म. टा. प्रतिनिधी, कोल्हापूर

रशियात फुटबॉल वर्ल्डकपचा थरार सुरु झाला आहे. सामने सुरू होण्याआधीपासूनच जगभर फुटबॉल फीवर चढला आहे. कोल्हापुरातही हा ज्वर वाढत आहे. कुस्तीबरोबर फुटबॉलवर जीवापाड प्रेम करणारे क्रीडाशौकिन शहरातील गल्लीबोळांत पाहायला मिळतात. फुटबॉल हंगाम सुरु झाला की, तालीम मंडळातील ईर्ष्या, चुरस अगदी टोकाची असते. आपल्या संघाला समर्थन द्यायला लहानांपासून वयोवृद्ध आवर्जून मैदानावर उपस्थित असतात. रशियात सुरू असलेल्या जागतिक फुटबॉल वर्ल्डकपचा मोठा परिणामही कोल्हापुरात पाहायला मिळत आहे.

चर्चा आणि उत्साही वातावरण

जगात घडणाऱ्या प्रत्येक गोष्टीवर कोल्हापुरात आवर्जून चर्चा घडते. इथला रांगडा माणूस खेळावर आपली प्रतिक्रिया आवर्जून देतो. फुटबॉल वर्ल्डकपबाबत रोज चर्चा घडत असून मंडळाचे कोपरे, कट्टे, जागोजागी फुटबॉल या एकाच विषयावरील चर्चेने रंगत आहेत. कोणता संघ विश्वविजेता ठरणार? यावर पैजा लावल्या जात आहेत. शिवाजी पेठ, मंगळावर पेठ, बुधवार पेठेत उत्साही वातावरण आहे. संघाचे समर्थक आपलाच संघ कसा बलवान आहे, याचे स्पष्टीकरण देताना दिसताहेत. अनेक तालीम मंडळांनी मोठ्या स्क्रीनवर सामने पाहण्याची सोय उपलब्ध करुन दिली आहे. शहरातील हॉटेलांतही सामने पाहण्यासाठी स्क्रीन लावले आहेत. तसेच शाळकरी मुले एका बोटावर फुटबॉल चेंडू फिरवण्याचे कसब दाखवत आहेत.

झेंडे, टी शर्ट खरेदीसाठी झुंबड

फुटबॉल वर्ल्डकपच्या स्वागतासाठी तरुणाई सज्ज झाली आहे. आवडत्या संघाचे झेंडे अभिमानाने घरावर लावणारे तरुणही येथे दिसतात. शहरात चाहत्यांची संख्या मोठी असून, संघाच्या आवडीनिवडीनुसार साहित्य खरेदीला उधाण आले आहे. यात ब्राझील, फ्रान्स, अर्जेन्टिना, जर्मनी, पोर्तुगाल, स्पेन, बेल्जियम, इंग्लंड या संघाचे चाहते मोठ्या प्रमाणात भेटतात. या संघाच्या जर्सींना मागणी वाढत आहे. खेळाडूंच्या जर्सी, रिस्ट बँड खरेदी करण्याकडे तरुणाईचा कल आहे.

स्टाईलला मागणी

स्पर्धाकाळात आपल्या आवडत्या खेळाडूसारखे दिसावे, यासाठी तरुणाई मेहनत घेत आहे. नाविन्यपूर्ण पेहराव, केशभूषा करण्यावर भर दिला जात आहे. यात अर्जेन्टिना संघाचा मेस्सी आणि पोर्तुगालचा रोनाल्डोच्या हेअरस्टाइलला सर्वाधिक पसंती दिली जात आहे. रोनाल्डोच्या केसांची एका बाजूची हेअरस्टाइल जास्त लोकप्रिय आहे. याबरोबर जर्मनीचा ओझिल, ब्राझिलचा नेमार, फ्रान्सचा पाऊल पोग्बा, स्पेनचा सर्जिओ रामोस आदींच्या हेअरस्टाइल लोकप्रिय आहेत. तसेच टॅटू गोंदण्याकडेही तरुणाईचा कल आहे. त्याचबरोबर बाइकच्या नंबरप्लेटवर आवडीच्या खेळाडूचे आकर्षक चित्र लावल्याचे दिसत आहे.

कोट

वर्ल्डकपमुळे हेअरस्टाइल करण्याकडे तरुणाईचा कल मोठ्या प्रमाणात आहे. शाळकरी मुलेही यासाठी गर्दी करतात. आवडीच्या खेळाडूंनी काय नवीन केले आहे, ते पाहून तशीच हेअरस्टाइल करण्याची मागणी करतात. फुटबॉल फीवर वाढेल तशी हेअरस्टाइल करून घेणाऱ्यांची संख्या वाढेल.

सागर भालेकर, सलून व्यावसायिक

आवडीच्या खेळाडूचे अनुकरण करण्यात मोठा आनंद असतो. ते खेळाडू तरुणांचे आदर्श बनतात. भारतीय टीम वर्ल्डकपसाठी नसल्याची खंत आहे. पण, भविष्यात आपली टीम वर्ल्डकपमध्ये असेल, अशी आशा वाटते.

दत्ता कदम, फुटबॉलप्रेमी

पान ६

..............

फाइल फोटो

......................

कर्जमाफीत प्रगत तालुक्यांची बाजी

करवीर, शिरोळ, कागल तालुक्यांतील लाभार्थ्यांना ११६ कोटींची रक्कम

म. टा. प्रतिनिधी, कोल्हापूर

राज्य सरकारच्या छत्रपती शिवाजी महाराज शेतकरी सन्मान योजनेंतर्गत जिल्ह्यातील प्रगत तालुक्यांमध्ये सर्वाधिक कर्जमाफीचा लाभ मिळाला आहे. राज्य सरकारच्या सहकार विभागाने प्रसिद्ध केलेल्या यादीमध्ये करवीर, शिरोळ, कागल तालुक्यांतील लाभार्थ्यांना सर्वाधिक ११६ कोटींची रक्कम मिळाली आहे. विशेष म्हणजे युपीए सरकारच्या कालावधीत जाहीर केलेल्या कर्जमाफीमध्ये या तालुक्यातील लाभार्थ्यांची रक्कम परत गेली होती.

जून २०१७ मध्ये शेतकरी संपानंतर राज्य सरकारने कर्जमाफीचा निर्णय जाहीर केला. कर्जमाफीचा लाभ मिळण्यासाठी जिल्ह्यातील सुमारे अडीच लाख खातेदारांनी ऑनलाइन अर्ज दाखल केले होते. त्यापैकी एक लाख ६८ हजार लाभार्थ्यांना ३०९ कोटी ६६ लाखांचा लाभ झाला आहे. तर अद्याप ४८ हजार लाभार्थी कर्जमाफीच्या प्रतीक्षेत आहेत.

जिल्ह्यात करवीर, शिरोळ, कागल व हातकणंगले सर्वात प्रगत तालुके म्हणून ओळखले जातात. कर्जमाफीमध्ये या तालुक्यातील लाभार्थ्यांना सर्वाधिक लाभ मिळाला आहे. यामध्ये सर्वाधिक ४८ कोटी २१ लाखाचा लाभ करवीर तालुक्यातील लाभार्थ्यांना झाला आहे. तर सर्वात कमी आठ कोटी २७ लाख रुपयांचा लाभ गगनबावडा तालुक्यातील लाभार्थ्यांना झाला आहे. विशेष म्हणजे युपीए सरकारच्या कालावधीत अपात्र ठरलेल्या तालुक्यातील लाभार्थ्यांची संख्या राज्य सरकारने जाहीर केलेल्या कर्जमाफीमध्ये आहे.

कर्जमाफीची घोषणा झाल्यानंतर सुमारे अडीच लाख खातेदारांनी ऑनलाइन अर्ज दाखल केले. त्यामध्ये पीककर्ज, मध्यम मुदत, खावटी कर्ज अशा चार लाख खात्यांचा समावेश होता. यातील दुबार खाती वगळता उर्वरीत ४८ हजार खातेदारांना लेखापरीक्षण झाल्यानंतरच कर्जमाफीचा लाभ देण्यात येणार आहे.

...............

चौकट

कर्जमाफीचे होणार लेखापरीक्षण

राज्य सरकारने कर्जमाफीची घोषणा केल्यानंतर प्रत्यक्ष लाभ मिळण्यास सहा महिन्याचा अवधी गेला. त्यानंतर कर्जमाफी यादीतील घोळ समोर आल्यानंतर कर्जमाफी मिळालेल्या खात्यांचे लेखापरीक्षण करण्याचा निर्णय जाहीर केला. यासाठी जिल्ह्यातील ६० लेखापरीक्षकांची नियुक्ती केली असून त्यांना प्रशिक्षणही देण्यात आले आहे. लेखापरीक्षकांकडून ६० हजार खात्यांची तपासणी करण्यात येईल.

.............

चौकट

तालुका एकूण खाती रक्कम

आजरा ९,९०५ १५ कोटी ४४ लाख

भुदरगड ११,८६८ १८ कोटी ७६ लाख

चंदगड १४,०९० २७ कोटी ४० लाख

गडहिंग्लज १२,०२१ २३ कोटी एक लाख

गगनबावडा ३,५२९ आठ कोटी २७ लाख

हातकणंगले १४,३५९ २५ कोटी ८९ लाख

कागल १६,५९४ ३३ कोटी आठ लाख

करवीर २८,०४६ ४८ कोटी २१ लाख

पन्हाळा १७,१४७ ३० कोटी ६३ लाख

राधानगरी १६,८१२ २८ कोटी ३३ लाख

शाहूवाडी ६,६८६ १५ कोटी २४ लाख

शिरोळ १७,१४६ ३५ कोटी ३५ लाख

एकूण १,६८,२०४ ३०९ कोटी ६६ लाख

फोटो आहे

.................

एनडीडीबीकडून 'गोकुळ' चा गौरव

म. टा. प्रतिनिधी, कोल्हापूर

'गोकुळ' ने महिला नेतृत्व विकास कार्यक्रमांतर्गत केलेल्या महिला सशक्तीकरण कार्याची नोंद घेऊन राष्ट्रीय दुग्ध विकास महामंडळाने (एनडीडीबी) नाविन्यपूर्ण काम म्हणून नुकताच आनंद, गुजरात येथे विशेष कार्यक्रमात 'इनोव्हेशन अॅवार्ड 'देऊन गौरव केला. एनडीडीबीचे चेअरमन दिलीप रथ यांचे हस्ते महिला विकास विभागाच्या अधिकारी मृण्मयी सातवेकर यांनी पुरस्कार स्वीकारला.

गोकुळने आपल्या कार्यक्षेत्रातील १,०१४ गावात २,४५३ बचत गट स्थापन केले आहेत. या बचत गटाच्या ३६,५०१ इतक्या महिला दूध उत्पादक सभासद असून या बचत गटाची पाच कोटी पन्नास लाख रुपये इतकी उलाढाल आहे. ग्रामीण भागातील दुग्ध उत्पादकांचा आर्थिक स्तर उंचावण्यात या बचत गटांचे मोठे योगदान आहे. याचबरोबर गोकुळच्या महिला नेतृत्व विभागाकडे २२५ महिला कार्यरत आहेत. गोकुळने ग्रामीण महिला बचत गटातील महिलांना तांत्रिक मार्गदर्शन करून रोजगार उपलब्ध करून दिला आहे. यामुळे दुध संस्थामध्ये महिला सभासदांच्या संख्येत वाढ झालेली आहे. एनडीडीबीने गोकुळच्या नाविन्यपूर्ण कामाची नोंद घेऊन महिला सबलीकरण या गटामध्ये इनोव्हेशन अवार्ड देऊन सन्मान केला. यावेळी गोकुळचे कार्यकारी संचालक डी.व्ही.घाणेकर तसेच देशाच्या विविध भागातून आलेले दूध संघांचे प्रतिनिधी उपस्थित होते.

कोल्हापूर : करवीर नाद ढोल ताशा पथकाचे मोबाइल अॅप आणि संकेतस्थळाचे उद्घाटन रविवारी (ता. १७) होत आहे. शाहू स्मारक भवनात सायंकाळी पाच वाजता कार्यक्रम होत असून, खासदार संभाजीराजे छत्रपती यांच्या हस्ते उद्घाटन होईल, अशी माहिती करवीर नादचे कलाकार जान्हवी धर्माधिकारी, प्राजक्ता ठाकूर यांनी पत्रकार परिषदेत दिली. धर्माधिकारी म्हणाल्या, 'पथकात ३५० हून अधिक सभासद असून पथकाने आतापर्यंत ५२ प्रयोग केले आहेत. सामाजिक बांधलिकी जोपासत आरोग्य शिबिर, स्वच्छता मोहीम, वृक्षारोपण, धान्यवाटप, आदी कार्यक्रम राबविले आहेत.'

सलग दुसऱ्या दिवशी डॉक्टर संपावर

कोल्हापूर

सीपीआर रुग्णालयातील प्रशिक्षणार्थी डॉक्टरांचा शुक्रवारी सलग दुसऱ्या दिवशी संप सुरु राहिल्याने रुग्णाचे हाल होत आहेत. सीपीआरमधील १२० प्रशिक्षणार्थी डॉक्टर संपावर असून विद्यावेतन वाढवावे, अशी त्यांची प्रमुख मागणी आहे. सीपीआर रुग्णालयात रोज शेकडो रुग्ण उपचारासाठी येतात. सीपीआर प्रशासनाने निवासी डॉक्टरांच्या मार्गदर्शनाखाली मेडिकल कॉलेजच्या विद्यार्थ्यांच्या मदतीने रुग्णावर उपचार केले जात आहेत. राज्यात प्रशिक्षणार्थी डॉक्टरांना प्रतिदिवशी २०० रुपये विद्यावेतन दिले जाते. वाढत्या महागाईमुळे तुटपंज्या सहा हजर रुपये विद्यावेतनावर काम करणे शक्य नसल्याने वेतन वाढवावे, अशी मागणी गेल्या काही वर्षापासून आंदोलनाद्वारे केली जात आहे. राज्य सरकारने २०१५ मध्ये अकरा हजार विद्यावेतन करण्याचे आश्वासन दिले होते. पण राज्य सरकारकडून ठोस कार्यवाही होत नसल्याने आंदोलनाचे हत्यार उपसण्यात आले आहे.

२०३४ खात्यांचे लेखापरीक्षण

सहकार विभागाने घेतला कर्जपुरवठ्याचा आढावा

म. टा. प्रतिनिधी, कोल्हापूर

छत्रपती शिवाजी महाराज शेतकरी सन्मान योजनेंतर्गत लाभार्थ्यांना कर्जमाफीचा लाभ देण्यासाठी ४८ हजार खातेदारांच्या खात्यांचे लेखापरीक्षण करण्यात येणार असून त्यापैकी २,०३४ खात्यांची यादी शुक्रवारी सहकार विभागाला प्राप्त झाली. प्राप्त झालेल्या यादींचे लेखापरीक्षण करुन सहकार व आयटी विभागाकडे पाठवण्यात येणार आहे. कर्जमाफीच्या लेखापरीक्षण यादीसह राज्य सहकार सचिवांनी व्हिडिओ कॉन्फरन्सद्वारे पीककर्ज वाटपाची माहिती जिल्हा सहकार विभागाकडून घेतली.

राज्य सरकारने कर्जमाफी जाहीर केल्यानंतर आतापर्यंत विविध ग्रीन लीस्टद्वारे जिल्ह्यातील एक लाख ६८ हजारांना कर्जमाफीचा लाभ मिळाला आहे. अद्याप ४८ हजार लाभार्थी कर्जमाफीच्या प्रतीक्षेत आहे. विधानसभेमध्ये अर्ज नसलेल्या लाभार्थ्यांना कर्जमाफीचा लाभ झाल्याचे निदर्शनास आल्यानंतर सर्वच खात्यांचे लेखापरीक्षण करण्याचे आदेश सहकार विभागाने दिले होते. लेखापरीक्षणासाठी कोल्हापूर, सांगली, सातारा येथील लेखापरीक्षकांना प्रशिक्षणही देण्यात आले.

पण प्रशिक्षण देवून महिना झाला तरी, यादी प्राप्त न झाल्याने कर्जमाफीची रक्कमच मिळालेली नव्हती. शुक्रवारी मात्र लेखापरीक्षणासाठी २,०३४ खातेदारांची यादी सहकार विभागाला प्राप्त झाली. त्याची माहिती व्हिडिओ कॉन्फरन्सद्वारे देण्यात आली. प्राप्त झालेली यादी जिल्ह्यातील ६० लेखापरीक्षकांना देण्यात येणार आहे. या खात्यांचे लेखापरीक्षण झाल्यानंतर सहकार विभागाकडे पाठवण्यात येणार आहे. त्यानंतर प्राप्त होणाऱ्या ग्रीन लीस्टद्वारे लाभार्थ्यांना कर्जमाफी देण्यात येणार आहे. दरम्यान, खरीप हंगामासाठी देण्यात येणाऱ्या पीककर्जाची माहिती घेण्यात आली. सरकारच्या कर्जमाफीमध्ये पात्र होऊन कर्जखाते बंद झालेल्या कर्जदारांना पुन्हा कर्जपुरवठा करण्याचे आदेश बँकांना देण्याच्या सूचना कॉन्फरन्सद्वारे देण्यात आल्या

म. टा. प्रतिनिधी, कोल्हापूर

पोलिस मुख्यालयासह जिल्ह्यातील पोलिस ठाण्यांमध्ये रिक्त असलेल्या आठ जागांवर अधिकाऱ्यांच्या नियुक्त्या करण्यात आल्या. नव्याने जिल्ह्यात हजर झालेल्या अधिकाऱ्यांपैकी मानसिंग खोचे यांची शहरातील जुना राजवाडा पोलिस ठाण्यात बदली झाली, तर लक्ष्मीपुरी पोलिस ठाण्यात वसंतराव बाबर यांची बदली झाली. पोलिस अधीक्षक संजय मोहिते यांनी शुक्रवारी (ता. १५) रात्री उशिरा बदल्यांचे आदेश जारी केले.

प्रशासकीय आणि विनंती बदलीदरम्यान जिल्ह्यातून १४ पोलिस निरीक्षक व सहायक निरीक्षक अन्य जिल्ह्यात गेले आहेत. नव्याने हजर झालेल्या पोलिसांच्या बदल्यांचे आदेश अधीक्षक संजय मोहिते यांनी जारी केले. यात जुना राजवाडा पोलिस ठाण्याच्या निरीक्षकपदी मानसिंग खोचे यांची बदली झाली. लक्ष्मीपुरीत निरीक्षक वसंतराव बाबर, तर विमानतळासाठी निरीक्षक संभाजी म्हेत्रे यांची नियुक्ती झाली. निरीक्षक प्रदीप काळे यांची इचलकरंजी, इरगोंडा पाटील यांची शिवाजीनगर पोलिस ठाण्यात बदली झाली आहे. शिवाजीनगर पोलिस ठाण्याचे निरीक्षक सतीश पवार यांची बदली नियंत्रण कक्षात करण्यात आली. सहायक पोलिस निरीक्षक सचिन पाटील यांची वडगाव पोलिस ठाण्यात बदली झाली. बदली झालेल्या सर्व अधिकाऱ्यांनी तातडीने बदलीच्या ठिकाणी हजर होण्याचे आदेश अधीक्षक मोहिते यांनी दिले आहेत.

म. टा. प्रतिनिधी, कोल्हापूर

सध्याच्या धावपळीच्या युगात प्रत्येकजण आपल्या शरीराची काळजी घेतो. अर्थात त्याचे स्वरूप कमी-अधिक प्रमाणात असू शकेल किंवा काळजी घेत असतानाही शरीराकडे लक्ष देण्यास फारसा वेळ मिळत नसेल. त्यासाठी कमी वेळात 'योगा' करून आरोग्याची काळजी घेणे शक्य आहे. याचीच महती सांगणारा आंतरराष्ट्रीय योगदिन गुरुवारी (ता. २१) साजरा होत आहे. यानिमित्त महाराष्ट्र टाइम्स, शिवाजी विद्यापीठ आणि सिद्धगिरी मठ यांच्या संयुक्त विद्यमाने योग शिबिराचे आयोजन केले आहे.

गुरुवारी सकाळी ६.३० वाजता शिवाजी विद्यापीठाच्या लोककला केंद्रात योग शिबिर होईल. आंतरराष्ट्रीय योगदिनाच्या निमित्ताने आयोजित केलेल्या या शिबिरात 'योग' या विषयाची शास्त्रीय माहिती, योगाचे महत्त्व, फायदे याविषयी तज्ज्ञांकडून मार्गदर्शन केले जाणार आहे. योग शिबिरासाठी हेल्थ पार्टनर म्हणून मुख्य प्रायोजक अवित्रा इंटरनॅशनल प्रा. लि. चे ट्रेलीस हेयर सोल्युशन्स आहेत.

वस्तुत: शरीर, मन आणि आत्मा यांना एकत्र आणणे म्हणजे योगाभ्यास असे मानले जाते. आधुनिक तंत्रज्ञानाच्या युगात वाढलेल्या धावपळीमुळे आरोग्याकडे दुर्लक्ष होऊ लागले आहे. परिणामी माणसाच्या जीवनात तणाव, व्याधी राहू लागले आहेत. माणसाची बिघडत चाललेली हालचाल, अस्थिरता, एकटेच स्वत:शी मोठ्याने बोलणे, आदी लक्षणे साहजिकच वाढू लागली. नोकरीसाठी ये-जा, तेथील काम, घरी आल्यानंतरही काम, हे सगळं मॅनेज करता करता दिवस कमी पडू लागला आहे. आजची ही बिझी लाइफस्टाइल तणावग्रस्त बनली आहे. त्यामुळेच योगाभ्यासाला अधिक महत्त्व आले असून, २१ जून हा दिवस आंतरराष्ट्रीय योगदिन म्हणून जगभर साजरा केला जाणार आहे. याच दिवशी सकाळी ६.३० वाजता विद्यापीठातील लोककला केंद्रात शिबिर होणार आहे. शिबिराचा अधिकाधिक नागरिकांनी लाभ घ्यावा, असे आवाहन केले आहे. अधिक माहितीसाठी ९६८९८८६६३० या क्रमांकावर संपर्क साधावा.

००

कोट

फोटो घ्यावा...

श्रीमंत होण्यासाठी माणसाची दररोज धावपळ सुरू आहे. या धावपळीच्या युगात माणूस स्वास्थ्य हरवून बसला आहे. निरोगी आयुष्यासाठी जीवनात योगा हा अविभाज्य घटक बनला पाहिजे. त्यासाठी दररोज वीस ते पंचवीस मिनिटे राखून ठेवली पाहिजेत. योगाचे महत्त्व कळण्यासाठी शिवाजी विद्यापीठ प्रयत्नशील आहे.

डॉ. देवानंद शिंदे, कुलगुरू, शिवाजी विद्यापीठ

००००००००००

पॉइंटर...

विद्यापीठाच्या लोककला केंद्रात होणार

गुरुवारी २१ जूनला सकाळी ६.३० वा.

००००००००००००००००००००००००००००

शिवाजीनगर पोलिस ठाण्याचे पोलिस निरीक्षक सतीश पवार यांची कोल्हापूर नियंत्रण कक्षाकडे बदली झाली आहे़. तर त्यांच्या जागी पुणे ग्रामीण येथून आलेल्या आय. एस. पाटील यांची नियुक्ती करण्यात आली आहे़. तसेच गावभाव पोलिस ठाण्याचे पोलिस निरीक्षक मनोहर रानमाळे यांची बदली शाहुवाडी पोलिस ठाण्याकडे झाली असून त्यांच्या जागी प्रदीप शिवाजी काळे यांची नियुक्ती करण्यात आली आहे़. सतीश पवार यापुर्वी शहापूर पोलिस ठाण्याकडे कार्यरत होते. शिवाजीनगर पोलिस ठाण्याचे तत्कालीन पोलिस निरीक्षक गायकवाड हे लाचलुचपतच्या जाळयात अडकल्यानंतर सतीश पवार यांची शिवाजीननगरकडे नियुक्ती करण्यात आली होती. पाटील हे रविवारी पदभार स्वीकारणार आहेत. सतीश पवार यांना तातडीने नियंत्रण कक्षात हजर राहण्याचे आदेश दिले आहेत.

कोल्हापूर : महापारेषण कंपनीतील तंत्रज्ञ श्रेणीतील कर्मचाऱ्यांचा परिमंडलस्तरीय मेळावा रविवारी (ता. १७) आयोजित केला आहे. नागाळा पार्कातील जयलक्ष्मी सांस्कृतिक सभागृहात दुपारी १२ वाजता मेळाव्याला सुरुवात होईल. राज्य मागासवर्गीय विद्युत कर्मचारी संघटनेच्या कराड परिमंडलाने हा मेळावा आयोजित केला आहे. कार्यकारी संचालक सुगत गमरे यांच्या हस्ते उद्घाटन होणार आहे. कर्मचाऱ्यांनी उपस्थित राहावे, असे आवाहन सुधाकर निर्मळे यांनी केले आहे.

फोटो आहे...

वाहनाच्या धडकेत एक ठार

म. टा. प्रतिनिधी, कोल्हापूर

अज्ञात वाहनाने दिलेल्या धडकेत लक्ष्मण शामराव रोकडे (वय ५६, रा. मूळ गाव मुडवी, ता. मंगळवेढा, जि. सोलापूर, सध्या रा. जोतिबा) जागीच ठार झाले. ते जोतिबा डोंगरावर मिठाई विक्रेते होते. पोलिसांनी दिलेल्या माहितीनुसार, त्यांनी शनिवारी मिठाईचा माल गावाकडून आणला होता. रजपूतवाडी येथे आल्यानंतर त्यांनी कामगाराला एसटीतील माल घेऊन जाण्यास सांगितले. ते रजपूतवाडी येथे उतरले. रात्री साडेनऊच्या सुमारात त्यांना अज्ञान वाहनाने धडक दिली. परिसरातील नागिरकांनी या घटनेची माहिती कामगाराला दिली. त्यांनी रोकडे यांचे चुलत जावई रामदास इंगवले यांना ही माहिती दिली. रोकडे यांना उपचारासाठी सीपीआरमध्ये दाखल केले. मात्र, उपचारापूर्वीच त्यांचा मृत्यू झाला. त्यांच्या पश्चात पत्नी, दोन मुलगे असा परिवार आहे.

म. टा. प्रतिनिधी, कोल्हापूर

राज्य सरकारच्या आदेशानुसार प्लास्टिकचे उत्पादन आणि विक्री करणाऱ्या तसेच प्लास्टिकचा वापर करणाऱ्यांना २३ जूनपासून दंडात्मक कारवाईस सामोरे जावे लागणार आहे. प्लास्टिक विल्हेवाटीची मुदत आठ दिवसांत संपणार असून, यापुढे प्लास्टिक पिशवीचा वापर करणाऱ्यांना पाच हजारपासून २५ हजार रुपयांपर्यंत दंड होणार आहे. तसेच तीन वर्षे तुरुंगवासाची शिक्षा होऊ शकते.

राज्य सरकारने गुढी पाडव्यादिवशी प्लास्टिकबंदीचा निर्णय घेतला. निर्णयाच्या अंमलबजावणीनंतर प्लास्टिकच्या विविध उत्पादनसाठ्याची विल्हेवाट लावणे शक्य होणार नसल्याने थोडा अवधी द्यावा, अशी विनंती प्लास्टिक उत्पादक संघटनांनी सरकारकडे केली होती. सरकारने प्लास्टिक विल्हेवाट लावण्यासाठी तीन महिन्यांची मुदत दिली होती. ही मुदत २३ जूनला संपणार आहे.

महापालिका, नगरपालिका, ग्रामपंचायतींकडून प्लास्टिकबंदीची अंमलबजावणी होणार आहे. प्लास्टिकबंदीची घोषणा झाल्यानंतर सुरुवातीला कॅरीबॅग्जवर बंदी आणली गेली. पण शहरातील महापालिकेच्या सर्व मार्केट, भाजीमंडई, मटण मार्केट, फळमार्केटमध्ये प्लास्टिक कॅरीबॅग्जचा सर्रास वापर केला जात आहे. राज्य सरकारने प्लास्टिकची विल्हेवाट लावण्यासाठी तीन महिन्यांची मुदत दिली होती. पण प्लास्टिक विक्री करणाऱ्या दुकानदारांनी विल्हेवाट न लावता चढ्या दराने प्लास्टिक बॅग्जची सर्रास विक्री सुरू केली आहे.

२३ जूनला प्लास्टिक साठ्यांच्या विल्हेवाटीची मुदत संपणार असल्याने दंड आकारणी २३ जूनपासून करावी लागणार आहे. प्लास्टिकचा वापर मोठ्या प्रमाणात असल्याने दंडात्मक कारवाईसाठी महापालिका, नगरपालिका आणि ग्रामपंचायतींना मोठी यंत्रणा राबवावी लागणार आहे. प्लास्टिकबंदीची अंमलबजावणी गुटखाबंदीप्रमाणे होऊ नये याची काळजी घेण्याची गरज आहे.

०००००

दुधाच्या बाटल्यांचा पर्याय

तीन महिन्यांनी प्लास्टिकच्या पिशव्यांचा पुनर्वापर न झाल्यास दुधासाठी काचेच्या बाटल्यांचा पर्याय दिला जाऊ शकतो, असे पर्यावरणमंत्री रामदास कदम यांनी जाहीर केले आहे. २३ जूननंतर दूध संघ दुधासाठी काचेच्या बाटल्यांचा वापर करणार का, हे पाहणे महत्त्वाचे ठरणार आहे. दुधाच्या पिशव्यांसाठी ५० पैसे अनामत रक्कम ठेवावी लागणार आहे. पिशवी रिकामी करून दिल्यास अनामत रक्कम परत मिळणार आहे. पाण्याच्या बाटल्यांसाठी एक ते दोन रुपये अनामत रक्कम आहे. बाटल्या परत देऊन अनामत रक्कम परत मिळू शकते. जिल्ह्यातील दूध संघ, मिनरल वॉटर विक्री करणाऱ्यांकडून प्लास्टिकबंदीच्या अंमलबजावणीसाठी कोणत्या उपाययोजना केल्या जाणार आहेत, हे स्पष्ट होणार आहे.

मालती पाटील

कोल्हापूर : राजारामपुरी चौथी गल्ली येथील मालती वसंतराव पाटील (वय ७०) यांचे निधन झाले. त्यांच्या पश्चात एक मुलगा, तीन मुली, नातवंडे असा परिवार आहे. रक्षाविसर्जन सोमवारी (ता. १८) सकाळी नऊ वाजता आहे.

००

डॉ. ए. डी. वैद्य

कोल्हापूर : कसबा बावडा येथील डॉ. ए. डी. वैद्य (वय ८५) यांचे निधन झाले. ते जुन्या काळातील नामवंत डॉक्टर म्हणून परिचित होते. कसबा बावडा येथील सेवा रुग्णालयात त्यांनी प्रदीर्घ काळ कार्यरत होते. त्यांच्या पश्चात पत्नी, दोन मुलगे, मुलगी असा परिवार आहे. रक्षाविसर्जन रविवारी सोमवारी (ता. १८) सकाळी नऊ वाजता कसबा बावडा येथील स्मशानभूमीत आहे.

म. टा. प्रतिनिधी, कोल्हापूर

ज्येष्ठ पत्रकार गौरी लंकेश यांचा मारेकरी परशुराम वाघमारे याच्या अटकेने कॉम्रेड गोविंद पानसरे यांच्या हत्येची उकल होण्याची शक्यता बळावली आहे. कर्नाटक एसआयटीकडून सुरू असलेल्या तपासाची माहिती घेण्यासाठी लवकरच महाराष्ट्र एसआयटीचे पथक बेंगळुरूला रवाना होईल. पानसरे हत्येत सहभागाचा पुरावा आढळल्यास वाघमारेला ताब्यात घेतले जाईल, अशी माहिती महाराष्ट्र एसआयटीचे प्रमुख संजय कुमार यांनी दिली.

बेंगळुरू येथे ५ सप्टेंबर २०१७ रोजी गौरी लंकेश यांची गोळ्या घालून हत्या केल्याची कबुली मारेकरी परशुराम वाघमारेने कर्नाटक एसआयटीला दिली आहे. लंकेश यांच्यासह डॉ. एम. एम. कलबुर्गी आणि कॉम्रेड पानसरे या तिघांच्या हत्येसाठी एकच शस्त्र वापरल्याचा पोलिसांचा अंदाज होता. गुन्ह्यातील गोळ्यांच्या फॉरेन्सिक अहवालाने याला दुजोरा मिळाला होता. लंकेश यांच्या हत्येची कबुली देणारा संशयित मारेकरी कर्नाटक एसआयटीच्या हाती लागल्याने आता अन्य गुन्ह्यांचीही उकल होण्याची शक्यता बळावली आहे. त्यादृष्टीने तपास करण्यासाठी संशयित वाघमारेचा ताबा घेतला जाईल, अशी माहिती संजय कुमार यांनी दिली.

'कर्नाटकातील लेखक डॉ. कलबुर्गी आणि ज्येष्ठ पत्रकार लंकेश यांच्या हत्येचा तपास करणाऱ्या पथकांशी आम्ही नियमित संपर्कात आहोत. तपासाच्या अनुषंगाने माहितीची देवाण-घेवाण होत असते. कॉ. पानसरे आणि लंकेश यांच्या हत्येतील गोळ्यांचा फॉरेन्सिक अहवाल अद्याप महाराष्ट्र एसआयटीला मिळालेला नाही. कर्नाटकातील तपासावर आमचे लक्ष आहे. पानसरे हत्येत सहभाग असल्याचा एकही पुरावा मिळाल्यास वाघमारेला ताब्यात घेतले जाईल. तपासाची माहिती घेण्यासाठी लवकरच पोलिसांचे एक पथक बेंगळुरूला रवाना होईल,' असे एसआयटीप्रमुख संजय कुमार यांनी सांगितले.

दरम्यान, संशयित वाघमारेला तातडीने एसआयटीने ताब्यात घेऊन चौकशी करावी असा आग्रह पानसरे कुटुंबीयांनी धरला आहे. याबाबत बोलताना मेघा पानसरे म्हणाल्या, 'कर्नाटक एसआयटीने लंकेश हत्येप्रकरणी सहा आरोपींना अटक केली आहे. यातील पाच आरोपी महाराष्ट्रातील आहेत. गोळ्या झाडल्याची कबुली देणारा मारेकरीदेखील महाराष्ट्रातील आहे. महाराष्ट्र आणि कर्नाटकातील विचारवंतांच्या हत्येप्रकरणी पहिल्यांदाच तपास यंत्रणांच्या हाती ठोस माहिती लागल्याचा दावा केला जात आहे. या माहितीच्या आधारे कॉ. पानसरे यांच्या हत्येचा उलगडा होऊ शकतो. महाराष्ट्र एसआयटीने तातडीने मारेकरी वाघमारेचा ताबा घेऊन पानसरे हत्येप्रकरणी चौकशी सुरू करावी.'

०००

तपासात समन्वय हवाच

पुरोगामी विचारवंतांच्या हत्येत साम्य असल्याने महाराष्ट्र आणि कर्नाटकातील तपासात समन्वय राहावा, असे यादेश यापूर्वीच हायकोर्टाने दिले आहेत. अनेकदा दोन्ही राज्यांतील वरिष्ठ अधिकाऱ्यांच्या तपासाबाबत बैठकाही झाल्या आहेत. पानसरे हत्येतील दोन्ही संशयितांना जिल्हा कोर्टाने जामीन मंजूर केला. या तुलनेत कर्नाटक एसआयटीने गौरी लंकेश हत्येचा ठोस तपास करून मारेकऱ्यांनाही अटक केली. याचा फायदा पानसरे हत्येचा उलगडा करण्यासाठी होऊ शकते. यासाठी दोन्ही राज्यांतील तपास यंत्रणांचा समन्वय महत्त्वाचा ठरणार आहे.

०००

महाराष्ट्रात एसआयटीला जमणार?

कॉ. पानसरे यांच्या हत्येला सव्वातीन वर्षे उलटली, तरीही पोलिसांना हत्येतील शस्त्र, मारेकऱ्यांनी वापरलेली दुचाकी सापडली नाही. गौरी लंकेश यांच्या हत्येचा तपास करताना कर्नाटक एसआयटीने मात्र ठोस तपास केला. कर्नाटकसह महाराष्ट्रातून त्यांनी सहा संशयितांना अटक केली. मारेकऱ्याने गोळ्या झाडल्याची कबुलीही दिल्याने गुन्ह्यातील अन्य पुरावे जमा करण्याचे काम कर्नाटक एसआयटीकडून सुरू आहे. कर्नाटक एसआयटीला जे जमले, ते महाराष्ट्र एसआयटीला जमणार का? असा सवाल उपस्थित केला जात आहे.

0000000000000000000

म. टा. प्रतिनिधी, कोल्हापूर

शांती आणि बंधुभावाचा संदेश देत शहरासह जिल्ह्यातील मुस्लिम बांधवांनी रमजान ईद (ईद उल फित्र) उत्साहात साजरी केली. जिल्ह्यातील मशिदी, दर्गे, ईदगाह या ठिकाणी सामुदायिक नमाज पठण करण्यात आले. देशाची एकात्मता तसेच सुखशांती अबाधित राहावी, यासाठी प्रार्थना करण्यात आली. चविष्ठ शीरखुर्मा आणि बिर्याणीची मेजवानी मुस्लिम बांधवांच्या घरोघरी आयोजित करण्यात आल्या.

दि मोहामेडन एज्युकेशन सोसायटीच्या वतीने मुस्लिम बोर्डिंगच्या पटांगणावर नमाज पठण करण्यात आले. मुक्ती इरशाद कन्नुरे, हाफीज अकिब म्हालदार, मौलाना राहमतुल्ला कोकणे यांनी उपस्थितांना मार्गदर्शन करत नमाज पठण करण्यात आले. त्यानंतर मुस्लिम बांधवांनी एकमेकांना आलिंगन देत शुभेच्छा दिल्या. आमदार सतेज पाटील, पोलिस अधीक्षक संजय मोहिते, अतिरिक्त पोलिस अधीक्षक तिरूपती काकडे, शहर पोलिस उपअधीक्षक डॉ. प्रशांत अमृतकर, पश्चिम महाराष्ट्र देवस्थान व्यवस्थापन समितीचे अध्यक्ष महेश जाधव, भाजप महानगर अध्यक्ष महेश जाधव, अखिल भारतीय मराठा महासंघाचे अध्यक्ष वसंतराव मुळीक, नगरसेवक संदीप नेजदार, माजी नगरसेवक रमेश पोवार, जयकुमार शिंदे, रणजित पोवार, योगेश सूर्यवंशी, शिवाजी मस्के यांनी मुस्लिम बांधवांना शुभेच्छा दिल्या. संस्थेचे प्रकाशक कादर मलबारी यांनी स्वागत केले. चेअरमन गणी आजरेकर यांनी आभार मानले. यावेळी उपाध्यक्ष आदिल फरास, सुपरिटेंड साजिद खान, संचालक पापाभाई बागवान, लियाकत मुजावर, अमीर शिंदी, जहाँगीर अत्तार, रफीक शेख, रफीक मुल्ला, फारूख पटवेगार, अल्ताफ झांजी, मलिक बागवान यांच्या उपस्थितीत शीरखुर्म्याचे वाटप करण्यात आले.

००००

नगरसेवक खाडे-पाटील यांच्यातर्फे इफ्तार पार्टी

भाजपचे नगरसेवक विजयसिंह खाडे-पाटील यांच्यावतीने पालकमंत्री चंद्रकांत पाटील यांच्या वाढदिनाचे औचित्य साधत इफ्तार पार्टीचे आयोजन केले होते. देशात भरपूर पाऊस पडू दे, सर्व जाती-धर्मात प्रेम व बंधुभाव वाढूदे, देशाची आर्थिक व राजकीय भरभराट होऊ दे यासाठी प्रार्थना करण्यात आली. यावेळी पालकमंत्री चंद्रकांत पाटील, आमदार अमल महाडिक, पश्चिम महाराष्ट्र देवस्थान समितीचे अध्यक्ष महेश जाधव, महानगर अध्यक्ष संदीप देसाई, महापालिका विरोधी पक्षनेते विलास वास्कर, नगरसेवक ईश्वर परमार, किरण नकाते, भाजप अल्पसंख्याक महानगर अध्यक्ष नजीर देसाई, मुसा कुलकर्णी, शफीक देसाई, मुसा शेख, शकील मुल्ला, अस्लम जमादार, साहिल इबुसे, शाहरुख गोडबोले, आदी उपस्थित होते.

०००००००००००००००००००

म. टा. प्रतिनिधी, कोल्हापूर

पंचगंगा नदीवरील पर्यायी पुलाच्या आराखड्यातील बदल केलेले डिझाइन सोमवारी (ता.१८) दिले जाईल, असे सार्वजनिक बांधकाम विभागाच्या संकल्प चित्र मंडळाच्या अधिकाऱ्यांनी सांगितले. संकल्प चित्र मंडळ ब्रिजेसचे कार्यकारी अभियंता एस. एस. भोंगे तसेच दोन उपअभियंत्यांनी पर्यायी पुलाच्या बांधकामाच्या ठिकाणी भेट देऊन सुमारे अर्धा तास पाहणी केली. डिझाइन उपलब्ध झाल्यावर तत्काळ पिलरचे काम सुरू करण्यात येणार असल्याचे राष्ट्रीय महामार्ग विभागाने स्पष्ट केले.

केंद्रीय पुरातत्त्व प्राधिकरण विभागाने चार जूनला परवानगी दिल्यानंतर पर्यायी पुलाच्या कामास सुरुवात झाली. पर्यायी पुलाच्या पिलरसाठी साडेनऊ मीटर खोदाई करूनही पाया लागला नाही. तसेच खोदाई करताना विहिरीसारखा मोठा खड्डा लागल्याने राष्ट्रीय महामार्ग विभागाने त्वरित सार्वजनिक बांधकाम विभागाच्या संकल्प चित्र मंडळाच्या कार्यालयाशी संपर्क साधला. राष्ट्रीय महामार्ग विभागाचे कार्यकारी अभियंता विजय कांडगावे यांनी बुधवारी (ता.१३) नवी मुंबई कोकण भवनातील सार्वजनिक बांधकाम विभागाच्या संकल्प चित्र मंडळाच्या कार्यालयाला भेट देऊन पुलासंदर्भात अहवाल दिला.

पर्यायी पुलाच्या बांधकामाचा प्रश्न गंभीर असल्याने सार्वजनिक बांधकाम विभागाच्या संकल्प चित्र मंडळाच्या अधिकाऱ्यांनी अन्य बैठका रद्द करून कोल्हापूरला येण्याचा निर्णय घेतला. शनिवारी दुपारी अडीच वाजता अधिकारी कोल्हापुरात दाखल झाले. नवी मुंबई कोकण भवन येथील सार्वजनिक बांधकाम विभागातील संकल्प चित्र मंडळ ब्रिजेसचे कार्यकारी अभियंता भोंगे, दोन उपकार्यकारी अभियंता शिवाजी पूल परिसरातील पर्यायी पुलाच्या बांधकामस्थळी आले. त्यांच्यासमवेत राष्ट्रीय महामार्ग विभागाचे मुख्य अभियंता आर. पी. निघोर, कोल्हापूर विभागाचे कार्यकारी अभियंता कांडगावे, उपअभियंता संपत आबदार उपस्थित होते. अभियंता भोंगे यांनी खोदलेल्या खड्ड्याची पाहणी केली. तसेच यापूर्वी झालेल्या बांधकामाची उंची व सध्याच्या उभारण्यात येणाऱ्या पिलरच्या डिझाइनची पाहणी केली. साडेनऊ मीटरपर्यंत खोदाई होऊनही पाया लागला नसला तरी खडक लागेपर्यंत खुदाई करण्याची सूचना केली. त्यासाठी दोन दिवसांत किरकोळ बदल करून सोमवारपर्यंत पिलर व स्लॅबचे डिझाइन पाठविण्यात येईल असे सांगितले. पाया लागल्यानंतर खड्डा काँक्रिटने भरून घेण्याची सूचना केली. तसेच पिलरची उभारणी करण्याची सूचना केली. अधिकाऱ्यांनी आणखीन खुदाई करण्यास ग्रीन सिग्नल दिल्याने रविवारपासून खडक लागेपर्यंत पुन्हा खोदाई केली जाणार आहे.

पावसाळ्यात पिलरची उभारणी करण्यात येणार असून, त्यानंतर दोन्ही पिलरवर ४० मीटरचा स्लॅब टाकण्यात येणार आहे. सप्टेंबरअखेरीस पिलर उभारणीचे काम पूर्ण होणार असून, त्यानंतर ऑक्टोबरच्या पहिल्या किंवा दुसऱ्या आठवड्यात स्लॅब टाकण्याच्या कामास सुरुवात होण्याची शक्यता ठेकेदारांनी व्यक्त केली.

०००००

पिलरसाठी खोदकाम करताना विहिरीसारखा मोठा खड्डा लागल्याने संकल्प चित्र मंडळाचे अधिकारी कोल्हापुरात आले. त्यांनी सोमवारपर्यंत पिलर व स्लॅबचे डिझाइन पाठविण्याची तयारी दर्शवली आहे. त्यामुळे रविवारपासून खडक लागेपर्यंत खोदाईचे काम सुरू करण्यात येईल. डिझाइन प्राप्त झाल्यानंतर पिलर उभारणीच्या कामास सुरुवात होईल.

विजय कांडगावे, कार्यकारी अभियंता, राष्ट्रीय महामार्ग विभाग

००००००००००००००

सिंगल फोटो...

म. टा. प्रतिनिधी, कोल्हापूर

चाटे शिक्षण समूहाचे संचालक प्रा. डॉ. भारत खराटे यांना नुकताच जीवनगौरव पुरस्कार प्रदान करण्यात आला. आविष्कार फाउंडेशनच्या वतीने देण्यात आलेल्या या पुरस्काराचे वितरण सेवानिवृत्त विशेष पोलीस महानिरीक्षक अजित पाटील यांच्या हस्ते झाले. यावेळी दक्षिण आफ्रिका-केनिया येथील आंतरराष्ट्रीय धावपटू डॅनियल लॅगेट, आयसायक केनबोई यांच्यासह एम. बी. शेख, शिवाजी विद्यापीठाचे सिनेट सदस्य प्रा. मधुकर पाटील, मदनराव यादव, पंडितराव चेडे, डॉ. संतोष भोसले, अरविंद दिंडे उपस्थित होते. प्रा. डॉ. खराटे उच्चविद्याविभूषित असून, सध्या रोटरी क्लब ऑफ कोल्हापूरचे सेक्रेटरी म्हणूनही काम पाहत आहेत. त्यांनी कोल्हापूर विभागामध्ये गेल्या २१ वर्षांत चाटे क्लासेस, चाटे स्कूल, चाटे ज्युनिअर कॉलेज, चाटे किड्स, चाटे पब्लिकेशन, देवयानी मूव्हीज् या संस्थांद्वारे शैक्षणिक, सामाजिक, क्रीडा व सांस्कृतिक क्षेत्रांत योगदान दिले आहे.

राधानगरी धरणाचे दरवाजे बदलण्याचा निर्णय मागे

म. टा. वृत्तसेवा, राधानगरी

जलाशयाचे रोल मॉडेल म्हणून ओळखल्या जाणाऱ्या राधानगरी धरणाला सात स्वयंचलित दरवाजाची रचना आहे. अशी रचना असलेले हे देशातील एकमेव धरण आहे. विशिष्ट रचनेमुळे लोकांच्या कुतुहलाचे केंद्रबिंदू असलेल्या राधानगरी धरणावरील स्वयंचलित दरवाजाची रचना बदलण्याची पाटबंधारे विभागाची योजना थांबली असून लोकांचा असलेला विरोध लक्षात घेऊन पाटबंधारे विभागाने याच्याशेजारी आधुनिक पद्धतीची रचना असलेल्या दरवाजांची उभारणी करण्याचा निर्णय घेतला आहे. सध्या याचे संकल्पचित्र तयार करण्याचे काम नाशिक येथील मेरी या संस्थेमध्ये सुरू आहे. येत्या दोन वर्षांत हे काम पूर्ण होणार आहे.

दुष्काळावर मात करण्यासाठी भोगावती नदीवर धरण बांधण्याची संकल्पना राजर्षी शाहू महाराजांनी मांडली. वैशिष्ट्यपूर्ण रचना असलेल्या राधानगरी धरणाला सात स्वयंचलित दरवाजाची रचना आहे.

१९०८ मध्ये उभारणीला सुरवात झालेल्या या धरणास १९५४ साली पूर्ण झाले. या धरणाची क्षमता ८. ३६ टीएमसी आहे. चंड विस्तारलेले पाणलोट क्षेत्र,संपूर्ण परिसर घनदाट अभयारण्याचा व त्यामुळे पावसाचे प्रचंड प्रमाण यामुळे पावसाळ्यात एक-दीड महिन्यातच हे धरण भरते. अतिरिक्त पाणी जलविद्युतनिर्मितीसाठी वापरून नदीत सोडले जाते. तर जादा होणारे पाणी सोडण्यासाठी डाव्या बाजूला सात स्वयंचलित दरवाजे उभारण्यात आले आहेत. ण्याचा दाब वाढल्यावर हे दरवाजे आपोआप खुले होतात. यातून प्रत्येकी १४०० क्युसेक्स प्रमाणे एकावेळी सात हजार क्युसेक्स पाण्याचा विसर्ग नदीपात्रात होतो.

२००५ पासून २०१० पर्यंत चारवेळा जादा पाऊस पडला. धरण पूर्ण क्षमतेने भरल्यानंतर पाण्याचा दाब वाढून मुख्य भिंतीवर पाण्याच्या लाटांचा दाब पडून अणीबाणी सदृश्य परिस्थिति निर्माण झाली होती. दरम्यान, मुख्य भिंतीतील पाच दरवाजापैकी उचललेला एक दरवाजा बसला नाही. परिणामी भोगावती नदीला पूर येऊन फेजिवडे व गुडाळवाडी गावात पाणी शिरले होते. तत्कालीन आमदार के. पी. पाटील यानी विधिमंडळात यावर प्रश्न उपस्थित केला होता. नागपूर अधिवेशनातही यावर चर्चा होऊन स्वयंचलित दरवाजांच्या जागी वक्राकार दरवाजे बसवण्याच्या प्रस्तावाला हिरवा कंदील दाखवण्यात आला. मात्र धरणाला असलेले ऐतिहासिक महत्त्व लक्षात घेता याला स्थानिक जनतेमधून मोठा विरोध झाला होता. यामुळे ही योजना बदलून पाटबंधारे विभागाने धरण व स्वयंचलित दरवाजे यांच्यामध्ये असलेल्या टेकडीच्या जागेवर नवीन दरवाजे उभारणीचे नियोजन केले आहे. याला हवामान विभाग व केंद्रीय समितीने मंजुरी दिली आहे. त्यामुळे याचा आराखडा करण्याचे काम नाशिक येथील संबधित विभागात सुरू आहे. वर्षभरात या अनुषंगिक बाबी पूर्ण झाल्यावर त्याचे काम सुरू होऊन दोन वर्षांत ते पूर्ण होईल.

राधानगरी जलाशय राजर्षी शाहू महाराजांच्या कर्तृत्वाचा ठेवा आहे. स्वयंचलित दरवाजे काढून टाकण्याचा काही लोकांच्या प्रयत्नास विरोध केल्यामुळे नवी रचना असलेले दरवाजे बसवण्यात येणार आहेत. नवे दरवाजे आकर्षक असावेत आणि दरवाजाचे काम लवकर करावे, ही अपेक्षा आहे.

संदेश म्हापसेकर, सामाजिक कार्यकर्ते, राधानगरी

स्वयंचलित दरवाज्यांशेजारी नव्या रचनेचे दरवाजे उभारण्याचा निर्णय झाला आहे. सध्याच्या पावसाळ्यात कमिटी प्रत्यक्ष पुरस्थितीचा अभ्यास करून संकल्पचित्र तयार करणार आहे. त्यानंतर प्रशासकीय मान्यतेनंतर टेंडर प्रक्रिया आणि दरवाजे बसवण्याचे काम सुरू होणार आहे.

रोहित बांदिवडेकर, शाखा अभियंता, राधानगरी जलाशय

सिंगल फोटो

म. टा. वृत्तसेवा , कुडित्रे

सावर्डे दुमाला (ता. करवीर) येथील दिशा कारंडे हिने लखनौ येथे झालेल्या राष्ट्रीय सबज्युनियर कुस्ती स्पर्धेत ४९ किलो वजनी गटात महाराष्ट्राला सुवर्णपदक मिळवून दिले. या स्पर्धेतील दर्जेदार कामगिरीमुळे तिची पुढील महिन्यात होणाऱ्या युरोपातील झाग्रेब येथे होणाऱ्या कॅडेट गटाच्या जागतिक अजिंक्यपद कुस्ती स्पर्धेसाठी निवड झाली आहे.

लखनौ येथील कुस्ती स्पर्धेत दिशा हिने ४९ किलो वजनी हरियाणा, दिल्ली व उत्तर प्रदेशच्या मल्लांवर विजय मिळवून स्पर्धेतील अजिंक्यपद पटकावले. त्यामुळे तिची आंतरराष्ट्रीय कुस्तीसाठी निवड झाली आहे. कुस्तीतील यशाबरोबरच दिशा इयत्ता १० वी परीक्षेत ७० टक्के गुण मिळवून उत्तीर्ण झाली आहे.

यापूर्वी दिशा कारंडे हिने भारत सरकारच्या क्रीडा विभागाच्यावतीने घेण्यात आलेल्या खेलो इंडिया कुस्ती स्पर्धेत ५६ किलो वजनी गटात रौप्यपदक पटकावले होते. याशिवाय खाशाबा जाधव चषक, महिला ज्युनियर कुस्ती स्पर्धा, पुणे महापौर चषक, कोल्हापूर महापौर केसरी स्पर्धेत प्रथम क्रमांक मिळविले आहेत तसेच अनेक राज्यस्तरीय, जिल्हास्तरीय स्पर्धेत विविध क्रमांक पटकावले आहेत.

दिशा कारंडे ही कोल्हापूर जिल्ह्यातील करवीर तालुक्यातील सावर्डे दुमाला गावची कन्या असून ती सध्या पुणे येथील मांजरी खुर्दच्या शिवछत्रपती कुस्ती संकुलात सराव करत आहे. तिला संकुलाचे संस्थापक अध्यक्ष प्रकाश सावंत, सतीश सावंत, महेश गायकवाड, राष्ट्रीय कोच विकास पाटील, युवराज पाटील आमशीकर यांच्या मार्गदर्शनाखाली सराव करीत आहे.

म. टा. प्रतिनिधी, कोल्हापूर

मराठा समाजातील विद्यार्थ्यांना शैक्षणिक दाखल्यांची गरज असल्याने कुणबी दाखले त्वरित द्यावेत, अन्यथा आंदोलन छेडले जाईल, असा इशारा अखिल भारतीय मराठा महासंघाने दिला आहे. महासंघाच्या वतीने जिल्हाध्यक्ष वसंतराव मुळीक यांच्या नेतृत्वाखाली जिल्हाधिकारी अविनाश सुभेदार यांना निवेदन देण्यात आले.

सामाजिक न्याय विभागाने २८ फेब्रुवारी २०१८ रोजी कु.,कुण.,कुणबी अशा नोंदी असणाऱ्यांना जात प्रमाणपत्र देण्याच्या स्पष्ट सूचना केल्या आहेत. सरकारने आदेश काढूनही गेले अडीच महिने प्रांत व तहसीलदार कार्यालयांनी आदेशाची दखल घेतलेली नाही. कुणबी जातीचे दाखले मिळावेत, असे प्रस्ताव विद्यार्थ्यांनी दिले आहेत. मराठा समाजाने लाखोंचा सहभाग असलेल्या मूक क्रांती मोर्चाद्वारे आंदोलन करून सामाजिक चळवळीला चांगली दिशा देऊन राष्ट्रीयत्वाची भावना जपली आहे. मराठा समाजातील तरुण, विद्यार्थी, शिक्षण व नोकरीपासून उपेक्षित राहात असल्याने त्यांना कुणबी जातीचे दाखले तातडीने देणे आवश्यक आहेत. दाखले देताना महसूल विभागाने नकारात्मक भूमिका लक्षात घेतली आहे, पण या विभागाने मौन बाळगणाऱ्या मराठ्यांना गौण समजू नये. कुणबी दाखले न दिल्यास आंदोलन छेडू, असा इशारा दिला आहे. जिल्हाधिकाऱ्यांनी सामाजिक न्याय विभागाच्या आदेशाची अंमलबजावणी करावी, असे आदेश द्यावेत अशी मागणी केली.

शिष्टमंडळात शंकरराव शेळके, प्रकाश पाटील, महादेव पाटील, उत्तम जाधव, शरद साळुंखे, सुनील पाटील, शिरीष जाधव, लहू शिंदे, केदार गायकवाड, गौरव पाटील, मनोज नरके, अवधूत पाटील, आदींचा समावेश होता.