\Bसंयुक्त रविवार पेठतर्फे शिवजयंतीनिमित्त रंगणार केरळी नृत्य \Bमिरवणुकीत १५ फूटी अश्वारूढ पुतळा आकर्षणसह भरगच्च कार्यक्रम म. टा. प्रतिनिधी, कोल्हापूर 'गेल्या आठ वर्षापासून ऐतिहासिक बिंदू चौक येथे भागातील सर्व मंडळ, तालीम संस्था विविध संघटना यांच्या संयुक्त विद्यमाने एकत्रितरित्या पारंपारिक पद्धतीने मोठ्या उत्साहात शिवजयंती साजरी होत आहे. यंदाचे नववे वर्ष असून यावर्षीही मोठ्या दिमाखात शिवजयंती साजरी होणार आहे. शिवजयंती उत्सवानिमित्त १६ एप्रिलपासून भरगच्च कार्यक्रमाचे आयोजन करण्यात आले आहे. मिरवणुकीतील केरळी नृत्याविष्कार, १५ फूट अश्वारूढ शिवपुतळा हे यंदाच्या उत्सवाचे खास आकर्षण आहे', अशी माहिती संयुक्त रविवार पेठ शिवजयंती उत्सव समितीचे अध्यक्ष प्रवीण सोनवणे यांनी पत्रकार परिषदेत दिली. सोनवणे म्हणाले,' मुंबईतील अश्वारूढ शिवरायांच्या पुतळ्याप्रमाणेच कोल्हापुरात १५ फूट उंच शिवरायांचा पुतळा शिवजयंतीनिमित्त साकारण्यात आला आहे. त्याचबरोबर ऐतिहासिक बिंदू चौक येथील देखाव्याचे उद्घाटन सोमवारी १६ एप्रिल रोजी सायंकाळी पाच वाजता होणार आहे. यावेळी पालकमंत्री चंद्रकांत पाटील, आमदार अमल महाडिक, देवस्थान समिती अध्यक्ष महेश जाधव, संदीप देसाई, जयेश कदम, स्थायी समिती सभापती आशिष ढवळे, आदिल फरास, दुर्वास कदम आदी उपस्थित राहणार आहेत. शिवजयंतीच्या पूर्वसंध्येला सोमवारी आतिषबाजी करण्यात येणार आहे.' मंगळवारी १७ एप्रिल रोजी मुख्य दिवशी महापौर स्वाती येवलुजे, मधुरिमाराजे,वैशाली क्षीरसागर, प्रतिमा पाटील यांच्या प्रमुख उपस्थितीत छत्रपती शिवाजी महाराज जन्म सोहळा, मूर्तीपूजन, पाळणा व संगीत होणार आहे. तर सायंकाळी भव्य मिरवणुकीचे उद्घाटन आमदार राजेश क्षीरसागर, आमदार सतेज पाटील,माजी आमदार मालोजीराजे छत्रपती यांच्या हस्ते होणार आहे. १५ फुटी अश्वारूढ पुतळा, केरळचे पारंपारिक नृत्य, चाळीस लहान मुलांचे लेझीम पथक, ऐतिहासिक वेशभूषा ही प्रमुख आकर्षणे असणार आहेत. मिरवणुकीस बिंदू चौक येथून प्रारंभ होणार आहे. यावेळी उपाध्यक्ष सुमित पोवार, सोनम कुमार घोटणे, अमोल मोरे आदी उपस्थित होते.
मोबाइल अॅप डाउनलोड करा आणि राहा अपडेट
