जि.प. लोगो

.............

शिक्षक बदलीचा घोळ कायम

म. टा. प्रतिनिधी, कोल्हापूर

शिक्षण विभागाने पहिल्यांदाच ऑनलाइन पध्दतीने प्राथमिक शिक्षक बदली प्रक्रिया राबवत आहे. त्यामध्ये पहिल्या टप्यात तीन हजारांवर शिक्षकांच्या बदल्या झाल्या. त्यातील ४५५ शिक्षकांना मागितलेल्या २० पैकी एकही शाळा मिळाली नाही. परिणामी ते विस्थापित झाले. त्यांनी पुन्हा ऑनलाइन बदली अर्ज केला. त्यात ३९९ शिक्षकांना मंगळवारी शाळा मिळाल्या. उर्वरित ५६ शिक्षक अजूनही विस्थापित असून, त्यांना शाळांची प्रतीक्षा आहे. दरम्यान, इतर जिल्ह्यातून शिक्षक आल्याशिवाय शाहूवाडी तालुक्यातील शिक्षकांना सोडू नये, अशी विनंती शिक्षण सभापती अंबरिश घाटगे यांच्या नेतृत्वाखालील शिष्टमंडळातर्फे मुख्य कार्यकारी अधिकारी डॉ. कुणाल खेमनार यांच्याकडे केली. शाळा सुरू होण्यास तीन दिवस असताना शिक्षक बदलीचा घोळ कायम आहे.

शिक्षक बदलीतील वशिलेबाजी मोडून काढण्यासाठी गेल्या वर्षापासून ऑनलाइन प्रक्रिया राबवण्याचा निर्णय झाला. त्यामध्ये वर्षानुवर्षे डोंगराळ तालुक्यात काम केलेल्या शिक्षकांना सुगम तालुक्यात बदलीचा आदेश देण्यात आला. त्याविरोधात सुगम तालुक्यातील शिक्षकांनी संघटनेच्या माध्यमातून हायकोर्टात याचिका दाखल केली. परिणामी शिक्षक बदलीची प्रक्रिया राबवण्यात आली नाही. यावर्षी पहिल्या टप्प्यात मोठ्या संख्येने शिक्षकांच्या बदल्या झाल्या. सोयीच्या २० शाळांत जागा रिक्त नसल्याने ४५५ शिक्षक विस्थापित झाले. त्यातील सुमारे २२७ शिक्षकांनी आपल्यावर अन्याय झाल्याचे कारण पुढे करून हायकोर्टात धाव घेतली. त्याची सुनावणी सुरू आहे. अद्याप न्यायालयाने कोणत्याही प्रकारचा अंतरिम आदेश दिलेला नाही. यामुळे विस्थापित शिक्षकांना शाळा देण्याची प्रक्रिया राबवली जात आहे. त्यामध्येही आपल्याला हव्या त्याच शाळेत बदली होण्यासाठी संबंधित शिक्षक विविध माध्यमातून प्रशासनावर दबाव तंत्राचा अवलंब करीत आहे. परिणामी अनेक शिक्षक संघटनांचे कारभारी पदाधिकारी दिवसभर शिक्षण विभागात घुटमळताना दिसत होते.

जिल्ह्यात जिल्हा परिषदेच्या २००२ शाळा आहेत. त्यामध्ये ९४४ जागा रिक्त आहेत. सर्वाधिक शाहूवाडी, राधानगरी, चंदगड तालुक्यातील शाळांत शिक्षकांच्या जागा रिक्त आहेत. डोंगराळ तालुक्यात शिक्षक जाण्यास उत्सुक नसल्याने असे चित्र निर्माण झाले आहे. आतापर्यंत रत्नागिरी, सिंधुदूर्ग जिल्ह्यातून १०७ शिक्षक बदलीने रूजू झाले आहेत. शाळा सुरू होण्यास केवळ तीन दिवस शिल्लक असताना सांगली, सातारा या जिल्ह्यातून शिक्षक हजर झालेले नाहीत. अशा परिस्थितीमध्ये शाहूवाडी जिल्ह्यातून पर जिल्ह्यात जाण्यास इच्छूक असलेल्यांना मुक्त केल्यास रिक्त जागांची संख्या वाढणार आहे. त्यामुळे इतर जिल्ह्यातून बदलीने येणारे सर्व शिक्षक आल्याशिवाय शाहूवाडी तालुक्यातून शिक्षक न सोडण्याचा निर्णय स्थायी समितीच्या बैठकीत घेण्यात आला.

-----------------------

कोट

'जिल्ह्यात सध्या दहा टक्क्यांपेक्षा अधिक शिक्षकांच्या जागा रिक्त आहेत. शाहूवाडी तालुक्यात सर्वाधिक शिक्षकांच्या जागा कमी आहेत. यामुळे दुसऱ्या जिल्ह्यातून शिक्षक आल्याशिवाय कार्यरत शिक्षकांना मुक्त करू नये, अशी विनंती सीईओंना शिष्टमंडळातर्फे केली आहे.

अंबरीश घाटगे, सभापती, शिक्षण समिती

-----------------

शेतकरी संघाच्या स्वीकृत

संचालकांची नियुक्ती रद्द

म. टा. प्रतिनिधी, कोल्हापूर

राज्य सहकारी निवडणूक प्राधिकरणाच्या परवानगीशिवाय शेतकरी सहकारी संघामध्ये स्वीकृत दोन संचालकांची केलेली नियुक्ती जिल्हा उपनिबंधक अरुण काकडे यांनी रद्द ठरवली आहे. संचालकांची नियुक्ती नियमबाह्य व बेकायदेशीर असल्याने संघाचे कोणतेही लाभ देण्यात येवू नयेत, अशी सूचनाही केली आहे. जिल्हा उपनिबंधकांच्या या निर्णयामुळे संघाच्या सत्तारुढ गटाला मोठा धक्का बसला असून स्वीकृत संचालक औटघटकेचे ठरले आहेत.

भूविकास बँकेचे थकबाकीदार असल्याने शेतकरी संघाचे अध्यक्ष युवराज पाटील यांच्यासह संचालक एम. एम. पाटील व मानसिंग पाटील यांना अपात्र ठरवण्यात यावे, अशी मागणी तक्रारदार सुरेश देसाई यांनी केली होती. सध्या अध्यक्ष पाटील यांच्या अपात्रतेबाबत सुनावणी सुरू असून जिल्हा उपनिबंधकांनी अपात्र ठरवल्यानंतर जानेवारी २०१७ रोजी एम. एम. पाटील व मानसिंग पाटील यांनी राजीनामा दिला होता. त्यानंतर दोन्ही पदे रिक्त होती.

एम. एम. पाटील व्यक्ती गटातून तर मानसिंग पाटील संस्था गटातून निवडून आले होते. ११ मे रोजी झालेल्या संचालक मंडळाच्या बैठकीत एम. एम. पाटील यांच्या स्नुषा सुरेखा रणजीत पाटील तर मानसिंग पाटील यांच्या पत्नी अपर्णा पाटील यांची स्वीकृत संचालक म्हणून नियुक्त करण्याचा ठराव केला होता. पण असा ठराव करताना राज्य सहकार निवडणूक प्राधिकरणाची परवानगी घेतली नव्हती. याचा आधार घेत तक्रारदार देसाई यांनी स्वीकृत संचालकांची नियुक्त रद्द करण्याची मागणी केली होती. त्यानुसार जिल्हा उपनिबंधक काकडे यांनी दोन्ही संचालकांच्या नियुक्त्या रद्द ठरवल्या असून स्वीकृत संचालकांना कोणत्याही प्रकारचे लाभ देण्यात येऊ नये, अशा सूचना केल्या आहेत. दरम्यान, स्वीकृत संचालकांची नियुक्ती रद्द होणार असल्याचे वृत्त महाराष्ट्र टाइम्समध्ये १७ मे रोजी प्रसिद्ध झाले होते. त्यानंतर या नियुक्तीविरोधात तक्रार झाल्यानंतर मंगळवारी या नियुक्त्या जिल्हा उपनिबंधकांनी रद्द ठरवल्या.

फोटो

................

शिरोळ नगरपरिषदेसाठी

प्रभाग आरक्षण जाहीर

अनेक इच्‍छुकांच्‍या आशेवर पाणी

म.टा.वृत्‍तसेवा, जयसिंगपूर

शिरोळ नगरपरिषदेच्‍या पहिल्‍याच निवडणुकीसाठी एकूण आठ प्रभागांचे आरक्षण मंगळवारी मध्‍यवर्ती प्रशासकीय इमारतीमधील सभागृहात इचलकरंजीचे प्रांताधिकारी समीर शिंगटे यांच्‍या अध्‍यक्षतेखाली चिठ्ठीव्‍दारे जाहीर करण्‍यात आले. यावेळी तहसिलदार तथा प्रशासक गजानन गुरव, प्रभारी मुख्‍याधिकारी नागेंद्र मुतकेकर प्रमुख उपस्थित होते. जाहीर झालेल्‍या आरक्षणामुळे अनेक प्रभागात मातब्‍बर इच्‍छुकांची कोंडी झाली. त्‍यामुळे 'कही खुशी कही गम' असे वातावरण होते.

शिरोळ येथे नुकतीच नगरपरिषद मंजूर झाली असून तहसिलदार गजानन गुरव यांची प्रशासक म्‍हणून नियुक्‍ती झाली आहे. या नगरपरिषदेच्‍या निवडणुकीसाठी प्रभागरचनेच्‍या कार्यक्रमास राज्‍य निवडणूक आयोगाच्‍या आदेशानुसार सुरुवात करण्‍यात आली आहे. शिरोळ येथे आठ प्रभाग असून या प्रभागातून सतरा सदस्‍य निवडले जाणार आहेत. आठ पैकी पहिले सात प्रभागात व्दिसदस्‍यीय तर आठव्‍या प्रभागात तीन सदस्‍य निवडले जाणार आहेत.

मंगळवारी प्रांताधिकारी समीर शिंगटे यांच्‍या अध्‍यक्षतेखाली प्रभागवार आरक्षण सोडत काढण्‍यात आली. यावेळी कोणत्‍या प्रभागाचे कोणते आरक्षण असणार याबाबत उत्‍सुकता ताणल्‍याने प्रशासकीय इमारतीत सर्वच गट-तट, पक्षाचे कार्यकर्ते व इच्‍छुकांनी गर्दी केली होती.

प्रभागनिहाय आरक्षण असे - प्रभाग १ - नागरिकांचा मागास प्रवर्ग, सर्वसाधारण महिला. प्रभाग २ - अनुसुचित जाती, सर्वसाधारण महिला, प्रभाग ३ - अनुसुचित जाती महिला, सर्वसाधारण महिला. प्रभाग ४ - नागरिकांचा मागास प्रवर्ग, सर्वसाधारण. प्रभाग ५ - नागरिकांचा मागास प्रवर्ग, सर्वसाधारण महिला. प्रभाग ६ - अनुसुचित जमाती, सर्वसाधारण महिला. प्रभाग ७ - अनुसुचित जाती महिला, सर्वसाधारण. प्रभाग ८ - नागरिकांचा मागास प्रवर्ग महिला, सर्वसाधारण, नागरिकांचा मागास प्रवर्ग महिला असे आरक्षण निश्चित करण्‍यात आले आहे.

------------------------------------

चौकट

इच्‍छूक लागले तयारीला

शिरोळ नगरपालिकेच्‍या निवडणुकीसाठी इच्‍छुकांनी तयारी सुरु केली असून खासकरून तरुणाई सरसावली आहे. इच्‍छुकांनी आपल्‍या परिसरात संपर्क वाढविला आहे. उमेदवारीसाठी स्‍थानिक नेत्‍यांची मनधरणी सुरु असल्‍याचे चित्र आहे. नगराध्‍यक्ष पद खुले असल्‍याने पहिलीच निवडणूक चुरशीची व रंगतदार होणार आहे.

शरद मांडरे

कोल्हापूर

शनिवार पेठ, परीट गल्ली येथील शरद वसंतराव मांडरे (वय ६८) यांचे निधन झाले. निवृत्त मुख्याध्यापक सुभाष मांडरे यांचे ते बंधू होत. त्यांच्या पश्चात भाऊ, बहिण, पुतणे, सुना, नातवंडे असा परिवार आहे. रक्षाविसर्जन गुरुवारी (ता.१४) सकाळी आहे.

..................

हेमलता पंडित

कोल्हापूर

नागळा पार्क येथील निवृत्त मुख्याध्यापिका श्रीमती हेमलता चंद्रकांत पंडित (वय ८२) यांचे निधन झाले. त्यांच्या पश्चात दोन मुले, सुना, नातवंडे असा परिवार आहे. रक्षाविसर्जन गुरुवारी (ता.१४) सकाळी आहे.

'भूविकास'चा थकबाकीदार नव्हतो

शेतकरी संघाच्या अध्यक्षांचा दावा, २१ रोजी पुन्हा सुनावणी

म. टा. प्रतिनिधी, कोल्हापूर

भूविकास बँकेच्या थकबाकीप्रकरणी पद अपात्रतेची टांगती तलवार असलेल्या शेतकरी सहकारी संघाचे अध्यक्ष युवराज पाटील यांनी मंगळवारी बँकेचे थकबाकीदार नसल्याचा लेखी म्हणणे जिल्हा उपनिबंधक अरुण काकडे यांच्याकडे सादर केले.

थकबाकीदार नसल्यामुळे महाराष्ट्र राज्य सहकारी कायदा कलम कलम ७३ (सीए), (१) 'अ' व 'ब' नुसार कारवाई करता येणार नसल्याचा दावा सुनावणी दरम्यान केला. अध्यक्ष पाटील यांच्या दाव्यामुळे शेतकरी संघाच्या सुनावणीला वेगळे वळण मिळाले असून पुढील सुनावणी २१ जून रोजी घेण्याचे उपनिबंधक काकडे यांनी जाहीर केले. दरम्यान, सुनावणीवेळी पाटील समर्थकांनी गर्दी केल्याने काहीकाळ तणाव निर्माण झाला होता. भूविकास बँकेचे थकबाकीदार असल्याने अध्यक्ष पाटील यांच्यासह अन्य दोन संचालकांना अपात्र ठरवण्याची मागणी तक्रारदार सुरेश देसाई यांनी केली होती. तक्रारीनंतर पाटील यांना जिल्हा उपनिबंधक काकडे यांनी अपात्र ठरवले होते. या निर्णयाविरोधात पाटील यांनी हाय कोर्टात धाव घेतली होती. कोर्टात झालेल्या सुनावणी दरम्यान अपात्रतेला स्थगिती देत रक्कम जमा करण्याचे आदेश देत पुढील निर्णय उपनिबंधकांना घेण्याची सूचना केली होती.

त्यानुसार गेल्या तीन महिन्यापासून जिल्हा उपनिबंधकांसमोर सुनावणी सुरू आहे. मंगळवारी झालेल्या सुनावणी दरम्यान पाटील यांच्यावतीने अॅड. लुइस शहा यांनी लेखी म्हणने सादर करताना भूविकास बँकेचे पाटील थकबाकीदार नसल्याचे नमूद केले. यावर देसाई यांनी हरकत घेत थकबाकीदार नव्हता, तर सुमारे २० लाखांची रक्कम बँकेकडे का जमा केली असा मुद्दा उपस्थित केल्याने वातावरण तणावपूर्ण बनले. सुनावणीदरम्यान अध्यक्ष पाटील यांचे पुतणे व बाजार समितीचे सभापती कृष्णात पाटील यांच्यासह त्यांच्या कार्यकर्त्यांनी जिल्हा उपनिबंधक कार्यालयात गर्दी केल्याने काहीकाळ तणाव निर्माण झाला.

कोल्हापूर टाइम्स टीम

कोल्हापूर मेडिकल असोसिएशन, इंडियन मेडिकल असोसिएशनच्या कोल्हापूर शाखेने 'आरोग्य सेवा आपल्या दारी' उपक्रम राबवण्यासाठी पुढाकार घेतला आहे. त्यातर्गंत असोसिएशनच्या कार्यालयात नोंदणी केलेल्या रूग्णास हेल्थ कार्ड देण्यात येणार आहे. शहरातील असोसिएशनशी करार केलेल्या खासगी रूग्णालयात सवलतीच्या दरात उपचार केले जातील, अशी माहिती असोसिएशनचे अध्यक्ष डॉ. अशोक जाधव यांनी मंगळवारी पत्रकार परिषदेत दिली.

डॉ. जाधव म्हणाले,असोसिएशन रूग्ण आणि डॉक्टरांमधील दुरावलेले अंतर कमी करण्यासाठी विविध उपक्रम राबवत आहे. एप्रिल, मे महिन्यात कागल तालुक्यातील कसबा सांगाव तर राधानगरी तालुक्यातील कपिलेश्वर येथे मोफत आरोग्य तपासणी शिबिर झाले. या शिबिरात असोसिएशनतर्फे शस्त्रक्रियेव्दारे उपचार करण्याची गरज असलेल्या रूग्णांना हेल्थ कार्ड दिले जात आहे. हे कार्ड घेऊन गेल्यास असोसिएशनने करार केलेल्या खासगी दवाखान्यात सवलतीच्या दरात शस्त्रक्रिया आणि उपचार केले जातील. सवलतीच्या उपचारासाठी शहरातील १५ रूग्णालयासोबत करार केला आहे. अजूनही नोंदणी, कराराची प्रक्रिया सुरू आहे. हा प्रयोग येथे प्रायोगिक तत्वावर राबविला जात आहे. हा यशस्वी झाल्यानंतर महाराष्ट्र, दिल्ली मेडिकल असोसिएशनला उपक्रमाची माहिती दिली जाणार आहे.

डॉ. जाधव म्हणाले, वेगवेगळ्या आजारांतील समज, गैरसमज संदर्भात वर्षभरात सहा जागृतीपर कार्यक्रम घेण्यात येणार आहे. १७ जून रोजी शाहू स्मारक भवनात 'हृदयरोग समज, गैरसमज' या विषयावर तज्ज्ञ डॉ. श्रीकांत कोले, डॉ. अक्षय बाफना मार्गदर्शन करणार आहेत. कार्यक्रमात वाढते वजन समज, गैरसमज, हाडांच्या समस्या, मानसिक आजार, महिलांचे आजार, होमिओपॅथी, आयुर्वेद उपयुक्तता समज, गैरसमज आदी विषयावर माहिती दिली जाईल. या वेळी असोसिएशनचे मानद सचिव डॉ. आबासाहेब शिर्के, डॉ. शैलेश कोरे, डॉ. राजेंद्र चिंचणीकर, डॉ. दिलीप शिंदे, डॉ. रमाकांत दगडे, डॉ. ए. बी. पाटील, डॉ. राजेंद्र वायचळ, डॉ. पी. एन. चौगुले आदी उपस्थित होते.

-----------------

बोगस डॉक्टर शोध

शहर जिल्हयात बोगस डॉक्टर आहेत. सरकारी यंत्रणेने त्यांना पकडण्याची मोहिम राबवावी. या मोहिमेला असोसिएशन पूर्णपणे सहकार्य करेल. त्यासाठी जिल्हा परिषद आरोग्य, जिल्हाधिकारी, पोलिस प्रशासनाने त्यासाठी पुढाकार घ्यावा, असेही असोसिएशनचे अध्यक्ष डॉ. जाधव यांनी सूचना केली.

satish.ghatage@timesgroup.com

Twitt@satishgMT

कोल्हापूर : कोल्हापूर शहराभोवती असणाऱ्या २३ गावांतील ८८.५२ किलोमीटरच्या रिंगरोड कामास सुरुवात झाली आहे. करवीर तालुक्यातील काही गावांमध्ये खडीकरणाचे काम सुरू झाले असून, पावसाळ्यानंतर डांबरीकरण होणार आहे. यासाठी राज्य सरकारने ४२५ कोटी रुपये निधीची तरतूद केली असून, ४० कोटी रुपयांचा निधी सार्वजनिक बांधकाम विभागाकडे उपलब्ध झाला आहे. २० कोटींचा निधी रस्त्यांसाठी, तर २० कोटी रुपये भूसंपादनासाठी खर्च होणार आहेत.

शहरातील वाहतुकीचा ताण कमी होण्यासाठी शहराभोवती असलेल्या २३ गावांतून रिंगरोड करण्याचा निर्णय घेतला आहे. या रिंगरोडमध्ये सध्याच्या २८ रस्त्यांचा समावेश करण्यात आला. ८८.५२ किलोमीटर लांबीचे रस्ते करण्यात येणार आहे. ज्या रस्त्यांसाठी भूसंपादनाची आवश्यकता नाही, त्या रस्त्यांचे काम प्रथम हाती घेण्यात आले आहे.

राष्ट्रीय महामार्गावरील जाजल पेट्रोल पंपापासून कणेरी, गिरगाव, नंदवाळ, वाशी या रस्त्यांचे काम हाती घेण्यात आले आहे. ज्या ठिकाणी चांगला रस्ता आहे, त्याचे विस्तारीकरण करण्यात येणार आहे. काही ठिकाणी ३.७५ मीटरचे, तर काही ठिकाणी ५.५० मीटरचे रस्ते तयार करण्यात येणार आहे. कणेरी ते गिरगाव रस्त्यावरील खड्डे असलेल्या ठिकाणी खडीकरण करण्यात येत आहे. पावसाळ्यानंतर डांबरीकरण करण्यात येणार असून, हा रस्ता कोल्हापूर-गारगोटी रस्त्याला जोडण्यात येणार आहे.

हातकणंगले तालुक्यातील हेर्ले, मौजे वडगाव, नागाव या रस्त्याचे कामही हाती घेण्यात आले आहे. केर्ली ते शिये असे चांगले रस्ते रिंगरोडला जोडण्यात येणार आहेत. रिंगरोडचे काम पूर्ण झाल्यावर पुणे, बेळगाव, सांगली, रत्नागिरी, गगनबावडा, गारगोटी, राधानगरीकडे होणारी वाहतूक कोल्हापूर शहरात न येता परस्पर रिंगरोडवरून जाणार आहेत. पहिल्या टप्प्यातील कामे पूर्ण झाल्यानंतर रिंगरोडसाठी निधीचा दुसरा हप्ता नोव्हेंबर महिन्यात मिळण्याची शक्यता आहे. रिंगरोडबरोबर ३९ पुलांची कामे हाती घेण्यात आली आहेत. पंचगंगा नदीवर राजाराम बंधाऱ्यावर मोठा पूल बांधण्याचे काम सुरू असून, त्यासाठी १९ कोटी रुपयांचा निधी प्राप्त झाला आहे. तसेच भुदरगड तालुक्यातील आदमापूर येथे १८ कोटी रुपये खर्चून उड्डाणपुलाचे काम सुरू आहे. रुकडी गावातही पंचगंगा नदीवर पूल बांधण्यात येणार आहे. नदीवर बांधलेला पूल आणि रिंगरोडमुळे राष्ट्रीय महामार्गावरील वाहतूक कोल्हापूर शहरात प्रवेश न करता परस्पर बाहेर जाण्याचा मार्ग मोकळा होणार आहे.

००००

या गावांतून जाणार रिंगरोड

राष्ट्रीय महामार्गावरील जाजल पेट्रोल पंप, कणेरी, गिरगाव, नंदवाळ, वाशी, महे, कोगे, कुडित्रे फॅक्टरी, वाकरे फाटा, खुपिरे, यवलूज, वरणगे, केर्ली, निगवे, टोप, नागाव, मौजे वडगाव, हेर्ले, रुकडी फाटा, रुकडी बंधारा, चिंचवाड, वसगडे, सांगवडे, हलसवडे, विकासवाडी परत जाजल पेट्रोल पंप.

०००००

रिंगरोडसाठी प्रस्तावित निधी : ४२५ कोटी

प्राप्त निधी : ४० कोटी

भूसंपादनासाठी निधी : २० कोटी

एकूण गावे : २३

एकूण रस्ते : २८

रस्त्यांची एकूण लांबी : ८८.५२ किलोमीटर

००००००००००

म. टा. प्रतिनिधी, कोल्हापूर

केंद्रीय पुरातत्त्व विभागाचा ग्रीन सिग्नल मिळाल्यानंतर पर्यायी पुलाचे काम सुरू करण्यात आले आहे. मात्र साडेनऊ मीटर खुदाई करुनही खडक न लागल्याने पुलाच्या बांधकामासाठी कॉलमचे डिझाइन बदलण्यात येणार आहे. त्यासाठी नवी मुंबई येथील कोकण भवनातील संकल्प चित्र मंडळ डिझाइन सर्कलकडून हेवी डिझाइन करण्यात येणार आहे. दरम्यान, पुलाचे बांधकाम थांबवण्यात आले नसल्याचा खुलासाही राष्ट्रीय महामार्ग विभागाने केला आहे.

दिल्लीतील राष्ट्रीय स्मारक प्राधिकरण समितीने पर्यायी पुलाचा परिसर ब्रह्मपुरी टेकडी पुरातत्त्व वास्तूच्या कक्षेत येत नसल्याचे नुकतेच स्पष्ट केले. त्यामुळे अडीच वर्षानंतर पुलाच्या बांधकामाचा मार्ग खुला झाला आहे. सात जून रोजी पुलाच्या बांधकामास सुरुवात झाली. ठेकेदाराने परिसराचे सपाटीकरण करुन पुलाच्या पूर्वेकडील बाजूला कॉलम उभारणीसाठी खुदाई सुरु केली आहे. कॉलमसाठी साडेचार मीटर खुदाई केल्यानंतर कठीण दगड न लागल्याने आणखी खुदाई करण्याचा निर्णय घेण्यात आला. पोकलॅन मशीनने साडेनऊ मीटर खुदाई करुनही दगड न लागल्याने सोमवारी काम थांबवण्यात आले.

मंगळवारी सकाळी राष्ट्रीय महामार्ग विभागाचे कार्यकारी अभियंता विजय कांडगावे यांनी बांधकामाच्या ठिकाणी प्रत्यक्ष पाहणी केली. सर्व ती पाहणी करुन पाया न लागल्याने कॉलमचे डिझाइन बदलावे लागणार असल्याने त्यांनी अहवाल केला आहे. नवी मुंबई कोकण भवनातील संकल्प चित्र मंडळाच्या डिझाइन सर्कलकडून कॉलमचे हेवी डिझाइन करावे लागणार आहे. त्यासाठी अभियंता कांडगावे स्वत: बुधवारी मुंबईला जाणार आहेत. पुलाचे बांधकाम युद्धपातळीवर करायचे असल्याने कॉलमचे नवीन डिझाइन लवकर प्राप्त होईल, अशी अपेक्षा राष्ट्रीय महामार्ग विभागाने व्यक्त केली आहे. डिझाइन होईपर्यंत अन्य कामे मार्गी लावण्यात येणार असून, पुलाचे काम थांबवण्यात येणार नसल्याचे महामार्ग विभागाने स्पष्ट केले आहे.

०००००

इमारत किंवा पुलाच्या बांधकामात पाया लागला नाही किंवा अन्य तांत्रिक कारणामुळे डिझाइन बदलावे लागते. पर्यायी पुलाच्या बांधकामासाठी कॉलमचे डिझाइन बदलावा लागणे ही तांत्रिक बाब आहे. मुंबईतील कार्यालयातून डिझाइनमध्ये बदल करुन कॉलम उभारणी काम करण्यात येणार आहे. पुलाचे काम थांबणार नाही.

विजय कांडगावे, कार्यकारी अभियंता

गोकुळ शॉपीतील अपहार सामूहिक दरोडाच

माजी आमदार संपतबापू पवार यांचा आरोप

म. टा. प्रतिनिधी, कोल्हापूर

कोल्हापूर जिल्हा सहकारी दूध उत्पादक संघाच्या (गोकुळ) शॉपीमध्ये झालेल्या अपहाराचा चौकशी अहवाल परिपूर्ण नसून शाखा व्यवस्थापक अमित अशोकराव पवार याने ६३ लाखांचा अपहार केल्याचे यापूर्वीच कबूल केले आहे. वस्तुत: शॉपीतील अपहार कोट्यवधी रुपयांचा असून अपहाराला केवळ पवार जबाबदार नसून गोकुळचे संचालक मंडळ व व्यवस्थापक जबाबदार असून शॉपीतील अपहार हा सामूहिक दरोडा असल्याचा आरोप शेतकरी कामगार पक्षाचे माजी आमदार संपतबापू पवार-पाटील यांनी पत्रकार बैठकीत केला. अमित पवार यांच्यासह संचालक व व्यवस्थापकांवर गुन्हा दाखल होऊन वसुली होत नाही, तोपर्यंत लढा सुरुच राहणार असल्याचे पवार-पाटील यांनी स्पष्ट केले.

माजी आमदार पवार म्हणाले, 'जुन्या पुणे-बेंगळरु रोडवरील गोकुळच्या शॉपीमध्ये सुमार ६३ लाखांचा अपहार झाल्याचे स्पष्ट झाले होते. त्यानुसार शॉपीतील क्लार्क पवार यांच्यावर पोलिस ठाण्यामध्ये गुन्हा नोंद केला. त्यानंतर संपूर्ण शॉपीतील व्यवहाराची चौकशी करण्याची मागणी केली. त्यानुसार चौकशी अधिकारी म्हणून विशेष लेखापरीक्षक जी. व्ही. निकाळजे यांची नियुक्ती केली. निकाळजे यांनी चौकशी करुन यामध्ये ७१ लाखांचा अपहार झाल्याचे चौकशी अहवालात नमूद केले आहे. एवढ्या मोठ्या रकमेचा अपहार केवळ एका साध्या कर्मचाऱ्यांकडून होणे शक्य नसून अपहारामध्ये संचालक मंडळ व व्यवस्थापक सामील आहेत. पवारने केवळ दोन महिन्यात भ्रष्टाचार केलेला असताना संपूर्ण वर्षाचा अपहार त्याच्या नावे खपवला जात आहे. त्यामुळे यातून कोणाला तरी अभय देण्याचा प्रयत्न चौकशी अहवालाच्या माध्यमातून सुरू आहे.'

ते पुढे म्हणाले, 'चौकशीदरम्यान पवार याने खुलासा करताना अपहारामध्ये दाखवलेली रक्कम अमान्य करत लेखापरीक्षक एस. ए. फडणीस यांच्यावर आरोप केले आहेत. त्यामुळे अपहाराची व्याप्ती वाढत असून केवळ ७१ लाखाचा अपहार नसून शॉपीमध्ये कोट्यवधी रुपयांचा अपहार झाला आहे. चौकशी अहवलामध्ये अपहारातील २४ लाख रुपये जमा झाल्याचे समजते असा उल्लेख केला आहे. अपहारातील रक्कम जमा झालेली असल्यास त्याच्या नोंदी का मिळत नाहीत?, लेखापरीक्षण अहवाल का मिळत नाही?'

पत्रकार परिषदेस बाजार समितीचे उपसभापती अमित कांबळे, माजी जिल्हा परिषद सदस्य बाबासाहेब देवकर, भारत पाटील, केरबा पाटील यांच्यासह शेकापचे पदाधिकारी उपस्थित होते.

..............

चौकट

कलम ८३ (३) 'ब', ८८ नुसार कारवाई करावी

दरम्यान, माजी आमदार पवार यांच्या नेतृत्वाखालील शिष्टमंडळाने विभागीय निबंधक गजेंद्र देशमुख यांना निवेदन दिले. निवेदनात म्हटले आहे, महाराष्ट्र राज्य सहकारी कायदा कलम ८३ (३) 'ब' नुसार फिरत्या चौकशी पथकाची नेमणूक करावी तसेच कलम '८८' नुसार अपहाराची जबाबदारी केवळ पवार यांच्यावर न देता संचालक मंडळ व व्यवस्थापकांना निश्चित करुन वसुलीची कारवाई करावी. चौकशी दरम्यान पवार व संघाच्या संचालक मंडळास स्थावर अथवा जंगम मालमत्तेची कोणत्याही प्रकारची विक्री करण्यास मनाई करावी.

चौकट

वरिष्ठ नेत्यांचा दबाव

अपहारातील दोषी पवार यांच्या आई रंजना या संघाच्या माजी संचालिका आहेत. या पदाचा दुरूपयोग होत असून संघाचे वरिष्ठ नेते दबाव आणत आहेत. त्यामुळे गोकुळ प्रशासन पवार याच्यावर कोणतीही कारवाई करत नाही. तसेच गोकुळची वैधानिक लेखापरीक्षण करण्याची जबाबदारी एस. व्ही. फडणीस यांच्याकडे असताना अंतर्गत लेखापरीक्षणाची जबाबदारी त्यांच्या मुलाच्या फर्मला दिली आहे. त्यामुळे गोकुळमधील सर्व व्यवहार साटेलोट करुन केले जात असल्याचा आरोप पवार यांनी केला.

महाआघाडीतील चर्चेसाठी शेट्टींची चर्चेची तयारी; भाजपसमोर आव्हान

Gurubal.mali@timesgroup.com

Tweet : gurubalmaliMT

कोल्हापूर : भारतीय जनता पक्षाला रोखण्यासाठी दोन्ही काँग्रेससह अन्य काही पक्षांना सोबत घेत महाआघाडी करण्याचे प्रयत्न राज्यपातळीवर सुरू आहेत. या महाआघाडीत स्वाभिमानी शेतकरी संघटनेला सहभागी करून घेण्यात येणार आहे. त्यासाठी हातकणंले लोकसभेची जागा संघटनेला सोडण्याचा प्रस्ताव आहे. असे झाल्यास खासदार राजू शेट्टी यांना ताकद मिळणार आहे; पण उमेदवारीच्या शोधात असलेल्या भाजपसमोर मोठे आव्हान उभे राहणार आहे.

लोकसभा आणि विधानसभा निवडणुकीत भाजपला रोखण्यासाठी सध्या देश आणि राज्यपातळीवर विरोधक एकत्र येत आहेत. महाराष्ट्रात काँग्रेसचे प्रदेशाध्यक्ष खासदार अशोक चव्हाण यांनी दोन दिवसांपूर्वी महाआघाडीची शक्यता व्यक्त केली होती. त्यांनी या आघाडीत सहभागी होण्याचे आवाहन काही मित्रपक्षांना केले. राष्ट्रवादीचे अध्यक्ष शरद पवारदेखील महाआघाडीसाठी प्रयत्न करत आहेत. पक्षाच्या मेळाव्यात पवारांनी याचे संकेत दिले होते. काँग्रेसचे अध्यक्ष राहुल गांधी यांना ते महाआघाडीचा प्रस्ताव देणार असल्याचे समजते. त्यासाठी लोकसभेबरोबरच त्यांनी विधानसभेच्याही जागावाटपाचा प्रस्ताव तयार केला आहे. दोन्ही काँग्रेसबरोबरच काही मित्रपक्षांनाही महाआघाडीत घेण्यात येणार आहे. लोकसभेसाठी २४ जागा काँग्रेस, १८ राष्ट्रवादी तर ६ जागा मित्रपक्षांना देण्याचा फॉर्म्युला आहे.

महाआघाडीत काँग्रेसच्या नेतृत्वाखालील स्वाभिमानी शेतकरी संघटनेला सहभागी करून घेण्यात येणार आहे. याची प्रक्रिया यापूर्वीच सुरू झाली आहे. कोल्हापुरात दौऱ्यावर असताना अशोक चव्हाण यांनी खासदार शेट्टी यांच्या निवासस्थानी भेट दिली. पवारांनी शेट्टी यांच्या आंदोलनाबाबत स्तुती केल्याने पवार व शेट्टी यांच्यातील कटुता फारच कमी झाली आहे. त्यामुळे महाआघाडीचा प्रस्ताव आल्यास चर्चेसाठी आपले दरवाजे उघडे राहतील असे सांगत खासदार शेट्टी यांनी महाआघाडीत सहभागी होण्याची तयारी दर्शविली आहे. भाजप आघाडीतून बाहेर पडून शेट्टींनी गेले वर्षभर आघाडीविरोधात रान उठवले आहे. हातकणंगले मतदारसंघात सध्या तरी काँग्रेसकडे प्रबळ उमेदवार नसल्याने शेट्टींना सोबत ठेवणे या पक्षाला फायदेशीर ठरणार आहे. यामुळे नव्या महाआघाडीत त्यांचा समावेश निश्चित समजला जातो.

भाजपला हातकणंगलेतून लढण्यासाठी सध्या तरी प्रबळ उमेदवार नाही. तरीही माजी मंत्री विनय कोरे, कृषी राज्यमंत्री सदाभाऊ खोत, आमदार सुरेश हाळवणकर यांची नावे चर्चेत आहेत. ऐनवेळी यापेक्षा वेगळे नावही पुढे येऊ शकते. काँग्रेसकडून चर्चेत असलेले कल्लाप्पाण्णा आवाडे अथवा प्रकाश आवाडे शेट्टींविरोधात लढण्याची शक्यता मावळली आहे. राष्ट्रवादीकडे उमेदवार नाही, अशा परिस्थितीत स्वाभिमानीबरोबर आघाडी करत त्याचा फायदा इतर मतदारसंघांत करून घेण्याचा काँग्रेसच्या नेत्यांचा मानस आहे. त्यामुळेच स्वाभिमानी संघटनेला महाआघाडीत सहभागी करून घेण्याचे प्रयत्न सुरू झाले आहेत.

०००००

कोट...

भाजपला विरोध करताना त्यांच्याविरोधात जर महाआघाडी होत असेल आणि त्यामध्ये आपल्याला कोणी बोलावत असेल तर यासाठी चर्चा करण्यास तयार आहोत. शेतकऱ्यांच्या प्रश्नांवर काँग्रेसने स्वाभिमानीला पाठिंबा दिल्याने या पक्षाच्या आघाडीत सहभागी होण्यास अडचण नाही. पण सत्तेवर आल्यानंतर शेतकऱ्यांच्या मागण्या मान्य करण्याबाबत लेखी आश्वासन देणे आवश्यक आहे.

राजू शेट्टी, खासदार

००००

महाआघाडीतील संभाव्य पक्ष

स्वाभिमानी शेतकरी संघटना : हातकणंगले

बहुजन विकास आघाडी : पालघर

समाजवादी पक्ष : भिवंडी

बहुजन समाज पक्ष, भारिप जोगेंद्र कवाडे गट

०००००००००००००

सरकारी कर्मचाऱ्यांचे

महाअक्रोश आंदोलन

म. टा. प्रतिनिधी, कोल्हापूर

केंद्राप्रमाणे राज्यात सातव्या वेतन आयोगाची अंमलबजावणी करावी, या प्रमुख मागणीसह अन्य प्रलंबित मागण्यांकडे राज्य सरकारकडून दुर्लक्ष होत असल्याच्या निषेधार्थ मंगळवारी सरकारी कर्मचाऱ्यांनी महाआक्रोश आंदोलन केले. जिल्हाधिकारी कार्यालयासमोर राज्य सरकारी कर्मचारी मध्यवर्ती संघटनेने निदर्शने करत सरकारचा निषेध केला. ऑगस्ट महिन्यात तीन दिवसांचे लाक्षणिक उपोषण करण्याचा इशारा यावेळी देण्यात आला.

मंगळवारी सकाळी कर्मचाऱ्यांच्यावतीने सीपीआर हॉस्पिटल, मध्यवर्ती प्रशासकीय इमारत, विक्रीकर भवन, शासकीय तंत्रनिकेतन, राजाराम कॉलेज, उच्च शिक्षण विभाग, पाटबंधारे विभाग, आयटीआय, सार्वजनिक बांधकाम विभाग शिक्षण विभाग या ठिकाणी स्वतंत्रपणे निदर्शने करण्यात आली. तसेच जिल्ह्यातील सर्व सरकारी कार्यालयासमोर कर्मचाऱ्यांनी निदर्शने केली.

मंगळवारी दुपारी दीड वाजता जिल्हाधिकारी कार्यालयासमोर राज्य सरकारी कर्मचारी मध्यवर्ती संघटनेने महाअक्रोश आंदोलन केले. या आंदोलनात महसूल, कृषी, आरोग्य, पाटबंधारे, सार्वजनिक बांधकाम, प्राथमिक, माध्यमिक शिक्षकासह अन्य विभागातील कर्मचारी सहभागी झाले. यावेळी राज्य सरकारच्या विरोधात घोषणा देत निदर्शने करण्यात आली.

संघटनेच्यावतीने जिल्हाधिकाऱ्यांना निवेदन देण्यात आले. निवेदनात म्हटले आहे, अंशदायी पेन्शन योजना बंद करुन जुनी पेन्शन योजना लागू करावी, एक जानेवारी २०१६ पासून सातवा वेतन आयोग विलंब न करता लागू करावा, खासगीकरण व कंत्राटीकरण रद्द करा, पाच दिवसांचा आठवडा करा, सेवानिवृत्तीचे वय ६० वर्ष करावे, महिला कर्मचाऱ्यांना दोन वर्षे बाल संगोपन रजा मिळावी, सर्व रिक्त पदे ताबडतोब भरावीत, अनुकंपा भरती विनाअट सुरु करावी.

आंदोलनात मध्यवर्ती संघटनेचे सहसचिव अनिल लवेकर, जिल्हा शाखा अध्यक्ष वसंत जवरे, संजय क्षीरसागर, हमशत हवेरी, सतीश ढेकळे, विलासराव कुरणे, सुनील देसाई, अंजली देवरकर, पल्लवी रेणके, श्रीमंतीनी पाटील, संजीवनी दळवी, बी.एस. खोत, विनय सूर्यवंशी, उदय लांबोरे, बी.बी. काळे, महेश सावंत, रमेश पाटील, प्रकाश पाटील, उत्तम पाटील, रमेश भोसले, विनायक लुगडे आदी सहभागी झाले .

दारू न दिल्याच्या रागातून मारहाण

म. टा. प्रतिनिधी, कोल्हापूर

राजारामपुरी येथील एका परमीटरूम बिअरबारमध्ये दारू न दिल्याच्या रागातून डोक्यात फरशी घातल्याने तरुण गंभीर जखमी झाला. संग्राम विश्वनाथ पावसकर (वय ३१, रा. राजारामपुरी, १३ वी गल्ली) असे जखमी तरुणाचे नाव आहे. त्याला उपचारासाठी सीपीआरमध्ये दाखल करण्यात आले. मंगळवारी (ता. १२) संध्याकाळी हा प्रकार घडला. याप्रकरणी पाच ते सहाजणांविरोधात राजारामपुरी पोलिस ठाण्यात रात्री उशिरापर्यंत गुन्हा दाखल करण्याचे काम चालू होते.

पोलिसांकडून मिळालेली माहिती अशी की, संग्राम विश्वनाथ पावसकर हा त्याच्या एका मित्रासह राजारामपुरीच्या चौथ्या गल्लीतील एका परमीटरूममध्ये मद्यपान करीत बसला होता. त्यावेळी याठिकाणी काही तरुण संग्रामच्या टेबलवर येऊन बसले. त्यांनी संग्रामच्या समोर असलेली दारुची बाटली घेण्याच्या प्रयत्न केला. मात्र, संग्रामने दारू देण्यास नकार दिला. त्यातून दोघांमध्ये वाद झाला. यानंतर तरुणांनी संग्रामला दगड आणि फरशीने मारहाण केली. या मारहाणीत संग्राम गंभीर जखमी झाला.

फोटो

कोल्हापूर : चेंबर ऑफ कॉमर्स अॅड इंडस्ट्रिजचे मानद सचिव जयेश मोहनलाल ओसवाल यांची महाराष्ट्र चेंबर ऑफ कॉमर्स इंडस्ट्रिज व अॅग्रीकल्चर मुंबई या संस्थेवर २०१८ ते २०२० या कालावधीसाठी गव्हर्निग काऊन्सिल सदस्य म्हणून बिनविरोध निवड करण्यात आली. ते बांधकाम व सराफ व्यावसायिक आहेत. त्यांच्या कार्याची दखल घेऊन ही निवड करण्यात आली.

म. टा. प्रतिनिधी, कोल्हापूर

कोल्हापूर जिल्हा बार असोसिएशनच्या नूतन कार्यकारिणीतील १५ जागांसाठी ४२ उमेदवारांनी अर्ज भरले. मतदार यादीतील वाढीव नावांमु‌ळे सुरू झालेला घोळ मात्र मंगळवारीही कायम राहिला. २४०६ मतदारांची अंतिम यादी प्रसिद्ध केली. मात्र, आक्षेपार्ह मतदारांबाबत ऐनवेळी मतदानाच्या दिवशीच निर्णय घेतला जाईल, अशी भूमिका निवडणूक निर्णय अधिकाऱ्यांनी घेतली आहे. दरम्यान, तिन्ही पॅनेलकडून जोरदार प्रचार सुरू आहे.

जिल्हा बार असोसिएशनच्या नूतन कार्यकारिणीसाठी शुक्रवारी (ता. १५) मतदान होत आहे. मतदार यादीत सीमाभागातील ४४ वकिलांची नावे घुसडल्याचा आक्षेप काही ज्येष्ठ वकिलांनी सोमवारी घेतला होता. याबाबत मंगळवारी निवडणूक निर्णय अधिकारी अॅड. सुभाष पिसाळ यांच्याकडे सुनावणी झाली. वाढीव मते वगळण्याचा थेट निर्णय त्यांनी दिला नाही. 'वादग्रस्त मतांची स्वतंत्र यादी करून यातील मतदार मतदानासाठी आल्यास माझ्या परवानगीशिवाय त्यांना मतदानाचा अधिकार मिळणार नाही,' असा निर्णय त्यांनी दिला. या निर्णयामुळे मतदार यादीतील घोळ कायम असल्याची चर्चा सुरू आहे.

मतदारांची अंतिम यादी मंगळवारी जाहीर करण्यात आली. या यादीत २४०६ मतदारांचा समावेश आहे. गेल्यावर्षी १८०० मतदारांची नोंद होती. यंदा ६०० हून अधिक मतांची नोंद झाली आहे. वाढीव मतांमध्ये सीमाभागातील ४४ मतांसह तरुण वकिलांची संख्या मोठी आहे. वाढीव मतदारांना आकर्षित करण्यासाठी तिन्ही पॅनेलकडून जोरदार प्रचार सुरू आहे. सर्किट बेंच आणि वकिलांसाठी सुविधा हे दोन मुद्दे प्रचारात आघाडीवर आहेत.

अध्यक्षपदाचे उमेदवार

प्रशांत चिटणीस

प्रशांत देसाई

प्रकाश देशमुख (आंबेकर)

०००

उपाध्यक्षपदाचे उमेदवार

सयाजीराजे कदम

आनंदराव जाधव

दत्तात्रय जाधव

०००

सचिवपदाचे उमेदवार

सुशांत गुडाळकर

महेशकुमार जाधव

नाथ पाटील

०००

सहसचिवपदाचे उमेदवार

सुरेश कदम

अमोल कुलकर्णी

अभिजित गायकवाड

तेहजीज नदाफ

०००

लोकल ऑडिटरपदाचे उमेदवार

ऋतुराज देशमुख-पाटील

धैर्यशील पवार

माणिक शिंदे

०००

महिला प्रतिनिधीपदाचे उमेदवार

भाग्यश्री कुलकर्णी

पूजा देशमुख

मनीषा पाटील

००००

कार्यकारिणी सदस्यपदाचे उमेदवार

जयदीप कदम, रणजित गुरव, गौरव जवळकर, सदाशिव जंगम, स्वाती तानवडे, पूजा देशमुख, ओंकार देशपांडे, अभिषेक देवरे, अमोल नाईक, अविनाश पाटील, भरत पाटील, दीपाली पोवार, अभिजित बच्चे-पाटील, कृष्णात माने, विनायक म्हांगोरे, संजय मुळे, कौत्सुभ रोटे, निखिल वारंगे, अरुण शिंदे, सुरेश शिंदे, संग्राम शिर्के, विद्याधर शेलार, युवराज शेळके.

००००००००००००

कोल्हापूर

जिल्हा परिषद खांदेपालटासाठी घडामोडी सुरू झाल्या आहेत. ठरल्यानुसार सव्वा वर्ष २३ जून रोजी पूर्ण होणार आहे. त्यामुळे स्वाभिमानी शेतकरी संघटनेच्या महिला व बालकल्याण पदाच्या सभापती शुभांगी शिंदे यांचा राजीनामा २३ नंतर होणार आहे. हे पद आता आवाडे गटाला जाणार आहे. इच्छूक वंदना मगदूम यांचे पती राजू मगदूम यांनी जोरदार मोर्चेबांधणीला सुरूवात केली आहे. अध्यक्षांसह इतर पदाधिकारी बदलासंबंधी अस्पष्टता कायम आहे.

-----------------------

फोटो

..............

महागाईविरोधात विरोधकांची एकजूट

इचलकरंजीत प्रांत कार्यालयावर सर्वपक्षीय मोर्चा

म. टा.वृत्तसेवा, इचलकरंजी

केंद्र व राज्य सरकारने केलेल्या महागाईमुळे सर्वसामान्यांना जगणेही अवघड झाले असल्याचा आरोप करत सरकारच्या चुकीच्या धोरणाविरोधात भाजप वगळून सर्व विरोधी पक्षीय कृती समितीच्यावतीने प्रांताधिकारी कार्यालयावर महागाईच्या भस्मासुराचा मोर्चा काढण्यात आला. स्वाभिमानीचे खासदार राजू शेट्टी, माजी वस्त्रोद्योग मंत्री प्रकाश आवाडे यांच्यासह मान्यवरांनी मोर्चाचे नेतृत्त्व केले. अच्छे दिनाचे स्वप्न दाखवून सत्तेवर आलेल्या मोदी सरकारला पायउतार करण्यासाठी एकजुटीने राहण्याचा निर्धार यावेळी करण्यात आला.

महात्मा गांधी पुतळ्यापासून मोर्चाला सुरुवात झाली. प्रमुख मार्गावरुन सरकारविरोधात घोषणाबाजी देत हा मोर्चा प्रांताधिकारी कार्यालयासमोर आला. त्यानंतर मोर्चाचे सभेत रुपांतर झाले. यावेळी बोलताना खासदार राजू शेट्टी म्हणाले, 'गट-तट, मतभेद विसरुन सर्वपक्ष एकत्र आल्याने देशातील राजकारणाला नवी दिशा देणारा हा मोर्चा आहे. एकीकडे शेतीमालाला दर नाही, पण बाजारात त्याच वस्तू घेणे सर्वसामान्यांना परवडत नाही. जनतेच्या पैशावर मोदी सरकार जाहिरातबाजीवर उधळपट्टी करत आहे. वस्त्रोद्योग धोरण प्रामाणिकपणे राबविले असते तर कामगारांवर बेकारीची वेळ आली नसती. पण विकासाच्या नावाखाली जनतेची लूट केली जात आहे. कामगार बेकार होतोय, शेतकरी आत्महत्या करतोय, जनता बेजार झाली आहे, पण सरकारला त्याच्याशी काही देणे घेणे नाही. पण आता विश्‍वासघात करणाऱ्या सरकारला जनता सुट्टी देणार नाही.'

माजी मंत्री प्रकाश आवाडे यांनी, अच्छे दिनाचे दिवास्वप्न दाखवून मोदी सरकारने जनतेचा भ्रमनिरास केला आहे. त्यांनी केलेल्या घोषणा हवेत विरल्या असून या सरकारच्या विरोधात नवीन बांधणीची सुरुवात झाली आहे. ये तो झाँकी है, अभी बहोत कुछ बाकी है असे म्हणत वस्त्राद्योगाची वाताहत, आयजीएमची दुरवस्था संदर्भात आमदार सुरेश हाळवणकर यांच्यावर टीकास्त्र सोडले. काम मंजूर केल्याची केवळ पत्रकबाजी करुन आमदार दिशाभूल करत आहेत. अन्नधान्य घरपोच केल्याचे सांगत दुसरीकडे रेशनवरील धान्य देणे बंद केले जात आहे. कर्नाटक निवडणुकीपासून सुरु झालेली ही एकजूट इचलकरंजीत कायम ठेवून ती राज्यभर चळवळ बनवूया, असे आवाहन त्यांनी केले.

यावेळी प्रकाश मोरे, मदन कारंडे, महादेव गौड, कॉ. दत्ता माने, मिश्रीलाल जाजू, प्रताप होगाडे, राजेंद्र निकम यांनीही मनोगत व्यक्त केले. यावेळी अनेक वक्त्यांनी, भारताच्या आजवरच्या इतिहासात सलग तीन आठवडे पेट्रोल व डिझेलचे दर तेही दररोज वाढत राहणे असे कधीच घडलेले नाही. पण मोदी सरकारने हा कारनामा करुन दाखविला आहे. मागील चार वर्षांपासून साधा यंत्रमाग उद्योग अडचणीतून मार्गक्रमण करीत असताना सरकारने त्याकडे दुर्लक्ष केल्याने हा व्यवसाय संकटात सापडला आहे. इचलकरंजी शहर व परिसरातील ६३ हजार केशरी शिधापत्रिकाधारकांना मागील चार वर्षांपासून अन्नधान्य मिळतच नसल्याने गोरगरीबांच्या तोंडातील घास हे सरकार काढून घेत आहे. जनता सुखी व्हायची असेल तर सत्ता बदल गरजेचा असून भाजपची सत्तेतून हकालपट्टी करण्यासाठी एकजूट होऊ या, असे आवाहन केले.

मोर्चात राष्ट्रीय काँग्रेस, स्वाभिमानी शेतकरी संघटना, राष्ट्रवादी काँग्रेस, शिवसेना, जनसेवा पार्टी, मार्क्सवादी कम्युनिस्ट पक्ष, भारतीय कम्युनिस्ट पक्ष, महाराष्ट्र नवनिर्माण सेना, शेतकरी कामगार पक्ष, भारिप बहुजन महासंघ, जनता दल (से), पिपल्स रिपब्लिकन पार्टी (कवाडे गट), सर्व श्रमिक संघ, राष्ट्रवादी कामगार संघटना, समता संघर्ष समिती, लालबावटा बांधकाम कामगार संघटना, इचलकरंजी म्युनिसिपल वर्कर्स युनियन, आझाद हिंद मंडळ, जॉबर संघटना, सोशलिस्ट पार्टी व रिपब्लिकन सेना आदी सहभागी झाले. यावेळी अजय जावळे, जयकुमार कोले, शशांक बावचकर, बजरंग लोणारी, सयाजी चव्हाण, शिवाजी साळुंखे, सदा मलाबादे, सावकार मादनाईक, भरमा कांबळे यांच्यासह विविध पक्षांचे पदाधिकारी, कार्यकर्ते व नागरिक सहभागी झाले .

...................

चौकट

माझी चिंता सोडा .... तुमचं बघा

'राजकारणात माझे काय होणार, याची चिंता विरोधकांनी करु नये. दुसऱ्यांची उणी -दुणी काढणाऱ्यांनी स्वत:ची काळजी घ्यावी, कारण भविष्यात जनताच त्यांना मतपेटीतून उत्तर देणार आहे. म्हणूनच अजून वेळ गेलेली नाही. महागाई नियंत्रणात आणा, दरवाढ कमी करा, शेतकरी व कामगारांना दिलासा द्या अन्यथा तुम्ही इतिहास जमा झाल्याशिवाय राहणार नाही,' असा इशाराही खासदार शेट्टी यांनी भाजप सरकारला दिला.

म. टा. प्रतिनिधी, कोल्हापूर

महाराष्ट्र गृहनिर्माण व क्षेत्रविकास प्राधिकरणाच्या (म्हाडा) पुणे गृहनिर्माण व क्षेत्रविकास मंडळातर्फे तीन हजार १६८ सदनिकांचे बांधकाम अंतिम टप्प्यात आहे. या घरांसाठी पंधरा दिवसांत लॉटरी काढण्यात येणार असून, १८ हजारांवर लोकांनी यासाठी नोंदणी केली आहे. अर्ज भरण्यापासून ते सोडत काढण्यापर्यंतची सर्वच प्रक्रिया ऑनलाइन राबविण्यात येणार आहे.

गतवर्षी शाहू साखर कारखान्याचे अध्यक्ष समरजित घाटगे यांची म्हाडाच्या पुणे विभागीय अध्यक्षपदी निवड करण्यात आली. त्यानंतर त्यांनी भूसंपादनाबरोबरच अधिकाधिक घरे तातडीने बांधण्यावर भर दिला. सध्या तीन हजार १६८ घरे बांधून तयार आहेत. म्हाडाअंतर्गत प्रथमच तीन हजारांवर घरे एकाचवेळी संगणकाद्वारे सोडत काढून देण्यात येणार आहेत. दोन वर्षांपासून या घरांसाठी ऑनलाइन नोंदणीची पद्धत सुरू केली. आता यामध्ये सर्वच प्रक्रिया ऑनलाइन राबविण्यात येणार आहे. तीन हजार सदनिका आणि २९ भूखंडांच्या विक्रीसाठी अर्ज भरण्यास सुरुवात झाली आहे. ही मुदत १८ जूनपर्यंत आहे. आतापर्यंत १५ हजार ३०३ अर्ज दाखल झाले आहेत. सात हजारांवर अर्ज अजूनही प्रक्रियेत आहेत. तीन हजारांपैकी एक हजार ८० सदनिका पुण्यातील नांदेड सिटीमधील आहेत. नांदेड सिटीमधील आयटी इन्क्युबेशन सेंटरमध्ये ३० जून २०१८ रोजी सकाळी १० वाजता संगणकाद्वारे सोडत काढण्यात येणार आहे.

पुण्यासह कोल्हापूर, सांगली, सोलापूर व सातारा या जिल्ह्यांतही या योजनेंतर्गत घरे बांधण्यात आली आहेत. ही घरे 'म्हाडा'मार्फत सोडतीद्वारे नागरिकांना परवडणाऱ्या दरांत उपलब्ध करून देण्यात येणार आहेत. सोडतीमध्ये उपलब्ध करून देण्यात येणाऱ्या घरांची प्लिंथ तयार असून, सुमारे दीड वर्षात या घरांची उभारणी पूर्ण होणार आहे.


तीन हजारांवर घरांची ऑनलाइन सोडतीद्वारे लॉटरी काढण्यात येणार आहे. यानंतरही अधिकाधिक लोकांना स्वस्तात घरे मिळावीत यासाठी सध्या भूसंपादन करण्यात येत आहे. कोल्हापुरात काही ठिकाणी ही घरे बांधण्याचा प्रस्ताव आहे.

समरजित घाटगे, अध्यक्ष म्हाडा, पुणे विभाग


पुण्यात मिळणार घरे

पुण्यातील नांदेड सिटी या भागात सर्वसामान्य लोकांना घरे मिळणार आहेत. नांदेड सिटीसारख्या भागात सर्वसामान्यांसाठी घराचे स्वप्न पूर्ण होणार आहे. कोल्हापुरातसुद्धा मोक्याच्या ठिकाणी घरे मिळावीत यासाठी प्रयत्न करण्यात येणार आहे. त्यासाठी भूसंपादनाची प्रक्रिया सुरू आहे. पाच जिल्ह्यांत अनेक सरकारी जागा वापराविना पडून आहेत. तेथे म्हाडाच्या माध्यमातून सर्वसामान्यांना स्वस्तात घरे उपलब्ध करून देण्याची योजना आहे. गेले सहा महिने म्हाडा कार्यालयाच्या वतीने अशा जागांचा शोध घेतला जात आहे. या जागा म्हाडाला देण्याबाबत सरकारला प्रस्ताव देण्यात येणार आहे.


सोडतीचे वेळापत्रक

ऑनलाइन अर्जासाठी नोंदणीची अंतिम तारीख : १८ जून, रात्री १२ वाजता

सोडतीसाठी ऑनलाइन अर्ज करण्याची अंतिम तारीख : १९ जून, रात्री १२ वाजता

क्रेडिट व डेबिट कार्डद्वारे ऑनलाइन पेमेंट स्वीकारण्याची तारीख : २० जून, रात्री १२ वाजता

सोडतीसाठी स्वीकारलेल्या अर्जांच्या प्रारूप यादीची प्रसिद्धी : २४ जून, सायंकाळी ६ वाजता

सोडतीसाठी स्वीकारलेल्या अंतिम यादीची प्रसिद्धी : २६ जून, सायंकाळी ६ वाजता

सोडत : ३० जून, सकाळी १० वाजता

म. टा. प्रतिनिधी, कोल्हापूर

कोल्हापूर जिल्ह्यात बाहेरच्या जिल्ह्यातून शिक्षक येत नाहीत. त्यामुळे सध्या ९२२ शिक्षकांच्या जागा रिक्त आहेत. त्या भरण्यासाठी शिक्षक मिळावेत, यासाठी जिल्हा परिषद अध्यक्षा शैामिका महाडिक, उपाध्यक्ष सर्जेराव पाटील, शिक्षण सभापती अंबरीश घाटगे, ज्येष्ठ सदस्य अरुण इंगवले, विजय भोजे यांचे शिष्टमंडळ गुरुवारी (ता.१४) ग्रामविकास मंत्री पंकजा मुंडे यांची भेट घेणार आहे.

शिक्षक बदलीची ऑनलाइन प्रक्रिया सुरू आहे. पहिल्या टप्प्यात झालेल्या बदलीतून एकही शाळा न मिळाल्याने विस्थापित झालेल्या ३९९ शिक्षकांना शाळा मिळाली. अजूनही विस्थापित ५६ शिक्षकांना शाळा मिळण्याची प्रतीक्षा आहे. शुक्रवारी शाळा सुरू होणार आहेत. त्यामुळे लवकर सोयीची शाळा मिळावी, यासाठी ते प्रयत्न करीत आहेत. याउलट ज्या विस्थापित शिक्षकांना शाळा मिळाली आहे, त्यातील गैरसोयीच्या ठिकाणची शाळा मिळालेले शिक्षक पुन्हा सोयीची शाळा मिळण्यासाठी धडपडत आहेत. शाहूवाडीतून बाहेरच्या जिल्ह्यात जाऊ इच्छिणारे शिक्षक मुक्त करण्यासाठी प्रशासनाकडे तगादा लावताना दिसत आहेत.

दरम्यान, प्रशासन आणि शिक्षण समिती सभापतींसह सर्व पदाधिकाऱ्यांनी जोपर्यंत बाहेरच्या जिल्ह्यातून शिक्षक येणार नाहीत, तोपर्यंत शाहूवाडी तालुक्यातील कार्यरत एकाही शिक्षकाला सोडायचे नाही, असा निर्णय घेतला आहे. यामुळे शाहूवाडीतून बाहेरच्या जिल्ह्यात जाऊ इच्छिणारे शिक्षक दिवसभर जिल्हा परिषद परिसरात कुटुंबासह थांबून शिक्षण प्रशासनावर दबाव आणण्याचा प्रयत्न करीत आहेत. मात्र, गेल्या वर्षी कार्यरत शिक्षक सोडल्यानंतर त्या जागी वर्षभर शिक्षक मिळाले नाहीत. अशा अनुभवामुळे बाहेरच्या जिल्ह्यातून येणारे सर्व शिक्षक आल्याशिवाय कार्यरत शिक्षक सोडायचे नाही, यावर प्रशासन ठाम आहे.

सोयीची शाळा मिळण्यासाठी ऑनलाइन पोर्टलवर खोटी माहिती भरल्याचे निदर्शनास आल्यास संबंधित शिक्षकावर कारवाई करण्याचे आदेश व्हीडीओ कॉन्फरन्समधून शिक्षण सचिवांनी शिक्षणाधिकाऱ्यांना दिले आहेत. येथील शिक्षिका प्रतिभा मोरे यांनी पती-पत्नी एकत्रिकरणासाठी अर्ज केला. त्या नाशिक जि. प. कडे हजर होण्यासाठी गेल्या. परंतु, आंतरजिल्हा बदलीचा गैरफायदा घेण्यासाठी चुकीची माहिती भरल्याचे समोर आले. त्यासंबंधित तेथील मुख्य कार्यकारी अधिकारी डॉ. नरेश गीते यांनी येथील जि. प. शिक्षण प्रशासनास पत्र दिले आहे. या प्रकरणात दोषी सापडल्यास त्या शिक्षिकेवर कारवाई होण्याची शक्यता आहे.

----------