साप्ताहिक बाजारभाव

उष्म्यावर उतारा फळांचा

कलिंगड, काकडी, चिकूला ग्राहकांचा प्रतिसाद; भाजीपाल्याचे दर स्थिर

फोटो आहे...

म. टा. प्रतिनिधी, कोल्हापूर

गेल्या काही दिवसांपासून कोल्हापूरचा पारा सातत्याने वाढत असल्याने नागरिकांच्या अंगातून घामाच्या धारा निघत आहे. असह्य उन्हापासून शरीराला गारवा मिळावा यासाठी बाजारपेठेत फळांच्या खरेदीसाठी ग्राहकांची गर्दी होत आहे. कलिंगड, चिकू, डाळिंब, पपई अशा रसाळ फळांबरोबर परदेशी सफरचंद व संत्री खरेदीला ग्राहक विशेष पसंती देत आहेत. फळांची आवक आणि मागणी वाढलेली असताना द्राक्षांची आवक मंदावली आहे. या आठवड्यात भाजीपाल्याचे दर मात्र स्थिर राहिले.

उन्हाळ्यात फळांच्या मागणीत नेहमीच वाढ असते. विशेषत: कलिंगड व हापूस आंब्याची विक्री जास्त होत असते. यावर्षी हापूस आंब्याची आवक अद्याप वाढलेली नसली, तरी इतर फळांची आवक प्रचंड प्रमाणात सुरू आहे. त्यामुळेच उन्हापासून शरीरातील पाण्याचे प्रमाण कायम राखण्यासाठी रसाळ फळांची मोठ्याप्रमाणात खरेदी केली जात आहे. गेल्या एक महिन्यापासून कलिंगडची आवक सुरू झाली असून, सुरुवातीस ७० ते १०० रुपये असणारा दर ३० रुपयांपर्यंत खाली आला आहे. शहरातील प्रमुख बाजारपेठेसह शहरातील अनेक रस्त्यांवर कलिंगड विक्रीचे स्टॉल मांडले आहेत. याचबरोबर बर्फावर ठेवलेले कलिंगडाचे थंडगार काप खाण्यासाठी ग्राहक हातगाडीवर गर्दी करत आहेत.

कलिंगडाबरोबरच चिकू, पपईची विक्री मोठ्याप्रमाणात सुरू आहे. देशी सफरचंद व संत्र्यांचा बहर संपला असला, तरी सध्या बाजारपेठेत आवक कायम असून, ही दोन्ही फळांची परदेशातून आवक सुरू आहे. संत्र्याची सरासरी १०० ते १२० रुपये, तर सफरचंदांची विक्री १२० ते १८० रुपये किलोने विक्री होत आहे. फळांसोबत काकडीची विक्रीही वाढली आहे.

फळभाज्या व पालेभाज्यांचे दर स्थिर

गेल्या काही दिवसांपासून फळभाज्या व पालेभाज्यांच्या दरात प्रचंड घसरण झाली आहे. त्यामुळे सर्वच फळभाज्यांची विक्री सरासरी ३० ते ४० रुपये किलोने होत आहे. या आठवड्यात हाच दर स्थिर राहिला आहे. मेथी, पालक, शेपू यासह सर्वच पालेभाज्यांची आवक कमी झाली आहे. त्यामुळे मेथीच्या दरात गेल्या दोन आठवड्यांपासून वाढ झाली आहे.

.........

फळभाज्यांचे दर (प्रतिकिलो रु.)

वांगी - ४०

टोमॅटो - १०

भेंडी - ४०

ढबू मिरची - ३०

जवारी गवार - ७०

दोडका - ५०

कारली - ३०

ओली मिरची - २०

गाजर - ४०

काकडी - ४०

..............

कांदा - १२ ते १५

बटाटा - ३०

लसूण - ३० ते ४०

आले - ४०

................

पालेभाजी दर (पेंडी रु.)

मेथी - १५

पालक - १०

शेपू - १०

कोथिंबीर - २५

.................

फळांचे दर (प्रतिकिलो रु.)

संत्री - १००

मोसंबी - ४०

डाळिंब - २० ते ४०

सफरचंद - १२० ते १८०

चिकू - ४०

द्राक्षे - ३० ते ७०

केळी - २५ ते ३० रु. डझन

जवारी केळी - ४० ते ५० रु. डझन

कलिंगड - ३० ते ७० रु. नग

हापूस आंबा - ४०० ते १००० रु. डझन

पेटी (४ ते ५ डझन) - चार ते पाच हजार रु.

०००००००००००००००००००००००००००००

एक जूनला सरकारी कार्यालयांना घेराव

किसान मेळाव्यात निर्धार; शेतकऱ्यांच्या रणसंग्रामाची सुरुवात कोल्हापुरातून

फोटो आहे

म. टा. प्रतिनिधी, कोल्हापूर

ऐतिहासिक एक जूनच्या शेतकरी संपात आश्वासने देऊन नंतर पाठीत खंजीर खपसून सरकारने शेतकऱ्यांचा विश्वासघात केला. त्यानंतर लाँग मार्चमध्ये लेखी आश्वासने दिली. त्यांची अंमलबजावणी करण्यासाठी एक जूनला राज्यातील सर्व सरकारी कार्यालयांना घेराव घालण्यात येणार असून, शेतकऱ्यांमध्ये जागृती निर्माण करण्यासाठी देशातील एक कोटी तर राज्यातील २० लाख शेतकऱ्यांच्या स्वाक्षऱ्या घेण्यात येणार आहेत. कोल्हापूरच्या आखाड्यातूनच शेतकऱ्यांच्या रणसंग्रामाला सुरुवात करण्याचा निर्धार अखिल भारतीय किसान सभेच्या मेळाव्यात करण्यात आला. अध्यक्षस्थानी प्राचार्य ए. बी. पाटील होते.

मुख्याध्यापक संघाच्या विद्याभवनमध्ये रविवारी मेळावा पार पडला. यावेळी बोलताना किसान सभेचे निमंत्रक डॉ. अजित नवले म्हणाले, 'शेतकरी संपामध्ये आश्वासनांची खैरात केली, पण प्रत्यक्षात पदरी काहीच पडले नाही. संपामध्ये झालेल्या गद्दारीचा बदला घेण्यासाठी सर्व शेतकरी संघटनांनी एकत्र येण्याची आवश्यकता होती, पण मानअपमान एकमेकांची जिरवाजिरवी करत कोपरखळ्या मारल्या जात होत्या. त्यामुळे लाँग मार्चच्या माध्यमातून सर्वांना एकत्र करण्याचे शिवधनुष्य पेलावे लागले. शेतकऱ्यांच्या पुढच्या पिढीला आत्महत्या करायला लागू नये, यासाठी ४० हजार शेतकऱ्यांनी सात दिवसात नाशिक ते मुंबई अंतर पार केले. वर्षानुवर्षे शेतकऱ्यांना लुटण्याचे काम केलेल्या सरकारच्या धोरणाविरोधात हा लाँग मार्च होता. लाँग मार्चदरम्यान दहा पैकी सहा आश्वासने लेखी दिला. भाजप सोडून इतर सर्व पक्षांनी आंदोलनाला पाठिंबा दिला. विशेषत: शहरवासीयांचा मिळालेल्या पाठिंब्यामुळे आंदोलन यशस्वी झाले. लाँग मार्चदरम्यान लेखी आश्वासने दिली असली, तरी आश्वासनाची अंमलबजावणी करण्यासाठी पुन्हा एक जूनपासून आंदोलन हाती घेण्यात येणार आहे.'

अध्यक्षीय भाषणात प्राचार्य ए. बी. पाटील म्हणाले, 'उत्तम शेती सद्य:स्थितीला चोहोबाजूनी संकटात सापडली आहे. सर्वस्वी सरकारी धोरणांचा परिणाम असून शेतीमालाचे दर सरकारच्या ताब्यात गेले आहेत. पूर्वीचे सरकार चांगले नव्हते, म्हणून यांना निवडून दिले, पण हे सरकार त्यापेक्षाही वाईट असल्याने अशा सरकारवर हल्लाबोल करण्याची आवश्यकता आहे.' समितीचे राज्य कोषाध्यक्ष उमेश देशमुख म्हणाले, 'देश स्वतंत्र झाल्यानंतर सर्व प्रकारची इनामे खालसा झाली, पण देवस्थान जमिनीवरील वर्ग '३'ची अट कायम राहिली. अट कमी करण्यासाठी सरकारने आश्वासन दिले आहे, तरी पण जोपर्यंत याची अंमलबजावणी होत नाही, तोपर्यंत शांत बसायचे नाही. यासाठी जिल्हाधिकारी कार्यालयाला एक जून रोजी घेराव घाला. जोपर्यंत पालकमंत्री चंद्रकांत पाटील आश्वासन देत नाहीत, तोपर्यंत घेराव मागे घेऊ नका असे आवाहन केले.'

मेळाव्यास संभाजी यादव, खंडू वाकचौरे, जितेंद्र चौगुले, दत्ता पाटील, आनंदराव चव्हाण, शिवगोंडा खोत, शिवाजी मगदूम, दिनकर आदमापुरे, अण्णासाहेब रड्डे, चंद्रकला मगदूम यांच्यासह शेतकरी व कामगार उपस्थित होते. प्रा. सुभाष जाधव यांनी प्रास्ताविक केले. सुभाष निकम-कडाळकर यांनी सूत्रसंचालन केले. अमोल नाईक यांनी आभार मानले.

०००००००००००

चौकट

पालकमंत्री पाटील, गिरीश महाजन फायर ब्रिगेड

राज्यात कोणतेही आंदोलन झाले की, आंदोलन शांत करण्यासाठी पालकमंत्री चंद्रकांत पाटील व गिरीश महाजन यांचा फायर ब्रिगेड म्हणून मुख्यमंत्री फडणवीस वापर करतात. कर्जमाफी आंदोलनावेळी पालकमंत्री पाटील पुढे आले. कोल्हापूरचा व्यक्ती फसवणार नाही, म्हणून चर्चा केली. पण नंतर कर्जमाफीत विविध अटींचा समावेश करून विश्वासघात केला. लाँग मार्चवेळी महाजन चर्चेसाठी आले, पण आम्ही लेखी आश्वासनावर ठाम राहिलो. त्यामुळे भविष्यातील आंदोलनात अशा फायर ब्रिगेडसोबत चर्चा करणार नसल्याचे डॉ. नवले यांनी सांगितले.

००००

आंदोलनाचा फायदा पाशा पटेलांना

केंद्र सरकारच्या कृषिमूल्य आयोगाप्रमाणे राज्य कृषिमूल्य आयोगाची स्थापना करून त्याचे अध्यक्षपद पाशा पटेल यांना दिले. शेतकरी नेते असल्याने शेतकऱ्यांचे प्रश्न सुटतील असे वाटले होते, पण वर्षानंतर आयोगाची समिती निर्माण झालेली नाही. लाँगमार्चनंतर किमान आयोगाला कार्यालय मिळेल आणि त्याचा फायदा पटेल यांना होईल असा उपरोधिक टोला डॉ. नवले यांनी लगावला.

०००००००००००

गुरुवारपासून फुकट दूधवाटपाचा सप्ताह

शेतकरी संपानंतर सरकारने जाहीर केलेली दूध दरवाढ मिळत नसून उत्पादकांची लूट केली जात आहे. दररोज लिटरमागे १० ते १२ रुपयांचा दरोडा टाकला जात असून दुधाला जाहीर केलेला दर मिळवण्यासाठी तीन ते नऊ मे दरम्यान फुकट दूध वाटपाचा सप्ताह साजरा करण्यात येणार आहे. यासाठी एक मे रोजी होणाऱ्या ग्रामसभेत ठराव करण्यात येणार आहे. प्रत्येक तहसील व जिल्हाधिकारी कार्यालयासमोर वाजत गाजत दूधवाटप करताना भाजप खासदार, आमदार व कार्यकर्ते, दूध संघांचे प्रतिनिधी व अधिकाऱ्यांना निमंत्रित करण्याचा निर्णय अखिल भारतीय किसान सभेच्या मेळाव्यात घेण्यात आला. आंदोलनानंतरही दूध दरवाढ मिळाली नाही, तर आंदोलनाच्या माध्यमातून राज्यात तमाशा सुरू होईल अशा इशाराही मेळाव्यात देण्यात आला.

'गोकुळ'ला ऊर्जा

बचतीचा पुरस्कार

ऊर्जामंत्री चंद्रशेखर बावनकुळे यांच्या हस्ते पुरस्कार वितरण

फोटो आहे

म. टा. प्रतिनिधी, कोल्हापूर

कोल्हापूर जिल्हा सहकारी दूध उत्पादक संघाने (गोकुळ) सहकाराच्या माध्यमातून दुग्ध व्यवसायाबरोबरच शैक्षणिक, सामाजिक कार्यातून ग्रामीण भागाचा कायापालट केला आहे. ऊर्जाबचतीचा महाराष्ट्र सरकारचा सलग पाचवा प्रथम क्रमांकाचा पुरस्कार मिळवून पुनः एकदा या क्षेत्रात आपले श्रेष्ठत्व सिद्ध केलेले आहे, असे गौरवोद्गार ऊर्जामंत्री चंद्रशेखर बावनकुळे काढले. पुणे येथे राज्य सरकारतर्फे देण्यात येणाऱ्या ऊर्जाबचत पुरस्कार वितरणप्रसंगी ते बोलत होते.

गोकुळच्यावतीने चेअरमन विश्वास पाटील, संचालक विश्वास जाधव, बाळासाहेब खाडे, उदय पाटील, सत्यजित पाटील, कार्यकारी संचालक डी. व्ही. घाणेकर, एस. आर. शिंदे यांनी हा पुरस्कार स्वीकारला.

पुरस्कार स्वीकारल्यानंतर चेअरमन पाटील म्हणाले, 'गोकुळच्या मुख्य डेअरीबरोबरच सर्व शीतकरण केंद्रे तसेच नवी मुंबई येथील पॅकिंग स्टेशनवरही वीज, पाणी, इंधन यांची बचत करत असून, यासाठी आधुनिक तंत्रज्ञानाचा वापर केला जातो. ज्यामुळे दूध उत्पादकांना जास्तीत जास्त लाभ करून देणे हा आमचा मुख्य उद्देश आहे.'

पुणे येथे मेडातर्फे आयोजित केलेल्या पुरस्कार वितरण सोहळ्यास मंत्री गिरीश बापट, दिलीप कांबळे, विजय शिवतारे, ऊर्जा विभागाचे सचिव अरविंद सिंग, महासंचालक बिपीन शर्मा, दिल्लीचे महासंचालक अभय भाकरे उपस्थित होते.

फोटो आहे

केडीसीसीच्या 'बँक ऑन व्हील्स' ला प्रारंभ

म. टा. प्रतिनिधी, कोल्हापूर

कोल्हापूर जिल्हा मध्यवर्ती सहकारी बँकेच्या 'केडीसीसी बँक ऑन व्हील्स' या मोबाईल व्हॅनचे उद्घाटन चेअरमन आमदार हसन मुश्रीफ यांच्या हस्ते झाला. या व्हॅनच्या माध्यमातून बँकेच्या शाखा नसलेल्या गावांमधून तसेच वाड्या-वस्त्यांसह दुर्गम भागात बँकिंग सेवा दिली जाणार आहे.

यावेळी बोलताना चेअरमन मुश्रीफ म्हणाले, 'बँकिंग क्षेत्रातील आधुनिक बदल, योजना ग्राहकांपर्यंत पोहोचविण्यासाठी नाबार्डच्या अर्थसहाय्याने ही व्हॅन सुरू केली आहे. २२ लाखांच्या सर्व सुविधांयुक्त या गाडीला नाबार्डच्यावतीने १५ लाखांचे अर्थसहाय्य मंजूर झाले आहे. या व्हॅनमध्ये एटीएम ,पासबुक प्रिंटर यासह बँकेने तंत्रज्ञानात केलेल्या बदलांची माहिती ग्राहकांना होण्यासाठी अद्ययावत एलसीडीची सुविधाही आहे. तसेच नवीन खाते उघडणे, बँकेच्या एटीम, सीआरएम, पीओएस, या ग्राहक सुविधांची माहिती, एटीम कार्ड कार्यरत करणे, पिन बदलने आदी सुविधा देण्यात येणार आहे.'

आतापर्यंत बँकेच्या केंद्र कार्यालासह राजारामपुरी, मलकापूर, राशिवडे, कुर, गडहिंग्लज मार्केट यार्ड, गगनबावडा, कुडित्रे, कसबा बावडा या नऊ शाखांमध्ये एटीएम सुविधा कार्यरत आहे. केंद्र कार्यालासह मुरगूड, जयसिंगपूर, कागल नं. २, बिद्री, कुरुंदवाड, राधानगरी, वारणानगर, चंदगड, आजरा, गडहिंग्लज शहर, पेठ वडगाव, हातकणंगले, साळवण, कळे, शाहूनगर-परिते, गारगोटी या १७ शाखांमध्ये सीआरएस सेवा कार्यरत आहे.

उद्घाटन समारंभास उपाध्यक्ष विनायक ऊर्फ अप्पी पाटील, नाबार्डचे जिल्हा महाप्रबंधक नंदू नाईक, जिल्हा उपनिबंधक अरुण काकडे, संचालक पी.जी. शिंदे, आर. के. पोवार, भैय्या माने, विलासराव गाताडे, आसिफ फारस, बाबासाहेब पाटील-आसुर्लेकर, राजू आवळे, अशोक चराटी, उदयानी साळुंखे आदी उपस्थित होते.

म. टा. प्रतिनिधी, कोल्हापूर

नागाळा पार्क महावीर गार्डन परिसरात चायनिज खाद्यपदार्थाचे बिल मागितल्याच्या रागातून चार ते पाच तरुणांनी केलेल्या मारहाणीत कामगार गंभीर जखमी झाला. अर्जुन सेशराम मिजार (वय २८, रा. नागाळा पार्क) असे जखमी कामगाराचे नाव आहे. रविवारी सायंकाळी सहा वाजता ही घटना घडली. शाहूपुरी पोलिसांनी एका संशयितास ताब्यात घेतले आहे.

याबाबत माहिती अशी : महावीर उद्यानाच्या फुटपाथाजवळ सुहासिनी सूर्यवंशी यांची चायनिज खाद्यपदार्थाची गाडी आहे. खाद्यपदार्थ तयार करण्यासाठी अर्जुन मिजार हा नेपाळी कामगार आहे. रविवारी सायंकाळी सहाच्या सुमारास चार ते पाच तरुण चायनिज गाडीवर आले. त्यांनी गोबी मंच्युरियनची ऑर्डर दिली. कामगार मिजारने मंच्युरियन बनवून दिली. ते खाल्ल्यानंतर मिजारने बिलाची मागणी केली. पण तरुणांनी बिल देण्यास नकार दिला. मिजारने याचा जाब विचारल्यावर 'तू नेपाळहून इथे कामास आला आहेस. तुझा इथे काही संबंध नाही. आम्हाला तंबी करतोस का?' अशी धमकी देत तरुणांनी त्याला बेदम मारहाण केली. एका तरुणाने त्याच्या डोक्यात लोखंडी रॉड मारला. तसेच खाद्यपदार्थाच्या गाडीची मोडतोड करून नुकसान केले. त्यामुळे इतर खाद्यपदार्थांच्या गाडीवरील ग्राहक पळून गेले. त्यानंतर हल्लेखोरांना आरडोओरड करत पळ काढला.

घटनेची माहिती कळताच गाडीमालक सूर्यवंशी आल्या. त्यांनी शाहूपुरी पोलिसांना हल्ल्याची माहिती दिल्यावर घटनास्थळी पोलिस दाखल झाले. त्यांनी जखमी अर्जुनला सीपीआरमध्ये दाखल केले. पोलिसांनी संशयित शुभम चव्हाणला ताब्यात घेऊन चौकशी सुरू केली आहे.

कार झाडावर

आदळून तिघे जखमी

म. टा. प्रतिनिधी, कोल्हापूर

कोल्हापूर-पन्हाळा रस्त्यावर केर्ली (ता. करवीर) येथे कार झाडावर आदळून झालेल्या अपघातात तिघे जखमी झाले. सतीश शिवाजी शिंदे (रा. शिंदेनगर, फलटण, जि. सातारा), कारचालक महादेव भिकू महानवर, सदाशिव बापू झेंडे (रा. मोरोची, ता. माळशिरस, जि. सोलापूर) अशी जखमींची नावे आहेत. अपघात रविवारी दुपारी चारच्या सुमारास घडला.

याबाबत माहिती अशी : फलटणहून शनिवारी गणपतीपुळे येथे तिघेही कारने गेले होते. देवदर्शन करून रविवारी सकाळी साडेदहा वाजता कोल्हापूरकडे येत होते. दुपारी तीन वाजता त्यांनी जेवण केले. त्यानंतर ते कोल्हापूरकडे येत असताना केर्ली येथे अचानक दुचाकी आडवी आल्याने चालक महानवर यांचा ताबा सुटला आणि कार झाडावर आदळली. त्यात तिघांच्याही डोके, चेहरा, नाक, तोंडाला जखमा झाल्या आहेत. त्यांच्यावर सीपीआरमध्ये उपचार सुरू आहेत. करवीर पोलिस ठाण्यात अपघाताची नोंद झाली आहे.

म. टा. प्रतिनिधी, कोल्हापूर

खासगी बस आणि ट्रॅव्हल्सकडून एसटी महामंडळाच्या दरापेक्षा चौपट दर आकारणी केली जाते. परिवहनमंत्री दिवाकर रावते यांनी दीडपटपेक्षा अधिक भाडे आकारल्यास खासगी वाहनांचा परवाना रद्द करण्याचे आदेश दिले आहेत. मात्र, संबधित ट्रॅव्हल्सचालकांकडून सुट्टीच्या कालावधीत प्रवाशांची आर्थिक लूटमार सुरू आहे. मुंबई ते कोल्हापूर मल्टी अॅक्सल सेमी स्लिपरचा दर प्रतिप्रवासी ३९०० रुपये असून, विमानसेवेपेक्षा खासगी ट्रॅव्हल्सचा दर अधिक आहे. याबाबत प्रादेशिक परिवहन कार्यालयाकडून कोणतीही कारवाई केली जात नाही.

शाळा आणि कॉलेजच्या सुट्टीच्या काळात प्रवाशांना दिलासा देणारा निर्णय परिवहनमंत्री रावते यांनी घेतला. मात्र, या निर्णयाची अद्याप अंमलबजावणी केली जात नाही. उच्च न्यायालयाच्या आदेशानुसार सरकारने खासगी वाहनांवर नियंत्रण ठेवण्यासाठी खासगी कंत्राटी वाहनांचे भाडेदर निश्चित करण्याचा निर्णय घेतला आहे. यानुसार एसटी तिकीटदराच्या तुलनेत खासगी वाहनांना जास्तीत जास्त दीडपट भाडे आकारण्याची मुभा आहे. मात्र, ती चौपट आकारली जाते.

कोल्हापूर ते मुंबई प्रवासाठी १५०० रुपये प्रतिप्रवासी तिकीट दर आहे. गर्दीच्या काळात राज्यातील बस, ट्रॅव्हल्ससह खासगी प्रवासी वाहनांकडून तिकीट दरात मोठ्या प्रमाणात वाढ केली आहे. मनमानी पद्धतीने तिकीट दर आकारणी सुरू असल्याने प्रवाशांची आर्थिक लूटमार सुरू आहे. शिवशाहीचा मुंबईचा दर ६३० रुपये आहे. दीडपट आकारणी केल्यास हा दर ९४५ रुपये प्रतिप्रवासी आकारण्याची मुभा असू शकते. मात्र, प्रतिप्रवासी एक हजारपासून ३९०० रुपयांपर्यंत दर आकारला जात आहे. कोल्हापुरात सुमारे ३५० खासगी ट्रॅव्हल्सधारक आहेत. मिनी ट्रॅव्हल्सची संख्याही दोनशे आहे. एसी, नॉन एसी, स्लीपर, सेमी स्लीपरची सुविधा आहे. गर्दीच्या काळात प्रवाशांची गरज पाहून विविध मार्गांवरील भाडे अद्यापही चौपट आहे. पुणे येथील केंद्र सरकारच्या सेंट्रल इन्स्टिट्यूट ऑ‌फ रोड ट्रान्सपोर्ट (सीआयआरटी) संस्थेची खासगी वाहनांचे दर ठरविण्यासाठी नियुक्ती केली होती. कंत्राटी वाहतुकीच्या विविध वर्गवारीतील सोयीसुविधांचा अभ्यास करून अहवाल सादर केला. या वाहनांची वर्गवारी एसी, नॉन एसी, स्लीपर, आसन व्यवस्थेसह असलेली सेमी स्लीपर आदी प्रकारांत करण्यात आली. मात्र, अद्याप भाडेदर निश्चित झालेले नाहीत. मध्यवर्ती बसस्थानक परिसरातील आराम बसमालकांकडून मनमानी पद्धतीने विविध मार्गावर तिकीटाची दर आकारणी सुरू आहे. मुंबई, पुणे, नाशिक, हैदराबाद, बेंगळुरू, गोवा मार्गावर खासगी ट्रॅव्हल्सचे दर चौपट आहेत. चार दिवसांपूर्वी असलेले ऑनलाइन दर अद्यापही तसेच आहे. कोल्हापूर-मुंबई विमानसेवेचा प्रतिप्रवासी तिकीट दर १९७० रुपये आहे. अवघ्या एक तासात मुंबईत विमान पोहोचते. त्या तुलनेत आठ तासांचा कालावधी ट्रॅव्हल्ससाठी लागतो. तरीही मुंबई-कोल्हापूरसाठी प्रतिप्रवासी चार हजार रुपये तिकिटाची आकारणी केली जात आहे.

०००

कोट

'एसटी महामंडळाचा तिकीट दर लक्षात घेता खासगी वाहतुकीने दीडपटपेक्षा अधिक आकारणी केल्यास संबंधित वाहनांचा परवाना रद्द केला जाईल. मोटार वाहन कायद्यानुसार कारवाईचा बडगा उगारला जाणार आहे. संबंधितांवर प्रादेशिक परिवहन विभागाने कारवाई करायची आहे.

दिवाकर रावते, परिवहनमंत्री

००

'एसटीपेक्षा खासगी ट्रॅव्हल्सकडून मनमानी पद्धतीने दर आकारणी सुरू आहे. सरकारने केलेला नियम अजूनही कागदावरच आहे. पोलिस, आरटीओ आणि शहर वाहतूक नियंत्रण शाखेकडून कोणतीच कारवाई केली जात नाही. त्याचा मोठा फटका प्रवाशांना बसत आहे.

प्रदीप साठे, प्रवासी

००

शिवशाहीचे प्रमुख मार्गांवरील दर

कोल्हापूर-मुंबई ६३०

कोल्हापूर-बोरिवली ६५८

कोल्हापूर-हैदराबाद ९१७

कोल्हापूर-नाशिक ७१४

कोल्हापूर-पणजी (सेमी लक्झरी) ३०१

कोल्हापूर-रत्नागिरी २२७

००

खासगी ट्र्रॅव्हल्सचे दर

कोल्हापूर-मुंबई १४००

कोल्हापूर-बोरिवली १५००

कोल्हापूर-हैदराबाद २५००

कोल्हापूर-नाशिक २२००

कोल्हापूर-पणजी १०००

कोल्हापूर-रत्नागिरी ५००

०००००००००००००

म. टा. प्रतिनिधी, कोल्हापूर

'धावपळीच्या जगात शारीरिक आणि मानसिक स्वास्थ्य हरवत चालले आहे. धर्माचरणाने वर्तन केल्यास मानसिक स्वास्थ्य लाभेल,' असे प्रतिपादन शंकराचार्य विद्याशंकर भारती यांनी केले. येथील श्रीमद जगद्गुरू शंकराचार्य पीठाच्या वतीने आद्य शंकराचार्यांचा २५२६ वा जयंती उत्सव आयोजित केला आहे. या सोहळ्यात विविध क्षेत्रांत उल्लेखनीय कार्य केलेल्या व्यक्तींना त्यांच्या हस्ते रविवारी गौरविण्यात आले. सन्मानचिन्ह, रोख रक्कम असे पुरस्काराचे स्वरूप होते. शुक्रवार पेठेतील करवीर पीठात ३० एप्रिलपर्यंत हा सोहळा सुरू राहणार आहे.

शंकराचार्य विद्याशंकर भारती म्हणाले, 'प्रत्येक कुटुंबातील कर्त्या पुरुषाची पैसा, संपती मिळविण्यासाठी धावपळ सुरू आहे. अनेकदा कुटुंबातील सर्व घटकांना अर्थार्जनासाठी बाहेर पडावे लागत आहे. मात्र, वाढलेल्या गरजांची पूर्ती करण्यासाठी मानसिक स्वास्थ्य हरवले जात आहे. कष्ट करूनही समाधान मिळत नाही. त्यासाठी धर्माचरण महत्त्वाचे आहे. धर्माचरणाने वागले तरच मानसिक स्वास्थ्य लाभेल. करवीरपीठातर्फे समाजाचे ऋण फेडण्याचे काम सुरू आहे. नागरिकांनी या पीठाला भेट देऊन सूचना आणि शंका सांगाव्यात.'

यावेळी वेदशास्त्रसंपन्न तुकाराम मुळे (नगर) यांना वैदिक पुरस्कार, उमाकांत भट्ट (कर्नाटक) यांना सांस्कृतिक पुरस्कार, संजय व्यास यांना कीर्तनकार पुरस्कार, सुहास मधुकर जोशी यांना वैदिक पुरस्कार, अरुंधती धनंजय महाडिक, प्रसाद धर्माधिकारी (शिरोळ) यांना सामाजिक पुरस्कार, सुनंदा कुलकर्णी, माधुरी अशोक ओक यांना कीर्तनकार पुरस्कार, तर सौरभ सतीश कुलकर्णी (परभणी) याला होतकरू विद्यार्थी पुरस्काराने गौरविण्यात आले. यावेळी धनंजय मालू, प्रसाद चिकसकर, किरण मानकरी, महेंद्र इनामदार, आदी उपस्थित होते. अध्यक्ष सुरेश कुलकर्णी यांनी स्वागत केले. सचिव शिवस्वरूप भेंडे यांनी प्रास्ताविक केले. नंदकुमार मराठे यांनी सूत्रसंचालन केले. रामकृष्ण देशपांडे यांनी आभार मानले.

दरम्यान, सोमवारी (ता. ३०) पालखी प्रदक्षिणा काढण्यात येणार आहे. दुपारी चार वाजता शंकराचार्य मठ येथून पालखी प्रस्थान होईल. गंगावेश, रंकाळावेश, ताराबाई रोड, महाद्वार रोड, पापाची तिकटी, गंगावेश परत शंकराचार्य मठ असा पालखीचा मार्ग आहे.

मुंबईहून जादा एसटी

म. टा. प्रतिनिधी, कोल्हापूर

सलग सुट्ट्या आल्याने मुंबईहून कोल्हापूर जिल्ह्यात येणाऱ्यांच्या संख्येत वाढ झाली आहे. प्रवाशांची गर्दी अधिक झाल्याने एसटीने मुंबई आणि जिल्ह्यातील तीन आगारांतून जादा गाड्या सोडल्या आहेत. शिवशाहीचे ऑनलाइन बुकिंग फुल्ल झाल्यानंतर पुणे आणि मुंबई विभागातून कोल्हापूरला येणाऱ्यांसाठी सुविधा उपलब्ध करून दिली आहे. बसस्थानकावर ४० हून अधिक प्रवासी असल्यास 'ऑन दि स्पॉट' वाहतुकीची सुविधा दिली आहे.

सलग सुट्टी आणि यात्रा या पार्श्वभूमीवर एसटीचे मुंबई, पुणे, कोल्हापूर आगार प्रवाशांच्या गर्दीने फुलून गेले आहे. खासगी वाहतूकीकडे वळणारा हा प्रवासीवर्ग थांबविण्यासाठी एसटीने जादा गाड्यांची सोय करून दिली आहे. रविवारी सायंकाळी स्वारगेट येथे कोल्हापूरला येण्यासाठी प्रवाशांची गर्दी झाली. ऐनवेळी झालेल्या गर्दीमुळे काहींनी जादा एसटी सोडण्याची मागणी केली. त्यासाठी कोल्हापूर विभागीय कार्यालयाकडे संपर्क साधला. प्रवाशांची वाढती संख्या पाहून जादा एसटी सोडण्यात आल्या. गडहिंग्लज, चंदगड आणि आजरा आगारातून जादा एसटी सोडल्या. मध्यवर्ती बसस्थानकातूही पाच एसटी सोडण्यात आल्या. मुंबईहून कोल्हापूरकडे येणाऱ्या प्रवाशांची संख्या अधिक असल्याने काही मार्गावरील फेऱ्या कमी करून मुंबई आणि पुणे मार्गावर एसटीची व्यवस्था केली आहे. त्यासाठी कोल्हापूर विभागाने मुंबई आणि पुणे विभागालाही जादा एसटी देण्याची मागणी केली आहे. गर्दीमुळे मुंबई पुणे एक्सप्रेस वेवर वाहतूक पोलिसांनी वीस मिनिटांच्या अंतराने नियोजन केले आहे. लोणावळा घाटात संथ वाहतूक सुरू असून बदललेल्या वेळापत्रकानुसार एसटीचे नियोजन केले जात आहे.

पाइपलाइन फाइल फोटो

................

पान ६ मेन

..........................

विरोध झुगारून 'वारणे'चे काम सुरू होणार

म.टा. वृत्तसेवा, इचलकरंजी -

प्रारंभापासूनच वादाच्या भोवऱ्यात सापडलेल्या वारणा थेट नळपाणी पुरवठा योजनेच्या प्रत्यक्ष कामाचा प्रारंभ मे महिन्याच्या पहिल्या आठवड्यात करण्यात येणार आहे. वादाच्या पार्श्‍वभूमीवर प्रचंड पोलिस बंदोबस्त व सरकारी अधिकाऱ्यांचा ताफा सज्ज करण्यात आला आहे. वादाला झुगारुन ही योजना कोणत्याही परिस्थितीत पूर्णत्वाचा नेण्याचा चंग प्रशासनाने बांधला आहे. त्यामुळे इचलकरंजीवासियांना शुध्द व मुबलक पाणी मिळण्याचा मार्ग सुकर झाला आहे. दरम्यान, योजनेला विरोध करणाऱ्या वारणा बचाव कृती समितीच्या पदाधिकाऱ्यांना पोलिस प्रशासन नोटीस बजावणार असल्याचेही समजते.

इचलकरंजीला पंचगंगा आणि कृष्णा या दोन्ही नद्यांमधून पाणी पुरवठा केला जातो. परंतु पंचगंगा प्रदुषित झाल्याने बहुतांशी वेळा येथील उपसा ठप्पच असतो. तर कृष्णा योजनेला सातत्याने लागणाऱ्या गळतीमुळे पाणीटंचाईचा प्रश्‍न कायमचा आहे. हा पिण्याच्या पाण्याचा प्रश्‍न कायमस्वरुपी निकालात निघावा म्हणून वारणा थेटनळ पाणी पुरवठा योजना पुढे आली. राज्य सरकारने अमृत योजने अंतर्गत दानोळी येथून वारणा नदी उद्भव धरुन इचलकरंजीसाठी ७० कोटी ३० लाख रुपये खर्चाची वारणा थेटनळ पाणी पुरवठा योजना मंजूर केली. योजनेच्या मंजुरीनंतर वारणाकाठच्या ग्रामस्थांनी त्याला विरोध दर्शविला आहे. कोणत्याही परिस्थितीत ही योजना पूर्णत्वास जावू न देण्याचा निर्धार वारणा बचाव कृती समितीने केला आहे. त्यानुसार समितीच्यावतीने नदीकाठावरील गावात बैठका घेऊन जनजागृती केली जात आहे. इचलकरंजीला पाणी दिल्यास नदीकाठावरील ७० गावांना पाणीटंचाईला तोंड द्यावे लागणार अशी भिती व्यक्त होत आहे.

या योजनेच्या कामासाठी मुंबईतील आर. ए. घुले यांची निविदा मंजूर करण्यात आली. १३ एप्रिल २०१७ रोजी मुख्यमंत्री देवेंद्र फडणवीस यांनी ऑनलाईन या योजनेच्या कामाचा शुभारंभही झाला. वर्षानंतरही योजनेचा श्रीगणेशा होत नसल्याने सरकारी अधिकारी चिंतेत आहेत. वारणा पाणी पुरवठा योजनेसाठी इचलकरंजी शहराला पिण्यासाठी २४.२६ दशलक्ष घनमीटर आणि औद्योगिकसाठी ५.९६ दशलक्ष घनमीटर असे वार्षिक ३०.२२ दशलक्ष घनमीटर (१ टीएमसी) पाणी आरक्षणाला कृष्णा खोरे विकास महामंडळाकडून मंजुरी मिळाल्यामुळे वारणा योजनेच्या कामातील मोठा अडसर दूर झाला असला तरी वारणाकाठच्या ग्रामस्थांचा विरोध आजही कायम आहे.

या योजनेसंदर्भात वारणा बचाव कृती समितीची समजूत काढण्यासाठी प्रांताधिकाऱ्यांनी इचलकरंजी व दानोळी येथे दोन बैठका घेतल्या. त्याचबरोबर जिल्हाधिकाऱ्यांसह पालकमंत्र्यांनीही बैठक घेऊन योजना मार्गी लागावी यासाठी सर्वतोपरी प्रयत्न केले. ज्येष्ठ नेते प्रा.एन.डी. पाटील यांनीही यामध्ये सर्वतोपरी मार्ग काढावा यासाठी वारणा बचाव कृती समितीसह इचलकरंजीच्या शिष्टमंडळाने भेट घेतली होती, पण त्याला यश आलेले नाही. या पार्श्वभूमीवर मे महीन्याच्या दोन, तीन तारखेला काम सुरू करण्याच्या दृष्टीने प्रशासनाने तयारी पूर्ण केली आहे.

दरम्यान, सरकारच्या अमृत योजनेअंतर्गत यासाठी निधी उपलब्ध झाला आहे. उद्घाटन होऊन एक वर्ष झाले तरी प्रत्यक्षात कामाला सुरुवात नसल्याने सरकारने मंजूर केलेला निधी परत जाऊ शकतो. यामुळे पोलिस बंदोबस्तात ही योजना मार्गी लावण्याचा निर्णय जिल्हा पातळीवर घेण्यात आले आहेत. मात्र काम सुरु झाल्यानंतर वारणा बचाव कृती समितीची भूमिका महत्वाची ठरणार आहे.

..............................

चौकट

वरिष्ठ अधिकाऱ्यांसह १५० पोलिसांचा ताफा

जिल्हाधिकारी, जिल्हा पोलीस प्रमुख, अप्पर पोलिस अधिक्षक, प्रांताधिकारी, पोलिस उपअधिक्षक , तहसीलदार, मुख्याधिकारी या अधिकाऱ्यांसह पाटबंधारे, नगरपालीकेचे कर्मचारी व दीडशे पोलिसांच्या उपस्थितीत योजनेच्या कामाला सुरुवात होणार आहे. किमान एक महिना हा बंदोबस्त कायम ठेवण्याचा निर्णय झाल्याचे एका अधिकाऱ्याने सांगितले. दरम्यान, प्रचंड पोलिस फौजफाटा दानोळी गावात तैनात करण्यात येणार असल्याची कुणकुण काही गावकऱ्यांना होताच वारणाकाठच्या ग्रामस्थांत भितीचे सावट निर्माण झाले आहे.

.....................

म. टा. प्रतिनिधी, कोल्हापूर

खासगी सावकाराच्या तगाद्याला कंटाळून राजू दिलीप भालकर यांनी २४ एप्रिलला विष पिऊन आत्महत्येचा प्रयत्न केला. याप्रकरणी भिकाजी दिनकर सुर्वे, संतोष सकटे (दोघेही रा. पाचगाव, ता. करवीर), सूरज सातपुते (रा. इंदिरा घरकुल, बळवंत नगर, आरकेनगर) यांच्याविरोधात वडगाव पोलिस ठाण्यात गुन्हा नोंदविण्यात आला. वडगाव पोलिसांनी हा गुन्हा करवीर पोलिस ठाण्याकडे वर्ग केला आहे. प्रियंका राजू भालकर (वय २३, रा. मातंग वसाहत, पोस्टल कॉलनी, पाचगाव) यांनी फिर्याद दिली आहे.

पोलिसांनी दिलेली माहिती अशी : पाचगाव येथे राहत असताना राजू भालकर यांनी २०१३ मध्ये भिकाजी सुर्वे याच्याकडून १० टक्के व्याजदराने एक लाख रुपये कर्ज घेतले. २०१६ पर्यंत मुद्दल व व्याजाची परतफेड करण्यासाठी भालकर यांनी घर विकून दोन लाख सुर्वेला दिले. तसेच भालकर यांच्या मालकीचा टेम्पो ट्रॅव्हलर (एम एच ०९ सी.व्ही. ०४९८) नावावर करून देण्यासाठी भालकरसह तीनही संशयित वारंवार धमकी देत होते. घरासमोर लावलेला भालकर यांचा टेम्पोही त्यांनी काढून घेतला. सुर्वेसह तीन संशयितांच्या तगाद्याला कंटाळून भालकर यांनी विष पिऊन आत्महत्येचा प्रयत्न केला. भालकर यांच्या पत्नी प्रियंका यांनी फिर्याद दिल्यावर सुर्वेसह तिघांविरोधात गुन्हा दाखल केला आहे.

००००००००००००००००

दोन मोटारसायकल चोरीस

कोल्हापूर : कदमवाडी येथील डॉ. डी. वाय. पाटील हॉस्पिटलच्या पार्किंगमधून बुलेट मोटारसायकल तसेच मंगळवार पेठ येथून एक हिरोहोंडा कंपनीची मोटारसायकल लंपास केली. शाहूपुरी आणि जुना राजवाडा पोलिस ठाण्यात याप्रकरणी नोंद झाली आहे. प्रथमेश बाबासाहेब पाटील (वय २४, रा. कसबा बीड, ता. करवीर) यांनी कदमवाडी येथील डॉ. डी.वाय. पाटील हॉस्पिटलच्या पार्किंगमध्ये पार्क केलेली बुलेट (एमएच ०९ डीएन ८८११) २४ एप्रिल रोजी चोरीस गेली. तर मंगळवार पेठ तस्ते गल्ली येथील रामकृष्ण अपार्टमेंटच्या पार्किंगमध्ये मदन कुलकर्णी (रा. बालाजी पार्क, जरगनगर) यांनी पार्क केलेली हिरो होंडा स्प्लेंडर (एम एच ०९ बीएच ३०८८) ही मोटारसायकल चोरट्यांनी लंपास केली. कुलकर्णी यांनी जुना राजवाडा पोलिस ठाण्यात चोरीची फिर्याद दिली आहे.

क्राईम पट्टा...

००००००००

वृद्धाचा मृत्यू

म. टा. प्रतिनिधी, कोल्हापूर

भाजून गंभीर जखमी झालेल्या महिपती कृष्णा साळोखे (वय ७०, रा. पोर्ले तर्फ ठाणे ता. पन्हाळा) यांचा सीपीआर रुग्णालयात उपचार सुरू असताना रविवारी सकाळी अकराच्या सुमारास मृत्यू झाला. २६ एप्रिलला चुलीवर पाणी गरम करीत असताना साळोखे यांच्या शर्टला आग लागल्याने ते भाजून गंभीर जखमी झाले होते. सीपीआर पोलिस चौकीत भाजून मृत्यू अशी नोंद झाली आहे.

चिक्की कारखानदाराचा मृत्यू

म. टा. प्रतिनिधी, कोल्हापूर

शिंगणापूर (ता. करवीर) येथील शेंगदाणा चिक्की कारखान्याचे मालक राजशेखर जगमनी नाडर ऊर्फ डेव्हीड (वय ५२, रा. लक्ष्मी कॉलनी, शिंगणापूर) यांचा पलंगावरून खाली पडल्याने मृत्यू झाला. रविवारी सकाळी त्यांचे नातेवाईक कारखान्यात गेले असता नाडर पलंगावरून खाली पडल्याचे निदर्शनास आले. नातेवाइकांनी त्यांना सीपीआरमध्ये दाखल केले असता उपचारापूर्वीच मृत्यू झाल्याचे डॉक्टरांनी सांगितले. नाडर यांचा हृदयविकाराने मृत्यू झाला असावा असा प्राथमिक अंदाज पोलिसांनी व्यक्त केला आहे. करवीर पोलिस ठाण्यात नोंद झाली आहे.

खुदाई कामगार जखमी

म. टा. प्रतिनिधी, कोल्हापूर

विहीर काढण्यासाठी खुदाईचे काम करीत असताना पाय घसरून विहिरीत पडल्याने आप्पासाहेब शिवाप्पा शिवशरण (वय ५५) हा कामगार जखमी झाला. कणेडी (ता. कणकवली) येथे शनिवारी दुपारी अपघात झाला. कणकवलीत प्राथमिक उपचार केल्यानंतर पुढील उपचारासाठी त्यांना सीपीआरमध्ये दाखल केले आहे.

अपघातात तरुण जखमी

म. टा. प्रतिनिधी, कोल्हापूर

पुणे-बेंगळुरू राष्ट्रीय महामार्गावर वाठार येथे झालेल्या अपघातात वैभव रामचंद्र तेजम (वय २५, रा. किणी, ता. हातकणंगले) जखमी झाला. रविवारी दुपारी तीन वाजता हा अपघात घडला. त्याच्यावर सीपीआरमध्ये उपचार सुरू आहेत.

मारहाणीत वृद्ध जखमी

म. टा. प्रतिनिधी, कोल्हापूर

हातकणंगले लक्ष्मी माळ येथे किरकोळ कारणावरून झालेल्या मारहाणीत शिवाजी राघू गोसावी (वय ६०, कुरुकली, ता. करवीर) जखमी झाले. त्यांच्यावर सीपीआरमध्ये उपचार सुरू आहेत. घटनेची नोंद सीपीआर पोलिस चौकीत झाली आहे.

म. टा. प्रतिनिधी, कोल्हापूर

राज्यसभेत पुरातत्त्व सुधारणा कायदा विधेयक मंजुरीस होणारा विलंब आणि अर्धवट पुलाचे काम करण्यास ठेकेदाराने नकार दिल्याने शिवाजी पुलाला असणाऱ्या पर्यायी पुलाचे काम आणखीन रखडणार आहे. ठेकेदाराने बँक गॅरंटीची रक्कम परत मागत पुलाच्या कामास नकार दिल्याने पर्यायी पूल उभारणीच्या कामात अडथळे निर्माण झाल्याने पर्यायी पूल उभारणीची प्रक्रिया अधांतरी राहणार आहे. त्यामुळे पावसाळ्यातही शिवाजी पुलावर धोकादायक प्रवास करावा लागणार आहे.

ब्रिटिशकालीन शिवाजी पुलाला उभारण्यात येत असलेल्या पर्यायी पुलाचे ८० टक्के काम पूर्ण झाले आहे. पुलाच्या उभारणीस आतापर्यंत १० कोटी रुपये खर्च झाला आहे. पुलाच्या दोन गाळ्यांचे काम पूर्ण झाले असून, एक गाळ्याचे काम अपूर्ण आहे. अपूर्ण गाळ्याचे बांधकाम ब्रह्मपुरी टेकडीपासून १०० मीटर अंतरावर आहे. ब्रह्मपुरी टेकडी केंद्रीय पुरातत्त्व खात्याच्या अखत्यारित आहे. पुरातत्त्व वास्तू असलेल्या ठिकाणापासून १०० मीटर अंतरावर बांधकामास बंदी असल्याने केंद्रीय पुरातत्त्व विभागाने पुलाच्या बांधकामास परवानगी नाकारली आहे. १० डिसेंबर २०१५ पासून पुलाचे काम बंद आहे.

गेली अडीच वर्षे पुलाचे बांधकाम रखडले आहे. रखडलेले काम पूर्ण व्हावे यासाठी कोल्हापुरात सर्वपक्षीय कृती समितीने हे काम त्वरित सुरू करावे, यासाठी आंदोलन करून पाठपुरावा केला. केंद्रीय पुरातत्त्व कायद्याच्या निकषांमुळे सार्वजनिक हिताची कामे रखडल्याने केंद्र सरकारने नवीन पुरातत्त्व कायदा २०१७ हे विधेयक तयार केले आहे. १७ मे २०१७ रोजी केंद्रीय मंत्रिमंडळाने या प्रस्तावाला मंजुरी दिली आहे. केंद्रीय मंत्रिमंडळाने प्रस्तावाला मंजुरी मिळाल्यावर स्थानिक राजकीय नेत्यांनी अभिनंदनपर फलक लावून श्रेयवाद घेण्याचा प्रयत्न केला. पण जुलै २०१७ मध्ये पावसाळी अधिवेशनात काही तांत्रिक कारणांनी कायद्याचे विधेयक सभागृहात सादर होऊ न शकल्याने शिवाजी पुलाच्या बांधकामाचा मुहूर्त पुढे गेला.

२ जानेवारी २०१८ रोजी लोकसभेत नवीन केंद्रीय पुरातत्त्व कायदा मंजूर झाल्याने शिवाजी पुलाचा मार्ग मोकळा झाला असे वाटत असताना अर्थसंकल्पीय अधिवेशनात राज्यसभेचे कामकाज ठप्प राहिल्याने पुरातत्त्व कायदा मंजूर झाला नाही. दरम्यान, संसदेची कायद्याला मंजुरी मिळेल यादृष्टीने राष्ट्रीय महामार्ग विभागाने अर्धवट पुलाच्या बांधकामाची निविदा एक वर्षापूर्वी पूर्ण केली आहे. गोव्याच्या आसमास कन्स्ट्रक्शन प्रायव्हेट लिमिटेड कंपनीला ठेका देण्यात आला होता. दोन कोटी ७५ लाखांच्या निविदेस कंपनीने १५ लाख रुपये बँक गॅरंटी दिली आहे, पण पुलाच्या बांधकामास परवानगी न मिळाल्याने राष्ट्रीय महामार्ग विभागाने कंपनीस वर्कऑर्डर दिलेली नाही. त्यामुळे कंपनीने पुलाचे काम पूर्ण करण्यास असमर्थता दाखवत राष्ट्रीय महामार्ग विभागाकडे बँक गॅरंटीची १५ लाख रुपये परत मिळावेत यासाठी लेखी मागणी केली आहे. त्यामुळे शिवाजी पुलाचे बांधकाम रखडण्याची दाट शक्यता आहे.

००००

लोकसभा व राज्यसभेची मंजुरी मिळेल ही शक्यता गृहित धरून एक वर्षापूर्वी पर्यायी पुलाच्या शिल्लक कामासाठी निविदा प्रक्रिया पूर्ण केली होती. पण राज्यसभेत केंद्रीय पुरातत्त्व कायद्याला मंजुरी न मिळाल्याने कंपनीला वर्कऑर्डर दिलेली नाही. त्यामुळे कंपनीने बँक गॅरंटीची रक्कम परत मागितली आहे.

विजय कांडगावे, कार्यकारी अभियंता राष्ट्रीय महामार्ग

०००००००००००००००००००

काँग्रेसच्या स्वयंघोषित

सीएमच्या स्वप्नांचा पराभव

पालकमंत्र्यांची सतेज पाटील यांच्यावर टीका

म. टा वृत्तसेवा, आजरा

'राज्याचा भावी मुख्यमंत्री म्हणून मिरविणाऱ्या आणि त्यांच्या सहकारी पक्षातील नेत्यांच्या स्वप्नांचाच पराभव हुपरी आणि आजरा नगरपालिका निवडणुकीत झाला. राज्यातील सत्ता माझ्या खिशात आहे. उद्याच्या निवडणुकीत आम्हीच बहुमताने येणार आहोत आणि भावी मुख्यमंत्रीही बनणार असे, अशा वल्गना करीत या नेत्याने आजरा नगरपंचायत निवडणुकीत अक्षरश: ठाण मांडले. मात्र, आजरेकरांनी त्यांना त्यांची जागा दाखवली,' अशी टीका पालकमंत्री चंद्रकांत पाटील यांनी आमदार सतेज पाटील यांच्यावर केली.

आजरा नगरपंचायत निवडणुकीत भाजप व आघाडीने मिळविलेल्या विजयानिमित्त आयोजित मेळाव्यात ते बोलत होते. आमदार सुरेश हाळवणकर, माजी आमदार महादेव महाडिक प्रमुख उपस्थित होते. यावेळी आजरा नगरीच्या पहिल्या नगराध्यक्षा जोत्स्ना चराटी, आघाडीचे सर्वेसर्वा अशोक चराटी यांच्यासह नूतन नगरसेवकांसह आघाडीच्या पराभूत उमेदवारांचाही मान्यवरांच्या हस्ते सत्कार करण्यात आला.

मंत्री पाटील म्हणाले, 'नव्याने अस्तित्वात आलेल्या आजरा नगरपंचायतीची ऐतिहासिक निवडणूक अशोक चराटी यांच्या नेतृत्वाखाली भाजप आघाडीने अक्षरशः 'वन वे' जिंकली आहे. विरोधक रथी महारथी इथे आले. पण काहीही झाले नाही. कारण आजरेकरांनी खरे-खोटे जाणले. याला कारण केंद्र व राज्य सरकारचा कारभार आहे.'

महादेवराव महाडिक म्हणाले, 'आजरा तालुकाच नव्हे तर सर्व जिल्हा आता पेटून उठला आहे. कारण त्यांना सरकारी निधी नि जागा बळकवणाऱ्या शक्ती नको आहेत. अशा वृत्तीचे उद्या काय होणार हे नक्की आहे. यांनी कोल्हापूरच्या थेट पाइपलाइनमध्येही घोटाळा केला. म्हणून पिण्याचे पाणीही मिळू शकले नाही. याचे भान त्यांनी ठेवावे आणि परिणामांना तयार राहावे.' यावेळी आमदार हाळवणकर, श्री. चराटी, विजयकुमार पाटील यांचीही भाषणे झाली. हिंदुराव शेळके, बाबा देसाई, 'गोकुळ' संचालक रवींद्र आपटे, सुनिता रेडेकर, अरुण देसाई आदी उपस्थित होते.

हातकणंगले : रेंदाळ (ता. हातकणंगले) येथील बिरदेवनगरमधील यंत्रमाग कारखान्याची साफसफाई करत असताना अचानक विजेच्या धक्याने यंत्रमागमालकाचा जागीच मृत्यू झाला. बाळासाहेब नामदेव पाटील (वय ६५, रा. बिरदेवनगर, रेंदाळ) असे त्यांचे नाव आहे. ही घटना रविवारी दुपारी दोनच्या सुमारास घडली. घटनेची नोंद हुपरी पोलिसांत झाली आहे.

फोटो

.................

कोट्यवधी खर्चूनही रस्ते खड्ड्यातच

इचलकरंजीतील मुख्य रस्त्यांसह उपनगरातील रस्त्यांची अवस्था दयनीय

म.टा. वृत्तसेवा, इचलकरंजी

अकरा वर्षांपूर्वी इचलकरंजी टेक्स्टाईल डेव्हलपमेंट क्लस्टरच्या माध्यमातून शहराचा कायापालट झाला होता. त्यावेळी झालेले रस्ते आणि आजचे रस्ते यांची तुलना करता सध्या विकासापेक्षा अर्थकारणाला महत्व आल्याचे दिसून येत आहे. वाढत्या टक्केवारीने नगरपरिषदेच्या रस्त्यांचा दर्जा निकृष्ट असल्याने ही कामे सार्वजनिक बांधकाम विभागाकडून केली जात आहेत. पण त्या कामांचाही दर्जा खालावला असल्याचे दिसत आहे. ३० कोटी रुपये रस्ते कामांसाठी खर्चूनही शहरातील मुख्य रस्त्यांसह उपनगरातील रस्ते खड्ड्यातच गेले आहेत.

पारदर्शी आणि भ्रष्टाचारमुक्तीचा नारा देत सत्ता काबिज केलेल्या सत्तारुढ भाजप आघाडीतच बिघाडी निर्माण होऊ लागली असून अर्थासाठी मुद्याची गोष्ट गुद्यावर आली आहे. स्वहिताला महत्व देत टक्केवारीच्या गाठलेल्या कळसाने नगर परिषद बदनाम होऊ लागली आहे. राज्यात सर्वात श्रीमंत असा नावलौकिक मिळवलेली इचलकरंजी नगरपरिषद आज आर्थिक संकटात सापडली आहे. बेकायदेशीर कामांना दिली जाणारी मोकळीक अन् अग्रक्रमाने बिले काढण्यासाठी होणारी जादा टक्क्याची मागणी यातून होणाऱ्या हातघाईतून उघडपणे आरोप केले जात आहेत. आमदार सुरेश हाळवणकर यांच्या नेतृत्त्वाखाली भारतीय जनता पक्षाने निवडणूकीपूर्वी भला मोठा जाहीरनामा आणि विकासकामांतून शहराचा कायापालटाचे अभिवचन दिले होते. मात्र दीड वर्षात किती वचनांची पूर्तता केली हा संशोधनाचा विषय आहे.

शहरातील रस्त्यांचा प्रश्‍न अत्यंत बिकट असून कोट्यवधींचा निधी येऊनही रस्ते जैसे थे च दिसत आहे. मागील दोन महिन्यांच्या कालावधीत गल्लीबोळातील रस्ते हॉटमिक्स डांबरीकरणाचा तर सपाटाचा लागला होता. प्रत्येक रस्ता हा १५ ते २० वर्षापूर्वी केल्याचे सांगितले जात आहे. मात्र सन २००७ मध्ये क्लस्टरच्या माध्यमातून रस्त्याचा कायापालट करण्यात आला होता. ज्याठिकाणी रस्ते कामाची गरज आहे ते मुख्य व वर्दळीचे रस्ते अजुनही खड्डेमयच आहेत. नगरपरिषदेकडून केल्या जाणाऱ्या रस्ता कामांचा दर्जा निकृष्ट असल्याचे सांगून मुख्य रस्त्यांची कामे सार्वजनिक बांधकाम खात्याकडे सोपविली. त्यासाठी सरकारकडून २० कोटी रुपयांचा आलेला निधी खर्च झाला. पण एस्टिमेट संपल्याने सार्वजनिक बांधकाम खात्याने हे रस्ते निम्म्यातच सोडून दिले. शिवाजी पुतळा ते कोल्हापूर रस्ता, शिवाजी पुतळा ते स्टेशन रोड, शिवाजी पुतळा ते संभाजी चौक हे रस्ते अर्धवटच करण्यात आले. तर शिवाजी पुतळा ते नदीवेस नाका-पंचगंगा नदी हा रस्ता महाराष्ट्र व कर्नाटक या दोन राज्यांना शिवाय दोन तालुक्यांनाही जोडणारा आहे. हा रस्ता तातडीने होणे गरजेचे असताना त्याकडे दुर्लक्ष केले जात आहे. नगरपरिषद फंडातून होणारया रस्त्यांचा दर्जा सुमार असल्याचे दाखवून सार्वजनिक बांधकाम विभागाकडून पुन्हा काही रस्त्यांची कामे करुन घेतली गेली. ते रस्तेही सध्या खड्ड्यातच आहेत. शिवाजी पुतळा ते एएससी कॉलेज या रस्त्यावर काही ठिकाणी खड्डे ते शाहू पुतळा समोरील रस्ता पूर्णत: खचल्याने खड्डा निर्माण झाला आहे.

........................

चौकट

अनुदानाचे काय झाले?

शहरातील विविध विकासकामांसाठी सरकारच्या नगरोत्थान योजनेंतर्गत नगरपरिषदेच्यावतीने १०० कोटी रुपयांचा विकास आराखडा तयार करण्यात आला आहे. तो सरकारकडे मंजुरीसाठी पाठविण्यात येणार असून त्यामध्ये रस्ते कामांचाही समावेश आहे. १०० कोटीतून रस्त्यांची कामे होणार असतील तर त्याच कामासाठी मिळालेल्या अनुदानाचे काय झाले? जूनमध्ये पावसाळा सुरु झाल्यानंतर नगरपरिषदेकडील सर्व विकासाची कामे ठप्प होतात. त्यामुळे अवघ्या महिन्याभरात रस्त्यांचे रुपडे पालटण्याची शक्यता कमी आहे.

अंतर्गत रस्त्यांची चाळण

बापूरामनगर, सुर्वेनगरतील रस्त्यांना दुरुस्तीची प्रतीक्षा

लोगो : उपनगरांची रस्तेकोंडी

फोटो आहेत

कोल्हापूर टाइम्स टीम

शहरीकरणाचा वेग वाढत गेल्यानंतर कळंबा परिसरात उपनगरांची झपट्याने वाढ होत गेली. सुरुवातीस आवाक्यात असलेला जमिनींचा दर आणि शहरापासून जवळच असणाऱ्या परिसरांमुळे एकापाठोपाठ एक उपनगरे वसत गेली. पण या उपनगरांमधील रस्त्यांचे भाग्य काही उजळले नाही.

बापूरामनगर, नवनाथ नगर, सर्वेनगर, महाराष्ट्र नगर, दत्तोबा शिंदे नगर, समता कॉलनी, शिवप्रभू नगर,मोरे-माने नगर, दादू चौगुले नगर येथील अंतर्गत रस्त्यांची प्रचंड दुरवस्था झाली असून नागरिकांना त्याचा त्रास होत आहे.

उपनगरे व कॉलनीची उभारणी करताना प्लॉटधारकांना आकर्षित करण्यासाठी लाइट, पाणी, रस्ते अशा पायाभूत सुविधा देण्यात आल्या. पण प्लॉटविक्री पुर्ण झाल्यानंतर त्या त्या कॉलन्यांमधील रस्त्यांकडे दुर्लक्ष केल्याने अनेक रस्त्यांची अक्षरश: चाळण झाली आहे.

२५ ते ३० वर्षांत कळंबा आणि परिसरातील उपनगरांमध्ये मोठ्या प्रमाणात वस्ती वाढली. सार्वजनिक वाहतूक, मंडई अशा शहरात मिळणाऱ्या सर्व सुविधा मिळत असल्याने रहिवाशांनी या भागात प्राधान्य दिले. यामुळे उपनगरांच्या संख्येमध्ये आणखीन भर पडली. पण वाढत्या उपनगरांना पायाभूत सुविधा देताना महापालिकेची दमछाक होऊ लागली. अनेक कॉलन्यांचा ले-आऊट मंजूर करताना रस्ते तयार करण्यात आले. पण त्यांनतर बुहतांशी रस्त्यांची दुरुस्तीही झालेली नाही.

महाराष्ट्र नगर ते बापूराम नगरच्या चौकाला जोडणाऱ्या रस्त्याचे काम दहा वर्षानंतर प्रथमच झाले. पण रस्त्याच्या दोन्ही बाजूला ड्रेनेजची व्यवस्था नसल्याने सर्व सांडपाणी रस्त्यावरच येत आहे. त्यामुळे हा रस्ता पुन्हा खराब होण्याची शक्यता आहे. अशीच अवस्था बापूराम नगर ते पुईखडीपर्यंतच्या रस्त्याची झाली आहे. बापूराम नगर ते दत्तोबा शिंदे नगरपर्यंतचा रस्ता तयार केला. रस्त्याच्या दोन्ही बाजूला मोठ्या गटारीची बांधणी केली असली, तरी गटार बांधनीनंतर सापसफाई केली नसल्यांमुळे पावसाचे सर्व पाणी रस्त्यावर येत आहे. गटारी कचऱ्यांने भरुन गेल्याने अनेक घरांचे सांडपाणी रस्त्यावर येत आहे.

लोकप्रतिनिधींचा स्वार्थ

दत्तोबा शिंदे नगर ते पुईखडीपर्यंत मोठा रस्ता आहे. पोद्दार इंग्लिश मीडियम स्कूलसह सुमारे दहा उपनगरांना जोडणारा हा रस्ता आहे. मात्र रस्त्याचे गेल्या अनेक वर्षांपासून डांबरीकरण झालेले नाही. केवळ मोठी खडी टाकली असून यावरूनच वाहतूक सुरू आहे. मात्र याच मार्गावर एका माजी महापौरांच्या वडिलांची बांधकाम साईट सुरू आहे. बापूरामनगर पासून या बांधकाम साईटपर्यंतचा फक्त रस्ता केला. मात्र तेथून पुढचा रस्ता तसाच ठेवला आहे. त्यामुळे नेमकी विकासकामे नागरिकांसाठी केली जातात, की लोकप्रतिनिधींच्या फायद्यासाठी केली जातात, असा प्रश्न या मार्गावरुन जाणारे सर्वजण उपस्थित करत आहेत.

समता कॉलनीचा रस्ता चकाचक

जीवबानाना पार्क व दत्तोबा शिंदे नगरच्या मध्ये समता कॉलनी उभारण्यात आली. जीवबानाना पार्कच्या डोंगरावरुन येणारे पावसाच्या पाण्यामुळे रस्त्यावर गाळ तयार होत होता. त्यामुळे पावसाळ्यात रहिवाशांना आपली वाहने घरापासून लांब पार्क करून गाळातूनच घरापर्यंतचा प्रवास करावा लागत होता. महाराष्ट्र टाइम्सने या प्रश्नाला वाचा फोडल्यानंतर नगरसेवकांनी तत्काळ रहिवाशांची बैठक घेवून पुढील पावसाळ्यांपर्यंत रस्ता तयार करण्याचे आश्वासन दिले होते. त्यानुसार समता कॉलनीतील मुख्य रस्त्याचे काम पूर्ण झाले असून डोंगरावरुन येणारे पाणी पाइपलाइनद्वारे ड्रेनेजमध्ये सोडण्याचे काम सध्या सुरू आहे.

पावसाळ्यामध्ये या रस्त्यावरुन जाताना प्रचंड त्रास सहन करावा लागत होता. मुख्य रस्त्यासह उपरस्त्यावर चिखल झाल्याने वाहने लांब लावावी लागत होती. सध्या या रस्त्याचे काम पूर्ण झाले असून पाइपलाइन टाकण्याचे काम सुरू आहे.

विजय निल्ले, स्थानिक रहिवासी

मुलांना शाळेत सोडण्यासाठी समता कॉलनीच्या रस्त्यावरुन जावे लागते. या रस्त्याचे काम शाळेपासून मुख्य रस्त्यापर्यंत अर्धवट ठेवण्यात आले आहे. पण एका लोकप्रतिनिधीच्या बांधकाम साइटपर्यंत रस्ता चकाचक केला आहे. त्यापुढे असलेला रस्ता महापालिकेने केला नाही, याची विचारणा कोण करणार?

केदार गुळवणी, नागरिक

जेईई परीक्षेत कोल्हापूरचा झेंडा

निकाल पाहण्यासाठी विद्यार्थ्यांसह पालकांची नेट कॅफेमध्ये गर्दी

म. टा. प्रतिनिधी, कोल्हापूर

केंद्रीय माध्यमिक शिक्षण (सीबीएसई) मंडळामार्फत घेण्यात आलेल्या जेईई मेन परीक्षेचा निकाल सोमवारी सायंकाळी साडेसात वाजता संकेतस्थळावर जाहीर केला. कोल्हापूरच्या विद्यार्थ्यांनी यावर्षीही यशाची परंपरा कायम राखत कोल्हापूरचा झेंडा फडकावला. उत्तीर्ण झालेले सर्व विद्यार्थी आयआयटीच्या प्रवेशासाठी घेण्यात येणाऱ्या जेईई अॅडव्हान्ससाठी पात्र ठरले आहेत. मंडळाच्या jeemain.nic.in या संकेतस्थळावर गुणवत्ता यादी पाहण्यासाठी विद्यार्थ्यांसह पालकांनी नेट कॅफेमध्ये गर्दी केली होती.

देशभरात दरवर्षी एनआयटी, आयआयटी आणि इतर सीएफटीआयमध्ये इंजिनीअरिंग व आर्किटेक्चर अभ्यासक्रमांसाठी जेईई मुख्य परीक्षा घेतली जाते. या परीक्षेत उत्तीर्ण झालेले विद्यार्थी जेईई अॅडव्हान्ससाठी पात्र ठरतात. जेईई मुख्य परीक्षा आठ एप्रिल रोजी झाली होती. देशभरातून सुमारे १४ लाख विद्यार्थ्यांनी परीक्षा दिली. आयआयटीमध्ये प्रवेश घेण्यासाठी प्रचंड स्पर्धा असल्याने विद्यार्थी अकरावीपासून परीक्षेची तयार करतात. त्यामुळे विद्यार्थ्यांसह पालकांमध्ये निकालाबाबत उत्सुकता असते.

देशातील सुमारे १४ लाख विद्यार्थ्यांमधून दोन लाख ३१ हजार विद्यार्थी जेईई अॅडव्हान्ससाठी पात्र ठरले आहेत. सर्वसाधारण गटाचा कटऑफ ७४ मार्कांचा राहिला . तर ओबीसी (४५), एससी (२९), एसटी (२४) मार्कावर कटऑफ स्थिरावला . उत्तीर्ण झालेल्या विद्यार्थ्यांची अॅडव्हान्स परीक्षा २० मे रोजी होणार असून यासाठी दोन ते सात मे दरम्यान ऑनलाइन फॉर्म भरावे लागणार आहेत.

जेईई मुख्य परीक्षेमध्ये येथील चाटे समूहाच्या २१० विद्यार्थ्यांनी गुणवत्ता यादीत स्थान मिळवले आहे. चाटे क्लासेसच्या शुभम कुष्ठे, श्रेयस पाटील, हेरंब चौगुले, नेहा जाधव, आकाश कांबळे, अभिषेक पवार, सुप्रिया थिट्टे, सिद्धीराज जाधव, रुकय्या मुजावर, मयुरेश पडयार, स्वानंद तळेकर, शुभम बोलकुंठवार, नेहा जाधव, कुणाल कवाळे, संजित अडिवरकर, पल्लवी झगडे, प्रथमेश पाटील, मनाली करणे, ऋषिकेश सुतार, रोहित सोनवणे, अमरनाथ निर्मळे, उत्कर्षा भाट, रोहन नलवडे, प्रथमेश गोसावी, ऋतिक पोळ, अरबाझ नदाफ, प्रतीक ढेरे, गौरव साबळे, आदित्य तिवठने, ऐश्वर्या अंबपकर यांचा समावेश आहे.तर राजारामपुरी येथील रितेश दलाल यांच्या फिजीक्स एज्यु पाँइटच्या बारा विद्यार्थ्यांनी गुणवत्ता यादीत स्थान पटकावले आहे. यामध्ये प्रणव खबाले, वेदांत शितुरकर, अक्षय राजाज्ञ, साक्षी कळेकर, अदिती कुलकर्णी, सर्वेश खिरे, तीर्थ ठकार, नुपूर शितुरकर, शांतनू दुसाने, निशी भाटे, प्रणीत पिसाळ, सिद्धी खेबूळकर यांनी गुणवत्ता यादीत स्थान मिळवले आहे. पेठे अॅकॅडमीच्या २२ विद्यार्थ्यांनी परीक्षेत यश मिळवले. त्यामध्ये गौरव कुंभोजकर, चैतन्य कुलकर्णी, नीरज वेलणकर, केतन भुजंगे, श्रेया नरवणे यांचा समावेश आहे. तसेच विवेकानंद, न्यू कॉलेज, राजाराम कॉलेजच्या विद्यार्थ्यांनी गुणवत्ता यादीत स्थान मिळवले आहे.