जिल्ह्यातील सर्व पोलिस ठाणी स्मार्ट करण्याचे काम सध्या सुरू असून सुविधांसह पोलिसांची मानसिकता, तंत्रज्ञानाचा वापर, तपासातील गतिमानता, कागदपत्रांचे जतन यासह पोलिस आणि नागरिकांमधील संबंधही सुधारले जाणार आहेत. मे २०१८ पर्यंत सर्व पोलिस ठाणी स्मार्ट होणार असल्याने पोलिस ठाण्यांचे रुपडे पालटणार आहे. हा बदल पोलिस ठाण्यातील कामकाज गतिमान करण्यास उपयुक्त ठरेल, असा विश्वास विशेष पोलिस महानिरीक्षक विश्वास नांगरे-पाटील यांनी व्यक्त केला आहे.
पंतप्रधान नरेंद्र मोदी यांनी देशातील प्रत्येक जिल्ह्यात किमान दोन पोलिस ठाणी स्मार्ट करण्याची संकल्पना मांडली होती. यानंतर आयजी नांगरे-पाटील यांनी कोल्हापूर परिक्षेत्रातील सर्वच पोलिस ठाणी स्मार्ट करण्याचा निर्णय घेतला आहे. या उपक्रमांतर्गत पोलिस ठाण्यातील सुविधा, शिस्त, तंत्रज्ञानाचा वापर, तत्परता आणि पोलिस-नागरिक संबंध यावर विशेष भर दिला आहे. पुण्यातील सोर कन्सल्टिंग सर्व्हिसेस कंपनीकडे काम दिले आहे. या कंपनीने सातारा जिल्ह्यातील सर्व पोलिस ठाणी आणि अधीक्षक कार्यालय स्मार्ट केले आहे. यानंतर कोल्हापुरातील शाहूवाडी पोलिस ठाणेही स्मार्ट केले आहे. सध्या आयजी ऑफिस, अधीक्षक कार्यालय आणि करवीर पोलिस ठाण्यात या कामाला सुरुवात झाली आहे. मे २०१८ पर्यंत जिल्ह्यातील ३० पोलिस ठाण्यांसह अधीक्षक कार्यालय आणि आयजी ऑफिसही स्मार्ट होणार आहे.
या उपक्रमांतर्गत पोलिस ठाण्यात स्वागत कक्ष असेल. सुसज्ज फर्निचर, स्वतंत्र रेकॉर्ड रुम, अधिकारी आणि कर्मचाऱ्यांसाठी विश्रांती कक्ष, शस्त्रे, हेल्मेट, अश्रूधुराच्या नळकांड्या, संरक्षण ढाली यासाठी स्वतंत्र कक्ष असेल. प्रत्येक पोलिस ठाण्यात स्वतंत्र कोठडीचाही प्रस्ताव पाठवला आहे. स्मार्ट पोलिस ठाण्यांमध्ये तंत्रज्ञानाचा वापर वाढणार आहे. सीसीटीव्ही, सीसीटीएनएस, इंटरनेट सुविधा, स्मार्ट फोनचा वापर, ऑनलाइन तक्रारींची नोंद यासह गुन्ह्यांची माहितीदेखील ऑनलाइन मिळण्याची व्यवस्था असेल. कामकाजात गतिमानता येण्यासाठी सुसज्ज वाहने, संपर्काची साधने, जीपीएस प्रणाली पुरवली जाणार आहे. पोलिसांनी तातडीने घटनास्थळाला भेट देणे, बिनचूक पंचनाम्याचे लेखन, जबाब लेखन यांचे प्रशिक्षण दिले जाणार आहे.
पोलिस ठाण्यातील रेकॉर्ड सुस्थितीत ठेवण्यासाठी स्वतंत्र रेकॉर्ड रुम असेल. यात २० वर्षांतील कोणतीही फाइल केवळ तीन मिनिटात मिळेल. वाहतुकीच्या नियमांची माहिती देण्यासह पोलिस आणि नागरिक यांच्यातील संबंध सुधारण्यावरही स्मार्ट पोलिस ठाण्यांमध्ये भर दिला आहे. जातीय सलोखा राखणे, महिला आणि मुलांच्या सुरक्षेसाठी स्वतंत्र पथकांची नियुक्ती करणे, शांतता कमिट्यांची जबाबदारी, सामाजिक प्रबोधन याबाबतही पोलिस ठाण्यांकडून काम होणार आहे. यामुळे पोलिस ठाण्यांमध्ये अंतर्बाह्य बदल होणार आहे. मे महिन्यापर्यंत हे सर्व काम पूर्ण होईल.
नागरिकांच्या मनातील पोलिसांची प्रतिमा बदलणारा हा उपक्रम आहे. पोलिसांच्या मानसिकतेसह पोलिस ठाण्यांतील सुविधांमध्येही अमूलाग्र बदल होणार आहेत. याची योग्य अंमलबजावणी करण्यासाठी पोलिसांना प्रशिक्षित केले जाणार आहे. लवकरच याची सुरुवात होईल.
विश्वास नांगरे-पाटील, आयजी
राज्यात अनेक ठिकाणी सध्या पोलिस ठाणी स्मार्ट होत आहेत. आम्ही नागपूर ग्रामीण विभागातील पोलिस ठाणी स्मार्ट केल्यानंतर सातारा जिल्ह्यातील पोलिस ठाण्यांमध्ये हा उपक्रम सुरू केला आहे. याचे परिणाम चांगले आहेत. कोल्हापुरातही सर्व पोलिस ठाणी मेपूर्वी स्मार्ट होतील.
सेजल रुपगल, प्रमुख, सोर कन्सलटिंग सर्व्हिसेस
मोबाइल अॅप डाउनलोड करा आणि राहा अपडेट
