फोटो

...............

गव्याच्या हल्ल्यात

राधानगरीत महिला ठार

राधानगरी

राधानगरी वन्यजीव विभागाच्या वनवसाहतीमध्ये गव्याच्या हल्ल्यात रखमाबाई रामभाऊ शेळके (वय ६५) ही महिला ठार झाली. गुरूवारी पहाटे साडेसहाच्या दरम्यान अंगण झाडत असताना वन्यजीव कार्यालयाशेजारी गव्याने हल्ला केला. गव्याने रखमाबाई यांना अक्षरशः तीन ते चारवेळा उचलून आपटले. यामध्ये त्यांच्या हाताला व डोक्याला गंभीर मार लागला. रखमाबाई ( मूळ गाव भोजदरी, तालुका आकोला, जिल्हा अहमदनगर) या आपले जावई वनरक्षक नितीन दिलीप नलवडे व मुलगी रंजना यांच्यासोबत वनविभागाच्या वनवसाहतीमध्ये रहात होत्या. गुरुवारी पहाटे साडेसहाच्या दरम्यान अंगण झाडत बाहेत येत असताना अचानक गव्याने त्यांना जोराची धडक देत शिंगावर घेऊन जमिनीवर आपटले. डोक्याला गंभीर मार लागल्याने त्यांना सोळांकूर येथील ग्रामीण रुग्णालयात दाखल करण्यात आले, पण उपचारापूर्वीच त्यांचा मृत्यू झाला.

फोटो आहे...

............

साहित्य संस्कृती ... लोगो

.............

शिक्षक भरविणार वाचनकट्टा

दादांची पुस्तक बॅग, बालकट्टा ते साहित्यिकांच्या घरी भेट

म. टा. प्रतिनिधी, कोल्हापूर

शालेय विद्यार्थ्यांना वाचनाची गोडी लागावी, वाचनासाठी वेगवेगळ्या विषयावरील पुस्तके उपलब्ध व्हावीत हा उद्देश ठेवून वेगवेगळ्या शाळांतील शिक्षकांनी एकत्र येऊन 'शिक्षक वाचनकट्टा व्यासपीठ'ची स्थापना केली आहे. त्यामार्फत शालेय विद्यार्थ्यांना घेऊन साहित्यिकांच्या घरी भेट, प्रत्येक महिन्याला बालकट्टा अशा साहित्यिक उपक्रमांची रेलचेल असेल. वाचन संस्कृतीच्या प्रसारासाठी बालकांपासून पालकांपर्यंत वेगवेगळ्या पातळीवर व्यासपीठ प्रयत्नशील राहणार आहे.

'जागतिक पुस्तक दिना'चे औचित्य साधून शिक्षक वाचनकट्टा व्यासपीठातर्फे शनिवारी (ता.२१) शहर आणि परिसरातील दहा शाळेतील चाळीस विद्यार्थी साहित्यकांच्या घरी भेट देणार आहेत. लेखकांशी संवाद आणि ग्रंथालय भेट असे स्वरुप आहे. यामध्ये साहित्यिक व जिल्हा परिषदेचे अतिरिक्त मुख्य कार्यकारी अधिकारी इंद्रजित देशमुख, प्राचार्य सुनीलकुमार लवटे, डॉ. बी. एम. हिर्डेकर यांच्या निवासस्थानी शनिवारी हा अनोखा साहित्यिक उपक्रम रंगणार आहे. तर दुपारी चार वाजता शाहू स्मारक भवन येथे डी लिट ने सन्मानित ज्येष्ठ साहित्यिक चंद्रकुमार नलगे यांचा सत्कार सोहळा आयोजित केल्याचे व्यासपीठाचे शहर विभागप्रमुख उत्तम तलवार यांनी सांगितले.

वाचनकट्टा बहुउद्देशीय संस्थेशी 'शिक्षक वाचनकट्टा व्यासपीठ'संलग्नित आहे. 'शिक्षक वाचनकट्टा...'स्थापण्यात शहर विभाग प्रमुख तलवार, ग्रामीण विभाग प्रमुख विजय एकशिंगे, प्रकाश ठाणेकर, शशिकला पाटील, विश्वजित शिंदे, कृष्णात कोरे, मनीषा रानमाळे, एस.डी.पाटील, भिकाजी काटकर आदींचा पुढाकार आहे. व्यासपीठात आणखी शंभर शिक्षकांनी सहभाग नोंदविला आहे.

....................................

'दादांची पुस्तक बॅग

'दादांची पुस्तक बॅग' ही अभिनव संकल्पना वर्षभरात दहा शाळांत राबविली जाईल. या संकल्पनेंतर्गत शंभर बालसाहित्याची पुस्तके वर्षभरात दहा शाळांना एका महिन्यासाठी दिली जातील. या पुस्तकावर प्रश्नावली, चर्चासत्र, गटचर्चा व सादरीकरण होणार आहे. ज्या शाळेत पुस्तके कमी आहेत तेथे पुस्तकांचे वितरण केले जाईल. समाजातील दानशूर लोक या बॅगेसाठी पुस्तके देऊ शकतात. याशिवाय मुक्तांगण ग्रंथालय आणि प्रत्येक शिक्षक आपआपल्या शाळेत वाचनकट्टा स्थापन करण्यासाठी पूर्ण क्षमतेने काम करतील. समाजमनावर सुसंस्कार करण्याच्या उद्देशाने व्यासपीठ प्रयत्नशील आहे, असे विजय एकशिंगे यांनी सांगितले.

.................

पुस्तकबन ते बालकट्टा

व्यासपीठातर्फे वर्षातून एकदा विविध शाळेतील विद्यार्थ्यांना एकत्र आणून खुल्या बागेत 'पुस्तकबन' सारखा साहित्यिक उपक्रम आयोजित केला जाईल. तर प्रत्येक महिन्याला शहरातील एखाद्या सभागृहात लहानमुलांचा बालकट्टा भरविण्याचा मानस आहे. पुस्तकाविषयी चर्चा, लेखकांची भेट, वाचनपूरक स्पर्धा, कुणी, कधी काय वाचावे आणि पालक वाचनकट्टा अशा वैविध्यपूर्ण उपक्रमाव्दारे साहित्यविषयक गोडी वाढविली जाईल, असे व्यासपीठातर्फे सांगण्यात आले.

........................

फोटो आहेत....

क्रांतिकारकांच्या पराक्रमाला मिळणार उजाळा

आज, उद्या कार्यक्रमांचे आयोजन

म. टा. प्रतिनिधी, कोल्हापूर

कोल्हापुरातील क्रांतिकारकांनी स्वातंत्र्यलढ्यात सहभागी होताना २० डिसेंबर १९४२ रोजी शनिवार पेठेतील इंग्रजाच्या कचेरीवर अॅसिड बाँम्बचा हल्ला केला होता. शिवाय दुसऱ्या दिवशी बॉम्ब तयार करताना चौघे क्रांतिकारक जखमी झाले होते. कचेरीवरील बॉम्ब हल्ला प्रकरणी वस्ताद बाबूराव महाडिक यांना दहा महिन्यांची शिक्षा झाली होती. देशाच्या स्वातंत्र्यलढ्यात कोल्हापुरातील त्या बॉम्बस्फोटाची घटना महत्वाची मानले जाते. ७५ वर्षापूर्वी स्वातंत्र्यासाठी घडलेला पराक्रम, सहभागी क्रांतिकारांच्या आठवणी शुक्रवारी व शनिवारी जागविल्या जाणार आहेत.

आताच्या सिटी सर्व्हे ऑफीस व लाचलुचपत प्रतिबंधक विभाग अॅन्टी करप्शन ऑफीसच्या इमारतीच्या पाठीमागील बोळातील वरच्या खिडकीत बाँम्ब ठेवत कचेरी पेटवून देण्यात आली होती. त्या ठिकाणी शुक्रवारी (ता.२०) सकाळी ११ वाजता अभिवादनाचा कार्यक्रम आहे. तर शनिवारी (ता.२१ )सायंकाळी पाच वाजता तटाकडील तालीमसमोर स्वातंत्र्यसैनिकांच्या वारसदारांचा स्नेहमेळावा आयोजित केल्याची माहिती पैलवान बाबा महाडिक व शरद तांबट यांनी दिली. आजच्या तरुण पिढीला या स्वातंत्र्यसैनिकांच्या पराक्रमाची माहिती व्हावी या उद्देशाने कार्यक्रमाचे आयोजन केले आहे.

बाबा महाडिक म्हणाले,' वस्ताद बाबूराव महाडिकांनी महादेव पार्टे, शांताराम भक्ते,चंद्रकांत खत्री, शामराव मेवेकरी, शंकर गवळी या सहकाऱ्यांसमवेत २० डिसेंबर १९४२ रोजी अॅसिड बॉम्बने शनिवार पेठेतील इंग्रजाची कचेरी पेटवून दिली होती. एकमेकांच्या खांद्यावर उभे रहात शिडीसारखे वरच्या मजल्यावर चढत बॉम्ब ठेवला होता. दुसऱ्या दिवशी शिवाजी पेठ परिसरातील वस्ताद महाडिकांच्या निवासस्थानच्या वरच्या मजल्यावर बाँम्ब तयार करताना स्फोट झाला. स्फोटाच्या तीव्रतेने भिंतीना तडे गेले, धुराचे लोट सर्वत्र पसरले. त्यामध्ये पार्टे, खत्री, भक्ते व राम घोरपडे जखमी झाले. यामध्ये पार्टे हे जबर जखमी झाल्यामुळे वरच्या मजल्यावर लोळागोळा होवून रक्ताच्या थारोळ्यात पडले होते. बॉम्बस्फोट झाला त्यावेळी बाबूराव महाडिकांच्या पत्नी गरोदर होत्या. अवघडलेल्या अवस्थेत वरच्या मजल्यावर जाऊन बॉम्ब तयार करायचे साहित्य गोळा करुन बाबूजमाल समोरील रिकाम्या जागेत टाकले. आज त्या ठिकाणी लक्ष्मी, सरस्वती ही चित्रपटगृहे आहेत. पुन्हा घरात येऊन खोली स्वच्छ केली. घरासमोर जमलेल्या लोकांना पांगविले. त्या गर्दीमधून खत्री, घोरपडे, भक्ते पसार झाले होते. पोलिसांनी वस्ताद महाडिकांना अटक झाली. त्यांनी बॉम्बस्फोटाची जबाबदारी अंगावर घेत पोलिसांना सहकाऱ्यांचा थांगपत्ता लागू दिला नाही. २३ डिसेंबर १९४२ रोजी त्यांना दहा महिन्याची शिक्षा ठोठावत सबजेलमध्ये रवानगी केली होती. स्वातंत्र्यानंतर भारत सरकारने १९७२ मध्ये ताम्रपट देऊन त्यांचा गौरव केला होता.'

.............

कोल्हापूरकरांच्या सहभागावर पुस्तक

शरद तांबट म्हणाले, 'महात्मा गांधींनी ब्रिटीशांना 'चले जाव'चा इशारा दिल्यानंतर देशभर उठाव झाला. कोल्हापुरातही महादेव पार्टे, दत्तोबा तांबट, राम घोरपडे, बाबूराव महाडिक, राजाराम ससे, चंद्रकांत खत्री व वीरमाने यांनी इंग्रजाविरुध्द कोल्हापूर परिसरात क्रांतिकारी कामे केली. स्वातंत्र्यलढ्यात सहभाग घेतलेल्या कोल्हापुरातील क्रांतीकारकांचा पराक्रम पुस्तकरुपाने शब्दबध्द करण्यात येत आहे. पुढील चार, पाच महिन्यात 'कोल्हापूरचा स्वातंत्र्यलढ्यातील सहभाग' या नावाने पुस्तक प्रकाशित केले जाईल.'

...................

जातीच्या दाखल्यासाठी

कोळी समाजाचा मोर्चा

म. टा. प्रतिनिधी, कोल्हापूर

कोळी समाजाला जातीचे दाखले वेळेवर मिळावेत, या मागणीसाठी कोल्हापूर जिल्हा कोळी समाज विकास मंडळाने करवीर प्रांताधिकारी कार्यालयावर मोर्चा काढण्यात आला. समाजाच्या वतीने करवीर प्रांताधिकारी सचिन इथापे यांना निवेदन देण्यात आले. निवेदनात म्हटले आहे की, कोळी महादेव, टोकरे कोळी, कोळी ढोर, कोळी मल्हार या जमातीच्या सदस्यांना त्रास अगर जबरदस्ती न करता जातीचे दाखले द्यावेत. १९५० च्या पूर्वीचा जातीचा दाखला देताना पुराव्याचा आग्रह धरू नये, अशा मागण्या करण्यात आल्या आहेत.

म. टा. प्रतिनिधी, कोल्हापूर

'धर्मा पाटील या शेतकऱ्यास मृत्यूनंतर सरकारने न्याय दिला. मी तर माजी सैनिक आहे. मला मृत्यूची भीती नाही. माझ्या मुलीचा खून होऊन दोन वर्षे उलटली तरीही मला न्याय मिळत नसल्याने मी आत्मदहनाचा निर्णय घेत आहे. माझ्या मृत्यूने तरी मुलीस न्याय मिळावा,' असा इशारा सहायक पोलिस निरीक्षक अश्विनी बिद्रे यांचे वडील जयकुमार बिद्रे यांनी मुख्यमंत्र्यांना निवेदनाद्वारे दिला आहे.

दरम्यान, तांत्रिक तपास अधिकारी संगीता अल्फान्सो यांचा कालावधी शुक्रवारी (ता. २०) संपत असल्याने त्यांना पूर्णवेळ तपास अधिकारीपदी नियुक्त करावे, अशी मागणी बिद्रे-गोरे कुटुंबीयांनी केली आहे.

पोलिस निरीक्षक अभय कुरुंदकर याने साथीदारांच्या मदतीने अश्विनी बिद्रे यांचे अपहरण करून निर्घृण खून केल्याची कबुली अटकेतील संशयिताने दिली आहे. कुरुंदकरच्या अटकेनंतरही पोलिसांच्या हाती महत्त्वाचे पुरावे लागलेले नाहीत. तपासातील उणिवांमुळे न्याय मिळण्याची शक्यता धूसर असल्याने अश्विनी यांचे वडील जयकुमार बिद्रे यांनी नाराजी व्यक्त केली आहे. त्यांनी मुख्यमंत्री देवेंद्र फडणवीस आणि गृह सचिवांना निवेदन दिले असून, कोणत्याही क्षणी मंत्रालयात मुख्यमंत्र्यांच्या दालनासमोर आत्मदहन करू, असा इशारा दिला आहे.

वारंवार पाठपुरावा केल्यानंतर पोलिसांनी संशयित आरोपी कुरुंदकरसह चौघांना अटक केली. मात्र, त्याच्याविरोधातील भक्कम पुरावे जमा करण्यात पोलिसांकडून चालढकल सुरू आहे. योग्य पुरावे हातात नसतील तर संशयितांना याचा कोर्टात फायदा होण्याची शक्यता आहे. त्यामुळे अश्विनी बिद्रे यांच्या मृतदेहाचे अवशेष शोधून काढावेत, असा आग्रह बिद्रे-गोरे कुटुंबीयांनी धरला आहे. या गुन्ह्याचा खटला जलदगती न्यायालयात चालवावा, तसेच सरकारी वकील म्हणून उज्ज्वल निकम यांची नियुक्त करण्याची मागणी कुटुंबीयांनी केली होती. याबाबत सरकारने कोणताच निर्णय घेतलेला नाही, त्यामुळे जयकुमार बिद्रे यांनी आत्मदहनाचा निर्णय घेतला आहे.

००००

अल्फान्सोंची मुदत संपली

एसीपी संगीता अल्फान्सो यांनी या गुन्ह्याचा सखोल तपास केला आहे. अल्फान्सो यांच्या बदलीनंतर नवी मुंबईचे पोलिस आयुक्त हेमंत नगराळे यांनी तपासात उणिवा ठेवल्याचा आरोप बिद्रे-गोरे कुटुंबीयांनी केला होता. कोर्टात मागणी केल्यानंतर अल्फान्सो यांची पुन्हा तीन महिन्यांसाठी तांत्रिक तपास अधिकारी म्हणून नियुक्ती केली होती. आज, २० एप्रिलला ही मुदत संपत आहे. दरम्यान, अल्फान्सो यांच्याकडेच तपासाची सूत्रे द्यावीत, अशी मागणी बिद्रे-गोरे कुटुंबीयांनी केली आहे.

०००००००००००००००००००००००

बैठकीत कारखानदारांची मागणी

म. टा. प्रतिनिधी, कोल्हापूर

ऊस उत्पादकांना एफआरपी देण्यासाठी केंद्र सरकारच्या कृषीमूल्य आयोगाने शिफारस केलेल्या ३२०० रुपये प्रतिक्विंटल साखरदराची अंमलबजावणी केंद्र सरकारने करावी, अशी मागणी जिल्ह्यातील साखर कारखानदारांनी बैठकीत केली. थकीत एफआरपीची रक्कम त्वरीत अदा करण्यासाठी साखर आयुक्त कार्यालयाकडून साखरसाठे जप्त करण्यासंबंधी काही साखर कारखान्यांना नोटीसा देण्यात आल्या. त्यामुळे गुरूवारी जिल्हा मध्यवर्ती सहकारी बँकेत बैठक झाली. बैठकीत साखरेचा भाव कमी झाल्याने एफआरपी देणे अडचणीचे होत असल्याचा सूर कारखानदारांनी आळवला.

यंदाच्या गाळप हंगामात देशात साखरेचे उत्पादन ३०० लाख मेट्रिक टन झाले. मागीलवर्षीचा सुमारे ४० लाख मेट्रिक टन साखर साठा होता. दोन हंगामातील देशात एकूण साखर उपलब्धता ३४० लाख मेट्रिक टन झाली आहे. देशातर्गंत २५० मेट्रिक टन साखरेला मागणी आहे. यामुळे पुढील वर्षी ९० लाख मेट्रिक टन साखर शिल्लक राहणार आहे. पुढील हंगामात साखरेचा भाव कमी होण्याची भीती कारखानदारांनी व्यक्त केली.

गाळप हंगामाच्या सुरुवातीला साखरेचा दर ३६०० प्रतिक्विंटल होता. त्यामध्ये दिवसेंदिवस घसरण राहिली. सध्या साखरेचा भाव २५५० प्रतिक्विंटल पर्यंत खाली आला आहे. सन २०१७ -१८ साठी एफआरपी ठरविताना कृषीमूल्य आयोगाने साखरेचे होलसेल दर ३२०० रुपये प्रतिक्विंटल गृहीत धरले. ही शिफारस विचारात घेवूनच केंद्र शासनाने अत्यावश्यक वस्तू कायद्याखाली उसाची एफआरपी निश्चित केली. परिणामी ते देणे सर्वच कारखांन्यावर कायदेशीर बंधनकारक आहे. म्हणूनच एफआरपी ठरविताना गृहीत धरलेल्या साखरेची ३२०० रुपये प्रतिक्विंटल मिळण्यासाठी अत्यावश्यक, जीवनावश्यक वस्तू कायद्याखाली केंद्र सरकारने त्वरित आदेश द्यावेत, अशी एकमुखी मागणीही खासगी व सहकारी कारखान्यांकडून करण्यात आली.

बैठकीला आमदार हसन मुश्रीफ, माजी आमदार के.पी. पाटील यासह मंडलिक - हमीदवाडा, छत्रपती शाहू - कागल, कुंभी कासारी - कुडित्रे, जवाहर - हुपरी, दत्त - शिरोळ, तात्यासाहेब कोरे - वारणा, गुरुदत्त- टाकळीवाडी, डॉ. डी. वाय. पाटील -गगनबावडा, छत्रपती राजाराम - कसबा बावडा, आजरा, भोगावती, शरद - नरंदे, इकोकेन - म्हाळुंगे, वोलम अग्रो - राजगोळी खुर्द , ब्रिक्स - गडहिंग्लज, दत्त दालमिया - आसुर्ले पोर्ले, रेणुका - इचलकरंजी आदी कारखान्यांचे कार्यकारी संचालक उपस्थित होते.

-------------------------------------------------------

मुश्रीफ हे कारखानदारांचे हस्तक

अंकुश संघटनेचा आरोप

म. टा. प्रतिनिधी, कोल्हापूर

'साखर कारखाने शॉर्ट मार्जिनमध्ये येतात म्हणून नव्हे तर मार्जिन शॉर्ट होणार असल्याचे दु:ख हसन मुश्रीफ यांना होत आहे. यामुळे ते एफआरपीचा शब्दश: अर्थ काढून काही संघटना न्यायालयात गेल्याची टीका करीत आहेत. ऊस उत्पादकांच्या आर्थिक हिताचा विचार करण्याऐवजी कारखानदारांची त्यांना चिंता अधिक आहे. त्यामुळे ते शेतकऱ्यांचे कैवारी नव्हे तर साखर कारखानदारांचे हस्तक आहेत', असा आरोप अंकुश संघटनेचे अध्यक्ष धनाजी चुडमुंगे यांनी गुरूवारी प्रसिध्दी पत्रकातून केला.

एफआरपीची थकीत रक्कम मिळण्यासाठी अंकुश संघटना न्यायालयात गेली आहेत. त्यांनी केलेल्या पाठपुराव्यामुळे एफआरपी थकवलेल्या काही कारखान्यांना साखर जप्तीचा आदेश साखर आयुक्तांनी दिले. या पार्श्वभूमीवर अंकुश संघटनेवर दोन दिवसांपूर्वी मुश्रीफ यांनी अप्रत्यक्षपणे टीका केली होती. त्यांला चुडमुंगे यांनी प्रसिध्दी पत्रकातून प्रत्युत्तर दिले.

पत्रकात म्हटले आहे, गेल्या हंगामात साखरेचा भाव प्रतिक्विंटल ४००० हजार होता. कारखान्यांना प्रतिटनाला १२०० ते १३०० रूपये अतिरिक्त नफा मिळाला. त्यातील फक्त ४०० ते ५०० रूपये शेतकऱ्यांना दिले. उर्वरित पैसे कारखानदारांनी कुठे ठेवले हे सांगितले नाही. जिल्ह्यातील सरासरी तोडणी, ओढणी खर्च ६०० रूपयांत असताना मुश्रीफ यांच्या कारखान्यांचा खर्च ७१५ कसा, ते काय गोव्यातून ऊस आणतात का ? साखर दराची घसरण सुरू असे, सांगत एफआरपी देता येत नाही, असे कारखानदारांचे म्हणणे दिशाभूल करणारे आहे.

------------------------------

म. टा. प्रतिनिधी, कोल्हापूर

तावडे हॉटेल परिसरातील अनधिकृत बांधकामांवर कारवाई न करणाऱ्या महापालिका अधिकाऱ्यांचा निषेध करत शिवसेनेने महापालिकेसमोर बांगड्या फेकण्याचे आंदोलन केले. तिथे कारवाई करायची नसल्यास शहरातील सामान्यांच्या अतिक्रमणावरही कारवाई करु देणार नाही, असा इशाराही यावेळी देण्यात आला.

हायकोर्टाने महापालिकेची हद्द स्पष्ट केली आहे. तरीही तावडे हॉटेल परिसरातील अनधिकृत बांधकामांवर महापालिकेने कारवाई केली नाही. त्यातून अधिकाऱ्यांनी अकार्यक्षमता सिद्ध केली आहे. त्यासाठी गुरुवारी झालेल्या महापालिकेच्या सभेवेळी शिवसेनेच्यावतीने महापालिकेवर बांगड्याफेक आंदोलन करण्यात आले. जिल्हाप्रमुख संजय पवार, उपजिल्हा प्रमुख सुजीत चव्हाण, शहरप्रमुख शिवाजीराव जाधव, दुर्गेश लिंग्रस यांच्या नेतृत्वाखाली महापालिकेवर मोर्चा काढण्यात आला. यावेळी हातगाडीवरुन बांगड्या आणण्यात आल्या. महापालिकेच्या मुख्य प्रवेशद्वारावर मोर्चा आल्यानंतर काहींनी महापालिकेच्या दिशेने बांगड्या फेकल्या. त्यानंतर पोलिसांनी हातगाडी ताब्यात घेतली. कार्यकर्त्यांनी प्रवेशद्वाराला काही बांगड्या बांधल्या.

प्रवेशद्वारासमोर झालेल्या सभेत संजय पवार म्हणाले, 'धनदांडग्यांना एक न्याय व सामान्यांना एक न्याय असा दुजाभाव केला जात असेल तर खपवून घेणार नाही. दुजाभाव करायचा असेल तर प्रथम अतिक्रमण विभाग बंद करावा. तसेच शहरात सामान्यांच्या अतिक्रमणावर कारवाई केल्यास त्याला चोख उत्तर दिले जाईल. हे टाळायचे असल्यास महापालिका प्रशासनाने अनधिकृत बांधकामे जमीनदोस्त करुन कर्तव्याचे पालन करावे.' या आंदोलनात हर्षल सुर्वे,जिल्हा महिला आघाडी प्रमुख शुभांगी पोवार, रिया पाटील, रवी चौगुले, अवधूत साळोखे, विराज पाटील, दत्ताजी टिपुगडे, दिलीप देसाई, विनोद खोत, दिलीप जाधव, संजय जाधव आदी सहभागी झाले.

म. टा. प्रतिनिधी, कोल्हापूर

टोल आंदोलनातील आंदोलकांना दिलासा मिळण्याची शक्यता बळावली आहे. आंदोलनादरम्यान दाखल झालेले गुन्हे मागे घ्यावेत, अशी मागणी टोलविरोधी कृती समितीने मुख्यमंत्री देवेंद्र फडणवीस आणि पालकमंत्री चंद्रकांत पाटील यांच्याकडे केली होती. राज्यभरातील आंदोलनांमध्ये दाखल झालेले गुन्हे मागे घेण्याची प्रक्रिया सुरू झाल्याने टोल आंदोलकांनाही याचा फायदा होणार आहे. ही प्रक्रिया तातडीने पूर्ण व्हावी, यासाठी टोलविरोधी कृती समिती पाठपुरावा करणार आहे.

रस्ते विकास प्रकल्पातील कामाच्या दर्जावरून सुरू झालेले आंदोलन आयआरबी कंपनीला शहरातून बाहेर घालविण्यापर्यंत सुरू राहिले. तीन वर्षे चाललेल्या या आंदोलनादरम्यान दोनशेहून अधिक आंदोलकांवर गुन्हे दाखल झाले आहेत. कोल्हापूर बंद आणि टोल नाक्यांची जाळपोळ केल्याने पोलिसांनी आंदोलकांकडून नुकसानभरपाई वसूल करण्याची प्रक्रिया सुरू केली होती. याबाबत गेली दोन वर्षे आंदोलकांना नोटिसा पाठविल्या जात आहेत. आंदोलकांच्या मागे सुरू असलेला पोलिसांचा ससेमिरा चुकवण्यासाठी त्यांच्यावरील गुन्हे मागे घ्यावेत, अशी मागणी टोलविरोधी कृती समितीने मुख्यमंत्री देवेंद्र फडणवीस आणि पालकमंत्री चंद्रकांत पाटील यंच्याकडे केली होती.

दरम्यान, राज्यातील सर्वच सामाजिक आणि राजकीय आंदोलनातील आंदोलकांवरील गुन्हे मागे घेण्याची प्रक्रिया राज्य सरकारकडून सुरू आहे. कोल्हापुरातील टोलविरोधी आंदोलनात दाखल झालेले गुन्हेही मागे घेतले जाणार आहेत. गुन्हे मागे घेण्यासह नुकसानभरपाई वसूल करू नये, असा आग्रह टोलविरोधी कृती समितीने धरला आहे. टोल आंदोलनातील गुन्हे दाखल झालेल्या आणि नुकसानभरपाईची नोटीस मिळालेल्या आंदोलकांनी टोलविरोधी कृती समितीशी संपर्क साधावा, असे आवाहन निमंत्रक निवास साळोखे यांनी केले आहे. याबाबत लवकरच पालकमंत्री चंद्रकांत पाटील यांची भेट घेऊन गुन्हे आणि नुकसानभरपाई रद्द करण्याची मागणी केली जाणार आहे, असे साळोखे यांनी सांगितले.

म. टा. प्रतिनिधी, कोल्हापूर

तावडे हॉटेल परिसरातील अनधिकृत बांधकामावरील कारवाईला राज्य सरकारने तात्पुरती स्थगिती दिल्याबद्दल संतापलेल्या सत्ताधारी काँग्रेस, राष्ट्रवादीच्या नगरसेवकांनी महापालिका सभेत अधिकाऱ्यांवर बांगड्या फेकण्याबरोबरच फाइल्स भिरकावल्याने मोठा गदारोळ उडाला. 'तावडे हॉटेल परिसरातील श्रीमंतांच्या अतिक्रमणांना संरक्षण देण्यासाठी सरकारने एकतर्फी स्थगिती दिली आहे. कारवाई होत नसेल तर नगरसेवकपद गेले तरी बेहत्तर शहरातील एकाही अतिक्रमणाला हात लावू देणार नाही,' असा इशारा देत सत्ताधारी काँग्रेस आघाडीने राज्य सरकार व महापालिका प्रशासनाचा निषेध करत सभा तहकूब केली.

तावडे हॉटेल परिसरातील अनधिकृत बांधकामाबाबत सरकारने हस्तक्षेप करत कारवाई करु नये असे तोंडी आदेश १० एप्रिलला महापालिकेला दिले होते. पालकमंत्र्यांनीही महापालिका पदाधिकारी व नगरसेवकांबाबत वक्तव्य केले होते. त्यामुळे गुरुवारी सभा सुरु होताच महापौर स्वाती यवलुजे यांनी थेट प्रश्नोत्तराचा तास घेतला. त्यात अॅड. सूरमंजिरी लाटकर व प्रा. जयंत पाटील यांनी तावडे हॉटेल परिसरात कारवाईप्रश्नी सरकारकडून काही पत्र आले का? त्यात नेमके काय आदेश दिले आहेत? सुप्रीम कोर्टात कोण गेले आहे का? २०१४ नंतरच्या बांधकामांवर काय कारवाई करणार, सरकार नेमके कुणासाठी काम करत आहे, असे प्रश्न विचारले. तसेच नगरसेवकांना उद्देशून जे अपशब्द वापरले गेले, त्याचा लाटकर यांनी निषेध केला.

तात्पुरत्या स्थगितीचा सरकारचा आदेश पाळावा लागेल, असे आयुक्तांनी सांगितल्यानंतर काँग्रेसचे गटनेते शारंगधर देशमुख, सभागृह नेता दिलीप पोवार, शिवसेनेचे गटनेते नियाज खान, जयश्री चव्हाण, महेश सावंत, तौफिक मुल्लाणी यांनी कारवाईची जोरदार मागणी करत गोंधळ घालण्यास सुरुवात केली. सरकार चुकीचे निर्णय घेत असेल तर आयुक्त म्हणून असलेल्या अधिकारात कारवाई करावी, अशी मागणी केली. पण त्यानंतर आयुक्तांनी सरकारच्या आदेशापुढे जाता येणार नाही, असे सांगताच देशमुख यांनी सरकार तसेच प्रशासनाचा निषेध करत सभा तहकूब करण्याची सूचना मांडली. प्रशासन कारवाई करत नसल्याचा निषेध म्हणून काँग्रेस आघाडीच्या नगरसेविकांनी सभागृहात बसलेल्या अधिकाऱ्यांवर बांगड्या फेकल्या. त्यातील काही बांगड्या अतिरिक्त आयुक्तांच्या अंगावर तर काही महापौर, आयुक्तांच्या टेबलसमोरील कर्मचाऱ्यांच्या अंगावर पडल्या. त्याचवेळी अन्य नगरसेवकांनी सरकार व प्रशासनाचा निषेध करत सभागृहात फाइल्स भिरकावल्या. या गोंधळातच सभा तहकूब करण्यात आली. आघाडीचे सर्व नगरसेवक काळ्या फिती लावून सभेला आले होते.

तत्पूर्वी प्रा. पाटील यांनी या जागेची १९४५ सालापासूनची माहिती दिली. ते म्हणाले,'ज्या ९९ नागरिकांनी २२ वर्षापासून महापालिकेला त्रास दिला. कायम कोर्ट कचेऱ्या करायला लावले. अपमान केला. त्यांच्या बाजूने आदेश काढला जातो, हे निषेधार्ह आहे. तसेच ज्या नगरविकासच्या प्रधान सचिवांनी तेथील जागा महापालिकेच्या असल्याचे प्रतिज्ञापत्र दिले त्यांनीच पुन्हा बैठक बोलवली. त्याचे गौडबंगाल समजले नाही. तेथील मिळकती का पाडू नयेत याबाबतच्या नोटीसांविरोधात ते कोर्टात गेले होते. तोच मूळ दावा होता.'

भूपाल शेटे यांनी महापालिकेवर बांगड्या फेकण्यापेक्षा तेथील कारवाई ज्यांनी थांबवली त्यांना बांगड्या द्यायला हव्या होत्या. तावडे हॉटेल परिसरात कारवाई केली जात नसेल तर शहरातील अतिक्रमणांनाही हात लावता येणार नाही, असे सांगितले. शहरातील झोपडपट्ट्या कायम करा, सरकारने महापालिका चालवावी, दादागिरी केली जात असेल तर न्यायव्यवस्था योग्य न्याय करेल, असे इशारेही देण्यात आले. या विषयावेळी भाजप, ताराराणी आघाडीचे सदस्य शांत होते.

तात्पुरत्या स्थगितीचे पत्र

तावडे हॉटेल परिसरातील बांधकामावर महापालिकेने प्रस्तावित केलेल्या कारवाईस तात्पुरती स्थगिती देण्यात येत असल्याचे पत्र नगरविकास विभागाचे उपसचिव कैलास बधान यांनी बुधवारी महापालिकेला दिले. तेथील बांधकामाबाबत सक्षम यंत्रणेमार्फत तपासणी करुन कार्यवाही करणे आवश्यक आहे. तशी तपासणी अद्याप झाल्याचे आढळून येत नाही. त्यामुळे पुढील आदेश येईपर्यंत तात्पुरती स्थगिती देण्यात येत असल्याचे आदेशात म्हटले आहे. याबाबत आयुक्त डॉ. चौधरी म्हणाले की, सरकारच्या आदेशाचे पालन करणे बंधनकारक आहे. पण मुंबईतील बैठकीनंतर तेथील बांधकामांबाबत माहिती मागवली आहे. त्यातून वस्तुस्थिती कळवणार आहे. ही जागा महापालिकेची आहे. त्यामुळे महापालिकाच तेथील सक्षम प्राधिकरण आहे ही महापालिकेची भूमिका कायम आहे. सुप्रीम कोर्टात महापालिका सक्षम वकील उभे करील. शिवाय गरज वाटल्यास खास वकीलही देण्यात येईल.

आजपासून कारवाई

तावडे हॉटेल परिसरातील काही जागांवरील सातबारावर महापालिकेचे नाव लागले आहे. त्या जागा तातडीने ताब्यात घेण्यासाठी कार्यवाही सुरु केली जाईल. तसेच स्थगिती असतानाही बांधकामे केली आहेत. त्यांना नोटिसा दिल्या असतील तर त्यांच्यावर गुन्हे दाखल करा. नगररचना विभागाचे सहायक संचालक व उपशहर अभियंता यांनी शुक्रवारपासून कारवाई करावी, असे आदेश आयुक्त डॉ. चौधरी यांनी दिले.

म. टा. प्रतिनिधी, कोल्हापूर

राष्ट्रवादी काँग्रेस पक्षांतर्गत जिल्हाध्यक्ष व शहराध्यक्ष निवडीचा कार्यक्रम जाहीर झाला असून, येत्या रविवारी (ता.२२) दोन्ही पदांसाठी मते आजमावून घेतली जाणार आहेत. ए. वाय. पाटील यांचीच पुन्हा जिल्हाध्यक्षपदी वर्णी लागण्याची स्पष्ट चिन्हे आहेत. शहराध्यक्षपदावर तिघांचा डोळा असून, त्यासाठी माजी महापौर आर. के. पोवार, विद्यमान शहराध्यक्ष राजू लाटकर, माजी स्थायी समितीचे माजी सभापती आदिल फरास यांची नावे चर्चेत आहेत.

जिल्हा निवडणूक निर्णय अधिकारी दिलीप पाटील यांच्या अध्यक्षतेखाली राष्ट्रवादीच्या जिल्हा कार्यालयात जिल्हा व शहर कार्यकारिणीची बैठक होणार आहे. यावेळी दोन्ही पदांसाठी इच्छुक व कार्यकारिणीची मते आजमावून घेतली जाणार आहेत. दोन्ही पदांसाठी निवडीची प्रक्रिया पूर्ण झाल्यानंतर त्याचा अहवाल प्रदेश कार्यालयाकडे सादर केला जाईल. राष्ट्रवादी प्रदेश कार्यकारिणीची बैठक २९ एप्रिलला पुण्यात होणार आहे. प्रदेश पातळीवर वरिष्ठ नेत्यांमध्ये चर्चा होईल. त्यानंतर निवड जाहीर करण्यात येईल. पक्षाचे राष्ट्रीय अध्यक्ष शरद पवार यांच्या प्रमुख उपस्थितीत सभा होणार आहे. प्रदेशाध्यक्ष सुनील तटकरे व विधिमंडळ पक्षनेते अजित पवार यांच्यासह पक्षातील ज्येष्ठ नेत्यांच्या उपस्थितीत पुण्यात बैठक होणार आहे.

राष्ट्रवादी काँग्रेस पक्षांतर्गत २०१८ ते २०२० या कालावधीसाठी संघटनात्मक निवडणुका होत आहेत. जिल्हा राष्ट्रवादीमध्ये सध्या जिल्हाध्यपदासाठी फारसे कुणी इच्छुक दिसत नाही. राधानगरी-भुदरगड विधानसभा मतदारसंघात सध्या राष्ट्रवादीमध्ये गटबाजी वाढली आहे. माजी आमदार के. पी. पाटील आणि जिल्हाध्यक्ष ए. वाय. या 'मेहुणे-पाहुणे' यांच्यातच विधानसभेच्या उमेदवारीवरून राजकारण सुरू आहे. दोघांनीही विधानसभेच्या पार्श्वभूमीवर स्वतंत्र भेटीगाठी, मेळावे सुरू केले आहेत. त्यामुळे दोघांमध्ये दरी रुंदावत चालली आहे.

जिल्हाध्यक्ष ए. वाय. पाटील मध्यंतरी भाजपच्या वाटेवर असल्याची चर्चा वेगावली होती. दुसरीकडे राष्ट्रवादीने सरकारविरोधात हल्लाबोल आंदोलन पुकारून वातावरणनिर्मिती केली. पक्षाच्या हल्लाबोल आंदोलनात ए.वाय. सक्रिय होते. शिवाय गेली तीन वर्षे त्यांनी संघटनात्मक काम उत्कृष्ट केल्याचे प्रशस्तिपत्र प्रदेश नेत्यांनी यापूर्वीच दिले आहे. यामुळे जिल्हाध्यपदावर ए.वाय. यांचीच पुन्हा वर्णी लागणार हे स्पष्ट आहे. जिल्हाध्यक्षपदासाठी बाबासाहेब पाटील-आसुर्लेकर यांच्या नावाचीही चर्चा आहे.

०००००

शहराध्यक्षपदासाठी तिघे दावेदार

शहराध्यक्षपदासाठी माजी महापौर आर. के. पोवार, शहराध्यक्ष राजू लाटकर व आदिल फरास इच्छुक असल्याची पक्षात चर्चा आहे. पोवार यांनी यापूर्वी दहा वर्षांहून अधिक काळ शहराध्यक्षपद भूषविले आहे. लाटकर २०१५ पासून शहराध्यक्षपदावर आहेत. फरास युवक राष्ट्रवादीत कार्यरत आहेत. त्यामुळे शहराध्यक्षपदासाठी चुरस निर्माण होणार आहे.

.............

Bhimgonda.Desai@timesgroup.com

Tweet : @bhimgondaMT

कोल्हापूर : सरकारने विनाअनुदानीत आणि कायम विनाअनुदानीत शाळांना २० टक्के अनुदान देण्याचा निर्णय सरकारने घेतला. त्यामध्ये जिल्ह्यातील केवळ ६ शाळाच पात्र ठरल्या़ त्या शाळा दहा वर्षांपूर्वीच्या असल्याने नियमानुसार शंभर टक्के अनुदानास पात्र आहेत. मात्र केवळ २० टक्के अनुदान देत तोंडाला पाने पुसण्याचा प्रयत्न सरकारने केल्याचा आरोप महाराष्ट्र राज्य कायम विनाअनुदानीत कृती समितीने केला आहे. सप्टेंबर २०१६ मध्ये २० टक्के अनुदान मिळालेल्या ४७ शाळांनाही दरवर्षी २० टक्क्यांची वाढ दिलेली नाही. याही शाळा शंभर टक्के अनुदानापासून वंचित आहेत. परिणामी या शाळांमध्ये काम करणारे शिक्षक, शिक्षकेतर कर्मचाऱ्यांत असंतोष आहे.

खासगी शाळेला मान्यता मिळाल्यापासून पाच वर्षानंतर २० टक्के, सहा वर्षानंतर ४०, सात वर्षानंतर ६०, आठ वर्षानंतर ८०, आणि ९ वर्षानंतर शंभर टक्के अनुदान नियमानुसार मिळाले पाहिजे. मात्र सरकार सोयीस्करपणे दुर्लक्ष करीत आहे. २०१६ मध्ये ४७ शाळांना २० टक्के अनुदान मिळाले. त्यानंतर नैसर्गिक वाढ झालेली नाही. तीन वर्षानंतरही त्या शाळांचे अनुदान २० टक्केच राहिले आहे. सरकार नव्याने पात्र शाळांना अनुदान देत नव्हते. यामुळे कृती समितीने दहावी, बारावी परीक्षेच्या उत्तरपत्रिका तपासणीवर बहिष्कार टाकला. त्यानंतर सरकारने राज्यातील विनाअनुदानीत १५८ प्राथमिक आणि ६३१ माध्यमिक शाळांना सरसकट २० टक्के अनुदान देणार असल्याचे सांगितले. त्याचा लाभ जिल्ह्यातील सहा शाळांना होणार आहे. या सहा शाळा दहा वर्षांपूर्वीच्या आहेत. त्यांना १०० टक्के अनुदानाची प्रतिक्षा होती. मात्र केवळ २० टक्के अनुदानावर सरकारने त्यांची बोळवण केली. तीन वर्षांपूर्वी २० टक्के अनुदान मिळालेल्या शाळांनाही वाढ मिळालेली नाही. आता २० टक्के अनुदान मिळणाऱ्या शाळांना १०० टक्के अनुदान मिळण्यासाठी पुढची किती वर्षे प्रतिक्षा करावी लागणार, असा प्रश्न उपस्थित होत आहे.

०००००००००००

लाभ मिळणाऱ्या शाळा

२० टक्के अनुदानासाठी जिल्ह्यातील पात्र शाळा अशा : न्यू इंग्लिश स्कूल (सूर्वेनगर, कोल्हापूर), सिध्देश्वर हायस्कूल (विक्रमनगर, कोल्हापूर), पंचशील हायस्कूल (शहापूर, ता. हातकणंगले), न्यू इंग्लिश स्कूल (कासारपुतळे, ता. राधानगरी), राजाभाऊ जगताप हायस्कूल (इचलकरंजी, ता. हातकणंगले), वारणा विद्यानिकेतन (नवे पारगाव, ता. पन्हाळा). याशिवाय १६ शाळांना वाढीव तुकड्यांना मान्यता मिळाली.

००००००००

वीस टक्के अनुदान देण्याच्या सरकारच्या निर्णयाचा लाभ जिल्ह्यातील सहा शाळांना होणार आहे. शिवाय १६ शाळांना वाढीव तुकड्यांना मान्यता देण्यात आली आहे. यामुळे येत्या शैक्षणिक वर्षात विद्यार्थी प्रवेशाचा प्रश्न काही प्रमाणात कमी होईल. नव्या निर्णयाचा आदेश आल्यानंतर तातडीने कार्यवाही सुरू केली जाईल.

किरण लोहार, शिक्षणाधिकारी, माध्यमिक

०००००००

वीस टक्के अनुदान मिळालेल्या शाळांची मान्यता १० वर्षापूर्वीच्या आहेत. त्या शंभर टक्के अनुदानासाठी पात्र आहेत. परंतु २० टक्के अनुदान देऊन सरकारने या शाळांच्या तोंडाला पाने पुसली आहेत. तीन वर्षांपूर्वी २० टक्के अनुदान मिळालेल्या शाळांना नैसर्गिक वाढही दिलेली नाही. त्या शाळा २० टक्के अनुदानावरच लटकल्या आहेत.

खंडेराव जगदाळे, उपाध्यक्ष, राज्य कायम विनाअनुदानीत कृती समिती

मिरवणुकीत वादावादी

कसबा बावडा वृत्तसेवा

संयुक्त कसबा बावडा तरुण मंडळातर्फे पारंपरिक वाद्यांत आयोजित शिवजयंती मिरवणुकीदरम्यान गुरुवारी रात्री किरकोळ वाद निर्माण झाला. पिंजार गल्ली ते भगवा चौकमार्गे मिरवणूक सुरू होती. चौगुले गल्ली कार्नर येथे रात्री दहाच्या सुमारास मिरवणूक दाखल झाली. यावेळी एका पोलिस कर्मचाऱ्याने कार्यकर्त्यांना मिरवणूक गतिमान करण्याच्या सूचना दिल्या. त्यावर कार्यकर्त्यांनी मिरवणूक सुरळीत सुरू असताना पोलिसांचा हस्तक्षेप कशाला, असा मुद्दा मांडला. यावरून पोलिस व कार्यकर्त्यांत किरकोळ वादावादी झाली. यामुळे सुमारे पंधरा मिनिटे मिरवणूक रेंगाळली. त्यानंतर शाहूपुरी पोलिस ठाण्याचे निरीक्षक संजय मोरे घटनास्थळी पोहोचले. कार्यकर्त्यांशी चर्चा केल्यानंतर मिरवणूक मार्गस्थ झाली.

म. टा. प्रतिनिधी, कोल्हापूर

राधानगरी तालुक्यातील तळाशी-तुरंबे गावच्या हद्दीतील शेतात ठेवलेला पाण्याच्या मोटरपंपाची चोरी केल्याच्या संशयावरून वसंत गोविंद जाधव (रा. तळाशी) यांच्यावर चुलतभावानेच धारदार हत्याराने हल्ला केला होता. याप्रकरणी दोषारोपपत्र सिद्ध झाल्याने प्रमुख जिल्हा व सत्र न्यायाधीश एम. ए. लव्हेकर यांनी शुक्रवारी आरोपी सर्जेराव यशवंत जाधव-चव्हाण (वय ४९, रा. तुरंबे) याला पाच वर्षांची सक्तमजुरी आणि एक हजार रुपये दंडाची शिक्षा सुनावली.

सरकारी वकील मंजुषा पाटील यांनी दिलेल्या माहितीनुसार, जखमी वसंत जाधव आणि आरोपी सर्जेराव जाधव तळाशीचे राहिवाशी असून, ते चुलतभाऊ आहेत. सर्जेराव हा दादू चव्हाण (रा. तुरुंबे) यांच्याकडे घरजावई आहे. पाच ते सहा वर्षांपूर्वी आरोपीच्या शेतातील विद्युत मोटरपंप चोरीस गेला होता. वसंत जाधवनेच तो चोरल्याचा संशय सर्जेरावला होता. यावरून त्यांच्यात भांडण झाले होते. ५ डिसेंबर २०१४ रोजी वसंत दुचाकीवरून तळाशीहून तुरुंबेकडे जात होते. यावेळी सर्जेरावने दुचाकी आडवी घालून वसंतच्या छाती, पोट, पायावर चाकूने वार करून गंभीर जखमी केले. जखमी अवस्थेत वसंत यांनी मुलगा मच्छिंद्रला फोन करून बोलावून घेतले. त्यानंतर वसंत यांना उपचारासाठी सीपीआरमध्ये दाखल केले. मच्छिंद्र जाधव याने राधानगरी पोलिसांत दिलेल्या फिर्यादीनुसार तत्कालीन पोलिस निरीक्षक अनिल गाडे यांनी हल्लेखोर सर्जेराव जाधववर गुन्हा दाखल केला. गाडे यांनी तपास पूर्ण करुन कोर्टात दोषारोपपत्र सादर केले होते.

सरकारपक्षातर्फे कोर्टात ११ साक्षीदार तपासण्यात आले. वसंत जाधव, आरोपीला जखमीसोबत पाहणारे साक्षीदार तानाजी दत्तात्रय चव्हाण, परशुराम रामचंद्र साळसकर, वैद्यकीय अधिकारी प्रमोद भोई, आदींच्या साक्षी महत्त्वाच्या ठरल्या. सरकारी वकील मंजुषा पाटील यांचा युक्तिवाद ग्राह्य धरून न्यायाधीश लव्हेकर यांनी कलम ३०७ प्रमाणे आरोपीला पाच वर्षे सक्तमजुरी आणि एक हजार रुपये दंडाची शिक्षा ठोठावली. दंड न भरल्यास एक महिन्याची साधी कैद भोगावी लागणार आहे.

उद्या बैठक

कोल्हापूर : निवृत्त पोलिस अधिकारी व कर्मचारी कल्याणकारी असोसिएशनची मासिक बैठक रविवारी (ता. २२) कसबा बावडा येथील पोलिस मुख्यालय अलंकार हॉल येथे सकाळी दहा वाजता होणार आहे. असोसिएशनने घेतलेल्या निर्णयाची माहिती बैठकीत देण्यात येणार आहे. तसेच आप्पासाहेब खोत यांच्या कथाकथनाचा कार्यक्रम होणार आहे. बैठकीला सदस्यांनी उपस्थित राहावे, असे आवाहन असोसिएशनचे अध्यक्ष मदनराव चव्हाण यांनी केले आहे.

दुभंगलेली मने

जोडण्याचे काम करु

शाहू-आंबेडकर कुटुंबियांचा मुरगूडमध्ये निर्धार

म. टा.वृत्तसेवा, कागल

'राजकारणामुळे राज्यातील समाजकारण बिघडून गेले आहे. त्यामुळे वातावरण दुषित झाले आहे. शाहू आणि आंबेडकरांच्या परंपरा खंडित करण्याचे काम पध्दतशीरपणे सुरु आहे. त्यामुळेच एक समाज दुसऱ्या समाजाकडे संशयाच्या नजरेने बघू लागला आहे. अशा परिस्थितीत १९२० नंतर तब्बल ९८ वर्षांनंतर एकत्र आलेली ही दोन कुटुंबे समाजाची दुभंगलेली मने जोडण्याचेच काम करतील ,'असा निर्धार भारतीय बौध्द महासभेचे कार्याध्यक्ष व डॉ. बाबासाहेब आंबेडकरांचे नातू भीमराव यशवंत आंबेडकर यांनी व्यक्त केला. मुरगूड येथे डॉ.बाबासाहेब आंबेडकरांच्या १२७ व्या जयंतीनिमित्ताने आयोजित कार्यक्रमात ते बोलत होते.

भीमराव आंबेडकर म्हणाले, 'राजकारणाचे व्यापारीकरण जर इथेच थांबवायचे असेल तर शाहू,फुले व आंबेडकरांच्या खऱ्या अर्थाने विचारांच्या आणि रक्तामासांच्या वारसांनी पुढे येवून सत्तेत जायला पाहीजे . कारण हे वारस जनतेशी द्रोह करणार नाहीत. मी राजकारणापेक्षा समाजकारणाला प्राधान्य देतो. त्यामुळे अशा वारसांना एकत्र करुन सर्वांना एक दिशा देण्याची जबाबदारी समरजीत घाटगे यांनी घ्यावी. डॉ. बाबासाहेब आंबेडकरांना घडवण्यात शाहू राजांच्या सिंहाचा वाटा होता. आजची पिढी पुस्तके कमी वाचते. त्यामुळे काळाच्या ओघात इतिहास गडप होवू नये यासाठी संपूर्ण बाबासाहेब आज जगासमोर आणण्याची गरज निर्माण झाली आहे. अशा परिस्थितीत समरजीत यांचे आमंत्रण ही माझ्यासाठी मोठी पर्वणी आणि आनंदाची गोष्ट आहे. शिवाय हे मला का सुचले नाही याचा मोठा खेदही आहे. परंतु मी अशाच सर्वसमावेशक प्लॅटफॉर्मची वाट पहात होतो. ही समाजधुरीणांची परंपरा पुढे अशीच चालू राहील आणि दोन्ही कुटुंबांच्या मैत्रीत यापुढे कधीही खंड पडणार नाही.'

समरजितसिंह घाटगे म्हणाले, 'ही जयंती माणूस जोडण्यासाठीची आहे. यामध्ये राजकारणाचा कोणताच संबंध नाही. राजकीय नेते येतील अन् जातील,सत्ता येईल व जाईल,आमदारही येतील आणि जातील परंतु शाहू आणि आंबेडकर घराण्याचे संबंध पिढ्यानपिढ्या तसेच रहातील. माझ्यावर वारसावरुन आरोप करणाऱ्यांना या गर्दीनेच उत्तर दिले आहे. कारण मी या सर्वांना गाड्या पाठवून पाहुण्यांसारखे निमंत्रण दिलेले नाही, तर दोन्ही कुटुंबांवरील प्रेमापोटीच जनसागर लोटला आहे. आजच्या युगात लोक स्वतःचा लोकोत्सव मोठ्या ऐटीत करतात परंतु १९८५ च्या नगरपालिकेतील सत्तेच्या काळी दिवंगत विक्रमसिंहराजेंनी आपल्या वडीलांच्या पुतळ्याऐवजी डॉ.बाबासाहेंब आंबेडकरांचा पुतळा गैबी चौकात बसवला.'

कार्यक्रमास मनीषा आंबेडकर,ॠतिका आंबेडकर,अमन आंबेडकर,साहील आंबेडकर,सुजान आंबेडकर,प्रसिध्द गायक आदर्श शिंदे,श्रीमंत सुहासिनीदेवी घाटगे,नवोदिता घाटगे,विरेंद्रसिंह घाटगे,रणजित पाटील,टी.ए.कांबळे,राजे बँकेचे चेअरमन एम.पी.पाटील,शाहू उपाध्यक्ष अमरसिंग घोरपडे,बाबासाहेब पाटील,भूषण पाटील आदी प्रमुख उपस्थित होते.

----------------------------------------------------------

चौकट

ही तर दुसरी माणगाव परिषद...

१९२० च्या माणगाव परिषदेनंतर ९८ वर्षांनी दोन्ही कुटुंबे एकत्र आली. माणगावचे 'म' आणि मुरगूडचे 'म' याचा संदर्भ समरजित घाटगेंनी भाषणातून दिला. माणगाव परिषदेप्रमाणेच घाटगेंनी आपले अध्यक्षपद आंबेडकरांचे नातू भीमराव यांना दिले. यामुळे माणगाव परिषदेच्या आठवणींना उजाळा मिळाल्याची भावना अनेकांनी व्यक्त केल्या.

कळंबा कारागृहात

आज गळाभेट

म. टा. प्रतिनिधी, कोल्हापूर

कळंबा कारागृहात शिक्षा भोगत असलेल्या कैद्यांना त्यांच्या मुलांची गळाभेट घेण्याची संधी कारागृह प्रशासनाने उपलब्ध करून दिली आहे. शनिवारी (ता. २१) सकाळी दहा ते बारा या वेळेत हा उपक्रम होणार आहे. प्रमुख जिल्हा व सत्र न्यायाधीश एम. ए. लवेकर यांच्या उपस्थितीत उपक्रमाची सुरुवात होणार असून, २५० हून अधिक कैद्यांनी मुलांच्या भेटीसाठी अर्ज केल्याची माहिती कारागृह अधीक्षक शरद शेळके यांनी दिली. कैद्यांच्या वर्तनात सुधारणा करणारा हा उपक्रम असून, कळंबा कारागृह प्रशासनाने गेल्या दोन वर्षांत चारवेळा याचे आयोजन केले होते. कैद्यांच्या पोशाखात पाहून पालकांबद्दल मुलांच्या मनात दुरावा निर्माण होऊ नये, यासाठी नेहमीच्या पोशाखात कैद्यांना भेटण्याची संधी कारागृह प्रशासनाने दिली आहे. गळाभेटीनंतर कैदी आणि त्यांच्या मुलांसाठी एकत्रित भोजनाचीही व्यवस्था केल्याचे कारागृह अधीक्षक शेळके यांनी सांगितले.

म. टा. प्रतिनिधी, कोल्हापूर

'सरकारने दिलेली स्थगिती केवळ बांधकामविषयक आहे की, व्यवसायांबाबतही लागू होते याबाबत कायदेविषयक सल्ला घेण्यात येणार आहे. त्यानंतर नोटीस देऊन तेथील व्यावसायिकांवर परवाने नसल्याबद्दल सीलबंदची कारवाई केली जाईल,' असे आयुक्त डॉ. अभिजित चौधरी यांनी सांगितले.

तावडे हॉटेल परिसरातील अनधिकृत बांधकामांवर गुन्हे दाखल करण्याच्या दृष्टीने नगररचना विभाग व विभागीय कार्यालयाने शुक्रवारी संयुक्त पाहणी केली. यावेळी आठ ठिकाणी बांधकामे सुरू असल्याचे आढळून आले. त्यामुळे त्याबाबतही कायदेविषयक सल्ला घेऊन गुन्हे दाखल करण्यात येणार आहेत.

हायकोर्टाची स्थगिती असतानाही तावडे हॉटेल परिसरात अजूनही अनधिकृत बांधकामे होत असल्याचे गुरुवारी झालेल्या महापालिकेच्या सभेत नगरसेवकांनी मांडले होते. तसेच ती जागा महापालिकेची असल्याचे स्पष्ट झाल्याने व्यवसाय करण्यासाठी महापालिकेचा परवाना आवश्यक आहे. तेथील व्यावसायिकांनी परवाना घेतला नसल्याने ते व्यवसाय सील करण्यात यावेत अशी मागणीही केली होती. त्याबाबत आयुक्त डॉ. चौधरी यांनी शुक्रवारपासून कारवाई केली जाईल, असे सांगितले होते. त्यानुसार नगररचना विभागाचे सहायक संचालक धनंजय खोत, उपनगररचनाकार नारायण भोसले, उपशहर अभियंता हर्षजित घाटगे, महादेव फुलारी, सुरेश पाटील यांनी तावडे हॉटेल परिसरात पाहणी केली. हायकोर्टाची स्थगिती असतानाही २०१४ नंतर बांधकामे केलेल्या दहा मिळकतींना ही बांधकामे अनधिकृत असून फौजदारी गुन्हा दाखल का करू नये, अशा नोटिसा नगररचना विभागाने दिल्या होत्या. पाहणीवेळी त्यातील आठ मिळकतींचे सध्याही बांधकाम सुरू असल्याचे आढळून आले. या मिळकतींबाबत कायदेशीर सल्ला घेऊन गुन्हे दाखल करण्यात येणार असल्याचे सांगण्यात येत आहे.

व्यवसाय सील करण्याच्या नगरसेवकांच्या मागणीबाबत आयुक्त डॉ. चौधरी म्हणाले, 'सरकारने स्थगितीचे पत्र दिले आहे. ती स्थगिती केवळ बांधकामविषयक आहे की व्यवसायांवरील कारवाईसाठीही लागू होते याचा कायदेशीर सल्ला घेण्यात येणार आहे. या परिसरात २०१४ पूर्वीच्या ८१ मिळकती, २०१४ नंतरच्या सर्व्हेमध्ये आढळलेल्या १९ तर कोणत्याही सर्व्हेमध्ये न सापडलेल्या २७ मिळकती आहेत. त्या सर्वांसाठी स्वतंत्र सल्ले घेण्यात येणार आहेत. त्यानंतर कारवाई केली जाईल. २०१४ नंतरच्या सर्व्हेमध्ये सापडलेल्या व नोटीस बजावलेल्या मिळकतींवर कारवाई करण्यास हरकत नसल्याचा सल्ला मिळताच त्यांना परवाना नसल्याच्या नोटीस देऊन सीलबंदची कारवाई केली जाईल. महापौरही कारवाई करण्याबाबतचे पत्र देणार आहेत. सरकारने मागितलेल्या माहितीनुसार रि. स. नंबरनिहाय बांधकामांची यादी जिल्हा प्रशासनाकडे सादर केली आहे. सभागृहात नगरसेवकांनी व्यक्त केलेल्या भावना सरकारला पाठवणार आहे.'

०००

महापालिका कोर्टात बाजू मांडणार

तावडे हॉटेलप्रश्नी हायकोर्टात नवीन दाखल केलेल्या याचिकेत महापालिकेचा समावेश आहे. बुधवारी या याचिकेवर सुनावणी होणार आहे. त्यासाठी सरकारकडून स्थगितीबाबतचे स्पष्टीकरण मागवले आहे. यामध्ये महापालिकेलाही बाजू मांडावी लागणार असून अॅड. अभिजित आडगुळे बाजू मांडतील, असे आयुक्त डॉ. चौधरी यांनी सांगितले.

म. टा. प्रतिनिधी, कोल्हापूर

राजर्षी शाहू छत्रपती शासकीय वैद्यकीय महाविद्यालयाच्या अधिष्ठातापदी डॉ. रघोजी थोरात यांची नियुक्ती करण्यात आली. गेली तीन डॉ. जयप्रकाश रामानंद यांच्याकडे या पदाचा कार्यभार होता. डॉ. थोरात यांनी शुक्रवारी सायंकाळी रामानंद यांच्याकडून पदभार स्वीकारला.

सीपीआरमध्ये आरोग्य सुविधा पुरविणाऱ्या राजर्षी शाहू छत्रपती शासकीय वैद्यकीय रुग्णालयाच्या अधिष्ठाता पदाचा कार्यभार गेल्या तीन वर्षांपासून डॉ. जयप्रकाश रामानंद यांच्याकडे होता. वैद्यकीय शिक्षण आणि संशोधन विभागाचे सचिव व संचालक संजय देशमुख यांनी डॉ. रामानंद यांना पदावरून हटवले. याजागी डॉ. रघोजी थोरात यांची नियुक्ती केली आहे. शुक्रवारी दुपारी नियुक्तीचे आदेश आले. थोरात यांनी तातडीने शुक्रवारी संध्याकाळी डॉ. रामानंद यांच्याकडून पदभार स्वीकारला. थोरात हे कान, नाक आणि घसा विभागाचे प्रमुख आहेत. यापूर्वीही त्यांनी सीपीआरच्या अधिष्ठातापदी काम केले आहे. सेवानिवृत्तीसाठी त्यांचा पाच महिन्यांचा कालावधी शिल्लक राहिला आहे. डॉ. रामानंद यांना तडकाफडकी पदावरून हटवण्याचे कारण मात्र स्पष्ट झाले नाही.