाच्या इमारतीत महिला वकिलांसाठी स्वतंत्र रूम असावी. अलिकडे महिला वकिलांची संख्या मोठ्या प्रमाणात वाढली आहे. त्यांना सुरक्षित काम करण्यासाठी सुविधा उपलब्ध करून देण्याची जबाबदारी आमच्यावर आहे. वकिलांचे रोजचे कामकाज तणावाचेच असते. कामाचा ताण हलका करण्यासाठी वकिलांचे वाढदिवस साजरे केले जातील. सर्व वकिलांच्या जन्मतारखा मिळवण्याचे काम सुरू आहे. लवकरच याची अंमलबजावणी केली जाईल. हा छोटासा उपक्रम वकिलांमधील आत्मविश्वास वाढवण्यास उपयुक्त ठरेल, त्याचबरोबर वकिलांमधील एकोपाही वाढेल. नवीन वकिलांना मार्गदर्शन करण्यासाठी ज्येष्ठ वकिलांची व्याख्याने आयोजित केली जातील. तालुका बार असोसिएशनलाही याचा लाभ मि‌ळावा, यासाठी प्रयत्न केले जातील.

मनीषा पाटील, महिला प्रतिनिधी

...................

यावेळी बार असोसिएशनचे सदस्य दीपाली पोवार, स्वाती तानवडे, युवराज शेळके, जयदीप कदम, संजय मुळे, अभिषेक देवरे, ओंकार देशपांडे आणि अविनाश पाटील यांनीही मते मांडली. खंडपीठाचा प्रश्न मार्गी लावण्यासाठी पुरेपूर प्रयत्न केले जातील, असा निर्धार नव्या कार्यकारिणीतील सर्वच वकिलांनी व्यक्त केला.

...................

सांडपाणी रोखा, अन्यथा फौजदारी

पर्यावरणमंत्री रामदास कदम यांचा महानगरपालिका आयुक्त, इचलकरंजी मुख्याधिकाऱ्यांना दम

म. टा. प्रतिनिधी, कोल्हापूर

जयंती नाल्यातील सांडपाणी पंचगंगेत मिसळत असल्याबद्दल पर्यावरणमंत्री रामदास कदम यांनी महानगरपालिका आयुक्त डॉ. अभिजीत चौधरी यांना नदी प्रदूषण रोखण्यासाठी आयोजित करण्यात आलेल्या उपाययोजना आढावा बैठकीत धारेवर धरले. जयंती नाल्यातील सांडपाणी रोखण्याचे आदेश दिल्यानंतर महानगरपालिकेने युद्धपातळीवर हालचाली करत सोमवारी दुपारी फायबर प्लेटस् लावून नाल्यातील सांडपाणी रोखले. नदीत मिसळणारे सांडपाणी रोखण्यासाठी युद्धपातळीवर कारवाई न केल्यास महानगरपालिका आयुक्त, इचलकरंजी नगरपालिका मुख्याधिकाऱ्यांवर सदोष मनुष्य वध केल्याप्रकरणी फौजदारी गुन्हा दाखल केला जाईल, अशा इशाराही कदम यांनी बैठकीत दिला.

पर्यावरण मंत्री कदम पंचगंगा नदी प्रदूषण रोखण्यााठी करण्यात आलेल्या उपाययोजना आढावा बैठकीसाठी सोमवारी कोल्हापुरात आले. त्यांनी कोल्हापुरातील जयंती नाला, इचलकरंजीतील काळा ओढा, हातकणंगलेतील लक्ष्मी औद्योगिक वसाहत या ठिकाणी भेट देऊन सरकारी विश्रामगृहात बैठक घेतली. या बैठकीत त्यांनी महानगरपालिका आयुक्त डॉ. अभिजित चौधरी, इचलकरंजी नगरपालिका मुख्याधिकारी दीपक पाटील यांची खरडपट्टी काढली. पंचगंगा प्रदूषण रोखण्यासाठी महानगरपालिकेने कसबा बावडा येथे ७६ एमएलडी एसटीपी, दुधाळी येथे १७ एमएलडी एसटीपी उभारण्यात आल्याची माहिती आयुक्त चौधरी यांनी दिली. तसेच बापट कॅम्प व लाईन बाजार येथील नाले रोखून तेथील सांडपाणी कसबा बावडा येथे नेण्यासाठी पाईप लाईनचे बांधकाम झाल्याची माहिती दिली. विद्युत पंप व विजेची सोय झाल्यावर नोव्हेंबर २०१८ पर्यंत दोन्ही नाल्याचे सांडपाणी नदीत रोखले जाईल, असे सांगितले. तसेच जयंती नाल्यातून ५२ एमएलडी सांडपाणी उपसा करुन कसबा बावडा एसटीपीमध्ये प्रक्रिया केली जाते अशी माहिती दिली. त्यावर कदम यांनी जयंती नाल्याला आपण भेट दिली असून नाल्यातील सांडपाणी का रोखत नाही, अशी विचारणा केली. त्यावर आयुक्त चौधरी व प्रभारी जलअभियंता सुरेश कुलकर्णी यांनी पावसाळा असल्याने बंधाऱ्यावरील फायबर प्लेटस् काढण्यात आले आहेत, अशी माहिती दिली. या खुलाशावर कदम यांनी, सध्या पाऊस नाही. नागरिकांनी हे सांडपाणी मिसळलेले पाणी प्यायचे का, जयंती नाल्यातून पंचगंगेत मिसळणारे पाणी तुम्ही पिणार का, अशा प्रश्नांची सरबत्ती करत जयंती नाल्याचे सांडपाणी रोखले असल्याची माहिती सांगून सरकारला फसवत असल्याचा आरोप केला. सरकारची फसवणूक केल्याबद्दल तुमच्यावर सदोष मनुष्यवधाअंतर्गत फौजदारी गुन्हा दाखल केला जाईल, असा इशारा दिला.

आयुक्त चौधरी यांच्यानंतर कदम यांनी इचलकरंजी मुख्याधिकारी दीपक पाटील यांच्याकडे मोर्चा वळवला. इचलकरंजीत सांडपाणी रोखण्यासाठी एसटीपी कार्यान्वित केला आहे, असा दावा पाटील यांनी केल्यावर मंत्री कदम चांगलेच भडकले. इचलकरंजीतील काळ्या ओढ्याला आपण भेट देऊन बैठकीला आलो आहे. एसटीपीचा व्हॉल्व्ह रात्री सोडून कापड उद्योगातील प्रोसेसिंगमधील काळे पाणी थेट काळ्या ओढ्यात सोडता. खोटी माहिती दिल्याबद्दल तुम्हाला एका मिनिटात मी निलंबित करीन, असा दम दिला. बैठकीतच त्यांनी प्रादेशिक प्रदूषण नियंत्रण मंडळाच्या अधिकाऱ्यांना इचलकरंजीला पाणी प्रदूषण करणाऱ्या सर्व कारखान्यांना भेट देऊन पाण्याचे नमुने घेण्याचे आदेश दिले. यावेळी प्रदूषण रोखण्यात महानगरपालिका अपयशी ठरल्याचा आरोप शिवसेना जिल्हाप्रमुख विजय देवणे, संजय पवार, उदय गायकवाड, प्रजासत्ताक सेवा संस्थेचे दिलीप देसाई, माजी जिल्हा परिषद उपाध्यक्ष धैर्यशील माने यांनी केला.

बैठकीला जिल्हा परिषद अध्यक्षा शौमिका महाडिक, आमदार डॉ. सुजित मिणचेकर, उल्हास पाटील, अमल महाडीक, माजी मंत्री प्रकाश आवाडे, मुख्य कार्यकारी अधिकारी डॉ. कुणाल खेमनार, अतिरिक्त जिल्हाधिकारी नंदकुमार काटकर, प्रदुषण नियंत्रण मंडळाचे सदस्य सचिव डॉ. पी. अनबालगण आदी उपस्थित होते.

..........

चौकट

चंद्रकांत पाटील 'सेकंड मुख्यमंत्री'

कोल्हापुरात एकही कत्तलखाना नसल्याने उघड्यावर कापलेल्या जनावरांचा निघणारा कचरा व पाणी थेट नदीत मिळत आहे, याकडे पर्यायवरण कार्यकर्ते उदय गायकवाड यांनी लक्ष वेधले. त्यावर, कत्तलखान्यास जिल्हा नियोजन मंडळातून निधी उपलब्ध करुन घ्या. पालकमंत्री चंद्रकांत पाटील हे राज्याचे 'सेकंड मुख्यमंत्री' आहेत. त्यांना पैशाची काय कमतरता आहे. त्यांच्याकडून निधी घ्या, अशी सूचना मंत्री कदम यांनी केले.

००००

पोलिसांवर आरोप

पर्यावरण चळवळीतील कार्यकर्ते व सामाजिक कार्यकर्त्यांनी बैठकीला उपस्थित राहू नये, यासाठी शाहूपुरी पोलिसांकडून नोटिसा आल्या आहेत, असा आरोप उदय गायकवाड यांनी केला. प्रादेशिक प्रदूषण नियंत्रण मंडळाच्या आदेशानुसार ही कारवाई करण्यात आल्याचेही गायकवाड यांनी यावेळी निदर्शनास आणले.

मी काँग्रेससोबतच राहणार

वडील, काकांच निर्णय घेणार असल्याची ऋतुराज पाटील यांची स्पष्टोक्ती

म. टा. प्रतिनिधी, कोल्हापूर

'माझ्या आगामी राजकीय वाटचालीचा निर्णय पप्पा आणि काका हेच घेतील. तोच आपला अंतिम निर्णय असेल' असे स्पष्ट करत ऋतुराज पाटील यांनी 'काँग्रेससोबतच राहणार आहे' असे सांगितले. पालकमंत्री चंद्रकांत पाटील यांच्या उपस्थितीत पाटाकडील तालीम मंडळाच्या कार्यक्रमातच ऋतुराज यांनी आपली भूमिका स्पष्ट केली. 'पालकमंत्र्यांसारख्या ज्येष्ठ व्यक्तींनी माझ्या उमेदवारीचा केलेला उल्लेख हीच माझ्या कामाची पोचपावती आहे' असे त्यांनी सांगितले.

काही दिवसांपूर्वी भाजपच्या मेळाव्यातच पालकमंत्री पाटील यांनी ऋतुराज पाटील हे भाजपच्या तिकीटावर कोल्हापूर उत्तर मतदारसंघात विधानसभेची निवडणूक लढवतील अशी घोषणा केली होती. त्याबाबत आमदार सतेज पाटील यांनी, 'आमचे घराणे काँग्रेसवर प्रेम करणारे आहे. त्यामुळे ऋतुराजदेखील काँग्रेसचेच उमेदवार असतील' असे स्पष्टीकरण दिले होते. या पार्श्वभूमीवर पाटील यांनी पाटाकडील तालीम मंडळाच्या सत्कार समारंभात आपली भूमिका मांडली.

ऋतुराज पाटील म्हणाले, गेल्या काही दिवसांपासून पालकमंत्र्यांनी दोन-तीन वेळा माझ्या नावाचा उल्लेख केला. त्यांच्यासारख्या ज्येष्ठ व्यक्तीने माझा उल्लेख केल्याबद्दल युवा कार्यकर्ता म्हणून मला बरं वाटलं. कारण आजपर्यंत विविध माध्यमांतून युवकांच्या साथीने मी कार्यरत आहे. माझा उल्लेख करून पालकमंत्र्यांनी माझ्या कामाची पोचपावतीच दिली आहे. आमच्या राजकीय वाटचालीबाबत जो काही निर्णय घ्यायचा असेल तो वडील आणि काका एकत्र बसूनच घेतात. माझ्या राजकीय वाटचालीबद्दलही पप्पा आणि काकाच चर्चेने निर्णय घेतील. त्यानुसारच माझी पुढील वाटचाल असेल. युवा पिढीचा प्रतिनिधी म्हणून कोल्हापूरकरांना अभिमान वाटेल असे काम मी करेन.'

ऋतुराज पाटील म्हणाले, 'काका आणि माझे वडील संजय पाटील हे गेली अनेक वर्षांपासून एकत्र शिवाजी विद्यापीठाच्या सिनेट आणि इतर निवडणुका लढवत आहेत. गेल्यावर्षी झालेल्या निवडणुकीतही विद्यापीठ विकास आघाडीची सर्व सूत्रे माझ्या पप्पांकडे होती. त्याला यश येऊन विद्यापीठाची सत्ता आघाडीच्या हातात आली. या संबंधांमुळेच पालकमंत्री माझे नाव घेत असावेत. मात्र घरच्यांचा निर्णय माझ्यासाठी अंतिम असेल.'

बसवेश्वरांनी लोकशाहीचा पाया रचला

'लिंगायत स्वतंत्र धर्मच' पुस्तकाचे प्रकाशन

म. टा. प्रतिनिधी, कोल्हापूर

'इंग्रजांनी लोकशाहीची देणगी दिल्याचे आपण मानतो, पण त्यापूर्वी १२ व्या शतकात बसवेश्वरांनी अनुभव मंटपातून लोकशाहीचा पाया घातला. अनुभव मंटपामध्ये झालेल्या विचारांवर मंथन होऊन त्याचे वचनामध्ये रुपांतर होत होते', असे प्रतिपादन प्राचार्य डॉ. भानुदास गाडवे यांनी केले. सोलापूर येथील चनवीर भद्रेश्वर मठ लिखित 'लिंगायत स्वतंत्र धर्मच' पुस्तक प्रकाशनप्रसंगी ते बोलत होते.

चित्रदुर्ग मठ येथे झालेल्या प्रकाशन कार्यक्रमात बोलताना डॉ. गाडवे म्हणाले, 'अनुभव मंटपाच्या माध्यमातून बसवेश्वरांनी लोकशाहीचा पाया घातला, तरी त्यांचे विचार लिंगायत समाजामध्ये पोहोचले नाहीत. त्यांचे विचार सद्य:स्थितीत समाजपर्यंत पोहोचवण्याची गरज आहे. लोकशाहीमध्ये स्वातंत्र मिळाले, पण भ्रष्टाचार, स्वैराचाराला आळा घालण्यासाठी बसवेश्वारांचे विचार मदतशील ठरतील. बसवेश्वरांच्या विचारांवर वारकरी संप्रदायाची निर्मिती होऊन, त्यांनी समता प्रस्थापित करताना प्रबोधनाच्या माध्यमातून प्रयत्न केले.'

'देशातील मठ त्या काळातील विद्यापीठे होती. विचारांचे आदान-प्रदान करणारी ज्ञानाची केंद्रे होती, मात्र पुढच्या काळात मठांचा वापर वेगळ्या कारणांसाठी होऊ लागला. बसवेश्वरांचे विचार स्वत: आत्मसात करुन दुसऱ्यांना सांगण्याची आवश्यकता व्यक्त करत विचार आणि वचने आत्मसात केल्यास जीवन समृद्ध होईल,' असे डॉ. गाडवे यांनी सांगितले. यावेळी प्रकाश हिरेमठ यांनी प्रबोधनात्मक गीत सादर केले. कार्यक्रमास सरलाताई पाटील, राजेशखर बटकडली, विलास आंबोळे, डॉ. विश्वनाथ मगदूम, अशोक माळी आदी उपस्थित होते. प्रास्ताविक चंद्रशेखर बटकडली यांनी केले. सूत्रसंचलन यश आंबोळे यांनी केले. बाबूराव तारळी यांनी आभार मानले.

दोन हल्लेखोरांना

पोलिस कोठडी

म. टा. प्रतिनिधी, कोल्हापूर

जमिनीच्या वादातून बिंदू चौकात दोघांवर कोयत्याने हल्ला करणाऱ्या हल्लेखोरांमधील दोघांना लक्ष्मीपुरी पोलिसांनी अटक केली. अटकेतील गौरव वडेर आणि राडा उर्फ आकाश पंडित या दोघांना कोर्टात हजर केले असता त्यांना पाच दिवसांची पोलिस कोठडी मिळाली. उर्वरित संशयितांचा शोध सुरू असल्याची माहिती लक्ष्मीपुरी पोलिसांनी दिली.

शहराच्या मध्यवर्ती ठिकाणी बिंदू चौकात आठ ते दहाजणांनी सोमवारी दुपारी दोघा भावांचा पाठलाग करून कोयत्याने हल्ला केला होता. फिल्मी स्टाईलने घडलेल्या या थरारक घटनेत मयूर प्रकाश क्षीरसागर (वय ३०) आणि विनायक शामराव क्षीरसागर (३३, दोघेही रा. भोई गल्ली, बिंदू चौक) हे दोघे जखमी झाले. याप्रकरणी पोलिसांनी सोमवारी रात्री उशिरा गौरव वडेर आणि आकाश पंडित यांना अटक केली. विकलेली जमीन परत मिळवण्यासाठी जमिनीची आधीची मालकीण गंगूबाई सदाशिव साळुंखे (रा. प्रयाग चिखली) यांच्यासह मुलगा बाबासाहेब यांनी सुपारी दिल्याची चर्चा सुरू होती. या अनुषंगाने पोलिसांनी अटकेतील दोघांकडे चौकशी केली. मात्र, सुपारी घेतली नसून, बाबासाहेब हा मित्र असल्याने हल्ला केल्याची माहिती संशयितांनी दिली आहे. पोलिसांकडून याची खातरजमा करण्याचे काम सुरू आहे. वडेर हा जरगनगर येथील खुनाच्या गुन्ह्यातील फिर्यादी आहे. मात्र, तो आरसी गँगशी संबंधित असल्याचीही माहिती समोर आली आहे. पोलिसांनी अटकेतील दोघांना मंगळवारी जिल्हा कोर्टात हजर केले असता, त्यांना पाच दिवसांची कोठडी मिळाली.

म. टा. प्रतिनिधी, कोल्हापूर

अहमदनगर येथील पुरोगामी चळवळीतील कार्यकर्ते अॅड. गजेंद्र दांगट यांच्यावर प्राणघातक हल्ला करणाऱ्या समाजकंटकावर कारवाई झाली पाहिजे, अशी मागणी संभाजी ब्रिगेडच्या कार्यकर्त्यांनी निवासी उपजिल्हाधिकारी संजय शिंदे यांच्याकडे निवेदनाद्वारे केली आहे. संभाजी ब्रिगेडचे प्रदेश कार्याध्यक्ष हिंदुराव हुजरे पाटील, बाळासाहेब पाटील, प्रवीण पाटील, राहुल पाटील आदींचा शिष्टमंडळात समावेश होता.

पत्रकात म्हटले आहे, 'अहमदनगरचे भाजपचा तत्कालिन उपमहापौर श्रीपाद छिंदमने छत्रपती शिवाजी महाराज यांच्या संदर्भात चुकीचे वक्तव्य केल्याबद्दल त्यांच्या निषेधार्थ मोर्चा काढण्यामध्ये अॅड. दांगड आघाडीवर होते. तो राग धरुन छिंदमच्या साथीदारांनी अॅड. दांगट यांच्यावर हल्ला केला. त्यामध्ये दांगट गंभीर जखमी झाले असून त्यांच्यावर उपचार सुरू आहेत. हल्लेखोरामध्ये अहमदनगर येथील शिवप्रतिष्ठान हिंदुस्थानचा शहराध्यक्ष देविदास मुदगलचा समावेश आहे. छिंदम व मुदगल हे संघटितपणे गुन्हेगारी टोळी चालवित असल्यामुळे त्यांच्यावर मकोका कायद्यान्वये कारवाई करावी. तर अॅड. दांगट व त्यांच्या परिवाराला पोलिस संरक्षण मिळावे. हल्लेखोरांवर कारवाई झाली नाही तर संभाजी ब्रिगेडतर्फे तीव्र आंदोलन केले जाईल.' शिष्टमंडळात आर्यन म्हातुगडे, संदीप भोसले, चेतन पाटील, सचिन पाटील, संतोष मोरे आदी उपस्थित होते.

(फोटो आहे)

खणीत बुडून सेवानिवृत्त

अधिकाऱ्याचा मृत्यू

म. टा. प्रतिनिधी, कोल्हापूर

रंकाळा परिसरात फिरण्यासाठी गेलेल्या सेवानिवृत्त अधिकाऱ्याचा पतौडी खणीत बुडून मृत्यू झाला. हा प्रकार मंगळवारी (ता. ३) सकाळी उघडकीस आला. सदाशिव निवृत्ती खेडेकर (वय ६०, रा. मीनाक्षी अपार्टमेंट, अंबाई टँक, कोल्हापूर) असे मृताचे नाव आहे. खेडेकर हे दोन वर्षांपूर्वी विमा कंपनीतून विकास अधिकारीपदावरून सेवानिवृत्त झाले होते.

जुना राजवाडा पोलिसांनी दिलेल्या माहितीनुसार, सदाशिव खेडेकर हे नेहमीप्रमाणे सोमवारी (दि. २) संध्याकाळी फिरण्यासाठी घराबाहेर पडले होते. रात्री उशिरापर्यंत ते घरी आले नाहीत. कुटुंबीयांनी शोधाशोध केली. मात्र, ते सापडले नाहीत. मंगळवारी सकाळी रंकाळा येथील पतौंडी खणीत त्यांचा चष्मा व टोपी आढळली. त्यांचा मुलगा सुरेंद्र खेडेकर याने या वस्तू ओळखल्यानंतर उदय निंबाळकर यांनी पाण्यात शोध घेतला असता, खेडेकर यांचा मृतदेह सापडला. गेल्या काही दिवसांपासून ते आजारी होते. खणीमध्ये पाय घसरून पडल्याने बुडून मृत्यू झाल्याची वर्दी त्यांच्या मुलाने जुना राजवाडा पोलिसांत दिली. त्यांच्या पश्चात पत्नी, मुलगा असा परिवार आहे.

म. टा. प्रतिनिधी, कोल्हापूर

माध्यमिक व उच्च माध्यमिक विद्यार्थ्यांच्या शिष्यवृत्तीचे ७२ लाख ९० हजार ५१४ रुपये लालफितीत अडकले आहेत. त्यामुळे गेल्या शैक्षणिक वर्षातील २ लाख ६४ हजार ९३७ विद्यार्थी शिष्यवृत्तीच्या पैशापासून वंचित आहेत. सध्याच्या योजनेतील शिष्यवृत्तीची सर्व रक्कम देण्यात सरकार, प्रशासन अपयशी ठरले असताना मराठा आरक्षणासाठीच्या आंदोलनाची धार कमी करण्यासाठी नव्या शिष्यवृत्ती, फी सवलतींच्या घोषणा, आश्वासने दिली जात आहेत. परिणामी सरकारच्या विश्वासार्हतेवर विद्यार्थी, पालकांतून प्रश्नचिन्ह उपस्थित केले जात आहे.

प्राथमिक शिक्षकांच्या पाल्यांना आणि एक लाखापेक्षा कमी उत्पन्न असलेल्या अकरावी-बारावीतील विद्यार्थ्यांची फी माफी, माजी सैनिकांच्या मुलांना शैक्षणिक सवलत, बारावीपर्यंत मुलींना मोफत शिक्षण, माध्यमिक, उच्च माध्यमिक शिक्षक, शिक्षकेतर कर्मचाऱ्यांच्या पाल्यांना पदव्युत्तरपर्यंत मोफत शिक्षण, दहावीपर्यंत मुलींना मोफत शिक्षण योजनेतून पात्र प्रत्येक विद्यार्थ्यास कमीत कमी १४ रुपये ते अधिकाधिक १५३६ रुपये सरकारकडून दिले जातात.

दरम्यान, प्रवेश प्रक्रियेवेळी पैसे भरून घेतले जातात. सरकारकडून जमा झाल्यानंतर परत केले जातात. त्यासाठी सरकारकडून ७२ लाख ९० हजार ५१४ रुपये माध्यमिक शिक्षण प्रशासनाकडे उपलब्ध झाले आहेत. हे पैसे हायस्कूलच्या बँक खात्यावर जमा केल्यानंतर संबंधित विद्यार्थ्यांना दिले जाणार आहेत. मात्र, प्रत्येक हायस्कूलचे बँक खाते घेणे आणि त्यावर पैसे वर्ग करण्यास विलंब झाला आहे. त्यामुळे नवीन शैक्षणिक वर्ष सुरू झाले तरी गेल्या वर्षीचे शिष्यवृत्तीचे पैसे मिळालेले नाहीत. काही योजनांतून मिळणारी शिष्यवृत्तीची रक्कम नाममात्र आहे. त्यामुळे विद्यार्थी, पालकही ठोस पाठपुरावा करीत नसल्याचे चित्र आहे.

०००००

निम्या निधीला कात्री

दहावीपर्यंत सर्व मुलींना मोफत शिक्षण देण्याच्या योजनेसाठी ३५ लाख ३५ हजार रुपयांची आवश्यकता आहे. मात्र, प्रत्यक्षात या योजनेत १९ लाख २० हजार रुपये मिळाले आहेत. उर्वरित रकमेला सरकारने कात्री लावली आहे. परिणामी शिष्यवृत्तीची रक्कमही विलंबाने मिळूनही सर्व पात्र विद्यार्थ्यांना दिली जाणार नाही. निधी कात्रीमुळे विद्यार्थ्यांना फटका बसणार आहे.

००००

सरकारने पूर्वीच्या शिष्यवृत्तीचे पैसे विद्यार्थ्यांना वेळेत दिलेले नाहीत. आता पुन्हा नव्या शिष्यवृत्ती, फी सवलतीच्या योजना जाहीर केल्या आहेत. सरकार केवळ घोषणा, आश्वासने देत जनतेची दिशाभूल करीत आहे. सरकारने खोटा प्रचार करणे बंद करून सर्व योजनांचे पैसे पात्र विद्यार्थ्यांच्या खात्यावर वेळच्या वेळी जमा करावेत.

रमेश मोरे, पालक

००००

सकाळी पाऊस, दुपारी उघडीप

म. टा. प्रतिनिधी, कोल्हापूर

बऱ्याच दिवसानंतर शहरात मंगळवारी सकाळी दमदार पाऊस झाल्याने जनजीवन विस्कळीत झाले. दुपारनंतर पावसाने उघडीप घेतली असली तरी संध्याकाळनंतर पावसाची उघडझाप सुरु होती. ग्रामीण भागातही पावसाला पुन्हा सुरुवात झाल्याने भाताच्या रोप लागणीला वेग येणार आहे.

गेले चार दिवस पावसाने दडी मारली होती. सोमवारी मध्यरात्रीपासून पावसाला सुरुवात झाली. सकाळी सात वाजल्यापासून पावसाच्या जोरदार सरी झाल्याने शहरात अनेक ठिकाणी रस्त्यांवर पाणी साचले होते. पावसामुळे जनजीवन विस्कळीत झाले. शहरातील भाजी मंडई, व्यापारी पेठेतही पावसाचा परिणाम जाणवला. सकाळी शाळेत जाणाऱ्या विद्यार्थी व नोकरीस जाणाऱ्यांना छत्री, रेनकोटचा आधार घ्यावा लागला. दुपारी साडेबारानंतर पावसाचा जोर कमी झाला. सायंकाळपर्यंत पावसाने चांगलीच उघडीप घेतली होती. त्यानंतर रात्री उशिरापर्यंत पावसाची उघडझाप सुरु होती.

मंगळवारी सकाळी आठ वाजेपर्यंत २४ तासांत गगनबावडा तालुक्यात सर्वाधिक २०,५० मिलीमीटर पावसाची नोंद झाली आहे. याच तालुक्यातील कोदे लघु पाटबंधारे धरण क्षेत्रात ६२ मिली मीटर पावसाची नोंद झाली आहे. कोदे धरण ९९ टक्के भरले आहे. कुंभी धरण क्षेत्रात ४७ तर शाहूवाडीतील कासारी धरणक्षेत्रात ३५ मिलीमीटर पावसाची नोंद झाली आहे. सोमवारी सकाळी आठ वाजता पंचगंगा नदीवरील कसबा बावडा राजराम बंधाऱ्याची पातळी १३ फूट होती. सायंकाळी सात वाजता ही पातळी एक इंचाने कमी होत १२ फूट ११ इंचावर पोचली आहे. तालुकानिहाय पाऊस पुढीलप्रमाणे, हातकणंगले ६.७५ मि.मी., शिरोळ १०.२८मि.मी., पन्हाळा २.७१मि.मी., शाहूवाडी ७.१६ मि.मी., राधानगरी ७.३३ मि.मी., कागल ३.७१मि.मी., गडहिंग्लज ०.१४ मि.मी. भुदरगड २.००मि.मी., आजरा ३.५०मि.मी. व चंदगड ५.८३ मि.मी.

हरित लवादाचे महापालिकेवर ताशेरे

पंचगंगा प्रदूषणप्रश्नी आराखडा सादर करण्याचे आदेश

म. टा. प्रतिनिधी, कोल्हापूर

पंचगंगा प्रदूषण रोखण्यास कोल्हापूर महापालिका अपयशी ठरल्याचा ठपका ठेवत हरित लवादाने मंगळवारी झालेल्या सुनावणीमध्ये जोरदार ताशेरे ओढले. अमृत योजनेसह इतर प्रकल्पांचा आराखडा सादर करण्याचे आदेश देत दंडात्मक कारवाई का करु नये, अशी विचारणा नागिण नंदा व एस. टी. नगंडी लवादाने केली. पुढील सुनावणी १६ जुलै रोजी होणार आहे. सोमवारी पर्यावरण मंत्री रामदास कदम यांनी महापालिका अधिकाऱ्यांना धारेवर धरल्यानंतर लवादानेही अधिकाऱ्यांना खडेबोल सुनावले.

रंकाळा व पंचगंगा प्रदूषणप्रकरणी सामाजिक कार्यकर्ते सुनील केंबळे यांनी याचिका दाखल केली होती. सद्य:स्थितीस रंकाळा प्रदूषणाचा विषय बाजूला पडला असला, तरी पंचगंगा प्रदूषणाचा विषय पुन्हा ऐरणीवर आला आहे. सोमवारी पर्यावरण मंत्री कदम यांनी जयंती नाल्यासह एसटीपी पंपिंग स्टेशनला भेट देत अधिकाऱ्यांना धारेवर धरले होते. तसेच गुन्हे दाखल करण्याचे आदेश दिले होते. त्यामुळे मंगळवारी होणाऱ्या सुनावणीकडे सर्वांचे लक्ष लागले होते.

सुनावणी दरम्यान महापालिकेच्या वकिलांनी दुधाळी एसटीपी प्लांट सुरू केला असून प्रदूषण रोखण्याचे काम युद्धपातळीवर सुरू असल्याचे सांगण्याचा प्रयत्न केला. लवाद नवीन असला, तरी यापूर्वीच्या ऑर्डरचे वाचन केले आहे. एसटीपी प्लांट महापालिका वेळेत का पूर्ण करु शकली नाही, याबाबत आपल्याला दंड का करु नये, अशी विचारणा लवादाने केली. प्लांटची भौगोलिक स्थिती व निधी मिळण्यास झालेला विलंब आदी कारणे देण्याचा प्रयत्न वकिलांकडून झाला, पण लवादाने ही कारणे पुरेशी नसून अमृत योजनेसह इतर प्रकल्पांचा आराखडा त्वरीत सादर करण्याचे आदेश दिले.