विकासकामांवरुन नगरसेवक-आयुक्तांत खडाजंगी

अधिकाऱ्यांनी फायली गहाळ केल्याचा नगरसेवकांचा आरोप

म. टा. प्रतिनिधी, कोल्हापूर

महापालिकेच्या सर्वसाधारण सभेत विकासकामांच्या मंजुरीवरुन नगरसेवक आणि आयुक्तांमध्ये खडाजंगी उडाली. विकासकामांच्या फायलींना आठ, आठ महिने मंजुरी मिळत नाही. अधिकाऱ्यांकडे चौकशी केल्यावर आयुक्तांकडे फाइल्स प्रलंबित असल्याचे सांगितले जाते. गेल्या वर्षीच्या अंदाजपत्रकातील मंजूर २९२ विकास कामांपैकी १२० कामांची निविदा प्रक्रिया राबवली नसल्याचा आरोपच नगरसेवकांनी सभागृहात केला. नगरसेवकांच्या आरोपाला आयुक्त अभिजीत चौधरी यांनी माझ्याकडे फायली सादर झाल्यानंतर दोन दिवसात निर्णय घेतो. नियमानुसार कामांच्या फायली पटकन मंजूर होतात. प्रलंबित १२० पैकी अनेक कामे ही नगरसेवकांनी सुचविलेल्या व्यक्तिगत स्वरुपातील कामाच्या होत्या. त्या नगरसेवकांची नावे मी सभागृहात जाहीर करु शकत नाही. मी महापालिकेचे हित पाहून काम करतो, असे जोरदार प्रत्युत्तर दिले.

आयुक्तांच्या प्रत्युत्तराने सभागृहातील गोंधळात आणखी भर पडली. सत्तारुढ काँग्रेसचे गटनेते शारंगधर देशमुख, ताराराणी आघाडीचे गटनेते सत्यजित कदम यांनी आयुक्तांच्या वक्तव्याला जोरदार आक्षेप घेत संबंधित नगरसेवकांची नावे जाहीर करा, असे खुले आव्हान दिले. महापालिका ही नागरिकांच्या मालकीची आहे. नगरसेवक हे शहरातील रस्ते, गटर्स, पिण्याची पाइपलाइन, लाइटच्या कामासाठी पाठपुरावा करतात. ही सगळी कामे नागरिकांशी निगडीत असल्याचे सांगत अनेक नगरसेवकांनी आयुक्तांच्यासमोरील डायससमोर धाव घेतल्याने गदारोळात आणखी भर पडला. शहर अभियंता नेत्रदीप सरनोबत, उपशहर अभियंता हर्षजित घाटगे यांनाही नगरसेवकांनी धारेवर धरले.

रुईकर कॉलनी येथील मैदान व खुल्या जागेवरील विकासकामाचा प्रश्न नगरसेवक कदम यांनी उपस्थित केला. महापालिकेच्या मालकीच्या जागेवर नाव लावण्याची जबाबदारी कुणाची आहे, प्रत्येक गोष्टीसाठी नगरसेवकांनी पाठपुरावा करायचा का असे सांगत ताराराणी मार्केट विभागीय कार्यालयतंर्गत २९१ विकास कामांपैकी १२० कामांची अद्याप निविदा प्रक्रिया राबवली नाही. एखाद्या कामाचे एस्टीमेट तयार केल्यानंतर किती कालावधीत काम पूर्ण करण्याची नियमावली आहे, अशी विचारणा शहर अभियंत्यांना केली. त्यावर शहर अभियंत्यांनी एका महिन्यात निविदा प्रक्रिया पूर्ण करुन काम सुरु करण्याची नियमावली असल्याचे उत्तर दिले. जिओ टॅगवरुनही नगरसेवकांनी प्रशासनाला लक्ष्य केले.

..........

नावे सांगा निलंबित करतो

नगररचना विभागासह अन्य काही विभागातील विकासकामांच्या फायली अधिकाऱ्यांनी गहाळ केल्याचा आरोप नगरसेवकांनी केला. त्यावर आयुक्तांनी संबंधित अधिकाऱ्यांची पुराव्यासहित नावे सांगा, त्यांना तत्काळ निलंबित करतो असे उत्तर दिले. त्यावर शारंगधर देशमुखांनी नगरसेवकांनी आठ, आठ महिने फायली घेऊन हेलपाटे मारायचे का, असा सवाल केला. नगरसेवक भूपाल शेटेंनी अधिकाऱ्यांनी महापालिकेच्या खुल्या जागा विकल्याचा आरोप केला.

म. टा. प्रतिनिधी, कोल्हापूर

'राज्यातील ४० हजार गावातील चार लाख शेतकऱ्यांचे सातबारा ऑनलाइन झाले असून शेतकऱ्यांना घरबसल्या सातबारा उपलब्ध होईल. उर्वरित गावातील शेतकऱ्यांचे सातबारा उतारे डिजिटल स्वाक्षरीसह महिन्याभरात उपलब्ध होतील,' असे महसूल मंत्री, कोल्हापूरचे पालकमंत्री चंद्रकांत पाटील यांनी सांगितले.

महाराष्ट्र राज्य स्थापनेच्या ५८ व्या वर्धापन दिनानिमित्त छत्रपती शाहू स्टेडियम येथे आयोजित मुख्य ध्वजारोहण कार्यक्रमात ते बोलत होते. महापौर स्वाती यवलुजे, विशेष पोलिस महानिरीक्षक विश्वास नांगरे-पाटील, जिल्हाधिकारी अविनाश सुभेदार, मुख्य कार्यकारी अधिकारी डॉ. कुणाल खेमनार, आयुक्त डॉ. अभिजित चौधरी, पोलिस अधीक्षक संजय मोहिते, अतिरिक्त जिल्हाधिकारी नंदकुमार काटकर, अतिरिक्त पोलिस अधीक्षक तिरुपती काकडे उपस्थित होते.

पालकमंत्री चंद्रकांत पाटील म्हणाले, 'गेल्या तीन वर्षांत सरकारने विविध प्रकल्प हाती घेतले आहेत. यापुढील काळातही विकासाचे अनेकविध‍ प्रकल्प राबवून महाराष्ट्र देशातील नंबर एकचे राज्य बनवण्याच्या दृष्टीने वाटचाल सुरु आहेत. शहीद जवानांच्या वीरपत्नी, वीरमातांना शिवसेना प्रमुख बाळासाहेब ठाकरे शहीद सन्मान योजनेंतर्गत सर्व प्रकाराच्या राज्य परिवहन बसमधून आजीवन मोफत प्रवासासाठी एसटी महामंडळाच्यावतीने स्मार्ट कार्ड देण्याबरोबरच अशा शहिदांच्या वारसांना एसटीमध्ये नोकरी देण्याचा निर्णय सरकारने घेतला आहे. शहिदांच्या कुटुंबीयांना देण्यात येणारी आठ लाखाची मदत वाढवून ती २५ लाख केली आहे. महाराष्ट्रातील सिंधी समाजाकडील जमिनी त्यांच्या स्वत:च्या मालकीच्या करण्याचा निर्णयही घेतला आहे.'

याप्रसंगी पोलिस अधिकारी आणि कर्मचारी, जिल्हा क्रीडा पुरस्कार विजेते आणि आदर्श तलाठी पुरस्कारांचे वितरण करण्यात आले. तसेच महाराष्ट्र राज्य परिवहन महामंडळाच्यावतीने शहीद जवानांच्या पाच वीरमाता, वीरपत्नींना स्मार्टकार्डाचे वितरणही करण्यात आले. ध्वजारोहणानंतर झालेल्या संचलनात पोलिस, गृहरक्षक, वनरक्षक, बँड पथक, श्वान पथक, वज्र वाहन, दंगल नियंत्रण पथक, सीसीसटीव्ही सर्व्हेलन्स व्हॅन, मोबाइल फॉरेन्सिक लॅब पथक, महात्मा गांधी तंटामुक्त अभियान, अग्निशमन पथक, निर्भया पथक, १०८ पथक आणि मुद्रा योजनेचा चित्ररथ अशी पथके सहभागी झाली होती. याबरोबरच शालेय मुला-मुलींनी समूहगीत सादर केले.

जिल्हा पुरवठा विवेक आगवणे, प्रांताधिकारी सचिन इथापे, तहसीलदार उत्तम दिघे, शिक्षण उपसंचालक मकरंद गोंधळी, कृषी विकास अधिकरी चंद्रकांत सूर्यवंशी यांच्यासह लष्करी अधिकारी, स्वातंत्र्यसैनिक, प्रशासकीय अधिकारी, शिक्षक, विद्यार्थी, ज्येष्ठ नागरिक, दलितमित्र उपस्थित होते. सूत्रसंचालन एस. बी. सोनार यांनी केले.

००००००००००

मनसेच्यावतीने मिरवणूक, मर्दानी खेळांची प्रात्यक्षिके

कोल्हापूर : महाराष्ट्र दिन व कामगार दिनाच्यानिमित्ताने महाराष्ट्र नवनिर्माण वाहतूक सेनेच्यावतीने शहरात मिरवणूक काढली. मर्दानी खेळाची प्रात्यक्षिके, धनगरी ढोल, ढोल ताशा पथक वातावरणात शहरातील प्रमुख मार्गावरुन मिरवणूक काढण्यात आली. खासदार धनंजय महाडिक, शानूर मुजावर यांच्या हस्ते मिरवणुकीला प्रारंभ झाला. डॉ. बाबासाहेब आंबेडकर, महात्मा फुले, हुतात्मा स्मारक, शंकरराव तोरस्कर यांच्या प्रतिमांना पुष्पहार अर्पण करण्यात आले. त्यानंतर खासदार महाडिक व मुजावर यांची भाषणे झाली. मिरवणुकीमध्ये महिला बचत गट, भाजी विक्रेते, मनसे वाहतूक सेनेचे पदाधिकारी, कार्यकर्ते सहभागी झाले होते. शंकरराव तोरस्कर यांच्या प्रतिमेचे पालखीमध्ये पूजन करण्यात आले. महालक्ष्मी प्रतिष्ठानचे ढोल ताशा पथक, उंट, घोडे, शिवराय व शाहू महाराजांच्या वेशभूषेतील नागरिक, धनगरी ढोल असा लवाजमा मिरवणुकीत होता. बिंदू चौकातून मिरवणूक सुरु झाली. देवल क्लब, मिरजकर तिकटी, बिनखांबी गणेश मंदिर, महाद्वार रोड, पापाची तिकटी, पानलाइन, शिवाजी चौक असा मिरवणुकीचा मार्ग होता.

मिरवणुकीत वाहतूक सेना जिल्हाध्यक्ष राजू जाधव, राजू बागवान, गणेश बुचडे, किरण बेडेकर, प्रमोद दाभाडे, विजय करजगार, अभिजित राऊत, मंदार पाटील, प्रसाद पाटील, आण्णा तिळवे, विनायक पाटील, गीता कांबळे, रंजना खाडे, अंजना मगदूम आदी सहभागी झाले होते.

अपात्र कर्जमाफीतील

शेतकऱ्यांना अंशत: दिलासा

खरीप हंगामासाठी कर्जपुरवठा करण्याचे सुप्रीम कोर्टाचे बँकांना आदेश

म. टा. प्रतिनिधी, कोल्हापूर

केंद्र सरकारच्या कर्जमाफीमध्ये अपात्र ठरलेल्या एक लाखांपर्यंतच्या कर्जदारांना खरीप हंगामात नवीन कर्जपुरवठा करण्याचे आदेश सुप्रीम कोर्टाने दिले आहेत. जिल्ह्यातील ४४ हजार शेतकऱ्यांची ११२ कोटीची कर्जमाफी अपात्र झाली असून याबाबत कोर्टात सुनावणी सुरू आहे. मंगळवारी झालेल्या सुनावणीमध्ये अपात्र कर्जदारांना अंशत: दिलासा देताना ४२ हजार शेतकऱ्यांना कर्जपुरवठा करण्याचे आदेश दिले आहेत, अशी माहिती कोल्हापूर जिल्हा मध्यवर्ती सहकारी बँकेचे चेअरमन हसन मुश्रीफ यांनी प्रसिद्धी पत्रकाद्वारे दिली.

पत्रकात म्हटले आहे, अपात्र कर्जमाफीबाबत हायकोर्टाने शेतकऱ्यांच्या बाजून निकाल दिला होता. याविरोधात नाबार्डने सुप्रीम कोर्टात दावे दाखल केले होते. सुप्रीम कोर्टाच्या न्यायमूर्ती रंजन गोगी व आर. भानुमती यांच्या खंडपीठासमोर सुनावणी झाली. सुनावणीवेळी कोर्टाने सर्वच प्रतिवाद्यांना नोटिसा लागू केलेल्या नाहीत. तसेच अपात्र कर्जमाफीतील अनेक शेतकरी मयत झाले असून त्यांच्या वारसांना नोटिसा मिळालेल्या नसल्याने संपूर्ण कायदेशीरबाबी पूर्ण झाल्यानंतच सुनावणी घेण्याचा निर्णय घेतला. लवकरच खरीप हंगाम सुरु होणार असून आमच्यावर फार मोठा अन्याय होणार आहे आणि गेल्या दहा वर्षापासून ही प्रकरणे प्रलंबित आहेत. ही कर्जमाफी केंद्र सरकारने ज्यावेळी केली, त्यावेळी केंद्र सरकारच्या अटीमध्ये मंजूर मर्यादेचा उल्लेख नव्हता. त्यानंतर चार वर्षांनी कर्जमाफी रद्द झाल्यामुळे व देशात कोणत्याही बँकेमध्ये हा प्रश्न उपस्थित झाला नसल्यामुळे ही सुनावणी त्वरीत घेण्याची विनंती शेतकऱ्यांच्यावतीने केली. कोर्टाने एक लाख रुपयापर्यंत कर्जमाफी रद्द झालेल्या शेतकऱ्यांपैकी ४२ हजार ३७७ शेतकऱ्यांना खरीप हंगामात नवीन कर्जपुरवठा सुरु करण्याचे आदेश देत सर्व प्रतिवाद्यांना नोटिसा देणाच्या सूचना केल्या.

अपात्र कर्जदारांच्यावतीने सिनिअर अॅडव्होकेट राकेश द्विवेदी,सिद्धार्थ लुथरा व अॅड. शिवाजीराव जाधव यांनी बाजू मांडली. जिल्हा बँकेच्यावतीने अॅड.अनिश शहा यांनी बाजू मांडली. नाबार्डच्यावतीने सिनिअर अॅडव्होकेट मुकुल रोहतगी व अॅड. पी. के. जैन यांनी बाजू मांडली.

फोटो आहे.

म. टा. प्रतिनिधी, कोल्हापूर

महाव्दार रोडवरील एका इमारतीवरील डिजीटल फलक काढताना उच्चप्रवाहित विजेच्या धक्क्याने तरूणाचा मृत्यू झाला. इस्माइल उर्फ शाहरूख बादशाह सय्यद ( वय २४, रा. राजेंद्रनगर, कोल्हापूर) असे त्याचे नाव आहे. मंगळवारी सायंकाळी ही घटना घडली. शहराच्या मध्यवस्तीमधील घटना पाहण्यासाठी बघ्यांची मोठी गर्दी झाली होती. यामुळे महाव्दार रोडवरील वाहतूक काही काळ विस्कळीत झाली.

महाद्वार रोड परिसरातील जोतिबा रोडवरील इमारतीवर सांस्कृतिक महोत्सवाच्या कार्यक्रमाचे डिजीटल फलक काही दिवसांपूर्वी लावण्यात आले होते. मंगळवारी सायंकाळी शाहरूख आणि त्याचे सहकारी सुनील माजगावकर, अक्षय साखरे इमारतीवर चढून तो फलक काढत होते. फलक काढताना इमारती नजीकच्या उच्चदाबाच्या विद्युत वाहिनीचा डिजीटल फलकाच्या लोखंडी फ्रेमला स्पर्श झाला. फ्रेम हातात धरल्याने शाहरूखला जोरात विजेचा धक्का बसला. तो बेशुध्द अवस्थेत लोखंडी अँगलवर कोसळला. अग्निशमन दलाच्या जवानांनी शाहरूखला खाली घेतले. गंभीर जखमी अवस्थेत त्याला सीपीआरमध्ये उपचारासाठी दाखल केले. मात्र उपचारापूर्वीच त्याचा मृत्यू झाल्याचे डॉक्टरांनी सांगितले. त्याचा वर्षापूर्वी विवाह झाला होता. त्याच्या मृत्यूमुळे कुटुंबास प्रचंड धक्का बसला. या घटनेची नोंद जुना राजवाडा पोलिस ठाण्यात झाली आहे.

---------------

Maruti.Patil@timesgroup.com

tweet: @MarutipatilMT

कोल्हापूर : ऑस्ट्रेलिया येथे नुकत्याच झालेल्या राष्ट्रकुल स्पर्धेत भारतीय खेळाडूंनी पदकांची अक्षरश: लयलूट करत एकूण पदकतालिकेत तिसरे स्थान पटकावले. स्पर्धेत बॉक्सिंग क्रीडा प्रकारात भारतीय खेळाडूंनी तब्बल आठ पदके मिळवली. पदक मिळवणारे सर्वच खेळाडू हिरो असले, तरी यांना मार्गदर्शन करणारे प्रशिक्षक जयसिंग पाटील मात्र पडद्यामागेच राहिले. संघ भारतात परतल्यानंतर कोल्हापूरसारख्या छोट्याशा खाटांगळे गावचे जयसिंग पाटील भारतीय बॉक्सिंग संघाचे प्रशिक्षक असल्याची माहिती मिळाली.

सांगरूळ पंचक्रोशी म्हणजे कुस्तीचे माहेरघर. परिसरातील अनेक मुले कुस्तीला प्राधान्य देतात, पण याला जयसिंग ज्ञानू पाटील अपवाद ठरले. खाटांगळे (ता. करवीर) येथील शेतकरी कुटुंबातील जयसिंग पाटील. त्यांचे पाचवीपर्यंतचे शिक्षण सांगरूळ हायस्कूलमध्ये झाल्यानंतर पुणे (खडकी) येथे बॉम्बे इंजिनीअरिंग ग्रुपच्या आर्मी स्कूलमध्ये दाखल झाले. त्यांनी स्पोर्टसमध्ये विशेष नैपुण्य दाखवले. शारीरिक शिक्षण परीक्षा झाल्यानंतर वयाच्या १७ व्या वर्षी भारतीय सैन्य दलात शिपाई पदावर रुजू झाले. याचवेळी ते बॉक्सिंगसारख्या रांगड्या खेळाकडे आकर्षित झाले.

२००७ ते २०११ पर्यंत त्यांनी ६४, ६९ व ७५ किलोगटात राष्ट्रीय चॅम्पियनशिप मिळवली. याच कालवधीत त्यांनी भारतीय संघाचे प्रतिनिधित्व करताना आंतरराष्ट्रीय स्तरावर १४ पदकांची कमाई केली. सरावादरम्यान डोळ्याला दुखापत झाल्यानंतर त्यांना बॉक्सिंग सोडावी लागली तरी त्यांनी पतियाळा (पंजाब) येथे बॉक्सिंग प्रशिक्षक डिप्लोमा पूर्ण केला आणि त्यांची वर्णी भारतीय संघाच्या प्रशिक्षकपदावर लागली. टॅटँगो निवाना या स्वीडनच्या प्रशिक्षकासह त्यांनी भारतीय संघाला प्रशिक्षण देण्यास सुरुवात केली. दोन वर्षांपासून ते पतियाळा खेळाडूंना मार्गदर्शन करत आहेत. त्यांच्या मार्गदर्शनाखाली संघाने आठ पदके मिळवली. त्यामध्ये दोन सुवर्ण व प्रत्येकी तीन रौप्य व ब्राँझ पदके मिळवली. १७ वर्षी सैन्यदलात दाखल झालेल्या पाटील यांना गेल्यावर्षी सुभेदारपदी बढती मिळाली.

खाटांगळेसारख्या ग्रामीण भागातील खेळाडूंनी आंतरराष्ट्रीय स्तरावर आपल्या कर्तृत्वाचा ठसा उमटवला असला, तरी ते पडद्यामागेच राहिले. आयपीएलच्या क्रिकेट सामन्याची सध्या रेलचेल सुरू असताना पाटील मात्र इतर खेळांकडे होणाऱ्या दुर्लक्षांमुळे अस्वस्थ आहेत. क्रिकेटबरोबरच बॉक्सिंग किंवा अन्य खेळांकडे सकारात्मक दृष्टीने पाहण्याची अपेक्षा व्यक्त करतात. त्यासाठी लोकप्रतिनिधी व समाजाने भक्कमपणे पाठीशी उभे राहण्याची आवश्यकता आहे. अन्यथा पाटील यांच्यासह अनेक खेळाडू केवळ पडद्यामागेच राहतील.

०००००

कामगिरीची उशिरा दखल

कोल्हापूरपासून सुमारे २० कि.मी.वर असलेल्या खाटांगळेसारख्या छोट्या गावातून पुढे आलेल्या पाटील यांची उत्तुंग कामगिरी फारशी माहीत झालेली नाही. सोशल मीडियावरून याबाबत माहिती मिळताच त्यांच्या सत्काराचे आयोजन करण्यात आले आहे. यामध्ये उपमहाराष्ट्र केसरी पैलवान अमृता भोसले यांनी आघाडी घेतली आहे. त्याचबरोबर सांगरूळ येथे कोल्हापूर परिक्षेत्राचे विशेष पोलिस महानिरीक्षक विश्वास नांगरे-पाटील यांच्या हस्ते सत्काराचे नियोजन केले आहे.

००००

क्रिकेटशिवाय अन्य खेळांत अनेक खेळाडू, प्रशिक्षक आपला ठसा उमटवत आहेत. पण अशा खेळाडूंना गृहित धरले जात नाही. त्यामुळेच बॉक्सिंगमध्ये भारताला तब्बल आठ पदके मिळूनही खेळाडूंकडे दुर्लक्ष केले आहे. क्रिकेटबरोबर इतर खेळांना प्राधान्य दिल्यास भारतीय खेळाडू आंतरराष्ट्रीयस्तरावर आपली छाप उमटवतील. यासाठी अशा खेळांकडे सकारात्मकदृष्टीने पाहण्याची गरज आहे.

जयसिंग पाटील, प्रशिक्षक, भारतीय बॉक्सिंग संघ

००००००००००००००

कोल्हापूर : रत्नाप्पा कुंभारनगर नागरी सहकारी पतसंस्थेच्या अध्यक्षपदी प्रमोद रामचंद्र कोगेकर यांची निवड झाली. निवड बैठकीच्या अध्यक्षस्थानी सहकारी विभागाचे अधिकारी संदीप पाटील होते. कोगेकर यांची निवड २०१८ ते २०२१ साठी करण्यात आली आहे. अध्यक्षपदासाठी कोगेकर यांचे नाव एस. के. वंदुरे-पाटील यांनी सुचवले. त्यास बी. वाय. डांगे यांनी अनुमोदन दिले. यावेळी संचालक ए. बी. पाटील, एस. के. घुमाई, डी. डी. कुंभार, व्ही. बी. आडनाईक, आर. आर. गायकवाड, व्ही. के. डवरी, आदी उपस्थित होते.

गोकुळ आज खुलासा सादर करणार

कोल्हापूर

राज्य सरकारच्या दूध खरेदी दराच्या आदेशाची पायमल्ली केल्याबद्दल बजावण्यात आलेल्या संचालक अपात्रतेच्या नोटिशीबाबत कोल्हापूर जिल्हा दूध उत्पादक सहकारी संघ (गोकुळ) गुरुवारी (ता. ३) विभागीय उपनिबंधकांकडे खुलासा सादर करणार आहे. सरकारच्या आदेश डावलून दूध दर कमी केल्याबद्दल विभागीय उपनिबंधक (दुग्ध) सुनील शिरापूरकर यांनी गोकुळसह पुणे विभागातील १७ संघांना संचालक मंडळ अपात्र ठरवून प्रशासकांची नियुक्ती का करु नये, अशी नोटीस बजावली होती.

कोल्हापूर

शहरातील साळोखेनगर आणि ताराबाई पार्क अशा दोन ठिकाणी अज्ञात चोरट्यांनी चोरी करून १ लाख ६९ हजार ५०० रूपयांचा मुद्देमाल लंपास केला. दोन्ही घटनांची नोंद पोलिसात झाली आहे. दत्तात्रय लक्ष्मण नरूटे यांचे साळोखे नगर येथे सिध्दीविनायक पार्कमध्ये घर आहे. सुट्टी असल्याने नरूटे २९ एप्रिल रोजी कुटुंबासह कारवार येथे गेले. एक मे रोजी ते परत घरी आले. त्यावेळी डायनिंग हॉलच्या आतील बाजूस असलेल्या दरवाजाची काच उचकटल्याचे दिसून आले. घरातील सोन्याचा नेकलेस, पैंजण, कानातील दागिने, रोख ३५ हजार असा १ लाख २२ हजार रूपयांचा ऐवज चोरट्यांनी लांबवल्याचे निदर्शनास आले. तर ताराबाई पार्कमधील ज्युपीटर मॉलमध्ये ३० एप्रिल ते १ दरम्यान चोरी झाली. बाथरूमच्या खिडकीची काच काढून चोरट्यांनी मॉलमध्ये प्रवेश केला. त्यांनी ४७ हजार ५०० रूपये लांबवले. अमोल अनंत देवरूखकर (रा. शिवाजी कॉलनी, लाईन बझार, कसबा बावडा) यांनी शाहूपुरी पोलिस ठाण्यात चोरीची फिर्याद दिली.

-------------------------------------

म. टा. प्रतिनिधी, कोल्हापूर

कोल्हापूर शहरातील अनेक हॉटेल्स, मंगल कार्यालये आणि हॉस्पिटलमध्ये राजरोस पाणी चोरी सुरु आहे. बेकायदेशीर नळकनेक्शनमुळे नियमित पाणी पुरवठ्यावर विपरित परिणाम झाला आहे. आयुक्तांनी स्वत: पाहणी करुन अशा पाणीचोरांचा शोध घ्यावा व त्यांना योग्य ते शासन करावे, यासाठी नगरसेवक आक्रमक बनल्याने महापालिका प्रशासनाने शहरातील हॉटेल्स, हॉस्पिटल्स तपासणीचा निर्णय बुधवारी घेतला. तसेच बिलांची फेरपडताळणी करण्याचा निर्णय घेण्यात आला. बेकायदेशीर नळकनेक्शन तोडण्याची कार्यवाहीही करण्यात येणार आहे. उपमहापौर सुनील पाटील यांच्या अध्यक्षतेखाली विशेष सभा झाली. याप्रसंगी नगरसेवकांनी प्रशासनाकडून मांडलेला एक दिवसाआड पाणी पुरवठ्यावरुन नगरसेवकांना अधिकाऱ्यांना सुनावले. नगरसेवकांना विश्वासात घेतल्याशिवाय परस्पर नियोजन केल्यास कायदा हातात घेऊ, असा इशाराही यावेळी देण्यात आला.

अनियमित पाणी पुरवठा, गळती आणि पाणी चोरीवरुन अधिकाऱ्यांवर नगरसेवकांनी हल्लाबोल केल्यानंतर प्रशासनाची भंबेरी उडाली. जल अभियंता सुरेश कुलकर्णी यांनी प्रशासनाकडून प्रायोगिक तत्त्वावर काही प्रभागात शहरात दिवसाआड पाणी पुरवठा सुरु केल्याचे सांगितले. काँग्रेसचे गटनेते शारंगधर देशमुख यांनी 'पाणी पुरवठा विस्कळीत झाला आहे. अवेळी पाणी पुरवठ्याने नागरिक त्रस्त आहेत. तरीही सभागृहाला विचारात न घेता परस्पर दिवसाआडचा प्रस्ताव कसा तयार केला. परस्पर निर्णय घ्यायला तुम्ही जहागीरदार आहात काय, पाणी पुरवठा नियोजन करताना नगरसेवकांना विश्वासात न घेतल्यास कायदा हातात घ्यावा लागेल,' असा इशारा दिला. भाजपचे विजय सुर्यवंशी यांनीही अधिकाऱ्यांना शहरवासीयांना पाणी कसे सुरळीत देणार, ते स्पष्ट करा अशी सूचना केली.

दरम्यान सभेत शहरातील अनधिकृत नळ कनेक्शनवरुन नगरसेवकांनी प्रशासनावर हल्लाबोल केला. मोठ्या गृहप्रकल्पांच्या पाणी पुरवठ्यावर स्थायी समिती सभेत आशीष ढवळे यांनी प्रश्नचिन्ह उपस्थित केले. नगरसेवक सत्यजित कदम यांनी हॉटेल, हॉस्पिटलमधील बोगस नळकनेक्शनची चौकशी करुन कारवाई झाली पाहिजे. १०० व २०० रुम्स असलेल्या हॉटेलमधील पाणी बिल हजारात कसे? अधिकाऱ्यांवर कुणाचा दबाव येत असेल तर सभागृहात सांगावे. शहरात ४५ कोटींची पाणी चोरी होते. गळती काढण्याच्या नावाखाली अधिकाऱ्यांनी चौकाचौकात खड्डे खोदले, दुरुस्ती नाही पण पाणी समस्या निर्माण झाली, असा आरोप केला.

...............

सयाजीमध्ये २०० रुम्स, पाणी बिल ४०००

हॉटेल सयाजीमध्ये जवळपास २०० रुम्स आहेत. मात्र या हॉटेलचे पाणी बिल केवळ चार हजार आहे. शेजारील हॉटेल ओपलचे पाणी बिल ७० हजार ते एक लाखापर्यंत आहे. सयाजी मोठे हॉटेल असून पाणीबिलात इतकी तफावत कशी? असा सवाल नगरसेवक सुनील कदम यांनी केला. कदम म्हणाले,'माजी आमदार महादेवराव महाडिक यांच्या रुईकर कॉलनीतील बंगल्यात तीन माणसे वास्तव्यास आहेत. त्यांना पाच हजार रुपये पाणी बिल येते. रहिवासी मिळकतीसाठी पाच हजार रुपये बिलाची आकारणी होते. याउलट हॉटेल सयाजीचा कमर्शियलमध्ये समावेश असूनही तेथे महिन्याला केवळ चार हजार पाणी बिल, त्या हॉटेलमध्ये मीटररिडरना प्रवेशही नाही. शिवाय हॉटेलच्या पाणी पुरवठ्यासाठी पाणी पुरवठा विभागाने स्वतंत्र व्हॉल्व्ह बसविला, हा काय प्रकार सुरू आहे. सत्ताधारी नेत्यांच्या दबावाला अधिकारी बळी पडत आहेत का?. कदम यांच्या भाषणावेळी सभागृहात सत्तारुढ काँग्रेस आघाडीचे केवळ नऊ नगरसेवक उपस्थित होते. दोन्ही काँग्रेसचे कारभारी नगरसेवकही सभागृहाबाहेर होते.

.............

बेकायदेशीर नळकनेक्शन तपासणीसाठी स्वतंत्र पथकाच्या माध्यमातून हॉटेल्स, हॉस्पिटलसह मोठी बिले असणाऱ्या मिळकतींच्या बिलाची फेरपडताळणी होईल. मीटर रिडरमार्फत योग्य बिले दिलीत की नाही, याची चौकशी करुन पुढील कार्यवाही होईल. गळतीची चार ठिकाणे निश्चित केली आहेत. प्रत्येकी २८ ते ३० लाखाचे एस्टिमेट केले आहे. अमृत योजनेंतर्गत नवीन टाकी, पाइपलाइन प्रस्तावित आहे.

-अभिजित चौधरी, आयुक्त

पालिकेकडे ५० हजार नाहीत

नगरसेवक भूपाल शेटे यांनी अधिकाऱ्यांच्या निष्काळजीपणामुळे सुभाषनगरात रोज दीड लाख लिटर पाणी वाया जात असल्याचे सांगत त्यासंबंधी फोटो सभागृहात सादर केले. ९० एमएलडी पाण्याचा हिशोब लागत नाही, त्याचा हिशेब अधिकाऱ्यांवर निश्चित करावा अशी मागणी केली. नगरसेविका सरिता मोरे यांनी कोकणे मठ प्रभागातील पाइपलाइन गळती काढायला महापालिकेकडे ५० हजार रुपये नाहीत याबद्दल प्रशासनाची लाज वाटते, असा टोला लगाविला.

म. टा. प्रतिनिधी, कोल्हापूर

वाहतुकीची सोय होण्यासाठी पर्यायी शिवाजी पुलाचे काम मार्गी लागण्यासाठी पोलिस प्रशासन पाठपुरावा करीत आहे. थेट संबंध नसला तरी दळणवळण, वाहतुकीचा प्रश्न सोडविण्यासाठी पर्यायी शिवाजी पुलासाठी पोलिस प्रशासन ठोस पाठपुरावा करीत आहे. पालकमंत्र्यांशी सकारात्मक चर्चा झाली आहे, अशी माहिती बुधवारी जिल्हा पोलिस अधीक्षक संजय मोहिते यांनी बी वार्ड अन्याय निवारण कृती समितीच्या शिष्टमंडळास दिली. यावेळी शिवाजी पुलावरील अपघातप्रकरणी अधिकारी व कामात अडथळा आणलेल्यावर गुन्हा दाखल करा, अशा मागणीचे निवेदनही त्यांनी दिले.

निवेदनात म्हटले आहे की, पर्यायी शिवाजी पूल अनेक वर्षांपासून रखडला आहे. याउलट आताचा शिवाजी पूल वाहतुकीस धोकादायक बनला आहे. लालफितीचा कारभार व राजकीय इच्छाशक्तीच्या अभावामुळे पुलाचे काम मार्गी लागलेले नाही. परिणामी २६ जानेवारी २०१८ रोजी पुलावर अपघात होऊन १३ जणांचा बळी गेला. त्यावेळी पर्यायी पूल रखडल्याप्रकरणी संबंधित दोषींवर कारवाईसाठी बैठक झाली होती. बैठकीत उपअधीक्षक सूरज गुरव यांची चौकशी अधिकारी म्हणून नियुक्ती केली. त्यानंतर पुढे कोणतीही कार्यवाही झालेली नाही. स्ट्रक्चरल ऑडिटमध्ये आताचा पूल वाहतुकीस योग्य नसल्याचे म्हटले आहे. त्यामुळे तातडीने पर्यायी पूल पूर्ण करावे.

पर्यायी पुलाचे रेंगाळलेले काम पूर्ण होण्यासाठी पाठपुरावा सुरू आहे. केंद्रीय पुरातत्त्व विभागाच्या अडथळ्यामुळे काम थांबले, असे सांगितले जाते. मात्र, त्याशेजारी मंदिर व इतर बांधकामे आहेत. त्यामुळे पर्यायी पुलाचे काम पूर्ण करण्यासाठी विविध पर्यायांचा अभ्यास केला जात असल्याचे पोलिस अधीक्षक संजय मोहिते यांनी सांगितले.

यावेळी किसनराव कल्याणकर, रामेश्वर पतकी, श्रीधर कुलकर्णी, योगेश शेटे, चिन्मय सासणे, दादासाहेब माने, प्रशांत बरगे, राहुल चौधरी, सुमित खानविलकर, तौफिक शेख, दिलीप परीट आदी उपस्थित होते.

००००००००००००

कोल्हापूर

किरकोळ कारणावरून दौलतनगरमध्ये तिघांनी वडापावच्या गाडीवर आणि वाहनांवर तलवार, कोयत्याने हल्ला करून दहशत माजवली. मारहाणीत जयश्री संजय पाटील (वय ४८, रा. तीनबत्ती चौक, दौलतनगर) जखमी झाल्या. मंगळवारी सायंकाळी साडेपाचच्या सुमारास ही घटना घडली. याप्रकरणी गौरव भालकर याच्यासह तिघांवर गुन्हा दाखल झाला.

कोल्हापूर : सव्वा वर्षानंतर जिल्हा परिषद पदाधिकारी खांदेपालटास मदत करावी, असे साकडे आमदार डॉ. सुजित मिणचेकर यांनी माजी आमदार महादेवराव महाडिक यांना घातले. मंगळवारी राजाराम कारखान्यावर ही भेट झाली. भेटीवेळी जि. प. उपाध्यक्षांसह चार सभापती बदलासंबंधी चर्चा झाली. महाडिक यांनी अध्यक्षपद सोडून इतर पदाधिकारी बदलासंबंधी हवी ती मदत करण्याची ग्वाही डॉ. मिणचेकर यांना दिली. यावेळी राजेश पाटील, राजू मगदूम, राहुल आवाडे उपस्थित हेाते.

--------------------------

स्लॅब पाडताना एकाचा मृत्यू

कोल्हापूर

जुनी इमारत पाडताना अंगावर स्लॅब पडल्याने नेर्ली - तामगांव (ता.करवीर) येथील सीताराम वसंत पोवार (वय ४२) यांचा मृत्यू झाला. गावातील ग्रामपंचायतीमागील जुनी इमारत पोवार हे ब्रेकरच्या सहाय्याने पाडत होते. त्यावेळी अचानक स्लॅब खाली कोसळला. त्याखाली सापडून पोवार ठार झाले. बुधवारी सायंकाळी पाच वाजता ही दुर्घटना घडली. ब्रेकरच्या सहाय्याने पोवार स्लॅब फोडत असताना तिन्ही बाजूच्या भिंती व कॉलम त्यांनी फोडले. एका बाजूची भिंत पाडत होते, त्यावेळी खचलेला वरील स्लॅब कोसळला. त्याखाली सापडल्याने ते जागीच ठार झाले. त्यांच्या पश्चात आई, वडील, पत्नी, दोन मुले असा परिवार आहे.

-----------------------

लालफितीला कंटाळून

दोघांचा आत्मदहनाचा प्रयत्न

फोटो

............

पोलिसात गुन्हा दाखल, लालफितीचा फटका

म. टा. प्रतिनिधी, कोल्हापूर

सरकारच्या लालफितीला कंटाळून १ मे रोजी कामगार दिनी दोघांनी पेटवून घेत आत्मदहनाचा प्रयत्न केला. पोलिसांनी सार्वजनिक ठिकाणी शांततेचा भंग केल्याचा आरोप दोघांवर ठेवत गुन्हा दाखल केला. संदीप मारूती नाईक (वय - ३५, रा. हडलगे, ता. गडहिंग्लज) यांनी जिल्हाधिकारी कार्यालयासमोर तर संजय रघुनाथ चव्हाण (वय - ४३, रा. बौध्दवाडी, ता. चिपळूण, जि. रत्नागिरी) यांनी भविष्यनिर्वाह निधी कार्यालयासमोर आत्मदहनाचा प्रयत्न केला.

याबाबतची अधिक माहिती अशी, सरकारची दप्तर दिरंगाई, प्रशासकीय अनास्थेला कंटाळून शहर आणि जिल्ह्यातील १५ जणांनी आत्मदहनाचा इशारा दिला होता. १ मे रोजी कामगार दिनी तरी न्याय मिळावा, अशी त्यांनी मागणी केली होती. मात्र न्याय न मिळाल्याने दोघांनी अंगावर रॉकेल ओतून घेत आत्मदहनाचा प्रयत्न केला. उर्वरितांची पोलिसांनी समजूत काढून त्यांना परावृत्त केले. दरम्यान, आत्मदहनाचा प्रयत्न केलेले नाईक यांची २४ गुंठे जमीन नेसरी कोवाड रस्त्यावरील घटप्रभा नदीवरील पुलासाठी चार वर्षापूर्वी संपादीत केली. त्याचा मोबदला सरकारकडून देण्यात आला नाही. भरपाईसाठी गडहिंग्लज प्रांताधिकारी, सार्वजनिक बांधकाम विभागाकडे त्यांनी वेळोवेळी हेलपाटे मारले. प्रत्येकवेळी वेगवेगळी कारणे सांगून त्यांना न्यायापासून वंचित ठेवले. मोबदला न मिळाल्याने आर्थिक फरफट होत राहिली. त्याला कंटाळून मंगळवारी ध्वजारोहणाचा कार्यक्रम सुरू असतानाच त्यांनी अंगावर रॉकेल ओतून घेत पेटवून घेतले. बंदोबस्तासाठी असलेल्या पोलिसांनी तातडीने धाव घेत शर्टला लागलेली आग विझवून रॉकेलचे कॅन, आगपेटी ताब्यात घेतले. तत्पूर्वी नाईक भाजून जखमी झाले.

ताराबाई पार्कमधील भविष्यनिर्वाह निधी कार्यालयासमोर आत्मदहनाचा प्रयत्न केलेले चव्हाण हे चिपळूण तालुक्यातील पेड आंबे येथील मंदार एज्युकेशन सोसायटीत नोकरीस होते. सोसायटीकडून त्यांना भविष्य निर्वाह निधी देय होता. त्यासाठी ते सोसायटीकडे आणि भविष्य निर्वाह कार्यालयाकडे पाठपुरावा करीत होते. तरीही त्यांना निर्वाह निधी मिळाला नाही. यामुळे ते १ मे रोजी सकाळी आठ वाजता अंगावर रॉकेल ओतून घेत लायटरने पेटवून घेतले. हा प्रकार निदर्शनास आल्यानंतर पोलिसांनी आग विझवली.

नवे पारगाव (ता. हातकणंगले) येथील सुप्रिया शिवाजी सूर्यवंशी हिने विक्रीकर निरीक्षक परीक्षेत राज्यात नववा क्रमांक मिळवला. लोकसेवा आयोगाच्या राज्य उत्पादन शुल्क परीक्षेतही त्यांनी खुल्या महिला गटात १३ वा क्रमांक मिळवला आहे. वारणानगर येथील विनय कोरे स्पर्धा परीक्षा मार्गदर्शन केंद्रात सुप्रिया यांनी अभ्यास केला.

दूध संस्थांच्या मनमानीला चाप

फॅटसाठी फक्त २० मिली दूध घेण्याचा आयुक्तांचा आदेश

म. टा. प्रतिनिधी, कोल्हापूर

प्राथमिक दूध संस्थांनी फॅट टेस्टिंगसाठी २० मिलीपेक्षा अधिक दूध घेवू नये, तसेच फॅटसाठी घेतलेले शिल्लक दूध त्वरीत उत्पादकांना परत देण्याचे आदेश दुग्ध आयुक्त आर. आर. जाधव यांनी बुधवारी दिले. आयुक्त्यांच्या आदेशामुळे प्राथमिक दूध संस्थांकडून उत्पादकांच्या होणाऱ्या लुटीला पायबंद बसणार आहे. दरम्यान, आयुक्तांचा आदेश दुपारपर्यंत पोहोचला नसल्याने संभाजी ब्रिगेडच्या कार्यकर्त्यांनी ताराबाई पार्क येथील पशु, दुग्ध व मत्स विभागाच्या कार्यालयाला ठाळे ठोकण्याचा इशारा दिल्याने येथे मोठा पोलिस बंदोबस्त तैनात करण्यात आला होता. यामुळे कार्यालय परिसरात काहीकाळ तणावाचे वातावरण निर्माण झाले होते.

दुधाचे फॅट व एस. एन. एफ. वर दर अवलंबून असल्याने त्याची गुणवत्ता तपासणी करुनच दूध स्वीकारले जाते. तपासणीसाठी दूध उत्पादकांचे किती दूध घ्यायचे, याबाबत कोणतेच नियम अथवा निर्देश नसल्याने संस्थाचालकांच्या मनमानीप्रमाणे दूध स्वीकारले जात होते. तसेच फॅट टेस्टिंगनंतर शिल्लक दूध उत्पादकांना परत दिले जात नव्हते. टेस्टिंगसाठी केवळ पाच ते दहा मिली दूध लागत असताना त्यापेक्षा जास्त दूध घेतले जात होते. त्यामुळे सकाळ व सायंकाळ अशा दोन सत्रामध्ये उत्पादकांचे सुमारे २०० मिली दूध जात होते. त्याचा फटका उत्पादकांना बसत होता. याविरोधात संभाजी ब्रिगेडने दुग्ध विभागाकडे तक्रार दाखल केली होती. तसेच दोन मे पर्यंत याबाबत योग्य तोडगा न काढल्यास येथील दुग्ध विभागाच्या कार्यालयाला तीन मे रोजी ठाळे ठोकण्याचा इशारा दिला होता.

या तक्रारीची दखल घेवून पुणे आयुक्त कार्यालयाने संपूर्ण राज्याचा आढावा घेवून निर्णय घेण्याची कार्यवाही सुरू केली होती. राज्याचा आढावा घेतल्यानंतर बुधवारी आयुक्तांनी फॅटसाठी २० मिलीपेक्षा अधिक दूध घेण्यास मनाई करणारा आदेश काढला आहे. तसेच फॅट घेतल्यानंतर शिल्लक दूध उतपादकांना परत देण्याचे आदेश दिले आहेत. २० मिलीपेक्षा उत्पादकांचे दूध घेतल्यास कारवाई करणाचा इशारा दिला आहे. आयुक्तांच्या आदेशानुसार मिल्क अॅनालायझर (पाच ते २०), मिल्को टेस्टर (दहा ते २०) व गर्बर मेथडसाठी (१०.७५ मिली) यापेक्षा अधिक दूध प्राथमिक दूध संस्थांना घेता येणार नाही. नव्या आदेशानुसार प्राथमिक दूध संस्थांच्या मनमानीला चाप बसणार असून उत्पादकांचे दररोज होणारे नुकसानही थांबणार आहे.

दरम्यान, आयुक्तांचा आदेश दुपारपर्यंत पोहोचला नसल्याने संभाजी ब्रिगेडच्या कार्यकर्त्यांनी कार्यालयाला ठाळे ठोकण्याचा इशारा देत कार्यालयात पोहोचले. सांगली येथे संभाजी ब्रिगेडच्या कार्यकर्त्यांनी वैद्यमापन कार्यालय फोडल्याची माहिती मिळाल्याने येथेही असा अनुचित प्रकार घडू नये, यासाठी शाहूपुरी पोलिस ठाण्याचे पोलिस कुमक दाखल झाली. त्यामुळे कार्यालय परिसरात तणाव निर्माण झाला होता. सायंकाळी दुग्ध आयुक्त जाधव यांचा आदेश प्राप्त झाल्यानंतर कार्यकर्त्यांनी आंदोलन मागे घेतले.

फोटो आहे

...................

ज्येष्ठ नागरिकांचे साखळी उपोषण

जिल्हाधिकाऱ्यांना आज निवेदन देणार

म. टा. प्रतिनिधी, कोल्हापूर

ज्येष्ठ नागरिकांसाठी स्वतंत्र आयोग निर्माण करावा, २०१५ च्या ज्येष्ठ नागरिक धोरणास आर्थिक तरतुदीसह मंजुरी द्यावी, विनामूल्य आरोग्य विमा योजना लागू करावी आदी मागण्यांसाठी महाराष्ट्र ज्येष्ठ नागरिक महासंघ (फेस्कॉम) कोल्हापूर विभागाच्यावतीने दोन दिवसीय उपोषणाला सुरुवात झाली. जिल्हाधिकारी कार्यालयासमोर बुधवारी केलेल्या उपोषणामध्ये सुमारे ५० ज्येष्ठ नागरिक सहभागी झाले होते. ज्येष्ठ नागरिकांनी दिवसभर दिलेल्या घोषणांनी जिल्हाधिकारी कार्यालय परिसर दणाणून गेला होता. मागण्यांचे निवेदन गुरुवारी (ता. ३) जिल्हाधिकारी अविनाश सुभेदार यांना शिष्टमंडळाच्यावतीने देण्यात येणार आहे.

सरकारकडे १९९९ पासून ज्येष्ठ नागरिकांच्या मागण्या प्रलंबित आहेत. सरकारने प्रथम १९९९ मध्ये ज्येष्ठ नागरिकांसाठी धोरण जाहीर केले. धोरणाची पुनर्रचनाही करण्यात आली. सप्टेंबर २०१५ मध्ये अंतिम पुनर्रचना झाल्यानंतरही अद्याप आर्थिक तरतुदीसह धोरणांची अंमलबजावणी केलेली नाही. तसेच याबाबतचा कोणताही अध्यादेश काढण्यात आलेला नाही. सेवानिवृत्तीचे वय ५८ असताना ६५ वर्षावरील व्यक्तींचा ज्येष्ठ नागरिक म्हणून मान्यता दिला जात आहे. यामुळे ज्येष्ठ नागरिकांना मिळणाऱ्या अनेक सरकारी योजनांचा उपभोग घेता येत नाही. याबाबत स्थानिक पातळीवर जिल्हाधिकारी, जिल्हा परिषद, समाज कल्याण अधिकारी यांच्यासमवेत व एकत्र बैठक झाली आहे. मात्र तरीही मागण्यांबाबत सकारात्मक भूमिका घेतलेली नाही.

यामुळेच बुधवारपासून ज्येष्ठ नागरिक महासंघाच्यावतीने प्रत्येक जिल्हाधिकारी कार्यालय व तहसील कार्यालयासमोर दोन दिवसीय उपोषण करण्यात येत आहे. त्याचबरोबर भुदरगड तहसील वगळता जिल्ह्यातील सर्वच तहसील कार्यालयासमोर ज्येष्ठ नागरिकांनी साखळी उपोषण केले. फेस्कॉमचे विभागीय अध्यक्ष डॉ. मानसिंगराव जगताप, श्रीकांत आडीवरेकर, आर. डी. नार्वेकर, डॉ. दशरथ चौगुले, डॉ. शिवाजीराव हिलगे, सुलोचना श्रीधर, सी. के. नलवडे, माजी प्राचार्य य. ना. कदम, भरत चव्हाण, वसंत खांडेकर, सुशिला ओडेयार, जयवंत लाटकर, आण्णासाहेब दानोळे यांच्यासह सुमारे ५० ज्येष्ठ नागरिक साखळी उपोषणामध्ये सहभागी झाले होते.

चौकट

खासदार महाडिक यांची उपोषणस्थळी भेट

ज्येष्ठ नागरिकांनी सुरू केलेल्या साखळी उपोषणाला खासदार धनंजय महाडिक यांनी दुपारी भेट दिली. यावेळी ज्येष्ठ नागरिकांना येणाऱ्या विविध समस्यांबाबत विभागीय अध्यक्ष डॉ. जगताप यांनी माहिती दिली. ज्येष्ठ नागरिकांना सरकारी रुग्णालयात मोफत औषधोपचार करण्यासाठी नियोजन मंडळास पत्रव्यवहार केला असून पेन्शनबाबत राज्य व राष्ट्रीयस्तरावर प्रयत्न करण्याचे आश्वासन खासदार महाडिक यांनी यावेळी दिले.

महापालिका .... लोगो

.....

फोटो

.................

उत्पन्न ४४ कोटीचे, पाणीचोरी ४५ कोटींची

अपुऱ्या पाणी पुरवठ्यावरुन सभागृहात गदारोळ, प्रशासनाच्या निषेधाच्या घोषणांनी सभागृह दुमदुमले

म. टा. प्रतिनिधी, कोल्हापूर

कोल्हापूर शहरातील अपुऱ्या पाणी पुरवठ्यावरुन महापालिकेच्या सर्वसाधारण सभेत गदारोळ झाला. नगरसेवकांनी पाणी पुरवठा विभागाला अनागोंदी व नियोजनशून्य कारभावरून धारेवर धरले. शहरात रोज ५० एमएलडीपेक्षा जादा पाण्याची चोरी होत असून अनेक मीटर रीडर हप्तेखोर बनले आहेत. पाणी पुरवठा विभागातील अधिकाऱ्यांच्या संपत्तीची चौकशी करा, शहरातील हॉटेल, मंगल कार्यालये, दवाखाने व मोठ्या गृहप्रकल्पांची चौकशी झाल्यास पाणी कुठे मुरतेय याचा पर्दाफाश होईल. बेकायदेशीर नळ कनेक्शनची संख्या हजारोंच्या संख्येत असून महापालिकेच्या पाण्याची राजरोस लूट होत आहे. पाणी पुरवठा विभागाचे वार्षिक उत्पन्न ४४ कोटी आणि पाणीचोरी ४५ कोटी रुपयांची असा अजब कारभार पाणी पुरवठा विभागात सुरु असल्याचा हल्लाबोल महापालिकेच्या विशेष सभेत नगरसेवकांनी केला. उपमहापौर सुनील पाटील अध्यक्षस्थानी होते.

अनियमित पाणी पुरवठ्यावरुन नगरसेवकांनी जलअभियंता सुरेश कुलकर्णी यांना धारेवर धरले. पाणी गळतीमुळे महापालिकेला वर्षाला १८ कोटी रुपयांचा फटका बसून अधिकाऱ्यांवर त्याची जबाबदारी निश्चित करावी असा आक्रमक पवित्रा नगरसेवकांनी घेतला. शहरातील अपुऱ्या पाणी पुरवठ्याबाबत उपाययोजनेच्या अनुषंगाने बुधवारी विशेष सभा बोलावली होती. सभेची पूर्वनियोजित वेळ दुपारी बाराची होती. मात्र दीड वाजता सभेला सुरुवात झाली. सभाध्यक्ष पाटील, आयुक्त अभिजित चौधरी हे सभागृहात आसनस्थ झाले, पण पाणी पुरवठा विभागाचा एकही अधिकारी सभागृहात नव्हता. भाजपचे गटनेते विजय सुर्यवंशी यांनी नेमक्या याच विषयाकडे सभागृहाचे लक्ष वेधले. पाण्यासाठी विशेष सभा असताना संबंधित गैरहजर का यावरुन त्यांनी प्रशासनाला पेचात पकडले. त्यानंतर काही वेळातच अधिकारी दाखल झाले.

नगरसेवक राजसिंह शेळके यांनी ई वॉर्डासह शहरातील अपुरा पाणी पुरवठा, पाणी गळतीची वस्तुनिष्ठ मांडणी करत चर्चेला सुरुवात केली. स्थायी सभापती आशिष ढवळे यांनी पाणी गळती दूर करण्यासंदर्भात प्रशासनाने काय नियोजन केले, की उन्हाळ्यात लोकांनी तहानलेलेच राहायचे असा सवाल केला. त्यावर जल अभियंता कुलकर्णी यांनी गळती दुरुस्तीचे काम महिनाभरात पूर्ण करण्यात येईल असे उत्तर दिले. नगरसेवक भूपाल शेटे, संतोष गायकवाड, विजय खाडे, मेहजबीन सुभेदार, शोभा कवाळे, सूरमंजिरी लाटकर, शेखर कुसाळे, माधवी गवंडी, हसीना फरास, राहुल माने, उमा इंगळे, अशोक जाधव, किरण नकाते, माधुरी लाड यांनी शहरातील विविध भागातील पाणी समस्यांवरुन प्रशासनाला खडे बोल सुनावले.

............

सभागृहात आणले ड्रेनेजमिश्रीत पाणी

टेंबलाईवाडी प्रभागात दूषित पाणी पुरवठा होत आहे. ड्रेनेजलाइनमधील सांडपाणी पिण्याच्या पाण्यामध्ये मिसळत आहे. अधिकाऱ्यांकडे तक्रार करुनही पाइपलाइन दुरुस्ती झालेली नाही. त्यामुळे प्रशासनाच्या निषेधार्थ नगरसेवक कमलाकर भोपळे यांनी ड्रेनेजमिश्रीत पाणी बाटलीत भरुन सभागृहात आणले. प्रभागातील नागरिक कित्येक दिवस दूषित पाणी पित असून त्यांच्या व्यथा, वेदना अधिकाऱ्यांना कळाव्यात यासाठी आपणही दूषित पाणी पिऊ या असे म्हणत ते आयुक्तांसमोर दाखल झाले. दूषित पाण्याने भरलेला ग्लास आयुक्तांकडे सादर करत असतानाच नगरसेवक सत्यजित कदम, विजय सुर्यवंशी यांनी त्यामध्ये हस्तक्षेप केला. हे पाणी मी पिणार आहे, असे सांगत भोपळे यांनी तसा प्रयत्न केला. तेव्हा इतर नगरसेवकांनी पाण्याची बाटली व ग्लास बाजूला काढला.

......

आता शोले स्टाइल आंदोलन

नगरसेविका पूजा नाईकनवरे यांनी शाहूपुरीतील पाण्याच्या टाकीवरुन प्रशासनावर टीका केली. मार्चअखेर पाण्याची टाकी कार्यान्वित करायची ग्वाही दिली होती. मे महिना उजाडला तरी पाण्याच्या टाकीचा वापर होत नाही. प्रशासनाच्या विरोधात आता शोले स्टाईलने पाण्याच्या टाकीवरुन आंदोलन करावे लागेल, असा इशारा त्यांनी दिला. नगरसेविका स्मिता माने यांनी ई वॉर्डाला १५ एमएलडी पाण्याची आवश्यकता असताना सात एमएलडी पाणी पुरवठा होतो. सभागृहात लक्ष वेधूनही नगरसेवकांच्या तोंडाला पाने पुसण्याचा प्रकार प्रशासनाकडून सुरु असल्याचा आरोप केला. नगरसेविका रुपाराणी निकम, प्रा. जयंत पाटील, लाला भोसले यांनी राजेंद्रनगर भागातील अपुऱ्या व अवेळी पाणी पुरवठ्यात सुधारणा करण्याची सूचना केली. नगरसेविका सुरेखा शहा यांनी पाण्याच्या टाक्यांचा वापर होणार नसेल तर त्या बांधल्या कशासाठी असा सवाल केला.

.....

६९ वर्षांपूर्वीच्या पाइपलाइनवर भार

ए, बी, सी आणि डी वॉर्डात ६९ वर्षापूर्वीच्या पाइपलाइन आहेत. जुन्या कोल्हापूरच्या बहुतांश भागाला त्याव्दारे पाणी पुरवठा होतो. त्यावेळी दहा हजार कनेक्शन होती, आता ८० हजारापर्यंत कनेक्शन वाढली आहेत. शहराची वाढ होत असताना त्याचा विचार झाला नाही. पूर्वीच्या २७ इंची पाइपलाइनला समांतर पाइपलाइन टाकणे अत्यावश्यक आहे. मात्र पाणी पुरवठा विभागाकडे नियोजनाचा अभाव असल्याचे नगरसेविका उमा बनछोडे यांनी सांगितले.

..........

फोटो

.................

मजलेत एकवटले हजारो हात

'पाणी फाऊंडेशन' चा उपक्रम, सहा एकरांत महाश्रमदान

म. टा. वृत्तसेवा, हातकणंगले

मजले (ता.हातकणंगले)ग्रामस्थांसह विविध संस्था आणि संघटनांनी महाराष्ट्र दिनी महाश्रमदान केले. 'पाणी फाऊंडेशन' ने आयोजित केलेल्या या महाश्रमदान शिबिरात सुमारे अडीच ते तीन हजार अबालवृद्ध

मजले गाव पाणीदार करण्यासाठी एकवटले.

पाणी फाऊंडेशनने केलेल्या आवाहनास प्रतिसाद देत मजलेतील प्रत्येक घरातील सदस्य महाश्रमदानासाठी हजर राहिला. पहाटे साडेपाच वाजल्यापासून महिला,पुरुष व लहान मुले हातात खोरे,पाटी,टिकाव घेऊन यामध्ये सहभागी झाले. तर सांगली येथील संजय जाधव ग्रुपच्या जेसन फाऊंड्रीतील अडीचशे कामगार व अधिकाऱ्यांनी कामगार दिनाची सुट्टी श्रमदानाने साजरी केली. सुमारे अडीच ते तीन हजार जणांनी एकाच वेळी झपाझप पाट्या टाकून खोरे,कुदळ हातात घेतल्याने एका दिवशी तब्बल पाच ते सहा एकर क्षेत्रावर श्रमदान होऊन डोंगर व पायथ्याशी सर्वत्र समांतर खोल चरी केलेल्या दिसून आल्या.

या महाश्रमदानासाठी उदगांवच्या रोहीदास युवा मंच, संतसेना,संभाजी प्रतिष्ठान,ड्रीम फाऊंडेशनचे स्वयंसेवक, भारतीय जैन संघटनेचे राज्य व जिल्ह्यांचे पदाधिकारी, इचलकरंजी नागरिक मंच, आचार्य आनंद युवा मंच, संवाद सामाजिक मंडळ, मारवाडी ट्रेकींग ग्रुप, वीर सेवादल , शिवसेना शाखा कबनूर यांचे सहकार्य लाभले. प्रांताधिकारी समीर शिंगटे व तहसीलदार वैशाली राजमाने यांच्यासह कृषी विभागाच्या अधिकाऱ्यांनी श्रमदानास भेट देऊन माहिती घेतली.

दरम्यान, मजले येथे पाणी फाऊंडेशनचे काम गेल्या तीन महिन्यांपासून सुरु आहे. यासाठी जलमित्र मोठ्या संख्येने सक्रीय सहभाग घेऊन कामे करत आहेत. मंगळवारी झालेल्या महाश्रमदानात एकाच वेळी अडीच ते तीन हजारजण एकवटल्याने तीन महिन्याचे काम एका दिवसात झाल्याने समाधान व्यक्त होत आहे. या महाश्रमदानासाठी आलेल्या स्वयंसेवकासाठी संदीप कारंडे यांच्या सोनाली उद्योग समूहाच्या वतीने नाष्टा व चहाची सोय करण्यात आली. तर अविनाश पाटील यांच्या पार्श्वअॅग्रोच्या वतीने केळी वाटप करण्यात आली. पिण्याच्या पाण्याची सोय सुनील पाटील (कोरोची ), भरत पाटील यांनी केली.

--------------------

चौकट

दिव्यांग सूरजचा सहभाग

या महाश्रमदानात अबालवृद्धांसह हजारो जलमित्रांनी उपस्थिती लावली. मात्र दोन्ही पायांनी अपंग असणाऱ्या संतोष गुरव यांच्या सहभागाने या मोहिमेला एक वेगळेच बळ मिळाले. त्याचबरोबर दक्षिण अफ्रिकेतून आलेल्या पूजा व रोहन पाटील या दोघांनी केलेल्या श्रमदानाचे सर्वांनी कौतुक केले.