आरोप, प्रत्यारोपांच्या फैरी; फुटीर नगरसेवकांनी नेत्यावर डागली तोफ
म. टा. प्रतिनिधी, कोल्हापूर
फोडाफोडीच्या राजकारणानंतर काँग्रेस राष्ट्रवादी काँग्रेस आघाडी आणि भाजप, ताराराणी आघाडीमध्ये आरोप, प्रत्यारोप सुरु झाल्याने महापालिकेतील राजकारण तापले आहे. घोडेबाजाराच्या आरोपावरुन सत्ताधारी आणि विरोधक आमनेसामने उभे ठाकले.
भाजपकडून कोट्यवधी रुपयांचा घोडेबाजार
महापालिकेतील सत्तेसाठी भाजपने कोट्यवधी रुपयांचा घोडेबाजार केला. व्हीप बजावूनही पक्षासोबत गद्दारी करणाऱ्यांना पक्षांतर्गत बंदी कायद्यानुसार कारवाई केली जाईल. काँग्रेस आघाडी सरकारच्या कालावधीत माजी मंत्री हसन मुश्रीफ व सतेज पाटील यांनी ११०० कोटी रुपयांचा निधी शहराच्या विकासकामांना उपलब्ध केला. भाजपच्या नेत्यांनी फोडाफोडीच्या राजकारणापेक्षा ११०० कोटीपैकी ५० टक्के निधी आणण्याची हिम्मत दाखवावी, असे आव्हान राष्ट्रवादीचे शहराध्यक्ष राजू लाटकर व काँग्रेसचे गटनेते शारंगधर देशमुख यांनी दिले. लाटकर म्हणाले, 'पिरजादे आणि चव्हाण यांना पक्षाने महत्त्वाची पदे, स्थायी समितीत स्थान दिले. यामुळे त्यांची पक्षाकडून अन्याय झाल्याची ओरड निरर्थक आहे. दोघांनाही सहा, सहा महिने स्थायी सभापतिपदी संधी देण्याची ग्वाही नेत्यांनी दिली होती. पैशासाठी त्यांनी गैरकृत्य केले आहे. भाजपचे आमदार महापालिकेत येतात याचा अर्थ घोडेबाजार झाला हे स्पष्ट आहे. देशमुख म्हणाले, नगरसेवक होण्याची पात्रता नसणाऱ्यांना पक्षामुळे सत्ता मिळाली होती. अजिंक्य चव्हाण यांना तर शिक्षण मंडळाच्या बैठका घ्या, अशी सूचना करावी लागत होती. पैशासाठी विकल्या जाणाऱ्या नगरसेवकांना नेते मंडळी व पक्षावर बोलण्याचा नैतिक अधिकार नाही.
नेत्यांच्या मर्जीतील नगरसेवकांना पदे
काँग्रेस, राष्ट्रवादी काँग्रेस आघाडीत सामान्य नगरसेवकांना स्थान नाही. ठराविक नगरसेवकांची मक्तेदारी आणि नेत्यांच्या मर्जीतील नगरसेवकांना पदे दिली जातात. मेघा पाटील या सभापतिपदासाठी सक्षम उमेदवार नव्हत्या. त्यांना सभापती म्हणजे केवळ शोभेच्या बाहुलीचे पद ठरले असते. भाजपकडून योग्य उमेदवार मिळाल्याने शहर विकासाला चालना मिळेल या अपेक्षेने पाठिंबा दिला. बंडखोरीसाठी कसलाही व्यवहार झाला नाही, असे नगरसेवक अजिंक्य चव्हाण व अफजल पिरजादे यांनी सांगितले. भाजपाने शहर विकासाची भूमिका घेऊन कामकाज केले तर भविष्यात भाजपसोबत जाऊ. सभेत इतर नगरसेवकांनी सांगून भाजपाला मतदान केले असेही दोघांनी स्पष्ट केले.
पिरजादे म्हणाले,'आम्हाला पक्षाकडून व्हीप लागू झाला नव्हता. ए. वाय. पाटील हे पक्षाचे जिल्हाध्यक्ष आहेत, त्यांच्या पत्नी बँकेत संचालक आहेत. ते स्वत: बिद्री कारखान्यात संचालक आहेत. एकाच घरात किती पदे द्यायची? राष्ट्रवादीत अन्य कार्यकर्ते नाहीत का? स्वत:चे हित साधणाऱ्या नेते मंडळीच्या विरोधातील हे बंड आहे.
अजिंक्य चव्हाण म्हणाले, 'सभापतिपदासाठी माझ्यासह, पिरजादे, उपमहापौर सुनील पाटील, संदीप कवाळे इच्छुक होते. साऱ्यांना विश्वासात घेऊन सभापतिपदाचा निर्णय आवश्यक होता. मात्र मर्जीतील नगरसेवकांसाठी पदाची खांडोळी केली. एकाने अर्थसंकल्प सादर करायचा, दुसऱ्याने काय करायचा. १४ महिन्याच्या आत चौघांना कशी संधी देणार.
आर्थिक देवाणघेवाण नाही
स्थायीच्या निवडणुकीत कसल्याही प्रकारची आर्थिक देवाणघेवाण झाली नाही. सत्ताधारी आघाडीतील नाराजी आणि भाजप शहराचा विकास साधेल ही खात्री पटल्याने राष्ट्रवादीच्या नगरसेवकांनी भाजपला पाठिंबा दिला, हा सकारात्मक राजकारणाचा विजय आहे, असे आमदार अमल महाडिक यांनी स्पष्ट केले. भाजप हा सकारात्मक राजकारण करणारा पक्ष असून ज्यांना कुणी नाही त्यांना सोबत घेऊ असे सांगत त्या दोघा नगरसेवकांना भविष्यात भाजपात सामावून घेण्याचे संकेतही त्यांनी दिले. सामान्य लोकांना केंद्रस्थानी ठेवून काम सुरू आहे. गेल्या तीन वर्षात जिल्हा आणि शहरासाठी कोट्यवधी रुपयांच्या योजना राबविल्या. कोल्हापूर शहराचा स्मार्ट सिटीत समावेश झाला नाही, पण शहर स्मार्ट बनविण्याच्या योजना आखू. पालकमंत्री चंद्रकांत पाटील यांच्या मार्गदर्शनाखाली विविध योजनांची प्रभावी अंमलबजावणी केली जाईल.
गटनेते सत्यजित कदम व विजय सूर्यवंशी म्हणाले, 'महापालिकेत गेल्या अडीच वर्षात सत्ताधारी काँग्रेस पक्षांनी विकासाची कुठलीच कामे केली नाहीत. सत्ताधाऱ्यांच्या कामकाजाने नगरसेवक त्रस्त आहेत. शहर विकासासाठी राष्ट्रवादीच्या नेत्यांनी भाजप सोबत येण्याचा निर्णय घेतला आहे. हा कोल्हापूरच्या विकासाचा विजय आहे.स्थायीमध्ये सत्ता आल्याने शहराशी निगडीत प्रकल्पांना चालना मिळेल. सत्ताधारी काँग्रेस आघाडीत काही जणांचा कारभार हुकूमशाही पद्धतीने सुरू आहे.
मुख्यमंत्र्यांनी केले अभिनंदन
स्थायी समिती सभापतिपदी भाजपाचे आशिष ढवळे यांची निवड झाल्यानंतर मुख्यमंत्री देवेंद्र फडणवीस यांनी फोन करून अभिनंदन केले. शहर विकासासाठी पूर्ण सहकार्य करण्याची ग्वाही मुख्यमंत्र्यांनी दिल्याचे ढवळे यांनी सांगितले. केंद्रात आणि राज्यात भाजपाची सत्ता आहे. तर महापालिकेत काँग्रेस, राष्ट्रवादी सत्तास्थानी आहे. यामुळे विकास कामे, नावीन्यपूर्ण योजनेत अडथळे निर्माण होत होते. शहर विकासाला खीळ बसली होती. भाजपाचा सभापती झाल्यामुळे शहर विकासाला गती येईल असेही ढवळे म्हणाले.
राष्ट्रवादीची वाद्ये भाजपाच्या मिरवणुकीत
राष्ट्रवादीच्या उमेदवार मेघा पाटील या विजयी होणार या अपेक्षेने कार्यकर्त्यांनी मिरवणुकीची जय्यत तयारी केली. गुलालाची पोती, फटाके आणि वाद्ये आणली होती. मात्र उमेदवारी न मिळालेल्या नाराज नगरसेवक चव्हाण व पिरजादे यांनी पक्षाविरोधात बंड पुकारत भाजपला मतदान केले. यामुळे राष्ट्रवादीची तयारी व्यर्थ गेली. भाजप कार्यकर्त्यांनी राष्ट्रवादीने आणलेल्या वाद्यांचा वापर करत जल्लोषी मिरवणूक काढली.
मोबाइल अॅप डाउनलोड करा आणि राहा अपडेट
