म. टा. प्रतिनिधी, कोल्हापूर

शिरोली मॅन्युफॅक्चरर्स असोसिएशनची (स्मॅक) पंचवार्षिक निवडणूक येत्या नऊ सप्टेंबरला होत आहे. गतवेळची निवडणूकही बिनविरोध करण्याचा प्रयत्न झाला होता. मात्र दुरंगी लढत झाली होती. या वर्षीही निवडणूक बिनविरोध करण्याचे प्रयत्न सुरू झाले आहेत.

उद्योजकांची सर्वात मोठी मानली जाणारी शिरोली मॅन्युफॅक्चरर्स असोसिएशन ही महत्त्वाची संस्था असून उद्योजक घडविण्यात संस्थेचा मोठा वाटा आहे. मात्र, असोसिएशनवर वर्चस्व कोणाचे यावरून उद्योजकांमध्ये मतभेद असल्याने गतवेळच्या निवडणूक रंगली होती. पंचवार्षिक निवडणुकीचा कार्यक्रम जाहीर झाला आहे. २०१८ ते २०२३ सालासाठी १० जुलै ते नऊ सप्टेंबर या कालावधीत निवडणुकीची प्रक्रिया राबविली जाणार आहे. निवडणुकीसाठी १० जुलै ते २६ ऑगस्ट पर्यंत प्रक्रिया राबविली जाणार आहे. नऊ सप्टेंबरला सकाळी नऊ ते पाच या वेळेत मतदान होणार असून सायंकाळी सहा वाजता मतमोजणीची सुरुवात होणार आहे. रात्री नऊ वाजेपर्यंत निकाल जाहीर केला जाणार आहे. अॅड. अशोक उपाध्ये, मॅकचे संचालक मोहन कुशिरे, उद्यम सोसायटीचे संचालक प्रकाश चरणे निवडणुकीचे कामकाज पाहणार आहेत. स्मॅकचे सदस्य होण्यासाठी उद्योजकांनी तयारी सुरू केली आहे. उद्योजकांचे अनेक प्रश्न स्मॅककडून मार्गी लावले जातात. गत वेळेच्या निवडणूकीत दुरंगी पॅनेलमुळे मोठी रंगत आली होती. या वर्षी ही निवडणूक बिनविरोध करण्याचे प्रयत्न सुरू झाले आहेत.

००

निवडणूक कार्यक्रम असा

१० जुलै : प्राथमिक यादी प्रसिद्ध

१७ ते २१ जुलै : लेखी तक्रारी आणि दुरुस्ती

२४ जुलै : तक्रार अर्जावर निकाल

२८ जुलै : निवडणूक मंडळाच्या अध्यक्षांकडे अपील

२ ऑगस्ट : निकाल

८ ऑगस्ट : अंतिम मतदार यादी प्रसिद्ध

८ ते १४ ऑगस्ट : उमेदवारी अर्ज स्वीकार

१८ ऑगस्ट : छाननीची प्रक्रिया

२३ ऑगस्ट : अर्ज माघार शेवटचा दिवस

२६ ऑगस्ट : उमेदवारांची यादी जाहीर

९ सप्टेंबर : सकाळी ९ ते ५ या वेळेत मतदान व निकाल

म. टा. प्रतिनिधी, कोल्हापूर

उद्योगाला बळ देण्यासाठी केंद्र आणि राज्य सरकारकडून 'मेक इन इंडिया', 'मेक इन महाराष्ट्र ', 'मेक इन कोल्हापूर' यांसारख्या संकल्पना राबविल्या जात आहेत. तत्कालीन काळात राजर्षी छत्रपती शाहू महाराजांनी कोल्हापूरच्या उद्योगाची पायाभरणी केली. मूलभूत क्षेत्रात भरीव काम केल्यामुळेच आजचा कोल्हापूरचा पर्यायाने दक्षिण महाराष्ट्राच्या प्रगतीचा आलेख साकारला आहे. उद्योग, सहकार, दू‌ध व्यवसाय, साखर, सूतउद्योग, शाहू मिलसह राजर्षी शाहू महाराजांनी विकासाचे 'कोल्हापूर मॉडेल' तयार केले. त्यामुळे कोल्हापूरच्या उद्योगाला भरभराटी येण्याचे शंभर टक्के श्रेय शाहू महाराजांना जाते.

कोल्हापूर इंजिनीअरिंग असोसिएशनची स्थापना १९४७ मध्ये झाली. तत्पूर्वी शाहू महाराजांनी शेतीपूरक असलेल्या अनेक व्यवसायाला लागणाऱ्या साधनांच्या निर्मितीसाठी उद्यमनगरात उद्योग उभे केले. नांगर, डिझेल इंजिन, वाहनांना लागणाऱ्या सुट्या भागांचे कारखाने उभे केले. त्यांनी शेती, उद्योग, शिक्षण, कला, क्रीडा, रस्ते, पाणी, रेल्वे, व्यापार, उद्योग या मूलभूत क्षेत्रांत विकासाची मुहूर्तमेढ रोवली. शाहू महाराजांचे विमानतळ उभारणी आणि विमान उतरविण्याचे स्वप्न होते. त्यांच्यानंतर ते छत्रपती राजाराम महाराजांनी स्वप्न साकारले. ४ मे १९४० रोजी कोल्हापुरातून पहिले विमानउड्डाण झाले. अनेक पायाभूत सुविधांचे जाळे विळले. विकासाच्या अनेक धमण्या जोडल्या. त्यापैकी महत्त्वाची धमणी उद्योगविश्वाची होती. कोल्हापूरचे संस्थानिक, राजे म्हणून ते येथेच न थांबता त्यांनी बोटीने विदेशाचा प्रवास केला. विदेशात असलेले अनेक उद्योग येथे सुरू केले. त्यासाठी भौगोलिक परिस्थिती, कौशल्य, उद्योगासाठी संस्थानातील जागा दिली. कोल्हापुरात शाहू मिलची उभारणी केली. येथे पहिल्यांदा सूत आणि नंतर कापडनिर्मिती सुरू झाली. इचलकरंजी, कोल्हापूर, शिरोळ, गडहिंग्लज येथे जिनिंग फॅक्टरी सुरू झाल्या. निर्यातीला मोठी चालना दिली. त्यासह येथील कामगारांच्या हाताला काम मिळवून दिले.

शाहू छत्रपती स्पिनिंग अँड विव्हिंग मिलची स्थापना, शाहूपुरी व्यापारपेठेची स्थापना, गुळाच्या बाजारपेठेची निर्मिती, शेतकऱ्यांच्या सहकारी संस्थांची स्थापना, राधानगरी धरणाची उभारणी केली. शेतकऱ्यांना कर्जे उपलब्ध करून दिली. शेतीच्या आधुनिकीकरणासाठी संशोधनाला पाठिंबा दिला, नगदी पिके व तंत्रज्ञानाचा वापर वाढण्यासाठी 'किंग एडवर्ड ॲग्रिकल्चरल इन्स्टिट्यूट' स्थापना केली. तत्कालीन काळात पाण्याचे महत्त्व लक्षात घेऊन राधानगरी धरणाची निर्मिती केली. त्यांनी शेतीला उपयुक्त जनावरांची प्रदर्शने भरवली. पारंपरिक पिकांशिवाय नवी पिके घेण्याचा उपक्रम यशस्वीपणे राबविला. पन्हाळा व भुदरगड येथे चहा आणि कॉफीची लागवड करण्याचा प्रयोग केला. वेलदोडे, कोको, रबर, ताग, अंबाडी, बटाटे, लाख, ट्रॅपिओका, कंबोडियन कापूस, आदींची लागवड केली. पैकी काही वस्तूंची निर्यात करण्यात त्यांचा मोठा वाटा राहिला. ते प्रयोगशीलता आणि प्रगतीशीलतेचे द्योतक ठरले.

०००००००००

तोफांचे नांगर

पहिल्या महायुद्धाचा परिणाम देशावर झाला होता. १९१६ मध्ये सर्व यंत्रे आणि लोखंड, आदी कच्च्या मालाची आयात परदेशातून केली जात होती. ही आयात थांबल्यामुळे कारखान्यांची स्थिती आणीबाणीची झाली होती. नांगरांना लागणाऱ्या हळीस पट्ट्या जर्मनीहून आणि फाळ, पाठी, मधले भाग यांना लागणारे बीड इंग्लंडहून आणि नांगराला लावण्यात येणारे रंगही परदेशातून आयात केले जात होते. ही आयात थांबल्याने किर्लोस्कर कारखाना बंद पडण्याच्या मार्गावर होता. त्या काळात शाहू महाराजांनी कोल्हापूर संस्थानातील किल्ल्यांवर पडलेल्या तोफा लक्ष्मणराव किर्लोस्करांना बक्षीस दिल्या. यामुळेच किर्लोस्कर कारखान्यात लोखंडी नांगर तयार करण्याचे काम सुरू राहिले.

०००००००००

लोगो : बाजारभाव

खोबरेलतेल ४० रुपयांनी स्वस्त

साखर वधारली, गूळ दरात घसरण

फोटो आहे

म. टा. प्रतिनिधी, कोल्हापूर

दोन महिन्यांपूर्वी खोबरेल तेलाच्या दरात किलोमागे तब्बल ६० रुपयांची वाढ झाली होती. दोन महिन्यानंतर मात्र खोबरेल तेलाच्या दर २० ते ४० रुपयांनी कमी झाल्याने सरासरी २४० ते २६० रुपयांनी खोबरेल तेलाची विक्री सुरू आहे. घाऊक बाजारात साखरेच्या दरात वाढ झाल्यानंतर साखरेचे किरकोळ दर ३४ रुपयांवरुन ३६ रुपये झाला. तर गूळ व शेंगदाणा दरात घसरण झाली आहे.

केंद्र सरकारने खाद्यतेलावरील आयात शुल्क वाढवल्यानंतर सर्वच प्रकारच्या खाद्यतेलाच्या दरात वाढ झाली होती. त्यामुळे स्थानिक बाजारात ग्राहकांना चढ्या दराने खाद्यतेलाची खरेदी करावी लागत होती. यामध्ये विशेषत: खोबरेल तेलाच्या दर २२० रुपयांवरुन २८० रुपये झाला होता. तर शेंगतेल व सरकी तेलाच्या दरात अनुक्रमे पाच व तीन रुपयांची वाढ झाली होती. वनस्पती तुपाचा दर ११० रुपये झाला होता. आठवड्यात मात्र खोबरेल तेलाचा दर २८० रुपयांवरुन २४० ते २६० रुपयांपर्यंत कमी झाला. तर सरकी तेल ९० रुपयांवरुन ८८ रुपये होऊन दोन रुपयांनी दर कमी झाला. शेंगतेलाचा दर मात्र १३० रुपयांवर स्थिर राहिला.

घाऊक बाजारात साखरेच्या दरात क्विंटलमागे शंभर ते १५० रुपयांची वाढ झाल्यानंतर त्याचा परिणाम किरकोळ बाजारावर झाला आहे. त्यामुळे ३४ रुपये किलोवरुन साखरेच्या दरात दोन रुपयांची वाढ झाल्याने ३६ रुपये झाला आहे. तर गुळाचे दर पाच रुपयाने कमी आहे. यामुळे ४५ रुपयांवरून गुळाचा दर ४० रुपयांपर्यंत कमी झाला आहे. जून महिन्यापासून भाजीपाल्याची आवक कमी होऊ लागली, असल्याने दर वाढू लागले आहेत. त्यामुळे भाजीपाल्यापेक्षा ग्राहक कडधान्य खरेदीला अधिक प्राधान्य देत आहेत. मागणी वाढली असली, तरी कडधान्याचे दर स्थिर राहिले आहेत.

किराणा दर (किलोमध्ये)

पोहे : ४४ रु.

साखर : ३६ रु.

शेंगदाणा : ७५ रु.

मैदा : २८ रु.

रवा : २८ रु.

आटा : ३० रु.

गूळ : ४० रू.

शाबू : ५५ रु.

तीळ : १४० रु.

.................

डाळीचे दर (किलोमध्ये)

तूरडाळ : ६६ रु.

मूगडाळ : ७५ रु.

उडीदडाळ : ६५ रु.

हरभराडाळ : ५० रु.

मसूरडाळ : ६० रु.

मूग : ७० रु.

मसूर : ६० रु.

चवळी : ८० ते १०० रु.

हिरवा वाटाणा : ४० ते ६० रु.

काळा वाटाणा : ७२ ते ८० रु.

मटकी : ८० रु.

छोले : १४० रु.

पावटा : १२० रु.

.................

तेलाचे दर (किलोमध्ये)

शेंगतेल : १३० रु.

सरकीतेल : ८८ रु.

खोबरेलतेल : २४० ते २६० रु.

वनस्पती तूप : ९० ते ११० रु.

.....................

बार्शी शाळू : ३५ ते ३६ रु.

ज्वारी नं. १ : २८ ते ३० रु.

ज्वारी नं. २ : २४ ते २६ रु.

बाजरी : १७ ते २४ रु.

म. टा. प्रतिनिधी, कोल्हापूर

दसरा चौक ते सीपीआर चौक या मार्गावर उलट्या दिशेने भरधाव वेगात जाणारी दुचाकी अडवल्याच्या रागातून मद्यधुंद अवस्थेतील दोन तरुणांनी वाहतूक पोलिसांना शिवीगाळ करीत धक्काबुक्की केली. हा प्रकार शनिवारी (ता. २३) संध्याकाळी सीपीआर चौकात घडला. अशोक रामसिंग मंडल (वय २६, रा. मोरे चाळ, उचगाव, ता. करवीर) आणि अनिल गंगाराम हिरवे (२८, रा. पुलाची शिरोली, ता. हातकणंगले) या दोघांना अटक केली.

घटनास्थळावरून मिळालेल्या माहितीनुसार, अशोक मंडल आणि अनिल हिरवे हे दोघे शनिवारी संध्याकाळी साडेसहाच्या सुमारास दुचाकीवरून दसरा चौकातून सीपीआर चौकाकडे उलट्या दिशेने जात होते. यावेळे सीपीआर चौकातील वाहतूक पोलिसांनी दुचाकी अडवली. दुचाकी अडवल्याच्या रागातून असोक मंडल याने पोलिसांना शिवीगाळ सुरू केली. पोलिसांनी दुचाकीची चावी काढून घेतल्याने संतापलेल्या दोघांनी वाटेतच आडवी दुचाकी लावून गोंधळ घातला. यावेळी त्यांनी वाहतूक पोलिस सुरेश शामराव पाटील आणि रघुनाथ गुंडाप्पा माने यांना धक्काबुक्कीही केली. पोलिसांनी या घटनेची माहिती लक्ष्मीपुरी पोलिसांना कळवली. काही वेळातच आलेल्या पोलिसांनी मंडल आणि हिरवे या दोघांनाही ताब्यात घेतले. मद्यधुंद अवस्थेतील दोघांची सीपीआरमध्ये वैद्यकीय तपासणी करण्यात आली. याबाबत लक्ष्मीपुरी पोलिस ठाण्यात गुन्हा दाखल करण्याचे काम रात्री उशिरापर्यंत सुरू होते. यातील मंडल याच्यावर गोकुळ शिरगाव आणि शिरोली एमआयडीसी पोलिस ठाण्यात गुन्हे दाखल आहेत.

म. टा. प्रतिनिधी, कोल्हापूर

सार्वजनिक बांधकाम विभागाच्या संकल्प चित्र मंडळाने पर्याय पुलाच्या बांधकामाचे नवीन डिझाईन बनवले आहे. सोमवारी (ता.२५) पिलरचे डिझाईन राष्ट्रीय महामार्ग विभागाला मिळणार आहे. त्यानंतर मंगळवारपासून पिलरच्या उभारणीला सुरुवात होणार असल्याचे राष्ट्रीय महामार्ग विभागाने स्पष्ट केले. चाळीस फूट खोदाई करुनही पाया न लागल्याने खडक व मातीचे नमुने, विहिरीची खोली याचा अभ्यास करुन मंडळाने नवे डिझाईन बनवले आहे.

पर्यायी पुलासाठी शेवटचा पिलर उभारण्यासाठी गेले दोन आठवडे खोदाई करण्यात येत होती. कठीण खडक लागेपर्यंत खोदाई करण्यासाठी अत्याधुनिक यंत्रसामग्री आणली होती. ७० फूट खोदाई केल्यानंतरही पाया लागला नाही. त्यामुळे खोदाई थांबवण्यात आली. दरम्यान, कठीण खडक लागला नाही तर अन्य पर्याय म्हणून खोदाई केलेल्या परिसरातील दगड, मातीची तपासणी करण्यात आली. गेले दोन दिवस राष्ट्रीय महामार्ग विभागाचे मुख्य अभियंता आर. पी. निघोर, कोल्हापूर विभाागाचे कार्यकारी अभियंता विजय कांडगावे यांनी संकल्प चित्र मंडळ ब्रिजेसचे कार्यकारी अभियंता भोंगे यांच्याशी चर्चा केली. शनिवारी सकाळी कार्यकारी अभियंता कांडगावे, उपअभियंता संपत आबदार यांनी पुलाच्या बांधकामाच्या ठिकाणी भेट देऊन पुन्हा चर्चा केली. त्यानंतर राष्ट्रीय संकल्प चित्र मंडळाने पिलरचे डिझाईन बनवले.

संकल्प चित्र मंडळाकडून सोमवारी पुलाच्या नवीन आराखड्याचे अंतिम डिझाईन मिळणार आहे. त्यानंतर मंगळवारी पिलरची उभारणीच्या कामाला सुरुवात होणार आहे. सोमवारी बांधकामाच्या ठिकाणी सळी, दहा ब्रास खडी आणण्यात येणार असल्याचे ठेकेदार एन.डी. लाड यांनी सांगितले. गेल्या आठवड्यात, १६ जूनला संकल्प चित्र मंडळाकडून पर्यायी पुलाची पाहणी केली होती. परिसरातील खडक व मातीचे नमुने, विहिरीची खोली याचा अभ्यास करुन आठवड्याने डिझाईन तयार करण्यात आले आहे. पाया लागला नसला तरी अत्याधुनिक तंत्राचा वापर करुन पिलर बांधण्यात येणार आहे. पावसाळ्यात पिलरची उभारणी करण्यात येणार असून, त्यानंतर दोन्ही पिलरवर ४० मीटरचा स्लॅब टाकण्यात येणार आहे. सप्टेंबरअखेरीस पिलर उभारणीचे काम पूर्ण होणार आहे. त्यानंतर ऑक्टोबरच्या पहिल्या किंवा दुसऱ्या आठवड्यात स्लॅब टाकण्याच्या कामास सुरुवात होण्याची शक्यता ठेकेदाराने व्यक्त केली.

हॉस्पिटल्सना आवाहन

शहरातील सुमारे ३३ भागात डेंगीची तीव्रता आढळली आहे. महापाालिकेने या भागावर लक्ष केंद्रित केले आहे. जवाहरनगर सरनाईक वसाहत येथे मोठ्या संख्येने डेंगी सदृश रुग्ण आढळल्यामुळे त्याची तीव्रता प्रशासनाच्या लक्षात आली. दरम्यान शहरातील खासगी हॉस्पिटलमध्ये उपचार घेणाऱ्या रुग्णांची महापालिकेच्या आरोग्य विभागाकडे नोंदणी होत नसल्याचे निदर्शनास आल्यानंतर प्रशासनाने कडक भूमिका घेतली. संबंधित रुग्णांची माहिती महापालिकेला कळविण्याचे आदेश खासगी हॉस्पिटल्सना दिले आहेत.

मंगळवारपर्यंत मोहीम सुरू राहणार

महापालिकेमार्फत २० जूनपासून डेंगी प्रतिबंधात्मक मोहिम हाती घेण्यात आली. अतिरिक्त आयुक्त, उपायुक्त, आरोग्य अधिकारी आणि मुख्य आरोग्य निरीक्षक यांच्यावर शहरातील विविध भागांची जबाबदारी सोपविली आहे. २६ जूनपर्यंत ही प्रतिबंधात्मक मोहिम सुरु राहणार आहे. यामध्ये घरोघरी सर्व्हेक्षणासह खरमाती उठाव, डबकी बंदिस्त करण्यात येत आहेत. तीन कुटुंबावर दंडात्मक कारवाई केली आहे. सर्व्हेक्षणाचा अहवाल रोज वरिष्ठ अधिकाऱ्यांना सादर करण्याच्या सूचना आहेत.

महापालिकेने प्लास्टिकबंदीवरुन कारवाई सुरू केल्यानंतर सायंकाळी किराणा दुकानदार, कापड व्यापारी, फरसाणा विक्रेते, चिरमुरे विक्रेत्यांची सर्किट हाऊस येथे बैठक झाली. रिसायकल होणाऱ्या प्लास्टिक पिशव्यांच्या वापराला परवानगी मिळावी. महापालिकेने रिसायलकल प्लँटसाठी जागा द्यावी, अशा मागण्या मांडल्या. तसेच त्यांनी महापालिकेच्या कारवाईसंदर्भात आमदार राजेश क्षीरसागर यांच्याकडे तक्रारी केल्या. दरम्यान आमदार क्षीरसागरांनी प्लास्टिक बंदीसंदर्भात बुधवारी मुख्यमंत्र्यासोबत बैठक होणार आहे. त्यामध्ये तुमच्या व्यथा मांडू अशी ग्वाही दिली.

म. टा. प्रतिनिधी, कोल्हापूर

सांगली विलिंग्डन कॉलेज येथील निसर्ग अभ्यासक व जंगल साहित्याचे संशोधक प्रा. डॉ. राजेंद्र पोंदे यांना पोर्तुगाल येथील लिस्बन येथील विद्यापीठाने स्पिकर रिसोस पर्सन म्हणून आमंत्रित केले आहे. लिस्बन येथे २७ ते ३० जून या कालावधीत साहित्य परिषदेत 'एनव्हायर्नमेंटल इमॅजिनेशन इन द शॉर्ट स्टोरी' या विषयावरील चर्चासत्रात डॉ. पोंदे प्रसिद्ध शिकारी व लेखक जिम कार्बेट यांच्या 'माय इंडिया' पुस्तकावर व्याख्यान देणार आहेत. डॉ. पोंदे यांनी जंगल कथा, शिकारी कथा व वन्यजीवनावरील साहित्यावर संशोधन केले आहे. त्यांची तीन पुस्तके प्रकाशित झाली आहेत. तसेच अनेक शोधनिबंध राष्ट्रीय व आंतरराष्ट्रीय जर्नल्समध्ये प्रकाशित झाले आहेत. ते जिम कार्बेट फाऊंडेशन, कॅनडा येथील एडमंटन व केनेथ अँडरसन नेचर कॉन्झरर्वेशन सोसायटी या संस्थेत कार्यरत आहेत. तसेच दि असोसिएशन फॉर एनव्हायर्नमेंट अँड लिटरेचर (अमेरिका) या संस्थेचे सदस्य आहेत. पोंदे यांना डेक्कन एज्युकेशन सोसायटीचे अध्यक्ष श्रीमंत शाहू छत्रपती, व्यवस्थापन समिती अध्यक्ष किशोर पंडित, प्रा. शरद कुंटे, प्राचार्य डॉ. बी.व्ही. ताम्हणकर यांचे प्रोत्साहन लाभले.

म. टा. प्रतिनिधी, कोल्हापूर

कोल्हापुरात प्लास्टिकबंदी निर्णयाच्या अंमलबजावणीसाठी महापालिकेची यंत्रणा सक्रीय झाली असून, पहिल्याच दिवशी नऊ व्यावसायिकांवर कारवाईसाठी छापे मारले. महापालिकेच्या आरोग्य विभागाच्या पथकांनी शहरातील विविध भागांत तपासणी केली. प्लास्टिक पिशव्यांचा वापर करताना सापडल्याप्रकरणी नऊ व्यावसायिकांवर कारवाई करण्यात आली. त्यांच्याकडून प्रत्येकी पाच हजारांचा दंड वसूल करण्यात आला. नऊ ठिकाणी करण्यात आलेल्या कारवाईतून ४५ हजाराचा दंड वसूल करण्यात आला. दरम्यान, या कारवाईदरम्यान दुकानदार आणि पथकातील अधिकाऱ्यांत काही ठिकाणी वादावादी झाली. पथकाने दंडात्मक कारवाई करताना सुमारे ५०० किलो प्लास्टिक पिशव्या जप्त केल्या. कारवाईत बेकरी व्यावसायिक, धान्य व्यापारी आणि किराणा दुकानदारांचा समावेश आहे.

रंकाळा बस स्थानकाजवळच्या केदारलिंग बेकरी, न्यू शाहूपुरीतील जोधपूर स्वीटस, कोल्हापूर चिकन सेंटर, लक्ष्मीपुरीतील किराणा दुकानदार कोरडे जनरल स्टोअर्स, लक्ष्मीपुरी धान्य बाजार येथील दादोबा तातोबा नष्टे अँड कंपनी, योगेश आनंदराव केसरकर, दीपक स्टोअर्स, अवतार ट्रेडर्स, मुकेश असरानी यांच्यावर कारवाई करण्यात आली. प्लास्टिक बंदीवरील कारवाईसाठी महापालिकेने चार पथकांची स्थापना केली आहे.

प्रशासनाकडून दुपारी तीननंतर प्लास्टिकबंदीची अंमलबजावणी सुरू करण्यात आली. रंकाळा बसस्थानक परिसर, महाद्वार रोड, लक्ष्मीपुरी, न्यू शाहूपूरी आणि राजारामपुरी भागात कारवाई करण्यात आली. लक्ष्मीपुरी येथे सायंकाळी कारवाई सुरु असताना काही दुकानदारांनी त्याला आक्षेप घेतला. ५० मायक्रॉनपेक्षा कमी जाडीच्या पिशव्यावर बंदी असल्याचे कारण सांगत काही दुकानदारांनी कारवाईत अडथळे आणण्याचा प्रयत्न केला. मात्र महापालिका अधिकाऱ्यांनी राज्य सरकार व हायकोर्टाच्या निर्णयाकडे लक्ष वेधत मोहीम राबवली. दरम्यान 'आरोग्य विभागातर्फे सध्या कोल्हापुरात डेंगी प्रतिबंधात्मक मोहीम सुरु आहे. २६ जूनपर्यंत मोहीम चालणार आहे. सोमवारी, ता.२५ पासून प्लास्टिकबंदीवरील कारवाई आणखी तीव्र केली जाईल,' असे आयुक्त अभिजित चौधरी यांनी सांगितले.

दरम्यान, प्लास्टिकबंदीचा सर्वाधिक फटका किराणा दुकानदारांना बसत आहे. वास्तविक, ५० मायक्रॉनपेक्षा कमी जाडीच्या पिशव्यावर बंदी असताना सरसकट कारवाई कशी सुरु आहे, असा सवाल करत कारवाईविरोधात आंदोलन करु, प्रसंगी कोल्हापूर बंदची हाक देऊ, असा इशारा किरकोळ दुकानदार असोसिएशनचे अध्यक्ष सुशील कोरडे यांनी दिला.

........

राज्य सरकार व हायकोर्टाच्या आदेशानुसार प्लास्टिकबंदी सुरु आहे. व्यापाऱ्यांना यापूर्वी प्लास्टिक पिशव्यांबाबत सूचना केल्या होत्या. मात्र कोर्टाचा आदेश डावलून प्लास्टिकचा वापर होत असल्यास नियमानुसार कारवाई केली जाईल. कारवाईदरम्यान वादावादीचे प्रसंग उद्भवत आहेत. यामुळे पोलिस बंदोबस्त मिळावा, यासाठी आयुक्तांकडे प्रस्ताव देणार आहोत.

तानाजी पाडळकर, विभागीय आरोग्य निरीक्षक

..............

म. टा. प्रतिनिधी, कोल्हापूर

'मराठा समाजाला शिक्षण आणि नोकरीत आरक्षण मिळण्यासाठी शाहू जयंतीदिवशी (ता. २६) मराठा समाजाची राज्यस्तरीय संघटना स्थापन केली जाणार आहे. शाहू स्मारक भवनात सकाळी दहा वाजता नव्या संघटनेची घोषणा, ध्येय, धोरण आणि आंदोलनाची पुढील दिशा ठरविली जाणार आहे,' ही माहिती मराठा आरक्षण संघर्ष समितीचे अध्यक्ष सुरेश पाटील यांनी पत्रकार परिषदेत दिली.

अध्यक्ष पाटील म्हणाले, 'मराठा समाजाला शिक्षण आणि नोकरीत आरक्षण मिळावे, यासाठी राज्यभर लाखोंच्या उपस्थितीत मोर्च काढले. मात्र सरकारकडून आजअखेर आश्वासनच मिळालेले आहे. त्यामुळे मराठा समाजाचे नेतृत्व करणाऱ्या संघटनांत असंतोष निर्माण झाला आहे. सरकारने समाजाच्या सवलतीसाठी वेगवेगळी सात परिपत्रके काढली, मात्र त्याचा फारसा फायदा झालेला नाही. त्यामुळे मराठ्यांच्या न्याय हक्कांसाठी राज्यस्तरीय संघटना स्थापन करण्याचा निर्णय घेतला. नव्याने स्थापन होत असलेल्या संघटनेत २५ हून अधिक संघटनाचा समा‌वेश आहे. या संघटना समाजासाठी गेली पंचवीस वर्षे लढा देत आहेत. यामध्ये छावा मराठा कृती समितीचे अध्यक्ष प्रा. चंद्रकांत भराट ( औरंगाबाद), भारतीय मराठा संघाचे अध्यक्ष अविनाश पवार (ठाणे), मराठा आरक्षण संघर्ष समितीचे कोकण विभागीय अध्यक्ष विलास सावंत (रायगड), भारतीय मराठा सेवा ट्रस्टचे अध्यक्ष किशोर देसाई (कल्याण), मराठा आरक्षण संघर्ष समितीचे मुंबईचे अध्यक्ष गोपाळ दळवी, मराठा विद्यार्थी सेनेचे पश्चिम महाराष्ट्र अध्यक्ष प्रा. मधुकर पाटील, राजमाता जिजाऊ ब्रिगेडचे संस्थापक चंद्रकांत पाटील, मराठा विकास संघटनेचे भरत पाटील, राजमाता जिजाऊ महिला ब्रिगेडच्या सुनीता पाटील, मराठा स्वराज्य संघाचे महादेव साळुंखे (सांगली), छावा संघटनेचे राजू सावंत, मराठा रियासतचे फत्तेसिंग सावंत, मराठा संघटनेचे बाळ घाटगे आदी संघटना एकत्रित येणार आहेत. या वेळी परेश भोसले, बंटी पाटील, संजय आरेकर, प्रा. मधुकर पाटील, संतोष कांदेकर आदी उपस्थित होते.

म. टा. प्रतिनिधी, कोल्हापूर

केंद्र सरकारच्या 'स्वच्छ भारत अभियान'अंतर्गत २०१८मध्ये राबविलेल्या स्वच्छ सर्वेक्षणात कोल्हापूरचे पुढचे पाऊल पडले. एक लाखाहून अधिक लोकसंख्या असलेल्या शहरांच्या (अमृत शहरे) यादीत कोल्हापूरने ७४ वा क्रमांक पटकावला. गेल्यावर्षीच्या तुलनेत शहराने यावर्षी स्वच्छतेच्या बाबतीतील कामगिरीत सुधारणा केल्याचे निकालावरुन स्पष्ट झाले. गेल्यावर्षी कोल्हापूरचा क्रमांक १७७ होता.

विभागस्तरीय पुरस्कारांवरही महाराष्ट्राने छाप सोडली आहे. विभागस्तरीय तीन पुरस्कारांवर राज्याने नाव कोरले आहे. यामध्ये सातारा जिल्ह्यातील पाचगणी शहराला पश्चिम विभागातील सर्वोत्कृष्ट स्वच्छ शहराचा तर, नागरिक प्रतिसादाबाबतचा पुरस्कार अमरावती जिल्ह्यातील शेंदुर्जना घाट या शहराला आणि पुणे जिल्ह्यातील सासवड या शहराला नाविन्यपूर्ण व उत्कृष्ट कार्यशैलीचा पुरस्कार जाहीर झाला आहे.

राज्यातील २८ शहरांनी शंभर क्रमांकामध्ये स्थान पटकाविले आहे. विशेष म्हणजे या स्पर्धेत राज्याची कामगिरी गेल्या वर्षापेक्षा सरस ठरली आहे. यंदा राज्यातील सर्वाधिक शहरे झळकली आहेत. अभियानांतर्गत कोल्हापूर महापालिकेने गेल्या वर्षभरात वैयक्तिक शौचालय बांधणीसाठी अनुदान, झोपडपट्टी परिसरात व्यक्तीगत शौचालय उभारणी केली. स्वच्छतेच्या कामात नागरिकांचा सहभाग वाढावा, म्हणून महापालिकेने 'स्वच्छ भारत अॅप'सुरू केले. अॅपच्या माध्यमातून नागरिकांच्या तक्रारींची सोडवणुकीला प्राधान्य दिले. महापालिकेने शहराच्या प्रत्येक भागात कचरा उठावासाठी घंटागाडी योजना सुरू केली. दैनंदिन कचरा उठावाचे नियोजन, स्वच्छतेसाठी नागरिकांचा सहभाग या जमेच्या बाजू ठरल्या आहेत. केंद्र सरकारच्या पथकाने फेब्रुवारी २००८ मध्ये कोल्हापुरात स्वच्छतेच्या कामाची पाहणी केली होती. या अभियानात इचलकरंजीचा ८० वा क्रमांक आला आहे.

महापालिकेने केलेल्या उपाययोजना

स्वच्छ भारत अॅपच्या माध्यमातून नागरिकांच्या तक्रारींची सोडवणूक

कचरा संकलनासाठी घंटागाडी, दैनंदिन कचरा उठावासाठी वाहने

सार्वजनिक शौचालयांची दुरुस्ती, वैयक्तिक शौचालय बांधणीला अनुदान

बायोगॅस प्लँट कार्यान्वित, कचऱ्यापासून वीजनिर्मिती प्रस्तावित

.......

स्वच्छ भारत अभियानांतर्गत कचरा उठाव, नागरिकांसाठी स्वच्छता अॅप सुरु केले. त्या माध्यमातून प्रश्नांची सोडवणूक केली. नागरिकांनीही प्रतिसाद दिल्यामुळे स्वच्छतेविषयक कामाला गती मिळाली. यामुळे स्वच्छतेत कोल्हापूरचा क्रमांक उंचावला. नागरिकांच्या सहभागातून भविष्यातही भरीव योजना आखल्या जातील.

डॉ. अभिजित चौधरी, आयुक्त महापालिका

.....

कोल्हापूर : आर्ट ऑफ लिव्हिंग संस्थेतर्फे २६ ते ३० जून या कालावधीत 'हेल्थ हॅपिनेस प्रोग्रॅम' आयोजित केला आहे. गर्व्हन्मेंट पॉलिटेक्निकच्या ग्रंथालयात सकाळी सहा ते नऊ किंवा सायंकाळी सहा ते नऊ या वेळेत शिबिर होणार आहे. यामध्ये ताणतणावातून मुक्ती, मन:शांती, योगासन, प्राणायाम, ध्यान, सूदर्शन क्रियेची प्रात्याक्षिके सादर केली जाणार आहेत. डॉ. अनिमा दहिभाते मोफत मार्गदर्शन करणार आहे. शिबिराचा लाभ घेण्याचे आवाहन संयोजकांनी केले आहे.

कोल्हापूर : वंचित बहुजन आघाडी या मोहिमेतंर्गत भारिप बहुजन महासंघाचे संस्थापक अध्यक्ष अॅड. प्रकाश आंबेडकर बुधवारी (ता. २७) नागरिकांशी संवाद साधणार आहेत. शाहू स्मारक भवनात सकाळी अकरा वाजता हा कार्यक्रम होत असून वंचित घटकांच्या समस्या जाणून घेणार आहेत. या समस्या सोडविण्यासाठी प्रयत्न केले जाणार आहेत. तरी कार्यक्रमाला यावे असे आवाहन भारिपचे शहराध्यक्ष संजय गुदगे यांनी केले आहे.

म. टा. प्रतिनिधी, कोल्हापूर

सीटू प्रणित आशा वर्कर्स आणि गट प्रवर्तक महिला संघटनेने बोलाविलेल्या अधिवेशनातच फूट पडली. स्थानिक नेतृत्वाविरोधात महिलांनी बंड पुकारून वेगळी चूल मांडली. महिलांना कोणत्याही निर्णय प्रक्रियेत न घेता पदाधिकाऱ्यांनी निर्णय घेतले आहे. या धोरणाच्या विरोधात बंड करून आशा वर्कर्स आणि गट प्रवर्तकांनी स्वतंत्र कार्यकारिणी जाहीर करण्याचा निर्णय घेतला. शाहू स्मारक भवनात शनिवारी अधिवेशन झाले.

सीटूचे कोल्हापूर विभागाचे पदाधिकारी प्रा. सुभाष जाधव, भरमा कांबळे, पद्मा कांबळे, सुभाष निकम, आबासाहेब चौगुले, शिवाजी मगदूम यांच्या नेतृत्वाखाली अधिवेशनाची सुरुवात झाली. पहिल्या दहा मिनिटांतच संघटनेच्या अध्यक्ष नेत्रदीपा पाटील यांनी अधिवेशनात सुरू असलेल्या विषयांना विरोध केला. स्थानिक नेते आशा वर्कर्स, गट प्रवर्तकांना विचारात घेत नाहीत. कोणत्याही मागण्यांचा पाठपुरावा केलेला नाही. सीटूचा कारभार पारदर्शी नसून अधिवेशनात हिशेब दिला नसल्याचा आरोप महिला सदस्यांनी केला. त्या वेळी पदाधिकारी आणि महिलांत गोंधळ निर्माण झाला. सुमारे अर्धा तास हा प्रकार सुरू राहिला. त्या वेळी पदाधिकाऱ्यांनी या सर्व प्रश्नांना येत्या काही दिवसांत उत्तरे दिली जातील, असे सांगितले. त्यावेळी अधिवेशनाताच सर्वच निर्णय घेतले पाहिजेत, असा आग्रह महिलांनी धरला. त्यावेळी महिलांनी स्वतंत्रपणे अधिवेशन घेतले. हात उंचावून मतदान घेण्यात आले. स्थानिक नेत्यांना कडाडून विरोध करून नवीन कार्यकारिणी स्थापन करण्याचा एकमुखी निर्णय घेण्यात आला. नव्या कार्यकारिणीत स्थानिक नेत्यांचा समावेश न करण्याच्या सूचना महिलांनी मांडल्या. या सूचनांची दखल घेऊन नव्या कार्यकारिणी स्थानिक नेत्यांना वगळण्यात आले. या गोंधळात सीटूचे निरीक्षक चंद्रकांत यादव आणि भरमा कांबळे यांनी महिलांची समजूत काढण्याचा प्रयत्न केला. मात्र महिला निर्णयावर ठाम राहिल्या.

पदाधिकाऱ्यांनी डावलून घेतलेले अधिवेशन लोकशाहीला घातक आहे. या प्रकाराचा अहवाल वरिष्ठांना दिला जाणार आहे.

चंद्रकांत यादव, निरीक्षक ( सिटू)

२२०० कुटुंबांचे सर्व्हेक्षण; वीस इमारत मालकांना नोटीसा

म. टा. प्रतिनिधी, कोल्हापूर

शहरामध्ये डेंगीची तीव्रता वाढतच असून शनिवारी २६३ घरामध्ये डासांच्या अळया सापडल्या आहेत. महापालिकेच्या आरोग्य विभागातर्फे सुरू असलेल्या डेंगी प्रतिबंधात्मक मोहिमेंतर्गत शहराच्या विविध भागात सर्व्हेक्षण करण्यात आले. ज्या इमारतीमध्ये बऱ्याच दिवसांपासून पाणी साचले आहे, अशा वीस इमारत मालकांना नोटीस बजावली आहे. दरम्यान डेंगीविषयी नागरिकांत जनजागृती करण्यासाठी शहर परिसरात २५० ठिकाणी प्रबोधन फलक लावले.

ताराबाई पार्क, सिद्धार्थनगर, टेंबलाईवाडी, उचगाव नाका, जुना वाशी नाका, रविवार पेठ लक्ष्मीपुरी अशा विविध भागात सर्वेक्षण झाले. महापालिकेच्या सर्वसाधारण व स्थायी समिती सभेत 'डेंगी'वरुन प्रशासनाला धारेवर धरल्यानंतर यंत्रणा गतीमान बनली. डेंगीला आळा घालण्यासाठी प्रशासन वेगवेगळ्या पातळीवर प्रयत्नशील आहे. अधिकाऱ्यांवर वॉर्डनिहाय जबाबदारी सोपवली आहे. महापालिकेचा आरोग्य विभाग, पवडी विभाग, नागरी कुटुंब कल्याण केंद्रामार्फत संयुक्त सर्व्हे सुरू आहे. २६ जूनपर्यंत ही मोहीम राबविण्यात येणार आहे. या मोहिमेत १७५ हून अधिक कर्मचाऱ्यांचा समावेश आहे.

महापालिकेच्या यंत्रणेने शनिवारी सकाळी सात ते दुपारी दोन या वेळेत ताराबाई पार्कमधील ४९०, सिद्धार्थनगरमधील ४३६, टेंबलाइवाडी उचगाव नाका परिसरातील ४२०, जुना वाशा नाका येथील ४२४, लक्ष्मीपुरीमधील ४३० घरांचा सर्व्हे झाला. जुना वाशा नाका परिसरातील ८७ घरामध्ये साचलेल्या पाण्यात डासांच्या अळ्या सापडल्या आहेत. रविवार पेठेत ३४ ठिकाणी तर टेंबलाइवाडी येथे १७ ठिकाणी अळ्या आढळल्या. घरोघरी सर्व्हे, प्रतिबंधात्मक उपाय योजताना प्रभागातील खरमाती उठाव, डबकी बंदिस्त करण्यात येत आहे. सोळा ठिकाणच्या खरमातीचा उठाव झाला. रविवारीही डेंगी प्रतिबंधात्मक मोहीम सुरू राहणार आहे.

म. टा. प्रतिनिधी, कोल्हापूर

शेती, उद्योग, शिक्षणाबरोबर राजर्षी शाहू महाराजांनी व्यापार क्षेत्रात आपल्या कार्यकर्तृत्वाचा वेगळा ठसा उमटवला. शाहू महाराजांनी शाहूपुरी व्यापार पेठ स्थापन करण्याचा निर्णय घेऊन येथील व्यापाराला चालना दिली. १८९५ मध्ये घेतलेल्या या ऐतिहासिक निर्णयामुळे कोल्हापूर जिल्ह्यातील अनेक वस्तू जगभरात निर्यात होत असून, कोट्यवधी रुपयांची उलाढाल होत आहे. त्याचा जिल्ह्याच्या अर्थकारणावर चांगलाच परिणाम दिसून येत आहे.

संस्थानकाळात कोल्हापुरात उत्पादित होणारा गूळ कोकणमार्गे मुंबईमध्ये पाठवला जात होता. प्रामुख्याने राजापूर बंदरावरून गूळ मुंबई शहरात येत असल्याने राजापुरी किंवा कोकणी गूळ म्हणून ओळख निर्माण झाली होती. येथे उत्पादित होणाऱ्या गुळाची ओळख कोल्हापुरी गूळ म्हणून मिळावी यासाठी शाहू महाराजांनी शाहूपुरीत व्यापार पेठेची १८९५ मध्ये स्थापना केली. तत्पूर्वी शाहू महाराजांनी कोल्हापुरात इतर वस्तूंची आवक वाढविण्यासाठी इतर संस्थांना पत्रे पाठवली होती. गुळाच्या व्यापारपेठेची केवळ स्थापना न करता संस्थानाबाहेरील व्यापाऱ्यांना येथे व्यापार करण्यासाठी निमंत्रित केले होते. शाहू महाराजांच्या विनंतीला मान देऊन त्यावेळी अनेक व्यापाऱ्यांनी कोल्हापुरात व्यापार सुरू केला. गुळाची स्वतंत्र व्यापारपेठ निर्माण झाल्यानंतर 'कोल्हापुरी गूळ' असा ब्रँड तयार झाला. व्यापारपेठेची स्थापना न करता, शेतकऱ्यांना विविध सुविधा देत नगदी पिके घेण्यास प्रोत्साहन दिले. त्यासाठी धरण, सहकारी संस्था स्थापन करण्यास प्रोत्साहन दिले. त्यामुळे गुळासोबत इतर अन्नधान्यांच्या माध्यमातून व्यापाराला अधिक चालना मिळाली. त्यानंतर रेल्वेसारखी वाहतूक व्यवस्था सुरू झाल्याने व्यापार अधिक वाढतच गेला.

व्यापाऱ्यांच्या वाढत्या संख्येमुळे स्वातंत्र्यानंतर शाहूपुरीतून गुळाची व्यापारपेठ सध्याच्या शाहू मार्केट यार्डमध्ये स्थलांतर करण्यात आली. तत्कालीन जिल्हाधिकारी राम प्रधान आणि तात्यासाहेब मोहिते यांनी यासाठी पुढाकार घेतला. व्यापाऱ्यांचा विरोध मोडीत काढत नव्या जागेत गुळाच्या व्यापाराला सुरुवात झाली. त्यानंतर अस्तित्वात आलेल्या शेती उत्पन्न बाजार समितीमुळे हा व्यापार अधिकच वाढत गेला. त्यातून जिल्ह्याची संपूर्ण अर्थव्यवस्थाच बदलून गेली. जिल्ह्याच्या अर्थकारणात झालेला बदल हा राजर्षी शाहू महाराजांनी घेतलेल्या निर्णयामुळेच झाल्यानेच सद्य:स्थितीला कोल्हापूरचा गूळ दुबईपर्यंत पोहोचला आहे.

कोल्हापूर शेती उत्पन्न बाजार समितीमधून दरवर्षी गूळ खरेदी-विक्रीतून सुमारे २५० कोटींची उलाढाल होत असली, तरी भाजीपाला, कांदा-बटाटा व इतर कृषिमालाच्या खरेदी-विक्रीतून येथील व्यापार अधिक भरभराटीस आला. इतर राज्य व जिल्ह्यांतून येणारा कांदा-बटाटा, कडधान्याचा कोकणसह दक्षिणेकडील राज्यांना पुरवठा केला जातो. त्याचप्रमाणे इतर राज्यांतून अनेक कृषी उत्पादने येथील बाजार समितीमध्ये येत आहेत. यामधून दरवर्षी कोट्यवधींची उलाढाल होत असून अनेकांच्या हाताला रोजगार मिळाला आहे. त्यामुळे जिल्ह्यातील अर्थकारण अधिक मजबूत होऊन जिल्ह्याच्या विकासाला चालना मिळत आहे. याचे सर्वस्वी श्रेय सध्याच्या राजकीय लोकप्रतिनिधींपेक्षा राजर्षी शाहू महाराजांचे आहे.

सिंगल फोटो..

म. टा. वृत्तसेवा, कुडित्रे

आमशी (ता. करवीर) येथील शेतकऱ्याचा चारा कटरचा शॉक लागून एकाचा मृत्यू झाला. प्रकाश निवृत्ती पाटील (वय ३८) असे मृत शेतकऱ्याचे नाव आहे. शनिवारी दुपारी चारच्या सुमारास ही घटना घडली. घटनेची नोंद करवीर पोलिस ठाण्यात झाली आहे.

याबाबत माहिती अशी : प्रकाश पाटील दुपारी दोनच्या सुमारास जनावरांना वैरण आणण्यासाठी शेतात गेले होते. त्यानंतर चारच्या सुमारास ते वैरण घेऊन घरी परतले. घरी आल्यानंतर शेजारीच असलेल्या जनावरांच्या गोठ्यात चारा कट करण्यासाठी कटर मशिन सुरू केले. वैरण कट करत असताना कटर मशीनमध्ये शॉर्टrसर्किट होऊन त्यांना विजेचा तीव्र झटका बसल्याने त्यांचा जागीच मृत्यू झाला. प्रकाश पाटील हे आमशी ग्रामपंचायतीचे माजी उपसरपंच होते. त्यांच्या पाश्चात पत्नी, मुलगा, मुलगी, आई,भाऊ असा परिवार आहे.

००००

कोल्हापूर : हरे माधव परमार्थ सत्संग समितीतर्फे रविवारी (ता. २४) 'हरे माधव सत्संग सोहळा' आयोजित केला आहे. गांधीनगरातील चिंचवड वळीवडे रोडवरील हरे माधव सत्संग भवनात सायंकाळी सहा वाजता आणि मंगळवारी (ता. २६) सांगली येथील शामरावनगर सिंधू सांस्कृतिक भवनात सायंकाळी सहा वाजता हा सोहळा होईल. कार्यक्रमाचा लाभ घेण्याचे आवाहन समितीच्या माधवनगर कटनीच्या कोल्हापूर शाखेने केले आहे.

फोटो आहे

म. टा. प्रतिनिधी, कोल्हापूर

'मनाची एकाग्रता अतिशय महत्त्वाची आहे. मन एकाग्र झाल्यास रागावर सहजपणे नियंत्रण मिळविता येते. त्यासाठी ध्यान धारणा, योग महत्वाचा आहे.' असे प्रतिपादन जैनाचार्य श्री नररत्नसुरिश्वरजी महाराज यांनी केले. ते कळंबा मध्यवर्ती जिल्हा कारागृहात आयोजित प्रवचनात बोलत होते. त्यांनी 'चित्त समाधान' विषयावर बंदीजनांना मार्गदर्शन केले. ते म्हणाले, ' मनात सुरू असलेल्या विचारांचा प्रभाव शरीरावर पडतो. त्यामुळे मनाला जिंकल्यास जीवनात कोणतीही गोष्ट सहजपणे साध्य करता येते. धावपळीच्या युगात मन:स्वास्थ्य हरवत चालले आहे. निरोगी आरोग्यासाठी समाधानी राहणे, हाच खरा कानमंत्र आहे.' या वेळी मध्यवर्ती जिल्हा कारागृह अधीक्षक शरद शेळके ,वरिष्ठ तुरुंगाधिकारी एच. एस. जाधवर ,गणीवर्यश्री कृपारत्नविजयजी महाराज, साधू साध्वी समुदाय, अरविंद मणियार, सुरेश शहा, अमृत शहा आदी उपस्थित होते. १०८ जैन समाज संघटनेचे अध्यक्ष राजेंद्र शहा यांनी स्वागत केले.