सोलापूर एसटी बसस्थानकात उभ्या असलेल्या एसटीमधून बँकेत भरणा करण्यासाठी घेऊन चाललेल्या १४ लाख ७६ हजार ११६ रुपयांची रोख रक्कम असलेली पेटी अज्ञात चोरट्यांनी लंपास केली. ही रक्कम एसटीचीच होती. दिवसाढवळ्या घडलेल्या या प्रकारामुळे एकच खळबळ उडाली आहे.
एसटी बसस्थानकात दुसऱ्या मजल्यावर कॅशियर रूम आहे. शनिवारी सकाळी दहा वाजेपर्यंत जमा झालेली १४ लाख ७६ हजार ११६ रुपयांची रक्कम पेटीमध्ये घेऊन कॅशियर विवेक भास्कर देशपांडे जिन्यावरून खाली उतरले आणि त्यांनी बसस्थानकात उभ्या असलेल्या एम एच ४० एन ९५००, या रिकाम्या बसमध्ये पैशाची पेटी ठेऊन ते बसस्थानकात एंट्री करायला गेलेल्या गाडीचे चालक अजमोद्दीन तालिकोटी याची वाट पाहत उभे होते. ही रक्कम देशपांडे बाळीवेस येथील स्टेट बँकेत जमा करण्यासाठी निघाले होते. त्याचवेळी अज्ञात चोरट्यांनी कॅशियर देशपांडे यांची नजर चुकवून ड्रायव्हरच्या केबिनमधून १४ लाख ७६ हजार ११६ रुपयांची रक्कम असलेली पेटी घेऊन पोबारा केला.
दरम्यान, एसटीमध्ये पैश्याची पेटी नसल्याचे लक्षात येताच देशपांडे यांनी धावपळ सुरू केली. मात्र, चोरटा कोठेही दिसून आला नाही. तातडीने आगार व्यवस्थापकांनी ही घटना फौजदार चावडीचे वरिष्ठ पोलिस निरीक्षक संजय जगताप यांना सांगितली. पोलिस उपायुक्त पौर्णिमा चौगुले आणि उपायुक्त अपर्णा गीते घटनास्थळावर दाखल झाले. एसटीचे चालक तालिकोटी आणि कॅशियर देशपांडे यांच्याकडून घटनेची माहिती घेऊन पोलिसांची पथके रवाना झाली आहेत.
कुर्डुवाडी-बार्शी रस्त्यावर
दरोडेखोरांनी प्रवाशांना लुटले
सोलापूर -हातामध्ये धारधार शस्त्रे घेऊन आलेल्या दरोडेखोरांच्या टोळीने कुर्डुवाडी-बार्शी रस्त्यावर शनिवारी मध्यरात्रीच्या सुमारास दहशत निर्माण करून वाहनातून लाखो रुपयांची रोकड आणि सोन्याचे दागिने लुटून नेले. वाहनातील प्रवाशांना मारहाण करून लुटल्याने या मार्गावरून प्रवास करणाऱ्या वाहनधारकांमध्ये भीतीचे वातावरण पसरले आहे.
कुर्डुवाडी-बार्शी रस्त्यावर रात्रीच्या सुमारास दरोडेखोरांची ही टोळी हातात शस्त्रे घेऊन थांबली होती. रात्री बारानंतर टोळीने वाहने अडवून, प्रवाशांना मारहाण करून रोख रक्कम, दागिने, मोबाइल हिसकावून घेतले. दरोडेखोरांनी मारहाण करताना लहान मुलांनाही सोडले नाही. यामध्ये अनेक प्रवाशी जखमी झाले आहेत. स्कार्पिओ, इनोव्हा, अल्टो या वाहनांबरोबरच दोन लक्झरी बसेसची या दरोडेखोरांनी अडवून लुटल्या असल्याचे पोलिसांनी सांगितले. जखमी प्रवाशांनी कुर्डुवाडी पोलिस ठाणे गाठले आणि फिर्याद दाखल केली.
कुर्डुवाडी-बार्शी रस्त्यावर रिधोरे गावानजीक आरडा पूल आहे. या पुलावर गतिरोधक असून, येथे वाहनांचा वेग कमी होतो. याची संधी साधत दरोडेखोरांनी लूटमार केली. या घटनेबाबत प्रवाशांनी फिर्यादी दिल्या आहेत. पोलिस निरीक्षक आय. डी. ओमासे तपास करीत आहेत.
मोबाइल अॅप डाउनलोड करा आणि राहा अपडेट
