Uddhav.Godase@timesgroup.com
Tweet@Uddhavg_MT
कोल्हापूर : शहरातील वाहतुकीला शिस्त लावण्यासाठी पोलिसांनी वाहतूक आराखडा तयार केला आहे. तीन टप्प्यांतील उपाययोजनांपैकी तातडीने राबवल्या जाणाऱ्या उपाययोजनांना सध्या प्राधान्य दिले जात आहे. आराखडा उत्तम असला तरी, त्याची प्रत्यक्षात अंमलबजावणी होणेही तितकेच गरजेच आहे. पोलिसांनी वाहतूक शिस्तीसाठी वाहनधारकांवर कारवाईचा बडगा उगारला. मात्र, आरटीओ आणि महानगरपालिकेच्या उदासिनतेमुळे वाहतूक कोंडी फोडण्यात अपेक्षित यश येत नाही.
कोल्हापूर शहरासह जिल्ह्यात १३ लाख ३६ हजार नोंदणीकृत वाहनांची संख्या आहेत. यातील १० लाख ५६ हजार दुचाकी आहेत, तर २ लाख ८० हजारांहून अधिक चारचाकी आणि अवजड वाहने आहेत. याशिवाय बाहेरच्या जिल्ह्यातून कोल्हापुरात येणाऱ्या वाहनांचीही संख्या दिवसेंदिवस वाढत आहे. वाढत्या पर्यटनामुळे शहरात वाहतूक कोंडी नित्याचीच बनली आहे. शहरातील अरुंद रस्ते आणि रस्त्यांवरील अतिक्रमणांमुळे वाहतूक जीवघेणी बनली आहे. महानगरपालिका, आरटीओ आणि पोलिस यांच्या संयुक्त प्रयत्नातून वाहतुकीला शिस्त लागू शकते, मात्र यासाठी प्रमाणिक प्रयत्न होत नाहीत. चौकांमधील झेब्रा क्रॉसिंग, ट्रॅफिक सिग्नल, स्पीड ब्रेकर, दिशादर्शक फलक, पार्किंगची सुविधा, वनवेचे नियोजन यासाठी वाहतूक नियंत्रण शाखेला वारंवार महापालिकेकडे पाठपुरावा करावा लागतो. शहरातील विनापरवाना आणि अवजड वाहतुकीवर आरटीओकडून कारवाई होत नाही. अनधिकृत रिक्षा स्टॉप, खासगी आरामबसच्या मालकांची आरेरावी, वडापमुळे होणारी कोंडी याकडे पोलिसांचे दुर्लक्ष होते. यावर मार्ग काढण्यासाठी वाहतूक आराखडा गरजेचा होता. गेल्या दोन वर्षात शहरातील वाहतुकीचा अभ्यास करून पोलिस, महापालिका आणि आरटीओ विभागाने वाहतूक आराखडा तयार केला आहे. मात्र, याची अंमलबजावणी होणेही तितकेच गरजेचे आहे.
सिग्नल सिंक्रोनायझेशन नाहीच
शहरात सध्या २२ सिग्नल आहेत. याशिवाय आणखी तीन ठिकाणी सिग्नल प्रस्तावित आहेत. २२ पैकी ६ बंद आहेत. लिशां हॉटेल चौक ते सीपीआर चौक या मुख्य मार्गावर सहा सिग्नल आहेत, तर दसरा चौक ते हॉकी स्टेडियम या मार्गावर सहा सिग्नल आहेत. या दोन्ही मार्गावरील सिग्नलचे सिंक्रोनायझेशन करणे गरजेचे आहे. सिंक्रोनायझेशनमुळे सिग्नल यंत्रणेत समन्वय राहणार आहे. शहर वाहतूक नियंत्रण शाखेने यासाठी महापालिकेकडे प्रस्ताव पाठवला असून, महापालिकेच्या स्थायी समितीने २३ लाखांचा निधी मंजूर केला आहे. निविदा प्रक्रिया पूर्ण होताच कामाला सुरुवात होणार असल्याची माहिती वाहतूक नियंत्रण शाखेने दिली.
दुभाजकांसह स्प्रिंग पोस्ट
बेशिस्त वाहतूक रोखण्यासाठी अपघातप्रवण क्षेत्रात दुभाजक लावण्याचे सूचवले आहे. यानुसार पोलिसांनी खासगी संस्थांच्या मदतीने स्टार बझारसमोर जुना पुणे-बेंगळुरू महामार्ग आणि रंकाळा चौपाटीजवळ राधानगरी मार्गावर दुभाजक बसवले आहेत. याशिवाय क्रशर चौक, हॉकी स्टेडियम, सायबर चौक, टाकाळा चौक, सीपीआर चौक, गोखले कॉलेज चौक, गंगावेश चौक, व्हिनस चौक आणि लिशां हॉटेल चौकात दुभाजक लावणे प्रस्तावित आहे. रस्त्याची डावी बाजू रिकामी राहण्यासाठी ताराराणी चौक, सीपीआर चौक, असेम्बली कॉर्नर, हॉकी स्टेडियम, सायबर चौक, आदी ठिकाणी कायमस्वरुपी स्प्रिंग पोस्ट लावण्यासह रस्त्यांचे रुंदीकरण करण्याचे महापालिकेला सुचवले आहे.
शहरात ११ ब्लॅक स्पॉट
कोल्हापूर पोलिस, सार्वजनिक बांधकाम विभाग, महानगरपालिका आणि आरटीओ विभागाने रस्त्यांची पाहणी करून अपघातास कारणीभूत ठरणारे ब्लॅक स्पॉट निश्चित केले आहेत. जिल्ह्यात एकूण ६१ ब्लॅक स्पॉट आहेत. त्यापैकी ११ ब्लॅक स्पॉट कोल्हापूर शहरात आहेत. ब्लॅक स्पॉटला स्पीड ब्रेकर बसवणे, रस्त्यांचे रुंदीकरण, दिशादर्शक फलक लावण्याचे सुचवले आहे. शहरातील तावडे हॉटेल परिसर, शिवाजी विद्यापीठ रोड, टेंबलाई नाका उड्डाणपूल परिसर, एसएससी बोर्डाजवळचे वळण, आदी ठिकाणांचा यात समावेश आहे.
झेब्रा क्रॉसिंगसाठी २० लाख
शहरातील रस्त्यांवरील झेब्रा क्रॉसिंग आणि दिशादर्शक फलकांसाठी महापालिकेने २० लाख रुपयांचा निधी मंजूर केला आहे. यातून रस्त्यांवर पांढरे पट्टे मारणे, स्पीड ब्रेकर तयार करणे, वाहनधारकांना सूचना देणारे फलक तयार केले जाणार आहेत. यातील काही फलक लावले आहेत, तर अन्य फलक लावले जाणार आहेत. लिशां हॉटेल चौक, ताराराणी चौक, दाभोलकर चौक, व्हिनस कॉर्नर चौक, सीपीआर चौक, फोर्ड कॉर्नर, उमा टॉकीज चौक, क्रशर चौक, हॉकी स्टेडियम चौक आणि टाकाळा चौकात झेब्रा क्रॉसिंगचे काम नव्याने करावे लागणार आहे. नो पार्किंग, वनवे, सम-विषम पार्किंग या सूचनांचे फलकही जुने झाले आहेत. असे फलक बदलण्याचे वाहतूक पोलिसांनी सूचवले आहे.
फेरीवाल्यांसह जुनी वाहने रस्त्यातच
महापालिकेने फेरीवाल्यांसाठी स्वतंत्र नियोजन केले आहे. यानुसार वाहतूक कोंडीच्या ठिकाणी फेरीवाल्यांना थांबण्यास परवानगी नाकारली आहे. प्रत्यक्षात मात्र गर्दीच्या ठिकाणीच फेरीवालेही बस्तान मांडतात. धैर्यप्रसाद चौक, खानविलकर चौक, भवानी मंडप ते बिंदू चौक कमान या ठिकाणी 'नो फेरीवाला झोन' घोषित करून फेरीवाल्यांचे अतिक्रमण हटवावे, असा अहवाल वाहतूक नियंत्रण शाखेने महापालिकेला दिला आहे. वाहतुकीस अडथळा करणारे १२९ फेरीवाले आणि दुकानांवर पोलिसांनी कारवाई केली आहे. नागरिकांची नादुरुस्त वाहने वर्षानुवर्षे रस्त्याकडेला पार्क केली आहेत. अशा वाहनांच्या मालकांना नोटिसा पाठवून वाहने हटवण्याच्या सूचना दिल्या आहेत. गेल्या वर्षभरात पोलिसांनी ३९० बेवारस वाहने हटवली आहेत. अनेक गॅरेजच्या बाहेर दुरुस्तीसाठी आलेल्या वाहनांची गर्दी असते. यातील बहुतांश वाहने रस्त्यावरच उभी असतात. वाहतुकीला अडथळा करणाऱ्या गॅरेजमालकांवर कारवाई केली जाणार आहे.
पार्किंगसाठी ७२ ठिकाणे
शहरात पार्किंग ही सर्वात मोठी समस्या आहे. अंबाबाई मंदिराच्या आसपास एक ते दीड किलोमीटरच्या परिसरात स्थानिकांनी स्वत:च्या वाहनांसाठी पार्किंगसाठी सोय केलेली नाही. बहुतांश वाहने रस्त्यावरच पार्क केली जातात. अपार्टमेंटच्या तळमजल्यावर पार्किंगऐवजी दुकानगाळे आहेत. नागरिकांची वाहने रस्त्यावर असल्याने कोंडीत भर पडते. खरेदीसाठी किंवा फिरण्यासाठी आलेल्या पर्यटकांचीही वाहने रस्त्याकडेलाच उभी असतात. याला शिस्त लावण्यासाठी दुचाकींसाठी ३७, तर चारचाकी वाहनांसाठी ३५ पार्किंगची ठिकाणे नियोजित आहेत. यातील काही ठिकाणी सध्या पार्किंगची व्यवस्था उपलब्ध आहे. मध्यवर्ती बसस्थानक आणि अंबाबाई मंदिर परिसरात बहुमजली पार्किंग इमारत प्रस्तावित आहे, यासाठी लोकप्रतिनिधींकडून पाठपुरावा होणे गरजेचे आहे. महापालिकेने पे अँड पार्किंगची सुविधा उपलब्ध करावी, असे आवाहन विशेष पोलिस महानिरीक्षक विश्वास नांगरे-पाटील यांनी केले आहे. मध्यवर्ती बसस्थानक परिसरातील खासगी आराम बसेसना कावळा नाका परिसरात जागा देण्याच्या हालचाली महापालिकेकडून सुरू आहेत. याच्या अंमलबजावणी तातडीणे होणे गरजेचे आहे.
मोबाइल अॅप डाउनलोड करा आणि राहा अपडेट
