निवडक नगरसेवकांवर निधीची खैरात स्थायी सभापती उत्तरेवर मेहेरबान, नाराज सदस्यांनी घेतली महापौरांची भेट म. टा. प्रतिनिधी, कोल्हापूर स्थायी समिती सभापतींनी अर्थसंकल्पात भाजप-ताराराणी आघाडीतील काही निवडक नगरसेवकांवरच निधीची खैरात केली आहे. अन्य नगरसेवकांसाठी तरतूद करण्यापेक्षा स्थायी सभापतींनी ६७ कामांच्या यादीत स्वत:च्या प्रभागातील २० कामांसाठी तरतूद केली आहे. याशिवाय सिद्धार्थनगरपासून कदमवाडी, विक्रमनगर या शहराच्या उत्तरेकडील प्रभागांतच निधीची तरतूद केली आहे. त्यामुळे भाजप-ताराराणी आघाडीतील नाराज गटाने बुधवारी महापौर स्वाती यवलुजे यांची भेट घेऊन त्यांच्या प्रभागांसाठी निधीची तरतूद करण्याची मागणी केली. स्थायी सभापती आशीष ढवळे यांनी सभापतींसाठीचा २५ लाखांचा निधी, १३ लाखांचा ऐच्छिक निधी यासह इतर कामांसाठी एक कोटी ६७ लाख रुपयांचा निधी अशी दोन कोटी पाच लाख रुपयांची तरतूद केली आहे, तर शहराच्या दक्षिणेकडील प्रभागांपेक्षा उत्तरेकडील प्रभागांतच निधीची तरतूद केल्याचे स्पष्ट दिसत आहे. सम्राटनगर व सानेगुरुजी वसाहत हे दोन प्रभाग सोडल्यास इतर १८ प्रभाग शहरातील मध्यवस्तीपासून कसबा बावडा, टेंबलाईवाडी, कदमवाडीपर्यंतचे आहेत. या सर्व प्रभागांत काँग्रेसचे अशोक जाधव, श्रावण फडतारे वगळता भाजप-ताराराणी आघाडीचेच नगरसेवक आहेत. तसेच स्थायी सभापतिपदाच्या निवडणुकीत राष्ट्रवादीतून फुटून मतदान करणाऱ्या अफजल पिरजादे व अजिंक्य चव्हाण यांना झुकते माप दिले आहे. याशिवाय कार्यालयाकडून सुचविण्यात येणाऱ्या कामांसाठी विविध नावाखाली निधी दिला जातो. त्यासाठी आतापर्यंत एक नाव देऊन त्याअंतर्गत सर्वांना निधी मिळेल, अशी व्यवस्था केली जात होती. पण आता एखाद्या विशिष्ट कामासाठीच निधी दिला आहे. त्यामुळे अन्य ठिकाणी हा निधी खर्च करता येणार नाही. अशा सुचवलेल्या कामांसाठीही भाजप, ताराराणी आघाडीच्याच ठराविक नगरसेवकांना निधी दिला आहे. तसेच स्थायी समितीतील काँग्रेस आघाडीच्या सदस्यांना जादा निधी दिलेला नाही. प्रत्येक नगरसेवकाला पाच लाख रुपयांचा, तर स्वीकृत नगरसेवकाला चार लाख रुपयांचा निधी देण्यात येणार आहे. स्थायी सदस्यांना प्रत्येकी सहा लाख रुपयांचा निधी दिला आहे. भाजप, ताराराणी आघाडीतील काही नगरसेवक नाराज आहेत. त्यांनी महापौरांची भेट घेऊन निधी देण्याची मागणी केली आहे. तर काही नगरसेवकांनी आता काही बोलायचे नाही, असा पवित्रा घेतला आहे. आतापर्यंत भाजप-ताराराणी आघाडीमध्ये दबून असलेली धुसफूस अर्थसंकल्पाच्या निमित्ताने उघड होण्याचे चित्र निर्माण झाले आहे. ...... या प्रभागांमध्ये निधी महाडिक वसाहत, सर्किट हाउस, भोसलेवाडी कदमवाडी, सदर बाजार, सिद्धार्थनगर, कदमवाडी, मुक्त सैनिक वसाहत, सिद्धार्थनगर, पद्माराजे उद्यान, रंकाळा स्टँड, सम्राटनगर, सिद्धाळा गार्डन, टेंबलाईवाडी, लक्ष्मीविलास पॅलेस, सानेगुरुजी, कसबा बावडा पूर्व, शाहूपुरी तालीम, ताराबाई पार्क ...... रंकाळ्यासाठी काहीच नाही सरकारकडून मंजूर केलेला चार कोटी ८० लाख रुपयांचा निधी रंकाळा विकासासाठी वापरण्यात येणार आहे. महापालिका आतापर्यंत स्वनिधीतून रंकाळ्यासाठी विशेष तरतूद करत होती. यंदा एक रुपयाही महापालिकेच्या निधीतील तरतूद नाही. यामुळे शहरातील पर्यटनाचे मोठे केंद्र असलेल्या रंकाळ्याकडे महापालिकेचे प्रथमच दुर्लक्ष झाल्याचे शारंगधर देशमुख यांनी सांगितले. ..... इतका आटापिटा दोघांसाठी स्थायी सभापतिपद मिळवण्यासाठी भाजप-ताराराणी आघाडीने प्रचंड आटापिटा केला. घोडेबाजारही केला. इतका आटापिटा शहराच्या विकासासाठी की या दोघांच्या प्रभागाच्या विकासासाठी, हेच आता समजेनास झाले आहे. तसेच ज्या ढवळेंनी यापूर्वी सभापतिपद भूषवले आहे, त्यांच्याकडून अशा प्रकारचा अर्थसंकल्प केला जाईल ही अपेक्षा नव्हती, असेही देशमुख यांनी सांगितले. ..... शिवाजी पेठ, मंगळवार पेठ विसरले काय? 'कोल्हापूर उत्तर मतदारसंघातून निवडणूक लढवलेले सत्यजित कदम यांनी आगामी निवडणूक डोळ्यासमोर ठेवून त्यांच्या प्रभागाशेजारील भागात कोट्यवधी रुपयांच्या निधीची तरतूद केली आहे. शहरातील अपवाद प्रभाग वगळता सिद्धार्थनगरपासून कदमवाडी, मुक्त सैनिक वसाहतीपर्यंतच्याच प्रभागांमध्ये निधीची तरतूद दिसत आहे. हे पाहून कदम आणखी एक वेगळा विधानसभा मतदारसंघ तयार करणार आहेत की काय असे वाटते. उत्तर मतदारसंघात शिवाजी पेठ, मंगळवार पेठ, बुधवार पेठ यासारख्या जुन्या पेठांचे शहरही येते हे कदम विसरले आहेत की काय?' असा टोला देशमुख यांनी यावेळी लगावला. ...........
मोबाइल अॅप डाउनलोड करा आणि राहा अपडेट
