Maharashtra Times

कोल्हापूर टाइम्स टीम

स्त्री पुरुष लिंगभेद, पुरुषत्वाबाबतच्या चुकीच्या कल्पना, समलिंगी व्यक्ती व त्यांचे जीवन, तृतीयपंथीयांचे जीवन अशा विविध पैलूंवर जाणीवजागृती करणारा 'समभाव चित्रपट महोत्सव' आयोजित करण्यात आला आहे. सहा फेब्रुवारीपासून महोत्सवाला प्रारंभ होणार असून त्यामध्ये १३ माहितीपट व चित्रपट दाखवण्यात येणार आहेत.

कलामहर्षि बाबुराव पेंटर फिल्म सोसायटी, महिला दक्षता समिती, मावा आणि न्यू एज्युकेशन सोसायटी यांच्या संयुक्त विद्यमाने आयोजित केलेला महोत्सव आठ फेब्रुवारीपर्यंत आहे. या महोत्सवाला कोणतेही शुल्क नाही,पण नोंदणी आवश्यक आहे. पेटाळा येथील राम गणेश गडकरी सभागृहात सकाळी दहा ते सायंकाळी पाच वाजेपर्यंत हा महोत्सव असेल.

स्त्री पुरुष समानतेसाठी 'मेन अगेन्स्ट व्हायोलन्स अँड अॅब्यूज' ही संस्था २५ वषार्पासून काम करत आहे. या संस्थेच्या माध्यमातून यापूर्वी दिल्ली, बंगळुरु,त्रिचूर, कोलकत्ता, जळगाव अशा ठिकाणी दोन दिवसांचा समभाव चित्रपट महोत्सव आयोजित केला आहे. याबाबतची माहिती देताना फिल्म सोसायटीचे चंद्रकांत जोशी म्हणाले की, लिंगभेद, पौरुषत्वाबद्दलच्या चुकीच्या कल्पना, लैंगिक विविधता याबाबतची जाणीव जागृती करण्यासाठी हा महोत्सव आयोजित केला आहे. कॉलेजचे विद्यार्थी, सामाजिक कार्यकर्ते, तरुण सिनेनिर्माते यांचा सहभाग अपेक्षित आहे. ज्या विषयावर आपण समाजात मोकळेपणाने चर्चा करत नाही, अशा विषयांवर चित्रपट पाहिल्यानंतर चर्चा केली जाणार आहे. यात 'मावा'चे संचालक हरीश सदानी, रोशन कोकणे, पुण्यातून अमोल काळे, सुरज पोवार सहभागी होणार आहेत. तसेच स्थानिक तज्ज्ञ व कार्यकर्तेही सहभागी होणार आहेत.

चित्रपटांबाबतची माहिती देताना दिलीप बापट यांनी सांगितले की, यामध्ये १३ चित्रपट व माहितीपट आहेत. त्यामध्ये मर्दिस्तान, बॉइज कॅन बी बॉइज, सुंदर, दारवठा, खेलबदल, मज्मा, ब्रोकन इमेज अशा चित्रपटांचा समावेश असेल. सहा फेब्रुवारी रोजी सायंकाळी सहा वाजता महोत्सवाचे उद्घाटन होणार आहे. महिला दक्षता समितीच्या तनुजा शिपूरकर व अनुराधा मेहता यांनी स्त्री पुरुष म्हणून जगण्याची पारंपारिक चौकट मोडून जगणाऱ्या माणसांना सन्मानाने व सुरक्षित जगता यावे यासाठी हा महोत्सव जागृती करेल, असा विश्वास व्यक्त केला.

Latest Images